|
28.9.2022 |
MT |
Il-Ġurnal Uffiċjali tal-Unjoni Ewropea |
C 370/8 |
Pubblikazzjoni ta’ komunikazzjoni tal-approvazzjoni ta’ emenda standard għall-Ispeċifikazzjoni tal-Prodott għal isem fis-settur tal-inbid kif imsemmi fl-Artikolu 17(2) u (3) tar-Regolament Delegat tal-Kummissjoni (UE) 2019/33
(2022/C 370/05)
Din il-komunikazzjoni hija ppubblikata skont l-Artikolu 17(5) tar-Regolament Delegat tal-Kummissjoni (UE) 2019/33 (1).
KOMUNIKAZZJONI TAL-APPROVAZZJONI TA’ EMENDA STANDARD
Alsace grand cru Kirchberg de Barr
PDO-FR-A0343-AM02
Data tal-komunikazzjoni: 20.7.2022
DESKRIZZJONI TAL-EMENDA APPROVATA U RAĠUNIJIET GĦALIHA
1. Referenza addizzjonali
Fil-Kapitolu I, it-Taqsima II(1), tal-Ispeċifikazzjoni tal-Prodott ġew miżjuda l-ismijiet użati li ġejjin: Sylvaner u Pinot noir, kif ukoll il-varjetajiet tad-dwieli korrispondenti, rispettivament: sylvaner B u pinot noir N.
L-isem użat Sylvaner ġie miżjud biex jiġi kkoreġut nuqqas fl-ewwel verżjoni tal-Ispeċifikazzjoni tal-Prodott. Din l-ewwel verżjoni tispeċifika, fil-Kapitolu I, it-Taqsima X(1)(b), li l-varjetajiet tad-dwieli awtorizzati “jistgħu jiġu vinifikati u kkummerċjalizzati bl-isem rispettiv tagħhom”, iżda l-isem korrispondenti użat ma kienx ġie inkluż fil-lista ta’ ismijiet użati possibbli. Deċiżjoni nazzjonali, li ttieħdet qabel l-approvazzjoni tal-ewwel verżjoni tal-Ispeċifikazzjoni tal-Prodott, kienet żiedet il-varjetà tad-dwieli sylvaner B ma’ dawk awtorizzati għall-produzzjoni ta’ nbejjed bid-denominazzjoni ta’ oriġini Alsace grand cru Zotzenberg, b’kunsiderazzjoni tad-drawwiet lokali u r-reputazzjoni ta’ dawn l-inbejjed.
Din l-emenda ma tinvolvi ebda emenda għad-Dokument Uniku.
L-isem użat Pinot noir ġie miżjud minħabba li saret applikazzjoni għar-rikonoxximent tal-inbejjed ħomor bla gass fil-livell nazzjonali għal din id-denominazzjoni ta’ oriġini. Din l-applikazzjoni għar-rikonoxximent tad-denominazzjoni Alsace grand cru Kirchberg de Barr għal inbid aħmar hija bbażata fuq l-anterjorità, il-fama u l-karatteristiċi tal-inbejjed magħmulin bl-għeneb tal-varjetà pinot noir N prodotti fl-irqajja’ art demarkati għal din id-denominazzjoni tal-Alsace grand cru li inizjalment kienet rikonoxxuta biss għall-inbejjed bojod.
Il-varjetà pinot noir N hija l-unika varjetà tad-dwieli awtorizzata għal dawn l-inbejjed ħomor.
Din l-emenda tinvolvi emenda għall-punt 9 tad-Dokument Uniku.
Fil-Kapitolu I, it-Taqsima II(1), tal-Ispeċifikazzjoni tal-Prodott, għall-varjetajiet ta’ għeneb muscat à petits grains li jikkorrispondu għall-isem użat Muscat, il-kelmiet “blancs” u “roses” ġew miżjuda mal-isem ta’ dawn il-varjetajiet tad-dwieli sabiex jiġi kkoreġut nuqqas fil-verżjoni preċedenti tal-Ispeċifikazzjoni tal-Prodott.
Din l-emenda ma tinvolvi ebda emenda għad-Dokument Uniku.
2. Tipi ta’ prodott
Fil-Kapitolu I, III tal-Ispeċifikazzjoni tal-Prodott, it-test ġie emendat biex jiġi indikat li d-denominazzjonijiet ta’ oriġini koperti minn din l-Ispeċifikazzjoni tal-Prodott ma għadhomx denominazzjonijiet esklużivament riżervati għall-inbejjed bojod bla gass.
Id-denominazzjonijiet ta’ oriġini kkontrollata Alsace grand cru riżervati għall-inbejjed bojod u ħomor bla gass jissemmew b’isimhom (Alsace grand cru Hengst u Alsace grand cru Kirchberg de Barr).
Bosta partijiet tad-Dokument Uniku ġew emendati, b’mod partikolari l-punt 4, minħabba r-rikonoxximent tal-inbejjed ħomor bla gass għad-denominazzjoni Alsace grand cru Kirchberg de Barr.
3. Żona ġeografika
Ġie miżjud paragrafu mal-punt 1 tal-Kapitolu I, IV tal-Ispeċifikazzjoni tal-Prodott biex issir referenza għad-dati li fihom iż-żona ġeografika ġiet ivvalidata mill-kumitat nazzjonali kompetenti tal-INAO u biex jiġi indikat ir-repożitorju tad-definizzjoni tal-perimetru taż-żona, il-kodiċi ġeografiku uffiċjali tal-2021, kif stabbilit fl-Ispeċifikazzjoni tal-Prodott. Din l-indikazzjoni tagħmilha possibbli li d-demarkazzjoni taż-żona tiġi żgurata legalment.
L-introduzzjoni tar-referenza għall-kodiċi ġeografiku uffiċjali tal-2021 twassal għal aġġornament tal-lista tal-ismijiet tal-muniċipalitajiet. Għalhekk, il-muniċipalitajiet ta’ Kientzheim u Sigolsheim tneħħew, u t-territorju tagħhom issa huwa anness mal-muniċipalità ta’ Kaysersberg Vignoble.
Dawn l-emendi editorjali ma jibdlux il-perimetru taż-żona ġeografika.
Fil-punt 1 ġew miżjuda wkoll is-sentenzi li ġejjin:
“Il-mapep taż-żona ġeografika huma disponibbli fis-sit web tal-INAO.
Il-kunsill lokali tal-muniċipalità li tinsab parzjalment fit-territorju għandu mappa li tidentifika l-limiti taż-żona ġeografika.”
Dawn l-emendi jinvolvu emenda għall-punt 6 tad-Dokument Uniku.
4. Żona tal-irqajja’ art demarkata
Fil-Kapitolu I, it-Taqsima IV(2), tal-Ispeċifikazzjoni tal-Prodott:
|
— |
fl-ewwel paragrafu, sabiex jiġi kkoreġut nuqqas, ġiet miżjuda l-informazzjoni “6 u 7 ta’ Settembru 2006”, li tikkorrispondi għad-data ta’ approvazzjoni taż-żona tal-irqajja’ art mill-kumitat nazzjonali kompetenti. |
|
— |
fit-tieni paragrafu, il-kitba ġiet emendata biex tirrifletti l-bidliet fl-ismijiet tal-muniċipalitajiet li saru fit-Taqsima IV(1). |
|
— |
il-kolonna “Muniċipalitajiet” tat-tabella ġiet aġġornata biex tikkorrispondi mal-ismijiet tal-muniċipalitajiet elenkati fit-Taqsima IV(1). |
Dawn l-emendi ma jaffettwawx id-Dokument Uniku.
5. Żona fil-viċinanza immedjata
Ġie emendat paragrafu fil-Kapitolu I, it-Taqsima IV(3), tal-Ispeċifikazzjoni tal-Prodott biex jiġi indikat ir-repożitorju tad-definizzjoni tal-perimetru taż-żona, il-kodiċi ġeografiku uffiċjali tal-2021, kif stabbilit fl-Ispeċifikazzjoni tal-Prodott. Din l-indikazzjoni tagħmilha possibbli li d-demarkazzjoni taż-żona tiġi żgurata legalment.
L-introduzzjoni tar-referenza għall-kodiċi ġeografiku uffiċjali tal-2021 twassal għal aġġornament tal-lista tal-ismijiet tal-muniċipalitajiet. Għalhekk tħassar l-isem tal-muniċipalità ta’ Kaysersberg u ġie miżjud dak tal-muniċipalità ta’ Kaysersberg Vignoble, flimkien mal-informazzjoni li din il-muniċipalità hija inkluża biss għall-parti tat-territorju tal-muniċipalità delegata ta’ Kaysersberg.
Dawn l-emendi editorjali ma jemendawx il-perimetru taż-żona fil-viċinanza immedjata.
Dawn l-emendi jinvolvu emenda għall-punt 9 tad-Dokument Uniku.
6. Varjetajiet tal-għeneb
Fil-Kapitolu I, it-Taqsima V(1)(a), tal-Ispeċifikazzjoni tal-Prodott, ġie miżjud il-kliem “- għall-inbejjed bojod: ” u “- għall-inbejjed ħomor: il-varjetà tad-dwieli pinot noir N”, minħabba li saret applikazzjoni għar-rikonoxximent tal-inbejjed ħomor bla gass fil-livell nazzjonali għal ċerti denominazzjonijiet ta’ oriġini Alsace grand cru. Il-varjetà pinot noir N hija l-unika varjetà tad-dwieli awtorizzata għal dawn l-inbejjed ħomor. Hija wkoll l-unika varjetà tad-dwieli awtorizzata għall-produzzjoni ta’ nbid aħmar fid-denominazzjoni ta’ oriġini Alsace.
Il-varjetà tad-dwieli Pinot noir N ġiet miżjuda fid-Dokument Uniku.
Fit-Taqsima V, il-punt 1(a), (b) u (e), u l-punt 2(b), il-kelmiet “blancs” u “roses” ġew miżjuda mal-isem tal-varjetajiet ta’ muscats à petits grains sabiex jiġi kkoreġut nuqqas fil-verżjoni preċedenti tal-Ispeċifikazzjoni tal-Prodott.
Id-Dokument Uniku ma huwiex emendat b’din l-emenda.
7. Densità tat-tħawwil
Fil-Kapitolu I, it-Taqsima VI(1)(a), tal-Ispeċifikazzjoni tal-Prodott, ġie miżjud il-kliem: “Għall-produzzjoni ta’ nbid abjad” u “Għall-produzzjoni ta’ nbid aħmar” biex issir distinzjoni bejn id-densitajiet minimi tat-tħawwil skont il-kulur tal-inbejjed. Dawn id-densitajiet huma indikati għad-denominazzjonijiet li jistgħu jipproduċu nbejjed ħomor.
Ġiet miżjuda s-sentenza li ġejja: Id-dwieli maħsuba għall-produzzjoni ta’ nbejjed ħomor li jistgħu jibbenefikaw mid-denominazzjoni ta’ oriġini kkontrollata Alsace grand cru Kirchberg de Barr għandhom densità minima tat-tħawwil ta’ 5 000 pjanta għal kull ettaru.
Il-punt 5 tad-Dokument Uniku ġie emendat.
Fil-Kapitolu I, it-Taqsima VI(1)(a) tal-Ispeċifikazzjoni tal-Prodott, ġiet speċifikata d-data effettiva tal-applikazzjoni tar-regola dwar il-possibbiltà li tiġi adattata d-densità permezz tal-qlugħ tas-siġar: “il-25 ta’ Ottubru 2011”, li tissostitwixxi l-formulazzjoni “fid-data tal-approvazzjoni ta’ din l-Ispeċifikazzjoni tal-Prodott”.
Din l-emenda tinvolvi emenda għall-punt 5 tad-Dokument Uniku.
8. Regola taż-żbir
Fil-Kapitolu I, it-Taqsima VI(1)(b), tal-Ispeċifikazzjoni tal-Prodott, għall-produzzjoni tal-inbejjed bojod, ir-regola dwar in-numru ta’ għejun għal kull metru kwadru tal-erja tal-art, li kienet tvarja skont il-varjetà tad-dwieli, tneħħiet u minflokha ddaħħlet regola waħda ta’ 18-il għajn għal kull pjanta.
Dan l-iżvilupp jippermetti l-armonizzazzjoni tal-kitba bejn l-Ispeċifikazzjonijiet tad-denominazzjonijiet ta’ oriġini ta’ Alsace, u li jiġu ssimplifikati l-metodi ta’ kontroll.
Fil-bidu tas-sentenza ġie miżjud il-kliem “Għall-inbejjed bojod,” minħabba l-applikazzjoni għar-rikonoxximent għall-inbejjed ħomor bla gass li saret fil-livell nazzjonali għal ċerti denominazzjonijiet ta’ oriġini Alsace grand cru.
Ġiet miżjuda r-regola dwar iż-żbir għall-inbejjed ħomor, bin-numru massimu ta’ għejun għal kull pjanta stabbilit għal 14. Dan huwa aktar baxx min-numru awtorizzat għall-produzzjoni tal-inbejjed bojod. Din ir-regola tippermetti l-konsistenza mar-rendimenti u mal-produzzjoni ta’ għeneb ta’ kwalità.
Il-punt 5 tad-Dokument Uniku ġie emendat.
9. Regoli dwar il-kannizzar u l-għoli tal-faxxina
Fil-Kapitolu I, it-Taqsima VI(1)(c), tal-Ispeċifikazzjoni tal-Prodott, tneħħa l-għoli massimu tal-wajer ta’ appoġġ tal-arkata u nbidel il-metodu tal-kejl tal-għoli tal-faxxina fuq il-kannizzati.
Dawn il-bidliet jagħmluha possibbli li l-għoli tal-faxxina jiġi osservat waqt it-tkabbir, li qabel kien isir biss b’obbligu tal-mezzi.
Din l-emenda ma taffettwax id-Dokument Uniku.
10. Tagħbija massima medja fuq ir-roqgħa art
Fil-Kapitolu I, it-Taqsima VI(1)(d), tal-Ispeċifikazzjoni tal-Prodott, il-valur tat-tagħbija massima medja għal kull roqgħa art tnaqqas minn 10 000 għal 8 500 kilogramma għal kull ettaru, għall-inbejjed bojod, f’konformità mat-tnaqqis fir-rendiment għal dawn l-inbejjed.
Ġie stabbilit valur għall-inbejjed ħomor, li huwa inqas minn dak stabbilit għall-inbejjed bojod, f’konformità mar-rendiment ta’ dawn l-inbejjed.
Dawn l-emendi ma jaffettwawx id-Dokument Uniku.
11. Maturazzjoni tal-għeneb u qawwa alkoħolika minima natural skont il-volum
Fil-Kapitolu I, it-Taqsima VII(2)(a), tal-Ispeċifikazzjoni tal-Prodott, it-tabella ġiet emendata biex titqies l-applikazzjoni għar-rikonoxximent tal-inbejjed ħomor bla gass li saret fil-livell nazzjonali għal ċerti denominazzjonijiet ta’ oriġini Alsace grand cru.
Għad-denominazzjoni Alsace grand cru Kirchberg de Barr, il-kontenut minimu ta’ zokkor tal-għeneb fil-ħsad huwa stabbilit għal 207 grammi għal kull litru ta’ most għall-pinot noir N. Il-qawwa alkoħolika naturali minima skont il-volum ġiet stabbilita għal 12 % vol.
Din l-aħħar indikazzjoni temenda l-punt 4 tad-Dokument Uniku.
Għall-inbejjed bojod, il-valuri minimi tal-kontenut taz-zokkor tal-għeneb żdiedu b’2 jew 3 grammi għal kull litru ta’ most sabiex tiġi rrispettata l-istess differenza ta’ 1 % vol. bil-valuri għal kull qawwa alkoħolika naturali minima skont il-volum, bħal fil-verżjoni preċedenti tal-Ispeċifikazzjoni tal-Prodott. Il-korp ta’ protezzjoni u ġestjoni għażel li għall-kalkolu tat-trasformazzjoni tal-grammi taz-zokkor f’alkoħol, juża l-valur ta’ 17-il gramma zokkor għal kull 1 % vol. għall-inbejjed bojod, filwaqt li fil-verżjoni inizjali tal-Ispeċifikazzjoni tal-Prodott kien uża l-valur ta’ 16,83. Dan il-valur ta’ 17 kien irrakkomandat mill-kumitat nazzjonali kompetenti tal-INAO meta ġiet stabbilita l-ewwel verżjoni tal-Ispeċifikazzjoni tal-Prodott.
Din l-emenda ma taffettwax id-Dokument Uniku.
12. Rendimenti
Fil-Kapitolu I, it-Taqsima VIII(1) u (2), tal-Ispeċifikazzjoni tal-Prodott, tnaqqsu kemm ir-rendimenti kif ukoll ir-rendimenti ta’ limitu, u b’hekk sar possibbli kontroll tal-kwalità aħjar għall-inbejjed bojod u l-inbejjed bojod bl-indikazzjoni “Vendanges tardives”, f’konformità mal-istruttura ġerarkika tad-denominazzjonijiet tar-reġjun ta’ Alsace.
Ġie miżjud il-kliem “Inbejjed bojod” għall-inbejjed mingħajr indikazzjoni, minħabba li saret applikazzjoni għar-rikonoxximent tal-inbejjed ħomor bla gass fil-livell nazzjonali għal ċerti denominazzjonijiet ta’ oriġini Alsace grand cru.
Ir-rendiment u r-rendiment ta’ limitu għall-inbejjed ħomor ġew stabbiliti skont l-istruttura ġerarkika tad-denominazzjonijiet fir-reġjun ta’ Alsace, u għalhekk f’valuri aktar baxxi għal dawn id-denominazzjonijiet tal-grand cru.
Il-punt 5 tad-Dokument Uniku ġie emendat fir-rigward tar-rendimenti massimi (ir-rendimenti ta’ limitu).
13. Fermentazzjoni malolattika, kontenut ta’ zokkor fermentabbli għall-inbejjed ħomor
Fil-Kapitolu I, it-Taqsima IX(1)(c), tal-Ispeċifikazzjoni tal-Prodott, ġie speċifikat li l-fermentazzjoni malolattika titlesta għall-inbejjed ħomor.
Sabiex tiġi kkontrollata din ir-regola, ġie stabbilit kontenut ta’ aċidu maliku ta’ 0,4 grammi għal kull litru jew inqas fl-istadju tal-ippakkjar.
Fit-Taqsima IX(1)(d), għall-inbejjed ħomor, ġie stabbilit kontenut ta’ zokkor fermentabbli (glukożju u fruttożju) ta’ 2 grammi jew inqas għal kull litru wara l-fermentazzjoni.
Il-punt 4 tad-Dokument Uniku ġie emendat.
14. Projbizzjoni taż-żieda tal-qawwa alkoħolika naturali minima skont il-volum għall-inbejjed ħomor
Fil-Kapitolu I, it-Taqsima IX(1)(e), tal-Ispeċifikazzjoni tal-Prodott, ġie speċifikat li l-inbejjed ħomor ma jiġux imsaħħa. Din ir-restrizzjoni applikabbli għall-produzzjoni tal-inbejjed hija possibbli minħabba l-maturazzjoni perfetta tal-għeneb fil-ħsad miksuba bis-saħħa tad-demarkazzjoni preċiża tal-vinja li żammet lill-irqajja’ art protetti mill-irjieħ kesħin tat-Tramuntana, li jinsabu fuq ħamrija ġeblija ħafna li tiżgura skular tajjeb u li tisħon malajr, minħabba d-densità relattivament għolja tal-pjantaġġun kif ukoll it-tħarriġ tad-dwieli fuq kannizzati għoljin, sabiex jibbenefikaw minn erja tal-weraq ottimali, u minħabba regola stretta taż-żbir li tippermetti rendimenti kkontrollati.
Il-punt 5 tad-Dokument Uniku ġie emendat.
15. Kapaċità tal-kamra tal-fermentazzjoni għall-vinifikazzjoni
Fil-Kapitolu I, it-Taqsima IX(1)(g), tal-Ispeċifikazzjoni tal-Prodott, il-koeffiċjent għall-kalkolu tal-kapaċità tal-kamra tal-fermentazzjoni għall-vinifikazzjoni ġie mnaqqas.
Il-proporzjon bejn il-volum tal-ħsad preċedenti u l-kapaċità tal-kamra tal-fermentazzjoni ma għandux għalfejn ikun għoli daqshekk.
Din l-emenda ma taffettwax id-Dokument Uniku.
16. Data tat-tqaddim u tat-tqegħid fis-suq għall-konsumatur għall-inbejjed ħomor
Fil-Kapitolu I, it-Taqsima IX(2), tal-Ispeċifikazzjoni tal-Prodott, ġie stabbilit perjodu minimu ta’ tqaddim għall-inbejjed ħomor sal-1 ta’ Ottubru tas-sena ta’ wara dik tal-ħsad. L-inbejjed prodotti bl-għeneb tal-varjetà pinot noir N minn din l-art jeħtieġu perjodu ta’ żmien minimu biex jesprimu tajjeb il-karatteristiċi tagħhom.
Il-punt 5 tad-Dokument Uniku ġie emendat.
Fil-Kapitolu I, it-Taqsima IX(5)(a), ġie indikat li wara jintemm il-perjodu ta’ tqaddim, l-inbejjed ħomor jistgħu jitqiegħdu fis-suq għall-konsumatur biss mill-1 ta’ Ottubru tas-sena ta’ wara dik tal-ħsad.
Din l-emenda ma tinvolvi ebda emenda għad-Dokument Uniku.
17. Spezzjoni tal-lottijiet ippakkjati
Fil-Kapitolu I, it-Taqsima IX(3)(b), tal-Ispeċifikazzjoni tal-Prodott, tneħħiet ir-regola dwar iż-żamma ta’ fliexken kampjuni biex jintwerew fi spezzjoni tal-lottijiet ippakkjati.
Din ir-regola hija miżura ta’ kontroll li hija rreġistrata fil-pjan ta’ kontroll.
Id-Dokument Uniku ma huwiex affettwat minn din l-emenda.
18. Ħażna tal-inbejjed ippakkjati
Fil-Kapitolu I, it-Taqsima IX(4), tal-Ispeċifikazzjoni tal-Prodott, ġew speċifikati l-karatteristiċi tal-post tal-ħażna tal-inbejjed ippakkjati.
Dan jippermetti lill-operaturi jifhmu aħjar din ir-regola, u jiffaċilita l-ispezzjoni tagħha.
Din l-emenda ma taffettwax id-Dokument Uniku.
19. Fatturi umani li jikkontribwixxu għar-rabta maż-żona ġeografika
Fil-Kapitolu I, it-Taqsima X(1)(b), tal-Ispeċifikazzjoni tal-Prodott, it-test ġie emendat biex jitqies ir-rikonoxximent tal-inbejjed ħomor bla gass għad-denominazzjonijiet ta’ oriġini Alsace grand cru Hengst u Alsace grand cru Kirchberg de Barr:
|
— |
ġiet miżjuda l-informazzjoni li ġejja għad-denominazzjoni ta’ oriġini kkontrollata Alsace grand cru Hengst: rikonoxximent fl-2022 għall-inbejjed ħomor, hija awtorizzata biss il-varjetà tad-dwieli pinot noir N, id-densità minima tat-tħawwil hija ta’ 5 500 pjanta għal kull ettaru għall-produzzjoni tal-inbid aħmar, dawn l-inbejjed ma jiġux imsaħħa, u jridu josservaw perjodu minimu ta’ tqaddim ta’ 10 xhur. Id-Dokument Uniku ma huwiex emendat b’din l-emenda. |
|
— |
ġiet miżjuda l-informazzjoni li ġejja għad-denominazzjoni ta’ oriġini kkontrollata Alsace grand cru Kirchberg de Barr: rikonoxximent fl-2022 għall-inbejjed ħomor, hija awtorizzata biss il-varjetà tad-dwieli pinot noir N, id-densità minima tat-tħawwil hija ta’ 5 000 pjanta għal kull ettaru għall-produzzjoni tal-inbid aħmar, dawn l-inbejjed ma jiġux imsaħħa, u jridu josservaw perjodu minimu ta’ tqaddim ta’ 10 xhur. Il-punti 4, 5 u 7 tad-Dokument Uniku ġew emendati. Fit-Taqsima X(1)(b), tneħħiet l-informazzjoni li r-rikonoxximent ta’ dawn iż-żewġ denominazzjonijiet ta’ oriġini kien ibbażat fuq varjetajiet ta’ għeneb abjad, u l-kliem “għall-inbejjed bojod” ġie miżjud fejn meħtieġ biex it-test jinftiehem aħjar. Id-Dokument Uniku ma huwiex emendat b’dawn l-emendi. Fit-Taqsima X(1)(b), il-kelmiet “blancs” u “roses” ġew miżjuda mal-ismijiet tal-varjetajiet ta’ muscats à petits grains sabiex jiġi kkoreġut nuqqas fil-verżjoni preċedenti tal-Ispeċifikazzjoni tal-Prodott. Dawn iż-żidiet ma jemendawx id-Dokument Uniku. |
20. Deskrizzjoni tal-inbid/inbejjed
Fil-Kapitolu I, it-Taqsima X(2), tal-Ispeċifikazzjoni tal-Prodott, ġiet miżjuda deskrizzjoni tal-aspett viżiv tal-inbejjed bojod sabiex jiġu karatterizzati aħjar.
Rigward l-ewwel 2 tipi ta’ nbejjed deskritti: “Dawn iż-żewġ tipi ta’ nbejjed għandhom kulur qawwi sa isfar dehbi.”
Rigward l-aħħar 2 tipi ta’ nbid deskritti: “Dawn iż-żewġ tipi ta’ nbejjed għandhom kulur qawwi sa isfar ambra.”
Fil-Kapitolu I, it-Taqsima X(2), ġiet miżjuda d-deskrizzjoni tal-karatteristiċi organolettiċi prinċipali tal-inbejjed ħomor għad-denominazzjonijiet ta’ oriġini Alsace grand cru Hengst u Alsace grand cru Kirchberg de Barr.
Għad-denominazzjoni Alsace grand cru Kirchberg de Barr, ġie miżjud it-test li ġej:
“L-inbejjed bil-kulur aħmar skur u qawwi għandhom aroma kumplessa ta’ frott iswed, ħwawar, aċidità kbira u volum, iżda huma fini ħafna. It-togħma finali ddum u hija mielħa. Għandhom potenzjal kbir ta’ tqaddim.”
Il-punt 4 tad-Dokument Uniku ġie emendat.
21. Miżuri tranżizzjonali
Fil-Kapitolu I, it-Taqsima XI(2), tal-Ispeċifikazzjoni tal-Prodott, għall-konformità mal-emendi tal-Kapitolu I, it-Taqsima VI, l-għoli massimu tal-wajer ta’ appoġġ tal-arkata tħassar u n-numru massimu ta’ għejun għal kull pjanta tnaqqas.
Din l-emenda ma taffettwax id-Dokument Uniku.
22. Indikazzjoni obbligatorja tal-kontenut taz-zokkor fuq it-tikkettar u mezzi oħra ta’ informazzjoni għall-inbejjed bojod
Fil-Kapitolu I, it-Taqsima XII(2)(d), tal-Ispeċifikazzjoni tal-Prodott, iddaħħal test ġdid, bħala sostituzzjoni, sabiex l-indikazzjoni tal-kontenut taz-zokkor kif definit fir-Regolament (UE) 2019/33, li attwalment hija fakultattiva, issir obbligatorja.
Din l-indikazzjoni tgħin lill-konsumatur jifhem aħjar dan it-tip ta’ nbid.
Din ir-regola l-ġdida ma tapplikax għall-inbejjed bl-indikazzjonijiet tradizzjonali “vendanges tardives” u “sélection de grains nobles”.
Il-punt 9 tad-Dokument Uniku ġie ssupplimentat.
F’XII, l-ittra d tal-punt 2 saret l-ittra e.
Din l-emenda ma taffettwax id-Dokument Uniku.
23. Dikjarazzjoni minn qabel tal-użu tal-irqajja’ art
Fil-Kapitolu II, it-Taqsima I(1), tal-Ispeċifikazzjoni tal-Prodott, ġiet miżjuda kjarifika mar-regoli relatati mad-dikjarazzjoni minn qabel tal-użu tal-irqajja’ art ippreżentata mill-operatur lill-korp ta’ protezzjoni u ġestjoni tad-denominazzjoni ta’ oriġini Alsace grand cru, f’każ li jieqaf jipproduċi din id-denominazzjoni.
Din l-emenda ma taffettwax id-Dokument Uniku.
24. Indikazzjonijiet tradizzjonali “vendanges tardives” u “sélection de grains nobles” u l-isem użat
Fil-punt 9 “Rekwiżiti addizzjonali” tad-Dokument Uniku:
L-intestatura “Indikazzjonijiet tradizzjonali” ġiet emendata biex jiġu speċifikati l-ismijiet użati awtorizzati għall-indikazzjonijiet “vendanges tardives” u “sélection de grains nobles” minħabba ż-żieda tal-isem użat Pinot noir fl-intestatura “Isem użat”.
DOKUMENT UNIKU
1. Isem/ismijiet għar-reġistrazzjoni
Alsace grand cru Kirchberg de Barr
2. Tip ta’ indikazzjoni ġeografika
DOP - Denominazzjoni ta’ Oriġini Protetta
3. Kategoriji tal-prodotti tad-dwieli
|
1. |
Inbid |
4. Deskrizzjoni tal-inbid/inbejjed
1.
DESKRIZZJONI TESTWALI KONĊIŻA
Il-qawwa alkoħolika naturali minima skont il-volum hija ta’ 12,5 % għall-gewurztraminer Rs u għall-pinot gris G u ta’ 11 % għall-varjetajiet tad-dwieli l-oħra.
Wara t-tisħiħ, l-inbejjed ma jkollhomx qawwa alkoħolika totali skont il-volum ta’ aktar minn 15 % għall-inbejjed magħmulin mill-varjetajiet tad-dwieli gewurztraminer B u pinot gris G u 14 % għall-inbejjed magħmulin mill-varjetajiet tad-dwieli l-oħra.
Il-karatteristiċi analitiċi l-oħra huma dawk stipulati fil-leġiżlazzjoni Komunitarja.
Huma eżempji eċċellenti ta' nbejjed bojod adattati għat-tqaddim u huma kkaratterizzati minn freskezza evidenti bbażata fuq aċidità tartarika dominanti relatata mal-maturazzjoni tajba tal-għeneb. L-isem tad-denominazzjoni jista’ jiġi ssupplimentat b’ismijiet użati, sakemm l-inbejjed ikunu magħmulin esklużivament minn varjetajiet tad-dwieli li jistgħu jiġu indikati bl-isem ikkonċernat. Għandhom palat sħiħ, huma kumplessi u għandhom riħa qawwija ħafna b’varjetà ta’ sfumaturi aromatiċi. B’togħma li ddum tintiegħem, isiru aktar kumplessi biż-żmien. Jiżviluppaw noti aktar kumplessi u armonija bbażata fuq ħafna mineralità, finezza u togħma li ddum tintiegħem. Issir distinzjoni bejn l-inbejjed xotti, minerali u l-inbejjed aromatiċi, tal-frott, magħquda, rikki. Dawn iż-żewġ tipi ta’ nbejjed għandhom kulur qawwi sa isfar dehbi.
|
Karatteristiċi analitiċi |
|
|
Qawwa alkoħolika totali massima (f’% tal-volum) |
|
|
Qawwa alkoħolika proprja minima (f’% tal-volum) |
|
|
Aċidità totali minima |
f’milliekwivalenti għal kull litru |
|
Aċidità volatili massima (f’milliekwivalenti għal kull litru) |
|
|
Total massimu ta’ diossidu tal-kubrit (f’milligrammi għal kull litru) |
|
2.
DESKRIZZJONI TESTWALI KONĊIŻA
Il-qawwa alkoħolika naturali minima skont il-volum tal-inbejjed hija ta’ 16 % għall-gewurztraminer Rs u għall-pinot gris G u ta’ 14,5 % għall-varjetajiet tad-dwieli l-oħra.
Il-karatteristiċi analitiċi l-oħra huma dawk stipulati fil-leġiżlazzjoni Komunitarja.
L-inbejjed bl-indikazzjoni “vendanges tardives” (ħsad tardiv) spiss ikollhom aromi eżotiċi ħafna ta’ frott ippreżervat u b’finitura friska. Għandhom kulur qawwi sa isfar ambra. Għandhom konċentrazzjoni notevoli u persistenza aromatika kbira.
|
Karatteristiċi analitiċi |
|
|
Qawwa alkoħolika totali massima (f’% tal-volum) |
|
|
Qawwa alkoħolika proprja minima (f’% tal-volum) |
|
|
Aċidità totali minima |
f’milliekwivalenti għal kull litru |
|
Aċidità volatili massima (f’milliekwivalenti għal kull litru) |
|
|
Total massimu ta’ diossidu tal-kubrit (f’milligrammi għal kull litru) |
|
3.
DESKRIZZJONI TESTWALI KONĊIŻA
Il-qawwa alkoħolika naturali minima skont il-volum tal-inbejjed hija ta’ 18,2 % għall-gewurztraminer Rs u għall-pinot gris G u ta’ 16,4 % għall-varjetajiet tad-dwieli l-oħra.
Il-karatteristiċi analitiċi l-oħra huma dawk stipulati fil-leġiżlazzjoni Komunitarja.
L-inbejjed bl-indikazzjoni “sélection de grains nobles” (għażla ta’ żrieragħ nobbli) huma nbejjed aktar ikkonċentrati, qawwija, li spiss ikollhom aromi ta’ pejst tal-frott. Għandhom kulur qawwi sa isfar ambra. Għandhom konċentrazzjoni notevoli u persistenza aromatika kbira.
|
Karatteristiċi analitiċi |
|
|
Qawwa alkoħolika totali massima (f’% tal-volum) |
|
|
Qawwa alkoħolika proprja minima (f’% tal-volum) |
|
|
Aċidità totali minima |
f’milliekwivalenti għal kull litru |
|
Aċidità volatili massima (f’milliekwivalenti għal kull litru) |
|
|
Total massimu ta’ diossidu tal-kubrit (f’milligrammi għal kull litru) |
|
4.
DESKRIZZJONI TESTWALI KONĊIŻA
L-inbejjed għandhom qawwa alkoħolika naturali minima skont il-volum ta’ 12 % għall-pinot noir N.
Il-fermentazzjoni malolattika tkun kompluta. Fl-istadju tal-ippakkjar, l-inbejjed ikollhom kontenut ta’ aċidu maliku ta’ 0,4 grammi jew inqas għal kull litru.
Wara l-fermentazzjoni, l-inbejjed ikollhom kontenut ta’ zokkor fermentabbli ta’ 2 grammi jew inqas għal kull litru.
Il-karatteristiċi analitiċi l-oħra huma dawk stipulati fil-leġiżlazzjoni Komunitarja.
L-inbejjed bil-kulur aħmar skur u qawwi għandhom aroma kumplessa ta’ frott iswed, ħwawar, aċidità kbira u volum, iżda huma fini ħafna. It-togħma finali ddum u hija mielħa.
|
Karatteristiċi analitiċi |
|
|
Qawwa alkoħolika totali massima (f’% tal-volum) |
|
|
Qawwa alkoħolika proprja minima (f’% tal-volum) |
|
|
Aċidità totali minima |
|
|
Aċidità volatili massima (f’milliekwivalenti għal kull litru) |
|
|
Total massimu ta’ diossidu tal-kubrit (f’milligrammi għal kull litru) |
|
5. Prattiki tal-produzzjoni tal-inbid
5.1. Prattiki enoloġiċi speċifiċi
1.
Prattika tal-kultivazzjoni
Għall-produzzjoni tal-inbejjed bojod, id-densità minima tat-tħawwil tad-dwieli hija ta’ 4 500 pjanta għal kull ettaru.
Għall-produzzjoni tal-inbejjed ħomor, id-densità minima tat-tħawwil tad-dwieli hija ta’ 5 000 pjanta għal kull ettaru.
Dawn id-dwieli ma jistax ikollhom distanza bejn il-flanni ta’ aktar minn 2 metri.
Id-dwieli għandhom distanza bejn il-flanni ta’ mill-inqas 0,75 metri u mhux aktar minn 1,50 metri.
Mill-25 ta’ Ottubru 2011, il-qlugħ tas-siġar tal-flanni f’roqgħa art ma jistax jirriżulta f’distanza ta’ aktar minn 3 metri bejn il-flanni l-aktar wisgħin.
2.
Prattika tal-kultivazzjoni
Għall-inbejjed bojod, id-dwieli jinżabru qosra bil-metodu Guyot sempliċi jew doppju b’massimu ta’ 18-il għajn għal kull pjanta.
Għall-inbejjed ħomor, id-dwieli jinżabru qosra bil-metodu Guyot sempliċi jew doppju b’massimu ta’ 14-il għajn għal kull pjanta.
3.
Prattika tal-kultivazzjoni
L-inbejjed huma magħmula minn għeneb maħsud bl-idejn.
4.
Prattika enoloġika speċifika
Għall-inbejjed bojod, iż-żieda fil-qawwa alkoħolika naturali minima skont il-volum medja ma tistax taqbeż 0,5 % vol. għall-inbejjed mill-varjetajiet tad-dwieli gewurztraminer B u pinot gris G u 1,5 % vol. għall-inbejjed minn varjetajiet tad-dwieli oħrajn.
L-inbejjed bojod li jistgħu jibbenefikaw mill-indikazzjonijiet “vendanges tardives” jew “sélection de grains nobles” u l-inbejjed ħomor ma jiġux imsaħħa.
5.
Restrizzjoni applikabbli għall-produzzjoni tal-inbejjed
L-użu taċ-ċana huwa pprojbit.
6.
Prattika enoloġika speċifika
L-inbejjed bojod jitħallew jitqaddmu mill-inqas sal-1 ta’ Ġunju tas-sena ta’ wara dik tal-ħsad.
L-inbejjed ħomor jitħallew jitqaddmu mill-inqas sal-1 ta’ Ottubru tas-sena ta’ wara dik tal-ħsad.
L-inbejjed li jistgħu jibbenefikaw mill-indikazzjonijiet “vendanges tardives” jew “sélection de grains nobles” jiġu mqaddma mill-inqas sal-1 ta’ Ġunju tat-tieni sena ta’ wara dik tal-ħsad.
5.2. Rendimenti massimi għal kull ettaru
1.
60 ettolitru għal kull ettaru
2.
48 ettolitru għal kull ettaru
3.
48 ettolitru għal kull ettaru
6. Żona ġeografika demarkata
Il-ħsad tal-għeneb, il-vinifikazzjoni, il-produzzjoni u t-tqaddim tal-inbejjed isiru fit-territorju tal-muniċipalitajiet li ġejjin, abbażi tal-Kodiċi Ġeografiku Uffiċjali tas-sena 2021:
|
— |
Id-département ta’ Haut-Rhin: Il-muniċipalitajiet sħaħ ta’: Ammerschwihr, Beblenheim, Bennwihr, Bergheim, Bergholtz, Eguisheim, Gueberschwihr, Guebwiller, Hattstatt, Hunawihr, Ingersheim, Katzenthal, Mittelwihr, Niedermorschwihr, Orschwihr, Pfaffenheim, Ribeauvillé, Riquewihr, Rodern, Rouffach, Saint-Hippolyte, Soultzmatt, Thann, Turckheim, Vieux-Thann, Voegtlinshoffen, Westhalten, Wettolsheim, Wintzenheim, Wuenheim, Zellenberg. Parti mill-muniċipalità ta’: Kaysersberg Vignoble għat-territorju tal-muniċipalitajiet delegati ta’ Kientzheim u ta’ Sigolsheim biss. |
|
— |
Id-département ta’ Bas-Rhin: Andlau, Barr, Bergbieten, Blienschwiller, Dahlenheim, Dambach-la-Ville, Eichhoffen, Kintzheim, Marlenheim, Mittelbergheim, Molsheim, Nothalten, Scharrachbergheim-Irmstett, Wolxheim. Il-kunsill lokali tal-muniċipalitajiet li jinsabu parzjalment fit-territorju għandhom mappa li tidentifika l-limiti taż-żona ġeografika. Il-mapep li jirrappreżentaw iż-żona ġeografika huma disponibbli fis-sit web tal-INAO. |
7. Varjetà jew varjetajiet tad-dwieli li minnhom jinkiseb l-inbid/jinkisbu l-inbejjed
Gewurztraminer Rs
Muscat Ottonel B - Muscat, Moscato
Muscat à petits grains blancs B - Muscat, Moscato
Muscat à petits grains roses Rs - Muscat, Moscato
Pinot gris G
Pinot noir N
Riesling B
8. Deskrizzjoni tar-rabta/rabtiet
Id-denominazzjoni ta’ oriġini kkontrollata Alsace grand cru Kirchberg de Barr hija bbażata fuq il-kundizzjonijiet klimatiċi favorevoli li jikkaratterizzaw il-vinji ta’ Alsace, u tisfrutta wieħed mill-aqwa postijiet tar-reġjun. Mistura fil-pajsaġġ pittoresk ta’ Alsace, il-vinja tippermetti l-produzzjoni ta’ nbejjed b’espressjoni kbira, b’karattru evidenti u personalità unika.
Protett mit-Tramuntana u ppożizzjonat fuq ħamrija li tisħon malajr, il-grand cru jagħti lill-inbejjed il-mineralità u s-salinità kif ukoll il-kumplessità tal-aċidità.
Bi ftuħ medjament bikri u tqaddim bil-mod, l-inbejjed biż-żmien jiżviluppaw riħa fina, togħma qawwija li ddum, freskezza u mineralità.
Il-kundizzjonijiet tat-temp eċċellenti fl-aħħar tal-istaġun jiffavorixxu l-konċentrazzjoni tal-għeneb fuq id-dielja u l-iżvilupp tal-moffa nobbli, u jippermettu l-produzzjoni ta’ nbejjed minn għeneb misjur iżżejjed.
It-tqaddim previst fl-Ispeċifikazzjoni tal-Prodott jgħin biex l-inbejjed jitjiebu.
Bl-adozzjoni ta’ regoli ta’ produzzjoni stretti, bħaż-żamma ta’ erja kbira tal-weraq u l-ħsad bl-idejn, il-produtturi tal-inbid ta’ Alsace jippreservaw il-karattru distintiv tal-inbejjed, li huma magħrufa għall-kumplessità tagħhom u għall-kapaċità ta’ konservazzjoni fit-tul tagħhom.
Dawn l-inbejjed huma fost l-aqwa prodotti f’dan ir-reġjun. Huma apprezzati aktar mill-inbejjed tad-denominazzjoni ta’ oriġini kkontrollata Alsace.
9. Rekwiżiti oħra applikabbli
Żona fil-viċinanza immedjata
Qafas legali
Il-leġiżlazzjoni nazzjonali
Tip ta’ rekwiżit addizzjonali
Deroga dwar il-produzzjoni fiż-żona ġeografika demarkata
Deskrizzjoni tar-rekwiżit:
Iż-żona fil-viċinanza immedjata, iddefinita b’deroga għall-vinifikazzjoni, il-produzzjoni u t-tqaddim tal-inbejjed, hija magħmula mit-territorju tal-muniċipalitajiet li ġejjin, abbażi tal-Kodiċi Ġeografiku Uffiċjali tas-sena 2021:
|
— |
Id-département ta’ Haut-Rhin: Il-muniċipalitajiet sħaħ ta’: Bergholtz-Zell, Berrwiller, Buhl, Cernay, Colmar, Gundolsheim, Hartmanswiller, Herrlisheim, Houssen, Husseren-les-Châteaux, Jungholtz, Leimbach, Obermorschwihr, Osenbach, Ostheim, Rorschwihr, Soultz, Steinbach, Uffholtz, Walbach, Wattwiller, Wihr-au-Val, Zimmerbach. Parti mill-muniċipalità ta’: Kaysersberg Vignoble, għat-territorju tal-muniċipalità delegata ta’ Kaysersberg biss |
|
— |
Id-département ta’ Bas-Rhin: Albé, Avolsheim, Balbronn, Bernardswiller, Bernardvillé, Bischoffsheim, Boersch, Bourgheim, Châtenois, Cleebourg, Dachstein, Dangolsheim, Dieffenthal, Dorlisheim, Epfig, Ergersheim, Ernolsheim- Bruche, Fessenheim-le-Bas, Flexbourg, Furdenheim, Gertwiller, Gimbrett-Berstett, Goxwiller, Heiligenstein, Itterswiller, Kienheim, Kirchheim, Kuttolsheim, Mittelhausen, Mutzig, Nordheim, Oberhoffen-les-Wissenbourg, Obernai, Odratzheim, Orschwiller, Osthoffen, Ottrott, Petersbach, Reichsfeld, Riedseltz, Rosenwiller, Rosheim, Rott, Saint-Nabor, Saint-Pierre, Scherwiller, Seebach, Soultz-les-Bains, Steinseltz, Stotzheim, Strasbourg, Traenheim, Villé, Wangen, Westhoffen, Wissembourg, Zellwiller. |
Ippakkjar fiż-żona
Qafas legali
Il-leġiżlazzjoni nazzjonali
Tip ta’ rekwiżit addizzjonali:
L-ippakkjar fiż-żona ġeografika demarkata
Deskrizzjoni tar-rekwiżit
L-inbejjed jiġu ppakkjati fi fliexken tat-tip Vin du Rhin skont id-dispożizzjonijiet tad-Digriet Nru 55-673 tal-20 ta’ Mejju 1955, tal-Ordni tat-13 ta’ Mejju 1959 u tad-Digriet tad-19 ta’ Marzu 1963, u kull tip ta’ flixkun ieħor huwa eskluż.
Minn meta daħlet fis-seħħ il-liġi tal-5 ta’ Lulju 1972, l-inbejjed bilfors iridu jiġu bbottiljati fid-départements ta’ Bas-Rhin u Haut-Rhin fil-fliexken tat-tip Vin du Rhin, deskritti fid-Digriet tal-1955.
Indikazzjoni tal-annata
Qafas legali
Il-leġiżlazzjoni nazzjonali
Tip ta’ rekwiżit addizzjonali
Dispożizzjonijiet addizzjonali dwar it-tikkettar
Deskrizzjoni tar-rekwiżit
L-indikazzjoni tal-annata trid tidher flimkien mal-isem tad-denominazzjoni, fid-dikjarazzjonijiet tal-ħsad u tal-ħażniet, fuq id-dokumenti ta’ akkumpanjament, fir-reklami, fuq il-prospetti, it-tikketti, il-fatturi u kwalunkwe kontenitur ieħor.
Isem użat
Qafas legali
Il-leġiżlazzjoni nazzjonali
Tip ta’ rekwiżit addizzjonali
Dispożizzjonijiet addizzjonali dwar it-tikkettar
Deskrizzjoni tar-rekwiżit
L-isem tad-denominazzjoni ta’ oriġini kkontrollata jista’ jiġi ssupplimentat b’wieħed mill-ismijiet użati, dment li l-inbejjed ikunu magħmulin esklużivament minn varjetajiet tad-dwieli li jistgħu jiġu indikati bl-isem ikkonċernat.
Huwa pprojbit li jintuża aktar minn isem użat wieħed fuq l-istess tikketta.
Dawn l-ismijiet użati huma dawn li ġejjin
Gewurztraminer,
Muscat,
Muscat Ottonel,
Pinot gris,
Pinot noir,
Riesling.
Indikazzjonijiet tradizzjonali “vendanges tardives” u “sélection de grains nobles”
Qafas legali
Il-leġiżlazzjoni nazzjonali
Tip ta’ rekwiżit addizzjonali
Dispożizzjonijiet addizzjonali dwar it-tikkettar
Deskrizzjoni tar-rekwiżit:
L-inbejjed li jistgħu jibbenefikaw mill-indikazzjonijiet “vendanges tardives” jew “sélection de grains nobles” bilfors irid ikollhom:
|
— |
l-indikazzjoni tal-annata, |
|
— |
u wieħed mill-ismijiet użati li ġejjin: |
Gewurztraminer,
Muscat,
Muscat Ottonel,
Pinot gris,
Riesling.
Indikazzjoni tal-kontenut taz-zokkor għall-inbejjed bojod
Qafas legali:
Il-leġiżlazzjoni nazzjonali
Tip ta’ rekwiżit addizzjonali
Dispożizzjonijiet addizzjonali dwar it-tikkettar
Deskrizzjoni tar-rekwiżit:
L-inbejjed bojod li għalihom, skont it-termini ta’ din l-Ispeċifikazzjoni tal-Prodott, tintalab waħda mill-51 Denominazzjoni ta’ Oriġini Kkontrollata Alsace Grand Cru - post imsemmi, bl-eċċezzjoni tal-indikazzjonijiet “Vendanges Tardives” u “Sélection de Grains nobles”, li huma ppreżentati taħt l-imsemmija denominazzjoni, ma jistgħux jiġu offruti lill-pubbliku, ikkunsinnati, imqiegħda għall-bejgħ jew jinbiegħu, sakemm il-kontenut taz-zokkor kif definit mir-regolamenti Ewropej ma jkunx indikat b’mod ċar ħafna fir-reklami, il-prospetti, it-tikketti, il-fatturi u l-kontenituri kollha.
Link għall-ispeċifikazzjoni tal-prodott
https://info.agriculture.gouv.fr/gedei/site/bo-agri/document_administratif-4cec3ff9-abd4-4253-a1db-245ddd809faa