IL-KUMMISSJONI EWROPEA
Brussell, 27.10.2023
COM(2023) 687 final
2023/0388(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-ħames sessjoni tal-Kumitat ad hoc għall-Affarijiet Legali u l-Kooperazzjoni Internazzjonali tal-OTIF
(Test b’rilevanza għaż-ŻEE)
MEMORANDUM TA’ SPJEGAZZJONI
1.Suġġett tal-proposta
Din il-proposta tikkonċerna d-deċiżjoni li tistabbilixxi l-pożizzjoni li għandha tittieħed f’isem l-Unjoni fil-ħames sessjoni tal-Kumitat ad hoc għall-Affarijiet Legali u l-Kooperazzjoni Internazzjonali (“il-Kumitat”) tal-Organizzazzjoni Intergovernattiva għat-Trasport Internazzjonali bil-Ferrovija (OTIF), b’rabta mal-adozzjoni ta’ opinjoni legali konsultattiva dwar l-interpretazzjoni tar-regoli tal-OTIF fir-rigward tal-faċilitajiet ta’ servizz, u tad-deċiżjonijiet li jikkonċernaw id-diġitalizzazzjoni tad-dokumenti tat-trasport internazzjonali tal-merkanzija bil-ferrovija, l-iżvilupp ta’ strateġija fit-tul għall-OTIF, is-sospensjoni u t-terminazzjoni tal-COTIF u/jew is-sħubija fl-OTIF fir-rigward ta’ Stat Membru partikolari tal-OTIF, l-użu ta’ firem elettroniċi fil-komunikazzjonijiet uffiċjali bejn l-OTIF u l-membri tagħha, il-protezzjoni legali tal-isem, l-abbrevjazzjonijiet, il-logo u x-xogħlijiet tal-OTIF, u l-kjarifika tat-terminu “espert” għall-fini tal-involviment tal-partijiet ikkonċernati fl-attivitajiet tal-Kumitat.
2.Kuntest tal-proposta
2.1.Il-Konvenzjoni li tirrigwarda t-Trasport Internazzjonali bil-Ferrovija
Il-Konvenzjoni li tirrigwarda t-Trasport Internazzjonali bil-Ferrovija (COTIF) tirregola l-funzjonament tal-OTIF u l-attivitajiet tagħha inġenerali. Hemm 51 pajjiż li huma partijiet għall-COTIF, inkluż 25 Stat Membru tal-Unjoni Ewropea (kollha minbarra Ċipru u Malta). Mill-1 ta’ Lulju 2011, l-Unjoni Ewropea (UE) hija wkoll parti kontraenti għall-COTIF.
Il-COTIF tikkonsisti mill-Konvenzjoni prinċipali u seba’ Appendiċijiet li jiffurmaw parti integrali mill-Konvenzjoni u li jistabbilixxu Regoli Uniformi (RU) għat-trasport internazzjonali tal-passiġġieri u tal-oġġetti bil-ferrovija (Appendiċi A: Kuntratt tat-Trasport Internazzjonali tal-Passiġġieri bil-Ferrovija – CIV; Appendiċi B: Kuntratt tat-Trasport Internazzjonali tal-Oġġetti bil-Ferrovija – CIM; Appendiċi C: Trasport Internazzjonali ta’ Oġġetti Perikolużi bil-Ferrovija – RID; Appendiċi D: Kuntratt tal-użu tal-vetturi fit-traffiku ferrovjarju internazzjonali – CUV; Appendiċi E: Kuntratt tal-użu tal-infrastruttura fit-traffiku ferrovjarju internazzjonali – CUI; Appendiċi F: Validazzjoni ta’ Standards Tekniċi u l-Adozzjoni ta’ Preskrizzjonijiet Tekniċi Uniformi applikabbli għall-Materjal Ferrovjarju li jkun maħsub li jintuża fit-Traffiku Internazzjonali – APTU; Appendiċi G: Ammissjoni Teknika tal-Materjal Ferrovjarju li jintuża fit-Traffiku Internazzjonali – ATMF).
2.2.Il-ftehim bejn l-Unjoni Ewropea u l-Organizzazzjoni Intergovernattiva għat-Trasport Internazzjonali bil-Ferrovija
Fis-16 ta’ Ġunju 2011, il-Kunsill adotta d-Deċiżjoni tal-Kunsill 2013/103/UE dwar l-iffirmar u l-konklużjoni tal-Ftehim bejn l-Unjoni Ewropea u l-Organizzazzjoni Intergovernattiva għat-Trasport Internazzjonali bil-Ferrovija (OTIF) dwar l-Adeżjoni tal-Unjoni Ewropea mal-Konvenzjoni li tirrigwarda t-Trasport Internazzjonali bil-Ferrovija (COTIF) tad-9 ta’ Mejju 1980, kif emendata mill-Protokoll ta’ Vilnius tat-3 ta’ Ġunju 1999 1 . Il-Ftehim daħal fis-seħħ fl-1 ta’ Lulju 2011. Id-Deċiżjoni tal-Kunsill 2013/103/UE fiha Dikjarazzjoni mill-Unjoni li tikkonċerna l-eżerċizzju ta’ kompetenza (l-Anness I) u l-arranġamenti interni għall-Kunsill, għall-Istati Membri u għall-Kummissjoni fi proċedimenti skont l-OTIF (l-Anness III).
2.3.Il-Kumitat ad hoc għall-Affarijiet Legali u l-Kooperazzjoni Internazzjonali
Il-Kumitat ad hoc għall-Affarijiet Legali u l-Kooperazzjoni Internazzjonali tal-OTIF (“il-Kumitat”) ġie stabbilit mill-15-il Assemblea Ġenerali tal-OTIF f’Settembru 2021, u l-ewwel sessjoni tiegħu saret f’Novembru 2021.
Il-mandat tiegħu huwa stabbilit fl-Artikolu 2 tar-Regoli ta’ Proċedura tiegħu: a) li jħejji abbozzi ta’ emendi jew supplimenti għall-Konvenzjoni; b) li jipprovdi parir legali fuq inizjattiva tiegħu stess jew fuq talba tal-organi msemmija fl-Artikolu 13 §§ 1 u 2 tal-Konvenzjoni jew fuq talba tal-organi stabbiliti minnhom; c) li jippromwovi u li jiffaċilita l-funzjonament u l-implimentazzjoni tal-Konvenzjoni; d) li jimmonitorja u li jivvaluta l-istrumenti legali; e) li jieħu deċiżjonijiet dwar il-kooperazzjoni ma’ organizzazzjonijiet u assoċjazzjonijiet internazzjonali oħra, inkluż l-istabbiliment u x-xoljiment ta’ gruppi ta’ kuntatt konsultattivi ma’ organizzazzjonijiet u assoċjazzjonijiet internazzjonali oħra u l-monitoraġġ tal-funzjonament tal-gruppi ta’ kuntatt.
Kull meta jkun applikabbli, il-Kumitat għandu jippreżenta l-konklużjonijiet u l-proposti tiegħu lill-organi kompetenti msemmija fl-Artikolu 13 § 1 tal-COTIF għal kunsiderazzjoni jew għal deċiżjoni.
Il-programm ta’ ħidma tal-Kumitat ġie aġġornat l-aħħar f’April 2023 (LAW-23079-JUR 4).
2.4.L-atti previsti tal-Kumitat
Matul il-ħames sessjoni tiegħu, il-Kumitat huwa mistenni jadotta opinjoni legali konsultattiva u deċiżjonijiet rilevanti oħra, li jkollhom impatt fuq l-attivitajiet tal-OTIF.
–Punt 3. L-applikazzjoni tas-CUI UR għall-faċilitajiet tas-servizz: il-Kumitat jista’ jadotta opinjoni legali konsultattiva; għalkemm trid issir distinzjoni bejn il-kuntratti koperti mis-CUI UR u l-obbligi li l-partijiet għal dawk il-kuntratti għandhom jissodisfaw skont id-dritt tal-Unjoni, f’dan il-każ speċifiku, l-abbozz ta’ opinjoni jikkonċerna wkoll l-interazzjoni bejn ir-regoli tal-OTIF u l-leġiżlazzjoni tal-Unjoni dwar il-kwistjoni tad-definizzjoni tal-infrastruttura ferrovjarja (regolata skont id-Direttiva 2012/34/UE tal-Parlament Ewropew u tal-Kunsill li tistabbilixxi żona ferrovjarja unika Ewropea 2 ); fil-fatt, l-opinjoni tirreferi b’mod estensiv għad-Direttiva 2012/34/UE sabiex tiġi stabbilita l-interpretazzjoni tal-applikazzjoni tas-CUI UR għall-faċilitajiet ta’ servizz u tirreferi speċifikament għall-ħtieġa li tiġi interpretata l-liġi pubblika applikata fil-membri tal-OTIF fil-punt 3 tal-konklużjonijiet tagħha, għaldaqstant, l-opinjoni konsultattiva tista’ tinfluwenza b’mod deċiżiv il-kontenut tal-leġiżlazzjoni tal-UE.
–Punt 4. Id-diġitalizzazzjoni tat-trasport internazzjonali, b’mod partikolari d-dokumenti tat-trasport tal-merkanzija: il-Kumitat jista’ jiddeċiedi li jagħti struzzjonijiet lis-Segretarjat tal-OTIF biex iħejji proposta għall-modifika tal-COTIF bil-ħsieb li tiġi ffaċilitata l-adozzjoni tan-nota ta’ konsenja ferrovjarja elettronika; dan is-suġġett, l-iskambju elettroniku ta’ informazzjoni relatata mat-trasport internazzjonali tal-merkanzija bil-ferrovija, huwa rregolat fil-livell tal-UE mir-Regolament (UE) 2020/1056 tal-Parlament Ewropew u tal-Kunsill tal-15 ta’ Lulju 2020 dwar l-informazzjoni elettronika dwar it-trasport tal-merkanzija; Il-premessa 6 tipprevedi fost l-oħrajn li “(...) L-obbligu għall-awtoritajiet kompetenti li jaċċettaw informazzjoni magħmula disponibbli elettronikament minn operaturi ekonomiċi jenħtieġ li japplika wkoll kull meta dispożizzjonijiet ta’ atti legali tal-Unjoni jew liġi nazzjonali li jaqgħu fil-kamp ta’ applikazzjoni ta’ dan ir-Regolament jeħtieġu informazzjoni li hija msemmija wkoll f’konvenzjonijiet internazzjonali rilevanti bħall-konvenzjonijiet li jirregolaw il-kuntratti internazzjonali ta’ trasport fil-modi differenti ta’ trasport, pereżempju (...) il-Konvenzjoni li tirrigwarda t-Trasport Internazzjonali bil-Ferrovija (COTIF)”; għaldaqstant, l-emenda għall-COTIF li l-Kumitat jista’ jiddeċiedi li jagħti struzzjonijiet lis-Segretarjat tal-OTIF biex iħejji se tkun vinkolanti skont id-dritt internazzjonali u se tkun tista’ tinfluwenza b’mod deċiżiv il-kontenut tal-leġiżlazzjoni tal-UE.
–Punt 6. L-iżvilupp ta’ strateġija fit-tul għall-OTIF: abbażi tad-deċiżjoni tal-15-il Assemblea Ġenerali, u f’konformità mal-programm ta’ ħidma tiegħu, il-Kumitat se jkompli jassisti lis-Segretarju Ġenerali tal-OTIF fit-tħejjija ta’ strateġija fit-tul għall-OTIF; f’din is-sessjoni, se jikkunsidra verżjoni riveduta tal-istrateġija u se jagħti parir lis-Segretarju Ġenerali dwar modifiki jew titjib possibbli; l-UE hija parti kontraenti għall-COTIF u membru tal-OTIF, l-istrateġija fit-tul tal-OTIF tikkonċerna l-ispettru sħiħ tal-attivitajiet tal-OTIF, inkluż l-istrumenti legali u l-oqsma ta’ politika li għalihom l-UE hija esklużivament kompetenti (eż. is-sikurezza ferrovjarja u l-istandards tekniċi, it-trasport ta’ oġġetti perikolużi); barra minn hekk, l-istrateġija fit-tul, jekk tiġi adottata mill-Assemblea Ġenerali fis-sessjoni ordinarja tagħha li jmiss, se jkollha influwenza deċiżiva fuq il-kontenut tal-programm ta’ ħidma tal-OTIF u potenzjalment fuq diversi aspetti tal-COTIF, li l-UE hija Parti Kontraenti għaliha.
–Punt 7. Sospensjoni u terminazzjoni tal-COTIF u/jew sħubija tal-OTIF fir-rigward ta’ Stat Membru partikolari: il-Kumitat se jikkunsidra l-opportunità li jagħti struzzjonijiet lis-Segretarjat tal-OTIF biex iħejji proposta biex tiġi emendata l-COTIF; is-suġġett jikkonċerna l-organizzazzjoni u l-funzjonament tal-organizzazzjoni, li l-UE hija Parti Kontraenti għaliha, u jista’ jwassal għall-elaborazzjoni ta’ proposti biex tiġi emendata l-COTIF; din il-kwistjoni topika tikkonċerna l-ambitu kollu tal-attivitajiet tal-OTIF, inkluż l-oqsma li għalihom l-UE hija esklużivament kompetenti; għaldaqstant, l-emenda għall-COTIF li l-Kumitat jista’ jiddeċiedi li jagħti struzzjonijiet lis-Segretarjat tal-OTIF biex iħejji se tkun vinkolanti skont id-dritt internazzjonali u se tkun tista’ tinfluwenza b’mod deċiżiv il-kontenut tal-leġiżlazzjoni tal-UE.
–Punt 8. L-użu ta’ firem elettroniċi fil-komunikazzjonijiet uffiċjali bejn l-OTIF u l-membri tagħha: il-Kumitat jista’ jiddeċiedi dwar struzzjonijiet ġenerali għas-Segretarjat biex iħejji rakkomandazzjoni dwar l-użu ta’ firem elettroniċi fil-komunikazzjonijiet uffiċjali bejn l-OTIF u l-membri tiegħu; dan il-qasam huwa rregolat fil-livell tal-UE mir-Regolament (UE) Nru 910/2014 dwar l-identifikazzjoni elettronika u s-servizzi fiduċjarji għal tranżazzjonijiet elettroniċi fis-suq intern; għaldaqstant, ir-rakkomandazzjoni li l-Kumitat jista’ jiddeċiedi li jagħti struzzjonijiet lis-Segretarjat tal-OTIF biex iħejji se tkun kapaċi tinfluwenza b’mod deċiżiv il-kontenut tal-leġiżlazzjoni tal-UE.
–Punt 9. Il-protezzjoni legali tal-isem, l-abbrevjazzjoni, il-logo u x-xogħlijiet tal-OTIF: il-Kumitat se jeżamina r-rekwiżiti legali u jista’ jiddeċiedi dwar azzjonijiet possibbli biex tissaħħaħ il-protezzjoni legali tal-isem, l-abbrevjazzjoni, il-logo u x-xogħlijiet tal-OTIF; il-kwistjoni tal-użu mill-ġdid ta’ informazzjoni tas-settur pubbliku bid-Direttiva (UE) 2019/1024 tal-Parlament Ewropew u tal-Kunsill tal-20 ta’ Ġunju 2019 dwar id-data miftuħa u l-użu mill-ġdid tal-informazzjoni tas-settur pubbliku 3 u bid-Deċiżjoni tal-Kummissjoni tat-12 ta’ Diċembru 2011 dwar l-użu mill-ġdid ta’ dokumenti tal-Kummissjoni (2011/833/UE) 4 ; għaldaqstant, id-deċiżjonijiet li għandhom jittieħdu mill-Kumitat f’dan il-qasam huma kapaċi jinfluwenzaw b’mod deċiżiv il-kontenut tal-leġiżlazzjoni tal-UE.
–Punt 10. L-involviment ta’ partijiet ikkonċernati rreġistrati fil-Kumitat ad hoc għall-Affarijiet Legali u l-Kooperazzjoni Internazzjonali: il-Kumitat jista’ jiddeċiedi li jagħmel kjarifika tat-terminu “espert” għall-fini tal-involviment tal-partijiet ikkonċernati fl-attivitajiet tagħha; l-objettiv hu li jippermetti l-parteċipazzjoni ta’ esperti bħala rappreżentanti ta’ persuni ġuridiċi attivi fis-settur ferrovjarju internazzjonali, bħat-trasportaturi u l-maniġers tal-infrastruttura; id-deċiżjoni dwar l-interpretazzjoni tat-terminu “espert” fil-kuntest tar-“Rakkomandazzjoni dwar l-involviment tal-partijiet ikkonċernati fil-ħidma tal-OTIF” se jkollha effetti legali peress li se tinfluwenza t-teħid tad-deċiżjonijiet fi ħdan il-COTIF li l-UE hija parti kontraenti għaliha.
2.5.Il-kompetenza u d-drittijiet tal-vot tal-Unjoni
Skont l-Artikolu 6 tal-Ftehim bejn l-Unjoni Ewropea u l-Organizzazzjoni Intergovernattiva għat-Trasport Internazzjonali bil-Ferrovija dwar l-Adeżjoni tal-Unjoni Ewropea mal-COTIF approvat bid-Deċiżjoni tal-Kunsill tas-16 ta’ Ġunju 2011:
“1. Għal deċiżjonijiet fi kwistjonijiet fejn l-Unjoni għandha kompetenza esklużiva, l-Unjoni għandha teżerċita d-drittijiet tal-vot tal-Istati Membri tagħha skont il-Konvenzjoni.
2. Għal deċiżjonijiet fi kwistjonijiet fejn l-Unjoni taqsam il-kompetenza mal-Istati Membri tagħha, għandhom jivvutaw l-Unjoni jew l-Istati Membri tagħha.
3. Soġġett għall-Artikolu 26, il-paragrafu 7, tal-Konvenzjoni, l-Unjoni għandu jkollha l-istess għadd ta’ voti daqs l-Istati Membri tagħha li huma wkoll Partijiet għall-Konvenzjoni. Meta l-Unjoni tivvota, l-Istati Membri tagħha ma għandhomx jivvutaw.”
Fir-rigward tad-deċiżjonijiet li għandhom jittieħdu mill-Kumitat fil-ħames sessjoni tiegħu kif spjegat fit-taqsima 2.4 ta’ hawn fuq, ġie vvalutat li l-punti kollha fl-aġenda jaqgħu kompletament jew parzjalment taħt il-kompetenza esklużiva tal-Unjoni.
L-atti msemmija hawn fuq li għandhom jiġu adottati mill-Kumitat jikkonċernaw oqsma speċifiċi li għalihom l-UE eżerċitat il-kompetenza tagħha u adottat regoli interni li jistgħu jiġu affettwati (il-punti 3, 4, 8, 9), jew fir-rigward ta’ kwistjonijiet trasversali jew amministrattivi awżiljarji għall-kwistjonijiet sostantivi rregolati mill-COTIF, li għalihom iċ-ċentru tal-gravità jaqa’ b’mod predominanti taħt il-kompetenza esklużiva tal-Unjoni (il-punti 6, 7, 10).
3.Il-pożizzjoni li għandha tittieħed f’isem l-Unjoni
Punt 3 fl-Aġenda – L-applikazzjoni tas-CUI UR għall-faċilitajiet tas-servizz
F’konformità mal-programm ta’ ħidma tiegħu, il-Kumitat jenħtieġ li jeżamina l-kwistjoni tal-applikazzjoni tar-Regoli Uniformi dwar il-Kuntratt tal-Użu tal-Infrastruttura fit-Traffiku Ferrovjarju Internazzjonali (CUI – l-Appendiċi E tal-Konvenzjoni, minn hawn ’il quddiem “CUI UR”) għall-faċilitajiet tas-servizz, u joħroġ opinjoni konsultattiva dwar il-kwistjoni.
Fir-raba’ sessjoni tiegħu, il-Kumitat kellu diskussjoni ġenerali dwar l-applikazzjoni tas-CUI UR għall-faċilitajiet tas-servizz abbażi ta’ dokument tal-bidu mħejji mis-Segretarjat tal-OTIF (LAW-23022-JUR 4/8). Wara din id-diskussjoni, il-Kumitat ta struzzjonijiet lis-Segretarjat biex iħejji abbozz ta’ opinjoni legali.
Fil-ħames sessjoni tiegħu, il-Kumitat se jikkunsidra l-abbozz ta’ opinjoni legali konsultattiva mħejji mis-Segretarjat (LAW-23109-JUR 5/3). Il-fini tiegħu huwa li jagħmel kjarifika tal-kamp ta’ applikazzjoni tas-CUI UR, b’mod partikolari jekk it-terminu “infrastruttura” jenħtieġx li jiġi interpretat bħala li jkopri faċilitajiet tas-servizz fiss skont it-tifsira tad-Direttiva 2012/34/UE tal-Parlament Ewropew u tal-Kunsill tal-21 ta’ Novembru 2012 li tistabbilixxi żona ferrovjarja unika Ewropea 5 , filwaqt li jitqies il-fatt li l-COTIF u, b’mod partikolari, is-CUI UR la jiddefinixxu u lanqas jirreferu għall-kunċett ta’ “faċilitajiet tas-servizz”.
L-Artikolu 3(a) tas-CUI UR jiddefinixxi l-infrastruttura ferrovjarja kif ġej:
“infrastruttura ferrovjarja” tfisser il-linji ferrovjarji u l-installazzjonijiet fissi kollha, sa fejn dawn huma meħtieġa għaċ-ċirkolazzjoni ta’ vetturi ferrovjarji u għas-sikurezza tat-traffiku.
Kif enfasizzat fid-dokument tal-bidu tas-Segretarjat, l-interpretazzjoni litterali tat-terminu tindika li dan ikopri kemm il-linji ferrovjarji kif ukoll l-installazzjonijiet fissi. It-tieni, biex jaqgħu taħt id-definizzjoni, l-oġġetti jridu jkunu meħtieġa għal żewġ finijiet kumulattivi: iċ-ċirkolazzjoni tal-vetturi ferrovjarji u s-sikurezza tat-traffiku.
Minn dak il-punt tat-tluq, u minn elementi analitiċi oħra rilevanti għas-suġġett, l-abbozz ta’ opinjoni legali mħejji mis-Segretarjat tal-OTIF jikkonkludi b’mod effettiv li:
–Ir-Regoli Uniformi dwar is-CUI japplikaw għal kwalunkwe kuntratt ta’ użu tal-infrastruttura ferrovjarja għall-finijiet tat-trasport internazzjonali skont it-tifsira tar-Regoli Uniformi dwar is-CIV (l-Appendiċi A tal-COTIF) u r-Regoli Uniformi dwar is-CIM (l-Appendiċi B tal-COTIF);
–Ir-Regoli Uniformi dwar is-CUI ma jaffettwawx il-liġi pubblika applikata fil-membri tal-OTIF li jikkonċerna l-infrastruttura ferrovjarja u l-aċċess għaliha u huma komplementari għal dik il-liġi;
–Jeħtieġ li tiġi żgurata interpretazzjoni armonizzata u komplementari tas-CUI UR u tal-liġi pubblika applikata fil-membri tal-OTIF sabiex jiġu evitati kunflitti bejn żewġ reġimi legali u biex tkun tista’ ssir l-applikazzjoni tas-CUI UR;
–Id-determinazzjoni ta’ x’jikkostitwixxi “infrastruttura ferrovjarja” għall-finijiet tar-Regoli Uniformi dwar is-CUI jenħtieġ li titwettaq f’żewġ stadji. L-ewwel nett, il-liġi pubblika applikata fil-membru tal-OTIF tiddetermina x’jikkostitwixxi infrastruttura ferrovjarja u x’inhuma l-kundizzjonijiet tal-aċċess għaliha. It-tieni, hija biss l-infrastruttura ferrovjarja kif iddefinita mil-liġi pubblika applikabbli ta’ membru tal-OTIF u li tissodisfa r-rekwiżiti tal-Artikolu 3(a) tas-CUI UR li tista’ tkun is-suġġett ta’ kuntratt tal-użu skont is-CUI UR.
Dawn il-konklużjonijiet huma kompletament kompatibbli u konsistenti mal-qafas legali tal-UE li jirregola d-drittijiet ta’ aċċess għan-netwerk ferrovjarju u l-forniment ta’ servizzi tat-trasport ferrovjarju kif stabbilit fid-Direttiva 2012/34/UE. Għalhekk, huwa propost li tiġi appoġġata l-adozzjoni tal-opinjoni legali konsultattiva fil-verżjoni attwali tagħha.
Punt 4 fl-Aġenda – Id-diġitalizzazzjoni tat-trasport internazzjonali, b’mod partikolari d-dokumenti tat-trasport tal-merkanzija
Fl-2022, is-Segretarjat tal-OTIF organizza stħarriġ dwar ir-regoli li jikkonċernaw id-dokumenti elettroniċi tat-trasport ferrovjarju. Wara li ddiskuta r-riżultati tal-istħarriġ fit-tielet sessjoni tiegħu, il-Kumitat ikkonkluda li ma kien hemm l-ebda ħtieġa immedjata li jiġu modifikati r-Regoli Uniformi dwar il-Kuntratt tat-Trasport Internazzjonali tal-Merkanzija bil-Ferrovija (l-Appendiċi B tal-COTIF, minn hawn ’il quddiem “CIM UR”) fir-rigward tad-dokumenti elettroniċi tat-trasport ferrovjarju u ta struzzjonijiet lis-Segretarjat biex jissottometti fis-sessjoni li jmiss tiegħu proposta għal azzjonijiet ta’ segwitu possibbli.
Fid-dokument tal-bidu mħejji mis-Segretarjat, ġie nnutat li l-każ tan-nota ta’ konsenja elettronika żviluppata b’mod konġunt mill-Kumitat għat-Trasport Internazzjonali bil-Ferrovija (CIT) u l-Organizzazzjoni għall-Kooperazzjoni tal-Ferroviji (OSJD) ma ġiex dokumentat. Din in-nota ta’ konsenja konġunta “OTIF-OSJD” diġà teżisti f’format elettroniku u hija amministrata, għall-parti tal-OTIF, mis-CIT. Hemm diversi dokumenti żviluppati f’dan il-qafas li jissupplimentaw b’mod effettiv id-dispożizzjonijiet ġenerali tal-COTIF dwar l-ekwivalenza funzjonali tan-nota ta’ konsenja elettronika.
Fir-raba’ sessjoni tiegħu, il-Kumitat ġie mistieden jiddeċiedi dwar azzjonijiet ta’ segwitu possibbli, jekk hemm. Madankollu, il-Kumitat ma kellux żmien biex jikkunsidra din il-kwistjoni u ddifferiha għall-ħames sessjoni. Il-pożizzjoni proposta tal-Unjoni hija għaldaqstant identika għal dik imħejjija għar-raba’ sessjoni tal-Kumitat kif stabbilit fid-dokument tal-Kunsill ST 7918/23, jiġifieri, li jitqies li d-dispożizzjonijiet eżistenti tas-CIM UR huma biżżejjed għat-trasport elettroniku u li s-Segretarjat jiġi mistieden iħejji għas-sessjoni li jmiss dokument informali analitiku dwar modifika possibbli għas-CIM UR bil-ħsieb li tiġi ffaċilitata l-adozzjoni tan-nota ta’ konsenja elettronika tas-CIM.
Punt 6 fl-Aġenda – L-iżvilupp ta’ strateġija fit-tul għall-OTIF
F’konformità mal-programm ta’ ħidma tiegħu, jenħtieġ li l-Kumitat “jassisti lis-Segretarju Ġenerali fit-tħejjija ta’ strateġija fit-tul ibbażata fuq id-deċiżjoni tal-Assemblea Ġenerali fil-15-il sessjoni tiegħu”. Fir-raba’ sessjoni tiegħu, il-Kumitat ta parir lis-Segretarju Ġenerali li l-istrateġija fit-tul tal-OTIF “jenħtieġ li tinkorpora elementi rilevanti tal-analiżi tal-isfond u jenħtieġ li tiġi ristrutturata f’abbozz ta’ dokument ta’ strateġija uniku li juri r-rabtiet bejn l-analiżi tal-kwistjonijiet u l-isfidi rilevanti u l-għanijiet strateġiċi”.
Il-Kumitat avża wkoll lis-Segretarju Ġenerali li l-istrateġija fit-tul tal-OTIF jenħtieġ li tkun strutturata skont l-elementi ewlenin li ġejjin:
–“Viżjoni: bħala forum internazzjonali, jenħtieġ li l-OTIF ikollha rwol ċentrali biex tagħmel it-trasport ferrovjarju s-sinsla ta’ sistema tat-trasport internazzjonali sostenibbli u bla xkiel.
–Missjoni: il-promozzjoni, it-titjib u l-iffaċilitar tat-traffiku internazzjonali bil-ferrovija fl-aspetti kollha (ara l-Artikolu 2 tal-COTIF).
–Objettivi strateġiċi: 1. L-iżgurar tal-applikazzjoni effettiva u uniformi tal-liġi tal-OTIF; 2. L-espansjoni tal-applikazzjoni tal-liġi tal-OTIF fuq l-iktar żona ġeografika wiesgħa possibbli; 3. L-iżgurar li l-liġi tal-OTIF tibqa’ rilevanti maż-żmien; 4. It-tisħiħ tar-rwol minn ta’ quddiem tal-OTIF fit-trasport ferrovjarju internazzjonali u l-kontribut biex jinstabu sinerġiji ma’ organizzazzjonijiet u assoċjazzjonijiet internazzjonali rilevanti oħra; 5. Il-kontribut għall-armonizzazzjoni u għall-unifikazzjoni tas-sistemi tal-liġi ferrovjarja internazzjonali”.
Fil-ħames sessjoni tiegħu, il-Kumitat se jkun mistenni jipprovdi iktar pariri u gwida lis-Segretarju Ġenerali abbażi ta’ verżjoni riveduta tal-abbozz tad-dokument ta’ strateġija, bl-objettiv li jinkiseb konsensus ġenerali dwar l-istruttura u s-sustanza tal-istrateġija fit-tul. Wara r-rieżami tal-abbozz rivedut tad-dokument ta’ strateġija, il-pożizzjoni tal-UE hi li tappoġġa l-verżjoni attwali mħejjija mis-Segretarju Ġenerali u li tissuġġerixxi ftit titjib possibbli kif spjegat fl-Anness tad-Deċiżjoni tal-Kunsill.
Punt 7 fl-Aġenda – Sospensjoni u terminazzjoni tal-COTIF u/jew sħubija tal-OTIF fir-rigward ta’ Stat Membru partikolari:
Fl-4 ta’ Awwissu 2022, il-Kumitat iddeċieda li jinkludi s-suġġett ta’ “sospensjoni u terminazzjoni tal-COTIF u/jew sħubija tal-OTIF fir-rigward ta’ Stat Membru partikolari” fil-programm ta’ ħidma tiegħu. L-objettiv u l-ambitu tax-xogħol ġew definiti kif ġej: “rieżami tal-OTIF u r-regoli tad-dritt internazzjonali u l-prattika rilevanti dwar is-sospensjoni u t-terminazzjoni tat-trattati u tas-sħubija (inkluż il-limitazzjoni ta’ xi drittijiet)”.
Fit-tielet sessjoni tiegħu, il-Kumitat ħa nota tad-dokument tal-bidu mħejji mis-Segretarjat, u ddeċieda li jaġġorna d-diskussjonijiet dwar din il-kwistjoni.
Fir-raba’ sessjoni tiegħu, il-Kumitat ġie mistieden ikompli d-diskussjonijiet u jikkunsidra, b’mod partikolari, il-mistoqsijiet li ġejjin:
–Jekk, bħala regola ġenerali, is-sanzjonijiet għall-ksur tar-regoli dwar l-OTIF jenħtiġux li jiġu imposti biss jekk ikun previst b’mod espliċitu mill-COTIF.
–Jekk il-COTIF jenħtieġx tistabbilixxi sanzjonijiet għal ksur tad-dritt internazzjonali inġenerali meta r-regoli tagħha stess ma jinkisrux. Jekk iva, liema ksur potenzjali jenħtieġ li jiġi inkluż?
–Jekk il-COTIF jenħtieġx li tistabbilixxi sanzjonijiet għal ksur għajr in-nuqqas ta’ ħlas tal-kontribuzzjonijiet. Jekk iva, liema ksur potenzjali jenħtieġ li jiġi inkluż?
–Liema organu tal-OTIF jenħtieġ li jkun responsabbli biex jiddeċiedi jekk inkisrux ir-regoli rilevanti? Liema organu tal-OTIF jenħtieġ li jiddeċiedi dwar l-applikazzjoni tas-sanzjonijiet, ir-restawr tad-drittijiet u r-riammissjoni tal-Istati Membri mkeċċija u b’liema maġġoranza?
–Iċ-ċirkostanzi li jipprekludu l-illegalità ta’ att jenħtieġ li jiġu inklużi espressament fil-COTIF?
–F’każ ta’ tkeċċija, ir-riammissjoni ta’ membri mkeċċija jenħtieġ li ssegwi l-istess proċedura bħal dik għall-ammissjoni ta’ membri ġodda jew il-proċedura jenħtieġ li tkun differenti? Jenħtieġ li jiġu imposti xi kundizzjonijiet speċifiċi?
Peress li dawn il-mistoqsijiet kien jeħtieġu analiżi ulterjuri, id-diskussjonijiet ġew aġġornati għall-ħames sessjoni tal-Kumitat. Matul id-diskussjonijiet fil-Grupp ta’ Ħidma tal-Kunsill dwar it-Trasport fuq l-Art, diversi Stati Membri talbu li tiġi diskussa din il-kwistjoni wara r-raba’ sessjoni tal-Kumitat, sabiex ikun hemm biżżejjed żmien għal diskussjonijiet u konsultazzjonijiet sinifikattivi bil-ħsieb li tintlaħaq pożizzjoni definita sew għall-ħames sessjoni tal-Kumitat. F’dan il-kuntest, is-servizzi tal-Kummissjoni ħejjew dokument informali komprensiv, li ġie ċċirkolat mis-Segretarjat Ġenerali tal-Kunsill fit-12 ta’ Lulju 2023 (referenza ST 11781/23) u ġie diskuss fil-Grupp ta’ Ħidma tal-Kunsill dwar it-Trasport fuq l-Art fl-4 u fit-18 ta’ Settembru 2023.
Abbażi tal-eżitu ta’ din id-diskussjoni informali, il-pożizzjoni proposta tal-Unjoni tiddependi fuq il-prinċipji ewlenin li ġejjin:
–Kwalunkwe sanzjoni għall-ksur tar-regoli dwar l-OTIF jenħtieġ li tiġi imposta biss jekk ikun previst b’mod espliċitu mill-COTIF.
–Jistgħu jiġu previsti emendi għall-COTIF biex jiġu definiti sanzjonijiet għall-ksur ta’ ċerti dispożizzjonijiet tal-COTIF għajr in-nuqqas ta’ ħlas tal-kontribuzzjonijiet finanzjarji għall-baġit, bħal fil-każ ta’ (1) ksur tar-regoli tal-OTIF li jikkawża disfunzjoni potenzjali jew reali tat-traffiku ferrovjarju internazzjonali rregolat mill-COTIF u/jew (2) ksur tar-regoli tal-OTIF li jfixklu serjament l-għan tal-OTIF li tippromwovi, tiffaċilita u ttejjeb it-traffiku ferrovjarju internazzjonali.
–L-opzjoni li jiġu stabbiliti sanzjonijiet skont il-COTIF għal ksur tad-dritt internazzjonali inġenerali tkun innovattiva u teħtieġ li tingħata attenzjoni, u ssir analiżi bir-reqqa, tal-implikazzjonijiet li tali deċiżjoni tista’ tinvolvi.
–Jenħtieġ li l-Assemblea Ġenerali tkun responsabbli formalment biex tiddeċiedi jekk inkisrux ir-regoli rilevanti tal-OTIF u biex tiddeċiedi dwar l-applikazzjoni tas-sanzjonijiet, ir-restawr tad-drittijiet u r-riammissjoni tal-Istati Membri mkeċċija.
–Iċ-ċirkostanzi li jipprekludu l-illegalità ta’ att jenħtieġ li jiġu inklużi espressament fil-COTIF u fformulati b’mod konsistenti mar-reġim tad-dritt internazzjonali tar-responsabbiltà tal-Istati għal atti illegali internazzjonalment.
–F’każ ta’ tkeċċija, ir-riammissjoni tal-membri mkeċċija jenħtieġ li titqies u tiġi aċċettata biss taħt kundizzjonijiet speċifiċi, u fi kwalunkwe każ biss jekk il-ksur tar-regoli tal-OTIF li wassal għas-sanzjoni jiġi kkoreġut b’mod effettiv.
Barra minn hekk, fid-dawl tas-sitwazzjoni ġeopolitika u r-rwol prominenti tal-OTIF fis-settur ferrovjarju fil-livell internazzjonali, l-Unjoni u l-Istati Membri tagħha se jissuġġerixxu li titqies l-inklużjoni possibbli fil-COTIF ta’ dispożizzjonijiet li jitolbu lill-membri jirrispettaw l-integrità fiżika u funzjonali tal-infrastruttura ferrovjarja ta’ membri oħra. Dan jista’ pereżempju jiddaħħal fl-Artikolu 5 tal-COTIF (Obbligi speċjali tal-Istati Membri). Il-ksur ta’ tali dispożizzjoni ġdida jista’ jkun sanzjonabbli.
Huwa propost li l-Kumitat jiddeċiedi li jagħti struzzjonijiet lis-Segretarjat tal-OTIF biex iħejji proposta għall-modifika tal-COTIF, filwaqt li jqis il-prinċipji gwida msemmija hawn fuq.
Punt 8 fl-Aġenda – L-użu ta’ firem elettroniċi fil-komunikazzjonijiet uffiċjali bejn l-OTIF u l-membri tagħha
F’konformità mal-programm ta’ ħidma tiegħu, il-Kumitat jenħtieġ li “jeżamina r-rekwiżiti legali għall-użu u l-aċċettazzjoni ta’ dokumenti ffirmati elettronikament (kredenzjali, ittri, approvazzjonijiet, riżervazzjonijiet, notifiki depożitarji, eċċ.) fil-komunikazzjonijiet uffiċjali bejn l-OTIF u l-membri tagħha.” Bħala riżultat tal-eżami ta’ hawn fuq, jenħtieġ li “joħroġ rakkomandazzjoni dwar l-użu u l-aċċettazzjoni ta’ firem elettroniċi fil-komunikazzjonijiet uffiċjali bejn l-OTIF u l-membri tagħha”.
Fil-ħames sessjoni tiegħu, il-Kumitat huwa mistieden jiddiskuti dan is-suġġett abbażi ta’ dokument tal-bidu mħejji mis-Segretarjat u jiddeċiedi dwar struzzjonijiet ġenerali għat-tħejjija tar-rakkomandazzjoni. Jenħtieġ li jiġi nnutat li din il-kwistjoni ġiet sottomessa għar-raba’ sessjoni tal-Kumitat ad hoc iżda ġiet posposta għall-ħames sessjoni.
Għalhekk, il-pożizzjoni proposta tal-Unjoni hija identika għal dik imħejjija għar-raba’ sessjoni tal-Kumitat kif stabbilit fid-dokument tal-Kunsill ST 7918/23, jiġifieri, li tappoġġa t-tħejjija ta’ rakkomandazzjoni, preferibbilment mis-Segretarjat tal-OTIF, għall-kunsiderazzjoni u l-adozzjoni possibbli fis-sessjoni li jmiss tal-Kumitat.
Fir-rigward tal-prinċipji ġenerali, jenħtieġ li jitqies il-livell differenti ta’ esperjenza tal-membri tal-OTIF, u għalhekk jidher xieraq li r-rakkomandazzjoni, fl-ewwel fażi, tkopri komunikazzjonijiet “sempliċi” biss, simili għal dawk koperti mill-Artikolu 3(10) tar-Regolament (UE) Nru 910/2014 6 . Skont dik id-dispożizzjoni, firma elettronika għal komunikazzjonijiet “sempliċi” tfisser data f’forma elettronika li tkun mehmuża jew assoċjata loġikament ma’ data oħra f’forma elettronika u li tintuża mill-firmatarju biex jiffirma.
Punt 9 fl-Aġenda – Il-protezzjoni legali tal-isem, l-abbrevjazzjoni, il-logo u x-xogħlijiet tal-OTIF
Fis-sessjoni preċedenti tiegħu, il-Kumitat aġġorna l-programm ta’ ħidma tiegħu billi żied il-punt li ġej: “il-protezzjoni legali tal-isem, l-abbrevjazzjoni, il-logo u x-xogħlijiet tal-OTIF”. Fil-ħames sessjoni, il-Kumitat se jikkunsidra dokument tal-bidu mħejji mis-Segretarjat tal-OTIF, li jinkludi informazzjoni ta’ sfond u analiżi dwar azzjonijiet possibbli biex tissaħħaħ il-protezzjoni legali tal-isem, l-abbrevjazzjoni, il-logo u x-xogħlijiet tal-OTIF u jista’ jiddeċiedi li jiżviluppa politika ta’ ġestjoni tad-dokumenti tal-proprjetà intellettwali għall-OTIF.
Il-kwistjoni tal-użu mill-ġdid tal-informazzjoni tas-settur pubbliku hija rregolata fil-livell tal-UE mid-Direttiva dwar id-Data Miftuħa (2019/1024) u mid-Deċiżjoni tal-Kummissjoni dwar l-użu mill-ġdid ta’ dokumenti tal-Kummissjoni (2011/833/UE). Id-Direttiva tistabbilixxi sett ta’ regoli minimi li jirregolaw l-użu mill-ġdid u l-arranġamenti prattiċi għall-iffaċilitar tal-użu mill-ġdid ta’ dokumenti miżmuma mill-korpi tas-settur pubbliku tal-Istati Membri u minn ċerti impriżi pubbliċi. Il-politika tal-Kummissjoni dwar l-użu mill-ġdid titwettaq fost l-oħrajn, bl-użu ta’ politiki ta’ aċċess miftuħ inkluż taħt Creative Commons (iżda mhux biss) u fejn ikun xieraq biss. Hemm diversi eċċezzjonijiet li jeskludu għalkollox mudelli ta’ liċenzjar ta’ aċċess miftuħ. Fir-rigward tad-dokumenti protetti bid-drittijiet tal-awtur, il-Kummissjoni hija marbuta li tagħmilhom disponibbli għall-użu mill-ġdid. L-OTIF hija s-sid tad-dokumenti tagħha u tista’ tasserixxi drittijiet ta’ sjieda bħad-drittijiet tal-awtur u kwalunkwe dritt ta’ proprjetà intellettwali rilevanti ieħor f’dawk id-dokumenti. Għalhekk huwa ssuġġerit li jiġi appoġġat l-iżvilupp ta’ politika interna għall-ġestjoni tad-dokumenti tal-proprjetà intellettwali għall-OTIF. Bħala prinċipju ġenerali, tali politika jenħtieġ li ma tmurx lil hinn mir-regoli li l-Kummissjoni hija marbuta li tapplika għad-dokumenti tagħha stess, jew ir-regoli stabbiliti fid-Direttiva (UE) 2019/1024.
Fir-rigward tal-protezzjoni tal-isem, tal-abbrevjazzjoni u tal-logo tal-OTIF skont l-Artikolu 6ter tal-Konvenzjoni ta’ Pariġi għall-Protezzjoni tal-Proprjetà Industrijali, l-UE hija kompetenti permezz tal-Ftehim tal-Organizzazzjoni Dinjija tal-Kummerċ dwar l-Aspetti tad-Drittijiet tal-Proprjetà Intellettwali Relatati mal-Kummerċ (TRIPS). Adottat ukoll leġiżlazzjoni f’dan il-qasam eż. ir-Regolament (UE) 2017/1001 tal-Parlament Ewropew u tal-Kunsill tal-14 ta’ Ġunju 2017 dwar it-trademark tal-Unjoni Ewropea 7 .
Punt 10 fl-Aġenda – L-involviment ta’ partijiet ikkonċernati rreġistrati fil-Kumitat ad hoc għall-Affarijiet Legali u l-Kooperazzjoni Internazzjonali:
Fit-tieni sessjoni tiegħu, il-Kumitat adotta “Rakkomandazzjoni dwar l-involviment tal-partijiet ikkonċernati fil-ħidma tal-OTIF”, (l-Anness OTIF-22002-JUR 2). Huwa ddeċieda wkoll li l-istatus ta’ “parti kkonċernata rreġistrata” jenħtieġ li jingħata permezz ta’ proċedura taċita bil-miktub u b’konsensus.
Għalkemm ir-rakkomandazzjoni ġiet implimentata b’suċċess, il-kategoriji ta’ esperti jeħtieġu xi kjarifika meta wieħed iqis l-irtirar ta’ espert wieħed u mistoqsijiet minn impriżi ferrovjarji interessati dwar il-possibbiltà li jinħatar espert biex jirrappreżenta l-interessi tagħhom.
Fil-ħames sessjoni tiegħu, il-Kumitat huwa mistenni jikkunsidra li jieħu deċiżjoni biex jagħmel kjarifika dwar it-terminu “espert” biex ifisser esperti fil-kapaċità professjonali indipendenti tagħhom u esperti bħala rappreżentanti ta’ persuni ġuridiċi attivi fis-settur ferrovjarju internazzjonali, bħat-trasportaturi u l-maniġers tal-infrastruttura. Qed jiġi propost li din il-proposta tiġi appoġġata għall-fini tal-involviment tal-partijiet ikkonċernati fl-attivitajiet tal-Kumitat.
4.Bażi legali
4.1.Bażi legali proċedurali
4.1.1.Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jipprevedi deċiżjonijiet li jistabbilixxu “l-pożizzjonijiet li għandhom jiġu adottati f’isem l-Unjoni f’sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim.”
Il-kunċett ta’ “atti li jkollhom effetti legali” jinkludi atti li jkollhom effetti legali bis-saħħa tar-regoli tad-dritt internazzjonali li jirregolaw is-sede inkwistjoni. Jinkludi wkoll strumenti li ma għandhomx effett vinkolanti skont id-dritt internazzjonali, iżda li “jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatura tal-Unjoni” 8 .
4.1.2.Applikabbiltà għall-każ preżenti
Il-Kumitat ad hoc għall-Affarijiet Legali u l-Kooperazzjoni Internazzjonali tal-OTIF huwa sede stabbilita bi ftehim, jiġifieri l-Konvenzjoni li tirrigwarda t-Trasport Internazzjonali bil-Ferrovija (COTIF), f’konformità mal-Artikolu 13 § 2 tagħha.
L-atti li l-Kumitat huwa mitlub jadotta jikkostitwixxu atti li għandhom effetti legali. L-atti previsti se jwasslu għall-adozzjoni ta’ atti li huma vinkolanti skont ir-regoli tad-dritt internazzjonali li jirregolaw is-sede inkwistjoni u li se jkunu kapaċi jinfluwenzaw b’mod deċiżiv il-kontenut tal-leġiżlazzjoni tal-UE, jiġifieri: id-Direttiva 2012/34/UE, ir-Regolament (UE) 2020/1056 u r-Regolament (UE) Nru 910/2014.
L-atti previsti la jissupplimentaw u lanqas jemendaw il-qafas istituzzjonali tal-ftehim.
Għalhekk, il-bażi legali proċedurali għad-deċiżjoni proposta hija l-Artikolu 218(9) tat-TFUE.
4.2.Bażi legali sostantiva
Il-bażi legali sostantiva għal deċiżjoni skont l-Artikolu 218(9) tat-TFUE tiddependi primarjament mill-objettiv u mill-kontenut tal-att previst li fir-rigward tiegħu tittieħed pożizzjoni f’isem l-Unjoni. Jekk l-att previst ikollu żewġ għanijiet jew żewġ komponenti, u jekk wieħed minn dawk l-għanijiet jew il-komponenti jkun jista’ jiġi identifikat bħala dak ewlieni, filwaqt li l-ieħor ikun sempliċement inċidentali, id-deċiżjoni skont l-Artikolu 218(9) tat-TFUE trid tkun ibbażata fuq bażi legali sostantiva waħda, jiġifieri dik meħtieġa mill-għan jew mill-komponent ewlieni jew predominanti.
L-għan u l-kontenut ewlenin tal-att previst jirrigwardaw it-“trasport ferrovjarju”. Għalhekk, il-bażi legali sostantiva għad-deċiżjoni proposta hija l-Artikolu 218(91) tat-TFUE.
4.3.Konklużjoni
Jenħtieġ li l-bażi legali tad-deċiżjoni proposta tkun l-Artikolu 91 tat-TFUE, flimkien mal-Artikolu 218(9) tat-TFUE.
2023/0388 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-ħames sessjoni tal-Kumitat ad hoc għall-Affarijiet Legali u l-Kooperazzjoni Internazzjonali tal-OTIF
(Test b’rilevanza għaż-ŻEE)
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 91, flimkien mal-Artikolu 218(9) tiegħu,
Wara li kkunsidra l-proposta tal-Kummissjoni Ewropea,
Billi:
(1)L-Unjoni aderiet mal-Konvenzjoni li tirrigwarda t-Trasport Internazzjonali bil-Ferrovija tad-9 ta’ Mejju 1980, kif emendata mill-Protokoll ta’ Vilnius tat-3 ta’ Ġunju 1999 (“COTIF”), f’konformità mad-Deċiżjoni tal-Kunsill 2013/103/UE 9 u mal-Ftehim bejn l-Unjoni Ewropea u l-Organizzazzjoni Intergovernattiva għat-Trasport Internazzjonali bil-Ferrovija (OTIF) dwar l-Adeżjoni tal-Unjoni Ewropea mal-Konvenzjoni COTIF.
(2)Skont l-Artikolu 2 tar-Regoli ta’ Proċedura tiegħu, il-Kumitat ad hoc għall-Affarijiet Legali u l-Kooperazzjoni Internazzjonali tal-OTIF (“il-Kumitat”) għandu l-mandat li: a) iħejji abbozzi ta’ emendi jew supplimenti għall-Konvenzjoni; b) jipprovdi parir legali fuq inizjattiva tiegħu stess jew fuq talba tal-organi msemmija fl-Artikolu 13 §§ 1 u 2 tal-Konvenzjoni jew fuq talba tal-organi stabbiliti minnhom; c) jippromwovi u jiffaċilita l-funzjonament u l-implimentazzjoni tal-Konvenzjoni; d) jimmonitorja u jivvaluta l-istrumenti legali; e) jieħu deċiżjonijiet dwar il-kooperazzjoni ma’ organizzazzjonijiet u assoċjazzjonijiet internazzjonali oħra, inkluż l-istabbiliment u x-xoljiment ta’ gruppi ta’ kuntatt konsultattivi ma’ organizzazzjonijiet u assoċjazzjonijiet internazzjonali oħra u l-monitoraġġ tal-funzjonament tal-gruppi ta’ kuntatt.
(3)L-Unjoni tipparteċipa fil-Kumitat f’konformità mad-dispożizzjonijiet tal-COTIF, tar-Regoli ta’ Proċedura tal-Kumitat, u tal-Ftehim dwar l-Adeżjoni tal-Unjoni mal-COTIF.
(4)Fil-ħames sessjoni tiegħu, li hija ppjanata li ssir fis-7-9 ta’ Novembru 2023, il-Kumitat huwa mistenni jiddeċiedi rigward opinjoni legali konsultattiva dwar l-applikazzjoni tal-Appendiċi E tal-COTIF għall-faċilitajiet ta’ servizz; l-opzjonijiet possibbli biex jiġi emendat l-Appendiċi B tal-COTIF sabiex tiġi ffaċilitata l-adozzjoni tan-nota ta’ konsenja ferrovjarja elettronika; ċerti aspetti dwar it-tħejjija ta’ strateġija fit-tul għall-OTIF; l-opzjonijiet possibbli biex tiġi emendata l-COTIF fir-rigward tas-sospensjoni u t-terminazzjoni tal-COTIF u/jew is-sħubija tal-OTIF fir-rigward ta’ membru partikolari tal-OTIF; it-tħejjija ta’ rakkomandazzjoni dwar l-użu ta’ firem elettroniċi fil-komunikazzjonijiet uffiċjali bejn l-OTIF u l-membri tagħha; l-iżvilupp ta’ politika dwar id-drittijiet tal-awtur u t-tħejjija ta’ linji gwida dwar il-protezzjoni tal-isem, l-abbrevjazzjoni u l-logo tal-OTIF; u l-kjarifika tat-terminu “espert” għall-fini tal-involviment tal-partijiet ikkonċernati fl-attivitajiet tagħha.
(5)Jixraq li tiġi stabbilita l-pożizzjoni li għandha tittieħed f’isem l-Unjoni fil-ħames sessjoni tal-Kumitat, peress li l-Unjoni hija membru tal-OTIF u d-deċiżjonijiet li għandhom jittieħdu mill-Kumitat jistgħu jwasslu għall-adozzjoni ta’ atti li huma vinkolanti skont id-dritt internazzjonali u li jistgħu jinfluwenzaw b’mod deċiżiv il-kontenut tal-leġiżlazzjoni tal-UE, jiġifieri: id-Direttiva 2012/34/UE tal-Parlament Ewropew u tal-Kunsill tal-21 ta’ Novembru 2012 li tistabbilixxi żona ferrovjarja unika Ewropea 10 , ir-Regolament (UE) 2020/1056 tal-Parlament Ewropew u tal-Kunsill tal-15 ta’ Lulju 2020 dwar l-informazzjoni elettronika dwar it-trasport tal-oġġetti 11 u r-Regolament (UE) Nru 910/2014 tal-Parlament Ewropew u tal-Kunsill tat-23 ta’ Lulju 2014 dwar l-identifikazzjoni elettronika u s-servizzi fiduċjarji għal tranżazzjonijiet elettroniċi fis-suq intern u li jħassar id-Direttiva 1999/93/KE 12 .
(6)Il-Kumitat huwa mistenni jiddeċiedi rigward opinjoni legali konsultattiva dwar l-applikazzjoni tar-Regoli Uniformi li jikkonċernaw il-Kuntratt tal-Użu tal-Infrastruttura fit-Traffiku Ferrovjarju Internazzjonali (CUI UR, COTIF Appendiċi E) għall-faċilitajiet tas-servizz ferrovjarju. Jeħtieġ li tiġi żgurata interpretazzjoni armonizzata u komplementari bejn dawk ir-regoli u l-leġiżlazzjoni applikabbli fil-membri tal-OTIF fir-rigward ta’ dawk il-faċilitajiet tas-servizz ferrovjarju, b’mod partikolari, sa fejn hija kkonċernata l-Unjoni, id-Direttiva 2012/34/UE.
(7)Id-dispożizzjonijiet eżistenti tal-COTIF jippermettu l-użu tan-nota ta’ konsenja elettronika bbażata fuq il-prinċipju tal-ekwivalenza funzjonali mal-verżjoni stampata. Fid-dawl tad-diġitalizzazzjoni kontinwa tat-trasport, jeħtieġ li tiġi rieżaminata l-adegwatezza tal-qafas legali tal-OTIF u li jitqiesu l-opzjonijiet possibbli biex tiġi emendata l-COTIF bil-ħsieb li tiġi ffaċilitata l-adozzjoni tan-nota ta’ konsenja ferrovjarja elettronika, filwaqt li jitqiesu r-regoli adottati fl-UE kif stabbilit fir-Regolament (UE) 2020/1056.
(8)Fir-rigward tal-iżvilupp strateġiku tal-OTIF, huwa importanti li jiġi żgurat li s-Segretarju Ġenerali jingħata iktar pariri u gwida dwar l-elaborazzjoni ta’ strateġija fit-tul għall-OTIF, li jenħtieġ li tiġi ppreżentata għall-kunsiderazzjoni u għall-adozzjoni mill-Assemblea Ġenerali tal-OTIF fis-sessjoni ordinarja tagħha li jmiss.
(9)Fid-dawl tat-tensjonijiet ġeopolitiċi reċenti fir-reġjun pan-Ewropew, il-Kumitat huwa mistenni li jkompli d-diskussjonijiet dwar is-sospensjoni u t-terminazzjoni tal-COTIF u/jew is-sħubija fl-OTIF fir-rigward ta’ Stat Membru partikolari. Jeħtieġ li jiġi żgurat li r-regoli tal-COTIF dwar is-sospensjoni u t-terminazzjoni tat-trattati u tas-sħubija inkluż il-limitazzjoni ta’ xi drittijiet jiġu rieżaminati kif xieraq, u li jiġi deċiż jekk il-COTIF jenħtieġx li tiġi emendata biex tiġi protetta aħjar l-integrità tal-organizzazzjoni u tan-network tal-membri tal-OTIF kif ukoll biex jiġi appoġġat aħjar il-ksib tal-għan tal-OTIF li tippromwovi, ittejjeb u tiffaċilita t-traffiku internazzjonali bil-ferrovija fl-aspetti kollha.
(10)L-iżvilupp tal-komunikazzjonijiet elettroniċi jirrikjedi ċerti aġġornamenti amministrattivi u modernizzazzjoni biex jiġi żgurat l-użu sikur u affidabbli tal-firem elettroniċi fil-komunikazzjonijiet uffiċjali bejn l-OTIF u l-membri tagħha. Huwa importanti li tiġi appoġġata t-tħejjija ta’ rakkomandazzjoni f’dak ir-rigward, li tqis il-livell differenti ta’ esperjenza tal-membri tal-OTIF u f’konformità mar-regoli stabbiliti fil-livell tal-UE f’dan ir-rigward, b’mod partikolari r-Regolament (UE) Nru 910/2014.
(11)Fir-rigward tal-protezzjoni legali tal-isem, l-abbrevjazzjoni, il-logo u l-proprjetà intellettwali tal-OTIF, il-Kumitat jista’ jiddeċiedi li jiżviluppa politika ta’ ġestjoni tad-dokumenti tal-proprjetà intellettwali għall-OTIF. Tali politika jenħtieġ li titfassal biex tiffaċilita l-użu mill-ġdid ta’ informazzjoni u ta’ dokumenti li jkunu proprjetà tal-OTIF f’konformità mar-regoli stabbiliti fid-Direttiva (UE) 2019/1024 tal-Parlament Ewropew u tal-Kunsill tal-20 ta’ Ġunju 2019 dwar id-data miftuħa u l-użu mill-ġdid tal-informazzjoni tas-settur pubbliku 13 u d-Deċiżjoni tal-Kummissjoni tat-12 ta’ Diċembru 2011 dwar l-użu mill-ġdid ta’ dokumenti tal-Kummissjoni (2011/833/UE) 14 .
(12)Il-Kumitat jista’ jiddeċiedi li jagħmel kjarifika tat-terminu “espert” fil-kuntest tar-“Rakkomandazzjoni dwar l-involviment tal-partijiet ikkonċernati fil-ħidma tal-OTIF”. Jeħtieġ li tiġi żgurata interpretazzjoni armonizzata ta’ dan il-kunċett, minħabba l-importanza li jiġi żgurat l-involviment xieraq tal-partijiet ikkonċernati fl-attivitajiet tal-Kumitat.
(13)Id-deċiżjonijiet proposti li għandhom jittieħdu fil-ħames sessjoni tal-Kumitat huma konformi mal-liġi u l-objettivi strateġiċi tal-Unjoni u għalhekk jenħtieġ li jiġu appoġġati.
ADOTTA DIN ID-DEĊIŻJONI:
Artikolu 1
Il-pożizzjoni li għandha tittieħed f’isem l-Unjoni fil-ħames sessjoni tal-Kumitat ad hoc għall-Affarijiet Legali u l-Kooperazzjoni Internazzjonali tal-Organizzazzjoni Intergovernattiva għat-Trasport Internazzjonali bil-Ferrovija (OTIF) hija stabbilita fl-Anness.
Bidliet minuri fil-pożizzjonijiet espressi fl-Anness ta’ din id-Deċiżjoni jistgħu jiġu maqbula mir-rappreżentanti tal-Unjoni fil-Kumitat mingħajr deċiżjoni ulterjuri tal-Kunsill.
Artikolu 2
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 27.10.2023
COM(2023) 687 final
ANNESS
tal-
Proposta għal Deċiżjoni tal-Kunsill
dwar il-pożizzjoni li għandha tittieħed f’isem l-Unjoni Ewropea fil-ħames sessjoni tal-Kumitat ad hoc għall-Affarijiet Legali u l-Kooperazzjoni Internazzjonali tal-OTIF
ANNESS
1.Introduzzjoni
Il-5 sessjoni tal-Kumitat ad hoc għall-Affarijiet Legali u l-Kooperazzjoni Internazzjonali tal-Konvenzjoni tal-Organizzazzjoni Intergovernattiva għat-Trasport Internazzjonali bil-Ferrovija (OTIF) se ssir mis-7 sad-9 ta’ Novembru 2023. Id-dokumenti tal-laqgħat huma disponibbli fuq is-sit web tal-OTIF permezz ta’ dan il-link: http://extranet.otif.org/jur/?page_id=6227
2.Il-kompetenza tal-UE
L-UE hija parti kontraenti għall-Konvenzjoni dwar it-Trasport Internazzjonali bil-Ferrovija (COTIF). Fir-rigward tal-punti tal-aġenda ta’ din il-laqgħa, meqjusa li jittrattaw kwistjonijiet li jaqgħu taħt il-kompetenza esklużiva tal-Unjoni, jenħtieġ li jiġi segwit il-punt 3.1 tal-“Arranġamenti Interni” (Anness III tad-Deċiżjoni tal-Kunsill 2013/103/UE). Fir-rigward tal-punti li fihom elementi ta’ kompetenza kemm nazzjonali kif ukoll tal-Unjoni, jenħtieġ li jiġi segwit il-punt 3.3 tal- “Arranġamenti Interni”. Dwar l-il-punti 3, 4, 8 u 9, il-Kummissjoni se titkellem u tivvota f’isem l-Unjoni. Dwar il-punti 6, 7 u 10, se jitkellmu l-Kummissjoni u l-Presidenza, u l-Kummissjoni ser tivvota f’isem l-Unjoni.
3.Kummenti dwar il-punti fl-aġenda
Il-Punt 3 tal-Aġenda – L-applikazzjoni tas-CUI UR għall-faċilitajiet ta’ servizz
|
Dokument(i): |
LAW-23108-JUR 5/3; LAW-23109-JUR 5/3; LAW-23085-JUR 5 |
|
Kompetenza: |
L-Unjoni (esklużiva) |
|
Eżerċizzju tad-drittijiet tal-vot: |
L-Unjoni |
|
Pożizzjoni: |
Appoġġ għall-adozzjoni tal-opinjoni legali konsultattiva dwar l-interpretazzjoni tas-CUI UR kif tinsab f’LAW-23109-JUR 5/3. Ifakkar li l-qrati tal-Unjoni biss jistgħu jinterpretaw id-dritt tal-Unjoni b’mod awtorevoli. |
Il-Punt 4 tal-Aġenda – Id-diġitalizzazzjoni tat-trasport internazzjonali, b’mod partikolari d-dokumenti tat-trasport tal-merkanzija
|
Dokument(i): |
LAW-23102-JUR 5/4; LAW-23024-JUR 4/9; LAW-22084-JUR 3/9-Corr.1; LAW-22031-JUR 2/11 |
|
Kompetenza: |
L-Unjoni (esklużiva) |
|
Eżerċizzju tad-drittijiet tal-vot: |
L-Unjoni |
|
Pożizzjoni: |
Jitqies id-dokument tal-bidu mħejji mis-Segretarjat (LAW-23024-JUR 4/9); Jitqies li d-dispożizzjonijiet eżistenti tas-CIM UR huma biżżejjed għall-ġarr mingħajr karti, u għalhekk ma hemm l-ebda urġenza biex tiġi emendata l-COTIF; Is-Segretarjat huwa mistieden iħejji dokument informali analitiku għas-6 sessjoni li jippreżenta modifiki possibbli għas-CIM UR bil-għan li titħaffef l-adozzjoni tan-nota ta’ konsenja elettronika tas-CIM. |
Il-Punt 6 tal-Aġenda – L-iżvilupp ta’ strateġija fit-tul għall-OTIF
|
Dokument(i): |
LAW-23115-JUR 5/6; LAW-23116-JUR 5/6 |
|
Kompetenza: |
L-Unjoni (kondiviża u esklużiva) |
|
Eżerċizzju tad-drittijiet tal-vot: |
L-Unjoni |
|
Pożizzjoni: |
Tintlaqa’ s-sottomissjoni mis-Segretarju Ġenerali ta’ verżjoni riveduta u konsolidata tal-“abbozz tad-dokument uniku ta’ strateġija”; Appoġġ ġenerali għall-abbozz attwali tal-istruttura tal-istrateġija fuq terminu twil, soġġett għal dawn il-kummenti: fir-rigward tal-objettiv strateġiku 1, ikun utli li jiġu deskritti proposti ġeneriċi konkreti, eż. l-organizzazzjoni ta’ sessjonijiet ta’ ħidma reġjonali biex jiġu promossi l-applikazzjoni u l-adozzjoni tal-appendiċijiet kollha tal-COTIF mill-membri tal-OTIF; fir-rigward tal-objettiv strateġiku 4, ikun utli li jiġu deskritti proposti ġeneriċi konkreti għat-tisħiħ tar-rwol ewlieni tal-OTIF fit-trasport ferrovjarju internazzjonali; fir-rigward tal-objettiv strateġiku 5, in-narrattiva jenħtieġ li tirreferi għall-kooperazzjoni mal-Aġenzija Ewropea għall-Ferroviji “ERA” u tinkludi paragrafu dwar il-Protokoll tal-Lussemburgu (għall-Konvenzjoni ta’ Cape Town) u r-rwol tal-OTIF biex tappoġġa l-implimentazzjoni tiegħu. |
Il-Punt 7 tal-Aġenda – Sospensjoni u terminazzjoni tal-COTIF u/jew sħubija fl-OTIF fir-rigward ta’ Stat Membru partikolari
|
Dokument(i): |
LAW-23103-JUR 5/7; LAW-23086-JUR 5; LAW-22082-JUR 3/5 |
|
Kompetenza: |
L-Unjoni (kondiviża u esklużiva) |
|
Eżerċizzju tad-drittijiet tal-vot: |
L-Unjoni |
|
Pożizzjoni: |
Fir-rigward tal-proposta għal deċiżjoni taħt dan il-punt, l-Unjoni Ewropea tappoġġa l-għoti ta’ struzzjonijiet lis-Segretarjat tal-OTIF biex iħejji proposta biex tiġi mmodifikata l-COTIF, filwaqt li jitqiesu l-elementi u l-prinċipji gwida li ġejjin. Jekk, bħala regola ġenerali, is-sanzjonijiet għall-ksur tar-regoli tal-OTIF jenħtieġx li jiġu imposti biss jekk ikun previst b’mod espliċitu mill-COTIF. Id-dokument tal-bidu mħejji mis-Segretarjat tal-OTIF juri li, b’mod ġenerali, id-deċiżjonijiet dwar sanzjonijiet kontra membru ta’ organizzazzjoni internazzjonali jsegwu proċeduri formali previsti b’mod espliċitu fil-konvenzjoni jew il-ftehim rilevanti kkonċernati. Dan kien il-każ fil-Kunsill tal-Ewropa fl-2022, fejn id-deċiżjonijiet li jiġi sospiż u eskluż membru mill-organizzazzjoni kienu bbażati fuq il-ksur tal-obbligi meħuda fi ħdan il-Kunsill tal-Ewropa. Għalhekk hija l-fehma tal-Unjoni Ewropea li kwalunkwe sanzjoni għall-ksur tar-regoli tal-OTIF jenħtieġ li tiġi imposta biss jekk tkun prevista b’mod espliċitu mill-COTIF, inklużi regoli u proċeduri definiti b’mod ċar fir-rigward tal-valutazzjoni ta’ ksur potenzjali u taċ-ċirkostanzi rilevanti u dwar id-definizzjoni tas-sanzjoni applikabbli. Jekk il-COTIF għandhiex tistabbilixxi sanzjonijiet għal ksur tad-dritt internazzjonali b’mod ġenerali meta r-regoli tagħha stess ma jinkisrux. Jekk iva, liema ksur potenzjali għandu jiġi inkluż? L-għan tal-OTIF huwa tekniku u limitat għat-trasport internazzjonali bil-ferrovija: Il-COTIF ma tistabbilixxi l-ebda objettiv ġenerali jew universali, bħaż-żamma tal-paċi internazzjonali jew il-promozzjoni tal-istat tad-dritt. Fil-prinċipju jista’ jiġi previst li jiġu stabbiliti dispożizzjonijiet fil-COTIF li jkunu jeħtieġu konformità mar-regoli jew il-prinċipji li jinsabu fi strumenti internazzjonali oħra (eż. il-Karta tan-NU jew trattati internazzjonali dwar id-drittijiet tal-bniedem) jew fid-dritt internazzjonali konswetudinarju, u li jiġu pprovduti wkoll sanzjonijiet fil-COTIF għall-ksur ta’ dawk ir-regoli jew prinċipji. Madankollu, dawn il-klawżoli normalment ma jinstabux fi trattati li jistabbilixxu organizzazzjonijiet tekniċi bħall-OTIF. Dan jaffettwa n-natura teknika tal-organizzazzjoni. Għalhekk hija l-fehma tal-Unjoni Ewropea li l-għażla li jiġu stabbiliti sanzjonijiet għal ksur tad-dritt internazzjonali b’mod ġenerali tkun innovattiva u teħtieġ li tingħata attenzjoni, u analiżi bir-reqqa, tal-implikazzjonijiet li tali deċiżjoni tista’ tinvolvi. Jekk il-COTIF għandhiex tistabbilixxi sanzjonijiet għal ksur għajr in-nuqqas ta’ ħlas tal-kontribuzzjonijiet. Jekk iva, liema ksur potenzjali għandu jiġi inkluż? L-Artikolu 1 § 1 tal-COTIF jipprevedi li l-partijiet kontraenti jikkostitwixxu l-organizzazzjoni “OTIF”. Għalhekk, jista’ jitqies li l-Membri tal-OTIF jaqsmu kollettivament ir-responsabbiltà — li tirriżulta mis-sħubija tagħhom fl-OTIF u l-obbligi tagħhom skont il-COTIF — li jilħqu l-għan tal-OTIF (l-Artikolu 2 § 1 tal-COTIF), li huwa li “tippromwovi, ittejjeb u tiffaċilita, f’kull aspett, it-traffiku internazzjonali bil-ferrovija (...)”. Skont dan ir-raġunament, jista’ jiġi previst li l-COTIF tiġi emendata biex tiddefinixxi sanzjonijiet għall-ksur ta’ ċerti dispożizzjonijiet tal-COTIF għajr għan-nuqqas ta’ ħlas tal-kontribuzzjonijiet finanzjarji għall-baġit, inkluż: (1) ksur tar-regoli tal-OTIF li jikkawża disfunzjoni potenzjali jew attwali tat-traffiku ferrovjarju internazzjonali rregolat mill-COTIF u/jew (2) ksur tar-regoli tal-OTIF li jfixklu serjament l-għan tal-OTIF li tippromwovi, tiffaċilita u ttejjeb it-traffiku ferrovjarju internazzjonali. Biex jiġi elaborat aktar dwar dan, ikun meħtieġ li: (a) Ikunu identifikati ċerti regoli tal-OTIF li huma partikolarment rilevanti għall-kisba tal-objettivi tal-organizzazzjoni; (b) Ikunu identifikati ċerti regoli tal-OTIF li fir-rigward tagħhom il-ksur mill-Membri tal-OTIF x’aktarx li jfixkel il-funzjonament xieraq tat-traffiku ferrovjarju internazzjonali; (c) Ikunu identifikati ċerti regoli tal-OTIF li fir-rigward tagħhom il-ksur (kemm jekk ta’ regoli speċifiċi jew ta’ kombinazzjonijiet tagħhom) mill-Membri tal-OTIF x’aktarx li jdgħajjef l-integrità jew il-funzjonament tal-OTIF; (d) Tkun definita metodoloġija biex jiġi ddeterminat jekk ksur tar-regoli tal-OTIF jistax ifixkel serjament l-għan tal-OTIF li tippromwovi, tiffaċilita u ttejjeb it-traffiku ferrovjarju internazzjonali. It-tipi ta’ sanzjonijiet li ġejjin jistgħu jiġu previsti fir-rigward ta’ ksur tad-dispożizzjonijiet tal-OTIF għajr in-nuqqas ta’ ħlas tal-kontribuzzjonijiet: sospensjoni tad-drittijiet tal-vot; sospensjoni tas-sħubija; terminazzjoni tas-sħubija (esklużjoni), li eventwalment għandha tiġi applikata jekk ma tiġi implimentata l-ebda azzjoni korrettiva xierqa wara s-sospensjoni. Għandhom jiġu applikati wkoll diversi prinċipji trasversali: kwalunkwe sanzjoni li għandha tiġi stabbilita għandha tkun effettiva, proporzjonata u dissważiva; għandhom jiġu previsti u kkalibrati tipi differenti ta’ sanzjonijiet biex jitqiesu l-livelli differenti ta’ gravità tal-ksur u l-fatturi aggravanti potenzjali, li jistgħu jiġu applikati wkoll jekk ma tiġi implimentata l-ebda azzjoni korrettiva xierqa wara s-sanzjoni; jenħtieġ li jiġu kkunsidrati aspetti proċedurali bħad-dritt li wieħed jinstema’, id-dritt ta’ appell, it-talbiet għal azzjonijiet ta’ rimedju, ir-restawr tad-drittijiet u r-riammissjoni ta’ Membru tal-OTIF imkeċċi. Ir-Renju Unit (LAW-23086-JUR 5, punt 5.2) jipproponi triq speċifika ‘l quddiem billi jqis iċ-ċirkostanzi li jkollhom impatt fuq il-prestazzjoni tal-OTIF u li huma marbuta ma’ mġiba differenti, bħal att ta’ gwerra minn Membru wieħed tal-OTIF li jdgħajjef b’mod mhux raġonevoli l-kapaċità ta’ Membru ieħor tal-OTIF li jissodisfa l-obbligi tiegħu skont il-COTIF, jew jekk Membru tal-OTIF jattakka l-infrastruttura ferrovjarja ta’ Membru ieħor, u b’hekk jimmina b’mod mhux raġonevoli l-kapaċità ta’ dak il-Membru li jissodisfa l-obbligi tiegħu tal-COTIF. L-UE tilqa’ b’mod ġenerali l-possibbiltà li tiġi diskussa l-introduzzjoni ta’ sanzjonijiet għal ksur għajr in-nuqqas ta’ ħlas tal-kontribuzzjonijiet fl-OTIF. Madankollu, f’dan l-istadju, jenħtieġ li x-xogħlijiet jikkonċentraw fuq proposti li jqisu kif xieraq in-natura teknika tal-OTIF. Huma jipproponu li tiġi kkunsidrata l-inklużjoni possibbli fil-COTIF ta’ dispożizzjonijiet li jitolbu lill-membri jirrispettaw l-integrità fiżika u funzjonali tal-infrastruttura ferrovjarja ta’ membri oħra. Dan jista’ pereżempju jiddaħħal fl-Artikolu 5 tal-COTIF (Obbligi speċjali tal-Istati Membri). Il-ksur ta’ tali dispożizzjoni ġdida jista’ jkun sanzjonabbli. Liema organu tal-OTIF għandu jkun responsabbli biex jiddeċiedi jekk inkisrux ir-regoli rilevanti? L-Assemblea Ġenerali hija l-korp suprem tat-teħid tad-deċiżjonijiet tal-OTIF u jenħtieġ li tkun responsabbli formalment biex tiddeċiedi jekk inkisrux ir-regoli rilevanti tal-OTIF. Abbażi tal-istruttura istituzzjonali tal-OTIF, ikun ir-rwol tas-Segretarju Ġenerali li jeżamina kwalunkwe allegat ksur tar-regoli tal-OTIF. Dan jista’ jinvolvi konsultazzjonijiet ma’ organi oħra tal-OTIF u jirrikjedi għarfien espert estern bil-ħsieb li jitħejjew il-proposti meħtieġa għal deċiżjoni, fejn xieraq, biex jiġu kkunsidrati mill-Assemblea Ġenerali. Liema organu tal-OTIF għandu jiddeċiedi dwar l-applikazzjoni tas-sanzjonijiet, ir-restawr tad-drittijiet u r-riammissjoni tal-Istati Membri mkeċċija u b’liema maġġoranza? L-Assemblea Ġenerali hija l-korp suprem tat-teħid tad-deċiżjonijiet tal-OTIF u jenħtieġ li tkun responsabbli formalment biex tiddeċiedi dwar l-applikazzjoni tas-sanzjonijiet, ir-restawr tad-drittijiet u r-riammissjoni tal-Istati Membri mkeċċija. Minħabba l-importanza u l-impatt tal-applikazzjoni tas-sanzjonijiet, il-maġġoranza kwalifikata ta’ żewġ terzi tal-Istati Membri tal-OTIF preżenti msemmija fl-Artikolu 14 § 6 tal-COTIF x’aktarx tkun xierqa f’dan il-każ. Ċirkustanzi li jipprekludu l-illegalità ta’ att għandhom jiġu inklużi espressament fil-COTIF? L-Unjoni hija tal-fehma li deskrizzjoni mhux eżawrjenti taċ-ċirkustanzi li jipprekludu l-illegalità ta’ att jenħtieġ li tabilħaqq tiġi inkluża espressament fil-COTIF. Bħala eżempju, klawżola ta’ forza maġġuri fil-COTIF tista’ tistabbilixxi kundizzjonijiet ċari li jkunu barra mill-kontroll ta’ Membru tal-OTIF, konsistenti mal-qafas ġenerali tar-responsabbiltà tal-Istati għal atti internazzjonalment ħżiena kif żviluppat fil-paragrafi 24 sa 35 tad-dokument tal-bidu tas-Segretarjat tal-OTIF. F’każ ta’ tkeċċija, ir-riammissjoni ta’ membri mkeċċija għandha ssegwi l-istess proċedura bħal dik għall-ammissjoni ta’ membri ġodda jew il-proċedura għandha tkun differenti? Għandhom jiġu imposti xi kundizzjonijiet speċifiċi? Fuq is-suppożizzjoni li s-sanzjonijiet huma tabilħaqq implimentati, bħala kwistjoni ta’ prinċipju, ir-riammissjoni ta’ membri mkeċċija jenħtieġ li tiġi kkunsidrata u aċċettata biss taħt kundizzjonijiet speċifiċi, u fi kwalunkwe każ biss jekk il-ksur tar-regoli tal-OTIF li wassal għas-sanzjoni jiġi kkoreġut b’mod effettiv. Il-kundizzjonijiet għar-revoka tas-sanzjonijiet u għar-restawr tad-drittijiet tas-sħubija jeħtieġ li jiġu identifikati u fformulati b’mod ċar. |
Il-Punt 8 tal-Aġenda – L-użu ta’ firem elettroniċi fil-komunikazzjonijiet uffiċjali bejn l-OTIF u l-membri tagħha
|
Dokument(i): |
LAW-23104-JUR-5/8; LAW-23019-JUR 4/4 |
|
Kompetenza: |
L-Unjoni (esklużiva) |
|
Eżerċizzju tad-drittijiet tal-vot: |
L-Unjoni |
|
Pożizzjoni: |
Titqies l-informazzjoni ppreżentata mis-Segretarjat (dokument tal-bidu) u jfakkar li, għall-UE, il-kwistjoni hija koperta mir-Regolament (UE) Nru 910/2014 dwar l-identifikazzjoni elettronika u s-servizzi fiduċjarji għal tranżazzjonijiet elettroniċi fis-suq intern; Jingħata appoġġ lit-tħejjija ta’ abbozz ta’ rakkomandazzjoni, preferibbilment mis-Segretarjat tal-OTIF, dwar l-użu tal-firma elettronika fil-komunikazzjonijiet uffiċjali bejn l-OTIF u l-membri tagħha, għall-kunsiderazzjoni u l-adozzjoni possibbli fis-sessjoni li jmiss tal-Kumitat ad hoc; Fir-rigward tal-prinċipji ġenerali, jenħtieġ li jiġi kkunsidrat il-livell differenti ta’ esperjenza tal-membri tal-OTIF b’firem elettroniċi, u għalhekk jidher xieraq li r-rakkomandazzjoni, fl-ewwel fażi, tkopri komunikazzjonijiet “sempliċi” biss. |
Il-Punt 9 tal-Aġenda – Il-protezzjoni legali tal-isem, l-abbrevjazzjoni, il-logo u x-xogħlijiet tal-OTIF
|
Dokument(i): |
LAW-23119-JUR 5/9; LAW-23120-JUR 5/9 |
|
Kompetenza: |
L-Unjoni (esklużiva) |
|
Eżerċizzju tad-drittijiet tal-vot: |
L-Unjoni |
|
Pożizzjoni: |
Jingħata appoġġ lill-iżvilupp ta’ politika dwar id-drittijiet tal-awtur u jingħataw struzzjonijiet lis-Segretarjat biex iħejji tali politika inkluż il-liċenzjar skont mudelli ta’ liċenzjar b’aċċess miftuħ fejn xieraq u filwaqt li jitqiesu d-drittijiet tas-sjieda speċjalment id-drittijiet ta’ partijiet terzi fit-tipi differenti ta’ dokumenti ppubblikati mill-OTIF; Tkun espressa l-fehma li l-Assemblea Ġenerali jenħtieġ li tapprova l-logo u l-linji gwida dwar l-użu tal-isem, il-logo, il-bandiera u l-abbrevjazzjoni tal-organizzazzjoni; Ikun hemm qbil mal-għoti ta’ struzzjonijiet lis-Segretarjat tal-OTIF biex iħejji abbozz ta’ linji gwida dwar l-użu tal-isem, l-abbrevjazzjoni u l-logo tal-OTIF li għandhom jiġu diskussi fis-sessjoni li jmiss tal-Kumitat u biex jipproċedi bil-komunikazzjoni tal-“isem, l-abbrevjazzjoni, l-emblema jew l-arma” tal-OTIF lill-WIPO (Organizzazzjoni Dinjija tal-Proprjetà Intellettwali) f’konformità mal-Artikolu 6ter tal-Konvenzjoni ta’ Pariġi għall-Protezzjoni tal-Proprjetà Industrijali. |
Il-Punt 10 tal-Aġenda – L-involviment tal-partijiet ikkonċernati rreġistrati fil-Kumitat ad hoc għall-Affarijiet Legali u l-Kooperazzjoni Internazzjonali
|
Dokument(i): |
LAW-23105-JUR 5/10 |
|
Kompetenza: |
L-Unjoni (kondiviża u esklużiva) |
|
Eżerċizzju tad-drittijiet tal-vot: |
L-Unjoni |
|
Pożizzjoni: |
Jingħata appoġġ lill-proposta tas-Segretarjat tal-OTIF biex jiġi ċċarat li, għall-fini tal-involviment tal-partijiet ikkonċernati fl-attivitajiet tal-Kumitat, it-terminu “espert” ifisser esperti fil-kapaċità professjonali indipendenti tagħhom u esperti bħala rappreżentanti ta’ persuni ġuridiċi attivi fis-settur ferrovjarju internazzjonali, bħat-trasportaturi u l-maniġers tal-infrastruttura; Jinnota d-deċiżjoni tal-Bureau tal-Kumitat li t-talbiet minn esperti, akkademiċi u riċerkaturi biex jagħmlu preżentazzjoni f’sessjoni tal-Kumitat ad hoc għandhom jiġu approvati mill-Bureau qabel is-sessjoni rilevanti sabiex jiġi żgurat li s-sessjoni tiġi ġestita b’mod effiċjenti. |