1. Introduzzjoni

Fil-kuntest tal-ħruġ tar-Renju Unit mill-Unjoni, matul il-Kunsill Affarijiet Ġenerali fl-20 ta’ Novembru 2017 is-27 Stat Membru l-ieħor għażlu lil Pariġi, Franza, bħala s-sede l-ġdida tal-Awtorità Bankarja Ewropea (EBA - European Banking Authority) 1 .

Il-post tas-sede tal-EBA huwa stabbilit fl-Artikolu 7 tar-Regolament ta’ twaqqif tal-EBA 2 (“ir-Regolament EBA”), li għalhekk kellu jiġi emendat 3 biex is-sede tiġi rilokata minn Londra għal Pariġi. Minbarra li mmodifikat il-post tas-sede, l-emenda għar-Regolament EBA introduċiet ċerti rekwiżiti ġodda rigward il-post tas-sede kif ukoll obbligu għall-Kummissjoni li tippubblika rapport sat-30 ta’ Marzu 2019 u kull 12-il xahar wara dan dwar il-konformità tal-EBA ma’ dawn ir-rekwiżiti.

Skont l-Artikolu 7 tar-Regolament EBA: “Il-post tas-sede tal-Awtorità ma għandux jaffettwa l-eżekuzzjoni tal-kompiti u tas-setgħat tal-Awtorità, l-organizzazzjoni tal-istruttura ta’ governanza tagħha, l-operat tal-organizzazzjoni prinċipali tagħha, jew il-finanzjament prinċipali tal-attivitajiet tagħha, filwaqt li jippermetti, fejn ikun applikabbli, l-kondiviżjoni ma’ aġenziji tal-Unjoni ta’ servizzi ta’ appoġġ amministrattiv u ta’ ġestjoni tal-faċilitajiet li ma jkunux relatati mal-attivitajiet ewlenin tal-Awtorità”.

L-EBA pprovdiet il-kontribut meħtieġ biex tissodisfa dawn ir-rekwiżiti ta’ rapportar. L-ewwel tliet rapporti ġew ippubblikati fl-2019 4 , fl-2020 5 u fl-2021 6 . Dan hu r-raba’ rapport skont dan l-obbligu ta’ rappurtar.

2. Ftehim dwar il-Kwartieri Ġenerali tal-EBA

Fis-6 ta’ Marzu 2019 ġie ffirmat Ftehim dwar il-Kwartieri Ġenerali (minn hawn ’il quddiem, HQA - Headquarters Agreement) mal-Gvern Franċiż f’Pariġi. F’konformità mal-Artikolu 25 tal-HQA, l-EBA lestiet il-proċeduri interni għad-dħul fis-seħħ tiegħu fl-4 ta’ Marzu 2019, u f’Ġunju 2021 ikkonfermat lill-Ministeru tal-Affarijiet Barranin Franċiż li dawn kienu tlestew. L-EBA qed tistenna konferma tat-tlestija tal-proċeduri meħtieġa mil-liġi Franċiża biex l-HQA jidħol fis-seħħ. l-Assemblée nationale adottat l-HQA fis-17 ta’ Frar 2022 u qed tistenna l-approvazzjoni tagħha fis-Sénat segwita minn pubblikazzjoni fil-Ġurnal Uffiċjali.

Minbarra li jirrifletti r-rekwiżiti tal-Protokoll Nru 7 dwar il-privileġġi u l-immunitajiet tal-Unjoni Ewropea 7 , l-HQA jintitola lill-membri tal-persunal tal-EBA għal permess ta’ residenza speċjali FI (Fonctionnaire International), li jattesta l-istatus tagħhom bħala impjegati internazzjonali taċ-ċivil fi Franza (applikabbli wkoll għall-membri tal-familja). L-EBA tinsab f’kuntatt mal-Uffiċċju tal-Protokoll tal-Ministeru Franċiż tal-Ewropa u l-Affarijiet Barranin u kif ukoll mal-awtoritajiet doganali Franċiżi biex tiggarantixxi proċess bla xkiel fir-rigward tal-wasla tal-persunal u l-familji tagħhom fi Franza, il-provvediment ta’ permessi ta’ residenza speċjali, u l-applikazzjoni tal-privileġġi fiskali għall-EBA. Minn April 2022, 223 membru tal-persunal u tal-familja rċevew permessi ta’ residenza speċjali, qed tiġi pproċessata applikazzjoni addizzjonali waħda u ġew irritornati 24 permess ta’ residenza speċjali minħabba t-tmiem tal-impjieg.

L-Artikolu 9 tal-HQA jeżenta lill-EBA mill-VAT imġarrba fuq spejjeż uffiċjali meta l-ammont tal-fattura mingħajr il-VAT ikun ta’ aktar minn EUR 150. Fil-prattika, l-EBA qed tħallas il-VAT fuq l-akkwisti Franċiżi, u fuq l-akkwisti fejn tapplika l-iskema “VAT Mini One Stop Shop” 8 , u qed tirkupra din il-VAT mill-gvern Franċiż. Sa April 2022, l-EBA kienet talbet rimborż ta’ EUR 2,522,883, li kollha ġew rimborżati.

Skont l-Artikolu 19 tal-HQA, il-Gvern Franċiż fetaħ l-Iskola Ewropea ta’ Pariġi-La Défense f’Courbevoie f’Settembru 2019. L-iskola toffri kurrikulu komprensiv mill-kindergarten sal-Bakkalawrjat Ewropew lit-tfal tal-persunal tal-korpi tal-UE stabbiliti fir-Reġjun ta’ Pariġi, kif ukoll lil studenti bi sfond internazzjonali. Il-Bord tal-Gvernaturi tal-Iskejjel Ewropej ta l-akkreditazzjoni unanima għas-snin skolastiċi kollha. Dan jipprovdi aċċess għall-Bakkalawrjat Ewropew; l-ewwel gradwazzjoni tal-Bakkalawrjat se ssir f’Ġunju 2022. It-taqsima tal-lingwa Ingliża tinkludi ċ-ċiklu kollu mill-klassi preprimarja sal-aħħar sena tal-iskola sekondarja. It-Taqsima tal-lingwa Franċiża tipprovdi ċiklu preprimarju u primarju sħiħ, u l-ewwel sena taċ-ċiklu sekondarju se tiftaħ f’Settembru 2022. Għas-sena skolastika 2021-2022, 25 tifel u tifla tal-membri tal-persunal tal-EBA ġew irreġistrati fl-iskola.

3. Governanza, Operazzjonijiet u Eżekuzzjoni tal-Kompiti tal-EBA

Il-kompiti u s-setgħat tal-EBA, l-organizzazzjoni tal-istruttura ta’ governanza tagħha, l-operat tal-organizzazzjoni prinċipali tagħha, u l-finanzjament prinċipali tagħha ma kinux affettwati mir-rilokazzjoni tas-sede tagħha. L-EBA ilha kompletament operattiva fl-uffiċċji l-ġodda tagħha f’Pariġi mill-bidu ta’ Ġunju 2019.

Ir-rilokazzjoni tas-sede tal-EBA lejn Pariġi ma kellha l-ebda impatt fuq il-finanzjament ewlieni tal-attivitajiet tagħha mill-UE u mill-awtoritajiet nazzjonali kompetenti. B’mod separat għal dan il-finanzjament, il-gvern Franċiż qed jipprovdi EUR 8,5 miljun biex ikopri l-ispejjeż tal-uffiċċji ta’ Pariġi. Dan il-finanzjament huwa maqsum bejn EUR 1,5 miljun għall-ispejjeż ta’ installazzjoni, li diġà waslu u ntefqu, u EUR 7,0 miljun għall-ispejjeż ta’ lokazzjoni li tinsab għaddejja li għandhom jaslu matul id-disa’ snin tal-lokazzjoni sabiex jittaffa l-impatt baġitarju. Sal-lum, l-EBA ffatturat u rċeviet EUR 5,650,000 skont dan il-ftehim.

Kondiviżjoni ta’ servizzi ta’ appoġġ amministrattiv ma’ aġenziji oħra tal-Unjoni

L-EBA tikkoopera b’mod attiv mal-ESMA dwar kwistjonijiet amministrattivi, b’laqgħat regolari li jsiru bejn l-unitajiet amministrattivi ekwivalenti taż-żewġ aġenziji.

L-EBA ffirmat Ftehim dwar il-Livell ta’ Servizz mal-ESMA għall-forniment ta’ servizzi kontabilistiċi, u l-EBA ilha minn Lulju 2021 tipprovdi dawn is-servizzi lill-ESMA. Iż-żewġ aġenziji jaqsmu s-servizzi tal-Uffiċjal tal-Kontabilità u tal-Assistent tal-Kontabilità tal-EBA biex b’hekk qed isir użu aktar effiċjenti tar-riżorsi. Il-Bord tat-Tmexxija tal-ESMA ħatar lill-Uffiċjal tal-Kontabilità tal-EBA bħala l-Uffiċjal tal-Kontabilità tal-ESMA b’effett mill-1 ta’ Lulju 2021.

L-EBA taħdem mill-qrib ma’ aġenziji oħra tal-UE bbażati fi Franza fir-rigward tal-proċeduri ta’ akkwist tagħhom, speċjalment mal-ESMA. It-tabella ta’ hawn taħt tiġbor l-attività f’dan il-qasam fil-qosor.

Aġenzija ewlenija	Aġenziji parteċipanti	Proċedura	Stat
EBA	ESMA + 9 aġenzija oħra	Konsulenza dwar il-protezzjoni tad-data	Kuntratt qafas iffirmat fl-2021
EBA	ESMA, EUISS 9 EUSPA 10	Servizzi mediċi	Kuntratt qafas iffirmat fl-2021
EBA	ESMA, EIOPA	Servizzi ta’ netwerk amministrati	Firma ppjanata f’Ġunju 2022
EBA	ESMA	Servizzi ta’ konsulenza u akkoljenza dwar il-ġestjoni tal-faċilitajiet	Firma ppjanata fl-2023
EBA	ESMA	Servizzi tat-tindif	Firma ppjanata fl-2023
EBA	ESMA	Servizzi ta’ catering	Firma ppjanata fl-2023
EBA	ESMA	Awditu estern tal-kontijiet annwali	Firma ppjanata f’Settembru 2022
ESMA	EBA, EIOPA	Żvilupp, manutenzjoni u appoġġ tal-applikazzjoni	Firma ppjanata fir-4a’ trimestru tal-2022
ESMA	EBA, EIOPA	Konsulenza tal-ICT	Iffirmat f’April 2022
ESMA	EBA, EIOPA	Taħriġ fl-iżvilupp tal-ħiliet professjonali	Firma ppjanata fir-3et trimestru tal-2022

L-EBA u l-ESMA jipparteċipaw ukoll f’network ta’ uffiċjali tal-akkwist ta’ organizzazzjonijiet internazzjonali bbażati f’Pariġi.