Avviż lill-impriżi li biħsiebhom jimportaw lejn l-Unjoni Ewropea jew jesportaw minnha xi sustanzi kkontrollati li jnaqqsu s-saff tal-ożonu, u lill-impriżi li fl-2023 biħsiebhom jipproduċu jew jimportaw dawn is-sustanzi għal użi essenzjali fil-laboratorju u għal skopijiet ta’ analiżi fl-2023

(2022/C 104/14)

Dan l-Avviż huwa indirizzat lill-impriżi li huma kkonċernati mir-Regolament (KE) Nru 1005/2009 tal-Parlament Ewropew u tal-Kunsill tas-16 ta’ Settembru 2009 dwar sustanzi li jnaqqsu s-saff tal-ożonu (1) (ir-Regolament) u li fl-2023 biħsiebhom:

a)	jimportaw jew jesportaw lejn l-Unjoni Ewropea jew minnha, sustanzi elenkati fl-Anness I tar-Regolament, jew

b)	jipproduċu jew jimportaw dawn is-sustanzi għal użi essenzjali fil-laboratorju u għal skopijiet ta’ analiżi fl-Unjoni Ewropea.

Il-Protokoll dwar l-Irlanda/l-Irlanda ta’ Fuq (2) jipprevedi li r-Regolament (KE) Nru 1005/2009 japplika għar-Renju Unit u fir-Renju Unit fir-rigward tal-Irlanda ta’ Fuq. Dan ifisser li r-referenzi għall-Unjoni Ewropea f’dan l-avviż għandhom jinftiehmu li jinkludu l-Irlanda ta’ Fuq.

Huma kkonċernati l-gruppi ta’ sustanzi li ġejjin:

Grupp I	:	CFC 11, 12, 113, 114 jew 115
Grupp II	:	CFCs oħrajn kompletament aloġenati
Grupp III	:	alon 1211, 1301 jew 2402
Grupp IV	:	tetraklorur tal-karbonju
Grupp V	:	1,1,1 trikloroetan
Grupp VI	:	bromur tal-metil
Grupp VII	:	idrobromofluworokarburi
Grupp VIII	:	idroklorofluworokarburi
Grupp IX	:	bromoklorometan

Kwalunkwe importazzjoni jew esportazzjoni ta’ sustanzi kkontrollati (3) teħtieġ liċenzja mill-Kummissjoni, għajr f’każijiet ta’ proċedura ta’ tranżitu, ta’ ħżin temporanju, ta’ ħżin doganali jew ta’ proċedura ta’ żona libera kif imsemmi fir-Regolament (KE) Nru 450/2008 tal-Parlament Ewropew u tal-Kunsill tat-23 ta’ April 2008 li jistabbilixxi l-Kodiċi Doganali Komunitarju (Kodiċi Doganali Modernizzat) (4), li ma ddumx iktar minn 45 jum. Kwalunkwe produzzjoni ta’ sustanzi kkontrollati għal użi essenzjali fil-laboratorju u għal skopijiet ta’ analiżi teħtieġ awtorizzazzjoni minn qabel.

Barra minn hekk, l-attivitajiet li ġejjin huma soġġetti għal limiti kwantitattivi:

a)	Il-produzzjoni u l-importazzjoni għal użi fil-laboratorju u għal skopijiet ta’ analiżi,

b)	L-importazzjoni għaċ-ċirkolazzjoni libera fl-Unjoni Ewropea għal użi kritiċi (aloni),

c)	L-importazzjoni għaċ-ċirkolazzjoni libera fl-Unjoni Ewropea għal użi bħala materja prima,

d)	L-importazzjoni għaċ-ċirkolazzjoni libera fl-Unjoni Ewropea għal użi bħala aġenti tal-proċessi.

Il-Kummissjoni talloka kwoti għal a), b), c) u d). Il-kwoti huma stabbiliti abbażi tal-applikazzjonijiet għall-kwoti u:

—	għall-każ a) ta’ hawn fuq, f’konformità mal-Artikolu 10(6) tar-Regolament u mar-Regolament tal-Kummissjoni (UE) Nru 537/2011 (5)

—	għall-każijiet b), c) u d) ta’ hawn fuq, f’konformità mal-Artikolu 16 tar-Regolament.

Għall-attivitajiet elenkati fil-paragrafu 4

Kwalunkwe impriża li fl-2023 tixtieq timporta jew tipproduċi sustanzi kkontrollati għal użi essenzjali fil-laboratorju u għal skopijiet ta’ analiżi, jew li tixtieq timporta sustanzi kkontrollati għal użi kritiċi (aloni), għal użi bħala materja prima, jew għal użi bħala aġenti tal-proċessi jeħtieġ li ssegwi l-proċedura deskritta fil-paragrafi 6 sa 9.

L-impriża, li għadha ma rreġistratx fis-Sistema għall-Ħruġ tal-Liċenzji tal-ODS (https://webgate.ec.europa.eu/ods2) jeħtieġ li tagħmel dan qabel it-23 ta’ Mejju 2022.

L-impriża jeħtieġ li timla u tippreżenta l-formola ta’ applikazzjoni għall-kwoti li tinsab online fis-Sistema għall-Ħruġ tal-Liċenzji tal-ODS.

Il-formola ta’ applikazzjoni għall-kwoti se tkun disponibbli online fis-Sistema għall-Ħruġ tal-Liċenzji tal-ODS mit-23 ta’ Mejju 2022.

Il-formoli tal-applikazzjoni għall-kwoti mimlija kif suppost u mingħajr żbalji li jaslu sat-23 ta’ Ġunju 2022 biss jitqiesu validi mill-Kummissjoni.

L-impriżi huma mħeġġa jippreżentaw il-formoli ta’ applikazzjoni għall-kwoti tagħhom kemm jista’ jkun malajr, u biżżejjed qabel id-data tal-iskadenza biex jekk jinqala’ l-bżonn ta’ korrezzjonijiet, dawn ikunu jistgħu jsiru u l-formoli jiġu ppreżentati mill-ġdid qabel id-data tal-iskadenza.

Il-preżentazzjoni ta’ formola ta’ applikazzjoni għall-kwoti waħedha ma tagħtix id-dritt ta’ importazzjoni jew ta’ produzzjoni ta’ sustanzi kkontrollati għal użi essenzjali fil-laboratorju u għal skopijiet ta’ analiżi, jew id-dritt ta’ importazzjoni ta’ sustanzi kkontrollati għal użi kritiċi (aloni), għal użi bħala materja prima, jew għal użi bħala aġenti tal-proċessi. Qabel ma sseħħ importazzjoni jew produzzjoni ta’ dan it-tip fl-2023, l-impriżi jridu japplikaw għal liċenzja billi jużaw il-formola ta’ applikazzjoni għal liċenzja, li tinsab online fis-Sistema għall-Ħruġ tal-Liċenzji tal-ODS.

Għall-importazzjoni għal użi oħra għajr dawk elenkati fil-paragrafu 4 u għall-esportazzjoni

10.

Kwalunkwe impriża li fl-2023 tixtieq tesporta s-sustanzi kkontrollati jew timporta s-sustanzi kkontrollati għal użi oħra għajr dawk elenkati fil-paragrafu 4 jeħtieġ li ssegwi l-proċedura deskritta fil-paragrafi 11 u 12.

11.

Kull impriża li għadha ma rreġistratx fis-Sistema għall-Ħruġ tal-Liċenzji tal-ODS, jeħtieġ li tagħmel dan mill-iktar fis possibbli.

12.

Qabel ma ssir importazzjoni għal użi oħra għajr dawk elenkati fil-paragrafu 4 jew qabel ma ssir esportazzjoni fl-2023, l-impriżi jridu japplikaw għal liċenzja billi jużaw il-formola ta’ applikazzjoni għal liċenzja li hija disponibbli online fis-Sistema għall-Ħruġ tal-Liċenzji tal-ODS.

(1) ĠU L 286, 31.10.2009, p. 1.

(2) https://eur-lex.europa.eu/legal-content/MT/TXT/?uri=CELEX%3A12020W/TXT#d1e32-102-1

(3) Ta’ min wieħed jinnota li jistgħu jiġu permessi biss l-importazzjoni jew l-esportazzjoni eżentati mill-projbizzjoni ġenerali tal-importazzjoni u tal-esportazzjoni skont l-Artikoli 15 u 17.

(4) ĠU L 145, 4.6.2008, p. 1.

(5) Ir-Regolament tal-Kummissjoni (UE) Nru 537/2011 tal-1 ta’ Ġunju 2011 dwar il-mekkaniżmu għall-allokazzjoni tal-kwantitajiet ta’ sustanzi kkontrollati li jistgħu jintużaw fil-laboratorji u għal skopijiet ta’ analiżi fl-Unjoni skont ir-Regolament (KE) Nru 1005/2009 tal-Parlament Ewropew u tal-Kunsill dwar sustanzi li jnaqqsu s-saff tal-ożonu (ĠU L 147, 2.6.2011, p. 4).