IL-KUMMISSJONI EWROPEA

Brussell, 12.9.2023

COM(2023) 534 final

RAPPORT TAL-KUMMISSJONI LILL-PARLAMENT EWROPEW U LILL-KUNSILL

L-ewwel Rapport ta' Implimentazzjoni dwar il-Portal Diġitali Uniku

Werrej

I.    ISSA ONLINE – Informazzjoni, Servizzi ta’ Assistenza u Għodda ta’ Feedback dwar l-Ostakli tas-Suq Uniku    

A.    Aċċess għal informazzjoni online fuq Your Europe    

B.    L-għoti ta’ assistenza ta’ kwalità lin-negozji u liċ-ċittadini    

C.    Rapportar tal-ostakli biex jittejjeb il-funzjonament tas-Suq Uniku    

II.    IMMINENTI – Proċeduri online u s-Sistema Teknika ta’ Darba Biss    

KONKLUŻJONI    

Il-Portal Diġitali Uniku 1 (SDG) huwa waħda mill-aktar inizjattivi ambizzjużi tal-UE dwar il-Gvern elettroniku biex tiġi diġitalizzata l-amministrazzjoni pubblika. Dan jgħin bil-kbir biex jitnaqqsu l-piżijiet amministrattivi, għan-negozji, iċ-ċittadini u l-awtoritajiet. Permezz tal-portal web Your Europe 2 , l-SDG jistabbilixxi punt uniku ta’ servizz li jipprovdi lin-negozji u liċ-ċittadini:

-Informazzjoni affidabbli u aġġornata dwar ir-regoli u l-proċeduri fis-Suq Uniku, fil-livelli kollha tal-gvern;

-Aċċess dirett, ċentralizzat u ggwidat għas-servizzi ta’ assistenza u ta’ soluzzjoni tal-problemi;

-Aċċess dirett għal firxa wiesgħa ta’ proċeduri amministrattivi kompletament diġitalizzati, li għalihom is-Sistema Teknika ta’ Darba Biss (OOTS) tippermetti skambju awtomatizzat ta’ evidenza bejn l-awtoritajiet madwar l-UE fuq talba tal-utenti;

-Għodod ta’ feedback biex jirrapportaw dwar il-kwalità tas-servizzi u l-ostakli tas-Suq Uniku.

L-SDG 3  itejjeb l-ambjent tan-negozju Ewropew billi jgħin lill-kumpaniji, b’mod partikolari lill-SMEs li spiss ikollhom inqas riżorsi u għarfien espert minn organizzazzjonijiet akbar, biex jifhmu u jużaw aħjar id-drittijiet u l-opportunitajiet offruti mis-Suq Uniku. L-SMEs jibbenefikaw ħafna mis-simplifikazzjoni amministrattiva u d-diġitalizzazzjoni offruti permezz tal-SDG. In-negozji, speċjalment dawk li joperaw b’mod transfruntier, jiffrankaw ħafna ħin u flus bl-użu tal-SDG, b’mod partikolari meta jippruvaw jiġbru informazzjoni jew ilestu l-proċeduri amministrattivi. 4 . 

L-SDG jissimplifika wkoll il-ħajja ta’ kuljum taċ-ċittadini f’ħafna oqsma, bħall-ivvjaġġar, ix-xogħol u l-irtirar, l-edukazzjoni, id-drittijiet tal-familja u l-kura tas-saħħa, li huma kruċjali biex jagħmlu l-aħjar użu mid-drittijiet tal-moviment liberu tagħhom, speċjalment f’kuntest transfruntier. L-SDG għaldaqstant jgħin biex jiġi żblokkat il-potenzjal sħiħ tas-Suq Uniku 5 u biex jintlaħqu l-miri tad-Deċennju Diġitali tal-UE 6 filwaqt li joffri soliev konkret lin-negozji ż-żgħar.

L-SDG jibbenefika mill-isforzi li saru fil-kuntest ta’ xi punti uniċi ta’ servizz speċifiċi għas-settur bħal pereżempju ċ-ċentri nazzjonali għall-professjonijiet kwalifikati jew il-Punti ta’ Kuntatt Uniku 7 , stabbiliti mid-Direttiva dwar is-Servizzi. Madankollu, il-SDG huwa soluzzjoni komprensiva u integrata, li taqdi l-ħtiġijiet kollha tan-negozji u taċ-ċittadini matul iċ-ċiklu tal-ħajja kollu tagħhom.

L-SDG jiġi implimentat fi stadji bħala sforz konġunt kemm mill-Istati Membri kif ukoll mill-Kummissjoni. Tnieda fl-2020, u b’mod partikolari għamel disponibbli informazzjoni dwar id-drittijiet u l-proċeduri fil-livelli tal-UE u nazzjonali fuq Your Europe. Sa tmiem l-2023, l-Istati Membri se jkollhom jiżguraw li l-proċeduri amministrattivi f’21 qasam ewlieni jkunu kompletament aċċessibbli online, inkluż għall-utenti transfruntieri, u li tiġi stabbilita l-OOTS sabiex fil-futur jkunu jistgħu jiġu skambjati d-dokumenti rilevanti.

Skont ir-Regolament SDG, il-Kummissjoni hija mitluba tivvaluta u tirrieżamina regolarment l-applikazzjoni ta’ dan ir-Regolament abbażi tal-istatistika u r-rispons miġburin permezz tal-portal. Dan l-ewwel rapport 8 huwa ppreżentat bħala parti mill-Pakkett ta’ Għajnuna għall-SMEs tal-Kummissjoni, peress li l-SDG jikkontribwixxi għall-objettivi tal-pakkett ta’ simplifikazzjoni regolatorja u t-tnaqqis tal-piż amministrattiv. Dan jipprovdi valutazzjoni tal-implimentazzjoni tal-SDG u l-mod kif jiffunzjona l-SDG illum, abbażi fost l-oħrajn, ta’ data dwar l-użu u l-feedback tal-utenti. Dan jiddeskrivi l-progress miksub lejn il-fażi li jmiss, b’mod partikolari d-diġitalizzazzjoni tal-proċeduri u l-OOTS. Dan jindika wkoll modi kif l-SDG jista’ jittejjeb u jiġi estiż ulterjorment, bil-għan li tingħata spinta lill-Gvern elettroniku għas-servizz ta’ Suq Uniku kompetittiv u żona aċċessibbli ta’ moviment liberu għaċ-ċittadini.

Il-Parti I tiffoka fuq il-pilastri tal-SDG diġà disponibbli online fuq Your Europe, jiġifieri s-servizzi ta’ informazzjoni, is-servizzi ta’ assistenza u l-għodda ta’ feedback dwar l-ostakli tas-Suq Uniku. Il-Parti II tkopri l-pilastri tal-SDG li ġejjin relatati mal-proċeduri online u mal-OOTS.

I.ISSA ONLINE – Informazzjoni, Servizzi ta’ Assistenza u Għodda ta’ Feedback dwar l-Ostakli tas-Suq Uniku

A.Aċċess għal informazzjoni online fuq Your Europe

Il-portal Your Europe huwa punt uniku ta’ servizz li jgħaqqad il-portali u s-servizzi tal-gvern nazzjonali u tal-UE. Dan joffri aċċess online għal informazzjoni ta’ kwalità għolja dwar ir-regoli u l-proċeduri applikabbli għan-negozji u għaċ-ċittadini fil-livelli kollha tal-gvern (UE, nazzjonali, reġjonali, u lokali).

Fuq Your Europe, in-negozji, speċjalment l-SMEs, jistgħu jsibu l-informazzjoni kollha li jeħtieġu biex jiftħu 9 , imexxu jew jagħlqu negozju fl-UE, bħal informazzjoni dwar l-impjiegi, it-taxxi, il-forniment ta’ oġġetti u servizzi jew l-aċċess għall-finanzjament. Pereżempju, kumpanija li tkun qed tfittex opportunitajiet biex tiffinanzja t-tranżizzjoni diġitali jew ekoloġika tagħha tista’ ssir taf kif tikseb aċċess għall-finanzjament; jew kumpanija tat-trasport bit-triq li trid tistazzjona xufiera barra mill-pajjiż, tista’ ssib il-proċeduri jew ir-regoli applikabbli, pereżempju dwar ir-remunerazzjoni f’kull pajjiż; u negozju żgħir li jixtieq jespandi l-attività turistika tiegħu fl-UE jista’ jsib informazzjoni dwar regoli speċifiċi għall-pajjiż, ir-responsabbiltà tagħhom fil-konfront ta’ vjaġġaturi b’diżabilità kif ukoll opportunitajiet għal finanzjament mill-UE. Iċ-ċittadini, min-naħa tagħhom, jistgħu jfittxu kif jittraslokaw jgħixu, jivvjaġġaw, jistudjaw u jfittxu impjieg fl-UE, b’informazzjoni dwar suġġetti bħas-saħħa u s-sikurezza fuq il-post tax-xogħol, id-dokumenti tal-ivvjaġġar, il-formalitajiet ta’ residenza, il-kura tas-saħħa barra mill-pajjiż, is-sigurtà soċjali, id-drittijiet tal-konsumatur u aktar.

Il-viżitaturi jistgħu jafdaw l-informazzjoni dwar Your Europe, li tiġi direttament minn sorsi uffiċjali u tiġi aġġornata fil-livell tal-UE hekk kif tidħol fis-seħħ il-leġiżlazzjoni tal-UE. Din issir disponibbli f’format aċċessibbli u faċli biex jinftiehem, bil-lingwa/lingwi nazzjonali u b’lingwa barranija li tinftiehem b’mod komuni. 10  

Kisbiet

Your Europe qed isir dejjem aktar affidabbli u aċċessat. Fl-2022, Your Europe ġie aċċessat madwar 43 miljun darba, u b’hekk sar it-tielet sit web l-aktar aċċessat tal-Kummissjoni, wara s-sit web korporattiv tal-Kummissjoni u l-EUR-LEX. Dan isegwi s-sena rekord tal-2021, li matulha l-laxkar tar-restrizzjonijiet fuq l-ivvjaġġar relatati mal-COVID iġġenera numri eċċezzjonalment għoljin ta’ viżitaturi. Il-paġni nazzjonali korrispondenti – notifikati lill-Kummissjoni mill-Istati Membri u marbuta ma’ Your Europe – ġew aċċessati 63 miljun darba oħra s-sena l-oħra 11 . Il-kontenut tal-SDG 12 ikkombinat irċieva aktar minn 100 miljun żjara fis-sena kemm fl-2021 kif ukoll fl-2022 13 .

Graff 1. L-għadd ta’ żjarat f’Your Europe u l-paġni web nazzjonali qabel u wara t-tnedija tal-SDG

L-istatistika tal-2022 uriet li l-utenti qattgħu aktar minn 120 000 siegħa fuq il-paġni web ta’ Your Europe għan-negozji biss. Anke permezz ta’ stima konservattiva tal-kostijiet fuq pariri legali, l-SDG qed jiffranka lil dawn l-utenti, speċjalment l-SMEs, madwar EUR 2,5 miljun fis-sena, u ħafna ħin 14 . Il-paġna medja ta’ Your Europe tista’ tinqara faċilment f’inqas minn erba’ minuti, filwaqt li tiġbor fil-qosor testi legali kkumplikati tal-UE li jieħdu aktar minn sagħtejn u nofs biex jinqraw, b’mod preċiż.

L-introduzzjoni tal-funzjonalità l-ġdida tat-tiftix f’Awwissu 2022 (li tissostitwixxi t-tfittxija ta’ test liberu preċedenti) irriżultat f’żieda sinifikanti ta’ tfittxijiet li tlestew b’suċċess 15 . Fl-2021, il-funzjonalità tat-tiftix ta’ Your Europe intużat 871 104 darbiet. Dak in-numru rdoppja fl-2022 biex laħaq 1 784 566 mistoqsija.

Graff 2. Evoluzzjoni tal-mistoqsijiet ta’ tiftix sottomessi lil Your Europe mit-tnedija tiegħu

Il-kopertura ta’ Your Europe qed issir dejjem aktar komprensiva. Minn Jannar 2023, l-Istati Membri nnotifikaw 40 776 paġna web skont l-SDG. In-notifiki tal-Istati Membri koprew 80 % tal-oqsma meħtieġa skont l-Anness I tar-Regolament dwar l-SDG 16 . Il-graff 3 turi dik il-kopertura skont l-Istat Membru 17 . Immappjar simili bħalissa qed jivvaluta l-kopertura tal-informazzjoni lokali, li minn Diċembru 2022 l-Istati Membri jridu jinnotifikaw ukoll 18 .

Graff 3. Perċentwal ta’ informazzjoni koperta dwar l-SDG skont il-pajjiż

Stħarriġ tal-2023 ta’ Your Europe 19 wera li 92,5 % taċ-ċittadini li wieġbu u 90,3 % tan-negozji sabu l-portal sodisfaċenti jew aħjar. 77 % tan-negozji u 76 % taċ-ċittadini kkonfermaw li sabu l-informazzjoni li kienu qed ifittxu. 88,4 % tan-negozji u 90,6 % taċ-ċittadini jirrakkomandaw lil Your Europe lil ħbieb, familja, jew kollegi.

Il-portal sar dejjem aktar aċċessibbli u viżibbli. Għaċ-ċittadini, l-aktar suġġetti popolari fuq Your Europe huma l-“Ivvjaġġar” u x-“Xogħol u rtirar”. It-“Tmexxija ta’ negozju” u t-“Tassazzjoni” huma l-aktar suġġetti mfittxija għan-negozji. Is-sejbiet preliminari juru riżultati komparabbli għall-paġni web nazzjonali 20 , anke jekk iż-żjarat fil-kontenut nazzjonali ta’ Your Europe skont is-suġġett ġew segwiti biss minn Awwissu 2022 meta tnediet it-tfittxija ggwidata.

Sabiex tiżgura viżibbiltà akbar, il-Kummissjoni wettqet wirjiet diġitali f’21 Stat Membru u kampanja b’79 influwenzatur laħqet lil aktar minn 9,5 miljun persuna 21 .

Graff 4. Żjarat skont is-suġġett għal suġġetti relatati maċ-ċittadini (in-naħa tax-xellug) u relatati man-negozju (in-naħa tal-lemin)

F’każ ta’ avvenimenti jew kriżijiet mhux previsti, il-Kummissjoni tuża l-viżibbiltà ta’ Your Europe bħala multiplikatur biex tipprovdi lin-negozji u liċ-ċittadini b’informazzjoni jew billi tospita kontenut ġdid (eż. Brexit) jew billi torbot ma’ siti web oħrajn tal-Kummissjoni (eż. l-Ukrajna b’informazzjoni għar-refuġjati, għad-donaturi, għan-negozji).

Oqsma ta’ titjib u l-passi li jmiss

Il-Kummissjoni u l-Istati Membri jeħtieġ li jkomplu jtejbu Your Europe u n-network ta’ portali nazzjonali tiegħu bħala s-sors ewlieni ta’ referenza għal informazzjoni prattika, li tinftiehem, affidabbli u aċċessibbli dwar ir-regoli, il-proċeduri, u l-opportunitajiet ta’ negozju f’kull livell tal-amministrazzjoni.

Il-Kummissjoni se tkompli ttejjeb il-kopertura, it-traċċabbiltà u l-aċċess għall-informazzjoni għan-negozji, speċjalment l-SMEs, u ċ-ċittadini f’oqsma li huma kritiċi biex tgħinhom jagħmlu l-aħjar użu mis-Suq Uniku:

-Dan se jtejjeb it-traċċabbiltà tal-informazzjoni dwar ir-rekwiżiti tal-prodott għall-manifatturi u għall-bejjiegħa bl-imnut. Dan is-suġġett diġà huwa wieħed mill-aktar suġġetti ta’ tiftix popolari għan-negozji. Minħabba l-għadd ta’ regoli applikabbli għal prodott speċifiku wieħed, fil-livell tal-UE u dak nazzjonali, kemm speċifiku għall-prodott kif ukoll trażversali, Your Europe se jsir punt uniku ta’ aċċess għal dawn ir-rekwiżiti. B’mod parallel, l-Istati Membri jridu jżidu n-notifika tar-regoli nazzjonali relatati kif meħtieġ mir-Regolament dwar l-SDG.

-Se jippreżenta wkoll informazzjoni dwar it-tassazzjoni b’mod faċli għall-utent. L-Istati Membri jridu jiżguraw li l-informazzjoni fi, u l-infrastruttura teknika ta’, il-Bażi ta’ Data tat-Taxxi fl-Ewropa 22 huma aġġornati biex joffru lill-SMEs l-informazzjoni x-xierqa.

-Peress li l-Istati Membri qed iżidu aktar informazzjoni, inkluż fil-livell muniċipali, il-Kummissjoni se tkompli tippreżenta dan b’mod dejjem aktar strutturat u faċli għall-utent. Pereżempju, dan jinkludi informazzjoni dwar ir-regolamenti dwar l-aċċess għall-vetturi urbani (UVARs) bħal Żoni b’Emissjonijiet Baxxi jew stikers tal-pedaġġ.

-Il-Kummissjoni u l-Istati Membri għandhom ikomplu jtejbu t-traċċabbiltà tal-informazzjoni dwar is-sigurtà soċjali, li hija essenzjali għaċ-ċittadini mobbli, il-ħaddiema u l-impjegaturi u kundizzjoni essenzjali għall-moviment liberu tal-ħaddiema.

-Il-Kummissjoni se tkompli ttejjeb u taġġorna magna tat-tiftix iggwidat ġdida. Is-suċċess tagħha jiddependi wkoll mill-informazzjoni nnotifikata mill-Istati Membri.

Barra minn hekk, il-Kummissjoni se tkompli tistabbilixxi Your Europe bħala strument ewlieni għall-aċċess ta’ informazzjoni essenzjali bażika. F’dak ir-rigward, il-karatteristiċi eżistenti diġà jintużaw b’mod wiesa’. Pereżempju, ċittadin jew SME diġà jistgħu jużaw Your Europe biex jivverifikaw in-numri tal-VAT biex ikunu jafu jekk negozju jkunx irreġistrat biex jagħmel kummerċ transfruntier fl-UE, li huwa meħtieġ għal ħafna proċeduri. Dan huwa minnu wkoll fil-każ tal-Karta Professjonali Ewropea. Bl-istess mod, sa tmiem l-2023 ir-regoli dwar it-traffiku nazzjonali, li bħalissa jinsabu fuq sit web separat tal-UE, se jiġu ppubblikati fuq Your Europe. Il-Kummissjoni se tesplora wkoll metodi ġodda biex timmonitorja l-kontenut, bħas-sistemi awtomatizzati ta’ sondi tal-kwalità 23 .

Fl-aħħar nett, il-Kummissjoni se tivvaluta l-użu ta’ mudelli lingwistiċi kbar avvanzati li jaħdmu bl-IA, inklużi teknoloġiji tar-rikonoxximent tal-lingwi naturali. B’dawn il-mudelli, jistgħu jinħolqu sistemi ta’ twassil ta’ informazzjoni aktar dinamiċi, konxji tal-kuntest u personalizzati li jistgħu jirrivoluzzjonaw kif l-utenti jaċċessaw u jinteraġixxu ma’ kontenut regolatorju. Eventwalment, dawn l-għodod għandhom imnejn ikunu jistgħu janalizzaw ammonti kbar ta’ informazzjoni minn diversi sorsi, inklużi regoli u proċeduri tal-UE u nazzjonali, u jippreżentawha f’format imfassal għall-ħtiġijiet speċifiċi tal-utent.

B’rispons għal kriżijiet kbar, Your Europe se jikkonferma r-rwol tiegħu bħala multiplikatur għall-informazzjoni uffiċjali, bħar-rwol li kellu b’rispons għall-pandemija jew għall-gwerra fl-Ukrajna. B’mod ġenerali, is-servizzi tal-Kummissjoni se jiżguraw li s-sit web ta’ Your Europe isir referenza għalih b’mod aktar sistematiku meta jiġu stabbiliti rekwiżiti ġodda ta’ informazzjoni fil-leġiżlazzjoni l-ġdida tal-UE.

B.L-għoti ta’ assistenza ta’ kwalità lin-negozji u liċ-ċittadini

L-SDG jipprovdi appoġġ addizzjonali permezz ta’ servizzi individwalizzati ta’ assistenza u ta’ soluzzjoni tal-problemi, meta l-paġni ta’ informazzjoni tal-SDG ma jkunux biżżejjed u/jew meta ċ-ċittadini jew in-negozji jiltaqgħu ma’ problemi filwaqt li jippruvaw jeżerċitaw id-drittijiet tagħhom fis-Suq Uniku 24 .

Kisbiet

L-offerta tas-servizz qed titwessa’. F’Diċembru 2020, saru disponibbli seba’ servizzi ta’ assistenza ewlenin 25 fuq Your Europe flimkien ma’ Faċilità għas-Sejbien tas-Servizzi tal-Assistenza 26 li tiffaċilita l-aċċess għal dawn is-servizzi. Dawn jinkludu: (1) Punti ta’ Kuntatt Waħdieni; (2) Punti ta’ Kuntatt tal-Prodotti; (3) Punti ta’ Kuntatt għall-Prodotti għall-Bini; (4) Ċentri ta’ assistenza nazzjonali għall-kwalifiki professjonali; (5) Punti ta’ kuntatt nazzjonali għall-kura tas-saħħa transfruntiera; (6) Network Ewropew ta’ servizzi tal-impjiegi (EURES); (7) Soluzzjoni online għal tilwim (ODR).

Ir-Regolament dwar l-SDG jippermetti li jingħaqdu servizzi ta’ assistenza addizzjonali jekk l-offerta tagħhom tkun komplementari għas-servizzi eżistenti, jekk jissodisfaw il-kriterji tal-kwalità u jekk ma jitolbu l-ebda tariffa jew jitolbu tariffi żgħar biss 27 . Fuq din il-bażi, tliet servizzi ngħaqdu u espandew l-offerta ta’ servizz tal-SDG: Il-Pariri ta’ Your Europe (YEA), in-network SOLVIT u n-network taċ-Ċentri Ewropej tal-Konsumaturi 28 . Kważi dawn is-servizzi kollha issa huma disponibbli permezz tal-Faċilità għas-Sejbien tas-Servizzi tal-Assistenza.

Is-servizz jintuża b’mod wiesa’. Fl-2021 u l-2022 flimkien, is-servizzi ta’ assistenza pprovdew assistenza f’6,5 miljun każ 29 , li minnhom, 5,3 miljun kienu ċittadini u 1,2 miljun kienu negozji. L-aktar gruppi ta’ utenti appoġġati ta’ spiss huma l-impjegaturi u dawk li qed ifittxu impjieg (6 miljuni), il-kumpaniji li jipprovdu servizzi (157 000 każ), il-konsumaturi b’mistoqsijiet dwar id-drittijiet tagħhom (120 000 każ) jew f’tilwim ma’ negozjanti online (80 000 każ 30 ) u n-nies li qed ifittxu kura tas-saħħa f’pajjiż ieħor (63 000 każ) 31 .

Graff 5. Numru ta’ każijiet skont it-tip ta’ servizz (naħa ta’ fuq) u skont is-suġġetti (naħa ta’ isfel)

In-negozji u ċ-ċittadini jistgħu jistennew tweġiba fi żmien jumejn jew 3 ijiem kalendarji. Madankollu, il-ħin tar-rispons taż-żewġ tipi ta’ punti ta’ kuntatt għall-prodotti jieħu medja ta’ 8 sa 9 ijiem. Dan jista’ jkun minħabba l-kumplessità tar-rekwiżiti tal-prodott, li spiss jirriżultaw minn taħlita ta’ leġiżlazzjoni tal-UE u nazzjonali. Il-limitazzjonijiet tar-riżorsi u l-flussi tax-xogħol tan-networks jista’ jkollhom rwol ukoll. Madankollu, dawn jammontaw biss għal madwar 1 % tal-każijiet kollha.

Il-feedback mill-utenti huwa pożittiv. S’issa, inġabru aktar minn 3 200 feedback, permezz ta’ ċirkwiti ta’ feedback speċifiku 32 , bi klassifikazzjoni medja ta’ 4,3 stilel minn 5. Dan huwa apprezzament pożittiv meta wieħed iqis li l-utenti mhux issodisfati huma rrappreżentati żżejjed f’dan it-tip ta’ sistemi 33 .

Oqsma għal titjib u l-passi li jmiss

S’issa, il-feedback tal-utenti u l-istatistika tal-każijiet għadhom ma ntużawx, fuq bażi sistematika, bħala għodda biex tittejjeb l-offerta ġenerali tas-servizz. Il-Kummissjoni se taħdem flimkien mal-Istati Membri u mas-servizzi ta’ assistenza rilevanti biex dan jinbidel. F’termini konkreti, dan ifisser li ż-żidiet u t-tnaqqis fit-tipi ta’ talbiet u l-feedback tal-utenti se jiġu mmonitorjati kif xieraq biex jiġi żgurat li ċ-ċittadini u n-negozji jkunu jistgħu jiġu servuti bl-aħjar mod. Pereżempju, f’każ li Punt ta’ Kuntatt Uniku jħabbat wiċċu ma’ żieda fit-talbiet tal-kumpaniji tal-kostruzzjoni li ġejjin minn Stat Membru ieħor, u l-feedback jindika li tali kumpaniji ma jsibux l-informazzjoni li jkunu qed ifittxu, dan għandu jwassal għal azzjoni mill-awtoritajiet rilevanti. Dawn jistgħu jtejbu l-informazzjoni fuq il-paġni nazzjonali tal-SDG u/jew jitolbu lill-Kummissjoni ttejjeb il-paġni fuq Your Europe u/jew tieħu passi oħrajn biex tiffaċilita n-negozju fl-Istat Membru tagħhom.

Il-Kummissjoni se tibda ssegwi kif il-Faċilità għas-Sejbien tas-Servizzi tal-Assistenza tintuża biex timmira t-titjib lejn l-aktar servizzi użati u tippermetti li jiġu offruti servizzi aħjar lill-SMEs u liċ-ċittadini, aktar aċċessibbli għall-utenti transfruntieri.

Sabiex tittejjeb l-offerta ta’ servizz tal-SDG, iċ-Ċentri Europe Direct, il-Korpi Nazzjonali tal-Infurzar fit-trasport u l-Helpdesk għad-Drittijiet tal-Proprjetà Intellettwali huma mħeġġa jipparteċipaw. L-SDG isir verament punt uniku ta’ servizz ta’ għajnuna fil-livell tal-UE fis-suġġetti kollha relatati mas-Suq Uniku.

Fl-aħħar nett, il-Kummissjoni se ttejjeb is-sinjalar tal-utenti fuq il-paġni web tal-SDG għall-aktar servizzi ta’ assistenza xierqa billi tiżviluppa funzjoni ta’ tiftix unifikata għall-informazzjoni u għall-assistenza online. Jistgħu jiġu esplorati wkoll soluzzjonijiet li jaħdmu bl-IA biex dan l-għan jintlaħaq aħjar.

C.Rapportar tal-ostakli biex jittejjeb il-funzjonament tas-Suq Uniku

In-negozji u ċ-ċittadini li jesperjenzaw ostakli fis-Suq Uniku jistgħu jirrapportawhom direttament permezz ta’ Your Europe, billi jikklikkjaw fuq “irrapporta ostaklu” fil-menu ta’ fuq. Dan jiftaħ formola web biex jiġi rrapportat ostakolu li wieħed jiltaqa’ miegħu fis-Suq Uniku 34 , li l-Istati Membri mbagħad għandhom jindirizzaw. L-Għodda tal-Ostakli tas-Suq Uniku (SMOT) tiġbor u tanalizza din id-data. L-għan ewlieni tagħha huwa li tipprovdi għarfien dwar l-aktar sfidi urġenti tas-suq intern mill-perspettiva tan-negozji u taċ-ċittadini 35 , u li tikkontribwixxi għal politika aktar immexxija mid-data.

Kisbiet

Minn Diċembru 2020, l-SMOT diġà rrapportat 1 511-il ostakolu. L-ostakli rrapportati u dashboard sommarju huma disponibbli f’ħin reali għall-Istati Membri u għall-Kummissjoni u settijiet ta’ data anonimizzata jiġu ppubblikati darba fis-sena fuq il-Portal tad-Data Miftuħa tal-UE.

80 % tal-ostakli rrapportati jikkonċernaw iċ-ċittadini. Fir-rigward taċ-ċittadini, il-kwistjonijiet li huma l-aktar irrappreżentati (f’għadd ta’ każijiet) jikkonċernaw prinċipalment id-drittijiet tal-konsumatur (23 % tal-każijiet taċ-ċittadini), ix-xogħol u l-irtirar (16 %), u ċ-ċittadini u d-drittijiet tal-familja (15 %).

Graff 6. Ostakli rrapportati fuq Your Europe skont is-suġġett, iċ-ċittadini

20 % tal-ostakli rrapportati jikkonċernaw in-negozji. Fir-rigward tan-negozji, it-taxxi jirrappreżentaw l-akbar numru ta’ ostakli rrapportati (25 %), segwiti mill-forniment ta’ servizzi (24 %), il-ftuħ, it-tmexxija, l-għeluq tal-operat tan-negozju (15 %), il-finanzjament (10 %), u l-impjieg tal-ħaddiema (10 %).

Graff 7. Ostakli rrapportati fuq Your Europe skont is-suġġett, in-negozji

Oqsma għal titjib u l-passi li jmiss

Mhux dejjem ikun ċar għall-utenti ta’ Your Europe li l-SMOT ma hijiex maħsuba biex issolvi każijiet individwali. Għal dan l-użu speċifiku, l-utenti jiġu diretti lejn servizzi ta’ assistenza nazzjonali jew servizzi ġestiti mill-UE bħal SOLVIT 36 u l-Pariri tal-Ewropa Tiegħek (YEA). Huwa għalhekk meħtieġ li jiġu ċċarati l-gwida għall-utenti u s-sekwenza tal-vjaġġ tal-utent fuq dan il-punt.

Fil-futur qrib, l-għodda għandha l-għan li tiġbor id-data miġbura permezz ta’ Your Europe mal-ammont kbir ta’ data eżistenti dwar l-ostakli f’diversi sorsi 37 , inklużi YEA, SOLVIT, in-Network Enterprise Europe (EEN) 38 u ċ-Ċentri Ewropej tal-Konsumaturi (ECC). Huwa ppjanat ukoll li tiġi inkluża data pprovduta mill-organizzazzjonijiet tan-negozju tal-volontarjat, bħall-Eurochambres, u l-mekkaniżmu ta’ feedback tal-SMEs, Stħarriġ tal-UE operat mill-EEN 39 . Kif muri hawn taħt, dan jirrikjedi l-integrazzjoni intelliġenti tad-data, l-istandardizzazzjoni u l-viżwalizzazzjoni 40 .    

Graff 8. Komponenti tal-SMOT

L-isfruttament tal-potenzjal ta’ data mhux ipproċessata li tirriżulta mill-integrazzjoni ta’ diversi sorsi jirrikjedi analitika tal-ogħla livell ta’ żvilupp tekniku. Għal dak l-għan, il-Kummissjoni se tesplora l-possibbiltà li tuża teknoloġiji bħall-Intelliġenza Artifiċjali (IA), l-Apprendiment Awtomatiku u l-Ipproċessar tal-Lingwi Naturali biex tiddetermina s-sors tal-ostakli rrapportati (eż. nuqqas ta’ informazzjoni, kwistjonijiet legali, ta’ infurzar jew proċedurali eċċ.), rilevanti u liema azzjonijiet għandhom jittieħdu.

Il-Kummissjoni, flimkien mal-Istati Membri, se toħroġ ukoll gwida dwar kif l-għodod eżistenti kollha jistgħu jintużaw biex jiġu ttrattati l-ostakli rrapportati inklużi r-responsabbiltajiet tal-Kummissjoni u tal-Istati Membri fl-indirizzar tal-ostakli u r-rwol tal-SMOT. L-għodod disponibbli huma, pereżempju, azzjonijiet fil-livell reġjonali jew nazzjonali, kooperazzjoni bejn l-Istati Membri u l-Kummissjoni, proċedimenti ta’ ksur, proposti ġodda tal-Kummissjoni eċċ. Id-data tista’ tgħin ukoll biex jiġu identifikati l-aktar ostakli urġenti li għandhom jiġu diskussi u solvuti fit-Taskforce għall-Infurzar tas-Suq Uniku (SMET), forum ta’ livell għoli fejn il-Kummissjoni u l-Istati Membri jaħdmu flimkien biex jiżguraw il-funzjonament xieraq tas-Suq Uniku.

II.IMMINENTI – Proċeduri online u s-Sistema Teknika ta’ Darba Biss

L-iffaċilitar tal-amministrazzjoni għan-negozji u għaċ-ċittadini fis-Suq Uniku huwa objettiv essenzjali tal-Portal Diġitali Uniku. L-għan huwa li jiġi ssimplifikat drastikament il-vjaġġ tal-utent, biex jitnaqqsu l-burokrazija żejda u l-piżijiet amministrattivi għan-negozji u ċ-ċittadini. Il-prinċipju ta’ “darba biss” huwa mistenni wkoll li jiġġenera impatt ekonomiku pożittiv fuq il-baġits tal-Istati Membri. 41 .

Sa Diċembru 2023, l-Istati Membri għandhom:

a.Jiżguraw li meta l-proċeduri nazzjonali jkunu jistgħu jiġu aċċessati u mlestija online mill-utenti nazzjonali, l-istess ikun jgħodd ukoll għall-utenti transfruntieri b’mod mhux diskriminatorju.

b.Jipprovdu aċċess online għall-utenti nazzjonali u transfruntieri, għal 21 tip ta’ proċedura 42 għan-negozji u għaċ-ċittadini (Tabella 1).

It-tipi ta’ proċeduri kollha skont l-Anness II tar-Regolament dwar l-SDG se jiġu offruti kompletament online 43 , li jfisser li l-utenti se jkunu jistgħu jidentifikaw u jawtentikaw, jimlew l-applikazzjoni u jiffirmaw online, jiġu nnotifikati b’mod elettroniku dwar it-tlestija tal-proċedura u jirċievu l-output rilevanti f’format diġitali.

GĦAN-NEGOZJI	GĦAĊ-ĊITTADINI
Innotifika l-attività tan-negozju u l-bidliet u t-terminazzjoni sussegwenti 44	Irreġistra bidla tal-indirizz
Itlob permess għall-attività tan-negozju	Itlob prova ta’ residenza
Irreġistra bħala impjegatur għall-pensjoni u għas-sigurtà soċjali	Itlob ċertifikat tat-twelid
Irreġistra l-impjegati għall-pensjoni u s-sigurtà soċjali	Itlob determinazzjoni tal-leġiżlazzjoni dwar is-sigurtà soċjali
Innotifika t-tmiem tal-kuntratt tal-impjegati għas-sigurtà soċjali	Innotifika bidla fiċ-ċirkostanzi personali għal finijiet ta’ sigurtà soċjali
Ħallas kontribuzzjoni soċjali għall-impjegati	Applikazzjoni għall-Karta Ewropea tal-Assigurazzjoni tas-Saħħa (EHIC)
Iddikjara t-taxxa korporattiva	Itlob pensjoni
	Itlob informazzjoni dwar id-drittijiet tal-pensjoni miksuba
	Iddikjara t-taxxa fuq l-introjtu
	Irreġistra vetturi bil-mutur
	Ikseb stikers tal-pedaġġ tal-emissjonijiet tal-vetturi bil-mutur
	Irreġistra f’università
	Applika għall-finanzjament tal-istudju
	Itlob ir-rikonoxximent tad-diplomi akkademiċi

Tabella 1. Il-21 tip ta’ proċedura li għandhom jiġu diġitalizzati għan-negozji u għaċ-ċittadini

Barra minn hekk, sa Diċembru 2023, il-Kummissjoni se tuża s-Servizzi Komuni tal-OOTS (jiġifieri, id-Direttorju tas-Servizzi tad-Data, is-Sensar tal-evidenza u r-Repożitorju semantiku). L-Istati Membri se jiżguraw il-konnessjoni teknika bejn il-portali ta’ proċedura tagħhom mas-Servizzi Komuni bl-għan li jippermettu l-iskambju transfruntier awtomatizzat u sigur ta’ evidenza - fil-forma ta’ dokumenti jew data strutturata - meħtieġ biex jitlestew dawn il-proċeduri.

Għal proċedura speċifika skont l-SDG, utent mhux se jibqa’ jiffaċċja proċeduri differenti fl-Istati Membri, bi kwistjonijiet relatati ma’ dokumenti maħruġa fi Stati Membri differenti jew siti web differenti biex jitlestew dawn il-proċeduri. Meta jibda l-vjaġġ tiegħu minn Your Europe, l-utent se jkun jista’ jawtentika għal kwalunkwe portal tal-proċedura online, biex jidentifika d-dokumenti meħtieġa aktar malajr u jagħti bidu għall-kondiviżjoni ta’ dokumenti u data bejn l-awtoritajiet kompetenti. L-utent mhux se jkollu aktar bżonn ifittex, jikseb u jniżżel/ittella’ dokumenti. Bis-saħħa tal-OOTS, l-SDG se jnaqqas il-kost tal-mobbiltà fis-Suq Uniku, il-frizzjonijiet amministrattivi u l-ostakli filwaqt li ma jimponi l-ebda obbligu addizzjonali fuq iċ-ċittadini u n-negozji.

Is-simplifikazzjoni tista’ tintwera u tiġi spjegata kif ġej:

Kisbiet

L-informazzjoni preliminari miġbura fil-kuntest tar-Rapport dwar il-Parametri Referenzjarji tal-Gvern Elettroniku 45 tindika l-progress sostanzjali fid-diġitalizzazzjoni tal-proċeduri koperti mir-Regolament dwar l-SDG: filwaqt li 81 % tal-proċeduri tal-EU27+ jistgħu jitlestew online miċ-ċittadini u 46 % mill-utenti transfruntieri, il-proċeduri relatati mal-SDG jilħqu medja ta’ 84 % u 47 %. Il-Kummissjoni qed taħdem mal-Istati Membri biex tindirizza l-isfidi li seħħew matul il-ħidma fuq id-diġitalizzazzjoni tal-proċeduri rilevanti.

Fir-rigward tal-iskambju awtomatizzat tal-evidenza, il-Kummissjoni adottat l-ispeċifikazzjonijiet tekniċi u operazzjonali tal-OOTS 46 u stabbiliet sitt gruppi biex iwettqu l-kompiti ewlenin li ġejjin: l-immappjar tal-evidenza, id-disinn tekniku, is-sigurtà, l-istandardizzazzjoni, l-ittestjar u l-governanza operazzjonali. Il-Kummissjoni qed tiżviluppa s-Servizzi Komuni tal-OOTS u qed tappoġġa lill-Istati Membri dwar kif jiżguraw il-konnessjoni teknika bejn il-portali ta’ proċedura tagħhom mas-Servizzi Komuni. L-avvenimenti fuq skala kbira, li l-Kummissjoni qed torganizza, (imsejħa Projectathons) 47 , urew il-prontezza funzjonali għolja tas-Servizzi Komuni tal-OOTS żviluppati mill-Kummissjoni.

Sabiex tiġi żgurata l-interoperabbiltà bejn l-OOTS u l-Portafoll tal-Identifikazzjoni Diġitali tal-UE (EUDI), il-Kummissjoni stabbiliet ukoll grupp b’esperti mill-Istati Membri biex jivvaluta tliet tipi ta’ sinerġiji: dwar l-esperjenza tal-utent, dwar l-investimenti u dwar is-semantika. Ladarba l-Portafoll tal-EUDI jsir operazzjonali, l-utenti se jibbenefikaw minn għażliet proċedurali addizzjonali. Pereżempju, l-utenti se jkunu jistgħu jiżvelaw l-identità u d-dokumenti elettroniċi tagħhom mill-Portafoll tal-EUDI tagħhom lill-portali tal-proċeduri jew jużaw l-OOTS biex jiksbu dokumenti elettroniċi direttament mis-sors awtentiku tal-informazzjoni 48 . L-evidenza miksuba permezz tal-OOTS se tkun tista’ titniżżel ukoll.

Fl-aħħar nett, aktar utenti se jkunu jistgħu jibbenefikaw mill-SDG (inkluż l-OOTS) u mis-simplifikazzjonijiet li jġibu magħhom, peress li l-Kummissjoni pproponiet li tespandi l-kamp ta’ applikazzjoni tagħhom għal każijiet ta’ użu ġdid bħala parti minn inizjattivi leġiżlattivi ġodda. Xi wħud minnhom se jikkonċernaw ħafna ċittadini u negozji, pereżempju fil-kuntest tas-servizzi ta’ kiri ta’ akkomodazzjoni għal żmien qasir u l-liċenzji tas-sewqan 49 . Oħrajn se jkunu relatati mal-għoti ta’ permessi għal proġetti strateġiċi li huma essenzjali għall-Pjan Industrijali Ekoloġiku, bħal fl-Att dwar l-Industrija b’Emissjonijiet Żero Netti u l-Att dwar il-Materja Prima Kritika.

Il-passi li jmiss

-L-ilħuq tal-istadju importanti ta’ Diċembru 2023

Il-Kummissjoni se tagħmel disponibbli s-Servizzi Komuni tal-OOTS, inklużi l-interfaċċi li jippermettu lill-koordinaturi nazzjonali, lill-awtoritajiet kompetenti, lill-pjattaformi intermedjarji, u lill-Kummissjoni, jimmaniġġaw l-informazzjoni li tinsab f’dawn is-servizzi. Il-Kummissjoni se tiffinalizza r-repożitorju komuni tal-IMI għall-eċċezzjonijiet fil-każ tal-proċeduri online u l-fluss tax-xogħol tal-IMI għall-verifika tal-awtentiċità tal-evidenza. Dan se jgħin lill-Istati Membri biex ilestu r-reġistrazzjoni tal-awtoritajiet fl-IMI 50 .

L-Istati Membri għandhom jiżguraw proċess ta’ onboarding mingħajr xkiel biex jippermettu l-konnessjoni bejn il-portali tal-proċedura u s-Servizzi Komuni. Peress li l-OOTS tibbaża fuq l-awtentikazzjoni tal-eIDAS regolata mir-Regolament eIDAS, l-Istati Membri jridu jinnotifikaw fil-ħin l-iskemi ta’ identifikazzjoni u awtentikazzjoni elettroniċi kemm għall-persuni fiżiċi kif ukoll għal dawk ġuridiċi.

-Il-massimizzazzjoni tal-benefiċċji ta’ proċeduri online “ta’ darba biss”

Il-Kummissjoni se tesplora l-opportunitajiet biex tespandi l-ambitu tal-SDG għal proċeduri addizzjonali, pereżempju, fl-oqsma tal-ekonomija soċjali u l-koordinazzjoni tas-sigurtà soċjali. Dan l-isforz jista’ jiggwadanja minn eżerċizzju ta’ proċeduri ta’ xenarju aktar sistematiku, immirat b’mod speċjali lejn dawk li jgħinu lill-kumpaniji u liċ-ċittadini jagħmlu negozju, jiċċaqalqu u jaħdmu f’pajjiż ieħor tal-UE.

Barra minn hekk, l-Istati Membri u l-Kummissjoni għandhom jippromwovu l-allinjament progressiv u s-simplifikazzjoni tal-proċeduri amministrattivi skont l-SDG madwar l-UE kollha, pereżempju permezz ta’ Eżerċizzji ta’ Apprendiment Reċiproku, u b’hekk jikkontribwixxu għall-objettiv tat-tnaqqis tar-rekwiżiti ta’ rapportar b’25 %. 51 . L-awtoritajiet pubbliċi bi proċessi amministrattivi aktar kumplessi jistgħu jitgħallmu mill-awtoritajiet li jużaw oħrajn aktar sempliċi u jippromwovu aktar is-simplifikazzjoni u l-armonizzazzjoni amministrattiva.

-Il-massimizzazzjoni tal-benefiċċji tal-OOTS

Bħala l-ewwel spazju tad-data transfruntier u transsettorjali madwar l-UE kollha bejn il-gvernijiet li jgħaqqad l-awtoritajiet pubbliċi li jaġixxu bħala sorsi awtentiċi ta’ informazzjoni affidabbli, l-OOTS hija element ewlieni tal-ispazju komuni emerġenti tad-data tal-UE. Il-Kummissjoni se tiżgura li l-ispazju tad-data tal-OOTS jiġi integrat fl-ispazji komuni Ewropej tad-data għall-amministrazzjonijiet pubbliċi  52 u li jkun interoperabbli ma’ spazji tad-data settorjali oħra bħall-ispazju tad-data tal-UE dwar is-saħħa. 53 . Dan se jiżgura aċċess transfruntier għad-data lil hinn minn settur speċifiku.

Il-Kummissjoni se tkompli tinvestiga l-konnessjonijiet kollha ta’ benefiċċju bejn l-OOTS u inizjattivi jew sistemi oħrajn tal-UE (eż. l-Iskambju Elettroniku ta’ Informazzjoni dwar is-Sigurtà Soċjali (EESSI)). Qed teżamina wkoll kif l-OOTS tista’ tappoġġa lill-utenti, u speċjalment lill-SMEs, fis-simplifikazzjoni tal-obbligi ta’ rapportar tagħhom, pereżempju fil-każ ta’ rapportar multiplu.

Għall-evoluzzjoni futura tal-OOTS, għandhom jiġu investigati l-benefiċċji potenzjali minn inizjattivi bħall-Infrastruttura Ewropea tal-Blockchain għas-Servizzi mnedija fl-ambitu tas-Sħubija Ewropea tal-Blockchain bl-għan li s-servizzi pubbliċi jiġu ttrasformati fl-era tal-web3.

KONKLUŻJONI

L-SDG huwa strument ewlieni tal-gvern elettroniku biex jiżgura Suq Uniku li jaħdem aħjar u aktar kompetittiv. Dan itejjeb b’mod radikali l-ambjent tan-negozju Ewropew u għandu rwol fundamentali fl-appoġġ tal-SMEs. L-SDG qed jiġi implimentat bis-sħiħ u qed jappoġġa dejjem aktar lin-negozji u liċ-ċittadini madwar l-Ewropa kollha.

L-Istati Membri huma mħeġġa jinkludu l-SDG fil-pjanijiet direzzjonali nazzjonali tagħhom li għandhom jiġu adottati sad-9 ta’ Ottubru 2023, biex jilħqu l-miri tad-Deċennju Diġitali 2030 u jrawmu t-trasformazzjoni diġitali tal-UE. 54 .

Il-Kummissjoni qed taħtaf l-opportunità ta’ dan ir-rapport biex tilħaq lir-rappreżentanti tal-SMEs, in-networks u l-partijiet ikkonċernati, u tiġbor il-feedback tagħhom fi sforz biex l-istrument jittejjeb b’mod kostanti.

(1)

Stabbilit bir-Regolament (UE) 2018/1724.

(2)

  Your Europe (europa.eu) .

(3)

Flimkien ma’ inizjattivi tal-UE relevanti oħrajn, bħall- Portal Ewropew tal-Ġustizzja Elettronika (europa.eu) , id-diġitalizzazzjoni tad-dritt tal-UE dwar il-kumpaniji (Direttiva (UE) 2019/1151 u COM(2023) 177 final), jew is- Sistema ta’ Interkonnessjoni tar-Reġistri Kummerċjali (BRIS) , li tgħaqqad ir-reġistri tan-negozji tal-Istati Membri kollha.

(4)

Studju stima li l-kostijiet tan-negozji transfruntiera huma 50 % ogħla meta mqabbla man-negozji domestiċi, u li l-kostijiet addizzjonali għan-negozji transfruntiera huma kkawżati b’mod partikolari mill-ġbir ta’ informazzjoni (l-aktar konsulenza, EUR 30 miljun), is-sottomissjoni ta’ dokumenti (EUR 22 miljun, l-aktar il-kostijiet tal-ivvjaġġar jekk tkun meħtieġa s-sottomissjoni personalment, iċ-ċertifikazzjoni (EUR 11 miljun) u l-ġbir ta’ data u dokumenti (EUR 7 miljun); dawn il-kostijiet jistgħu jittaffew permezz ta’ aktar diġitalizzazzjoni; ara r-Reġistru tad-Dokumenti tal-Kummissjoni - SWD(2017)213 (europa.eu) .

(5)

F’konformità mar-Riżoluzzjoni tal-Parlament Ewropew tat-18 ta’ April 2023 (2022/2036(INI)).

(6)

Id-Deċiżjoni (UE) 2022/2481.

(7)

Il-Punti ta’ Kuntatt Uniku, stabbiliti bid-Direttiva 2006/123/KE, jipprovdu informazzjoni online, servizzi ta’ assistenza u aċċess għal proċeduri rilevanti għall-forniment ta’ servizzi, fl-ambitu tal-SDG. L-azzjonijiet nazzjonali u tal-Kummissjoni tejbu b’mod sinifikanti d-disponibbiltà u l-kwalità tal-informazzjoni.

(8)

 L-Artikolu 36 tar-Regolament dwar l-SDG jipprevedi l-pubblikazzjoni ta’ rapport ta’ implimentazzjoni kull sentejn.

(9)

Skont id-Direttiva (UE) 2019/1151, l-Artikolu 13f l-informazzjoni dwar l-istabbiliment ta’ kumpaniji u fergħat u r-reġistrazzjoni ta’ dawn mar-reġistri tan-negozju hija meħtieġa li tkun disponibbli fuq portali ta’ reġistrazzjoni jew websajts li huma aċċessibbli permezz tas-Single Digital Gateway.

(10)

Baġit tal-Kummissjoni jgħin lill-Istati Membri biex jittraduċi r-regoli nazzjonali, normalment bl-Ingliż.

(11)

 L-Istati Membri jinnotifikaw lill-Kummissjoni dwar is-siti web tagħhom li fihom kontenut speċifikat fir-regolament dwar l-SDG.

(12)

 Inklużi l-paġni web tal-UE u dawk nazzjonali.

(13)

  Europa Analytics – what it does and how | L-Unjoni Ewropea .

(14)

L-SMEs jiksbu informazzjoni mingħajr ħlas. L-istatistika tal-viżitaturi tal-Kummissjoni turi kemm iqattgħu ħin il-viżitaturi fuq kull paġna. Fl-2022, il-viżitaturi qattgħu aktar minn 120 000 siegħa fuq il-paġni web ta’ Your Europe għall-SMEs biss. Skont l-Eurostat, il-parir legali jiswa medja ta’ EUR 23,9 fis-siegħa fl-UE (għal Q3 tal-2022).

(15)

Ir-riżultati tat-tiftix jistgħu jiġu ffiltrati skont il-livell ta’ kompetenza, il-lingwa, il-post u t-tip ta’ kontenut.

(16)

 L-Anness I jkopri informazzjoni dwar l-ivvjaġġar, ix-xogħol u l-irtirar, il-vetturi, ir-residenza, l-edukazzjoni u t-taħriġ prattiku fi Stati Membri oħrajn, il-kura tas-saħħa, id-drittijiet taċ-ċittadini u tal-familja, id-drittijiet tal-konsumatur, il-protezzjoni tad-data, il-bidu, it-tmexxija u l-għeluq tan-negozji, ir-regoli dwar l-impjiegi, it-taxxi, il-merkanzija u r-rekwiżiti tal-prodotti, il-finanzjament tan-negozju, il-kuntratti pubbliċi u s-saħħa u s-sikurezza fuq il-post tax-xogħol.

(17)

Minkejja livell għoli ta’ kopertura, il-lakuni li fadal wasslu lill-Kummissjoni biex tibni sett ta’ data aktar komplut ta’ informazzjoni. L-Istati Membri mhux dejjem jinterpretaw ir-rekwiżiti tar-regolament bl-istess mod u huma meħtieġa riżorsi umani u finanzjarji sinifikanti. Dan jista’ jaffettwa r-rati ta’ kopertura.

(18)

 Sabiex tiġi evitata d-duplikazzjoni tal-informazzjoni, il-koordinaturi nazzjonali tal-SDG jridu jinnotifikaw il-paġni web rilevanti, f’każ biss li fih ir-regoli nazzjonali jinbidlu minn dawk lokali.

(19)

 Fuq bażi annwali jsir stħarriġ dwar is-sodisfazzjon fuq Your Europe.

(20)

Oqsma ta’ kwistjonijiet A, B, L u M.

(21)

90 % tar-rispondenti li raw il-filmat tal-kampanja setgħu jidentifikaw il-logo ta’ Your Europe b’mod korrett. Kampanji ta’ reklamar addizzjonali ta’ Twitter, Facebook, LinkedIn u Google ġġeneraw aktar minn 3 miljun impressjoni, aktar minn miljun interazzjoni, 14-il elf klikk tal-links, u aktar minn 244 000 viżwalizzazzjoni tal-filmat fix-xahar. Livell għoli ta’ viżibbiltà wassal f’għadd dejjem akbar ta’ viżitaturi.

(22)

Il-bażi tad-data dwar “It-Taxxi fl-Ewropa” hija għodda ta’ informazzjoni online tal-Kummissjoni. Din fiha informazzjoni dwar madwar 650 taxxa, kif ipprovduti mill-Istati Membri tal-UE: Taxes in Europe Database v3 (europa.eu) .

(23)

Dan jista’ jinkludi crawler (software li jindividwa l-kontenut tas-siti web sabiex dawk is-siti web ikunu jistgħu jidhru fir-riżultati tat-tiftix) biex tiġi identifikata l-eżistenza tal-informazzjoni meħtieġa, it-traduzzjonijiet, il-logo ta’ Your Europe, eċċ.

(24)

Dan jista’ jseħħ meta l-attivitajiet transfruntieri jkunu speċifiċi wisq għal spjegazzjonijiet standard fuq il-paġni web jew, minħabba diversi diffikultajiet fl-interazzjoni mal-awtoritajiet.

(25)

 Skont l-Anness III tar-Regolament dwar l-SDG.

(26)

  Faċilità għas-Sejbien tas-Servizzi tal-Assistenza (europa.eu) .

(27)

  L-Artikolu 7(3) tar-Regolament dwar l-SDG . Kemm is-servizzi fil-livell nazzjonali kif ukoll f’dak tal-UE jistgħu jagħżlu l-SDG.

(28)

Fil-livell nazzjonali, ingħaqad ukoll l-Uffiċċju Ġermaniż għat-trattament ugwali tal-ħaddiema tal-UE (ETO). Il-korp ta’ Konċiljazzjoni Ġermaniż għat-trasport pubbliku beda l-proċess.

(29)

Fl-2022, YEA u SOLVIT indirizzaw aktar minn 28 000 każ (minn dawn 20 000 kienu eliġibbli) u 2 200 każ rispettivament. SOLVIT solva 86 % tal-każijiet.

(30)

Din iċ-ċifra tinkludi 50 000 ilment minn qabel, li huma taħditiet diretti bejn il-konsumatur u n-negozjant permezz tal-pjattaforma mingħajr l-involviment ta’ korp għas-Soluzzjoni Alternattiva għat-Tilwim.

(31)

Dawn iċ-ċifri huma bbażati fuq servizzi ta’ assistenza f’21 Stat Membru.

(32)

Ara l-Artikolu 25 tar-Regolament dwar l-SDG u r-Regolament ta’ Implimentazzjoni (UE) 2020/1121. Il-fornituri tas-servizzi jridu jistiednu lill-utenti jagħtu feedback dwar id-disponibbiltà u l-kwalità tas-servizz wara li jużawh.

(33)

Din il-predispożizzjoni ta’ utenti inqas sodisfatti li jkunu aktar inklinati li jużaw funzjonijiet ta’ feedback hija sejba konsistenti tal-feedback miġbur matul ħafna snin fuq il-portal Your Europe.

(34)

Kull każ jinħażen b’mod anonimu fl-għodda ta’ ġestjoni tal-SDG. Il-koordinaturi nazzjonali u l-amministraturi tal-Kummissjoni jistgħu jaċċessaw statistika viżwalizzata f’dashboard.

(35)

L-Artikolu 1c u l-Artikolu 26 tar-Regolament dwar l-SDG.

(36)

SOLVIT huwa servizz online mingħajr ħlas li għandu l-għan li jipprovdi soluzzjonijiet liċ-ċittadini u lin-negozji li d-drittijiet tagħhom ikunu nkisru mill-awtoritajiet pubbliċi.

(37)

  Feedback dwar l-ostakli (europa.eu) .

(38)

Il-konsultazzjonijiet mal-EEN irriżultaw fl-iżvilupp ta’ żewġ formoli ta’ dħul u dashboards distinti għaċ-ċittadini u n-negozji, kif ukoll modulu ġdid għad-dħul ta’ data minn organizzazzjonijiet tan-negozju esterni. Dawn il-bidliet se jsiru viżibbli fid-data fi tmiem l-2023. Il-Kummissjoni se tinvesti wkoll fl-iżvilupp ulterjuri tad-dashboard u tar-rekwiżiti ta’ rapportar, eż. fir-Rapport Annwali dwar is-Suq Uniku.

(39)

L-aġenziji ta’ appoġġ għall-SMEs jirreġistraw każijiet irrapportati lilhom mill-SMEs fl-operat tagħhom ta’ kuljum fis-sistema. Il-mekkaniżmu ta’ feedback tal-SMEs u l-SMOT jaqsmu għan komuni biex jisfruttaw aħjar il-feedback riċevut.

(40)

Il-komponenti teknoloġiċi tal-SMOT huma magħmula minn formola tad-dħul tad-data fuq il-paġni ta’ Your Europe u dawk nazzjonali tal-SDG, sistema ta’ ġestjoni tal-każijiet u dashboard tal-istatistika.

(41)

 Ara l-Istudju dwar il-Gvern elettroniku u t-Tnaqqis tal-Piż Amministrattiv , li jistma li Stat Membru (id-Danimarka bħala każ ta’ użu) jista’ jiffranka sa EUR 100 miljun fis-sena billi jimplimenta l-prinċipju ta’ darba biss permezz ta’ programm speċifiku.

(42)

L-Anness II tar-Regolament dwar l-SDG jelenka t-tipi ta’ proċeduri koperti mill-SDG.

(43)

F’konformità mal-Artikolu 6(4) tar-Regolament dwar l-SDG, sa Diċembru 2023, il-Kummissjoni u l-Istati Membri għandhom jiżguraw li s-Sistema ta’ Informazzjoni tas-Suq Intern (IMI) tkun lesta biex tintuża mill-Istati Membri biex jinnotifikaw, f’repożitorju komuni, il-proċeduri li jistgħu jirrikjedu preżenza fiżika.

(44)

Kif speċifikat fl-Anness II tar-Regolament SDG, il-proċeduri li ġejjin huma esklużi: proċeduri ta’ insolvenza jew ta’ likwidazzjoni, ir-reġistrazzjoni inizjali ta’ attività kummerċjali mar-reġistru tan-negozju u proċeduri li jikkonċernaw il-kostituzzjoni ta’ jew kwalunkwe preżentazzjoni sussegwenti minn kumpaniji jew ditti fis-sens tat-tieni paragrafu tal-Artikolu 54 TFUE.

(45)

Il-Kummissjoni Ewropea, eGovernment Benchmark 2022 – Insight Report, p. 32.

(46)

Ir-Regolament ta’ Implimentazzjoni tal-Kummissjoni (UE) 2022/1463 tal-5 ta’ Awwissu 2022.

(47)

Li jikkonsistu f’testijiet tal-interoperabbiltà u tal-konformità f’ambjent strutturat, biex jappoġġaw l-iżvilupp u l-użu tal-OOTS.

(48)

Jistgħu jiġu previsti sinerġiji oħrajn bħall-użu mill-ġdid tas-servizzi tal-OOTS mill-EUDI.

(49)

Proposta għal Direttiva li temenda d-Direttiva (UE) 2015/413, li tiffaċilita l-iskambju transkonfinali ta’ informazzjoni dwar reati tat-traffiku relatati mas-sikurezza fit-toroq. COM(2023) 126

(50)

F’konformità mal-Artikoli 6(4) u 15 tar-Regolament dwar l-SDG.

(51)

Kif imħabbar mill-President von der Leyen fil-15 ta’ Marzu 2023 fil-Parlament Ewropew.

(52)

Spazji oħrajn tad-data huma pereżempju l-ispazju tad-data legali tal-amministrazzjonijiet pubbliċi, l-ispazju tad-data dwar l-akkwist pubbliku (ara 2023/C 98 I/01) u l-ispazju tad-data tas-sigurtà tal-amministrazzjonijiet pubbliċi għall-innovazzjoni (SWD/2022/45 final).

(53)

COM/2022/197 final.

(54)

  Id-Deċennju Diġitali tal-Ewropa: miri diġitali għall-2030 (europa.eu) .