IL-KUMMISSJONI EWROPEA

Brussell, 10.10.2022

COM(2022) 517 final

RAPPORT TAL-KUMMISSJONI LILL-PARLAMENT EWROPEW U LILL-KUNSILL

Dwar il-funzjonament tar-Regolament dwar it-Titolizzazzjoni

RAPPORT TAL-KUMMISSJONI LILL-PARLAMENT EWROPEW U LILL-KUNSILL

Dwar il-funzjonament tar-Regolament dwar it-Titolizzazzjoni

Werrej

1.    Introduzzjoni    

2.    Żviluppi tas-suq    

3.    L-effetti tar-Regolament    

4.    Ritenzjoni tar-riskju    

5.    Diliġenza dovuta u trasparenza    

6.    Titolizzazzjonijiet privati    

6.1 Żieda sproporzjonata fl-għadd ta’ titolizzazzjonijiet privati?    

6.2 Informazzjoni suffiċjenti għall-investituri u għas-superviżuri dwar it-titolizzazzjonijiet privati?    

6.3 Definizzjoni ta’ titolizzazzjoni privata    

7.    Ekwivalenza tal-STS    

8.    Titolizzazzjoni sostenibbli    

9.    Verifika minn parti terza tal-kriterji STS    

10.    Entitajiet bi skop speċjali tat-titolizzazzjoni (SSPEs)    

11.    Kamp ta’ applikazzjoni ġuriżdizzjonali    

11.1 Obbligi min-naħa tal-bejgħ    

11.2 Obbligi min-naħa tax-xiri – disponibbiltà tad-divulgazzjonijiet    

11.3 Obbligi min-naħa tax-xiri – investituri tal-AIFM    

12. Superviżjoni tat-titolizzazzjoni    

13. Trattament prudenzjali tat-titolizzazzjonijiet    

14. Konklużjoni    

1.Introduzzjoni 

It-titolizzazzjoni hija l-proċess li permezz tiegħu, is-self mhux funġibbli, jew il-flussi ta’ flus li jirriżultaw minnu, jinbidlu f’titoli kummerċjabbli. Għalhekk, din l-għodda tagħti kontribut sinifikanti għal sistema finanzjarja li tiffunzjona tajjeb li tiffinanzja b’mod effiċjenti l-ekonomija reali, minħabba li tillibera l-kapaċità fuq il-karti bilanċjali tal-banek u b'hekk tippermettilhom jipprovdu kreditu ġdid lin-negozji, inklużi lil kumpaniji żgħar u ta’ daqs medju. Hija taġixxi bħala għodda importanti għall-ġestjoni tal-kapital, tal-likwidità u tar-riskju fil-banek. Barra minn hekk, it-titolizzazzjoni tagħmel klassijiet ta’ assi ġodda aċċessibbli għall-investituri, u b’hekk tipprovdi opportunitajiet ta’ investiment diversifikati għal investituri fit-tul.

Madankollu, 15-il sena wara l-kriżi finanzjarja kbira, it-titolizzazzjoni għadha ssofri minn stigma perċepita bħala għodda kumplessa ta’ inġinerija tal-finanzjament ta’ dak iż-żmien. Huwa magħruf sew li t-titolizzazzjoni regolata b’mod laxk ikkontribwiet b’mod sinifikanti għall-kriżi tas-suq ipotekarju tas-subprime tal-Istati Uniti, li nfirxet malajr permezz tas-sistema finanzjarja globali b’konsegwenzi estensivi għall-kontribwenti u għall-kumpaniji fl-UE u lil hinn minnha.

Is-swieq Ewropej tat-titolizzazzjoni ma sofrewx l-istess problemi bħal dawk tal-Istati Uniti 1 . Madankollu, il-ħruġ u l-investiment fis-swieq tal-UE naqsu drastikament. Wara l-kriżi finanzjarja kbira, il-banek ċentrali 2 u ħafna partijiet ikkonċernati qablu fuq il-ħtieġa li s-suq tat-titolizzazzjoni tal-UE jerġa’ jitqajjem fuq saqajh. Għalhekk, il-Kummissjoni Ewropea impenjat ruħha li tilħaq l-għan li terġa’ tqajjem is-suq tat-titolizzazzjoni fl-UE fuq bażi sikura u sostenibbli. Fil-pjan ta’ investiment tal-2014 għall-Ewropa, il-Kummissjoni identifikat il-ħolqien ta’ suq li jiffjorixxi ta’ titolizzazzjonijiet ta’ kwalità għolja bħala wieħed mill-ħames oqsma fejn kienet meħtieġa azzjoni immedjata u inkludiet din l-azzjoni fil-lista tal-elementi kostitwenti għal Unjoni tas-Swieq Kapitali 3 . 

B’segwitu għal dawn l-impenji ta’ politika, fl-2015 il-Kummissjoni pproponiet qafas legali komprensiv li jikkonsisti f’Regolament ġdid dwar it-Titolizzazzjoni u bidliet immirati għat-trattament prudenzjali tat-titolizzazzjoni.

In-negozjati bejn il-koleġiżlaturi - il-Parlament Ewropew u l-Kunsill - ġew konklużi fl-2017. Ir-Regolament (UE) 2017/2402 4 (“ir-Regolament dwar it-Titolizzazzjoni”) u r-Regolament (UE) 2017/2401, li jemenda r-Regolament (UE) Nru 575/2013 dwar ir-rekwiżiti prudenzjali għall-istituzzjonijiet ta’ kreditu u d-ditti tal-investiment, daħlu fis-seħħ fl-1 ta’ Jannar 2019.

Ir-Regolament dwar it-Titolizzazzjoni jibni fuq għadd ta’ dispożizzjonijiet li kienu diġà fis-seħħ u li kienu ġew emendati parzjalment b’reazzjoni għall-kriżi. Madankollu, dawn id-dispożizzjonijiet kienu mifruxa fuq għadd kbir ta’ atti legali settorjali li applikaw għal entitajiet differenti tas-suq, inklużi: (i) ir-Regolament dwar ir-Rekwiżiti ta’ Kapital (CRR) għall-banek 5 ; (ii) id-Direttiva dwar Solvenza II 6 għall-assiguraturi; u d-direttivi dwar (iii) l-Impriżi ta’ Investiment Kollettiv f’Titoli Trasferibbli (UCITS) 7 u l-Maniġers ta’ Fondi ta’ Investiment Alternattiv (AIFM 8 ) għall-maniġers tal-assi. Ir-Regolament dwar it-Titolizzazzjoni joħloq qafas legali uniku u armonizzat għall-partijiet ewlenin involuti fi tranżazzjoni ta’ titolizzazzjoni. Dawn huma mutwanti oriġinali, oriġinaturi, sponsors, entitajiet bi skop speċjali tat-titolizzazzjoni u investituri istituzzjonali li jipparteċipaw fis-suq tat-titolizzazzjoni tal-UE. Barra minn hekk, ir-Regolament dwar it-Titolizzazzjoni joħloq qafas speċifiku għal titolizzazzjonijiet sempliċi, trasparenti u standardizzati (STS) ta’ bejgħ veru 9 biex tittejjeb it-trasparenza u titnaqqas il-kumplessità tas-suq.

L-importanza ta’ suq tat-titolizzazzjoni li jiffunzjona tajjeb biex jipprovdi kreditu suffiċjenti lill-ekonomija reali għal darba oħra ġiet sottolinjata mill-Pakkett ta’ Rkupru tas-Swieq Kapitali 10 biex jgħin lill-ekonomija tal-UE tirkupra mill-pandemija tal-COVID-19. Il-pakkett kien jinkludi emendi għar-Regolament dwar it-Titolizzazzjoni bil-għan li jitwessa’ l-kamp ta’ applikazzjoni tar-reġim STS għal titolizzazzjonijiet sintetiċi fuq il-karta bilanċjali 11 u biex jitneħħew ċerti impedimenti regolatorji għat-titolizzazzjoni ta’ skoperturi li ma jrendux. Dawn l-emendi ġew adottati mill-Parlament Ewropew u mill-Kunsill f’Marzu 2021.

Aktar minn tliet snin wara d-dħul fis-seħħ tal-qafas il-ġdid ta’ titolizzazzjoni, u kif imħabbar fil-pjan ta’ azzjoni tal-Unjoni tas-Swieq Kapitali tal-2020 12 , dan ir-rapport iqis l-iżvilupp tas-suq u jiddiskuti aspetti importanti tal-qafas legali. Dan ir-rapport jissodisfa l-mandat legali tal-Kummissjoni skont l-Artikolu 46 tar-Regolament dwar it-Titolizzazzjoni biex jippreżenta rapport lill-Parlament Ewropew u lill-Kunsill dwar il-funzjonament tar-Regolament dwar it-Titolizzazzjoni, akkumpanjat, jekk xieraq, minn proposta leġiżlattiva. Huwa jissodisfa wkoll il-mandat legali skont l-Artikolu 45a(3) biex jirrapporta għand il-koleġiżlaturi dwar il-ħolqien ta’ qafas ta’ titolizzazzjoni sostenibbli speċifiku, li jibni fuq ir-rapport rilevanti tal-Awtorità Bankarja Ewropea (EBA). Dan ir-rapport jindirizza wkoll il-kwistjonijiet imqajma mill-opinjoni tal-awtoritajiet superviżorji Ewropej (ASE) tal-25 ta’ Marzu 2021 lill-Kummissjoni Ewropea dwar il-kamp ta’ applikazzjoni ġuriżdizzjonali 13 (l-“Opinjoni tal-Kumitat Konġunt”), billi jipprovdi interpretazzjonijiet legali ta’ ċerti dispożizzjonijiet tar-Regolament dwar it-Titolizzazzjoni. Huwa jqis ukoll ir-rakkomandazzjonijiet magħmula minn forum ta’ livell għoli dwar l-Unjoni tas-Swieq Kapitali, maħluq mill-Kummissjoni fl-2019 14 .

Ir-rapport huwa msejjes fuq għadd ta’ sorsi, b’mod partikolari l-analiżi estensiva li saret mis-sottokumitat tat-titolizzazzjoni tal-Kumitat Konġunt tal-ASE, li ġiet ippubblikata f’żewġ dokumenti: (i) ir-rapport dwar l-implimentazzjoni u l-funzjonament tar-Regolament dwar it-Titolizzazzjoni 15 (is-17 ta’ Mejju 2021, ir-“rapport tal-Kumitat Konġunt”); u (ii) l-opinjoni tal-Kumitat Konġunt. Barra minn hekk, il-Kummissjoni wettqet konsultazzjoni pubblika mmirata li rċeviet 56 tweġiba (“il-konsultazzjoni”). Din attirat interess minn firxa wiesgħa ta’ parteċipanti fis-suq, kemm min-naħa tax-xiri kif ukoll min-naħa tal-bejgħ tas-suq, kif ukoll mill-awtoritajiet pubbliċi u mill-akkademiċi. Dan ir-rapport huwa akkumpanjat minn dikjarazzjoni ta’ feedback 16 li tipprovdi sommarju dettaljat tat-tweġibiet riċevuti.

F’konformità mal-mandati legali, dan ir-rapport jiffoka fuq aspetti tal-qafas ta’ titolizzazzjoni li jappartjenu għar-Regolament dwar it-Titolizzazzjoni. Kwistjonijiet relatati mat-trattament prudenzjali tat-titolizzazzjoni għall-banek u għall-kumpaniji tal-assigurazzjoni bħalissa huma s-suġġett ta’ sejħa għal parir lill-Kumitat Konġunt tal-ASE 17 u se jiġu vvalutati mill-Kummissjoni ladarba dak il-parir mitlub ikun ingħata. Dan ir-rapport u l-konklużjonijiet tiegħu bl-ebda mod ma jantiċipaw il-valutazzjoni u d-deċiżjonijiet possibbli li l-Kummissjoni se tagħmel dwar l-adegwatezza tar-reġim prudenzjali attwali.

Ir-rapport jiffoka fuq il-funzjonament ta’: (i) ir-rekwiżit tar-ritenzjoni tar-riskju; (ii) ir-rekwiżiti tad-diliġenza dovuta u tat-trasparenza; (iii) ir-regoli u d-definizzjoni għal titolizzazzjonijiet privati; (iv) il-każ għal reġim ta’ ekwivalenza tal-STS; (v) reġim għal titolizzazzjoni sostenibbli; (vi) il-funzjoni tal-verifika tal-STS minn parti terza; u (vii) il-każ għall-istabbiliment ta’ sistema ta’ banek b’liċenzja limitata biex jissostitwixxu l-istruttura attwali ta’ titolizzazzjoni ta’ bejgħ veru mibnija madwar entitajiet bi skop speċjali tat-titolizzazzjoni (SSPEs). Ir-rapport jikkunsidra wkoll kwistjonijiet dwar il-kamp ta’ applikazzjoni ġuriżdizzjonali tar-Regolament dwar it-Titolizzazzjoni, kif imqajma fl-opinjoni tal-Kumitat Konġunt, u jipprovdi interpretazzjonijiet legali f’dak il-kuntest. Abbażi tar-rapport tal-Kumitat Konġunt, dan id-dokument jivvaluta l-istat attwali tas-superviżjoni u jikkonkludi b’ħarsa ġenerali lejn il-ħidma li għaddejja u li ġejja dwar it-trattament prudenzjali tat-titolizzazzjoni.

2.Żviluppi tas-suq

Bħalissa huwa diffiċli li tinkiseb stima affidabbli u komprensiva tad-daqs tas-suq tat-titolizzazzjoni fl-UE. Maż-żmien, ir-repożitorji tat-titolizzazzjoni se jkunu jistgħu jipprovdu rendikont sħiħ tat-titolizzazzjonijiet pubbliċi, iżda bħalissa għad hemm għadd kbir ta’ tranżazzjonijiet ta’ legat attivi, jiġifieri maħruġa qabel l-1 ta’ Jannar 2019, li ma għandhomx bżonn jiġu rrapportati lir-repożitorji. Il-volum ta’ titolizzazzjonijiet irrapportati lir-repożitorji tat-titolizzazzjoni kien ta’ madwar EUR 460 biljun fis-6 ta’ April 2022, filwaqt li l-estimi tas-suq tad-daqs tas-suq tat-titolizzazzjonijiet pubbliċi fiż-żona tal-euro (esklużi l-obbligi ta’ self kollateralizzat) fi tmiem l-2021 kienu ta’ kważi EUR 750 biljun. Barra minn hekk, bħalissa ma hemm l-ebda informazzjoni uffiċjali dwar id-daqs eżatt tas-suq tat-titolizzazzjonijiet privati, minħabba l-fatt li tali tranżazzjonijiet bħalissa qed jiġu rrapportati biss lir-repożitorji tat-titolizzazzjoni fuq bażi volontarja, u s-superviżuri sa issa għadhom ma ġabrux tali data b’mod sistematiku. Skont l-Eżerċizzju ta’ Benchmarking Ewropew għat-titolizzazzjonijiet privati 18 , is-suq ġenerali huwa stmat li huwa ta’ mill-inqas EUR 189 biljun f’impenji totali. Madankollu, din l-istima tinkludi t-tranżazzjonijiet tar-Renju Unit.

Skont l-estimi tas-suq, wara diversi snin ta’ tnaqqis 19 , il-bilanċ pendenti tat-tranżazzjonijiet ta’ titolizzazzjoni fl-UE kien stabbli sa mid-dħul fis-seħħ tar-Regolament dwar it-Titolizzazzjoni fl-2019. Il-bilanċ naqas bi 11,9 % bejn l-2015 u t-tmiem tal-2021, u wera dinamika simili għas-suq tar-Renju Unit, filwaqt li s-suq tat-titolizzazzjoni tal-Istati Uniti kiber sostanzjalment matul dan il-perjodu 20 . It-tip dominanti ta’ titolizzazzjoni huwa t-titolu abbażi ta’ ipoteka residenzjali, li kien jirrappreżenta kważi 60 % tas-suq tal-UE fi tmiem l-2021, segwit minn titolizzazzjoni appoġġata minn self lill-SMEs, kreditu għall-konsumatur u self għal karozzi.

Sors alternattiv ta’ data huwa r-rapportar komuni għar-rekwiżiti kapitali konsolidati, subkonsolidati u individwali (COREP), li jinkludi titolizzazzjonijiet ta’ bejgħ veru, titolizzazzjonijiet sintetiċi u karti kummerċjali garantiti b’assi miżmuma jew oriġinati minn banek. Dan is-sors għandu l-benefiċċju li jinkludi tranżazzjonijiet privati, għalkemm bir-rimarka li t-tranżazzjonijiet mingħajr bank parteċipanti ma jaqgħux fil-kamp ta’ applikazzjoni tiegħu. Skont dan is-sors ta’ data, l-ammont pendenti ta’ tranżazzjonijiet żdied minn EUR 1 080 miljun fl-2018 għal EUR 1 300 miljun fl-2021, li jissuġġerixxi żieda fl-attività ta’ titolizzazzjoni fost il-banek minn meta sar applikabbli r-Regolament dwar it-Titolizzazzjoni.

3. L-effetti tar-Regolament

Sfond u sejbiet

L-impatt fuq il-funzjonament tas-suq għat-titolizzazzjoni fl-UE

Il-biċċa l-kbira tar-rispondenti għall-konsultazzjoni ġeneralment kienu jappoġġaw il-qafas legali eżistenti. Ir-rispondenti kkunsidraw ukoll li r-Regolament dwar it-Titolizzazzjoni kien applika biss għal perjodu ta’ żmien relattivament qasir u flimkien ma’ fatturi eżoġeni, bħall-pandemija tal-COVID-19 u ż-żieda fil-likwidità permezz ta’ strumenti tal-politika monetarja, dan għamilha diffiċli li l-effetti jiġu vvalutati bis-sħiħ.

Illustrazzjoni 1: Sommarju tat-tweġibiet għall-Mistoqsija 1: Ir-Regolament dwar it-Titolizzazzjoni rnexxielu jilħaq l-objettivi li ġejjin?

Skont ir-rispondenti, il-qafas legali l-ġdid kien l-aktar effettiv fir-rigward tal-għan ta’ politika li jiġi pprovdut livell għoli ta’ protezzjoni tal-investituri permezz tar-ritenzjoni tar-riskju u d-disponibbiltà tal-informazzjoni. Xi rispondenti esprimew dubji dwar il-proporzjonalità tal-kostijiet tal-konformità. Ġie rikonoxxut b’mod ġenerali li r-Regolament kien iffaċilita integrazzjoni ulterjuri, iżda li s-suq tat-titolizzazzjoni tal-UE kien għadu qed jiżviluppa. Madankollu, ir-rispondenti nnotaw li s-suq għadu frammentat bejn l-Istati Membri, li jidher li jillimita l-ekonomiji ta’ skala li jistgħu jinkisbu. Ir-rispondenti enfasizzaw ukoll li integrazzjoni ulterjuri tas-suq tat-titolizzazzjoni tal-UE tiddependi fuq fatturi oħrajn minbarra r-Regolament dwar it-Titolizzazzjoni nnifsu, bħall-politika monetarja, l-infrastruttura superviżorja u l-progress fil-pjan ta’ azzjoni usa’ tal-Unjoni tas-Swieq Kapitali. Il-maġġoranza tar-rispondenti qablu li r-Regolament dwar it-Titolizzazzjoni jipprovdi qafas legali ċar, filwaqt li ssottolinjaw li ċerti partijiet jistgħu jittejbu, u rrikonoxxew li r-Regolament dwar it-Titolizzazzjoni ffaċilita l-monitoraġġ tar-riskji possibbli, għalkemm mhux neċessarjament għal titolizzazzjonijiet privati.

Il-maġġoranza tar-rispondenti mill-industrija ma kinux tal-fehma li t-titolizzazzjoni tejbet l-aċċess għall-kreditu għall-ekonomija reali, inklużi l-SMEs. Bl-istess mod, ir-rispondenti mill-industrija ma rawx twessigħ tal-bażi ta’ investituri jew emittenti matul l-ewwel snin tal-implimentazzjoni tar-Regolament dwar it-Titolizzazzjoni. Għall-kuntrarju, ir-rispondenti qalu li l-għadd ta’ investituri minn xi setturi ewlenin, bħall-kumpaniji tal-assigurazzjoni, naqas.

B’mod ġenerali, ir-rispondenti ħassew li r-Regolament dwar it-Titolizzazzjoni sa issa ma ġab l-ebda benefiċċju tanġibbli għall-ekonomija reali u għas-self lill-SMEs. B’mod partikolari, dan minħabba li l-volum tas-suq ma żdiedx minn mindu ġie introdott ir-Regolament dwar it-Titolizzazzjoni, speċjalment għas-self lill-SMEs.

L-impatt tat-tikketta STS

Fl-aħħar ta’ Marzu 2022, ġew innotifikati 620 titolizzazzjoni STS tradizzjonali u 19-il waħda fuq il-karta bilanċjali 21 lill-Awtorità Ewropea tat-Titoli u s-Swieq (ESMA). L-aktar tip komuni ta’ assi sottostanti fit-titolizzazzjonijiet STS huma r-riċevibbli tan-negozju, ġeneralment permezz ta’ tranżazzjonijiet ta’ karti kummerċjali garantiti b’assi, segwiti minn self/lokazzjonijiet għal karozzi u titoli abbażi ta’ ipoteka residenzjali. Skont ir-rapport tal-Kumitat Konġunt, il-benefiċċju ewlieni li l-parteċipanti fis-suq jaraw fit-tikketta STS huwa t-trattament regolatorju preferenzjali mehmuż magħha. B’riżultat ta’ dan, il-banek u l-kumpaniji tal-assigurazzjoni jibbenefikaw minn imposta kapitali aktar baxxa fuq il-pożizzjonijiet innotifikati bħala STS meta mqabbla ma’ titolizzazzjonijiet mhux STS (ara l-Illustrazzjoni 2).

Illustrazzjoni 2: Il-benefiċċji u l-isfidi ewlenin tat-tikketta STS

Benefiċċji tal-STS	Punteġġ relattiv	Sfidi tal-STS	Punteġġ relattiv
Trattament tal-kapital	4,2	Kumplessità tal-kriterji STS	3,9
Bażi usa’ ta’ investituri	3,4	Restrittività tal-kriterji	3,7
Ipprezzar	3,3	Penali legali	3,7
Standardizzazzjoni	3,1	Kostijiet tal-konformità	3,6
Trasparenza	3,0	Ċarezza insuffiċjenti tal-kriterji	3,5

Sors: Ir-Rapport tal-Kumitat Konġunt

Punteġġ relattiv minn 0 (mhux rilevanti) sa 5 (estremament rilevanti)

Valutazzjoni tal-Kummissjoni

Fir-rigward tas-sitwazzjoni ġenerali tas-suq, il-Kummissjoni tirrikonoxxi l-feedback mill-industrija li jindika li l-ħruġ ta’ titolizzazzjoni għadu mxejjen. Madankollu, fin-nuqqas ta’ sors ta’ data komprensiv li jkopri s-segmenti kollha tas-suq, ma huwiex possibbli li tiġi ddeterminata b’mod kunfidenti s-sitwazzjoni għas-suq kollu. F’dan ir-rigward, is-superviżuri huma mħeġġa jagħmlu aktar sforzi biex jifhmu aħjar, b’mod partikolari, id-daqs tas-suq privat tat-titolizzazzjoni. Barra minn hekk, f’dan l-istadju ma huwiex ċar sa liema punt l-iżviluppi tas-suq jistgħu jiġu attribwiti għall-impatt tar-reġim regolatorju u sa liema punt il-fatturi eżoġeni kienu aktar deċiżivi.

Il-Kummissjoni ma ltaqgħetx jew ma saret taf b’ebda tħassib sinifikanti dwar il-kwalità tal-kreditu tat-titolizzazzjonijiet tal-UE, minkejja l-ambjent makroekonomiku relattivament negattiv, li jissuġġerixxi li s-suq tat-titolizzazzjoni tal-UE jinsab fuq bażi soda.

Il-Kummissjoni tinnota li t-tikketta STS ġiet adottata u aċċettata b’mod wiesa’ mis-suq. Hija sservi l-iskop tagħha li tgħin lill-investituri jidentifikaw strutturi ta’ kwalità għolja u tgħin biex titneħħa l-istigma marbuta mat-titolizzazzjoni. Il-Kummissjoni u l-ASE se jkomplu jimmonitorjaw is-suq u jipprovdu lill-parteċipanti fis-suq bil-gwida u ċ-ċarezza meħtieġa dwar l-interpretazzjoni tal-kriterji STS, sabiex jgħinuhom jinnavigaw il-qafas legali.

Il-Kummissjoni hija tal-opinjoni li r-Regolament dwar it-Titolizzazzjoni jidher li b’mod ġenerali huwa adattat għall-iskop tiegħu u ma tarax il-ħtieġa għal bidla leġiżlattiva kbira f’dan il-mument. Madankollu, il-Kummissjoni tieħu nota tat-tħassib espress mill-partijiet ikkonċernati u tirrikonoxxi li hemm lok għal irfinar fuq ċerti aspetti (ara t-Taqsimiet 5 u 6).

4.Ritenzjoni tar-riskju

Sfond u sejbiet

Sabiex jiġi evitat allinjament ħażin tal-inċentivi bejn l-emittenti u x-xerrejja ta’ titolizzazzjoni, l-Artikolu 6 tar-Regolament dwar it-Titolizzazzjoni jitlob lill-oriġinaturi, lill-isponsors jew lill-mutwanti oriġinali (u lis-servizzjanti, fil-każ ta’ titolizzazzjoni ta’ skoperturi li ma jrendux) iżommu interess ekonomiku nett ta’ mill-inqas 5 % fit-titolizzazzjoni matul il-ħajja tat-tranżazzjoni. Minbarra dan l-obbligu dirett, hemm ukoll verifika indiretta tar-rekwiżit tar-ritenzjoni tar-riskju li biha l-investituri istituzzjonali jitħallew iżommu biss pożizzjonijiet ta’ titolizzazzjoni fejn jinżamm interess ekonomiku nett materjali ta’ mill-inqas 5 %.

Skont l-informazzjoni mir-repożitorju tat-titolizzazzjoni tal-Maħżen Virtwali Ewropew tad-Data 22 , l-aktar metodu komuni ta’ ritenzjoni fost it-titolizzazzjonijiet pubbliċi fit-tul kien “l-ewwel telf”, fejn ir-ritenitur iżomm l-ewwel telf ta’ kreditu sa mill-inqas 5 % tal-valur nominali tal-iskoperturi titolizzati (ara l-Illustrazzjoni 3).

Illustrazzjoni 3: Użu ta’ metodi ta’ ritenzjoni f’titolizzazzjonijiet b’ terminu pubbliċi, % tat-total

Sors: Maħżen Virtwali Ewropew tad-Data

Billi t-titolizzazzjonijiet privati ma humiex meħtieġa jirrapportaw lir-repożitorji tat-titolizzazzjoni, huwa aktar diffiċli li tinkiseb sistematikament data dwar il-metodi ta’ ritenzjoni tar-riskju fi ftehimiet privati. Skont id-data ta’ COREP dwar il-banek involuti fit-tranżazzjonijiet ta’ titolizzazzjoni, l-aktar metodu komuni ta’ ritenzjoni fost it-tranżazzjonijiet sintetiċi li jfittxu r-rikonoxximent ta’ trasferiment ta’ riskju sinifikanti (SRT) biex jilliberaw il-kapital (li tipikament ikunu tranżazzjonijiet privati) huwa t-“taqsima vertikali”. Dan ifisser li l-oriġinatur, l-isponsor jew il-mutwanti oriġinali jżomm mill-inqas 5 % ta’ kull segment mibjugħ jew ittrasferit lill-investituri. Dan il-metodu ta’ ritenzjoni ntuża minn 80 % tat-tranżazzjonijiet SRT sintetiċi fis-snin 2020-2021.

Ir-rapport tal-Kumitat Konġunt ma sab l-ebda nuqqas fil-mod kif jiġi applikat il-qafas tar-ritenzjoni tar-riskju. Madankollu, l-istandards tekniċi regolatorji awtorizzati mill-Artikolu 6(7) tar-Regolament dwar it-Titolizzazzjoni, li jistabbilixxi l-ispeċifiċitajiet tal-proċeduri tar-ritenzjoni tar-riskju, għadhom ma ġewx adottati mill-Kummissjoni. Dan seta’ rriżulta f’xi inċertezza legali għall-parteċipanti fis-suq 23 . L-hekk imsejħa tranżazzjonijiet “plain vanilla” jidhru li ma ġewx affettwati minn dan in-nuqqas ta’ dispożizzjonijiet dettaljati, billi r-rekwiżiti ta’ ritenzjoni tar-riskju fil-biċċa l-kbira ħadu magħhom id-dispożizzjonijiet diġà eżistenti fir-Regolament dwar ir-Rekwiżiti ta’ Kapital u, b’mod partikolari, l-istituzzjonijiet ta’ kreditu huma familjari magħhom.

Valutazzjoni tal-Kummissjoni

Id-data turi li l-metodi ta’ ritenzjoni kollha disponibbli qed jintużaw mis-suq. Ma hemm l-ebda evidenza li xi wieħed mill-metodi ta’ ritenzjoni tar-riskju permessi mir-Regolament dwar it-Titolizzazzjoni ma huwiex adegwat. Għalhekk, il-Kummissjoni ma tarax il-ħtieġa li tirrevedi r-rekwiżiti ta’ ritenzjoni tar-riskju, iżda tistieden lill-EBA biex tkompli timmonitorja l-applikazzjoni ta’ dawn ir-rekwiżiti. Fil-ġejjieni, jista’ jkun xieraq li jiġi eżaminat f’aktar dettall għaliex u f’liema ċirkostanzi l-parteċipanti fis-suq jipprivileġġaw metodu wieħed ta’ ritenzjoni fuq l-ieħor u kemm ikun effettiv kull metodu ta’ ritenzjoni biex iżomm proporzjon tat-tranżazzjoni.

5.Diliġenza dovuta u trasparenza

Sfond u sejbiet

Ir-Regolament dwar it-Titolizzazzjoni jitlob lill-investituri istituzzjonali jwettqu diliġenza dovuta bir-reqqa qabel ma jipparteċipaw f'pożizzjoni ta’ titolizzazzjoni. Analiżi prudenti u diliġenti tar-riskji involuti f’titolizzazzjoni tiddependi b’mod kritiku fuq l-aċċess għall-informazzjoni. Sabiex tiġi ffaċilitata d-diliġenza dovuta tal-investituri u jiġu appoġġati l-awtoritajiet kompetenti fis-superviżjoni, l-Artikolu 7 jitlob lill-oriġinaturi, lill-isponsors u lill-SSPEs jagħmlu disponibbli d-dokumentazzjoni rilevanti kollha li tiddeskrivi l-karatteristiċi tat-titolizzazzjoni, u jiddivulgaw regolarment id-data materjalment rilevanti kollha dwar il-kwalità tal-kreditu u l-prestazzjoni tal-iskoperturi sottostanti. L-informazzjoni tiġi sottomessa lir-repożitorji tat-titolizzazzjoni permezz ta’ mudelli standardizzati. Parti mid-dmirijiet tal-investituri ta’ diliġenza dovuta hija li jivverifikaw li t-titolizzazzjoni tikkonforma mar-rekwiżiti ta’ trasparenza fir-Regolament dwar it-Titolizzazzjoni.

Il-konsultazzjoni talbet feedback dwar il-proporzjonalità tar-rekwiżiti ta’ divulgazzjoni u ta’ diliġenza dovuta, il-proċeduri ta’ diliġenza dovuta tal-investituri u l-utilità tal-mudelli ta’ divulgazzjoni tad-data. Il-biċċa l-kbira tar-rispondenti, b’mod partikolari dawk li jirrappreżentaw l-industrija, ma kkunsidrawx ir-rekwiżiti ta’ diliġenza dovuta u ta’ trasparenza bħala proporzjonati. Dawn il-partijiet ikkonċernati sabu li d-dispożizzjonijiet huma preskrittivi u stretti wisq, speċjalment meta mqabbla mal-qafas applikabbli għal strumenti simili, bħal bonds koperti. Barra minn hekk, ir-rispondenti kienu tal-fehma li d-dispożizzjonijiet jonqsu milli jqisu bis-sħiħ l-ispeċifiċitajiet ta’ ftehim, b’mod partikolari jekk huwiex pubbliku jew privat (ara wkoll it-Taqsima 6 dwar it-titolizzazzjonijiet privati). Ir-rispondenti tal-industrija raw ukoll nuqqas ta’ proporzjonalità fl-applikazzjoni tar-regoli ta’ trasparenza għat-titolizzazzjonijiet ta’ pajjiżi terzi. Dan joħloq inċertezza dwar il-kapaċità tal-investituri li jikkonformaw mal-obbligi ta’ diliġenza dovuta tagħhom meta jinvestu f’tali tranżazzjonijiet (ara t-Taqsima 11). Dawk li qiesu r-reġim attwali bħala proporzjonat iffokaw fuq il-benefiċċju ta’ divulgazzjonijiet standardizzati biex jgħinu lill-investituri janalizzaw il-karatteristiċi ta’ tranżazzjoni ta’ titolizzazzjoni kumplessa.

Il-biċċa l-kbira tar-rispondenti qablu li l-informazzjoni pprovduta skont l-Artikolu 7 tar-Regolament dwar it-Titolizzazzjoni hija biżżejjed għall-ħtiġijiet ta’ diliġenza dovuta tal-investituri. Xi partijiet ikkonċernati sostnew li din l-informazzjoni hija fil-fatt eċċessiva u li l-investituri jistgħu ma jużawhiex, iżda minflok jiddependu fuq l-arranġamenti eżistenti tagħhom ta’ diliġenza dovuta li kienu fis-seħħ qabel ma daħal fis-seħħ ir-Regolament dwar it-Titolizzazzjoni. Għadd ta’ rispondenti identifikaw oqsma speċifiċi fil-mudelli li huma qiesu bħala problematiċi għal diversi raġunijiet, eż. oqsma multipli għal informazzjoni simili jew nuqqas ta’ ċarezza dwar l-utilità ta’ ċerta informazzjoni meħtieġa mill-mudelli. Fir-rigward tal-impatt tad-divulgazzjoni ta’ informazzjoni dwar self b’self, il-biċċa l-kbira tal-partijiet ikkonċernati sabuha ġeneralment utli għall-klassijiet kollha tal-assi, sakemm il-portafoll ma jkunx magħmul minn għadd kbir ta’ skoperturi, f’liema każ l-impatt ta’ skopertura individwali fuq il-prestazzjoni tal-ġabra titolizzata jkun żgħir.

Il-biċċa l-kbira tal-partijiet ikkonċernati kienu tal-fehma li r-reġim ta’ divulgazzjoni jista’ għalhekk jiġi ssimplifikat mingħajr ma jfixkel l-objettiv tal-koleġiżlaturi li l-investituri istituzzjonali jiġu protetti u li tiġi ffaċilitata s-superviżjoni. Il-biċċa l-kbira tat-tweġibiet, inklużi dawk minn diversi awtoritajiet pubbliċi, issuġġerew li r-rekwiżiti ta’ trasparenza għandhom ikunu allinjati aħjar mal-ħtiġijiet tal-investituri, b’mod partikolari għat-titolizzazzjonijiet privati.

Ir-rapport tal-Kumitat Konġunt analizza wkoll l-impatt tar-rekwiżiti ta’ diliġenza dovuta u ta’ trasparenza. Fir-rigward tad-diliġenza dovuta, ir-rapport ma kkunsidrax il-ħtieġa għal bidliet legali u rrakkomanda kjarifika dwar il-kamp ta’ applikazzjoni ġuriżdizzjonali tad-dispożizzjonijiet (ara t-Taqsima 11) u sforz akbar mill-awtoritajiet nazzjonali kompetenti sabiex is-superviżjoni tad-diliġenza dovuta ssir aktar effettiva. Fir-rigward tad-dispożizzjonijiet ta’ trasparenza, ir-rakkomandazzjonijiet ewlenin kienu li jittejbu l-konverġenza u l-koordinazzjoni fil-qasam tas-superviżjoni, u li jiġi mmonitorjat aktar l-impatt tal-mudelli ta’ divulgazzjoni, bl-argument li kien kmieni wisq f’dak l-istadju għal evalwazzjoni komprensiva ta’ kif jaħdmu l-mudelli.

Valutazzjoni tal-Kummissjoni

Id-dispożizzjonijiet dwar it-trasparenza u d-diliġenza dovuta fir-Regolament dwar it-Titolizzazzjoni huma intrinsikament marbuta, minħabba li t-trasparenza għandha tiffaċilita d-diliġenza dovuta. B’hekk, ir-rapportar ta’ informazzjoni li ma tintużax mill-investituri għandu jiġi evitat, minħabba li jimplika kostijiet ta’ konformità bla bżonn bi ftit benefiċċju.

Anki jekk il-qafas ta’ trasparenza ilu japplika bis-sħiħ biss minn Ġunju 2021 bl-awtorizzazzjoni tal-ewwel repożitorji tat-titolizzazzjoni, il-mudelli ta’ divulgazzjoni ilhom jintużaw, mill-inqas f’partijiet mis-suq, minn meta ġew adottati mill-ESMA f’Jannar 2019. Għalhekk, il-Kummissjoni tqis li l-mudelli ilhom jintużaw għal ammont suffiċjenti ta’ żmien biex jippermettu li kwalunkwe nuqqas potenzjalment sinifikanti jsir evidenti. Il-feedback għall-konsultazzjoni jindika oqsma fejn l-utilità tal-mudelli ta’ divulgazzjoni tista’ tabilħaqq tkun limitata.

Għalhekk, il-Kummissjoni tistieden lill-ESMA biex tirrieżamina l-mudelli ta’ divulgazzjoni għall-iskoperturi sottostanti fit-titolizzazzjoni. B’mod partikolari, l-ESMA għandha tipprova tindirizza d-diffikultajiet tekniċi possibbli biex timtela l-informazzjoni meħtieġa f’ċerti kampijiet, tneħħi l-kampijiet possibbilment mhux meħtieġa u tallinjahom aktar mill-qrib mal-ħtiġijiet tal-investituri. Bħala parti minn din il-ħidma, l-ESMA għandha tikkunsidra jekk l-informazzjoni fuq bażi ta’ self b’self hijiex utli u proporzjonata għall-ħtiġijiet tal-investituri għat-tipi kollha ta’ titolizzazzjonijiet.

6.Titolizzazzjonijiet privati 

It-titolizzazzjonijiet privati huma definiti bħala titolizzazzjonijiet fejn mhux meħtieġ jitfassal prospett f’konformità mad-Direttiva 2003/71/KE. It-titolizzazzjonijiet privati għandhom jissodisfaw l-istess rekwiżiti regolatorji bħat-titolizzazzjonijiet pubbliċi, minbarra li huma eżentati milli jkollhom jużaw ir-repożitorju tat-titolizzazzjoni biex jiddivulgaw l-informazzjoni preskritta mill-Artikolu 7 tar-Regolament dwar it-Titolizzazzjoni.

6.1 Żieda sproporzjonata fl-għadd ta’ titolizzazzjonijiet privati?

Sfond u sejbiet

It-titolizzazzjonijiet privati huma sors addizzjonali sinifikanti ta’ finanzjament għan-negozji. It-titolizzazzjonijiet privati, fil-biċċa l-kbira tagħhom, iservu niċeċ tas-suq speċifiċi ħafna, pereżempju: (i) fejn ir-relazzjoni diretta bejn l-investitur u l-oriġinatur tkun importanti; (ii) fejn l-emittent ikollu bżonn jikkontrolla l-aċċess għal data tan-negozju partikolarment sensittiva; jew (iii) fejn il-volumi tat-tranżazzjonijiet ikunu żgħar wisq biex jiġġustifikaw il-kost ta’ ħruġ pubbliku.

Fl-istess ħin, il-koleġiżlaturi kienu mħassba li tali ftehimiet jistgħu jintużaw biex jiġu evitati r-rekwiżiti ta’ trasparenza aktar onerużi tat-titolizzazzjonijiet pubbliċi. Għalhekk, huma talbu lill-Kummissjoni tivvaluta jekk kienx hemm żieda sproporzjonata fl-għadd ta’ dawn it-tranżazzjonijiet u jekk dan kienx motivat minn xewqa li jiġu evitati l-obbligi ta’ trasparenza tat-tranżazzjonijiet pubbliċi. F’dan il-kuntest, żieda f’dawn it-tranżazzjonijiet tista’ tkun “sproporzjonata” jekk ikun hemm suspett li t-titolizzazzjonijiet privati jissostitwixxu tranżazzjonijiet illi li kieku kienu jsiru pubblikament.

Ir-rapport tal-Kumitat Konġunt irrimarka li l-għadd ta’ titolizzazzjonijiet STS privati tabilħaqq żdied b’mod konsiderevoli minn Marzu 2019. Tliet kwarti tat-tranżazzjonijiet STS kollha fl-2020 kienu privati meta mqabbla ma’ terz biss tat-titolizzazzjonijiet STS kollha fl-2019. Skont l-informazzjoni dwar it-titolizzazzjonijiet STS ippubblikata fuq is-sit web tal-ESMA, l-għadd ta’ tranżazzjonijiet privati reġa’ naqas fl-2021, tant li jammonta għal inqas minn 60 % tat-titolizzazzjonijiet STS kollha. Madankollu, id-data dwar l-għadd ta’ tranżazzjonijiet mhux STS, kif ukoll il-volum tagħhom ma kinux inklużi fir-rapport tal-Kumitat Konġunt.

Ir-rispondenti tal-industrija fil-konsultazzjoni qiesu li dawn iċ-ċifri tat-titolizzazzjonijiet STS privati huma żgwidanti u konsegwenza tal-qafas regolatorju l-ġdid għar-raġunijiet li ġejjin: L-ewwel, id-definizzjoni wiesgħa ħafna ta’ titolizzazzjoni applikata mir-Regolament dwar it-Titolizzazzjoni allokat ċerti tranżazzjonijiet bħala titolizzazzjonijiet privati li qabel kienu jitqiesu bħala self bankarju. It-tieni, il-biċċa l-kbira tat-tranżazzjonijiet privati, u speċjalment it-tranżazzjonijiet tal-karti kummerċjali garantiti b’assi (ABCP), kienu ġew imġedda/riportati ħafna drabi u issa huma viżibbli minħabba li kienu ġew ristrutturati bħala tranżazzjonijiet STS u, għalhekk, jidhru fir-reġistru tal-ESMA.

Valutazzjoni tal-Kummissjoni

Il-Kummissjoni tirrikonoxxi li l-adattamenti għall-qafas regolatorju l-ġdid jistgħu jkunu qed jikkontribwixxu għaż-żieda fl-għadd ta’ titolizzazzjonijiet privati mid-data tal-applikazzjoni tal-qafas il-ġdid ta’ titolizzazzjoni. F’dak l-isfond, perjodu ta’ sentejn ma jitqiesx li huwa biżżejjed biex jiġi stabbilit b’ċertezza jekk kienx hemm bidla reali minn tranżazzjonijiet pubbliċi għal privati jew le. Il-Kummissjoni tinnota wkoll li ma hemmx data disponibbli dwar l-għadd ta’ tranżazzjonijiet mhux STS privati, u lanqas dwar il-volum ta’ tranżazzjonijiet li jagħmluha diffiċli li ssir valutazzjoni komprensiva tal-iżvilupp tas-suq tat-tranżazzjonijiet privati.

Filwaqt li ma tistax tintlaħaq konklużjoni definittiva dwar jekk hemmx żieda konsistenti fl-għadd u l-volum ta’ titolizzazzjonijiet privati li ma hijiex riflessa minn żieda proporzjonata fit-tranżazzjonijiet pubbliċi, il-Kummissjoni ma tistax tivvaluta jekk tali żieda hijiex motivata mill-għan li jiġu evitati l-obbligi ta’ trasparenza tat-tranżazzjonijiet pubbliċi. Għalhekk, il-Kummissjoni tistieden lill-Kumitat Konġunt biex ikompli jimmonitorja l-iżviluppi fil-volumi tat-tranżazzjonijiet privati u pubbliċi u biex isegwi l-volum tat-tranżazzjonijiet mhux STS u l-volum ġenerali tat-tranżazzjonijiet. Abbażi ta’ din id-data addizzjonali, il-Kummissjoni se tirrevedi l-kwistjoni fi żmien xieraq.

6.2 Informazzjoni suffiċjenti għall-investituri u għas-superviżuri dwar it-titolizzazzjonijiet privati?

Sfond u sejbiet

Bħalissa ma hemm l-ebda mudell iddedikat għat-titolizzazzjonijiet privati, iżda l-oriġinaturi, l-isponsors jew l-SSPEs ta’ titolizzazzjonijiet privati għandhom jimlew il-mudelli estensivi li jintużaw ukoll għat-titolizzazzjonijiet pubbliċi, għalkemm ma hemmx bżonn li dawn jiġu pprovduti permezz ta’ repożitorju tat-titolizzazzjoni. Xi awtoritajiet nazzjonali kompetenti jitolbu informazzjoni bażika dwar ftehimiet privati permezz ta’ formoli individwali.

Il-fehmiet kienu maqsuma dwar jekk il-mudelli jżidux valur lit-titolizzazzjonijiet privati: xi rispondenti tal-industrija (irrispettivament minn jekk jaġixxux bħala investitur jew oriġinatur fis-suq tat-titolizzazzjoni) u l-biċċa l-kbira tal-awtoritajiet pubbliċi raw il-benefiċċju fil-mudelli standardizzati. Rispondenti oħrajn qajmu dubji dwar l-utilità tal-mudelli sabiex tiġi pprovduta trasparenza fuq it-titolizzazzjonijiet privati, b’mod partikolari għal ftehimiet sintetiċi privati fejn il-ħtiġijiet ta’ informazzjoni huma speċifiċi ħafna.

Il-biċċa l-kbira tar-rispondenti tal-industrija sostnew li skont is-sistema attwali, is-superviżuri u l-investituri għandhom biżżejjed informazzjoni sabiex, rispettivament, jimmonitorjaw l-iżviluppi tas-suq u jwettqu diliġenza dovuta bir-reqqa.

Filwaqt li r-rispondenti tal-industrija kienu tal-fehma li l-mudelli attwali tal-Artikolu 7 għandhom jipprovdu wkoll biżżejjed informazzjoni dwar it-titolizzazzjonijiet privati għas-superviżuri, il-feedback mill-awtoritajiet pubbliċi dwar din il-kwistjoni kien maqsum. Żewġ superviżuri kellhom it-tendenza li jaqblu, filwaqt li l-maġġoranza tas-superviżuri appoġġaw il-fehmiet tar-rapport tal-Kumitat Konġunt li nnota diffikultajiet għas-superviżuri biex ikunu infurmati tajjeb biżżejjed dwar l-eżistenza u l-parametri tat-tranżazzjonijiet.

Valutazzjoni tal-Kummissjoni

Il-Kummissjoni taqbel mal-fehma li l-mudelli standardizzati jgħinu biex tiġi pprovduta informazzjoni li tkun ta’ kwalità għolja biżżejjed u faċli biżżejjed biex tiġi pproċessata mir-riċevituri differenti. Fl-istess ħin, il-Kummissjoni tirrikonoxxi li, minħabba n-natura personalizzata tat-titolizzazzjoni privata, l-investituri f’tali tranżazzjonijiet jeħtieġu informazzjoni mfassla aktar apposta mill-informazzjoni li jistgħu jipprovdu l-mudelli tal-ESMA. Il-Kummissjoni ma għandha l-ebda indikazzjoni biex tikkontesta l-affermazzjoni tar-rispondenti tal-industrija li l-investituri fi ftehimiet privati għandhom pożizzjoni strutturalment b’saħħitha biżżejjed biex jitolbu u jirċievu l-informazzjoni kollha li jeħtieġu għal diliġenza dovuta bir-reqqa. Iżda filwaqt li l-informazzjoni sottomessa permezz tal-mudelli tal-ESMA tista’ tkun ta’ inqas rilevanza għall-investituri milli oriġinarjament preżunt mill-koleġiżlaturi, l-informazzjoni standardizzata dwar it-tranżazzjonijiet privati eżistenti għadha essenzjali għas-superviżuri biex jiksbu malajr ħarsa ġenerali lejn l-iżviluppi tas-suq u biex jidentifikaw it-tranżazzjonijiet li jistgħu jkunu jridu jissoġġettaw għal skrutinju superviżorju dettaljat. Il-formoli ad hoc differenti li ħolqu diversi superviżuri għal dan il-għan jissuġġerixxu li l-mudelli dettaljati attwali tal-ESMA jistgħu ma jkunux kompletament xierqa biex tinkiseb faċilment ħarsa ġenerali preċiża tas-suq privat tat-titolizzazzjoni.

Fid-dawl ta’ dawn il-kunsiderazzjonijiet, il-Kummissjoni tistieden lill-ESMA tfassal mudell iddedikat għal tranżazzjonijiet privati ta’ titolizzazzjoni li jkun mfassal b’mod partikolari għall-ħtieġa tas-superviżuri li jiksbu ħarsa ġenerali lejn is-suq u l-karatteristiċi ewlenin tat-tranżazzjonijiet privati. Huwa legalment possibbli wkoll li jkun hemm mudelli differenti għal titolizzazzjonijiet privati u pubbliċi, billi l-Artikolu 7(3) tar-Regolament dwar it-Titolizzazzjoni jippermetti l-iżvilupp ta’ mudelli “li jqisu l-utilità tal-informazzjoni għad-detentur tal-pożizzjoni ta’ titolizzazzjoni”. Mudell iddedikat għat-titolizzazzjonijiet privati huwa mistenni li jissimplifika b’mod konsiderevoli r-rekwiżiti ta’ trasparenza għat-titolizzazzjonijiet privati. Fl-istess ħin, dan se jservi l-ħtieġa li s-superviżuri jirċievu biżżejjed informazzjoni dwar it-tranżazzjonijiet privati.

Dan il-mudell ġdid jista’ jissostitwixxi l-mudelli eżistenti għat-titolizzazzjonijiet privati kollha. Dan jiżgura li s-superviżuri jirċievu l-informazzjoni li jeħtieġu, filwaqt li l-investituri f’titolizzazzjonijiet privati jistgħu jiksbu kwalunkwe informazzjoni addizzjonali li jeħtieġu f’formati miftiehma b’mod bilaterali, mingħajr ma jkunu restritti mill-kontenut tal-mudelli standardizzati. Filwaqt li l-emittenti ma għandhomx bżonn jissottomettu mudelli għal titolizzazzjonijiet privati lil repożitorju, il-Kummissjoni tqis li ma hemm l-ebda ostaklu biex is-superviżuri jiksbu dik l-informazzjoni, billi l-Artikolu 7 jirrikjedi li l-emittenti jagħmlu din l-informazzjoni disponibbli għas-superviżuri. Il-Kummissjoni tqis li s-superviżuri għandhom jinfurzaw dak l-obbligu u jużaw l-informazzjoni fil-mudelli għall-ħidma tagħhom. L-ASE jistgħu jużaw is-setgħat eżistenti tagħhom biex jiżguraw li l-informazzjoni tasal għand is-superviżuri b’modi li jagħmluha faċli biex tintuża.

Jista’ jkun li n-notifiki sottomessi individwalment mill-oriġinaturi, mill-isponsors jew mill-SSPEs, minflok permezz tar-repożitorji tat-titolizzazzjoni, huma konsiderevolment aktar diffiċli biex jiġu pproċessati u li l-kontrolli tal-kwalità tar-repożitorji tat-titolizzazzjoni huma indispensabbli għal data ta’ kwalità għolja. Jekk dan ikun il-każ, mela r-rakkomandazzjoni tar-rapport li tiġi rreġistrata informazzjoni dwar ftehimiet privati permezz ta’ repożitorji tat-titolizzazzjoni, għall-benefiċċju tas-superviżuri, tista’ tkun triq ’il quddiem fit-tul, ladarba l-Kummissjoni tiddeċiedi li tagħmel proposta biex jiġi emendat ir-Regolament dwar it-Titolizzazzjoni.

6.3 Definizzjoni ta’ titolizzazzjoni privata

Sfond u Sejbiet

Maġġoranza sinifikanti ta’ rispondenti għall-konsultazzjoni kienu favur l-emendar tad-definizzjoni ta’ x’jikkostitwixxi titolizzazzjoni privata. Madankollu, għadd sinifikanti ta’ dawn ir-rispondenti kienu favur definizzjoni differenti, jekk wieħed jassumi li ċerti tranżazzjonijiet ittikkettati bħala privati jistgħu jiġu eżentati għalkollox mir-rekwiżiti ta’ trasparenza. Bl-istess mod, ir-rapport tal-Kumitat Konġunt iffavorixxa wkoll li tiġi emendata d-definizzjoni biex issir aktar preċiża u biex jiġi eżentat kompletament mir-rekwiżiti ta’ trasparenza subsett ta’ dak li bħalissa jikkostitwixxi tranżazzjonijiet privati (eż. tranżazzjonijiet li jseħħu fi ħdan il-grupp mingħajr investitur terz).

Valutazzjoni tal-Kummissjoni

Fil-fehma tal-Kummissjoni, ma jidhirx xieraq li tinbidel id-definizzjoni ta’ titolizzazzjoni privata fir-Regolament dwar it-Titolizzazzjoni. Filwaqt li jkun possibbli li d-definizzjoni ssir aktar speċifika, id-definizzjoni attwali hija ċara u taħdem tajjeb b’mod ġenerali. Dawk li jappoġġaw definizzjoni ġdida jirrikonoxxu li definizzjoni aħjar ta’ titolizzazzjoni privata tista’ tkun diffiċli biex tinstab, li hija r-raġuni għaliex xi wħud ma humiex qed jipproponu definizzjoni alternattiva, iżda jipproponu proċess ta’ diskussjoni miftuħa, wara valutazzjoni tal-impatt u konsultazzjoni.

Il-Kummissjoni tinnota li s-sejħiet għal delineazzjoni differenti ta’ x’jikkostitwixxi titolizzazzjoni privata huma kważi kollha marbuta mat-tħassib li r-rekwiżiti ta’ trasparenza għal ftehimiet privati huma preskrittivi żżejjed u pjuttost bla tifsira għall-investituri u għall-investituri potenzjali fil-prattika. Huwa argumentat li dawn l-investituri fi ftehimiet privati huma f’pożizzjoni li jitolbu u jirċievu kontinwament l-informazzjoni mfassla apposta li jeħtieġu min-naħa tal-bejgħ tat-tranżazzjoni. B’hekk, jidher li l-partijiet ikkonċernati li qed jitolbu bidla fid-definizzjoni qed jagħmlu dan biss biex jiffaċilitaw ir-rekwiżiti ta’ trasparenza fuq ftehimiet privati. Il-Kummissjoni temmen li din il-kwistjoni tista’ tiġi indirizzata billi jiġu skrutinizzati r-regoli u l-mudelli eżistenti u tiġi vvalutata l-utilità tagħhom (ara t-Taqsima preċedenti).

7.Ekwivalenza tal-STS 

Sfond u sejbiet

L-ekwivalenza hija mekkaniżmu li bih l-UE tista’ tirrikonoxxi standards regolatorji mhux tal-UE, f’qasam definit, bħala ekwivalenti għal tagħha stess 24 . L-għoti ta’ ekwivalenza f’settur partikolari lil pajjiż terz jirrikjedi li r-regoli u s-superviżjoni jkunu ekwivalenti għal dawk fl-UE. Dan jista’ jipprevedi eżenzjoni regolatorja billi jneħħi r-rekwiżiti duplikati fuq it-tranżazzjonijiet transfruntiera u jallinja t-trattament prudenzjali tal-iskoperturi transfruntiera ma’ dak applikat għall-iskoperturi domestiċi.

Fil-konsultazzjoni, il-biċċa l-kbira tal-parteċipanti fis-suq esprimew appoġġ sabiex l-entitajiet mhux tal-UE jkunu jistgħu joħorġu titolizzazzjonijiet STS. Bil-maqlub, l-awtoritajiet pubbliċi kienu kważi unanimi fl-oppożizzjoni tagħhom għat-twaqqif ta’ reġim ta’ ekwivalenza.

Valutazzjoni tal-Kummissjoni

Il-qafas ta’ titolizzazzjoni STS tal-UE huwa bbażat fuq sett impenjattiv ta’ rekwiżiti, mhux l-inqas f’termini ta’ divulgazzjoni tal-informazzjoni. Il-Kummissjoni tosserva li sal-lum l-ebda reġim ta’ titolizzazzjoni f’ġuriżdizzjoni ta’ pajjiż terz ma jista’ jersaq qrib li jitqies bħala ekwivalenti għall-qafas STS tal-UE. Ir-Renju Unit huwa l-unika ġuriżdizzjoni barra mill-UE li għandha reġim STS fis-seħħ, wara li adotta r-reġim STS tiegħu stess għall-UE wara li ħareġ mill-UE.

Fid-dawl ta’ dan, il-Kummissjoni tqis li huwa kmieni wisq biex tintroduċi reġim ta’ ekwivalenza tal-STS bħal issa. Ir-reġim STS tal-UE għadu qed jevolvi, u l-UE dan l-aħħar stabbiliet reġim għat-titolizzazzjonijiet STS fuq il-karta bilanċjali li ma jeżistix fir-Renju Unit. Barra minn hekk, se jkun fattibbli biss li jiġu riveduti l-prattiki superviżorji ta’ pajjiżi terzi ladarba l-prattika superviżorja tal-UE tiġi żviluppata aktar u ssir konverġenti bis-sħiħ bejn is-superviżuri tal-UE. F’dan il-kuntest, ir-rieżami bejn il-pari tal-implimentazzjoni tar-rekwiżiti STS huwa kruċjali biex tinkiseb ħarsa ġenerali lejn is-superviżjoni tar-reġim STS fl-UE. Dan ir-rieżami bejn il-pari, li oriġinarjament kellu jitlesta sal-1 ta’ Jannar 2022 25 , ġie pospost għall-2024.

Minkejja dan, il-Kummissjoni se tkompli timmonitorja l-iżviluppi regolatorji rilevanti f’ġuriżdizzjonijiet ta’ pajjiżi terzi li jistgħu jwasslu għall-adozzjoni ta’ reġimi ta’ titolizzazzjoni simili f’konformità mal-istandard Sempliċi, Trasparenti u Komparabbli żviluppat mill-Kumitat ta’ Basel dwar is-Superviżjoni Bankarja u mill-Organizzazzjoni Internazzjonali tal-Kummissjonijiet tat-Titoli, li fuqhom huwa msejjes ir-reġim STS tal-UE.

Jekk is-sitwazzjoni attwali tinbidel, il-Kummissjoni tista’ terġa’ tikkunsidra l-ħtieġa u l-adegwatezza li tintroduċi reġim ta’ ekwivalenza tal-STS.

8.Titolizzazzjoni sostenibbli

Sfond u sejbiet

Ir-Regolament dwar it-Titolizzazzjoni jimponi biss obbligu limitat biex isiru divulgazzjonijiet dwar is-sostenibbiltà. Għat-titolizzazzjonijiet STS, il-parti tal-bejgħ għandha tippubblika l-informazzjoni disponibbli dwar il-prestazzjoni ambjentali tal-assi ffinanzjati minn self residenzjali jew self jew lokazzjonijiet għal karozzi. L-emendi tal-Pakkett għall-Irkupru tas-Swieq Kapitali żiedu l-għażla għall-oriġinaturi li minflok jippubblikaw l-informazzjoni disponibbli dwar l-impatt negattiv prinċipali fuq il-fatturi ta’ sostenibbiltà tal-assi ffinanzjati mill-iskoperturi sottostanti.

Minbarra il-mandat skont l-Artikolu 46(e), l-Artikolu 45a(e) jitlob lill-Kummissjoni tirrapporta dwar il-ħolqien ta’ qafas ta’ titolizzazzjoni sostenibbli speċifiku, abbażi ta’ rapport mill-EBA (“ir-rapport tal-EBA”) 26 . L-EBA ppubblikat ir-rapport tagħha fit-2 ta’ Marzu 2022 27 .

L-estensjoni tal-kamp ta’ applikazzjoni tar-rekwiżiti ta’ divulgazzjoni eżistenti dwar is-sostenibbiltà ambjentali

Fil-konsultazzjoni, il-biċċa l-kbira tar-rispondenti appoġġaw fil-prinċipju l-kunċett li l-estensjoni tar-rekwiżit ta’ divulgazzjoni eżistenti għal klassijiet ta’ assi oħrajn 28 tista’ żżid il-valur għall-investituri li japprezzaw li jkollhom tali informazzjoni biex ikejlu s-sehem tagħhom stess ta’ investiment ambjentali, soċjali u ta’ governanza (ESG), biex jivvalutaw ir-riskji relatati mal-ESG, u bħala għodda ta’ tqabbil. L-investituri wrew dispjaċir li din għadha ma hijiex disponibbli, minħabba li din ix-xorta ta’ informazzjoni se tkun meħtieġa fil-futur biex jikkonformaw mar-rekwiżiti ta’ divulgazzjoni tagħhom stess.

Madankollu, ir-rispondenti qalu li l-utilità ta’ tali estensjoni tar-rekwiżiti ta’ divulgazzjoni għal klassijiet ta’ assi oħrajn tiddependi fuq jekk hemmx parametri ċari u pertinenti biżżejjed biex jiġu vvalutati l-prestazzjonijiet ambjentali rispettivi. Skont il-biċċa l-kbira tar-rispondenti, dan għadu ma huwiex il-każ għall-klassijiet kollha ta’ assi 29 . 

Sabiex tittejjeb id-disponibbiltà tad-data, ir-rapport tal-EBA jirrakkomanda li d-divulgazzjonijiet dwar l-impatt negattiv prinċipali jiġu estiżi għal titolizzazzjonijiet għajr dawk STS, u li għandhom jiġu introdotti divulgazzjonijiet obbligatorji dwar l-impatt negattiv prinċipali fuq terminu medju.

Ħolqien ta’ qafas ta’ titolizzazzjoni sostenibbli speċifiku

Il-proposta attwali għal Standard Ewropew għall-Bonds Ekoloġiċi (EuGBS), li ġiet ippubblikata f’Lulju 2021 u li għadha qed tiġi nnegozjata 30 , għandha l-għan li tfassal qafas għall-bonds ekoloġiċi, inklużi dawk maħruġa minn entità bi skop speċjali fil-kuntest ta’ tranżazzjoni ta’ titolizzazzjoni. Sabiex tinkiseb it-tikketta tal-bonds ekoloġiċi, l-emittent jeħtieġ li jimpenja ruħu li juża r-rikavat mill-ħruġ għall-finanzjament, il-finanzjament mill-ġdid jew l-akkwist ta’ assi f'allinjament mat-tassonomija tal-UE.

Ir-rapport tal-EBA ma jirrakkomandax li jiġi stabbilit qafas iddedikat għat-titolizzazzjoni ekoloġika f’dan il-mument, meta jitqies l-ammont pjuttost baxx ta’ assi ekoloġiċi disponibbli biex jiġu titolizzati 31 u minħabba li s-suq għat-titolizzazzjoni sostenibbli għadu pjuttost ġdid. Ir-rapport jirrakkomanda li jiġi kkunsidrat qafas iddedikat biss ladarba l-ekonomija tal-UE tkun għamlet aktar progress fit-tranżizzjoni ekoloġika.

Minflok, ir-rapport tal-EBA jirrakkomanda li l-istandard tal-EuGBS jiġi aġġustat sabiex isir aktar xieraq għat-titolizzazzjonijiet fil-fażi ta’ tranżizzjoni (ara l-kaxxa ta’ hawn taħt). L-EBA tirrakkomanda li titħalla barra t-titolizzazzjoni sintetika tal-kamp ta’ applikazzjoni ta’ tikketta għal titolizzazzjoni ekoloġika (kemm jekk tkun it-tikketta tal-EuGBS kif ukoll jekk tkun tikketta ddedikata separata) minħabba li sa issa ma hemm l-ebda metodoloġija rikonoxxuta b’mod ġenerali biex jitkejjel l-iskjerament mill-ġdid tal-kapital li jinħeles bħala riżultat tat-tranżazzjoni għal skopijiet ekoloġiċi.

Fil-konsultazzjoni, il-biċċa l-kbira tar-rispondenti wissew kontra li jkun hemm diversi tikketti differenti għall-klassifikazzjoni tat-titolizzazzjoni ekoloġika u esprimew preferenza ċara li tintuża t-tikketta tal-EuGBS għall-futur prevedibbli, minflok ma jinħoloq qafas separat. Il-feedback ikkondivida t-tħassib tal-EBA dwar il-ħtieġa li l-pula ta’ assi sottostanti tkun allinjata mat-tassonomija, minħabba li dan joħloq trattament mhux ugwali tat-titolizzazzjoni ma’ strumenti komparabbli oħrajn ta’ finanzjament bankarju, bħal bonds koperti. Jista’ jkun li t-titolizzazzjoni mbagħad ma tkunx tista’ tikkontribwixxi għall-finanzjament tat-tranżizzjoni lejn ekonomija ekoloġika, minħabba l-iskarsezza attwali tal-assi allinjati mat-tassonomija. Fir-rigward tal-entità responsabbli għar-rapportar, ħafna rispondenti ppreferew l-oriġinaturi aktar milli l-emittenti, minħabba li ma jkunx prattiku li jingħata mandat lill-emittenti li ma jkollhomx kontroll fuq l-assi.

Fir-rigward tad-divulgazzjonijiet meħtieġa biex jikkwalifikaw bħala sostenibbli, huwa sostnut li reġim deskrittiv iżżejjed ikun kontroproduttiv minħabba l-firxa wiesgħa ta’ attivitajiet relatati mal-iskoperturi sottostanti it-tranżazzjonijiet ta’ titolizzazzjoni.

Rakkomandazzjoni tar-rapport tal-EBA dwar l-aġġustament tal-Istandard Ewropew għall-Bonds Ekoloġiċi (EuGBS) Il-proposta tal-EuGBS tistabbilixxi standard volontarju għall-finanzjament tal-investiment sostenibbli u tippermetti lill-emittent ta’ bond juża t-tikketta ta’ bond ekoloġiku sakemm ir-rikavat sħiħ mill-ħruġ tal-bonds jintuża għal skopijiet li huma allinjati bis-sħiħ mat-tassonomija. Dan ifisser li l-iskoperturi sottostanti tat-titolizzazzjoni miżmuma mill-SSPE jkollhom bżonn jiġu allinjati mat-tassonomija. Ir-rapport tal-EBA jwissi li dan l-approċċ ipoġġi t-titolizzazzjonijiet (u strumenti finanzjarji oħrajn maħruġa minn entità bi skop speċjali) fuq bażi differenti minn titoli li ma jinħarġux minn entità bi skop speċjali. L-EBA tiġbed l-attenzjoni għall-fatt li l-approċċ attwali jkun jirrikjedi li t-titolizzazzjonijiet konformi mal-EuGBS ikunu appoġġati minn assi allinjati mat-tassonomija. Madankollu, dan ma jwaqqafx lill-oriġinatur, bħala l-benefiċjarju aħħari tar-rikavat mill-ħruġ ta’ bonds ta’ titolizzazzjoni, milli juża r-rikavat għal skopijiet mhux ekoloġiċi. L-EBA qieset dan l-approċċ bħala inkonsistenti mal-intenzjoni tal-politika li tidderieġi finanzjament ġdid lejn il-finanzjament tat-tranżizzjoni lejn ekonomija tal-UE ekoloġika u sostenibbli. Minħabba l-iskarsezza attwali tal-assi allinjati mat-tassonomija disponibbli għat-titolizzazzjoni, il-fehma tal-EBA kienet li dan jillimita wkoll b’mod sinifikanti l-potenzjal għal suq tat-titolizzazzjoni tal-EuGBS. Barra minn hekk, ir-rapport tal-EBA jirrimarka li l-SSPEs huma ta’ sustanza ekonomika limitata u, għalhekk, suq tat-titolizzazzjoni tal-EuGBS ma jkunx prattiku anki jekk l-SSPEs ikunu l-uniċi entitajiet li jġorru r-responsabbiltà legali. B’hekk, ir-rapport tal-EBA jirrakkomanda li r-rekwiżiti tal-EuGBS għandhom japplikaw għall-oriġinatur ta’ titolizzazzjoni, mhux għall-SSPE. L-EBA tirrikonoxxi li l-applikazzjoni tar-rekwiżiti fuq l-użu tar-rikavat fil-livell tal-oriġinatur, minflok fil-livell tal-SSPE, ma tidhirx li hija triq ovvja għat-titolizzazzjoni minħabba li n-natura garantita b’assi tagħha ma tibbenefikax minn rikors doppju. Dan jista’ jirriżulta wkoll f’titolizzazzjonijiet tal-EuGBS b’assi sottostanti li “ma humiex ekoloġiċi”. Madankollu, l-EBA tqis li dan huwa l-aktar approċċ effiċjenti u prammatiku matul fażi ta’ tranżizzjoni u bħala mod kif jiġi żgurat trattament ugwali tat-titolizzazzjoni ma’ tipi oħrajn ta’ titoli garantiti b’assi. L-EBA tirrakkomanda li t-trasferiment tar-rekwiżiti tal-EuGBS lill-oriġinatur għandu jkun akkumpanjat minn miżuri ta’ trasparenza addizzjonali biex l-investituri jiġu infurmati sa liema punt il-pula ta’ assi hija allinjata mat-tassonomija. Dan l-approċċ għandu jkun ikkomplementat minn salvagwardji biex tiġi evitata l-għażla tal-assi li jkunu se jiġu titolizzati mill-oriġinatur b’mod li jista’ jitqies bħala greenwashing.

Barra minn hekk, fir-rigward tad-divulgazzjoni għal titolizzazzjonijiet sostenibbli, f’konformità mal-Artikolu 45(a) tar-Regolament dwar it-Titolizzazzjoni, ir-rapport tal-EBA investiga kif id-divulgazzjoni relatata mas-sostenibbiltà għandha tiġi integrata fir-Regolament dwar it-Titolizzazzjoni, billi uża r-Regolament dwar Divulgazzjonijiet Relatati mas-Sostenibbiltà tas-Servizzi Finanzjarji 32 (SFDR). L-SFDR jistabbilixxi l-obbligi ta’ divulgazzjoni tas-sostenibbiltà għall-parteċipanti fis-swieq finanzjarji u għall-konsulenti finanzjarji vis-à-vis l-investituri finali. Ir-rapport tal-EBA jinnota li filwaqt li l-investituri li huma attivi fis-suq tat-titolizzazzjoni huma koperti mir-reġim tal-SFDR, il-prodotti ta’ titolizzazzjoni jaqgħu barra mill-kamp ta’ applikazzjoni tal-SFDR minħabba li ma humiex meqjusa bħala prodotti finanzjarji skont it-tifsira tal-Artikolu 2 tal-SFDR. B’riżultat ta’ dan, jista’ jkun li l-investituri ma jkunux jistgħu jinkludu skoperturi ta’ titolizzazzjoni fl-istrateġiji ta’ investiment tal-ESG tagħhom.

Il-Kumitat Konġunt tal-ASE għandu l-kompitu li jiżviluppa standards tekniċi regolatorji li jispeċifikaw l-informazzjoni li għandha tiġi pprovduta dwar l-impatti negattivi prinċipali ta’ ċerti tipi ta’ assi sottostanti fit-tranżazzjonijiet STS 33 . Filwaqt li dan jindirizza d-domandi għall-informazzjoni tal-investituri ffokati fuq prodotti marbuta mal-ESG, l-EBA tirrakkomanda li l-kamp ta’ applikazzjoni tad-divulgazzjoni tal-impatt negattiv prinċipali għandu jiġi estiż: (i) fit-terminu qasir, għal titolizzazzjonijiet mhux STS appoġġati mill-istess tipi ta’ assi bħal dawk fir-rekwiżit ta’ divulgazzjoni STS eżistenti; u (ii) fit-terminu medju, għat-titolizzazzjonijiet kollha.

Valutazzjoni tal-Kummissjoni

Il-Kummissjoni tilqa’ r-rapport estensiv u fondat sewwa tal-EBA bħala kontribut importanti għall-iżvilupp ta’ qafas għal titolizzazzjoni sostenibbli. Il-Kummissjoni taqbel mal-EBA li, mill-inqas fit-terminu qasir u medju, ma hemmx każ għall-ħolqien ta’ tikketta ta’ sostenibbiltà ddedikata għat-titolizzazzjonijiet, meta jitqies b’mod partikolari l-ammont baxx ta’ assi ekoloġiċi disponibbli biex jiġu titolizzati. Fid-dawl ta’ dan, il-Kummissjoni tistieden lill-Parlament Ewropew u lill-Kunsill biex iqisu r-rakkomandazzjoni tal-EBA fil-kuntest tan-negozjati li għaddejjin dwar l-EuGBS, u tinsab lesta biex tassisti fil-ħidma fuq l-ispeċifikazzjoni tad-dettalji tat-titolizzazzjoni fil-qafas tal-EuGBS.

Fir-rigward tad-divulgazzjoni ta’ informazzjoni relatata mas-sostenibbiltà, il-Kummissjoni tirrikonoxxi l-ħtieġa li jiġu żviluppati divulgazzjonijiet prinċipali tal-impatt negattiv u tqis li l-kamp ta’ applikazzjoni tal-Istandard Tekniku Regolatorju li jmiss mill-Kumitat Konġunt għandu jkun wiesa’ kemm jista’ jkun.

9.Verifika minn parti terza tal-kriterji STS

Sfond u sejbiet

Ir-Regolament dwar it-Titolizzazzjoni stabbilixxa sistema ta’ entitajiet ta’ verifika terzi biex jassistu kemm lill-emittenti kif ukoll lill-investituri, fuq bażi volontarja, fil-valutazzjoni tal-konformità ta’ tranżazzjoni mal-kriterji STS. Madankollu, l-involviment ta’ tali verifikaturi ma jneħħix ir-responsabbiltà legali mill-oriġinaturi, mill-isponsors u mill-investituri istituzzjonali biex jittrattaw tranżazzjoni ta’ titolizzazzjoni bħala STS. Dawn l-entitajiet ta’ verifika terzi huma awtorizzati mill-ESMA u taħt is-superviżjoni tal-awtorità nazzjonali kompetenti rispettiva tal-Istat Membru li fih huma inkorporati. Sa issa, l-ESMA awtorizzat żewġ verifikaturi terzi. Sal-lum, il-biċċa l-kbira tat-tranżazzjonijiet STS użaw is-servizzi ta’ wieħed miż-żewġ verifikaturi terzi.

Ir-rapport tal-Kumitat Konġunt analizza r-rwol tal-entitajiet ta’ verifika terzi fis-suq STS. Huwa nnota li s-suq isib dawn l-entitajiet ta’ għajnuna, b’mod partikolari għall-parteċipanti fis-suq b’inqas esperjenza, mhux l-inqas billi jipprovdu riassigurazzjoni fid-dawl tas-sanzjonijiet finanzjarji imposti għal informazzjoni żbaljata f’notifika STS. Il-Kumitat Konġunt iddikjara li l-interazzjonijiet bejn il-verifikaturi terzi u l-awtoritajiet nazzjonali kompetenti sa issa kienu limitati. Minħabba l-importanza evidenti tal-verifikaturi għas-suq STS u l-konċentrazzjoni fuq ftit entitajiet, dan jista’ jwassal għal diverġenza potenzjali bejn is-superviżuri u l-verifikaturi fl-interpretazzjoni tagħhom tal-kriterji STS. Barra minn hekk, ir-Rapport tal-Kumitat Konġunt innota li sa issa ma kien hemm l-ebda approċċ komuni għas-superviżjoni tal-verifikaturi STS.

Valutazzjoni tal-Kummissjoni

Ir-reġim ta’ verifika minn parti terza jidher li jiffunzjona kif maħsub u l-Kummissjoni ma tara l-ebda ħtieġa li tirrevedi d-dispożizzjonijiet li jirregolaw dan ir-reġim. Kif indikat mir-Rapport tal-Kumitat Konġunt, id-djalogu għandu jsir bi frekwenza xierqa bejn l-awtoritajiet nazzjonali kompetenti u d-ditti ta’ verifika terzi sabiex jiġu evitati interpretazzjonijiet inkonsistenti tal-kriterji STS għad-detriment tal-emittenti u tal-investituri.

Fir-rigward tal-kompetizzjoni, ir-rapport tal-Kumitat Konġunt ma indikax li n-numru żgħir ta’ verifikaturi terzi awtorizzati huwa r-riżultat ta’ ostaklu regolatorju għad-dħul fis-suq jew ta’ kompetizzjoni insuffiċjenti. Għalhekk, il-Kummissjoni bħalissa ma tara l-ebda ħtieġa li tintervjeni.

10.Entitajiet bi skop speċjali tat-titolizzazzjoni (SSPEs)

Sfond u sejbiet

Fir-rigward tat-titolizzazzjonijiet tal-bejgħ veru, l-SSPEs huma għodda ewlenija għall-ġestjoni tat-tranżazzjonijiet u għall-isfruttar tal-effetti mixtieqa, b’mod partikolari s-serħan kapitali għall-banek oriġinarji: l-SSPE tissegrega l-assi mill-oriġinatur u tipproteġi lill-oriġinatur mir-riskju tal-assi. L-attivitajiet tal-SSPE huma limitati għall-ilħuq ta’ dawn l-objettivi. Ir-Regolament dwar it-Titolizzazzjoni fih sett sħiħ ta’ rekwiżiti applikabbli għall-SSPEs.

Fid-dawl tal-mandat skont l-Artikolu 46(h), il-Kummissjoni staqsiet fil-konsultazzjoni jekk sistema ta’ banek b’liċenzja limitata biex iwettqu l-funzjonijiet ta’ SSPEs iżżidx valur lill-qafas ta’ titolizzazzjoni.

Maġġoranza kbira ta’ rispondenti, kemm mill-industrija kif ukoll mill-awtoritajiet pubbliċi, wissew kontra l-introduzzjoni ta’ sistema bħal din u l-impatt li jista’ jkollha fuq is-suq. Ħafna enfasizzaw li l-SSPEs huma diġà soġġetti għal awtorizzazzjoni u superviżjoni mill-awtorità kompetenti rilevanti, li tippermetti s-superviżjoni adegwata tagħhom u l-monitoraġġ xieraq tar-riskji. 

Sistema ta’ banek b’liċenzja limitata tqieset bħala detrimentali għall-indipendenza tal-SSPEs bħala tali, b’eventwalment aktar atturi jimmaniġġjaw il-fondi ta’ titolizzazzjoni f’entità separata li tappartjeni għall-istess grupp konsolidat. Minflok, il-prijorità għandha tkun li tiġi żgurata l-indipendenza fil-kontroll, fil-ġestjoni u fir-rapportar tat-tranżazzjoni ta’ titolizzazzjoni vis-à-vis l-inizjaturi, l-isponsors u l-investituri. Barra minn hekk, ir-rispondenti nnotaw riskji potenzjali li jirriżultaw minn sistema ta’ banek b’liċenzja limitata. Huma wissew li dan iwassal għal konċentrazzjoni ogħla ta’ riskji. Din id-dinamika tmur kontra l-loġika stess tad-diversifikazzjoni u t-tnaqqis tar-riskju li jirfdu s-suq tat-titolizzazzjoni.

Valutazzjoni tal-Kummissjoni

Il-Kummissjoni tqis li l-qafas attwali qed jaħdem b’mod adegwat billi ma ġew identifikati l-ebda nuqqas jew kwistjoni li għandhom jiġu indirizzati fir-rigward tal-SSPEs. Fid-dawl ta’ dan, ma hemmx bżonn li l-qafas jiġi kkomplementat billi tiġi stabbilita sistema ta’ banek b’liċenzja limitata li jwettqu l-funzjonijiet tal-SSPEs u li jkollhom id-dritt esklussiv li jixtru skoperturi mingħand l-oriġinaturi u jbigħu pretensjonijiet appoġġati mill-iskoperturi mixtrija lill-investituri.

11. Kamp ta’ applikazzjoni ġuriżdizzjonali

Ir-Regolament dwar it-Titolizzazzjoni huwa predominentement regolament ibbażat fuq l-attività, mhux regolament purament dwar il-prodotti. Huwa prinċipalment jimponi obbligi fuq in-naħa tal-bejgħ (oriġinatur, mutwanti oriġinali, sponsor u SSPE) u fuq in-naħa tax-xiri (investitur istituzzjonali) involuti fit-titolizzazzjoni. Ir-Regolament dwar it-Titolizzazzjoni ma jiddistingwix it-titolizzazzjonijiet tal-UE minn titolizzazzjonijiet li fihom waħda mill-partijiet hija stabbilita f’pajjiż terz. Madankollu, il-fatt li parti waħda jew aktar għal tranżazzjoni huma stabbiliti f’pajjiż terz jista’ jqajjem mistoqsijiet dwar kif ir-rekwiżiti tar-reġim tal-UE għandhom jiġu ssodisfati fil-prattika mill-partijiet tal-UE għat-tranżazzjoni.

L-opinjoni tal-Kumitat Konġunt innotat diffikultajiet relatati mal-kamp ta’ applikazzjoni ġuriżdizzjonali tar-Regolament dwar it-Titolizzazzjoni. Il-maġġoranza kbira tar-rispondenti għall-konsultazzjoni kkonfermaw dik is-sejba.

Il-Kummissjoni tieħu nota tad-diffikultajiet irrapportati u se tuża s-subtaqsimiet li ġejjin ta’ dan ir-rapport biex tipprovdi xi gwida interpretattiva dwar din il-kwistjoni, kif mitlub mill-Kumitat Konġunt u mill-partijiet ikkonċernati.

11.1 Obbligi min-naħa tal-bejgħ

Sfond u sejbiet

L-Artikoli 6, 7 u 9 tar-Regolament dwar it-Titolizzazzjoni joħolqu ċerti obbligi fundamentali li, bħala lezzjoni mill-kriżi finanzjarja l-kbira, il-partijiet kollha għat-titolizzazzjonijiet iridu jikkonformaw magħhom. Id-dispożizzjonijiet inkwistjoni ma jqisux jekk il-parti obbligata hijiex ġewwa jew barra l-UE:

·l-Artikolu 6 jobbliga lill-oriġinatur, lill-sponsor jew lill-mutwanti oriġinali jżommu parti mir-riskju tat-tranżazzjoni (interess ekonomiku nett ta’ mhux inqas minn 5 %);

·l-Artikolu 7 jobbliga lill-oriġinatur, lill-sponsor u lill-SSPE jipprovdu l-informazzjoni elenkata lill-investitur, lill-awtoritajiet kompetenti u, fuq talba, lill-investituri potenzjali;

·Sabiex il-“mudell oriġina u ddistribwixxi” problematiku jsir impossibbli fil-futur, l-Artikolu 9 jobbliga lill-oriġinaturi, lill-isponsors u lill-mutwanti oriġinali japplikaw għal skoperturi titolizzati l-istess kriterji sodi għall-għoti ta’ kreditu li huma japplikaw għal skoperturi mhux titolizzati.

L-opinjoni tal-Kumitat Konġunt qajmet it-tħassib li fi tranżazzjoni li tinvolvi partijiet min-naħa tal-bejgħ li jinsabu fl-UE u barra minnha, l-entitajiet min-naħa tal-bejgħ jistgħu jaħarbu minn dawn l-obbligi fundamentali, minħabba li s-superviżuri tal-UE ma jistgħux iżommu lill-partijiet li jinsabu f’pajjiżi terzi responsabbli f’każ ta’ ksur ta’ dawn l-obbligi. Għalhekk, il-Kumitat Konġunt kien tal-fehma li d-dispożizzjonijiet għandhom jiġu interpretati b’tali mod li:

·entità bbażata fl-UE biss għandha tkun tista’ żżomm ir-riskju;

·l-partijiet għandhom ikunu obbligati jagħżlu l-entità bbażata fl-UE bħala l-entità ta’ rapportar maħtura;

·entità bbażata fl-UE għandha tkun responsabbli biex tiżgura li l-istess kriterji sodi u definiti sewwa għall-għoti ta’ kreditu japplikaw kemm għal skoperturi titolizzati kif ukoll għal dawk mhux titolizzati, u li l-iskoperturi titolizzati jkunu soġġetti għall-istess proċessi bħal dawk mhux titolizzati għall-approvazzjoni u t-tiġdid tal-kreditu.

Il-Kumitat Konġunt issuġġerixxa li dawn id-dispożizzjonijiet għandhom jiġu ċċarati kif xieraq.

Barra minn hekk, il-Kumitat Konġunt identifika inkonsistenza bejn l-Artikolu 5(1)(b) u l-Artikolu 9 tar-Regolament dwar it-Titolizzazzjoni, madankollu mingħajr ma għamel rakkomandazzjoni ċara dwar kif din għandha tissolva: L-Artikolu 9 jobbliga wkoll lill-isponsor biex jiżgura għoti ta’ kreditu tajjeb, filwaqt li l-obbligu ta’ diliġenza dovuta korrispondenti fl-Artikolu 5(1)(b) ma jsemmix lill-isponsor.

Ir-rispondenti għall-konsultazzjoni rreaġixxew kif ġej għas-suġġerimenti tal-Kumitat Konġunt:

·Il-parteċipanti fis-suq argumentaw kontra r-restrizzjoni tar-ritenzjoni tar-riskju biss għal entitajiet ibbażati fl-UE. Dawk li jżommu r-riskju għandhom ikunu l-entitajiet b’kontroll effettiv u suffiċjenti fuq il-portafoll titolizzat u b’interess fih; il-ġuriżdizzjoni ma għandu jkollha l-ebda rwol.

·Barra minn hekk, fir-rigward tar-rekwiżiti ta’ trasparenza tal-Artikolu 7 tar-Regolament dwar it-Titolizzazzjoni, maġġoranza wiesgħa, prinċipalment ta’ rappreżentanti tal-industrija, oġġezzjonaw li jiġi impost fuq l-entità bbażata fl-UE l-obbligu li tiddivulga, filwaqt li enfasizzaw li l-aktar entità ta’ rapportar xierqa tista’ ma tkunx tinsab fl-UE. Il-biċċa l-kbira tas-superviżuri li rrispondew kienu aktar favur is-suġġeriment tal-Kumitat Konġunt. Madankollu, huwa nnotat li kienu biss ftit is-superviżuri li rrispondew.

·Il-fehmiet kienu maqsuma wkoll fuq jekk il-verifika tal-istandards għall-għoti ta’ kreditu skont l-Artikolu 9 tar-Regolament dwar it-Titolizzazzjoni għandhiex titwettaq b’mod obbligatorju mill-entità bbażata fl-UE. Tliet kwarti tar-rispondenti (li jinkludu l-biċċa l-kbira tar-rispondenti tal-industrija) argumentaw kontra li dawn ir-responsabbiltajiet jitneħħew minn fuq l-entità xierqa biex jgħaddu fuq dik li tkun tinsab fl-UE.

Fl-aħħar nett, il-konsultazzjoni ssuġġeriet kunsens wiesa’ fost ir-rispondenti li l-inkonsistenza identifikata bejn l-Artikolu 5(1)(b) u l-Artikolu 9 tar-Regolament dwar it-Titolizzazzjoni għandha tissolva.

Valutazzjoni tal-Kummissjoni

Il-Kummissjoni tinnota li l-interpretazzjoni tal-Artikoli 6, 7 u 9 tar-Regolament dwar it-Titolizzazzjoni ssuġġerita mill-Kumitat Konġunt ma hijiex appoġġata mit-test legali. Il-Kummissjoni tqis li tali interpretazzjoni ristretta ma hijiex imperattiva lanqas sabiex tintlaħaq l-intenzjoni leġiżlattiva tad-dispożizzjonijiet tal-Artikoli 6, 7 u 9, jiġifieri sabiex jiġi żgurat li t-titolizzazzjonijiet kollha mal-partijiet parteċipanti tal-UE jikkonformaw ma’ ċerti rekwiżiti strutturali u ta’ kwalità. Filwaqt li huwa ċertament l-aktar mixtieq li dawn ir-rekwiżiti jiġu infurzati direttament mis-superviżuri tal-UE, għandu jiġi mfakkar li dan l-għan jintlaħaq ukoll b’mod effettiv permezz tal-obbligi ta’ diliġenza dovuta tal-investitur istituzzjonali imposti mill-Artikolu 5 tar-Regolament dwar it-Titolizzazzjoni. Skont dawn l-obbligi, l-investituri istituzzjonali jridu jivverifikaw li l-partijiet min-naħa tal-bejgħ tat-tranżazzjoni, irrispettivament mill-post fejn jinsabu, jikkonformaw mal-obbligi rispettivi skont dan ir-regolament qabel ma jinvestu f’din it-titolizzazzjoni. L-investituri istituzzjonali tal-UE jistgħu ma jinvestux f’titolizzazzjonijiet jekk l-entitajiet min-naħa tal-bejgħ jinstabu li ma humiex konformi ma’ dawn l-obbligi. F’aktar dettall:

·L-iskop ewlieni tar-rekwiżit tar-ritenzjoni tar-riskju tal-Artikolu 6 tar-Regolament dwar it-Titolizzazzjoni huwa l-allinjament tal-interessi bejn l-emittent u l-investitur ta’ titolizzazzjoni. B’hekk, id-dispożizzjoni hija fl-interess tal-investitur. Għalhekk, l-interpretazzjoni ristretta tal-Artikolu 6 issuġġerita mill-Kumitat Konġunt ma hijiex meqjusa neċessarja, minħabba li d-dmir ta’ verifika tal-investitur skont l-Artikolu 5 jiżgura b’mod effettiv li r-ritenzjoni tar-riskju tiġi mħarsa għat-titolizzazzjonijiet kollha li jinxtraw mill-investituri tal-UE. Jekk l-iskop tad-dispożizzjoni tar-ritenzjoni tar-riskju jkun jista’ jintlaħaq b’dan il-mod, l-interpretazzjoni aktar intrużiva tal-Kumitat Konġunt, jew emenda tar-Regolament dwar it-Titolizzazzjoni f’dan ir-rigward, tidher li ma hijiex meħtieġa.

·L-obbligi tal-Artikolu 7 tar-Regolament dwar it-Titolizzazzjoni huma obbligi konġunti li għalihom kull entità, kemm jekk l-oriġinatur, l-isponsor jew l-SSPE tat-titolizzazzjoni, tkun kompletament responsabbli. Għalhekk, jekk waħda biss minn dawk l-entitajiet min-naħa tal-bejgħ tkun tinsab fl-UE, hija jkollha l-obbligu legali li tiddivulga l-informazzjoni kollha mitluba mill-Artikolu 7, anki jekk ma tkunx l-entità maħtura biex tissodisfa r-rekwiżiti ta’ divulgazzjoni. Dan l-obbligu jista’ jiġi infurzat kontra l-entitajiet min-naħa tal-bejgħ tal-UE, anki jekk l-entità ta’ rapportar maħtura tkun stabbilita barra mill-UE.

·Il-Kummissjoni tqis li l-obbligu skont l-Artikolu 9 tar-Regolament dwar it-Titolizzazzjoni jista’ jiġi ssodisfat biss b’mod sinifikanti mill-entità li tagħti l-kreditu fil-proċess, irrispettivament minn jekk tkunx tinsab fl-UE jew le. Il-Kummissjoni taqbel li l-obbligu għandu idealment ikun taħt superviżjoni u infurzat kontra entità tal-UE u tinnota li l-investituri tal-UE jridu jkunu konxji li dan jista’ ma jkunx il-każ f’kull konfigurazzjoni possibbli. L-investitur ibbażat fl-UE huwa permess li jinvesti biss fi tranżazzjonijiet li jista’ jiġi vverifikat li jikkonformaw mal-obbligi tal-Artikolu 9.

Fl-aħħar, il-Kummissjoni tinnota l-inkonsistenza bejn l-Artikolu 5(1)(b) u l-Artikolu 9 u biħsiebha ssolvi din il-kwistjoni fir-reviżjoni li jmiss tar-Regolament dwar it-Titolizzazzjoni. Il-Kummissjoni tinnota li din l-inkonsistenza ma għandha l-ebda effett ta’ ħsara fil-prattika. Jekk ikun minnu li l-isponsor (kif definit mir-Regolament dwar it-Titolizzazzjoni) ma japplika l-ebda standard għall-għoti ta’ kreditu minħabba li ma jagħtix kreditu f’ismu stess, fil-prattika, l-Artikolu 9(1) ma jistax jimponi obbligu dirett validu fuq l-isponsor.

11.2 Obbligi min-naħa tax-xiri – disponibbiltà tad-divulgazzjonijiet

Sfond u sejbiet

Skont l-Artikolu 5(1)(e) tar-Regolament dwar it-Titolizzazzjoni, qabel ma jinvestu f’titolizzazzjoni, l-investituri istituzzjonali għandhom jivverifikaw li l-informazzjoni meħtieġa mill-Artikolu 7 tal-istess regolament tkun saret disponibbli skont il-frekwenza u l-modalitajiet previsti. Għall-investimenti f’titolizzazzjonijiet ta’ pajjiżi terzi fejn l-ebda waħda mill-partijiet min-naħa tal-bejgħ ma tkun tinsab fl-UE, dan iqajjem il-mistoqsija dwar jekk dawn l-investimenti humiex ammissibbli biss jekk l-informazzjoni elenkata fl-Artikolu 7 tiġi pprovduta permezz tal-mudelli tal-ESMA u, fil-każ ta’ titolizzazzjonijiet pubbliċi, repożitorju tat-titolizzazzjoni. Barra minn hekk, dan iqajjem il-mistoqsija dwar jekk għandux jiġi vverifikat li l-informazzjoni pprovduta taqbel kompletament mar-rekwiżiti speċifikati mill-istandard tekniku regolatorju tal-ESMA dwar id-divulgazzjoni 34 u, b’mod partikolari, jekk id-data ta’ self b’self tkunx disponibbli għall-iskoperturi kollha sottostanti it-titolizzazzjoni. Din l-interpretazzjoni tal-Artikolu 5(1)(e) timpedixxi lill-investituri istituzzjonali tal-UE milli jinvestu f’titolizzazzjonijiet ta’ pajjiżi terzi li ma jissodisfawx dawn il-kundizzjonijiet. Is-sottomissjonijiet tal-Kumitat Konġunt u l-feedback għall-konsultazzjoni jindikaw b’mod ċar li r-rekwiżiti tal-Artikolu 5(1)(e) bħalissa huma interpretati u applikati b’mod differenti mill-parteċipanti fis-suq.

L-opinjoni tal-Kumitat Konġunt argumentat għal aktar flessibbiltà, sabiex il-verifika tkun tista’ tiġi preżunta li tlestiet fil-każ ta’ titolizzazzjoni ta’ pajjiż terz, anki jekk mhux ir-rekwiżiti ta’ trasparenza kollha tal-UE jiġu ssodisfati f’kull dettall. Għal dan il-għan, il-Kumitat Konġunt issuġġerixxa li jitwaqqaf “reġim ta’ ekwivalenza ta’ pajjiżi terzi għar-rekwiżiti ta’ trasparenza” b’rabta mat-titolizzazzjonijiet ta’ pajjiżi terzi. Dan jagħmilha possibbli li tiġi vverifikata l-konformità tat-titolizzazzjonijiet ta’ pajjiżi terzi mat-trasparenza meħtieġa mill-Artikolu 7 jekk waħda mill-partijiet min-naħa tal-bejgħ ta’ pajjiżi terzi tkun ipprovdiet informazzjoni dwar it-titolizzazzjoni f’konformità mar-rekwiżiti ta’ pajjiżhom li jirregolaw it-titolizzazzjoni, u jekk ir-reġim ta’ trasparenza ta’ dan il-pajjiż ikun ġie ddikjarat bħala ekwivalenti għar-regoli ta’ trasparenza tal-UE.

Fil-konsultazzjoni, maġġoranza kbira tal-partijiet ikkonċernati tal-industrija ngħaqdu mas-sejħa għal aktar flessibbiltà. Huma sostnew li interpretazzjoni legali tal-Artikolu 5(1)(e) li tirrikjedi li l-investituri istituzzjonali f’titolizzazzjonijiet ta’ pajjiżi terzi jivverifikaw li jkunu rċevew l-informazzjoni kollha f’konformità mal-Artikolu 7 toħloq żvantaġġ kompetittiv għall-investituri istituzzjonali tal-UE. Ftit ħafna mir-rispondenti appoġġaw l-idea li jitwaqqaf reġim ta’ ekwivalenza kif issuġġerit mill-opinjoni tal-Kumitat Konġunt. Xi rispondenti oħrajn barra mill-industrija kienu kontra flessibbiltà akbar fil-każ ta’ investimenti f’titolizzazzjonijiet ta’ pajjiżi terzi, iżda rrakkomandaw li jiġu ssimplifikati r-rekwiżiti ta’ informazzjoni b’mod ġenerali.

Valutazzjoni tal-Kummissjoni

Il-Kummissjoni tirrikonoxxi li l-Artikolu 5(1)(e) iqajjem kwistjonijiet ta’ interpretazzjoni legali u tieħu nota tal-interpretazzjonijiet differenti ta’ din il-kwistjoni. Madankollu, il-Kummissjoni hija tal-fehma li l-intenzjoni leġiżlattiva tal-obbligu ta’ verifika skont l-Artikolu 5(1)(e) tar-Regolament dwar it-Titolizzazzjoni hija essenzjali għall-interpretazzjoni ta’ din id-dispożizzjoni. Bl-esperjenza miksuba mill-kriżi finanzjarja l-kbira, il-leġiżlaturi tal-UE riedu jiżguraw li fil-futur l-investituri istituzzjonali tal-UE fit-titolizzazzjonijiet iwettqu diliġenza dovuta xierqa qabel kwalunkwe investiment, u li jkollhom l-informazzjoni kollha meħtieġa għad-dispożizzjoni tagħhom. Il-koleġiżlaturi speċifikaw l-informazzjoni li trid tiġi ddivulgata lill-investituri fl-Artikolu 7. B’hekk, id-differenzjazzjoni tal-ambitu tal-informazzjoni li għandha tiġi pprovduta, skont jekk it-titolizzazzjoni tkunx maħruġa minn entitajiet tal-UE jew minn entitajiet ibbażati f’pajjiżi terzi, ma hijiex konformi mal-intenzjoni leġiżlattiva, minħabba li ma huwiex importanti għat-twettiq xieraq tad-diliġenza dovuta tal-investituri istituzzjonali bbażati fl-UE jekk titolizzazzjoni tkunx oriġinat ġewwa jew barra l-UE. Għalhekk, mingħajr emenda tad-dispożizzjoni legali, ma huwiex xieraq li l-Artikolu 5(1)(e) jiġi interpretat b’mod li jitħalla għad-diskrezzjoni tal-investituri istituzzjonali li jiddeċiedu jekk irċevewx jew le informazzjoni materjalment komparabbli.

Minkejja dak li ntqal hawn fuq, il-Kummissjoni hija konxja li t-test attwali tal-Artikolu 5(1)(e), flimkien mar-regoli stipulati mill-Artikolu 7 (u, min-naħa l-oħra, flimkien mal-istandard tekniku rispettiv) de facto jeskludi lill-investituri istituzzjonali tal-UE milli jinvestu f’ċerti titolizzazzjonijiet ta’ pajjiżi terzi. Dan ma huwiex minħabba li dawn it-tranżazzjonijiet ma jkunux jistgħu jikkonformaw b’mod materjali mal-qafas regolatorju tal-UE, iżda sempliċiment minħabba li l-partijiet min-naħa tal-bejgħ ta’ pajjiżi terzi jistgħu ma jkunux interessati li jipprovdu l-informazzjoni meħtieġa skont il-proċeduri stabbiliti fl-Artikolu 7. Filwaqt li jista’ jkun li l-kwistjoni tkun tistħoqqilha kunsiderazzjoni bir-reqqa fil-kuntest ta’ emenda futura tar-Regolament dwar it-Titolizzazzjoni, il-Kummissjoni temmen li l-miżuri previsti biex jiġu emendati l-istandards tekniċi li jistabbilixxu r-rekwiżiti ta’ trasparenza tal-Artikolu 7 (ara t-Taqsimiet 5 u 6) jistgħu jgħinu biex inaqqsu l-iżvantaġġ kompetittiv għall-investituri istituzzjonali tal-UE. Dan għaliex dan se jagħmilha aktar faċli wkoll għall-partijiet min-naħa tal-bejgħ minn pajjiżi terzi biex jipprovdu l-informazzjoni meħtieġa.

11.3 Obbligi min-naħa tax-xiri – investituri tal-AIFM

Sfond u sejbiet

L-opinjoni tal-Kumitat Konġunt indikat il-ħtieġa għal ċerti kjarifiki legali dwar maniġers ta’ fondi ta’ investiment alternattivi (AIFM) li jaġixxu bħala investituri istituzzjonali fit-titolizzazzjonijiet. L-ewwel, ma kienx ċar jekk AIFM mhux tal-UE li jiġġestixxi jew jikkummerċjalizza fondi ta’ investiment alternattivi (AIF) fl-UE jkunx kopert mill-kamp ta’ applikazzjoni tad-definizzjoni tar-Regolament dwar it-Titolizzazzjoni ta’ investitur istituzzjonali, anki jekk il-kummerċjalizzazzjoni fl-UE sseħħ biss fuq bażi ta’ pjazzament privat. It-tieni, ma kienx ċar jekk id-definizzjoni tal-investitur istituzzjonali (li huwa soġġett għar-rekwiżiti estensivi ta’ diliġenza dovuta) tinkludix ukoll AIFM “taħt il-limitu” 35 .

Il-konsultazzjoni indikat maġġoranza ċara favur il-kjarifiki, madankollu b’fehmiet opposti dwar kif għandhom jiġu abbozzati l-kjarifiki. Dawk favur l-inklużjoni kemm tal-AIFM taħt il-limitu kif ukoll tal-AIFM ta’ pajjiżi terzi li jikkummerċjalizzaw u jiġġestixxu l-AIF fl-UE jenfasizzaw il-ħtieġa li jkun hemm kundizzjonijiet ekwivalenti għall-AIFM kollha attivi fis-suq tat-titolizzazzjoni.

Min-naħa l-oħra, xi rispondenti staqsew jekk l-inklużjoni ta’ AIFM taħt il-limitu tkunx proporzjonata. Ir-rispondenti li argumentaw kontra l-applikazzjoni tar-rekwiżiti ta’ diliġenza dovuta tal-UE għall-AIFM ta’ pajjiżi terzi li jiġġestixxu jew jikkummerċjalizzaw fondi fl-UE enfasizzaw li tali interpretazzjoni tagħmel ir-Regolament dwar it-Titolizzazzjoni ekstraterritorjali. Huma ssuġġerew ukoll li dan joħloq differenza mhux ġustifikata bejn il-fondi u prodotti oħrajn li għalihom ir-rekwiżiti ta’ diliġenza dovuta huma regolati mir-regolatur tad-domiċilju tal-investitur istituzzjonali. Fl-aħħar nett, ġie nnotat minn għadd ta’ rispondenti li t-test legali kif inhu ma kienx ċar dwar jekk rekwiżit għal AIFM f’pajjiż mhux tal-UE li japplika r-regoli tal-UE dwar id-diliġenza dovuta jkunx limitat għall-fondi ġestiti u kkummerċjalizzati fl-UE jew, ladarba l-AIFM jiġġestixxi jew jikkummerċjalizza fond wieħed fl-UE, jekk dan l-obbligu jestendix għall-fondi kollha kkummerċjalizzati jew ġestiti minn dan l-AIFM ta’ pajjiż terz.

Valutazzjoni tal-Kummissjoni

Il-Kummissjoni tinnota li l-Artikolu 2(12), jiġifieri d-dispożizzjoni li tiddefinixxi l-investituri istituzzjonali għall-finijiet tar-Regolament dwar it-Titolizzazzjoni, jirreferi fil-paragrafu (d) speċifikament għad-dispożizzjoni fid-Direttiva dwar Maniġers ta’ Fondi ta’ Investiment Alternattivi (AIFM) li tiddefinixxi AIFM mingħajr ma tiddifferenzja bejn entitajiet ’il fuq mil-limitu msemmi hawn fuq jew taħtu. Għalhekk, il-formulazzjoni legali tirrikjedi b’mod ċar li l-AIFM taħt il-limitu għandhom jitqiesu wkoll bħala investituri istituzzjonali skont it-tifsira tar-Regolament dwar it-Titolizzazzjoni. Din l-interpretazzjoni hija appoġġata wkoll mill-intenzjoni leġiżlattiva tar-rekwiżiti ta’ diliġenza dovuta tal-Artikolu 5, li hija li l-investituri tal-UE jiġu protetti mill-iskopertura fil-futur għal investimenti fit-titolizzazzjoni mingħajr diliġenza dovuta minn qabel u fehim xieraq tal-prodott akkwistat.

L-intenzjoni leġiżlattiva tipprovdi wkoll argumenti b’saħħithom għall-interpretazzjoni tal-Kummissjoni li l-AIFM ta’ pajjiżi terzi li jikkummerċjalizzaw u jiġġestixxu l-fondi fl-UE għandhom jikkonformaw mar-rekwiżiti ta’ diliġenza dovuta tar-Regolament dwar it-Titolizzazzjoni għall-investimenti kollha tagħhom fit-titolizzazzjoni. Jekk l-AIFM ta’ pajjiżi terzi li jikkummerċjalizzaw il-fondi fl-UE jitqiesu eżentati mir-regoli dwar id-diliġenza dovuta, dan jista’ jimmina l-protezzjoni komprensiva tal-investituri li kellhom f’moħħhom il-leġiżlaturi. Din l-interpretazzjoni ma tagħmilx dawn ir-regoli “ekstraterritorjali”, minħabba li jirregolaw attività – il-ġestjoni jew il-kummerċjalizzazzjoni ta’ fond fl-UE – li sseħħ ġewwa l-UE. Barra minn hekk, meta wieħed iqis l-intenzjoni leġiżlattiva, jidher ċar li l-formulazzjoni wiesgħa tal-Artikolu 2(12)(d) tar-Regolament dwar it-Titolizzazzjoni għandha tapplika biss għall-fondi li l-AIFM ta’ pajjiż terz jikkummerċjalizza u jiġġestixxi fl-UE, iżda ma għandhiex tiġi interpretata bħala li tkopri l-attivitajiet ta’ ġestjoni u kummerċjalizzazzjoni ta’ dan l-istess AIFM li ma għandu l-ebda rabta mal-UE. Il-Kummissjoni se tikkunsidra li temenda l-formulazzjoni tal-Artikolu 2(12)(d) biex tneħħi speċifikament kwalunkwe xorta ta’ inċertezza legali fi proposta futura biex jiġi emendat ir-Regolament dwar it-Titolizzazzjoni.

12. Superviżjoni tat-titolizzazzjoni

Sfond u sejbiet

Ir-rapport tal-Kumitat Konġunt iffoka fuq is-superviżjoni tad-diliġenza dovuta, ir-ritenzjoni tar-riskju, it-trasparenza, it-titolizzazzjonijiet privati u r-rekwiżiti STS. Filwaqt li nnota xi kwistjonijiet possibbli fis-superviżjoni tas-suq, huwa ma talabx bidliet leġiżlattivi, iżda rrakkomanda li jiġu pprovduti aktar gwida u ċarezza lill-awtoritajiet superviżorji biex tiġi żgurata l-implimentazzjoni effiċjenti u konsistenti tar-Regolament dwar it-Titolizzazzjoni. Barra minn hekk, ir-rapport tal-Kumitat Konġunt argumenta li huwa diffiċli għas-superviżuri li jaċċessaw l-informazzjoni dwar titolizzazzjoni privata, minħabba li din ma ssirx disponibbli permezz ta’ repożitorju tat-titolizzazzjoni.

Fil-konsultazzjoni, il-parteċipanti fis-suq irrapportaw differenzi fl-approċċi superviżorji tal-Istati Membri u enfasizzaw li dan jista’ joħloq inċertezza. L-awtoritajiet kompetenti ssemmew li għandhom interpretazzjonijiet differenti tar-Regolament dwar it-Titolizzazzjoni u gradi differenti ta’ involviment fil-proċess superviżorju.

B’mod ġenerali, il-partijiet ikkonċernati talbu konsistenza, aktar koordinazzjoni bejn is-superviżuri (minħabba li diversi awtoritajiet kompetenti spiss ikunu involuti fis-superviżjoni ta’ tranżazzjoni waħda) u approċċ proporzjonat biex jiġu evitati prattiki diverġenti. Huma enfasizzaw li ma huwa meħtieġ ebda rekwiżit addizzjonali, lanqas permezz ta’ standards tekniċi regolatorji, li minflok jiffavorixxu gwida superviżorja mill-Kumitat Konġunt tal-ASE.

Fl-aħħar nett, ftit awtoritajiet kompetenti għamlu l-każ li jkun hemm superviżur ewlieni, magħżul minn fost l-awtoritajiet kompetenti involuti f’titolizzazzjoni. Fil-fehma tagħhom, is-superviżur ewlieni jikkoordina l-kondiviżjoni tal-informazzjoni bejn is-superviżuri, b’mod partikolari f’kuntest fejn superviżuri differenti jkunu involuti fil-verifika tal-konformità mar-rekwiżiti differenti tar-Regolament dwar it-Titolizzazzjoni.

Valutazzjoni tal-Kummissjoni

Il-Kummissjoni tirrikonoxxi li l-awtoritajiet kompetenti jistgħu jkunu jeħtieġu aktar żmien biex jiksbu biżżejjed esperjenza, parzjalment minħabba l-adozzjoni tard ta’ xi standards tekniċi regolatorji. Madankollu, sal-lum ma ġie rrapportat l-ebda nuqqas kbir fis-superviżjoni, b’mod partikolari l-ebda kwistjoni li teħtieġ bidliet fil-leġiżlazzjoni. Il-Kummissjoni tqis dan bħala indikazzjoni tal-adegwatezza ġenerali tal-qafas superviżorju.

Madankollu, f’dan l-istadju ġew indikati xi ftit kwistjonijiet fejn konverġenza akbar u koordinazzjoni mtejba bejn is-superviżuri jkunu ta’ benefiċċju. Il-Kummissjoni tqis li l-prattiki superviżorji diverġenti u l-inċertezza legali li tirriżulta għandhom il-potenzjal li joħolqu kundizzjonijiet mhux ekwivalenti u huma ta’ ħsara għat-tkabbir tas-suq tat-titolizzazzjoni. Għandha tiġi pprovduta gwida għall-prevenzjoni tad-differenzi fl-interpretazzjoni tar-Regolament dwar it-Titolizzazzjoni u fl-involviment tal-awtoritajiet kompetenti fil-proċess superviżorju. B’mod partikolari, għandu jiġi żgurat approċċ aktar armonizzat bejn l-awtoritajiet kompetenti għall-monitoraġġ tal-konformità tar-rekwiżiti STS. Tali gwida tista’ tiġi pprovduta mill-Kumitat Konġunt biex jiġi żviluppat aktar fehim komuni tar-regoli, tal-aħjar prattiki u tal-għodod superviżorji biex jiġi żgurat approċċ superviżorju komuni fil-livell tal-UE.

Il-Kummissjoni hija konxja li s-suq tat-titolizzazzjoni ma huwiex żviluppat bl-istess mod madwar l-UE u li dan għandu impatt fuq il-grad ta’ esperjenza tas-superviżuri differenti. B’hekk, il-Kummissjoni taqbel mar-rakkomandazzjoni fir-rapport tal-Kumitat Konġunt biex tiġi żviluppata gwida komuni tal-UE dwar l-aħjar prattiki għas-superviżuri nazzjonali.

Ir-rieżamijiet bejn il-pari huma għodda importanti u effettiva oħra għall-promozzjoni tal-konverġenza u jistgħu jipprovdu għarfien sinifikanti dwar il-prattiki differenti fost l-awtoritajiet kompetenti fil-kriterji STS irrapportati mill-partijiet ikkonċernati. Għalhekk, il-Kummissjoni jiddispjaċiha li ma sar jew ma huwa ppjanat li jsir fil-futur qrib l-ebda rieżami bejn il-pari dwar l-implimentazzjoni tal-kriterji STS, minkejja l-obbligu fl-Artikolu 36(7) tar-Regolament dwar it-Titolizzazzjoni. Il-proċess ta’ mistoqsijiet u tweġibiet wera li huwa għodda effettiva biex tiġi żgurata l-konverġenza u għandu jiġi żgurat trattament rapidu tal-mistoqsijiet imqajma.

Kif irrimarkat ukoll mir-Rapport tal-Kumitat Konġunt dwar ir-rekwiżiti STS, il-frammentazzjoni tar-responsabbiltà superviżorja sa ċertu punt toħloq sfidi għall-bini ta’ għarfien espert u esperjenza superviżorji. F’dan ir-rigward, fit-tul, il-Kummissjoni tara mertu fl-esplorazzjoni bir-reqqa tal-fattibbiltà li jkun hemm superviżur ewlieni. Din il-valutazzjoni għandha tirrifletti wkoll fuq l-aktar għodda xierqa biex dan jitmexxa ’l quddiem, eż. permezz ta’ linji gwida għas-superviżuri jew permezz ta’ emenda għar-Regolament dwar it-Titolizzazzjoni.

Fl-aħħar nett, fir-rigward tal-allegata diffikultà għas-superviżuri biex jaċċessaw informazzjoni dwar titolizzazzjonijiet privati, il-Kummissjoni tinnota li r-rekwiżit legali għan-naħa tal-bejgħ biex l-informazzjoni ssir disponibbli għas-superviżur f’konformità mal-Artikolu 7 ma jiddistingwix bejn tranżazzjonijiet privati u pubbliċi. Barra minn hekk, il-Kummissjoni hija tal-opinjoni li r-Regolament dwar it-Titolizzazzjoni jipprevedi l-għodod superviżorji kollha li jistgħu jkunu meħtieġa biex jiġi infurzat dan l-obbligu.

13. Trattament prudenzjali tat-titolizzazzjonijiet

Il-Kummissjoni hija meħtieġa tissottometti rapport lill-koleġiżlaturi skont l-Artikolu 519(a) tar-Regolament dwar ir-Rekwiżiti ta’ Kapital (CRR) dwar l-applikazzjoni ta’ ċerti dispożizzjonijiet fil-parti tat-titolizzazzjoni ta’ dak ir-Regolament “fid-dawl tal-iżviluppi fis-swieq tat-titolizzazzjoni, inkluż minn perspettiva makroprudenzjali u ekonomika”. Dan għandu jkun akkumpanjat minn proposta leġiżlattiva, jekk ikun xieraq. Waqt li kienet qed tħejji tali rapport, il-Kummissjoni qieset li kien xieraq li twettaq valutazzjoni wiesgħa tal-prestazzjoni tal-qafas prudenzjali tat-titolizzazzjoni kollu kemm hu, fid-dawl tal-kundizzjonijiet diffiċli tas-suq f’dawn l-aħħar snin.

Sejħa għal parir

F’dan l-isfond, il-konsultazzjoni kienet tinkludi diversi mistoqsijiet dwar il-funzjonament tal-qafas prudenzjali tat-titolizzazzjoni tal-UE. Barra minn hekk, fis-17 ta’ Ottubru 2021, il-Kummissjoni indirizzat sejħa għal parir (‘call for advice’ - CFA) lill-Kumitat Konġunt tal-ASE, fejn talbitu jivvaluta jekk il-qafas prudenzjali tat-titolizzazzjoni ssodisfax l-objettiv maħsub tiegħu li jgħin fl-irkupru tas-suq tat-titolizzazzjoni tal-UE, filwaqt li jżomm livell xieraq ta’ prudenza. Il-Kumitat Konġunt intalab jagħti l-parir tiegħu sal-1 ta’ Settembru 2022.

Il-Kummissjoni qed tivvaluta wkoll l-adegwatezza tal-kalibrazzjoni tar-rekwiżiti ta’ kapital għall-investimenti f’segmenti ta’ titolizzazzjoni minn ditti tal-assigurazzjoni u tar-riassigurazzjoni. Dawk il-kwistjonijiet ifformaw ukoll parti mill-konsultazzjoni ta’ hawn fuq u mis-sejħa għal parir lill-Kumitat Konġunt tal-ASE.

Il-Kummissjoni se tistenna l-pariri u r-rakkomandazzjonijiet tal-Kumitat Konġunt. Wara li tqis il-pariri u l-feedback li tkun irċeviet fil-konsultazzjoni, il-Kummissjoni se tivvaluta l-adegwatezza u l-konvenjenza tal-emendi potenzjali għall-qafas prudenzjali tat-titolizzazzjoni.

Trasferiment ta’ riskju sinifikanti (‘significant risk transfer’ - SRT)

Wieħed mill-objettivi ewlenin li jirfdu t-titolizzazzjonijiet mill-perspettiva ta’ oriġinatur huwa li jinkiseb serħan kapitali b’rabta mal-portafoll tal-assi titolizzati, meta mqabbel mal-ammont ta’ kapital regolatorju li l-oriġinatur irid iżomm b’rabta mal-istess portafoll qabel ma jwettaq it-titolizzazzjoni.

Il-kisba ta’ serħan kapitali hija soġġetta għad-diversi kundizzjonijiet kwantitattivi u kwalitattivi msemmija fl-Artikoli 244 u 245 tas-CRR (il-“qafas tal-SRT”), li jiżguraw li l-oriġinatur ma jġarrabx riskju materjali ta’ sottokapitalizzazzjoni b’rabta mal-portafoll ta’ assi titolizzati. Għaldaqstant, l-awtoritajiet kompetenti jridu jivvalutaw jekk it-titolizzazzjonijiet li għalihom l-oriġinaturi jfittxu li jitolbu serħan kapitali jissodisfawx il-kundizzjonijiet għall-SRT stipulati f’dawk l-artikoli.

Għalhekk, il-qafas tal-SRT huwa essenzjali biex jiggarantixxi s-sikurezza u s-solidità tal-oriġinaturi bankarji, kif ukoll biex jippromwovi l-fiduċja ġenerali tas-suq.

Fir-rapport tagħha tat-23 ta’ Novembru 2020 36 , l-EBA għamlet diversi rakkomandazzjonijiet lill-Kummissjoni dwar l-armonizzazzjoni tal-prattiki u l-proċessi ta’ valutazzjoni tal-SRT. Fl-aħħar nett, l-EBA inkludiet ukoll rakkomandazzjonijiet biex tissimplifika u ttejjeb it-testijiet tal-SRT stipulati fl-Artikoli 245 u 246 tas-CRR.

L-industrija rrimarkat li l-qafas tal-SRT iqajjem diversi ostakli għall-funzjonament bla xkiel u effettiv tas-suq tat-titolizzazzjoni u rrakkomandat li l-qafas jiġi applikat b’mod aktar trasparenti, konsistenti u effiċjenti. Il-Kummissjoni ġabret feedback mill-industrija dwar aspetti magħżula tar-rapport tal-EBA dwar l-SRT fil-konsultazzjoni.

Fid-dawl tar-rakkomandazzjonijiet tal-EBA u l-feedback tal-industrija, il-Kummissjoni bħalissa qed tikkunsidra l-mertu u l-konvenjenza tal-użu tal-għoti tas-setgħa kif stabbilit fl-Artikoli 244(6) u 245(6) tas-CRR biex ittejjeb l-armonizzazzjoni tal-qafas tal-SRT, bil-għan li tagħmlu aktar effiċjenti, trasparenti u konsistenti.

14. Konklużjoni

Il-qafas il-ġdid tat-titolizzazzjoni tal-UE sar applikabbli biss fl-2019 u żdiedu xi elementi ġodda lejn l-aħħar ta’ April 2021. L-implimentazzjoni sħiħa tal-qafas għadha għaddejja b’xi ftit standards tekniċi regolatorji li għadhom qed jitħejjew. Bl-istess mod, kif juru l-mistoqsijiet dwar l-ambitu ġuriżdizzjonali, pereżempju, kemm il-parteċipanti fis-suq kif ukoll is-superviżuri għadhom fil-proċess li jittraduċu d-dispożizzjonijiet legali fil-prattika.

B’hekk, il-Kummissjoni temmen li hemm bżonn ta’ aktar żmien biex tinkiseb stampa sħiħa tal-impatt tal-qafas il-ġdid ta’ titolizzazzjoni. Dan huwa aktar u aktar minnu minħabba li fatturi esterni straordinarji bħall-pandemija tal-COVID-19 u l-politika monetarja akkomodanti tal-banek ċentrali matul dak il-perjodu setgħu kellhom rwol sinifikanti fil-mod kif is-suq tat-titolizzazzjoni tal-UE żviluppa jew ma żviluppax minn meta daħal fis-seħħ il-qafas il-ġdid.

Minkejja dan, dan ir-rieżami mandat legalment huwa opportunità tajba biex jittieħed kont, fuq bażi preliminari, u biex jiġi deċiż jekk hemmx oqsma li jiġġustifikaw azzjoni immedjata. Wara li kkunsidrat il-kontribut kollu li rċeviet, il-Kummissjoni temmen li r-Regolament dwar it-Titolizzazzjoni jikkontribwixxi b’mod sinifikanti biex jintlaħaq l-objettiv ewlieni tal-leġiżlazzjoni tal-2017 li jiġi stabbilit suq tat-titolizzazzjoni tal-UE li jgħin fil-finanzjament tal-ekonomija mingħajr ma jinħolqu riskji għall-istabbiltà finanzjarja. It-tikketta STS il-ġdida tikkostitwixxi element kostitwenti wieħed għal dan il-għan u tgħin biex titneħħa l-istigma li s-swieq tat-titolizzazzjoni tal-UE sofrew minnha minn żmien il-kriżi finanzjarja l-kbira. B’mod ġenerali, is-suq jidher li qed jaħdem raġonevolment tajjeb, għalkemm l-aspettattivi għal suq dinamiku ħafna b’volumi li jiżdiedu u għadd dejjem jikber ta’ parteċipanti għadhom ma jidhrux li ġew issodisfati.

Madankollu, dan l-ewwel rendikont uffiċjali tal-qafas il-ġdid tat-titolizzazzjoni qajjem ukoll għadd ta’ kwistjonijiet bil-qafas il-ġdid li huma kkunsidrati li għandhom rwol għaliex is-suq tat-titolizzazzjoni tal-UE sa issa ma kibirx daqskemm kienu ttamaw l-inizjaturi tal-qafas il-ġdid.

Fir-rigward tat-trattament prudenzjali tat-titolizzazzjoni, li ħafna partijiet ikkonċernati tal-industrija jqisu li huwa aktar konservattiv milli għal prodotti komparabbli bi profil ta’ riskju simili, il-Kummissjoni nediet sejħa għal parir lill-Kumitat Konġunt tal-ASE biex tanalizza s-sitwazzjoni f’aktar dettall. Ladarba tirċievi dan il-kontribut, il-Kummissjoni se tivvaluta jekk hemmx każ għal aġġustamenti jew le.

It-tħassib bil-parti l-oħra tal-qafas il-ġdid, ir-Regolament dwar it-Titolizzazzjoni, jiffoka prinċipalment fuq l-affermazzjoni tal-parteċipanti fis-suq li l-konformità mal-obbligi ta’ trasparenza attwali tirrikjedi ħafna riżorsi, mingħajr ma tipproduċi wisq valur miżjud għall-investitur, b’mod partikolari fil-każ tat-tranżazzjonijiet privati. Meta jitqies kollox, il-Kummissjoni tirrikonoxxi li hemm lok għal titjib, iżda taħseb li, għan-nuqqasijiet li identifika r-rieżami, it-titjib jista’ jiġi implimentat mingħajr il-ħtieġa li jinbidel ir-Regolament dwar it-Titolizzazzjoni. B’dan f’moħħha, il-Kummissjoni tistieden lill-ESMA tirrevedi l-istandards tekniċi regolatorji u ta’ implimentazzjoni li jistabbilixxu d-dettalji tar-reġim ta’ trasparenza.

Fir-rigward ta’ qafas ta’ titolizzazzjoni ekoloġika, il-mandat legali jixħet attenzjoni importanti, fil-mument it-tajjeb, fuq il-kwistjoni ta’ kif it-titolizzazzjoni tista’ tiġi sfruttata biex tappoġġa l-finanzjament tat-tranżizzjoni lejn ekonomija sostenibbli tal-UE, filwaqt li fl-istess ħin jiġu evitati r-riskji ta’ greenwashing. Il-Kummissjoni taqbel mar-rapport tal-EBA li ma hemm l-ebda ħtieġa għal tikketta ta’ titolizzazzjoni ekoloġika separata fit-terminu qasir u medju u tistieden lill-koleġiżlaturi biex minflok jindirizzaw il-kwistjoni b’mod xieraq fin-negozjati li għaddejjin dwar il-ħolqien ta’ EuGBS. Fil-fehma tal-Kummissjoni, l-għoti ta’ opportunità lis-suq tat-titolizzazzjoni li jkollu rwol fit-tranżizzjoni ekoloġika mhux biss huwa essenzjali biex jiżdiedu aktar il-benefiċċji tat-titolizzazzjoni għas-soċjetà, iżda huwa meħtieġ ukoll biex jiġi appoġġat l-iżvilupp futur tas-suq tat-titolizzazzjoni tal-UE nnifsu.

Il-Kummissjoni tibqa’ impenjata bis-sħiħ għall-għan li toħloq qafas għal suq tat-titolizzazzjoni tal-UE b’saħħtu u stabbli. Tali suq huwa element kostitwenti indispensabbli ta’ Unjoni tas-Swieq Kapitali ġenwina u jista’ jsir saħansitra aktar importanti biex jiġu indirizzati l-isfidi tal-finanzjament tal-attività ekonomika fl-ambjent tas-suq ferm aktar diffiċli li jidher li qed jevolvi bħalissa. Għalhekk, il-Kummissjoni se tkompli timmonitorja mill-qrib is-suq tat-titolizzazzjoni u tintervjeni, jekk u meta jitqies xieraq, biex taħsad bis-sħiħ il-benefiċċji ta’ suq tat-titolizzazzjoni b’saħħtu għall-UE.

(1)

Ara d-dokument ta’ ħidma tal-persunal tal-Kummissjoni, il-Valutazzjoni tal-Impatt li takkumpanja l-Proposta tad-dokument għal Regolament tal-Parlament Ewropew u tal-Kunsill li jistabbilixxi regoli komuni dwar it-titolizzazzjoni u li joħloq qafas Ewropew għal titolizzazzjoni sempliċi u trasparenti u li jemenda d-Direttivi 2009/65/KE, 2009/138/KE, 2011/61/UE u r-Regolamenti (KE) Nru 1060/2009 u (UE) Nru 648/2012 u l-Proposta għal Regolament tal-Parlament Ewropew u tal-Kunsill li jemenda r-Regolament (UE) Nru 575/2013 dwar ir-rekwiżiti prudenzjali għall-istituzzjonijiet ta’ kreditu u d-ditti tal-investiment, 30.9.2015 (SWD (2015)185 final).

(2)

Il-każ għal suq tat-titolizzazzjoni li jiffunzjona aħjar fl-Unjoni Ewropea: A discussion paper, Bank of England u l-Bank Ċentrali Ewropew, https://www.ecb.europa.eu/pub/pdf/other/ecb-boe_case_better_functioning_securitisation_marketen.pdf .

(3)

 Pjan ta’ Azzjoni għall-Bini ta’ Unjoni tas-Swieq Kapitali, 20.9.2015 (COM/2015/0468 final), https://eur-lex.europa.eu/legal-content/MT/TXT/?uri=CELEX%3A52015DC0468

(4)

Ir-Regolament (UE) 2017/2402 tal-Parlament Ewropew u tal-Kunsill tat-12 ta’ Diċembru 2017 li jistabbilixxi qafas ġenerali għat-titolizzazzjoni u li joħloq qafas speċifiku għal titolizzazzjoni sempliċi, trasparenti u standardizzata, u li jemenda d-Direttivi 2009/65/KE, 2009/138/KE u 2011/61/UE u r-Regolamenti (KE) Nru 1060/2009 u (UE) Nru 648/2012.

(5)

Ir-Regolament (UE) Nru 575/2013 tal-Parlament Ewropew u tal-Kunsill tas-26 ta’ Ġunju 2013 dwar ir-rekwiżiti prudenzjali għall-istituzzjonijiet ta’ kreditu u d-ditti tal-investiment u li jemenda r-Regolament (UE) Nru 648/2012 (ĠU L 176, 27.6.2013, p. 1).

(6)

Id-Direttiva 2009/138/KE tal-Parlament Ewropew u tal-Kunsill tal-25 ta’ Novembru 2009 dwar il-bidu u l-eżerċizzju tan-negozju tal-assigurazzjoni u tar-riassigurazzjoni (Solvibbiltà II) (ĠU L 335, 17.12.2009, p. 1).

(7)

Id-Direttiva 2009/65/KE tal-Parlament Ewropew u tal-Kunsill tat-13 ta’ Lulju 2009 dwar il-koordinazzjoni ta’ liġijiet, regolamenti u dispożizzjonijiet amministrattivi fir-rigward tal-impriżi ta’ investiment kollettiv f’titoli trasferibbli (UCITS) (ĠU L 302, 17.11.2009, p. 32).

(8)

Id-Direttiva 2011/61/UE tal-Parlament Ewropew u tal-Kunsill tat-8 ta’ Ġunju 2011 dwar Maniġers ta’ Fondi ta’ Investiment Alternattivi u li temenda d-Direttivi 2003/41/KE u 2009/65/KE u r-Regolamenti (KE) Nru 1060/2009 u (UE) Nru 1095/2010 (ĠU L 174, 1.7.2011, p. 1).

(9)

Titolizzazzjoni ta’ bejgħ veru tinvolvi t-trasferiment tal-interess ekonomiku fl-iskoperturi li jkunu qed jiġu titolizzati permezz tat-trasferiment tas-sjieda ta’ dawk l-iskoperturi għal entità bi skop speċjali.

(10)

Ara https://ec.europa.eu/info/publications/200722-proposal-capital-markets-recovery_en  

(11)

B’kuntrast għal titolizzazzjoni ta’ bejgħ veru, f’titolizzazzjoni sintetika, ir-riskju ta’ kreditu sottostanti assoċjat ma’ ġabra ta’ self jiġi ttrasferit bl-użu ta’ derivattivi jew garanziji ta’ kreditu, u l-iskoperturi li jiġu titolizzati jibqgħu skoperturi tal-oriġinatur.

(12)

Azzjoni 6 tal-pjan ta’ azzjoni: https://eur-lex.europa.eu/legal-content/MT/TXT/?uri=COM:2020:590:FIN  

(13)

ESA’s opinion to the European Commission on the jurisdictional scope of application of the Securitisation Regulation, JC 2021 16. https://www.esma.europa.eu/sites/default/files/library/jc_2021_16_-_esas_opinion_on_jurisdictional_scope_of_application_of_the_securitisation_regulation_003.pdf

(14)

Final report of the high-level forum on the Capital Markets Union “A new vision for Europe’s capital markets” https://ec.europa.eu/info/files/200610-cmu-high-level-forum-final-report_en .  

(15)

Joint Committee report on the implementation and functioning of the Securitisation Regulation JC 2021 31. https://www.eiopa.europa.eu/document-library/report/joint-committee-report-implementation-and-functioning-of-securitisation_en

(16)

  https://finance.ec.europa.eu/document/download/4ce4c935-06eb-4a35-a475-3b7224982242_en?filename=2021-eu-securitisation-framework-summary-of-responses_en.pdf  

(17)

https://www.eba.europa.eu/sites/default/documents/files/document_library/About%20Us/Missions%20and%20tasks/Call%20for%20Advice/2021/CfA%20to%20JC%20for%20securitisation%20in%20prudential%20framework%20review/1022482/CfA%20cover%20letter_final.pdf  

(18)

European Benchmarking Exercise (EBE) for Private Securitisations, l-1 ta’ Diċembru 2021, https://www.afme.eu/publications/reports/details/European-Benchmarking-Exercise-EBE-for-Private-Securitisations .  

(19)

Iċ-ċifri ma jinkludux obbligi ta’ self kollateralizzat. Sors: Ir-Rapport dwar id-Data dwar it-Titolizzazzjoni tal-AFME, Q4 2021 u s-Sena 2021 Sħiħa, il-15 ta’ Marzu 2022.

(20)

It-tqabbil mas-suq tat-titolizzazzjoni tal-Istati Uniti għandu jqis l-istruttura differenti tiegħu, iddominata mill-attivitajiet ta’ entitajiet sponsorjati mill-gvern, li jikkostitwixxu l-maġġoranza assoluta tal-ħruġ tat-titolizzazzjoni fl-Istati Uniti, kif ukoll id-differenzi fir-regoli kontabilistiċi u prudenzjali tagħha.

(21)

     L-ewwel titolizzazzjonijiet STS fuq il-karta bilanċjali ġew innotifikati lill-ESMA fit-22 ta’ Ġunju 2021.

(22)

Il-Maħżen Virtwali Ewropew tad-Data (EDW) huwa wieħed miż-żewġ repożitorji tat-titolizzazzjoni li huma awtorizzati sa issa. Ir-repożitorji tat-titolizzazzjoni għandhom il-kompitu li jiġbru b’mod ċentrali data dwar it-titolizzazzjonijiet fl-UE u li jipprovdu din id-data lill-investituri u lis-superviżuri.

(23)

L-EBA dan l-aħħar adottat verżjoni aġġornata tal-istandards tekniċi msemmija hawn fuq bħala riżultat tal-emendi għad-dispożizzjonijiet dwar ir-ritenzjoni tar-riskju bil-Pakkett għall-Irkupru tas-Swieq Kapitali. Ir-rapport finali ġie sottomess lill-Kummissjoni fit-12 ta’ April 2022.

(24)

Il-Komunikazzjoni tal-Kummissjoni lill-Parlament Ewropew, lill-Kunsill, lill-Bank Ċentrali Ewropew, lill-Kumitat Ekonomiku u Soċjali Ewropew u lill-Kumitat tar-Reġjuni - Ekwivalenza fil-qasam tas-servizzi finanzjarji - COM(2019) 349 final.

(25)

Kif awtorizzat mill-paragrafu 7 tal-Artikolu 36 tar-Regolament dwar it-Titolizzazzjoni.

(26)

https://www.eba.europa.eu/sites/default/documents/files/document_library/Publications/Reports/2022/1027593/EBA%20report%20on%20sustainable%20securitisation.pdf  

(27)

  L-EBA tirrakkomanda aġġustamenti għall-Istandard Ewropew għall-Bonds Ekoloġiċi propost fir-rigward tat-tranżazzjonijiet ta’ titolizzazzjoni | L-Awtorità Bankarja Ewropea (europa.eu)

(28)

Lil hinn minn self residenzjali jew self jew lokazzjonijiet għal karozzi.

(29)

  https://eur-lex.europa.eu/legal-content/MT/TXT/?uri=CELEX:52021PC0391  

(30)

https://ec.europa.eu/info/business-economy-euro/banking-and-finance/sustainable-finance/european-green-bond-standard_en  

(31)

Skont l-estimi tal-EBA tal-ammont ta’ assi allinjati mat-tassonomija fil-banek tal-UE, il-pula massima annwali ta’ titolizzazzjonijiet ekoloġiċi, jekk wieħed jassumi li huma appoġġati bis-sħiħ minn assi allinjati mat-tassonomija, hija ta’ EUR 15,6-il biljun.

(32)

Ir-Regolament UE 2019/2088 tal-Parlament Ewropew u tal-Kunsill dwar divulgazzjonijiet relatati mas-sostenibbiltà fis-settur tas-servizzi finanzjarji.

(33)

L-Artikolu 22(6) tar-Regolament dwar it-Titolizzazzjoni.

(34)

Ir-Regolament Delegat tal-Kummissjoni (UE) 2020/1224 tas-16 ta’ Ottubru 2019 li jissupplimenta r-Regolament (UE) 2017/2402 tal-Parlament Ewropew u tal-Kunsill fir-rigward tal-istandards tekniċi regolatorji li jispeċifikaw l-informazzjoni u d-dettalji ta’ titolizzazzjoni li għandhom jitqiegħdu għad-dispożizzjoni mill-oriġinatur, mill-isponsor u mill-SSPE, ĠU L 289, 3.9.2020, p. 1–216.

(35)

AIFM taħt il-limitu jfisser AIFM żgħir li jibbenefika minn eżenzjoni de minimis u li għalhekk huwa meħtieġ biss li jikkonforma mad-Direttiva dwar l-AIFM (u l-liġi ta’ implimentazzjoni tal-Istat Membru speċifiku tiegħu) fir-rigward tal-obbligi ta’ reġistrazzjoni u rapportar, iżda ma jibbenefikax mill-passaport tal-kummerċjalizzazzjoni.

(36)

Ir-Rapport dwar l-armonizzazzjoni tal-prattiki u l-proċessi tal-SRT għall-finijiet tal-Att Delegat imsemmi fl-Artikoli 244(6) u 245(6) tas-CRR https://www.eba.europa.eu/eba-calls-european-commission-harmonize-significant-risk-transfer-assessment-securitisation