IL-KUMMISSJONI EWROPEA

Brussell, 28.9.2022

COM(2022) 489 final

2022/0298(COD)

Proposta għal

DIRETTIVA TAL-PARLAMENT EWROPEW U TAL-KUNSILL

li temenda d-Direttiva 2009/148/KE dwar il-protezzjoni tal-ħaddiema mir-riskji konnessi mal-espożizzjoni għall-asbestos fuq ix-xogħol

{SEC(2022) 342 final} - {SWD(2022) 310 final} - {SWD(2022) 311 final} - {SWD(2022) 312 final}

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u objettivi tal-proposta

Wieħed mill-objettivi tal-Unjoni Ewropea (UE) huwa li tippromwovi l-benesseri u l-iżvilupp sostenibbli, fuq il-bażi ta’ ekonomija tas-suq soċjali kompetittiva ħafna, bl-għan li jinkisbu okkupazzjoni sħiħa u progress soċjali 1 . Id-dritt ta’ kull ħaddiem għal kundizzjonijiet tax-xogħol li jirrispettaw is-saħħa, is-sikurezza u d-dinjità tiegħu huwa stabbilit fl-Artikolu 31 tal-Karta tad-Drittijiet Fundamentali tal-Unjoni Ewropea. Il-prinċipju numru 10 tal-Pilastru Ewropew tad-Drittijiet Soċjali 2 jiddikjara li l-ħaddiema għandhom id-dritt għal livell għoli ta’ protezzjoni tas-saħħa u tas-sikurezza tagħhom fuq il-post tax-xogħol.

Fil-linji gwida politiċi tagħha, il-President von der Leyen ħadet impenn li tippreżenta pjan Ewropew għall-ġlieda kontra l-kanċer, sabiex jappoġġa lill-Istati Membri fit-titjib tal-kontroll u tal-kura tal-kanċer 3 . Din il-proposta twettaq l-impenn li sar fil-Pjan tal-Ewropa biex Jingħeleb il-Kanċer 4 , fil-Pjan ta’ Azzjoni tal-Pilastru Ewropew tad-Drittijiet Soċjali u fil-qafas strateġiku tal-UE dwar is-saħħa u s-sikurezza fuq il-post tax-xogħol għall-2021-2027 5 sabiex ikompli jitnaqqas l-esponiment tal-ħaddiema għall-asbestos, li huwa sustanza karċinoġenika perikoluża ħafna. Din il-proposta, enfasizzata bħala waħda mill-prijoritajiet taħt l-azzjoni 3 - Ekonomija aktar b’saħħitha, ġustizzja soċjali u impjiegi - tal- Konferenza dwar il-Futur tal-Ewropa (CoFE) hija riżultat ewlieni tal-programm ta’ ħidma tal-Kummissjoni tal-2022 6

Il-protezzjoni tal-ħaddiema kontra l-esponiment għall-asbestos hija wkoll prijorità ewlenija għall-Parlament Ewropew. Fir-riżoluzzjoni tiegħu ta’ Ottubru 2021 7 , il-Parlament Ewropew stabbilixxa approċċ komprensiv sabiex jiġu indirizzati l-problemi dejjiema relatati mal-asbestos. Bi tweġiba għal dan, il-Kummissjoni adottat il-Komunikazzjoni dwar il-ħidma lejn futur mingħajr asbestos: approċċ Ewropew sabiex jiġu indirizzati r-riskji għas-saħħa minħabba l-asbestos 8 . Tindirizza r-riskju għas-saħħa pubblika li jirriżulta mill-asbestos b’mod olistiku, u tippreżenta miżuri fil-livell tal-UE sabiex jiġi indirizzat l-asbestos matul iċ-ċiklu tal-ħajja tiegħu.

Il-kanċer okkupazzjonali huwa l-kawża predominanti tal-imwiet relatati max-xogħol fl-UE 9 . Huwa kkawżat primarjament mill-esponiment għal sustanzi karċinoġeniċi bħall-asbestos. Sa 78 % tal-kanċers okkupazzjonali rikonoxxuti fl-Istati Membri huma relatati mal-asbestos 10 . Meta jittieħdu man-nifs, il-fibri tal-asbestos fl-ajru jistgħu jwasslu, pereżempju, għal mesoteljoma 11 u għal kanċer tal-pulmun, b’intervall medju ta’ 30 sena bejn l-esponiment u l-ewwel sinjali ta’ mard. Għalhekk, il-kanċers jistgħu jiżviluppaw għexieren ta’ snin wara l-esponiment fuq ix-xogħol, inkluż meta l-ħaddiema jkunu rtiraw mix-xogħol. Dan jagħmilha diffiċli li jiġu traċċati l-esponimenti tal-passat u li tiġi identifikata rabta kawżali bejn l-esponiment relatat max-xogħol u l-kanċers. Għal din ir-raġuni, in-numru ta’ persuni affettwati minn mard okkupazzjonali relatat mal-asbestos jista’ jiġi ssottovalutat.

Il-projbizzjoni progressiva fuq l-użu tal-asbestos fl-UE bdiet fl-1988 bil-projbizzjoni tal-kroċidolit (imsejjaħ ukoll asbestos blu) 12 u sussegwentement ġiet estiża sabiex tkopri materjali oħrajn li fihom l-asbestos. Mill-2005, il-forom kollha tal-asbestos huma pprojbiti fl-UE 13 .

L-ewwel azzjoni tal-UE mmirata lejn il-protezzjoni tal-ħaddiema mir-riskji speċifiċi tal-esponiment fuq il-post tax-xogħol għall-asbestos tmur lura għall-1983, meta ġiet adottata d-Direttiva tal-Kunsill 83/477/KEE 14 . Din id-Direttiva ġiet emendata sostanzjalment diversi drabi sal-aktar verżjoni kodifikata riċenti tagħha, id-Direttiva 2009/148/KE (id-Direttiva dwar l-Asbestos fuq ix-Xogħol) 15 . Barra minn hekk, peress li l-asbestos huwa sustanza karċinoġenika, id-dispożizzjonijiet stabbiliti fid-Direttiva 2004/37/KE dwar il-protezzjoni tal-ħaddiema mir-riskji relatati mal-espożizzjoni għal karċinoġeni, mutaġeni jew sustanzi tossiċi għar-riproduzzjoni fuq il-post tax-xogħol 16 (id-Direttiva dwar il-Karċinoġeni, il-Mutaġeni u s-Sustanzi Tossiċi għar-Riproduzzjoni (CMRD)) japplikaw kull meta dawn ikunu aktar favorevoli għas-saħħa u għas-sikurezza tal-ħaddiema. Dan jinkludi rekwiżit dwar il-minimizzazzjoni tal-esponiment peress li għadu ma kienx possibbli li jiġi identifikat limitu ta’ esponiment li taħtu l-esponiment għall-asbestos ma jinvolvix riskju ta’ kanċer. Għalhekk, u f’konformità mas-CMRD, l-impjegaturi għandhom jiżguraw li r-riskju relatat mal-esponiment tal-ħaddiema għall-asbestos fuq il-post tax-xogħol jitnaqqas għal minimu u fi kwalunkwe każ sa livell baxx kemm jista’ jkun teknikament possibbli.

Id-Direttiva dwar l-Asbestos fuq ix-Xogħol tipproteġi lill-ħaddiema kontra r-riskji għas-saħħa tagħhom li jinħolqu jew li x’aktarx jirriżultaw mill-esponiment għall-asbestos fuq il-post tax-xogħol, inkluż billi tipprevjeni riskji bħal dawn. Skont id-Direttiva dwar l-Asbestos fuq ix-Xogħol, għall-attivitajiet kollha li fihom il-ħaddiema huma jew jistgħu jkunu esposti għal trab mill-asbestos jew għal materjali li fihom l-asbestos, l-esponiment irid jitnaqqas għal minimu u fi kwalunkwe każ taħt il-limitu fiss vinkolanti ta’ esponiment fuq ix-xogħol ta’ 0,1 fibri/cm3 bħala medja ponderata skont il-ħin ta’ 8 sigħat (TWA). Dan jinkludi sitwazzjonijiet li fihom il-ħaddiema jerġgħu jidħlu fil-post tax-xogħol wara li jwettqu attivitajiet bħal demolizzjoni, xogħol ta’ tneħħija tal-asbestos, tiswija u manutenzjoni li fir-rigward tagħhom ikun prevedibbli li l-valur ta’ limitu stabbilit se jinqabeż minkejja l-użu ta’ miżuri preventivi tekniċi sabiex jiġu limitati l-konċentrazzjonijiet tal-asbestos fl-arja. Jekk il-valur ta’ limitu jinqabeż, iridu jiġu identifikati r-raġunijiet u l-impjegatur jeħtieġlu jieħu miżuri xierqa ta’ ġestjoni tar-riskju (RMMS) sabiex jirrimedja s-sitwazzjoni qabel ma jerġa’ jibda x-xogħol. Huwa speċifikat ukoll li jekk il-limitu ta’ esponiment fuq ix-xogħol ma jkunx jista’ jiġi osservat b’mezzi oħrajn, l-impjegaturi jeħtiġilhom jipprovdu lill-ħaddiema b’tagħmir respiratorju u b’tagħmir ta’ sikurezza personali xieraq ieħor. Barra minn hekk, obbligi stretti f’termini ta’ protezzjoni, ta’ ppjanar u ta’ taħriġ diġà japplikaw għall-impjegaturi.

Filwaqt li l-estrazzjoni, il-manifattura u l-proċessar tal-asbestos huma pprojbiti, teżisti problema ta’ legat sostanzjali fl-UE, li tirrappreżenta sfida għas-saħħa pubblika u okkupazzjonali, peress li l-asbestos għadu preżenti f’ħafna bini antik, li x’aktarx jiġi rrinnovat, adattat jew jitwaqqa’ fis-snin li ġejjin. L-istrateġija tal-mewġa ta’ rinnovazzjoni 17  taħt il-Patt Ekoloġiku Ewropew, b’mod partikolari għandha l-għan li taċċellera l-pass tar-rinnovazzjonijiet tal-bini fl-UE kollha. Peress li r-riskju ta’ esponiment għall-asbestos iseħħ l-aktar matul ix-xogħlijiet ta’ rinnovazzjoni, ta’ manutenzjoni u ta’ demolizzjoni, huwa importanti li jissaħħu l-miżuri preventivi sabiex jiġi limitat aktar l-esponiment tal-ħaddiema għall-asbestos.

Huwa stmat li bħalissa 4,1 sa 7,3 miljun ħaddiem huma esposti għall-asbestos 18 . Ir-riskju ta’ dan l-esponiment huwa relatat l-aktar mat-trattament ta’ materjali li fihom l-asbestos u mat-tixrid ta’ fibri tal-asbestos matul ix-xogħlijiet ta’ kostruzzjoni, bħal matul ir-rinnovazzjoni, il-manutenzjoni, it-tiswija u d-demolizzjoni. Mill-ħaddiema kollha esposti għall-asbestos, 97 % jaħdmu fis-settur tal-kostruzzjoni, inklużi okkupazzjonijiet relatati bħall-bini ta’ soqfa, il-plumbing, ix-xogħol ta’ mastrudaxxa jew it-twittija tal-art. L-esponiment għall-asbestos huwa preżenti wkoll f’setturi ekonomiċi oħrajn, eż. l-immaniġġar tal-iskart (2 % tal-ħaddiema esposti kollha), l-estrazzjoni u x-xogħol fil-barrieri, it-tifi tan-nar, l-iskavar u l-manutenzjoni tal-mini, u t-teħid ta’ kampjuni u l-analiżi tal-asbestos. Hemm ukoll riskju ta’ esponiment meta jissewwew jew jiġu żarmati bastimenti, pjattaformi tat-tħaffir, u mezzi tat-trasport bħall-ferroviji u l-inġenji tal-ajru b’iżolament tal-asbestos.

Sabiex jiġi żgurat li l-miżuri għall-protezzjoni tal-ħaddiema minn esponiment għall-asbestos ikunu effettivi kemm jista’ jkun, id-Direttiva dwar l-Asbestos fuq ix-Xogħol teħtieġ li tinżamm aġġornata b’għarfien xjentifiku ġdid żviluppat mill-aħħar reviżjoni sostanzjali tagħha.

Il-limitu attwali ta’ esponiment fuq ix-xogħol ta’ 0,1 fibri/cm3 fid-Direttiva dwar l-Asbestos fuq ix-Xogħol ġie stabbilit fl-2003 fuq il-bażi tal-għarfien xjentifiku u teknoloġiku disponibbli dak iż-żmien. Id-Direttiva dwar l-Asbestos fuq ix-Xogħol tinkludi kundizzjonijiet minimi li għandhom jiġu eżaminati mill-ġdid fuq il-bażi tal-esperjenza miksuba u tal-iżviluppi fit-teknoloġija f’dan il-qasam. Wara l-aħħar żviluppi xjentifiċi u teknoloġiċi, hemm lok sabiex tittejjeb il-protezzjoni tal-ħaddiema esposti għall-asbestos u b’hekk tkompli titnaqqas il-probabbiltà li l-ħaddiema jaqbadhom mard relatat mal-asbestos. Barra minn hekk, erba’ Stati Membri diġà introduċew limiti ta’ esponiment fuq ix-xogħol aktar stretti fil-leġiżlazzjoni nazzjonali tagħhom 19 .

L-emenda proposta tad-Direttiva dwar l-Asbestos fuq ix-Xogħol se tagħmel il-limitu ta’ esponiment fuq ix-xogħol skont id-Direttiva aktar effettiv billi taġġornah fuq il-bażi tal-aħħar evidenza xjentifika disponibbli. L-emenda proposta hija appoġġata mill-aħħar evalwazzjoni fil-fond tad-Direttiva dwar l-Asbestos fuq ix-Xogħol (evalwazzjoni ex post tal-2017 tad-Direttivi tal-UE dwar is-saħħa u sikurezza okkupazzjonali (OSH) 20 ) u mill-aktar valutazzjoni riċenti tal-implimentazzjoni tad-Direttivi tal-UE dwar is-saħħa u sikurezza okkupazzjonali, li tkopri l-perjodu mill-2013 sal-2017. L-aħħar evalwazzjoni fil-fond tad-Direttiva dwar l-Asbestos fuq ix-Xogħol ikkonkludiet li d-Direttiva dwar l-Asbestos fuq ix-Xogħol għadha rilevanti ħafna u li, sabiex tiżdied l-effettività tagħha fid-dawl tal-progress xjentifiku, għandu jiġi kkunsidrat it-tnaqqis tal-limitu ta’ esponiment fuq ix-xogħol stabbilit fid-Direttiva dwar l-Asbestos fuq ix-Xogħol.

Il-Kummissjoni talbet lill-Kumitat għall-Istima tar-Riskji (RAC) tal-Aġenzija Ewropea għas-Sustanzi Kimiċi (ECHA) jivvaluta r-rilevanza xjentifika tal-limitu attwali ta’ esponiment fuq ix-xogħol għall-asbestos, sabiex jinforma t-tħejjija tal-proposta sabiex tiġi emendata d-Direttiva dwar l-Asbestos fuq ix-Xogħol. L-opinjoni xjentifika tal-RAC ġiet adottata f’Ġunju 2021 21 . Hija kkonfermat li l-asbestos ma għandux livell ta’ esponiment sikur, li jfisser li kwalunkwe esponiment għall-asbestos jista’ eventwalment iwassal għal mard. Għalhekk, ġiet derivata relazzjoni bejn il-livelli ta’ esponiment u r-riskju assoċjat (relazzjoni bejn l-esponiment u r-riskju, ERR), li tesprimi r-riskju eċċessiv ta’ kanċer tal-pulmun u ta’ mortalità mill-mesoteljoma (ikkombinati) bħala funzjoni tal-konċentrazzjoni ta’ fibri fl-arja. Barra minn hekk, il-Kumitat ta’ Konsulenza dwar is-Sigurtà u s-Saħħa fuq il-Post tax-Xogħol (Advisory Committee on Safety and Health at Work, ACSH) qabel b’mod unanimu dwar il-ħtieġa li jitnaqqas il-limitu attwali ta’ esponiment fuq ix-xogħol.

It-tnaqqis tal-esponiment għall-asbestos fuq il-post tax-xogħol billi jitnaqqas il-limitu ta’ esponiment fuq ix-xogħol fl-UE kollha jgħin b’mod effettiv sabiex jiġu evitati każijiet u mwiet minħabba l-kanċer. Konsegwentement, itejjeb il-protezzjoni tal-ħaddiema billi żżid it-tul, il-kwalità u l-produttività tal-ħajja tax-xogħol tal-ħaddiema tal-UE u jiżgura livell minimu simili ta’ protezzjoni fl-UE kollha. Joħloq ukoll kundizzjonijiet ekwi għan-negozji, peress li jipprevjeni lill-kumpaniji li ma jiħdux miżuri xierqa milli jiksbu vantaġġ kompetittiv fuq dawk li jieħdu.

Jekk ma tittieħed l-ebda azzjoni u minħabba l-perjodu ta’ latenza tal-konsegwenzi ta’ prevenzjoni ineffettiva (jiġifieri l-effetti fuq is-saħħa), in-negozji huma mistennijin iġarrbu kostijiet ogħla fil-futur u jbatu minn produttività mnaqqsa minħabba assenteiżmu u telf ta’ għarfien espert. Għall-Istati Membri, dan ikun iwassal għal żieda fil-kostijiet tas-sigurtà soċjali (eż. minħabba kostijiet ogħla għat-trattament mediku u benefiċċji tal-inkapaċità) u dħul mit-taxxa mitluf.

Ir-reviżjoni tal-limitu ta’ esponiment fuq ix-xogħol skont id-Direttiva dwar l-Asbestos fuq ix-Xogħol twassal għal armonizzazzjoni akbar tal-valuri ta’ limitu fl-UE, li hija mistennija twassal għal kundizzjonijiet ekwi għan-negozji. Il-kumpaniji li lesti joperaw f’diversi Stati Membri se jibbenefikaw ukoll minn valuri ta’ limitu applikabbli ssimplifikati. Dan jista’ jirriżulta fi ffrankar, peress li jistgħu jiġu adottati soluzzjonijiet komuni fil-faċilitajiet kollha, għall-kuntrarju tal-ħtieġa li jiġu ddisinjati soluzzjonijiet speċifiċi għas-sit sabiex jiġu ssodisfati diversi rekwiżiti tal-limitu ta’ esponiment fuq ix-xogħol.

L-azzjoni fil-livell tal-UE se toħloq ukoll kundizzjonijiet aktar ġusti għall-ħaddiema stazzjonati, transfruntiera u mobbli esposti għall-asbestos fis-settur tal-kostruzzjoni (li għandu numru sinifikanti ta’ ħaddiema stazzjonati li jiċċaqilqu minn sit għal ieħor, spiss f’diversi Stati Membri) kif ukoll distribuzzjoni aktar ġusta tal-kostijiet tal-kura tas-saħħa fl-Istati Membri.

•Konsistenza mad-dispożizzjonijiet eżistenti fil-qasam ta’ politika

Din l-inizjattiva hija allinjata mal-Pilastru Ewropew tad-Drittijiet Soċjali, b’mod partikolari mal-prinċipju 10 tiegħu dwar id-dritt għal ambjent tax-xogħol f’saħħtu, sikur u adattat sew, u mal-pjan ta’ azzjoni tiegħu. Ir-reviżjoni tal-limitu ta’ esponiment fuq ix-xogħol għall-asbestos tgħin sabiex jinkiseb livell għoli ta’ protezzjoni tas-saħħa u tas-sikurezza tal-ħaddiema.

•Konsistenza ma’ politiki oħra tal-Unjoni

Ir-Regolament REACH 23 (fis-seħħ mill-2007) ħoloq, fost l-oħrajn, żewġ approċċi regolatorji distinti tal-UE: restrizzjonijiet u awtorizzazzjonijiet.

Mill-1988, ġew ipprojbiti t-tqegħid fis-suq u l-użu ta’ kroċidolit u ta’ prodotti li fihom dan. It-tqegħid fis-suq ta’ prodotti li fihom forom oħrjn ta’ asbestos ġie ristrett. Dawk id-dispożizzjonijiet ġew emendati diversi drabi qabel il-projbizzjoni finali fuq il-manifattura, fuq it-tqegħid fis-suq, u fuq l-użu tal-forom kollha ta’ asbestos, u ta’ oġġetti u ta’ taħlitiet li fihom dawn u li jiżdiedu magħhom intenzjonalment 24 li ġiet introdotta fl-2005.

Flimkien, id-Direttiva dwar l-Asbestos fuq ix-Xogħol u r-Regolament REACH huma rilevanti għall-protezzjoni tal-ħaddiema mir-riskji ta’ esponiment għall-asbestos.

Id-Direttiva dwar l-Asbestos fuq ix-Xogħol u r-Regolament REACH huma komplementari legalment. Id-Direttiva Qafas dwar is-sigurtà u s-saħħa tal-ħaddiema fuq ix-xogħol 25 tistabbilixxi l-prinċipji ewlenin tal-prevenzjoni tar-riskji okkupazzjonali u tal-protezzjoni tas-sikurezza u tas-saħħa. Tapplika għas-setturi kollha tal-attivitajiet u ma għandha l-ebda effett fuq ir-regoli nazzjonali u tal-UE attwali jew futuri li jiżguraw livell ogħla ta’ protezzjoni tas-saħħa u tas-sikurezza tal-ħaddiema fuq il-post tax-xogħol. Ġiet adottata serje ta’ Direttivi individwali fil-qasam tas-sigurtà u s-saħħa tal-ħaddiema fuq ix-xogħol fuq il-bażi tal-Artikolu 16 tad-Direttiva Qafas dwar l-OSH (inkluża d-Direttiva dwar l-Asbestos fuq ix-Xogħol). Min-naħa tiegħu, ir-Regolament REACH jiddikjara li japplika mingħajr preġudizzju għal-leġiżlazzjoni dwar il-protezzjoni tal-ħaddiema, inkluża d-Direttiva dwar l-Asbestos fuq ix-Xogħol.

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

•Sussidjarjetà (għall-kompetenza mhux esklużiva)

L-aġġornament tad-Direttiva dwar l-Asbestos fuq ix-Xogħol huwa mod effettiv sabiex jiġi żgurat li l-miżuri preventivi jiġu aġġornati kif xieraq fl-Istati Membri kollha. Jgħin sabiex jinkiseb livell uniformi ta’ rekwiżiti minimi mfasslin sabiex jiggarantixxu standard aħjar tas-saħħa u tas-sikurezza, u b’hekk jitnaqqsu d-differenzi fil-protezzjoni tas-saħħa u tas-sikurezza tal-ħaddiema bejn l-Istati Membri u fis-suq uniku tal-UE.

•Proporzjonalità

L-emenda proposta tad-Direttiva dwar l-Asbestos fuq ix-Xogħol hija ffokata fuq: (i) ir-reviżjoni tal-limitu ta’ esponiment fuq ix-xogħol għall-asbestos billi jiġi emendat l-Artikolu 8 tad-Direttiva dwar l-Asbestos fuq ix-Xogħol fuq il-bażi tad-data xjentifika u teknoloġika disponibbli, kif previst fil-premessa 3 tad-Direttiva dwar l-Asbestos fuq ix-Xogħol; (ii) l-indirizzar ta’ xi aspetti direttament marbutin mat-tnaqqis tal-limitu attwali ta’ esponiment fuq ix-xogħol (bħat-tekniki ta’ kejl); u (iii) l-għoti ta’ kjarifiki tekniċi tat-test tad-Direttiva.

Fir-rigward tal-valuri ta’ limitu proposti, tqiesu l-fatturi soċjoekonomiċi ta’ fattibbiltà wara diskussjonijiet intensivi mal-partijiet ikkonċernati kollha (ir-rappreżentanti tal-organizzazzjonijiet tal-ħaddiema, ir-rappreżentanti tal-organizzazzjonijiet tal-impjegaturi u r-rappreżentanti tal-gvernijiet). Din l-inizjattiva għandha l-għan li tiżgura approċċ bilanċjat, jiġifieri li tipprevjeni lill-kumpaniji milli jiffaċċjaw żvantaġġi ekonomiċi severi filwaqt li tipprovdi protezzjoni xierqa lill-ħaddiema fil-livell tal-UE. L-inizjattiva hija meqjusa bilanċjata u ġustifikata fid-dawl tal-benefiċċji miksubin u fit-tul f’termini tat-tnaqqis tar-riskji għas-saħħa li jirriżultaw mill-esponiment tal-ħaddiema għall-asbestos u mis-salvataġġ tal-ħajjiet, mingħajr ma tpoġġi piż sproporzjonat fuq in-negozji fis-setturi kkonċernati, inkluż fuq l-intrapriżi mikro, żgħar u ta’ daqs medju.

F’konformità mal-Artikolu 153(4) tat-TFUE, din il-proposta tistabbilixxi rekwiżiti minimi u ma tipprevjeni lill-ebda Stat Membru milli jżomm jew jintroduċi miżuri protettivi aktar stretti kompatibbli mat-Trattati, pereżempju, fil-forma ta’ valuri ta’ limitu aktar baxxi jew ta’ dispożizzjonijiet oħrajn li jiżguraw protezzjoni akbar għall-ħaddiema.

Minn dan isegwi li b’mod konformi mal-prinċipju tal-proporzjonalità, kif stabbilit fl-Artikolu 5(4) tat-TUE, din il-proposta ma tmurx lil hinn minn dak li huwa neċessarju sabiex tilħaq l-objettivi tagħha. Informazzjoni dettaljata dwar il-konformità mal-prinċipju tal-proporzjonalità hija pprovduta fil-valutazzjoni tal-impatt li takkumpanja din il-proposta (il-punt 8.2).

•Għażla tal-istrument

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Evalwazzjonijiet ex post/kontrolli tal-idoneità tal-leġiżlazzjoni eżistenti

L-aktar evalwazzjoni fil-fond riċenti tad-Direttiva dwar l-Asbestos fuq ix-Xogħol (evalwazzjoni ex post tal-2017 tad-Direttivi tal-UE dwar is-saħħa u s-sikurezza okkupazzjonali 31 ) ikkonkludiet li skont l-evidenza disponibbli, d-Direttiva dwar l-Asbestos fuq ix-Xogħol għadha rilevanti ħafna u effettiva. Fl-istess ħin, l-istudju li jappoġġa din l-evalwazzjoni kkonkluda li, sabiex jiżdiedu r-rilevanza u l-effettività tad-Direttiva dwar l-Asbestos fuq ix-Xogħol, għandu jiġi kkunsidrat it-tnaqqis tal-limitu ta’ esponiment fuq ix-xogħol għall-asbestos. L-istudju ssuġġerixxa wkoll li din il-kwistjoni kienet teħtieġ analiżi aktar fil-fond. Din il-proposta tindirizza dawk is-sejbiet u hija bbażata fuq analiżi bir-reqqa tal-kwistjonijiet identifikati.

•Konsultazzjonijiet mal-partijiet ikkonċernati

Il-konsultazzjoni f’żewġ stadji tas-sħab soċjali Ewropej f’konformità mal-Artikolu 154 tat-TFUE

Fl-2020 u fl-2021, il-Kummissjoni wettqet konsultazzjoni f’żewġ stadji mas-sħab soċjali fil-livell tal-UE skont l-Artikolu 154(2) tat-TFUE. L-ewwel fażi tal-konsultazzjoni tas-sħab soċjali ntemmet fil-11 ta’ Frar 2021 u kkonfermat l-appoġġ ġenerali tas-sħab soċjali għar-reviżjoni tal-limitu attwali ta’ esponiment fuq ix-xogħol għall-asbestos. It-tieni fażi tal-konsultazzjoni, li ffokat fuq il-kontenut previst tal-proposta possibbli, intemmet fit-30 ta’ Settembru 2021.

Din il-konsultazzjoni ppermettiet lill-Kummissjoni tiġbor l-opinjonijiet tas-sħab soċjali tal-UE dwar id-direzzjoni u l-kontenut possibbli tal-azzjoni tal-UE dwar ir-reviżjoni tal-limitu vinkolanti ta’ esponiment fuq ix-xogħol għall-asbestos.

Ir-riżultati tal-ewwel fażi tal-konsultazzjoni kkonfermaw l-appoġġ ġenerali tas-sħab soċjali għal approċċ fil-livell tal-UE għal-limiti ta’ esponiment fuq ix-xogħol għal sustanzi kimiċi perikolużi għall-ħaddiema fl-UE.

Iż-żewġ organizzazzjonijiet tal-ħaddiema li wieġbu għall-konsultazzjoni 32 għarfu l-importanza tar-reviżjoni tal-limitu attwali ta’ esponiment fuq ix-xogħol għall-asbestos u talbu kamp ta’ applikazzjoni usa’ għall-azzjoni skont id-Direttiva dwar l-Asbestos fuq ix-Xogħol. Fost affarijiet oħrajn, huma ssuġġerew: (i) it-twessigħ tal-kamp ta’ applikazzjoni tad-Direttiva dwar l-Asbestos fuq ix-Xogħol sabiex tinkludi lista aġġornata tal-forom magħrufin kollha ta’ fibri b’effetti dannużi simili fuq is-saħħa tal-bniedem; (ii) it-tħassir tal-kunċetti ta’ esponiment sporadiku u ta’ esponiment b’intensità baxxa, u ta’ materjali li fihom l-asbestos li jitfarrku u li ma jitfarrkux; u (iii) il-projbizzjoni tal-inkapsulament u tal-issiġillar tal-asbestos. Għamlu wkoll suġġerimenti dwar aspetti tekniċi 33 , li l-biċċa l-kbira tagħhom huma diġà koperti mit-termini ġenerali tad-Direttiva dwar l-Asbestos fuq ix-Xogħol, filwaqt li oħrajn imorru lil hinn mill-kamp ta’ applikazzjoni tagħha. Is-suġġerimenti tagħhom jirriflettu l-proposti tar-riżoluzzjoni tal-Parlament Ewropew 34 . Xi suġġerimenti jmorru lil hinn mill-kamp ta’ applikazzjoni tal-qasam ta’ politika tas-saħħa u s-sikurezza okkupazzjonali, bħall-iskrinjar obbligatorju tal-bini jew il-ħolqien ta’ reġistri nazzjonali tal-asbestos. Suġġerimenti oħrajn imorru lil hinn mill-kompetenzi tal-UE, bħal proposta leġiżlattiva għar-rikonoxximent tal-mard okkupazzjonali, bi standards minimi għall-proċeduri ta’ rikonoxximent, u għall-kumpens tal-vittmi.

It-tliet organizzazzjonijiet tal-impjegaturi li wieġbu għall-konsultazzjoni 35 appoġġaw l-objettiv li l-ħaddiema jiġu protetti b’mod effettiv mill-esponiment għal sustanzi kimiċi perikolużi, inkluż billi jiġu stabbiliti limiti ta’ esponiment fuq ix-xogħol fil-livell tal-UE, fejn xieraq. Huma qiesu li dan huwa fl-interess tal-ħaddiema u tan-negozji u jgħin sabiex jinkisbu l-kundizzjonijiet ekwi għan-negozji. Madankollu, huma qajmu wkoll xi tħassib dwar l-approċċ meħud sabiex jiġu stabbiliti valuri bħal dawn. Żewġ organizzazzjonijiet tal-impjegaturi 36 enfasizzaw li kwalunkwe reviżjoni ta’ limitu ta’ esponiment fuq ix-xogħol trid tkun ibbażata fuq evidenza xjentifika soda u fuq valutazzjoni bir-reqqa tal-fattibbiltà teknika u ekonomika u tal-impatt soċjoekonomiku, li għalihom ir-rwol tal-Kumitat ta’ Konsulenza dwar is-Sigurtà u s-Saħħa fuq il-Post tax-Xogħol huwa kruċjali.

Fit-tieni fażi tal-konsultazzjoni, żewġ organizzazzjonijiet tal-ħaddiema li wieġbu għall-konsultazzjoni 37 rrikonoxxew l-importanza li tkompli tittejjeb il-protezzjoni tal-ħaddiema minn esponiment għall-asbestos, u appoġġaw ir-reviżjoni tal-limitu ta’ esponiment fuq ix-xogħol fid-Direttiva dwar l-Asbestos fuq ix-Xogħol. Iż-żewġ organizzazzjonijiet tal-ħaddiema tennew il-pożizzjoni tagħhom mill-ewwel stadju tal-konsultazzjoni, u talbu l-istess miżuri kif proposti fir-riżoluzzjoni tal-Parlament Ewropew.

Tlieta mill-erba’ organizzazzjonijiet tal-impjegaturi li wieġbu kemm għall-ewwel kif ukoll għat-tieni fażi tal-konsultazzjoni 38 tennew id-dikjarazzjonijiet preċedenti tagħhom. L-Assoċjazzjoni tat-Tagħmir tat-Tarzna u Marittimu tal-Ewropa, li wieġbet biss għat-tieni fażi tal-konsultazzjoni, irreferiet għall-inkapsulament bħala l-aħjar u l-aktar metodu sikur sabiex jiġi indirizzat l-asbestos fl-industrija marittima.

Konsultazzjoni mal-Kumitat ta’ Konsulenza dwar is-Sigurtà u s-Saħħa fuq il-Post tax-Xogħol

Il-Kumitat tripartitiku ta’ Konsulenza dwar is-Sigurtà u s-Saħħa fuq il-Post tax-Xogħol huwa magħmul minn rappreżentanti tal-gvernijiet nazzjonali u tal-organizzazzjonijiet tal-ħaddiema u tal-impjegaturi. Ġie kkonsultat dwar din il-proposta permezz tal-Grupp ta’ Ħidma dedikat tiegħu dwar is-Sustanzi Kimiċi, f’konformità mal-mandat tal-Kumitat ta’ Konsulenza dwar is-Sigurtà u s-Saħħa fuq il-Post tax-Xogħol. F’dan il-mandat, il-Kummissjoni titlob lill-Grupp ta’ Ħidma dwar is-Sustanzi Kimiċi sabiex jipparteċipa b’mod attiv fir-rakkomandazzjoni ta’ prijoritajiet għal evalwazzjonijiet xjentifiċi ġodda jew riveduti. L-opinjoni tal-Grupp ta’ Ħidma dwar is-Sustanzi Kimiċi tqis il-kontribut xjentifiku tal-RAC, u l-fatturi soċjoekonomiċi u ta’ fattibbiltà.

Fl-24 ta’ Novembru 2021, il-Kumitat ta’ Konsulenza dwar is-Sigurtà u s-Saħħa fuq il-Post tax-Xogħol adotta opinjoni 39 dwar limitu vinkolanti tal-UE ta’ esponiment fuq ix-xogħol skont d-Direttiva dwar l-Asbestos fuq ix-Xogħol. F’din l-opinjoni ntlaħaq ftehim ta’ kunsens dwar il-ħtieġa li jitnaqqas sostanzjalment il-limitu vinkolanti attwali ta’ esponiment fuq ix-xogħol sabiex is-saħħa u s-sikurezza tal-ħaddiema jiġu protetti aħjar, filwaqt li jitqiesu l-iżviluppi xjentifiċi u tekniċi mill-adozzjoni tal-limitu ta’ esponiment fuq ix-xogħol kurrenti ta’ 0,1 fibri/cm3 fl-2003. Madankollu, ma ntlaħaq l-ebda kunsens dwar il-valur ta’ limitu li għandu jiġi propost. Il-Grupp ta’ Interess tal-Gvern (GIG) u l-Grupp ta’ Interess tal-Impjegaturi (EIG) qablu li l-valur ta’ limitu l-ġdid għandu jiġi stabbilit għal 0,01 fibri/cm3, filwaqt li l-Grupp ta’ Interess tal-Ħaddiema (WIG) enfasizza l-preferenza tiegħu għal limitu ġdid ta’ esponiment fuq ix-xogħol ugwali għal 0,001 fibri/cm3, li jikkorrispondi għall-valur ta’ limitu ppreżentat fir-riżoluzzjoni tal-Parlament Ewropew.

B’kunsiderazzjoni tal-iżviluppi tekniċi, il-Kumitat ta’ Konsulenza dwar is-Sigurtà u s-Saħħa fuq il-Post tax-Xogħol issuġġerixxa wkoll li tiġi ssostitwita l-mikroskopija ta’ kuntrast tal-fażi (PCM), bħalissa l-aktar metodoloġija użata b’mod wiesa’ għall-kejl tal-fibri tal-asbestos fuq il-post tax-xogħol fl-arja, b’metodoloġija aktar moderna u sensittiva bbażata fuq il-mikroskopija tal-elettroni (EM).

F’dan ir-rigward, il-GIG enfasizza li peress li ħafna Stati Membri għadhom jużaw il-PCM, se jkun meħtieġ perjodu tranżizzjonali sabiex il-laboratorji jkunu jistgħu jiksbu tagħmir ġdid, jitħarrġu t-tekniċi u jiġi organizzat tqabbil interlaboratorju. Il-GIG żied li, fuq il-bażi tal-esperjenza tal-Istati Membri fl-użu tal-EM, il-laboratorji se jkollhom bżonn sentejn sa tliet snin sabiex jadattaw. Il-GIG irrakkomanda li l-limitu l-ġdid ta’ esponiment fuq ix-xogħol jiġi implimentat mhux aktar tard minn 4 snin wara d-dħul fis-seħħ tad-Direttiva emendatorja, filwaqt li l-EIG issuġġerixxa skadenza itwal (4-5 snin). Il-Grupp ta’ Interess tal-Ħaddiema talab li l-limitu l-ġdid ta’ esponiment fuq ix-xogħol jiġi implimentat mill-aktar fis possibbli wara d-dħul fis-seħħ tad-Direttiva dwar l-Asbestos fuq ix-Xogħol aġġornata.

•Ġbir u użu tal-għarfien espert

L-opinjoni xjentifika tal-RAC neċessarja għar-reviżjoni tal-limitu ta’ esponiment fuq ix-xogħol tal-asbestos ġiet adottata f’Ġunju 2021 40 . Skont din, l-asbestos ma għandux livell ta’ esponiment sikur, li jfisser li kwalunkwe esponiment għall-asbestos jista’ eventwalment jikkawża mard relatat mal-asbestos. Għalhekk, ġiet idderivata ERR, li hija ppreżentata bħala r-relazzjoni bejn il-livelli ta’ esponiment u r-riskju assoċjat.

Għal din l-inizjattiva, il-Kummissjoni użat l-opinjoni tal-RAC dwar valutazzjoni tar-riskju aġġornata għall-asbestos. L-opinjoni tipproponi ERR li tesprimi r-riskju eċċessiv ta’ mortalità mill-kanċer (kanċer tal-pulmun u mesoteljoma) relatat ma’ diversi livelli ta’ esponiment. Ir-relazzjoni bejn id-diversi valuri ta’ esponiment u r-riskju li jiġi żviluppat kanċer turi r-riskju għall-ħaddiema esposti f’diversi limiti ta’ esponiment fuq ix-xogħol. Pereżempju, għal valur ta’ esponiment ekwivalenti għal-limitu attwali ta’ esponiment fuq ix-xogħol, hemm riskju li 125 minn 100 000 ħaddiem espost jistgħu jiżviluppaw kanċer tal-pulmun jew mesoteljoma.

•Valutazzjoni tal-impatt

·xenarju bażi ta’ ebda azzjoni ulterjuri tal-UE (għażla 1); u

·l-għażliet għal diversi limiti ta’ esponiment fuq ix-xogħol, filwaqt li jitqiesu l-valutazzjoni xjentifika tal-RAC 42 , l-opinjoni tal-Kumitat ta’ Konsulenza dwar is-Sigurtà u s-Saħħa fuq il-Post tax-Xogħol 43 , u l-limiti ta’ esponiment fuq ix-xogħol fis-seħħ fl-Istati Membri (l-evalwazzjoni xjentifika tipprovdi approċċ sod ibbażat fuq l-evidenza, filwaqt li l-opinjoni tal-ACSH tipprovdi informazzjoni importanti għall-implimentazzjoni b’suċċess tal-għażliet tal-limitu rivedut ta’ esponiment fuq ix-xogħol).

Fir-rigward tal-impatt fuq l-impjegaturi, din l-inizjattiva tista’ twassal għal kostijiet operatorji ogħla għall-kumpaniji, li se jkollhom jaġġustaw il-prattiki ta’ ħidma tagħhom sabiex jikkonformaw mal-limitu l-ġdid ta’ esponiment fuq ix-xogħol. Dawk il-kostijiet jikkonsistu f’kostijiet inkrementali tal-RMMs (inkluż tagħmir protettiv respiratorju), kostijiet tan-notifika u tas-sorveljanza medika, kostijiet tal-monitoraġġ u kostijiet tat-taħriġ. Il-kostijiet possibbli tal-kejl addizzjonali minħabba valur ta’ limitu aktar baxx ikunu jinvolvu piż amministrattiv addizzjonali limitat ħafna għall-kumpaniji. L-għażla magħżula tkun tinvolvi l-anqas kostijiet għall-kumpaniji.

Ftit li xejn hemm data mkejla dwar l-impatt fuq l-ambjent. Madankollu, huwa maħsub li r-rilaxx tal-asbestos huwa relattivament baxx fuq il-bażi tar-regoli attwali dwar l-iskart tal-asbestos u dwar l-attivitajiet ta’ demolizzjoni jew ta’ manutenzjoni li jinvolvu l-asbestos fil-bini 49 . Minħabba dawn il-livelli baxxi ta’ rilaxx, l-impatti ambjentali tal-asbestos huma meqjusin bħala relattivament baxxi minkejja l-persistenza u t-tossiċità tal-fibri tal-asbestos. Aktar RMMs sabiex tinżamm il-konformità ma’ limitu ta’ esponiment fuq ix-xogħol aktar strett tista’ tgħin ukoll sabiex ittejjeb b’mod marġinali l-esponiment ambjentali għall-asbestos, għalkemm huwa improbabbli li jiġu osservati differenzi sinifikanti. L-impatt ambjentali tal-asbestos jitnaqqas mil-leġiżlazzjoni attwali tal-UE dwar l-iskart, li tirregola b’mod komprensiv il-ġestjoni ambjentalment soda tal-iskart tal-asbestos ladarba jiġi ġġenerat 50 . L-iskart tal-asbestos huwa kklassifikat bħala skart perikoluż 51 . Għalhekk, skont il-leġiżlazzjoni tal-UE dwar l-iskart, japplikaw regoli speċifiċi u aktar stretti għall-ġenerazzjoni, għat-trasport u għall-immaniġġar ta’ skart bħal dan, inklużi obbligi ta’ rapportar u ta’ traċċabbiltà sabiex jiġi żgurat li l-iskart jiġi mmaniġġat b’mod li jitħares l-ambjent.

Peress li l-kumpaniji jistgħu jgħaddu kostijiet addizzjonali minn limiti ta’ esponiment fuq ix-xogħol aktar stretti lill-konsumaturi, għandhom jiġu kkunsidrati l-impatti negattivi potenzjali fuq l-objettivi ta’ rinnovazzjoni u ekoloġiċi (eż. rinnovazzjonijiet posposti u ffrankar tal-enerġija mitluf). Aktar ma jkun strett il-limitu ta’ esponiment fuq ix-xogħol, aktar ikunu kbar dawn l-impatti negattivi. Il-bini huwa responsabbli għal 36 % tal-emissjonijiet ta’ gassijiet serra relatati mal-enerġija. Minħabba li aktar minn 85 % tal-bini attwali se jkun għadu wieqaf fl-2050, ir-rinnovazzjonijiet tal‑effiċjenza enerġetika se jkunu essenzjali sabiex jintlaħqu l-objettivi tal-Patt Ekoloġiku Ewropew 52 . F’dan il-kuntest, l-istrateġija dwar il-mewġa ta’ rinnovazzjoni 53 għandha l-għan li tirdoppja r-rata annwali ta’ rinnovazzjoni tal-enerġija sal-2030. Xogħlijiet speċjalizzati ta’ rinnovazzjoni sabiex jitnaqqas il-konsum tal-enerġija jistgħu jagħtu spinta lill-valur fit-tul tal-proprjetajiet u joħolqu l-impjiegi u l-investiment, li spiss ikunu bbażati fuq ktajjen tal-provvista lokali.

Min-naħa l-oħra, il-kundizzjonijiet estremi tat-temp minħabba t-tibdil fil-klima jistgħu jżidu l-erożjoni tal-materjali tal-asbestos li għadhom preżenti (eż. pjanċi tas-soqfa u materjali esterni oħra tal-bini li fihom l-asbestos) u, b’hekk, jiżdied il-potenzjal li jiġu rrilaxxati fl-ambjent.

Fir-rigward tal-impatt fuq l-Istati Membri / l-awtoritajiet nazzjonali, l-Istati Membri li għandhom fis-seħħ limitu ta’ esponiment fuq ix-xogħol għall-asbestos fil-livell tal-valur ta’ limitu stabbilit f’din l-inizjattiva jew aktar baxx minnu se jkunu affettwati anqas mill-Istati Membri li għandhom fis-seħħ limitu ogħla ta’ esponiment fuq ix-xogħol. Il-kostijiet għall-awtoritajiet nazzjonali stmati għal madwar EUR 390 000 għal kull pajjiż u fis-sena mhumiex mistennijin ikunu sinifikanti. Dawk il-kostijiet huma relatati ma’: (i) kostijiet tat-traspożizzjoni għall-adozzjoni ta’ dispożizzjonijiet nazzjonali sabiex jiġu akkomodati l-bidliet fil-limitu ta’ esponiment fuq ix-xogħol; (ii) kostijiet għat-tibdil tal-linji gwida (inklużi miżuri rakkomandati sabiex jiġi żgurat li l-konċentrazzjonijiet tal-esponiment fuq ix-xogħol jkunu ferm anqas mil-limitu ta’ esponiment fuq ix-xogħol); u (iii) kostijiet ta’ infurzar, ta’ monitoraġġ u ta’ aġġudikazzjoni. Il-kostijiet skont il-punt (iii) ġejjin esklussivament mill-proċessar ta’ notifiki ġodda 55 , u huma stmati li jkunu f’medda ta’ bejn EUR 650 miljun u EUR 2.18 biljun fuq 40 sena jew EUR 16.25-il miljun u EUR 54.5 miljun fis-sena.

Kontribuzzjoni għall-iżvilupp sostenibbli

L-inizjattiva se tgħin sabiex jintlaħqu l-Għanijiet ta’ Żvilupp Sostenibbli (SDGs) dwar is-saħħa tajba u l-benessri ( SDG 3 ) u x-xogħol deċenti u t-tkabbir ekonomiku ( SDG 8 ). Hija mistennija wkoll ikollha impatt pożittiv fuq l-SDG dwar l-industrija, l-innovazzjoni u l-infrastruttura ( SDG 9 ) u fuq l-SDG dwar il-produzzjoni u l-konsum responsabbli ( SDG 12 ).

L-impatt fuq id-diġitalizzazzjoni

•Idoneità regolatorja u simplifikazzjoni

•Drittijiet fundamentali

4.IMPLIKAZZJONIJIET BAĠITARJI

5.ELEMENTI OĦRA

•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar

Il-ġbir ta’ data affidabbli f’dan il-qasam huwa kumpless. Għalhekk, il-Kummissjoni u l-Aġenzija Ewropea għas-Saħħa u s-Sigurtà fuq il-Post tax-Xogħol (EU-OSHA) qegħdin jaħdmu b’mod attiv sabiex itejbu l-kwalità u d-disponibbiltà tad-data, sabiex l-impatt attwali tal-inizjattiva proposta jkun jista’ jitkejjel b’mod aktar akkurat u jkunu jistgħu jiġu żviluppati indikaturi addizzjonali (eż. dwar il-mortalità kkawżata minn kanċer okkupazzjonali).

Il-proġetti li għaddejjin li jiġġeneraw data utli jinkludu l-kooperazzjoni mal-awtoritajiet nazzjonali dwar il-ġbir tad-data tal-Istatistika Ewropea dwar il-Mard Okkupazzjonali 57 u l-istħarriġ dwar l-esponiment tal-ħaddiema dwar il-fatturi ta’ riskju tal-kanċer li għandu jiġi implimentat mill-EU-OSHA 58 . Jeħtieġ li l-azzjoni leġiżlattiva tiġi segwita minn implimentazzjoni effettiva fuq il-post tax-xogħol. Il-kumpaniji jistgħu jużaw il-firxa wiesgħa ta’ għodod, ta’ informazzjoni u ta’ prattiki tajbin ipprovduti mill-EU-OSHA bħala parti mill-Kampanja Postijiet tax-Xogħol Ħielsa mill-Periklu dwar sustanzi perikolużi 59 .

Il-Kummissjoni, f’kooperazzjoni mal-Kumitat ta’ Konsulenza dwar is-Sigurtà u s-Saħħa fuq il-Post tax-Xogħol, biħsiebha wkoll tiżviluppa linji gwida sabiex tappoġġa l-applikazzjoni tad-Direttiva dwar l-Asbestos fuq ix-Xogħol ladarba tiġi adottata l-emenda proposta tagħha. Il-linji gwida jistgħu jipprovdu informazzjoni fil-fond dwar id-dispożizzjonijiet diġà inklużi fil-verżjoni attwali tad-Direttiva dwar l-Asbestos fuq ix-Xogħol (pereżempju dwar it-taħriġ u l-użu ta’ tagħmir ta’ protezzjoni personali). Uħud minn dawn id-dispożizzjonijiet jaqgħu fil-kompetenza tal-Istati Membri (bħaċ-ċertifikazzjoni tad-ditti tat-tneħħija tal‑asbestos), iżda l-kjarifika u l-pariri dwarhom jistgħu jkunu ta’ benefiċċju.

Huwa kruċjali li jiġi promoss taħriġ xieraq għall-ħaddiema li jimmaniġġaw l-asbestos bħala parti minn xogħlijiet ta’ kostruzzjoni, ta’ rinnovazzjoni u ta’ demolizzjoni. Il-linji gwida jistgħu jgħinu lill-Istati Membri u lill-impjegaturi, speċjalment lill-SMEs, sabiex jiżguraw li l-ħaddiema jkunu konxji tal-prekawzjonijiet li għandhom jittieħdu, sabiex jinkiseb l-ogħla livell ta’ protezzjoni.

Il-linji gwida jistgħu jindirizzaw ukoll kwistjonijiet oħrajn relatati mal-proċedura ta’ dekontaminazzjoni, li jissupplimentaw id-dispożizzjonijiet attwali tad-Direttiva dwar l-Asbestos fuq ix-Xogħol dwar:

it-tfassil ta’ pjan ta’ ħidma qabel ma jinbeda xogħol ta’ demolizzjoni jew xogħol fuq it-tneħħija tal-asbestos u/jew prodotti li fihom l-asbestos minn bini, minn strutturi, minn impjanti jew minn installazzjonijiet jew minn bastimenti, li, fuq talba tal-awtoritajiet kompetenti, iridu jinkludu informazzjoni dwar il-protezzjoni u d-dekontaminazzjoni ta’ dawk li jwettqu x-xogħol (l-Artikolu 13(2), it-tielet subparagrafu, il-punt (d)(i)); u

it-taħriġ tal-ħaddiema, li jippermettilhom jiksbu l-għarfien u l-ħiliet neċessarji f’termini ta’ prevenzjoni u ta’ sikurezza, b’mod partikolari fir-rigward tal-proċeduri ta’ dekontaminazzjoni (l-Artikolu 14(2)(g)).

Il-linji gwida jistgħu jindirizzaw ukoll xi dispożizzjonijiet li jaqgħu taħt il-kompetenza tal-Istati Membri (bħaċ-ċertifikazzjoni tad-ditti tat-tneħħija tal-asbestos). Appoġġ addizzjonali dwar dawn id-dispożizzjonijiet jista’ jkun ta’ benefiċċju. Il-linji gwida jistgħu jipprovdu wkoll informazzjoni prattika dwar kunċetti relatati mal-implimentazzjoni tad-Direttiva dwar l-Asbestos fuq ix-Xogħol, bħall-esponiment sporadiku u ta’ intensità baxxa, in-nuqqas ta’ tifrik, il-kampjunar, il-pjanijiet ta’ ħidma, in-notifiki lill-awtoritajiet nazzjonali, il-kontrolli tal-immuntar tat-tagħmir ta’ sikurezza personali, il-kustodja ta’ rekords mediċi u ta’ ċertifikati mediċi. Meta jkun xieraq, il-linji gwida se jkunu jinkludu tweġibiet speċifiċi għas-settur. Dan ikun jippermetti lil dawk kollha involuti jwettqu n-numru mistenni ta’ rinnovazzjonijiet, filwaqt li jiġi żgurat l-ogħla livell ta’ protezzjoni tal-ħaddiema mill-esponiment għall-asbestos.

•Dokumenti ta’ spjegazzjoni (għad-direttivi)

•Spjegazzjoni fid-dettall tad-dispożizzjonijiet speċifiċi tal-proposta

2022/0298 (COD)

Proposta għal

DIRETTIVA TAL-PARLAMENT EWROPEW U TAL-KUNSILL

li temenda d-Direttiva 2009/148/KE dwar il-protezzjoni tal-ħaddiema mir-riskji konnessi mal-espożizzjoni għall-asbestos fuq ix-xogħol

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 153(2), punt (b), flimkien mal-paragrafu 1, il-punt (a), tiegħu,

Wara li kkunsidraw il-proposta tal-Kummissjoni Ewropea,

Wara li l-abbozz tal-att leġiżlattiv intbagħat lill-parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew 61 ,

Wara li kkunsidraw l-opinjoni tal-Kumitat tar-Reġjuni,

Filwaqt li jaġixxu skont il-proċedura leġiżlattiva ordinarja 62 ,

Billi:

(1)Id-Direttiva 2009/148/KE tal-Parlament Ewropew u tal-Kunsill 63 għandha l-għan li tipproteġi lill-ħaddiema mir-riskji għas-saħħa u għas-sikurezza tagħhom mill-esponiment għall-asbestos fuq il-post tax-xogħol. F’dik id-Direttiva huwa pprovdut livell konsistenti ta’ protezzjoni mir-riskji relatati mal-esponiment fuq ix-xogħol għall-asbestos permezz ta’ qafas ta’ prinċipji ġenerali li jippermetti li l-Istati Membri jiżguraw l-applikazzjoni konsistenti tar-rekwiżiti minimi. L-għan ta’ dawn ir-rekwiżiti minimi huwa li jipproteġu lill-ħaddiema fil-livell tal-Unjoni, filwaqt li jkunu jistgħu jiġu stabbiliti dispożizzjonijiet aktar stretti mill-Istati Membri.

(2)Jenħtieġ li d-dispożizzjonijiet ta’ din id-Direttiva japplikaw mingħajr preġudizzju għal dispożizzjonijiet aktar stretti u/jew speċifiċi li jinsabu fid-Direttiva 2004/37/KE tal-Parlament Ewropew u tal-Kunsill 64 .

(3)L-asbestos huwa aġent karċinoġeniku perikoluż ħafna, li għadu jaffettwa setturi ekonomiċi differenti, bħall-bini u r-rinnovazzjoni, l-estrazzjoni u l-barrieri, l-immaniġġar tal-iskart u t-tifi tan-nar, fejn il-ħaddiema jinsabu f’riskju għoli li jkunu esposti. Il-fibri tal-asbestos huma kklassifikati bħala karċinoġeni 1A skont ir-Regolament (KE) 1272/2008 tal-Parlament Ewropew u tal-Kunsill  65 . Meta jittieħdu bin-nifs, il-fibri tal-asbestos fl-ajru jistgħu jwasslu għal mard serju bħal mesoteljoma u kanċer tal-pulmun, u l-ewwel sinjali tal-marda jistgħu jieħdu medja ta’ 30 sena sabiex jidhru mill-mument tal-esponiment, u fl-aħħar mill-aħħar iwasslu għal imwiet relatati max-xogħol.

(4)Wara l-iżviluppi xjentifiċi u teknoloġiċi l-ġodda fil-qasam, hemm lok sabiex tittejjeb il-protezzjoni tal-ħaddiema esposti għall-asbestos u b’hekk titnaqqas il-probabbiltà li l-ħaddiema jaqbadhom mard relatat mal-asbestos. Billi l-asbestos ma huwiex karċinoġenu b’livell limitu, mhuwiex xjentifikament possibbli li jiġu identifikati l-livelli li taħthom l-esponiment ma jwassalx għal effetti negattivi għas-saħħa. Minflok, tista’ tinkiseb relazzjoni bejn l-esponiment u r-riskju (ERR), li tiffaċilita l-istabbiliment ta’ limitu ta’ esponiment fuq ix-xogħol billi jitqies livell aċċettabbli ta’ riskju eċċessiv. B’konsegwenza ta’ dan, jenħtieġ li l-limitu ta’ esponiment fuq ix-xogħol għall-asbestos jiġi rivedut sabiex jitnaqqas ir-riskju billi jitnaqqsu l-livelli ta’ esponiment.

(5)Il-Pjan tal-Ewropa biex Jingħeleb il-Kanċer 66 jappoġġa l-ħtieġa għal azzjoni fil-qasam tal-protezzjoni tal-ħaddiema kontra sustanzi karċinoġeniċi. Protezzjoni mtejba tal-ħaddiema esposti għall-asbestos tkun importanti wkoll fil-kuntest tat-tranżizzjoni ekoloġika u tal-implimentazzjoni tal-Patt Ekoloġiku Ewropew, inkluża b’mod partikolari l-mewġa ta’ rinnovazzjoni għall-Ewropa 67 . Ir-rakkomandazzjonijiet taċ-ċittadini fil-qafas tal-Konferenza dwar il-Futur tal-Ewropa 68 enfasizzaw ukoll l-importanza ta’ kundizzjonijiet tax-xogħol ġusti, b’mod partikolari r-reviżjoni tad-Direttiva 2009/148/KE.

(6)Valur ta’ limitu vinkolanti ta’ esponiment fuq ix-xogħol għall-asbestos, li ma jistax jinqabeż, huwa komponent importanti tal-arranġamenti ġenerali għall-protezzjoni tal-ħaddiema, stabbiliti bid-Direttiva 2009/148/KE, minbarra l-miżuri xierqa ta’ mmaniġġar tar-riskji (RMMs) u għall-provvista ta’ tagħmir respiratorju u ta’ tagħmir ta’ sikurezza personali ieħor adegwati.

(7)Jenħtieġ li l-valur ta’ limitu għall-asbestos stabbilit fid-Direttiva 2009/148/KE jiġi rivedut fid-dawl tal-evalwazzjonijiet tal-Kummissjoni u tal-evidenza xjentifika u tad-data teknika reċenti. Ir-reviżjoni tiegħu hija wkoll mod effettiv sabiex jiġi żgurat li l-miżuri preventivi u protettivi jiġu aġġornati kif xieraq fl-Istati Membri kollha.

(8)Jenħtieġ li f’din id-Direttiva jiġi stabbilit valur ta’ limitu rivedut fid-dawl tal-informazzjoni disponibbli, inkluża data xjentifika u teknika aġġornata, u dan jenħtieġ li jkun ibbażat wkoll fuq valutazzjoni bir-reqqa tal-impatt soċjoekonomiku u fuq tad-disponibbiltà tal-protokolli u tat-tekniki għall-kejl tal-esponiment fuq il-post tax-xogħol. Jenħtieġ li dik l-informazzjoni tkun ibbażata fuq l-opinjonijiet tal-Kumitat għall-Istima tar-Riskji (Committee for Risk Assessment, RAC) tal-Aġenzija Ewropea għas-Sustanzi Kimiċi (ECHA), stabbilit bir-Regolament (KE) Nru 1907/2006 u fuq l-opinjonijiet tal-Kumitat ta’ Konsulenza dwar is-Sigurtà u s-Saħħa fuq il-Post tax-Xogħol (ACSH) stabbilit b’Deċiżjoni tal-Kunsill tas-22 ta’ Lulju 2003 69 .

(9)Filwaqt li jitqiesu l-għarfien espert xjentifiku rilevanti u approċċ bilanċjat li jiżgura fl-istess ħin protezzjoni adegwata tal-ħaddiema fil-livell tal-Unjoni u li jiġu evitati żvantaġġi u piżijiet ekonomiċi sproporzjonati għall-operaturi ekonomiċi affettwati (inklużi l-SMEs), jenħtieġ li jiġi stabbilit limitu rivedut ta’ esponiment fuq ix-xogħol ugwali għal 0,01 fibri/cm3 bħala medja ponderata skont il-ħin (TWA) fuq 8 sigħat. Dan l-approċċ bilanċjat huwa sostnut minn objettiv tas-saħħa pubblika li jimmira għat-tneħħija sikura neċessarja tal-asbestos. Ingħatat ukoll kunsiderazzjoni li jiġi propost limitu ta’ esponiment fuq ix-xogħol li jqis kunsiderazzjonijiet ekonomiċi u tekniċi sabiex tkun tista’ ssir tneħħija effettiva.

(10)Il-Kummissjoni wettqet ukoll konsultazzjoni f’żewġ stadji mal-maniġment u mal-ħaddiema fil-livell tal-Unjoni f’konformità mal-Artikolu 154 tat-Trattat. Hija kkonsultat ukoll lill-Kumitat ta’ Konsulenza dwar is-Sigurtà u s-Saħħa fuq il-Post tax-Xogħol, li adotta opinjoni li pprovdiet ukoll informazzjoni għall-implimentazzjoni b’suċċess tal-għażliet tal-limitu rivedut ta’ esponiment fuq ix-xogħol. Il-Parlament Ewropew adotta riżoluzzjoni 70 li tappella għal proposta biex tiġi aġġornata d-Direttiva 2009/148/KE sabiex jissaħħu l-miżuri tal-Unjoni għall-protezzjoni tal-ħaddiema mit-theddida tal-asbestos.

(11)Il-mikroskopija ottika, għalkemm ma tippermettix l-għadd tal-iżgħar fibri li jagħmlu ħsara lis-saħħa, hija l-metodu li bħalissa qed jintuża l-aktar għat-tkejjil normali tal-asbestos. Peress li huwa possibbli li jitkejjel limitu ta’ esponiment fuq ix-xogħol ugwali għal 0,01 f/cm³ bil-mikroskopju ta’ kuntrast tal-fażi (PCM), mhu meħtieġ l-ebda perjodu ta’ tranżizzjoni għall-implimentazzjoni tal-limitu rivedut ta’ esponiment fuq ix-xogħol. F’konformità mal-opinjoni tal-Kumitat ta’ Konsulenza dwar is-Sigurtà u s-Saħħa fuq il-Post tax-Xogħol, jenħtieġ li tintuża metodoloġija aktar moderna u sensittiva bbażata fuq il-mikroskopija tal-elettroni, filwaqt li titqies il-ħtieġa għal perjodu adegwat ta’ adattament u għal armonizzazzjoni akbar fil-livell tal-UE ta’ metodoloġiji differenti ta’ mikroskopija tal-elettroni.

(12)Filwaqt li jitqiesu r-rekwiżiti għall-minimizzazzjoni tal-esponiment stabbiliti fid-Direttiva 2009/148/KE tal-Parlament Ewropew u tal-Kunsill u fid-Direttiva 2004/37/KE tal-Parlament Ewropew u tal-Kunsill, jenħtieġ li l-impjegaturi jiżguraw li r-riskju relatat mal-esponiment tal-ħaddiema għall-asbestos fuq il-post tax-xogħol jitnaqqas għall-minimu u, fi kwalunkwe każ, għal livell kemm jista’ jkun teknikament baxx.

(13)Hemm bżonn ta’ miżuri u ta’ prekawzjonijiet speċjali ta’ kontroll għall-ħaddiema esposti jew li x’aktarx ikunu esposti għall-asbestos, bħall-fatt li l-ħaddiema jiġu soġġetti għal proċedura ta’ dekontaminazzjoni u għal taħriġ relatat, bħala kontribut sinifikanti għat-tnaqqis tar-riskji relatati ma’ tali esponiment.

(14)Il-miżuri preventivi għall-protezzjoni tas-saħħa tal-ħaddiema esposti għall-asbestos u l-impenn previst għall-Istati Membri fir-rigward tas-sorveljanza tas-saħħa tagħhom huma importanti, b’mod partikolari l-issoktar tas-sorveljanza tas-saħħa wara t-tmiem tal-esponiment.

(15)Jenħtieġ li l-impjegaturi jieħdu l-passi neċessarji kollha sabiex jidentifikaw materjali preżunti li fihom l-asbestos, jekk ikun xieraq billi jiksbu informazzjoni mingħand is-sidien tal-bini kif ukoll minn sorsi oħrajn ta’ informazzjoni, inklużi r-reġistri rilevanti. Jenħtieġ li jirrekordjaw, qabel il-bidu ta’ kwalunkwe proġett ta’ tneħħija tal-asbestos, il-presenza jew il-presenza preżunta tal-asbestos f’bini jew f’installazzjonijiet u jikkomunikaw din l-informazzjoni lil oħrajn li jistgħu jkunu esposti għall-asbestos bħala riżultat tal-użu tiegħu, tal-manutenzjoni jew ta’ attivitajiet oħrajn fil-bini jew fuqu.

(16)Minħabba li l-objettiv ta’ din id-Direttiva, jiġifieri l-protezzjoni tal-ħaddiema kontra riskji għas-saħħa u għas-sikurezza tagħhom li jirriżultaw minn jew li x’aktarx jistgħu jirriżultaw minn esponiment għall-asbestos fuq il-post tax-xogħol, li jinkludi l-prevenzjoni ta’ dawn ir-riskji, ma jistax jinkiseb b’mod suffiċjenti mill-Istati Membri, iżda jista’ pjuttost, minħabba l-iskala u l-effetti tiegħu, jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju tal-proporzjonalità, kif stabbilit f’dak l-Artikolu, din id-Direttiva ma tmurx lil hinn minn dak li huwa neċessarju sabiex tilħaq dak l-objettiv.

(17)Peress li din id-Direttiva tikkonċerna l-protezzjoni tas-saħħa u s-sikurezza tal-ħaddiema fuq il-post tax-xogħol, jenħtieġ li tiġi trasposta fi żmien sentejn mid-data tad-dħul fis-seħħ tagħha.

(18)Għalhekk, jenħtieġ li d-Direttiva 2009/148/KE tiġi emendata skont dan,

ADOTTAW DIN ID-DIRETTIVA:

Artikolu 1

Emendi għad-Direttiva 2009/148/KE

Id-Direttiva 2009/148/KE hija emendata kif ġej:

(1)    fl-Artikolu 1(1), jiddaħħal it-tielet subparagrafu li ġej:

“Id-dispożizzjonijiet tad-Direttiva 2004/37/KE tal-Parlament Ewropew u tal-Kunsill* għandhom japplikaw kull meta jkunu aktar favorevoli għas-saħħa u għas-sikurezza tal-ħaddiema fuq il-post tax-xogħol.”

* Id-Direttiva 2004/37/KE tal-Parlament Ewropew u tal-Kunsill tad-29 ta’ April 2004 dwar il-protezzjoni tal-ħaddiema mir-riskji relatati mal-espożizzjoni għal karċinoġeni, mutaġeni jew sustanzi tossiċi għar-riproduzzjoni fuq il-post tax-xogħol (Is-Sitt Direttiva individwali fis-sens tal-Artikolu 16(1) tad-Direttiva tal-Kunsill 89/391/KEE (ĠU L 158, 30.04.2004, p. 50), kif emendata l-aħħar bid-Direttiva (UE) 2022/431 tal-Parlament Ewropew u tal-Kunsill tad-9 ta’ Marzu 2022 (ĠU L 88, 16.3.2022, p. 1–14).;

(2)    L-Artikolu 2 huwa ssostitwit b’dan li ġej:

“Artikolu 2

Għall-finijiet ta’ din id-Direttiva, “asbestos” tfisser is-sustanzi u l-materjali tal-fibra li ġejjin, li huma klassifikati bħala karċinoġeni 1A skont ir-Regolament (KE) 1272/2008*:

* Ir-Regolament (KE) Nru 1272/2008 tal-Parlament Ewropew u tal-Kunsill tas-16 ta’ Diċembru 2008 dwar il-klassifikazzjoni, l-ittikkettar u l-imballaġġ tas-sustanzi u t-taħlitiet, li jemenda u jħassar id-Direttivi 67/548/KEE u 1999/45/KE, u li jemenda r-Regolament (KE) Nru 1907/2006 (ĠU L 353, 31.12.2008, p. 1–1355).;

1.(a) asbestos, aċtinolit, CAS* 77536-66-4

(b) asbestos, amosit (grunerit), CAS 12172-73-5;

(c) asbestos, anthofillit, CAS 77536-67-5;

(d) asbestos, krisotil, CAS 12001-29-5;

(e) asbestos, kroċidolit, CAS 12001-28-4;

(f) asbestos, tremolit, CAS 77536-68-6.

       *CAS: Numru tal-Chemical Abstracts Service.”;

(3)    L-Artikolu 6 huwa ssostitwit b’dan li ġej:

“Artikolu 6

Għall-attivitajiet kollha msemmijin fl-Artikolu 3(1), l-esponiment ta’ ħaddiema għal trab li joħroġ mill-asbestos jew minn materjali li jkun fihom l-asbestos fuq il-post tax-xogħol għandu jitnaqqas għal minimu u, f’kull każ, għall-aktar livell baxx teknikament possibbli taħt il-valur ta’ limitu stabbilit fl-Artikolu 8, b’mod partikolari permezz tal-miżuri li ġejjin:

(a) in-numru ta’ ħaddiema esposti jew x’aktarx li jkunu esposti għat-trab li joħroġ mill-asbestos jew minn materjali li jkun fihom l-asbestos għandu jkun limitat għall-figura l-aktar baxxa possibbli;

(b) il-proċessi tax-xogħol għandhom ikunu disinjati sabiex ma jipproduċux trab tal-asbestos jew, jekk dan ikun impossibbli, li jiġi evitat ir-rilaxx ta’ trab tal-asbestos fl-arja;

(c) il-postijiet kollha u t-tagħmir involut fit-trattament tal-asbestos għandhom ikunu kapaċi jitnaddfu u jiġu mantnuti regolarment u effettivament;

(d) l-asbestos jew materjal li fih l-asbestos li jiġġenera t-trab għandu jinħażen u jiġi ttrasportat f’pakketti ssiġillati kif xieraq;

(e) l-iskart għandu jinġabar u jitneħħa mill-post tax-xogħol kemm jista’ jkun malajr f’pakketti ssiġillati kif xierqa b’tikketti li jindikaw li jkun fihom l-asbestos; din il-miżura ma għandhiex tapplika għal attivitajiet tal-estrazzjoni; imbagħad, skart bħal dan għandu jiġi ttrattat f’konformità mad-Direttiva 2008/98/KE tal-Parlament Ewropew u tal-Kunsill*.

* Id-Direttiva 2008/98/KE tal-Parlament Ewropew u tal-Kunsill tad-19 ta’ Novembru 2008 dwar l-iskart u li tħassar ċerti Direttivi (ĠU L 312, 22.11.2008, p. 3).”;

(4)    fl-Artikolu 7(6) l-ewwel subparagrafu huwa ssostitwit b’dan li ġej:

“L-għadd tal-fibri għandu jsir permezz ta’ mikroskopju ta’ kuntrast tal-fażi (PCM) f’konformità mal-metodu rrakkomandat fl-1997 mill-Organizzazzjoni Dinjija tas-Saħħa (WHO)* jew, kull fejn possibbli, kwalunkwe metodu ieħor li jagħti riżultati ekwivalenti jew aħjar, bħal metodu bbażat fuq il-mikroskopija tal-elettroni (EM).

* Determination of airborne fibre concentrations. A recommended method, by phase-contrast optical microscopy (membrane filter method), WHO, Ġinevra 1997 (ISBN 92 4 154496 1).”;

(5)    L-Artikolu 8 huwa ssostitwit b’dan li ġej:

“Artikolu 8

L-impjegaturi għandhom jiżguraw li ebda ħaddiem ma jiġi espost għall-konċentrazzjoni ta’ asbestos fl-arja li teċċedi ż-0,01 fibri kull cm³ fuq medja ta’ perjodu ponderat skont il-ħin (TWA) ta’ 8 sigħat.”

(6)    fl-Artikolu 11, l-ewwel subparagrafu huwa ssostitwit b’dan li ġej:

“Qabel ma jibdew ix-xogħol ta’ demolizzjoni jew ta’ manutenzjoni, l-impjegaturi għandhom jieħdu, jekk ikun xieraq billi jiksbu informazzjoni mingħand is-sidien tal-bini kif ukoll minn sorsi oħrajn ta’ informazzjoni, inklużi r-reġistri rilevanti, il-passi neċessarji kollha sabiex jidentifikaw materjali preżunti li fihom l-asbestos.”

(7)    fl-Artikolu 19, il-paragrafu 2 huwa ssostitwit b’dan li ġej:

“L-impjegatur għandu jdaħħal l-informazzjoni dwar il-ħaddiema involuti fl-attivitajiet imsemmijin fl-Artikolu 3(1) f’reġistru. Dik l-informazzjoni għandha tindika n-natura u d-durata tal-attività u tal-esponiment li għalih ikunu ġew soġġetti. It-tabib u/jew l-awtorità responsabbli għas-sorveljanza medika għandu jkollhom aċċess għal dan ir-reġistru. Kull ħaddiem ikkonċernat għandu jkollu aċċess għar-riżultati fir-reġistru li jkollhom x’jaqsmu miegħu personalment. Il-ħaddiema u/jew ir-rappreżentanti tagħhom għandu jkollhom aċċess għal informazzjoni anonima u kollettiva fir-reġistru. ”

Artikolu 2

1.L-Istati Membri għandhom idaħħlu fis-seħħ il-liġijiet, ir-regolamenti u d-dispożizzjonijiet amministrattivi neċessarji sabiex jikkonformaw ma’ din id-Direttiva sa mhux aktar tard minn sentejn wara d-data tad-dħul fis-seħħ ta’ din id-Direttiva. Huma għandhom jikkomunikaw minnufih it-test ta’ dawk il-miżuri lill-Kummissjoni. 

Meta l-Istati Membri jadottaw dawk il-miżuri, fihom għandu jkun hemm referenza għal din id-Direttiva jew għandhom ikunu akkumpanjati minn referenza bħal din meta ssir il-pubblikazzjoni uffiċjali tagħhom. Huma l-Istati Membri li għandhom jiddeċiedu kif issir dik ir-referenza.

2.L-Istati Membri għandhom jikkomunikaw lill-Kummissjoni t-test tal-miżuri prinċipali tad-dritt nazzjonali li jadottaw fil-qasam kopert minn din id-Direttiva.

Artikolu 3

Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.

Artikolu 4

Din id-Direttiva hija indirizzata lill-Istati Membri.

Magħmul fi Brussell,

(1)    L-Artikolu 3 tat-Trattat dwar l-Unjoni Ewropea.

(2)    https://op.europa.eu/webpub/empl/european-pillar-of-social-rights/mt/

(3)    https://ec.europa.eu/info/sites/default/files/political-guidelines-next-commission_mt_0.pdf

(4)    https://ec.europa.eu/health/system/files/2022-02/eu_cancer-plan_en_0.pdf

(5)    https://eur-lex.europa.eu/legal-content/MT/TXT/?uri=CELEX%3A52021DC0323&qid=1626089672913#PP1Contents

(6)     https://eur-lex.europa.eu/resource.html?uri=cellar%3A9fb5131e-30e9-11ec-bd8e-01aa75ed71a1.0001.02/DOC_1&format=PDF  

(7)     https://www.europarl.europa.eu/doceo/document/TA-9-2021-0427_MT.html  

(8)    [għandha tiżdied kontroreferenza mal-adozzjoni]

(9)    B’sehem ta’ 52 %, il-kanċer okkupazzjonali huwa l-ewwel kawża ta’ mwiet relatati max-xogħol fl-UE, qabel il-mard ċirkolatorju (24 %), il-korrimenti (2 %) u l-kawżi l-oħrajn kollha (22 %) (data tal-2017, u b’hekk ikopri l-UE u r-Renju Unit ( https://visualisation.osha.europa.eu/osh-costs#!/ )).

(10)     https://ec.europa.eu/eurostat/web/experimental-statistics/european-occupational-diseases-statistics  

(11)    Il-mesoteljoma hija tip ta’ kanċer li jiżviluppa mis-saff irqiq ta’ tessut li jkopri ħafna mill-organi interni (magħrufin bħala l-mesotelju).

(12)    Id-Direttiva tal-Kunsill 83/478/KEE tad-19 ta’ Settembru 1983 li temenda għall-ħames darba id-Direttiva (tal-asbestos) 76/769/KEE dwar l-approssimazzjoni tal-liġijiet, tar-regolamenti u tad-disposizzjonijiet amministrattivi tal-Istati Membri li jirriggwardjaw ir-restrizzjonijiet fuq l-użu u t-tqegħid fis-suq ta’ xi sustanzi u preparazzjonijiet perikolużi (ĠU L 263, 24.9.1983, p. 33).

(13)    It-tqegħid fis-suq u l-użu tal-asbestos ġew ipprojbiti fl-UE bid-Direttiva tal-Kummissjoni 1999/77/KE tas-26 ta’ Lulju 1999 li taddatta għall-progress tekniku għas-sitt darba Anness I tad-Direttiva tal-Kunsill 76/769/KEE dwar l-approssimazzjoni tal-liġijiet, ir-regolamenti u d-dispożizzjonijiet amministrattivi tal-Istati Membri li għandhom x’jaqsmu mar-restrizzjonijiet dwar il-marketing u l-użu ta’ ċerti sustanzi u preparazzjonijiet perikolużi (l-asbestos). Din id-Direttiva tħassret bir-Regolament REACH (ir-Regolament (KE) Nru 1907/2006 (ĠU L 396, 30.12.2006, p. 1), ara l-Anness XVII tiegħu, l-entrata 6, dwar il-fibri tal-asbestos).

(14)    ĠU L 263, 24.9.1983, p. 25.

(15)    Id-Direttiva 2009/148/KE tal-Parlament Ewropew u tal-Kunsill tat-30 ta’ Novembru 2009 dwar il-protezzjoni tal-ħaddiema mir-riskji konnessi mal-espożizzjoni għall-asbestos fuq ix-xogħol (ĠU L 330, 16.12.2009, p. 28).

(16)    ĠU L 158, 30.4.2004, p. 50 (Artikolu 1(4)).

(17)    Il-Komunikazzjoni tal-Kummissjoni Mewġa ta’ Rinnovazzjoni għall-Ewropa - l-ekoloġizzazzjoni tal-binjiet tagħna, il-ħolqien tal-impjiegi, it-titjib tal-ħajja (COM(2020) 662 final).

(18)    Studju estern, RPA, 2021. Il-Kummissjoni Ewropea, id-Direttorat Ġenerali tal-Impjiegi, l-Affarijiet Soċjali u l-Inklużjoni, Lassen, C., Christens, F., Vencovska, J., et al., Study on collecting information on substances with the view to analyse health, socio-economic and environmental impacts in connection with possible amendments of Directive 98/24/EC (Chemical Agents) and Directive 2009/148/EC (Asbestos): final report for asbestos, Uffiċċju tal-Pubblikazzjonijiet, 2021, https://data.europa.eu/doi/10.2767/981554 .

(19)    Il-Ġermanja, id-Danimarka, Franza u n-Netherlands.

(20)     SWD(2017) 10 final .

(21)    RAC, Opinion on scientific evaluation of occupational exposure limits for Asbestos (ECHA/RAC/A77-O-0000006981-66-01/F).

(22)    ĠU L 183, 29.6.1989, p. 1.

(23)    Ir-Regolament (KE) Nru 1907/2006 tal-Parlament Ewropew u tal-Kunsill tat-18 ta’ Diċembru 2006 dwar ir-reġistrazzjoni, il-valutazzjoni, l-awtorizzazzjoni u r-restrizzjoni ta’ sustanzi kimiċi. Disponibbli fuq: https://eur-lex.europa.eu/legal-content/MT/ALL/?uri=CELEX%3A32006R1907 .

(24)    Id-Direttiva tal-Kummissjoni 1999/77/KEE tas-26 ta’ Lulju 1999 li taddatta għall-progress tekniku għas-sitt darba Anness I tad-Direttiva tal-Kunsill 76/769/KEE dwar l-approssimazzjoni tal-liġijiet, ir-regolamenti u d-dispożizzjonijiet amministrattivi tal-Istati Membri li għandhom x’jaqsmu mar-restrizzjonijiet dwar il-marketing u l-użu ta’ ċerti sustanzi u preparazzjonijiet perikolużi (l-asbestos), imħassra bir-Regolament REACH (ir-Regolament (KE) Nru 1907/2006 (ĠU L 396. 30.12.2006. P. 1), ara l-Anness XVII tagħha, l-entrata 6, dwar il-fibri tal-asbestos).

(25)    Ara n-nota 22 f’qiegħ il-paġna.

(26)    Mill-2022, il-valur ta’ limitu għall-asbestos huwa ta’ 0,003 fibri/cm3 ( https://asbest-huset.dk/graensevaerdi/ ).

(27)    Mill-2017, il-fibri tal-asbestos tat-tip kriżotil u amfiboliċi, rispettivament, ma għandhomx jaqbżu ż-0,002 fibri/cm3.

(28)    Mill-2015, il-limitu ta’ esponiment fuq ix-xogħol huwa ta’ 0,01 fibri/cm3, imkejjel bil-mikroskopija tal-elettroni tat-trażmissjoni, u b’hekk jinkludi “fibri tal-asbestos irqaq”.

(29)    Għalkemm il-limitu vinkolanti attwali ta’ esponiment fuq ix-xogħol fil-Ġermanja huwa ta’ 0,1 fibri/cm3, il-linji gwida obbligatorji fil-prattika jeżiġu miżuri meqjusa li jġibu l-konċentrazzjoni tal-esponiment taħt il-“livell ta’ aċċettazzjoni” (0,01 fibri/cm3).

(30)    Ir-riskju aċċettabbli huwa r-riskju addizzjonali tal-kanċer li huwa aċċettat, li jfisser li statistikament, 4 minn kull 10 000 persuna esposti għas-sustanza matul il-ħajja tax-xogħol tagħhom se jiżviluppaw kanċer. BAuA, National Asbestos Profile for Germany, 2014.

(31)     SWD(2017) 10 final .

(32)    Il-Konfederazzjoni Ewropea tat-Trade Unions u l-Federazzjoni Ewropea tal-Bennejja u tal-Mastrudaxxi.

(33)    Pereżempju, l-istabbiliment ta’ rekwiżiti minimi tekniċi sabiex titnaqqas il-konċentrazzjoni tal-fibri tal-asbestos, il-kampjunar rappreżentattiv tal-esponiment personali tal-ħaddiema, u l-bqija.

(34)    Ir-riżoluzzjoni tal-Parlament Ewropew tal-20 ta’ Ottubru 2021 li jinkludi rakkomandazzjonijiet lill-Kummissjoni dwar il-protezzjoni tal-ħaddiema mill-asbestos (2019/2182(INL), ĠU C 184, 5.5.2022, p. 45).

(35)    BusinessEurope, SMEunited (Assoċjazzjoni Ewropea tas-Snajja’ u tal-SMEs) u l-Federazzjoni Ewropea tal-Industrija tal-Kostruzzjoni.

(36)    BusinessEurope u SMEunited.

(37)    Il-Konfederazzjoni Ewropea tat-Trade Unions u l-Federazzjoni Ewropea tal-Bennejja u tal-Mastrudaxxi.

(38)    BusinessEurope, SMEunited, il-Federazzjoni Ewropea tal-Industrija tal-Kostruzzjoni u l-Assoċjazzjoni tat-Tagħmir tat-Tarzna u Marittimu tal-Ewropa.

(39)     ACSH, Opinion on an EU Binding Occupational Exposure Limit Value (BOEL) for Asbestos under the Asbestos at Work Directive 2009/148/EC (Doc. 008-21), adottata fl-24.11.2021 .

(40)    Opinjoni tal-RAC. Ara n-nota 21 f’qiegħ il-paġna.

(41)    Ara n-nota 18 f’qiegħ il-paġna.

(42)    Opinjoni tal-RAC. Ara n-nota 21 f’qiegħ il-paġna.

(43)    Ara n- nota 39 f’qiegħ il-paġna.

(44)    Disponibbli fuq: https://ec.europa.eu/info/better-regulation-guidelines-and-toolbox_mt .

(45)    Kemm jista’ jkun qrib is-sitwazzjoni futura.

(46)    Inklużi l-mesoteljoma u l-kanċer tal-pulmun, tal-larinġi u tal-ovarji.

(47)    Ara n-nota 18 f’qiegħ il-paġna.

(48)    Ara n-nota 18 f’qiegħ il-paġna.

(49)    Id-Direttiva Qafas dwar l-Iskart (2008/98/KE) u d-Direttiva dwar il-Landfills (1999/31/KE), li jindirizzaw l-immaniġġar ambjentalment sod tal-iskart tal-asbestos, u l-EU Construction & Demolition Waste Management Protocol u l-Guidelines for the waste audits before demolition and renovation works of buildings, ippubblikati mill-Kummissjoni, li għandhom l-għan li jgħinu lin-negozji fit-tneħħija u fl-immaniġġar sikuri tal-asbestos.

(50)    Skont l-Artikolu 2(1)(b) tad-Direttiva 2008/98/KE dwar l-iskart, “bini konness mal-art b’mod permanenti mal-art” huwa eskluż mill-kamp ta’ applikazzjoni tad-Direttiva peress li ma huwiex meqjus bħala skart.

(51)    F’konformità mal-Anness III tad-Direttiva 2008/98/KE dwar l-iskart u d-Deċiżjoni 2000/532/KE dwar il-lista ta’ skart.

(52)     https://eur-lex.europa.eu/resource.html?uri=cellar:c51fe6d1-5da2-11ec-9c6c-01aa75ed71a1.0001.02/DOC_1&format=PDF  

(53)     https://ec.europa.eu/energy/sites/ener/files/eu_renovation_wave_strategy.pdf

(54)     https://www.technologyreview.com/2020/10/06/1009374/asbestos-could-be-a-powerful-weapon-against-climate-change-you-read-that-right/

(55)    Ir-reviżjoni ppjanata tad-Direttiva dwar l-Asbestos fuq ix-Xogħol ma tbiddilx is-sistema ta’ notifika. It-tnaqqis tal-limitu ta’ esponiment fuq ix-xogħol jista’ indirettament iżid il-kostijiet għall-Istati Membri u għan-negozji jekk jiżdied in-numru ta’ notifiki. Dan il-kost ikun pjuttost marbut ma’ kif id-Direttiva dwar l-Asbestos fuq ix-Xogħol huwa implimentat bħalissa fl-Istati Membri (fir-rigward tas-sistema ta’ notifika) milli ma’ obbligu amministrattiv impost mill-bidla fil-limitu ta’ esponiment fuq ix-xogħol.

(56)     Eurostat, Jobs still split along gender lines.

(57)     https://ec.europa.eu/eurostat/web/experimental-statistics/european-occupational-diseases-statistics  

(58)     https://osha.europa.eu/mt/facts-and-figures/workers-exposure-survey-cancer-risk-factors-europe . L-istħarriġ inizjalment se jitwettaq f’għażla ġeneralment rappreżentattiva ta’ 6 Stati Membri u jkopri 24 fattur ta’ riskju tal-kanċer, inkluż l-asbestos, bl-ewwel sejbiet mistennijin fl-2023.

(59)    Il-kampanja segwiet diversi objettivi, inklużi s-sensibilizzazzjoni dwar l-importanza tal-prevenzjoni tar-riskji minn sustanzi perikolużi, il-promozzjoni tal-valutazzjoni tar-riskju, it-tisħiħ tal-għarfien dwar ir-riskji ta’ esponiment għal karċinoġeni fuq il-post tax-xogħol, jew iż-żieda fl-għarfien tal-qafas leġiżlattiv. Twettqet fl-2018-2019. Waħda mill-karatteristiċi hija bażi tad-data ta’ gwida u ta’ prattiki tajbin disponibbli fuq https://osha.europa.eu/mt/themes/dangerous-substances/practical-tools-dangerous-substances .

(60)    Ir-Regolament (KE) Nru 1272/2008 tal-Parlament Ewropew u tal-Kunsill tas-16 ta’ Diċembru 2008 dwar il-klassifikazzjoni, l-ittikkettar u l-imballaġġ tas-sustanzi u t-taħlitiet, li jemenda u jħassar id-Direttivi 67/548/KEE u 1999/45/KE, u li jemenda r-Regolament (KE) Nru 1907/2006 (ĠU L 353, 31.12.2008, p. 1).

(61)    ĠU C 56, 16.2.2021, p. 63.

(62)    Il-pożizzjoni tal-Parlament Ewropew ta XXXXX (għadha mhijiex ippubblikata f’Il-Ġurnal Uffiċjali) u d-Deċiżjoni tal-Kunsill ta’ XXXXX.

(63)    Id-Direttiva 2009/148/KE tal-Parlament Ewropew u tal-Kunsill tat-30 ta’ Novembru 2009 dwar il-protezzjoni tal-ħaddiema mir-riskji konnessi mal-espożizzjoni għall-asbestos fuq ix-xogħol (Test b’rilevanza għaż-ŻEE)ĠU L 330, 16.12.2009, p. 28.

(64)    Id-Direttiva 2004/37/KE tal-Parlament Ewropew u tal-Kunsill tad-29 ta’ April 2004 dwar il-protezzjoni tal-ħaddiema mir-riskji relatati mal-espożizzjoni għal karċinoġeni, mutaġeni jew sustanzi tossiċi għar-riproduzzjoni fuq il-post tax-xogħol (Is-Sitt Direttiva individwali fis-sens tal-Artikolu 16(1) tad-Direttiva tal-Kunsill 89/391/KEE) (ĠU L 158, 30.4.2004, p. 50).

(65)    Ir-Regolament (KE) Nru 1272/2008 tal-Parlament Ewropew u tal-Kunsill tas-16 ta’ Diċembru 2008 dwar il-klassifikazzjoni, l-ittikkettar u l-imballaġġ tas-sustanzi u t-taħlitiet, li jemenda u jħassar id-Direttivi 67/548/KEE u 1999/45/KE, u li jemenda r-Regolament (KE) Nru 1907/2006 (Test b’rilevanza għaż-ŻEE)ĠU L 353, 31.12.2008, p. 1.

(66)     https://ec.europa.eu/health/system/files/2022-02/eu_cancer-plan_en_0.pdf

(67)    Mewġa ta’ Rinnovazzjoni: nirduppjaw ir-rata ta’ rinnovazzjoni biex innaqqsu l-emissjonijiet, nagħtu spinta lill-irkupru u nnaqqsu l-faqar enerġetiku, COM(2020) 662 final

(68)    Il-Konferenza dwar il-Futur tal-Ewropa. Report on the final outcome (Mejju 2022). https://prod-cofe-platform.s3.eu-central-1.amazonaws.com/8pl7jfzc6ae3jy2doji28fni27a3?response-content-disposition=inline%3B%20filename%3D%22CoFE_Report_with_annexes_EN.pdf%22%3B%20filename%2A%3DUTF-8%27%27CoFE_Report_with_annexes_EN.pdf&response-content-type=application%2Fpdf&X-Amz-Algorithm=AWS4-HMAC-SHA256&X-Amz-Credential=AKIA3LJJXGZPDFYVOW5V%2F20220917%2Feu-central-1%2Fs3%2Faws4_request&X-Amz-Date=20220917T104038Z&X-Amz-Expires=300&X-Amz-SignedHeaders=host&X-Amz-Signature=6806caf5fd75a86ad4e907b934b2194de4c3c0c756a8d2a34c5e8b68985ffbde  

(69)    Id-Deċiżjoni tal-Kunsill tat-22 ta’ Lulju 2003 li tistabbilixxi Kumitat ta’ Konsulenza dwar is-Sigurtà u s-Saħħa fuq il-Post tax-Xogħol (ĠU C 218, 13.9.2003, p. 1).

(70)    Ir-riżoluzzjoni tal-Parlament Ewropew tal-20 ta’ Ottubru 2021 li jinkludi rakkomandazzjonijiet lill-Kummissjoni dwar il-protezzjoni tal-ħaddiema mill-asbestos (2019/2182(INL)), (ĠU C 184, 5.5.2022, p. 45.)