IL-KUMMISSJONI EWROPEA

Brussell, 7.12.2022

COM(2022) 760 final

2022/0405(COD)

Proposta għal

DIRETTIVA TAL-PARLAMENT EWROPEW U TAL-KUNSILL

li temenda d-Direttiva 2014/65/UE biex tagħmel is-swieq kapitali pubbliċi fl-Unjoni aktar attraenti għall-kumpaniji u biex tiffaċilita l-aċċess għall-kapital għall-intrapriżi żgħar u ta’ daqs medju u li tħassar id-Direttiva 2001/34/KE

(Test b’rilevanza għaż-ŻEE)

{SEC(2022) 760 final} - {SWD(2022) 762 final} - {SWD(2022) 763 final}

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u objettivi tal-proposta

Kuntest politiku

Din il-proposta hija parti mill-pakkett tal-Att dwar l-Elenkar, sett ta’ miżuri biex is-swieq pubbliċi jsiru aktar attraenti għall-kumpaniji tal-UE u biex jiġi ffaċilitat l-aċċess għall-kapital għal kumpaniji żgħar u ta’ daqs medju (SMEs). Hija konformi mal-għan ewlieni tal-Unjoni tas-Swieq Kapitali (CMU) li ttejjeb l-aċċess għal sorsi tal-finanzjament ibbażati fuq is-suq għall-kumpaniji tal-UE f’kull stadju tal-iżvilupp tagħhom, inkluż għal kumpaniji iżgħar. Il-kumpaniji elenkati, inklużi dawk elenkati reċentement, ħafna drabi jissuperaw il-kumpaniji privati f’termini ta’ tkabbir tad-dħul annwali u ħolqien tal-impjiegi 1 . Permezz tal-elenkar fis-swieq pubbliċi, il-kumpaniji jistgħu jiddiversifikaw il-bażi tal-investituri tagħhom, inaqqsu d-dipendenza tagħhom mill-finanzjament bankarju, jiksbu aċċess aktar faċli u orħos għal kapital ta’ ekwità addizzjonali u finanzjament b’dejn (permezz ta’ offerti sekondarji), jgħollu l-profil pubbliku tagħhom u jżidu r-rikonoxximent tal-marka kummerċjali.

Mill-pubblikazzjoni tal-ewwel pjan ta’ azzjoni tas-CMU fl-2015, sar progress sabiex ikun aktar faċli u orħos għall-kumpaniji, b’mod partikolari l-SMEs, biex jaċċessaw is-swieq pubbliċi. F’Jannar 2018, id-Direttiva 2014/65/UE tal-Parlament Ewropew u tal-Kunsill (MiFID II) 2 introduċiet kategorija ġdida ta’ faċilitajiet multilaterali tan-negozjar (MTFs), is-swieq tat-tkabbir tal-SMEs 3 , biex tinċentiva l-aċċess tal-SMEs għas-swieq kapitali. Fl-2019, ġew ippreżentati regoli ġodda tal-UE skont ir-Regolament (UE) 2019/2115 tal-Parlament Ewropew u tal-Kunsill 4 (l-Att dwar l-Elenkar tal-SME) li jnaqqsu l-piż regolatorju għall-kumpaniji li jelenkaw fis-swieq tat-tkabbir tal-SMEs, filwaqt li jinżamm livell għoli ta’ protezzjoni tal-investituri u ta’ integrità tas-suq. Madankollu, minkejja dan il-progress, il-partijiet ikkonċernati jargumentaw li hija meħtieġa azzjoni regolatorja ulterjuri biex jiġi ssimplifikat il-proċess tal-elenkar u ħalli dan isir aktar flessibbli għall-emittenti.

Raġuni għall-proposta

Fl-2021, ir-regoli ta’ separazzjoni ġew emendati għall-ewwel darba, bħala parti minn sforz aktar ġenerali skont is-CMRP 9 biex jgħinu l-irkupru mill-kriżi tal-COVID-19 li ġiegħlet lill-kumpaniji jibbażaw ferm aktar fuq id-dejn, u dan dgħajjef l-istrutturi ta’ finanzjament tagħhom. F’ċirkostanzi, li fihom il-kumpaniji kienu jeħtieġu rikapitalizzazzjoni urġenti, il-ħtieġa ta’ aktar viżibbiltà tal-kumpaniji tal-UE, b’mod partikolari l-kumpaniji b’kapitalizzazzjoni żgħira u medja, tqieset fundamentali u l-kost impliċitu li l-kopertura tar-riċerka ma tkunx saħansitra akbar. F’dak il-kuntest, is-CMRP, applikabbli mit-28 ta’ Frar 2022, fittex li jtejjeb il-kopertura tar-riċerka tal-kumpaniji b’kapitalizzazzjoni żgħira u medja billi 10 jipprovdi eżenzjoni mir-regoli ta’ separazzjoni għar-riċerka dwar l-investiment li tkopri l-emittenti li l-kapitalizzazzjoni tas-suq tagħhom ma taqbiżx EUR 1 biljun għall-perjodu ta’ 36 xahar qabel il-provvediment tar-riċerka, b’hekk jippermettu f’tali każijiet, pagament konġunt għall-eżekuzzjoni u r-riċerka tan-negozju. Madankollu, filwaqt li din il-miżura kienet milqugħa tajjeb ħafna, hija ma indirizzatx biżżejjed il-problema. Peress li ħafna ditti tal-investiment u sensara joffru servizzi lil kumpaniji ta’ daqsijiet (u kapitalizzazzjoni) differenti, inklużi dawk li jaqbżu l-kapitalizzazzjoni ta’ EUR 1 biljun stabbilita fis-CMRP, dawn id-ditti tal-investiment u s-sensara ddeċidew li ma jintroduċux żewġ sistemi paralleli għall-fatturazzjoni tar-riċerka, filwaqt li żammew l-approċċ separat għall-klijenti kollha. Għalhekk, l-emenda fis-CMRP ma laħqitx bis-sħiħ l-objettiv tagħha li tappoġġa l-produzzjoni tar-riċerka dwar il-kumpaniji b’kapitalizzazzjoni żgħira u medja u jkun meħtieġ rieżami leġiżlattiv ulterjuri f’dan il-kuntest.

Minbarra l-emendi għar-reġim tas-separazzjoni tar-riċerka, il-proposta tintroduċi għadd limitat ta’ emendi għall-qafas leġiżlattiv li jirregola s-suq tat-tkabbir tal-SMEs, kategorija ta’ MTFs, maħluqa skont l-MiFID II biex iżżid il-viżibbiltà u l-profil tal-SMEs kif ukoll biex tgħin fl-iżvilupp ta’ standards regolatorji komuni fl-UE għal swieq speċjalizzati fl-SMEs 11 .

Objettivi tal-proposta

16 Sabiex ir-riċerka dwar l-investiment ikklassifikata bħala riċerka ffinanzjata mill-emittent issir aktar faċilment aċċessibbli għall-pubbliku u biex tiġi promossa l-viżibbiltà tal-kumpaniji b’kapitalizzazzjoni żgħira u medja b’investituri potenzjali, il-proposta ssemmi li l-Istati Membri għandhom jiżguraw li l-emittenti jistgħu jissottomettu r-riċerka tagħhom ffinanzjata mill-emittent lill-korp tal-ġbir kif iddefinit skont [l-Artikolu 2(2) tal-proposta għal regolament dwar Punt ta’ Aċċess Uniku Ewropew].

Ladarba jkun stabbilit, il-Punt ta’ Aċċess Uniku Ewropew (ESAP), propost mill-Kummissjoni fil-25 ta’ Novembru 2021 17 u li bħalissa jinsab f’negozjati interistituzzjonali mal-koleġiżlaturi tal-UE se jipprovdi punt ta’ aċċess uniku għall-informazzjoni finanzjarja pubblika dwar il-kumpaniji tal-UE, inklużi l-SMEs, u l-prodotti ta’ investiment tal-UE. L-ESAP huwa mfassal biex jagħti lill-kumpaniji tal-UE, speċjalment lill-SMEs, viżibbiltà akbar lill-investituri u jista’ jintuża biex tinġabar u tiġi mxerrda r-riċerka ffinanzjata mill-emittent. Iktar ’il quddiem, l-ESAP jista’ jintuża biex jiġu ppubblikati n-notifiki tal-emittenti relatati mar-riċerka ffinanzjata mill-emittent u l-kontenut ta’ tali riċerka.

•Konsistenza mad-dispożizzjonijiet eżistenti fil-qasam ta’ politika

•Konsistenza ma’ politiki oħra tal-Unjoni

Il-proposta hija konformi għalkollox mal-għan ewlieni tas-CMU li tagħmel il-finanzjament aktar aċċessibbli għall-kumpaniji tal-UE u b’mod partikolari għall-SMEs. Hija konsistenti ma’ numru ta’ azzjonijiet leġiżlattivi u mhux leġiżlattivi meħuda mill-Kummissjoni fil-qafas tal-Pjan ta’ Azzjoni tas-CMU tal-2015, 19 tar-Rieżami ta’ Nofs it-Terminu tal-2017 tal-Pjan ta’ Azzjoni tas-CMU 20 u tal-Pjan ta’ Azzjoni tas-CMU tal-2020.

Sabiex jiġu appoġġati l-impjiegi u t-tkabbir fl-UE, l-iffaċilitar tal-aċċess għall-finanzjament għall-kumpaniji, speċjalment l-SMEs, kien għan ewlieni tas-CMU mill-bidu nett. Mill-pubblikazzjoni tal-Pjan ta’ Azzjoni tas-CMU fl-2015, ittieħdu xi azzjonijiet immirati biex jiġu żviluppati sorsi adegwati ta’ finanzjament għall-SMEs matul l-istadji kollha ta’ żvilupp tagħhom. Fir-Rieżami ta’ Nofs it-Terminu tagħha tal-Pjan ta’ Azzjoni tas-CMU ppubblikat f’Ġunju 2017, il-Kummissjoni għażlet li tgħolli l-livell ta’ ambizzjoni tagħha u saħħet l-enfasi tagħha fuq l-aċċess tal-SMEs għas-swieq pubbliċi. F’Mejju 2018, il-Kummissjoni ppubblikat proposta għall-Att dwar l-Elenkar tal-SMEs 21 li għandha l-għan li tnaqqas il-piż amministrattiv u l-kostijiet għoljin tal-konformità li jiffaċċjaw l-emittenti tas-suq tat-tkabbir tal-SMEs filwaqt li tiżgura livell għoli ta’ integrità tas-suq u protezzjoni tal-investituri; trawwem il-likwidità tal-ishma tal-SMEs elenkati biex dawn is-swieq isiru aktar attraenti għall-investituri, għall-emittenti u għall-intermedjarji; u tiffaċilita r-reġistrazzjoni tal-MTFs bħala swieq tat-tkabbir tal-SMEs. L-Att dwar l-Elenkar tal-SMEs ġie adottat f’Novembru 2019.

Barra minn hekk, wara l-kriżi tal-COVID-19, il-Kummissjoni ppubblikat is-CMRP, li kien magħmul minn emendi mmirati għas-swieq kapitali u r-regolamentazzjoni tal-bank, bil-għan ġenerali li tagħmilha aktar faċli għas-swieq kapitali biex jappoġġaw lin-negozji tal-UE jirkupraw mill-kriżi tal-COVID-19. Il-bidliet suġġeriti għar-regoli tas-suq kapitali mmirati b’mod partikolari biex itaffu l-piż regolatorju u l-kumplessità għad-ditti tal-investiment u għall-emittenti.

Din il-proposta ssegwi l-Pjan ta’ Azzjoni tas-CMU tal-2020 u l-objettiv tiegħu li jagħmel il-finanzjament aktar aċċessibbli għall-kumpaniji tal-UE (Azzjoni 2 “appoġġ għall-aċċess għas-swieq pubbliċi”). Il-proposta tiffoka fuq it-tnaqqis tar-rekwiżiti regolatorji li jistgħu jiskoraġġixxu lil kumpanija milli tiddeċiedi li telenka ruħha jew li tibqa’ elenkata. Fatturi oħra li jistgħu jiskoraġġixxu lill-emittenti milli jelenkaw ruħhom, bħal bażi ta’ investituri dejqa u trattament tat-taxxa aktar favorevoli ta’ dejn fuq l-ekwità, huma indirizzati minn inizjattivi oħrajn tas-CMU li għadhom għaddejjin u li ġejjin li jikkomplementaw l-emendi mressqa f’din il-proposta u għandhom jiġu analizzati flimkien ma’ din l-inizjattiva. Dawn l-inizjattivi jirrigwardaw, pereżempju, (i) il-ħolqien ta’ Punt ta’ Aċċess Uniku tal-UE (ESAP) li se jindirizza n-nuqqas ta’ data aċċessibbli u komparabbli għall-investituri, u b’hekk il-kumpaniji jsiru aktar viżibbli għall-investituri, (ii) iċ-ċentralizzazzjoni tal-informazzjoni dwar in-negozjar tal-UE f’tape konsolidat għal xenarju tan-negozjar tas-suq pubbliku aktar effiċjenti u l-iskoperta tal-prezzijiet, (ii) l-introduzzjoni ta’ benefiċċju għat-tnaqqis tal-predispożizzjoni favur id-dejn (DEBRA) 22 biex il-finanzjament mill-bejgħ ta’ ishma jsir aktar attraenti (u inqas għali) għall-kumpaniji.

Barra minn hekk, serje ta’ inizjattivi tal-Kummissjoni se jkomplu jsaħħu l-bażi tal-investituri għall-ekwità elenkata. Il-Fond tal-IPO tal-SMEs tal-UE se jkollu r-rwol ta’ investitur ankra biex jattira aktar investiment privat fl-ekwità pubblika tal-SMEs permezz ta’ sħubija ma’ investituri istituzzjonali u investiment f’fondi ffukati fuq l-emittenti tal-SMEs. Ir-rieżamijiet tas-CRR u tas-Solvenza II se jżidu l-bażi tal-investituri għall-emittenti billi jiffaċilitaw l-investimenti mill-banek u mill-kumpaniji tal-assigurazzjoni f’ekwità pubblika (fit-tul).

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

•Sussidjarjetà (għall-kompetenza mhux esklużiva)

•Proporzjonalità

•Għażla tal-istrument

3.IR-RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Evalwazzjonijiet ex post/kontrolli tal-idoneità tal-leġiżlazzjoni eżistenti

Biex tiġi informata din l-inizjattiva, is-servizzi tal-Kummissjoni ġabru ammont sinifikanti ta’ data direttament minn ċentri tan-negozjar u emittenti (inklużi assoċjazzjonijiet tal-SMEs). It-TESG (fis-seħħ bejn Ottubru 2020 u Mejju 2021) ipprovda xi evidenza minbarra l-kontribut riċevut mill-parteċipanti fis-suq. Il-Kummissjoni kkuntrattat ukoll studju dwar is-Swieq Primarji u Sekondarji tal-Ekwità fl-UE minn Oxera f’Novembru 2020, li fih ħarsa ġenerali dettaljata ħafna lejn is-swieq kapitali tal-UE. Sorsi oħra użati kienu jinkludu letteratura akkademika estensiva u riċerka.

•Konsultazzjonijiet mal-partijiet ikkonċernati

Fid-19 ta’ Novembru 2021, il-Kummissjoni nediet konsultazzjoni pubblika u mmirata ta’ 14-il ġimgħa li tfittex fehmiet mill-partijiet ikkonċernati dwar kif tista’ tiżdied l-attraenza ġenerali tal-elenkar fis-swieq pubbliċi fl-Unjoni, inkluż kwalunkwe nuqqas potenzjali fil-qafas regolatorju li jiskoraġġixxi lill-kumpaniji milli jiġbru fondi permezz tas-swieq kapitali. Il-konsultazzjoni ressqet mistoqsijiet speċifiċi dwar ir-Regolament (UE) 2017/1129, ir-Regolament (UE) Nru 596/2014, u inklużi d-Direttiva 2001/34/KE u d-Direttiva 2014/65/UE u oqsma ta’ titjib minn perspettiva ġenerali.

B’mod ġenerali, ġew riċevuti 108 tweġibiet, mibgħuta mill-partijiet ikkonċernati minn 22 Stat Membru, mill-Istati Uniti, mir-Renju Unit u mill-Iżvizzera.

Il-maġġoranza tar-rispondenti (60 %) raw mertu fl-inklużjoni fil-Livell 1 tal-kundizzjonijiet li operatur ta’ MTF jista’ jirreġistra segment tal-MTF bħala suq tat-tkabbir tal-SMEs taħthom. Huma enfasizzaw li dan isaħħaħ iċ-ċarezza legali. Huma żiedu jgħidu li tali emenda tista’ tinċentiva wkoll lil aktar MTFs biex jirreġistraw segmenti tal-GM tal-SMEs.

Maġġoranza żgħira ta’ rispondenti (51 %) qiesu r-reġim ta’ riċerka l-ġdid introdott mis-CMRP bħala pożittiv biex jappoġġa l-aċċess tal-SMEs għas-swieq kapitali. Il-biċċa l-kbira ta’ dawk ir-rispondenti indikaw li l-impatt tas-CMRP huwa madankollu limitat ħafna. Xi wħud indikaw li l-kopertura tar-riċerka għall-SMEs titqies bħala mhux ekonomika għall-maniġers tal-assi u għall-fornituri tar-riċerka u li din tidher bħala xejra fit-tul. Madankollu, l-assoċjazzjonijiet ta’ intrapriżi, b’mod partikolari, u l-NCAs indikaw li għadu kmieni wisq biex jgħidu x’inhu l-impatt ġenerali tar-reġim il-ġdid. Il-maġġoranza assoluta tar-rispondenti (72,9 %) jaraw mertu mill-fatt li jitnaqqas ir-reġim tal-MiFID II dwar ir-riċerka. Filwaqt li xi wħud issuġġerew li jitneħħa l-livell limitu ta’ eżenzjoni sabiex jiġi kopert bis-sħiħ is-segment żgħir u mid-cap, diversi assoċjazzjonijiet ta’ intrapriżi qiesu li r-ritorn għal eżekuzzjoni raggruppata għalkollox u l-ipprezzar tar-riċerka tal-kumpaniji huwa l-unika soluzzjoni biex tingħata spinta lir-riċerka għall-SMEs (li naqset għal livell kważi noneżistenti). Xi wħud qiesu wkoll li r-reġim ta’ riċerka tal-MiFID II kien imfassal ħażin għall-kumpaniji ta’ kwalunkwe daqs. Huma sostnew li r-reġim tal-MiFID II sar indirettament inċentiv biex parti akbar mill-valur tas-servizzi ta’ riċerka tiġi allokata f’idejn ftit atturi kbar (jiġifieri li jwasslu għal konsolidazzjoni fl-industrija).

•Ġbir u użu tal-għarfien espert

Matul dawn l-aħħar snin, l-aċċess tal-kumpaniji u speċjalment tal-SMEs għas-swieq pubbliċi kien l-enfasi tal-evalwazzjonijiet kontinwi tal-Kummissjoni. Fil-kuntest tat-TESG u tal-Pjan ta’ Azzjoni tas-CMU tal-2020, tqajmu kwistjonijiet relatati mal-piż regolatorju fuq il-kumpaniji meta jaċċessaw is-swieq pubbliċi. Il-Kummissjoni qieset ukoll riċerka estensiva dwar is-suġġett meħud fl-istudju ta’ Oxera.

Il-Kummissjoni organizzat ukoll żewġ laqgħat/workshops tekniċi mal-partijiet ikkonċernati tal-industrija f’April 2022 bil-ħsieb li tkompli tirfina l-għażliet ta’ politika li qed jiġu kkunsidrati.

Barra minn hekk, il-Kummissjoni ppreżentat l-objettiv tal-proposta fil-Grupp ta’ Esperti tal-Kumitat Ewropew tat-Titoli u fil-Koordinaturi tal-Kumitat għall-Affarijiet Ekonomiċi u Monetarji (ECON) tal-Parlament Ewropew.

Rakkomandazzjonijiet tal-grupp ta’ esperti

F’Ottubru 2020, il-Kummissjoni Ewropea bdiet it-TESG. Il-Grupp kien inkarigat biex jimmonitorja u jivvaluta l-funzjonament tas-swieq tat-tkabbir tal-SMEs, kif ukoll li jipprovdi għarfien espert u kontribut possibbli f’oqsma rilevanti oħra tal-aċċess tal-SMEs għas-swieq pubbliċi. It-TESG ikkonferma t-tħassib espress mill-partijiet ikkonċernati li hija meħtieġa azzjoni leġiżlattiva ulterjuri biex tappoġġa l-elenkar tal-kumpaniji u speċjalment tal-SMEs. Fir- rapport finali tiegħu, ippubblikat f’Mejju 2021, it-TESG ifformula 12-il rakkomandazzjoni, inkluż l-inkoraġġiment tal-Istati Membri biex jistabbilixxu miżuri ħalli jippromwovu l-kopertura tar-riċerka dwar l-ekwità tal-kumpaniji żgħar u ta’ daqs medju elenkati kollha.

Laqgħat tal-partijiet ikkonċernati

Laqgħat mal-esperti tal-Istati Membri

Laqgħa mal-koordinaturi tal-ECON fil-Kumitat tal-Parlament Ewropew

•Valutazzjoni tal-impatt

Il-valutazzjoni tal-impatt tiffoka fuq l-identifikazzjoni u l-indirizzar ta’ ostakli regolatorji speċifiċi f’kull stadju tal-proċess tal-elenkar. Hija tiddiskuti l-ostakli fl-istadju ta’ qabel l-IPO li jirriżultaw mil-liġi tal-kumpaniji, b’mod partikolari, mill-fatt li elenkar ta’ ishma b’vot multiplu ma huwiex possibbli f’xi Stati Membri. Imbagħad tiffoka fuq l-ostakli fl-istadju tal-IPO li jirriżultaw mir-Regolament dwar il-Prospett, b’mod partikolari mill-kostijiet għoljin tat-tfassil ta’ prospett. Fl-aħħar nett, tindirizza l-ostakli ffaċċjati fl-istadju ta’ wara l-IPO li jirriżultaw mill-MAR, b’mod partikolari, il-kostijiet minħabba l-inċertezza legali rigward l-obbligu tal-emittenti li jiżvelaw pubblikament informazzjoni privileġġata. Għal kull stadju tal-proċess tal-elenkar, il-valutazzjoni tal-impatt tistabbilixxi żewġ għażliet ta’ politika alternattivi, wara li tkun analizzat l-evidenza empirika disponibbli u wara li tkun qieset il-fehmiet tal-partijiet ikkonċernati.

Il-valutazzjoni tal-impatt tanalizza l-għażliet fir-rigward ta’ tliet objettivi, jiġifieri jekk dawn: (i) inaqqsux il-kostijiet regolatorji u tal-konformità għall-kumpaniji li jkunu qed ifittxu li jelenkaw ruħhom jew dawk li diġà huma elenkati, (ii) jiżgurawx livell suffiċjenti ta’ protezzjoni tal-investituri u integrità tas-suq, u (iii) jipprovdux lill-emittenti b’aktar inċentivi biex jelenkaw. Għalhekk, l-għażla ppreferuta (għal kull studju tal-proċess tal-elenkar) għandha tkun kosteffiċjenti u effettiva fl-indirizzar tal-ostaklu identifikat filwaqt li jiġi ssalvagwardjat livell għoli biżżejjed ta’ protezzjoni tal-investituri u integrità tas-suq. Il-proporzjonalità tal-miżuri għal kumpaniji iżgħar ġiet ikkunsidrata meta ġew identifikati u vvalutati l-għażliet.

Filwaqt li l-emendi regolatorji stabbiliti fl-għażliet, waħedhom, ma setgħux jindirizzaw l-isfidi kollha ffaċċjati mis-swieq pubbliċi tal-UE, flimkien ma’ miżuri oħrajn ikkunsidrati bħala parti minn pjan aktar mifrux biex jittejjeb l-aċċess tal-kumpaniji għas-swieq kapitali pubbliċi, ifittxu li jikkontribwixxu għat-treġġigħ lura tax-xejra negattiva attwali fis-swieq pubbliċi tal-UE. Fin-nuqqas ta’ dak it-titjib regolatorju, is-swieq pubbliċi tal-UE jkomplu jibbażaw fuq il-qafas regolatorju subottimali għall-elenkar, li min-naħa tiegħu jnaqqas l-attraenza tas-swieq pubbliċi, u dan jirriżulta f’kost ekonomiku għall-emittenti tal-UE, l-investituri u l-ekonomija tal-UE kollha kemm hi. Għalhekk, ix-xenarju ta’ referenza ma jipprevedi l-ebda emenda għall-qafas leġiżlattiv li jirregola r-regoli għall-elenkar u għall-kumpaniji diġà elenkati.

Fir-rigward tal-impatti soċjali, ekonomiċi u ambjentali, il-verifika tal-konsistenza klimatika u l-prinċipju “la tagħmilx ħsara sinifikanti”, din il-proposta se tikkontribwixxi għall-aġenda tas-CMU u l-objettivi tagħha biex tiżgura l-iżvilupp u l-integrazzjoni ulterjuri tas-swieq kapitali fl-UE. Il-miżuri regolatorji proposti f’din l-inizjattiva huma mistennija li jkollhom impatt fuq il-kumpaniji kollha fl-UE, iżda b’mod partikolari fuq l-SMEs, li huma aktar esposti għall-piż regolatorju (eċċessiv) minn kumpaniji akbar b’potenzjal ogħla ta’ assorbiment tal-kostijiet. Din il-proposta twassal ukoll għall-iżvilupp ta’ swieq kapitali aktar miftuħa u aktar kompetittivi, li huma b’mod partikolari ta’ benefiċċju għall-kumpaniji li qed jikbru aktar malajr f’setturi innovattivi u intensivi fir-riċerka li għandhom it-tendenza li jkollhom ħtiġijiet kapitali akbar.

L-inizjattiva ma hijiex mistennija li jkollha impatt soċjali dirett. Madankollu, jista’ jkun hemm impatt indirett pożittiv fuq l-impjiegi. Għalkemm l-impatt soċjali (indirett) ma jistax jiġi kkwantifikat, x’aktarx li jkun pożittiv. Dment li l-proposta tilħaq l-objettiv tagħha li tiffaċilita l-aċċess għas-swieq pubbliċi mill-kumpaniji tal-UE, dawn tal-aħħar se jkunu jistgħu jibbenefikaw minn ġabra aktar diversifikata u akbar ta’ sorsi ta’ finanzjament, u dan jippermetti lil dawn il-kumpaniji jinnovaw, jikbru u jimpjegaw aktar nies.

Din il-proposta hija konformi mal-SDG 8 26 - xogħol deċenti u tkabbir ekonomiku peress li tikkontribwixxi għat-tkabbir tal-SMEs billi tipprovdi aċċess aktar faċli għall-finanzjament permezz tas-swieq pubbliċi. Kumpaniji elenkati ġodda huma xprun essenzjali ta’ investiment ġdid u ħolqien tal-impjiegi. Aċċess aktar faċli għas-swieq pubbliċi joħloq inċentivi għall-imprendituri biex jiddiversifikaw fi żminijiet ta’ taqlib ekonomiku, u dan iwassal għal ekonomija aktar reżiljenti. Din tikkontribwixxi wkoll direttament għall-Mira 8.3 “Promozzjoni ta’ politiki orjentati lejn l-iżvilupp li jappoġġaw attivitajiet produttivi, il-ħolqien ta’ impjiegi deċenti, l-intraprenditorija, il-kreattività u l-innovazzjoni, u li jħeġġu l-formalizzazzjoni u t-tkabbir ta’ intrapriżi mikro, żgħar u ta’ daqs medju, inkluż permezz ta’ aċċess għal servizzi finanzjarji” u l-Mira 8.10 “Tisħiħ tal-kapaċità tal-istituzzjonijiet finanzjarji domestiċi li jħeġġu u jespandu l-aċċess għall-ibbankjar, l-assigurazzjoni u s-servizzi finanzjarji għal kulħadd” kif ukoll indirettament għall-Mira 8.2 “Ksib ta’ livelli ogħla ta’ produttività ekonomika permezz ta’ diversifikazzjoni, titjib teknoloġiku u innovazzjoni”.

Barra minn hekk, huwa konformi mal-SDG 9 – industrija, innovazzjoni u infrastruttura peress li aċċess aktar faċli għas-swieq pubbliċi jżid l-aċċess ta’ kumpaniji (industrijali) iżgħar għal opportunitajiet ġodda ta’ finanzjament. Dan jipprovdilhom sorsi alternattivi ta’ finanzjament u jiżgura l-kapaċità tagħhom li jikbru u jinnovaw, inkluż fl-oqsma ta’ importanza strateġika ewlenija għall-UE. Jikkontribwixxi indirettament għall-Mira 9.3 “Żieda fl-aċċess ta’ intrapriżi industrijali u oħrajn fuq skala żgħira għal servizzi finanzjarji, inkluż kreditu affordabbli, u l-integrazzjoni tagħhom fil-ktajjen tal-valur u fis-swieq”.

•Idoneità regolatorja u simplifikazzjoni

•Drittijiet fundamentali

4.IMPLIKAZZJONIJIET BAĠITARJI

5.ELEMENTI OĦRA

•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar

•Spjegazzjoni fid-dettall tad-dispożizzjonijiet speċifiċi tal-proposta

Emendi għad-Direttiva 2014/65/UE

·L-Artikolu 1(1) tal-proposta jemenda l-Artikolu 4(1), il-punt (12) tad-Direttiva 2014/65/UE, li huwa d-definizzjoni ta’ “suq tat-tkabbir tal-SMEs”, biex jinkludi wkoll is-segment ta’ MTF fid-definizzjoni.

·L-Artikolu 1(2), il-punt (a) tal-proposta jintroduċi punt 3a ġdid dwar il-kwalitajiet tar-riċerka dwar l-investiment. Dan jistabbilixxi li r-riċerka pprovduta minn partijiet terzi għandha tkun ġusta, ċara u mhux qarrieqa.

·L-Artikolu 1(2), il-punt (a) tal-proposta jdaħħal ukoll punt 3b ġdid dwar il-kundizzjonijiet biex ir-riċerka tiġi ttikkettata bħala “riċerka ffinanzjata mill-emittent”. Tali kundizzjonijiet jinkludu r-rekwiżit li r-riċerka tikkonforma ma’ kodiċi ta’ kondotta, kif ukoll ir-rekwiżiti għall-kontenut, il-pubblikazzjoni u r-rieżami ta’ tali kodiċi ta’ kondotta. L-Artikolu jiċċara wkoll li l-emittenti jistgħu jissottomettu r-riċerka tagħhom iffinanzjata mill-emittent lill-korp tal-ġbir skont il-proposta għal punt ta’ aċċess uniku Ewropew. Tiżdied kjarifika aħħarija li kwalunkwe materjal ta’ riċerka mħallas mill-emittent iżda mhux prodott f’konformità ma’ tali kodiċi ta’ kondotta għandu jiġi kklassifikat bħala komunikazzjoni ta’ kummerċjalizzazzjoni.

·L-Artikolu 1(2), il-punt (a) tal-proposta jintroduċi punt 3d ġdid. Għar-riċerka kklassifikata bħala riċerka ffinanzjata mill-emittent, irid ikun indikat b’mod ċar fuq il-paġna ta’ quddiem tar-riċerka li tkun tħejjiet f’konformità ma’ kodiċi ta’ kondotta.

·L-Artikolu 1(2), il-punt (b) tal-proposta jżid il-livell limitu tal-kapitalizzazzjoni tas-suq tal-kumpaniji għal EUR 10 biljun, li r-regoli ta’ separazzjoni ma japplikawx taħtu.

·L-Artikolu 1(3), il-punti (a) sa (c) jiċċaraw li segment ta’ MTF jista’ jiġi rreġistrat bħala suq tat-tkabbir tal-SMEs u jistabbilixxi l-kundizzjonijiet u r-rekwiżiti għar-reġistrazzjoni jew għat-tneħħija tar-reġistrazzjoni tiegħu.

·L-Artikolu 1(4) tal-proposta jintroduċi Artikolu 51a ġdid biex ikopri l-kundizzjonijiet speċifiċi għall-ammissjoni ta’ ishma għan-negozjar f’suq regolat. Tali kundizzjonijiet huma r-rekwiżit minimu ta’ kapitalizzazzjoni tas-suq minimu ta’ EUR 1 miljun għal kumpaniji li jfittxu li jelenkaw l-ishma tagħhom f’suq regolat, kif ukoll rekwiżit minimu ta’ volum varjabbli ta’ 10 %. Barra minn hekk, il-Kummissjoni għandha s-setgħa li tadotta atti delegati biex tbiddel tali livelli limiti meta dawn ifixklu l-likwidità fis-swieq pubbliċi, filwaqt li tqis l-iżviluppi finanzjarji.

Emendi għad-Direttiva 2001/34/KE

2022/0405 (COD)

Proposta għal

DIRETTIVA TAL-PARLAMENT EWROPEW U TAL-KUNSILL

li temenda d-Direttiva 2014/65/UE biex tagħmel is-swieq kapitali pubbliċi fl-Unjoni aktar attraenti għall-kumpaniji u biex tiffaċilita l-aċċess għall-kapital għall-intrapriżi żgħar u ta’ daqs medju u li tħassar id-Direttiva 2001/34/KE

(Test b’rilevanza għaż-ŻEE)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 50, 53(1) u 114 tiegħu,

Wara li kkunsidraw il-proposta tal-Kummissjoni Ewropea,

Wara li l-abbozz tal-att leġiżlattiv intbagħat lill-parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew 27 ,

Filwaqt li jaġixxu skont il-proċedura leġiżlattiva ordinarja,

Billi:

(1)Id-Direttiva 2014/65/UE tal-Parlament Ewropew u tal-Kunsill 28 ġiet emendata bir-Regolament (UE) 2019/2115 tal-Parlament Ewropew u tal-Kunsill 29 , li introduċa mitigazzjonijiet proporzjonati biex jittejjeb l-użu tas-swieq tat-tkabbir tal-SMEs u biex jitnaqqsu r-rekwiżiti regolatorji eċċessivi għall-emittenti li jfittxu ammissjoni ta’ titoli fis-swieq tat-tkabbir tal-SMEs, filwaqt li jinżamm livell xieraq ta’ protezzjoni tal-investituri u ta’ integrità tas-suq. Madankollu, biex jiġi ssimplifikat il-proċess tal-elenkar u biex it-trattament regolatorju tal-kumpaniji jsir aktar flessibbli u proporzjonat għad-daqs tagħhom, huma meħtieġa emendi ulterjuri għad-Direttiva 2014/65/UE.

(2)Id-Direttiva 2014/65 UE u d-Direttiva Delegata tal-Kummissjoni (UE) 2017/593 30 jistabbilixxu l-kundizzjonijiet li taħthom il-provvediment ta’ riċerka dwar l-investiment minn partijiet terzi lil ditti tal-investiment li jipprovdu mmaniġġar tal-portafoll jew servizzi oħra ta’ investiment jew anċillari ma għandux jitqies bħala inċentiv. Sabiex titrawwem aktar riċerka dwar l-investiment fuq il-kumpaniji fl-Unjoni, b’mod partikolari l-kumpaniji b’kapitalizzazzjoni żgħira u medja, u biex dawk il-kumpaniji jingħataw viżibbiltà akbar u aktar ċans li jattiraw investituri potenzjali, huwa meħtieġ li jiġu introdotti xi emendi għal dik id-Direttiva.

(3)Id-dispożizzjonijiet dwar ir-riċerka stabbiliti fid-Direttiva 2014/65/UE jirrikjedu li d-ditti tal-investiment jisseparaw il-pagamenti li jirċievu bħala kummissjonijiet ta’ senserija mill-kumpens perċepit għall-provvediment ta’ riċerka dwar l-investiment (“regoli dwar is-separazzjoni tar-riċerka”), jew li jħallsu għar-riċerka dwar l-investiment mir-riżorsi proprji tagħhom u jivvalutaw il-kwalità tar-riċerka li jixtru abbażi ta’ kriterji ta’ kwalità robusti u l-kapaċità ta’ tali riċerka li tikkontribwixxi għal deċiżjonijiet aħjar ta’ investiment. Fl-2021, dawk ir-regoli ġew emendati bid-Direttiva (UE) 2021/338 tal-Parlament Ewropew u tal-Kunsill 31 biex jippermettu pagamenti raggruppati għal servizzi ta’ eżekuzzjoni u riċerka għal kumpaniji b’kapitalizzazzjoni żgħira u medja taħt kapitalizzazzjoni tas-suq ta’ EUR 1 biljun. Madankollu, it-tnaqqis fir-riċerka dwar l-investiment ma naqasx.

(4)Sabiex tingħata ħajja ġdida lis-suq għar-riċerka dwar l-investiment u biex tiġi żgurata kopertura suffiċjenti tar-riċerka tal-kumpaniji, b’mod partikolari l-kumpaniji b’kapitalizzazzjoni żgħira u medja, huwa meħtieġ aktar tnaqqis fir-regoli dwar is-separazzjoni tar-riċerka. Billi l-livell limitu tal-kapitalizzazzjoni tas-suq tal-kumpaniji li taħtu ma japplikawx ir-regoli ta’ separazzjoni jiżdied minn EUR 1 biljun għal EUR 10 biljun, aktar kumpaniji b’kapitalizzazzjoni żgħira u medja, u b’mod partikolari aktar kumpaniji b’kapitalizzazzjoni medja se jibbenefikaw minn kopertura akbar tar-riċerka, li ġġib lil dawk il-kumpaniji aktar viżibbiltà minn investituri potenzjali u b’hekk iżżid il-kapaċità tagħhom li jżidu l-finanzjament fis-swieq.

(5)Barra minn hekk, biex tiġi appoġġata ulterjorment il-kopertura ta’ kumpaniji b’kapitalizzazzjoni żgħira u medja mir-riċerka dwar l-investiment, il-materjal ta’ riċerka mħallas kompletament jew parzjalment mill-emittenti jenħtieġ li jiġi kklassifikat bħala “riċerka ffinanzjata mill-emittent”. Sabiex jiġi żgurat livell adegwat ta’ oġġettività u ta’ indipendenza ta’ tali materjal ta’ riċerka, tali materjal jenħtieġ li jiġi prodott f’konformità ma’ kodiċi ta’ kondotta żviluppat jew approvat minn operatur tas-suq irreġistrat fi Stat Membru jew minn awtorità kompetenti. Sabiex tiġi appoġġata aktar viżibbiltà tar-riċerka ffinanzjata mill-emittent, jenħtieġ li l-emittenti jkollhom il-possibbiltà li jissottomettu r-riċerka tagħhom iffinanzjata mill-emittent lill-korp ta’ ġbir rilevanti kif iddefinit 32  fl-[Artikolu 2 (2) tal-proposta għal Regolament 33 dwar Punt ta’ Aċċess Uniku Ewropew ].

(6)Id-Direttiva 2014/65/UE introduċiet il-kategorija tas-suq tat-tkabbir tal-SMEs biex iżżid il-viżibbiltà u l-profil tas-swieq speċjalizzati fl-SMEs u trawwem l-iżvilupp ta’ standards regolatorji komuni fl-Unjoni ta’ swieq speċjalizzati fl-SMEs. Is-swieq tat-tkabbir tal-SMEs għandhom funzjoni ewlenija fl-iffaċilitar tal-aċċess għall-kapital għal dawk l-emittenti iżgħar billi jaqdu l-ħtiġijiet tagħhom. Biex jitrawwem l-iżvilupp ta’ tali swieq speċjalizzati u biex jiġi limitat il-piż organizzazzjonali għall-operaturi ta’ faċilitajiet multilaterali tan-negozjar (MTFs), huwa meħtieġ li s-segment ta’ MTF jitħalla japplika biex isir suq tat-tkabbir tal-SMEs dment li tali segment ikun separat b’mod ċar mill-bqija tal-MTF.

(7)Id-Direttiva 2001/34/KE tal-Parlament Ewropew u tal-Kunsill 34 tistabbilixxi regoli dwar l-elenkar fis-swieq tal-Unjoni. Dik id-Direttiva għandha l-għan li tikkoordina r-regoli dwar l-ammissjoni ta’ titoli għall-elenkar uffiċjali f’borża u dwar l-informazzjoni li għandha tiġi ppubblikata fuq dawk il-titoli biex tiġi pprovduta protezzjoni ekwivalenti għall-investituri fil-livell tal-Unjoni. Dik id-Direttiva tistabbilixxi wkoll ir-regoli tal-qafas regolatorju u superviżorju għas-swieq primarji tal-Unjoni. Matul is-snin, id-Direttiva 2001/34/KE ġiet emendata b’mod sinifikanti diversi drabi. Id-Direttivi 2003/71/KE tal-Parlament Ewropew u tal-Kunsill 35 u d-Direttiva 2004/109/KE tal-Parlament Ewropew u tal-Kunsill 36 issostitwew il-biċċa l-kbira tad-dispożizzjonijiet li jarmonizzaw il-kundizzjonijiet għall-għoti ta’ informazzjoni dwar talbiet għall-ammissjoni ta’ titoli għall-elenkar uffiċjali f’borża u l-informazzjoni dwar it-titoli ammessi għan-negozjar, u għamlu partijiet kbar mid-Direttiva 2001/34/KE żejda. Id-Direttiva 2001/34/KE bħala Direttiva ta’ armonizzazzjoni minima tagħti lill-Istati Membri diskrezzjoni pjuttost wiesgħa biex jiddevjaw mir-regoli stabbiliti f’dik id-Direttiva, li wassal għal frammentazzjoni tas-suq fl-Unjoni. Biex tiġi xprunata l-armonizzazzjoni tas-suq fil-livell tal-Unjoni u tinħoloq ġabra unika ta’ regoli, id-Direttiva 2001/34/KE jenħtieġ li titħassar.

(8)Id-Direttiva 2014/65/UE, bħad-Direttiva 2001/34/KE, tipprevedi r-regolamentazzjoni tas-swieq tal-istrumenti finanzjarji u ssaħħaħ il-protezzjoni tal-investituri fl-Unjoni. Id-Direttiva 2014/65/UE tistabbilixxi wkoll regoli dwar l-ammissjoni ta’ strumenti finanzjarji għan-negozjar. Billi l-kamp ta’ applikazzjoni tad-Direttiva 2014/65/UE jiġi estiż biex ikopri dispożizzjonijiet speċifiċi mid-Direttiva 2001/34/KE dan se jiżgura li jinżammu d-dispożizzjonijiet rilevanti kollha mid-Direttiva 2001/34/KE. Għadd ta’ dispożizzjonijiet tad-Direttiva 2001/34/KE, inklużi r-rekwiżiti dwar il-volum varjabbli u l-kapitalizzazzjoni tas-suq li għadhom japplikaw, huma infurzati mill-awtoritajiet kompetenti u huma meqjusa bħala regoli importanti għat-tfittxija tal-ammissjoni għan-negozjar ta’ ishma fi swieq regolati fl-Unjoni mill-parteċipanti fis-suq. Għalhekk huwa meħtieġ li dawk ir-regoli jiġu ttrasferiti fid-Direttiva 2014/65/UE biex, f’dispożizzjoni ġdida ta’ dik id-Direttiva, jiġu stabbiliti kundizzjonijiet minimi speċifiċi għall-ammissjoni għan-negozjar ta’ ishma fi swieq regolati. L-applikazzjoni ta’ dik id-dispożizzjoni l-ġdida jenħtieġ li tikkomplementa d-dispożizzjonijiet ġenerali dwar l-ammissjoni ta’ strument finanzjarju għan-negozjar stabbiliti fid-Direttiva 2014/65/UE.

(9)Sabiex ikun hemm lok għal aktar flessibbiltà għall-emittenti u biex is-swieq kapitali tal-Unjoni jsiru aktar kompetittivi, ir-rekwiżit minimu ta’ volum varjabbli jenħtieġ li jitnaqqas għal 10 %, li huwa limitu li jiżgura livell suffiċjenti ta’ likwidità fis-suq. Ir-rekwiżit ta’ volum varjabbli stabbilit fid-Direttiva 2001/34/KE li għandu jitqassam numru suffiċjenti ta’ ishma lill-pubbliku fi Stat Membru wieħed jew aktar jirreferi għall-pubbliku fl-Unjoni u ż-Żona Ekonomika Ewropea (UE/ŻEE). Jenħtieġ li dik ir-restrizzjoni ġeografika tar-rekwiżit ta’ volum varjabbli għall-UE/ŻEE ma tinżammx peress li d-Direttiva 2014/65/UE ma tipprevedix tali restrizzjoni għall-istrumenti finanzjarji ammessi għan-negozjar. Ir-rekwiżit li kumpanija għandha tippubblika jew tippreżenta l-kontijiet annwali tagħha għal perjodu ta’ żmien speċifiku jenħtieġ li ma jiġix ttrasferit fid-Direttiva 2014/65/UE peress li r-Regolament (UE) 2017/1129 tal-Parlament Ewropew u tal-Kunsill 37 diġà fih dispożizzjoni għal dak il-għan. Id-Direttiva 2014/65/UE diġà tistabbilixxi dispożizzjonijiet biex jiġu nnominati l-awtoritajiet kompetenti. Għalhekk, id-dispożizzjonijiet stabbiliti fid-Direttiva 2001/34/KE għall-ħatra ta’ awtorità kompetenti waħda jew aktar huma żejda. Ir-rekwiżit għal titoli ta’ dejn li l-ammont tas-self ma għandux ikun inqas minn EUR 200 000 jitqies bħala skadut fid-dawl tal-prattika attwali tas-suq.

(10)Il-kunċett ta’ ammissjoni ta’ titoli għall-elenkar uffiċjali f’borża, previst fid-Direttiva 2001/34/KE ma għadux jintuża b’mod frekwenti minħabba l-iżviluppi tas-suq, peress li d-Direttiva 2014/65/UE diġà tipprevedi l-kunċett ta’ “ammissjoni tal-istrumenti finanzjarji għan-negozjar f’suq regolat”. Ħafna drabi, iż-żewġ kunċetti “ammissjoni għall-elenkar uffiċjali” u “ammissjoni għan-negozjar f’suq regolat” jintużaw b’mod alternanti f’xi Stati Membri. Dan ifisser li, f’xi Stati Membri, ma ssir l-ebda distinzjoni bejn iż-żewġ kunċetti. Barra minn hekk, ir-reġim doppju ta’ ammissjoni għan-negozjar, minn naħa waħda, u l-ammissjoni għall-elenkar uffiċjali, min-naħa l-oħra, jistgħu jwasslu għal inċertezza legali fil-livell tal-Unjoni, b’mod partikolari, minħabba l-fatt li r-rekwiżiti stabbiliti fid-Direttiva 2003/71/KE, fid-Direttiva 2004/109/KE u fid-Direttiva 2014/57/UE tal-Parlament Ewropew u tal-Kunsill 38 ma japplikawx għal strumenti ammessi għall-elenkar uffiċjali, filwaqt li dawk ir-rekwiżiti japplikaw għal strumenti ammessi għan-negozjar f’suq regolat.

(11)Biex tissaħħaħ il-viżibbiltà tal-kumpaniji elenkati, b’mod partikolari l-SMEs u biex jiġu adattati l-kundizzjonijiet tal-elenkar sabiex jittejbu r-rekwiżiti għall-emittenti, il-Kummissjoni jenħtieġ li tiġi ddelegata bis-setgħa ta’ adozzjoni ta’ atti skont l-Artikolu 290 tat-Trattat dwar il-Funzjonament tal-Unjoni Ewropea fir-rigward tad-Direttiva emendatorja 2014/65/UE. Il-livell limitu tal-kapitalizzazzjoni tas-suq għall-kumpaniji, li għalihom ikun possibbli r-raggruppament mill-ġdid tat-tariffi tal-eżekuzzjoni tan-negozjar u tar-riċerka, biex jiġu koperti l-kumpaniji b’kapitalizzazzjoni żgħira u medja, u jiġi previst qafas għall-iżvilupp ta’ forma partikolari ta’ riċerka li l-emittent iħallas għaliha jenħtieġ li jiġi adattat. L-adattament tar-regoli dwar l-elenkar fl-Unjoni jenħtieġ li jirrifletti wkoll il-prattika tas-suq biex ikun effettiv u jippromwovi l-kompetizzjoni. B’mod partikolari huwa importanti li l-Kummissjoni twettaq konsultazzjonijiet xierqa waqt il-ħidma preparatorja tagħha, inkluż fil-livell tal-esperti, u li dawn il-konsultazzjonijiet isiru f’konformità mal-prinċipji stabbiliti fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet 39 . B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(12)Għaldaqstant, id-Direttiva 2014/65/KE jenħtieġ li tiġi emendata kif xieraq.

(13)Minħabba li l-objettivi ta’ din id-Direttiva, jiġifieri li jiġi ffaċilitat l-aċċess tal-kumpaniji b’kapitalizzazzjoni żgħira u medja għas-swieq kapitali, u li tiżdied il-koerenza tar-regoli tal-elenkar tal-Unjoni ma jistgħux jinkisbu suffiċjentement mill-Istati Membri iżda minflok, minħabba t-titjib u l-effetti mfittxija, jistgħu jinkisbu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju tal-proporzjonalità, kif stabbilit f’dak l-Artikolu, din id-Direttiva ma tmurx lil hinn minn dak li huwa meħtieġ sabiex jintlaħqu dawk l-objettivi.

ADOTTAW DIN ID-DIRETTIVA:

Artikolu 1
Emendi għad-Direttiva 2014/65/UE

Id-Direttiva 2014/65/UE hija emendata kif ġej:

(1)fl-Artikolu 4(1), il-punt (12) huwa sostitwit b’dan li ġej:

“(12)“suq tat-tkabbir tal-SMEs’ tfisser MTF, jew segment ta’ MTF, li huwa rreġistrat bħala suq tat-tkabbir tal-SMEs f’konformità mal-Artikolu 33;”;

(2)l-Artikolu 24 huwa emendat kif ġej:

(a)jiddaħħlu l-paragrafi 3a sa 3d li ġejjin:

“3a.ir-riċerka pprovduta minn partijiet terzi lil ditti tal-investiment li jipprovdu mmaniġġar tal-portafoll jew servizzi oħra ta’ investiment jew anċillari u riċerka mħejjija u distribwiti minn tali ditti għandha tkun ġusta, ċara u mhux qarrieqa. Ir-riċerka għandha tkun identifikabbli b’mod ċar bħala tali jew f’termini simili, dment li jiġu ssodisfati l-kundizzjonijiet kollha applikabbli għar-riċerka.

3b.Meta r-riċerka titħallas, kompletament jew parzjalment, mill-emittent u titqassam lill-pubbliku jew lil ditti tal-investiment jew lill-klijenti ta’ ditti tal-investiment li jipprovdu mmaniġġar tal-portafoll jew servizzi oħra ta’ investiment jew anċillari, tali riċerka għandha tiġi kklassifikata bħala “riċerka ffinanzjata mill-emittent” dment li tiġi prodotta f’konformità ma’ kodiċi ta’ kondotta żviluppat jew approvat minn operatur tas-suq irreġistrat fi Stat Membru jew minn awtorità kompetenti.

Il-kodiċi ta’ kondotta għandu jistabbilixxi standards minimi ta’ indipendenza u oġġettività li għandhom jiġu rrispettati mill-fornituri ta’ tali riċerka. L-operatur tas-suq jew l-awtorità kompetenti għandhom jippubblikaw il-kodiċi ta’ kondotta fuq is-sit web tagħhom u jirrieżaminawh u japprovawh mill-ġdid kull sentejn.

3c. L-Istati Membri għandhom jiżguraw li kwalunkwe emittent jista’ jissottometti r-riċerka tiegħu ffinanzjata mill-emittent, kif imsemmi fil-paragrafu 3b ta’ dan l-Artikolu, lill-korp ta’ ġbir rilevanti kif iddefinit fl-[Artikolu 2(2) tal-proposta għal Regolament dwar Punt ta’ Aċċess Uniku Ewropew 40 ].

3d.Ir-riċerka li tkun ikklassifikata bħala riċerka ffinanzjata mill-emittent għandha tindika fuq il-paġna ta’ quddiem tagħha b’mod ċar u prominenti li tkun tħejjiet f’konformità mal-kodiċi ta’ kondotta. Għandu jissemma wkoll l-isem tal-operatur tas-suq jew tal-awtorità kompetenti li tkun żviluppat jew approvat tali kodiċi ta’ kondotta. Kwalunkwe materjal ta’ riċerka ieħor imħallas kompletament jew parzjalment mill-emittent iżda mhux prodott f’konformità ma’ kodiċi ta’ kondotta kif imsemmi fil-paragrafu 3b għandu jiġi kklassifikat bħala komunikazzjoni ta’ kummerċjalizzazzjoni.”;

(b)fil-paragrafu 9a, il-punt (c) huwa sostitwit b’dan li ġej:

“(c)ir-riċerka li għaliha jkunu saru t-tariffi kkombinati jew il-pagament konġunt tikkonċerna emittenti li l-kapitalizzazzjoni tas-suq tagħhom għall-perjodu ta’ 36 xahar qabel il-provvediment tar-riċerka ma tkunx qabżet EUR 10 biljun, kif espressa mill-kwoti ta’ tmiem is-sena għas-snin meta dawk l-emittenti jkunu jew kienu elenkati jew mill-kapital proprju għas-snin finanzjarji meta dawk l-emittenti ma jkunux, jew ma kinux, elenkati.”;

(3)l-Artikolu 33 huwa emendat kif ġej:

(a)il-paragrafi 1 u 2 huma sostitwiti b’dan li ġej:

“1.L-Istati Membri għandhom jipprovdu li l-operatur ta’ MTF jista’ japplika mal-awtorità kompetenti tal-post sabiex l-MTF jew segment tagħha tiġi rreġistrata bħala suq tat-tkabbir tal-SMEs.

2.L-Istati Membri għandhom jipprovdu li l-awtorità kompetenti tad-domiċilju tista’ tirreġistra l-MTF, jew segment tagħha, bħala suq tat-tkabbir tal-SMEs jekk l-awtorità kompetenti tirċievi applikazzjoni kif imsemmi fil-paragrafu 1 u tkun issodisfata li r-rekwiżiti fil-paragrafu 3 jkunu mħarsa fir-rigward tal-MTF, jew li r-rekwiżiti fil-paragrafu 3a jkunu mħarsa fir-rigward ta’ segment tal-MTF.”;

(b)jiżdied il-paragrafu 3a li ġej:

“3a. L-Istati Membri għandhom jiżguraw li s-segment rilevanti tal-MTF ikun soġġett għal regoli, sistemi u proċeduri effettivi li jiżguraw li jkunu ġew issodisfati l-kundizzjonijiet imsemmija fil-paragrafu 3 u l-kundizzjonijiet kollha li ġejjin:

(a)is-segment tal-MTF irreġistrat bħala “suq tat-tkabbir tal-SMEs” ikun separat b’mod ċar mis-segmenti tas-suq l-oħra mħaddma mill-operatur tal-MTF, li jkun fost l-oħrajn indikat b’isem differenti, b’ġabra ta’ regoli differenti, bi strateġija ta’ kummerċjalizzazzjoni differenti, u b’pubbliċità differenti, kif ukoll b’allokazzjoni speċifika tal-kodiċi ta’ identifikazzjoni tas-suq għas-segment tas-suq tat-tkabbir tal-SMEs;

(b)it-tranżazzjonijiet magħmula fis-segment speċifiku tas-suq tat-tkabbir tal-SMEs ikunu distinti b’mod ċar minn attività oħra tas-suq fis-segmenti l-oħra tal-MTF;

(c)fuq talba tal-awtorità kompetenti tad-domiċilju, l-MTF għandha tipprovdi lista komprensiva tal-istrumenti elenkati fis-segment tas-suq tat-tkabbir tal-SMEs ikkonċernat, kif ukoll kwalunkwe informazzjoni dwar it-tħaddim tas-segment tas-suq tat-tkabbir tal-SMEs li l-awtorità kompetenti tista’ titlob.”;

(c)il-paragrafi 4 sa 6 huma sostitwiti b’dawn li ġejjin:

“4.Il-kriterji stabbiliti fil-paragrafi 3 u 3a huma mingħajr preġudizzju għall-konformità mid-ditta ta’ investiment jew mill-operatur tas-suq li jħaddem l-MTF, jew segment tagħha, ma’ obbligi oħra skont din id-Direttiva, rilevanti għat-tħaddim tal-MTFs.

5.L-Istati Membri għandhom jipprovdu li l-awtorità kompetenti tad-domiċilju tista’ tiddereġistra l-MTF, jew segment tagħha, bħala suq tat-tkabbir tal-SMEs fi kwalunkwe każ minn dawn li ġejjin:

(a)id-ditta ta’ investiment jew l-operatur tas-suq li jħaddem l-MTF, jew segment tagħha, japplika għad-dereġistrazzjoni tagħha;

(b)ma jkunx hemm aktar konformità mar-rekwiżiti fil-paragrafu 3 jew 3a b’rabta mal-MTF, jew segment tagħha.

6.L-Istati Membri għandhom jirrikjedu li jekk awtorità kompetenti tad-domiċilju tirreġistra jew tiddereġistra MTF, jew segment tagħha, bħala suq tat-tkabbir tal-SMEs skont dan l-Artikolu, dik l-awtorità għandha tinforma mill-aktar fis possibbli lill-ESMA b’dik ir-reġistrazzjoni jew dereġistrazzjoni. L-ESMA għandha tippubblika fuq is-sit web tagħha lista tas-swieq tat-tkabbir tal-SMEs u għandha żżomm dik il-lista aġġornata.”;

(d)il-paragrafu 8 huwa sostitwit b’dan li ġej:

“8.Il-Kummissjoni għandha s-setgħa li tadotta atti delegati f’konformità mal-Artikolu 89 biex tissupplimenta din id-Direttiva billi tkompli tispeċifika r-rekwiżiti stabbiliti fil-paragrafi 3 u 3a ta’ dan l-Artikolu. Dawk ir-rekwiżiti għandhom iqisu l-ħtieġa li jinżammu livelli għoljin ta’ protezzjoni tal-investituri biex tiġi promossa l-fiduċja tal-investituri f’dawk is-swieq filwaqt li jiġu mminimizzati l-piżijiet amministrattivi għall-emittenti fis-suq. Għandhom iqisu wkoll li d-dereġistrazzjonijiet ma jseħħux u lanqas ma għandhom jiġu rrifjutati r-reġistrazzjonijiet sempliċiment minħabba nuqqas temporanju ta’ konformità mar-rekwiżit stabbilit fil-paragrafu 3, il-punt (a), ta’ dan l-Artikolu.”;

(4)jiddaħħal l-Artikolu 51a li ġej:

“Artikolu 51a Kundizzjonijiet speċifiċi għall-ammissjoni ta’ ishma għan-negozjar

1.L-Istati Membri għandhom jirrikjedu li l-kapitalizzazzjoni tas-suq prevedibbli tal-ishma li għalihom tintalab l-ammissjoni għan-negozjar, jew jekk dan ma jkunx jista’ jiġi vvalutat, il-kapital u r-riżervi tal-kumpanija, inkluż il-profitt u t-telf, mill-aħħar sena finanzjarja, għandhom ikunu mill-inqas EUR 1 000 000 jew ammont ekwivalenti f’munita nazzjonali għajr l-Euro.

2.Madankollu, il-paragrafu 1 ma għandux japplika għall-ammissjoni għan-negozjar ta’ ishma funġibbli ma’ ishma diġà ammessi għan-negozjar.

3.Meta, bħala riżultat ta’ aġġustament tal-ammont ekwivalenti tal-Euro fil-munita nazzjonali, il-kapitalizzazzjoni tas-suq espressa fil-munita nazzjonali tibqa’ għal perjodu ta’ sena mill-inqas 10 % bejn wieħed u ieħor il-valur ta’ EUR 1 000 000, l-Istat Membru għandu, sa 12-il xahar wara li jiskadi dak il-perjodu, jaġġusta l-liġijiet, ir-regolamenti jew id-dispożizzjonijiet amministrattivi tiegħu biex jikkonforma mal-paragrafu 1.

4.L-Istati Membri għandhom jirrikjedu li s-swieq regolati jiżguraw li, fi kwalunkwe ħin, mill-inqas 10 % tal-kapital sottoskritt irrappreżentat mill-klassi ta’ ishma kkonċernata mill-applikazzjoni għall-ammissjoni għan-negozjar ikun miżmum mill-pubbliku.

5. Meta l-perċentwal ta’ ishma miżmuma mill-pubbliku jkun inqas minn 10 % tal-kapital sottoskritt, l-Istati Membri għandhom jiżguraw li s-swieq regolati jirrikjedu li numru suffiċjenti ta’ ishma jitqassmu lill-pubbliku sabiex jiġi ssodisfat ir-rekwiżit stabbilit fil-paragrafu 4.

6.Meta tintalab ammissjoni għan-negozjar għal ishma funġibbli ma’ ishma diġà ammessi għan-negozjar, is-swieq regolati għandhom jivvalutaw, biex jiġi ssodisfat ir-rekwiżit stabbilit fil-paragrafu 4, jekk ikunx tqassam numru suffiċjenti ta’ ishma lill-pubbliku fir-rigward tal-ishma kollha maħruġa u mhux biss fir-rigward tal-ishma funġibbli ma’ ishma diġà ammessi għan-negozjar.

7.Il-Kummissjoni għandha s-setgħa li tadotta atti delegati f’konformità mal-Artikolu 89 biex temenda din id-Direttiva billi timmodifika l-livelli limitu msemmija fil-paragrafi 1 u 3 jew fil-paragrafi 4 u 5 jew fit-tnejn li huma, meta l-livelli limitu applikabbli jimpedixxu l-likwidità fis-swieq pubbliċi meta jitqiesu l-iżviluppi finanzjarji.”;

(5)l-Artikolu 89 huwa emendat kif ġej:

(a)il-paragrafi 2 u 3 huma sostitwiti b’dan li ġej:

“2.Id-delega tas-setgħa msemmija fl-Artikolu 2(3), l-Artikolu 2(4), l-Artikolu 4(1)(2), it-tieni subparagrafu, l-Artikolu 4(2), l-Artikolu 13(1), l-Artikolu 16(12), l-Artikolu 23(4), l-Artikolu 24(13), l-Artikolu 25(8), l-Artikolu 27(9), l-Artikolu 28(3), l-Artikolu 30(5), l-Artikolu 31(4), l-Artikolu 32(4), l-Artikolu 33(8), l-Artikolu 51a(7), l-Artikolu 52(4), l-Artikolu 54(4), l-Artikolu 58(6), l-Artikolu 64(7), l-Artikolu 65(7) u l-Artikolu 79(8) hija mogħtija lill-Kummissjoni għal perjodu ta’ żmien indeterminat.

3.Id-delega tas-setgħa msemmija fl-Artikolu 2(3), l-Artikolu 2(4), l-Artikolu 4(1)(2), it-tieni subparagrafu, l-Artikolu 4(2), l-Artikolu 13(1), l-Artikolu 16(12), l-Artikolu 23(4), l-Artikolu 24(13), l-Artikolu 25(8), l-Artikolu 27(9), l-Artikolu 28(3), l-Artikolu 30(5), l-Artikolu 31(4), l-Artikolu 32(4), l-Artikolu 33(8), l-Artikolu 51a(7), l-Artikolu 52(4) l-Artikolu 54(4), l-Artikolu 58(6), l-Artikolu 64(7), l-Artikolu 65(7) u Artikolu 79(8) tista’ tiġi revokata fi kwalunkwe mument mill-Parlament Ewropew jew mill-Kunsill. Deċiżjoni li tirrevoka għandha ttemm id-delega tas-setgħa speċifikata f’dik id-deċiżjoni. Din għandha ssir effettiva l-għada tal-pubblikazzjoni tad-deċiżjoni f’Il-Ġurnal Uffiċjali tal-Unjoni Ewropea jew f’data aktar tard speċifikata fih. Ma għandhiex taffettwa l-validità ta’ kwalunkwe att delegat li jkun diġà fis-seħħ.”;

(b)il-paragrafu 5 huwa sostitwit b’dan li ġej:

“5.Att delegat adottat skont l-Artikolu 2(3), l-Artikolu 2(4), l-Artikolu 4(1)(2), it-tieni subparagrafu, l-Artikolu 4(2), l-Artikolu 13(1), l-Artikolu 16(12), l-Artikolu 23(4), l-Artikolu 24(13), l-Artikolu 25(8), l-Artikolu 27(9), l-Artikolu 28(3), l-Artikolu 30(5), l-Artikolu 31(4), l-Artikolu 32(4), l-Artikolu 33(8), l-Artikolu 51a(7), l-Artikolu 52(4), l-Artikolu 54(4), l-Artikolu 58(6), l-Artikolu 64(7), l-Artikolu 65(7) jew l-Artikolu 79(8) għandu jidħol fis-seħħ biss jekk ma tiġix espressa oġġezzjoni mill-Parlament Ewropew jew mill-Kunsill fi żmien tliet xhur min-notifika ta’ dak l-att lill-Parlament Ewropew u lill-Kunsill jew jekk, qabel ma jiskadi dak il-perjodu, il-Parlament Ewropew u l-Kunsill ikunu t-tnejn infurmaw lill-Kummissjoni li mhumiex se joġġezzjonaw. Dak il-perjodu għandu jiġi estiż bi tliet xhur fuq l-inizjattiva tal-Parlament Ewropew jew tal-Kunsill.”.

Artikolu 2
Tħassir tad-Direttiva 2001/34/KE

Id-Direttiva 2001/34/KE titħassar minn … [OP jekk jogħġbok daħħal id-data = 24 xahar mid-data tad-dħul fis-seħħ ta din id-Direttiva].

Artikolu 3
Traspożizzjoni

1.L-Istati Membri għandhom jadottaw u jippubblikaw, sa mhux aktar tard minn … [OP, jekk jogħġbok daħħal id-data = 12-il xahar mid-data tad-dħul fis-seħħ ta’ din id-Direttiva], il-liġijiet, ir-regolamenti u d-dispożizzjonijiet amministrattivi neċessarji sabiex jikkonformaw ma’ din id-Direttiva. Huma għandhom jikkomunikaw minnufih it-test ta’ dawk id-dispożizzjonijiet lill-Kummissjoni.

Huma għandhom japplikaw dawk id-dispożizzjonijiet minn … [OP jekk jogħġbok daħħal id-data = 18-il xahar mid-data tad-dħul fis-seħħ ta’ din id-Direttiva].

Meta l-Istati Membri jadottaw dawk id-dispożizzjonijiet, fihom għandu jkun hemm referenza għal din id-Direttiva jew għandhom ikunu akkumpanjati minn dik ir-referenza meta ssir il-pubblikazzjoni uffiċjali tagħhom. Huma l-Istati Membri li għandhom jiddeċiedu kif issir dik ir-referenza.

2.L-Istati Membri għandhom jikkomunikaw lill-Kummissjoni t-test tad-dispożizzjonijiet prinċipali tad-dritt nazzjonali li jadottaw fil-qasam kopert minn din id-Direttiva.

Artikolu 4
Dħul fis-seħħ

Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.

Artikolu 5
Destinatarji

Din id-Direttiva hija indirizzata lill-Istati Membri.

Magħmul fi Brussell,

(1)    Empowering EU capital markets for SMEs - Making listing cool again Final report of the Technical Expert Stakeholder Group (TESG) on SMEs, Mejju 2021. Oxera Consulting LPP, Primary and secondary equity markets in EU, Final report, Novembru 2020, Oxera-study-Primary-and-Secondary-Markets-in-the-EU-Final-Report-EN-1.pdf .

(2)

   Id-Direttiva 2014/65/UE tal-Parlament Ewropew u tal-Kunsill tal-15 ta’ Mejju 2014 dwar is-swieq fl-istrumenti finanzjarji u li temenda d-Direttiva 2002/92/KE u d-Direttiva 2011/61/UE (riformulazzjoni) (ĠU L 173, 12.6.2014, p. 349).

(3)

   Biex MTF tikkwalifika bħala suq tat-tkabbir tal-SMEs, mill-inqas 50 % tal-emittenti li l-istrumenti finanzjarji tagħhom huma nnegozjati fuq l-MTF jeħtieġ li jkunu SMEs, iddefiniti skont l-MiFID II bħala kumpaniji b’kapitalizzazzjoni medja tas-suq ta’ inqas minn EUR 200 miljun. Sabiex jiġi żgurat il-livell xieraq ta’ protezzjoni tal-investituri, ir-regoli tal-elenkar dwar is-swieq tat-tkabbir tal-SMEs iridu jissodisfaw ukoll ċerti standards ta’ kwalità, inkluża l-ħtieġa li jitfassal dokument ta’ ammissjoni xieraq (meta prospett ma jkunx meħtieġ) u li jkun hemm konformità mar-rapportar finanzjarju perjodiku. Il-qafas tas-suq tat-tkabbir tal-SMEs ġie żviluppat biex jiġu rikonoxxuti ulterjorment il-ħtiġijiet speċjali tal-SMEs li jaċċessaw is-swieq pubbliċi tal-ekwità u tal-bonds għall-ewwel darba.

(4)

   Ir-Regolament (UE) 2019/2115 tal-Parlament Ewropew u tal-Kunsill tas-27 ta’ Novembru 2019 li jemenda d-Direttiva 2014/65/UE u r-Regolamenti (UE) Nru 596/2014 u (UE) 2017/1129 fir-rigward tal-promozzjoni tal-użu ta’ swieq tat-tkabbir tal-SMEs (ĠU L 320, 11.12.2019, p. 1).

(5)

    Final report of the Technical Expert Stakeholder Group (TESG) on SMEs - Empowering EU capital markets - Making listing cool again (europa.eu)

(6)

   Ara p. 4: state_of_the_union_2021_letter_of_intent_mt.pdf (europa.eu) .

(7)

   Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjun Programm ta’ ħidma tal-Kummissjoni għall-2022 Flimkien għal Ewropa iktar b’saħħitha COM (2021) 645 final cwp2022_en.pdf (europa.eu) .

(8)

   Id-Direttiva Delegata tal-Kummissjoni (UE) 2017/593 tas-7 ta’ April 2016 li tissupplimenta d-Direttiva 2014/65/UE tal-Parlament Ewropew u tal-Kunsill rigward is-salvagwardja tal-istrumenti finanzjarji u l-fondi tal-klijenti, l-obbligi ta’ governanza tal-prodotti u r-regoli applikabbli għall-provvediment jew ir-riċeviment ta’ tariffi, kummissjonijiet jew kwalunkwe benefiċċju monetarju jew mhux monetarju (ĠU L 87, 31.3.2017, p. 500).

(9)

   Id-Direttiva (UE) 2021/338 tal-Parlament Ewropew u tal-Kunsill tas-16 ta’ Frar 2021 li temenda d-Direttiva 2014/65/UE fir-rigward ta’ rekwiżiti ta’ informazzjoni, governanza tal-prodotti u limiti ta’ pożizzjoni, u d-Direttivi 2013/36/UE u (UE) 2019/878 fir-rigward tal-applikazzjoni tagħhom għad-ditti tal-investiment, għas-sostenn tal-irkupru mill-kriżi tal-COVID-19

(10)

   Il-Premessa 8 tas-CMRP (id-Direttiva (UE) 2021/338 tal-Parlament Ewropew u tal-Kunsill tas-16 ta’ Frar 2021 li temenda d-Direttiva 2014/65/UE fir-rigward ta’ rekwiżiti ta’ informazzjoni, governanza tal-prodotti u limiti ta’ pożizzjoni, u d-Direttivi 2013/36/UE u (UE) 2019/878 fir-rigward tal-applikazzjoni tagħhom għad-ditti tal-investiment, għas-sostenn tal-irkupru mill-kriżi tal-COVID-19) tgħid li: “Immedjatament wara l-pandemija tal-COVID-19, l-emittenti, u b’mod partikolari l-kumpaniji b’kapitalizzazzjoni żgħira u medja, jeħtieġ li jiġu appoġġati minn swieq tal-kapital b’saħħithom. Ir-riċerka dwar l-emittenti b’kapitalizzazzjoni żgħira u medja hija essenzjali biex tgħin lill-emittenti jistabbilixxu kuntatt mal-investituri. Dik ir-riċerka żżid il-viżibbiltà tal-emittenti u għaldaqstant tiżgura livell suffiċjenti ta’ investiment u likwidità. Id-ditti tal-investiment għandhom jitħallew iħallsu b’mod konġunt għall-provvediment tar-riċerka u għall-provvediment tas-servizzi eżekuttivi dment li jiġu ssodisfati ċerti kundizzjonijiet”.

(11)

   F’April 2021, l-ESMA ppubblikat ir-Rapport Finali tagħha dwar il-funzjonament tar-reġim għas-swieq tat-tkabbir tal-SMEs, li kkonkluda li dan ir-reġim il-ġdid kien relattivament ta’ suċċess, fiż-żmien tal-pubblikazzjoni tar-rapport, bi sbatax-il MTF irreġistrati bħala swieq tat-tkabbir tal-SMEs. Rapport disponibbli fuq: final_report_on_sme_gms_-_mifid_ii.pdf (europa.eu) .

(12)    Id-Direttiva 2003/71/KE tal-Parlament Ewropew u tal-Kunsill tal-4 ta’ Novembru 2003 dwar il-prospett li għandu jiġi ppubblikat meta titoli jiġu offruti lill-pubbliku jew jiġu ammessi għall-kummerċ u li temenda d-Direttiva 2001/34/KE (ĠU L 345, 31.12.2003, p. 64).

(13)    Id-Direttiva 2004/109/KE tal-Parlament Ewropew u tal-Kunsill tal-15 ta’ Diċembru 2004 dwar l-armonizzazzjoni tar-rekwiżiti ta’ trasparenza f’dak li għandu x’jaqsam ma’ informazzjoni dwar emittenti li t-titoli tagħhom huma ammessi għall-kummerċ f’suq regolat (ĠU L 390, 31.12.2004, p. 38).

(14)

   Seba’ NCAs biss innotaw li d-Direttiva dwar l-Elenkar għadha fis-seħħ jew parzjalment fis-seħħ fil-ġuriżdizzjoni tagħhom. Analiżi aktar dettaljata tista’ tinstab fl-Anness 7 tal-Valutazzjoni tal-Impatt li takkumpanja din il-proposta.

(15)

   Rapport bit-titolu “Reviving research in the wake of Directive 2014/65/EU: Observations, issues and recommendations available at: 20200124-rapport-mission-recherche-projet-va-pm.pdf (amf-france.org)

(16)    Proposta għal Regolament tal-Parlament Ewropew u tal-Kunsill li jistabbilixxi punt ta’ aċċess uniku Ewropew li jipprovdi aċċess ċentralizzat għal informazzjoni disponibbli pubblikament ta’ rilevanza għas-servizzi finanzjarji, is-swieq kapitali u s-sostenibbiltà. 2021/0378 (COD).

(17)    Proposta għal Regolament tal-Parlament Ewropew u tal-Kunsill li jistabbilixxi punt ta’ aċċess uniku Ewropew li jipprovdi aċċess ċentralizzat għal informazzjoni disponibbli pubblikament ta’ rilevanza għas-servizzi finanzjarji, is-swieq kapitali u s-sostenibbiltà. 2021/0378 (COD)

(18)

   MiFID II, Premessa 132 

(19)

   Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni Pjan ta’ Azzjoni għall-Bini ta’ Unjoni tas-Swieq Kapitali COM(2015) 468 final

(20)

   Komunikazzjoni tal-Kummissjoni dwar ir-rieżami ta’ nofs it-terminu tal-pjan ta’ azzjoni tal-unjoni tas-swieq kapitali ({SWD(2017) 224 final} u {SWD(2017) 225 final} – 8 ta’ Ġunju 2017) https://commission.europa.eu/system/files/2017-06/factsheet-cmu-mid-term-review-june2017_en.pdf

(21)

   Proposta għal Regolament tal-Parlament Ewropew u tal-Kunsill li jemenda r-Regolamenti (UE) Nru 596/2014 u (UE) Nru 2017/1129 fejn tidħol il-promozzjoni tal-użu ta’ swieq tat-tkabbir tal-SMEs COM(2018) 331 final

(22)

   Proposta għal Direttiva tal-Kunsill dwar l-istabbiliment ta’ regoli dwar remissjoni li tnaqqas il-predispożizzjoni favur id-dejn, u dwar il-limitazzjoni tad-deduċibbiltà tal-imgħax għal finijiet ta’ taxxa korporattiva (COM/2022/216 final).

(23)

   Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni - Aġenda Ewropea għall-Innovazzjoni Ġdida (COM/2022/332 final).

(24)    Il-Kummissjoni Ewropea - Dikjarazzjoni, “A “Relief Package” to give our SMEs a lifeline in troubled waters I Blog of Commissioner Thierry Breton; Brussell, 19 ta’ Settembru 2022.

(25)

   ĠU C 326, 26.10.2012, p. 47–390 (GA)

(26)    Fost l-Għanijiet ta’ Żvilupp Sostenibbli (SDG) tan-Nazzjonijiet Uniti, l-SDG 8 jikkonċerna “xogħol deċenti u tkabbir ekonomiku”. L-Att dwar l-Elenkar huwa mistenni li jikkontribwixxi għat-tkabbir tal-SMEs billi jipprovdi aċċess aktar faċli għall-finanzjament permezz tas-swieq pubbliċi. Kumpaniji elenkati ġodda huma xprun essenzjali ta’ investiment ġdid u ħolqien tal-impjiegi. Aċċess aktar faċli għas-swieq pubbliċi joħloq inċentivi għall-imprendituri biex jiddiversifikaw fi żminijiet ta’ taqlib ekonomiku, u dan iwassal għal ekonomija aktar reżiljenti.

(27)    ĠU C , , p. .

(28)    Id-Direttiva 2014/65/UE tal-Parlament Ewropew u tal-Kunsill tal-15 ta’ Mejju 2014 dwar is-swieq fl-istrumenti finanzjarji u li temenda d-Direttiva 2002/92/KE u d-Direttiva 2011/61/UE (ĠU L 173, 12.6.2014, p. 349).

(29)    Ir-Regolament (UE) 2019/2115 tal-Parlament Ewropew u tal-Kunsill tas-27 ta’ Novembru 2019 li jemenda d-Direttiva 2014/65/UE u r-Regolamenti (UE) Nru 596/2014 u (UE) 2017/1129 fir-rigward tal-promozzjoni tal-użu ta’ swieq tat-tkabbir tal-SMEs (ĠU L 320, 11.12.2019, p. 1).

(30)    Id-Direttiva Delegata tal-Kummissjoni (UE) 2017/593 tas-7 ta’ April 2016 li tissupplimenta d-Direttiva 2014/65/UE tal-Parlament Ewropew u tal-Kunsill rigward is-salvagwardja tal-istrumenti finanzjarji u l-fondi tal-klijenti, l-obbligi ta’ governanza tal-prodotti u r-regoli applikabbli għall-provvediment jew ir-riċeviment ta’ tariffi, kummissjonijiet jew kwalunkwe benefiċċju monetarju jew mhux monetarju (ĠU L 87, 31.3.2017, p. 500).

(31)    Id-Direttiva (UE) 2021/338 tal-Parlament Ewropew u tal-Kunsill tas-16 ta’ Frar 2021 li temenda d-Direttiva 2014/65/UE fir-rigward ta’ rekwiżiti ta’ informazzjoni, governanza tal-prodotti u limiti ta’ pożizzjoni, u d-Direttivi 2013/36/UE u (UE) 2019/878 fir-rigward tal-applikazzjoni tagħhom għad-ditti tal-investiment, għas-sostenn tal-irkupru mill-kriżi tal-COVID-19 (ĠU L 68, 26.2.2021, p. 14).

(32)    Ara l-Artikolu 2.2 tal-proposta għal Regolament [2021.78.COD]

(33)    Proposta għal Regolament [2021/03.78.COD]

(34)    Id-Direttiva 2001/34/KE tal-Parlament Ewropew u tal-Kunsill tat-28 ta’ Mejju 2001 fuq l-ammissjoni ta’ titoli għal-listi ta’ stock exchange uffiċjali u fuq informazzjoni li għandha tkun ippubblikata fuq dawk it-titoli (ĠU L 184, 6.7.2001, p. 1).

(35)    Id-Direttiva 2003/71/KE tal-Parlament Ewropew u tal-Kunsill tal-4 ta’ Novembru 2003 dwar il-prospett li għandu jiġi ppubblikat meta titoli jiġu offruti lill-pubbliku jew jiġu ammessi għall-kummerċ u li temenda d-Direttiva 2001/34/KE (ĠU L 345, 31.12.2003, p. 64).

(36)    Id-Direttiva 2004/109/KE tal-Parlament Ewropew u tal-Kunsill tal-15 ta’ Diċembru 2004 dwar l-armonizzazzjoni tar-rekwiżiti ta’ trasparenza f’dak li għandu x’jaqsam ma’ informazzjoni dwar emittenti li t-titoli tagħhom huma ammessi għall-kummerċ f’suq regolat u li temenda d-Direttiva 2001/34/KE (ĠU L 390, 31.12.2004, p. 38).

(37)    Ir-Regolament (UE) 2017/1129 tal-Parlament Ewropew u tal-Kunsill tal-14 ta’ Ġunju 2017 dwar il-prospett li għandu jiġi ppubblikat meta titoli jiġu offruti lill-pubbliku jew jiġu ammessi għall-kummerċ f’suq regolat, u li jħassar id-Direttiva 2003/71/KE (ĠU L 168, 30.6.2017, p. 12).

(38)    Id-Direttiva 2014/57/UE tal-Parlament Ewropew u tal-Kunsill tas-16 ta’ April 2014 dwar sanzjonijiet kriminali għal abbuż tas-suq (direttiva dwar l-abbuż tas-suq) (ĠU L 173, 12.6.2014, p. 179).

(39)    ĠU L 123, 12.5.2016, p. 1.

(40)    Proposta għal Regolament [2021/0378.COD].