IL-KUMMISSJONI EWROPEA
Strasburgu, 5.4.2022
COM(2022) 157 final
2022/0105(COD)
Proposta għal
REGOLAMENT TAL-PARLAMENT EWROPEW U TAL-KUNSILL
dwar ir-rapportar ta’ data ambjentali minn installazzjonijiet industrijali u l-istabbiliment ta’ Portal dwar l-Emissjonijiet Industrijali
(Test b’rilevanza għaż-ŻEE)
{SEC(2022) 169 final} - {SWD(2022) 111 final} - {SWD(2022) 112 final} - {SWD(2022) 113 final}
MEMORANDUM TA’ SPJEGAZZJONI
1.
KUNTEST TAL-PROPOSTA
•
Raġunijiet u objettivi tal-proposta
Ir-Regolament (KE) Nru 166/2006 (ir-Regolament) stabbilixxa r-Reġistru Ewropew dwar ir-Rilaxx u t-Trasferiment ta’ Inkwinanti (PRTR Ewropew), bħala r-reġistru madwar l-Ewropa li jipprovdi aċċess pubbliku għal data ambjentali ewlenija minn faċilitajiet industrijali li jinsabu fl-UE, fl-Iżlanda, fil-Liechtenstein u fin-Norveġja. Il-PRTR Ewropew fih data rrapportata kull sena minn madwar 30 000 faċilità industrijali li jkopru 65 attività ekonomika madwar l-UE. Ir-Regolament jimplimenta l-Protokoll ta’ Kiev tal-2006 dwar ir-Reġistri dwar ir-Rilaxx u t-Trasferiment ta’ Inkwinanti (Protokoll), li daħal fis-seħħ fl-2009. Huwa l-uniku strument internazzjonali legalment vinkolanti dwar ir-reġistri tar-rilaxx u t-trasferiment ta’ inkwinanti.
Kull sena, l-Istati Membri jibagħtu lill-Kummissjoni rapport li jkun fih data sottomessa mill-operaturi ta’ faċilitajiet industrijali dwar ir-rilaxx u t-trasferimenti ta’ kull faċilità. Imbagħad id-data tiġi ppubblikata mill-Kummissjoni fuq sit web pubbliku, bl-appoġġ tal-Aġenzija Ewropea għall-Ambjent.
L-effettività, l-effiċjenza, ir-rilevanza, il-koerenza u l-valur miżjud tal-UE tar-Regolament ġew ivvalutati bħala parti mill-programm tal-Kummissjoni dwar l-Idoneità u l-Prestazzjoni tar-Regolamentazzjoni (REFIT). Il-valutazzjoni eżaminat il-benefiċċji tal-PRTR Ewropew kif ukoll il-potenzjal għas-simplifikazzjoni tiegħu u t-tnaqqis tal-kostijiet u l-piżijiet regolatorji. Abbażi ta’ din il-valutazzjoni, it-tieni rapport tal-Kummissjoni dwar l-implimentazzjoni tar-Regolament ikkonkluda dan li ġej.
·Il-PRTR Ewropew wera li huwa bażi ta’ għarfien kruċjali dwar ir-rilaxxi mill-attivitajiet industrijali tal-UE. Dan jipprovdi data aċċessibbli faċilment u ta’ kwalità għolja. Dan jagħti aċċess lill-pubbliku għal din l-informazzjoni siewja, u b’hekk jappoġġa t-teħid ta’ deċiżjonijiet ambjentali.
·Madankollu, il-PRTR Ewropew jista’ jittejjeb aktar u jsir aktar effettiv billi jiġi allinjat mal-obbligi tar-rapportar stabbiliti f’leġiżlazzjoni ambjentali oħra, kif ukoll billi jintuża għar-rapportar ta’ informazzjoni kuntestwali addizzjonali.
Bħala segwitu għal dan ir-rapport ta’ implimentazzjoni, twettqu diversi inizjattivi.
·Inħoloq il-Portal dwar l-Emissjonijiet Industrijali (il-Portal). Dan jinkludi d-data rrapportata kull sena skont ir-Regolament dwar il-PRTR Ewropew, flimkien mad-data rrapportata f’konformità mad-Direttiva 2010/75/UE dwar l-emissjonijiet industrijali (id-Direttiva dwar l-Emissjonijiet Industrijali – IED). Dan il-Portal, li ħa post is-sit web tal-PRTR Ewropew, jiġbor flimkien id-data dwar l-attivitajiet industrijali rrapportati taħt dawn iż-żewġ liġijiet ambjentali tal-UE.
·Għal informazzjoni kuntestwali addizzjonali, id-Deċiżjoni ta’ Implimentazzjoni tal-Kummissjoni 2022/142 stabbiliet unitajiet u metriki li jippermettu lill-operaturi jirrapportaw kull sena dwar il-volum tal-produzzjoni ta’ kull faċilità tal-PRTR Ewropew. Ir-rapportar dwar il-volum tal-produzzjoni jsir obbligatorju għall-ewwel darba għas-sena tar-rapportar 2023.
Il-Patt Ekoloġiku Ewropew huwa l-istrateġija ta’ tkabbir tal-Ewropa li għandha l-għan li sal-2050 ikun hemm ekonomija newtrali għall-klima, nadifa u ċirkolari. Jirrikonoxxi l-ħtieġa għal politiki profondament trasformattivi, biex tiġi ottimizzata l-ġestjoni tar-riżorsi u jiġi minimizzat it-tniġġis. Il-Kummissjoni impenjat ruħha li tirrevedi r-regoli tal-UE sabiex tnaqqas it-tniġġis minn installazzjonijiet industrijali kbar. Se tirrevedi l-leġiżlazzjoni u tara kif tagħmilha konsistenti għalkollox mal-ambizzjonijiet tal-Patt Ekoloġiku għal tniġġis żero u l-politiki tiegħu dwar il-klima, l-enerġija u l-ekonomija ċirkolari, filwaqt li se tqis il-benefiċċji li dan isir kemm għas-saħħa pubblika kif ukoll għall-bijodiversità.
L-IED u r-Regolament huma liġijiet komplementari mmirati lejn il-monitoraġġ tal-impatt ambjentali tal-industrija:
·l-IED tistabbilixxi regoli ta’ kmand u ta’ kontroll biex gradwalment jitnaqqas it-tniġġis mill-akbar installazzjonijiet industrijali u tat-trobbija tal-bhejjem tal-UE, filwaqt li jinżammu kundizzjonijiet ekwi ta’ kompetizzjoni;
·ir-Regolament jgħin fil-monitoraġġ tal-isforzi biex jitnaqqas it-tniġġis billi jtejjeb l-informazzjoni pubblika dwar kif qed jaħdmu l-installazzjonijiet.
Twettqet analiżi ulterjuri biex jiġi identifikat titjib potenzjali fir-Regolament, inkluża valutazzjoni tal-impatt. Li rriżulta huma l-konklużjonijiet ewlenin tal-valutazzjoni tal-impatt deskritti hawn taħt.
·Il-kamp ta’ applikazzjoni settorjali tar-Regolament jenħtieġ li jiġi rivedut biex ikun aktar konsistenti mal-attivitajiet koperti mil-liġijiet ambjentali relatati. Dan jikkonċerna b’mod partikolari l-IED, iżda wkoll id-Direttiva (UE) 2015/2193 dwar l-impjanti tal-kombustjoni medji (MCPD) u d-Direttiva tal-Kunsill 91/271/KEE dwar it-trattament tal-ilma urban mormi (id-Direttiva UWWT). Sabiex jiġu allinjati ulterjorment, l-attivitajiet għandhom jiġu rrapportati fil-livell tal-installazzjoni — bħal fil-każ ta’ dawn il-liġijiet l-oħra — aktar milli fil-livell tal-faċilità.
·Ir-Regolament dwar il-PRTR Ewropew għandu jkopri l-inkwinanti rilevanti kollha. Dan ifisser li għandhom jiżdiedu ċerti inkwinanti mal-Anness II tar-Regolament, inklużi:
·sustanzi prijoritarji skont id-Direttiva Qafas dwar l-Ilma 2000/60/KE u d-Direttiva 2008/105/UE dwar l-Ilma tal-Wiċċ;
·sustanzi identifikati bħala ta’ tħassib serju ħafna fir-Regolament (KE) Nru 1907/2006 (REACH);
·sustanzi koperti mil-liġijiet tal-UE dwar l-ilma ta’ taħt l-art u l-kwalità tal-arja, inkluża d-Direttiva dwar l-Ilma ta’ Taħt l-Art, id-Direttiva dwar il-Kwalità tal-Arja Ambjentali u d-Direttiva 2004/107/KE dwar il-konċentrazzjonijiet ta’ ċerti inkwinanti fl-arja ambjentali.
·Sabiex ikunu konsistenti mal-politiki tal-UE dwar l-ekonomija ċirkolari u d-dekarbonizzazzjoni u biex jippermettu valutazzjoni ambjentali aħjar tad-data tal-PRTR Ewropew, l-operaturi għandhom jirrapportaw dwar il-volum tal-produzzjoni u d-data komplementari, speċjalment l-użu tar-riżorsi (l-enerġija, l-ilma, u l-materja prima).
·In-nuqqasijiet attwali li jaffettwaw l-implimentazzjoni tar-Regolament jenħtieġ li jiġu indirizzati wkoll billi:
·jiġu aġġornati l-metodi analitiċi li jużaw l-operaturi biex jiddeterminaw ir-rilaxxi u t-trasferimenti barra mill-post tagħhom;
·l-operaturi jintalbu jikkonfermaw b’mod espliċitu fir-rapport tagħhom lill-awtoritajiet kompetenti li r-rilaxx ta’ inkwinant partikolari jew trasferiment mhux fuq il-post ta’ skart jew ilma mormi jkun taħt il-livelli limitu tar-rapportar applikabbli;
·l-Istati Membri jitħallew jirrapportaw ċerta data f’isem l-operaturi li jrabbu l-bhejjem, li jistgħu ma jkollhomx ir-riżorsi biex jirrapportaw data akkurata.
Il-ħtieġa li r-Regolament jiġi rivedut ġiet ikkonfermata fil-Patt Ekoloġiku Ewropew, u qiegħda tiġi riveduta fl-istess waqt tal-IED. Dan se jiżgura l-konsistenza u l-effiċjenza ġenerali ta’ dawn iż-żewġ liġijiet.
F’dan il-kuntest, minħabba n-natura u l-firxa tal-modifiki meħtieġa fir-Regolament u l-ħtieġa li jittejbu l-konsistenza u ċ-ċarezza ġuridika, din il-proposta jenħtieġ li tħassru u tissostitwixxih filwaqt li tassumi l-obbligi sostantivi tagħha kull meta jkun għadu meħtieġ.
•
Konsistenza mad-dispożizzjonijiet eżistenti fil-qasam ta’ politika
Ir-Regolament huwa marbut ma’ ħafna liġijiet ambjentali oħra tal-UE, peress li jkopri firxa wiesgħa ta’ installazzjonijiet agroindustrijali u sustanzi rilevanti, inklużi l-gassijiet serra. Il-liġijiet li huwa marbut magħhom jinkludu leġiżlazzjoni dwar it-tniġġis, eż. l-IED, l-MCPD, id-Direttiva UWWT u d-Direttiva tal-Kunsill 1999/31/KE dwar il-landfill tal-iskart (id-Direttiva dwar il-Landfills). Huwa marbut ukoll mad-dritt tal-UE li jipproteġi l-mezzi ambjentali mir-rilaxxi tal-inkwinanti (inkluż l-ilma tal-wiċċ, l-ilma ta’ taħt l-art u l-arja ambjentali), minħabba li r-rilaxxi tal-inkwinanti jistgħu jaffettwaw l-istatus ta’ dawk il-mezzi.
Fl-aħħar nett, ir-Regolament huwa marbut mal-liġi dwar il-klima, inkluża s-Sistema tal-UE għall-Iskambju tal-Kwoti tal-Emissjonijiet u r-Regolament dwar il-Kondiviżjoni tal-Isforzi.
L-ewwel reġistru Ewropew dwar l-inkwinanti, ir-Reġistru Ewropew dwar l-Emissjonijiet ta’ Sustanzi Niġġiesa (EPER), ġie stabbilit fil-qafas tal-ewwel leġiżlazzjoni tal-UE dwar il-kontroll tat-tniġġis industrijali — id-Direttiva dwar il-Prevenzjoni u l-Kontroll Integrati tat-Tniġġis (id-Direttiva dwar l-IPPC). L-għan tal-EPER kien li jipprovdi informazzjoni dwar l-emissjonijiet ewlenin minn attivitajiet regolati mid-Direttiva dwar l-IPPC.
Madankollu, issa hemm differenzi bejn is-sistema regolatorja tal-IED u l-inventarju tagħha tar-rilaxxi minħabba bidliet fiż-żewġ liġijiet. Fl-2006, l-EPER sar ir-Reġistru Ewropew dwar ir-Rilaxx u t-Trasferiment ta’ Inkwinanti (PRTR Ewropew), fit-twettiq tal-obbligi tal-Protokoll tal-UE. Fl-2010, il-kamp ta’ applikazzjoni tal-IED ġie estiż għal aktar attivitajiet milli tkopri d-Direttiva dwar l-IPPC. B’riżultat ta’ dan, hemm inqas konsistenza bejn is-sistema regolatorja għall-attivitajiet agroindustrijali tal-IED u r-Regolament, l-għodda ewlenija ta’ monitoraġġ tagħha. Fl-2015, ġew introdotti kontrolli regolatorji fuq impjanti iżgħar tal-kombustjoni fl-MCPD, iżda mingħajr rekwiżit għal inventarju tar-rilaxxi.
Din hija r-raġuni għaliex, sabiex ir-Regolament jappoġġa l-implimentazzjoni tal-IED, qed jiġi propost li jiġi emendat l-Anness I tar-Regolament, sabiex tiġi estiża l-kopertura tiegħu għall-attivitajiet kollha tal-IED u għal xi impjanti iżgħar tal-kombustjoni. Bil-ħolqien ta’ inventarju tar-rilaxxi, il-PRTR Ewropew jappoġġa wkoll l-implimentazzjoni tad-Direttivi UWWT u dwar il-Landfills.
•
Konsistenza ma’ politiki oħra tal-Unjoni
Il-Patt Ekoloġiku Ewropew isemmi speċifikament ir-reviżjoni tar-Regolament. Ir-reviżjoni tiegħu tikkontribwixxi wkoll għat-twettiq tal-viżjoni tal-UE ta’ tniġġis żero għall-2050 , billi tipprovdi data dwar ir-rilaxxi agroindustrijali fl-arja, fl-ilma u fil-ħamrija. Flimkien ma’ liġijiet ambjentali relatati oħra tal-UE, ir-reviżjoni tar-Regolament se tgħin biex jitnaqqas it-tniġġis għal livelli li mhumiex meqjusa ta’ ħsara għas-saħħa jew għall-ekosistemi naturali. Se tirrispetta wkoll il-limiti li l-pjaneta tista’ tlaħħaq magħhom, u b’hekk tneħħi t-tossiċità mill-ambjent.
2.
BAŻI ĠURIDIKA, SUSSIDJARJETÀ U PROPORZJONALITÀ
•
Bażi ġuridika
L-objettiv ewlieni tal-att propost huwa relatat mal-protezzjoni tal-ambjent u tas-saħħa tal-bniedem. Għalhekk, il-bażi ġuridika tar-Regolament propost hi l-Artikolu 192(1) tat-Trattat dwar il-Funzjonament tal-Unjoni Ewropea.
•
Sussidjarjetà (għall-kompetenza mhux esklużiva)
Kemm l-UE kif ukoll l-Istati Membri individwali ffirmaw il-Protokoll. Peress li l-Protokoll jinkludi għażliet għall-implimentazzjoni ta’ xi regoli (eż. l-attivitajiet jistgħu jiġu ddefiniti bl-użu ta’ livelli limitu tal-kapaċità jew tal-impjegati), ir-Regolament jadotta approċċ komuni u jiżgura li jiġi applikat b’mod konsistenti madwar l-UE.
Ir-Regolament iżid ukoll il-valur peress li wassal għall-iżvilupp ta’ dokument ta’ gwida tal-UE, b’regoli u pariri dwar il-ġbir tad-data, l-assigurazzjoni tal-kwalità u l-preżentazzjoni. Din il-gwida tagħmel id-data aktar konsistenti u aktar faċli biex titqabbel bejn l-Istati Membri.
L-Aġenzija Ewropea għall-Ambjent twettaq aktar kontrolli tal-assigurazzjoni tal-kwalità. Dan jgħin biex id-data ssir aktar kompluta u akkurata. Dawn il-kontrolli fil-livell tal-UE jidentifikaw kwistjonijiet li mbagħad jiġu kkoreġuti fil-livell nazzjonali — xi ħaġa li ma sseħħx mingħajr reġistru Ewropew.
Il-gruppi ta’ esperti, il-workshops u r-rapporti analitiċi tal-UE jappoġġaw u jgħinu wkoll lill-Istati Membri jżommu r-reġistri nazzjonali tagħhom.
Għall-pubbliku, ir-Regolament iġib valur miżjud sinifikanti tal-UE billi jagħmilha possibbli li d-data dwar ir-rilaxx tiġi mqabbla faċilment għal industriji differenti tal-UE u billi tiġi pprovduta data dwar ir-rilaxx kumulattiv fl-UE. Din id-data tkun ħafna aktar diffiċli biex tinġabar u tiġi kkompilata minn 27 reġistru nazzjonali separat.
Għalhekk, ir-Regolament iġib valur miżjud sinifikanti, meta mqabbel ma’ dak li jista’ jinkiseb mill-azzjoni individwali ta’ 27 pajjiż, u s-suġġett tar-Regolament ikompli jiġġustifika l-azzjoni tal-UE.
•
Proporzjonalità
Huwa diffiċli li jitkejlu l-kostijiet u l-benefiċċji tal-PRTR Ewropew. Madankollu, il-partijiet ikkonċernati jqisu l-kostijiet stmati tal-PRTR Ewropew bħala relattivament baxxi meta mqabbla mal-kontribut sinifikanti tiegħu għat-trasparenza tad-data u l-parteċipazzjoni pubblika.
L-Artikolu 16, dispożizzjoni ineffiċjenti fir-Regolament dwar il-PRTR Ewropew, diġà tneħħiet — kienet tirrikjedi li l-Istati Membri jirrapportaw dwar l-implimentazzjoni ġenerali tal-PRTR Ewropew kull tliet snin.
•
Għażla tal-istrument
Filwaqt li r-Regolament (KE) Nru 166/2006 jikkostitwixxi l-punt tat-tluq għal din il-Proposta, jixraq li dan jiġi rrevokat u sostitwit għall-finijiet ta’ ċarezza ġuridika. L-Anness III fih it-tabella ta’ korrelazzjoni. Peress li l-proposta għandha l-għan li tħassar u li tissostitwixxi Regolament tal-UE, il-proposta tieħu l-forma ta’ Regolament.
3.
RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
•
Evalwazzjonijiet ex post/kontrolli tal-idoneità tal-leġiżlazzjoni eżistenti
L-evalwazzjoni REFIT tal-2017 tar-Regolament ikkonkludiet li kien adattat għall-fini tiegħu u meqjus bħala liġi ambjentali importanti tal-UE minħabba l-informazzjoni li jagħmel disponibbli għall-pubbliku dwar il-prestazzjoni ambjentali ta’ industriji kbar.
Il-partijiet ikkonċernati japprezzaw il-PRTR Ewropew. Huma jirrikonoxxu li huwa faċli li wieħed jaċċessah u li fih sett ta’ data siewi u konsistenti, mingħajr l-ebda alternattiva komparabbli għad-data dwar ir-rilaxx industrijali fl-UE.
L-evalwazzjoni ma identifikatx kif ittejjeb jew tissimplifika b’mod sinifikanti r-Regolament eżistenti. Madankollu, hija identifikat aspetti li jistgħu jittejbu fl-oqsma li ġejjin:
–filwaqt li l-Istati Membri dehru li qed jikkonverġu fuq prattiki tajbin, l-aġġornament tal-gwida eżistenti tal-UE jista’ jgħin biex id-data tiġi interpretata b’mod aktar konsistenti;
–il-PRTR Ewropew jista’ jkun aktar effiċjenti u konsistenti jekk ikun allinjat aktar ma’ obbligi oħra tar-rapportar ambjentali relatati mill-qrib;
–l-obbligu għall-Istati Membri li jirrapportaw dwar l-implimentazzjoni tagħhom tar-Regolament dwar il-PRTR Ewropew kull tliet snin ma kienx meqjus utli ħafna, u dan jindika li kien hemm lok għal simplifikazzjoni;
–iż-żieda ta’ data aktar kuntestwali mal-PRTR Ewropew eżistenti tista’ tagħmlu aktar utli bħala sors komprensiv ta’ informazzjoni ambjentali.
Fl-2021 tlestiet valutazzjoni tal-impatt tar-Regolament, li tagħti kunsiderazzjoni aktar dettaljata lill-kwistjonijiet li ġejjin.
–Aspetti ineffettivi tal-leġiżlazzjoni — kif għandhom jiġu indirizzati oqsma fejn ir-regoli attwali jistgħu jkunu aktar effettivi u effiċjenti.
–Kontribut għall-effiċjenza fir-riżorsi u għall-produzzjoni inqas tossika — id-determinazzjoni ta’ inkwinanti ġodda possibbli biex jiżdiedu mar-Regolament, speċjalment biex jiġi allinjat aħjar mal-istandards ta’ kwalità ambjentali (għall-arja u għall-ilma) u mar-Regolament REACH; jiġi kkunsidrat kif ir-Regolament jista’ jikkontribwixxi għall-iżvilupp u għaż-żamma tal-ekonomija ċirkolari, eż. billi jsir rapportar dwar l-użu tal-enerġija, l-ilma u l-materja prima.
–Kontribut għad-dekarbonizzazzjoni — kif ir-Regolament jista’ jgħin biex diversi attivitajiet industrijali jsiru aktar effiċjenti fl-użu tal-karbonju.
–Ambitu settorjali — id-determinazzjoni dwar jekk ir-Regolament iħallix barra attivitajiet ambjentali importanti u kif huwa allinjat mal-leġiżlazzjoni relatata u jappoġġaha (speċjalment l-IED, l-MCPD u d-Direttiva UWWT).
•
Konsultazzjonijiet mal-partijiet ikkonċernati
Il-feedback inizjali ġie pprovdut fuq il-valutazzjoni tal-impatt tal-bidu ppubblikata fis-sit web tal-Kummissjoni “Semma’ Leħnek”. Il-konsultazzjoni saret mit-28 ta’ Settembru 2020 sas-26 ta’ Ottubru 2020, u rċeviet 37 rispons.
Bħala parti mill-valutazzjoni tal-impatt, konsultazzjoni pubblika miftuħa dwar ir-reviżjoni tal-IED u r-Regolament damet għaddejja 13-il ġimgħa, mit-22 ta’ Diċembru 2020 sat-23 ta’ Marzu 2021. Kien hemm 24 mistoqsija, u erba’ minnhom koprew direttament ir-Regolament. Il-pubbliku u l-organizzazzjonijiet ġew imħeġġa jimlew kwestjonarju online dwar il-pjattaforma tal-Istħarriġ tal-UE. Il-konsultazzjoni ġiet ippubblikata fis-sit web “Semma’ Leħnek”, u l-partijiet ikkonċernati ġew infurmati wkoll dwar it-tnedija tagħha permezz tal-posta elettronika. Ir-rispondenti tal-konsultazzjoni setgħu jibagħtu wkoll dokumenti ta’ pożizzjoni.
Il-konsultazzjoni ġiet segwita minn stħarriġ immirat fost il-partijiet ikkonċernati. L-istħarriġ kien miftuħ għal tmien ġimgħat (mit-8 ta’ Marzu sat-30 ta’ April 2021), imbagħad ġie estiż b’ġimagħtejn (sal-14 ta’ Mejju 2021), u għalhekk setgħu jiġu ppreżentati aktar risponsi. Stediniet biex jimtela l-istħarriġ intbagħtu permezz tal-posta elettronika lil aktar minn 800 parti kkonċernata tal-IED u tal-PRTR Ewropew.
L-istħarriġ talab lill-partijiet ikkonċernati jidentifikaw u jivvalutaw għażliet differenti. Dan kien jikkonsisti f’61 mistoqsija, miġbura madwar sitt oqsma problematiċi identifikati (ara hawn taħt). Xi mistoqsijiet tfasslu apposta għal partijiet ikkonċernati speċifiċi: L-awtoritajiet tal-Istati Membri (fi kwalunkwe livell ta’ amministrazzjoni), l-industrija (kumpaniji individwali jew assoċjazzjonijiet kummerċjali) jew gruppi oħra (NGOs ambjentali, esperti tekniċi, akkademiċi u riċerkaturi). Il-verżjonijiet Word u PDF tal-istħarriġ intbagħtu bil-posta elettronika biex jgħinu fil-ġbir tal-informazzjoni u għal trasparenza sħiħa. Tliet assoċjazzjonijiet industrijali u NGO waħda ppreżentaw materjal ta’ akkumpanjament, bħal dokumenti ta’ pożizzjoni, rimarki ta’ spjegazzjoni u sommarji ta’ messaġġi ewlenin.
Barra minn hekk, saru 30 intervista ma’ rappreżentanti ta’ korpi internazzjonali, istituzzjonijiet tal-UE, awtoritajiet nazzjonali, assoċjazzjonijiet tal-industrija jew tal-kummerċ, organizzazzjonijiet mhux governattivi u oħrajn.
L-input ewlieni li wasal dwar is-sitt problemi identifikati huwa deskritt hawn taħt.
1.
Attivitajiet u livelli limitu ta’ attività: Il-biċċa l-kbira tar-rispondenti, mill-gruppi kollha tal-partijiet ikkonċernati, qiesu li huwa importanti li l-kategorizzazzjonijiet tal-attività tar-Regolament u tal-IED jiġu allinjati. Il-biċċa l-kbira tar-riċerkaturi, l-NGOs u l-awtoritajiet pubbliċi kienu tal-fehma li dan jgħin fil-ħidma tagħhom, filwaqt li l-biċċa l-kbira tar-rispondenti mill-industrija ħasbu li dan ma jagħmel l-ebda differenza għall-kompiti attwali tagħhom tal-PRTR Ewropew. Dan l-allinjament tqies bħala opportunità biex il-ġbir tad-data u r-rapportar isiru aktar faċli, u biex l-attività ta’ kontroll ambjentali u l-kwalità tad-data jsiru aktar konsistenti.
2.
Inkwinanti u livelli limitu għar-rapportar tar-rilaxxi: Ir-rispondenti ġew mistoqsija dwar l-importanza li jiżdiedu 52 inkwinant identifikati fl-Anness II tar-Regolament. Kien hemm appoġġ ġenerali għal din il-proposta, iżda r-riżultati jirriflettu l-għarfien espert tar-rispondenti u l-importanza ta’ dawn l-inkwinanti fis-setturi industrijali rispettivi. Il-parteċipanti fl-istħarriġ issuġġerew ukoll għadd ta’ inkwinanti oħra li jenħtieġ li jiġu inklużi.
3.
Informazzjoni biex jiġi segwit il-progress li qed isir lejn l-iżvilupp tal-ekonomija ċirkolari u d-dekarbonizzazzjoni tal-industrija: Ħafna riċerkaturi, NGOs u awtoritajiet pubbliċi qiesu li huwa importanti ħafna jew pjuttost importanti li tiġi rrapportata informazzjoni kuntestwali addizzjonali dwar il-konsum tal-enerġija u l-irkupru/l-użu mill-ġdid tal-enerġija. Madankollu, perċentwal żgħir biss tal-partijiet ikkonċernati mill-industrija ħasbu li kien importanti, u spiss semmew il-piż amministrattiv addizzjonali bħala tħassib.
4.
Metodi tar-rapportar u fluss tad-data: Il-biċċa l-kbira tar-rispondenti, mill-gruppi kollha tal-partijiet ikkonċernati, qiesu li kien importanti jew tal-anqas ftit importanti li tkun permessa flessibbiltà għar-rapportar minn fuq għal isfel (mill-Istati Membri) f’xi setturi industrijali. Fir-rigward tat-tqassir tal-iskadenzi tar-rapportar, ħafna partijiet ikkonċernati tal-industrija indikaw li l-kwalità tad-data kienet aktar importanti mill-veloċità tar-rapportar tad-data.
5.
Aċċess għall-informazzjoni dwar l-PRTR Ewropew: Ir-riċerkaturi, l-NGOs, l-awtoritajiet pubbliċi u l-pubbliku appoġġaw ir-rekwiżit li jirrapportaw ir-rilaxxi f’“livell ta’ sottofaċilità”. Ir-rappreżentanti tal-industrija wrew inqas appoġġ, u kienu tal-fehma li dan ikollu effett sinifikanti fuq l-ammont ta’ xogħol tagħhom.
6.
Rilaxxi minn sorsi u prodotti diffużi: Ir-rispondenti kollha kienu tal-fehma li l-għażliet proposti jgħinu biex tittejjeb l-informazzjoni attwali tal-PRTR Ewropew dwar ir-rilaxxi minn sorsi diffużi, b’appoġġ partikolari għal mudelli standardizzati u fatturi ta’ rilaxx. Il-biċċa l-kbira tal-partijiet ikkonċernati tal-industrija ħasbu li r-rilaxxi mill-prodotti ma kinux importanti, filwaqt li r-riċerkaturi, l-NGOs u l-awtoritajiet ħasbu li dawn kienu pjuttost importanti jew importanti ħafna.
•
Valutazzjoni tal-impatt
Fl-20 ta’ Diċembru 2021, il-Bord tal-Iskrutinju Regolatorju ħareġ “opinjoni pożittiva b’xi riżervi”. Din se tiġi ppubblikata ladarba l-Kummissjoni tkun adottat din il-proposta. Sadanittant, id-dokument ta’ ħidma tal-persunal ġie emendat biex iqis is-sejbiet tal-Bord.
•
Idoneità regolatorja u simplifikazzjoni
F’konformità mal-impenn tal-Kummissjoni għal regolamentazzjoni aħjar, din il-proposta tħejjiet b’mod inklużiv, abbażi ta’ trasparenza sħiħa u impenn kontinwu mal-partijiet ikkonċernati, filwaqt li tqiesu kemm il-feedback estern kif ukoll l-iskrutinju estern biex jiġi żgurat li l-proposta tilħaq il-bilanċ it-tajjeb.
Il-PRTR Ewropew huwa rikonoxxut bħala l-aħjar prattika fir-rapportar issimplifikat u koerenti. Filwaqt li dan jillimita l-potenzjal għal simplifikazzjoni ulterjuri, il-proposti ġew iddisinjati biex jimminimizzaw piż addizzjonali.
Ir-rapportar fil-livell ta’ installazzjoni minflok fil-livell tal-faċilità se jiżgura koerenza sħiħa mar-rapportar skont id-Direttiva 2010/75, b’hekk se jnaqqas kwalunkwe piż amministrattiv relatat mar-rapportar f’livelli tekniċi differenti fis-siti industrijali.
Ir-rapportar minn fuq għal isfel issimplifikat għat-trobbija tal-bhejjem u għall-akkwakultura se jħaffef il-piż amministrattiv fuq il-farms tal-bhejjem u n-negozji tal-akkwakultura b’EUR 11,8-il miljun fis-sena għall-amministrazzjoni pubblika: €0,670 miljun.
Peress li r-Regolament (KE) Nru 166/2006 tal-PRTR Ewropew eżistenti jeħtieġ li jiġi mmodifikat sostanzjalment, se jitħassar u jiġi sostitwit b’Regolament ġdid sabiex jipprovdi ċertezza ġuridika, ċarezza u trasparenza.
•
Drittijiet fundamentali
Il-proposta tirrispetta d-drittijiet fundamentali, b’mod partikolari dawk fil-Karta tad-Drittijiet Fundamentali tal-Unjoni Ewropea. Tikkontribwixxi wkoll għad-dritt għal livell għoli ta’ protezzjoni ambjentali f’konformità mal-prinċipju tal-iżvilupp sostenibbli, kif stabbilit fl-Artikolu 37 tal-Karta.
4.
IMPLIKAZZJONIJIET BAĠITARJI
Il-proposta se jkollha implikazzjonijiet baġitarji għar-riżorsi umani u amministrattivi fil-Kummissjoni u fl-Aġenzija Ewropea għall-Ambjent. Id-dikjarazzjoni finanzjarja fl-Anness tipprovdi dawn id-dettalji.
Il-Kummissjoni se jkollha aktar xogħol x’tagħmel biex timplimenta l-kamp ta’ applikazzjoni usa’ tar-Regolament (jiġifieri kopertura settorjali usa’) u l-azzjoni intensifikata (eż. fatturi addizzjonali bħall-użu tar-riżorsi u r-rapportar fil-livell tal-installazzjoni). Se twettaq din il-ħidma f’konformità mal-allokazzjoni eżistenti tar-riżorsi.
L-Aġenzija Ewropea għall-Ambjent se tappoġġa lill-Kummissjoni billi tiġġestixxi l-Portal dwar l-Emissjonijiet Industrijali (il-Portal) u timplimenta l-arranġamenti prattiċi biex takkomoda l-kamp ta’ applikazzjoni usa’ u l-azzjoni intensifikata. Dan jeħtieġ total ta’ żewġ ekwivalenti full-time addizzjonali.
5.
ELEMENTI OĦRA
•
Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar
Ir-rilaxxi totali ta’ inkwinanti għal kull settur, abbażi tad-data rrapportata mill-operaturi lill-PRTR Ewropew, se jibqgħu indikaturi ewlenin biex jiġi segwit il-progress biex jintlaħqu l-objettivi ta’ din l-inizjattiva. Il-PRTR Ewropew imtejjeb se jtejjeb il-monitoraġġ tal-prestazzjoni ambjentali ta’ setturi industrijali differenti.
·Rapportar aktar dettaljat tal-inkwinanti fil-livell tal-installazzjoni se jippermetti l-analiżi tal-proċessi ewlenin f’setturi fejn il-prestazzjoni ambjentali qed titjieb jew għadha lura.
·L-inklużjoni tar-rapportar tal-użu tar-riżorsi se tippermetti li jiġu definiti indikaturi ġodda dwar l-użu tal-materjali, tal-ilma u tal-enerġija. Dan se jagħmilha possibbli li jiġi segwit it-titjib fl-effiċjenza tar-riżorsi.
·Aġġornamenti regolari tas-sustanzi koperti mill-PRTR Ewropew se jagħmluha possibbli li jiġu definiti indikaturi tar-rilaxx ta’ sustanzi ta’ tħassib emerġenti jew attwali. Dan min-naħa tiegħu se jagħmilha possibbli li jiġi segwit it-titjib fil-mod kif dawn is-sustanzi jintużaw u jiġu ġestiti.
Dan it-titjib se jgħin ukoll biex jiġi żgurat li dan il-monitoraġġ ikun jista’ jintuża b’mod effettiv fil-qafas usa’ ta’ monitoraġġ u prospettiva ta’ tniġġis żero, li għandu jiġi ppubblikat kull sentejn mill-2022. Id-data dwar it-tniġġis tal-arja, tal-ilma u tal-ħamrija disponibbli bħala parti mill-qafas ta’ monitoraġġ tat-tniġġis żero se tgħin biex jiġi evalwat l-impatt tat-tniġġis imnaqqas mill-installazzjonijiet koperti mill-IED u mir-Regolament.
Għall-miżuri tal-PRTR Ewropew, l-indikaturi ewlenin se jinkludu t-tempestività u l-kompletezza tar-rapportar — skont l-Istat Membru, is-settur u l-mezz ambjentali. L-istatistika tal-web mill-portal se tkejjel l-aċċess pubbliku għall-informazzjoni kkombinata tal-IED/PRTR Ewropew.
Ir-reazzjoni għat-titjib leġiżlattiv se tiġi mmonitorjata bl-użu ta’ stħarriġ fost il-partijiet ikkonċernati tal-IED u tal-PRTR Ewropew.
•
Spjegazzjoni fid-dettall tad-dispożizzjonijiet speċifiċi tal-proposta
L-Artikolu 1 jispeċifika s-suġġett, jiġifieri l-istabbiliment tal-Portal dwar l-Emissjonijiet Industrijali (il-Portal) bħala l-bażi tad-data elettronika online l-ġdida li tissostitwixxi l-PRTR Ewropew u li fiha d-data kollha rrapportata skont ir-Regolament; l-implimentazzjoni tal-Protokoll tal-UNECE dwar ir-Reġistri dwar ir-Rilaxx u t-Trasferiment ta’ Inkwinanti; il-faċilitazzjoni tal-aċċess pubbliku għall-informazzjoni ambjentali u tal-parteċipazzjoni pubblika fit-teħid ta’ deċiżjonijiet ambjentali; u l-kapaċità li jiġu evalwati u vvalutati aħjar l-impatti ambjentali tal-leġiżlazzjoni dwar l-emissjonijiet industrijali.
L-Artikolu 2 jiddefinixxi t-termini ewlenin bil-għan li jipprovdi ċertezza u ċarezza ġuridika u jiżgura l-implimentazzjoni korretta u sħiħa tiegħu. Dawn id-definizzjonijiet jindirizzaw inter alia it-termini “installazzjoni”, “rilaxx”, “trasferiment barra mis-sit”, “sorsi diffużi”, “operatur”. Għal raġunijiet ta’ konsistenza ma’ leġiżlazzjoni oħra relatata tal-UE, xi definizzjonijiet jirreferu għad-definizzjonijiet stabbiliti fl-IED u fid-Direttiva Qafas dwar l-Iskart 2008/98/UE.
L-Artikolu 3 jispeċifika liema data se jkun fih il-Portal, jiġifieri data rrapportata mill-operaturi u mill-Istati Membri f’konformità mal-Artikolu 5 u informazzjoni ambjentali rilevanti addizzjonali rrapportata skont leġiżlazzjoni relatata oħra tal-UE.
L-Artikolu 4 jindirizza d-disinn u l-istruttura tal-Portal u jispeċifika li d-data hija ppreżentata kemm f’forma aggregata kif ukoll f’forma mhux aggregata biex tippermetti lill-utenti tal-Portal iwettqu tfittxijiet speċifiċi inter alia permezz ta’ installazzjoni jew attività. L-objettiv huwa li jiġu żgurati l-faċilità u l-utilità massimi għall-utenti tal-Portal f’termini ta’ aċċess għad-data rrapportata rilevanti.
L-Artikolu 5 jiddeskrivi d-data li għandha tiġi rrapportata kull sena mill-operaturi tal-installazzjonijiet industrijali kkonċernati, kif elenkati fl-Anness I, lill-Istati Membri tagħhom. Dan jinkludi r-rilaxxi fl-ambjent tal-inkwinanti elenkati fl-Anness II, it-trasferimenti barra mis-sit tal-iskart u tal-ilma mormi, l-użu tar-riżorsi (eż. l-ilma, il-materja prima), l-informazzjoni li tpoġġi lil dik id-data f’kuntest (eż. il-volum annwali tal-produzzjoni) u jekk l-installazzjoni hijiex koperta minn leġiżlazzjoni oħra relatata mal-UE, bħall-IED.
Sabiex jiġi evitat rapportar doppju, l-Artikolu 5(1)(b) jiċċara li t-trasferimenti barra mis-sit ta’ skart li huma soġġetti għar-rimi bi “trattament tal-art” jew b’“injezzjoni fil-fond” jenħtieġ li jiġu rrapportati biss bħala rilaxx fl-art mill-operatur tal-installazzjoni minn fejn joriġina l-iskart.
Id-data dwar ir-rilaxxi u t-trasferimenti għandha tiġi rrapportata bħala totali annwali tal-attivitajiet intenzjonati, aċċidentali, ta’ rutina u mhux ta’ rutina kollha. L-Artikolu 5(1) u l-Anness II jistabbilixxu valuri ta’ livelli limitu li jiskattaw l-obbligu tar-rapportar. Meta dawk il-valuri ta’ livelli limitu ma jinqabżux, l-operaturi għandhom jiddikjaraw b’mod espliċitu li r-rilaxxi annwali u/jew it-trasferimenti barra mis-sit tagħhom kienu taħt dawk il-valuri ta’ livelli limitu. Dan għandu l-għan li jindirizza nuqqas ta’ implimentazzjoni, jiġifieri ambigwità dwar jekk ir-redditi żero tal-operatur jirriflettux nuqqas fir-rapportar jew ir-rilaxxi u t-trasferimenti taħt il-livelli limitu tar-rapportar applikabbli. Bl-istess mod, l-Artikolu 5(3) jindirizza nuqqas ieħor ta’ implimentazzjoni, fir-rigward tal-metodi użati mill-operaturi biex jikkwantifikaw ir-rilaxxi u t-trasferimenti barra mis-sit tagħhom, billi jistabbilixxi l-ġerarkija ta’ kwantifikazzjoni tal-1. Kejl; 2. Kalkolu; u 3. Stima. Sabiex jippermettu l-awditjar tar-rapporti tal-operaturi, l-operaturi jenħtieġ li jżommu rekords, tad-data li minnha tkun ġiet derivata l-informazzjoni rrapportata, għal perjodu ta’ ħames snin.
L-operaturi ta’ xi installazzjonijiet jistgħu ma jkollhomx ir-riżorsi meħtieġa biex jikkwantifikaw ir-rilaxxi intenzjonati u annwali tagħhom tal-inkwinanti elenkati fl-Anness II. Għalhekk, bħala simplifikazzjoni amministrattiva, l-Istati Membri jistgħu jikkwantifikaw tali rilaxxi f’isem l-operaturi tal-installazzjonijiet għat-trobbija tat-tjur, tal-ħnieżer u tal-bhejjem tal-ifrat (l-Attività 2 tal-Anness I) u għall-akkwakultura (l-Attività 7 tal-Anness I).
Dan jirrikjedi wkoll li l-Istati Membri jistabbilixxu skadenza għall-operaturi biex jipprovdu d-data lill-awtoritajiet kompetenti tagħhom.
L-Artikolu 6 jindirizza r-rapportar annwali sussegwenti tad-data lill-Kummissjoni mill-Istati Membri. Il-format u d-data sa meta l-Istati Membri għandhom jirrapportaw id-data għandhom jiġu stabbiliti permezz ta’ atti ta’ implimentazzjoni. F’dan ir-rigward, id-Deċiżjoni ta’ Implimentazzjoni tal-Kummissjoni (UE) 2019/1741, li tistabbilixxi l-format tad-data u l-iskadenza tar-rapportar, tibqa’ applikabbli. Il-Kummissjoni, assistita mill-Aġenzija Ewropea għall-Ambjent, għandha tinkorpora d-data tal-Istati Membri fil-Portal fi żmien xahar minn meta tirċieviha mingħand l-Istati Membri.
L-Artikolu 7 jindirizza r-rapportar ta’ rilaxxi ta’ inkwinanti minn sorsi diffużi. Fejn ma tiġi rrapportata l-ebda data bħal din, il-Kummissjoni għandha s-setgħa li tadotta atti delegati biex tagħti bidu lil tali rapportar.
L-Artikolu 8 jikkonċerna l-kwalità tad-data rrapportata. L-operaturi huma meħtieġa jiżguraw il-kwalità tad-data u l-awtoritajiet kompetenti jridu jivvalutaw l-akkuratezza, il-kompletezza, il-konsistenza u l-kredibbiltà ta’ dik id-data. Il-Kummissjoni tista’ tadotta linji gwida rilevanti permezz ta’ atti ta’ implimentazzjoni.
L-Artikoli 9, 10 u 11: F’konformità mal-Konvenzjoni tal-UNECE dwar l-Aċċess għall-Informazzjoni, il-Parteċipazzjoni Pubblika fit-Teħid tad-Deċiżjonijiet u l-Aċċess għall-Ġustizzja fi Kwistjonijiet Ambjentali, il-Protokoll u l-leġiżlazzjoni rilevanti tal-UE, inkluża d-Direttiva 2003/4/KE tal-Parlament Ewropew u tal-Kunsill, dawn id-dispożizzjonijiet għandhom l-għan li jiżguraw:
(i) aċċess pubbliku mingħajr ħlas u online għad-data li tinsab fil-Portal filwaqt li jiġi speċifikat li dan huwa mingħajr preġudizzju għar-restrizzjonijiet stabbiliti fid-dritt tal-UE dwar l-aċċess għall-informazzjoni ambjentali, eż. il-protezzjoni tal-interessi kummerċjali tal-operaturi u l-informazzjoni kunfidenzjali;
(ii) parteċipazzjoni pubblika fl-iżvilupp ulterjuri tal-Portal; u
(iii) id-dritt tal-pubbliku li jaċċessa l-ġustizzja fir-rigward tal-aċċess għall-informazzjoni ambjentali.
L-Artikolu 12 jirreferi għall-iżvilupp u għall-aġġornament regolari tal-gwida biex tiġi appoġġata l-implimentazzjoni ta’ dan ir-Regolament. Il-gwida għandha tindirizza inter alia l-proċeduri tar-rapportar u l-assigurazzjoni tal-kwalità tad-data rrapportata.
L-Artikolu 13 jirrikjedi li l-Kummissjoni u l-Istati Membri jippromwovu l-għarfien pubbliku tal-Portal.
L-Artikoli 14 u 15: L-Artikolu 14 jagħti s-setgħa lill-Kummissjoni li tadotta atti delegati biex temenda l-Annessi I u II sabiex tiżgura li r-Regolament jibqa’ attwali.
Fir-rigward tal-Anness I, dan jipprovdi l-kapaċità li jiżdiedu attivitajiet industrijali jew agrikoli ġodda li jaffettwaw b’mod avvers, jew li jistgħu jaffettwaw, l-ambjent jew is-saħħa tal-bniedem bħala riżultat ta’ rilaxxi sinifikanti ta’ inkwinanti jew l-użu tar-riżorsi. L-attivitajiet jista’ jkollhom jiżdiedu wkoll biex jiġu implimentati bidliet li jsiru fil-Protokoll dwar il-PRTRs.
Bl-istess mod, hemm dispożizzjoni biex jiġi aġġornat l-Anness II billi jiżdiedu inkwinanti li huma soġġetti għal kontrolli regolatorji speċifiċi skont il-leġiżlazzjoni tal-UE dwar is-sustanzi kimiċi, l-ilma u l-kwalità tal-arja, u minħabba l-periklu potenzjali tagħhom għall-ambjent jew għas-saħħa tal-bniedem. Jista’ jkun hemm bżonn li jiżdiedu wkoll inkwinanti biex jiġu applikati bidliet li jsiru fil-Protokoll dwar il-PRTRs. Barra minn hekk, din id-dispożizzjoni tippermetti l-iffissar ta’ livelli limitu tar-rapportar li jiżguraw qbid ta’ mill-inqas 90 % tar-rilaxxi ta’ inkwinanti mill-attivitajiet tal-Anness I.
L-Artikolu 15 jistabbilixxi l-kundizzjonijiet għall-eżerċitar ta’ dawn id-delegi.
L-Artikolu 16 huwa d-dispożizzjoni tal-komitoloġija li tispeċifika li l-Kummissjoni se tkun assistita minn kumitat u li tapplika l-proċedura ta’ eżami stabbilita fir-Regolament tal-komitoloġija (UE) Nru 182/2011. Dan jipprevedi l-adozzjoni possibbli tal-atti ta’ implimentazzjoni tal-Kummissjoni għall-istabbiliment jew għall-aġġornament tad-data u l-format tar-rapportar skont l-Artikolu 6(1).
L-Artikolu 17 jispeċifika l-kriterji li għandhom jiġu kkunsidrati mill-Istati Membri meta jistabbilixxu penali għall-ksur tad-dispożizzjonijiet tar-Regolament u jistieden lill-Istati Membri jadottaw miżuri ta’ assigurazzjoni tal-konformità biex jipprevjenu u jidentifikaw il-ksur.
L-Artikoli 18, 19 u 20: L-Artikolu 18 jikkonċerna t-tħassir u s-sostituzzjoni tar-Regolament (KE) 166/2006. L-Artikolu 20 jindirizza d-data tad-dħul fis-seħħ, filwaqt li l-Artikolu 19 jikkonċerna d-dispożizzjonijiet tranżizzjonali sa dik id-data.
L-Anness I jispeċifika l-attivitajiet li għalihom japplika r-Regolament, jiġifieri:
·l-installazzjonijiet li jwettqu attività waħda jew aktar speċifikati fl-Annessi I jew Ia tad-Direttiva 2010/75/UE u ogħla mil-livelli limitu applikabbli speċifikati fiha;
·l-impjanti tal-kombustjoni ta’ daqs medju ogħla minn kapaċità ta’ 20 MW (megawatts);
·l-attivitajiet addizzjonali li huma speċifikati fil-Protokoll iżda li mhumiex koperti mil-leġiżlazzjoni ta’ hawn fuq, jiġifieri: l-estrazzjoni taħt l-art (inkluża l-estrazzjoni ta’ żejt mhux maħdum jew ta’ gass mhux maħdum); il-proċess ta’ tneħħija tas-saffi tal-wiċċ ta’ minjieri u xogħol fil-barrieri; l-impjanti akbar għat-trattament tal-ilma mormi urban; l-akkwakultura; u l-bini/iż-żarmar jew it-tneħħija ta’ żebgħa/kisi biż-żebgħa tal-bastimenti.
Dan il-kamp ta’ applikazzjoni għandu l-għan li jikseb koerenza ma’ leġiżlazzjoni ambjentali oħra relatata mal-UE, inkluż id-Direttiva 2010/75/UE u d-Direttiva (UE) 2015/2193.
L-Anness II jistabbilixxi l-lista ta’ inkwinanti li għandhom jiġu rrapportati u l-livelli limitu ta’ akkumpanjament li jiskattaw ir-rapportar tar-rilaxxi.
L-Anness III huwa tabella ta’ korrelazzjoni li telenka d-dispożizzjonijiet tar-Regolament (KE) 166/2006 u d-dispożizzjonijiet korrispondenti ta’ din il-proposta.
2022/0105 (COD)
Proposta għal
REGOLAMENT TAL-PARLAMENT EWROPEW U TAL-KUNSILL
dwar ir-rapportar ta’ data ambjentali minn installazzjonijiet industrijali u l-istabbiliment ta’ Portal dwar l-Emissjonijiet Industrijali
(Test b’rilevanza għaż-ŻEE)
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea u, b’mod partikolari, l-Artikolu 192(1) tiegħu,
Wara li kkunsidraw il-proposta tal-Kummissjoni Ewropea,
Wara li l-abbozz tal-att leġiżlattiv intbagħat lill-parlamenti nazzjonali,
Wara li kkunsidraw l-opinjoni tal-Kumitat Ekonomiku u Soċjali Ewropew,
Wara li kkunsidraw l-opinjoni tal-Kumitat tar-Reġjuni,
Filwaqt li jaġixxu skont il-proċedura leġiżlattiva ordinarja,
Billi:
(1)It-tmien Programm ta’ Azzjoni ambjentali tal-Unjoni Ewropea adottat bid-Deċiżjoni Nru XXX/202X/UE tal-Parlament Ewropew u tal-Kunsill jirrikjedi li l-Kummissjoni, l-Istati Membri, l-awtoritajiet reġjonali u lokali u l-partijiet ikkonċernati, japplikaw b’mod effettiv standards għoljin ta’ trasparenza, parteċipazzjoni pubblika u l-aċċess għall-ġustizzja f’konformità mal-Konvenzjoni tal-UNECE dwar l-Aċċess għall-Informazzjoni, il-Parteċipazzjoni Pubblika fit-Teħid tad-Deċiżjonijiet u l-Aċċess għall-Ġustizzja fi Kwistjonijiet Ambjentali (“il-Konvenzjoni ta’ Aarhus”), kemm fil-livell tal-Unjoni kif ukoll fil-livell tal-Istati Membri.
(2)Il-Konvenzjoni ta’ Aarhus, irratifikata mill-Komunità Ewropea fis-17 ta’ Frar 2005 bid-Deċiżjoni tal-Kunsill 2005/370/KE, tirrikonoxxi li ż-żieda fl-aċċess pubbliku għall-informazzjoni ambjentali u t-tixrid ta’ tali informazzjoni jikkontribwixxu għal sensibilizzazzjoni akbar dwar kwistjonijiet ambjentali, skambju liberu ta’ fehmiet, parteċipazzjoni aktar effettiva mill-pubbliku fit-teħid tad-deċiżjonijiet ambjentali u, eventwalment, għal ambjent aħjar.
(3)Fit-2 ta’ Diċembru 2005, il-Komunità Ewropea rratifikat il-Protokoll tal-UNECE dwar ir-Reġistri dwar ir-Rilaxx u t-Trasferiment ta’ Inkwinanti (“il-Protokoll”) bid-Deċiżjoni tal-Kunsill 2006/61/KE.
(4)Ir-Regolament (KE) Nru 166/2006 tal-Parlament Ewropew u tal-Kunsill, stabbilixxa Reġistru Ewropew dwar ir-Rilaxx u t-Trasferiment ta’ Inkwinanti sabiex jiġi implimentat il-Protokoll.
(5)It-tieni rapport tal-Kummissjoni dwar l-implimentazzjoni tar-Regolament (KE) Nru 166/2006 kkonkluda li l-obbligi tar-rapportar jenħtieġ li jiġu ssimplifikati billi jiġu esplorati aktar sinerġiji ma’ leġiżlazzjoni ambjentali relatata oħra tal-Unjoni dwar it-tniġġis minn installazzjonijiet industrijali, inkluża, b’mod partikolari d-Direttiva 2010/75/UE tal-Parlament Ewropew u tal-Kunsill u d-Direttiva tal-Kunsill 91/271/KEE. Ir-rapport enfasizza wkoll il-ħtieġa li jiġu esplorati għażliet għal informazzjoni kuntestwali addizzjonali biex id-data rrapportata ssir aktar effettiva.
(6)Il-Komunikazzjoni tal-Kummissjoni “Lejn Tniġġis Żero għall-Arja, għall-Ilma u għall-Ħamrija”, stabbiliet pjan ta’ azzjoni tal-Unjoni dwar tniġġis żero, enerġija, dekarbonizzazzjoni u ekonomija ċirkolari, u ppromoviet l-użu effettiv tal-informazzjoni rrapportata fil-qafas usa’ ta’ monitoraġġ u prospettiva ta’ tniġġis żero u taħt il-qafas ta’ monitoraġġ previst fit-Tmien Programm ta’ Azzjoni Ambjentali.
(7)F’konformità mal-konklużjonijiet tat-tieni rapport tal-Kummissjoni dwar l-implimentazzjoni tar-Regolament (KE) Nru 166/2006, f’Ġunju 2021, il-Kummissjoni, bl-appoġġ tal-Aġenzija Ewropea għall-Ambjent (“l-Aġenzija”), żviluppat Portal dwar l-Emissjonijiet Industrijali (“il-Portal”) biex jissostitwixxi r-Reġistru Ewropew dwar ir-Rilaxx u t-Trasferiment ta’ Inkwinanti u għalhekk itejjeb is-sinerġiji mar-rapportar skont id-Direttiva 2010/75/UE.
(8)Jenħtieġ li l-Portal jipprovdi lill-pubbliku b’aċċess mingħajr ħlas u online għal sett ta’ data integrat u koerenti ulterjuri dwar il-pressjonijiet ambjentali ewlenin iġġenerati minn installazzjonijiet industrijali peress li tali data tikkostitwixxi għodda kosteffettiva għat-twettiq ta’ paraguni u għat-teħid ta’ deċiżjonijiet fi kwistjonijiet ambjentali, filwaqt li jinkoraġġixxi prestazzjoni ambjentali aħjar, jittraċċa x-xejriet, juri l-progress fit-tnaqqis tat-tniġġis, fl-installazzjonijiet ta’ valutazzjoni komparattiva, fil-monitoraġġ tal-konformità mal-ftehimiet internazzjonali rilevanti, fl-istabbiliment tal-prijoritajiet u fl-evalwazzjoni tal-progress miksub permezz tal-politiki u l-programmi ambjentali tal-Unjoni u nazzjonali.
(9)Jenħtieġ li l-Portal jippreżenta d-data li jkun fih f’forom aggregati u mhux aggregati biex l-utenti jkunu jistgħu jwettqu tfittxijiet immirati.
(10)Ir-rekwiżiti tar-rapportar jenħtieġ li japplikaw fil-“livell tal-installazzjoni” sabiex jiġu implimentati sinerġiji bejn il-Portal u l-bażijiet tad-data dwar il-pressjonijiet ambjentali minn installazzjonijiet industrijali, inklużi dawk koperti mid-Direttiva 2010/75/UE, u biex tiġi żgurata l-koerenza mal-implimentazzjoni ta’ dik id-Direttiva u l-appoġġ għaliha.
(11)Sabiex jikkonformaw mar-rekwiżiti tal-Protokoll, ir-rekwiżiti tar-rapportar jenħtieġ li japplikaw għall-attivitajiet kollha elenkati fl-Anness I. Barra minn hekk, u bil-ħsieb li jinkisbu sinerġiji mal-leġiżlazzjoni ambjentali relatata tal-Unjoni li taffettwa l-installazzjonijiet industrijali, il-kamp ta’ applikazzjoni ta’ dan ir-Regolament jenħtieġ li jallinja wkoll mal-attivitajiet industrijali skont l-Annessi I u Ia tad-Direttiva 2010/75/UE u ma’ attivitajiet magħżula koperti mid-Direttiva (UE) 2015/2193 tal-Parlament Ewropew u tal-Kunsill.
(12)Sabiex tiġi mmonitorjata l-prestazzjoni ambjentali tal-installazzjonijiet industrijali, id-data li għandha tiġi inkluża fil-Portal jenħtieġ li tkopri, ’il fuq mil-livelli limitu kwantitattivi, ir-rilaxxi fl-ambjent ta’ ċerti inkwinanti, it-trasferimenti barra mis-sit tal-ilma mormi li jkun fih dawn l-inkwinanti u t-trasferimenti barra mis-sit tal-iskart.
(13)Jenħtieġ li l-Portal jinkludi wkoll data dwar l-użu tal-ilma, tal-enerġija u tal-materja prima mill-installazzjonijiet ikkonċernati biex ikun jista’ jsir monitoraġġ tal-progress lejn ekonomija ċirkolari u effiċjenti ħafna fir-riżorsi
(14)Il-Konvenzjoni ta’ Aarhus, irratifikata mill-Komunità Ewropea fis-17 ta’ Frar 2005 mid-Deċiżjoni tal-Kunsill 2005/370/KE , tirrikonoxxi li ż-żieda fl-aċċess pubbliku għall-informazzjoni ambjentali u t-tixrid ta’ tali informazzjoni jikkontribwixxu għal sensibilizzazzjoni akbar dwar kwistjonijiet ambjentali, skambju liberu ta’ fehmiet, parteċipazzjoni aktar effettiva mill-pubbliku fit-teħid ta’ deċiżjonijiet ambjentali u, eventwalment, għal ambjent aħjar.
(15)L-operaturi tal-installazzjonijiet jenħtieġ li jirrapportaw ukoll informazzjoni dwar il-volum tal-produzzjoni, l-għadd ta’ impjegati u s-sigħat ta’ tħaddim tal-installazzjoni kkonċernata kif ukoll informazzjoni dwar inċidenti li wasslu għal rilaxxi, sabiex tkun tista’ ssir il-kuntestwalizzazzjoni tad-data rrapportata dwar ir-rilaxxi ta’ inkwinanti u t-trasferimenti barra mis-sit tal-iskart u tal-ilma mormi.
(16)Il-benefiċċju ġenerali tal-Portal għall-aċċess għal informazzjoni ambjentali dwar installazzjonijiet industrijali jenħtieġ li jiġi massimizzat billi jiġu inklużi rabtiet ma’ flussi ta’ informazzjoni oħra li jirriżultaw mil-leġiżlazzjoni ambjentali tal-Unjoni dwar it-tibdil fil-klima, il-protezzjoni tal-arja, tal-ilma u tal-art u dwar il-ġestjoni tal-iskart, inkluż ir-rapportar skont id-Direttiva 2012/18/UE tal-Parlament Ewropew u tal-Kunsill, id-Direttiva 2008/98/KE tal-Parlament Ewropew u tal-Kunsill u d-Direttiva 2010/75/UE. Barra minn hekk, sabiex jiġi mmassimizzat il-valur tal-Portal għall-utenti, jenħtieġ li dan jitfassal biex jiffaċilita l-integrazzjoni futura ma’ flussi rilevanti oħra ta’ data ambjentali.
(17)Għall-finijiet taċ-ċertezza ġuridika, l-operaturi tal-installazzjonijiet jenħtieġ li jkunu rikjesti li jdaħħlu redditi żero meta r-rilaxxi u t-trasferimenti barra mis-sit tal-iskart u tal-ilma mormi mill-installazzjonijiet tagħhom ikunu taħt il-livelli limitu tar-rapportar.
(18)Sabiex tittejjeb il-kwalità tad-data rrapportata u biex tiġi żgurata l-komparabbiltà tagħha, jixraq li jiġu armonizzati l-metodi ta’ kwantifikazzjoni li għandhom jintużaw mill-operaturi meta jirrapportaw ir-rilaxxi, it-trasferimenti barra mis-sit tal-iskart, it-trasferimenti barra mis-sit tal-ilma mormi u l-użu tar-riżorsi. Għalhekk, l-operaturi jenħtieġ li jkunu meħtieġa jużaw, bħala prijorità, il-kejl bħala l-aktar metodu ta’ kwantifikazzjoni akkurat u, jekk mhux prattikabbli, il-kalkolu, filwaqt li l-istima jenħtieġ li tintuża biss bħala l-aħħar għażla.
(19)Peress li l-operaturi tal-installazzjonijiet tal-produzzjoni tal-bhejjem u tal-akkwakultura jistgħu ma jkollhomx ir-riżorsi meħtieġa biex jikkwantifikaw b’mod akkurat ir-rilaxxi intenzjonati tagħhom ta’ inkwinanti, l-Istati Membri jenħtieġ li jkunu intitolati li jikkwantifikawhom f’isimhom.
(20)Sabiex jiġu żgurati kundizzjonijiet uniformi għall-implimentazzjoni tad-dispożizzjonijiet ta’ dan ir-Regolament rigward ir-rapportar mill-Istati Membri, jenħtieġ li l-Kummissjoni tingħata setgħat ta’ implimentazzjoni biex tistabbilixxi t-tip u l-format tal-informazzjoni li għandha tiġi pprovduta u l-iskadenzi tar-rapportar. Jenħtieġ li dawk is-setgħat jiġu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill.
(21)Minħabba l-importanza li ċ-ċittadini tal-Unjoni jkollhom aċċess rapidu għall-informazzjoni ambjentali, huwa essenzjali li l-Istati Membri u l-Kummissjoni jagħmlu d-data disponibbli għall-pubbliku malajr kemm ikun teknikament fattibbli. Għal dak il-għan, filwaqt li l-iskadenza preċiża tar-rapportar għandha tiġi stabbilita f’att ta’ implimentazzjoni, jenħtieġ li ma tkunx aktar tard minn 11-il xahar wara t-tmiem tas-sena tar-rapportar.
(22)Fejn xieraq, il-Portal jenħtieġ li jiffaċilita wkoll l-aċċess għal informazzjoni dwar rilaxxi minn sorsi diffużi sabiex dawk li jieħdu d-deċiżjonijiet ikunu jistgħu jqiegħdu f’kuntest aħjar dawk ir-rilaxxi u jagħżlu l-aktar soluzzjoni effettiva għat-tnaqqis tat-tniġġis.
(23)Id-data rrapportata mill-Istati Membri jenħtieġ li tkun ta’ kwalità għolja b’mod partikolari fir-rigward tal-akkuratezza, il-kompletezza, il-konsistenza u l-kredibbiltà tagħha. Għalhekk, jenħtieġ li l-awtoritajiet kompetenti jivvalutaw il-kwalità tad-data pprovduta mill-operaturi.
(24)L-aċċess pubbliku għall-informazzjoni ambjentali rrapportata mill-Istati Membri jenħtieġ li ma jkunx ristrett u jenħtieġ li l-eċċezzjonijiet minn din ir-regola jkunu possibbli biss f’konformità mad-Direttiva 2003/4/KE tal-Parlament Ewropew u tal-Kunsill jew mar-Regolament (KE) Nru 1049/2001 tal-Parlament Ewropew u tal-Kunsill, kif xieraq.
(25)Il-parteċipazzjoni pubblika jenħtieġ li tiġi żgurata fl-iżvilupp ulterjuri tal-Portal billi jiġu pprovduti opportunitajiet bikrija u effettivi biex jiġu ppreżentati kummenti, informazzjoni, analiżi u opinjonijiet għall-proċess tat-teħid tad-deċiżjonijiet.
(26)Sabiex ittejjeb l-utilità u l-impatt tal-Portal, il-Kummissjoni, appoġġata mill-Aġenzija, jenħtieġ li tiżviluppa gwida li tappoġġa l-implimentazzjoni ta’ dan ir-Regolament.
(27)Jenħtieġ li jkun possibbli għall-Kummissjoni li taġġorna l-lista ta’ attivitajiet industrijali jew agrikoli li fir-rigward tagħhom japplikaw ir-rekwiżiti tar-rapportar. Għalhekk, jenħtieġ li l-Kummissjoni tingħata s-setgħa li tadotta atti delegati f’konformità mal-Artikolu 290 tat-Trattat li jemenda l-Anness I ta’ dan ir-Regolament biex iżżid attivitajiet li għandhom, jew huwa mistenni li jkollhom, impatt fuq is-saħħa jew l-ambjent u li jallinjaw l-Anness mal-emendi għall-Protokoll.
(28)Jenħtieġ li l-Kummissjoni tingħata wkoll is-setgħa li tadotta atti delegati f’konformità mal-Artikolu 290 tat-Trattat biex temenda l-Anness II ta’ dan ir-Regolament biex jiġu ddeterminati l-livelli limitu tar-rapportar, biex jiżdiedu inkwinanti li huma soġġetti għal miżuri regolatorji speċifiċi skont id-dritt tal-Unjoni dwar il-kwalità tal-ilma u tal-arja u dwar is-sustanzi kimiċi, inklużi r-Regolament (KE) Nru 1907/2006 tal-Parlament Ewropew u tal-Kunsill, id-Direttivi 2000/60/KE, 2004/107/KE, 2006/118/KE, 2008/50/KE u 2008/105/UE tal-Parlament Ewropew u tal-Kunsill, biex jiġu riflessi l-bidliet li saru fil-Protokoll fir-rigward tal-inkwinanti li għandhom jiġu rrapportati jew il-livelli limitu tar-rapportar tagħhom, u biex dak l-Anness jiġi adattat għall-progress xjentifiku jew tekniku.
(29)Jenħtieġ li l-Kummissjoni tingħata wkoll is-setgħa li tadotta atti delegati f’konformità mal-Artikolu 290 tat-Trattat biex temenda l-Anness II ta’ dan ir-Regolament biex jiġu ddeterminati l-livelli limitu tar-rapportar, biex jiżdiedu inkwinanti li huma soġġetti għal miżuri regolatorji speċifiċi skont id-dritt tal-Unjoni dwar il-kwalità tal-ilma u tal-arja u dwar is-sustanzi kimiċi, inklużi r-Regolament (KE) Nru 1907/2006 tal-Parlament Ewropew u tal-Kunsill, id-Direttivi 2000/60/KE, 2004/107/KE, 2006/118/KE, 2008/50/KE u 2008/105/UE tal-Parlament Ewropew u tal-Kunsill, biex jiġu riflessi l-bidliet li saru fil-Protokoll fir-rigward tal-inkwinanti li għandhom jiġu rrapportati jew il-livelli limitu tar-rapportar tagħhom, u biex dak l-Anness jiġi adattat għall-progress xjentifiku jew tekniku.
(30)Meta tadotta atti delegati, huwa partikolarment importanti li l-Kummissjoni twettaq konsultazzjonijiet xierqa waqt il-ħidma preparatorja tagħha, inkluż fil-livell tal-esperti, u li dawk il-konsultazzjonijiet jitwettqu f’konformità mal-prinċipji stabbiliti fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet. B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.
(31)Sabiex tiġi żgurata l-implimentazzjoni effettiva ta’ dan ir-Regolament, l-Istati Membri jenħtieġ li jistabbilixxu regoli dwar il-penali applikabbli għall-ksur tiegħu u jenħtieġ li jiżguraw li dawn jiġu implimentati.
(32)Peress li r-Regolament (KE) Nru 166/2006 hemm bżonn li jiġi mmodifikat sostanzjalment, jenħtieġ li jitħassar u jiġi sostitwit b’dan ir-Regolament għal raġunijiet ta’ ċertezza ġuridika, ċarezza u trasparenza.
(33)Minħabba li l-objettiv ta’ dan ir-Regolament, jiġifieri li jittejjeb l-aċċess pubbliku għall-informazzjoni ambjentali permezz tal-ħolqien ta’ bażi tad-data elettronika integrata, koerenti u mifruxa mal-Komunità kollha, ma jistax jintlaħaq biżżejjed mill-Istati Membri peress li l-ħtieġa għal data komparabbli fl-Istati Membri kollha titlob livell għoli ta’ armonizzazzjoni, iżda jista’ jintlaħaq aħjar fil-livell Komunitarju, il-Komunità tista’ tadotta miżuri skont il-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju tal-proporzjonalità, kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jintlaħaq dak l-objettiv.
(34)Ir-rekwiżiti tar-rapportar stabbiliti b’dan ir-Regolament jenħtieġ li japplikaw mis-sena tar-rapportar 2025 sabiex l-Istati Membri u l-operaturi kkonċernati jkollhom biżżejjed żmien biex jieħdu l-miżuri meħtieġa.
(35)Sabiex tiġi żgurata kemm il-kontinwità tad-data kif ukoll iċ-ċertezza ġuridika, ir-Regolament (KE) Nru 166/2006 jenħtieġ li jkompli japplika għas-sena tar-rapportar 2024.
ADOTTAW DAN IR-REGOLAMENT:
Artikolu 1
Suġġett
Dan ir-Regolament jimplimenta l-Protokoll tal-UNECE dwar ir-Reġistri dwar ir-Rilaxx u t-Trasferiment ta’ Inkwinanti (“il-Protokoll”) billi jistabbilixxi regoli dwar il-ġbir u r-rapportar tad-data ambjentali dwar l-installazzjonijiet industrijali u jistabbilixxi Portal dwar l-Emissjonijiet Industrijali (“Portal”) fil-livell tal-Unjoni fil-forma ta’ bażi tad-data online li tagħti aċċess għal tali data.
Artikolu 2
Definizzjonijiet
Għall-finijiet ta’ dan ir-Regolament, għandhom japplikaw id-definizzjonijiet li ġejjin:
(1)“installazzjoni” tfisser unità teknika stazzjonarja li fiha titwettaq attività waħda jew aktar minn dawk elenkati fl-Anness I, u kull attività oħra direttament assoċjata li jkollha konnessjoni teknika mal-attivitajiet imwettqa fuq dak is-sit u li jista’ jkollha effett fuq emissjonijiet u tniġġis;
(2) “sit” tfisser il-post ġeografiku fejn tinsab l-installazzjoni;
(3)“il-pubbliku” tfisser il-pubbliku kif definit fil-punt (16) tal-Artikolu 3 tad-Direttiva 2010/75/UE;
(4)“rilaxx” tfisser kwalunkwe introduzzjoni ta’ inkwinanti fl-ambjent bħala riżultat ta’ kwalunkwe attività tal-bniedem, kemm jekk deliberata jew aċċidentali, ta’ rutina jew mhux ta’ rutina, inkluż tixrid, emissjoni, ħruġ, injezzjoni, rimi jew ħatt, jew permezz ta’ sistemi ta’ dranaġġ mingħajr trattament finali tal-ilma mormi;
(5)“inkwinant” tfisser sustanza jew grupp ta’ sustanzi li tista’ tkun / jista’ jkun ta’ periklu għall-ambjent u għas-saħħa tal-bniedem minħabba l-proprjetajiet tagħha/tiegħu u l-introduzzjoni tagħha/tiegħu fl-ambjent;
(6)“sustanza” tfisser sustanza kif definita fil-punt (1) tal-Artikolu 3 tad-Direttiva 2010/75/UE;
(7)“operatur” tfisser operatur kif definit fil-punt (15) tal-Artikolu 3 tad-Direttiva 2010/75/UE;
(8)“trasferiment barra mis-sit” tfisser il-moviment lill-hinn mill-fruntieri ta’ installazzjoni ta’ skart destinata għall-irkupru jew għar-rimi u ta’ inkwinanti f’ilma mormi destinat għat-trattament tal-ilma mormi;
(9)“skart” tfisser skart kif definit fl-Artikolu 3(1) tad-Direttiva 2008/98/KE tal-Parlament Ewropew u tal-Kunsill;
(10)“ilma mormi” tfisser ilma mormi li ġej minn sorsi urbani, domestiċi jew industrijali, kif definit fl-Artikolu 2 (1), (2) u (3) tad-Direttiva 91/271/KEE u kwalunkwe ilma użat ieħor li huwa soġġett għar-regolamentazzjoni mid-dritt tal-Unjoni minħabba s-sustanzi jew oġġetti li fih;
(11)“sorsi diffużi” tfisser il-ħafna sorsi iżgħar jew sparpaljati li minnhom jista’ jkun hemm rilaxx ta’ inkwinanti fl-art, fl-arja jew fl-ilma, li l-impatt ikkombinat tagħhom fuq dawk il-mezzi jista’ jkun sinifikanti u li għalihom ma huwiex prattiku li jinġabru rapporti minn kull sors individwali;
(12)“awtorità kompetenti” tfisser l-awtorità jew l-awtoritajiet nazzjonali, jew kwalunkwe korp kompetenti jew aktar, maħtura mill-Istati Membri;
(13)“skart perikoluż” tfisser skart perikoluż kif definit fil-punt (2) tal-Artikolu 3 tad-Direttiva 2008/98/KE;
(14)“irkupru” tfisser kwalunkwe operazzjoni msemmija fl-Anness II tad-Direttiva 2008/98/KE;
(15)“rimi” tfisser kwalunkwe operazzjoni msemmija fl-Anness I tad-Direttiva 2008/98/KE;
(16)“sena tar-rapportar” tfisser is-sena kalendarja li għaliha trid tinġabar id-data.
Artikolu 3
Kontenut tal-Portal
1.Il-Portal għandu jinkludi d-data dwar:
(a)ir-rilaxxi ta’ inkwinanti kif imsemmi fil-punt (a) tal-Artikolu 5(1);
(b)it-trasferimenti barra mis-sit tal-iskart kif imsemmi fil-punt (b) tal-Artikolu 5(1), u ta’ inkwinanti fl-ilma mormi kif imsemmi fil-punt (c) tal-Artikolu 5(1);
(c)l-użu tar-riżorsi tal-ilma, tal-enerġija u tal-materja prima kif imsemmi fil-punt (d) tal-Artikolu 5(1);
(d)l-informazzjoni kuntestwali kif imsemmija fil-punt (e) tal-Artikolu 5(1);
(e)fejn disponibbli, id-data dwar ir-rilaxxi ta’ inkwinanti minn sorsi diffużi imsemmija fl-Artikolu 7(1).
2.Il-Portal għandu jinkludi links għal dawn li ġejjin:
(a)ir-reġistri nazzjonali dwar ir-rilaxx u t-trasferiment ta’ inkwinanti stabbiliti mill-Istati Membri f’konformità mal-Protokoll;
(b)reġistri, bażijiet tad-data jew siti web eżistenti oħra aċċessibbli għall-pubbliku, stabbiliti fil-livell tal-Istati Membri jew tal-Unjoni, li jipprovdu aċċess għar-rekwiżiti tar-rapportar stabbiliti fil-leġiżlazzjoni tal-Unjoni dwar it-tibdil fil-klima, il-protezzjoni tal-arja, tal-ilma u tal-art, u dwar il-ġestjoni tal-iskart.
Artikolu 4
Disinn u struttura tal-Portal
1.Il-Kummissjoni għandha tagħmel il-Portal aċċessibbli għall-pubbliku, u għandha tippreżenta d-data kemm f’forma aggregata kif ukoll f’forma mhux aggregata bil-għan li tippermetti tfittxijiet skont:
(a)l-installazzjoni, inkluża l-kumpanija omm tal-installazzjoni fejn applikabbli, u s-sit ġeografiku tagħha, inkluż il-baċir tax-xmara;
(b)l-attività;
(c)l-okkorrenza fuq livell tal-Istati Membri jew Komunitarju;
(d)l-inkwinanti, l-iskart jew ir-riżorsa, kif xieraq;
(e)il-mezz ambjentali (l-arja, l-ilma, l-art) li fih sar ir-rilaxx tal-inkwinant;
(f)it-trasferimenti barra mis-sit tal-iskart u, kif xieraq, id-destinazzjoni tagħhom;
(g)it-trasferimenti barra mis-sit ta’ inkwinanti fl-ilma mormi;
(h)is-sorsi diffużi;
(i)is-sid jew l-operatur tal-installazzjoni.
2.Il-Portal għandu jkun iddisinjat sabiex l-aċċess pubbliku jkun l-iktar faċli possibbli sabiex id-data, taħt kundizzjonijiet operattivi normali, tkun kontinwament u immedjatament aċċessibbli fuq l-internet. Id-disinn tiegħu għandu jqis il-possibbiltà tal-espansjoni futura tiegħu u għandu jinkludi kull data li ġiet irrapportata fis-snin preċedenti tar-rapportar, sa mill-inqas l-aħħar għaxar snin preċedenti tar-rapportar.
Artikolu 5
Rapportar mill-operaturi lill-awtoritajiet kompetenti
1.L-operatur ta’ kull installazzjoni li jwettaq waħda jew aktar mill-attivitajiet speċifikati fl-Anness I, li jissodisfaw il-livelli limitu ta’ kapaċità applikabbli speċifikati f’dak l-Anness, għandu jirrapporta kull sena, lill-awtorità kompetenti tiegħu, id-data li ġejja, sakemm dik id-data ma tkunx diġà disponibbli għall-awtorità kompetenti:
(a)ir-rilaxxi fl-arja, fl-ilma, jew fl-art ta’ kwalunkwe inkwinant speċifikat fl-Anness II li għalihom il-valur ta’ livell limitu applikabbli speċifikat fl-Anness II jkun inqabeż;
(b)it-trasferimenti barra mis-sit ta’ skart perikoluż ta’ piż ta’ aktar minn żewġ tunnellati fis-sena jew ta’ skart mhux perikoluż li l-piż tiegħu hu aktar minn 2 000 tunnellata fis-sena, għal kwalunkwe operazzjoni ta’ rkupru jew ta’ rimi bl-eċċezzjoni tal-operazzjonijiet ta’ rimi bi trattament tal-art u injezzjoni fil-fond kif imsemmi fl-Anness I tad-Direttiva 2008/98/KE, b’indikazzjonijiet bl-ittri “R” jew “D” rispettivament jekk l-iskart huwa destinat għall-irkupru jew għar-rimi u, għal movimenti li jaqsmu l-fruntieri ta’ skart perikoluż, l-isem u indirizz ta’ min se jirkupra jew min se jarmi l-iskart u s-sit effettiv ta’ fejn se jsir l-irkupru jew ir-rimi. L-iskart li jkun soġġett għal operazzjonijiet ta’ rimi bi trattament tal-art jew injezzjoni fil-fond għandu jiġi rrapportat bħala rilaxx għall-art mill-operatur tal-installazzjoni li minnha joriġina l-iskart biss;
(c)it-trasferimenti barra mis-sit ta’ kwalunkwe inkwinant speċifikat fl-Anness II f’ilma mormi li huwa destinat għat-trattament tal-ilma mormi li għalih il-valur ta’ livell limitu speċifikat fl-Anness II, taħt kolonna 1b inqabeż;
(d)l-użu tal-ilma, tal-enerġija u tal-materja prima;
(e)l-informazzjoni li tippermetti l-kuntestwalizzazzjoni tad-data rrapportata skont il-punti (a) sa (d), inkluż il-volum tal-produzzjoni, l-għadd ta’ impjegati, l-għadd ta’ sigħat ta’ tħaddim, u informazzjoni dwar aċċidenti li wasslu għal rilaxxi;
(f)l-informazzjoni dwar jekk l-installazzjoni hijiex koperta wkoll mid-Direttiva 2003/87/KE tal-Parlament Ewropew u tal-Kunsill, mid-Direttiva 91/271/KEE, id-Direttiva 2010/75/UE, mid-Direttiva 2012/18/UE, mid-Direttiva (UE) 2015/2193 jew minn kwalunkwe leġiżlazzjoni ambjentali oħra tal-Unjoni identifikata fil-format tar-rapportar imsemmi fl-Artikolu 6.
2.Meta r-rilaxxi msemmija fil-paragrafu 1, il-punt (a), jew it-trasferimenti barra s-sit ta’ inkwinanti msemmija fil-paragrafu 1, il-punt (c), ma jaqbżux il-valuri ta’ livell limitu applikabbli speċifikati fl-Anness II, jew meta t-trasferimenti tal-iskart lil hinn mis-sit ma jaqbżux il-limiti stabbiliti fil-paragrafu 1, il-punt (b), l-operatur tal-installazzjoni kkonċernata għandu jiddikjara, fir-rapport tiegħu, li r-rilaxxi jew it-trasferimenti lil hinn mis-sit huma taħt dawk il-valuri jew il-livelli limitu.
3.L-operaturi għandhom jiksbu d-data msemmija fil-paragrafu 1 permezz ta’ kejl. Meta l-kejl ma jkunx prattikabbli, l-operaturi għandhom jużaw il-kalkolu. Fejn la l-kejl u lanqas il-kalkolu ma jkunu prattikabbli, l-operaturi jistgħu jiksbu d-data permezz ta’ stima.
4.L-operaturi għandhom jispeċifikaw fir-rapport il-metodi użati għall-kisba tad-data. Fejn id-data tkun inkisbet permezz ta’ kejl, għandu jiġi indikat il-metodu analitiku. Fejn id-data tkun inkisbet permezz ta’ kalkolu, għandu jiġi indikat il-metodu ta’ kalkolu.
5.Meta jiġi ppreparat ir-rapport imsemmi fil-paragrafu 1, l-operatur ikkonċernat għandu juża l-aħjar informazzjoni disponibbli, li tista’ tinkludi d-data minn monitoraġġ, il-fatturi ta’ emissjoni, l-ekwazzjonijiet ta’ bilanċ ta’ massa, il-monitoraġġ indirett jew kalkoli oħra, il-ġudizzji ta’ inġinerija u metodi oħra skont l-Artikolu 8(1) u f’konformità ma’ metodoloġiji approvati internazzjonalment, fejn dawn ikunu disponibbli.
6.Ir-rilaxxi msemmija fl-Anness II rrapportati skont il-paragrafu 1, punt (a), għandhom jinkludu r-rilaxxi kollha mis-sorsi kollha inklużi fl-Anness I fis-sit tal-installazzjoni.
7.Id-data msemmija fil-paragrafu 1 għandha tinkludi rilaxxi u trasferimenti rrapportati bħala totali ta’ kull attività magħmula deliberatament, aċċidentalment, bħala rutina u mhux bħala rutina. Meta jipprovdu din id-data, l-operaturi għandhom jispeċifikaw kwalunkwe data li tkun marbuta ma’ rilaxxi aċċidentali, meta din tkun disponibbli.
8.L-operatur ta’ kull installazzjoni għandu jiġbor bi frekwenza xierqa id-data meħtieġa sabiex jiġi determinat liema mir-rilaxxi mill-installazzjoni u mit-trasferimenti barra mis-sit huma soġġetti għar-rekwiżiti tar-rapportar taħt paragrafu 1.
9.L-operatur ta’ kull installazzjoni kkonċernata għandu jżomm għall-awtoritajiet kompetenti tiegħu r-reġistri li minnhom ittieħdet id-data rapportata għal perjodu ta’ ħames snin, li jibda mit-tmiem tas-sena tar-rapportar ikkonċernata. Dawn ir-reġistri għandhom jispjegaw ukoll il-metodoloġija li ntużat għall-ġbir tad-data.
10.L-Istati Membri jistgħu jiddeċiedu li jikkwantifikaw huma stess ir-rilaxxi intenzjonati msemmija fil-paragrafu 1, il-punt (a), f’isem l-operaturi tal-installazzjonijiet koperti mill-Attività 2 elenkati fl-Anness I u mill-Attività 7 elenkata fl-Anness I. F’dawn il-każijiet, il-paragrafi 1 sa 9 ma għandhomx japplikaw għal dawk l-operaturi fir-rigward ta’ tali rilaxxi.
11.Wara li jitqiesu r-rekwiżiti stabbiliti fl-Artikolu 6, l-Istati Membri għandhom jiddeterminaw data sa meta l-operaturi għandhom jipprovdu d-data msemmija f’dan l-Artikolu lill-awtorità kompetenti tagħhom.
Artikolu 6
Rapportar mill-Istati Membri lill-Kummissjoni
1.Kull sena, l-Istati Membri għandhom jipprovdu lill-Kummissjoni, b’mezz elettroniku, rapport li jkun fih id-data kollha msemmija fl-Artikolu 5 f’format u sa data li għandhom jiġu stabbiliti mill-Kummissjoni permezz ta’ atti ta’ implimentazzjoni. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 17(2). Fi kwalunkwe każ, id-data tar-rapportar għandha tkun mhux aktar tard minn 11-il xahar wara t-tmiem tas-sena tar-rapportar.
2.Is-servizzi tal-Kummissjoni, assistiti mill-Aġenzija Ewropea għall-Ambjent (“l-Aġenzija”), għandhom jinkorporaw id-data rrapportata mill-Istati Membri fil-Portal fi żmien xahar mit-tlestija tar-rapportar mill-Istati Membri f’konformità mal-paragrafu 1.
Artikolu 7
Data dwar ir-rilaxxi ta’ inkwinanti minn sorsi diffużi
1.Il-Kummissjoni, assistita mill-Aġenzija, għandha tinkludi fil-Portal id-data dwar ir-rilaxxi ta’ inkwinanti minn sorsi diffużi fejn teżisti tali data u diġà tkun ġiet irrapportata mill-Istati Membri.
2.Id-data disponibbli fuq il-Portal għandha tippermetti lill-utenti jfittxu u jidentifikaw ir-rilaxxi ta’ inkwinanti minn sorsi diffużi skont diżaggregazzjoni ġeografika adegwata u għandha tinkludi informazzjoni dwar it-tip ta’ metodoloġija użata sabiex tinkiseb id-data.
3.Fejn tiddetermina li ma teżisti ebda data dwar ir-rilaxxi minn sorsi diffużi, il-Kummissjoni għandha s-setgħa li tadotta atti delegati f’konformità mal-Artikolu 15 sabiex tissupplimenta dan ir-Regolament billi tibda rapportar dwar ir-rilaxxi ta’ inkwinanti rilevanti minn sors diffuż wieħed jew aktar billi jintużaw, fejn ikunu xierqa, metodoloġiji approvati f’livell internazzjonali.
Artikolu 8
Assigurazzjoni u valutazzjoni tal-kwalità
1.L-operaturi tal-installazzjoni soġġetta għar-rekwiżiti tar-rapportar imsemmija fl-Artikolu 5 għandhom jiżguraw il-kwalità tad-data li jirrapportaw.
2.L-awtoritajiet kompetenti għandhom jivvalutaw il-kwalità tad-data pprovduta mill-operaturi tal-installazzjonijiet imsemmija fil-paragrafu 1, b’mod partikolari dwar l-akkuratezza, il-kompletezza, il-konsistenza u l-kredibbiltà tagħhom.
Artikolu 9
Aċċess għall-informazzjoni
1.Il-Kummissjoni, assistita mill-Aġenzija, għandha tagħmel id-data li tinsab fil-Portal aċċessibbli għall-pubbliku u mingħajr ħlas fuq l-internet fi żmien xahar mit-tlestija tar-rapportar mill-Istati Membri f’konformità mal-Artikolu 6(1).
2.Meta d-data li tinstab fil-Portal ma tkunx aċċessibbli faċilment għall-pubbliku fuq l-internet, l-Istat Membru kkonċernat u l-Kummissjoni għandhom jiffaċilitaw l-aċċess elettroniku għall-Portal f’postijiet aċċessibbli għall-pubbliku.
3.Kull Stat Membru għandu jagħmel disponibbli għall-pubbliku d-data tiegħu, irrapportata f’konformità mal-Artikolu 5 u, fejn disponibbli, l-Artikolu 7(1), b’mod kontinwu, mingħajr ħlas u mingħajr ma jirrestrinġi l-aċċess għall-utenti rreġistrati.
Artikolu 10
Kunfidenzjalità
Meta d-data titqies kunfidenzjali minn Stat Membru f’konformità mal-Artikolu 4(2) tad-Direttiva 2003/4/KE, ir-rapport imsemmi fl-Artikolu 6(2) ta’ dan ir-Regolament għas-sena tar-rapportar ikkonċernata għandu jindika separatament għal kull installazzjoni liema data ma tkunx tista’ ssir pubblika u għandu jagħti r-raġunijiet għal dan.
Artikolu 11
Parteċipazzjoni pubblika
1.Il-Kummissjoni għandha tipprovdi lill-pubbliku b’opportunitajiet bikrija u effettivi sabiex jieħu sehem fl-iżvilupp ulterjuri tal-Portal, inkluż it-tisħiħ tal-kapaċità u l-preparazzjoni ta’ emendi għal dan ir-Regolament.
2.Il-pubbliku għandu jkollu l-opportunità li jippreżenta kummenti, informazzjoni, analiżi jew opinjonijiet f’qafas ta’ żmien raġonevoli.
3.Il-Kummissjoni se tqis kif dovut it-tali input u għandha tinforma lill-pubbliku dwar l-eżitu tal-parteċipazzjoni pubblika.
Artikolu 12
Gwida
Il-Kummissjoni, assistita mill-Aġenzija, għandha tfassal u taġġorna perjodikament gwida li tappoġġa l-implimentazzjoni ta’ dan ir-Regolament, li tindirizza mill-inqas dan li ġej:
(a)il-proċeduri tar-rapportar;
(b)id-data li għandha tiġi rapportata;
(c)l-assigurazzjoni u l-valutazzjoni tal-kwalità;
(d)l-indikazzjoni tat-tip ta’ data miżmuma u r-raġuni għaliex ġiet miżmuma fil-każ ta’ data kunfidenzjali;
(e)ir-referenza għal metodi approvati internazzjonalment għad-determinazzjoni, għall-analiżi u għall-kampjunar tar-rilaxx;
(f)l-indikazzjoni tal-kumpaniji omm.
Artikolu 13
Sensibilizzazzjoni
L-Istati Membri u l-Kummissjoni għandhom jippromwovu l-għarfien pubbliku tal-Portal u l-fehim u l-użu tad-data li tinsab fih.
Artikolu 14
Emendi għall-Annessi
1.Il-Kummissjoni għandha s-setgħa li tadotta atti delegati f’konformità mal-Artikolu 15 sabiex temenda l-Anness I għal wieħed jew aktar mill-finijiet li ġejjin:
(a)sabiex tiżdied attività industrijali jew agrikola li għandha, jew li huwa mistenni li jkollha, impatt fuq is-saħħa jew l-ambjent bħala konsegwenza tar-rilaxxi ta’ inkwinanti, tat-trasferimenti tal-iskart jew tal-ilma mormi jew tal-użu tar-riżorsi tagħha; ir-rilaxxi jew it-trasferimenti ogħla mil-livelli limitu tar-rapportar rispettivi, kif stabbilit fil-punt (b) tal-Artikolu 5(1) u fl-Anness II, se jkunu fattur primarju fid-determinazzjoni tal-impatt fuq is-saħħa jew fuq l-ambjent;
(b)sabiex jiġi allinjat mal-Protokoll wara l-adozzjoni ta’ emenda għall-annessi tiegħu.
2.Il-Kummissjoni għandha s-setgħa li tadotta atti delegati f’konformità mal-Artikolu 15 sabiex temenda l-Anness II għal fini wieħed jew aktar minn dawn li ġejjin:
(a)sabiex tadattah għall-progress tekniku jew xjentifiku;
(b)sabiex jiżdiedu inkwinanti, li r-rilaxx tagħhom fl-arja, fl-ilma u fl-art ikollu, jew jista’ jkollu, impatt avvers fuq l-ambjent jew fuq is-saħħa tal-bniedem, inklużi dawk li jiġu rilaxxati mill-attivitajiet imsemmija fl-Anness I ta’ dan ir-Regolament, u li jissodisfaw waħda mill-kundizzjonijiet li ġejjin:
(i)
jiġu ddeżinjati bħala sustanzi ta’ tħassib għoli ħafna fl-Anness XIV tar-Regolament (KE) Nru 1907/2006;
(ii) jiġu ddeżinjati bħala sustanzi prijoritarji skont id-Direttiva 2000/60/KE jew 2008/105/KE,
(iii) jiġu inklużi fil-listi ta’ sorveljanza stabbiliti fil-qafas tad-Direttiva 2006/118/KE jew 2008/105/KE;
(iv) ikunu soġġetti għal valuri ta’ limitu jew għal restrizzjonijiet oħra skont id-Direttivi 2008/50/KE, 2004/107/KE jew 2006/118/KE;
(c)sabiex jistabbilixxi u jaġġorna l-livelli limitu għar-rilaxxi sabiex jintlaħaq l-għan li jinqabdu mill-inqas 90 % tar-rilaxxi ta’ kull inkwinant fl-arja, fl-ilma u fl-art mill-attivitajiet imsemmija fl-Anness I; inklużi l-livelli limitu ta’ żero għal sustanzi li juru periklu partikolarment għoli għall-ambjent jew għas-saħħa tal-bniedem;
(d)sabiex jiġi allinjat mal-Protokoll wara l-adozzjoni ta’ emenda għall-annessi tiegħu.
Artikolu 15
Eżerċizzju tad-delega
1.Is-setgħa tal-adozzjoni ta’ atti delegati hija mogħtija lill-Kummissjoni soġġett għall-kundizzjonijiet stabbiliti f’dan l-Artikolu.
2.Il-Kummissjoni għandha tingħata s-setgħa tal-adozzjoni ta’ atti delegati msemmija fl-Artikolu 7(3) u fl-Artikolu 14 għal perjodu ta’ ħames snin minn … [Uffiċċju tal-Pubblikazzjonijiet: jekk jogħġobkom daħħlu d-data = id-data tad-dħul fis-seħħ ta’ dan ir-Regolament]. Il-Kummissjoni għandha tfassal rapport fir-rigward tad-delega tas-setgħa mhux aktar tard minn disa’ xhur qabel it-tmiem tal-perjodu ta’ ħames snin. Id-delega tas-setgħa għandha tiġi estiża awtomatikament għal perjodi ta’ żmien identiċi, ħlief jekk il-Parlament Ewropew jew il-Kunsill joġġezzjonaw għal tali estensjoni mhux iktar tard minn tliet xhur qabel it-tmiem ta’ kull perjodu.
3.Id-delega tas-setgħa msemmija fl-Artikolu 7(3) u fl-Artikolu 14 tista’ tiġi revokata fi kwalunkwe mument mill-Parlament Ewropew jew mill-Kunsill. Deċiżjoni ta’ revoka għandha ttemm id-delega tas-setgħa speċifikata f’dik id-deċiżjoni. Din għandha ssir effettiva l-għada tal-pubblikazzjoni tad-deċiżjoni f’Il-Ġurnal Uffiċjali tal-Unjoni Ewropea jew f’data aktar tard speċifikata fih. Ma għandhiex taffettwa l-validità ta’ kwalunkwe att delegat li jkun diġà fis-seħħ.
4.Qabel ma tadotta att delegat, il-Kummissjoni għandha tikkonsulta lill-esperti maħtura minn kull Stat Membru f’konformità mal-prinċipji stabbiliti fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet.
5.Hekk kif tadotta att delegat, il-Kummissjoni għandha tinnotifikah simultanjament lill-Parlament Ewropew u lill-Kunsill.
6.Att delegat adottat skont l-Artikolu 7(3) u l-Artikolu 14 għandu jidħol fis-seħħ biss jekk ma tiġix espressa oġġezzjoni mill-Parlament Ewropew jew mill-Kunsill fi żmien xahrejn min-notifika ta’ dak l-att lill-Parlament Ewropew u lill-Kunsill jew jekk, qabel ma jiskadi dak il-perjodu, il-Parlament Ewropew u l-Kunsill ikunu t-tnejn infurmaw lill-Kummissjoni li mhumiex se joġġezzjonaw. Dak il-perjodu għandu jiġi estiż b’xahrejn fuq l-inizjattiva tal-Parlament Ewropew jew tal-Kunsill.
Artikolu 16
Proċedura ta’ Kumitat
1.Il-Kummissjoni għandha tkun megħjuna minn kumitat.
2.Fejn issir referenza għal dan il-paragrafu, għandu japplika l-Artikolu 5 tar-Regolament (UE) Nru 182/2011.
Artikolu 17
Penali u miżuri ta’ assigurazzjoni tal-konformità
1.L-Istati Membri għandhom jistabbilixxu r-regoli dwar il-penali applikabbli għal ksur ta’ dispożizzjonijiet adottati skont dan ir-Regolament u għandhom jieħdu l-miżuri kollha meħtieġa sabiex jiżguraw li jiġu implimentati. Il-penali previsti għandhom ikunu effettivi, proporzjonati u dissważivi. L-Istati Membri għandhom, mingħajr dewmien, jinnotifikaw lill-Kummissjoni b’dawk ir-regoli u b’dawk il-miżuri u għandhom jinnotifikawha, mingħajr dewmien, bi kwalunkwe emenda sussegwenti li taffettwahom.
2.Il-penali msemmija fil-paragrafu 1 għandhom jinkludu multi proporzjonati għall-fatturat tal-persuna ġuridika jew għall-introjtu tal-persuna fiżika li tkun wettqet il-ksur. Il-livell tal-multi għandu jiġi kkalkolat b’tali mod li jiġi żgurat li dawn effettivament iċaħħdu lill-persuna responsabbli għall-ksur mill-benefiċċji ekonomiċi derivati minn dak il-ksur. Il-livell tal-multi għandu jiżdied gradwalment għal ksur ripetut.
3.L-Istati Membri għandhom jiżguraw li l-penali msemmija fil-paragrafu 1 iqisu kif xieraq dan li ġej, kif applikabbli:
(a)in-natura, is-serjetà u t-tul tal-ksur;
(b)il-karattru intenzjonali jew negliġenti tal-ksur;
(c)il-popolazzjoni jew l-ambjent affettwat mill-ksur, filwaqt li jitqies l-impatt fuq l-objettiv li jinkiseb livell għoli ta’ protezzjoni tas-saħħa tal-bniedem u tal-ambjent.
4.L-Istati Membri għandhom jadottaw miżuri ta’ assigurazzjoni tal-konformità biex jipprevjenu u jidentifikaw il-ksur imsemmi fil-paragrafu 1.
Artikolu 18
Tħassir
Ir-Regolament (KE) Nru 166/2006 jitħassar b’effett mill-1 ta’ Jannar 2026.
Ir-referenzi għar-Regolament imħassar (KE) Nru 166/2006 għandhom jinftiehmu bħala referenzi għal dan ir-Regolament u għandhom jinqraw f’konformità mat-tabella ta’ korrelazzjoni fl-Anness III.
Artikolu 19
Dispożizzjonijiet tranżizzjonali
Minkejja l-ewwel paragrafu tal-Artikolu 18, ir-Regolament (KE) Nru 166/2006 għandu jkompli japplika fir-rigward tar-rapportar għas-sena 2024.
Artikolu 20
Dħul fis-seħħ
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Għandu japplika mill-1 ta’ Jannar 2026.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Strasburgu,
Għall-Parlament Ewropew
Għall-Kunsill
Il-President
Il-President
DIKJARAZZJONI FINANZJARJA LEĠIŻLATTIVA
QAFAS TAL-PROPOSTA/TAL-INIZJATTIVA
Titolu tal-proposta/tal-inizjattiva
Proposta għal Regolament tal-Parlament Ewropew u tal-Kunsill dwar ir-rapportar ta’ data ambjentali minn installazzjonijiet industrijali u li jistabbilixxi Portal dwar l-Emissjonijiet Industrijali
Qasam/Oqsma ta’ politika kkonċernat(i)
Qasam ta’ politika: 09 Ambjent u Azzjoni Klimatika
Il-proposta hija marbuta ma’
◻ azzjoni ġdida
◻ azzjoni ġdida b’segwitu għal proġett pilota/azzjoni preparatorja
⌧ l-estensjoni ta’ azzjoni eżistenti
◻ fużjoni ta’ azzjoni waħda jew aktar f’azzjoni oħra/f’azzjoni ġdida
Objettiv(i)
Objettiv(i) ġenerali
L-objettiv ta’ din il-proposta huwa li:
(1)Taġġorna r-Reġistru Ewropew dwar ir-Rilaxx u t-Trasferiment ta’ Inkwinanti (PRTR Ewropew) f’konformità mas-sejbiet tal-valutazzjoni tal-impatt li tlestiet dan l-aħħar billi toħloq Portal dwar l-Emissjonijiet Industrijali (il-Portal);
(2)Ittejjeb l-aċċess tal-UE għall-informazzjoni ambjentali dwar l-installazzjonijiet industrijali;
(3)Tistabbilixxi mill-ġdid il-Portal bħala strument ta’ appoġġ għad-Direttiva dwar l-Emissjonijiet Industrijali (IED) u l-liġi ambjentali relatata tal-UE.
B’mod partikolari, din il-proposta se tgħin biex jintlaħqu l-objettivi stabbiliti:
·fil-Patt Ekoloġiku Ewropew: “Il-Kummissjoni se tirrieżamina l-miżuri tal-UE biex tindirizza t-tniġġis minn installazzjonijiet industrijali kbar.”;
·fil-Pjan ta’ Azzjoni għal Tniġġis Żero: “[Reviżjoni tar-Regolament dwar l-IED u l-PRTR Ewropew].. se jkollu l-għan li... itejjeb l-aċċess pubbliku għall-informazzjoni … u jagħmilha aktar faċli li jitqabblu l-prestazzjonijiet tal-Istati Membri fl-indirizzar tal-emissjonijiet industrijali.”.
Il-proposti huma wkoll kompletament konformi mal-Aġenda 2030, b’mod partikolari fir-rigward tal-Għanijiet ta’ Żvilupp Sostenibbli li ġejjin:
·“3.9: Jitnaqqas b’mod sostanzjali l-għadd ta’ mwiet u mard minn sustanzi kimiċi perikolużi u mit-tniġġis u mill-kontaminazzjoni tal-arja, tal-ilma u tal-ħamrija;
·9.4: Tittejjeb l-infrastruttura u ssir modifika retroattiva tal-industriji biex isiru sostenibbli, b’effiċjenza akbar fl-użu tar-riżorsi u adozzjoni akbar ta’ teknoloġiji u proċessi industrijali nodfa u ambjentalment korretti, bil-pajjiżi kollha jieħdu azzjoni f’konformità mal-kapaċitajiet rispettivi tagħhom;
·12.4 Jinkiseb l-immaniġġjar ambjentalment korrett tas-sustanzi kimiċi u l-iskart kollu fiċ-ċiklu tal-ħajja tagħhom, f’konformità mal-oqfsa internazzjonali miftiehma, u jitnaqqas b’mod sinifikanti r-rilaxx tagħhom fl-arja, fl-ilma u fil-ħamrija sabiex jitnaqqsu kemm jista’ jkun l-impatti avversi tagħhom fuq is-saħħa tal-bniedem u fuq l-ambjent;
·12.5 Titnaqqas sostanzjalment il-ġenerazzjoni tal-iskart permezz tal-prevenzjoni, it-tnaqqis, ir-riċiklaġġ u l-użu mill-ġdid;
·12.6 Il-kumpaniji, speċjalment il-kumpaniji kbar u tranżnazzjonali, jiġu mħeġġin jadottaw prattiki sostenibbli u jintegraw l-informazzjoni dwar is-sostenibbiltà fiċ-ċiklu tar-rapportar tagħhom;
·12.8 Jiġi żgurat li n-nies kullimkien ikollhom l-informazzjoni u s-sensibilizzazzjoni rilevanti għall-iżvilupp sostenibbli u l-istil ta’ ħajja f’konformità man-natura.”
(4)Objettiv(i) speċifiku/speċifiċi
1. Tiġi mtejba l-effettività tal-Portal billi jiġu indirizzati n-nuqqasijiet identifikati fil-feedback dwar l-implimentazzjoni, eż. aġġornament tal-inkwinanti rrapportati, li jeħtieġu rapportar fil-livell tal-installazzjoni aktar milli fil-livell tal-faċilità;
2. Isir kontribut għall-objettivi tal-ekonomija ċirkolari u għall-produzzjoni mhux tossika billi tintalab data addizzjonali dwar il-konsum tar-riżorsi, eż. l-użu tal-enerġija, tal-ilma, tal-materja prima, u billi l-lista ta’ sustanzi rrapportati tkun aktar dinamika biex jiġu inkorporati is-sustanzi ta’ tħassib emerġenti;
3. Isir kontribut għad-dekarbonizzazzjoni tal-industrija billi tinġabar data aktar akkurata dwar ir-rilaxxi ta’ gassijiet serra minn attivitajiet industrijali;
4. Jiġi estiż il-kamp ta’ applikazzjoni settorjali tal-Portal sabiex jittejjeb l-għarfien dwar rilaxxi/trasferimenti industrijali sinifikanti oħra u biex tittejjeb il-koerenza mal-leġiżlazzjoni relatata, speċjalment id-Direttiva dwar l-IED u l-impjanti tal-kombustjoni medji.
(5)Riżultat(i) u impatt mistennija
Speċifika l-effetti li l-proposta/l-inizjattiva jenħtieġ li jkollha fuq il-benefiċjarji/il-gruppi fil-mira.
L-emenda proposta għar-Regolament se tindirizza n-nuqqasijiet ta’ implimentazzjoni identifikati fl-evalwazzjonijiet tal-PRTR Ewropew / tal-IED u se tgħin biex jintlaħqu għanijiet usa’ tal-politika tal-EGD.
It-tranżizzjoni għar-rapportar fil-livell tal-installazzjoni (aktar milli fil-faċilità) se tistabbilixxi mill-ġdid ir-rabta mal-IED, u b’hekk tipprovdi metrika aktar affidabbli għall-prestazzjoni ambjentali tal-installazzjonijiet industrijali.
Il-forniment ta’ data addizzjonali dwar il-konsum tar-riżorsi u r-rilaxxi tal-gassijiet serra se jgħin fil-promozzjoni ta’ metodi ta’ produzzjoni effiċjenti fir-riżorsi, ċirkolari u b’livell żero ta’ emissjonijiet tal-karbonju billi jiġu identifikati dawk tajbin u ħżiena.
L-espansjonijiet tal-kamp ta’ applikazzjoni settorjali se jiżguraw li l-Portal jagħti stampa aktar akkurata tar-rilaxxi / tat-trasferimenti ewlenin mill-attivitajiet industrijali tal-UE.
L-aġġornament tal-lista tal-inkwinanti tal-Anness II se jiżgura li l-ħtiġijiet attwali u futuri tal-informazzjoni jiġu ssodisfati b’mod aktar preċiż.
B’mod ġenerali, il-proposti se jgħinu biex jiġi żgurat li l-Portal jibqa’ bażi tad-data komprensiva u faċli biex tintuża dwar il-post u l-prestazzjoni tal-installazzjonijiet industrijali tal-UE.
(6)Indikaturi tal-prestazzjoni
Speċifika l-indikaturi għall-monitoraġġ tal-progress u tal-kisbiet.
Il-Portal se jipprovdi informazzjoni li tinkludi l-emissjonijiet kumplessivi ta’ inkwinanti għal kull installazzjoni u dan se jkun indikatur ewlieni għat-traċċar tal-progress rivedut tal-IED fit-tnaqqis tal-impatt ambjentali. Dawn l-indikaturi se jkomplu jiġu prodotti kull sena b’mod komparabbli u faċilment aċċessibbli permezz tal-Portal, kif ġestit mill-Aġenzija Ewropea għall-Ambjent (EEA).
Il-granularità akbar tar-rapportar tal-emissjonijiet ta’ inkwinanti fil-livell tal-installazzjoni se tippermetti l-monitoraġġ tal-attivitajiet ewlenin, jiġifieri li l-prestazzjoni ambjentali tagħhom tkun qed titjieb jew tkun għadha lura.
L-inklużjoni tar-rapportar tal-użu tar-riżorsi se tippermetti d-definizzjoni ta’ indikaturi ġodda dwar l-użu tal-materjali, l-ilma u l-enerġija, li se jippermettu t-traċċar tat-titjib fl-effiċjenza tar-riżorsi.
(7)Raġunijiet għall-proposta/għall-inizjattiva
(8)Rekwiżit(i) li għandu/għandhom jiġi/u ssodisfat(i) fuq terminu qasir jew twil inkluża kronoloġija dettaljata għat-tnedija tal-implimentazzjoni tal-inizjattiva
Din id-dikjarazzjoni finanzjarja se tiżgura l-finanzjament għall-EEA biex jiġi stabbilit Portal tal-emissjonijiet industrijali aġġornat, estiż, faċli għall-utent u kompletament operazzjonali. Il-Portal jissostitwixxi l-PRTR Ewropew (Reġistru Ewropew dwar ir-Rilaxx u t-Trasferiment ta’ Inkwinanti).
Skeda ta’ żmien:
- Q1-Q2 2024 — ħidma preparatorja: ħidma analitika għat-tfassil ta’ moduli addizzjonali biex il-Portal jiġi allinjat mal-kamp ta’ applikazzjoni usa’ tal-IED u biex jiġi żgurat ir-rapportar dwar l-użu tar-riżorsi (il-materjali, l-ilma, l-enerġija) minbarra r-rilaxxi ta’ inkwinanti.
- Q3 2024 — il-fażi tat-test tal-Portal il-ġdid
- Q1 2025 — tnedija tal-Portal aġġornat: il-ġbir tad-data, l-assigurazzjoni tal-kwalità u l-pubblikazzjoni
(9)Valur miżjud tal-involviment tal-Unjoni (dan jista’ jirriżulta minn fatturi differenti, eż. il-gwadanji mill-koordinazzjoni, iċ-ċertezza ġuridika, effettività akbar jew il-komplementarjetajiet). Għall-finijiet ta’ dan il-punt, il-“valur miżjud tal-involviment tal-Unjoni” huwa l-valur li jirriżulta mill-intervent tal-Unjoni li jkun addizzjonali għall-valur li kieku kien jinħoloq mill-Istati Membri waħedhom.
Raġunijiet għall-azzjoni fil-livell Ewropew (ex ante)
Fin-nuqqas ta’ approċċ komuni għall-UE kollha għall-istabbiliment tar-rekwiżiti tar-rapportar, ikun diffiċli ħafna li titqabbel il-prestazzjoni ambjentali tal-installazzjonijiet fi Stati Membri differenti. Barra minn hekk, l-istandards tar-rapportar tal-UE jiġu adottati lil hinn mill-EU-27, li jfisser li data ambjentali komparabbli hija disponibbli wkoll għall-installazzjonijiet fil-pajjiżi tal-EFTA u tal-adeżjoni mal-UE.
Valur miżjud tal-Unjoni li mistenni jkun iġġenerat (ex post)
Il-Portal jipprovdi informazzjoni użata mill-Istati Membri kollha, li timminimizza l-ħtieġa li kull Stat Membru jistabbilixxi l-proċessi nazzjonali tiegħu stess. Dan jgħin il-komparabbiltà tad-data.
Barra minn hekk, l-impjanti industrijali regolati skont ir-Regolament, id-Direttiva dwar l-IED u d-Direttiva Seveso-III spiss jiġu mmonitorjati minn awtoritajiet kompetenti ta’ Stati Membri differenti. Madankollu, il-Portal se jintegra din l-informazzjoni f’“punt uniku ta’ servizz” wieħed u ċentralizzat. Se jagħmel ukoll rabtiet infurmati ma’ bażijiet tad-data u sorsi ta’ informazzjoni separati li jipprovdu informazzjoni kuntestwali, bħal dwar il-kwalità tal-arja u tal-ilma fil-viċinanza tal-installazzjonijiet. Dan jipprovdi ħafna informazzjoni dwar diversi aspetti relatati ma’ dawn l-installazzjonijiet industrijali; informazzjoni li hija siewja għall-awtoritajiet kompetenti, l-industriji, l-NGOs, il-pubbliku u l-Kummissjoni (għall-finijiet tat-tfassil tal-politika u t-titjib fl-implimentazzjoni).
(10)Tagħlimiet meħuda minn esperjenzi simili fl-imgħoddi
Din se tkun it-tieni okkażjoni li fiha ġie emendat l-inventarju tal-emissjonijiet industrijali tal-Ewropa.
Fis-sena 2000, inħoloq l-ewwel inventarju tal-emissjonijiet tal-Ewropa (Reġistru Ewropew dwar l-Emissjonijiet ta’ Sustanzi Niġġiesa; EPER) bħala konsegwenza diretta tal-Artikolu 15(3) tad-Direttiva dwar l-IPPC tal-1996 (il-predeċessur tal-IED). L-Artikolu 15(3) iddikjara li:
“Inventarju tal-emissjonijiet prinċipali u l-għejun responsabbli għandu jiġi pubblikat kull tliet snin mill-Kummissjoni fuq il-bażi tad-data mogħtija mill-Istati Membri. Il-Kummissjoni għandha tistabbilixxi l-format u d-dettalji meħtieġa għat-trażmissjoni tal-informazzjoni skont il-proċedura stabbilita fl-Artikolu 19.
Skont l-istess proċedura, il-Kummissjoni tista’ tipproponi miżuri biex tiżgura interkomparabbilita u kumplementarjeta bejn id-data li tikkonċerna l-inventarju tal-emissjonijiet imsemmi fl-ewwel subparagrafu u d-data minn reġistri u għejun oħra ta’ data dwar l-emissjonijiet.”
Fl-2006, l-EPER ġie sostitwit mill-PRTR Ewropew (Reġistru Ewropew dwar ir-Rilaxx u t-Trasferiment ta’ Inkwinanti) sabiex l-UE tissodisfa l-obbligi internazzjonali tagħha skont il-Protokoll ta’ Kiev tal-UNECE għall-Konvenzjoni ta’ Aarhus dwar l-aċċess għall-informazzjoni ambjentali.
(11)Kompatibbiltà mal-Qafas Finanzjarju Pluriennali u sinerġiji possibbli ma’ strumenti xierqa oħra
Din l-azzjoni hija konsistenti ma’ għadd ta’ politiki oħra tal-UE u inizjattivi li għaddejjin bħalissa li jirriżultaw mill-Patt Ekoloġiku Ewropew.
(12)Valutazzjoni tal-għażliet differenti ta’ finanzjament disponibbli, inkluż l-ambitu għar-riallokazzjoni
L-għażla miżmuma hija li l-EEA tkompli timmaniġġja l-Portal u timplimenta l-bidliet addizzjonali kollha taħt is-superviżjoni tad-DĠ ENV. Dan huwa favorevoli peress li:
(1) hemm valur miżjud ċar fl-iżgurar ta’ approċċ konsistenti madwar l-UE, li se jiġi esportat lejn il-Protokoll, li huwa wkoll il-parametru referenzjarju globali użat minn kontinenti oħra (eż. l-Amerka t’Isfel, il-Ġappun u l-OECD inġenerali).
(2) sinerġiji ovvji mar-rwol tal-EEA fil-ġestjoni tal-informazzjoni ambjentali relatata mal-kwalità tal-arja, mal-kwalità tal-ilma, eċċ.
Għażliet oħra investigati:
Dipendenza biss fuq il-PRTRs żviluppati mill-Istati Membri. Bħala parti għall-Konvenzjoni ta’ Aarhus u għall-Protokoll tagħha, l-UE hija meħtieġa timplimenta l-impenji tagħha. Fit-teorija, peress li l-Istati Membri huma partijiet għall-Protokoll ukoll, l-obbligi kollha li fih, setgħu ġew stabbiliti fil-leġiżlazzjoni nazzjonali tal-Istati Membri. Madankollu, ma kien ikun hemm l-ebda garanzija ta’ applikazzjoni konsistenti madwar l-UE f’dan il-każ peress li l-Protokoll fih għażliet għall-implimentazzjoni ta’ xi dispożizzjonijiet. Pereżempju, l-attivitajiet li jaqgħu fil-kamp ta’ applikazzjoni tiegħu jistgħu jiġu ddefiniti bl-użu ta’ livelli limitu tal-kapaċità jew tal-impjegati. Il-ħolqien tal-Portal jimminimizza l-ħtieġa li kull Stat Membru jistabbilixxi l-proċessi nazzjonali tiegħu stess u jgħin il-komparabbiltà tad-data.
(13)Durata u impatt finanzjarju tal-proposta/tal-inizjattiva
◻ durata limitata
◻
Proposta/inizjattiva fis-seħħ minn [JJ/XX]SSSS sa [JJ/XX]SSSS
◻
Impatt finanzjarju mill-SSSS sal-SSSS
⌧ durata mhux limitata
Implimentazzjoni b’perjodu ta’ bidu mill-2022 sal-2025, segwita minn operazzjoni fuq skala sħiħa.
(14)Mod(i) ta’ ġestjoni ppjanat/i
◻ Ġestjoni diretta mill-Kummissjoni permezz ta’
◻
aġenziji eżekuttivi
◻ Ġestjoni kondiviża mal-Istati Membri
☒ Ġestjoni indiretta billi jiġu fdati kompiti ta’ implimentazzjoni baġitarja:
◻ lill-organizzazzjonijiet internazzjonali u lill-aġenziji tagħhom (iridu jiġu speċifikati);
◻lill-BEI u lill-Fond Ewropew tal-Investiment;
☒ lill-korpi msemmija fl-Artikoli 70 u 71;
◻ lill-korpi tal-liġi pubblika;
◻ lill-korpi rregolati mid-dritt privat b’missjoni ta’ servizz pubbliku diment li jipprovdu garanziji finanzjarji adegwati;
◻ lill-korpi rregolati mid-dritt privat ta’ Stat Membru li huma fdati bl-implimentazzjoni ta’ sħubija pubblika-privata u li jipprovdu garanziji finanzjarji adegwati;
◻ lill-persuni fdati bl-implimentazzjoni ta’ azzjonijiet speċifiċi fil-PESK skont it-Titolu V tat-TUE, u identifikati fl-att bażiku rilevanti.
(15)MIŻURI TA’ ĠESTJONI
(16)Regoli tal-monitoraġġ u tar-rapportar
Speċifika l-frekwenza u l-kundizzjonijiet.
Se japplikaw regoli standard ta’ monitoraġġ u rapportar għas-sussidji tal-UE lill-aġenziji deċentralizzati.
(17)Sistema/i ta’ ġestjoni u ta’ kontroll
(18)Ġustifikazzjoni tal-mod(i) ta’ ġestjoni, tal-mekkaniżmu/i għall-implimentazzjoni tal-finanzjament, tal-modalitajiet ta’ pagament u tal-istrateġija ta’ kontroll proposta
Se japplikaw regoli standard ta’ monitoraġġ u rapportar għas-sussidji tal-UE lill-aġenziji deċentralizzati.
(19)Informazzjoni dwar ir-riskji identifikati u s-sistema/i ta’ kontroll intern stabbilita/i għall-mitigazzjoni tagħhom
(20)Stima u ġustifikazzjoni tal-kosteffettività tal-kontrolli (proporzjon tal-“kostijiet tal-kontroll ÷ il-valur tal-fondi relatati ġestiti”), u valutazzjoni tal-livelli mistennija tar-riskju ta’ żball (mal-ħlas u fl-għeluq)
(21)Miżuri għall-prevenzjoni ta’ frodi u ta’ irregolaritajiet
Speċifika l-miżuri ta’ prevenzjoni u ta’ protezzjoni eżistenti jew previsti, eż. mill-Istrateġija Kontra l-Frodi.
Se japplikaw modalitajiet standard għas-sussidji tal-UE lil aġenziji tradizzjonali
(22) IMPATT FINANZJARJU STMAT TAL-PROPOSTA
(23)Intestatura tal-qafas finanzjarju pluriennali u l-linja baġitarja tan-nefqa affettwata
Intestatura tal-qafas finanzjarju pluriennali
|
Linja baġitarja
|
Tip ta’
nefqa
|
Kontribuzzjoni
|
|
Numru
|
Diff./Mhux diff.
|
mill-pajjiżi tal-EFTA
|
mill-pajjiżi kandidati
|
minn pajjiżi terzi
|
skont it-tifsira tal-Artikolu 21(2)(b) tar-Regolament Finanzjarju
|
3
|
09.10.02 – L-Aġenzija Ewropea għall-Ambjent (EEA)
|
Diff.
|
IVA
|
IVA
|
LE
|
LE
|
(24)Impatt finanzjarju stmat tal-proposta fuq l-approprjazzjonijiet
(25)Sommarju tal-impatt stmat fuq l-approprjazzjonijiet operazzjonali
◻
Il-proposta/l-inizjattiva ma teħtieġx l-użu ta’ approprjazzjonijiet operazzjonali
⌧
Il-proposta/l-inizjattiva teħtieġ l-użu ta’ approprjazzjonijiet operazzjonali, kif spjegat hawn taħt:
Intestatura tal-qafas finanzjarju
pluriennali
|
Numru
|
Intestatura 3 – Riżorsi naturali u ambjent
|
miljuni ta’ EUR (ittondjati għal tliet pożizzjonijiet deċimali)
Aġenzija: EEA
|
|
|
Sena
2024
|
Sena
2025
|
Sena
2026
|
Sena
2027
|
TOTAL
|
Titolu 1: Nefqa fuq il-persunal
|
Impenji
|
(1a)
|
0,430
|
0,438
|
0,447
|
0,456
|
1,772
|
|
Pagamenti
|
(2a)
|
0,430
|
0,438
|
0,447
|
0,456
|
1,772
|
Titolu 2: Nefqa amministrattiva
|
Impenji
|
(1a)
|
0,050
|
0,050
|
0,020
|
0,020
|
0,140
|
|
Pagamenti
|
(2a)
|
0,050
|
0,050
|
0,020
|
0,020
|
0,140
|
Titolu 3: Nefqa operazzjonali
|
Impenji
|
(1b)
|
0,170
|
0,070
|
0,030
|
0,030
|
0,300
|
|
Pagamenti
|
(2b)
|
0,170
|
0,070
|
0,030
|
0,030
|
0,300
|
TOTAL tal-approprjazzjonijiet
għall-EEA
|
Impenji
|
=1a+1b +3
|
0,650
|
0,558
|
0,497
|
0,506
|
2,212
|
|
Pagamenti
|
=2a+2b
+3
|
0,650
|
0,558
|
0,497
|
0,506
|
2,212
|
|
|
|
2024
|
2025
|
2026
|
2027
|
Total
|
TOTAL tal-approprjazzjonijiet
skont l-INTESTATURA 3
tal-qafas finanzjarju pluriennali
|
Impenji
|
=4+ 6
|
0,650
|
0,558
|
0,497
|
0,506
|
2,212
|
|
Pagamenti
|
=5+ 6
|
0,650
|
0,558
|
0,497
|
0,506
|
2,212
|
Ġustifikazzjoni għall-kostijiet ta’ hawn fuq:
Il-kostijiet tal-EEA jinkludu l-kost ta’ żewġ FTE addizzjonali li se jistabbilixxu l-infrastruttura tal-IT għall-ġbir ta’ oqsma ġodda tad-data (dwar l-użu tar-riżorsi u inkwinanti addizzjonali), jimmodifikaw u jespandu l-iskema XML biex tippermetti r-rapportar fil-livell tal-installazzjoni u għal attivitajiet agroindustrijali li għadhom kemm ġew inklużi, jaġġornaw il-Manwal għal Min Jirrapporta biex jiġu żgurati redditi konsistenti mill-operaturi/mill-Istati Membri, iwettqu sessjonijiet ta’ taħriġ għal min jirrapporta mill-Istati Membri biex jintroduċu dawn ir-rekwiżiti l-ġodda, u sussegwentement jimmaniġġjaw ir-rapportar u d-data relatata.
Il-kostijiet tal-iżvilupp tal-infrastruttura tal-IT se jonqsu fit-tielet sena, peress li se jibqgħu biss il-kostijiet tal-manutenzjoni tal-infrastruttura tal-IT. Huwa preżunt li għall-ewwel sentejn, l-EEA se jkollha bżonn aktar riżorsi finanzjarji biex timmodernizza l-għodod eżistenti bħala riżultat tal-proposta legali.
Il-kostijiet tal-EEA jassumu żieda inflazzjonarja ta’ 2 % u koeffiċjent ta’ korrezzjoni għar-remunerazzjoni għad-Danimarka mill-1 ta’ Lulju 2021 — 1,342. Dan ġie preżunt mhux mibdul għas-snin ta’ wara.
Iż-żieda meħtieġa tal-kontribuzzjoni tal-UE għall-EEA se tiġi kkumpensata minn tnaqqis korrispondenti fil-pakkett tal-programm LIFE (linja baġitarja 09.0202 – Ekonomija ċirkolari u kwalità tal-ħajja).
(26)Output stmat iffinanzjat bl-approprjazzjonijiet operazzjonali
Mhux applikabbli
(27)L-impatt stmat fuq ir-riżorsi tal-EEA
◻
Il-proposta/l-inizjattiva ma teħtieġx l-użu ta’ approprjazzjonijiet ta’ natura amministrattiva
⌧
Il-proposta/l-inizjattiva teħtieġ l-użu ta’ approprjazzjonijiet ta’ natura amministrattiva, kif spjegat hawn taħt:
miljuni ta’ EUR (ittondjati għal tliet pożizzjonijiet deċimali)
|
Sena
2024
|
Sena
2025
|
Sena
2026
|
Sena
2027
|
TOTAL
|
Aġenti temporanji (Gradi ta’ AD)
|
0,430
|
0,438
|
0,447
|
0,456
|
1,772
|
TOTAL
|
0,430
|
0,438
|
0,447
|
0,456
|
1,772
|
Rekwiżiti tal-persunal (FTE):
|
Sena
2024
|
Sena
2025
|
Sena
2026
|
Sena
2027
|
TOTAL
|
Aġenti temporanji (Gradi ta’ AD)
|
2
|
2
|
2
|
2
|
2/sena
|
TOTAL
|
2
|
2
|
2
|
2
|
2/sena
|
Il-persunal tal-EEA se jistabbilixxi l-infrastruttura tal-IT li se tkun meħtieġa biex jiġu implimentati r-reviżjonijiet proposti u sussegwentement jimmaniġġja r-rapportar u d-data relatata. Dan it-titjib huwa relatat mal-kapaċità fiżika tal-fluss tar-rapportar (jiġifieri l-għadd u n-natura tar-rapporti) u s-sistemi ta’ appoġġ (gwida, taħriġ, eċċ.) biex tiġi żgurata l-applikazzjoni konsistenti tagħhom mill-operaturi industrijali u mill-Istati Membri.
(28)Rekwiżiti stmati ta’ riżorsi umani fil-Kummissjoni
Mhux applikabbli
(29)Kompatibbiltà mal-qafas finanzjarju pluriennali attwali
·Il-proposta/l-inizjattiva:
⌧
tista’ tiġi ffinanzjata kompletament permezz ta’ riallokazzjoni fl-intestatura rilevanti tal-Qafas Finanzjarju Pluriennali (QFP).
◻
teħtieġ l-użu tal-marġni mhux allokat taħt l-intestatura rilevanti tal-QFP u/jew l-użu tal-istrumenti speċjali ddefiniti fir-Regolament dwar il-QFP.
◻
teħtieġ reviżjoni tal-QFP.
(30)Kontribuzzjonijiet ta’ partijiet terzi
·Il-proposta/l-inizjattiva ma tipprevedix kofinanzjament minn partijiet terzi
(31)Impatt stmat fuq id-dħul
Il-proposta/l-inizjattiva ma għandha l-ebda impatt finanzjarju fuq id-dħul.