IL-KUMMISSJONI EWROPEA
Strasburgu, 13.6.2023
COM(2023) 314 final
2023/0177(COD)
Proposta għal
REGOLAMENT TAL-PARLAMENT EWROPEW U TAL-KUNSILL
dwar it-trasparenza u l-integrità tal-attivitajiet ta’ klassifikazzjoni Ambjentali, Soċjali u ta’ Governanza (ESG)
(Test b’rilevanza għaż-ŻEE)
{SEC(2023) 241 final} - {SWD(2023) 204 final} - {SWD(2023) 207 final}
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u objettivi tal-proposta
Din il-proposta hija parti integrali mill-istrateġija mġedda tal-Kummissjoni Ewropea għall-finanzi sostenibbli adottata f’Lulju 2021.
L-investiment ambjentali, soċjali u ta’ governanza (ESG), jiġifieri, l-investiment li jqis il-fatturi ESG meta jittieħdu deċiżjonijiet ta’ investiment (imsejħa wkoll investimenti sostenibbli), qed isir parti importanti mill-finanzjament ġenerali. B’mod partikolari, il-fondi ta’ investiment b’karatteristiċi jew objettivi sostenibbli żdiedu sew fl-għadd, fid-daqs u fit-tip ta’ kapital li jattiraw. F’dan il-kuntest, ġiet żviluppata ekosistema ta’ investiment ESG, inkluża, fost l-oħrajn, il-provvista ta’ klassifikazzjonijiet ESG. Tali klassifikazzjonijiet ESG jiġu kkummerċjalizzati bħala li jipprovdu opinjoni dwar l-esponiment ta’ kumpanija jew entità għal fatturi ambjentali, soċjali u/jew ta’ governanza, u l-impatt tagħhom fuq is-soċjetà.
Il-klassifikazzjonijiet ESG għandhom impatt dejjem aktar importanti fuq it-tħaddim tas-swieq kapitali u fuq il-fiduċja tal-investituri fi prodotti sostenibbli. B’mod partikolari, il-klassifikazzjonijiet ESG għandhom rwol abilitanti għall-funzjonament xieraq tas-suq tal-finanzi sostenibbli tal-UE billi jipprovdu sorsi kritiċi ta’ informazzjoni għall-istrateġiji ta’ investiment, għall-ġestjoni tar-riskju u għall-obbligi ta’ divulgazzjoni mill-investituri u mill-istituzzjonijiet finanzjarji. Dawn jintużaw ukoll minn impriżi li jfittxu li jifhmu aħjar ir-riskji u l-opportunitajiet ta’ sostenibbiltà marbuta mal-attivitajiet tagħhom jew ma’ dawk tas-sħab tagħhom, u għal tqabbil mal-pari tagħhom.
Is-suq tal-klassifikazzjonijiet ESG huwa mistenni li jkompli jikber b’mod sostanzjali fis-snin li ġejjin. It-tkabbir u ż-żieda fid-domanda għall-klassifikazzjonijiet ESG huma xprunati min-natura li qed tinbidel tar-riskji għall-kumpaniji, minn sensibilizzazzjoni dejjem tikber tal-investituri dwar l-implikazzjonijiet finanzjarji ta’ dawk ir-riskji u mit-tkabbir fi prodotti ta’ investiment li espliċitament ifittxu li jissodisfaw ċerti standards ta’ sostenibbiltà jew li jilħqu ċerti objettivi ta’ sostenibbiltà. Dan huwa marbut ukoll mal-leġiżlazzjoni dwar il-finanzi sostenibbli mressqa mill-UE mill-2018.
Madankollu, is-suq attwali tal-klassifikazzjoni ESG ibati minn nuqqasijiet u mhux qed jiffunzjona kif suppost, bil-ħtiġijiet tal-investituri u tal-entitajiet valutati fir-rigward tal-klassifikazzjonijiet ESG mhux qed jiġu ssodisfati u l-fiduċja fil-klassifikazzjonijiet qed tiġi mminata. Din il-problema għandha għadd ta’ aspetti differenti, prinċipalment (i) in-nuqqas ta’ trasparenza dwar il-karatteristiċi tal-klassifikazzjonijiet ESG, il-metodoloġiji tagħhom u s-sorsi tad-data tagħhom u (ii) in-nuqqas ta’ ċarezza dwar kif joperaw il-fornituri tal-klassifikazzjonijiet ESG. Il-klassifikazzjonijiet ESG ma jippermettux biżżejjed lill-utenti, lill-investituri u lill-entitajiet ikklassifikati jieħdu deċiżjonijiet infurmati fir-rigward tar-riskji, l-impatti u l-opportunitajiet relatati mal-ESG.
B’hekk, il-Kummissjoni impenjat ruħha fl-istrateġija mġedda għall-finanzi sostenibbli li tieħu azzjoni biex ittejjeb l-affidabbiltà, il-komparabbiltà u t-trasparenza tal-klassifikazzjonijiet ESG. B’mod aktar speċifiku, din il-proposta għandha l-għan li ttejjeb il-kwalità tal-informazzjoni dwar il-klassifikazzjonijiet ESG, billi (i) ittejjeb it-trasparenza tal-karatteristiċi u l-metodoloġiji tal-klassifikazzjonijiet ESG, u billi (ii) tiżgura aktar ċarezza dwar l-operazzjonijiet tal-fornituri tal-klassifikazzjonijiet ESG u l-prevenzjoni tar-riskji ta’ kunflitt ta’ interess fil-livell tal-fornituri tal-klassifikazzjonijiet ESG. Billi l-klassifikazzjonijiet ESG u d-data sottostanti jintużaw għad-deċiżjonijiet ta’ investiment u għall-allokazzjoni tal-kapital, l-objettiv ġenerali tal-inizjattiva huwa li tittejjeb il-kwalità tal-klassifikazzjonijiet ESG sabiex l-investituri jkunu jistgħu jieħdu deċiżjonijiet ta’ investiment infurmati aħjar fir-rigward tal-objettivi ta’ sostenibbiltà. Hija se tippermetti wkoll lill-entitajiet ikklassifikati jieħdu deċiżjonijiet infurmati dwar il-ġestjoni tar-riskji ESG u l-impatt tal-operazzjonijiet tagħhom. Fl-istess ħin, huwa kruċjali li jitrawmu l-fiduċja u l-kunfidenza fl-operazzjonijiet tal-fornituri tal-klassifikazzjonijiet ESG billi jiġi żgurat li s-suq jopera kif suppost u l-fornituri tal-klassifikazzjonijiet ESG jipprevjenu u jimmaniġġaw il-kunflitti ta’ interess.
Din il-proposta ma għandhiex l-għan li tarmonizza l-metodoloġiji għall-kalkolu tal-klassifikazzjonijiet ESG, iżda li żżid it-trasparenza tagħhom. Il-fornituri tal-klassifikazzjonijiet ESG se jibqgħu f’kontroll sħiħ tal-metodoloġiji li jużaw u se jkomplu jkunu indipendenti fl-għażla tagħhom, biex jiżguraw li varjetà ta’ approċċi jkunu disponibbli fis-suq tal-klassifikazzjonijiet ESG (jiġifieri l-klassifikazzjonijiet ESG jistgħu jvarjaw bejniethom u jkopru oqsma differenti).
Din il-proposta għandha l-għan li tagħmilha aktar faċli li jiġi sfruttat il-potenzjal tas-Suq Uniku Ewropew u tal-Unjoni tas-Swieq Kapitali u li tikkontribwixxi għat-tranżizzjoni lejn sistema ekonomika u finanzjarja kompletament sostenibbli u inklużiva f’konformità mal-Patt Ekoloġiku Ewropew u mal-Għanijiet ta’ Żvilupp Sostenibbli tan-NU.
Huwa meħtieġ investiment sinifikanti fis-setturi kollha tal-ekonomija għat-tranżizzjoni lejn ekonomija newtrali għall-klima u biex jintlaħqu l-objettivi tal-Unjoni dwar is-sostenibbiltà ambjentali. Għandu jsir aktar faċli għall-investituri u l-impriżi li jidentifikaw investimenti ambjentalment sostenibbli u li jiżguraw li jkunu kredibbli.
Din l-inizjattiva ma hijiex inizjattiva tal-programm dwar l-idoneità u l-prestazzjoni tar-regolamentazzjoni (REFIT).
•Konsistenza mad-dispożizzjonijiet eżistenti fil-qasam ta’ politika
L-UE daħħlet fis-seħħ l-elementi kostitwenti għal qafas għall-finanzi sostenibbli. Il-partijiet ikkonċernati issa qed jindikaw l-ineffiċjenzi tas-suq u l-lakuni regolatorji li fadal li jistgħu jxekklu l-iżvilupp tas-suq. Il-fornituri tal-klassifikazzjonijiet ESG u l-fornituri tad-data jużaw l-informazzjoni ppubblikata mill-impriżi; id-disponibbiltà, l-akkuratezza u l-konsistenza ta’ din id-data huma kruċjali għall-kwalità tal-prodotti downstream li jiddependu fuqha. Skont id-Direttiva dwar ir-Rapportar Korporattiv dwar is-Sostenibbiltà (CSRD) u r-Regolament dwar it-Tassonomija tal-UE, l-impriżi huma meħtieġa jipproduċu informazzjoni dwar fatturi ESG speċifiċi. Il-klassifikazzjonijiet ESG se jibnu fuq dan u jikkomplementawh billi jipprovdu sorsi kritiċi ta’ informazzjoni għal strateġiji ta’ investiment, ġestjoni tar-riskju u analiżi interna minn investituri u istituzzjonijiet finanzjarji. Il-fornituri tal-klassifikazzjonijiet ESG jużaw id-data li ġejja mill-impriżi, u aktar ma tkun disponibbli data affidabbli, akkurata u standardizzata, inqas ikun hemm bżonn li jintużaw stimi biex jimtlew il-lakuni. Pereżempju, ir-rapporti dwar is-sostenibbiltà korporattiva se jiffaċilitaw il-valutazzjonijiet imwettqa mill-fornituri tal-klassifikazzjonijiet ESG.
Barra minn hekk, ir-rekwiżiti l-ġodda imposti fuq l-istituzzjonijiet finanzjarji u l-parteċipanti fis-suq mil-leġiżlazzjoni dwar il-finanzi sostenibbli (bħas-CSRD, ir-Regolament dwar id-Divulgazzjoni tal-Finanzi Sostenibbli u r-Regolament dwar it-Tassonomija tal-UE) se jwasslu għal domanda akbar għall-klassifikazzjonijiet ESG.
Din l-inizjattiva tinteraġixxi wkoll mal-ħidma dwar l-istandards tal-bonds ekoloġiċi u l-parametri referenzjarji klimatiċi tal-UE. Fir-rigward tal-proposta għal Regolament dwar il-Bonds Ekoloġiċi Ewropej, l-emittenti ta’ standards futuri tal-bonds ekoloġiċi tal-UE huma meħtieġa jiddivulgaw l-allinjament tat-tassonomija tal-proġetti ffinanzjati mill-bonds tagħhom. Għal dak il-għan, huma jistgħu jfittxu klassifikazzjonijiet ESG biex jiksbu data sottostanti li tikkontribwixxi għall-valutazzjonijiet tal-proġetti tagħhom. L-informazzjoni divulgata fil-klassifikazzjonijiet ESG tgħin lill-investituri, inklużi l-investituri ta’ bonds ekoloġiċi, jivvalutaw aħjar il-prestazzjoni mhux finanzjarja ġenerali tal-impriżi.
Fir-rigward tar-Regolament dwar il-Parametru Referenzjarju tal-Klima tal-UE, Regolament Delegat jistabbilixxi lista ta’ fatturi ESG li għandhom jiġu ddivulgati mill-amministraturi tal-parametri referenzjarji, għal dawk il-parametri referenzjarji li jsegwu l-objettivi ESG, skont it-tip ta’ assi sottostanti kkonċernati (eż. ekwità, introjtu fiss, titoli sovrani). Dawn se jkollhom jiksbu l-informazzjoni direttament mingħand l-impriżi (eż. permezz tar-rapporti annwali tagħhom) jew jiksbu din l-informazzjoni mingħand fornituri esterni ta’ klassifikazzjoni/data. Ir-Regolament Delegat jagħti lill-amministraturi tal-parametri referenzjarji l-għażla li jiddivulgaw informazzjoni dwar il-klassifikazzjonijiet ESG tal-parametri referenzjarji. Informazzjoni aħjar dwar il-metodoloġiji użati għall-klassifikazzjonijiet ESG għandha tgħin biex l-amministraturi tal-parametri referenzjarji jiġu pprovduti b’ċarezza rigward il-kostitwenti tal-parametri referenzjarji. Klassifikazzjonijiet aħjar u aktar affidabbli se jibnu l-fiduċja tal-amministraturi tal-parametri referenzjarji, u eventwalment itejbu l-adozzjoni ta’ dawk il-klassifikazzjonijiet bħala għodda affidabbli għat-tfassil ta’ parametri referenzjarji sinifikanti. Barra minn hekk, din se tgħin lill-utenti tal-parametri referenzjarji jiżguraw li huma jidentifikaw il-parametri referenzjarji li huma allinjati mal-istrateġija ta’ investiment tagħhom u tgħinhom jimplimentawha, filwaqt li jevitaw ir-riskji ta’ greenwashing. Dan ir-Regolament għandu jtejjeb ukoll il-fiduċja tal-investituri fil-parametri referenzjarji ESG u, b’hekk, ikompli jappoġġa l-investiment sostenibbli.
•Konsistenza ma’ politiki oħra tal-Unjoni
Din il-proposta hija parti minn pakkett ta’ miżuri ta’ finanzjament sostenibbli li huwa prijorità taħt il-proġett tal-Unjoni tas-Swieq Kapitali. Hija fiha miżuri maħsuba biex jisfruttaw is-setgħa trasformattiva tas-servizzi finanzjarji u biex jittrasferixxu l-kapital privat lejn investiment sostenibbli. Hija tikkontribwixxi għall-iżvilupp ta’ swieq kapitali aktar integrati billi tagħmilha aktar faċli għall-investituri biex jibbenefikaw mis-suq uniku, filwaqt li jieħdu deċiżjonijiet informati aħjar. Pereżempju, il-Punt ta’ Aċċess Uniku Ewropew (ESAP) jagħti lill-partijiet ikkonċernati aċċess aktar faċli għad-data, u jista’ jservi wkoll bħala sors ta’ informazzjoni/data tal-input għall-fornituri tal-klassifikazzjonijiet ESG, filwaqt li jnaqqas l-użu ta’ stimi, iżda wkoll jikkontribwixxi għal kwalità aħjar tal-klassifikazzjonijiet b’mod ġenerali.
Din il-proposta hija konformi wkoll mal-għanijiet ta’ politika ġenerali tal-Patt Ekoloġiku Ewropew. Il-Patt Ekoloġiku Ewropew huwa r-rispons tal-Unjoni għall-isfidi relatati mal-klima u l-ambjent li jiddefinixxu l-ġenerazzjoni. Huwa għandu l-għan li jittrasforma l-Unjoni f’ekonomija moderna, effiċjenti fir-riżorsi u kompetittiva mingħajr emissjonijiet netti ta’ gassijiet serra sal-2050.
Barra minn hekk, suq integrat u li jiffunzjona bis-sħiħ għall-kapital se jippermetti lill-ekonomija tal-UE tikber b’mod sostenibbli u tkun aktar kompetittiva, f’konformità mal-prijorità strateġika tal-Kummissjoni għal Ekonomija għas-Servizz tan-Nies, iffokata fuq il-ħolqien ta’ kundizzjonijiet tajbin għall-ħolqien tal-impjiegi, it-tkabbir u l-investiment.
Din il-proposta tikkomplementa l-politiki ambjentali u klimatiċi eżistenti tal-UE billi tagħmel il-metodoloġiji għall-klassifikazzjonijiet ESG aktar trasparenti, li għandhom iwasslu għad-direzzjonar aktar effiċjenti tal-investiment lejn assi sostenibbli.
2.BAŻI ĠURIDIKA, SUSSIDJARJETÀ U PROPORZJONALITÀ
•Bażi ġuridika
Din il-proposta taqa’ fil-qasam ta’ kompetenza kondiviża f’konformità mal-Artikolu 4(2)(a) tat-Trattat dwar il-Funzjonament tal-Unjoni Ewropea (TFUE) u hija bbażata fuq l-Artikolu 114 tat-TFUE, li jagħti lill-UE l-kompetenza biex tistabbilixxi dispożizzjonijiet xierqa għall-istabbiliment u l-funzjonament tas-suq intern.
L-Artikolu 114 tat-TFUE jippermetti lill-Unjoni tieħu miżuri mhux biss biex telimina l-ostakli eżistenti għall-eżerċitar tal-libertajiet fundamentali, iżda wkoll biex tipprevjeni l-ħolqien probabbli ta’ tali ostakli fil-futur. Dan jinkludi ostakli li jagħmluha diffiċli għall-parteċipanti fis-suq, bħall-fornituri ta’ klassifikazzjonijiet ESG jew l-investituri, biex jieħdu vantaġġ sħiħ mill-benefiċċji tas-suq intern.
•Sussidjarjetà (għall-kompetenza mhux esklużiva)
L-objettiv ta’ din l-inizjattiva, li tittejjeb iċ-ċarezza fir-rigward tal-karatteristiċi u l-objettivi tal-klassifikazzjonijiet ESG u l-operazzjonijiet tal-fornituri tal-klassifikazzjonijiet ESG, ma jistax jintlaħaq b’mod adegwat mill-Istati Membri li jaġixxu b’mod indipendenti u, b’hekk, hija meħtieġa azzjoni fil-livell tal-UE għall-funzjonament xieraq tas-swieq kapitali tal-UE.
Bħalissa ma hemm l-ebda qafas regolatorju tal-UE għall-fornituri tal-klassifikazzjonijiet ESG. L-Istati Membri ma jirregolawx l-attivitajiet tal-fornituri tal-klassifikazzjonijiet ESG jew il-kundizzjonijiet li taħthom jipprovdu l-klassifikazzjonijiet ESG. Kull fornitur tal-klassifikazzjonijiet ESG isegwi r-regoli tiegħu stess, b’nuqqas ta’ ċarezza dwar x’jagħmel u kif jagħmel dan.
Is-suq tal-klassifikazzjonijiet ESG huwa globali. Xi fornituri kbar tal-ESG għandhom il-kwartieri ġenerali tagħhom fl-UE, filwaqt li ħafna oħrajn għandhom il-kwartieri ġenerali tagħhom barra mill-UE, iżda għandhom sussidjarji fl-UE.
Għalkemm l-Istati Membri jistgħu jieħdu azzjoni individwalment biex isaħħu l-affidabbiltà u t-trasparenza tal-klassifikazzjonijiet ESG, tali miżuri x’aktarx li jvarjaw b’mod sinifikanti bejn l-Istati Membri. Dan jista’ joħloq livelli diverġenti ta’ trasparenza, ostakli għall-parteċipanti fis-suq u sfidi għal dawk li joperaw b’mod transfruntier (kif jagħmlu fis-suq tal-UE, b’utenti f’għadd ta’ Stati Membri), minbarra li jillimita l-komparabbiltà bejn il-klassifikazzjonijiet. Inkella, mingħajr ebda regola dwar l-operazzjonijiet tal-fornituri tal-klassifikazzjonijiet ESG, is-sitwazzjoni attwali u l-kwistjonijiet ta’ trasparenza relatati mat-trasparenza jkomplu u jistgħu saħansitra jmorru għall-agħar.
B’investiment sostenibbli u klassifikazzjonijiet ESG li jattiraw attenzjoni dejjem akbar f’ġuriżdizzjonijiet madwar id-dinja, qed isir essenzjali għall-UE li timpenja ruħha mas-sħab tagħha abbażi ta’ approċċ armonizzat koerenti u komprensiv. L-inizjattiva ma tissostitwix il-leġiżlazzjoni nazzjonali, minħabba li bħalissa l-ebda Stat Membru ma għandu leġiżlazzjoni li tirregola l-funzjonament tal-fornituri tal-klassifikazzjonijiet ESG.
Il-funzjonament tas-suq intern jittejjeb b’ċarezza akbar dwar l-operazzjonijiet tal-entitajiet li huma dejjem aktar importanti għad-direzzjonar tal-finanzi.
•Proporzjonalità
Din il-proposta hija konformi mal-prinċipju tal-proporzjonalità kif stabbilit fl-Artikolu 5 tat-TFUE. Il-miżuri proposti huma meħtieġa biex jintlaħqu l-objettivi, kif ukoll huma l-aktar xierqa.
Il-proposta tiffoka fuq l-attivitajiet tal-fornituri tal-klassifikazzjonijiet ESG li joperaw fl-UE. Hija tindirizza n-nuqqasijiet tas-suq, jiġifieri: (a) in-nuqqas ta’ ċarezza dwar il-karatteristiċi tal-klassifikazzjonijiet ESG, il-metodoloġiji użati u s-sorsi tad-data, u (b) in-nuqqas ta’ ċarezza dwar l-operazzjonijiet tal-fornituri tal-klassifikazzjonijiet ESG u l-kontroll tagħhom.
Din il-proposta ma tmurx lil hinn minn dak li huwa meħtieġ biex tindirizza u tirrimedja kull waħda minn dawn il-kwistjonijiet bl-aktar mod effettiv, jiġifieri billi: (1) toħloq sistema ta’ awtorizzazzjoni li tkun tapplika għall-fornituri tal-klassifikazzjonijiet ESG li joperaw fl-UE, billi tissoġġettahom għal regoli proporzjonati li jirregolaw l-operazzjonijiet tagħhom u s-superviżjoni proporzjonata li għaddejja, u (2) titlob lill-fornituri tal-klassifikazzjonijiet ESG li joperaw fl-UE jippubblikaw informazzjoni ewlenija dwar il-karatteristiċi u l-metodoloġiji tal-klassifikazzjonijiet ESG, u jiddivulgaw informazzjoni metodoloġika granulari lill-abbonati tagħhom u lill-entitajiet ikklassifikati.
Din il-proposta ma tinkludix klassifikazzjonijiet interni żviluppati minn maniġers tal-assi jew minn istituzzjonijiet oħrajn, bħall-amministraturi tal-parametri referenzjarji, minħabba li dawn jintużaw għad-deċiżjonijiet u l-investimenti proprji, ma jaqdux l-istess skop u ma humiex soġġetti għal divulgazzjoni pubblika jew distribuzzjoni b’abbonament jew b’mezzi oħrajn.
B’riżultat ta’ dan, din l-inizjattiva se tkun immirata lejn persuni ġuridiċi li jipprovdu klassifikazzjonijiet ESG lill-pubbliku jew lill-abbonati. Hija mhux se tkopri istituzzjonijiet finanzjarji jew parteċipanti oħrajn fis-suq li jiżviluppaw klassifikazzjonijiet ESG għall-finijiet tagħhom stess jew għall-użu tagħhom stess.
•Għażla tal-istrument
Din il-proposta għandha l-għan li tistabbilixxi sistema li ttejjeb iċ-ċarezza fir-rigward tal-karatteristiċi tal-klassifikazzjonijiet ESG. Għal dak il-għan, hija tistabbilixxi regoli għall-fornituri tal-klassifikazzjonijiet ESG li joperaw fl-UE. Il-proposta tfittex li tagħmilha aktar faċli li jiġi sfruttat aħjar il-potenzjal tas-suq uniku Ewropew u li tikkontribwixxi għat-tranżizzjoni lejn sistema ekonomika u finanzjarja kompletament sostenibbli u inklużiva f’konformità mal-Patt Ekoloġiku Ewropew u mal-Għanijiet ta’ Żvilupp Sostenibbli tan-NU. Huwa meħtieġ regolament biex jintlaħqu dawn l-objettivi ta’ politika u dan huwa l-aħjar mod biex tittejjeb iċ-ċarezza fir-rigward tal-operazzjonijiet minn entitajiet li huma dejjem aktar importanti għad-direzzjonar tal-finanzjament.
Qafas regolatorju jkun allinjat mal-approċċ meħud għal parteċipanti oħrajn fis-suq finanzjarju u mal-leġiżlazzjoni rilevanti, eż. ir-Regolament dwar il-Parametri Referenzjarji tal-UE, ir-Regolament dwar l-Aġenziji tal-Klassifikazzjoni tal-Kreditu u l-proposta standard tal-Bonds Ekoloġiċi tal-UE li jipprevedu superviżjoni kontinwa u jistabbilixxu għadd ta’ rekwiżiti organizzazzjonali u rekwiżiti li jikkonċernaw il-proċessi u d-dokumenti ta’ governanza. Għodod oħrajn, bħal miżuri ta’ liġi mhux vinkolanti u kodiċijiet ta’ kondotta, jilħqu biss parzjalment l-objettivi ta’ din l-inizjattiva, billi ma jkun hemm l-ebda inċentiv biex jiġi prodott kodiċi ta’ kondotta rigoruż biżżejjed. Il-pressjonijiet eżistenti tas-suq jiddeterminaw ir-rigorożità u l-komprensività ta’ kodiċi, u dawk il-pressjonijiet urew li ma humiex biżżejjed biex jindirizzaw il-problemi. Barra minn hekk, kodiċi ta’ kondotta jkun volontarju. Xi fornituri jistgħu jagħżlu li ma jadottawhx, jew jistgħu jinħolqu kodiċijiet multipli tal-industrija. Iż-żewġ każijiet jimminaw kwalunkwe prospett ta’ ċarezza akbar fis-suq għall-utenti jew għall-entitajiet ikklassifikati.
3.IR-RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
•Evalwazzjonijiet ex post/kontrolli tal-idoneità tal-leġiżlazzjoni eżistenti
Mhux applikabbli.
Bħalissa ma hemm l-ebda reġim legali fil-livell tal-UE għall-klassifikazzjonijiet ESG.
•Konsultazzjonijiet mal-partijiet ikkonċernati
Il-Kummissjoni ġabret ammont sinifikanti ta’ evidenza minn sorsi differenti, inkluż studju kkummissjonat mid-Direttorat Ġenerali tal-Kummissjoni Ewropea għall-Istabbiltà Finanzjarja, is-Servizzi Finanzjarji u l-Unjoni tas-Swieq Kapitali (DĠ FISMA), konsultazzjoni tal-Kummissjoni u attivitajiet ta’ sensibilizzazzjoni u skambji mal-partijiet ikkonċernati. L-Awtorità Ewropea tat-Titoli u s-Swieq (ESMA) appoġġat ukoll il-ħidma tal-Kummissjoni permezz ta’ sejħa għal evidenza ppubblikata fl-2022 u pprovdiet immappjar tal-fornituri ta’ klassifikazzjonijiet ESG li joperaw fl-UE. Il-Kummissjoni analizzat ukoll ir-rakkomandazzjonijiet u l-kodiċijiet internazzjonali eżistenti għall-fornituri tal-klassifikazzjonijiet ESG, b’mod partikolari r-rakkomandazzjonijiet mill-Organizzazzjoni Internazzjonali tal-Kummissjonijiet tat-Titoli (IOSCO). Total ta’ 168 organizzazzjoni u individwi privati wieġbu għall-konsultazzjoni mmirata li tappoġġa din l-inizjattiva, prinċipalment investituri, fornituri ta’ klassifikazzjonijiet ESG u kumpaniji elenkati.
•Ġbir u użu tal-għarfien espert
Sabiex tifhem aħjar il-problemi li s-suq qed jiffaċċja fil-prattika, u wara l-konsultazzjoni mmirata, il-Kummissjoni wettqet rieżami kbir tal-letteratura akkademika, tal-analiżi tas-suq u tal-attivitajiet ta’ sensibilizzazzjoni ma’ għadd kbir ta’ partijiet ikkonċernati ewlenin fis-suq tal-klassifikazzjonijiet ESG.
Bejn April u Ottubru 2022, il-Kummissjoni organizzat laqgħat bilaterali ma’ diversi partijiet ikkonċernati, inklużi 14-il fornitur differenti ta’ klassifikazzjonijiet ESG, utenti, u assoċjazzjonijiet li jirrappreżentaw, fost l-oħrajn, utenti tal-klassifikazzjoni, akkademiċi, organizzazzjonijiet mhux governattivi, korpi pubbliċi u awtoritajiet superviżorji.
Il-Kummissjoni organizzat ukoll telefonati regolari mal-ESMA għall-opinjoni u l-parir tagħha, inkluż dwar reġim potenzjali ta’ awtorizzazzjoni u superviżjoni għall-fornituri ta’ klassifikazzjonijiet ESG fil-livell tal-UE.
•Valutazzjoni tal-impatt
Din il-proposta hija akkumpanjata minn valutazzjoni tal-impatt, li ġiet sottomessa lill-Bord tal-Iskrutinju Regolatorju (RSB) fis-16 ta’ Novembru 2022 u rċeviet opinjoni pożittiva b’riżervi fis-16 ta’ Diċembru.
Il-valutazzjoni tal-impatt tikkonkludi li l-problema ewlenija hija doppja: filwaqt li l-investituri u l-impriżi jaraw kwistjonijiet dwar l-affidabbiltà, l-akkuratezza u l-puntwalità tal-klassifikazzjonijiet ESG, l-entitajiet ikklassifikati ma humiex ċerti liema kategoriji/kriterji jintużaw biex jivvalutawhom u kemm il-klassifikazzjonijiet ESG jirriflettu b’mod preċiż il-prestazzjoni attwali tagħhom u kif itejbuha.
Hemm diversi konsegwenzi ta’ din il-problema. Il-konsegwenzi mill-perspettiva ta’ utent huma:
(1)L-investituri ma jistgħux iqisu biżżejjed ir-riskji u l-opportunitajiet relatati mas-sostenibbiltà u oħrajn mhux finanzjarji fid-deċiżjonijiet ta’ investiment tagħhom,
(2)L-investituri huma wkoll inqas kapaċi li jidderieġu r-riżorsi finanzjarji lejn l-impriżi u l-attivitajiet ekonomiċi li jindirizzaw u ma jaggravawx il-problemi soċjali u ambjentali,
(3)L-amministraturi tal-parametri referenzjarji jibnu parametri referenzjarji bbażati fuq il-klassifikazzjonijiet ESG meta ma jkollhomx ċarezza sħiħa fuq kif dawn ġew ikkalkolati,
(4)L-impriżi ma jistgħux jikkunsidraw ir-riskji u l-opportunitajiet potenzjali kollha mill-attivitajiet tagħhom u jidderieġu l-investimenti kif xieraq.
Il-konsegwenza speċifika minn perspettiva ta’ entità kklassifikata hija li jistgħu jirċievu klassifikazzjoni ESG b’rabta ma’ elementi li huma skaduti jew mhux korretti, li jista’ jkollhom impatt fuq it-termini tal-aċċess tagħhom għall-finanzjament.
Il-konsegwenza speċifika mill-perspettiva ta’ partijiet ikkonċernati oħrajn hija li l-organizzazzjonijiet mhux governattivi, it-trade unions u partijiet ikkonċernati oħrajn huma inqas kapaċi li jżommu lill-impriżi responsabbli għall-impatti tagħhom fuq is-soċjetà u l-ambjent.
Il-problemi għandhom konsegwenzi negattivi għall-funzjonament tas-suq tal-finanzi sostenibbli tal-UE, li jħallu lakuna fil-qafas tal-finanzi sostenibbli tal-UE li ġie stabbilit biex jipprovdi aktar trasparenza u l-għodod sabiex il-kapital privat jiċċirkola lejn investimenti sostenibbli li huma meħtieġa b’mod urġenti għat-tranżizzjoni. Il-konsegwenzi usa’ huma li l-potenzjal tas-Suq Uniku Ewropew li jikkontribwixxi għall-objettivi tal-Patt Ekoloġiku Ewropew, u għall-ilħuq tal-Għanijiet ta’ Żvilupp Sostenibbli tan-NU, ma huwiex utilizzat bis-sħiħ.
Ġew identifikati żewġ kawżi komplementari tal-problema:
(1)Nuqqas ta’ ċarezza dwar l-operazzjonijiet tal-fornituri ta’ klassifikazzjonijiet ESG u l-kontroll tagħhom.
(2)In-nuqqas ta’ ċarezza dwar il-karatteristiċi tal-klassifikazzjonijiet ESG, il-metodoloġiji tagħhom u s-sorsi tad-data tagħhom (dan jinkludi kif jinħolqu u d-divulgazzjoni/it-trasparenza dwarhom), u
Il-valutazzjoni tal-impatt ikkunsidrat firxa ta’ għażliet ta’ politika għal żewġ varjabbli ewlenin:
·aktar ċarezza dwar l-operazzjonijiet tal-fornituri ta’ klassifikazzjonijiet ESG u l-prevenzjoni tar-riskji ta’ kunflitt ta’ interess fil-livell tal-fornituri ta’ klassifikazzjonijiet ESG, u
·il-ħtieġa li tittejjeb iċ-ċarezza tal-karatteristiċi tal-klassifikazzjonijiet ESG (jiġifieri xi jfissru u x’objettivi jsegwu, il-metodoloġiji u s-sorsi tad-data jew l-istimi użati għall-iżvilupp tagħhom).
Ġew analizzati diversi għażliet ta’ politika leġiżlattivi u mhux leġiżlattivi għaż-żewġ dimensjonijiet li ġejjin: entitajiet (fornituri ta’ klassifikazzjonijiet ESG) u prodotti (klassifikazzjonijiet ESG). Fir-rigward tat-trattament regolatorju tal-fornituri ta’ klassifikazzjonijiet ESG, it-tliet għażliet ikkunsidrati kienu kodiċi ta’ kondotta tal-industrija (Għażla 1), reġistrazzjoni u superviżjoni ħafifa (Għażla 2), u awtorizzazzjoni, rekwiżiti organizzazzjonali bbażati fuq il-prinċipji u superviżjoni bbażata fuq ir-riskju (Għażla 3). Fir-rigward tal-firxa tar-rekwiżiti ta’ trasparenza dwar il-klassifikazzjonijiet ESG u l-metodoloġiji tagħhom, iż-żewġ għażliet ikkunsidrati huma rekwiżiti minimi ta’ divulgazzjoni lill-pubbliku (Għażla 1) u rekwiżiti minimi ta’ divulgazzjoni lill-pubbliku u rekwiżiti ta’ divulgazzjoni aktar komprensivi lill-klijenti tal-fornituri ta’ klassifikazzjonijiet ESG u lill-entitajiet ikklassifikati (Għażla 2). L-analiżi tqis ukoll bir-reqqa l-kosteffettività u l-koerenza tagħhom. L-għażliet li ġejjin ġew skartati fi stadju bikri: ir-reġistrazzjoni u s-superviżjoni fil-livell nazzjonali, l-armonizzazzjoni tal-metodoloġiji tal-fornituri ta’ klassifikazzjonijiet ESG, l-iffissar ta’ rekwiżiti minimi dwar il-kontenut tal-klassifikazzjonijiet ESG u mudelli dettaljati għar-rekwiżiti ta’ divulgazzjoni.
Fir-rigward tal-kamp ta’ applikazzjoni, id-definizzjoni tal-klassifikazzjonijiet ESG mill-IOSCO tifforma l-bażi għall-kamp ta’ applikazzjoni ta’ din l-inizjattiva, li tkopri kemm il-punteġġi kif ukoll il-klassifikazzjonijiet, u prodotti li huma taħlita tat-tnejn. Din l-inizjattiva timmira lejn l-entitajiet speċjalizzati li jipprovdu klassifikazzjonijiet ESG jew punteġġi lill-pubbliku jew lill-abbonati u ma tkoprix istituzzjonijiet finanzjarji jew parteċipanti oħrajn fis-suq li jiżviluppaw klassifikazzjonijiet ESG għall-finijiet tagħhom stess, minħabba li jużaw il-mudelli proprjetarji tagħhom stess u ma jipprovdux il-klassifikazzjonijiet ESG kummerċjalment lil parteċipanti oħrajn fis-suq finanzjarju.
Abbażi tat-tqabbil tal-effettività, l-effiċjenza u l-koerenza, l-għażla ppreferuta tikkombina l-Għażla 3 dwar il-fornituri ta’ klassifikazzjonijiet ESG (awtorizzazzjoni, rekwiżiti organizzazzjonali u superviżjoni) flimkien mal-Għażla 2 dwar il-klassifikazzjonijiet ESG (divulgazzjonijiet minimi tat-trasparenza lill-pubbliku ġenerali u divulgazzjonijiet aktar komprensivi lill-klijenti ta’ fornituri ta’ klassifikazzjonijiet ESG u entitajiet ikklassifikati). L-analiżi dettaljata sabet li l-kombinazzjoni ta’ tali għażliet tindirizza bis-sħiħ l-objettivi (kuntrarju għall-għażliet l-oħrajn) u tirriżulta fl-ogħla benefiċċji għall-utenti u għall-entitajiet ikklassifikati, kif ukoll għall-fornituri nfushom u għas-soċjetà. Minkejja li l-għażla ppreferuta tista’ tinvolvi kostijiet bil-quddiem ogħla, fuq perjodu ta’ żmien twil il-benefiċċji huma mistennija li jisbqu l-kostijiet.
L-għażla ppreferuta hija mistennija li ġġib benefiċċji ekonomiċi sinifikanti. Din l-inizjattiva tkun mistennija li tinfluwenza b’mod pożittiv il-funzjonament tas-swieq finanzjarji u l-kundizzjonijiet għall-investiment ESG. L-għażla ppreferuta għandha tippermetti lill-investituri, u lill-entitajiet ikklassifikati, jifhmu u jagħmlu għażliet ESG infurmati rigward il-klassifikazzjonijiet. Hija għandha tnaqqas ukoll il-kost tal-ġbir tal-informazzjoni u l-ħtieġa li jintużaw fornituri addizzjonali, biex b’hekk jitnaqqas il-kost tan-negozju. L-għażla ppreferuta tkun ukoll mhux diskriminatorja u tapplika bl-istess mod għall-parteċipanti fis-swieq domestiċi u mhux tal-UE. Din l-inizjattiva jista’ jkollha impatt fuq il-kompetittività ġenerali tal-fornituri ta’ klassifikazzjonijiet ESG, li x’aktarx iżżid il-kost tan-negozju għalihom fuq perjodu ta’ żmien qasir, iżda ż-żieda fil-fiduċja fil-klassifikazzjonijiet ESG tista’ ttejjeb it-tkabbir tas-suq. Sabiex jittaffa t-tħassib potenzjali dwar it-telf ta’ aċċess għas-suq, jista’ jiġi previst perjodu tranżitorju, li jagħti lill-atturi iżgħar, b’mod partikolari, aktar żmien biex jaġġustaw. L-inizjattiva hija mistennija wkoll li jkollha impatti soċjali u ambjentali indiretti pożittivi, għalkemm marġinali.
•Idoneità regolatorja u simplifikazzjoni
Din l-inizjattiva ma hijiex inizjattiva tal-programm dwar l-idoneità u l-prestazzjoni tar-regolamentazzjoni (REFIT).
Sabiex jittaffew il-kostijiet u l-impatti ta’ rekwiżiti ġodda skont dan ir-Regolament fuq fornituri iżgħar, qed jiġu proposti l-miżuri ta’ mitigazzjoni li ġejjin.
(1)Perjodu ta’ tranżizzjoni. Sabiex jittaffa t-tħassib potenzjali dwar it-telf ta’ aċċess għall-fornituri tas-suq minħabba l-proċess ta’ awtorizzazzjoni, il-fornituri jitħallew ikomplu joperaw bil-kundizzjoni li jinnotifikaw lill-ESMA u jsiru awtorizzati f’perjodu ta’ żmien iddeterminat minn qabel, jiġifieri l-perjodu tranżitorju.
(2)Aġġustament tat-tariffi superviżorji għad-daqs tal-fornitur. It-tariffi jitqassmu b’mod proporzjonali bejn il-fornituri abbażi tal-fatturat nett annwali tagħhom.
(3)Superviżjoni proporzjonata. L-ESMA adottat approċċ ibbażat fuq ir-riskju u xprunat mid-data biex twettaq is-superviżjoni u tipprijoritizza l-attivitajiet superviżorji tagħha skont il-livell ta’ riskju identifikat u l-importanza/id-daqs tal-entitajiet issorveljati.
(4)Il-possibbiltà li entitajiet iżgħar u innovattivi japplikaw għal eżenzjoni minn firxa wiesgħa ta’ miżuri organizzattivi interni, jekk ikunu jistgħu juru li r-rekwiżiti huma sproporzjonati għan-natura, l-iskala u l-kumplessità tan-negozju tagħhom u għan-natura u l-firxa ta’ kwistjonijiet ivvalutati mill-prodott tagħhom (eż. analizzatur xprunat mid-data jew analizzatur innovattiv li jħares ’il quddiem).
•Drittijiet fundamentali
Il-proposta tirrispetta d-drittijiet u l-prinċipji stabbiliti fil-Karta tad-Drittijiet Fundamentali tal-Unjoni Ewropea, b’mod partikolari dawk fl-Artikolu 16 (il-libertà ta’ intrapriża). Il-moviment liberu tal-persuni, tas-servizzi u tal-istabbiliment huwa wieħed mid-drittijiet u l-libertajiet bażiċi protetti mit-Trattat dwar l-Unjoni Ewropea u mit-Trattat dwar il-Funzjonament tal-Unjoni Ewropea u huwa rilevanti għal din il-miżura.
4.IMPLIKAZZJONIJIET BAĠITARJI
Din il-proposta tagħti s-setgħa lill-ESMA biex twettaq funzjoni ġdida, jiġifieri li tawtorizza u tissorvelja l-fornituri ta’ klassifikazzjonijiet ESG li jipprovdu s-servizzi tagħhom skont dan ir-Regolament. Din se tirrikjedi li l-ESMA timponi tariffi fuq il-fornituri ta’ klassifikazzjonijiet ESG, li għandhom ikopru l-kostijiet amministrattivi kollha mġarrba mill-ESMA għall-attivitajiet ta’ awtorizzazzjoni u superviżjoni tagħha. Id-daqs tas-suq huwa ta’ 59 entità: 30 fornitur ESG ibbażati fl-UE (3 kbar, 6 ta’ daqs medju, 9 żgħar u 12 mikro); u 29 entità mhux tal-UE. Abbażi tal-istima li l-ESMA jkollha bżonn 1,7 ekwivalent full-time (FTEs) biex tissorvelja fornitur kbir ta’ klassifikazzjonijiet ESG u 0,2 FTEs biex tissorvelja fornitur żgħir ta’ klassifikazzjonijiet ESG, aħna kkalkolajna l-ħtieġa għal 20 FTE kull sena. Abbażi tal-istess stima, l-ESMA tkun teħtieġ 7 karigi ta’ persunal temporanju (AC) u 12-il kariga ta’ CA għall-awtorizzazzjoni ta’ 30 entità tal-UE u 29 entità mhux tal-UE, u s-superviżjoni ta’ 30 entità tal-UE u 29 entità mhux tal-UE li jibdew mis-sena N+1. Aħna nikkunsidraw li x’aktarx se jkun hemm l-ogħla livell ta’ xogħol ta’ darba fl-ewwel sena (sena N) relatat mal-awtorizzazzjoni. Għalhekk, huwa importanti li l-ESMA tingħata d-19 FTE mill-bidu nett, sabiex timmaniġġa dan il-perjodu.
Iż-żieda totali fil-kost annwali hija stmata li tkun madwar EUR 3,7-3,8 miljun. Dan il-kost mhux se jitħallas mill-baġit tal-UE, minħabba li l-proposta se tippermetti lill-ESMA timponi tariffi ta’ awtorizzazzjoni u superviżjoni fuq il-fornituri ta’ klassifikazzjonijiet ESG, sabiex tkopri l-kostijiet superviżorji kollha. Dan huwa simili għal oqsma oħrajn, fejn l-ESMA hija responsabbli għas-sorveljanza ta’ ċerti entitajiet (eż. aġenziji ta’ klassifikazzjoni tal-kreditu). Għal aktar dettalji, jekk jogħġbok ara d-Dikjarazzjoni Leġiżlattiva Finanzjarja.
5.ELEMENTI OĦRAJN
•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar
Il-Kummissjoni se tiżgura li l-azzjonijiet magħżula f’dan ir-Regolament jikkontribwixxu biex jintlaħqu l-objettivi ta’ politika b’taħlita ta’ elementi speċifiċi ta’ monitoraġġ maħsuba biex titkejjel l-effiċjenza fl-implimentazzjoni u l-progress lejn objettivi speċifiċi, iżda wkoll għodod oħrajn ta’ monitoraġġ li jikkontribwixxu għall-objettivi ġenerali. Dawk l-elementi u l-għodod huma deskritti aktar hawn taħt. Sabiex timmonitorja l-progress lejn l-ilħuq tal-objettivi speċifiċi, il-Kummissjoni se tesplora l-possibbiltà li torganizza stħarriġ perjodiku tal-investituri, tal-impriżi u tal-fornituri ta’ klassifikazzjonijiet ESG.
L-istħarriġ jiġbor data dwar: (1) il-perċezzjonijiet tal-utenti u tal-entitajiet ikklassifikati dwar il-bidliet fl-informazzjoni disponibbli b’mod partikolari fir-rigward tal-objettivi speċifiċi identifikati fit-Taqsima 4, u l-perċezzjonijiet dwar jekk dawk l-objettivi humiex qed jintlaħqu; u (2) il-kostijiet u l-benefiċċji tar-regolamentazzjoni u s-sorveljanza tal-klassifikazzjonijiet ESG mill-perspettiva ta’ fornitur ta’ klassifikazzjonijiet ESG. Tali stħarriġ se jkun jiddependi mid-disponibbiltà tar-riżorsi finanzjarji.
Il-progress lejn l-ilħuq tal-objettivi speċifiċi jista’ wkoll jiġi mmonitorjat permezz ta’ għadd ta’ indikaturi, bħall-għadd ta’ klassifikazzjonijiet ESG li saru disponibbli, it-tkabbir fl-użu tal-klassifikazzjonijiet ESG mill-utenti u mill-emittenti u ż-żieda fil-korrelazzjoni ġenerali bejn il-klassifikazzjonijiet ESG.
Il-monitoraġġ tal-progress lejn l-ilħuq tal-objettivi ġenerali huwa, minnu nnifsu, konsiderevolment aktar kumpless, minħabba li huwa metodoloġikament diffiċli li ssir distinzjoni bejn l-impatti tal-miżuri proposti fuq il-klassifikazzjonijiet ESG minn fatturi possibbli oħrajn. Madankollu, il-Kummissjoni tipproponi li timmonitorja l-progress fir-rigward tal-objettivi ġenerali billi:
–timmonitorja x-xejriet fl-investimenti f’impriżi li jwettqu attivitajiet ekonomiċi sostenibbli, li jkopru aspetti ambjentali, soċjali u ta’ governanza;
–tinvolvi ruħha ma’ superviżuri u partijiet ikkonċernati rilevanti oħrajn biex tivvaluta jekk it-tħassib ta’ greenwashing li jinvolvi l-klassifikazzjonijiet ESG huwiex qed jitnaqqas.
Jista’ jkun possibbli wkoll li jintuża l-istħarriġ propost tal-investituri, l-impriżi u l-fornituri tal-klassifikazzjonijiet ESG biex tinġabar evidenza dwar jekk il-partijiet ikkonċernati jipperċepux li l-fornituri ta’ klassifikazzjonijiet ESG huma aktar responsabbli għall-attivitajiet tagħhom.
Bħala superviżur tal-fornituri ta’ klassifikazzjonijiet ESG taħt din l-inizjattiva, l-ESMA tkun il-korp xieraq biex tqis l-iżviluppi u tenfasizza kwistjonijiet potenzjali ta’ tħassib, tikkollabora mal-awtoritajiet nazzjonali rilevanti fl-Istat Membru fejn jintużaw il-klassifikazzjonijiet ESG u fejn il-fornituri ta’ klassifikazzjonijiet ESG ikunu jinsabu u jkollhom l-operazzjonijiet tagħhom.
Barra minn hekk, diversi partijiet ikkonċernati, inklużi organizzazzjonijiet tas-soċjetà ċivili, fornituri ta’ klassifikazzjonijiet ESG, organizzazzjonijiet tan-negozju u awtoritajiet pubbliċi, x’aktarx jippubblikaw rapporti li jimmonitorjaw l-iżviluppi f’dan il-qasam, li se jkunu komplement utli għall-monitoraġġ imwettaq mill-Kummissjoni.
Kemm l-indikaturi ta’ hawn fuq kif ukoll l-istħarriġ se jgħinu biex jiġi evalwat jekk l-għażla ta’ politika ppreferuta hux se jirnexxila tilħaq l-objettivi speċifikati. Dawn l-indikaturi mbagħad se jservu bħala bażi għal evalwazzjoni li għandha tiġi ppreżentata mhux aktar tard minn 5 snin wara d-dħul fis-seħħ ta’ din l-inizjattiva. L-abbozz ta’ proposta se jkun fih ukoll impenn biex jiġu evalwati l-impatti tal-att leġiżlattiv il-ġdid. Il-Kummissjoni se tibda timmonitorja l-implimentazzjoni tal-għażla ta’ politika ppreferuta wara d-dħul fis-seħħ tal-inizjattiva.
•Dokumenti ta’ spjegazzjoni (għad-direttivi)
•Spjegazzjoni fid-dettall tad-dispożizzjonijiet speċifiċi tal-proposta (li għandha timtela meta tintalab ċarezza dwar in-numerazzjoni/l-ordni mill-ġdid tal-artikoli)
It-Titolu I jistabbilixxi s-suġġett, il-kamp ta’ applikazzjoni u d-definizzjonijiet applikabbli għar-Regolament. L-Artikolu 1 jistabbilixxi s-suġġett tar-Regolament, jiġifieri l-introduzzjoni ta’ approċċ regolatorju komuni biex jittejbu l-integrità, it-trasparenza, ir-responsabbiltà, il-governanza tajba u l-indipendenza tal-attivitajiet ta’ klassifikazzjoni ESG, li jikkontribwixxi għat-trasparenza u l-kwalità tal-klassifikazzjonijiet ESG ipprovduti lil impriżi finanzjarji Ewropej regolati u impriżi Ewropej. Ir-Regolament jistabbilixxi wkoll rekwiżiti ta’ trasparenza relatati mal-klassifikazzjonijiet ESG u r-regoli dwar l-organizzazzjoni u l-kondotta tal-fornituri ta’ klassifikazzjonijiet ESG. L-Artikolu 2 huwa relatat mal-kamp ta’ applikazzjoni ta’ dan ir-Regolament, li japplika għall-attivitajiet ta’ klassifikazzjoni ESG ipprovduti mill-fornituri ta’ klassifikazzjonijiet ESG li joperaw fl-UE. L-Artikolu 3 jistabbilixxi d-definizzjonijiet għall-finijiet ta’ dan ir-Regolament.
It-Titolu II tar-Regolament jistabbilixxi l-kundizzjonijiet għall-forniment ta’ klassifikazzjonijiet ESG fl-Unjoni.
L-Artikoli minn 4 sa 8 jistabbilixxu rekwiżiti relatati mal-proċess għall-awtorizzazzjoni tal-fornituri ta’ klassifikazzjonijiet ESG, inkluża s-sottomissjoni ta’ applikazzjoni għall-awtorizzazzjoni, l-eżami tagħha, in-notifika ta’ deċiżjoni ta’ awtorizzazzjoni, rifjut jew irtirar ta’ awtorizzazzjoni mill-ESMA. L-Artikoli minn 9 sa 12 jistabbilixxu regoli dwar il-forniment ta’ klassifikazzjonijiet ESG fl-UE minn fornituri ta’ klassifikazzjonijiet ESG ta’ pajjiżi terzi. L-Artikolu 9 jistabbilixxi r-rekwiżiti relatati mad-deċiżjonijiet dwar l-ekwivalenza, filwaqt li l-Artikolu 10 ikopri r-rekwiżiti dwar l-approvazzjoni tal-klassifikazzjonijiet ESG u l-Artikolu 11 jistabbilixxi r-rekwiżiti dwar il-proċess ta’ rikonoxximent. L-Artikolu 12 jikkonċerna l-arranġamenti ta’ kooperazzjoni bejn l-ESMA u l-awtoritajiet superviżorji ta’ pajjiżi terzi. L-Artikolu 13 jintroduċi rekwiżit sabiex l-ESMA żżomm reġistru fuq is-sit web tagħha bil-fornituri awtorizzati kollha ta’ klassifikazzjonijiet ESG u jipprevedi rekwiżiti dwar l-aċċessibbiltà tal-informazzjoni fuq il-Punt ta’ Aċċess Uniku Ewropew (ESAP).
It-Titolu III tar-Regolament jistabbilixxi l-prinċipji dwar l-integrità u l-affidabbiltà tal-attivitajiet ta’ klassifikazzjoni ESG.
Il-Kapitolu 1 jiddetermina r-rekwiżiti, il-proċessi u d-dokumenti organizzattivi dwar il-governanza għall-attivitajiet ta’ klassifikazzjoni ESG. L-Artikolu 14 jistabbilixxi l-prinċipji ġenerali li għandhom jiġu segwiti mill-fornituri ta’ klassifikazzjonijiet ESG, inkluża l-ħtieġa li jintużaw sistemi, riżorsi u proċeduri xierqa u li tiġi żgurata l-indipendenza tal-attivitajiet. L-Artikolu 15 jitlob li l-attivitajiet ta’ klassifikazzjoni ESG jiġu separati minn għadd ta’ attivitajiet, inkluż il-forniment ta’ attivitajiet ta’ konsultazzjoni, il-ħruġ u l-bejgħ ta’ klassifikazzjonijiet ta’ kreditu u l-iżvilupp ta’ parametri referenzjarji. L-Artikolu 16 jistabbilixxi f’aktar dettall l-obbligi għall-analisti tal-klassifikazzjoni, għall-impjegati u għal persuni oħrajn involuti fil-forniment ta’ klassifikazzjonijiet ESG. L-Artikolu 17 jintroduċi rekwiżiti dwar iż-żamma tar-rekords relatati mal-attivitajiet ta’ klassifikazzjoni ESG. L-Artikolu 18 imbagħad jistabbilixxi l-obbligi għall-fornituri ta’ klassifikazzjonijiet ESG li jkollhom proċedura indipendenti tal-ilmenti stabbilita biex jiżguraw li l-partijiet ikkonċernati jkunu jistgħu jinnotifikawhom bl-ilmenti u li l-fornitur ta’ klassifikazzjonijiet ESG jevalwa b’mod oġġettiv il-merti ta’ kwalunkwe lment. L-Artikolu 19 jintroduċi rekwiżiti u salvagwardji relatati mal-esternalizzazzjoni ta’ xi funzjonijiet relatati mal-attivitajiet ta’ klassifikazzjoni ESG lil partijiet terzi. L-Artikolu 20 jistabbilixxi eżenzjonijiet fuq ir-rekwiżiti ta’ governanza li jistgħu jingħataw mill-ESMA lil dawk il-fornituri ta’ klassifikazzjonijiet ESG li qegħdin jissodisfaw il-kriterji partikolarment relatati mad-daqs tagħhom.
Il-Kapitolu 2 ikopri r-rekwiżiti ta’ trasparenza tal-attivitajiet ta’ klassifikazzjoni ESG. L-Artikolu 21 jintroduċi r-rekwiżiti ta’ trasparenza fuq l-attivitajiet ta’ klassifikazzjoni ESG li għandhom isiru disponibbli għall-pubbliku. L-Artikolu 22 jintroduċi rekwiżiti ta’ trasparenza fuq l-attivitajiet ta’ klassifikazzjoni ESG li għandhom isiru disponibbli għall-abbonati tal-klassifikazzjonijiet ESG u għall-entitajiet ikklassifikati.
Il-Kapitolu 3 jistabbilixxi obbligi relatati mal-indipendenza u l-kunflitti ta’ interess tal-fornituri ta’ klassifikazzjonijiet ESG. L-Artikolu 23 jitlob li l-fornituri ta’ klassifikazzjonijiet ESG ikollhom fis-seħħ arranġamenti ta’ governanza robusti li jinkludu struttura organizzattiva ċara bi rwoli u responsabbiltajiet definiti sewwa, trasparenti u konsistenti għall-persuni kollha involuti fil-forniment ta’ klassifikazzjoni ESG. L-Artikolu 24 jistabbilixxi r-rekwiżiti dwar il-ġestjoni ta’ kunflitti ta’ interess potenzjali mill-impjegati involuti fil-forniment ta’ klassifikazzjonijiet ESG. L-Artikolu 25 jistabbilixxi l-obbligi li t-tariffi tal-klassifikazzjonijiet ESG li jintalbu lill-klijenti jkunu ġusti, raġonevoli, trasparenti, mhux diskriminatorji u bbażati fuq il-kostijiet attwali.
L-Artikoli minn 26 sa 39 tal-Kapitolu 4 jistabbilixxu s-setgħat tal-ESMA fir-rigward tas-superviżjoni tal-fornituri ta’ klassifikazzjonijiet ESG. Dawn jinkludu s-setgħa li tintalab informazzjoni b’talba sempliċi jew b’deċiżjoni, is-setgħa li jsiru investigazzjonijiet ġenerali u s-setgħa li jsiru spezzjonijiet fuq il-post. Il-kapitolu jistabbilixxi wkoll il-kundizzjonijiet li taħthom l-ESMA tista’ teżerċita s-setgħat superviżorji tagħha. Diversi dispożizzjonijiet jispeċifikaw il-miżuri superviżorji, il-multi u l-penali perjodiċi li tista’ timponi l-ESMA. L-ESMA għandha wkoll il-possibbiltà li timponi tariffi għall-awtorizzazzjoni u s-superviżjoni.
Il-Kapitolu 5 jistabbilixxi prinċipji dwar il-kooperazzjoni bejn l-ESMA u l-awtoritajiet nazzjonali kompetenti.
It-Titolu IV dwar l-Atti Delegati u ta’ Implimentazzjoni jagħti lill-Kummissjoni s-setgħa li tadotta atti delegati soġġetti għall-kundizzjonijiet stabbiliti fl-Artikolu 45.
It-Titolu V dwar id-dispożizzjonijiet tranżitorji u finali jistabbilixxi d-data sa meta l-fornituri ta’ klassifikazzjonijiet ESG għandhom japplikaw għall-awtorizzazzjoni, filwaqt li jipprevedi wkoll perjodu tranżitorju għall-fornituri ta’ klassifikazzjonijiet ESG żgħar u ta’ daqs medju li qed joffru s-servizzi tagħhom qabel id-dħul fis-seħħ tar-Regolament. Huwa jintroduċi wkoll perjodu tranżitorju għal parteċipanti ġodda fis-suq li huma fornituri ta’ klassifikazzjonijiet ESG żgħar u ta’ daqs medju.
2023/0177 (COD)
Proposta għal
REGOLAMENT TAL-PARLAMENT EWROPEW U TAL-KUNSILL
dwar it-trasparenza u l-integrità tal-attivitajiet ta’ klassifikazzjoni Ambjentali, Soċjali u ta’ Governanza (ESG)
(Test b’rilevanza għaż-ŻEE)
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea u, b’mod partikolari, l-Artikolu 114 tiegħu,
Wara li kkunsidraw il-proposta tal-Kummissjoni Ewropea,
Wara li l-abbozz tal-att leġiżlattiv intbagħat lill-parlamenti nazzjonali,
Wara li kkunsidraw l-opinjoni tal-Kumitat Ekonomiku u Soċjali Ewropew,
Filwaqt li jaġixxu skont il-proċedura leġiżlattiva ordinarja,
Billi:
(1)Fil-25 ta’ Settembru 2015, l-Assemblea Ġenerali tan-NU adottat qafas globali ġdid għall-iżvilupp sostenibbli: l-Aġenda 2030 għall-Iżvilupp Sostenibbli, li għandha fil-qalba tagħha l-Għanijiet ta’ Żvilupp Sostenibbli (SDGs). Il-Komunikazzjoni tal-Kummissjoni tal-2016 dwar il-passi li jmiss għal ġejjieni Ewropew sostenibbli torbot l-SDGs mal-qafas ta’ politika tal-Unjoni biex jiġi żgurat li l-azzjonijiet u l-inizjattivi ta’ politika kollha tal-Unjoni, fl-Unjoni u globalment, jikkunsidraw l-SDGs mill-bidu nett. Il-konklużjonijiet tal-Kunsill Ewropew tal-20 ta’ Ġunju 2017 ikkonfermaw l-impenn tal-Unjoni u tal-Istati Membri għall-implimentazzjoni tal-Aġenda 2030 b’mod sħiħ, koerenti, komprensiv, integrat u effettiv u f’kooperazzjoni mill-qrib mas-sħab u ma’ partijiet ikkonċernati oħrajn. Fil-11 ta’ Diċembru 2019, il-Kummissjoni ppubblikat il-komunikazzjoni tagħha dwar “Il-Patt Ekoloġiku Ewropew”.
(2)It-tranżizzjoni lejn ekonomija sostenibbli hija kruċjali biex tiġi żgurata l-kompetittività fit-tul tal-ekonomija tal-Unjoni. Is-sostenibbiltà ilha għal żmien twil fil-qalba tal-proġett tal-Unjoni u t-Trattati tal-Unjoni jagħtu rikonoxximent lid-dimensjonijiet soċjali u ambjentali tagħha.
(3)L-ilħuq tal-SDGs fl-Unjoni jirrikjedi d-direzzjonar tal-flussi tal-kapital lejn investimenti sostenibbli. Huwa importanti li jiġi sfruttat bis-sħiħ il-potenzjal tas-suq intern għall-ilħuq ta’ dawk l-għanijiet. F’dak il-kuntest, huwa kruċjali li jitneħħew l-ostakli għall-moviment effiċjenti tal-kapital lejn investimenti sostenibbli fis-suq intern u li jiġi evitat li jitfaċċaw ostakli bħal dawn.
(4)L-approċċ tal-UE għal tkabbir sostenibbli u inklużiv huwa msejjes fl-20 prinċipju tal-Pilastru Ewropew tad-Drittijiet Soċjali biex tiġi żgurata tranżizzjoni ġusta lejn dan l-għan u politiki li ma jħallu lil ħadd jaqa’ lura. Barra minn hekk, l-acquis soċjali tal-UE, li jinkludi l-Istrateġiji tal-Unjoni tal-Ugwaljanza, jipprovdi standards fl-oqsma tal-liġi tax-xogħol, l-ugwaljanza, l-aċċessibbiltà, is-saħħa u s-sikurezza fuq il-post tax-xogħol, u l-ġlieda kontra d-diskriminazzjoni.
(5)F’Marzu 2018, il-Kummissjoni ppubblikat il-Pjan ta’ Azzjoni tagħha “Finanzjament tat-Tkabbir Sostenibbli”, li jistabbilixxi l-istrateġija tagħha dwar il-finanzi sostenibbli. L-objettivi ta’ dak il-Pjan ta’ Azzjoni huma li l-fatturi ta’ sostenibbiltà jiġu integrati fil-ġestjoni tar-riskju u li l-flussi tal-kapital jiġu orjentati mill-ġdid lejn investiment sostenibbli biex jinkiseb tkabbir sostenibbli u inklużiv.
(6)Bħala parti mill-Pjan ta’ Azzjoni, il-Kummissjoni kkummissjonat studju intitolat “Studju dwar il-Klassifikazzjonijiet, id-Data u r-Riċerka Relatati mas-Sostenibbiltà” biex tqis l-iżviluppi fis-suq tal-prodotti u tas-servizzi relatati mas-sostenibbiltà, tidentifika l-parteċipanti ewlenin fis-suq u tenfasizza n-nuqqasijiet potenzjali. Dak l-istudju pprovda inventarju u klassifikazzjoni tal-atturi tas-suq, il-prodotti u s-servizzi ta’ sostenibbiltà disponibbli fis-suq u analiżi tal-użu u tal-kwalità perċepita tal-prodotti u s-servizzi relatati mas-sostenibbiltà mill-parteċipanti fis-suq. L-istudju enfasizza n-nuqqas ta’ trasparenza u akkuratezza tal-metodoloġiji tal-klassifikazzjonijiet Ambjentali, Soċjali u ta’ Governanza (“ESG”) u n-nuqqas ta’ ċarezza fuq l-operazzjonijiet tal-fornituri ta’ klassifikazzjonijiet ESG.
(7)Fil-qafas tal-Patt Ekoloġiku Ewropew, il-Kummissjoni ressqet strateġija sostenibbli mġedda. L-istrateġija mġedda għall-finanzi sostenibbli ġiet adottata fis-6 ta’ Lulju 2021
(8)Bħala segwitu, il-Kummissjoni ħabbret fl-istrateġija mġedda għall-finanzi sostenibbli, konsultazzjoni pubblika dwar il-klassifikazzjonijiet ESG biex tikkontribwixxi għal valutazzjoni tal-impatt. Fil-konsultazzjoni pubblika li saret fl-2022, il-partijiet ikkonċernati kkonfermaw tħassib dwar in-nuqqas ta’ trasparenza tal-metodoloġiji u l-objettivi tal-klassifikazzjonijiet ESG u ċarezza fuq l-attivitajiet ta’ klassifikazzjoni ESG.
(9)Fil-livell internazzjonali, l-Organizzazzjoni Internazzjonali tal-Kummissjonijiet tat-Titoli (“IOSCO”) ħarġet rapport f’Novembru 2021 li fih sett ta’ rakkomandazzjonijiet dwar il-fornituri ta’ klassifikazzjonijiet ESG.
(10)Il-klassifikazzjonijiet ESG għandhom rwol importanti fis-swieq kapitali globali, minħabba li l-investituri, il-mutwatarji u l-emittenti qed jużaw dejjem aktar dawk il-klassifikazzjonijiet ESG bħala parti mit-teħid ta’ deċiżjonijiet infurmati u sostenibbli dwar l-investiment u l-finanzjament. L-istituzzjonijiet ta’ kreditu, id-ditti tal-investiment, l-impriżi tal-assigurazzjoni, l-impriżi tal-assigurazzjoni fuq il-ħajja u l-impriżi tar-riassigurazzjoni, fost l-oħrajn, ta’ spiss jużaw dawk il-klassifikazzjonijiet ESG bħala referenza għall-prestazzjoni tas-sostenibbiltà jew għar-riskji u l-opportunitajiet tas-sostenibbiltà fl-attività tal-investiment tagħhom. Konsegwentement, il-klassifikazzjonijiet ESG għandhom impatt sinifikanti fuq l-operat tas-swieq u fuq il-fiduċja u l-kunfidenza tal-investituri u l-konsumaturi. Sabiex jiġi żgurat li l-klassifikazzjonijiet ESG użati fl-Unjoni jkunu indipendenti, oġġettivi u ta’ kwalità adegwata, huwa importanti li l-attivitajiet ta’ klassifikazzjoni ESG jitwettqu f’konformità mal-prinċipji ta’ integrità, trasparenza, responsabbiltà u governanza tajba. Komparabbiltà aħjar u affidabbiltà akbar tal-klassifikazzjonijiet ESG itejbu l-effiċjenza ta’ dak is-suq li qed jikber malajr, u b’hekk jiffaċilitaw il-progress lejn l-objettivi tal-Patt Ekoloġiku.
(11)Il-klassifikazzjonijiet ESG għandhom rwol abilitanti għall-funzjonament xieraq tas-suq tal-finanzi sostenibbli tal-Unjoni billi jipprovdu informazzjoni importanti għall-istrateġiji ta’ investiment, il-ġestjoni tar-riskju u l-obbligi ta’ divulgazzjoni minn investituri u istituzzjonijiet finanzjarji. Għalhekk, huwa meħtieġ li jiġi żgurat li l-klassifikazzjonijiet ESG jipprovdu informazzjoni materjali utli għad-deċiżjonijiet lill-utenti, u li l-utenti tal-klassifikazzjonijiet ESG jifhmu aħjar l-objettivi li jfittxu li jilħqu l-klassifikazzjonijiet ESG u xi kwistjonijiet u metriċi speċifiċi jkejlu dawk il-klassifikazzjonijiet.
(12)Huwa meħtieġ li jiġu rikonoxxuti d-diversi mudelli tan-negozju tas-suq tal-klassifikazzjonijiet ESG. L-ewwel mudell tan-negozju huwa l-mudell ta’ ħlas mill-utent, fejn l-utenti huma prinċipalment investituri li jixtru klassifikazzjonijiet ESG għal deċiżjonijiet ta’ investiment. It-tieni mudell tan-negozju huwa l-mudell ta’ ħlas mill-emittent, fejn l-impriżi jixtru klassifikazzjonijiet ESG għall-valutazzjoni tar-riskji u tal-opportunitajiet bl-operazzjonijiet tagħhom.
(13)L-Istati Membri la jirregolaw u lanqas jissorveljaw l-attivitajiet tal-fornituri ta’ klassifikazzjonijiet ESG jew il-kundizzjonijiet għall-forniment ta’ klassifikazzjonijiet ESG. Fl-iżgurar tal-allinjament mal-objettivi tal-SDGs u tal-Patt Ekoloġiku Ewropew, u minħabba d-diverġenzi eżistenti, in-nuqqas ta’ trasparenza u n-nuqqas ta’ regoli komuni, huwa probabbli li l-Istati Membri jadottaw miżuri u approċċi diverġenti, li jkollhom impatt negattiv dirett fuq il-funzjonament xieraq tas-suq intern u joħolqu ostakli għalih, u jkunu ta’ detriment għas-suq tal-klassifikazzjonijiet ESG. Il-fornituri ta’ klassifikazzjonijiet ESG li joħorġu klassifikazzjonijiet ESG għall-użu ta’ istituzzjonijiet u impriżi finanzjarji fl-Unjoni jkunu soġġetti għal regoli differenti fi Stati Membri differenti. Standards u prattiki tas-suq diverġenti jagħmluha diffiċli li jkun hemm ċarezza fuq il-kostruzzjoni tal-klassifikazzjonijiet ESG u jippermettu t-tqabbil tagħhom, biex b’hekk jinħolqu kundizzjonijiet tas-suq mhux uniformi għall-utenti, jikkawżaw ostakli addizzjonali fis-suq intern, u jirriskjaw li jfixklu d-deċiżjonijiet ta’ investiment.
(14)Dan ir-Regolament jikkomplementa l-qafas eżistenti tal-finanzi sostenibbli tal-UE. Fl-aħħar mill-aħħar, jenħtieġ li l-klassifikazzjonijiet ESG jiffaċilitaw il-flussi ta’ informazzjoni sabiex jiffaċilitaw id-deċiżjonijiet ta’ investiment.
(15)Jenħtieġ li r-regoli dwar il-fornituri ta’ klassifikazzjonijiet ESG ma japplikawx għal klassifikazzjonijiet ESG privati prodotti skont ordni individwali u pprovduti esklussivament lill-persuna li tkun għamlet l-ordni u li ma humiex maħsuba għal divulgazzjoni jew distribuzzjoni pubblika b’abbonament jew b’mezzi oħrajn. Lanqas ma jenħtieġ li dawn ir-regoli japplikaw għall-klassifikazzjonijiet ESG prodotti minn impriżi finanzjarji Ewropej li jintużaw għal skopijiet interni. Jenħtieġ li l-klassifikazzjonijiet ESG żviluppati mill-awtoritajiet Ewropej jew nazzjonali u mill-banek ċentrali jiġu eżentati wkoll minn tali regoli. Fl-aħħar nett, jenħtieġ li tali regoli ma japplikawx għall-forniment ta’ data ESG li ma tinkludix element ta’ klassifikazzjoni jew punteġġ u ma humiex soġġetti għal immudellar jew analiżi li jirriżultaw fl-iżvilupp ta’ klassifikazzjoni ESG.
(16)Huwa importanti li jiġu stabbiliti regoli li jiżguraw li l-klassifikazzjonijiet ESG ipprovduti mill-fornituri ta’ klassifikazzjonijiet ESG awtorizzati fl-Unjoni jkunu ta’ kwalità adegwata, ikunu soġġetti għal rekwiżiti xierqa u jiżguraw l-integrità tas-suq. Dawk ir-regoli jkunu japplikaw għall-klassifikazzjonijiet ESG ġenerali li jkopru fatturi Ambjentali, Soċjali u ta’ Governanza, u għal klassifikazzjonijiet li qed iħarsu biss lejn fattur Ambjentali, Soċjali jew ta’ Governanza uniku jew subkomponent ta’ dak il-fattur.
(17)Minħabba l-użu tal-klassifikazzjonijiet ESG minn fornituri li jinsabu barra mill-Unjoni, huwa meħtieġ li jiġu introdotti rekwiżiti bbażati fuq liema fornituri ta’ klassifikazzjonijiet ESG ta’ pajjiżi terzi jistgħu joffru s-servizzi tagħhom fl-Unjoni. Dan huwa meħtieġ biex jiġu żgurati l-integrità tas-suq, il-protezzjoni tal-investituri u l-infurzar xieraq. Għalhekk, qed jiġu proposti tliet reġimi possibbli għal dawk il-fornituri ta’ klassifikazzjonijiet ESG ta’ pajjiżi terzi: ekwivalenza, approvazzjoni u rikonoxximent. Bħala prinċipju ġenerali, jenħtieġ li s-superviżjoni u r-regolamentazzjoni f’pajjiż terz ikunu ekwivalenti għas-superviżjoni u r-regolamentazzjoni tal-Unjoni tal-klassifikazzjonijiet ESG. Għalhekk, il-klassifikazzjonijiet ESG ipprovduti minn fornitur ta’ klassifikazzjonijiet ESG li jinsab f’pajjiż terz jistgħu jiġu offruti biss fl-Unjoni meta tkun ittieħdet deċiżjoni pożittiva mill-Kummissjoni dwar l-ekwivalenza tar-reġim ta’ pajjiż terz. Madankollu, sabiex jiġi evitat kwalunkwe impatt negattiv li jirriżulta minn waqfien f’daqqa possibbli tal-offerta fl-Unjoni tal-klassifikazzjonijiet ESG ipprovduti minn fornitur ta’ klassifikazzjonijiet ESG ta’ pajjiż terz, huwa meħtieġ ukoll li jiġu previsti ċerti mekkaniżmi oħrajn, jiġifieri l-approvazzjoni u r-rikonoxximent. Kwalunkwe fornitur ta’ klassifikazzjonijiet ESG bi struttura ta’ grupp jenħtieġ li jkun jista’ juża l-mekkaniżmu ta’ approvazzjoni għall-klassifikazzjonijiet ESG żviluppati barra mill-Unjoni, diment li jistabbilixxi, fi ħdan il-grupp, fornitur ta’ klassifikazzjonijiet ESG awtorizzat fl-Unjoni. Fornituri iżgħar ta’ klassifikazzjonijiet ESG, skont it-tifsira tal-limitu massimu tal-fatturat nett biex jiġu definiti impriżi żgħar fid-Direttiva 2013/34/UE, li ġeneralment ma jkunux jappartjenu għal grupp, u li jista’ jkun li ma jkollhomx il-mezzi biex ikollhom entità ġuridika awtorizzata fl-Unjoni, jenħtieġ li jkunu jistgħu jkomplu jew jibdew joffru s-servizzi tagħhom fl-Unjoni u, għalhekk, jenħtieġ li jibbenefikaw minn reġim inqas strett, jiġifieri r-rikonoxximent. Meta l-fornitur ta’ klassifikazzjonijiet ESG ta’ pajjiż terz ikun soġġett għal superviżjoni, jenħtieġ li jiġu stabbiliti arranġamenti ta’ kooperazzjoni xierqa sabiex jiġi żgurat l-iskambju xieraq ta’ informazzjoni mal-awtorità kompetenti rilevanti tal-pajjiż terz.
(18)Sabiex jiġi żgurat livell għoli ta’ fiduċja tal-investituri u tal-konsumaturi fis-suq intern, jenħtieġ li l-fornituri ta’ klassifikazzjonijiet ESG li jipprovdu klassifikazzjonijiet ESG fl-Unjoni jiġu awtorizzati. Għalhekk, jeħtieġ li jiġu stabbiliti kundizzjonijiet armonizzati għal tali awtorizzazzjoni u l-proċedura għall-għoti, is-sospensjoni u l-irtirar ta’ tali awtorizzazzjoni.
(19)Sabiex jiġi żgurat livell għoli ta’ informazzjoni lill-investituri u lil utenti oħrajn tal-klassifikazzjonijiet ESG, jenħtieġ li l-informazzjoni dwar il-klassifikazzjonijiet ESG u l-fornituri ta’ klassifikazzjonijiet ESG tkun disponibbli fuq il-Punt ta’ Aċċess Uniku Ewropew (ESAP). Jenħtieġ li l-ESAP jipprovdi lill-pubbliku b’aċċess ċentralizzat faċli għal tali informazzjoni.
(20)Sabiex jiġu żgurati l-kwalità u l-affidabbiltà tal-klassifikazzjonijiet ESG, jenħtieġ li l-fornituri ta’ klassifikazzjonijiet ESG jużaw metodoloġiji ta’ klassifikazzjoni li jkunu rigorużi, sistematiċi, oġġettivi, kontinwi u soġġetti għal validazzjoni. Jenħtieġ li l-fornituri ta’ klassifikazzjonijiet ESG jirrieżaminaw il-metodoloġiji tal-klassifikazzjonijiet ESG fuq bażi kontinwa u mill-inqas kull sena.
(21)Sabiex tiġi żgurata trasparenza ta’ livell ogħla, jenħtieġ li l-fornituri ta’ klassifikazzjonijiet ESG jiddivulgaw informazzjoni lill-pubbliku dwar il-metodoloġiji, il-mudelli u s-suppożizzjonijiet ewlenin tal-klassifikazzjoni li dawk il-fornituri jużaw fl-attivitajiet ta’ klassifikazzjoni ESG tagħhom u f’kull wieħed mill-prodotti ta’ klassifikazzjoni ESG tagħhom. Fid-dawl tal-użi tal-klassifikazzjonijiet ESG mill-investituri, jenħtieġ li l-prodotti ta’ klassifikazzjoni jiddivulgaw b’mod espliċitu liema dimensjoni tal-materjalità doppja l-klassifikazzjoni tindirizza, kemm jekk hijiex riskju finanzjarju materjali għall-entità kklassifikata u l-impatt materjali tal-entità kklassifikata fuq l-ambjent u fuq is-soċjetà b’mod ġenerali, jew jekk tqisx wieħed biss minnhom. Jenħtieġ li dawn jiddivulgaw b’mod espliċitu jekk il-klassifikazzjoni tindirizzax dimensjonijiet oħrajn. Għall-istess raġuni, jenħtieġ li l-fornituri ta’ klassifikazzjonijiet ESG jipprovdu informazzjoni aktar dettaljata dwar il-metodoloġiji, il-mudelli u s-suppożizzjonijiet ewlenin tal-klassifikazzjoni lill-abbonati tal-klassifikazzjonijiet ESG. Jenħtieġ li dik l-informazzjoni tippermetti lill-utenti tal-klassifikazzjonijiet ESG iwettqu d-diliġenza dovuta tagħhom stess meta jivvalutaw jekk għandhomx jiddependu jew le fuq dawk il-klassifikazzjonijiet ESG. Madankollu, jenħtieġ li d-divulgazzjoni ta’ informazzjoni li tikkonċerna l-mudelli ma tiżvelax informazzjoni kummerċjali sensittiva u ma tfixkilx l-innovazzjoni.
(22)Jenħtieġ li l-fornituri ta’ klassifikazzjonijiet ESG jiżguraw li jipprovdu klassifikazzjonijiet ESG li jkunu indipendenti, oġġettivi u ta’ kwalità adegwata. Huwa importanti li jiġu introdotti rekwiżiti organizzazzjonali li jiżguraw il-prevenzjoni u l-mitigazzjoni ta’ kunflitti ta’ interess potenzjali. Sabiex tiġi żgurata l-indipendenza tagħhom, jenħtieġ li l-fornituri ta’ klassifikazzjonijiet ESG jevitaw sitwazzjonijiet ta’ kunflitt ta’ interess u jimmaniġġaw dawk il-kunflitti b’mod adegwat meta dawn ikunu inevitabbli. Jenħtieġ li l-fornituri ta’ klassifikazzjonijiet ESG jiddivulgaw il-kunflitti ta’ interess fil-ħin. Jenħtieġ li huma jżommu wkoll rekords tat-theddid sinifikanti kollu għall-indipendenza tal-fornitur ta’ klassifikazzjonijiet ESG u dik tal-impjegati tiegħu u ta’ persuni oħrajn involuti fil-proċess ta’ klassifikazzjoni, kif ukoll is-salvagwardji applikati biex jittaffa dak it-theddid. Barra minn hekk, sabiex jiġu evitati kunflitti ta’ interess potenzjali, jenħtieġ li l-fornituri ta’ klassifikazzjonijiet ESG ma jitħallewx joffru għadd ta’ servizzi oħrajn, inklużi servizzi ta’ konsulenza, klassifikazzjonijiet tal-kreditu, parametri referenzjarji, attivitajiet ta’ investiment, awditjar, jew attivitajiet bankarji, tal-assigurazzjoni u tar-riassigurazzjoni. Fl-aħħar nett, sabiex jiġi evitat, identifikat, eliminat jew immaniġġat u divulgat kwalunkwe kunflitt ta’ interess u sabiex jiġu żgurati l-kwalità, l-integrità u r-reqqa tal-proċess ta’ klassifikazzjoni u rieżami ESG f’kull ħin, jenħtieġ li l-fornituri ta’ klassifikazzjonijiet ESG jistabbilixxu politiki u proċeduri interni xierqa b’rabta mal-impjegati u ma’ persuni oħrajn involuti fil-proċess ta’ klassifikazzjoni. Jenħtieġ li tali politiki u proċeduri, b’mod partikulari, jinkludu mekkaniżmi ta’ kontroll intern u funzjoni ta’ konformità.
(23)Sabiex ikun hemm aktar ċarezza u tissaħħaħ il-fiduċja fl-operazzjonijiet tal-fornituri ta’ klassifikazzjonijiet ESG, huwa meħtieġ li jiġu stabbiliti rekwiżiti għas-superviżjoni kontinwa tal-fornituri ta’ klassifikazzjonijiet ESG fil-livell tal-Unjoni. Sabiex jiġu żgurati kundizzjonijiet ekwi f’termini ta’ superviżjoni kontinwa u jiġi eliminat ir-riskju ta’ arbitraġġ regolatorju madwar l-Istati Membri, jenħtieġ li l-Awtorità Ewropea tat-Titoli u s-Swieq (ESMA) tiġi fdata bir-responsabbiltà esklużiva għal tali awtorizzazzjoni u superviżjoni. Fl-istess ħin, jenħtieġ li tali responsabbiltà esklużiva tottimizza l-allokazzjoni tar-riżorsi superviżorji fil-livell tal-Unjoni, u b’hekk tagħmel lill-ESMA ċ-ċentru tas-superviżjoni.
(24)Jenħtieġ li l-ESMA tkun tista’ titlob l-informazzjoni kollha meħtieġa biex twettaq il-kompiti superviżorji tagħha b’mod effettiv. Għalhekk, jenħtieġ li hija tkun tista’ titlob tali informazzjoni mingħand il-fornituri ta’ klassifikazzjonijiet ESG, il-persuni involuti f’attivitajiet ta’ klassifikazzjoni ESG, l-entitajiet ikklassifikati u partijiet terzi li lilhom il-fornituri ta’ klassifikazzjonijiet ESG esternalizzaw funzjonijiet operattivi u persuni li b’xi mod ieħor huma relatati jew konnessi mill-qrib u sostanzjalment ma’ fornituri ta’ klassifikazzjonijiet ESG jew ma’ attivitajiet ta’ klassifikazzjoni ESG.
(25)Jenħtieġ li l-ESMA tkun tista’ twettaq il-kompiti superviżorji tagħha u, b’mod partikolari, sabiex il-fornituri ta’ klassifikazzjonijiet ESG jiġu mġiegħla jtemmu ksur, jipprovdu informazzjoni kompluta u korretta, jew jikkonformaw ma’ investigazzjoni jew spezzjoni fuq il-post. Sabiex jiġi żgurat li l-ESMA tkun tista’ twettaq dawk il-kompiti superviżorji, jenħtieġ li l-ESMA tkun tista’ timponi penali jew pagamenti perjodiċi ta’ penali.
(26)Minħabba r-rwol tagħha li tawtorizza u tissorvelja l-fornituri ta’ klassifikazzjonijiet ESG, jenħtieġ li l-ESMA tiżviluppa abbozzi ta’ standards tekniċi regolatorji li ma jinvolvux għażliet ta’ politika għas-sottomissjoni lill-Kummissjoni. Jenħtieġ li l-ESMA tispeċifika aktar l-informazzjoni meħtieġa għall-awtorizzazzjoni tal-fornituri ta’ klassifikazzjonijiet ESG. Jenħtieġ li l-Kummissjoni jkollha s-setgħa li tadotta dawk l-istandards tekniċi ta’ implimentazzjoni permezz ta’ atti delegati skont l-Artikolu 290 tat-TFUE u f’konformità mal-Artikoli minn 10 sa 14 tar-Regolament (UE) Nru 1095/2010 tal-Parlament Ewropew u tal-Kunsill.
(27)Fir-rwol tagħha li tawtorizza u tissorvelja l-fornituri ta’ klassifikazzjonijiet ESG, jenħtieġ li l-ESMA tkun tista’ titlob tariffi superviżorji lill-entitajiet taħt superviżjoni. Jenħtieġ li dawn it-tariffi jitħallsu mill-entitajiet taħt superviżjoni.
(28)Sabiex jiġu speċifikati aktar l-elementi tekniċi ta’ dan ir-Regolament, is-setgħa ta’ adozzjoni ta’ atti skont l-Artikolu 290 tat-Trattat dwar il-Funzjonament tal-Unjoni Ewropea jenħtieġ li tiġi delegata lill-Kummissjoni fir-rigward tal-ispeċifikazzjonijiet tal-proċedura li timponi multi jew pagamenti perjodiċi ta’ penali, inklużi dispożizzjonijiet dwar id-drittijiet ta’ difiża, dispożizzjonijiet temporali, il-ġbir ta’ multi jew pagamenti perjodiċi ta’ penali, u regoli dettaljati dwar il-perjodi ta’ limitazzjoni għall-impożizzjoni u l-infurzar ta’ penali u t-tip ta’ tariffi, il-kwistjonijiet li għalihom huma dovuti t-tariffi, l-ammont tat-tariffi, u l-mod li bih għandhom jitħallsu dawk it-tariffi. Huwa ta’ importanza partikolari li l-Kummissjoni twettaq konsultazzjonijiet xierqa matul il-ħidma preparatorja tagħha, inkluż fil-livell tal-esperti, u li dawk il-konsultazzjonijiet isiru f’konformità mal-prinċipji stabbiliti fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet. B’mod partikolari, sabiex tiġi żgurata parteċipazzjoni ugwali fit-tħejjija tal-atti delegati, jenħtieġ li l-Parlament Ewropew u l-Kunsill jirċievu d-dokumenti kollha fl-istess żmien bħall-esperti tal-Istati Membri, u jenħtieġ li l-esperti tagħhom sistematikament ikollhom aċċess għal-laqgħat tal-gruppi ta’ esperti tal-Kummissjoni li jittrattaw it-tħejjija tal-atti delegati.
(29)Huwa meħtieġ li jkun hemm għadd ta’ miżuri li jappoġġaw fornituri iżgħar ta’ klassifikazzjonijiet ESG biex ikunu jistgħu jkomplu l-attivitajiet tagħhom, jew jidħlu fis-suq wara d-data tal-applikazzjoni ta’ dan ir-Regolament. Jenħtieġ li tali miżuri jinkludu l-possibbiltà li l-ESMA teżenta lill-fornituri iżgħar ta’ klassifikazzjonijiet ESG minn għadd ta’ rekwiżiti organizzazzjonali meta jissodisfaw ċerti kriterji. Barra minn hekk, jenħtieġ li jiġi introdott reġim tranżitorju għall-ewwel xhur wara l-applikazzjoni ta’ dan ir-Regolament, sabiex tiġi ffaċilitata l-fażi inizjali ta’ applikazzjoni għal fornituri iżgħar ta’ klassifikazzjonijiet ESG. Fl-aħħar nett, jenħtieġ li t-tariffi superviżorji jkunu proporzjonati mal-fatturat nett annwali tal-fornitur ta’ klassifikazzjonijiet ESG ikkonċernat.
(30)Minħabba li l-objettivi ta’ dan ir-Regolament ma jistgħux jintlaħqu b’mod suffiċjenti mill-Istati Membri, jiġifieri li jistabbilixxu reġim konsistenti u effettiv biex jiġu indirizzati n-nuqqasijiet u l-vulnerabbiltajiet li joħolqu l-klassifikazzjonijiet ESG, iżda pjuttost jistgħu, minħabba l-iskala u l-effetti, jintlaħqu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju tal-proporzjonalità, kif stipulat f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jintlaħqu dawk l-objettivi.
(31)Jenħtieġ li dan ir-Regolament japplika mingħajr preġudizzju għall-applikazzjoni tal-Artikoli 101 u 102 tat-TFUE,
ADOTTAW DAN IR-REGOLAMENT
Titolu I
SUĠĠETT, KAMP TA’ APPLIKAZZJONI U DEFINIZZJONIJIET
Artikolu 1
Suġġett
Dan ir-Regolament jintroduċi approċċ regolatorju komuni biex jittejbu l-integrità, it-trasparenza, ir-responsabbiltà, il-governanza tajba u l-indipendenza tal-attivitajiet ta’ klassifikazzjoni ESG, u jikkontribwixxi għat-trasparenza u l-kwalità tal-klassifikazzjonijiet ESG. Huwa għandu l-għan li jikkontribwixxi għall-funzjonament bla xkiel tas-suq intern, filwaqt li jikseb livell għoli ta’ protezzjoni tal-konsumaturi u tal-investituri u jipprevjeni l-greenwashing jew tipi oħrajn ta’ miżinformazzjoni, inklużi l-ħasil soċjali, bl-introduzzjoni ta’ rekwiżiti ta’ trasparenza relatati mal-klassifikazzjonijiet ESG u r-regoli dwar l-organizzazzjoni u l-kondotta tal-fornituri ta’ klassifikazzjonijiet ESG.
Artikolu 2
Kamp ta’ applikazzjoni
1.Dan ir-Regolament japplika għall-klassifikazzjonijiet ESG maħruġa minn fornituri ta’ klassifikazzjonijiet ESG li joperaw fl-Unjoni li jiġu ddivulgati pubblikament jew li jitqassmu lil impriżi finanzjarji regolati fl-Unjoni, impriżi li jaqgħu fil-kamp ta’ applikazzjoni tad-Direttiva 2013/34/UE tal-Parlament Ewropew u tal-Kunsill, jew awtoritajiet pubbliċi tal-Unjoni jew tal-Istati Membri.
2.Dan ir-Regolament ma japplika għall-ebda waħda minn dawn li ġejjin:
(a)klassifikazzjonijiet ESG privati li ma humiex maħsuba għad-divulgazzjoni pubblika jew għad-distribuzzjoni;
(b)klassifikazzjonijiet ESG prodotti minn impriżi finanzjarji regolati fl-Unjoni li jintużaw għal skopijiet interni jew għall-forniment ta’ servizzi u prodotti finanzjarji interni;
(c)il-forniment ta’ data ESG mhux ipproċessata li ma fihiex element ta’ klassifikazzjoni jew punteġġ, u li ma tkun soġġetta għall-ebda mmudellar jew analiżi li jirriżultaw fl-iżvilupp ta’ klassifikazzjoni ESG;
(d)klassifikazzjonijiet tal-kreditu maħruġa skont ir-Regolament (KE) Nru 1060/2009 tal-Parlament Ewropew u tal-Kunsill;
(e)prodotti jew servizzi li jinkorporaw element ta’ klassifikazzjoni ESG;
(f)opinjonijiet ta’ tieni parti dwar il-bonds tas-sostenibbiltà;
(g)klassifikazzjonijiet ESG prodotti mill-awtoritajiet pubbliċi tal-Unjoni jew tal-Istati Membri;
(h)klassifikazzjonijiet ESG minn fornitur awtorizzat ta’ klassifikazzjonijiet ESG li jitqiegħdu għad-dispożizzjoni tal-utenti minn parti terza;
(i)klassifikazzjonijiet ESG prodotti minn banek ċentrali li jissodisfaw il-kundizzjonijiet kollha li ġejjin:
(a)ma jitħallsux mill-entità kklassifikata;
(b)ma jiġux iddivulgati lill-pubbliku;
(c)jiġu pprovduti f’konformità mal-prinċipji, l-istandards u l-proċeduri li jiżguraw l-adegwatezza, l-integrità u l-indipendenza tal-attivitajiet ta’ klassifikazzjoni, kif previst minn dan ir-Regolament, u
(d)ma jkunux relatati mal-istrumenti finanzjarji maħruġa mill-Istati Membri tal-banek ċentrali rispettivi.
Artikolu 3
Definizzjonijiet
Għall-finijiet ta’ dan ir-Regolament, japplikaw id-definizzjonijiet li ġejjin:
(1)“klassifikazzjoni ESG” tfisser opinjoni, punteġġ jew kombinazzjoni tat-tnejn, fir-rigward ta’ entità, strument finanzjarju, prodott finanzjarju, jew il-profil jew il-karatteristiċi ESG ta’ impriża jew skopertura għar-riskji ESG jew l-impatt fuq in-nies, is-soċjetà u l-ambjent, li huma bbażati fuq metodoloġija stabbilita u sistema ta’ klassifikazzjoni definita tal-kategoriji ta’ klassifikazzjoni u li huma pprovduti lil partijiet terzi, irrispettivament minn jekk tali klassifikazzjoni ESG hijiex espliċitament ittikkettata bħala “klassifikazzjoni” jew “punteġġ ESG”;
(2)“opinjoni” tfisser valutazzjoni li tkun ibbażat fuq metodoloġija bbażata fuq ir-regoli u sistema ta’ klassifikazzjoni definita tal-kategoriji ta’ klassifikazzjoni, li tinvolvi direttament analista tal-klassifikazzjoni fil-proċess tal-klassifikazzjoni jew fil-proċess tas-sistemi;
(3)“punteġġ” tfisser miżura derivata mid-data, bl-użu ta’ metodoloġija bbażata fuq ir-regoli, u bbażata biss fuq sistema jew mudell statistiku jew algoritmiku stabbilit minn qabel, mingħajr ebda input analitiku sostanzjali addizzjonali minn analista;
(4)“fornituri ta’ klassifikazzjonijiet ESG” tfisser persuna ġuridika li xogħolha jinkludi li toffri u tiddistribwixxi l-klassifikazzjonijiet jew il-punteġġi ESG fuq bażi professjonali;
(5)“impriża finanzjarja regolata fl-Unjoni” tfisser impriża, irrispettivament mill-forma ġuridika tagħha, jiġifieri:
–(i)
istituzzjoni ta’ kreditu kif definita fl-Artikolu 4(1), il-punt (1), tar-Regolament (UE) Nru 575/2013 tal-Parlament Ewropew u tal-Kunsill;
–(ii)
ditta tal-investiment kif definita fl-Artikolu 4(1), il-punt (1), tad-Direttiva 2014/65/UE tal-Parlament Ewropew u tal-Kunsill;
–(iii)
maniġer ta’ fond ta’ investiment alternattiv (AIFM) kif definit fl-Artikolu 4(1), punt (b), tad-Direttiva 2011/61/UE tal-Parlament Ewropew u tal-Kunsill, inkluż maniġer ta’ fond ta’ kapital ta’ riskju kwalifikanti kif definit fl-Artikolu 3, punt (c), tar-Regolament (UE) Nru 345/2013 tal-Parlament Ewropew u tal-Kunsill, maniġer ta’ fond ta’ intraprenditorija soċjali kwalifikanti kif definit fl-Artikolu 3, punt (c), tar-Regolament (UE) Nru 346/2013 tal-Parlament Ewropew u tal-Kunsill u maniġer tal-ELTIF kif definit fl-Artikolu 2, punt (12), tar-Regolament (UE) 2015/760 tal-Parlament Ewropew u tal-Kunsill;
–(iv)
kumpanija maniġerjali ta’ impriża ta’ investiment kollettiv f’titoli trasferibbli (UCITS) kif definita fl-Artikolu 2(1), punt (b), tad-Direttiva 2009/65/KE tal-Parlament Ewropew u tal-Kunsill;
–(v)
impriża tal-assigurazzjoni kif definita fl-Artikolu 13, punt (1), tad-Direttiva 2009/138/KE tal-Parlament Ewropew u tal-Kunsill;
–(vi)
impriża tar-riassigurazzjoni kif definita fl-Artikolu 13, punt (4), tad-Direttiva 2009/138/KE;
–(vii)
istituzzjoni għall-provvista ta’ rtirar okkupazzjonali kif definita fl-Artikolu 1, punt (6), tad-Direttiva 2016/2341 tal-Parlament Ewropew u tal-Kunsill;
–(viii)
istituzzjonijiet tal-pensjoni li joperaw skemi tal-pensjoni li huma kkunsidrati bħala skemi tas-sigurtà soċjali koperti mir-Regolament (KE) Nru 883/2004 tal-Parlament Ewropew u tal-Kunsill u mir-Regolament (KE) Nru 987/2009 tal-Parlament Ewropew u tal-Kunsill, u kwalunkwe entità ġuridika stabbilita għall-fini ta’ investiment ta’ tali skemi tas-sigurtà soċjali;
–(ix)
fond ta’ investiment alternattiv (AIF) ġestit minn AIFM kif definit fl-Artikolu 4(1), punt (b), tad-Direttiva 2011/61/UE jew AIF taħt superviżjoni skont il-liġi nazzjonali applikabbli;
–(x)
UCITS kif definita fl-Artikolu 1(2) tad-Direttiva 2009/65/KE;
–(xi)
kontroparti ċentrali kif definita fl-Artikolu 2, punt (1), tar-Regolament (UE) Nru 648/2012 tal-Parlament Ewropew u tal-Kunsill;
–(xii)
depożitorju ċentrali tat-titoli kif definit fl-Artikolu 2(1), punt (1), tar-Regolament (UE) Nru 909/2014 tal-Parlament Ewropew u tal-Kunsill;
–(xiii)
veikolu bi skop speċjali tal-assigurazzjoni jew tar-riassigurazzjoni awtorizzat f’konformità mal-Artikolu 211 tad-Direttiva 2009/138/KE;
–(xiv)
“entità bi skop speċjali tat-titolizzazzjoni” kif definita fl-Artikolu 2, punt (2), tar-Regolament (UE) Nru 2017/2402 tal-Parlament Ewropew u tal-Kunsill;
–(xv)
kumpanija azzjonarja tal-assigurazzjoni kif definita fl-Artikolu 212(1)(f) tad-Direttiva 2009/138/KE jew kumpanija azzjonarja finanzjarja mħallta kif definita fl-Artikolu 212(1)(h) tad-Direttiva 2009/138/KE, li hija parti minn grupp tal-assigurazzjoni li huwa soġġett għal superviżjoni fil-livell tal-grupp skont l-Artikolu 213 ta’ dik id-Direttiva u li ma huwiex eżentat mis-superviżjoni tal-grupp skont l-Artikolu 214(2) ta’ dik id-Direttiva;
–(xvi)
istituzzjoni ta’ pagament kif definita fl-Artikolu 1(1)(d) tad-Direttiva (UE) 2015/2366 tal-Parlament Ewropew u tal-Kunsill;
–(xvii)
istituzzjoni tal-flus elettroniċi kif definita fl-Artikolu 2, punt (1), tad-Direttiva 2009/110/KE tal-Parlament Ewropew u tal-Kunsill;
–(xviii)
fornitur ta’ servizz ta’ finanzjament kollettiv kif definit fl-Artikolu 2(1)(e) tar-Regolament (UE) 2020/1503 tal-Parlament Ewropew u tal-Kunsill;
–(xix)
fornitur ta’ servizzi tal-kriptoassi kif definit fl-Artikolu 3(1), punt (8), ta’ [il-proposta għal Regolament tal-Parlament Ewropew u tal-Kunsill dwar is-Swieq fil-Kriptoassi] fejn iwettaq servizz wieħed jew aktar tal-kriptoassi kif definit fl-Artikolu 3(1), punt (9), ta’ [il-proposta għal Regolament tal-Parlament Ewropew u tal-Kunsill dwar is-Swieq fil-Kriptoassi];
–(xx)
repożitorju tad-data dwar it-tranżazzjonijiet kif definit fl-Artikolu 2, punt (2), tar-Regolament (UE) Nru 648/2012;
–(xxi)
repożitorju tat-titolizzazzjoni kif definit fl-Artikolu 2, punt 23, tar-Regolament (UE) 2017/2402;
–(xxii)
amministratur ta’ parametri referenzjarji kif definit fl-Artikolu 3(1), punt (3), tar-Regolament (UE) 2016/1011 tal-Parlament Ewropew u tal-Kunsill;
–(xxiii)
aġenzija tal-klassifikazzjoni tal-kreditu kif definita fl-Artikolu 3(1)(b) tar-Regolament (KE) Nru 1060/2009;
(6)“analist ta’ klassifikazzjoni” tfisser persuna li twettaq funzjonijiet analitiċi bil-għan li toħroġ klassifikazzjonijiet ESG;
(7)“entità kklassifikata” tfisser persuna ġuridika, strument finanzjarju, prodott finanzjarju jew awtorità pubblika jew korp irregolat bil-liġi pubblika li huwa espliċitament jew impliċitament ikklassifikat fil-klassifikazzjoni jew fil-punteġġ ESG, irrispettivament minn jekk tali klassifikazzjoni tkunx ġiet mitluba u irrispettivament minn jekk il-persuna ġuridika tkunx ipprovdiet informazzjoni għal tali klassifikazzjoni jew punteġġ ESG;
(8)“utent” tfisser persuna fiżika jew ġuridika, inkluża awtorità pubblika jew korp irregolat bil-liġi pubblika, li tingħatalha klassifikazzjoni ESG;
(9)“awtoritajiet kompetenti” tfisser l-awtoritajiet maħtura minn kull Stat Membru għall-finijiet ta’ dan ir-Regolament;
(10)“maniġment superjuri” tfisser il-persuna jew il-persuni li jidderieġu b’mod effettiv in-negozju tal-fornitur ta’ klassifikazzjonijiet ESG u l-membru jew il-membri tal-bord amministrattiv jew superviżorju tal-fornitur ta’ klassifikazzjonijiet ESG.
(11)“grupp ta’ fornituri ta’ klassifikazzjonijiet ESG” tfisser grupp ta’ impriżi stabbiliti fl-Unjoni li jikkonsisti minn impriża prinċipali u s-sussidjarji tagħha skont it-tifsira tal-Artikolu 2 tad-Direttiva 2013/34/UE, u impriżi marbuta ma’ xulxin b’relazzjoni u li l-okkupazzjoni tagħhom tinkludi l-forniment ta’ klassifikazzjonijiet ESG.
TITOLU II
Forniment ta’ klassifikazzjonijiet ESG fl-Unjoni
Artikolu 4
Rekwiżiti biex jiġu pprovduti klassifikazzjonijiet ESG fl-Unjoni
Kwalunkwe persuna ġuridika li tixtieq tipprovdi klassifikazzjonijiet ESG fl-Unjoni għandha tkun soġġetta għal waħda minn dawn li ġejjin:
(a)awtorizzazzjoni maħruġa mill-ESMA kif imsemmi fl-Artikolu 5;
(b)deċiżjoni ta’ implimentazzjoni kif imsemmija fl-Artikolu 9;
(c)awtorizzazzjoni għall-approvazzjoni kif imsemmija fl-Artikolu 10;
(d)rikonoxximent kif imsemmi fl-Artikolu 11;
KAPITOLU 1
Awtorizzazzjoni biex jiġu pprovduti klassifikazzjonijiet ESG fl-Unjoni
Artikolu 5
Applikazzjoni għal awtorizzazzjoni biex tiġi pprovduta klassifikazzjoni ESG
1.Il-persuni ġuridiċi stabbiliti fl-Unjoni li jixtiequ jipprovdu klassifikazzjonijiet ESG fl-Unjoni għandhom japplikaw għall-awtorizzazzjoni mal-ESMA.
2.L-applikazzjoni għall-awtorizzazzjoni għandu jkun fiha l-informazzjoni kollha elenkata fl-Anness I u għandha tiġi sottomessa bi kwalunkwe waħda mil-lingwi uffiċjali tal-Unjoni. Ir-Regolament tal-Kunsill Nru 1 għandu japplika mutatis mutandis għal kwalunkwe komunikazzjoni oħra bejn l-ESMA u l-fornituri ta’ klassifikazzjonijiet ESG u l-persunal tagħhom.
3.L-ESMA għandha tiżviluppa abbozzi ta’ standards tekniċi regolatorji biex tispeċifika aktar l-informazzjoni elenkata fl-Anness I.
L-ESMA għandha tissottometti dawk l-abbozzi ta’ standards tekniċi regolatorji lill-Kummissjoni sa XX XXXX XXXX.
Il-Kummissjoni hija mogħtija s-setgħa biex tadotta l-istandards tekniċi regolatorji msemmija fl-ewwel subparagrafu f’konformità mal-proċedura stabbilita fl-Artikoli minn 10 sa 14 tar-Regolament (UE) Nru 1095/2010.
4.Fornitur awtorizzat ta’ klassifikazzjonijiet ESG għandu jikkonforma mal-kundizzjonijiet għall-awtorizzazzjoni inizjali f’kull ħin.
5.Il-fornituri ta’ klassifikazzjonijiet ESG għandhom jinnotifikaw lill-ESMA dwar kwalunkwe bidla materjali fil-kundizzjonijiet għall-awtorizzazzjoni inizjali, inkluż kwalunkwe ftuħ jew għeluq ta’ fergħa fl-Unjoni, mingħajr dewmien żejjed.
Artikolu 6
Eżami tal-applikazzjoni għall-awtorizzazzjoni tal-fornituri ta’ klassifikazzjonijiet ESG mill-ESMA
1.Fi żmien 30 jum tax-xogħol minn meta tirċievi l-applikazzjoni msemmija fl-Artikolu 5(2), l-ESMA għandha tivvaluta jekk l-applikazzjoni tkunx kompluta. Meta l-applikazzjoni ma tkunx kompluta, l-ESMA għandha tistabbilixxi data tal-għeluq sa meta l-applikant għandu jipprovdi informazzjoni addizzjonali.
2.Wara li tkun ivvalutat jekk applikazzjoni hijiex kompluta, l-ESMA għandha tinnotifika lill-applikant bir-riżultat ta’ dik il-valutazzjoni.
3.Fi żmien 120 jum tax-xogħol min-notifika msemmija fil-paragrafu 2, l-ESMA għandha tadotta deċiżjoni motivata bis-sħiħ li tawtorizza jew tirrifjuta l-awtorizzazzjoni.
4.L-ESMA tista’ testendi l-perjodu msemmi fil-paragrafi 3 sa 140 jum tax-xogħol, b’mod partikolari meta l-applikant:
(a)jipprevedi l-approvazzjoni tal-klassifikazzjonijiet ESG kif imsemmi fl-Artikolu 10;
(b)jipprevedi l-użu ta’ esternalizzazzjoni; jew
(c)jitlob eżenzjoni mill-konformità skont l-Artikolu 20.
5.Id-deċiżjoni adottata mill-ESMA skont il-paragrafu 3 għandha tidħol fis-seħħ fil-ħames jum tax-xogħol wara l-adozzjoni tagħha.
Artikolu 7
Deċiżjoni li tingħata jew tiġi rrifjutata l-awtorizzazzjoni biex jiġu pprovduti l-klassifikazzjonijiet ESG u n-notifika ta’ dik id-deċiżjoni
1.L-ESMA għandha tawtorizza lill-applikant bħala fornitur ta’ klassifikazzjonijiet ESG meta wara l-eżami tal-applikazzjoni msemmi fl-Artikolu 6 tikkonkludi li l-applikant jirrispetta l-kundizzjonijiet għall-forniment tal-klassifikazzjonijiet stabbiliti f’dan ir-Regolament.
2.L-ESMA għandha tinforma lill-applikant fi żmien 5 ijiem tax-xogħol b’dik id-deċiżjoni msemmija fl-ewwel paragrafu.
3.L-ESMA għandha tinforma lill-Kummissjoni, lill-EBA u lill-EIOPA bi kwalunkwe deċiżjoni meħuda skont il-paragrafu 2.
4.L-awtorizzazzjoni għandha tkun effettiva għat-territorju kollu tal-Unjoni.
Artikolu 8
Irtirar jew sospensjoni tal-awtorizzazzjoni
1.L-ESMA għandha tirtira jew tissospendi l-awtorizzazzjoni ta’ fornitur ta’ klassifikazzjonijiet ESG fi kwalunkwe wieħed mill-każijiet li ġejjin:
(a)il-fornitur ta’ klassifikazzjonijiet ESG ikun irrinunzja espressament l-awtorizzazzjoni jew ma jkun ipprovda l-ebda klassifikazzjoni ESG għal 9 xhur qabel dak l-irtirar jew dik is-sospensjoni;
(b)il-fornitur ta’ klassifikazzjonijiet ESG ikun kiseb l-awtorizzazzjoni tiegħu billi għamel dikjarazzjonijiet foloz jew b’xi mezz irregolari ieħor;
(c)il-fornitur ta’ klassifikazzjonijiet ESG ma jkunx għadu jissodisfa l-kundizzjonijiet li taħthom kien awtorizzat;
(d)il-fornitur ta’ klassifikazzjonijiet ESG kiser serjament jew ripetutament dan ir-Regolament.
2.Id-deċiżjoni dwar l-irtirar jew is-sospensjoni tal-awtorizzazzjoni għandha tidħol fis-seħħ b’mod immedjat fl-Unjoni kollha.
KAPITOLU 2
Forniment ta’ klassifikazzjonijiet ESG fl-Unjoni minn fornituri ta’ klassifikazzjonijiet ESG ta’ pajjiżi terzi
Artikolu 9
Deċiżjoni dwar l-ekwivalenza
1.Fornitur ta’ klassifikazzjonijiet ESG ta’ pajjiż terz li jixtieq jipprovdi klassifikazzjonijiet ESG fl-Unjoni għandu jkun jista’ jagħmel dan biss meta jkun inkluż fir-reġistru msemmi fl-Artikolu 13 u diment li jkunu ġew irrispettati l-kundizzjonijiet kollha li ġejjin:
(a)il-fornitur ta’ klassifikazzjonijiet ESG ta’ pajjiż terz ikun persuna ġuridika, ikun awtorizzat jew irreġistrat bħala fornitur ta’ klassifikazzjonijiet ESG fil-pajjiż terz ikkonċernat, u jkun soġġett għal superviżjoni minn dak il-pajjiż terz;
(b)il-fornitur ta’ klassifikazzjonijiet ESG ta’ pajjiż terz ikun innotifika lill-ESMA li jixtieq jipprovdi klassifikazzjonijiet ESG fl-Unjoni u jkun informa lill-ESMA bl-isem tal-awtorità kompetenti responsabbli għas-superviżjoni tiegħu fil-pajjiż terz;
(c)il-Kummissjoni tkun adottat deċiżjoni dwar l-ekwivalenza skont il-paragrafu 2;
(d)l-arranġamenti ta’ kooperazzjoni msemmija fil-paragrafu 4 jkunu operattivi.
2.Il-Kummissjoni tista’ tadotta deċiżjoni ta’ implimentazzjoni li tiddikjara li l-qafas legali u l-prattika superviżorja ta’ pajjiż terz jiżguraw li:
(a)il-fornituri ta’ klassifikazzjonijiet ESG awtorizzati jew irreġistrati f’dak il-pajjiż terz ikunu konformi mar-rekwiżiti vinkolanti li huma ekwivalenti għar-rekwiżiti skont dan ir-Regolament,
(b)il-konformità mar-rekwiżiti vinkolanti msemmija fil-punt (a) tkun soġġetta għal superviżjoni u infurzar effettivi fuq bażi kontinwa f’dak il-pajjiż terz.
Għall-finijiet tal-punt (a), il-Kummissjoni għandha tqis jekk il-qafas legali u l-prattika superviżorja ta’ pajjiż terz jiżgurawx il-konformità mar-rakkomandazzjonijiet tal-IOSCO għall-Klassifikazzjonijiet ESG ippubblikati f’Novembru 2021.
Tali deċiżjoni ta’ implimentazzjoni għandha tiġi adottata f’konformità mal-proċedura ta’ eżami msemmija fl-Artikolu 47.
3.Il-Kummissjoni tista’ tadotta att delegat f’konformità mal-Artikolu 45 biex tispeċifika l-kundizzjonijiet imsemmija fil-punti (a) u (b) tal-ewwel subparagrafu. Il-Kummissjoni tista’ tissoġġetta l-applikazzjoni tad-deċiżjoni ta’ implimentazzjoni msemmija fil-paragrafu 2 għal:
(a)l-issodisfar effettiv fuq bażi kontinwa minn dak il-pajjiż terz ta’ kwalunkwe kundizzjoni stabbilita f’dik id-deċiżjoni ta’ implimentazzjoni li għandha l-għan li tiżgura standards superviżorji u regolatorji ekwivalenti;
(b)il-kapaċità tal-ESMA li teżerċita b’mod effettiv ir-responsabbiltajiet ta’ monitoraġġ imsemmija fl-Artikolu 33 tar-Regolament (UE) Nru 1095/2010.
4.
L-ESMA għandha tistabbilixxi arranġamenti ta’ kooperazzjoni mal-awtoritajiet kompetenti tal-pajjiżi terzi li l-qafas legali u l-prassi superviżorji tagħhom ikunu ġew rikonoxxuti bħala ekwivalenti f’konformità mal-paragrafu 2. Tali arranġamenti għandhom jispeċifikaw dawn kollha li ġejjin:
(a)il-mekkaniżmu għall-iskambju ta’ informazzjoni bejn l-ESMA u l-awtoritajiet kompetenti ta’ pajjiżi terzi kkonċernati, inkluż l-aċċess għall-informazzjoni rilevanti kollha mitluba mill-ESMA rigward il-fornitur ta’ klassifikazzjonijiet ESG awtorizzat jew irreġistrat f’dak il-pajjiż terz;
(b)il-mekkaniżmu għal notifika fil-pront lill-ESMA meta awtorità kompetenti ta’ pajjiż terz tqis li l-fornitur ta’ klassifikazzjonijiet ESG awtorizzat jew irreġistrat f’dak il-pajjiż terz u li jkun issorveljat minn dik l-awtorità kompetenti ta’ pajjiż terz ikun qed jikser il-kundizzjonijiet tal-awtorizzazzjoni jew tar-reġistrazzjoni tiegħu, jew liġi nazzjonali oħra f’dak il-pajjiż terz;
(c)il-proċeduri li jikkonċernaw il-koordinazzjoni ta’ attivitajiet superviżorji, inklużi spezzjonijiet fuq il-post.
Artikolu 10
Approvazzjoni tal-klassifikazzjonijiet ESG ipprovduti minn fornitur ta’ klassifikazzjonijiet ESG ta’ pajjiż terz
1.Fornitur ta’ klassifikazzjonijiet ESG li jinsab fl-Unjoni u li huwa awtorizzat f’konformità mal-Artikolu 7 jista’ japprova l-klassifikazzjonijiet ESG ipprovduti minn fornitur ta’ klassifikazzjonijiet ESG ta’ pajjiż terz li jappartjeni għall-istess grupp, diment li jkunu ġew issodisfati l-kundizzjonijiet kollha li ġejjin:
(a)il-fornitur ta’ klassifikazzjonijiet ESG li jinsab fl-Unjoni jkun applika mal-ESMA għall-awtorizzazzjoni ta’ tali approvazzjoni;
(b)il-fornitur ta’ klassifikazzjonijiet ESG li jinsab fl-Unjoni jkun ivverifika u jista’ juri fuq bażi kontinwa lill-ESMA li l-forniment tal-klassifikazzjoni ESG li għandha tiġi approvata jissodisfa rekwiżiti li huma mill-inqas stretti daqs ir-rekwiżiti ta’ dan ir-Regolament;
(c)il-fornitur ta’ klassifikazzjonijiet ESG li jinsab fl-Unjoni jkollu l-għarfien espert meħtieġ biex jimmonitorja l-forniment ta’ klassifikazzjonijiet ESG mill-fornitur ta’ klassifikazzjonijiet ESG ta’ pajjiż terz b’mod effettiv, u biex jimmaniġġa kwalunkwe riskju assoċjat;
(d)ikun hemm raġuni oġġettiva għaliex il-fornitur ta’ klassifikazzjonijiet ESG ta’ pajjiż terz għandu jipprovdi l-klassifikazzjoni ESG u għaliex dik il-klassifikazzjoni ESG għandha tiġi approvata għall-użu fl-Unjoni;
(e)il-fornitur ta’ klassifikazzjonijiet ESG li jinsab fl-Unjoni jipprovdi lill-ESMA fuq talba tagħha bl-informazzjoni kollha meħtieġa biex l-ESMA tkun tista’ tissorvelja l-konformità mill-fornitur ta’ klassifikazzjonijiet ESG ta’ pajjiż terz ma’ dan ir-Regolament fuq bażi kontinwa;
(f)meta fornitur ta’ klassifikazzjonijiet ESG ta’ pajjiż terz ikun soġġett għal superviżjoni, ikun hemm fis-seħħ arranġament ta’ kooperazzjoni xieraq bejn l-ESMA u l-awtorità kompetenti tal-pajjiż terz fejn ikun jinsab il-fornitur ta’ klassifikazzjonijiet ESG, sabiex jiġi żgurat skambju effiċjenti ta’ informazzjoni;
Għall-finijiet tal-punt (b) tal-ewwel subparagrafu, l-ESMA tista’ tikkunsidra li l-konformità tal-forniment tal-klassifikazzjoni ESG li għandha tiġi approvata mar-rakkomandazzjonijiet tal-IOSCO għall-klassifikazzjonijiet ESG hija ekwivalenti għall-konformità mar-rekwiżiti ta’ dan ir-Regolament.
2.Fornitur ta’ klassifikazzjonijiet ESG li japplika għall-approvazzjoni kif imsemmi fil-paragrafu 1 għandu jipprovdi lill-ESMA bl-informazzjoni kollha meħtieġa biex jissodisfa lill-ESMA li, fiż-żmien tal-applikazzjoni, il-kundizzjonijiet kollha msemmija f’dak il-paragrafu jkunu ssodisfati.
3.Fi żmien 90 jum tax-xogħol minn meta tirċievi l-applikazzjoni għal approvazzjoni kif imsemmija fil-paragrafu 1, l-ESMA għandha teżamina l-applikazzjoni u tiddeċiedi jew li tawtorizza l-approvazzjoni jew inkella li tirrifjutaha. L-ESMA għandha tinnotifika pubblikament id-deċiżjoni li tapprova pprovduta minn fornitur ta’ klassifikazzjonijiet ESG ta’ pajjiż terz.
4.Klassifikazzjoni ESG approvata għandha titqies bħala klassifikazzjoni ESG ipprovduta mill-fornitur ta’ klassifikazzjonijiet ESG li japprova. Il-fornitur li japprova ma għandux juża l-approvazzjoni bl-intenzjoni li jevita r-rekwiżiti ta’ dan ir-Regolament.
5.Fornitur ta’ klassifikazzjonijiet ESG li jkun approva klassifikazzjoni ESG ipprovduta minn fornitur ta’ klassifikazzjonijiet ESG ta’ pajjiż terz għandu jibqa’ kompletament responsabbli għal tali klassifikazzjoni ESG u għall-konformità mal-obbligi skont dan ir-Regolament.
6.Meta l-ESMA jkollha raġunijiet fondati sewwa biex tikkunsidra li l-kundizzjonijiet stabbiliti fil-paragrafu 1 ma għadhomx issodisfati, hija għandu jkollha s-setgħa li titlob lill-fornitur ta’ klassifikazzjonijiet ESG li japprova biex iwaqqaf l-approvazzjoni.
Artikolu 11
Rikonoxximent ta’ fornituri ta’ klassifikazzjonijiet ESG ta’ pajjiżi terzi
1.Sakemm il-Kummissjoni tkun adottat deċiżjoni dwar l-ekwivalenza kif imsemmi fl-Artikolu 9 jew, meta tkun adottata, f’każ li d-deċiżjoni dwar l-ekwivalenza titħassar, il-fornituri ta’ klassifikazzjonijiet ESG ta’ pajjiżi terzi b’fatturat nett annwali fuq l-attivitajiet ta’ klassifikazzjoni ESG tagħhom ta’ inqas minn EUR 12-il miljun għal 3 snin konsekuttivi jistgħu jipprovdu klassifikazzjonijiet ESG lil impriżi finanzjarji regolati fl-Unjoni, diment li l-ESMA tkun irrikonoxxiet dak il-fornitur ta’ klassifikazzjonijiet ESG ta’ pajjiż terz f’konformità mal-paragrafi XX u YY.
2.Il-fornituri ta’ klassifikazzjonijiet ESG ta’ pajjiżi terzi li jixtiequ jiġu rikonoxxuti kif imsemmi fil-paragrafu 1 għandhom jikkonformaw mar-rekwiżiti stabbiliti f’dan ir-Regolament u japplikaw għar-rikonoxximent mal-ESMA. Il-fornituri ta’ klassifikazzjonijiet ESG jistgħu jissodisfaw dik il-kundizzjoni billi japplikaw ir-rakkomandazzjonijiet tal-IOSCO fuq il-klassifikazzjonijiet ESG, diment li tali applikazzjoni tkun ekwivalenti għall-konformità mar-rekwiżiti stabbiliti f’dan ir-Regolament.
Għall-finijiet tal-ewwel subparagrafu, l-ESMA tista’ tqis valutazzjoni minn awditur estern indipendenti jew ċertifikazzjoni tal-awtorità kompetenti tal-pajjiż terz fejn ikun jinsab il-fornitur ta’ klassifikazzjonijiet ESG ta’ pajjiż terz.
3.Il-fornituri ta’ klassifikazzjonijiet ESG ta’ pajjiżi terzi li jixtiequ jiġu rikonoxxuti kif imsemmi fil-paragrafu 1 għandu jkollhom rappreżentant legali. Dak ir-rappreżentant legali għandu jkun persuna ġuridika li tinsab fl-Unjoni u maħtura espressament minn dak il-fornitur ta’ klassifikazzjonijiet ESG ta’ pajjiż terz biex taġixxi f’isem dak il-fornitur ta’ klassifikazzjonijiet ESG fir-rigward tal-obbligi ta’ dak il-fornitur ta’ klassifikazzjonijiet ESG skont dan ir-Regolament u, f’dak ir-rigward, tkun responsabbli lejn l-ESMA.
4.Il-fornitur ta’ klassifikazzjonijiet ESG ta’ pajjiż terz għandu jipprovdi lill-ESMA, qabel ir-rikonoxximent imsemmi fil-paragrafu 1, bl-informazzjoni li ġejja:
(a)l-informazzjoni kollha meħtieġa biex tissodisfa lill-ESMA li dak il-fornitur ta’ klassifikazzjonijiet ESG ta’ pajjiż terz ikun stabbilixxa l-arranġamenti kollha meħtieġa biex jissodisfa r-rekwiżiti msemmija fil-paragrafu 2;
(b)il-lista tal-klassifikazzjonijiet ESG attwali jew prospettivi tiegħu li huma maħsuba għall-forniment fl-Unjoni;
(c)fejn applikabbli, l-isem u d-dettalji ta’ kuntatt tal-awtorità kompetenti fil-pajjiż terz responsabbli għas-superviżjoni tiegħu.
L-ESMA għandha tivverifika li l-kundizzjonijiet stabbiliti fil-paragrafi 2 u 3 jiġu ssodisfati fi żmien 90 jum tax-xogħol minn meta tirċievi l-applikazzjoni msemmija fl-ewwel subparagrafu ta’ dan il-paragrafu.
5.L-ESMA għandha tirrikonoxxi l-fornitur ta’ klassifikazzjonijiet ESG ta’ pajjiż terz kif imsemmi fil-paragrafu 1, diment li jiġu ssodisfati l-kundizzjonijiet kollha li ġejjin:
(a)il-fornitur ta’ klassifikazzjonijiet ESG ta’ pajjiż terz ikun ikkonforma mal-kundizzjonijiet kollha stabbiliti fil-paragrafi 2, 3 u 4;
(b)meta l-fornitur ta’ klassifikazzjonijiet ESG ta’ pajjiż terz ikun soġġett għal superviżjoni, l-ESMA għandha tfittex li tistabbilixxi arranġament ta’ kooperazzjoni xieraq mal-awtorità kompetenti rilevanti tal-pajjiż terz fejn jinsab il-fornitur ta’ klassifikazzjonijiet ESG, sabiex tiżgura skambju effiċjenti ta’ informazzjoni;
6.Ma għandu jingħata l-ebda rikonoxximent meta l-eżerċitar effettiv mill-ESMA tal-funzjonijiet superviżorji tagħha skont dan ir-Regolament ikun ipprevenut jew mil-liġijiet, mir-regolamenti jew mid-dispożizzjonijiet amministrattivi tal-pajjiż terz fejn ikun stabbilit il-fornitur ta’ klassifikazzjonijiet ESG ta’ pajjiż terz, jew inkella, fejn applikabbli, mil-limitazzjonijiet fis-setgħat ta’ superviżjoni u investigazzjoni tal-awtorità kompetenti ta’ dak il-pajjiż terz.
7.L-ESMA għandha timponi multi, f’konformità mal-Artikolu 30, tissospendi jew, fejn xieraq, tirtira r-rikonoxximent imsemmi fil-paragrafu 1 meta jkollha raġunijiet fondati sewwa, abbażi ta’ evidenza dokumentata, biex tikkunsidra li l-fornitur ta’ klassifikazzjonijiet ESG:
(a)qed jaġixxi, jew kien qed jaġixxi, b’mod li huwa evidentement ta’ preġudizzju għall-interessi tal-utenti tal-klassifikazzjonijiet ESG tiegħu jew għall-funzjonament tajjeb tas-swieq;
(b)ikun kiser serjament ir-rekwiżiti applikabbli stabbiliti f’dan ir-Regolament;
(c)ikun għamel dikjarazzjonijiet foloz jew uża kwalunkwe mezz irregolari ieħor biex jikseb ir-rikonoxximent.
8.L-ESMA għandha tiżviluppa abbozz ta’ standards tekniċi regolatorji biex tiddetermina l-forma u l-kontenut tal-applikazzjoni msemmija fil-paragrafu 2 u, b’mod partikolari, il-preżentazzjoni tal-informazzjoni mitluba fil-paragrafu 4. L-ESMA għandha tissottomettihom lill-Kummissjoni.
Il-Kummissjoni hija mogħtija s-setgħa biex tadotta l-istandards tekniċi regolatorji msemmija fl-ewwel subparagrafu f’konformità mal-proċedura stabbilita fl-Artikoli minn 10 sa 14 tar-Regolament (UE) Nru 1095/2010.
Artikolu 12
Arranġamenti ta’ kooperazzjoni
1.Kwalunkwe arranġament ta’ kooperazzjoni kif imsemmi fl-Artikolu 9(4), fl-Artikolu 10(1)(f) u fl-Artikolu 11(5)(b) għandu jkun soġġett għal garanziji ta’ segretezza professjonali li jkunu mill-inqas ekwivalenti għal dawk stabbiliti fl-Artikolu 44. L-iskambju ta’ informazzjoni mwettaq taħt tali arranġamenti ta’ kooperazzjoni għandu jkun maħsub għat-twettiq tal-kompiti tal-ESMA jew tal-awtoritajiet kompetenti.
2.Fir-rigward tat-trasferiment ta’ data personali lil pajjiż terz, l-ESMA għandha tapplika r-Regolament (UE) 2018/1725 tal-Parlament Ewropew u tal-Kunsill.
KAPITOLU 3
Reġistru u aċċessibbiltà tal-informazzjoni
Artikolu 13
Reġistru tal-fornituri ta’ klassifikazzjonijiet ESG u aċċessibbiltà tal-informazzjoni fuq il-Punt ta’ Aċċess Uniku Ewropew (ESAP)
1.L-ESMA għandha tistabbilixxi u żżomm reġistru li jkun fih informazzjoni dwar dawn kollha li ġejjin:
(a)l-identitajiet tal-fornituri ta’ klassifikazzjonijiet ESG awtorizzati skont l-Artikolu 7;
(b)l-identitajiet tal-fornituri ta’ klassifikazzjonijiet ESG ta’ pajjiżi terzi li jikkonformaw mal-kundizzjonijiet stabbiliti fl-Artikolu 9 u tal-awtoritajiet kompetenti ta’ pajjiżi terzi responsabbli għas-superviżjoni ta’ dawk il-fornituri ta’ klassifikazzjonijiet ESG ta’ pajjiżi terzi;
(c)l-identitajiet tal-fornitur ta’ klassifikazzjonijiet ESG li japprova u tal-fornitur ta’ klassifikazzjonijiet ESG ta’ pajjiż terz approvat imsemmi fl-Artikolu 10 u, fejn applikabbli, tal-awtoritajiet kompetenti ta’ pajjiżi terzi li huma responsabbli għas-superviżjoni tal-fornitur ta’ klassifikazzjonijiet ESG ta’ pajjiż terz approvat;
(d)l-identitajiet tal-fornituri ta’ klassifikazzjonijiet ESG ta’ pajjiżi terzi li ġew rikonoxxuti f’konformità mal-Artikolu 11 u, fejn applikabbli, tal-awtoritajiet kompetenti ta’ pajjiżi terzi responsabbli għas-superviżjoni ta’ dawk il-fornituri ta’ klassifikazzjonijiet ESG ta’ pajjiżi terzi;
2.Ir-reġistru msemmi fil-paragrafu 1 għandu jkun aċċessibbli għall-pubbliku fuq is-sit web tal-ESMA u għandu jiġi aġġornat minnufih, kif meħtieġ.
3.Mill-1 ta’ Jannar 2028, meta jagħmel pubblika kwalunkwe informazzjoni skont l-Artikolu 18(1) u l-Artikolu 21(1), il-fornitur ta’ klassifikazzjonijiet ESG għandu jissottometti dik l-informazzjoni lill-korp ta’ ġbir rilevanti msemmi fil-paragrafu 6 ta’ dan l-Artikolu fl-istess ħin għall-aċċessibbiltà fuq l-ESAP stabbilit skont ir-Regolament (UE) XX/XXXX [ir-Regolament dwar l-ESAP] tal-Parlament Ewropew u tal-Kunsill*.
4.Dik l-informazzjoni għandha tikkonforma mar-rekwiżiti kollha li ġejjin:
(a)l-informazzjoni għandha titħejja f’format li minnu tista’ tiġi estratta d-data kif definit fl-Artikolu 2, punt (3), tar-Regolament (UE) XX/XXXX [ir-Regolament dwar l-ESAP] jew, fejn meħtieġ skont id-dritt tal-Unjoni, f’format li jista’ jinqara mill-magni, kif definit fl-Artikolu 2, punt (4), tar-Regolament (UE) XX/XXXX [ir-Regolament dwar l-ESAP];
(b)l-informazzjoni għandha tkun akkumpanjata bil-metadata li ġejja:
(1)l-ismijiet kollha tal-fornituri ta’ klassifikazzjonijiet ESG li jissottomettu l-informazzjoni;
(2)l-identifikatur ta’ entità ġuridika tal-fornitur ta’ klassifikazzjonijiet ESG, kif speċifikat skont l-Artikolu 7(4) tar-Regolament (UE) XX/XXXX [ir-Regolament dwar l-ESAP];
(3)id-daqs tal-fornitur ta’ klassifikazzjonijiet ESG kif speċifikat skont l-Artikolu 7(4) tar-Regolament (UE) XX/XXXX [ir-Regolament dwar l-ESAP];
(4)it-tip ta’ informazzjoni kif klassifikata skont l-Artikolu 7(4) tar-Regolament (UE) XX/XXXX [ir-Regolament dwar l-ESAP];
(5)metadata li tispeċifika jekk l-informazzjoni tinkludix data personali.
5.Għall-finijiet tal-paragrafu 1(b)(ii), il-fornitur ta’ klassifikazzjonijiet ESG għandu jikseb l-identifikatur ta’ entità ġuridika kif speċifikat skont l-Artikolu 7(4) tar-Regolament (UE) XX/XXXX [ir-Regolament dwar l-ESAP].
6.Sabiex l-informazzjoni msemmija fil-paragrafu 1 issir aċċessibbli fuq l-ESAP, il-korp tal-ġbir kif definit fl-Artikolu 2(2) tar-Regolament (UE) XX/XXXX [ir-Regolament tal-ESAP] għandu jkun l-ESMA.
7.Mill-1 ta’ Jannar 2028, l-informazzjoni msemmija fil-paragrafu 1 u fl-Artikolu 10(3), fl-Artikolu 33(1), fl-Artikolu 34 u fl-Artikolu 35 għandha ssir aċċessibbli fuq l-ESAP. Għal dak l-iskop, il-korp ta’ ġbir kif definit fl-Artikolu 2, punt (2), ta’ dak ir-Regolament għandu jkun l-ESMA. Dik l-informazzjoni għandha titħejja f’format li minnu tista’ tiġi estratta d-data kif definit fl-Artikolu 2, punt 3, tar-Regolament (UE) XX/XXXX [ir-Regolament dwar l-ESAP], filwaqt li tkun tinkludi l-metadata fir-rigward tal-ismijiet u, fejn disponibbli, l-identifikatur ta’ entità ġuridika tal-fornitur ta’ klassifikazzjonijiet ESG kif speċifikat skont l-Artikolu 7(4) ta’ dak ir-Regolament, it-tip ta’ informazzjoni kif ikklassifikata skont l-Artikolu 7(4) ta’ dak ir-Regolament u jekk l-informazzjoni tinkludix data personali.
8.Għall-finijiet tal-iżgurar ta’ ġbir u amministrazzjoni effiċjenti tad-data sottomessa f’konformità mal-paragrafu 3, l-ESMA għandha tiżviluppa abbozzi ta’ standards tekniċi ta’ implimentazzjoni biex tispeċifika:
(a)kwalunkwe metadata oħra li għandha takkumpanja l-informazzjoni;
(b)l-istrutturar tad-data fl-informazzjoni;
(c)għal liema informazzjoni huwa meħtieġ format li jinqara mill-magni u liema format li jinqara mill-magni għandu jintuża.
Qabel ma tiżviluppa l-abbozz ta’ standards tekniċi ta’ implimentazzjoni, l-ESMA għandha twettaq analiżi tal-ispejjeż u l-benefiċċji. Għall-finijiet tal-punt (c), l-ESMA għandha tivvaluta l-vantaġġi u l-iżvantaġġi ta’ formati differenti li jinqraw mill-magni u twettaq testijiet xierqa fuq il-post.
L-ESMA għandha tissottometti dawk l-abbozzi ta’ standards tekniċi ta’ implimentazzjoni lill-Kummissjoni.
Il-Kummissjoni tingħata s-setgħa li tadotta l-istandards tekniċi ta’ implimentazzjoni msemmijin fl-ewwel subparagrafu f’konformità mal-Artikolu 15 tar-Regolament (UE) Nru 1095/2010.
9.Jekk ikun meħtieġ, l-ESMA għandha tadotta linji gwida għall-entitajiet biex jiżguraw li l-metadata sottomessa f’konformità fil-paragrafu 8, l-ewwel subparagrafu, punt (a), tkun korretta.
TITOLU III
INTEGRITÀ U AFFIDABBILTÀ TAL-ATTIVITAJIET TA’ KLASSIFIKAZZJONI ESG
KAPITOLU 1
Rekwiżiti, proċessi u dokumenti organizzazzjonali dwar il-governanza
Artikolu 14
Prinċipji ġenerali
1.Il-fornituri ta’ klassifikazzjonijiet ESG għandhom jiżguraw l-indipendenza tal-attivitajiet ta’ klassifikazzjoni tagħhom, inkluż mill-influwenzi jew ir-restrizzjonijiet politiċi u ekonomiċi kollha.
2.Il-fornituri ta’ klassifikazzjonijiet ESG għandu jkollhom fis-seħħ regoli u proċeduri li jiżguraw li l-klassifikazzjoni ESG tagħhom tiġi pprovduta u ppubblikata jew issir disponibbli f’konformità ma’ dan ir-Regolament.
3.Il-fornituri ta’ klassifikazzjonijiet ESG għandhom jużaw sistemi, riżorsi u proċeduri li huma adegwati u effettivi biex jikkonformaw mal-obbligi tagħhom skont dan ir-Regolament.
4.Il-fornituri ta’ klassifikazzjonijiet ESG għandhom jadottaw u jimplimentaw politiki u proċeduri bil-miktub li jiżguraw li l-klassifikazzjonijiet ESG tagħhom ikunu bbażati fuq analiżi bir-reqqa tal-informazzjoni rilevanti kollha disponibbli għalihom.
5.Il-fornituri ta’ klassifikazzjonijiet ESG għandhom jadottaw u jimplimentaw politiki u proċeduri interni ta’ diliġenza dovuta li jiżguraw li l-interessi kummerċjali tagħhom ma jfixklux l-indipendenza jew l-akkuratezza tal-attivitajiet ta’ valutazzjoni.
6.Il-fornituri ta’ klassifikazzjonijiet ESG għandhom jadottaw u jimplimentaw proċeduri amministrattivi u kontabilistiċi tajbin, mekkaniżmi ta’ kontroll intern, u arranġamenti ta’ kontroll u salvagwardja effettivi għas-sistemi tal-ipproċessar tal-informazzjoni.
7.Il-fornituri ta’ klassifikazzjonijiet ESG għandhom jużaw metodoloġiji ta’ klassifikazzjoni għall-klassifikazzjonijiet ESG li jipprovdu li jkunu rigorużi, sistematiċi, oġġettivi u kapaċi li jiġu vvalidati u għandhom japplikaw dawk il-metodoloġiji ta’ klassifikazzjoni b’mod kontinwu.
8.Il-fornituri ta’ klassifikazzjonijiet ESG għandhom jirrieżaminaw il-metodoloġiji ta’ klassifikazzjoni msemmija fil-paragrafu 6 fuq bażi kontinwa u mill-inqas kull sena.
9.Il-fornituri ta’ klassifikazzjonijiet ESG għandhom jimmonitorjaw u jevalwaw l-adegwatezza u l-effettività tas-sistemi, tar-riżorsi u tal-proċeduri msemmija fil-paragrafu 2 mill-inqas kull sena u jieħdu miżuri xierqa biex jindirizzaw kwalunkwe nuqqas.
10.Il-fornituri ta’ klassifikazzjonijiet ESG għandhom jistabbilixxu u jżommu funzjoni ta’ sorveljanza permanenti u effettiva biex jiżguraw sorveljanza tal-aspetti kollha tal-forniment tal-klassifikazzjonijiet ESG tagħhom.
Il-fornituri ta’ klassifikazzjonijiet ESG għandhom jiżviluppaw u jżommu proċeduri robusti fir-rigward tal-funzjoni ta’ sorveljanza tagħhom.
11.Il-fornituri ta’ klassifikazzjonijiet ESG għandhom jadottaw, jimplimentaw u jinforzaw miżuri biex jiżguraw li l-klassifikazzjonijiet ESG tagħhom ikunu bbażati fuq analiżi bir-reqqa tal-informazzjoni kollha li tkun disponibbli għalihom u li tkun rilevanti għall-analiżi tagħhom f’konformità mal-metodoloġiji tal-klassifikazzjoni tagħhom. Huma għandhom jadottaw l-miżuri kollha meħtieġa biex jiżguraw li l-informazzjoni li jużaw biex jassenjaw il-klassifikazzjonijiet ESG tkun ta’ kwalità suffiċjenti u miksuba minn sorsi affidabbli. Il-fornituri ta’ klassifikazzjonijiet ESG għandhom isemmu b’mod espliċitu li l-klassifikazzjonijiet ESG tagħhom huma l-opinjoni tagħhom stess.
12.Il-fornituri ta’ klassifikazzjonijiet ESG ma għandhomx jiddivulgaw informazzjoni dwar il-kapital intellettwali, il-proprjetà intellettwali, l-għarfien espert jew ir-riżultati tal-innovazzjoni tagħhom li jikkwalifikaw bħala sigrieti kummerċjali kif definiti fl-Artikolu 2, punt 1, tad-Direttiva (UE) 2016/943 tal-Parlament Ewropew u tal-Kunsill.
13.Il-fornituri ta’ klassifikazzjonijiet ESG għandhom jagħmlu biss bidliet fil-klassifikazzjonijiet ESG tagħhom f’konformità mal-metodoloġiji tal-klassifikazzjoni tagħhom ippubblikati skont l-Artikolu 21.
Artikolu 15
Separazzjoni tan-negozju u tal-attivitajiet
1.Il-fornituri ta’ klassifikazzjonijiet ESG ma għandhom jipprovdu l-ebda waħda mill-attivitajiet li ġejjin:
(a)attivitajiet ta’ konsulenza ma’ investituri jew impriżi;
(b)il-ħruġ u l-bejgħ ta’ klassifikazzjonijiet tal-kreditu;
(c)l-iżvilupp ta’ parametri referenzjarji;
(d)attivitajiet ta’ investiment;
(e)attivitajiet ta’ awditjar;
(f)attivitajiet bankarji, tal-assigurazzjoni jew tar-riassigurazzjoni.
2.Il-fornituri ta’ klassifikazzjonijiet ESG għandhom jiżguraw li l-forniment ta’ servizzi oħrajn għajr dawk imsemmija fil-paragrafu 1 ma joħloqx riskji ta’ kunflitti ta’ interess fl-attivitajiet ta’ klassifikazzjoni ESG tagħhom.
Artikolu 16
Analisti tal-klassifikazzjoni, impjegati u persuni oħrajn involuti fil-forniment ta’ klassifikazzjonijiet ESG
1.Il-fornituri ta’ klassifikazzjonijiet ESG għandhom jiżguraw li l-analisti tal-klassifikazzjoni, l-impjegati u kwalunkwe persuna fiżika oħra li s-servizzi tagħha jitqiegħdu għad-dispożizzjoni jew taħt il-kontroll tagħhom u li huma direttament involuti fil-forniment ta’ klassifikazzjonijiet ESG, inklużi analisti direttament involuti fil-proċess ta’ klassifikazzjoni u persuni involuti fil-forniment ta’ punteġġi, ikollhom l-għarfien u l-esperjenza li huma meħtieġa għat-twettiq tad-dmirijiet u tal-kompiti assenjati.
2.Il-fornituri ta’ klassifikazzjonijiet ESG għandhom jiżguraw li l-persuni msemmija fil-paragrafu 1 ma jitħallewx jibdew jew jipparteċipaw f’negozjati rigward tariffi jew pagamenti ma’ kwalunkwe entità kklassifikata jew kwalunkwe persuna direttament jew indirettament marbuta mal-entità kklassifikata b’kontroll.
3.Il-persuni msemmija fil-paragrafu 1 ma għandhom jixtru jew ibigħu l-ebda strument finanzjarju maħruġ, garantit, jew appoġġat b’xi mod ieħor minn xi entità kklassifikata għajr parteċipazzjonijiet fi skemi diversifikati ta’ investiment kollettiv, inklużi fondi ġestiti, u lanqas ma għandhom jinvolvu ruħhom f’xi tranżazzjoni f’tali strumenti finanzjarji.
4.Il-persuni msemmija fil-paragrafu 1 ma għandhomx jipparteċipaw jew jinfluwenzaw b’xi mod ieħor id-determinazzjoni ta’ klassifikazzjoni ESG ta’ kwalunkwe entità kklassifikata meta dawk il-persuni:
(a)ikollhom strumenti finanzjarji tal-entità kklassifikata, minbarra parteċipazzjonijiet fi skemi diversifikati ta’ investiment kollettiv;
(b)ikollhom strumenti finanzjarji ta’ kwalunkwe entità relatata ma’ entità kklassifikata, li l-pussess tagħhom jista’ jikkawża jew jista’ ġeneralment ikun ipperċepit li qed jikkawża kunflitt ta’ interess, minbarra parteċipazzjonijiet fi skemi diversifikati ta’ investiment kollettiv;
(c)reċentement kellhom relazzjoni ta’ impjieg, negozju jew relazzjoni oħra mal-entità kklassifikata li tista’ tikkawża jew tista’ ġeneralment tkun ipperċepita li qed tikkawża kunflitt ta’ interess.
5.Il-fornituri ta’ klassifikazzjonijiet ESG għandhom jiżguraw li l-persuni msemmija fil-paragrafu 1:
(a)jieħdu l-miżuri kollha raġonevoli biex jipproteġu l-proprjetà u r-rekords fil-pussess tal-fornitur ta’ klassifikazzjonijiet ESG minn frodi, serq jew użu ħażin, filwaqt li jqisu n-natura, l-iskala u l-kumplessità tan-negozju tal-fornitur ta’ klassifikazzjonijiet ESG u n-natura u l-firxa tal-attivitajiet ta’ klassifikazzjoni ESG;
(b)ma jikkondividux informazzjoni kunfidenzjali li tkun ġiet fdata lill-fornitur ta’ klassifikazzjonijiet ESG ma’ xi persuna li ma tkunx involuta direttament fil-forniment ta’ attivitajiet ta’ klassifikazzjoni ESG, inklużi analisti tal-klassifikazzjoni u impjegati ta’ xi persuna direttament jew indirettament marbuta mal-fornitur ta’ klassifikazzjonijiet ESG b’kontroll, u kwalunkwe persuna fiżika oħra li s-servizzi tagħha huma jew ikunu tqiegħdu għad-dispożizzjoni ta’, jew huma taħt il-kontroll ta’, kwalunkwe persuna direttament jew indirettament marbuta mal-fornitur ta’ klassifikazzjonijiet ESG b’kontroll;
(c)ma jużawx jew ma jikkondividux informazzjoni kunfidenzjali għal xi skop ieħor għajr il-forniment ta’ attivitajiet ta’ klassifikazzjoni ESG, inkluż għan-negozjar ta’ strumenti finanzjarji.
6.Persuni kif imsemmija fil-paragrafu 1 li jqisu li kwalunkwe persuna oħra kif imsemmija fil-paragrafu 1 tkun involuta f’imġiba li huma jqisu li hija illegali għandhom jinformaw minnufih lill-funzjoni ta’ kontroll tal-konformità b’dan. Il-fornitur ta’ klassifikazzjonijiet ESG għandu jiżgura li tali rapportar ma jkollu l-ebda konsegwenza negattiva għall-persuna li tkun qed tirrapporta.
7.Meta analist tal-klassifikazzjoni jittermina l-impjieg tiegħu mal-fornitur ta’ klassifikazzjonijiet ESG u jingħaqad ma’ entità kklassifikata li fiha kien involut fil-klassifikazzjoni, il-fornitur ta’ klassifikazzjonijiet ESG għandu jirrieżamina x-xogħol tal-analist tal-klassifikazzjoni fuq sena qabel it-tluq tiegħu.
8.Il-persuni kif imsemmija fil-paragrafu 1 ma għandhomx jieħdu pożizzjoni maniġerjali ewlenija f’entità kklassifikata li fiha kienu involuti fil-klassifikazzjoni għal 6 xhur wara l-għoti ta’ tali klassifikazzjoni.
Artikolu 17
Rekwiżiti taż-żamma tar-rekords
1.Il-fornituri ta’ klassifikazzjonijiet ESG għandhom jirreġistraw l-attivitajiet ta’ klassifikazzjoni ESG tagħhom. Dawk ir-rekords għandu jkun fihom l-informazzjoni elenkata fl-Anness II.
2.Il-fornituri ta’ klassifikazzjonijiet ESG għandhom iżommu l-informazzjoni msemmija fil-paragrafu 1 għal mill-inqas 5 snin u f’tali forma li jkun possibbli li tiġi replikata u mifhuma bis-sħiħ id-determinazzjoni ta’ klassifikazzjoni ESG.
Artikolu 18
Mekkaniżmu ta’ trattament tal-ilmenti
1.Il-fornituri ta’ klassifikazzjonijiet ESG għandu jkollhom fis-seħħ u jippubblikaw fuq is-sit web tagħhom il-proċeduri biex jirċievu, jinvestigaw u jżommu rekords dwar l-ilmenti li jkunu saru.
2.Il-proċeduri msemmija fil-paragrafu 1 għandhom jiżguraw li:
(a)il-fornitur ta’ klassifikazzjonijiet ESG jagħmel disponibbli għall-pubbliku l-politika dwar it-trattament tal-ilmenti li permezz tagħha jistgħu jiġu sottomessi lmenti dwar:
(1)is-sorsi tad-data użati għal klassifikazzjoni ESG speċifika;
(2)il-mod li bih tkun ġiet applikata l-metodoloġija ta’ klassifikazzjoni b’rabta ma’ klassifikazzjoni ESG speċifika;
(3)jekk klassifikazzjoni ESG speċifika hijiex rappreżentattiva tal-entità kklassifikata;
(4)bidla proposta fil-proċess ta’ determinazzjoni tal-klassifikazzjoni ESG;
(5)deċiżjonijiet oħrajn b’rabta mal-klassifikazzjoni ESG;
(b)il-fatt li l-ilmenti jiġu investigati b’mod f’waqtu u ġust u li l-eżitu tal-investigazzjoni jiġi kkomunikat lill-ilmentatur f’perjodu ta’ żmien raġonevoli, sakemm tali komunikazzjoni ma tmurx kontra l-objettivi tal-ordni pubbliku jew ir-Regolament (UE) Nru 596/2014 tal-Parlament Ewropew u tal-Kunsill;
(c)il-fatt li l-inkjesta titwettaq b’mod indipendenti minn kwalunkwe persunal li kien involut fis-suġġett tal-ilment.
Artikolu 19
Esternalizzazzjoni
1.Il-fornituri ta’ klassifikazzjonijiet ESG ma għandhomx jesternalizzaw funzjonijiet operazzjonali importanti meta tali esternalizzazzjoni tfixkel b’mod materjali l-kwalità tal-politiki u l-proċeduri ta’ kontroll intern tal-fornitur ta’ klassifikazzjonijiet ESG, jew il-kapaċità tal-Awtorità Ewropea tat-Titoli u s-Swieq (ESMA) li tissorvelja l-konformità tal-fornitur ta’ klassifikazzjonijiet ESG mal-obbligi tiegħu skont dan ir-Regolament.
2.Il-fornituri ta’ klassifikazzjonijiet ESG li jesternalizzaw funzjonijiet jew kwalunkwe servizz jew attività li huma rilevanti għall-forniment ta’ klassifikazzjoni ESG għandhom jibqgħu kompletament responsabbli għat-twettiq tal-obbligi kollha skont dan ir-Regolament.
3.Il-fornituri ta’ klassifikazzjonijiet ESG li jesternalizzaw funzjonijiet jew kwalunkwe servizz jew attività li huma rilevanti għall-forniment ta’ klassifikazzjoni ESG għandhom jibqgħu kompletament responsabbli għad-divulgazzjoni tal-informazzjoni msemmija fl-Anness II.
Artikolu 20
Eżenzjonijiet fuq ir-rekwiżiti ta’ governanza
1.L-ESMA tista’ teżenta fornitur ta’ klassifikazzjonijiet ESG fuq talba tiegħu milli jikkonforma ma’ xi wħud mir-rekwiżiti stabbiliti fl-Artikolu 14 meta dak il-fornitur ta’ klassifikazzjonijiet ESG ikun jista’ juri li dawk ir-rekwiżiti ma humiex proporzjonati fid-dawl tan-natura, l-iskala u l-kumplessità tan-negozju tiegħu u n-natura u l-firxa tal-ħruġ tal-klassifikazzjonijiet ESG u diment li:
(a)il-fornitur ta’ klassifikazzjonijiet ESG ikun impriża żgħira jew ta’ daqs medju skont il-kriterji stabbiliti fl-Artikolu 3 tad-Direttiva 2013/34/UE;
(b)il-fornitur ta’ klassifikazzjonijiet ESG ikun implimenta miżuri u proċeduri u, b’mod partikolari, mekkaniżmi ta’ kontroll intern, arranġamenti ta’ rapportar u miżuri li jiżguraw l-indipendenza tal-analisti tal-klassifikazzjoni u tal-persuni li japprovaw il-klassifikazzjonijiet ESG u li jiżguraw il-konformità effettiva ma’ dan ir-Regolament;
(c)id-daqs tal-fornitur ta’ klassifikazzjonijiet ESG ma jiġix iddeterminat b’tali mod li tiġi evitata l-konformità mar-rekwiżiti ta’ dan ir-Regolament minn fornitur ta’ klassifikazzjonijiet ESG jew grupp ta’ fornituri ta’ klassifikazzjonijiet ESG.
2.Fil-każ ta’ grupp ta’ fornituri ta’ klassifikazzjonijiet ESG, l-ESMA għandha tiżgura li mill-inqas wieħed mill-fornituri ta’ klassifikazzjonijiet ESG fil-grupp ma jkunx eżentat mir-rekwiżiti stabbiliti f’dan ir-Regolament.
KAPITOLU 2
Rekwiżiti tat-trasparenza
Artikolu 21
Divulgazzjoni lill-pubbliku tal-metodoloġiji, tal-mudelli u tas-suppożizzjonijiet ewlenin tal-klassifikazzjoni użati fl-attivitajiet ta’ klassifikazzjoni ESG
1.Il-fornituri ta’ klassifikazzjonijiet ESG għandhom jiddivulgaw fuq is-sit web tagħhom il-metodoloġiji, il-mudelli u s-suppożizzjonijiet ewlenin tal-klassifikazzjoni li jużaw fl-attivitajiet ta’ klassifikazzjoni ESG tagħhom, inkluża l-informazzjoni msemmija fl-Anness III, punt 1.
2.L-ESMA għandha tiżviluppa abbozz ta’ standards tekniċi regolatorji li jispeċifikaw aktar l-elementi li għandhom jiġu ddivulgati f’konformità mal-paragrafu 1.
3.L-ESMA għandha tissottometti dawk l-abbozzi ta’ standards tekniċi regolatorji lill-Kummissjoni sa XX XXXX XXXX.
Il-Kummissjoni hija mogħtija s-setgħa biex tadotta l-istandards tekniċi regolatorji msemmija fl-ewwel subparagrafu f’konformità mal-proċedura stabbilita fl-Artikoli minn 10 sa 14 tar-Regolament (UE) Nru 1095/2010.
Artikolu 22
Divulgazzjonijiet lill-abbonati tal-klassifikazzjonijiet ESG u lill-entitajiet ikklassifikati
1.Il-fornituri ta’ klassifikazzjonijiet ESG għandhom jiddivulgaw, bħala minimu, l-informazzjoni msemmija fil-punt 2 tal-Anness III lill-abbonati tagħhom u lill-entitajiet ikklassifikati.
2.L-ESMA għandha tiżviluppa abbozz ta’ standards tekniċi regolatorji li jispeċifikaw aktar l-elementi li għandhom jiġu ddivulgati f’konformità mal-paragrafu 1.
3.L-ESMA għandha tissottometti dawk l-abbozzi ta’ standards tekniċi regolatorji lill-Kummissjoni sa XX XXXX XXXX.
Il-Kummissjoni hija mogħtija s-setgħa biex tadotta l-istandards tekniċi regolatorji msemmija fl-ewwel subparagrafu f’konformità mal-proċedura stabbilita fl-Artikoli minn 10 sa 14 tar-Regolament (UE) Nru 1095/2010.
KAPITOLU 3
Indipendenza u kunflitti ta’ interess
Artikolu 23
Indipendenza u evitar ta’ kunflitti ta’ interess
1.Il-fornituri ta’ klassifikazzjonijiet ESG għandu jkollhom fis-seħħ arranġamenti ta’ governanza robusti, inkluża struttura organizzattiva ċara bi rwoli u responsabbiltajiet definiti sewwa, trasparenti u konsistenti għall-persuni kollha involuti fil-forniment ta’ klassifikazzjoni ESG.
2.Il-fornituri ta’ klassifikazzjonijiet ESG għandhom jieħdu l-passi kollha meħtieġa biex jiżguraw li kwalunkwe klassifikazzjoni ESG ipprovduta ma tiġix affettwata minn xi kunflitt ta’ interess eżistenti jew potenzjali, jew minn xi relazzjoni kummerċjali, mill-fornitur ta’ klassifikazzjonijiet ESG innifsu jew mill-azzjonisti, mill-maniġers, mill-analisti tal-klassifikazzjoni, mill-impjegati jew minn xi persuna fiżika oħra li s-servizzi tagħha jitqiegħdu għad-dispożizzjoni jew taħt il-kontroll tal-fornituri ta’ klassifikazzjonijiet ESG, jew ta’ xi persuna direttament jew indirettament marbuta magħhom b’kontroll.
3.Fejn ikun hemm riskju ta’ kunflitt ta’ interess fi ħdan fornitur ta’ klassifikazzjonijiet ESG minħabba l-istruttura tas-sjieda, l-interessi ta’ kontroll, jew l-attivitajiet ta’ dak il-fornitur ta’ klassifikazzjonijiet ESG, ta’ xi entità li għandha jew tikkontrolla l-fornitur ta’ klassifikazzjonijiet ESG, ta’ entità li hija proprjetà tal-fornitur ta’ klassifikazzjonijiet ESG jew li hija kkontrollata minnu, jew ta’ xi wieħed mill-affiljati tal-fornitur ta’ klassifikazzjonijiet ESG, l-ESMA tista’ titlob lill-fornitur ta’ klassifikazzjonijiet ESG jieħu miżuri biex itaffi dak ir-riskju. Tali miżuri jistgħu jinkludu l-istabbiliment ta’ funzjoni ta’ sorveljanza indipendenti li tirrappreżenta lill-partijiet ikkonċernati, inklużi l-utenti tal-klassifikazzjonijiet ESG u l-kontributuri għal tali klassifikazzjonijiet, b’mod ibbilanċjat.
Meta kunflitt ta’ interess kif imsemmi fl-ewwel subparagrafu ma jkunx jista’ jiġi ġestit b’mod adegwat, l-ESMA tista’ titlob lill-fornitur ta’ klassifikazzjonijiet ESG iwaqqaf l-attivitajiet jew ir-relazzjonijiet li joħolqu l-kunflitt ta’ interess, jew tista’ titlob lill-fornitur ta’ klassifikazzjonijiet ESG jieqaf jipprovdi l-klassifikazzjonijiet ESG.
4.Il-fornituri ta’ klassifikazzjonijiet ESG għandhom jiddivulgaw lill-ESMA l-kunflitti ta’ interess eżistenti jew potenzjali kollha, inklużi l-kunflitti ta’ interess li jirriżultaw mis-sjieda jew mill-kontroll tal-fornituri ta’ klassifikazzjonijiet ESG.
5.Il-fornituri ta’ klassifikazzjonijiet ESG għandhom jistabbilixxu u joperaw politiki, proċeduri u arranġamenti organizzattivi effettivi għall-identifikazzjoni, id-divulgazzjoni, il-prevenzjoni, l-immaniġġar u l-mitigazzjoni tal-kunflitti ta’ interess. Il-fornituri ta’ klassifikazzjonijiet ESG għandhom jirrieżaminaw u jaġġornaw regolarment dawk il-politiki, il-proċeduri u l-arranġamenti. Dawk il-politiki, il-proċeduri u l-arranġamenti għandhom jipprevjenu, jimmaniġġaw u jimmitigaw b’mod speċifiku l-kunflitti ta’ interess minħabba s-sjieda jew il-kontroll tal-fornitur ta’ klassifikazzjonijiet ESG jew minħabba interessi oħrajn fil-grupp tal-fornitur ta’ klassifikazzjonijiet ESG, jew kunflitti ta’ interess li huma kkawżati minn persuni oħrajn li jeżerċitaw influwenza jew kontroll fuq il-fornitur ta’ klassifikazzjonijiet ESG b’rabta mad-determinazzjoni tal-klassifikazzjoni ESG.
6.Il-fornituri ta’ klassifikazzjonijiet ESG għandhom jirrieżaminaw l-operazzjonijiet tagħhom biex jidentifikaw kunflitti ta’ interess potenzjali mill-inqas kull sena.
Artikolu 24
Ġestjoni ta’ kunflitti ta’ interess potenzjali mill-impjegati
1.Il-fornituri ta’ klassifikazzjonijiet ESG għandhom jiżguraw li l-impjegati tagħhom u kwalunkwe persuna fiżika oħra li s-servizzi tagħha jitqiegħdu għad-dispożizzjoni jew taħt il-kontroll tagħhom u li jkunu involuti direttament fil-forniment ta’ klassifikazzjoni ESG:
(a)ikollhom il-ħiliet li huma meħtieġa biex iwettqu l-kompiti u d-dmirijiet tagħhom u jkunu soġġetti għal ġestjoni u superviżjoni effettivi;
(b)ma jkunux soġġetti għal influwenza mhux dovuta jew għal kunflitti ta’ interess;
(c) li l-kumpens u l-evalwazzjoni tal-prestazzjoni ta’ dawk il-persuni ma toħloqx kunflitti ta’ interess jew b’xi mod ieħor taffettwa l-integrità tal-proċess ta’ determinazzjoni tal-klassifikazzjoni ESG;
(d)ma jkollhom l-ebda interess jew konnessjoni kummerċjali li jikkompromettu l-attivitajiet tal-fornitur ta’ klassifikazzjonijiet ESG;
(e)ikunu pprojbiti milli jikkontribwixxu għad-determinazzjoni ta’ klassifikazzjoni ESG permezz ta’ offerti ta’ akkwist jew ta’ bejgħ u tranżazzjonijiet fuq bażi personali jew f’isem il-parteċipanti fis-suq, ħlief meta tali kontribuzzjoni tkun meħtieġa espliċitament bħala parti mill-metodoloġija tal-klassifikazzjoni ESG u tkun soġġetta għal regoli speċifiċi stabbiliti hemmhekk;
(f)ikunu soġġetti għal proċeduri effettivi li jikkontrollaw l-iskambju ta’ informazzjoni ma’ impjegati oħrajn involuti f’attivitajiet li jistgħu joħolqu riskju ta’ kunflitti ta’ interess jew ma’ partijiet terzi, meta dik l-informazzjoni tista’ taffettwa l-klassifikazzjoni ESG.
2.Il-fornituri ta’ klassifikazzjonijiet ESG għandhom jistabbilixxu proċeduri ta’ kontroll intern speċifiċi biex jiżguraw l-integrità u l-affidabbiltà tal-impjegat jew tal-persuna li tiddetermina l-klassifikazzjoni ESG, inkluża l-approvazzjoni interna mill-maniġment qabel it-tixrid tal-klassifikazzjoni ESG.
Artikolu 25
Trattament ġust, raġonevoli, trasparenti u mhux diskriminatorju tal-utenti tal-klassifikazzjonijiet ESG
1.Il-fornituri ta’ klassifikazzjonijiet ESG għandhom jieħdu passi li jkunu adegwati biex jiżguraw li t-tariffi imposti fuq il-klijenti jkunu ġusti, raġonevoli, trasparenti, mhux diskriminatorji u jkunu bbażati fuq il-kostijiet.
2.Għall-finijiet tal-paragrafu 1, l-ESMA tista’ titlob lill-fornituri ta’ klassifikazzjonijiet ESG jipprovdulha evidenza ddokumentata, tista’ tieħu miżuri superviżorji f’konformità mal-Artikolu 33, u tista’ tiddeċiedi li timponi multi f’konformità mal-Artikolu 34 meta ssib li t-tariffi tal-fornituri ta’ klassifikazzjonijiet ESG ma humiex ġusti, raġonevoli, trasparenti, mhux diskriminatorji u mhumiex ibbażati fuq il-kostijiet attwali.
KAPITOLU 4
Superviżjoni mill-ESMA
Taqsima 1
Prinċipji ġenerali
Artikolu 26
Nuqqas ta’ interferenza mal-kontenut tal-klassifikazzjonijiet jew tal-metodoloġiji
Fit-twettiq ta’ dmirijiethom skont dan ir-Regolament, l-ESMA, il-Kummissjoni jew kwalunkwe awtorità pubblika ta’ Stat Membru ma għandhomx jinterferixxu mal-kontenut tal-klassifikazzjonijiet jew tal-metodoloġiji ESG.
Artikolu 27
ESMA
1.F’konformità mal-Artikolu 16 tar-Regolament (UE) Nru 1095/2010, l-ESMA għandha toħroġ u taġġorna linji gwida dwar il-kooperazzjoni bejn l-ESMA u l-awtoritajiet kompetenti għall-finijiet ta’ dan ir-Regolament, inklużi l-proċeduri u l-kundizzjonijiet dettaljati relatati mad-delega tal-kompiti.
2.F’konformità mal-Artikolu 16 tar-Regolament (UE) Nru 1095/2010, l-ESMA għandha, f’kooperazzjoni mal-EBA u mal-EIOPA, toħroġ u taġġorna linji gwida dwar l-applikazzjoni tar-reġim ta’ approvazzjoni msemmi fl-Artikolu 10 ta’ dan ir-Regolament sa XX XXXX XXXX.
3.L-ESMA għandha tippubblika rapport annwali dwar l-applikazzjoni ta’ dan ir-Regolament, inkluż dwar il-miżuri superviżorji meħuda u l-penali imposti mill-ESMA skont dan ir-Regolament, inklużi multi u pagamenti perjodiċi ta’ penali. Dak ir-rapport għandu jkun fih, b’mod partikolari, informazzjoni dwar l-evoluzzjoni tas-suq tal-Klassifikazzjonijiet ESG u valutazzjoni tal-applikazzjoni tar-reġimi tal-pajjiżi terzi msemmija fl-Artikoli 9, 10 u 11.
L-ESMA għandha tippreżenta r-rapport annwali msemmi fl-ewwel subparagrafu lill-Parlament Ewropew, lill-Kunsill u lill-Kummissjoni.
4.L-ESMA għandha tikkoopera mal-EBA u mal-EIOPA fit-twettiq tal-kompiti tagħha u għandha tikkonsulta mal-EBA u mal-EIOPA qabel ma toħroġ u taġġorna linji gwida u tissottometti abbozzi ta’ standards tekniċi regolatorji.
Artikolu 28
Awtoritajiet kompetenti
1.Sa XX XXXX XXXX, kull Stat Membru għandu jinnomina awtorità kompetenti għall-finijiet ta’ dan ir-Regolament.
2.L-awtoritajiet kompetenti għandu jkollhom persunal adegwat, fir-rigward tal-kapaċità u l-għarfien espert, sabiex ikunu jistgħu japplikaw dan ir-Regolament.
Artikolu 29
Eżerċitar tas-setgħat imsemmija fl-Artikoli minn 30 sa 32
Is-setgħat mogħtija lill-ESMA jew lil xi uffiċjal tal-ESMA jew persuna oħra awtorizzata minnha mill-Artikoli minn 30 sa 32 ma għandhomx jintużaw biex tintalab id-divulgazzjoni ta’ informazzjoni jew dokumenti li huma soġġetti għal privileġġ legali.
Artikolu 30
Talbiet għal informazzjoni
1.L-ESMA tista’, b’talba sempliċi jew b’deċiżjoni, titlob lill-fornituri ta’ klassifikazzjonijiet ESG, lill-persuni involuti f’attivitajiet ta’ klassifikazzjoni ESG, lill-entitajiet ikklassifikati, lill-partijiet terzi li lilhom il-fornituri ta’ klassifikazzjonijiet ESG ikunu esternalizzaw funzjonijiet jew attivitajiet operazzjonali u lil persuni li b’xi mod ieħor ikunu relatati jew konnessi mill-qrib u b’mod sostanzjali ma’ fornituri ta’ klassifikazzjonijiet ESG jew ma’ attivitajiet ta’ klassifikazzjoni ESG, biex jipprovdu l-informazzjoni kollha li teħtieġ biex twettaq id-dmirijiet tagħha skont dan ir-Regolament.
2.Meta tibgħat talba sempliċi għall-informazzjoni skont il-paragrafu 1, l-ESMA għandha:
(a)tirreferi għal dan l-Artikolu bħala l-bażi ġuridika għat-talba;
(b)tiddikjara l-iskop tat-talba;
(c)tispeċifika x’informazzjoni tkun meħtieġa;
(d)tistabbilixxi limitu ta’ żmien li fih għandha tiġi pprovduta l-informazzjoni;
(e)tinforma lill-persuna li mingħandha tkun intalbet l-informazzjoni li ma hemm l-ebda obbligu li tiġi pprovduta l-informazzjoni, iżda li kwalunkwe tweġiba għat-talba għall-informazzjoni ma għandhiex tkun skorretta jew qarrieqa;
(f)tindika l-multa prevista fl-Artikolu 34, meta t-tweġibiet għall-mistoqsijiet li jsiru jkunu skorretti jew qarrieqa.
3.Meta titlob li tingħata informazzjoni skont il-paragrafu 1 b’deċiżjoni, l-ESMA għandha:
(a)tirreferi għal dan l-Artikolu bħala l-bażi ġuridika għat-talba;
(b)tiddikjara l-iskop tat-talba;
(c)tispeċifika x’informazzjoni tkun meħtieġa;
(d)tistabbilixxi limitu ta’ żmien li fih għandha tiġi pprovduta l-informazzjoni;
(e)tindika l-pagamenti perjodiċi ta’ penali previsti fl-Artikolu 35 meta l-produzzjoni tal-informazzjoni meħtieġa ma tkunx kompluta;
(f)tindika l-multa prevista fl-Artikolu 34, meta t-tweġibiet għall-mistoqsijiet li jsiru jkunu skorretti jew qarrieqa;
(g)tindika d-dritt għal appell tad-deċiżjoni quddiem il-Bord tal-Appell u għar-rieżami tad-deċiżjoni mill-Qorti tal-Ġustizzja tal-Unjoni Ewropea f’konformità mal-Artikoli 60 u 61 tar-Regolament (UE) Nru 1095/2010.
4.Il-persuni msemmija fil-paragrafu 1 jew ir-rappreżentanti tagħhom u, fil-każ ta’ persuni ġuridiċi jew ta’ assoċjazzjonijiet li ma jkollhom l-ebda personalità ġuridika, il-persuni awtorizzati li jirrappreżentawhom bil-liġi jew bil-kostituzzjoni tagħhom, għandhom jipprovdu l-informazzjoni mitluba. L-avukati debitament awtorizzati biex jaġixxu jistgħu jipprovdu l-informazzjoni f’isem il-klijenti tagħhom. Dawk il-klijenti għandhom jibqgħu kompletament responsabbli jekk l-informazzjoni pprovduta mill-avukati ma tkunx kompluta, jew tkun skorretta jew qarrieqa.
5.L-ESMA għandha, mingħajr dewmien, tibgħat kopja tat-talba sempliċi jew tad-deċiżjoni tagħha lill-awtorità kompetenti tal-Istat Membru fejn ikunu domiċiljati jew stabbiliti l-persuni msemmija fil-paragrafu 1 ikkonċernati mit-talba għall-informazzjoni.
Artikolu 31
Investigazzjonijiet ġenerali
1.Sabiex taqdi dmirijietha skont dan ir-Regolament, l-ESMA tista’ twettaq l-investigazzjonijiet kollha meħtieġa tal-persuni msemmija fl-Artikolu 30(1). Għal dak il-għan, l-uffiċjali tal-ESMA u persuni oħrajn awtorizzati minnha għandu jkollhom is-setgħa li:
(a)jeżaminaw kwalunkwe rekord, data, proċedura u kwalunkwe materjal ieħor rilevanti għat-twettiq tal-kompiti tagħhom, irrispettivament mill-mezz li fuqu jkunu maħżuna;
(b)jieħdu jew jiksbu kopji ċċertifikati ta’, jew siltiet minn, tali rekords, data, proċeduri u materjal ieħor;
(c)isejħu u jitolbu lil kwalunkwe persuna msemmija fl-Artikolu 30(1) jew lir-rappreżentanti jew lill-persunal tagħha għal spjegazzjonijiet bil-fomm jew bil-miktub dwar fatti jew dokumenti relatati mas-suġġett u mal-iskop tal-ispezzjoni u jżommu rekord tat-tweġibiet;
(d)jintervistaw lil kwalunkwe persuna fiżika jew ġuridika oħra li tagħti l-kunsens tagħha li tiġi intervistata għall-fini tal-ġbir ta’ informazzjoni relatata mas-suġġett ta’ investigazzjoni;
(e)jitolbu rekords tat-traffiku tat-telefon u tad-data.
2.L-uffiċjali tal-ESMA u persuni oħrajn awtorizzati minnha għall-finijiet tal-investigazzjonijiet imsemmija fil-paragrafu 1 għandhom jeżerċitaw is-setgħat tagħhom mal-produzzjoni ta’ awtorizzazzjoni bil-miktub li tispeċifika s-suġġett u l-iskop tal-investigazzjoni. Dik l-awtorizzazzjoni għandha tindika wkoll il-pagamenti perjodiċi ta’ penali previsti fl-Artikolu 35(1) meta l-produzzjoni tar-rekords, tad-data, tal-proċeduri jew ta’ xi materjal ieħor meħtieġ, jew it-tweġibiet għall-mistoqsijiet li jsiru lill-persuni msemmija fl-Artikolu ma jiġux ipprovduti jew ma jkunux kompluti, kif ukoll il-multi previsti fl-Artikolu 34, meta t-tweġibiet għall-mistoqsijiet li jsiru lill-persuni msemmija fl-Artikolu jkunu skorretti jew qarrieqa.
3.Il-persuni msemmija fl-Artikolu 30(1) għandhom jissottomettu ruħhom għal investigazzjonijiet imnedija abbażi ta’ deċiżjoni tal-ESMA. Id-deċiżjoni għandha tispeċifika s-suġġett u l-iskop tal-investigazzjoni, il-pagamenti perjodiċi ta’ penali previsti fl-Artikolu 3, ir-rimedji legali disponibbli skont ir-Regolament (UE) Nru 1095/2010 u d-dritt li d-deċiżjoni tiġi rieżaminata mill-Qorti tal-Ġustizzja tal-Unjoni Ewropea.
4.Fi żmien xieraq qabel l-investigazzjoni, l-ESMA għandha tinforma lill-awtorità kompetenti tal-Istat Membru fejn għandha titwettaq l-investigazzjoni bl-investigazzjoni u bl-identità tal-persuni awtorizzati. L-uffiċjali tal-awtorità kompetenti kkonċernata għandhom, fuq talba tal-ESMA, jassistu lil dawk il-persuni awtorizzati fil-qadi ta’ dmirijiethom. L-uffiċjali tal-awtorità kompetenti kkonċernata jistgħu jattendu wkoll l-investigazzjonijiet fuq talba.
5.Jekk talba għar-rekords tat-traffiku tat-telefon jew tad-data msemmija fil-paragrafu 1(e) tkun teħtieġ awtorizzazzjoni minn awtorità ġudizzjarja skont ir-regoli nazzjonali, għandha ssir applikazzjoni għal tali awtorizzazzjoni. Tista’ wkoll issir applikazzjoni għal tali awtorizzazzjoni bħala miżura ta’ prekawzjoni.
6.Meta ssir applikazzjoni għal awtorizzazzjoni kif imsemmi fil-paragrafu 5, l-awtorità ġudizzjarja nazzjonali għandha tivverifika li d-deċiżjoni tal-ESMA tkun awtentika u li l-miżuri koerċittivi previsti la jkunu arbitrarji u lanqas eċċessivi wara li jkun tqies is-suġġett tal-investigazzjonijiet. Meta tivverifika l-proporzjonalità tal-miżuri koerċittivi, l-awtorità ġudizzjarja nazzjonali tista’ titlob lill-ESMA għal spjegazzjonijiet dettaljati, b’mod partikolari dawk relatati mar-raġunijiet li jkollha l-ESMA biex tissuspetta li jkun sar ksur ta’ dan ir-Regolament u mas-serjetà tal-ksur suspettat u man-natura tal-involviment tal-persuna soġġetta għall-miżuri koerċittivi. Madankollu, l-awtorità ġudizzjarja nazzjonali ma għandhiex tirrieżamina l-ħtieġa għall-investigazzjoni jew titlob li tingħata l-informazzjoni dwar il-fajl tal-ESMA. Il-legalità tad-deċiżjoni tal-ESMA għandha tkun soġġetta għal rieżami mill-Qorti tal-Ġustizzja tal-Unjoni Ewropea biss skont il-proċedura stabbilita fir-Regolament (UE) Nru 1095/2010.
Artikolu 32
Spezzjonijiet fuq il-post
1.Sabiex taqdi dmirijietha skont dan ir-Regolament, l-ESMA tista’ twettaq l-ispezzjonijiet fuq il-post kollha meħtieġa fi kwalunkwe bini kummerċjali tal-persuni ġuridiċi msemmija fl-Artikolu 30(1). Meta t-twettiq tajjeb u l-effiċjenza tal-ispezzjoni jkunu jirrikjedu dan, l-ESMA tista’ twettaq spezzjoni fuq il-post mingħajr avviż minn qabel.
2.L-uffiċjali tal-ESMA u persuni oħrajn awtorizzati minnha sabiex iwettqu spezzjoni fuq il-post jistgħu jidħlu fi kwalunkwe bini kummerċjali u art tal-persuni ġuridiċi soġġetti għal deċiżjoni ta’ investigazzjoni adottata mill-ESMA u għandu jkollhom is-setgħat kollha stipulati fl-Artikolu 31(1). Huma għandu jkollhom ukoll is-setgħa li jissiġillaw kwalunkwe bini kummerċjali u l-kotba jew ir-rekords għall-perjodu tal-ispezzjoni u sa fejn ikun meħtieġ għaliha.
3.L-uffiċjali tal-ESMA u persuni oħrajn awtorizzati minnha biex iwettqu spezzjoni fuq il-post għandhom jeżerċitaw is-setgħat tagħhom wara l-produzzjoni ta’ awtorizzazzjoni bil-miktub li tispeċifika s-suġġett u l-iskop tal-ispezzjoni u l-pagamenti perjodiċi ta’ penali previsti fl-Artikolu 31 meta l-persuni kkonċernati ma jissottomettux ruħhom għall-ispezzjoni. Fi żmien xieraq qabel l-ispezzjoni, l-ESMA għandha tavża dwar l-ispezzjoni lill-awtorità kompetenti tal-Istat Membru li fih tkun se ssir l-ispezzjoni.
4.Il-persuni msemmija fl-Artikolu 30(1) għandhom jissottomettu ruħhom għal spezzjonijiet fuq il-post ordnati b’deċiżjoni tal-ESMA. Id-deċiżjoni għandha tispeċifika s-suġġett u l-iskop tal-ispezzjoni, tispeċifika d-data li fiha għandha tibda u tindika l-pagamenti perjodiċi ta’ penali previsti fl-Artikolu 31, ir-rimedji legali disponibbli skont ir-Regolament (UE) Nru 1095/2010, kif ukoll id-dritt li d-deċiżjoni tiġi rieżaminata mill-Qorti tal-Ġustizzja tal-Unjoni Ewropea. L-ESMA għandha tieħu tali deċiżjonijiet wara li tikkonsulta mal-awtorità kompetenti tal-Istat Membru li fih tkun se ssir l-ispezzjoni.
5.L-uffiċjali tal-awtorità kompetenti tal-Istat Membru li fih tkun se ssir l-ispezzjoni, kif ukoll dawk awtorizzati jew maħtura minnha, għandhom, fuq talba tal-ESMA, jassistu b’mod attiv lill-uffiċjali tal-ESMA u lil persuni oħrajn awtorizzati minnha. Għal dak il-għan, huma għandhom igawdu s-setgħat stabbiliti fil-paragrafu 2. L-uffiċjali tal-awtorità kompetenti tal-Istat Membru kkonċernat jistgħu wkoll jattendu l-ispezzjonijiet fuq il-post fuq talba.
6.L-ESMA tista’ wkoll titlob lill-awtoritajiet kompetenti jwettqu kompiti investigattivi speċifiċi u spezzjonijiet fuq il-post kif previst f’dan l-Artikolu u fl-Artikolu 31(1) f’isimha. Għal dak il-għan, l-awtoritajiet kompetenti għandhom igawdu l-istess setgħat bħall-ESMA kif stabbiliti f’dan l-Artikolu u fl-Artikolu 31(1).
7.Meta l-uffiċjali tal-ESMA u persuni oħrajn li jakkumpanjawhom awtorizzati mill-ESMA jsibu li persuna tkun qed topponi spezzjoni ordnata skont dan l-Artikolu, l-awtorità kompetenti tal-Istat Membru kkonċernat għandha tagħtihom l-assistenza meħtieġa, filwaqt li titlob, fejn xieraq, l-assistenza tal-pulizija jew ta’ awtorità tal-infurzar ekwivalenti, sabiex dawn ikunu jistgħu jwettqu l-ispezzjoni tagħhom fuq il-post.
8.Jekk l-ispezzjoni fuq il-post prevista fil-paragrafu 1 jew l-assistenza prevista fil-paragrafu 7 tkun teħtieġ awtorizzazzjoni minn awtorità ġudizzjarja skont ir-regoli nazzjonali, għandha ssir applikazzjoni għal tali awtorizzazzjoni. Tista’ wkoll issir applikazzjoni għal tali awtorizzazzjoni bħala miżura ta’ prekawzjoni.
9.Meta tkun saret applikazzjoni għall-awtorizzazzjoni msemmija fil-paragrafu 8, l-awtorità ġudizzjarja nazzjonali għandha tivverifika li d-deċiżjoni tal-ESMA tkun awtentika u li l-miżuri koerċittivi previsti la jkunu arbitrarji u lanqas eċċessivi wara li jkun tqies is-suġġett tal-ispezzjoni. Meta tivverifika l-proporzjonalità tal-miżuri koerċittivi, l-awtorità ġudizzjarja nazzjonali tista’ titlob lill-ESMA għal spjegazzjonijiet dettaljati, b’mod partikolari dawk relatati mar-raġunijiet li l-ESMA jkollha biex tissuspetta li jkun sar ksur ta’ dan ir-Regolament u s-serjetà tal-ksur suspettat u n-natura tal-involviment tal-persuna soġġetta għall-miżuri koerċittivi. Madankollu, l-awtorità ġudizzjarja nazzjonali ma għandhiex tirrieżamina l-ħtieġa għall-ispezzjoni jew titlob li tiġi pprovduta bl-informazzjoni dwar il-fajl tal-ESMA. Il-legalità tad-deċiżjoni tal-ESMA għandha tkun soġġetta għal rieżami mill-Qorti tal-Ġustizzja tal-Unjoni Ewropea biss skont il-proċedura stabbilita fir-Regolament (UE) Nru 1095/2010.
Taqsima 2
Sanzjonijiet amministrattivi u miżuri amministrattivi oħrajn
Artikolu 33
Miżuri superviżorji mill-ESMA
1.Meta l-ESMA ssib li fornitur ta’ klassifikazzjonijiet ESG ma jkunx ikkonforma mal-obbligi tiegħu skont dan ir-Regolament, hija għandha tieħu waħda jew aktar mill-miżuri superviżorji li ġejjin:
(a)tirtira l-awtorizzazzjoni tal-fornitur ta’ klassifikazzjonijiet ESG;
(b)tipprojbixxi temporanjament lill-fornitur ta’ klassifikazzjonijiet ESG milli jipprovdi klassifikazzjonijiet ESG, sakemm il-ksur ikun intemm;
(c)tissospendi l-użu tal-klassifikazzjonijiet ESG ipprovduti mill-fornitur ta’ klassifikazzjonijiet ESG, sakemm il-ksur ikun intemm;
(d)titlob lill-fornitur ta’ klassifikazzjonijiet ESG itemm il-ksur;
(e)timponi multi skont l-Artikolu 34;
(f)toħroġ avviżi pubbliċi.
2.Il-miżuri superviżorji msemmija fil-paragrafu 1 għandhom ikunu effettivi, proporzjonati u dissważivi.
3.Meta tieħu l-miżuri superviżorji msemmija fil-paragrafu 1, l-ESMA għandha tqis in-natura u s-serjetà tal-ksur, filwaqt li tqis il-kriterji li ġejjin:
(a)id-durata u l-frekwenza tal-ksur;
(b)jekk ir-reat finanzjarju kienx ikkawżat, iffaċilitat jew inkella attribwibbli għall-ksur;
(c)jekk il-ksur ikunx sar intenzjonalment jew b’negliġenza;
(d)il-grad ta’ responsabbiltà tal-persuna responsabbli għall-ksur;
(e)is-saħħa finanzjarja tal-fornitur ta’ klassifikazzjonijiet ESG, kif indikata mill-fatturat nett annwali totali tiegħu;
(f)l-impatt tal-ksur fuq l-interessi tal-investituri bl-imnut;
(g)l-importanza tal-profitti miksuba u tat-telf evitat mill-fornitur ta’ klassifikazzjonijiet ESG jew tat-telf għall-partijiet terzi derivat mill-ksur, sa fejn ikunu jistgħu jiġu ddeterminati tali profitti u telf;
(h)il-livell ta’ kooperazzjoni tal-fornitur ta’ klassifikazzjonijiet ESG mal-ESMA, mingħajr preġudizzju għall-ħtieġa li tiġi żgurata r-restituzzjoni tal-profitti miksuba jew tat-telf evitat minn dak il-fornitur ta’ klassifikazzjonijiet ESG;
(i)ksur preċedenti mill-fornitur ta’ klassifikazzjonijiet ESG;
(j)il-miżuri meħuda wara l-ksur mill-fornitur ta’ klassifikazzjonijiet ESG biex tiġi evitata r-repetizzjoni tiegħu.
4.L-ESMA għandha tinnotifika kwalunkwe azzjoni meħuda skont il-paragrafu 1 lill-persuna responsabbli għall-ksur mingħajr dewmien żejjed. L-ESMA għandha tippubblika kwalunkwe azzjoni bħal din fuq is-sit web tagħha fi żmien 10 ijiem tax-xogħol mid-data meta tkun ġiet adottata.
Il-pubblikazzjoni msemmija fl-ewwel subparagrafu għandu jkun fiha dawn kollha li ġejjin:
(a)dikjarazzjoni li tafferma d-dritt tal-fornitur ta’ klassifikazzjonijiet ESG li jappella d-deċiżjoni;
(b)fejn rilevanti, dikjarazzjoni li tafferma li jkun tressaq appell u li tispeċifika li tali appell ma jkollux effett sospensiv;
(c)dikjarazzjoni li tasserixxi li jkun possibbli għall-ESMA li tissospendi l-applikazzjoni tad-deċiżjoni kkontestata f’konformità mal-Artikolu 60(3) tar-Regolament (UE) Nru 1095/2010.
Artikolu 34
Multi
1.Meta l-ESMA ssib li fornitur ta’ klassifikazzjonijiet ESG, jew, fejn applikabbli, ir-rappreżentant legali tiegħu, ikun kiser dan ir-Regolament intenzjonalment jew b’negliġenza, hija għandha tadotta deċiżjoni li timponi multa. L-ammont massimu tal-multa għandu jkun ta’ 10 % tal-fatturat nett annwali totali tal-fornitur ta’ klassifikazzjonijiet ESG, ikkalkolat abbażi tal-aktar rapporti finanzjarji disponibbli reċenti approvati mill-korp maniġerjali tal-fornitur ta’ klassifikazzjonijiet ESG.
2.Meta l-fornitur ta’ klassifikazzjonijiet ESG ikun impriża prinċipali jew sussidjarja ta’ impriża prinċipali li tkun meħtieġa tħejji kontijiet finanzjarji kkonsolidati skont id-Direttiva 2013/34/UE, il-fatturat nett annwali totali rilevanti għandu jkun il-fatturat nett annwali totali jew it-tip korrispondenti ta’ introjtu f’konformità mad-dritt tal-Unjoni rilevanti fil-qasam tal-kontabilità, skont l-aktar kontijiet ikkonsolidati disponibbli reċenti approvati mill-korp maniġerjali tal-impriża prinċipali aħħarija.
3.Meta tiddetermina l-livell ta’ multa skont il-paragrafu 1, l-ESMA għandha tqis il-kriterji stabbiliti fl-Artikolu 33(3).
4.Minkejja l-paragrafu 3, meta l-fornitur ta’ klassifikazzjonijiet ESG ikun ibbenefika finanzjarjament mill-ksur, direttament jew indirettament, l-ammont tal-multa għandu jkun mill-inqas ugwali għal dak il-benefiċċju.
5.Meta att jew ommissjoni ta’ fornitur ta’ klassifikazzjonijiet ESG ikunu jikkostitwixxu aktar minn ksur wieħed ta’ dan ir-Regolament, għandha tapplika biss l-ogħla multa kkalkolata f’konformità mal-paragrafu 2 u relatata ma’ wieħed mill-każijiet ta’ ksur.
Artikolu 35
Pagamenti perjodiċi ta’ penali
1.L-ESMA għandha, b’deċiżjoni, timponi pagamenti perjodiċi ta’ penali sabiex iġġiegħel:
(a)fornitur ta’ klassifikazzjonijiet ESG itemm ksur f’konformità ma’ deċiżjoni meħuda skont l-Artikolu 33;
(b)il-persuni msemmija fl-Artikolu 30(1):
(1)jipprovdu informazzjoni kompluta li tkun intalbet b’deċiżjoni meħuda skont l-Artikolu 30;
(2)jissottomettu ruħhom għal investigazzjoni u, b’mod partikolari, jipproduċu fl-intier tagħhom rekords, data, proċeduri kompluti jew kwalunkwe materjal ieħor meħtieġ u jimlew u jikkoreġu informazzjoni oħra pprovduta f’investigazzjoni mnedija b’deċiżjoni meħuda skont l-Artikolu 30;
(3)jissottomettu ruħhom għal spezzjoni fuq il-post ordnata b’deċiżjoni meħuda skont l-Artikolu 32.
2.Pagament perjodiku ta’ penali għandu jkun effettiv u proporzjonat. L-ESMA għandha timponi l-pagament perjodiku ta’ penali fuq bażi ta’ kuljum sakemm il-fornitur ta’ klassifikazzjonijiet ESG jew il-persuna kkonċernata jikkonformaw mad-deċiżjoni rilevanti msemmija fil-paragrafu 1.
3.Minkejja l-paragrafu 2, l-ammont tal-pagamenti perjodiċi ta’ penali għandu jkun 3 % tal-fatturat medju ta’ kuljum fis-sena kontabilistika preċedenti, jew, fil-każ ta’ persuni fiżiċi, 2 % tal-introjtu medju ta’ kuljum fis-sena kalendarja preċedenti. Dan għandu jiġi kkalkolat mid-data stipulata fid-deċiżjoni li timponi l-pagament perjodiku ta’ penali.
4.Pagament perjodiku ta’ penali għandu jiġi impost għal perjodu massimu ta’ 6 xhur wara n-notifika tad-deċiżjoni tal-ESMA. Wara t-tmiem ta’ dak il-perjodu, l-ESMA għandha tirrieżamina l-miżura.
Artikolu 36
Divulgazzjoni, natura, infurzar u allokazzjoni tal-multi u tal-pagamenti perjodiċi ta’ penali
1.L-ESMA għandha tiddivulga lill-pubbliku kull multa u kull pagament perjodiku ta’ penali li hija tkun imponiet skont l-Artikoli 34 u 35, sakemm tali divulgazzjoni lill-pubbliku ma tipperikolax serjament is-swieq finanzjarji tal-Unjoni jew ma tikkawżax dannu sproporzjonat lill-partijiet involuti. Tali divulgazzjoni ma għandux ikun fiha data personali skont it-tifsira tar-Regolament (UE) 2018/1725 tal-Parlament Ewropew u tal-Kunsill.
2.Il-multi u l-pagamenti perjodiċi ta’ penali imposti skont l-Artikoli 34 u 35 għandhom ikunu ta’ natura amministrattiva.
3.Il-multi u l-pagamenti perjodiċi ta’ penali imposti skont l-Artikoli 34 u 35 għandhom ikunu infurzabbli.
L-infurzar tal-multi u tal-pagamenti perjodiċi għandu jiġi regolat mir-regoli ta’ proċedura fis-seħħ fl-Istat Membru jew fil-pajjiż terz fejn jitwettaq.
4.Il-multi u l-pagamenti perjodiċi ta’ penali għandhom jiġu allokati għall-baġit ġenerali tal-Unjoni Ewropea.
Taqsima 3
Proċeduri u rieżami
Artikolu 37
Regoli proċedurali sabiex jittieħdu miżuri superviżorji u jiġu imposti multi
1.Meta l-ESMA ssib li hemm indikazzjonijiet serji ta’ ksur possibbli ta’ dan ir-Regolament, l-ESMA għandha taħtar uffiċjal tal-investigazzjoni indipendenti fi ħdan l-ESMA biex jinvestiga l-kwistjoni. L-uffiċjal maħtur ma għandux jiġi involut jew ikun ġie involut, direttament jew indirettament, fis-superviżjoni tal-klassifikazzjonijiet ESG li magħhom ikun relatat il-ksur u għandu jwettaq il-funzjonijiet tiegħu indipendentement mill-Bord tas-Superviżuri tal-ESMA.
2.L-uffiċjal tal-investigazzjoni msemmi fil-paragrafu 1 għandu jinvestiga l-allegat ksur, filwaqt li jqis kwalunkwe kumment sottomess mill-persuni li jkunu soġġetti għall-investigazzjoni, u għandu jissottometti fajl komplut bis-sejbiet tiegħu lill-Bord tas-Superviżuri tal-ESMA.
3.L-uffiċjal tal-investigazzjoni għandu jkollu s-setgħa li jitlob informazzjoni f’konformità mal-Artikolu 30 u li jwettaq investigazzjonijiet u spezzjonijiet fuq il-post f’konformità mal-Artikoli 31 u 32.
4.Meta jwettaq il-kompiti tiegħu, l-uffiċjal tal-investigazzjoni għandu jkollu aċċess għad-dokumenti u l-informazzjoni kollha li jkunu nġabru mill-ESMA fl-attivitajiet superviżorji tagħha.
5.Id-drittijiet ta’ difiża tal-persuni soġġetti għall-investigazzjonijiet għandhom jiġu rrispettati bis-sħiħ matul l-investigazzjonijiet skont dan l-Artikolu.
6.Mas-sottomissjoni tal-fajl bis-sejbiet tiegħu lill-Bord tas-Superviżuri tal-ESMA, l-uffiċjal tal-investigazzjoni għandu jinnotifika lill-persuni li jkunu soġġetti għall-investigazzjoni.
7.Abbażi tal-fajl li jkun fih is-sejbiet tal-uffiċjal tal-investigazzjoni u, fejn mitlub mill-persuni kkonċernati wara li jkun sema’ lil dawk il-persuni f’konformità mal-Artikolu 38, il-Bord tas-Superviżuri tal-ESMA għandu jivvaluta jekk persuna waħda jew aktar soġġetti għall-investigazzjoni jkunux ikkommettew il-ksur ikkonċernat u għandu, f’dak li għandu x’jaqsam mal-konklużjoni li jkun twettaq tali ksur, jieħu miżura superviżorja kif imsemmija fl-Artikolu 33 u jimponi multa f’konformità mal-Artikolu 34.
8.L-uffiċjal tal-investigazzjoni ma għandux jipparteċipa fid-deliberazzjonijiet tal-Bord tas-Superviżuri tal-ESMA jew jintervjeni bi kwalunkwe mod ieħor fil-proċess tat-teħid tad-deċiżjonijiet tal-Bord tas-Superviżuri tal-ESMA.
9.Il-Kummissjoni għandha tissupplimenta dan ir-Regolament billi tadotta aktar regoli ta’ proċedura biex tiġi eżerċitata s-setgħa tal-ESMA li timponi multi jew pagamenti perjodiċi ta’ penali, inklużi dispożizzjonijiet dwar id-drittijiet ta’ difiża, dispożizzjonijiet temporali, u l-ġbir ta’ multi jew pagamenti perjodiċi ta’ penali, u billi tadotta regoli dettaljati dwar il-perjodi ta’ limitazzjoni għall-impożizzjoni u l-infurzar tal-penali.
Ir-regoli msemmija fl-ewwel subparagrafu għandhom jiġu adottati permezz ta’ atti delegati f’konformità mal-Artikolu 45.
10.L-ESMA għandha tirreferi kwistjonijiet għal prosekuzzjoni kriminali lill-awtoritajiet nazzjonali kkonċernati meta, fit-twettiq tal-kompiti tagħha skont dan ir-Regolament, hija ssib li jkun hemm indikazzjonijiet serji tal-eżistenza possibbli ta’ fatti li jistgħu jikkostitwixxu reati kriminali. L-ESMA għandha żżomm lura milli timponi multi jew pagamenti perjodiċi ta’ penali meta liberazzjoni minn qabel jew kundanna li tirriżulta minn fatt identiku jew fatti li jkunu sostanzjalment l-istess tkun diġà saret res judicata bħala riżultat tal-proċedimenti kriminali skont il-liġi nazzjonali.
Artikolu 38
Smigħ tal-persuni soġġetti għal investigazzjonijiet
1.Qabel ma tieħu kwalunkwe deċiżjoni skont l-Artikoli 33, 34 u 35, l-ESMA għandha tagħti lill-persuni soġġetti għall-proċedimenti l-opportunità li jinstemgħu dwar is-sejbiet tagħha. L-ESMA għandha tibbaża d-deċiżjonijiet tagħha fuq sejbiet li dwarhom il-persuni soġġetti għall-proċedimenti kellhom opportunità li jikkummentaw biss.
L-ewwel subparagrafu ma għandux japplika meta tkun meħtieġa azzjoni urġenti skont l-Artikolu 33 sabiex jiġi evitat li ssir ħsara sinifikanti u imminenti lis-sistema finanzjarja. F’każ bħal dan, l-ESMA tista’ tadotta deċiżjoni interim u għandha tagħti lill-persuni kkonċernati l-opportunità li jinstemgħu malajr kemm jista’ jkun wara li tieħu d-deċiżjoni tagħha.
2.Id-drittijiet ta’ difiża tal-persuni soġġetti għall-proċedimenti għandhom jiġu rrispettati bis-sħiħ fl-investigazzjonijiet. Huma għandhom ikunu intitolati li jkollhom aċċess għall-fajl tal-ESMA, soġġetti għall-interess leġittimu ta’ persuni oħrajn fil-protezzjoni tas-sigrieti kummerċjali tagħhom. Id-dritt ta’ aċċess għall-fajl ma għandux jestendi għal informazzjoni kunfidenzjali jew għad-dokumenti preparatorji interni tal-ESMA.
Artikolu 39
Rieżami mill-Qorti tal-Ġustizzja
Il-Qorti tal-Ġustizzja għandu jkollha ġuriżdizzjoni bla limiti biex tirrieżamina d-deċiżjonijiet li permezz tagħhom l-ESMA tkun imponiet multa jew pagament perjodiku ta’ penali. Hija tista’ tannulla, tnaqqas jew iżżid il-multa jew il-pagament perjodiku ta’ penali impost.
Taqsima 4
Tariffi u delega
Artikolu 40
Tariffi superviżorji
1.L-ESMA għandha timponi tariffi fuq il-fornituri ta’ klassifikazzjonijiet ESG f’konformità mal-att delegat adottat skont il-paragrafu 2. Dawk it-tariffi għandhom ikopru bis-sħiħ in-nefqa meħtieġa tal-ESMA relatata mas-superviżjoni tal-fornituri ta’ klassifikazzjonijiet ESG u r-rimborż ta’ kwalunkwe kost li l-awtoritajiet kompetenti jistgħu jġarrbu fit-twettiq tax-xogħol skont dan ir-Regolament, b’mod partikolari bħala riżultat ta’ kwalunkwe delega tal-kompiti f’konformità mal-Artikolu 41.
2.L-ammont ta’ tariffa individwali għandu jkun proporzjonat mal-fatturat nett annwali tal-fornitur ta’ klassifikazzjonijiet ESG ikkonċernat.
Sa XX XXXX XXXX, il-Kummissjoni għandha tadotta atti delegati f’konformità mal-Artikolu 45 biex jissupplimentaw dan ir-Regolament billi tispeċifika t-tip ta’ tariffi, il-kwistjonijiet li għalihom huma dovuti t-tariffi, l-ammont tat-tariffi, il-mod li bih għandhom jitħallsu u, fejn applikabbli, il-mod li bih l-ESMA għandha tirrimborża lill-awtoritajiet kompetenti fir-rigward ta’ kwalunkwe kost li setgħu ġarrbu fit-twettiq tax-xogħol skont dan ir-Regolament, b’mod partikolari bħala riżultat ta’ kwalunkwe delega tal-kompiti kif imsemmi fl-Artikolu 41.
KAPITOLU 5
Kooperazzjoni bejn l-ESMA u l-awtoritajiet nazzjonali kompetenti
Artikolu 41
Delega tal-kompiti mill-ESMA lill-awtoritajiet kompetenti
1.Fejn meħtieġ għat-twettiq xieraq ta’ kompitu superviżorju, l-ESMA tista’ tiddelega kompiti superviżorji speċifiċi lill-awtorità kompetenti ta’ Stat Membru f’konformità mal-linji gwida maħruġa mill-ESMA skont l-Artikolu 16 tar-Regolament (UE) Nru 1095/2010. Tali kompiti superviżorji speċifiċi jistgħu, b’mod partikolari, jinkludu s-setgħa li jitwettqu talbiet għal informazzjoni f’konformità mal-Artikolu 30 u li jsiru investigazzjonijiet u spezzjonijiet fuq il-post f’konformità mal-Artikolu 31 u mal-Artikolu 32.
2.Qabel id-delega ta’ kompitu f’konformità mal-paragrafu 1, l-ESMA għandha tikkonsulta mal-awtorità kompetenti rilevanti dwar:
(a)il-kamp ta’ applikazzjoni tal-kompitu li għandu jiġi ddelegat;
(b)l-iskeda ta’ żmien għat-twettiq tal-kompitu;
(c)it-trażmissjoni tal-informazzjoni meħtieġa mill-ESMA u lilha.
3.L-ESMA għandha tirrimborża lil awtorità kompetenti għall-kostijiet imġarrba bħala riżultat tat-twettiq tal-kompiti ddelegati f’konformità mal-att delegat adottat skont l-Artikolu 45.
4.L-ESMA għandha tirrieżamina kwalunkwe delega li ssir f’konformità mal-paragrafu 1 f’intervalli xierqa. L-ESMA tista’ tirrevoka delega fi kwalunkwe ħin.
5.Delega tal-kompiti la għandha taffettwa r-responsabbiltà tal-ESMA u lanqas tillimita l-kapaċità tal-ESMA li twettaq u tissorvelja l-attività ddelegata. L-ESMA ma għandhiex tiddelega r-responsabbiltajiet superviżorji, inklużi d-deċiżjonijiet ta’ awtorizzazzjoni, il-valutazzjonijiet finali u d-deċiżjonijiet ta’ segwitu dwar il-ksur.
Artikolu 42
Skambju ta’ informazzjoni
L-ESMA u l-awtoritajiet kompetenti għandhom, mingħajr dewmien żejjed, jipprovdu lil xulxin bl-informazzjoni meħtieġa għall-qadi ta’ dmirijiethom skont dan ir-Regolament.
Artikolu 43
Notifiki u talbiet għal sospensjoni mill-awtoritajiet kompetenti
1.Awtorità kompetenti ta’ Stat Membru li ssib li fit-territorju tiegħu stess jew ta’ Stat Membru ieħor qed jitwettqu jew twettqu atti li jiksru dan ir-Regolament, għandha tinforma lill-ESMA b’dan. Awtorità kompetenti li tqis li jkun xieraq għal skopijiet investigattivi tista’ tissuġġerixxi lill-ESMA li tivvaluta l-ħtieġa li tuża s-setgħat skont l-Artikolu 30 b’rabta mal-fornitur ta’ klassifikazzjonijiet ESG involut f’dawk l-atti.
2.L-ESMA għandha tieħu azzjoni xierqa. L-ESMA għandha tinforma lill-awtorità kompetenti notifikanti bl-eżitu u, sa fejn ikun possibbli, bi kwalunkwe żvilupp interim sinifikanti.
3.Awtorità kompetenti notifikanti ta’ Stat Membru li tqis li fornitur ta’ klassifikazzjonijiet ESG li huwa elenkat fir-reġistru msemmi fl-Artikolu 13 u li l-klassifikazzjonijiet ESG tiegħu jintużaw fit-territorju ta’ dak l-Istat Membru jkun kiser dan ir-Regolament b’tali mod li l-protezzjoni tal-investituri jew l-istabbiltà tas-sistema finanzjarja f’dak l-Istat Membru jiġu affettwati b’mod sinifikanti, tista’ titlob lill-ESMA tissospendi l-forniment ta’ klassifikazzjonijiet ESG mill-fornitur ta’ klassifikazzjonijiet ESG ikkonċernat. L-awtorità kompetenti notifikanti għandha tipprovdi lill-ESMA bir-raġunijiet sħaħ għat-talba tagħha.
4.Meta l-ESMA tqis li t-talba msemmija fil-paragrafu 3 ma tkunx ġustifikata, hija għandha tinforma lill-awtorità kompetenti notifikanti b’dan bil-miktub, filwaqt li tistabbilixxi r-raġunijiet għall-opinjoni tagħha. Meta l-ESMA tqis li t-talba hija ġustifikata, hija għandha tieħu l-miżuri xierqa biex issolvi l-kwistjoni.
Artikolu 44
Segretezza professjonali
1.L-obbligu tas-segretezza professjonali għandu japplika għall-ESMA, għall-awtoritajiet kompetenti u għall-persuni kollha li jaħdmu jew li ħadmu għall-ESMA, għall-awtoritajiet kompetenti jew għal kwalunkwe persuna oħra li lilha l-ESMA tkun iddelegat xi kompiti, inklużi awdituri u esperti kkuntrattati mill-ESMA.
2.
L-informazzjoni kollha skambjata skont dan ir-Regolament bejn l-ESMA, l-awtoritajiet kompetenti, l-EBA, l-EIOPA u l-BERS għandha titqies kunfidenzjali, ħlief:
(a)meta l-ESMA jew l-awtorità kompetenti jew awtorità oħra jew korp ieħor ikkonċernati jiddikjaraw fil-mument tal-komunikazzjoni li tali informazzjoni tista’ tiġi ddivulgata;
(b)meta d-divulgazzjoni tkun meħtieġa għal proċedimenti ġudizzjarji;
(c)meta l-informazzjoni ddivulgata tintuża f’sommarju jew f’forma aggregata fejn il-parteċipanti individwali fis-swieq finanzjarji ma jkunux jistgħu jiġu identifikati.
TITOLU IV
ATTI DELEGATI U TA’ IMPLIMENTAZZJONI
Artikolu 45
Eżerċitar u revoka tad-delega u oġġezzjonijiet għall-atti delegati
1.Is-setgħa ta’ adozzjoni ta’ atti delegati hija mogħtija lill-Kummissjoni bil-kundizzjonijiet stabbiliti f’dan l-Artikolu.
2.Is-setgħa ta’ adozzjoni ta’ atti delegati msemmija fl-Artikoli 5, 21, 22 u 40 għandha tiġi mogħtija lill-Kummissjoni għal perjodu ta’ żmien indeterminat minn [UP: Jekk jogħġbok daħħal id-data tad-dħul fis-seħħ].
3.Id-delega tas-setgħa msemmija fl-Artikoli 5, 21, 22 u 40 tista’ tista’ tiġi revokata fi kwalunkwe mument mill-Parlament Ewropew jew mill-Kunsill. Deċiżjoni li tirrevoka għandha ttemm id-delega tas-setgħa speċifikata f’dik id-deċiżjoni. Din għandha ssir effettiva l-għada tal-pubblikazzjoni tad-deċiżjoni f’Il-Ġurnal Uffiċjali tal-Unjoni Ewropea jew f’data aktar tard speċifikata fih. Ma għandhiex taffettwa l-validità ta’ kwalunkwe att delegat li jkun diġà fis-seħħ.
4.Qabel ma tadotta att delegat, il-Kummissjoni għandha tikkonsulta mal-esperti maħtura minn kull Stat Membru f’konformità mal-prinċipji stabbiliti fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet.
5.Hekk kif tadotta att delegat, il-Kummissjoni għandha tinnotifikah simultanjament lill-Parlament Ewropew u lill-Kunsill.
6.Att delegat adottat skont l-Artikoli 7, 33, 34 u 40 għandu jidħol fis-seħħ biss jekk ma tiġix espressa oġġezzjoni mill-Parlament Ewropew jew mill-Kunsill fi żmien xahrejn min-notifika ta’ dak l-att lill-Parlament Ewropew u lill-Kunsill jew jekk, qabel ma jiskadi dak il-perjodu, il-Parlament Ewropew u l-Kunsill ikunu t-tnejn infurmaw lill-Kummissjoni li ma humiex sejrin joġġezzjonaw. Dak il-perjodu għandu jiġi estiż b’[xahrejn] fuq l-inizjattiva tal-Parlament Ewropew jew tal-Kunsill.
7.Jekk, malli jiskadi l-perjodu msemmi fil-paragrafu 6, la l-Parlament Ewropew u lanqas il-Kunsill ma jkunu oġġezzjonaw għall-att delegat, dan għandu jiġi ppubblikat f’Il-Ġurnal Uffiċjali tal-Unjoni Ewropea u għandu jidħol fis-seħħ fid-data ddikjarata fih. L-att delegat jista’ jiġi ppubblikat f’Il-Ġurnal Uffiċjali tal-Unjoni Ewropea u jidħol fis-seħħ qabel l-iskadenza ta’ dak il-perjodu jekk il-Parlament Ewropew u l-Kunsill ikunu t-tnejn infurmaw lill-Kummissjoni bl-intenzjoni tagħhom li ma jqajmux oġġezzjonijiet.
8.Jekk jew il-Parlament Ewropew jew il-Kunsill joġġezzjona għall-att delegat fil-perjodu msemmi fil-paragrafu 1, dan ma għandux jidħol fis-seħħ. F’konformità mal-Artikolu 296 tat-Trattat dwar il-Funzjonament tal-Unjoni Ewropea, l-istituzzjoni li toġġezzjona għandha tiddikjara r-raġunijiet għall-oġġezzjoni għall-att delegat.
Artikolu 46
Emendi fl-Annessi
Sabiex tqis l-iżviluppi, inklużi l-iżviluppi internazzjonali, fis-swieq finanzjarji, b’mod partikolari b’rabta mal-finanzi sostenibbli, il-Kummissjoni tista’ tadotta, permezz ta’ atti delegati f’konformità mal-Artikolu 45, miżuri biex temenda l-Annessi.
Artikolu 47
Proċedura ta’ kumitat
1.Il-Kummissjoni għandha tiġi assistita mill-Kumitat Ewropew tat-Titoli stabbilit mid-Deċiżjoni tal-Kummissjoni 2001/528/KE. Dak il-kumitat għandu jkun kumitat skont it-tifsira tar-Regolament (UE) Nru 182/2011 tal-Parlament Ewropew u tal-Kunsill.
2.Fejn issir referenza għal dan il-paragrafu, għandu japplika l-Artikolu 5 tar-Regolament (UE) Nru 182/2011.
TITOLU V
DISPOŻIZZJONIJIET TRANŻITORJI U FINALI
Artikolu 48
Dispożizzjonijiet tranżitorji
1.Il-fornituri ta’ klassifikazzjonijiet ESG li pprovdew is-servizzi tagħhom fid-data tad-dħul fis-seħħ ta’ dan ir-Regolament għandhom jinnotifikaw lill-ESMA fi żmien 3 xhur jekk ikunu jridu jkomplu joffru s-servizzi tagħhom u japplikaw għal awtorizzazzjoni f’konformità mal-Artikolu 5. F’dak il-każ, huma għandhom japplikaw għall-awtorizzazzjoni fi żmien 6 xhur wara d-data tal-applikazzjoni ta’ dan ir-Regolament.
2.B’deroga mill-ewwel paragrafu, il-fornituri ta’ klassifikazzjonijiet ESG ikkategorizzati bħala impriża żgħira u ta’ daqs medju skont l-Artikolu 3 għandhom japplikaw għal awtorizzazzjoni fi żmien 24 xahar wara d-data tal-applikazzjoni ta’ dan ir-Regolament.
3.Il-fornituri ta’ klassifikazzjonijiet ESG ikkategorizzati bħala impriża żgħira u ta’ daqs medju skont l-Artikolu 3 li jidħlu fis-suq wara [jekk jogħġbok daħħal id-data tad-dħul fis-seħħ] għandhom jinnotifikaw lill-ESMA qabel ma jibdew joffru s-servizzi tagħhom u għandhom japplikaw għal awtorizzazzjoni fi żmien 12-il xahar minn dik in-notifika.
Artikolu 49
Rieżami
1.Il-Kummissjoni għandha tevalwa l-applikazzjoni ta’ dan ir-Regolament sa [5 snin wara d-dħul fis-seħħ ta’ dan ir-Regolament].
2.Il-Kummissjoni għandha tippreżenta rapport dwar is-sejbiet ewlenin tal-evalwazzjoni lill-Parlament Ewropew u lill-Kunsill. Meta twettaq l-evalwazzjoni, il-Kummissjoni għandha tqis l-iżviluppi tas-suq u l-evidenza rilevanti għad-dispożizzjoni tagħha.
3.Fejn il-Kummissjoni ssib li jkun xieraq, ir-rapport għandu jkun akkumpanjat minn proposta leġiżlattiva għall-emenda tad-dispożizzjonijiet rilevanti ta’ dan ir-Regolament.
Artikolu 50
Dħul fis-seħħ u applikazzjoni
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Huwa għandu japplika minn [6 xhur wara d-dħul fis-seħħ ta’ dan ir-Regolament].
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Strasburgu,
Għall-Parlament Ewropew
Għall-Kunsill
Il-President
Il-President
DIKJARAZZJONI FINANZJARJA LEĠIŻLATTIVA
1.QAFAS TAL-PROPOSTA/TAL-INIZJATTIVA
1.1.Titolu tal-proposta/tal-inizjattiva
1.2.Qasam/Oqsma ta’ politika kkonċernat(i)
1.3.Il-proposta/l-inizjattiva hija relatata ma’:
1.4.Objettiv(i)
1.4.1.Objettiv(i) ġenerali
1.4.2.Objettiv(i) speċifiku/speċifiċi
1.4.3.Riżultat(i) u impatt mistennija
1.4.4.Indikaturi tal-prestazzjoni
1.5.Raġunijiet għall-proposta/għall-inizjattiva
1.5.1.Rekwiżit(i) li jrid(u) jiġi/u ssodisfat(i) fuq terminu qasir jew twil inkluża kronoloġija dettaljata għat-tnedija tal-implimentazzjoni tal-inizjattiva
1.5.2.Valur miżjud tal-involviment tal-Unjoni (dan jista’ jirriżulta minn fatturi differenti, eż. il-gwadanji mill-koordinazzjoni, iċ-ċertezza legali, effettività akbar jew il-komplementarjetajiet). Għall-finijiet ta’ dan il-punt, il-“valur miżjud tal-involviment tal-Unjoni” huwa l-valur li jirriżulta mill-intervent tal-Unjoni li jkun addizzjonali għall-valur illi kieku kien jinħoloq mill-Istati Membri waħedhom.
1.5.3.Tagħlimiet meħuda minn esperjenzi simili fl-imgħoddi
1.5.4.Kompatibbiltà mal-Qafas Finanzjarju Pluriennali u sinerġiji possibbli ma’ strumenti xierqa oħra
1.5.5.Valutazzjoni tal-għażliet differenti ta’ finanzjament disponibbli, inkluż l-ambitu għar-riallokazzjoni
1.6.Durata u impatt finanzjarju tal-proposta/tal-inizjattiva
1.7.Metodu/i ta’ implimentazzjoni tal-baġit ippjanat(i)
2.MIŻURI TA’ ĠESTJONI
2.1.Regoli ta’ monitoraġġ u ta’ rapportar
2.2.Sistema/i ta’ ġestjoni u ta’ kontroll
2.2.1.Ġustifikazzjoni tal-mod(i) ta’ ġestjoni, tal-mekkaniżmu/i għall-implimentazzjoni tal-finanzjament, tal-modalitajiet ta’ pagament u tal-istrateġija ta’ kontroll proposta
2.2.2.Informazzjoni dwar ir-riskji identifikati u s-sistema/i ta’ kontroll intern stabbilita/i għall-mitigazzjoni tagħhom
2.2.3.Stima u ġustifikazzjoni tal-kosteffettività tal-kontrolli (proporzjon tal-“kostijiet tal-kontroll ÷ il-valur tal-fondi relatati ġestiti”), u valutazzjoni tal-livelli mistennija ta’ riskju ta’ żball (mal-ħlas u mal-għeluq)
2.3.Miżuri għall-prevenzjoni ta’ frodi u ta’ irregolaritajiet
3.IMPATT FINANZJARJU STMAT TAL-PROPOSTA/TAL-INIZJATTIVA
3.1.Intestatura/i tal-qafas finanzjarju pluriennali u l-linja/i baġitarja/i tan-nefqa affettwata/i
3.2.Impatt finanzjarju stmat tal-proposta fuq l-approprjazzjonijiet
3.2.1.Sommarju tal-impatt stmat fuq l-approprjazzjonijiet operazzjonali
3.2.2.Output stmat iffinanzjat bl-approprjazzjonijiet operazzjonali
3.2.3.Sommarju tal-impatt stmat fuq l-approprjazzjonijiet amministrattivi
3.2.3.1.Rekwiżiti stmati ta’ riżorsi umani
3.2.4.Kompatibbiltà mal-qafas finanzjarju pluriennali attwali
3.2.5.Kontribuzzjonijiet ta’ partijiet terzi
3.3.Impatt stmat fuq id-dħul
1.QAFAS TAL-PROPOSTA/TAL-INIZJATTIVA
1.1.Titolu tal-proposta/tal-inizjattiva
Proposta għal Regolament [tal-Parlament Ewropew u tal-Kunsill] dwar it-trasparenza u l-operazzjonijiet ta’ fornituri ta’ Klassifikazzjonijiet Ambjentali, Soċjali u ta’ Governanza (ESG).
1.2.Qasam/Oqsma ta’ politika kkonċernat(i)
Qasam ta’ politika: Stabbiltà finanzjarja, servizzi finanzjarji u l-unjoni tas-swieq kapitali
1.3.Il-proposta tirrigwarda
☑ azzjoni ġdida
◻ azzjoni ġdida b’segwitu għal proġett pilota/azzjoni preparatorja
◻ l-estensjoni ta’ azzjoni eżistenti
◻ fużjoni ta’ azzjoni waħda jew aktar lejn azzjoni oħra/ġdida
1.4.Objettiv(i)
1.4.1.Objettiv(i) ġenerali
L-objettiv ġenerali ta’ din l-inizjattiva huwa li jiġi sfruttat aħjar il-potenzjal tas-Suq Uniku Ewropew u li hija tikkontribwixxi għat-tranżizzjoni lejn sistema ekonomika u finanzjarja kompletament sostenibbli u inklużiva f’konformità mal-Patt Ekoloġiku Ewropew u mal-Għanijiet ta’ Żvilupp Sostenibbli tan-NU. Dan jista’ jinkiseb billi tittejjeb il-kapaċità tal-investituri li jieħdu deċiżjonijiet infurmati rigward is-sostenibbiltà tal-investimenti, kif ukoll billi l-kumpaniji jiġu megħjuna jifhmu l-prestazzjoni mil-lat ta’ sostenibbiltà tagħhom.
Billi l-klassifikazzjonijiet ESG u d-data sottostanti jintużaw għad-deċiżjonijiet ta’ investiment u għall-allokazzjoni tal-kapital, l-objettiv tal-inizjattiva huwa – billi tirregola l-fornituri ta’ klassifikazzjonijiet ESG – li ttejjeb il-kwalità u t-trasparenza tal-klassifikazzjonijiet ESG sabiex l-investituri u l-kumpaniji kklassifikati jkunu jistgħu jieħdu deċiżjonijiet infurmati aħjar fir-rigward tal-ġestjoni tar-riskji ESG u l-impatti tal-investimenti jew l-operazzjonijiet tagħhom. Fl-istess ħin, huwa kruċjali li jitrawmu l-fiduċja u l-kunfidenza fl-operazzjonijiet tal-fornituri tal-klassifikazzjonijiet ESG billi jiġi żgurat li s-suq jopera kif suppost u l-fornituri tal-klassifikazzjonijiet ESG jipprevjenu u jimmaniġġaw il-kunflitti ta’ interess.
1.4.2.Objettiv(i) speċifiku/speċifiċi
Hemm żewġ objettivi speċifiċi, li jirrigwardjaw iż-żewġ kawżi tal-problema:
- Tiġi pprovduta aktar ċarezza dwar il-karatteristiċi tal-klassifikazzjonijiet ESG (xi jfissru u liema objettivi jfittxu li jilħqu), il-metodoloġiji u s-sorsi tad-data jew l-istimi użati biex jinkisbu l-klassifikazzjonijiet ESG.
- Tiġi pprovduta aktar ċarezza dwar l-operazzjonijiet tal-fornituri ta’ klassifikazzjonijiet ESG, kif ukoll jiġu żgurati l-prevenzjoni u l-mitigazzjoni tar-riskji ta’ kunflitti ta’ interess fil-livell tal-fornituri ta’ klassifikazzjonijiet ESG.
1.4.3.Riżultat(i) u impatt mistennija
Speċifika l-effetti li l-proposta/l-inizjattiva jenħtieġ li jkollha fuq il-benefiċjarji/il-gruppi fil-mira.
Jenħtieġ li din il-Proposta ġġib trasparenza u ċarezza fl-operazzjonijiet tal-fornituri ta’ klassifikazzjonijiet ESG. Jenħtieġ li dan ikun ta’ benefiċċju għall-utenti ta’ dawk il-klassifikazzjonijiet, iżda wkoll għall-kumpaniji kklassifikati u għal partijiet interessati oħrajn. Dan se jikkontribwixxi għall-objettivi tal-Patt Ekoloġiku tal-UE u tal-istrateġija għall-finanzi sostenibbli.
Il-Proposta se jkollha impatti ekonomiċi diretti u indiretti sinifikanti fuq il-partijiet rilevanti. L-ewwel nett, il-fornituri ta’ klassifikazzjonijiet ESG se jkunu soġġetti għal divulgazzjoni u għal rekwiżiti operazzjonali oħrajn, li jimplikaw kostijiet. Imbagħad, l-utenti tal-klassifikazzjonijiet ESG u l-entitajiet ikklassifikati se jibbenefikaw minn aktar trasparenza dwar il-karatteristiċi tal-klassifikazzjonijiet ESG u l-operazzjonijiet tal-fornituri ta’ klassifikazzjonijiet ESG. L-awtoritajiet pubbliċi (ESMA) se jiġu affettwati wkoll, b’mod partikolari bl-introduzzjoni tas-superviżjoni tal-fornituri ta’ klassifikazzjonijiet ESG, anki jekk fi ħdan l-istruttura eżistenti tagħhom.
1.4.4.Indikaturi tal-prestazzjoni
Speċifika l-indikaturi għall-monitoraġġ tal-progress u tal-kisbiet.
Ġew identifikati l-indikaturi tal-prestazzjoni li ġejjin:
Objettiv Nru 1
-
l-għadd ta’ klassifikazzjonijiet ESG magħmula disponibbli;
-
l-għadd ta’ klassifikazzjonijiet ESG li għandhom riskji finanzjarji u/jew objettivi tal-impatt;
-
l-informazzjoni magħmula disponibbli għall-pubbliku, online, mill-fornituri ta’ klassifikazzjonijiet ESG, b’mod partikolari l-iżvilupp ta’ fuljetti/dokumenti ta’ informazzjoni eventwali;
-
il-punt sa fejn il-klassifikazzjonijiet/punteġġi ESG li jkejlu l-istess kostruzzjonijiet ivarjaw bejn aġenziji ta’ klassifikazzjoni differenti u, b’mod partikolari, jekk id-diverġenza tonqosx maż-żmien;
-
jekk il-korrelazzjoni tal-klassifikazzjonijiet ESG ma’ objettivi simili żdiditx.
Objettiv Nru 2
-
iż-żieda fl-użu tal-klassifikazzjonijiet ESG mill-utenti u mill-emittenti;
-
l-ammont u s-sehem mis-suq tal-investiment ESG abbażi ta’ klassifikazzjonijiet ESG;
-
l-għadd ta’ skandli marbuta mal-klassifikazzjonijiet ESG.
1.5.Raġunijiet għall-proposta/għall-inizjattiva
1.5.1.Rekwiżit(i) li jrid(u) jiġi/u ssodisfat(i) fuq terminu qasir jew twil inkluża kronoloġija dettaljata għat-tnedija tal-implimentazzjoni tal-inizjattiva
Din il-proposta hija parti integrali mill-istrateġija mġedda tal-Kummissjoni Ewropea għall-finanzi sostenibbli adottata f’Lulju 2021. Il-klassifikazzjonijiet ambjentali, soċjali u ta’ governanza (ESG) għandhom rwol abilitanti għall-funzjonament xieraq tas-suq tal-finanzi sostenibbli tal-UE billi jipprovdu sorsi kritiċi ta’ informazzjoni għall-istrateġiji ta’ investiment, għall-ġestjoni tar-riskju u għall-obbligi ta’ divulgazzjoni mill-investituri u mill-istituzzjonijiet finanzjarji. Dawn jintużaw ukoll minn kumpaniji li jfittxu li jifhmu aħjar ir-riskji u l-opportunitajiet ta’ sostenibbiltà marbuta mal-attivitajiet tagħhom jew ma’ dawk tas-sħab tagħhom, u kif jitqabblu mal-pari tagħhom fuq dawn il-kwistjonijiet.
Din il-proposta għandha l-għan li tisfrutta aħjar il-potenzjal tas-Suq Uniku Ewropew u tal-Unjoni tas-Swieq Kapitali u li tikkontribwixxi għat-tranżizzjoni lejn sistema ekonomika u finanzjarja kompletament sostenibbli u inklużiva f’konformità mal-Patt Ekoloġiku Ewropew u mal-Għanijiet ta’ Żvilupp Sostenibbli tan-NU.
Is-suq attwali tal-klassifikazzjonijiet ESG ibati minn nuqqasijiet u mhux qed jiffunzjona kif suppost, bil-ħtiġijiet tal-utenti u tal-entitajiet ikklassifikati fir-rigward tal-klassifikazzjonijiet ESG mhux qed jiġu ssodisfati u bil-fiduċja fil-klassifikazzjonijiet imminata. Din il-problema għandha għadd ta’ dimensjonijiet differenti, prinċipalment (i) in-nuqqas ta’ trasparenza dwar il-karatteristiċi tal-klassifikazzjonijiet ESG, il-metodoloġiji tagħhom u s-sorsi tad-data tagħhom u (ii) in-nuqqas ta’ ċarezza dwar kif joperaw il-fornituri ta’ klassifikazzjonijiet ESG. Għalhekk, il-klassifikazzjonijiet ESG ma jaqdux l-iskop tagħhom u ma jippermettux biżżejjed lill-utenti, lill-investituri u lill-entitajiet ikklassifikati jieħdu deċiżjonijiet infurmati fir-rigward tar-riskji, l-impatti u l-opportunitajiet relatati mal-ESG.
1.5.2.Valur miżjud tal-involviment tal-Unjoni (dan jista’ jirriżulta minn fatturi differenti, eż. il-gwadanji mill-koordinazzjoni, iċ-ċertezza legali, effettività akbar jew il-komplementarjetajiet). Għall-finijiet ta’ dan il-punt, il-“valur miżjud tal-involviment tal-Unjoni” huwa l-valur li jirriżulta mill-intervent tal-Unjoni li jkun addizzjonali għall-valur illi kieku kien jinħoloq mill-Istati Membri waħedhom.
Bħalissa ma hemm l-ebda qafas regolatorju tal-UE għall-fornituri tal-klassifikazzjonijiet ESG. L-Istati Membri ma jirregolawx l-attivitajiet tal-fornituri ta’ klassifikazzjonijiet ESG jew il-kundizzjonijiet li taħthom jikkonsenjaw il-prodotti jew is-servizzi tagħhom.
L-objettiv ta’ din l-inizjattiva, jiġifieri li ttejjeb iċ-ċarezza fuq il-karatteristiċi tal-klassifikazzjonijiet ESG, iżda wkoll l-operazzjonijiet tal-fornituri ta’ klassifikazzjonijiet ESG, ma jistax jintlaħaq b’mod suffiċjenti mill-Istati Membri li jaġixxu b’mod indipendenti. L-azzjoni fil-livell tal-UE hija meħtieġa għall-funzjonament xieraq tas-swieq kapitali tal-UE u biex tikkontribwixxi għat-tranżizzjoni lejn sistema ekonomika u finanzjarja kompletament sostenibbli u inklużiva f’konformità mal-Patt Ekoloġiku Ewropew u mal-Għanijiet ta’ Żvilupp Sostenibbli tan-NU.
Hekk kif l-attenzjoni għall-investiment sostenibbli u l-klassifikazzjonijiet ESG qed tikber f’ġuriżdizzjonijiet madwar id-dinja, huwa importanti li l-UE timpenja ruħha mas-sħab tagħha abbażi ta’ approċċ Ewropew koerenti u komprensiv.
Għalkemm l-Istati Membri jistgħu jieħdu azzjoni individwalment biex isaħħu l-affidabbiltà u l-komparabbiltà tal-klassifikazzjonijiet ESG, tali miżuri x’aktarx li jkunu differenti b’mod sinifikanti bejn l-Istati Membri, li jista’ joħloq livelli diverġenti ta’ trasparenza, ostakli għall-parteċipanti fis-suq u sfidi għal dawk li joperaw b’mod transfruntier (kif dan huwa partikolarment il-każ għal dan is-suq, b’utenti f’għadd ta’ Stati Membri), minbarra li jillimitaw il-komparabbiltà bejn il-klassifikazzjonijiet. Dan jikkawża kwistjonijiet u konfużjoni għall-kumpaniji kklassifikati u għall-utenti tal-klassifikazzjoni bl-istess mod u fl-aħħar mill-aħħar jista’ jwassal għal protezzjoni żbilanċjata tal-investituri fi Stati Membri differenti.
1.5.3.Tagħlimiet meħuda minn esperjenzi simili fl-imgħoddi
Abbażi tal-esperjenza bis-superviżjoni tas-CRAs u tal-fatt li bħalissa l-klassifikazzjonijiet ESG ma humiex sistemikament importanti daqs il-klassifikazzjonijiet tal-kreditu, huma għalhekk se jkunu jeħtieġu livell aktar baxx ta’ intensità superviżorja minn dak li qed tuża bħalissa l-ESMA għas-CRAs. Għalhekk, meta mqabbel mal-kostijiet superviżorji għas-CRA, l-għadd ta’ FTEs tnaqqas b’aktar minn 50 %, fuq is-suppożizzjoni li l-fornituri ta’ klassifikazzjonijiet ESG jeħtieġu livell aktar baxx ta’ intensità superviżorja minn dak li qed tuża bħalissa l-ESMA għas-CRAs.
Madankollu, ir-rwol tal-klassifikazzjonijiet ESG fl-ekosistema finanzjarja u l-użu tagħhom għall-finijiet regolatorji x’aktarx li jikbru fil-futur qrib, biex b’hekk l-intensità tal-kompiti superviżorji x’aktarx li tikber ukoll.
Skont it-tqabbil mas-CRAs – bħalissa hemm 29 CRA rreġistrati jew iċċertifikati mill-ESMA, filwaqt li hemm 59 fornitur ta’ klassifikazzjonijiet ESG li qegħdin joperaw fl-UE.
Mill-esperjenza eżistenti tar-reġistrazzjoni tas-CRAs, bħalissa huwa stmat li 0,5 FTE jkollu bżonn 6 xhur biex jirreġistra entità waħda, irrispettivament mid-daqs tagħha. L-esperjenza turi wkoll li ma huwiex probabbli li r-reġistrazzjoni ta’ entità tkun tista’ titlesta aktar malajr milli fi żmien 6 xhur.
It-tagħlimiet meħuda mir-regolamentazzjoni ta’ swieq ġodda/fornituri ġodda (bħas-CRAs jew l-Amministraturi tal-Parametri Referenzjarji), jindikaw li l-isforz ewlieni fl-ewwel sena/snin huwa li jiġu awtorizzati/irreġistrati l-entitajiet eżistenti, madankollu, mit-tieni sena ’l quddiem, minbarra r-reġistrazzjoni/l-awtorizzazzjoni, il-persunal ikun meħtieġ jissorvelja l-entitajiet awtorizzati/irreġistrati fis-snin preċedenti.
Bħala paragun, l-ESMA għandha 37 TA u 14-il CA (51 b’kollox) ibbaġitjati taħt is-subattività tal-aġenziji ta’ klassifikazzjoni tal-kreditu għall-2023. Dan jinkludi persunal ewlieni u servizzi ċentralizzati. L-ESMA ngħatat il-kompitu tas-superviżjoni diretta tas-CRAs fl-2011. It-tagħlimiet meħuda matul l-aħħar 12-il sena wrew li s-superviżjoni diretta tal-entitajiet teħtieġ persunal b’esperjenza li jiġi impjegat fuq bażi permanenti, għalhekk, fil-każ tas-superviżjoni tas-CRAs, l-għadd ta’ TAs jkun ħafna ogħla mill-għadd ta’ CAs.
1.5.4.Kompatibbiltà mal-Qafas Finanzjarju Pluriennali u sinerġiji possibbli ma’ strumenti xierqa oħra
Il-Kummissjoni hija impenjata li tikseb tranżizzjoni ekoloġika tal-ekonomija tal-UE, kif stabbilit fil-komunikazzjoni dwar il-Patt Ekoloġiku Ewropew ta’ Diċembru 2019u fl-Istrateġija għall-Finanzjament tat-Tranżizzjoni lejn Ekonomija Sostenibbli.
Il-proposta dwar il-klassifikazzjonijiet ESG se tikkontribwixxi għal din l-aġenda billi ttejjeb it-trasparenza tal-operazzjonijiet ta’ tip importanti ta’ parteċipant fis-suq finanzjarju li se jgħin ukoll biex isiru investimenti privati fi proġetti u attivitajiet sostenibbli.
Din il-proposta leġiżlattiva hija kompatibbli mal-Qafas Finanzjarju Pluriennali.
1.5.5.Valutazzjoni tal-għażliet differenti ta’ finanzjament disponibbli, inkluż l-ambitu għar-riallokazzjoni
L-ESMA tingħata l-kompiti li tagħti awtorizzazzjonijiet u li tissorvelja s-settur fuq bażi kontinwa, li jkun jeħtieġ aktar riżorsi. Iż-żieda totali fil-kost annwali hija stmata għal madwar EUR 3,7-3,8 miljun. Dan il-kost mhux se jitħallas mill-baġit tal-UE, minħabba li l-proposta se tinkludi dispożizzjoni li l-ESMA tkun tista’ timponi tariffi ta’ awtorizzazzjoni u superviżjoni fuq il-fornituri ta’ klassifikazzjonijiet ESG, sabiex tkopri l-kostijiet superviżorji kollha. Dan huwa simili għal oqsma oħrajn, fejn l-ESMA hija responsabbli għas-sorveljanza ta’ ċerti entitajiet (eż. aġenziji ta’ klassifikazzjoni tal-kreditu).
1.6.Durata u impatt finanzjarju tal-proposta/tal-inizjattiva
◻ durata limitata
–◻
Proposta/inizjattiva fis-seħħ minn [JJ/XX]SSSS sa [JJ/XX]SSSS
–◻
Impatt finanzjarju minn SSSS sa SSSS
☑ durata mhux limitata
–Implimentazzjoni b’perjodu tal-bidu mill-2022 sal-2024,
–segwita b’operazzjoni fuq skala sħiħa.
1.7.Mod(i) ta’ ġestjoni ppjanat(i)
◻ Ġestjoni diretta mill-Kummissjoni permezz ta’
–◻
aġenziji eżekuttivi
◻ Ġestjoni kondiviża mal-Istati Membri
☑ Ġestjoni indiretta billi jiġu fdati kompiti ta’ implimentazzjoni baġitarja:
◻ lill-organizzazzjonijiet internazzjonali u lill-aġenziji tagħhom (iridu jiġu speċifikati);
◻lill-BEI u lill-Fond Ewropew tal-Investiment;
☑ lill-korpi msemmija fl-Artikoli 70 u 71;
◻ lill-korpi tal-liġi pubblika;
◻ lill-korpi rregolati bil-liġi privata b’missjoni ta’ servizz pubbliku sal-punt li jipprovdu garanziji finanzjarji adegwati;
◻ lill-korpi rregolati bil-liġi privata ta’ Stat Membru li jkunu fdati bl-implimentazzjoni ta’ sħubija pubblika-privata u li jipprovdu garanziji finanzjarji adegwati;
◻ lill-persuni fdati bl-implimentazzjoni ta’ azzjonijiet speċifiċi fil-PESK skont it-Titolu V tat-TUE, u identifikati fl-att bażiku rilevanti.
Kummenti
2.MIŻURI TA’ ĠESTJONI
2.1.Regoli ta’ monitoraġġ u ta’ rapportar
Speċifika l-frekwenza u l-kundizzjonijiet.
F’konformità mal-arranġamenti li diġà jeżistu, l-ASE jħejju rapporti regolari dwar l-attività tagħhom (inklużi r-rapportar intern lill-Maniġment Superjuri, ir-rapportar lill-Bordijiet u l-produzzjoni tar-rapport annwali) u jkunu suġġetti għal awditi mill-Qorti tal-Awdituri u mis-Servizz tal-Awditjar Intern tal-Kummissjoni dwar l-użu tar-riżorsi u l-prestazzjoni tagħhom. Il-monitoraġġ u r-rapportar tal-azzjonijiet inklużi fil-proposta jkunu jikkonformaw mar-rekwiżiti li diġà jeżistu, kif ukoll ma’ kwalunkwe rekwiżit ġdid li jirriżulta minn din il-proposta.
2.2.Sistema/i ta’ ġestjoni u ta’ kontroll
2.2.1.Ġustifikazzjoni tal-mod(i) ta’ ġestjoni, tal-mekkaniżmu/i għall-implimentazzjoni tal-finanzjament, tal-modalitajiet ta’ pagament u tal-istrateġija ta’ kontroll proposta
Il-ġestjoni se tkun indirettament permezz tal-ASE. Il-mekkaniżmu ta’ finanzjament jiġi implimentat permezz ta’ tariffi ta’ awtorizzazzjoni u superviżjoni imposti mill-ESMA fuq il-fornituri ta’ klassifikazzjonijiet ESG.
2.2.2.Informazzjoni dwar ir-riskji identifikati u s-sistema/i ta’ kontroll intern stabbilita/i għall-mitigazzjoni tagħhom
B’rabta mal-użu ġuridiku, ekonomiku, effiċjenti u effettiv tal-approprjazzjonijiet li jirriżultaw mill-proposta, huwa mistenni li l-proposta ma toħloqx riskji sinifikanti ġodda li ma jkunux koperti minn qafas ta’ kontroll intern eżistenti. Madankollu, sfida ġdida tista’ tkun relatata mal-iżgurar tal-ġbir f’waqtu tat-tariffi mingħand il-fornituri ta’ klassifikazzjonijiet ESG.
2.2.3.Stima u ġustifikazzjoni tal-kosteffettività tal-kontrolli (proporzjon tal-“kostijiet tal-kontroll ÷ il-valur tal-fondi relatati ġestiti”), u valutazzjoni tal-livelli mistennija ta’ riskju ta’ żball (mal-ħlas u mal-għeluq)
Is-sistemi ta’ ġestjoni u kontroll, kif previsti fir-Regolamenti dwar l-ASE, huma diġà implimentati. L-ASE jaħdmu flimkien mill-qrib mas-Servizz tal-Awditjar Intern tal-Kummissjoni biex jiżguraw li jintlaħqu l-istandards xierqa fl-oqsma kollha tal-qafas ta’ kontroll intern. Dawn l-arranġamenti se japplikaw ukoll fir-rigward tar-rwol tal-ASE skont il-proposta preżenti. Barra minn hekk, kull sena finanzjarja, il-Parlament Ewropew, wara rakkomandazzjoni mill-Kunsill, jagħti kwittanza lil kull ASE għall-implimentazzjoni tal-baġit tagħhom.
2.3.Miżuri għall-prevenzjoni ta’ frodi u ta’ irregolaritajiet
Speċifika l-miżuri ta’ prevenzjoni u ta’ protezzjoni eżistenti jew previsti, eż. mill-Istrateġija Kontra l-Frodi.
Għall-fini tal-ġlieda kontra l-frodi, il-korruzzjoni u kwalunkwe attività illegali oħra, id-dispożizzjonijiet tar-Regolament (UE, Euratom) Nru 883/2013 tal-Parlament Ewropew u tal-Kunsill tal-11 ta’ Settembru 2013 dwar investigazzjonijiet immexxija mill-Uffiċċju Ewropew Kontra l-Frodi (OLAF) japplikaw għall-ASE mingħajr ebda restrizzjoni. L-ASE għandhom strateġija ddedikata kontra l-frodi u pjan ta’ azzjoni li jirriżulta minnha. L-azzjonijiet imsaħħa tal-ASE fil-qasam tal-ġlieda kontra l-frodi se jkunu konformi mar-regoli u l-gwida pprovduti mir-Regolament Finanzjarju (miżuri kontra l-frodi bħala parti minn ġestjoni finanzjarja tajba), mal-politiki ta’ prevenzjoni tal-frodi tal-OLAF, mad-dispożizzjonijiet ipprovduti mill-Istrateġija tal-Kummissjoni Kontra l-Frodi (COM(2011) 376), kif ukoll kif stabbilit fl-Approċċ Komuni dwar l-aġenziji deċentralizzati tal-UE (Lulju 2012) u l-pjan direzzjonali relatat. Barra minn hekk, ir-Regolamenti li jistabbilixxu l-ASE, kif ukoll ir-Regolamenti Finanzjarji tal-ASE jistabbilixxu d-dispożizzjonijiet dwar l-implimentazzjoni u l-kontroll tal-baġits tal-ASE u r-regoli finanzjarji applikabbli, inklużi dawk immirati biex jipprevjenu l-frodi u l-irregolaritajiet.
3.IMPATT FINANZJARJU STMAT TAL-PROPOSTA/TAL-INIZJATTIVA
3.1.Intestatura/i tal-qafas finanzjarju pluriennali u l-linja/i baġitarja/i tan-nefqa affettwata/i
·Linji baġitarji eżistenti
Skont l-ordni tal-intestaturi tal-qafas finanzjarju pluriennali u tal-linji baġitarji.
Intestatura tal-qafas finanzjarju pluriennali
|
Linja baġitarja
|
Tip ta’
nefqa
|
Kontribuzzjoni
|
|
Numru
|
Diff./mhux diff.
|
mill-pajjiżi tal-EFTA
|
mill-pajjiżi kandidati
|
minn pajjiżi terzi
|
skont it-tifsira tal-Artikolu 21(2)(b) tar-Regolament Finanzjarju
|
|
Mhux applikabbli
|
Diff.
|
LE
|
LE
|
LE
|
LE
|
·Linji baġitarji ġodda mitluba
Skont l-ordni tal-intestaturi tal-qafas finanzjarju pluriennali u tal-linji baġitarji.
Intestatura tal-qafas finanzjarju pluriennali
|
Linja baġitarja
|
Tip ta’
nefqa
|
Kontribuzzjoni
|
|
Numru
|
Diff./Mhux diff.
|
mill-pajjiżi tal-EFTA
|
mill-pajjiżi kandidati
|
minn pajjiżi terzi
|
skont it-tifsira tal-Artikolu 21(2)(b) tar-Regolament Finanzjarju
|
|
Mhux applikabbli
|
|
|
|
|
|
3.2.Impatt stmat fuq in-nefqa
3.2.1.Sommarju tal-impatt stmat fuq in-nefqa
miljuni ta’ EUR (għal tliet pożizzjonijiet deċimali)
Intestatura tal-qafas finanzjarju
pluriennali
|
Numru
|
[Intestatura……………...………………………………………………………]
|
[Korp]: <…….>
|
|
|
2023
|
2024
|
2025
|
2026
|
2027
|
TOTAL
|
Titolu 1:
|
Impenji
|
(1)
|
|
|
|
|
|
|
|
Pagamenti
|
(2)
|
|
|
|
|
|
|
Titolu 2:
|
Impenji
|
(1a)
|
|
|
|
|
|
|
|
Pagamenti
|
(2a)
|
|
|
|
|
|
|
Titolu 3:
|
Impenji
|
(3a)
|
|
|
|
|
|
|
|
Pagamenti
|
(3b)
|
|
|
|
|
|
|
TOTAL tal-approprjazzjonijiet
għal [korp] <…….>
|
Impenji
|
=1+1a +3a
|
|
|
|
|
|
|
|
Pagamenti
|
=2+2a
+3b
|
|
|
|
|
|
|
Intestatura tal-qafas finanzjarju
pluriennali
|
7
|
“Nefqa amministrattiva”
|
miljuni ta’ EUR (aġġustati ’l fuq għal tliet pożizzjonijiet deċimali)
|
|
|
2023
|
2024
|
2025
|
2026
|
2027
|
TOTAL
|
DĠ: <…….>
|
• Riżorsi Umani
|
|
|
|
|
|
|
• Nefqa amministrattiva oħra
|
|
|
|
|
|
|
TOTAL TAD-DĠ <…….>
|
Approprjazzjonijiet
|
|
|
|
|
|
|
TOTAL tal-approprjazzjonijiet
skont l-INTESTATURA 7
tal-qafas finanzjarju pluriennali
|
(Total ta’ impenji = Total ta’ pagamenti)
|
|
|
|
|
|
|
miljuni ta’ EUR (għal tliet pożizzjonijiet deċimali)
|
|
|
2023
|
2024
|
2025
|
2026
|
2027
|
TOTAL
|
TOTAL tal-approprjazzjonijiet
skont l-INTESTATURI 1 sa 7
tal-qafas finanzjarju pluriennali
|
Impenji
|
|
|
|
|
|
|
|
Pagamenti
|
|
|
|
|
|
|
3.2.2.Impatt stmat fuq l-approprjazzjonijiet tal-ESMA
–◻
Il-proposta/l-inizjattiva ma teħtieġx l-użu ta’ approprjazzjonijiet operazzjonali
–☑
Il-proposta/l-inizjattiva teħtieġ l-użu ta’ approprjazzjonijiet operazzjonali, kif spjegat hawn taħt:
Approprjazzjonijiet ta’ impenn f’miljuni ta’ EUR (aġġustati ’l fuq għal tliet pożizzjonijiet deċimali)
Indika l-objettivi u l-outputs
⇩
|
|
|
2023
|
2024
|
2025
|
2026
|
2027
|
TOTAL
|
|
OUTPUTS
|
|
Tip
|
Kost medju
|
Nru
|
Kost
|
Nru
|
Kost
|
Nru
|
Kost
|
Nru
|
Kost
|
Nru
|
Kost
|
Nru totali
|
Kost totali
|
OBJETTIV SPEĊIFIKU Nru 1: Inkorporazzjoni tal-entitajiet fis-sistema ta’ rapportar superviżorju
|
|
|
|
|
|
|
|
|
|
|
|
|
- Output
|
Entitajiet inkorporati
|
|
|
|
|
|
40
|
0,035
|
10
|
0,005
|
9
|
0,005
|
59
|
0,045
|
Subtotal tal-objettiv speċifiku Nru 1
|
|
|
|
|
40
|
0,035
|
10
|
0,005
|
9
|
0,005
|
59
|
0,045
|
OBJETTIV SPEĊIFIKU Nru 2
|
|
|
|
|
|
|
|
|
|
|
|
|
- Output
|
|
|
|
|
|
|
|
|
|
|
|
|
|
|
- Output
|
|
|
|
|
|
|
|
|
|
|
|
|
|
|
Subtotal tal-objettiv speċifiku Nru 2
|
|
|
|
|
|
|
|
|
|
|
|
|
KOST TOTALI
|
|
|
|
|
40
|
0,035
|
10
|
0,005
|
9
|
0,005
|
59
|
0,045
|
3.2.3.Impatt stmat fuq ir-riżorsi umani tal-ESMA
3.2.3.1.Sommarju
–◻
Il-proposta/l-inizjattiva ma teħtieġx l-użu ta’ approprjazzjonijiet ta’ natura amministrattiva
–☑
Il-proposta/l-inizjattiva teħtieġ l-użu ta’ approprjazzjonijiet ta’ natura amministrattiva, kif spjegat hawn taħt:
miljuni ta’ EUR (għal tliet pożizzjonijiet deċimali)
|
2023
|
2024
|
2025
|
2026
|
2027
|
TOTAL
|
Persunal temporanju (Gradi ta’ AD)
|
|
|
0,587
|
1,198
|
1,222
|
3,006
|
Persunal temporanju (Gradi ta’ AST)
|
|
|
0,098
|
0,200
|
0,203
|
0,501
|
Persunal bil-kuntratt
|
|
|
0,918
|
1,873
|
1,720
|
4,512
|
Esperti Nazzjonali Sekondati
|
|
|
|
|
|
|
TOTAL
|
|
|
1,603
|
3,271
|
3,145
|
8,020
|
Rekwiżiti tal-persunal (FTE):
|
2023
|
2024
|
2025
|
2026
|
2027
|
TOTAL
|
Persunal temporanju (Gradi ta’ AD)
|
|
|
6
|
6
|
6
|
18
|
Persunal temporanju (Gradi ta’ AST)
|
|
|
1
|
1
|
1
|
3
|
Persunal bil-kuntratt
|
|
|
12
|
12
|
10
|
34
|
Esperti Nazzjonali Sekondati
|
|
|
|
|
|
|
3.2.3.2.Rekwiżiti stmati ta’ riżorsi umani għad-DĠ prinċipali
–☑
Il-proposta/l-inizjattiva ma teħtieġx l-użu ta’ riżorsi umani.
–◻
Il-proposta/l-inizjattiva teħtieġ l-użu ta’ riżorsi umani, kif spjegat hawn taħt:
Stima li trid tingħata f’ammonti sħaħ (jew l-iktar l-iktar għal pożizzjoni deċimali waħda)
|
Sena
N
|
Sena
N+1
|
Sena N+2
|
Sena N+3
|
Daħħal is-snin kollha li hemm bżonn biex turi d-durata tal-impatt (ara l-punt 1.6)
|
·Pożizzjonijiet fit-tabella tal-persunal (uffiċjali u aġenti temporanji)
|
|
|
|
|
|
|
|
20 01 02 01 u 20 01 02 02 (Kwartieri Ġenerali u Uffiċċji tar-Rappreżentanza tal-Kummissjoni)
|
|
|
|
|
|
|
|
20 01 02 03 (Delegazzjonijiet)
|
|
|
|
|
|
|
|
01 01 01 01 (Riċerka indiretta)
|
|
|
|
|
|
|
|
10 01 05 01 (Riċerka diretta)
|
|
|
|
|
|
|
|
|
|
|
|
|
|
|
|
• Persunal estern (f’unità ta’ Ekwivalenti Full-Time: FTE)
|
|
|
|
|
|
|
|
20 02 01 (AC, END, INT mill-“pakkett globali”)
|
|
|
|
|
|
|
|
20 02 03 (AC, AL, END, INT u JPD fid-Delegazzjonijiet)
|
|
|
|
|
|
|
|
Linja(i) baġitarja(i) (speċifika)
|
- fil-Kwartieri Ġenerali
|
|
|
|
|
|
|
|
|
- fid-Delegazzjonijiet
|
|
|
|
|
|
|
|
01 01 01 02 (AC, END, INT – Riċerka indiretta)
|
|
|
|
|
|
|
|
10 01 05 02 (AC, END, INT – Riċerka diretta)
|
|
|
|
|
|
|
|
Linji baġitarji oħra (speċifika)
|
|
|
|
|
|
|
|
TOTAL
|
|
|
|
|
|
|
|
Ir-riżorsi umani meħtieġa se jiġu koperti mill-persunal tad-DĠ li diġà jkun assenjat għall-ġestjoni tal-azzjoni u/jew li diġà jkun ġie riassenjat fid-DĠ, flimkien, jekk ikun meħtieġ, ma’ kwalunkwe allokazzjoni addizzjonali li tista’ tingħata lid-DĠ tal-ġestjoni skont il-proċedura annwali ta’ allokazzjoni u fid-dawl tal-limitazzjonijiet baġitarji.
Deskrizzjoni tal-kompiti li jridu jitwettqu:
Uffiċjali u aġenti temporanji
|
|
Persunal estern
|
|
Id-deskrizzjoni tal-kalkolu tal-kost għall-unitajiet FTE jenħtieġ li tiġi inkluża fit-Taqsima 3 tal-Anness V.
3.2.4.Kompatibbiltà mal-qafas finanzjarju pluriennali attwali
–☑
Il-proposta/l-inizjattiva hija kompatibbli mal-qafas finanzjarju pluriennali attwali.
–◻
Il-proposta/l-inizjattiva teħtieġ riprogrammazzjoni tal-intestatura rilevanti fil-qafas finanzjarju pluriennali.
Spjega liema riprogrammazzjoni hija meħtieġa, filwaqt li tispeċifika l-linji baġitarji kkonċernati u l-ammonti korrispondenti.
Mhux applikabbli
–◻
Il-proposta/l-inizjattiva teħtieġ l-applikazzjoni tal-istrument ta’ flessibbiltà jew ir-reviżjoni tal-qafas finanzjarju pluriennali..
Spjega x’inhu meħtieġ, filwaqt li tispeċifika l-intestaturi u l-linji baġitarji kkonċernati u l-ammonti korrispondenti.
Mhux applikabbli
3.2.5.Kontribuzzjonijiet ta’ partijiet terzi
–◻
Il-proposta/l-inizjattiva ma tipprevedix kofinanzjament minn partijiet terzi.
–☑
Il-proposta/l-inizjattiva tipprevedi l-kofinanzjament stmat hawn taħt:
miljuni ta’ EUR (għal tliet pożizzjonijiet deċimali)
|
2023
|
2024
|
2025
|
2026
|
2027
|
Total
|
Stima tal-kostijiet koperti mit-tariffi superviżorji
|
|
|
1,911
|
3,833
|
3,685
|
9,430
|
TOTAL tal-approprjazzjonijiet kofinanzjati (inklużi l-kontribuzzjonijiet tal-pensjoni tal-impjegatur)
|
|
|
1,911
|
3,833
|
3,685
|
9,430
|
3.3.Impatt stmat fuq id-dħul
–☑
Il-proposta/l-inizjattiva ma għandha l-ebda impatt finanzjarju fuq id-dħul.
–◻
Il-proposta/l-inizjattiva għandha l-impatt finanzjarju li ġej:
–◻
fuq ir-riżorsi proprji
–◻
fuq dħul ieħor
–◻ indika, jekk id-dħul hux assenjat għal-linji tan-nefqa
miljuni ta’ EUR (għal tliet pożizzjonijiet deċimali)
Linja baġitarja tad-dħul:
|
Approprjazzjonijiet disponibbli għas-sena finanzjarja attwali
|
Impatt tal-proposta/tal-inizjattiva
|
|
|
Sena
N
|
Sena
N+1
|
Sena
N+2
|
Sena
N+3
|
Daħħal is-snin kollha li hemm bżonn biex turi d-durata tal-impatt (ara l-punt 1.6)
|
Artikolu ………….
|
|
|
|
|
|
|
|
|
Għad-dħul “assenjat” mixxellanju, speċifika l-linja/i baġitarja/i tan-nefqa affettwata/i.
Speċifika l-metodu biex jiġi kkalkolat l-impatt fuq id-dħul.
Anness għad-Dikjarazzjoni Finanzjarja Leġiżlattiva
Suppożizzjonijiet Ġenerali:
·Il-leġiżlazzjoni tidħol fis-seħħ fit-tieni nofs tal-2024.
·Is-superviżjoni diretta u t-tariffi se jibdew 6 xhur wara, fl-2025.
·Il-kost tan-nefqa addizzjonali fuq il-persunal (it-Titolu I) ġie kkalkolat bl-użu tal-kostijiet medji tal-persunal applikabbli minn Jannar 2023 ta’ EUR 171 000 għal kull Membru tal-Persunal Temporanju u EUR 91 000 għal kull Membru tal-Persunal bil-Kuntratt (jiġifieri, il-kostijiet standard minbarra l-kost standard ta’ EUR 29 000 ta’ “habillage” għall-kostijiet tal-bini u tal-IT assoċjati ma’ FTEs addizzjonali).
Il-koeffiċjent ta’ korrezzjoni applikabbli bħalissa għal Pariġi (118,7) ġie applikat għal dawn il-kostijiet standard, li mbagħad ġew indiċjati b’rata ta’ 2 % għas-snin wara l-2023 (kif inhi l-prattika standard meta jiġi pprogrammat il-baġit tal-Unjoni, b’kont meħud tal-fatt li f’xi snin l-inflazzjoni tista’ tkun inqas u f’oħrajn tista’ tkun aktar).
·Il-kost tal-infrastruttura addizzjonali u tan-nefqa operatorja (it-Titolu II) ġie kkalkolat bl-użu tal-allokazzjoni standard ta’ EUR 29 000 ta’ “habillage” għall-kostijiet tal-bini u tal-IT assoċjati ma’ FTEs addizzjonali, indiċjati b’rata ta’ 2 % għas-snin wara l-2023. Barra minn hekk, ġie inkluż kost standard ta’ EUR 2 500 għal kull FTE (indiċjat ukoll għal 2 % għas-snin wara l-2023) għal kostijiet amministrattivi oħrajn mhux koperti mill-allokazzjoni ta’ “habillage”.
L-impatt imbassar fuq il-baġit tal-Unjoni ġie stmat fuq il-bażi li ġejja:
Titolu I – Nefqa fuq il-Persunal
·Il-kalkoli huma bbażati fuq id-data li ġejja: hemm 59 entità li qegħdin joperaw fl-UE, li minnhom 30 jinsabu fl-UE u 29 jinsabu barra mill-UE. Għall-entitajiet mhux ibbażati fl-UE, se jkun hemm 3 modi kif dawn se jkunu jistgħu jipprovdu servizzi fl-UE: a) ekwivalenza b) approvazzjoni c) rikonoxximent. L-intensità tal-kompiti superviżorji se tvarja skont il-post fejn ikunu jinsabu l-fornituri (fl-UE vs mhux fl-UE).
Entitajiet ibbażati fl-UE: Fil-każ ta’ 30 fornitur ta’ klassifikazzjonijiet ESG ibbażati fl-UE (3 kbar + 6 medji + 9 żgħar + 12 mikro): i) fis-sena (n), se jkun hemm bżonn 6 xhur għall-awtorizzazzjoni ta’ 30 entità bbażati fl-UE (CAs) + 6 xhur oħra ta’ superviżjoni ta’ dawk l-entitajiet li diġà kienu ġew awtorizzati (TAs); ii) fis-sena (n)+1, is-superviżjoni ta’ 30 entità; iii) fis-sena (n)+2, is-superviżjoni ta’ 30 entità.
·Suppożizzjonijiet ta’ fornituri tal-UE: Il-Kummissjoni tistma, abbażi tal-input mill-ESMA, li se jkun hemm bżonn 1,7 FTE għas-superviżjoni ta’ fornitur kbir ta’ klassifikazzjonijiet ESG u 0,2 FTE għas-superviżjoni ta’ fornitur żgħir ta’ klassifikazzjonijiet ESG. Dan huwa bbażat fuq is-suppożizzjoni li l-klassifikazzjonijiet ESG ma humiex sistemikament importanti daqs il-klassifikazzjonijiet tal-kreditu u, għalhekk, se jkunu jeħtieġu livell aktar baxx ta’ intensità superviżorja minn dak li qed tuża bħalissa l-ESMA għas-CRAs, biex b’hekk il-Kummissjoni applikat tnaqqis ta’ 50 % fin-numri ta’ FTE għas-CRAs.
·Suppożizzjonijiet ta’ fornituri ta’ klassifikazzjonijiet ESG mhux ibbażati fl-UE:
Aħna kkunsidrajna għall-fornituri mhux tal-UE = 0,1 FTE (nofs iż-żmien allokat għal fornitur mikro ta’ klassifikazzjonijiet ESG ibbażat fl-UE), meta jitqiesu 29 fornitur ta’ klassifikazzjonijiet ESG mhux ibbażati fl-UE, ikkunsidrajna tariffa fissa ta’ EUR 3 000 għal kull fornitur ta’ klassifikazzjonijiet ESG mhux ibbażat fl-UE (nofs l-ammont ta’ tariffi imposti fuq is-CRAs iċċertifikati ta’ EUR 6 000).
·Għandu jiġi nnotat li l-bilanċ tal-persunal taħt il-mandat ta’ klassifikazzjoni ESG (aktar CAs vs TAs) huwa differenti mill-approċċ għas-CRAs. Fiż-żewġ każijiet, l-ESMA għandha mandat tas-superviżjoni diretta, madankollu, fil-każ tas-CRAs, hija għandha konsiderevolment aktar TAs minn CAs (37 TA u 14-il CA) sabiex tiżgura li jiġi impjegat persunal tas-sengħa u bl-esperjenza fuq bażi permanenti.
·Aħna nikkunsidraw li x’aktarx ikun hemm l-ogħla livell ta’ xogħol ta’ darba fl-ewwel sena (is-sena 2025) relatat mal-awtorizzazzjoni. F’dan ir-rigward, se jkun importanti li l-ESMA tingħata d-19-il FTE msemmija fuq mill-bidu, sabiex timmaniġġa dan l-ogħla livell. Għas-sena 2027, huwa probabbli li l-ammont kbir ta’ xogħol inizjali tar-reġistrazzjoni u tal-awtorizzazzjoni se jonqos, u l-għadd ta’ CAs temporanji jista’ jitnaqqas, sabiex b’hekk l-għadd totali ta’ FTEs ikun jista’ jitnaqqas għal 17. Madankollu, fis-sena 2027, l-ESMA se tkun responsabbli għas-superviżjoni tal-entitajiet kollha rreġistrati u awtorizzati fis-snin 2025 u 2026, għalhekk, it-tnaqqis propost ma jistax ikun sostanzjali wisq.
·Meta mqabbel mal-għadd ta’ FTEs għas-superviżjoni diretta tas-CRAs, l-għadd ta’ FTEs għas-superviżjoni diretta tal-fornituri ta’ klassifikazzjonijiet ESG tnaqqas b’aktar minn 50 % (total ta’ 51 FTE għas-CRAs vs 19-il FTE fl-2025/2026 u 17-il FTE fl-2027 għall-fornituri ta’ klassifikazzjonijiet ESG). Dan jitqies bħala persunal minimu li jista’ jiggarantixxi s-superviżjoni diretta xierqa tas-suq ta’ 59 entità.
Titolu III – nefqiet operazzjonali
·Ġustifikazzjoni ta’ EUR 35 000 għall-inkorporazzjoni tal-entitajiet fis-sistema ta’ rapportar superviżorju. Dan il-kost huwa meħtieġ biex jinħoloq modulu fis-sistema li tuża l-ESMA għar-rapportar superviżorju msejjaħ BWise. Minħabba l-mandat il-ġdid tas-superviżjoni diretta, is-sistema ta’ rapportar superviżorju jeħtieġ li tiġi estiża. Minbarra l-kostijiet inizjali, se jkun hemm tariffa annwali rikorrenti għall-manutenzjoni ta’ EUR 5 000.
·Is-sistema ta’ rapportar tippermetti lill-ESMA tipproċessa d-dokumentazzjoni superviżorja li tirċievi mingħand l-entitajiet, u tgħin biex jitnaqqas ix-xogħol manwali tal-ftuħ u l-issejvjar ta’ dokumenti mehmuża mal-emails b’mod manwali. Għalhekk, hija tgħin biex jitnaqqsu l-kostijiet tal-FTE.
Nefqa stmata li għandha tiġi koperta minn tariffi għall-kompiti superviżorji diretti kollha mwettqa mill-ESMA
EUR
ESMA
|
|
|
2023
|
2024
|
2025
|
2026
|
2027
|
TOTAL
|
Titolu 1: Nefqa fuq il-persunal
|
Impenji
|
(1)
|
|
|
1,603,618
|
3,271,382
|
3,145,675
|
8,020,675
|
|
Pagamenti
|
(2)
|
|
|
1,603,618
|
3,271,382
|
3,145,675
|
8,020,675
|
Titolu 2: Nefqa operatorja u infrastrutturali
|
Impenji
|
(1a)
|
|
|
273,105
|
557,134
|
534,849
|
1,365,088
|
|
Pagamenti
|
(2a)
|
|
|
273,105
|
557,134
|
534,849
|
1,365,088
|
Titolu 3: nefqa operazzjonali
|
Impenji
|
(3a)
|
|
|
35,000
|
5,000
|
5,000
|
45,000
|
|
Pagamenti
|
(3b)
|
|
|
35,000
|
5,000
|
5,000
|
45,000
|
TOTAL tal-approprjazzjonijiet
|
Impenji
|
=1+1a +3a
|
|
|
1,911,724
|
3,833,516
|
3,685,523
|
9,430,763
|
|
Pagamenti
|
=2+2a +3b
|
|
|
1,911,724
|
3,833,516
|
3,685,523
|
9,430,763
|