Komunikazzjoni tal-Kummissjoni dwar linji gwida għat-tnaqqis tal-kwoti skont l-Artikolu 105(1), (2) u (5) tar-Regolament (KE) Nru 1224/2009, u li tissostitwixxi l-Komunikazzjoni 2012/C 72/07

(2022/C 369/03)

Meta l-Kummissjoni tkun stabbiliet li Stat Membru jkun qabeż il-kwoti allokati lilu, skont l-Artikolu 105(1) tar-Regolament (KE) Nru 1224/2009, għandha twettaq tnaqqis minn kwoti futuri ta’ dak l-Istat Membru.

Skont l-Artikolu 105(2), fil-każ ta’ sajd żejjed aktar mill-kwota disponibbli għal Stat Membru f’sena speċifika, għandu jitwettaq tnaqqis fis-sena jew is-snin li jsegwu mill-kwota annwali ta’ dak l-Istat Membru.

Jekk ma jistax jitwettaq tnaqqis skont l-Artikolu 105(1) u (2) fuq il-kwota fejn ikun sar sajd żejjed minħabba li dik il-kwota mhijiex disponibbli għall-Istat Membru kkonċernat, jew mhijiex disponibbli b’mod suffiċjenti, skont l-Artikolu 105(5) jista’ jitwettaq tnaqqis, wara konsultazzjoni mal-Istat Membru kkonċernat, fil-kwoti tas-sena jew snin ta’ wara minn stokkijiet jew gruppi ta’ stokkijiet oħra disponibbli għal dak l-Istat Membru fl-istess żona ġeografika, jew bl-istess valur kummerċjali.

Bil-għan li tiġi ffaċilitata applikazzjoni trasparenti u konsistenti ta’ dawn id-dispożizzjonijiet f’konformità mal-prinċipju tat-trattament indaqs, il-Kummissjoni trid tagħmel pubbliċi l-prinċipji li se jiggwidawha fit-tnaqqis tal-kwoti.

Din il-Komunikazzjoni tissostitwixxi l-Komunikazzjoni 2012/C 72/07 (1) u żżid dan li ġej ma’ dak li diġà pprevediet dik il-Komunikazzjoni: it-tnaqqis f’każ ta’ sajd żejjed aktar mill-kwota għal stokkijiet ġestiti minn organizzazzjonijiet reġjonali tal-ġestjoni tas-sajd disponibbli għal Stat Membru f’sena partikolari għandu, fejn applikabbli, isegwi l-istess skeda ta’ żmien bħal fl-organizzazzjonijiet reġjonali tal-ġestjoni tas-sajd ikkonċernati.

Għalhekk, il-Kummissjoni, fl-applikazzjoni tal-Artikolu 105(1), (2) u (5) tar-Regolament (KE) Nru 1224/2009, se tkun immexxija mill-prinċipji li ġejjin.

It-totalità tat-tnaqqis (minn hawn ’il quddiem “għoti lura”), inkluż l-ammonti li jirriżultaw minn fatturi multiplikanti applikabbli, hija dovuta fis-sena ta’ wara li jkun sar is-sajd żejjed.

Madankollu, f’każ ta’ sajd żejjed aktar mill-kwota għall-istokkijiet ġestiti minn organizzazzjonijiet reġjonali tal-ġestjoni tas-sajd, l-għoti lura, inklużi l-ammonti li jirriżultaw minn fatturi multiplikanti applikabbli, huwa dovut fis-sena/snin li l-aġġustament isir jew fis-sena/snin deċiżi mill-organizzazzjoni reġjonali tal-ġestjoni tas-sajd ikkonċernata.

Jekk l-għoti lura jkun ikbar mill-kwota disponibbli, it-tnaqqis se jitwettaq sal-massimu tal-kwota disponibbli fis-sena ta’ wara li jkun sar is-sajd żejjed. It-tnaqqis li jifdal se jitwettaq fuq il-kwoti disponibbli fis-sena jew, jekk ikun meħtieġ, fis-snin ta’ wara, sakemm l-ammont totali ta’ sajd żejjed (inkluż l-ammonti li jirriżultaw minn fatturi multiplikanti applikabbli) jingħata lura.

B’deroga mill-punt 2 hawn fuq, tista’ tingħata possibbiltà eċċezzjonali ta’ għoti lura aktar bil-mod (jiġifieri, rata ta’ 50/50 fuq sentejn jew għoti lura bħala perċentwal tal-ammont dovut mifrux fuq aktar minn sentejn) jekk tintlaħaq waħda mill-kundizzjonijiet li ġejjin:

(a)	il-ħut jiġi ġestit b’mod sostenibbli abbażi tal-parir xjentifiku rilevanti għall-istokk ikkonċernat; jew

(b)	l-istokk ikkonċernat jinqabad f’sajd imħallat u nuqqas sinifikanti tal-kwota jkun se jevita lill-ispeċijiet assoċjati f’dik il-qabda mis-sajd imħallat milli jiġu sfruttati; jew

(c)	regoli speċifiċi internazzjonali (bħal dawk tal-Organizzazzjonijiet Reġjonali tal-Ġestjoni tas-Sajd) marbuta mal-għoti lura għall-istokk ikkonċernat jippermettu għoti lura aktar bil-mod fuq sentejn jew aktar.

Jekk ma jkunx possibbli li t-tnaqqis jitwettaq fuq l-istokk li fuqu sar sajd żejjed fis-sena ta’ wara dik li fiha jkun sar is-sajd żejjed għaliex l-Istat Membru kkonċernat ma jkollux kwota disponibbli, it-tnaqqis se jitwettaq fuq stokkijiet oħrajn fl-istess żona ġeografika jew bl-istess valur kummerċjali, kif preskritt mir-Regolament (KE) Nru 1224/2009. Tali stokkijiet se jiġu identifikati abbażi tal-kriterji li ġejjin:

(a)	it-tnaqqis se jitwettaq fuq stokkijiet fl-istess żona ġeografika skont l-Artikolu 105(5) u preferibbilment mistada mill-istess flotta li tkun wettqet sajd żejjed fuq il-kwota;

(b)	meta jkun hemm iżjed minn stokk wieħed li jissodisfa l-kriterju msemmi fil-punt (a), tingħata preferenza lil tnaqqis mill-kwota ta’ stokkijiet li jinsabu fl-agħar status ta’ konservazzjoni abbażi tal-pariri xjentifiċi rilevanti.

Fejn it-tnaqqis jikkonċerna stokkijiet ġestiti minn organizzazzjonijiet reġjonali tal-ġestjoni tas-sajd, il-Kummissjoni tista’ twettaq tnaqqis, inklużi l-ammonti li jirriżultaw minn fatturi multiplikanti applikabbli, skont il-punti 2 sa 4 mis-sena/snin ta’ aġġustament deċiża/deċiżi mill-organizzazzjoni reġjonali tal-ġestjoni tas-sajd ikkonċernata.

(1) Komunikazzjoni tal-Kummissjoni — Linji Gwida għat-tnaqqis tal-kwoti skont l-Artikolu 105(1), (2) u (5) tar-Regolament (KE) Nru 1224/2009 (ĠU C 72, 10.3.2012, p. 27) kif emendat bil-Komunikazzjoni 2019/C 192/03 (ĠU C 192, 7.6.2019, p. 5).