IL-KUMMISSJONI EWROPEA

Brussell, 25.7.2023

COM(2023) 456 final

RAPPORT TAL-KUMMISSJONI LILL-PARLAMENT EWROPEW U LILL-KUNSILL

dwar l-applikazzjoni tal-kriterji tal-allokazzjoni baġitarja u dwar l-impatt tat-trasferimenti baġitarji fuq l-effettività tal-Iskema tal-UE għall-Frott, il-Ħaxix u l-Ħalib għall-Iskejjel

WERREJ

1.    Introduzzjoni    

2.    Kriterji tal-allokazzjoni    

2.1.    Sfond legali    

2.2.    Metodoloġija għall-iffissar tal-allokazzjonijiet indikattivi tal-għajnuna tal-Unjoni għal kull sena skolastika wara l-1 ta’ Awwissu 2023    

2.2.1.    Sorsi tad-data    

2.2.2.    Kalkoli    

2.3.    Ir-riżultat tal-applikazzjoni tal-kriterji tal-allokazzjoni    

3.    L-impatt tat-trasferimenti    

3.1.    Sfond legali    

3.2.    Trasferimenti li saru matul il-perjodu ta’ implimentazzjoni 2017-2023    

4.    Konklużjonijiet    

1.Introduzzjoni

Skont l-Artikolu 225(e) u (f) tar-Regolament (UE) Nru 1308/2013 tal-Parlament Ewropew u tal-Kunsill 1 , dan ir-rapport jissodisfa tnejn mill-obbligi ta’ rapportar relatati tal-Kummissjoni lill-Parlament Ewropew u lill-Kunsill dwar l-iskema tal-UE għall-frott, il-ħaxix u l-ħalib għall-iskejjel (“l-iskema tal-iskejjel tal-UE”).

L-ewwel obbligu jikkonċerna l-applikazzjoni tal-kriterji ta’ allokazzjoni msemmija fl-Artikolu 23a(2), fejn jiġi stabbilit sett ta’ kriterji oġġettivi sabiex jiġi allokat l-ammont ġenerali ta’ għajnuna tal-UE għall-iskema tal-iskejjel tal-UE fost l-Istati Membri.

It-tieni obbligu jikkonċerna l-impatt tat-trasferimenti msemmija fl-Artikolu 23a(4) dwar l-effettività tal-iskema tal-iskejjel tal-UE fir-rigward tad-distribuzzjoni tal-frott u l-ħaxix għall-iskejjel u tal-ħalib għall-iskejjel. Dawn id-dispożizzjonijiet jippermettu lill-Istati Membri jittrasferixxu darba għal kull sena skolastika sa 20 % ta’ waħda jew l-oħra mill-allokazzjonijiet indikattivi tagħhom, u dan il-perċentwal jista’ jiżdied sa 25 % f’każijiet debitament ġustifikati 2 .

2.Kriterji tal-allokazzjoni

2.1.Sfond legali

Skont l-Artikolu 23a(1) tar-Regolament (UE) Nru 1308/2013, l-ammont globali tal-għajnuna tal-UE għall-iskema tal-iskejjel tal-UE huwa stabbilit għal EUR 220 804 135 għal kull sena skolastika, li minnhom EUR 130 608 466 huma għall-frott u l-ħaxix u EUR 90 195 669 għall-ħalib.

L-ammonti huma allokati fost l-Istati Membri abbażi tal-kriterji oġġettivi li ġejjin.

a)In-numru ta’ tfal ta’ età bejn 6 u 10 snin fl-Istat Membru kkonċernat. Peress li huwa meqjus kruċjali li jiżdied b’mod sostenibbli s-sehem ta’ dawk il-prodotti fid-dieti tat-tfal fl-istadju meta jkunu qed jissawru d-drawwiet tal-ikel tagħhom. B’hekk dan jikkontribwixxi biex jintlaħqu l-għanijiet tal-politika agrikola komuni (PAK) fl-istabbilizzazzjoni tas-swieq u fl-iżgurar tad-disponibbiltà kemm tal-provvisti attwali kif ukoll ta’ dawk futuri (ara l-Premessa 24 tar-Regolament (UE) Nru 1308/2013).

b)Il-grad ta’ żvilupp reġjonali fl-Istat Membru kkonċernat biex jiġi żgurat li livell ogħla ta’ għajnuna tal-UE jiġi allokat għal reġjuni anqas żviluppati u għall-Gżejjer Minuri tal-Eġew f’konformità mal-Artikolu 1(2) tar-Regolament (UE) Nru 229/2013.

c)L-użu storiku tal-għajnuna tal-UE għall-provvista ta’ ħalib u prodotti tal-ħalib lit-tfal minbarra l-kriterji msemmija fil-punti (a) u (b).

Abbażi ta’ dawk il-kriterji oġġettivi, il-Kunsill stabbilixxa l-allokazzjonijiet indikattivi tal-għajnuna tal-UE għal kull Stat Membru mill-1 ta’ Awwissu 2017 sal-31 ta’ Lulju 2023 fir-Regolament tal-Kunsill (UE) Nru 1370/2013 3 .

It-tielet subparagrafu tal-Artikolu 5(4) ta’ dak ir-Regolament jipprevedi li, mill-1 ta’ Awwissu 2023, il-Kummissjoni trid tistabbilixxi l-allokazzjonijiet indikattivi tal-għajnuna tal-UE skont is-sena skolastika għal kull Stat Membru. L-għajnuna tal-UE trid issegwi l-istess kriterji ta’ allokazzjoni u tqis l-ammont minimu li l-Istati Membri huma intitolati għalih (EUR 290 000 għall-frott u l-ħaxix għall-iskejjel u EUR 193 000 għall-ħalib għall-iskejjel) sabiex l-Istati Membri b’daqs demografiku limitat ikunu jistgħu jimplimentaw skema kosteffettiva.

Abbażi ta’ dan, il-Kummissjoni stabbiliet l-allokazzjonijiet indikattivi għall-perjodu ta’ 6 snin li jibda mill-1 ta’ Awwissu 2023 sal-31 ta’ Lulju 2029. Dan ikopri l-perjodu ta’ implimentazzjoni stabbilit fl-istrateġiji li l-Istati Membri jridu jissottomettu lill-Kummissjoni sat-30 ta’ April 2023, f’konformità mal-Artikolu 2(3) tar-Regolament Delegat tal-Kummissjoni (UE) 2017/40 4 .

2.2.Metodoloġija għall-iffissar tal-allokazzjonijiet indikattivi tal-għajnuna tal-Unjoni għal kull sena skolastika wara l-1 ta’ Awwissu 2023

2.2.1.Sorsi tad-data

a)L-għadd ta’ tfal ta’ età bejn 6 u 10 snin ittieħed mill-aħħar data tal-Eurostat “Popolazzjoni fl-1 ta’ Jannar skont l-età u s-sess”. L-għadd totali ta’ tfal ta’ età ta’ bejn 6 u 10 snin fl-EU-27 żdied bi 2 % fl-2021 meta mqabbel mal-2012. L-akbar żidiet (fil-medda ta’ +20 %) ġew irreġistrati fis-Slovenja, fl-Iżvezja, f’Malta, fil-Lussemburgu u fir-Repubblika Ċeka. Iċ-ċensiment naqas bi 13 % fil-Portugall, bejn 5 u 8 % fir-Rumanija, fin-Netherlands, fid-Danimarka, fl-Italja u fl-Ungerija, u b’4 % kemm fil-Greċja kif ukoll fil-Kroazja.

b)Reġjuni anqas żviluppati: il-kategoriji huma definiti fil-“Qafas leġiżlattiv tal-politika ta’ koeżjoni tal-2021-2027” 5 . Dawn huma r-reġjuni fil-livell tan-NUTS2 li fihom il-PDG/capita (skont il-PPS - l-Istandard tal-Kapaċità tal-Akkwist - PPS) huwa inqas minn 75 % tal-medja tal-EU-27. Il-Gżejjer Minuri tal-Eġew huma ddefiniti fl-Artikolu 1 tar-Regolament (UE) 229/2013 6 bħala l-gżejjer kollha fil-Baħar Eġew ħlief il-gżejjer ta’ Kreta u Evia (dawn jikkorrispondu għar-reġjun tan-NUTS2 indikat bħala Greċja 42, Notio Aigaio u jitqiesu bħala r-reġjuni l-oħra anqas żviluppati).

c)L-użu storiku ttieħed mid-dikjarazzjonijiet tal-infiq ta’ kull xahar tal-Istati Membri mibgħuta lill-Kummissjoni skont ir-Regolament ta’ Implimentazzjoni tal-Kummissjoni (UE) Nru 908/2014 7 (il-partiti tal-baġit 05 02 18 u 08 02 03 04). Iċ-ċifri użati huma l-medja tal-infiq tal-UE minn kull Stat Membru għall-ħalib għall-iskejjel fl-aħħar 4 snin skolastiċi kompluti: 2017/2018, 2018/2019, 2019/2020 u 2020/2021. Meta mqabbel mal-perjodu 2012 sal-2014, ġiet osservata żieda notevoli fl-infiq (aktar minn 100 %) għall-Bulgarija, għar-Repubblika Ċeka, għall-Irlanda, għall-Italja, għal-Lussemburgu, għal Malta, u għas-Slovenja. Is-Slovakkja żiedet l-infiq b’71 %. Madankollu, l-użu naqas drastikament fi Franza (-96 %) u l-Belġju (-54 %). Ir-rata totali tal-użu storiku fil-livell tal-UE turi żieda ta’3 % 8 .

2.2.2.Kalkoli

Għall-frott u l-ħaxix għall-iskejjel, l-ammont totali tal-għajnuna tal-UE (EUR 130 608 466) kien allokat inizjalment lill-Istati Membri, b’mod proporzjonali mal-kriterju a) tan-numru ta’ tfal ta’ età bejn 6 u 10 snin.

Sussegwentement, ġie kkalkolat bonus ta’ massimu ta’ 20 % b’mod proporzjonali għas-sehem ta’ tfal li għandhom bejn 6 u 10 snin fir-reġjuni anqas żviluppati/fil-Gżejjer Minuri tal-Eġew f’kull Stat Membru (il-kriterju b). Dan l-approċċ jirriżulta f’ponderazzjoni ta’ kważi 5 % għal dan il-kriterju (bonus ta’ EUR 7 028 176 fuq total ta’ EUR 137 636 642).

L-allokazzjonijiet indikattivi tal-għajnuna tal-UE li jirriżultaw mis-somma tal-ammonti kkalkolati abbażi tal-kriterji a) u b) tnaqqsu b’mod proporzjonali biex jaqblu mal-ammont totali tal-għajnuna tal-UE ta’ EUR 130 608 466.

L-allokazzjonijiet indikattivi tal-għajnuna tal-UE għal kull Stat Membru ġew aġġustati wkoll biex jikkonformaw mar-rekwiżit li kull Stat Membru għandu jirċievi mill-inqas EUR 290 000. Ċipru, il-Lussemburgu u Malta rċivew ammont addizzjonali. L-allokazzjonijiet indikattivi tal-għajnuna tal-UE għall-Istati Membri l-oħra kollha tnaqqsu b’mod proporzjonali biex jiġi rrispettat l-ammont totali.

Fir-rigward tal-ħalib għall-iskejjel, abbażi tal-kriterju a), 60 % tal-ammont totali tal-għajnuna tal-UE ġie allokat lill-Istati Membri b’mod proporzjonali man-numru tagħhom ta’ tfal ta’ età bejn 6 u 10 snin. Abbażi tal-kriterju b), 5 % tal-ammont totali tal-għajnuna tal-UE għall-ħalib għall-iskejjel ġie allokat lill-Istati Membri b’mod proporzjonali man-numru ta’ tfal ta’ età bejn 6 u 10 snin fir-reġjuni anqas żviluppati/fil-Gżejjer Minuri tal-Eġew.

Minbarra dawn iż-żewġ kriterji, 35 % tal-ammont totali tal-għajnuna tal-UE għall-ħalib għall-iskejjel ġie allokat lill-Istati Membri b’nefqa medja tal-għajnuna tal-UE għal kull tifel u tifla ogħla mill-medja tal-UE b’mod proporzjonali mal-użu storiku tal-għajnuna tal-UE f’dawk l-Istati Membri, f’konformità mal-kriterju c). Dawn huma l-Bulgarija, ir-Repubblika Ċeka, id-Danimarka, l-Estonja, Ċipru, il-Lussemburgu, l-Ungerija, il-Latvja, il-Litwanja, Malta, il-Polonja, ir-Rumanija, is-Slovakkja, il-Finlandja, l-Iżvezja.

L-allokazzjonijiet indikattivi tal-għajnuna tal-UE għall-ħalib għall-iskejjel li jirriżultaw mis-somma tal-ammonti kkalkolati abbażi tal-kriterji a), b), u c) ġew aġġustati biex jikkonformaw mar-rekwiżit li kull Stat Membru jirċievi ammont ta’ mill-inqas EUR 193 000. Il-Lussemburgu u Malta rċivew ammont addizzjonali. L-allokazzjonijiet indikattivi tal-għajnuna tal-UE għall-Istati Membri l-oħra kollha tnaqqsu b’mod proporzjonali biex jiġi rrispettat l-ammont totali (il-kalkoli dettaljati jinsabu fl-Anness II).

2.3.Ir-riżultat tal-applikazzjoni tal-kriterji tal-allokazzjoni

Għal 10 Stati Membri (id-Danimarka, l-Estonja, il-Greċja, il-Kroazja, l-Italja, il-Litwanja, l-Ungerija, in-Netherlands, il-Portugall u r-Rumanija), l-allokazzjoni indikattiva l-ġdida tal-għajnuna tal-UE għall-frott u l-ħaxix għall-iskejjel hija aktar baxxa milli għall-perjodu preċedenti. It-tnaqqis huwa inqas minn 5 % għall-Greċja, il-Litwanja u l-Ungerija, ivarja minn 5 % sa 10 % għad-Danimarka, għall-Estonja, għall-Kroazja, għall-Italja, għan-Netherlands, u għar-Rumanija, u huwa 15 % għall-Portugall.

Għal 14-il Stat Membru (il-Belġju, il-Bulgarija, ir-Repubblika Ċeka, il-Ġermanja, l-Irlanda, Spanja, Franza, il-Latvja, l-Awstrija, il-Polonja, is-Slovenja, is-Slovakkja, il-Finlandja u l-Iżvezja), l-allokazzjoni indikattiva l-ġdida tal-għajnuna tal-UE għall-frott u l-ħaxix għall-iskejjel hija ogħla milli għall-perjodu preċedenti. Iż-żieda hija inqas minn 5 % għall-Bulgarija, għall-Ġermanja, għal Spanja, għal Franza, għal-Latvja, għall-Awstrija, għall-Polonja u għall-Finlandja, tvarja minn 5 % sa 10 % għall-Belġju, għar-Repubblika Ċeka, għall-Irlanda, u għas-Slovakkja, u hija ta’ 19 % għall-Iżvezja u 20 % għas-Slovenja.

Il-fattur ewlieni għat-tnaqqis jew għaż-żieda fl-allokazzjoni indikattiva tal-għajnuna tal-UE huwa l-bidla fl-għadd ta’ tfal ta’ età bejn 6 u 10 snin fl-Istati Membri kkonċernati, u għall-Estonja fl-istatus ta’ żoni rikonoxxuti inqas żvantaġġati.

Għal Ċipru, għal-Lussemburgu u għal Malta, ma hemm l-ebda bidla fl-allokazzjoni indikattiva, li tirriżulta mir-rekwiżit de minimis (jiġifieri, kull Stat Membru għandu jirċievi ammont ta’ mill-inqas EUR 290 000).

Fir-rigward tal-ħalib għall-iskejjel, 15-il Stat Membru (il-Belġju, il-Ġermanja, l-Irlanda, il-Greċja, Spanja, Franza, il-Kroazja, l-Italja, Ċipru, in-Netherlands, l-Awstrija, il-Portugall, is-Slovenja, il-Finlandja u l-Iżvezja) irċivew allokazzjonijiet indikattivi aktar baxxi tal-għajnuna tal-UE milli fil-perjodu preċedenti.

It-tnaqqis huwa inqas minn 5 % għall-Belġju u għal Spanja, ivarja minn 5 % sa 10 % għall-Ġermanja, għall-Irlanda, għall-Greċja, għan-Netherlands, għall-Awstrija, għas-Slovenja u għall-Iżvezja, huwa 14 % għall-Italja, minn 20 % sa 30 % għal Franza, il-Kroazja, u l-Finlandja, u 41 % għall-Portugall u 49 % għal Ċipru. Il-Portugall esperjenza tnaqqis ta’ 13 % fl-għadd ta’ tfal ta’ età bejn 6 u 10 snin u l-użu storiku tiegħu naqas b’mod sinifikanti. Ċipru kien irċieva ammont ogħla ta’ għajnuna għall-perjodu preċedenti milli kien ikun intitolat għalih b’applikazzjoni stretta tal-kriterji ta’ allokazzjoni, bħala parti mid-diskussjonijiet interistituzzjonali.

B’mod ġenerali, il-bidliet fl-allokazzjonijiet indikattivi għall-ħalib għall-iskejjel huma aktar sinifikanti mill-bidliet għall-frott u l-ħaxix. Dan huwa dovut għat-tielet kriterju tal-użu storiku tal-għajnuna tal-UE (xi Stati Membri raw tnaqqis sinifikanti fl-użu tal-għajnuna tal-UE taħt l-iskema l-ġdida).

Meta wieħed iħares lejn l-ammont indikattiv totali tal-għajnuna tal-UE (għall-frott u l-ħaxix, u għall-ħalib), tliet Stati Membri raw tnaqqis qawwi: Ċipru (-31 %), il-Portugall (-25 %) u l-Finlandja (-19 %), li l-ebda wieħed minnhom ma rnexxielu juża 100 % tal-allokazzjoni indikattiva fl-aħħar erba’ snin skolastiċi.

3.L-impatt tat-trasferimenti 

3.1.Sfond legali

L-iskema tal-ħalib għall-iskejjel tal-UE u l-iskema tal-frott u l-ħaxix għall-iskejjel tal-UE kienu skemi separati sakemm dawn ingħaqdu f’qafas legali u finanzjarju komuni skont ir-Regolament (UE) Nru 2016/791 9 . Il-Parlament Ewropew u l-Kunsill qiesu li approċċ komuni jippermetti lill-Istati Membri jimmassimizzaw l-impatt tad-distribuzzjoni fi ħdan baġit fiss u jżidu l-effiċjenza tal-ġestjoni. Madankollu, sabiex jitqiesu d-differenzi bejn l-iskemi (u l-ktajjen tal-provvista tagħhom) ċerti elementi, bħall-baġits rispettivi, baqgħu separati.

Mill-1 ta’ Awwissu 2017, l-Istati Membri li jixtiequ jipparteċipaw fl-iskema tal-iskejjel kull sena ppreżentaw it-talba tagħhom għall-għajnuna tal-UE li tispeċifika l-ammont mitlub għall-frott u l-ħaxix għall-iskejjel u l-ammont mitlub għall-ħalib għall-iskejjel. Kif issemma hawn fuq, ir-Regolament (UE) 1308/2013 jagħti lill-Istati Membri l-possibbiltà li jittrasferixxu darba kull sena skolastika sa 20 % ta’ waħda jew l-oħra mill-allokazzjonijiet indikattivi tagħhom biex jaġġustaw aħjar għall-prijoritajiet u l-ħtiġijiet tagħhom fl-implimentazzjoni tal-iskema. It-trasferimenti jistgħu jsiru jew:

(a)	qabel l-iffissar ta’ allokazzjonijiet definittivi għas-sena skolastika ta’ wara, bejn l-allokazzjonijiet indikattivi tal-Istat Membru; jew
(b)	wara l-bidu tas-sena skolastika, bejn l-allokazzjonijiet definittivi tal-Istat Membru, fejn tali allokazzjonijiet ikunu ġew stabbiliti għall-Istat Membru inkwistjoni.

3.2.Trasferimenti li saru matul il-perjodu ta’ implimentazzjoni 2017-2023

L-evalwazzjoni tal-iskema tal-iskejjel tal-UE mill-2017/18 sal-2020/21 uriet li l-possibbiltà li l-għajnuna tal-UE tiġi ttrasferita bejn iż-żewġ partijiet tal-iskema tal-UE ntużat minn 14-il Stat Membru (abbażi ta’ rieżami tad-dokumenti ta’ ħidma ppreżentati lid-delegati tal-Istati Membri fil-Kumitat għall-Organizzazzjoni Komuni tas-Swieq Agrikoli, il-prodotti tal-annimali). Dan intuża l-aktar għat-trasferiment ta’ fondi mill-ħalib għall-frott u l-ħaxix (f’10 Stati Membri mill-14 bl-użu tat-trasferimenti). Ir-raġuni ewlenija għat-trasferiment kienet li tiġi akkomodata domanda ogħla għall-frott u l-ħaxix, b’mod parallel ma’ użu insuffiċjenti tal-baġit għall-ħalib 10 . 

It-trasferimenti mill-allokazzjonijiet tal-ħalib għall-allokazzjonijiet tal-frott u l-ħaxix għall-10 Stati Membri kkonċernati ma ntalbux kull sena u l-użu tal-baġit ittrasferit varja minn sena għall-oħra, kif muri fit-tabella ta’ hawn taħt.

SM	IS-SENA LI FIHA SAR IT-TRASFERIMENT	% UŻAT TAL-AMMONT ITTRASFERIT
Il-Belġju	2017/2018- 2020/2021	0 %
Id-Danimarka	2020/2021	0 %
Il-Ġermanja	2018/2019 2017/2018, 2019/2020 u 2020/2021	100 % 0 %
L-Irlanda	2017/2018	60 %.
Spanja	2017/2018 2018/2019 u 2019/2020	30 % 0 %
Ċipru	2017/2018 2018/2019 2019/2020 2020/2021	0 % 82 % 0 % 60 %
Il-Lussemburgu	2017/2018- 2020/2021	100 %
Malta	2017/2018	0 %
In-Netherlands	2017/2018 2018/2019 2019/2020 u 2020/2021	27 % 70 % 0 %
L-Awstrija	2017/2018-2018/2019 u 2019/2020	0 %

It-trasferimenti mill-allokazzjonijiet għall-frott u l-ħaxix għall-allokazzjonijiet għall-ħalib intużaw minn għadd limitat ta’ Stati Membri (Franza, il-Portugall, ir-Rumanija, l-Iżvezja), iżda l-ammonti ttrasferiti huma ogħla. Kull sena, l-Iżvezja tuża din il-possibbiltà peress li l-iskema tal-iskejjel tal-UE għall-frott u l-ħaxix ma tiġix applikata hemmhekk; madankollu, is-somma ttrasferita fil-fatt ma tintużax. Franza tittrasferixxi kważi EUR 4,5 miljun kull sena biex ikollha baġits tal-istess daqs kemm għall-ħalib kif ukoll għall-frott u l-ħaxix. Madankollu, iż-żewġ allokazzjonijiet baqgħu fil-biċċa l-kbira mhux użati matul il-perjodu ta’ implimentazzjoni ta’ erba’ snin kopert mill-evalwazzjoni. Fil-każ tar-Rumanija biss, l-ammont ittrasferit intuża kollu, bis-saħħa ta’ frekwenza akbar fid-distribuzzjoni (kuljum).

4.Konklużjonijiet

Il-kriterji stabbiliti fir-Regolament (UE) Nru 1308/2013 biex jiġi allokat l-ammont globali ta’ għajnuna tal-UE għall-iskema tal-iskejjel tal-UE fost l-Istati Membri ġew applikati mill-Kunsill meta adotta r-Regolament tal-Kunsill (UE) Nru 1370/2013 (għall-perjodu mill-1 ta’ Awwissu 2017 sal-31 ta’ Lulju 2023), u mill-Kummissjoni permezz tad-Deċiżjoni ta’ Implimentazzjoni (UE) 2023/106 (għall-perjodu mill-1 ta’ Awwissu 2023 sal-31 ta’ Lulju 2029). Dan tal-aħħar ġie adottat wara opinjoni pożittiva tal-Kumitat għall-Organizzazzjoni Komuni tas-Swieq Agrikoli tal-15/12/2022, fejn 24 Stat Membru, li jirrappreżentaw 83 % tal-popolazzjoni tal-UE, esprimew l-appoġġ tagħhom. Fi kliem ieħor, l-applikazzjoni tal-kriterji ġiet approvata b’maġġoranza vasta.

Il-kriterji jibqgħu rilevanti peress li dawn jinkludu tliet prinċipji ewlenin: il-proporzjonalità (l-għadd ta’ studenti f’kull Stat Membru); il-koeżjoni (il-grad ta’ żvilupp tar-reġjuni); u l-effettività (l-użu storiku). Ir-rieżami li għaddej tal-iskema tal-iskejjel tal-UE jista’ jikkunsidra li jestendi l-kamp ta’ applikazzjoni tat-tielet kriterju (l-użu storiku) għall-frott u l-ħaxix għall-iskejjel, peress li bħalissa huwa limitat għall-ħalib għall-iskejjel.

Il-possibbiltà li l-għajnuna tal-UE tiġi ttrasferita ntużat l-aktar mill-ħalib għall-iskejjel għall-frott u l-ħaxix għall-iskejjel. Dan sar biex tiġi ssodisfata d-domanda dejjem akbar għall-frott u l-ħaxix, li jidher li huwa konsistenti max-xejra ’l fuq fl-għadd ta’ tfal li jipparteċipaw fil-parti tal-frott u l-ħaxix tal-iskema tal-iskejjel tal-UE u x-xejra ’l isfel fl-għadd ta’ tfal li jipparteċipaw fil-parti tal-ħalib tal-iskema tal-iskejjel tal-UE 11 .

F’termini prattiċi, l-ammonti ttrasferiti ntużaw b’mod effettiv biss għal massimu ta’ 15 % għat-trasferimenti mill-ħalib għall-frott u l-ħaxix, u 12 % għat-trasferimenti mill-frott u l-ħaxix għall-ħalib. Madankollu, il-possibbiltà ppermettiet lill-Istati Membri jagħmlu użu aħjar mill-għajnuna tal-UE allokata fejn meħtieġ biex tiżdied il-kopertura f’termini tal-kwantità u l-frekwenza tad-distribuzzjoni. Ir-rieżami kontinwu tal-iskema tal-iskejjel tal-UE jista’ jikkunsidra s-simplifikazzjoni tal-approċċ billi jippermetti lill-Istati Membri jużaw l-allokazzjonijiet nazzjonali tagħhom skont il-ħtiġijiet tagħhom u kif deskritt fl-istrateġiji nazzjonali tagħhom.

(1) ()    Ir-Regolament (UE) Nru 1308/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi organizzazzjoni komuni tas-swieq fi prodotti agrikoli u li jħassar ir-Regolamenti tal-Kunsill (KEE) Nru 922/72, (KEE) Nru 234/79, (KE) Nru 1037/2001 u (KE) Nru 1234/2007.

(2) ()    L-Istati Membri b’reġjuni ultraperiferiċi elenkati fl-Artikolu 349 tat-TFUE u f’każijiet oħra inkluż fejn Stat Membru jeħtieġ li jindirizza sitwazzjoni speċifika tas-suq fis-settur kopert mill-iskema tal-iskejjel, it-tħassib partikolari tiegħu dwar il-konsum baxx ta’ wieħed mill-gruppi ta’ prodotti, jew bidliet oħra fis-soċjetà.

(3) ()    Ir-Regolament tal-Kunsill (UE) Nru 1370/2013 tas-16 ta’ Diċembru 2013 li jiddetermina miżuri dwar l-iffissar ta’ ċerti għajnuniet u rifużjonijiet relatati mal-organizzazzjoni komuni tas-swieq tal-prodotti agrikoli.

(4) ()    Ir-Regolament Delegat tal-Kummissjoni (UE) 2017/40 tat-3 ta’ Novembru 2016 li jissupplimenta r-Regolament (UE) Nru 1308/2013 tal-Parlament Ewropew u tal-Kunsill f’dak li għandu x’jaqsam mal-għajnuna tal-Unjoni għall-provvista ta’ frott u ħaxix, banana u ħalib fl-istabbilimenti edukattivi u li jemenda r-Regolament Delegat tal-Kummissjoni (UE) Nru 907/2014.

(5) ()     https://cohesiondata.ec.europa.eu/2021-2027-Finances/2021-2027-IJG-Categories-of-NUTS2-regions/uxj2-277b/data

(6) ()    Ir-Regolament (UE) Nru 229/2013 tal-Parlament Ewropew u tal-Kunsill tat-13 ta' Marzu 2013 li jistabbilixxi miżuri speċifiċi għall-agrikoltura favur il-gżejjer minuri fil-Baħar Eġew u li jħassar ir-Regolament tal-Kunsill (KE) Nru 1405/2006.

(7) ()    Ir-Regolament ta’ Implimentazzjoni tal-Kummissjoni (UE) Nru 908/2014 tas-6 ta’ Awwissu 2014 li jistabbilixxi r-regoli għall-applikazzjoni tar-Regolament (UE) Nru 1306/2013 tal-Parlament Ewropew u tal-Kunsill fir-rigward tal-aġenziji tal-pagamenti u korpi oħra, il-ġestjoni finanzjarja, l-approvazzjoni ta’ kontijiet, ir-regoli dwar kontrolli, garanziji u trasparenza.

(8) ()    It-tabelli għall-ħidma u l-kalkoli relatati għat-tliet kriterji huma mogħtija fl-Anness I.

(9) ()    Ir-Regolament (UE) 2016/791 tal-Parlament Ewropew u tal-Kunsill tal-11 ta’ Mejju 2016 li jemenda r-Regolamenti (UE) Nru 1308/2013 (UE) Nru 1306/2013 fir-rigward tal-iskema ta’ għajnuna għall-provvista ta’ frott u ħaxix, banana u ħalib fi stabbilimenti edukattivi.

(10) ()    Tabella dettaljata tat-trasferimenti tal-għajnuna tal-Unjoni bejn il-frott u l-ħaxix għall-iskejjel u l-ħalib għall-iskejjel tinsab fl-Anness III.

(11) ()    B’mod ġenerali, fil-perjodu 2017/18-2020/21, in-numru ta’ tfal li jibbenefikaw mill-parti tal-frott u l-ħaxix naqas bi 2,5 % (fil-biċċa l-kbira b’rabta ma’ miżuri ta’ restrizzjonijiet tas-saħħa biex jiġi limitat it-tixrid tal-pandemija tal-COVID-19). Madankollu, l-għadd ta’ tfal li jibbenefikaw mill-parti tal-ħalib tal-iskema juri tnaqqis kostanti mill-2017/18 ’l hawn.

IL-KUMMISSJONI EWROPEA

Brussell, 25.7.2023

COM(2023) 456 final

ANNESSI

tar-

RAPPORT MILL-KUMMISSJONI LILL-PARLAMENT EWROPEW U LILL-KUNSILL

dwar l-applikazzjoni tal-kriterji tal-allokazzjoni baġitarja u dwar l-impatt tat-trasferimenti baġitarji fuq l-effettività tal-Iskema tal-UE għall-Frott, il-Ħaxix u l-Ħalib għall-Iskejjel

Anness I: Tabelli biex jinħadmu l-kriterji tal-allokazzjoni

Anness II: Kalkolu tal-allokazzjoni indikattiva tal-għajnuna tal-Unjoni għall-iskema tal-frott u l-ħxejjex u tal-ħalib għall-iskejjel

Anness III: Trasferimenti ta’ għajnuna tal-Unjoni bejn il-frott u l-ħxejjex għall-iskejjel u l-ħalib għall-iskejjel

Stati Membri	2017/2018	2018/2019	2019/2020	2020/2021	Raġuni ewlenija għat-trasferimenti (sors: Stħarriġ tal-PA)	L-użu jew in-nuqqas ta’ użu għall-ammonti ttrasferiti
	Euro	Euro	Euro	Euro
Il-Belġju	22 450	37 529	37 529	37 529	-	L-ammont tat-trasferimenti magħmula mill-parti tal-ħalib għall-parti tal-frott u l-ħxejjex ma ntużax.
Id-Danimarka				2 987		L-ammont tat-trasferimenti magħmula mill-parti tal-ħalib għall-parti tal-frott u l-ħxejjex ma ntużax.
Il-Ġermanja	451 361	177 929	384 706	162 902	Domanda ogħla għall-frott u l-ħxejjex milli għall-ħalib fl-iskejjel fi proporzjon mal-allokazzjoni.	L-ammont tat-trasferimenti li jsaħħaħ l-għajnuna tal-Unjoni għall-parti tal-frott u l-ħxejjex tal-iskema ntuża fl-2018/2019 iżda ma ntużax fl-2017/2018, fl-2019/2020 u fl-2020/2021.
L-Irlanda	117 052				Użu insuffiċjenti tal-baġit għall-ħalib u fondi insuffiċjenti għall-frott u l-ħxejjex.	L-ammont tat-trasferiment magħmul mill-parti tal-ħalib għall-parti tal-frott u l-ħxejjex intuża 60 % minnu.
Spanja	1 575 696	1 114 961	165 874		Restrizzjonijiet tal-awtoritajiet tas-saħħa nazzjonali/reġjonali.	Fl-2017/2018 intuża 30 % tal-ammont ittrasferit mill-parti tal-ħalib għall-parti tal-frott u l-ħxejjex tal-iskema iżda ma ntużax fl-2018/2019 u fl-2019/2020.
Franza	4 497 617	4 497 617	4 497 617	4 497 617	L-istabbiliment ta’ ekwivalenza fil-baġits għall-frott u l-ħxejjex u għall-ħalib bil-għan li tinkiseb kontribuzzjoni indaqs għall-konsum ta’ prodotti agrikoli.	L-ammont tat-trasferimenti magħmula mill-parti tal-frott u l-ħxejjex għall-parti tal-ħalib ma ntużax.
Ċipru	100 044	100 044	100 044	100 044	Fl-2018/2019 intuża 82 % tal-ammont ittrasferit mill-parti tal-ħalib għall-parti tal-frott u l-ħxejjex tal-iskema u 60 % minnu fl-2020/2021.	L-ammont ittrasferit mill-parti tal-ħalib għall-parti tal-frott u l-ħxejjex tal-iskema ma ntużax fl-2017/2018, intuża 82 % minnu fl-2018/2019, ma ntużax fl-2019/2020 u ntuża 60 % fl-2020/2021.
Il-Lussemburgu	4 000	30 000	35 000	40 950	Adozzjoni aktar bil-mod għall-ħalib u għall-prodotti tal-ħalib milli mistenni.	L-ammont ittrasferit mill-parti tal-ħalib għall-parti tal-frott u l-ħxejjex tal-iskema ntuża kollu.
Malta	48 250				-	L-ammont ittrasferit mill-parti tal-ħalib għall-parti tal-frott u l-ħxejjex tal-iskema ma ntużax.
In-Netherlands	480 212	480 212	480 212	480 212	-	Fl-2017/2018 intuża 27 % tal-ammont ittrasferit mill-parti tal-ħalib għall-parti tal-frott u l-ħxejjex tal-iskema, 70 % minnu fl-2018/2019 u fl-2019/2020 u 2020/2021 ma ntużax.
L-Awstrija	112 546	130 000	150 000		Domanda ogħla għall-frott u l-ħxejjex milli għall-ħalib.	L-ammont tat-trasferimenti magħmula mill-parti tal-ħalib għall-parti tal-frott u l-ħxejjex ma ntużax.
Il-Portugall	426 842				-	L-ammont tat-trasferimenti magħmula mill-parti tal-frott u l-ħxejjex għall-parti tal-ħalib ma ntużax.
Ir-Rumanija	1 373 370	1 373 370			Kien hemm ħafna Awtoritajiet Kontraenti (kunsilli tal-bliet) li għażlu d-distribuzzjoni tal-ħalib 5 ijiem fil-ġimgħa.	L-ammont tat-trasferimenti magħmula mill-parti tal-frott u l-ħxejjex għall-parti tal-ħalib intuża kollu.
L-Iżvezja	570 994	570 994	570 994	570 994	L-Iżvezja ma tapplikax il-parti tal-frott u l-ħxejjex tal-iskema għall-iskejjel.	L-ammont tat-trasferimenti magħmula mill-parti tal-frott u l-ħxejjex għall-parti tal-ħalib ma ntużax.
Trasferimenti mill-parti tal-ħalib għall-parti tal-frott u l-ħxejjex	(9) = 2 911 611	(7) = 2 070 675	(7) = 1 353 365	(6) = 824 354
Trasferimenti mill-parti tal-frott u l-ħxejjex għall-parti tal-ħalib	(4) = 6 868 823	(3) = 6 441 981	(2) = 5 068 611	(2) = 5 068 611

Sors: Dokumenti ta’ ħidma ppreżentati lid-delegati tal-Istati Membri fil-Kumitat għall-organizzazzjoni komuni tas-swieq agrikoli, il-prodotti tal-annimali