IL-KUMMISSJONI EWROPEA
Brussell, 3.3.2023
COM(2023) 108 final
2023/0056(COD)
Proposta għal
REGOLAMENT TAL-PARLAMENT EWROPEW U TAL-KUNSILL
li jemenda r-Regolament (UE) 2019/833 li jistabbilixxi miżuri ta’ konservazzjoni u ta’ infurzar li japplikaw fiż-Żona Regolatorja tal-Organizzazzjoni tas-Sajd fl-Atlantiku tal-Majjistral
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u objettivi tal-proposta
L-iskop ewlieni tal-proposta huwa li l-miżuri ta’ konservazzjoni u ta’ infurzar li l-Organizzazzjoni tas-Sajd fl-Atlantiku tal-Majjistral (NAFO) adottat waqt il-laqgħa annwali tagħha f’Settembru 2022 jiġu implimentati fid-dritt tal-Unjoni. In-NAFO hija l-organizzazzjoni reġjonali għall-ġestjoni tas-sajd li hija responsabbli għall-ġestjoni tar-riżorsi tas-sajd fl-Atlantiku tal-Majjistral li huma taħt ir-responsabbiltà tagħha. Il-miżuri ta’ konservazzjoni u ta’ ġestjoni tan-NAFO japplikaw biss għaż-Żona Regolatorja tan-NAFO li tinsab fl-ibħra internazzjonali u li hija ddefinita bħala ż-żona li tinsab lil hinn miż-żona li fiha s-sajd jaqa’ taħt il-ġuriżdizzjoni tal-istati kostali. L-UE ilha mill-1979 Parti Kontraenti tan-NAFO.
Skont il-Konvenzjoni NAFO, il-miżuri ta’ konservazzjoni li l-Kummissjoni tan-NAFO tadotta huma vinkolanti (l-Artikoli XIV, VI.8 u VI.9) u l-Partijiet Kontraenti huma obbligati jimplimentawhom.
Ir-Regolament (UE) 2019/833 implimenta fil-liġi tal-Unjoni l-miżuri ta’ konservazzjoni u ta’ infurzar tan-NAFO u ġie emendat fl-2021 u fl-2022 biex jimplimenta l-miżuri adottati min-NAFO fl-2019, fl-2020 u fl-2021. Din il-proposta tkopri l-emendi adottati min-NAFO waqt il-laqgħa annwali tagħha f’Settembru 2022. Dawk l-emendi daħlu fis-seħħ fl-1 ta’ Diċembru 2022 u japplikaw minn dik id-data.
•Konsistenza mad-dispożizzjonijiet eżistenti fil-qasam ta’ politika
Din il-proposta hija konsistenti mar-Regolament (UE) 2019/833.
Il-proposta hija konformi mal-Parti VI tar-Regolament (UE) Nru 1380/2013 dwar il-Politika Komuni tas-Sajd (li tittratta l-politika esterna), u li tipprevedi li l-Unjoni twettaq is-sajd estern tagħha f’konformità mal-obbligi internazzjonali tagħha u ssejjes l-attivitajiet tas-sajd tal-UE fuq il-kooperazzjoni reġjonali fil-qasam tas-sajd.
Il-proposta tikkumplimenta kemm ir-Regolament (UE) 2017/2403 dwar il-ġestjoni ta’ flotot tas-sajd esterni, li jipprevedi li l-bastimenti tas-sajd tal-Unjoni ikunu soġġetti għall-awtorizzazzjoni tas-sajd mill-Organizzazzjonijiet Reġjonali għall-Ġestjoni tas-Sajd, u kemm ir-Regolament tal-Kunsill (KE) Nru 1005/2008 dwar is-sajd illegali, mhux irrappurtat u mhux irregolat, li jipprevedi l-inklużjoni tal-lista tan-NAFO tal-bastimenti li jwettqu sajd illegali, mhux irrappurtat u mhux irregolat (is-sajd IUU) fil-lista tal-Unjoni tal-bastimenti li jwettqu l-IUU.
Din il-proposta ma tkoprix l-opportunitajiet tas-sajd tal-UE li ddeċidew dwarhom in-NAFO. Skont l-Artikolu 43(3) tat-Trattat dwar il-Funzjonament tal-Unjoni Ewropea (it-TFUE), huwa l-Kunsill li għandu d-dritt jadotta miżuri dwar l-iffissar tal-prezzijiet, l-imposti, l-għajnuna u l-limitazzjonijiet kwantitattivi u dwar l-iffissar u l-allokazzjoni ta’ opportunitajiet tas-sajd.
•Konsistenza ma’ politiki oħra tal-Unjoni
Il-proposta hija konsistenti ma’ politiki oħra tal-Unjoni.
2.BAŻI ĠURIDIKA, SUSSIDJARJETÀ U PROPORZJONALITÀ
•Bażi ġuridika
Il-proposta hija bbażata fuq l-Artikolu 43(2) tat-TFUE minħabba li tistabbilixxi d-dispożizzjonijiet li huma meħtieġa għall-kisba tal-objettivi tal-politika komuni tas-sajd.
•Sussidjarjetà (għall-kompetenza mhux esklużiva)
Il-proposta tidħol fl-ambitu tal-kompetenza esklużiva tal-Unjoni (l-Artikolu 3(1)(d) tat-TFUE). Għalhekk il-prinċipju tas-sussidjarjetà ma japplikax.
•Proporzjonalità
Il-proposta se tiżgura li jintlaħqu l-obbligi tal-UE marbutin man-NAFO mingħajr ma tmur lil hinn minn dak li huwa meħtieġ biex jintlaħaq dan l-għan.
•Għażla tal-istrument
L-istrument magħżul jemenda r-Regolament (UE) 2019/833.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
•Evalwazzjonijiet ex post/kontrolli tal-idoneità tal-leġiżlazzjoni eżistenti
Mhux rilevanti.
•Konsultazzjonijiet mal-partijiet ikkonċernati
L-iskop ta’ din il-proposta huwa li temenda r-Regolament (UE) 2019/833 billi timplimenta fid-dritt tal-Unjoni l-miżuri ta’ konservazzjoni u ta’ infurzar li ġew adottati waqt il-laqgħa annwali tan-NAFO f’Settembru tal-2022. L-esperti nazzjonali tal-Istati Membri tal-UE u r-rappreżentanti tal-industrija ġew ikkonsultati kemm fil-perjodu ta’ qabel il-laqgħa annwali tan-NAFO li matulha ġew adottati dawn il-miżuri u kemm waqt in-negozjati li saru fin-NAFO.
•Ġbir u użu tal-għarfien espert
Din il-proposta timplimenta fid-dritt tal-Unjoni l-miżuri ta’ konservazzjoni u ta’ infurzar tan-NAFO li ġew adottati f’konformità mal-pariri xjentifiċi u ta’ kontroll tal-kumitati permanenti tan-NAFO.
•Valutazzjoni tal-impatt
Mhix rilevanti. Din il-proposta timplimenta fid-dritt tal-Unjoni l-miżuri ta’ konservazzjoni u ta’ infurzar tan-NAFO li jorbtu lill-Partijiet Kontraenti u li tapplika direttament għall-Istati Membri.
•Idoneità regolatorja u simplifikazzjoni
Din il-proposta mhix marbuta mal-idoneità regolatorja u mas-simplifikazzjoni (il-programm imsejjaħ REFIT).
•Drittijiet fundamentali
Din il-proposta ma għandha l-ebda impatt fuq il-ħarsien tad-drittijiet fundamentali.
4.IMPLIKAZZJONIJIET GĦALL-BAĠIT
Din il-proposta ma għandha l-ebda implikazzjoni għall-baġit.
5.ELEMENTI OĦRA
•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rappurtar
Mhux applikabbli.
•Dokumenti ta’ spjegazzjoni (għad-direttivi)
Mhux applikabbli.
•Spjegazzjoni fid-dettall tad-dispożizzjonijiet speċifiċi tal-proposta
Il-proposta timplimenta l-miżuri ta’ konservazzjoni u ta’ infurzar adottati fil-laqgħa annwali tan-NAFO ta’ Settembru 2022 dwar: (i) dmirijiet ġodda tal-Istati Membri tal-bandiera relatati mas-sottomissjoni ta’ pjanijiet ta’ riċerka u rekwiżiti ta’ bastimenti għall-parteċipazzjoni f’attivitajiet ta’ riċerka; (ii) regolamentazzjoni ta’ tkarkir bi prova mal-ewwel dħul f’Diviżjoni għal vjaġġ tas-sajd; (iii) aġġustamenti għall-għeluq tar-redfish fid-diviżjoni 3M; (iv) il-projbizzjoni tal-ħatt l-art, tat-trażbord u taż-żamma abbord tal-kelb il-baħar ta’ Greenland; u (v) l-kontroelenkar tal-bastimenti IUU minn organizzazzjonijiet reġjonali oħra għall-ġestjoni tas-sajd.
Il-proposta tiddelega wkoll lill-Kummissjoni s-setgħat li temenda r-Regolament (UE) 2019/833 dwar id-dmirijiet tal-Istati Membri relatati mas-sottomissjoni tal-pjanijiet ta’ riċerka u r-rekwiżiti tal-bastimenti biex iwettqu attivitajiet ta’ riċerka, jekk in-NAFO temenda tali miżuri fil-futur. Huwa meħtieġ l-implimentazzjoni fil-pront ta’ dawn id-dispożizzjonijiet fid-dritt tal-Unjoni biex il-bastimenti tal-Unjoni jkunu jistgħu jistadu bl-istess mod bħall-bastimenti tal-Partijiet Kontraenti l-oħrajn tan-NAFO fl-istaġuni tas-sajd futuri.
2023/0056 (COD)
Proposta għal
REGOLAMENT TAL-PARLAMENT EWROPEW U TAL-KUNSILL
li jemenda r-Regolament (UE) 2019/833 li jistabbilixxi miżuri ta’ konservazzjoni u ta’ infurzar li japplikaw fiż-Żona Regolatorja tal-Organizzazzjoni tas-Sajd fl-Atlantiku tal-Majjistral
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea, u b’mod partikulari l-Artikolu 43(2) tiegħu,
Wara li kkunsidraw il-proposta tal-Kummissjoni Ewropea,
Wara li l-abbozz tal-att leġiżlattiv intbagħat lill-parlamenti nazzjonali,
Wara li kkunsidraw l-opinjoni tal-Kumitat Ekonomiku u Soċjali Ewropew 1 ,
Filwaqt li jaġixxu skont il-proċedura leġiżlattiva ordinarja,
Billi:
(1)Ir-Regolament (UE) 2019/833 tal-Parlament Ewropew u tal-Kunsill 2 implimenta fid-dritt tal-Unjoni l-iktar regoli aġġornati għall-miżuri ta’ konservazzjoni u ta’ infurzar li japplikaw fiż-Żona Regolatorja tal-Organizzazzjoni tas-Sajd fl-Atlantiku tal-Majjistral (NAFO). Sussegwentement, dan ir-Regolament ġie emendat sabiex jimplimenta l-miżuri tan-NAFO adottati waqt il-laqgħat annwali tagħha fl-2019, l-2020 u l-2021 3 .
(2)Sussegwentement, fl-44 Laqgħa Annwali tagħha f’Settembru 2022 in-NAFO adottat għadd ta’ miżuri legalment vinkolanti għall-konservazzjoni tar-riżorsi tas-sajd taħt ir-responsabbiltà tagħha fir-rigward ta’ dmirijiet ġodda tal-Istati Membri tal-bandiera relatati mas-sottomissjoni ta’ pjanijiet ta’ riċerka u rekwiżiti ta’ bastimenti biex jitwettqu attivitajiet ta’ riċerka, ir-regolamentazzjoni ta’ tkarkir bi prova mal-ewwel dħul f’Diviżjoni fuq vjaġġ tas-sajd, l-aġġustamenti għall-għeluq tar-redfish fit-3M, il-projbizzjoni tal-ħatt l-art, tat-trażbord u taż-żamma abbord tal-kelb il-baħar ta’ Greenland u l-kontroelenkar ta’ bastimenti illegali, mhux rappurtati u mhux regolati (IUU) minn organizzazzjonijiet reġjonali oħra għall-ġestjoni tas-sajd.
(3)Dawk il-miżuri huma indirizzati lill-Partijiet Kontraenti tan-NAFO, u jinkludu wkoll obbligi għall-operaturi. Wara li l-Miżuri ta’ Konservazzjoni u ta’ Infurzar tan-NAFO (CEM) daħlu fis-seħħ fl-1 ta’ Diċembru 2022, dawn bdew jorbtu lill-Partijiet Kontraenti kollha tan-NAFO. Fir-rigward tal-Unjoni Ewropea, dawn iridu jiġu implimentati fid-dritt tal-Unjoni sal-punt li fih mhumiex diġà previsti mid-dritt tal-Unjoni.
(4)Għalhekk, jenħtieġ li r-Regolament (UE) 2019/833 jiġi emendat sabiex jimplimenta dawn il-miżuri l-ġodda tan-NAFO.
(5)Ċerti dispożizzjonijiet tas-CEM x’aktarx jiġu emendati waqt il-Laqgħat Annwali tan-NAFO li ġejjin wara li ddaħħlu miżuri ġodda b’rabta mal-pjanijiet ta’ riċerka fuq is-sajd. Sabiex tali emendi futuri tas-CEM jiġu implimentati malajr fid-dritt tal-Unjoni, is-setgħa ta’ adozzjoni ta’ atti skont l-Artikolu 290 tat-Trattat dwar il-Funzjonament tal-Unjoni Ewropea jenħtieġ li tiġi delegata lill-Kummissjoni fir-rigward tad-dmirijiet tal-Istat Membru b’rabta mas-sottomissjoni ta’ pjanijiet ta’ riċerka u ta’rekwiżiti marbutin mal-bastimenti biex jwettqu l-attivitajiet ta’ riċerka.
(6)Huwa partikolarment importanti li l-Kummissjoni twettaq konsultazzjonijiet xierqa matul ix-xogħol ta’ tħejjija tagħha, anke fil-livell tal-esperti, u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet 4 . B’mod partikulari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jenħtieġ li jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom jenħtieġ li jkollhom aċċess sistematiku għal-laqgħat tal-gruppi tal-esperti tal-Kummissjoni li jkunu qed jittrattaw it-tħejjija tal-atti delegati.
(7)Għalhekk jenħtieġ li r-Regolament (UE) 2019/833 jiġi emendat skont dan,
ADOTTAW DAN IR-REGOLAMENT:
Artikolu 1
Emendi fir-Regolament (UE) 2019/833
Ir-Regolament (UE) 2019/833 b’dan huwa emendat kif ġej:
(1)Fl-Artikolu 4, il-paragrafu (2) huwa sostitwit b’dan li ġej:
“2. L-Istat Membru tal-bandiera għandu:
(a) javża lill-Kummissjoni, b’mod elettroniku u fil-format preskritt fl-Anness II.C tas-CEM imsemmi fil-punt 5 tal-Anness ta’ dan ir-Regolament, u qabel il-bidu tar-riċerka, bil-bastimenti kollha tar-riċerka intitolati li jtajru l-bandiera tiegħu li huma awtorizzati biex iwettqu attivitajiet tar-riċerka fiż-Żona Regolatorja;
(b) jipprovdi pjan ta’ riċerka lill-Kummissjoni għall-bastimenti kollha intitolati li jtajru l-bandiera tiegħu li huma awtorizzati jwettqu attivitajiet ta’ riċerka fiż-Żona Regolatorja, mhux inqas minn 40 jum qabel il-laqgħa tal-Kunsill Xjentifiku tan-NAFO ta’ Ġunju, fil-każijiet ta’ stħarriġiet u ta’ attivitajiet ta’ riċerka ġodda mhux rikorrenti u fejn il-qabdiet miżmuma abbord matul l-attivitajiet ta’ riċerka jkunu maħsuba għall-kummerċjalizzazzjoni. F’każijiet oħra, il-pjan ta’ riċerka għandu jiġi pprovdut mhux inqas minn 10 ijiem qabel il-bidu tar-riċerka;
(c) jiżgura li l-pjan ta’ riċerka ta’ stħarriġiet imwettaq fiż-Żona Regolatorja li jimmiraw għal stokkijiet soġġetti għal opportunitajiet tas-sajd għandu jkun fih mill-inqas l-informazzjoni li ġejja:
(i) identifikazzjoni tal-bastiment;
(ii) skop,
(iii) sommarju ta’ metodi jew proċeduri xjentifiċi,
(iv) post u dati tal-attività ta’ riċerka,
(v) isem tal-investigatur prinċipali,
(vi) jekk il-qabdiet miżmuma abbord humiex se jiġu kkummerċjalizzati,
(vii) qabda totali stmata tar-riċerka tal-ispeċijiet fil-mira tal-istħarriġ u jekk osservatur b’għarfien espert xjentifiku suffiċjenti hux se jkun abbord,
(viii) informazzjoni dwar meta r-riżultati tar-riċerka se jiġu ppreżentati lill-Kunsill Xjentifiku tan-NAFO,
(ix) fejn rilevanti, kwalunkwe talba għal deroga mid-dispożizzjonijiet f’dan il-punt, u
(x) fejn rilevanti, indikazzjoni li l-attività tikkostitwixxi stħarriġ jew riċerka ġdida mhux rikorrenti; u
(d) jinnotifika minnufih lill-Kummissjoni dwar il-bidu u t-tmiem tal-attivitajiet ta’ riċerka minn bastimenti impjegati temporanjament fir-riċerka, inkluż matul vjaġġi tas-sajd li fihom iseħħu kemm attivitajiet kummerċjali kif ukoll ta’ riċerka.”
(2)Fl-Artikolu 4, il-paragrafu (3) huwa sostitwit b’dan li ġej:
“3. Il-bastimenti involuti fir-riċerka għandhom:
(a) iżommu abbord kopja tal-pjan ta’ riċerka u kwalunkwe tibdil tiegħu bil-lingwa Ingliża f’kull ħin, u
(b) għal stħarriġiet imwettqa fiż-Żona Regolatorja li jimmiraw stokkijiet soġġetti għal opportunitajiet tas-sajd, l-istivar tal-qabdiet meħuda f’attivitajiet ta’ riċerka separatament bi xbieki, plywood, kaxex jew mezzi oħra mill-qabdiet l-oħra kollha li jsiru fi vjaġġi tas-sajd li fihom jitwettqu kemm attivitajiet kummerċjali kif ukoll ta’ riċerka, u l-post tal-qabdiet li jsiru f’attivitajiet ta’ riċerka għandhom jiġu indikati fil-pjan tal-istivar.”
(3)Fl-Artikolu 4, il-paragrafu (4) huwa sostitwit b’dan li ġej:
“4. Sakemm ma jkunx appoġġat mod ieħor mill-opinjoni tal-Kunsill Xjentifiku tan-NAFO, il-bastimenti tar-riċerka li jwettqu stħarriġiet imwettqa fiż-Żona Regolatorja li jkollhom fil-mira stokkijiet soġġetti għal opportunitajiet tas-sajd u li jżommu abbord qabdiet miksuba matul tali attivitajiet ta’ riċerka bl-iskop li jikkummerċjalizzaw dawn il-qabdiet għandhom:
(a) jikkonformaw mar-rekwiżiti ta’ reġistrazzjoni u rappurtar fil-Kapitolu V ta’ dan ir-Regolament,
(b) ikollhom osservatur b’għarfien espert suffiċjenti abbord,
(c) jgħoddu dawn il-qabdiet mal-kwota rilevanti tal-Istat Membru u mal-limitazzjonijiet tal-isforz tas-sajd stabbiliti fl-opportunitajiet tas-sajd.”
(4)Fl-Artikolu 4, il-paragrafu (5) huwa sostitwit b’dan li ġej:
“5. Sakemm ma jkunx previst mod ieħor f’dan ir-Regolament jew fis-CEM, il-miżuri ta’ konservazzjoni u ta’ ġestjoni marbutin mat-teħid tal-ħut fiż-Żona Regolatorja, b’mod partikulari d-daqs tal-malji, il-limiti tad-daqs u ż-żoni u l-istaġuni magħluqin, ma għandhomx jillimitaw lill-bastimenti tar-riċerka.”
(5)Fl-Artikolu 4, il-paragrafu (6) huwa sostitwit b’dan li ġej:
“6. Il-Kummissjoni għandha tibgħat l-informazzjoni nnotifikata mill-Istati Membri tal-bandiera f’konformità mal-paragrafu 2 lis-Segretarju Eżekuttiv tan-NAFO mingħajr dewmien.”
(6)Fl-Artikolu 6, il-paragrafu (1)(e) huwa sostitwit b’dan li ġej:
“(e) jagħlaq is-sajd għar-redfish fid-Diviżjoni 3M f’24:00 UTC tal-jum li fih ikun stmat li l-qabda totali rrappurtata tkun laħqet il-100 % tat-TAC għar-redfish fid-Diviżjoni 3M, kif innotifikat f’konformità mal-paragrafu 3;”
(7)Fl-Artikolu 8, jiżdied il-paragrafu (5):
“5. Mal-ewwel dħul tiegħu f’Diviżjoni fi vjaġġ tas-sajd, bastiment jista’ jagħmel tkarkir bi prova wieħed għal massimu ta’ 3 sigħat. Jekk l-istokkijiet soġġetti għal limiti tal-qabdiet aċċessorji jkunu jikkostitwixxu l-ikbar perċentwal, skont il-piż, tal-qabda totali li jkun hemm minn dak il-ġbir, dan is-sajd ma għandux jitqies bħala sajd dirett għal dawk l-istokkijiet, u l-bastiment għandu jibdel il-pożizzjoni tiegħu minnufih f’konformità mad-dispożizzjonijiet tal-paragrafu 1(b). Il-bastimenti għandhom jidentifikaw kull tkarkir bi prova li jagħmlu f’konformità ma dan il-paragrafu u jirreġistraw il-koordinati tal-pożizzjoni tal-bidu u tat-tmiem ta’ kull tkarkir bi prova li jkunu għamlu fil-ġurnal ta’ abbord dwar is-sajd.”
(8)Fl-Artikolu 12, il-paragrafu (9) huwa sostitwit b’dan li ġej:
“9. Għandu jkun ipprojbit is-sajd dirett , iż-żamma, it-trażbord, jew il-ħatt l-art tal-kelb il-baħar ta’ Greenland (Somniosus microcephalus) sħiħ jew parti minnu fiż-Żona Regolatorja.”
(9)Fl-Artikolu 44, il-punt (c) huwa sostitwit b’dan li ġej:
“(c) inkluż fil-lista tal-IUU tal-Kummissjoni għall-Konservazzjoni tar-Riżorsi Ħajjin tal-Baħar Antartiku 5 , il-Kummissjoni għall-Konservazzjoni tat-Tonna tan-Nofsinhar 6 , il-Kummissjoni Inter-Amerikana għat-Tonn Tropikali 7 , il-Kummissjoni Internazzjonali għall-Konservazzjoni tat-Tonn tal-Atlantiku 8 ,il-Kummissjoni dwar it-Tonn tal-Oċean Indjan 9 , il-Kummissjoni Ġenerali tas-Sajd għall-Baħar Mediterran 10 , il-Kummissjoni tas-Sajd tal-Atlantiku tal-Grigal 11 , il-Kummissjoni tas-Sajd tal-Paċifiku tat-Tramuntana 12 , l-Organizzazzjoni tas-Sajd tal-Atlantiku tax-Xlokk 13 , il-Ftehim dwar is-Sajd fin-Nofsinhar tal-Oċean Indjan 14 , l-Organizzazzjoni Reġjonali għall-Ġestjoni tas-Sajd fin-Nofsinhar tal-Paċifiku 15 , u l-Kummissjoni għas-Sajd fil-Punent tal-Paċifiku u l-Paċifiku Ċentrali 16 .”
(10)Fl-Artikolu 50,fil-paragrafu 2, jiżdied il-punt (m):
“(m) id-dmirijiet tal-Istat Membru tal-bandiera fir-rigward tal-pjanijiet ta’ riċerka tal-Artikolu 4(2).”
(11)Fl-Artikolu 50,fil-paragrafu 2, jiżdied il-punt (n):
“(n) ir-rekwiżiti għal bastimenti impenjati fir-riċerka tal-Artikolu 4(3), (4), u (5).”
Artikolu 2
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell,
Għall-Parlament Ewropew Għall-Kunsill
Il-President Il-President
ĠU L 123, 12.5.2016, p. 1.