IL-KUMMISSJONI EWROPEA

Brussell, 7.12.2022

COM(2022) 689 final

2022/0401(APP)

Proposta għal

DIRETTIVA TAL-KUNSILL

dwar standards għall-korpi tal-ugwaljanza fil-qasam tat-trattament ugwali bejn il-persuni irrispettivament mill-oriġini razzjali jew etnika tagħhom, it-trattament ugwali fil-qasam tal-impjiegi u x-xogħol bejn il-persuni irrispettivament mir-reliġjon jew it-twemmin, id-diżabilità, l-età jew l-orjentazzjoni sesswali tagħhom, it-trattament ugwali bejn in-nisa u l-irġiel fi kwistjonijiet ta’ sigurtà soċjali u fl-aċċess għal prodotti u servizzi u l-provvista tagħhom, u li tħassar l-Artikolu 13 tad-Direttiva 2000/43/KE u l-Artikolu 12 tad-Direttiva 2004/113/KE

{SWD(2022) 386 final} - {SWD(2022) 387 final}

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u objettivi tal-proposta

Il-korpi tal-ugwaljanza għandhom rwol fundamentali fl-arkitettura tan-nondiskriminazzjoni tal-UE. Dawn huma organizzazzjonijiet pubbliċi li jassistu lill-vittmi tad-diskriminazzjoni, jimmonitorjaw u jirrapportaw dwar kwistjonijiet ta’ diskriminazzjoni, u jikkontribwixxu biex titqajjem kuxjenza dwar id-drittijiet tan-nies u l-valur tal-ugwaljanza. Il-korpi tal-ugwaljanza sa issa huma meħtieġa mid-dritt tal-UE biex jiġġieldu d-diskriminazzjoni abbażi tal-oriġini razzjali u etnika u l-ġeneru f’oqsma speċifiċi. Il-liġi nazzjonali spiss tipprevedi mandat usa’.

L-għan ta’ din il-proposta huwa li jiġu stabbiliti standards vinkolanti għall-korpi tal-ugwaljanza fil-qasam ta’:

(a) it-trattament ugwali bejn il-persuni irrispettivament mill-oriġini razzjali jew etnika tagħhom,

(b) it-trattament ugwali fi kwistjonijiet ta’ impjieg u xogħol bejn il-persuni irrispettivament mir-reliġjon jew it-twemmin, id-diżabilità, l-età jew l-orjentazzjoni sesswali tagħhom, u,

(c) it-trattament ugwali bejn in-nisa u l-irġiel fi kwistjonijiet ta’ sigurtà soċjali u fl-aċċess għal oġġetti u servizzi u l-provvista tagħhom.

Il-Kummissjoni adottat proposta separata 1 biex tistabbilixxi standards vinkolanti għall-korpi tal-ugwaljanza fil-qasam tat-trattament ugwali u l-opportunitajiet indaqs bejn in-nisa u l-irġiel f’materji ta’ impjieg u xogħol, inkluż l-impjieg indipendenti (“proposta parallela”). Flimkien mal-proposta parallela, din il-proposta għandha l-għan li toħloq qafas imsaħħaħ għall-korpi tal-ugwaljanza fl-Unjoni Ewropea biex tippromwovi t-trattament ugwali u l-opportunitajiet indaqs u tiġġieled id-diskriminazzjoni għar-raġunijiet kollha u fl-oqsma stabbiliti mid-Direttivi dwar l-Ugwaljanza msemmija hawn taħt.

Il-korpi tal-ugwaljanza ġew stabbiliti għall-ewwel darba mid-Direttiva dwar l-Ugwaljanza Razzjali (2000/43/KE) 2 . Huma ngħataw il-kompitu li jippromwovu t-trattament ugwali permezz tal-missjonijiet li ġejjin:

-Jipprovdu assistenza indipendenti lill-vittmi tad-diskriminazzjoni fis-segwitu tal-ilmenti tagħhom rigward id-diskriminazzjoni,

-iwettqu stħarriġ indipendenti dwar id-diskriminazzjoni,

-jippubblikaw rapporti indipendenti u jagħmlu rakkomandazzjonijiet dwar kwistjonijiet relatati mad-diskriminazzjoni.

Tliet Direttivi sussegwenti dwar l-ugwaljanza inkarigaw lill-korpi tal-ugwaljanza bl-istess missjoni fl-oqsma rispettivi tagħhom: id-Direttiva dwar l-Ugwaljanza bejn il-Ġeneri fil-qasam tal-prodotti u s-servizzi (2004/113/KE) 3 , id-Direttiva dwar l-Ugwaljanza bejn il-Ġeneri fil-qasam tal-impjiegi (2006/54/KE) 4 u d-Direttiva dwar l-Ugwaljanza bejn il-Ġeneri fil-qasam tal-impjiegi indipendenti (2010/41/UE) 5 . Dawn it-tnejn tal-aħħar żiedu l-kompitu ulterjuri tal-iskambju ta’ informazzjoni ma’ korpi Ewropej korrispondenti.

Żewġ Direttivi oħra dwar l-ugwaljanza, id-Direttiva dwar l-Ugwaljanza fl-Impjiegi (2000/78/KE) 6 u d-Direttiva dwar l-Ugwaljanza bejn il-Ġeneri fil-qasam tas-sigurtà soċjali (79/7/KEE) 7 , ma jinkludux dispożizzjonijiet dwar il-korpi tal-ugwaljanza. Madankollu, fil-prattika, ħafna Stati Membri għażlu li jafdaw lill-korpi tal-ugwaljanza bir-raġunijiet u bl-oqsma kollha ta’ diskriminazzjoni koperti minn dawn iż-żewġ Direttivi u xi drabi aktar 8 , permezz tad-dritt nazzjonali. Il-maġġoranza l-kbira tal-Istati Membri issa stabbilew korpi tal-ugwaljanza “għal diversi raġunijiet” li jittrattaw bosta raġunijiet ta’ diskriminazzjoni u oqsma, li spiss imorru lil hinn minn dawk protetti mid-dritt tal-UE. Madankollu, dan ma huwiex il-każ fl-Istati Membri kollha, u f’xi każijiet 9 , il-korpi tal-ugwaljanza għadhom lanqas ikopru r-raġunijiet u l-oqsma tad-Direttivi 2000/78/KE u 79/7/KEE.

(a)jikkontribwixxu b’mod effettiv għall-infurzar tad-Direttivi 79/7/KEE, 2000/43/KE, 2000/78/KE u 2004/113/KE;

(b)jassistu b’mod effettiv lill-vittmi ta’ diskriminazzjoni biex jaċċessaw il-ġustizzja;

(c)jippromwovu t-trattament ugwali u l-prevenzjoni tad-diskriminazzjoni.

Din il-proposta tibni fuq is-sustanza tad-dispożizzjonijiet eżistenti dwar il-korpi tal-ugwaljanza li jinsabu fid-Direttivi 2000/43/KE u 2004/113/KE biex tissostitwihom b’sett ta’ regoli msaħħa u aktar dettaljati. Ir-regoli l-ġodda jinkorporaw l-obbligi minimi kollha li kienu previsti miż-żewġ Direttivi.

Din il-proposta ssaħħaħ il-protezzjoni fil-qasam tat-trattament ugwali u n-nondiskriminazzjoni billi testendi l-mandat tal-korpi tal-ugwaljanza biex ikopri r-raġunijiet u l-oqsma tad-Direttivi 79/7/KEE u 2000/78/KE.

•Konsistenza mad-dispożizzjonijiet eżistenti fil-qasam ta’ politika

•Konsistenza ma’ politiki oħra tal-Unjoni

Ir-Regolament dwar Dispożizzjonijiet Komuni għall-fondi ta’ ġestjoni kondiviża 28 jirrikjedi li l-Istati Membri jinvolvu korpi tal-ugwaljanza matul it-tħejjija, l-implimentazzjoni u l-evalwazzjoni ta’ tali programmi, inkluż permezz tal-parteċipazzjoni fil-kumitati ta’ monitoraġġ.

Il-proposta għal Direttiva dwar il-ġlieda kontra l-vjolenza fuq in-nisa u l-vjolenza domestika 30  tipprevedi wkoll rwol potenzjali għall-korpi tal-ugwaljanza stabbiliti skont id-Direttivi 2004/113/KE, 2006/54/KE u 2010/41/UE. Din tħalli lill-Istati Membri liberi li jinvolvu korp tal-ugwaljanza jew korp ieħor biex iwettaq il-kompiti stabbiliti fil-proposta għal Direttiva, f’termini ta’ assistenza u pariri indipendenti lill-vittmi ta’ vjolenza kontra n-nisa u vjolenza domestika; il-pubblikazzjoni ta’ rapporti indipendenti u t-tfassil ta’ rakkomandazzjonijiet fil-qasam; u l-iskambju ta’ informazzjoni ma’ korpi Ewropej korrispondenti.

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

•Is-sussidjarjetà (għal kompetenza mhux esklużiva)

•Proporzjonalità

•Għażla tal-istrument

3.ĠBIR TA’ GĦARFIEN ESPERT, ANALIŻI U KONSULTAZZJONIJIET MAL-PARTIJIET IKKONĊERNATI

•Ġbir ta’ għarfien espert u analiżi

Il-Kummissjoni tat kuntratt għal studju biex tappoġġa t-tħejjija ta’ dokument analitiku retrospettiv u prospettiv, bil-ħsieb ta’ proposta leġiżlattiva dwar standards vinkolanti għall-korpi tal-ugwaljanza. Id-dokument analitiku jakkumpanja kemm din il-proposta kif ukoll il-proposta parallela li tkopri t-trattament ugwali u l-opportunitajiet indaqs bejn in-nisa u l-irġiel f’materji ta’ impjieg u xogħol, inkluż l-impjieg indipendenti. Huwa jinkludi analiżi retrospettiva tad-dispożizzjonijiet eżistenti tal-UE dwar il-korpi tal-ugwaljanza, u analiżi prospettiva ta’ intervent ulterjuri possibbli tal-UE.

Evalwazzjoni sħiħa u valutazzjoni tal-impatt ma twettqux għar-raġunijiet li ġejjin:

(1)Proporzjonalità - l-ambitu limitat tal-intervent tal-UE

Il-proposti huma ffukati biss fuq korpi tal-ugwaljanza li huma koperti minn Artikolu wieħed f’erba’ Direttivi dwar l-Ugwaljanza (u mhumiex inklużi f’żewġ Direttivi oħra dwar l-Ugwaljanza). L-Artikolu msemmi huwa kważi identiku fl-erba’ Direttivi. Il-proposti ma jemendawx id-dispożizzjonijiet l-oħra tad-Direttivi. Il-proposti huma bbażati wkoll fuq ir-Rakkomandazzjoni eżistenti tal-Kummissjoni tal-2018 dwar l-istandards għall-korpi tal-ugwaljanza, li ġiet ivvalutata fl-2021. Għalhekk, evalwazzjoni sħiħa tad-Direttivi rilevanti fl-intier tagħhom la tqieset proporzjonata u lanqas meħtieġa.

(2) In-nuqqas ta’ potenzjal ta’ simplifikazzjoni

L-analiżi retrospettiva turi li d-dispożizzjonijiet eżistenti dwar il-korpi tal-ugwaljanza fid-Direttivi dwar l-Ugwaljanza huma ristretti u vagi wisq. Ma hemm l-ebda potenzjal ta’ simplifikazzjoni f’dawn id-dispożizzjonijiet. Ir-rispons dwar l-implimentazzjoni tar-Rakkomandazzjoni tal-2018 qatt ma indika xi ħtieġa għal simplifikazzjoni jew xi piż amministrattiv.

(3)Id-diffikultà li jiġu vvalutati l-impatti

Analiżi retrospettiva tal-leġiżlazzjoni eżistenti

L-analiżi retrospettiva tindirizza l-effettività, l-effiċjenza, il-koerenza, il-valur miżjud tal-UE u r-rilevanza tad-dispożizzjonijiet tal-UE dwar il-korpi tal-ugwaljanza fid-Direttivi dwar l-Ugwaljanza u r-Rakkomandazzjoni tal-2018  42 .

L-effettività tal-qafas eżistenti tal-UE għall-korpi tal-ugwaljanza ġiet ivvalutata bħala limitata fir-rigward tal-progress fil-ġlieda kontra d-diskriminazzjoni u l-prevenzjoni tagħha. Sar xi progress, speċjalment fl-Istati Membri fejn ma kinux jeżistu korpi tal-ugwaljanza qabel l-intervent tal-UE. Madankollu, l-effetti mixtieqa 43 ma ntlaħqux bis-sħiħ. L-analiżi wriet li l-livelli ta’ diskriminazzjoni baqgħu għoljin, filwaqt li l-għarfien tal-vittmi dwar id-drittijiet tagħhom baqa’ baxx. In-nuqqas ta’ rapportar għadu problema konsiderevoli u s-sensibilizzazzjoni tal-pubbliku dwar id-diskriminazzjoni u l-għarfien dwarha għadhom limitati. Ħafna korpi tal-ugwaljanza ma humiex mgħammra kif xieraq, f’termini ta’ setgħat u riżorsi, biex jgħinu lill-vittmi b’mod effettiv.

L-effiċjenza tal-qafas eżistenti tal-UE għall-korpi tal-ugwaljanza ġiet ivvalutata bħala limitata fir-rigward tal-kapaċità tal-korpi tal-ugwaljanza li jiġġieldu u jipprevjenu d-diskriminazzjoni, u inkonklużiva fir-rigward tal-kostijiet u l-benefiċċji, l-aktar minħabba d-disponibbiltà limitata tad-data. L-analiżi retrospettiva wriet li l-qafas attwali tal-UE pprovdut mid-Direttivi huwa ġenerali wisq u limitat fil-kamp ta’ applikazzjoni u ma jindirizzax l-istabbiliment, l-effiċjenza jew ir-riżorsi tal-korpi tal-ugwaljanza. Din is-sitwazzjoni ma ttaffietx bir-Rakkomandazzjoni aktar dettaljata tal-2018 minħabba li din ma kinitx vinkolanti. L-analiżi retrospettiva wriet li r-riżorsi tal-korpi tal-ugwaljanza huma problema konsiderevoli f’dan il-kuntest, peress li jvarjaw ħafna bejn l-Istati Membri u ma humiex biżżejjed biex il-biċċa l-kbira tal-korpi tal-ugwaljanza jkunu jistgħu jissodisfaw il-kompiti kollha tagħhom b’mod effettiv.

Il-koerenza tal-qafas eżistenti tal-UE ġiet meqjusa bħala globalment pożittiva fil-livelli kollha. L-analiżi wriet li l-koerenza mat-Trattati u mal-Karta hija għolja, peress li l-qafas tal-UE għandu l-għan li jsaħħaħ l-ugwaljanza u n-nondiskriminazzjoni, li huma fost il-valuri fundamentali tal-UE. L-ugwaljanza hija wkoll dritt fundamentali protett mill-Karta. Filwaqt li l-istrumenti internazzjonali, bħall-“Prinċipji Relatati mal-Istatus tal-Istituzzjonijiet Nazzjonali tad-Drittijiet tal-Bniedem” tan-Nazzjonijiet Uniti 44 (l-hekk imsejħa “Prinċipji ta’ Pariġi”) u r-Rakkomandazzjoni Nru 2 tal-Kummissjoni Ewropea kontra r-Razziżmu u l-Intolleranza (ECRI) mill-Kunsill tal-Ewropa 45 huma aktar dettaljati minħabba n-natura legali differenti tagħhom, id-diversi strumenti huma konsistenti fis-sustanza.

Il-valur miżjud tal-UE ġie vvalutat bħala pożittiv. L-analiżi wriet li fiż-żmien tal-adozzjoni tad-Direttiva 2000/43, madwar nofs biss tal-Istati Membri tal-EU-15 ta’ dak iż-żmien kellhom korp tal-ugwaljanza b’mandat limitat, u Stat Membru wieħed biss mill-bqija tal-EU-12 kellu korp tal-ugwaljanza qabel il-proċess tal-adeżjoni. Il-partijiet ikkonċernati kkonsultati fiż-żmien tal-istudju kkonfermaw li l-korpi tal-ugwaljanza ma kinux se jiġu stabbiliti fl-Istati Membri kollha mingħajr ma l-UE tieħu azzjoni. Il-fatt li l-livelli ta’ diskriminazzjoni 46 għadhom għoljin madwar l-Istati Membri juri li għadha meħtieġa azzjoni fil-livell tal-UE. Madankollu, din trid tkun aktar dettaljata u konkreta mill-qafas ġuridiku attwali biex tipprovdi aktar ċarezza legali dwar il-miżuri li għandhom jiġu implimentati mill-Istati Membri.

Ir-rilevanza tal-objettivi oriġinali tal-qafas tal-UE fid-dawl tal-ħtiġijiet oriġinali u attwali ġiet ivvalutata bħala pożittiva. Madankollu, il-qafas ġuridiku oriġinali għall-korpi tal-ugwaljanza kien meqjus ristrett u vag wisq. Din il-fehma hija kondiviża b’mod wiesa’ mill-partijiet ikkonċernati kollha, speċjalment il-korpi tal-ugwaljanza, l-organizzazzjonijiet tas-soċjetà ċivili (OSĊ), u l-Istati Membri. L-analiżi wriet li hemm appoġġ kbir ħafna biex tittieħed aktar azzjoni biex jiġu indirizzati l-kwistjonijiet identifikati hawn fuq 47 u biex jiġi żgurat li l-korpi tal-ugwaljanza jkollhom ir-riżorsi biex jindirizzaw sfidi ġodda fil-qasam tan-nondiskriminazzjoni, bħal dawk relatati mal-użu ta’ sistemi awtomatizzati, li l-frekwenza u s-serjetà tagħhom żdiedu bl-iżvilupp teknoloġiku.

Meta wieħed iqis dan kollu ta’ hawn fuq, ġew identifikati għadd ta’ tagħlimiet meħuda, kif indikat hawn taħt. Minħabba n-nuqqas ta’ ċarezza tad-dispożizzjonijiet attwali dwar il-korpi tal-ugwaljanza, il-korpi tal-ugwaljanza jiffaċċjaw diversi problemi fl-Istati Membri, kif spjegat hawn taħt. Minkejja li r-Rakkomandazzjoni tal-2018 kellha l-għan li tindirizza dawn il-kwistjonijiet, kellha biss impatt limitat minħabba n-natura mhux vinkolanti tagħha, u għalhekk qed jiġi propost strument legali vinkolanti biex jindirizzahom b’mod aktar effettiv.

Riżorsi u indipendenza

L-analiżi wriet li n-nuqqas ta’ riżorsi huwa problema rikorrenti li tfixkel b’mod sinifikanti l-funzjonament tal-korpi tal-ugwaljanza. Bl-istess mod, in-nuqqas ta’ indipendenza jfixkel lill-korpi tal-ugwaljanza milli jwettqu l-kompiti u l-objettivi tagħhom b’mod effettiv.

Assistenza lill-vittmi

L-assistenza pprovduta lill-vittmi u s-setgħat mogħtija lill-korpi tal-ugwaljanza għal dan l-għan ivarjaw ħafna bejn l-Istati Membri. Sabiex jiġi żgurat livell minimu ta’ protezzjoni tad-dritt fundamentali tan-nondiskriminazzjoni, regoli komuni aktar speċifiċi f’dan il-qasam ikunu ta’ benefiċċju. Is-setgħat ta’ litigazzjoni huma setgħat ta’ interess partikolari f’dan ir-rigward. Sabiex ikunu jistgħu jassistu lill-vittmi kollha tad-diskriminazzjoni, huwa importanti wkoll li jiġi żgurat li l-korpi tal-ugwaljanza jkunu aċċessibbli għall-vittmi kollha tad-diskriminazzjoni mingħajr ostakli.

Id-Direttiva dwar l-Ugwaljanza fl-Impjiegi u d-Direttiva dwar l-Ugwaljanza bejn il-Ġeneri fil-qasam tas-sigurtà soċjali bħalissa ma fihomx dispożizzjonijiet dwar il-korpi tal-ugwaljanza. Madankollu, l-analiżi retrospettiva wriet li l-livelli ta’ diskriminazzjoni għar-raġunijiet u l-oqsma koperti minn dawk id-Direttivi għadhom għoljin fl-Istati Membri.

Għarfien tad-diskriminazzjoni

L-analiżi retrospettiva turi li r-regolarità li biha l-korpi tal-ugwaljanza jwettqu riċerka indipendenti, iwettqu stħarriġ u jippubblikaw ir-rapporti tvarja ħafna. L-istess jgħodd għall-ġbir ta’ data primarja u sekondarja dwar l-ugwaljanza. Minħabba l-fatt li l-għarfien dwar id-diskriminazzjoni u t-tagħrif dwarha għadhom insuffiċjenti, huma meħtieġa regoli aktar ċari f’dan il-qasam.

Kooperazzjoni

Il-punt sa fejn il-korpi tal-ugwaljanza jikkooperaw u jaqsmu l-informazzjoni ma’ xulxin u mal-awtoritajiet jew il-korpi nazzjonali, Ewropej u internazzjonali rilevanti jvarja bejn l-Istati Membri. Madankollu, skambji bħal dawn ikunu ta’ benefiċċju biex jiġi kondiviż l-għarfien u jinħolqu sinerġiji.

Analiżi prospettiva dwar azzjoni ġdida possibbli tal-UE

(a)l-istabbiliment ta’ network attiv ta’ korpi għall-ugwaljanza ffinanzjati mill-Kummissjoni (Equinet),

(b)ir-Rakkomandazzjoni mhux vinkolanti tal-Kummissjoni tal-2018,

(c)skambji tal-aħjar prattiki, u

(d)finanzjament dirett permezz tal-Programm dwar iċ-Ċittadini, l-Ugwaljanza, id-Drittijiet u l-Valuri (“CERV”).

·jgħinu fl-infurzar tas-sitt Direttivi dwar l-Ugwaljanza,

·jassistu b’mod effettiv lill-vittmi ta’ diskriminazzjoni biex jaċċessaw il-ġustizzja, u

·jippromwovu t-trattament ugwali u l-prevenzjoni tad-diskriminazzjoni.

·il-korpi għall-ugwaljanza jkunu ħielsa minn influwenza esterna sabiex ikunu jistgħu jeżerċitaw il-kompiti kollha tagħhom b’mod indipendenti,

·il-korpi tal-ugwaljanza jkollhom ir-riżorsi meħtieġa biex iwettqu l-kompiti kollha tagħhom, u

·jekk korp tal-ugwaljanza jkun parti minn korp b’mandat multiplu, ikun hemm struttura interna (l-hekk imsejjaħ “firewall”) li tiggarantixxi indipendenza, fokus u riżorsi suffiċjenti għall-mandat tal-ugwaljanza.

Id-dokument analitiku investiga l-miżuri proposti abbażi tal-ħames kriterji ta’ effettività 49 , effiċjenza 50 , koerenza 51 , valur miżjud tal-UE 52 u rilevanza 53 . Il-valur miżjud tal-UE, ir-rilevanza u l-koerenza ġew ivvalutati għall-inizjattiva leġiżlattiva proposta kollha kemm hi, filwaqt li ġew ivvalutati l-effettività u l-effiċjenza għal kull blokka tematika, filwaqt li tqiesu l-miżuri individwali. Għal xi miżuri, ma kinitx possibbli valutazzjoni sħiħa minħabba d-disponibbiltà limitata tad-data jew restrizzjonijiet metodoloġiċi. Dan japplika b’mod partikolari għall-effiċjenza.

Fl-aħħar nett, il-Kummissjoni qieset is-sejbiet ta’ studju dwar lakuni possibbli fil-protezzjoni legali kontra d-diskriminazzjoni abbażi tal-oriġini razzjali jew etnika, imwettaq kif previst fil-pjan ta’ azzjoni kontra r-razziżmu. L-istudju investiga lakuni possibbli fil-mekkaniżmi ta’ protezzjoni stabbiliti fid-Direttiva dwar l-Ugwaljanza Razzjali, inkluż ir-rwol tal-korpi tal-ugwaljanza.

L-istudju kkonferma li l-korpi tal-ugwaljanza huma meqjusa bħala mekkaniżmu ta’ protezzjoni importanti (ħafna) fil-ġlieda kontra d-diskriminazzjoni. Ir-rispondenti għall-istħarriġ fil-mira mwettaq bħala parti mill-istudju kkonfermaw din is-sejba. L-istudju sab li l-korpi tal-ugwaljanza – minħabba l-kompetenzi tagħhom, speċjalment jekk jissaħħu – jistgħu jtejbu l-effettività ta’ mekkaniżmi oħra ta’ protezzjoni. Minbarra r-rwol tal-korpi tal-ugwaljanza, il-mekkaniżmi ta’ protezzjoni li jistgħu jikkontribwixxu għall-prevenzjoni u l-protezzjoni kontra d-diskriminazzjoni jinkludu dispożizzjonijiet dwar id-difiża tad-drittijiet u l-vittimizzazzjoni, is-sanzjonijiet, l-azzjoni pożittiva, u d-djalogu. L-istudju identifika xi lakuni potenzjali fir-rigward ta’ dawn il-mekkaniżmi eżistenti (eż. sanzjonijiet, drittijiet ta’ difiża) u mekkaniżmi/miżuri li jistgħu jippermettu l-użu ta’ approċċi aktar proattivi/preventivi filwaqt li tiġi indirizzata d-diskriminazzjoni (eż. pjanijiet ta’ azzjoni nazzjonali, dmirijiet ta’ ugwaljanza, ġbir ta’ data dwar l-ugwaljanza). Huwa rrakkomanda rwol akbar għall-korpi tal-ugwaljanza fir-rigward ta’:

(a)informazzjoni, sensibilizzazzjoni, gwida u taħriġ,

(b)difiża tad-drittijiet inklużi setgħat investigattivi u ta’ litigazzjoni, soluzzjoni alternattiva għat-tilwim u sanzjonijiet,

(c)l-użu ta’ data dwar l-ugwaljanza,

(d)id-djalogu, il-kooperazzjoni u l-kollaborazzjoni, u,

(e)azzjoni pożittiva/dmirijiet ta’ ugwaljanza 56 .

•Konsultazzjonijiet mal-partijiet ikkonċernati

·l-indipendenza (inkluża għażla tat-tmexxija trasparenti u bbażata fuq il-kompetenza, u l-indipendenza baġitarja),

·riżorsi suffiċjenti (riżorsi umani, riżorsi finanzjarji u bini xieraq),

·kopertura tar-raġunijiet u l-oqsma kollha ta’ diskriminazzjoni li jaqgħu taħt id-Direttivi dwar l-Ugwaljanza,

·preżentazzjoni u aċċessibbiltà faċli tal-ilmenti,

·is-setgħat ta’ tilwim u s-setgħat investigattivi tal-korpi kollha tal-ugwaljanza,

·l-eżekuzzjoni tad-deċiżjonijiet vinkolanti tal-korpi tal-ugwaljanza u l-possibbiltà li jimponu sanzjonijiet,

·sensibilizzazzjoni dwar l-eżistenza ta’ korpi tal-ugwaljanza fil-popolazzjoni ġenerali u fi gruppi f’riskju ta’ diskriminazzjoni,

·il-promozzjoni tal-ugwaljanza u l-prevenzjoni tad-diskriminazzjoni,

·il-ġbir ta’ data mill-korpi tal-ugwaljanza dwar l-attivitajiet tagħhom u l-aċċess għad-data dwar l-ugwaljanza miġbura minn entitajiet pubbliċi u privati oħra, biex jiġu prodotti rapporti regolari, u

·koordinazzjoni u kooperazzjoni mal-awtoritajiet pubbliċi, il-partijiet ikkonċernati (eż. OSĊ u sħab soċjali) u korpi internazzjonali/tal-UE.

Il-partijiet ikkonċernati appoġġaw l-aktar għażliet ambizzjużi fl-oqsma ta’ hawn fuq. Skont maġġoranza kbira tal-partijiet ikkonċernati, il-leġiżlazzjoni futura għandha tagħmel lill-Istati Membri responsabbli biex jistabbilixxu l-kundizzjonijiet li jippermettu lill-korpi tal-ugwaljanza jaqdu bis-sħiħ ir-rwol tagħhom, peress li l-korpi tal-ugwaljanza ma jistgħux iwettqu b’mod effettiv l-għanijiet tagħhom mingħajr il-mezzi u s-setgħat xierqa.

Fl-istess ħin, huma enfasizzaw li l-adozzjoni ta’ standards minimi vinkolanti msaħħa għall-korpi tal-ugwaljanza għandha tikkunsidra d-diversità tat-tradizzjonijiet legali fl-Istati Membri u tirrispetta l-awtonomija istituzzjonali tagħhom. L-elementi li ġejjin ġew enfasizzati bħala importanti f’dan ir-rigward:

·Setgħat ta’ teħid ta’ deċiżjonijiet vinkolanti (funzjoni kważi ġudizzjarja) ma għandhomx jiġu imposti fuq il-korpi kollha tal-ugwaljanza; minflok, l-Istati Membri għandhom ikunu jistgħu jiddeċiedu jekk jinkarigawx lill-korpi tal-ugwaljanza b’setgħat ta’ teħid ta’ deċiżjonijiet vinkolanti u bl-aħjar mod biex jiżguraw l-effettività tagħhom.

·F’dan l-istadju ma għandhiex tiġi stabbilita sistema ċentralizzata ta’ akkreditazzjoni bejn il-pari tal-korpi tal-ugwaljanza; minflok, il-monitoraġġ regolari mill-Kummissjoni skont lista ta’ indikaturi għandu jippermetti valutazzjoni tal-punt sa fejn l-objettivi tal-inizjattiva jkunu ntlaħqu u r-rekwiżiti tagħha jkunu ġew issodisfati mill-Istati Membri.

·Sabiex jiġi żgurat li s-servizzi tal-korpi tal-ugwaljanza jkunu disponibbli għall-vittmi potenzjali kollha, ċertu grad ta’ flessibbiltà huwa importanti fir-rigward tal-preżenza fiżika tal-korpi tal-ugwaljanza fit-territorju nazzjonali kollu tal-Istati Membri (eż. l-Istati Membri għandhom ikunu liberi li jorganizzaw din il-preżenza kif jixtiequ, pereżempju permezz ta’ netwerk fiss ta’ uffiċċji, żjarat lokali regolari (“flying offices”) jew kooperazzjoni mal-OSĊ lokali.

·L-Istati Membri għandhom jiżguraw li l-korpi tal-ugwaljanza jkollhom il-mandat, il-kundizzjonijiet u l-għodod xierqa biex iwettqu l-missjonijiet tagħhom, mingħajr ma jippreskrivu kif għandhom iwettquhom fi kwalunkwe każ partikolari (eż. ikollhom is-setgħa, iżda mhux l-obbligu, li jaġixxu fil-qorti).

Dawn l-aspetti kollha tqiesu u ġew riflessi f’din il-proposta.    

•Drittijiet fundamentali

4.IMPLIKAZZJONIJIET BAĠITARJI

L-inizjattiva ma toħloqx spejjeż addizzjonali għall-Kummissjoni Ewropea u l-aġenziji tagħha. Biex jappoġġaw il-monitoraġġ tal-implimentazzjoni ta’ din id-Direttiva, il-FRA u l-EIGE jiġbru u janalizzaw id-data rilevanti. Dan it-tip ta’ kompitu diġà huwa kopert mill-mandati eżistenti tal-FRA 57 u tal-EIGE 58 u jista’ jitwettaq mingħajr riżorsi addizzjonali.

5.ELEMENTI OĦRA

•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar

•Spjegazzjoni fid-dettall tad-dispożizzjonijiet speċifiċi tal-proposta

·Indipendenza: Artikolu 3,

·Assistenza lill-vittmi tad-diskriminazzjoni: Artikoli 6 sa 9,

·Opinjonijiet u rakkomandazzjonijiet: Artikoli 8, 13 u 14,

·Stħarriġ u rapporti: Artikoli 14 u 15, u

·Kooperazzjoni: Artikolu 12.

Sabiex ikunu jistgħu jipprovdu assistenza lill-vittmi kollha tad-diskriminazzjoni, huwa essenzjali li l-korpi tal-ugwaljanza jkunu aċċessibbli għan-nies kollha mingħajr xkiel, u li jipprovdu servizzi bla ħlas lill-ilmentaturi fit-territorju kollu tal-Istati Membri, inkluż fiż-żoni rurali u remoti. Din id-dispożizzjoni tirrikjedi wkoll l-aċċessibbiltà tas-servizzi kollha kif ukoll il-forniment ta’ akkomodazzjoni raġonevoli għall-persuni b’diżabilità.

Din id-dispożizzjoni tistabbilixxi (i) l-obbligi tal-korpi tal-ugwaljanza li jiġbru d-data dwar l-attivitajiet tagħhom stess, (ii) is-setgħat li jwettqu stħarriġ, (iii) is-setgħat li jaċċessaw u jipproċessaw l-istatistika miġbura minn entitajiet pubbliċi jew privati oħra, u (iv) il-possibbiltà li jkollhom rwol ta’ koordinazzjoni fil-ġbir ta’ data dwar l-ugwaljanza minn entitajiet pubbliċi jew privati oħra. Għalhekk, il-korpi tal-ugwaljanza se jikkontribwixxu għall-ġbir ta’ data dwar l-ugwaljanza li se tikkontribwixxi għar-rapporti tagħhom stess, għar-rapport ta’ monitoraġġ tal-Kummissjoni msemmi fl-Artikolu 16, u għall-għarfien pubbliku dwar it-trattament ugwali u d-diskriminazzjoni fl-Istati Membri.

L-għan ta’ din id-dispożizzjoni huwa li jiġi żgurat li l-korpi tal-ugwaljanza jippjanaw u jirrapportaw b’mod regolari lill-pubbliku dwar il-ħidma tagħhom u dwar is-sitwazzjoni tat-trattament ugwali u n-nondiskriminazzjoni. Minħabba li jagħmlu data dwar l-attivitajiet tagħhom stess, dwar l-għadd ta’ lmenti riċevuti skont ir-raġunijiet u l-oqsma, u dwar id-diskriminazzjoni b’mod ġenerali fl-Istati Membri disponibbli għall-pubbliku, il-korpi tal-ugwaljanza se jrawmu l-għarfien pubbliku dwar id-diskriminazzjoni u dwar ix-xogħol tagħhom stess.

Min-naħa tiegħu, dan l-għarfien se jgħinhom jieħdu deċiżjonijiet infurmati dwar l-organizzazzjoni futura tal-ħidma tagħhom, il-prijoritajiet tagħhom għas-snin li ġejjin, u kif l-aħjar jallokaw ir-riżorsi tagħhom.

Skont din id-dispożizzjoni, il-Kummissjoni se tistabbilixxi lista ta’ indikaturi komuni biex timmonitorja l-implimentazzjoni ta’ din id-Direttiva u tfassal rapport ta’ applikazzjoni. Fit-tħejjija tal-indikaturi, il-Kummissjoni tista’ tfittex parir mill-FRA u l-EIGE. Il-lista ta’ indikaturi se tkopri r-riżorsi, il-funzjonament indipendenti, l-attivitajiet, u l-effettività tal-korpi tal-ugwaljanza u kwalunkwe bidla fil-mandat, is-setgħat jew l-istruttura tagħhom. L-Istati Membri u l-partijiet ikkonċernati jiġu kkonsultati kemm fil-livell nazzjonali kif ukoll f’dak tal-UE, u se jitqiesu l-indikaturi żviluppati mill-Equinet.

Dan l-Artikolu jintroduċi wkoll obbligu għall-Istati Membri biex kull 5 snin jikkomunikaw lill-Kummissjoni l-informazzjoni rilevanti kollha dwar l-implimentazzjoni tad-Direttiva abbażi tal-indikaturi msemmija hawn fuq, li jippermetti lill-Kummissjoni tirrieżamina l-implimentazzjoni tad-Direttiva u tfassal ir-rapport ta’ implimentazzjoni tagħha.

Artikolu 19 – tħassir tad-dispożizzjonijiet attwali dwar il-korpi tal-ugwaljanza

Dan l-Artikolu jemenda d-Direttivi 2000/43/KE u 2004/113/KE biex jitħassru d-dispożizzjonijiet eżistenti dwar il-korpi tal-ugwaljanza u jispeċifika li r-referenzi kollha għad-dispożizzjonijiet imħassra għandhom jinftiehmu bħala referenzi għal din id-Direttiva.

L-Artikolu 21 jispeċifika wkoll id-data tad-dħul fis-seħħ ta’ dan l-Artikolu biex jiġi żgurat li ma jkun hemm l-ebda lakuna fil-funzjonament tal-korpi tal-ugwaljanza.

Artikolu 20 – Traspożizzjoni

Dan l-Artikolu jistabbilixxi l-perjodu massimu li l-Istati Membri għandhom biex idaħħlu d-Direttiva fis-seħħ fil-liġi nazzjonali u jikkomunikaw it-testi rilevanti lill-Kummissjoni. Dan il-perjodu huwa stabbilit għal 18-il xahar mid-dħul fis-seħħ ta’ din id-Direttiva.

2022/0401 (APP)

Proposta għal

DIRETTIVA TAL-KUNSILL

dwar standards għall-korpi tal-ugwaljanza fil-qasam tat-trattament ugwali bejn il-persuni irrispettivament mill-oriġini razzjali jew etnika tagħhom, it-trattament ugwali fil-qasam tal-impjiegi u x-xogħol bejn il-persuni irrispettivament mir-reliġjon jew it-twemmin, id-diżabilità, l-età jew l-orjentazzjoni sesswali tagħhom, it-trattament ugwali bejn in-nisa u l-irġiel fi kwistjonijiet ta’ sigurtà soċjali u fl-aċċess għal prodotti u servizzi u l-provvista tagħhom, u li tħassar l-Artikolu 13 tad-Direttiva 2000/43/KE u l-Artikolu 12 tad-Direttiva 2004/113/KE

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea u, b’mod partikulari, l-Artikolu 19(1) tiegħu,

Wara li kkunsidra l-proposta tal-Kummissjoni Ewropea,

Wara li l-abbozz tal-att leġiżlattiv intbagħat lill-parlamenti nazzjonali,

Wara li kkunsidra l-opinjoni tal-Parlament Ewropew 60 ,

Wara li kkunsidra l-opinjoni tal-Kumitat Ekonomiku u Soċjali Ewropew 61 ,

Wara li kkunsidra l-opinjoni tal-Kumitat tar-Reġjuni 62 ,

Wara li kkunsidra l-opinjoni tas-Superviżur Ewropew tal-Protezzjoni tad-Data 63 ,

Filwaqt li jaġixxi skont proċedura leġiżlattiva speċjali,

Billi:

(1)It-Trattati u l-Karta tad-Drittijiet Fundamentali tal-Unjoni Ewropea jirrikonoxxu d-dritt għall-ugwaljanza u d-dritt għan-nondiskriminazzjoni bħala valuri essenzjali tal-Unjoni 64 , u l-Unjoni diġà adottat diversi Direttivi dwar il-projbizzjoni tad-diskriminazzjoni.

(2)Skont l-Artikolu 19(1) tat-TFUE, mingħajr preġudizzju għad-dispożizzjonijiet l-oħra tat-Trattati u fil-limiti tal-poteri mogħtija minnu lill-Unjoni, il-Kunsill, li jaġixxi unanimament skont il-proċedura leġiżlattiva speċjali u bl- approvazzjoni tal-Parlament Ewropew, jista’ jieħu l-azzjoni xierqa sabiex jiġġieled id-diskriminazzjoni bbażata fuq il-ġeneru, l-oriġini razzjali jew etnika, ir-reliġjon jew twemmin, id-diżabilità, l-età jew l-orjentazzjoni sesswali.

(3)L-għan ta’ din id-Direttiva huwa li tistabbilixxi rekwiżiti minimi għall-funzjonament tal-korpi tal-ugwaljanza biex ittejjeb l-effettività tagħhom u tiggarantixxi l-indipendenza tagħhom sabiex tissaħħaħ l-applikazzjoni tal-prinċipju ta’ trattament ugwali kif derivat mid-Direttivi tal-Kunsill 79/7/KEE 65 , 2000/43/KE 66 , 2000/78/KE 67 u 2004/113/KE 68 .

(4)Id-Direttiva 79/7/KEE tipprojbixxi d-diskriminazzjoni bbażata fuq il-ġeneru, f’materji ta’ sigurtà soċjali.

(5)Id-Direttiva 2000/43/KE tipprojbixxi d-diskriminazzjoni bbażata fuq l-oriġini razzjali jew etnika.

(6)Id-Direttiva 2000/78/KE tipprojbixxi d-diskriminazzjoni fuq bażi ta’ reliġjon jew twemmin, diżabilità, età jew orjentazzjoni sesswali f’dak li għandu x’jaqsam mal-impjieg, ix-xogħol u t-taħriġ vokazzjonali.

(7)Id-Direttiva 2004/113/KE tipprojbixxi d-diskriminazzjoni bbażata fuq is-sess fl-aċċess għal merkanzija u servizzi u l-provvista tagħhom.

(8)Id-Direttivi 2000/43/KE u 2004/113/KE jirrikjedu li l-Istati Membri jaħtru korp wieħed jew aktar għall-promozzjoni tat-trattament ugwali, inklużi l-analiżi, il-monitoraġġ u l-appoġġ tat-trattament ugwali tal-persuni kollha mingħajr diskriminazzjoni għar-raġunijiet koperti mid-Direttivi rispettivi (minn hawn ’il quddiem “il-korpi tal-ugwaljanza”). Dawn jirrikjedu li l-Istati Membri jiżguraw li l-kompetenzi ta’ dawn il-korpi jinkludu l-għoti ta’ assistenza indipendenti lill-vittmi, it-twettiq ta’ stħarriġ indipendenti dwar id-diskriminazzjoni, il-pubblikazzjoni ta’ rapporti indipendenti u l-ħruġ ta’ rakkomandazzjonijiet dwar kwalunkwe kwistjoni relatata ma’ tali diskriminazzjoni.

(9)Id-Direttivi 2006/54/KE 69 u 2010/41/UE 70 tal-Parlament Ewropew u tal-Kunsill jipprevedu wkoll il-ħatra ta’ korpi tal-ugwaljanza.

(10)L-Istati Membri kollha stabbilew korpi tal-ugwaljanza skont id-Direttivi 2000/43/KE u 2004/113/KE. Ġiet stabbilita sistema varjata ta’ korpi tal-ugwaljanza, u tfaċċaw prattiki tajbin. Madankollu, ħafna korpi tal-ugwaljanza jiffaċċjaw sfidi, b’mod partikolari f’dak li jirrigwarda r-riżorsi, l-indipendenza u s-setgħat meħtieġa biex iwettqu l-kompiti tagħhom 71 .

(11)Id-Direttivi 2000/43/KE u 2004/113/KE jħallu marġni wiesa’ ta’ diskrezzjoni lill-Istati Membri fir-rigward tal-istruttura u l-funzjonament tal-korpi tal-ugwaljanza. Dan iwassal għal differenzi sinifikanti bejn il-korpi tal-ugwaljanza stabbiliti fl-Istati Membri, f’termini tal-mandati, il-kompetenzi, l-istrutturi, ir-riżorsi u l-funzjonament operazzjonali tal-korpi tal-ugwaljanza. Dan, min-naħa tiegħu, ifisser li l-protezzjoni kontra d-diskriminazzjoni tvarja minn Stat Membru għal ieħor.

(12)Għalkemm id-Direttivi 79/7/KEE u 2000/78/KE ma jirrikjedux li l-Istati Membri jaħtru korpi tal-ugwaljanza biex jittrattaw il-materji koperti minn dawk id-Direttivi, dawn il-korpi għandhom kompetenza għal dawk il-materji fil-biċċa l-kbira tal-Istati Membri, fejn meħtieġ mid-dritt nazzjonali. Madankollu, dan ma huwiex il-każ fl-Istati Membri kollha, li jwassal għal livelli differenti ta’ protezzjoni kontra d-diskriminazzjoni fir-rigward tal-materji koperti minn dawk id-Direttivi madwar l-Unjoni.

(13)Biex jiġi żgurat li l-korpi tal-ugwaljanza jkunu jistgħu jikkontribwixxu b’mod effettiv għall-infurzar tad-Direttivi 79/7/KEE, 2000/43/KE, 2000/78/KE u 2004/113/KE billi jippromwovu t-trattament ugwali, jipprevjenu d-diskriminazzjoni u joffru assistenza lill-individwi u lill-gruppi kollha li jiġu ddiskriminati biex jaċċessaw il-ġustizzja madwar l-Unjoni, huwa meħtieġ li jiġu adottati standards minimi vinkolanti għall-funzjonament ta’ dawk il-korpi, u li l-mandat tagħhom jiġi estiż għall-materji koperti mid-Direttivi 79/7/KEE u 2000/78/KE. L-istandards il-ġodda jenħtieġ li jibbażaw fuq it-tagħlimiet meħuda permezz tal-applikazzjoni tar-Rakkomandazzjoni tal-Kummissjoni 2018/951 72 , filwaqt li jibnu fuq xi wħud mid-dispożizzjonijiet tagħha u jistabbilixxu regoli ġodda fejn meħtieġ. Jenħtieġ li jibbażaw ukoll fuq strumenti rilevanti oħra, bħall-General Policy Recommendation N°2 73 dwar il-korpi tal-ugwaljanza adottata mill-Kummissjoni Ewropea kontra r-Razziżmu u l-Intolleranza (ECRI) u l-Prinċipji ta’ Pariġi 74 adottati min-Nazzjonijiet Uniti u applikabbli għall-istituzzjonijiet nazzjonali tad-drittijiet tal-bniedem.

(14)L-istess standards minimi vinkolanti għall-funzjonament tal-korpi tal-ugwaljanza fir-rigward tal-kwistjonijiet koperti mid-Direttivi 2006/54/KE u 2010/41/UE huma stipulati fid-Direttiva (UE) …/… [dwar standards għall-korpi tal-ugwaljanza fil-qasam tat-trattament ugwali u l-opportunitajiet indaqs bejn in-nisa u l-irġiel fi kwistjonijiet ta’ impjiegi u xogħol, u li tħassar l-Artikolu 20 tad-Direttiva 2006/54/KE u l-Artikolu 11 tad-Direttiva 2010/41/UE] 75 .

(15)Din id-Direttiva jenħtieġ li tapplika għall-azzjoni tal-korpi tal-ugwaljanza fir-rigward tal-kwistjonijiet koperti mid-Direttivi 79/7/KEE, 2000/43/KE, 2000/78/KE u 2004/113/KE. L-istandards jenħtieġ li jikkonċernaw biss il-funzjonament tal-korpi tal-ugwaljanza u jenħtieġ li ma jestendux il-kamp ta’ applikazzjoni materjali jew personali ta’ dawk id-Direttivi.

(16)Fil-promozzjoni tat-trattament ugwali, il-prevenzjoni tad-diskriminazzjoni u l-assistenza lill-vittmi tad-diskriminazzjoni, il-korpi tal-ugwaljanza jenħtieġ li jagħtu attenzjoni partikolari lid-diskriminazzjoni bbażata fuq diversi raġunijiet protetti mid-Direttivi 79/7/KEE, 2000/43/KE, 2000/78/KE u 2004/113/KE.

(17)Il-korpi tal-ugwaljanza jistgħu jaqdu r-rwol tagħhom b’mod effettiv biss jekk ikunu jistgħu jaġixxu b’indipendenza sħiħa mingħajr ma jkunu suġġetti għal xi influwenza esterna. Għal dak il-għan, l-Istati Membri jenħtieġ li jqisu għadd ta’ kriterji li jikkontribwixxu għall-indipendenza tal-korpi tal-ugwaljanza. Il-korpi tal-ugwaljanza jenħtieġ li ma jiġux stabbiliti bħala parti minn ministeru jew korp li jieħu struzzjonijiet direttament mill-gvern. Kwalunkwe membru tal-persunal jew persuna li jkollha pożizzjoni maniġerjali – pereżempju bħala membru ta’ bord li jmexxi l-korp tal-ugwaljanza, kap tal-korp tal-ugwaljanza, viċi jew f’każ ta’ interim – jenħtieġ li tkun indipendenti, kwalifikata għall-pożizzjoni tagħha, u magħżula permezz ta’ proċess trasparenti. Jenħtieġ li l-korpi tal-ugwaljanza jkunu jistgħu jimmaniġġjaw il-baġit u r-riżorsi tagħhom stess, inkluż billi jagħżlu u jimmaniġġjaw il-persunal tagħhom stess, u jkunu jistgħu jistabbilixxu l-prijoritajiet tagħhom stess.

(18)Sabiex jiġi żgurat li l-korpi tal-ugwaljanza jkunu jistgħu jeżerċitaw il-kompetenzi kollha tagħhom u jissodisfaw il-kompiti kollha tagħhom, l-Istati Membri jenħtieġ li jiżguraw li l-istruttura interna tal-korpi tal-ugwaljanza tippermetti l-eżerċizzju indipendenti tad-diversi kompetenzi tagħhom. Jenħtieġ li tingħata attenzjoni partikolari lil sitwazzjonijiet fejn il-korpi jkunu meħtieġa kemm li jkunu imparzjali kif ukoll li joffru appoġġ lill-vittmi. Dan huwa partikolarment rilevanti meta l-korp tal-ugwaljanza jkollu setgħat ta’ teħid ta’ deċiżjonijiet vinkolanti li jeħtieġu imparzjalità jew meta jkun parti minn korp b’diversi mandati fejn mandat ieħor ikun jeħtieġ imparzjalità. Struttura interna li tiżgura separazzjoni stretta bejn il-kompetenzi u l-kompiti rilevanti jenħtieġ li tiggarantixxi li l-korp tal-ugwaljanza jkun jista’ jeżerċitahom b’mod effettiv.

(19)In-nuqqas ta’ riżorsi xierqa huwa kwistjoni ewlenija li xxekkel il-kapaċità tal-korpi tal-ugwaljanza milli jwettqu l-kompiti tagħhom b’mod adegwat. Għalhekk, jenħtieġ li l-Istati Membri jiżguraw li l-korpi tal-ugwaljanza jirċievu finanzjament suffiċjenti, ikunu jistgħu jimpjegaw persunal kwalifikat u jkollhom bini u infrastruttura xierqa biex iwettqu kull wieħed mill-kompiti tagħhom b’mod effettiv, fi żmien raġonevoli u fl-iskadenzi stabbiliti mid-dritt nazzjonali. L-allokazzjoni baġitarja tagħhom jenħtieġ li tkun stabbli, ħlief fil-każ ta’ żieda fil-kompetenzi, ippjanata fuq bażi pluriennali, u tippermettilhom ikopru spejjeż li jistgħu jkunu diffiċli li jiġu antiċipati bħal spejjeż marbuta ma’ litigazzjoni. Sabiex jiġi żgurat li l-korpi tal-ugwaljanza jingħataw riżorsi suffiċjenti, jenħtieġ li l-baġit tagħhom ma jġarrabx, pereżempju, tnaqqis li jkun ferm ogħla mit-tnaqqis medju għal entitajiet pubbliċi oħra; bl-istess mod, it-tkabbir annwali tagħhom jenħtieġ li jkun tal-anqas marbut mat-tkabbir medju fil-finanzjament lil entitajiet oħra. Ir-riżorsi jenħtieġ li jiżdiedu b’mod proporzjonali jekk il-kompiti u l-mandat tal-korpi tal-ugwaljanza jiġu estiżi.

(20)Is-sistemi awtomatizzati, inkluża l-intelliġenza artifiċjali, jirrappreżentaw għodda utli biex jiġu identifikati x-xejriet ta’ diskriminazzjoni, iżda d-diskriminazzjoni algoritmika hija wkoll riskju. Għalhekk, jenħtieġ li l-korpi tal-ugwaljanza jkollhom aċċess għal persunal jew għal servizzi kwalifikati, li jkunu jistgħu jużaw sistemi awtomatizzati għall-ħidma tagħhom minn naħa waħda u li jivvalutaw il-konformità tagħhom mar-regoli dwar in-nondiskriminazzjoni min-naħa l-oħra. Jenħtieġ li tingħata attenzjoni partikolari biex il-korpi tal-ugwaljanza jiġu mgħammra b’riżorsi diġitali xierqa, kemm direttament kif ukoll permezz ta’ sottokuntrattar.

(21)Il-korpi tal-ugwaljanza, flimkien ma’ atturi oħra, għandhom rwol ewlieni fil-prevenzjoni tad-diskriminazzjoni u fil-promozzjoni tal-ugwaljanza. Sabiex jindirizzaw l-aspetti strutturali tad-diskriminazzjoni u jikkontribwixxu għall-bidla soċjali, jenħtieġ li dawn jippromwovu d-dmirijiet tal-ugwaljanza, prattiki tajbin, azzjoni pożittiva u l-integrazzjoni tal-ugwaljanza fost l-entitajiet pubbliċi u privati, u jipprovduhom b’taħriġ, informazzjoni, pariri, gwida u appoġġ rilevanti. Jenħtieġ li dawn jikkomunikaw ma’ entitajiet pubbliċi u privati u gruppi f’riskju ta’ diskriminazzjoni u jinvolvu ruħhom f’dibattitu pubbliku sabiex jiġġieldu l-isterjotipi u jqajmu kuxjenza dwar id-diversità u l-benefiċċji tagħha, pilastru ewlieni tal-istrateġiji tal-Unjoni għall-ugwaljanza.

(22)Lil hinn mill-prevenzjoni, kompitu ċentrali tal-korpi tal-ugwaljanza huwa li jipprovdu assistenza lill-vittmi tad-diskriminazzjoni. Din l-assistenza jenħtieġ li tinkludi dejjem l-għoti ta’ informazzjoni essenzjali lill-ilmentaturi u valutazzjoni preliminari tal-ilment tagħhom, ibbażata fuq l-informazzjoni inizjali miġbura mingħand il-partijiet b’mod volontarju. L-Istati Membri jenħtieġ li jkunu responsabbli għad-definizzjoni tal-modalitajiet li taħthom il-korp tal-ugwaljanza joħroġ din il-valutazzjoni, bħall-perjodu ta’ żmien tal-proċess jew is-salvagwardji proċedurali kontra lmenti ripetittivi jew abbużivi.

(23)Sabiex jiġi żgurat li l-vittmi kollha jkunu jistgħu jilmentaw, jenħtieġ li jkun possibbli li l-ilmenti jiġu ppreżentati b’diversi modi. L-Istati Membri jenħtieġ li jqisu wkoll kif xieraq ir-Rakkomandazzjoni tal-Kummissjoni 2018/951 li skontha jenħtieġ li jkun possibbli li l-ilmenti jiġu ppreżentati f’lingwa magħżula mill-ilmentatur u li tkun komuni fl-Istat Membru fejn jinsab il-korp tal-ugwaljanza. Sabiex tiġi indirizzata waħda mill-kawżi tan-nuqqas ta’ rapportar, jiġifieri l-biża’ ta’ rappreżalji, u mingħajr preġudizzju għad-Direttiva (UE) 2019/1937 dwar il-protezzjoni ta’ persuni li jirrapportaw dwar ksur tad-dritt tal-Unjoni 76 , jenħtieġ li tiġi offruta kunfidenzjalità lix-xhieda u lill-informaturi, u sa fejn ikun possibbli, lill-ilmentaturi.

(24)Sabiex joffru possibbiltà għal soluzzjoni tat-tilwim rapida, affordabbli u barra mill-qorti, l-Istati Membri jenħtieġ li jipprevedu l-possibbiltà li l-partijiet jitolbu soluzzjoni bonarja għat-tilwim tagħhom, lill-korp tal-ugwaljanza jew lil entità ddedikata eżistenti oħra. Jenħtieġ li l-Istati Membri jiddefinixxu l-modalitajiet tal-proċess ta’ soluzzjoni bonarja skont id-dritt nazzjonali.

(25)Fejn il-korpi tal-ugwaljanza jissuspettaw ksur possibbli tal-prinċipju ta’ trattament ugwali stabbilit mid-Direttivi 79/7/KEE, 2000/43/KE, 2000/78/KE jew 2004/113/KE, jenħtieġ li dawn ikunu jistgħu jaġixxu aktar wara lment jew fuq inizjattiva tagħhom stess.

(26)L-evidenza hija kruċjali biex jiġi ddeterminat jekk tkunx seħħet diskriminazzjoni u ta’ spiss tkun f’idejn l-awtur allegat. Għalhekk, jenħtieġ li l-korpi tal-ugwaljanza jkunu jistgħu jaċċessaw l-informazzjoni meħtieġa biex jistabbilixxu diskriminazzjoni u jikkooperaw mas-servizzi pubbliċi rilevanti – bħall-ispettorati tax-xogħol jew l-ispettorati tal-edukazzjoni. L-Istati Membri jenħtieġ li jistabbilixxu qafas xieraq għall-eżerċizzju ta’ din il-kompetenza, f’konformità mar-regoli u l-proċeduri nazzjonali.

(27)Abbażi tal-evidenza miġbura, jew b’mod volontarju jew permezz ta’ investigazzjoni, il-korpi tal-ugwaljanza jenħtieġ li jipprovdu l-valutazzjoni tagħhom lill-ilmentatur u lill-allegat awtur tar-reat. L-Istati Membri jenħtieġ li jiddeterminaw il-valur legali ta’ din il-valutazzjoni li tista’ tkun opinjoni mhux vinkolanti jew deċiżjoni infurzabbli vinkolanti. It-tnejn li huma jenħtieġ li jiddikjaraw ir-raġunijiet għall-valutazzjoni u jinkludu, fejn meħtieġ, miżuri biex jiġi rimedjat kwalunkwe ksur misjub u biex jiġu evitati okkorrenzi ulterjuri. Sabiex tiġi żgurata l-effettività tal-ħidma tal-korpi tal-ugwaljanza, jenħtieġ li l-Istati Membri jadottaw miżuri xierqa għas-segwitu tal-opinjonijiet u għall-infurzar tad-deċiżjonijiet.

(28)Sabiex jippromwovu l-ħidma tagħhom u l-liġi tal-ugwaljanza, il-korpi tal-ugwaljanza jenħtieġ li jkunu jistgħu jippubblikaw sommarju tal-opinjonijiet u d-deċiżjonijiet tagħhom mingħajr ma jiżvelaw data personali.

(29)Il-korpi tal-ugwaljanza jenħtieġ li jkollhom id-dritt li jaġixxu fi proċedimenti tal-qorti fi kwistjonijiet ta’ liġi ċivili jew amministrattiva sabiex jikkontribwixxu għall-iżgurar tar-rispett tal-prinċipju tat-trattament ugwali stabbilit fid-Direttivi 79/7/KEE, 2000/43/KE, 2000/78/KE u 2004/113/KE. Filwaqt li dawk il-proċedimenti tal-qorti jenħtieġ li jkunu soġġetti għal-liġi proċedurali nazzjonali, inklużi regoli nazzjonali dwar l-ammissibbiltà ta’ rikorsi, tali regoli, u b’mod partikolari kwalunkwe kundizzjoni ta’ interess leġittimu, ma jistgħux jiġu applikati b’tali mod li jimminaw l-effettività tad-dritt tal-korpi tal-ugwaljanza li jaġixxu. Is-setgħat ta’ investigazzjoni u ta’ teħid ta’ deċiżjonijiet u d-dritt ta’ azzjoni fi proċedimenti tal-qorti mogħtija lill-korpi tal-ugwaljanza minn din id-Direttiva se jiffaċilitaw l-implimentazzjoni prattika tad-dispożizzjonijiet attwali tad-Direttivi 2000/43/KE, 2000/78/KE u 2004/113/KE dwar l-oneru tal-provi u d-difiża tad-drittijiet. Skont il-kundizzjonijiet previsti f’din id-Direttiva, il-korpi tal-ugwaljanza se jkunu jistgħu jistabbilixxu fatti “li minnhom jista’ jiġi preżunt li kien hemm diskriminazzjoni diretta jew indiretta”, u b’hekk jissodisfaw il-kundizzjonijiet previsti fl-Artikolu 8 tad-Direttiva 2000/43/KE, l-Artikolu 10 tad-Direttiva 2000/78/KE u l-Artikolu 9 tad-Direttiva 2004/113/KE. L-appoġġ tagħhom għalhekk se jiffaċilita l-aċċess għall-ġustizzja għall-vittmi.

(30)Il-pożizzjoni legali tippermetti lill-korpi tal-ugwaljanza jaġixxu f’isem il-vittmi jew b’appoġġ għalihom, u tippermettilhom jaċċessaw il-ġustizzja meta l-ostakli proċedurali u finanzjarji jew il-biża’ ta’ vittimizzazzjoni spiss jiskoraġġuhom. Il-pożizzjoni legali tippermetti wkoll lill-korpi tal-ugwaljanza jagħżlu b’mod strateġiku l-każijiet li jiddeċiedu li jsegwu quddiem il-qrati nazzjonali, u jikkontribwixxu għall-interpretazzjoni u l-applikazzjoni xierqa tal-leġiżlazzjoni dwar it-trattament ugwali.

(31)Xi każijiet ta’ diskriminazzjoni huma diffiċli biex jiġu miġġielda minħabba li ma hemm l-ebda kwerelant li qed isegwi l-każ huwa stess. Fis-sentenza tagħha fil-Kawża C-54/07 (Feryn) 77 , li tressqet minn korp tal-ugwaljanza f’ismu stess, il-Qorti tal-Ġustizzja kkonfermat li d-diskriminazzjoni tista’ tiġi stabbilita anki fin-nuqqas ta’ vittma identifikata. Għalhekk huwa importanti li l-korpi tal-ugwaljanza jkunu jistgħu jaġixxu f’isimhom stess, biex jiddefendu l-interess pubbliku.

(32)Il-korpi tal-ugwaljanza jenħtieġ li jkunu jistgħu wkoll jippreżentaw dikjarazzjonijiet orali jew bil-miktub lill-qrati - eż. amicus curiae - bħala mod eħfef biex jappoġġaw każijiet bl-opinjoni esperta tagħhom.

(33)Id-drittijiet tal-korpi tal-ugwaljanza li jaġixxu fil-qorti jridu jirrispettaw il-prinċipji ta’ proċess ġust u ta’ opportunitajiet ugwali għall-partijiet. Għalhekk, ħlief meta l-korp tal-ugwaljanza jaġixxi bħala parti fi proċedimenti dwar l-infurzar jew ir-rieżami ġudizzjarju ta’ deċiżjoni proprja jew jaġixxi bħala amicus curiae, jenħtieġ li l-korp tal-ugwaljanza ma jitħalliex jissottometti fil-proċedimenti tal-qorti evidenza miksuba permezz ta’ investigazzjonijiet preċedenti tal-istess każ li l-allegat awtur jew kwalunkwe parti terza kienet legalment marbuta li tipprovdi.

(34)Sabiex jiġi żgurat ir-rispett tad-drittijiet individwali, l-Istati Membri jenħtieġ li jinkwadraw is-setgħat tal-korpi tal-ugwaljanza b’salvagwardji proċedurali xierqa, filwaqt li jiżguraw li l-prinċipji ewlenin bħad-dritt tad-difiża, id-dritt għal rieżami ġudizzjarju u d-dritt għall-kunfidenzjalità jkunu protetti b’mod xieraq.

(35)Id-dispożizzjonijiet dwar id-dritt tal-korpi tal-ugwaljanza li jaġixxu fi proċedimenti tal-qorti ma jibdlux id-drittijiet tal-vittmi u ta’ assoċjazzjonijiet, organizzazzjonijiet jew entitajiet legali oħra li jinfurzaw id-drittijiet tal-vittmi li għandhom, f’konformità mal-kriterji stabbiliti mil-liġi nazzjonali tagħhom, interess leġittimu li jiżguraw li d-Direttivi 2000/43/KE, 2000/78/KE u 2004/113/KE jiġu rrispettati, kif stabbilit f’dawk id-Direttivi.

(36)L-effettività tal-ħidma tal-korpi tal-ugwaljanza tiddependi wkoll fuq l-għoti ta’ aċċess sħiħ għas-servizzi tagħhom lill-gruppi f’riskju ta’ diskriminazzjoni. Fi stħarriġ imwettaq mill-Aġenzija tal-Unjoni Ewropea għad-Drittijiet Fundamentali 78 , 71 % tal-membri ta’ gruppi ta’ minoranza etnika jew immigranti rrappurtaw li ma kinux konxji minn xi organizzazzjoni li toffri appoġġ jew pariri lill-vittmi ta’ diskriminazzjoni. Pass ewlieni lejn l-appoġġ għal dan l-aċċess huwa li l-Istati Membri jiżguraw li n-nies ikunu jafu d-drittijiet tagħhom u jkunu konxji mill-eżistenza u s-servizzi offruti mill-korpi tal-ugwaljanza. Dan huwa partikolarment importanti għall-gruppi żvantaġġati u għall-gruppi li l-aċċess tagħhom għal dik l-informazzjoni jista’ jkun ostakolat, pereżempju mill-istatus ekonomiku tagħhom, id-diżabilità tagħhom, il-litteriżmu tagħhom jew in-nuqqas ta’ aċċess tagħhom għal għodod online.

(37)Jenħtieġ li jiġi ggarantit l-aċċess għas-servizzi u l-pubblikazzjonijiet tal-korpi tal-ugwaljanza fuq bażi ugwali għal kulħadd. Għal dak il-għan, jenħtieġ li jiġu identifikati u indirizzati l-ostakli potenzjali għall-aċċess għas-servizzi tal-korpi tal-ugwaljanza. Is-servizzi jenħtieġ li jkunu mingħajr ħlas għall-ilmentaturi. L-Istati Membri jenħtieġ li jiżguraw ukoll li s-servizzi tal-korpi tal-ugwaljanza jkunu disponibbli għall-vittmi potenzjali kollha fit-territorju tagħhom, pereżempju permezz tal-istabbiliment ta’ uffiċċji lokali, inklużi dawk mobbli, l-organizzazzjoni ta’ kampanji lokali jew il-kooperazzjoni ma’ delegati lokali jew ma’ organizzazzjonijiet tas-soċjetà ċivili.

(38)L-Unjoni u l-Istati Membri kollha huma partijiet għall-Konvenzjoni tan-NU dwar id-Drittijiet ta’ Persuni b’Diżabilità 79 (UNCRPD) li tinkludi l-obbligu li tiġi pprojbita d-diskriminazzjoni abbażi ta’ diżabilità u li tiġi ggarantita lill-persuni b’diżabilità protezzjoni legali ugwali u effettiva kontra d-diskriminazzjoni għar-raġunijiet kollha. Din id-Direttiva jenħtieġ li tiġi interpretata b’mod konsistenti mal-UNCRPD. Sabiex jiġu ggarantiti protezzjoni legali u aċċess ugwali u effettivi għall-persuni b’diżabilità għas-servizzi u l-attivitajiet kollha tal-korpi tal-ugwaljanza, huwa meħtieġ li tiġi żgurata l-aċċessibbiltà, f’konformità mar-rekwiżiti stabbiliti fid-Direttiva (UE) 2019/882, u akkomodazzjoni raġonevoli. Il-korpi tal-ugwaljanza jenħtieġ li jiżguraw l-aċċessibbiltà fiżika u diġitali 80 billi jipprevjenu u jneħħu l-ostakli li l-persuni b’diżabilità jistgħu jiffaċċjaw biex jaċċessaw is-servizzi u l-informazzjoni tagħhom, u jipprovdu akkomodazzjoni raġonevoli, filwaqt li jagħmlu l-modifiki u l-aġġustamenti meħtieġa u xierqa fejn meħtieġ f’każ partikolari.

(39)Li l-korpi tal-ugwaljanza jkunu jistgħu jikkoordinaw u jikkooperaw regolarment f’livelli differenti, fuq bażi fit-tul, huwa kruċjali għat-tagħlim reċiproku, il-koerenza u l-konsistenza, u jista’ jwessa’ s-sensibilizzazzjoni u l-impatt tal-ħidma tagħhom. Il-korpi tal-ugwaljanza jenħtieġ li jikkooperaw, b’mod partikolari, ma’ korpi oħra tal-ugwaljanza fl-istess Stat Membru u fi Stati Membri oħra – inkluż fil-qafas tan-Network Ewropew tal-Korpi tal-Ugwaljanza (Equinet) – u ma’ entitajiet pubbliċi u privati fil-livell lokali, reġjonali, nazzjonali, tal-Unjoni u internazzjonali, bħal organizzazzjonijiet tas-soċjetà ċivili, awtoritajiet tal-protezzjoni tad-data, trade unions, spettorati tax-xogħol u tal-edukazzjoni, korpi tal-infurzar tal-liġi, aġenziji b’responsabbiltà fil-livell nazzjonali għad-difiża tad-drittijiet tal-bniedem, awtoritajiet li jimmaniġġjaw il-fondi tal-Unjoni, Punti ta’ Kuntatt Nazzjonali tar-Rom, korpi tal-konsumatur, u mekkaniżmi indipendenti nazzjonali għall-promozzjoni, il-protezzjoni u l-monitoraġġ tal-UNCRPD. Tali kooperazzjoni jenħtieġ li ma tinvolvix l-iskambju ta’ data personali (jiġifieri data dwar l-ugwaljanza f’forma li fiha l-individwi jistgħu jiġu identifikati).

(40)Il-korpi tal-ugwaljanza ma jistgħux jaqdu bis-sħiħ ir-rwol tagħhom bħala esperti fi trattament ugwali jekk ma jiġux ikkonsultati kmieni biżżejjed matul il-proċess tat-tfassil tal-politika dwar materji relatati mad-drittijiet u l-obbligi li jirriżultaw mid-Direttivi 79/7/KEE, 2000/43/KE, 2000/78/KE u 2004/113/KE. Għalhekk, jenħtieġ li l-Istati Membri jistabbilixxu proċeduri trasparenti biex jiżguraw li l-konsultazzjoni ssir fil-ħin. Jenħtieġ li dawn jippermettu wkoll lill-korpi tal-ugwaljanza jagħmlu rakkomandazzjonijiet u jippubblikawhom.

(41)Id-data dwar l-ugwaljanza hija kruċjali għas-sensibilizzazzjoni, biex tissensitizza n-nies, biex tiġi kkwantifikata d-diskriminazzjoni, jintwerew ix-xejriet maż-żmien, tiġi pprovata l-eżistenza ta’ diskriminazzjoni, tiġi evalwata l-implimentazzjoni tal-leġiżlazzjoni dwar l-ugwaljanza, tintwera l-ħtieġa ta’ azzjoni pożittiva, u jingħata kontribut għat-tfassil tal-politika bbażat fuq l-evidenza 81 . Il-korpi tal-ugwaljanza għandhom rwol x’jaqdu fil-kontribut għall-iżvilupp ta’ data rilevanti dwar l-ugwaljanza għal dawk l-għanijiet, pereżempju billi jorganizzaw diskussjonijiet regolari li jiġbru l-entitajiet rilevanti kollha. Jenħtieġ li jiġbru u janalizzaw ukoll data dwar l-attivitajiet tagħhom stess jew iwettqu stħarriġ u jenħtieġ li jkunu jistgħu jaċċessaw u jagħmlu użu minn informazzjoni statistika miġbura minn entitajiet pubbliċi jew privati oħra, bħall-uffiċċji nazzjonali tal-istatistika, il-qrati nazzjonali, l-ispettorati tax-xogħol u tal-edukazzjoni, it-trade unions jew l-organizzazzjonijiet tas-soċjetà ċivili, dwar il-materji li huma fdati bihom skont id-Direttivi 79/7/KEE, 2000/43/KE, 2000/78/KE u 2004/113/KE. Jenħtieġ li dik l-informazzjoni statistika ma jkun fiha l-ebda data personali.

(42)Minbarra li jippubblikaw rapport annwali dwar l-attivitajiet tagħhom, il-korpi tal-ugwaljanza jenħtieġ li jippubblikaw regolarment rapport li jinkludi valutazzjoni ġenerali tas-sitwazzjoni fir-rigward tad-diskriminazzjoni li taqa’ taħt il-mandat tagħhom fl-Istati Membri. Dak ir-rapport jenħtieġ li jipprovdi informazzjoni għall-entitajiet pubbliċi u privati u jservi ta’ gwida biex jiġu ddeterminati l-prijoritajiet tal-korpi tal-ugwaljanza għall-futur. Ir-rapporti jenħtieġ li ma jkun fihom l-ebda data personali.

(43)Sabiex jiddeterminaw il-viżjoni tagħhom għall-futur u jidentifikaw l-għanijiet u l-objettivi tal-organizzazzjoni tagħhom, il-korpi tal-ugwaljanza jenħtieġ li jadottaw programm pluriennali. Dan jenħtieġ li jippermettilhom jiżguraw il-koerenza tal-linji ta’ ħidma differenti tagħhom maż-żmien u jindirizzaw kwistjonijiet sistemiċi ta’ diskriminazzjoni li jaqgħu taħt il-mandat tagħhom bħala parti minn pjan ta’ azzjoni fit-tul.

(44)Sabiex tiġi vvalutata l-effettività ta’ din id-Direttiva huwa meħtieġ li jiġi stabbilit mekkaniżmu għall-monitoraġġ tal-applikazzjoni tagħha u, minbarra l-monitoraġġ tal-konformità, jivvaluta l-effetti prattiċi tagħha. Jenħtieġ li l-Kummissjoni tkun responsabbli minn dak il-monitoraġġ u tfassal regolarment rapport ta’ applikazzjoni. Sabiex jiġu żgurati kundizzjonijiet uniformi għall-implimentazzjoni tal-obbligi ta’ rapportar tal-Istati Membri skont l-Artikolu 16(2) fir-rigward tal-effetti prattiċi ta’ din id-Direttiva, jenħtieġ li l-Kummissjoni tingħata setgħat ta’ implimentazzjoni biex tistabbilixxi lista ta’ indikaturi rilevanti, li abbażi tagħhom jenħtieġ li tinġabar id-data. Jenħtieġ li dan il-monitoraġġ ma jinvolvix l-ipproċessar ta’ data personali.

(45)Din id-Direttiva tistabbilixxi r-rekwiżiti minimi, u b’hekk tagħti lill-Istati Membri l-għażla li jdaħħlu jew iżommu dispożizzjonijiet aktar favorevoli. Jenħtieġ li l-implimentazzjoni ta’ din id-Direttiva ma sservix biex tiġġustifika xi regressjoni relatata mas-sitwazzjoni li diġà teżisti f’kull Stat Membru.

(46)Din id-Direttiva tibni fuq ir-regoli stabbiliti fid-Direttivi 2000/43/KE u 2004/113/KE billi tintroduċi standards imsaħħa għall-funzjonament tal-korpi tal-ugwaljanza. Id-dispożizzjonijiet preċedenti dwar il-korpi tal-ugwaljanza fl-Artikolu 13 tad-Direttiva 2000/43/KE u l-Artikolu 12 tad-Direttiva 2004/113/KE għalhekk jenħtieġ li jitħassru.

(47)Din id-Direttiva għandha l-għan li tiżgura l-funzjonament tal-korpi tal-ugwaljanza skont standards minimi, bil-għan li ttejjeb l-effettività tagħhom u tiggarantixxi l-indipendenza tagħhom, sabiex issaħħaħ l-applikazzjoni tal-prinċipju ta’ trattament ugwali. Peress li l-objettiv ta’ din id-Direttiva ma jistax jintlaħaq biżżejjed mill-Istati Membri u għalhekk jenħtieġ li jintlaħaq fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju tal-proporzjonalità, kif stabbilit f’dak l-Artikolu, din id-Direttiva, li sempliċiment tistabbilixxi standards minimi, ma tmurx lil hinn minn dak li huwa meħtieġ biex jintlaħaq dak l-objettiv.

(48)Kwalunkwe pproċessar ta’ data personali mill-korpi tal-ugwaljanza skont din id-Direttiva jenħtieġ li jitwettaq f’konformità sħiħa mar-Regolament (UE) 2016/679. L-Istati Membri jenħtieġ li jiżguraw li l-kompiti tal-korpi tal-ugwaljanza jkunu stabbiliti b’mod ċar fil-liġi, f’konformità mal-Artikolu 6(1)(e), tar-Regolament (UE) 2016/679, moqri flimkien mal-Artikolu 6(2) u (3) ta’ dak ir-Regolament. Il-korpi tal-ugwaljanza jenħtieġ li jipproċessaw data personali biss sa fejn ikun meħtieġ biex iwettqu l-kompiti tagħhom skont din id-Direttiva li għandha l-għan li tinforza d-drittijiet u l-obbligi fundamentali li jirriżultaw mid-Direttivi 79/7/KEE, 2000/43/KE, 2000/78/KE u 2004/113/KE. L-individwi li d-data personali tagħhom tiġi pproċessata jenħtieġ li jiġu infurmati dwar id-drittijiet tagħhom bħala suġġetti tad-data, inklużi r-rimedji disponibbli għalihom fil-livell nazzjonali.

(49)Meta t-twettiq tal-kompiti tal-korpi tal-ugwaljanza jirrikjedi l-ipproċessar ta’ kategoriji speċjali ta’ data personali, jiġifieri data dwar l-oriġini razzjali jew etnika, ir-reliġjon jew it-twemmin, diżabilità jew l-orjentazzjoni sesswali, jenħtieġ li l-Istati Membri jiżguraw ukoll li d-dritt nazzjonali jirrispetta l-essenza tad-dritt għall-protezzjoni tad-data u jipprevedi miżuri xierqa u speċifiċi għas-salvagwardja tad-drittijiet fundamentali u l-interessi tas-suġġett tad-data, f’konformità mal-Artikolu 9(2)(g) tar-Regolament (UE) 2016/679. Tali salvagwardji jenħtieġ li jinkludu pereżempju politiki u miżuri interni biex jiżguraw il-minimizzazzjoni tad-data, inkluż permezz tal-anonimizzazzjoni tad-data personali, fejn possibbli; biex jiġu applikati l-psewdonimizzazzjoni u l-kriptaġġ għad-data personali; biex jiġu evitati l-aċċess għal data personali u t-trażmissjoni tagħha mingħajr awtorizzazzjoni; u biex jiġi żgurat li d-data personali ma tiġix ipproċessata aktar milli jkun meħtieġ għall-finijiet li għalihom tiġi pproċessata.

(50)Il-kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 u ta opinjoni fi [data].

ADOTTA DIN ID-DIRETTIVA:

Artikolu 1

Għan, suġġett u kamp ta’ applikazzjoni

1.Din id-Direttiva tistabbilixxi rekwiżiti minimi għall-funzjonament tal-korpi tal-ugwaljanza biex ittejjeb l-effettività tagħhom u tiggarantixxi l-indipendenza tagħhom sabiex tissaħħaħ l-applikazzjoni tal-prinċipju ta’ trattament ugwali kif derivat mid-Direttivi 79/7/KEE, 2000/43/KE, 2000/78/KE u 2004/113/KE.

2.L-obbligi mqiegħda fuq l-Istati Membri u l-kompiti tal-korpi tal-ugwaljanza skont din id-Direttiva għandhom ikopru d-drittijiet u l-obbligi li jirriżultaw mid-Direttivi 79/7/KEE, 2000/43/KE, 2000/78/KE u 2004/113/KE.

Artikolu 2

Ħatra ta’ korpi tal-ugwaljanza

L-Istati Membri għandhom jaħtru korp wieħed jew aktar (minn hawn ’il quddiem imsejħa “korpi tal-ugwaljanza”) biex jeżerċitaw il-kompetenzi stabbiliti f’din id-Direttiva.

Il-korpi tal-ugwaljanza jistgħu jifformaw parti minn aġenziji b’responsabbilità għad-difiża tad-drittijiet tal-bniedem jew għas-salvagwardja tad-drittijiet tal-individwi fuq livell nazzjonali.

Artikolu 3

Indipendenza

1.L-Istati Membri għandhom jieħdu miżuri biex jiżguraw li l-korpi tal-ugwaljanza jkunu indipendenti u ħielsa minn influwenza esterna fit-twettiq tal-kompiti tagħhom u fl-eżerċizzju tal-kompetenzi tagħhom, b’mod partikolari fir-rigward tal-istruttura legali, ir-responsabbiltà, il-baġit, il-persunal u l-kwistjonijiet organizzattivi tagħhom.

2.L-Istati Membri għandhom jipprevedu regoli u salvagwardji trasparenti dwar l-għażla, il-ħatra, ir-revoka u l-kunflitt ta’ interess potenzjali tal-persunal tal-korpi tal-ugwaljanza, b’mod partikolari persuni li jkollhom pożizzjoni maniġerjali, sabiex jiggarantixxu l-kompetenza u l-indipendenza tagħhom.

3.L-Istati Membri għandhom jiżguraw li jkun hemm fis-seħħ salvagwardji xierqa, b’mod partikolari fl-istruttura interna tal-korpi tal-ugwaljanza, biex jiġi garantit l-eżerċizzju indipendenti tal-kompetenzi tagħhom, b’mod partikolari fejn xi wħud jeħtieġu imparzjalità u oħrajn jiffukaw fuq l-appoġġ għall-vittmi.

4.L-Istati Membri għandhom jiżguraw li jkunu fis-seħħ salvagwardji xierqa fl-istruttura interna tal-korpi b’diversi mandati biex jiggarantixxu l-eżerċizzju awtonomu tal-mandat tal-ugwaljanza.

Artikolu 4

Riżorsi

1.L-Istati Membri għandhom jiżguraw li kull korp tal-ugwaljanza jingħata r-riżorsi umani, tekniċi u finanzjarji meħtieġa biex iwettaq il-kompiti kollha tiegħu u biex jeżerċita l-kompetenzi kollha tiegħu b’mod effettiv, għar-raġunijiet kollha u fl-oqsma kollha koperti mid-Direttivi 79/7/KEE, 2000/43/KE, 2000/78/KE u 2004/113/KE inkluż fil-każ ta’ żidiet fil-kompetenzi, żidiet fl-ilmenti, spejjeż ta’ litigazzjoni u l-użu ta’ sistemi awtomatizzati.

2.Meta l-korpi tal-ugwaljanza jkunu parti minn korp inkarigat minn diversi mandati, il-paragrafu 1 għandu japplika speċifikament għall-mandat tal-ugwaljanza u għall-persunal u s-sistemi ta’ appoġġ tiegħu.

Artikolu 5

Prevenzjoni, promozzjoni u sensibilizzazzjoni

L-Istati Membri għandhom:

(a)jadottaw strateġija biex iqajmu kuxjenza fost il-popolazzjoni ġenerali, fit-territorju kollu tagħhom, b’attenzjoni partikolari għall-individwi u l-gruppi f’riskju ta’ diskriminazzjoni, dwar id-drittijiet skont id-Direttivi 79/7/KEE, 2000/43/KE, 2000/78/KE u 2004/113/KE u dwar l-eżistenza ta’ korpi tal-ugwaljanza u s-servizzi tagħhom;

(b)jiżguraw li l-korpi tal-ugwaljanza jinvolvu ruħhom fil-prevenzjoni tad-diskriminazzjoni u fil-promozzjoni tat-trattament ugwali, u jadottaw strateġija li tiddefinixxi kif se jinvolvu ruħhom fid-djalogu pubbliku, jikkomunikaw mal-individwi u l-gruppi f’riskju ta’ diskriminazzjoni, jipprovdu taħriġ u gwida, u jippromwovu d-dmirijiet ta’ ugwaljanza, l-integrazzjoni tal-ugwaljanza u l-azzjoni pożittiva fost l-entitajiet pubbliċi u privati.

Meta jagħmlu dan, l-Istati Membri u l-korpi tal-ugwaljanza għandhom iqisu l-aktar għodod u formati ta’ komunikazzjoni xierqa għal kull grupp fil-mira. Huma għandhom jiffukaw b’mod partikolari fuq gruppi żvantaġġati li l-aċċess tagħhom għall-informazzjoni jista’ jiġi mfixkel, pereżempju mill-istatus ekonomiku, l-età, id-diżabilità, il-litteriżmu, in-nazzjonalità, l-istatus ta’ residenza tagħhom jew in-nuqqas ta’ aċċess tagħhom għal għodod online.

Artikolu 6

Assistenza lill-vittmi

1.L-Istati Membri għandhom jiżguraw li l-korpi tal-ugwaljanza jkunu jistgħu jipprovdu assistenza lill-vittmi kif stabbilit fil-paragrafi 2 sa 4.

2.Il-korpi tal-ugwaljanza għandhom ikunu jistgħu jirċievu lmenti ta’ diskriminazzjoni, bil-fomm, bil-miktub u online.

3.Il-korpi tal-ugwaljanza għandhom jipprovdu assistenza lill-vittmi, inizjalment billi jinfurmawhom dwar il-qafas legali, inkluż dwar il-parir immirat lejn is-sitwazzjoni speċifika tagħhom, dwar is-servizzi offruti mill-korp tal-ugwaljanza u l-aspetti proċedurali relatati, kif ukoll dwar ir-rimedji disponibbli, inkluża l-possibbiltà li tinfetaħ kawża fil-qorti.

Il-korpi tal-ugwaljanza għandhom jinfurmaw ukoll lill-vittmi dwar ir-regoli ta’ kunfidenzjalità applikabbli, dwar il-protezzjoni tad-data personali u dwar il-possibbiltajiet li jingħataw appoġġ psikoloġiku jew tipi oħra ta’ appoġġ rilevanti minn korpi jew organizzazzjonijiet oħra.

4.Il-korpi tal-ugwaljanza għandhom joħorġu valutazzjoni preliminari ta’ lment ibbażata fuq informazzjoni ppreżentata volontarjament mill-partijiet involuti. L-Istati Membri għandhom jiddefinixxu l-modalitajiet preċiżi li taħthom il-korp tal-ugwaljanza joħroġ tali valutazzjoni preliminari.

Il-korpi tal-ugwaljanza għandhom jinfurmaw lill-ilmentaturi dwar il-valutazzjoni preliminari tagħhom u jekk ikunux se jagħlqu l-ilment tagħhom jew jekk ikunx hemm raġunijiet biex ikomplu jsegwuh, inkluż permezz tal-proċeduri stabbiliti fl-Artikoli 7, 8 u 9.

Artikolu 7

Ftehimiet bonarji

Il-korpi tal-ugwaljanza għandhom ikunu jistgħu joffru lill-partijiet il-possibbiltà li jfittxu soluzzjoni bonarja għat-tilwima tagħhom. Dak il-proċess għandu jkun suġġett għall-qbil tal-partijiet u jista’ jkun immexxi mill-korp tal-ugwaljanza nnifsu jew minn entità ddedikata eżistenti oħra, f’liema każ il-korp tal-ugwaljanza jkun jista’ jifformula osservazzjonijiet lil dik l-entità. L-involviment f’tali proċess ma għandux jipprevjeni lill-partijiet milli jeżerċitaw id-dritt tagħhom ta’ aċċess għall-qorti.

Artikolu 8

Opinjonijiet u deċiżjonijiet

1.L-Istati Membri għandhom jiżguraw li meta, wara lment jew fuq inizjattiva tagħhom stess, il-korpi tal-ugwaljanza jqisu li l-prinċipju ta’ trattament ugwali stabbilit fid-Direttivi 79/7/KEE, 2000/43/KE, 2000/78/KE jew 2004/113/KE seta’ nkiser, dawk il-korpi jkollhom is-setgħa li jinvestigaw aktar il-każ.

2.L-Istati Membri għandhom jipprevedu qafas li jippermetti lill-korpi tal-ugwaljanza jwettqu inkjesta.

B’mod partikolari, dak il-qafas għandu jipprovdi lill-korpi tal-ugwaljanza bi drittijiet effettivi li jaċċessaw l-informazzjoni meħtieġa biex jistabbilixxu jekk tkunx seħħet diskriminazzjoni. Il-qafas għandu jipprevedi wkoll mekkaniżmi xierqa għall-korpi tal-ugwaljanza biex dawn jikkooperaw mal-korpi pubbliċi rilevanti għal dak il-għan.

3.L-Istati Membri jistgħu jipprevedu wkoll li l-allegat awtur u kwalunkwe parti terza jkunu marbuta legalment li jipprovdu kwalunkwe informazzjoni u dokumenti mitluba mill-korpi tal-ugwaljanza.

4.L-Istati Membri għandhom jiżguraw li l-korpi tal-ugwaljanza jirreġistraw bil-miktub il-valutazzjoni tagħhom tal-każ, inkluż l-istabbiliment tal-fatti u konklużjoni motivata dwar l-eżistenza ta’ diskriminazzjoni. L-Istati Membri għandhom jiddeterminaw jekk dan għandux isir permezz ta’ opinjonijiet mhux vinkolanti jew permezz ta’ deċiżjonijiet eżegwibbli vinkolanti.

Fejn xieraq, l-opinjonijiet u d-deċiżjonijiet għandhom jinkludu miżuri speċifiċi biex jiġi rrimedjat kwalunkwe ksur li jinstab u biex jiġu evitati okkorrenzi ulterjuri. L-Istati Membri għandhom jistabbilixxu mekkaniżmi xierqa għas-segwitu tal-opinjonijiet, bħall-obbligi ta’ feedback, u għall-eżekuzzjoni tad-deċiżjonijiet.

Il-korpi tal-ugwaljanza għandhom jippubblikaw sommarji tal-opinjonijiet u tad-deċiżjonijiet tagħhom, mingħajr ma jiżvelaw data personali.

Artikolu 9

Tilwim

1.L-Istati Membri għandhom jiżguraw li l-korpi tal-ugwaljanza jkollhom id-dritt li jaġixxu fi proċedimenti tal-qorti fi kwistjonijiet amministrattivi u ċivili relatati mal-implimentazzjoni tal-prinċipju tat-trattament ugwali stabbilit fid-Direttivi 79/7/KEE, 2000/43/KE, 2000/78/KE u 2004/113/KE f’konformità mal-paragrafi 2 sa 5, mingħajr preġudizzju għar-regoli nazzjonali dwar l-ammissibbiltà tal-azzjonijiet.

2.Id-dritt li taġixxi fi proċedimenti tal-qorti għandu jinkludi:

(a)id-dritt tal-korp tal-ugwaljanza li jaġixxi bħala parti fi proċedimenti dwar l-infurzar jew ir-rieżami ġudizzjarju ta’ deċiżjoni meħuda skont l-Artikolu 8(4);

(b)id-dritt tal-korp tal-ugwaljanza li jissottometti osservazzjonijiet lill-qorti bħala amicus curiae;

(c)id-dritt tal-korp tal-ugwaljanza li jibda jew jipparteċipa fi proċedimenti f’isem vittma waħda jew diversi vittmi jew b’appoġġ għalihom; f’dan il-każ, l-approvazzjoni tal-vittmi għandha tkun meħtieġa.

3.L-Istati Membri għandhom jiżguraw li l-korp tal-ugwaljanza jkun jista’ jibda proċedimenti tal-qorti f’ismu stess, b’mod partikolari sabiex jindirizza d-diskriminazzjoni strutturali u sistematika f’każijiet magħżula mill-korp tal-ugwaljanza minħabba l-abbundanza tagħhom, is-serjetà tagħhom jew il-ħtieġa tagħhom għal kjarifika legali.

4.L-Istati Membri għandhom jiżguraw li, ħlief fil-każijiet imsemmija fil-paragrafi 2(a) u (b), il-korp tal-ugwaljanza ma jippreżentax fil-proċedimenti tal-qorti evidenza li jkun kiseb permezz tal-eżerċizzju tas-setgħat skont l-Artikolu 8(3).

5.L-Istati Membri għandhom jiżguraw li l-ebda investigazzjoni skont l-Artikolu 8(2) sa (4) ma tinbeda jew titkompla waqt li jkunu pendenti proċedimenti tal-qorti dwar l-istess każ.

Artikolu 10

Salvagwardji proċedurali

L-Istati Membri għandhom jiżguraw li, fil-proċeduri msemmija fl-Artikoli 6, 7, 8 u 9, id-drittijiet tad-difiża tal-persuni fiżiċi u ġuridiċi involuti jkunu protetti kif xieraq. L-Istati Membri għandhom jiżguraw li l-korpi tal-ugwaljanza jiggarantixxu l-kunfidenzjalità tax-xhieda u tal-informaturi, u sa fejn ikun possibbli, tal-ilmentaturi.

Id-deċiżjonijiet imsemmija fl-Artikolu 8(4) għandhom ikunu soġġetti għal rieżami ġudizzjarju, f’konformità mal-liġi nazzjonali.

Artikolu 11

Aċċess, aċċessibbiltà u akkomodazzjoni raġonevoli

1.L-Istati Membri għandhom jiggarantixxu aċċess għas-servizzi u l-pubblikazzjonijiet tal-korpi tal-ugwaljanza fuq bażi ugwali għal kulħadd u jiżguraw li ma jkun hemm l-ebda ostaklu għas-sottomissjoni tal-ilmenti.

2.L-Istati Membri għandhom jiżguraw li l-korpi tal-ugwaljanza jipprovdu s-servizzi kollha tagħhom mingħajr ħlas għall-ilmentaturi, fit-territorju kollu tagħhom, inkluż f’żoni rurali u remoti.

3.L-Istati Membri għandhom jiżguraw l-aċċessibbiltà u jipprovdu akkomodazzjoni raġonevoli għall-persuni b’diżabilità biex jiggarantixxu l-aċċess ugwali tagħhom għas-servizzi u l-attivitajiet kollha tal-korpi tal-ugwaljanza, inklużi l-assistenza lill-vittmi, l-immaniġġjar tal-ilmenti, il-mekkaniżmi ta’ soluzzjoni bonarja, l-informazzjoni u l-pubblikazzjonijiet, u l-attivitajiet ta’ prevenzjoni, ta’ promozzjoni u ta’ sensibilizzazzjoni.

l-Artikolu 12

Kooperazzjoni

L-Istati Membri għandhom jiżguraw li l-korpi tal-ugwaljanza jkollhom fis-seħħ mekkaniżmi xierqa biex jikkooperaw, fl-oqsma ta’ kompetenza rispettivi tagħhom, ma’ korpi oħra tal-ugwaljanza fl-istess Stat Membru, u ma’ entitajiet pubbliċi u privati rilevanti, inklużi organizzazzjonijiet tas-soċjetà ċivili, fil-livell nazzjonali, reġjonali, lokali kif ukoll fi Stati Membri oħra u fil-livell tal-Unjoni u internazzjonali.

Artikolu 13

Konsultazzjoni

L-Istati Membri għandhom jistabbilixxu proċeduri trasparenti biex jiżguraw li l-gvern u istituzzjonijiet pubbliċi oħra jikkonsultaw fil-ħin lill-korpi tal-ugwaljanza dwar il-leġiżlazzjoni, il-politika, il-proċedura, il-programmi u l-prattiki relatati mad-drittijiet u l-obbligi li jirriżultaw mid-Direttivi 79/7/KEE, 2000/43/KE, 2000/78/KE u 2004/113/KE.

Huma għandhom jiżguraw li l-korpi tal-ugwaljanza jkollhom id-dritt li jagħmlu rakkomandazzjonijiet dwar dawk il-kwistjonijiet, jippubblikawhom u jitolbu feedback mill-awtoritajiet ikkonċernati.

Artikolu 14

Ġbir ta’ data u aċċess għal data dwar l-ugwaljanza

1.L-Istati Membri għandhom jiżguraw li l-korpi tal-ugwaljanza jiġbru data dwar l-attivitajiet tagħhom, bil-għan li jipproduċu r-rapporti msemmija fl-Artikolu 15(b) u (c).

Id-data miġbura għandha tiġi diżaggregata skont ir-raġunijiet u l-oqsma koperti mid-Direttivi 79/7/KEE, 2000/43/KE, 2000/78/KE u 2004/113/KE, u f’konformità mal-indikaturi msemmija fl-Artikolu 16. Id-data personali miġbura għandha tiġi anonimizzata u, fejn ma jkunx possibbli, psewdonimizzata.

2.L-Istati Membri għandhom jiżguraw li l-korpi tal-ugwaljanza jkunu jistgħu jaċċessaw statistika relatata mad-drittijiet u l-obbligi li jirriżultaw mid-Direttivi 79/7/KEE, 2000/43/KE, 2000/78/KE u 2004/113/KE miġbura minn entitajiet pubbliċi u privati inklużi awtoritajiet pubbliċi, trade unions, kumpaniji, u organizzazzjonijiet tas-soċjetà ċivili fejn iqisu li tali statistika tkun meħtieġa biex jagħmlu valutazzjoni ġenerali tas-sitwazzjoni tad-diskriminazzjoni fl-Istat Membru, u biex ifasslu r-rapport imsemmi fl-Artikolu 15(c).

3.L-Istati Membri għandhom jippermettu lill-korpi tal-ugwaljanza jagħmlu rakkomandazzjonijiet dwar liema data għandha tinġabar fir-rigward tad-drittijiet u l-obbligi li jirriżultaw mid-Direttivi 79/7/KEE, 2000/43/KE, 2000/78/KE u 2004/113/KE, lil entitajiet pubbliċi u privati inklużi awtoritajiet pubbliċi, trade unions, kumpaniji u organizzazzjonijiet tas-soċjetà ċivili. L-Istati Membri għandhom jippermettu wkoll lill-korpi tal-ugwaljanza jaqdu rwol ta’ koordinazzjoni fil-ġbir tad-data dwar l-ugwaljanza.

4.L-Istati Membri għandhom jiżguraw li l-korpi tal-ugwaljanza jkunu jistgħu jwettqu stħarriġ indipendenti dwar id-diskriminazzjoni.

Artikolu 15

Rapporti u ppjanar strateġiku

L-Istati Membri għandhom jiżguraw li l-korpi tal-ugwaljanza:

(a)jadottaw programm pluriennali li jistabbilixxi l-prijoritajiet u l-attivitajiet prospettivi tagħhom, inkluża l-istrateġija msemmija fl-Artikolu 5(b);

(b)jipproduċu u jagħmlu disponibbli għall-pubbliku rapport annwali tal-attività, li jinkludi l-baġit annwali, il-persunal u r-rapportar finanzjarju tagħhom;

(c)jippubblikaw rapport, b’rakkomandazzjonijiet, tal-anqas kull erba’ snin, dwar is-sitwazzjoni tat-trattament ugwali u d-diskriminazzjoni, inklużi kwistjonijiet strutturali potenzjali, fl-Istat Membru tagħhom.

Artikolu 16

Monitoraġġ

1.Il-Kummissjoni għandha, permezz ta’ att ta’ implimentazzjoni, tistabbilixxi lista ta’ indikaturi komuni biex jitkejlu l-effetti prattiċi ta’ din id-Direttiva. Meta tħejji l-indikaturi, il-Kummissjoni tista’ titlob il-parir tal-Aġenzija tal-Unjoni Ewropea għad-Drittijiet Fundamentali u tal-Istitut Ewropew għall-Ugwaljanza bejn is-Sessi. Dawk l-indikaturi għandhom ikopru r-riżorsi, il-funzjonament indipendenti, l-attivitajiet u l-effettività tal-korpi tal-ugwaljanza, kif ukoll l-iżviluppi fil-mandat, is-setgħat jew l-istruttura tagħhom, filwaqt li jiżguraw il-komparabbiltà, l-oġġettività u l-affidabbiltà tad-data miġbura fil-livell nazzjonali.

2.Sa [5 snin wara d-data tat-traspożizzjoni], u kull 5 snin minn hemm ’il quddiem, l-Istati Membri għandhom jipprovdu lill-Kummissjoni bl-informazzjoni rilevanti kollha dwar l-applikazzjoni ta’ din id-Direttiva, inkluża data dwar l-effetti prattiċi tagħha miġbura abbażi tal-indikaturi msemmija fil-paragrafu 1 ta’ dan l-Artikolu, u b’mod partikolari b’kont meħud tar-rapporti mfassla mill-korpi tal-ugwaljanza skont l-Artikolu 15, il-punti (b) u (c).

3.Il-Kummissjoni għandha tfassal rapport dwar l-applikazzjoni u l-effetti prattiċi ta’ din id-Direttiva, abbażi tal-informazzjoni msemmija fil-paragrafu 2 u ta’ data rilevanti addizzjonali miġbura fil-livell nazzjonali u tal-Unjoni, b’mod partikolari mill-partijiet ikkonċernati, mill-Aġenzija tal-Unjoni Ewropea għad-Drittijiet Fundamentali u mill-Istitut Ewropew għall-Ugwaljanza bejn is-Sessi.

Artikolu 17

Rekwiżiti minimi

1.L-Istati Membri jistgħu jintroduċu jew iżommu dispożizzjonijiet li jkunu aktar favorevoli mir-rekwiżiti minimi stabbiliti f’din id-Direttiva.

2.L-implimentazzjoni ta’ din id-Direttiva ma għandha fl-ebda ċirkostanza tikkostitwixxi bażi għat-tnaqqis fil-livell ta’ protezzjoni kontra diskriminazzjoni diġà mogħtija mill-Istati Membri fil-materji koperti minn din id-Direttiva.

Artikolu 18

Proċessar ta’ data personali

1.L-Istati Membri għandhom jiżguraw li l-korpi tal-ugwaljanza jistgħu jiġbru data personali biss fejn ikun meħtieġ għat-twettiq ta’ kompitu skont din id-Direttiva.

2.L-Istati Membri għandhom jiżguraw li meta l-korpi tal-ugwaljanza jipproċessaw kategoriji speċjali ta’ data personali, jiġifieri data dwar l-oriġini razzjali jew etnika, ir-reliġjon jew it-twemmin, id-diżabilità jew l-orjentazzjoni sesswali, jiġu pprovduti miżuri xierqa u speċifiċi biex jiġu ssalvagwardjati d-drittijiet fundamentali u l-interessi tas-suġġett tad-data.

Artikolu 19

L-Artikolu 13 tad-Direttiva 2000/43/KE u l-Artikolu 12 tad-Direttiva 2004/113/KE huma mħassra.

Ir-referenzi għall-korpi għall-promozzjoni tat-trattament ugwali msemmija f’dawk l-Artikoli għandhom jinftiehmu bħala referenzi għall-korpi tal-ugwaljanza msemmija fl-Artikolu 2 ta’ din id-Direttiva.

Artikolu 20

1.L-Istati Membri għandhom idaħħlu fis-seħħ il-liġijiet, ir-regolamenti u d-dispożizzjonijiet amministrattivi meħtieġa biex jikkonformaw ma’ din id-Direttiva sa mhux aktar tard minn [18-il xahar]. Huma għandhom minnufih jinfurmaw lill-Kummissjoni b’dan.

Meta l-Istati Membri jadottaw dawk id-dispożizzjonijiet, fihom għandu jkun hemm referenza għal din id-Direttiva jew għandhom ikunu akkumpanjati minn dik ir-referenza meta ssir il-pubblikazzjoni uffiċjali tagħhom. Huma l-Istati Membri li għandhom jiddeċiedu kif issir dik ir-referenza.

2.L-Istati Membri għandhom jikkomunikaw lill-Kummissjoni t-test tad-dispożizzjonijiet prinċipali tad-dritt nazzjonali li jadottaw fil-qasam kopert minn din id-Direttiva.

Artikolu 21

Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.

L-Artikolu 19 għandu japplika minn [data msemmija fl-Artikolu 20(1)].

Artikolu 22

Din id-Direttiva hija indirizzata lill-Istati Membri.

Magħmul fi Brussell,

(1)    [referenza]

(2)    Id-Direttiva tal-Kunsill 2000/43/KE tad-29 ta’ Ġunju 2000 li timplimenta l-prinċipju tat-trattament ugwali bejn il-persuni irrispettivament mill-oriġini tar-razza jew l-etniċità (ĠU L 180, 19.7.2000, p. 22).

(3)    Id-Direttiva tal-Kunsill 2004/113/KE tat-13 ta’ Diċembru 2004 li timplimenta l-prinċipju ta’ trattament ugwali bejn l-irġiel u n-nisa fl-aċċess għal u l-provvista ta’ merkanzija u servizzi (ĠU L 373, 21.12.2004, p. 37).

(4)    Id-Direttiva 2006/54/KE tal-Parlament Ewropew u tal-Kunsill tal-5 ta’ Lulju 2006 dwar l-implimentazzjoni tal-prinċipju ta’ opportunitajiet indaqs u ta’ trattament ugwali tal-irġiel u n-nisa fi kwistjonijiet ta’ impjiegi u xogħol (ĠU L 204, 26.07.2006, p. 23).

(5)    Id-Direttiva 2010/41/UE tal-Parlament Ewropew u tal-Kunsill tas-7 ta’ Lulju 2010 dwar l-applikazzjoni tal-prinċipju ta’ trattament ugwali bejn l-irġiel u n-nisa li jeżerċitaw attività li fiha jaħdmu għal rashom u li tħassar id-Direttiva tal-Kunsill 86/613/KEE (ĠU L 180, 15.7.2010, p. 1).

(6)    Id-Direttiva tal-Kunsill 2000/78/KE tas-27 ta’ Novembru 2000 li tistabbilixxi qafas ġenerali għall-ugwaljanza fit-trattament fl-impjieg u fix-xogħol (ĠU L 303, 2.12.2000, p. 16).

(7)    Id-Direttiva tal-Kunsill 79/7/KEE tad-19 ta’ Diċembru 1978 dwar l-implimentazzjoni progressiva tal-prinċipju tat-trattament ugwali tal-irġiel u n-nisa fi kwistjonijiet ta’ sigurtà soċjali (ĠU L 6, 10.1.1979, p. 24).

(8)    Xi liġijiet tal-Istati Membri joffru protezzjoni usa’ f’termini ta’ raġunijiet u oqsma, jiġifieri n-nazzjonalità, l-istatus ekonomiku, l-espressjoni tal-ġeneru, jew saħansitra lista mhux eżawrjenti ta’ raġunijiet.

(9)    Ara SWD(2021) 63 Parti 2.1.1 commission_staff_working_document_-_equality_bodies_and_the_implementation_of_the_commission_recommendation_on_standards_for_equality_bodies_en.pdf (europa.eu) .

(10)    Ir-Rakkomandazzjoni tal-Kummissjoni (UE) 2018/951 tat-22 ta’ Ġunju 2018 dwar standards għall-korpi għall-ugwaljanza (ĠU L 167, 4.7.2018, p. 28).

(11)    SWD(2021)63 tad-19 ta’ Marzu 2021.

(12)    Żid ir-referenza għall-SWD.

(13)    Riżoluzzjoni tal-Parlament Ewropew tal-10 ta’ Marzu 2021 dwar l-implimentazzjoni tad-Direttiva tal-Kunsill 2000/78/KE li tistabbilixxi qafas ġenerali għall-ugwaljanza fit-trattament fl-impjieg u fix-xogħol fid-dawl tal-UNCRPD (2020/2086(INI).

(14)    KONKLUŻJONIJIET TAL-KUNSILL dwar il-ġlieda kontra r-razziżmu u l-antisemitiżmu - 6406/1/22 REV 1.

(15)    Opinjoni fuq inizjattiva proprja tal-Kumitat Ekonomiku u Soċjali Ewropew dwar It-titjib tal-ugwaljanza fl-UE, SOC/724-EESC-2022, adottata 26/10/2022.

(16)    https://ec.europa.eu/info/strategy-documents/commission-work-programme/commission-work-programme-2022_en.

(17)    COM(2020)152 https://ec.europa.eu/info/policies/justice-and-fundamental-rights/gender-equality/gender-equality-strategy_mt .

(18)    COM(2020)565 https://ec.europa.eu/info/policies/justice-and-fundamental-rights/combatting-discrimination/racism-and-xenophobia/eu-anti-racism-action-plan-2020-2025_en .  

(19)     https://ec.europa.eu/info/publications/new-eu-roma-strategic-framework-equality-inclusion-and-participation-full-package_en .

(20)    COM(2020)698 https://ec.europa.eu/info/policies/justice-and-fundamental-rights/combatting-discrimination/lesbian-gay-bi-trans-and-intersex-equality/lgbtiq-equality-strategy-2020-2025_en .

(21)    COM(2021)101 https://ec.europa.eu/social/main.jsp?catId=1484&langId=mt .  

(22)    COM(2021) 615 https://ec.europa.eu/commission/presscorner/detail/mt/ip_21_4990 .

(23)    Ir-Rakkomandazzjoni tal-Kunsill tat-12 ta’ Marzu 2021 dwar l-ugwaljanza, l-inklużjoni u l-parteċipazzjoni tar-Rom 2021/C 93/01 (ĠU C 93, 19.3.2021, p. 1).

(24)    Id-Direttiva (UE) 2019/1158 tal-Parlament Ewropew u tal-Kunsill tal-20 ta’ Ġunju 2019 dwar il-bilanċ bejn ix-xogħol u l-ħajja privata għall-ġenituri u għall-persuni li jindukraw u li tħassar id-Direttiva tal-Kunsill 2010/18/UE (ĠU L 188, 12.7.2019, p. 79).

(25)    Proposta għal Direttiva tal-Kunsill dwar l-implimentazzjoni tal-prinċipju ta’ trattament ugwali bejn il-persuni irrispettivament mir-reliġjon jew it-twemmin, id-diżabilità, l-età jew l-orjentazzjoni sesswali, COM(2008)426 tat-2 ta’ Lulju 2008.

(26)    Jew, jekk tiġi adottata sa dak iż-żmien, din id-Direttiva.

(27)    Ara l-Artikolu 4 tad-Direttiva 2014/54/UE tal-Parlament Ewropew u tal-Kunsill tas-16 ta’ April 2014 dwar miżuri li jiffaċilitaw l-eżerċizzju tad-drittijiet konferiti fuq ħaddiema fil-kuntest tal-moviment liberu tal-ħaddiema (ĠU L 128, 30.4.2014, p. 8). Din id-Direttiva ma tkoprix ir-raġunijiet ta’ diskriminazzjoni stabbiliti mill-Artikolu 19 tat-TFUE. Hija bbażata fuq l-Artikolu 46 tat-TFUE, il-moviment liberu tal-ħaddiema.

(28)    Ir-Regolament (UE) 2021/1060 tal-Parlament Ewropew u tal-Kunsill tal-24 ta’ Ġunju 2021 li jistipula dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew Plus, il-Fond ta’ Koeżjoni, il-Fond għal Tranżizzjoni Ġusta u l-Fond Ewropew għall-Affarijiet Marittimi, is-Sajd u l-Akkwakultura u r-regoli finanzjarji għalihom u għall-Fond għall-Ażil, il-Migrazzjoni u l-Integrazzjoni, il-Fond għas-Sigurtà Interna u l-Istrument għall-Appoġġ Finanzjarju għall-Ġestjoni tal-Fruntieri u l-Politika dwar il-Viżi (ĠU L 231, 30.6.2021, p. 159).

(29)    Komunikazzjoni mill-Kummissjoni: Strateġija biex tissaħħaħ l-applikazzjoni tal-Karta tad-Drittijiet Fundamentali fl-UE, COM(2020)711.

(30)    Proposta għal Direttiva tal-Parlament Ewropew u tal-Kunsill dwar il-ġlieda kontra l-vjolenza kontra n-nisa u l-vjolenza domestika, COM(2022)105 tat-8.03.2022.

(31)    Id-Direttiva 2012/29/UE tal-Parlament Ewropew u tal-Kunsill tal-25 ta’ Ottubru 2012 li tistabbilixxi standards minimi fir-rigward tad-drittijiet, l-appoġġ u l-protezzjoni tal-vittmi tal-kriminalità, u li tissostitwixxi d-Deċiżjoni Qafas tal-Kunsill 2001/220/JHA - ĠU L 315, 14.11.2012, p. 57-73.

(32)    Id-Direttiva tal-Kunsill 2003/8/KE tas-27 ta’ Jannar 2003 biex ittejjeb l-aċċess għal ġustizzja f’tilwimiet bejn il-konfini billi tistabbilixxi regoli komuni minimi konnessi ma’ għajnuna legali għal tilwimiet bħal dawn - ĠU L 26, 31.1.2003, p. 41-47.

(33)    Id-Direttiva 2008/52/KE tal-Parlament Ewropew u tal-Kunsill tal-21 ta’ Mejju 2008 dwar ċerti aspetti ta’ medjazzjoni f’materji ċivili u kummerċjali - ĠU L 136, 24.5.2008, p. 3-8.

(34)    Ir-Rakkomandazzjoni tal-Kummissjoni tal-11 ta’ Ġunju 2013 dwar prinċipji komuni għal mekkaniżmi ta’ rimedju kollettiv ta’ inġunzjoni u kumpensatorji fl-Istati Membri li jikkonċernaw il-ksur tad-drittijiet mogħtija skont il-Liġi tal-Unjoni - ĠU L 201, 26.7.2013, p. 60-65 u d-Direttiva (UE) 2020/1828 tal-Parlament Ewropew u tal-Kunsill tal-25 ta’ Novembru 2020 dwar azzjonijiet rappreżentattivi għall-protezzjoni tal-interessi kollettivi tal-konsumaturi, u li tħassar id-Direttiva 2009/22/KE - ĠU L 409, 4.12.2020, p. 1-27.

(35)    RAKKOMANDAZZJONI TAL-KUMMISSJONI (UE) 2022/758 tas-27 ta’ April 2022 dwar il-protezzjoni tal-ġurnalisti u tad-difensuri tad-drittijiet tal-bniedem li jinvolvu ruħhom fil-parteċipazzjoni pubblika minn proċedimenti tal-qorti manifestament bla bażi jew abbużivi (“Kawżi strateġiċi kontra l-parteċipazzjoni pubblika”).

(36)     Ir-rapport dwar l-istat tad-dritt tal-2022 | Il-Kummissjoni Ewropea (europa.eu)

(37)     social-summit-european-pillar-social-rights-booklet_mt.pdf (europa.eu)

(38)    L-Artikolu 235 ippermetta lill-Kunsill jadotta (b’unanimità) Direttivi meta azzjoni Komunitarja dehret li kienet meħtieġa biex jintlaħaq wieħed mill-għanijiet tal-Komunità u t-Trattat ma tax is-setgħat speċifiċi meħtieġa.

(39)    L-intervent tal-UE, jew il-Qafas tal-UE, imsemmi f’din il-proposta, jinkludi d-dispożizzjonijiet li jikkonċernaw il-korpi tal-ugwaljanza fid-Direttivi dwar l-Ugwaljanza u r-Rakkomandazzjoni tal-2018 dwar standards għall-korpi tal-ugwaljanza.

(40)    PT, ES, MT, LT. Sadanittant Spanja adottat liġi ġdida (Ley 15/2022 tat-12 ta’ Lulju 2022).

(41)    Ħafna miżuri jridu jiġu implimentati f’konformità mal-liġi nazzjonali u xi miżuri mhumiex qed jiġu proposti sabiex tiġi rispettata l-awtonomija proċedurali tal-Istati Membri, bħar-rekwiżit li l-korpi tal-ugwaljanza jistgħu jadottaw deċiżjonijiet vinkolanti.

(42)    Minn hawn ’il quddiem imsejħa l-Qafas tal-UE jew l-intervent tal-UE.

(43)    L-impatti ewlenin mistennija kienu (i) implimentazzjoni u infurzar effettivi tal-leġiżlazzjoni tal-UE dwar it-trattament ugwali u n-nondiskriminazzjoni, (ii) tnaqqis fil-livelli ta’ diskriminazzjoni u trattament mhux ugwali u (iii) żieda fil-prevenzjoni u sensibilizzazzjoni ogħla.

(44)     https://www.un.org/ruleoflaw/blog/document/principles-relating-to-the-status-of-national-institutions-paris-principles/ .  

(45)     https://www.coe.int/en/web/european-commission-against-racism-and-intolerance/recommendation-no.2#:~:text=ECRI%20General%20Policy%20Recommendation%20N%C2%B02%20revised%20on%20Equality,and%20combating%20discrimination%20and%20intolerance .

(46)    Ara l-Kapitolu 3 tal-Anness 5 tad-dokument analitiku għal ċifri dettaljati mill-Ewrobarometru tal-2019.

(47)    B’mod partikolari, il-maġġoranza l-kbira ta’ dawk li wieġbu għall-Konsultazzjoni Pubblika Miftuħa (97,2 %) iqisu li l-istabbiliment ta’ korpi tal-ugwaljanza b’saħħithom u effettivi huwa importanti – ara  Korpi tal-Ugwaljanza – standards vinkolanti (europa.eu) .    

(48)    Mandat, setgħat, aċċess, kooperazzjoni, stħarriġ, ġbir tad-data, monitoraġġ, eżekuzzjoni, indipendenza, riżorsi u struttura.

(49)    L-analiżi tal-effettività tqis sa liema punt il-miżura proposta hija mistennija tikkontribwixxi għall-progress lejn l-objettivi definiti fil-loġika tal-intervent.

(50)    L-analiżi tal-effiċjenza tivvaluta r-relazzjoni bejn ir-riżorsi użati minn miżura proposta u l-bidliet li hija mistennija tiġġenera.

(51)    L-analiżi tal-koerenza tiffoka fuq kemm il-miżura proposta hija mistennija li taħdem tajjeb flimkien ma’ strumenti oħra tal-UE, internazzjonali u nazzjonali.

(52)    L-analiżi tal-valur miżjud tal-UE teżamina l-bidliet li għandhom jiskattaw mill-miżura proposta minbarra dak li jista’ jkun raġonevolment mistenni mill-partijiet ikkonċernati biss jew mill-ebda azzjoni.

(53)    L-analiżi tar-rilevanza teżamina jekk il-miżura proposta hijiex rispons xieraq għall-ħtiġijiet.

(54)    Aktar informazzjoni dwar is-sitwazzjoni f’kull Stat Membru tinsab fl-Anness 4 tad-dokument analitiku.

(55)

   SWD(2021)63 final.

(56)    Id-dmirijiet tal-ugwaljanza huma obbligu għall-entitajiet pubbliċi u/jew privati biex jikkunsidraw jew jaħsbu dwar kif il-politiki jew id-deċiżjonijiet tagħhom se jaffettwaw lill-persuni protetti skont il-liġi dwar it-trattament ugwali.

(57)    L-Artikolu 4 tar-Regolament tal-Kunsill (KE) Nru 168/2007 tal-15 ta’ Frar 2007 li jistabbilixxi Aġenzija tal-Unjoni Ewropea għad-Drittijiet Fundamentali, ĠU L 53, p. 1.

(58)    L-Artikolu 3 tar-Regolament (KE) Nru 1922/2006 tal-Parlament Ewropew u tal-Kunsill tal-20 ta’ Diċembru 2006 li jistabbilixxi Istitut Ewropew għall-Ugwaljanza bejn is-Sessi, ĠU L 403, p. 9.

(59)    Ir-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data), ĠU L 119, 4.5.2016, p. 1.

(60)    ĠU C , , p. .

(61)    ĠU C , , p. .

(62)    ĠU C , , p. .

(63)    ĠU C , , p. .

(64)    L-Artikoli 2 u 3 tat-Trattat dwar l-Unjoni Ewropea (“TUE”), l-Artikoli 8 u 10 tat-Trattat dwar il-Funzjonament tal-Unjoni Ewropea (“TFUE”), u l-Artikoli 21, 23 u 26 tal-Karta

(65)    Id-Direttiva tal-Kunsill 79/7/KEE tad-19 ta’ Diċembru 1978 dwar l-implimentazzjoni progressiva tal-prinċipju tat-trattament ugwali tal-irġiel u n-nisa fi kwistjonijiet ta’ sigurtà soċjali (ĠU L 6, 10.1.1979, p. 24).

(66)    Id-Direttiva tal-Kunsill 2000/43/KE tad-29 ta’ Ġunju 2000 li timplimenta l-prinċipju tat-trattament ugwali bejn il-persuni irrispettivament mill-oriġini tar-razza jew l-etniċità (ĠU L 180, 19.7.2000, p. 22).

(67)    Id-Direttiva tal-Kunsill 2000/78/KE tas-27 ta’ Novembru 2000 li tistabbilixxi qafas ġenerali għall-ugwaljanza fit-trattament fl-impjieg u fix-xogħol (ĠU L 303, 2.12.2000, p. 16).

(68)    Id-Direttiva tal-Kunsill 2004/113/KE tat-13 ta’ Diċembru 2004 li timplimenta l-prinċipju ta’ trattament ugwali bejn l-irġiel u n-nisa fl-aċċess għal u l-provvista ta’ merkanzija u servizzi (ĠU L 373, 21.12.2004, p. 37).

(69)    Id-Direttiva 2006/54/KE tal-Parlament Ewropew u tal-Kunsill tal-5 ta’ Lulju 2006 dwar l-implimentazzjoni tal-prinċipju ta’ opportunitajiet indaqs u ta’ trattament ugwali tal-irġiel u n-nisa fi kwistjonijiet ta’ impjiegi u xogħol (ĠU L 204, 26.7.2006, p. 23).

(70)    Id-Direttiva 2010/41/UE tal-Parlament Ewropew u tal-Kunsill tas-7 ta’ Lulju 2010 dwar l-applikazzjoni tal-prinċipju ta’ trattament ugwali bejn l-irġiel u n-nisa li jeżerċitaw attività li fiha jaħdmu għal rashom u li tħassar id-Direttiva tal-Kunsill 86/613/KEE (ĠU L 180, 15.7.2010, p. 1).

(71)    Ara l-analiżi dettaljata f’SWD(2021) 63 final “Il-Korpi tal-ugwaljanza u l-implimentazzjoni tar-Rakkomandazzjoni tal-Kummissjoni dwar l-istandards għall-korpi tal-ugwaljanza”.

(72)    Ir-Rakkomandazzjoni tal-Kummissjoni (UE) 2018/951 tat-22 ta’ Ġunju 2018 dwar standards għall-korpi għall-ugwaljanza (ĠU L 167, 4.7.2018, p. 28).

(73)    Rakkomandazzjoni ta’ Politika Ġenerali Nru 2 tal-ECRI riveduta dwar il-Korpi tal-Ugwaljanza biex jiġu miġġielda r-razziżmu u l-intolleranza fil-livell nazzjonali - adottata fit-13 ta’ Ġunju 1997 u riveduta fis-7 ta’ Diċembru 2017.

(74)    Prinċipji relatati mal-Istatus tal-Istituzzjonijiet Nazzjonali adottati mir-Riżoluzzjoni tal-Assemblea Ġenerali 48/134 tal-20 ta’ Diċembru 1993.

(75)    [Referenza]

(76)    Id-Direttiva (UE) 2019/1937 tal-Parlament Ewropew u tal-Kunsill tat-23 ta’ Ottubru 2019 dwar il-protezzjoni ta’ persuni li jirrapportaw dwar ksur tal-liġi tal-Unjoni (ĠU L 305, 26.11.2019, p. 17).

(77)    Sentenza tal-10 ta’ Lulju 2008 f’Feryn (C-54/07, ECLI:EU:C:2008:397).

(78)    L-istħarriġ EU-MIDIS II tal-FRA. 

(79)    ĠU L 23, 27.1.2010, p. 37.

(80)    Ara d-Direttiva (UE) 2016/2102 tal-Parlament Ewropew u tal-Kunsill tas-26 ta’ Ottubru 2016 dwar l-aċċessibbiltà tas-siti elettroniċi u tal-applikazzjonijiet mobbli tal-korpi tas-settur pubbliku (ĠU L 327, 2.12.2016 p. 1-15) u d-Deċiżjoni ta’ Implimentazzjoni relatata.

(81)    Ir-rapport tal-Kummissjoni lill-Parlament Ewropew u lill-Kunsill dwar l-applikazzjoni tad-Direttiva tal-Kunsill 2000/43/KE li timplimenta l-prinċipju tat-trattament ugwali bejn il-persuni irrespettivament mill-oriġini tar-razza jew l-etniċità (“id-Direttiva dwar l-Ugwaljanza Razzjali”) u tad-Direttiva tal-Kunsill 2000/78/KE li tistabbilixxi qafas ġenerali għall-ugwaljanza fit-trattament fl-impjieg u fix-xogħol (“id-Direttiva dwar l-Ugwaljanza fl-Impjiegi”) SWD(2021) 63 final.