Pubblikazzjoni ta’ applikazzjoni għal emenda tal-Ispeċifikazzjoni tal-Prodott ta’ isem fis-settur tal-inbid kif imsemmi fl-Artikolu 105 tar-Regolament (UE) Nru 1308/2013 tal-Parlament Ewropew u tal-Kunsill

(2021/C 393/14)

Din il-pubblikazzjoni tikkonferixxi d-dritt ta’ oppożizzjoni għall-applikazzjoni skont l-Artikolu 98 tar-Regolament (UE) Nru 1308/2013 tal-Parlament Ewropew u tal-Kunsill (1) fi żmien xahrejn mid-data ta’ din il-pubblikazzjoni.

APPLIKAZZJONI GĦAL EMENDA GĦALL-ISPEĊIFIKAZZJONI TAL-PRODOTT

Επανομή (Epanomi)

PGI-GR-A0858-AM01

Data tal-applikazzjoni: 30-07-2015

1. Regoli applikabbli għall-emenda

L-Artikolu 105 tar-Regolament (UE) Nru 1308/2013 – Emenda mhux minuri

2. Deskrizzjoni u raġunijiet għall-emenda

2.1. Żieda tal-kategorija tal-prodott tal-inbid “inbid abjad minn għeneb misjur iżżejjed” tal-varjetà Malagousia

L-emenda tal-fajl tekniku PGI-GR-A0858 Epanomi, l-Ispeċifikazzjoni tal-Prodott u d-Dokument Uniku, tikkonċerna ż-żieda tal-kategorija tal-prodott tal-inbid “inbid abjad minn għeneb misjur iżżejjed” li se jiġi prodott minn għeneb tal-varjetà Malagousia.

L-inbid abjad minn għeneb misjur iżżejjed ilu jiġi prodott mill-varjetà indiġena Malagousia mill-bidu tas-sena 2000. Din hija waħda mill-aħjar varjetajiet fit-territorju Grieg. Il-varjetà toriġina mir-reġjun muntanjuż ta’ Nafpaktia. Ilha kkultivata fir-reġjun Epanomi għal aktar minn 35 sena b’riżultati u karatteristiċi organolettiċi eċċellenti.

L-armonija bejn Malagousia u t-terroir tal-pajjiż hija ideali, billi l-elementi kollha relatati mal-vitikultura huma favorevoli. Il-kundizzjonijiet klimatiċi, flimkien mad-diversità tal-ħamrija tar-reġjun, il-varjetà tal-għeneb imkabbra, il-ħsieb fil-kultivazzjoni tad-dwieli u t-tekniki tal-vinifikazzjoni jagħtu lill-inbid abjad minn għeneb misjur iżżejjed il-karatteristiċi partikolari tiegħu.

L-inbid abjad minn għeneb misjur iżżejjed rebaħ medalji f’kompetizzjonijiet internazzjonali.

Din l-emenda tikkonċerna l-partijiet “Deskrizzjoni tal-inbid/inbejjed”, “Prattiki tal-produzzjoni tal-inbid”, “Rendimenti massimi għal kull ettaru”, “Varjetà jew varjetajiet tad-dwieli li minnhom jinkiseb l-inbid/jinkisbu l-inbejjed” u “Deskrizzjoni tar-rabta/rabtiet” fid-Dokument Uniku u fl-Ispeċifikazzjoni tal-Prodott.

2.2. Aġġornament tal-fajl tekniku tal-IĠP Epanomi

Minbarra l-bidliet mitluba u bħala parti mill-aġġornament tal-fajls tekniċi, l-Ispeċifikazzjonijiet tal-Prodott ġew emendati kif ġej: a) iż-żieda ta’ dispożizzjonijiet nazzjonali dwar ir-rekwiżiti u l-kontrolli għall-inbejjed tad-DOP u tal-IĠP u t-tħassir tar-revoki; u b) emenda tad-data dwar l-awtoritajiet ta’ kontroll kompetenti, b’mod partikolari l-isem tal-Ministeru u d-Direttorat u ż-żieda tad-Direttorat Ġenerali, kif ukoll korrezzjoni tal-ismijiet taċ-Ċentri Reġjonali għall-Protezzjoni tal-Pjanti u l-Kontroll tal-Kwalità

Din l-emenda ma taffettwax id-Dokument Uniku.

DOKUMENT UNIKU

1. Isem/ismijiet għar-reġistrazzjoni

Επανομή (Epanomi)

2. Tip ta’ indikazzjoni ġeografika

IĠP – Indikazzjoni Ġeografika Protetta

3. Kategoriji tal-prodotti tad-dwieli

Inbid

16.	Inbid minn għeneb misjur izżejjed

4. Deskrizzjoni tal-inbid/inbejjed

Inbid aħmar xott

—	Qawwa alkoħolika totali minima: 12,0 % tal-volum.

—	Qawwa alkoħolika naturali minima: 11,5 % tal-volum.

—	Kontenut ta’ zokkor totali (g/l): massimu ta’ 9,0*

Aċidità totali, espressa bħala aċidu tartariku (g/l): massimu ta’ 7,0

Kulur vjola skur luminuż b’riflessi ħomor lewn il-briks wara t-tqaddim fit-tul tal-inbid. Aromi ta’ frott misjur frisk, ħwawar, żbib u kawkaw. Palat sħiħ b’togħma bbilanċjata u tannini rotob sostnuti mill-frott u finitura aromatika qawwija.

*	Meta l-kontenut taz-zokkor ikun ogħla minn 4 g/l, għandhom japplikaw ir-rekwiżiti ta’ Parti B tal-Anness III tar-Regolament (UE) 2019/33 tal-Kummissjoni.

Fir-rigward tal-parametri li għalihom ma huwa indikat l-ebda valur preċiż, għandhom japplikaw il-limiti previsti fir-regolamenti tal-UE.

Karatteristiċi analitiċi
Qawwa alkoħolika totali massima (f’% tal-volum)
Qawwa alkoħolika proprja minima (f’% tal-volum)	12
Aċidità totali minima	3,5 g/l, espressi bħala aċidu tartariku
Aċidità volatili massima (f’milliekwivalenti għal kull litru)	20
Total massimu ta’ diossidu tal-kubrit (f’milligrammi għal kull litru)	150

Inbid abjad xott

—	Qawwa alkoħolika totali minima: 11,0 % tal-volum.

—	Qawwa alkoħolika naturali minima: 10,5 % tal-volum.

—	Kontenut ta’ zokkor totali (g/l): massimu ta’ 9,0*

—	Aċidità totali, espressa bħala aċidu tartariku (g/l): massimu ta’ 7,5

Kulur ċar bjond qawwi b’riflessi ħodor jew kulur isfar dehbi qawwi wara t-tqaddim tal-inbid għal ċertu perjodu ta’ żmien. Aromi ta’ frott eżotiku sajfi, ġiżimin, ċitru, vanilla, għasel u noti tat-tabakk. Fuq il-palat hija kumplessa u rikka b’togħma bbilanċjata b’mod armonjuż, aċidità friska u aroma qawwija u finitura dejjiema.

*	Meta l-kontenut taz-zokkor ikun ogħla minn 4 g/l, għandhom japplikaw ir-rekwiżiti ta’ Parti B tal-Anness III tar-Regolament (UE) 2019/33 tal-Kummissjoni.

Fir-rigward tal-parametri li għalihom ma huwa indikat l-ebda valur preċiż, għandhom japplikaw il-limiti previsti fir-regolamenti tal-UE.

Karatteristiċi analitiċi
Qawwa alkoħolika totali massima (f’% tal-volum)
Qawwa alkoħolika proprja minima (f’% tal-volum)	11
Aċidità totali minima	3,5 g/l, espressi bħala aċidu tartariku
Aċidità volatili massima (f’milliekwivalenti għal kull litru)	18
Total massimu ta’ diossidu tal-kubrit (f’milligrammi għal kull litru)	200

Inbid abjad minn għeneb misjur iżżejjed

—	Qawwa alkoħolika totali minima: 15 % tal-volum.

—	Kontenut ta’ zokkor naturali (g/l): minimu ta’ 250 g/l

—	Aċidità totali, espressa bħala aċidu tartariku (g/l): massimu ta’ 6,5

—	Total ta’ diossidu tal-kubrit tal-inbejjed (mg/l): massimu ta’ 300**

Dan l-inbid, magħmul esklużivament mill-varjetà tad-dwieli Malagousia, għandu kulur dehbi skur minħabba perjodu twil ta’ tqaddim tiegħu fil-btieti tal-ballut. Aromi kumplessi ta’ frott misjur bil-polpa bajda bħal ħawħ, lanġas, sfarġel, mango u għasel. Fluwidità pronunzjata fuq il-palat flimkien ma’ aċidità tajba u bażi ratba.

**	f’konformità mad-deroga msemmija fil-punt 2(c) tal-Parti B tal-Anness I tar-Regolament tal-Kummissjoni (UE) 2019/934

Fir-rigward tal-parametri li għalihom ma huwa indikat l-ebda valur preċiż, għandhom japplikaw il-limiti previsti fir-regolamenti tal-UE.

Karatteristiċi analitiċi
Qawwa alkoħolika totali massima (f’% tal-volum)
Qawwa alkoħolika proprja minima (f’% tal-volum)	15
Aċidità totali minima	3,5 g/l, espressi bħala aċidu tartariku
Aċidità volatili massima (f’milliekwivalenti għal kull litru)	20
Total massimu ta’ diossidu tal-kubrit (f’milligrammi għal kull litru)	300

5. Prattiki tal-produzzjoni tal-inbid

5.1. Prattiki enoloġiċi speċifiċi użati biex isir l-inbid jew biex isiru l-inbejjed, u r-restrizzjonijiet rilevanti fuq il-produzzjoni tagħhom

Ġestjoni tad-dwieli

Prattika tal-kultivazzjoni

Id-dwieli huma ġestiti skont it-tekniki ta’ kultivazzjoni li normalment jintużaw fir-reġjun.

Vinifikazzjoni tal-inbejjed bojod

Restrizzjonijiet rilevanti fuq il-produzzjoni tal-inbid

Vinifikazzjoni tal-inbejjed bojod:

Inbid abjad tal-IĠP Epanomi

L-inbejjed bojod huma magħmula bl-użu ta’ tekniki ta’ produzzjoni moderni; it-temperatura matul il-fermentazzjoni alkoħolika ma taqbiżx l-20 °C.

Vinifikazzjoni tal-inbejjed ħomor

Restrizzjonijiet rilevanti fuq il-produzzjoni tal-inbid

Vinifikazzjoni tal-inbejjed ħomor:

L-inbid aħmar tal-IĠP Epanomi huwa magħmul skont il-metodu klassiku tal-vinifikazzjoni tal-inbid aħmar.

Vinifikazzjoni tal-inbejjed bojod minn għeneb misjur iżżejjed

Restrizzjonijiet rilevanti fuq il-produzzjoni tal-inbid

Inbid abjad minn għeneb misjur iżżejjed tal-IĠP Epanomi

L-għeneb jitħalla fuq id-dielja biex isir iżżejjed, fis-snin meta l-kundizzjonijiet klimatiċi jippermettu dan biss.

L-inbejjed bojod huma magħmula bl-użu ta’ tekniki ta’ produzzjoni moderni; it-temperatura matul il-fermentazzjoni alkoħolika ma taqbiżx l-20 °C.

5.2. Rendimenti massimi għal kull ettaru

Rendiment massimu f’ettolitri ta’ prodott lest għal kull ettaru - inbid aħmar

88 ettolitru għal kull ettaru

Rendiment massimu f’ettolitri ta’ prodott lest għal kull ettaru - inbid abjad

82,5 ettolitru għal kull ettaru

Rendiment massimu f’ettolitri ta’ prodott lest għal kull ettaru - inbid abjad minn għeneb misjur iżżejjed

40 ettolitru għal kull ettaru

Rendiment massimu f’kilogrammi ta’ għeneb għal kull ettaru - inbid aħmar

11 000 kilogramma ta’ għeneb għal kull ettaru

Rendiment massimu f’kilogrammi ta’ għeneb għal kull ettaru - inbid abjad

11 000 kilogramma ta’ għeneb għal kull ettaru

Rendiment massimu f’kilogrammi ta’ għeneb għal kull ettaru - inbid abjad minn għeneb misjur iżżejjed

8 000 kilogramma ta’ għeneb għal kull ettaru

6. Żona ġeografika demarkata

Iż-żona ta’ produzzjoni demarkata tal-inbejjed tal-IĠP Epanomi tinkludi r-reġjun li fin-Nofsinhar ta’ Tessaloniki, fil-muniċipalità ta’ Epanomi tad-demos ta’ Thermaïkos.

7. Varjetà jew varjetajiet tad-dwieli li minnhom jinkiseb l-inbid/jinkisbu l-inbejjed

Limnio N

Αssyrtiko Β

Malagousia B

Chardonnay B

Sauvignon Blanc B

Viognier B

Xinomavro N - Xinogaltso, Popolka

Cabernet sauvignon N

Mourvedre N

Grenache rouge N

Merlot N

Syrah N

8. Deskrizzjoni tar-rabta/rabtiet

8.1 Informazzjoni dwar iż-żona ġeografika - Inbejjed u nbejjed minn għeneb misjur izżejjed

Ir-rabta storika, kulturali, soċjali u ekonomika, kif ukoll l-ambjent u l-oriġini ġeografiċi, huma validi għall-kategoriji “inbid” u “inbid minn għeneb misjur iżżejjed”.

A. Rabta storika

Ir-reġjun ta’ Epanomi kien jappartjeni għar-reġjun ta’ “Kalamaria”, isem li jfisser “in-naħa t-tajba” u li ngħata lilu minn vjaġġaturi Franċiżi minħabba l-kwalità tajba tal-prodotti agrikoli tar-reġjun. Hemm evidenza tal-vinifikazzjoni li tmur lura 1 500 sena u r-reġjun kien imsemmi għall-vinji tiegħu matul il-perjodu Biżantin. L-ewwel referenza għall-agglomerazzjoni bl-isem ta’ Panomi (1302) hija marbuta mal-eżistenza ta’ dwieli fir-reġjun. Jidher li l-vitikultura kompliet issir sa tmiem l-okkupazzjoni Ottomana. Fiċ-ċensiment tal-1875, kienu rreġistrati 325 vinja, u f’dak tal-1907 kien hemm 586. Fl-1907, kien hemm 27 mitħna tal-għeneb bħala binjiet indipendenti u 22 fi djar fir-raħal. Hemm ukoll rekords ta’ ħlasijiet ta’ taxxi lill-awtoritajiet lokali Torok rigward il-kultivazzjoni tal-vinji u l-produzzjoni tal-inbejjed tal-pajjiż.

B. Rabta kulturali, soċjali u ekonomika

Sa mill-qedem, id-dwieli u l-inbid kienu marbuta b’mod inseparabbli mal-ħajja kulturali, soċjali u ekonomika tal-abitanti tar-reġjun.

Din ir-rabta għadha teżisti sal-lum, bl-organizzazzjoni ta’ avvenimenti u konferenzi li għandhom l-għan li jippromwovu l-inbid, iżda wkoll it-tradizzjoni kulturali tar-reġjun, bħar-“rotot tal-inbid” ta’ Epanomi.

C. Ambjent ġeografiku u oriġini ġeografika

Ir-reġjun tal-vitikultura ta’ Epanomi jinsab fin-Nofsinhar ta’ Tessaloniki, fil-muniċipalità ta’ Thermaïkos. Il-klima hija tat-tip Mediterranju. It-temperatura medja annwali hija ta’ 16 °C u x-xita medja annwali hija ta’ madwar 550 mm. Tista’ tiġi osservata ħafna nida matul is-sigħat bikrin ta’ filgħodu, li tiffavorixxi tnaqqis fit-transpirazzjoni, u ġeneralment din tkun segwita minn riħ niexef mit-Tramuntana li jneħħi l-umdità żejda mill-veġetazzjoni. Il-ħamrija hija ramlija-taflija u tal-lom tafli. Il-kontenut ta’ karbonat tal-kalċju jikkontribwixxi għall-konsistenza tajba u l-iskular tal-ħamrija, filwaqt li l-kontenut relattivament għoli ta’ tafal jirriżulta f’akkumulazzjoni sinifikanti ta’ nutrijenti. Il-kontenut ta’ materja organika huwa medju, u jikkontribwixxi għall-konsistenza tajba u l-iskular tal-ħamrija. Il-ħamrija għandha inklinazzjoni żgħira sa medja, li tikkontribwixxi għal skular aħjar u tillimita jew telimina r-riskju ta’ mard, bħall-immuffar. L-effett tal-baħar flimkien mal-inklinazzjoni u l-orjentazzjoni tal-ħamrija inaqqas b’mod sinifikanti r-riskju ta’ ġlata.

8.2 Informazzjoni dwar il-prodott għall-kategorija “inbid”

L-inbejjed bojod tal-IĠP Epanomi għandhom kulur ċar bjond qawwi b’riflessi ħodor u tal-fidda jew isfar dehbi qawwi wara t-tqaddim tal-inbid fi btieti tal-ballut għal ċertu perjodu ta’ żmien. L-aromi jvarjaw skont it-tip, il-varjetà u t-tqaddim. Ikkaratterizzati minn aċidità friska, l-inbejjed huma kumplessi u rikki fuq il-palat, minħabba l-kundizzjonijiet ideali tal-maturazzjoni tal-varjetajiet.

L-inbejjed ħomor tal-IĠP Epanomi għandhom kulur aħmar qawwi b’riflessi blu u aromi ta’ frott aħmar, ħwawar, kawkaw u żbib. Għandhom palat rikk, togħma bbilanċjata u tannini rotob, minħabba l-kundizzjonijiet klimatiċi ideali li jiddominaw fir-reġjun u li jiddeterminaw maturità teknoloġika u fenolika tajba.

8.3 Informazzjoni dwar il-prodott għall-kategorija “inbid minn għeneb misjur izżejjed”

L-inbid minn għeneb misjur iżżejjed ilu jiġi prodott mill-varjetà indiġena Malagousia mill-bidu tas-sena 2000. Din il-varjetà ilha tiġi kkultivata fir-reġjun għal aktar minn 35 sena b’riżultati eċċellenti. L-armonija tagħha mat-terroir tal-pajjiż hija ideali, billi l-elementi kollha relatati mal-vitikultura huma favorevoli.

L-għeneb jitħalla fuq id-dwieli biex isir iżżejjed, fis-snin meta l-kundizzjonijiet klimatiċi jippermettu dan biss. Il-kulur dehbi skur huwa dovut għat-tqaddim fi btieti tal-ballut għal perjodu ta’ żmien twil, filwaqt li l-inbid huwa kkaratterizzat minn aromi ta’ frott abjad misjur u għasel. L-inbid għandu togħma mirquma fuq il-palat li hija bbilanċjat b’mod ideali bl-aċidità tajba li tiddistingwih.

L-inbejjed bojod minn għeneb misjur iżżejjed rebħu premji f’kompetizzjonijiet internazzjonali bħal: Decanter World Wine Awards, International Wine Challenge, International Wine & Spirits Competition.

8.4 Interazzjoni kawżali għall-kategorija “inbid”

Kif iddettaljat fit-taqsimiet preċedenti, il-karattru uniku tal-inbejjed tal-IĠP Epanomi huwa dovut għall-interazzjoni bejn il-karatteristiċi partikolari tar-reġjun (il-ħamrija, il-klima, l-influwenza tal-irjieħ matul is-sajf), il-varjetajiet ta’ dwieli kkultivati u t-tekniki ta’ kultivazzjoni użati.

Il-klima ta’ Epanomi hija ideali għall-varjetajiet ikkultivati fir-reġjun peress li l-għeneb jilħaq il-maturità teknoloġika u fenolika mixtieqa qabel il-perjodu ta’ xita qawwija fil-ħarifa, li taffettwa l-kwalità tal-għeneb.

Il-kundizzjonijiet kserotermiċi li jiddominaw fir-reġjun, flimkien mat-tip ta’ ħamrija, jirriżultaw fil-maturazzjoni tal-għeneb bejn nofs Awwissu u nofs Settembru, skont il-varjetà. Għalhekk, it-taħlita tal-varjetajiet ikkultivati u l-indiċi kserotermiku għoli tar-reġjun jirriżultaw f’differenza fit-tip u l-karatteristiċi organolettiċi tal-inbejjed prodotti, li tirrifletti direttament il-klima.

Il-varjetajiet bojod huma kkultivati fil-partijiet l-aktar baxxi tal-vinja biex jiġi evitat l-istress idriku li jnaqqas l-aċidità tal-inbejjed. L-unika eċċezzjoni hija l-varjetà Malagousia, li tiġi kkultivata fil-partijiet tan-nofs u għoljin minħabba li hija sensittiva għall-umdità żejda. Il-maturazzjoni tal-għeneb tibda madwar nofs Awwissu għall-varjetajiet Chardonnay, Sauvignon Blanc u Viognier, filwaqt li l-varjetajiet Assyrtiko u Malagousia jimmaturaw fl-aħħar ta’ Awwissu.

Aktar speċifikament, il-varjetà Assyrtiko akklimatizzat perfettament għall-ambjent lokali u tipproduċi nbejjed b’aċidità għolja, qawwa alkoħolika għolja u aromi ta’ frott aħdar misjur, noti ta’ fjuri u mineralità żgħira fil-ħalq.

Il-varjetà Malagousia ssir mingħajr diffikultà u tipproduċi nbejjed b’qawwa alkoħolika partikolarment għolja, aċidità tajba (minħabba r-riħ kiesaħ li jonfoħ mit-Tramuntana) u aromi ta’ frott tropikali, ċitru u ġiżimin.

Il-varjetajiet Chardonnay, Viognier u Sauvignon Blanc, minħabba l-kundizzjonijiet termali tal-maturazzjoni, għandhom karattru aromatiku tropikali, li huwa kkombinat ma’ volum qawwi fuq il-palat, aċidità tajba u kapaċità tajba ta’ tqaddim.

Il-varjetajiet ħomor huma kkultivati fil-partijiet l-aktar għoljin tal-vinja, fejn il-ħamrija żżomm ammonti iżgħar ta’ ilma, sabiex jinkisbu l-istress idriku mixtieq u l-aħjar maturità fenolika u teknoloġika. L-inbejjed prodotti fuq ħamrija ramlija għandhom aromi delikati, filwaqt li l-inbejjed prodotti fuq ħamrija b’ammont kbir ta’ tafal għandhom karattru fenoliku qawwi. Il-maturazzjoni tal-għeneb tibda lejn l-aħħar ta’ Awwissu għall-varjetajiet ħomor Merlot, Grenache rouge, segwiti mill-varjetajiet Syrah, Cabernet Sauvignon u Mourvedre, u titlesta fl-ewwel nofs ta’ Settembru bil-varjetajiet Limnio u Xinomavro.

B’mod partikolari, il-varjetajiet Merlot u Grenache rouge jipproduċu nbejjed b’kontenut għoli ta’ alkoħol, ħlewwa fuq il-palat u aromi ta’ frott misjur. Il-varjetajiet Syrah, Cabernet Sauvignon u Mourvedre jipproduċu nbejjed strutturati tajjeb u b’kulur qawwi b’kapaċità kbira ta’ tqaddim. Il-varjetà Limnio tipproduċi nbejjed b’kulur qawwi, aromi speċjali ta’ frott aħmar u volum rikk, filwaqt li l-varjetà Xinomavro tipproduċi nbejjed b’intensità kromatika tajba, minħabba l-maturazzjoni ideali tal-varjetà fir-reġjun, qawwa alkoħolika tajba u karatteristiċi ta’ frott aħmar.

8.5 Interazzjoni kawżali għall-kategorija “inbid minn għeneb misjur izżejjed”

Il-varjetà Malagousia hija varjetà polidinamika, li, skont il-kultivazzjoni u l-metodu ta’ vinifikazzjoni, tista’ tipproduċi nbejjed sempliċi b’aromi ta’ muskatell u lumi, iżda wkoll inbejjed ta’ palat aktar kumpless, b’aromi ta’ frott taċ-ċitru (tronġ, lumi), frott misjur, ħwawar u bżar abjad. Il-pożizzjoni, l-espożizzjoni, l-elevazzjoni, u l-kompożizzjoni mekkanika u kimika tal-vinja għandhom rwol importanti.

Il-varjetà Malagousia għandha ta’ adattament tajba, iżda hija sensittiva għall-umdità. Għalhekk tiġi mħawla fl-ogħla livelli taż-żona fejn l-umdità hija aktar baxxa, jiġifieri fil-postijiet li jiffavorixxu l-maturazzjoni tal-għeneb. Hija tipproduċi nbejjed kumplessi b’aromi qawwija ta’ frott taċ-ċitru u tropikali, iżda wkoll b’aċidità tajba, minħabba l-irjieħ mit-Tramuntana, li jneħħu l-umdità mill-veġetazzjoni, u ż-żiffiet mill-baħar, li jnaqqsu t-temperatura tal-għeneb matul ix-xhur tas-sajf.

Il-ħamrija hija essenzjalment ramlija, b’livelli baxxi ta’ nutrijenti u b’inklinazzjoni, li tippermetti skular malajr u faċli, u toħloq kundizzjonijiet favorevoli ħafna għall-varjetà, b’mod partikolari matul il-perjodu ta’ maturazzjoni. Kieku ma kienx il-każ, l-assorbiment ta’ volum kbir ta’ ilma jwassal biex tinqasam il-qoxra rqiqa tal-Malagousia u jiżviluppa l-botrytis.

Fl-istess ħin, l-għażla ta’ pjanti ta’ età akbar (30 sena u aktar), flimkien mal-ħamrija fqira tar-reġjun, twassal għal produttività baxxa u tiffavorixxi l-maturazzjoni eċċessiva tal-varjetà. Madankollu, jekk ikun hemm snin ta’ produzzjoni, isir ħsad bikri biex jippromwovi l-maturazzjoni tal-varjetà.

L-espożizzjoni diretta għax-xemx tnaqqas l-intensità tal-aromi terpeniċi tal-varjetà, li jagħtu l-karatteristiċi ta’ muskatell. Għal din ir-raġuni, it-tħawwil fiż-żona jrid ikun orjentat lejn il-Punent-Lvant biex tiġi żgurata maturazzjoni armonjuża u biex l-għeneb ikun protett minn espożizzjoni diretta għar-raġġi tax-xemx u b’hekk jiġi evitat il-ħruq. Fl-istess ħin, il-ġestjoni speċifika tal-erja tal-weraq (aktar minn 2 metri) tiggarantixxi aktar dell u protezzjoni aħjar tal-għeneb.

L-għażla tal-kloni hija vantaġġ ukoll. It-tħawwil bil-klonu dilwit tal-varjetà jiffaċilita ventilazzjoni aħjar tal-għeneb u jnaqqas ir-riskju ta’ botrytis.

Fl-aħħar nett, instab li l-varjetà hija adattata tajjeb ħafna għat-tibdil fil-klima. In-nuqqas ta’ xita fir-reġjun f’Awwissu u Settembru f’dawn l-aħħar snin jippermetti s-sajran aħjar tal-varjetà, kif ukoll jippromwovi l-produzzjoni ta’ nbid minn għeneb misjur iżżejjed kważi kull sena.

9. Rekwiżiti oħra applikabbli

Rekwiżiti speċifiċi tat-tikkettar

Qafas legali:

Il-leġiżlazzjoni nazzjonali

Tip ta’ rekwiżit addizzjonali:

Dispożizzjonijiet addizzjonali dwar it-tikkettar

Deskrizzjoni tal-indikazzjoni:

L-Artikolu 53(1), (2) u (6) u b’mod partikolari l-Anness V tar-Regolament Delegat tal-Kummissjoni (UE) 2019/33 tas-17 ta’ Ottubru 2018 li jissupplimenta r-Regolament (UE) Nru 1308/2013 tal-Parlament Ewropew u tal-Kunsill fir-rigward tal-applikazzjonijiet għall-protezzjoni ta’ denominazzjonijiet ta’ oriġini, indikazzjonijiet ġeografiċi u termini tradizzjonali fis-settur tal-inbid, il-proċedura ta’ oġġezzjoni, ir-restrizzjonijiet tal-użu, l-emendi għall-ispeċifikazzjonijiet tal-prodott, it-tħassir tal-protezzjoni, u t-tikkettar u l-preżentazzjoni

Fuq it-tikketta tal-inbejjed organiċi tal-IĠP Epanomi, l-indikazzjoni “organiku” jew “org.” flimkien mal-isem tal-prodott għandha tiġi kkompletata:

—	bin-numru tal-kodiċi tal-korp ta’ kontroll

—	bil-logo tal-UE

—	bl-indikazzjoni “Agriculture UE ou/et Agriculture Grèce”

Rekwiżiti speċifiċi tat-tikkettar

Qafas legali:

Il-leġiżlazzjoni nazzjonali

Tip ta’ rekwiżit addizzjonali:

Dispożizzjonijiet addizzjonali dwar it-tikkettar

Deskrizzjoni tal-indikazzjoni:

Indikazzjonijiet li jikkonċernaw ċerti metodi ta’ produzzjoni

Id-Digriet Ministerjali Nru 280557 tad-9 ta’ Ġunju 2005, “Definizzjoni tat-tul tal-maturazzjoni, it-tqaddim u r-rilaxx għall-konsum ta’ nbejjed b’denominazzjoni ta’ oriġini ta’ kwalità superjuri u nbejjed lokali, kif ukoll l-indikazzjonijiet li għandhom jintużaw fuq it-tikkettar tagħhom fir-rigward tal-mod jew il-metodu tal-produzzjoni” (JORH Nru 818, it-2ni volum, tal-15 ta’ Ġunju 2005) jistabbilixxi, fl-Artikoli 3 u 4 tiegħu, il-prerekwiżiti għall-użu tal-indikazzjonijiet li ġejjin:

—	“ΝΕΟΣ ΟΙΝΟΣ” jew “ΝΕΑΡΟΣ ΟΙΝΟΣ” (inbid ġdid)

—	“ΩΡΙΜΑΝΣΗ ΣΕ ΒΑΡΕΛΙ” jew “ΩΡΙΜΑΣΕ ΣΕ ΒΑΡΕΛΙ” (maturazzjoni f’bettija jew immaturat f’bettija)

—	“ΠΑΛΑΙΩΜΕΝΟΣ ΣΕ ΒΑΡΕΛΙ” jew “ΠΑΛΑΙΩΣΗ ΣΕ ΒΑΡΕΛΙ” (imqaddem f’bettija jew tqaddim f’bettija)

—	“ΟΙΝΟΠΟΙΗΘΗΚΕ ΚΑΙ ΩΡΙΜΑΣΕ ΣΕ ΒΑΡΕΛΙ” jew “ΟΙΝΟΠΟΙΗΣΗ ΚΑΙ ΩΡΙΜΑΝΣΗ ΣΕ ΒΑΡΕΛΙ” (iffermentat u mmaturat f’bettija jew fermentazzjoni u maturazzjoni f’bettija)

—	“ΟΙΝΟΠΟΙΗΣΗ ΣΕ ΒΑΡΕΛΙ” jew “ΟΙΝΟΠΟΙΗΘΗΚΕ ΣΕ ΒΑΡΕΛΙ” (fermentazzjoni f’bettija jew iffermentat f’bettija).

Rekwiżiti speċifiċi tat-tikkettar

Qafas legali:

Il-leġiżlazzjoni nazzjonali

Tip ta’ rekwiżit addizzjonali:

Dispożizzjonijiet addizzjonali dwar it-tikkettar

Deskrizzjoni tal-indikazzjoni:

Indikazzjoni tas-sena tal-ħsad fuq it-tikketta.

Jekk tidher l-indikazzjoni “ΝΕΟΣ ΟΙΝΟΣ” jew “ΝΕΑΡΟΣ ΟΙΝΟΣ” (inbid ġdid) fuq it-tikketta tal-inbejjed, huwa obbligatorju li tissemma s-sena tal-ħsad tal-għeneb kif previst fl-Artikolu 1(2) tad-Digriet Ministerjali Nru 280557 tad-9 ta’ Ġunju 2005, “Definizzjoni tat-tul tal-maturazzjoni, it-tqaddim u r-rilaxx għall-konsum ta’ nbejjed b’denominazzjoni ta’ oriġini ta’ kwalità superjuri u nbejjed lokali, kif ukoll l-indikazzjonijiet li għandhom jintużaw fuq it-tikkettar tagħhom fir-rigward tal-mod jew il-metodu tal-produzzjoni” (JORH Nru 818, it-tieni volum, tal-15 ta’ Ġunju 2005).

Rekwiżiti speċifiċi tat-tikkettar

Qafas legali:

Il-leġiżlazzjoni nazzjonali

Tip ta’ rekwiżit addizzjonali:

Dispożizzjonijiet addizzjonali dwar it-tikkettar

Deskrizzjoni tal-indikazzjoni:

Indikazzjonijiet fuq it-tikkettar f’konformità mal-leġiżlazzjoni nazzjonali

F’konformità mad-Digriet Ministerjali Nru 235309 tas-7 ta’ Frar 2002, l-indikazzjonijiet tradizzjonali li jistgħu jitniżżlu fuq it-tikketta tal-inbejjed bl-indikazzjoni ġeografika protetta (IĠP) Epanomi huma dawn li ġejjin:

ΛΕΥΚΟΣ ΑΠΟ ΛΕΥΚΑ ΣΤΑΦΥΛΙΑ (Abjad minn għeneb abjad), ΛΕΥΚΟΣ ΑΠΟ ΕΡΥΘΡΑ ΣΤΑΦΥΛΙΑ (Abjad minn għeneb iswed), ΛΕΥΚΟΣ ΑΠΟ ΕΡΥΘΡΩΠΑ ΣΤΑΦΥΛΙΑ Η ΛΕΥΚΟΣ ΑΠΟ ΓΚΡΙΖΑ ΣΤΑΦΥΛΙΑ (Abjad minn għeneb griż), ΚΟΚΚΙΝΕΛΙ (Kokkineli), ΟΙΝΟΣ ΛΟΦΩΝ (Inbid mill-għoljiet), ΟΙΝΟΣ ΠΛΑΓΙΩΝ (Inbid mill-ġnub tal-għoljiet).

Derogi

Qafas legali:

Il-leġiżlazzjoni nazzjonali

Tip ta’ rekwiżit addizzjonali:

Deroga dwar il-produzzjoni fiż-żona ġeografika demarkata

Deskrizzjoni tal-indikazzjoni:

L-Artikolu 5(1)(b) tar-Regolament Delegat tal-Kummissjoni (UE) 2019/33 tas-17 ta’ Ottubru 2018 li jissupplimenta r-Regolament (UE) Nru 1308/2013 tal-Parlament Ewropew u tal-Kunsill fir-rigward tal-applikazzjonijiet għall-protezzjoni ta’ denominazzjonijiet ta’ oriġini, indikazzjonijiet ġeografiċi u termini tradizzjonali fis-settur tal-inbid, il-proċedura ta’ oġġezzjoni, ir-restrizzjonijiet tal-użu, l-emendi għall-ispeċifikazzjonijiet tal-prodott, it-tħassir tal-protezzjoni, u t-tikkettar u l-preżentazzjoni.

Derogi

Qafas legali:

Il-leġiżlazzjoni nazzjonali

Tip ta’ rekwiżit addizzjonali:

Deroga dwar il-produzzjoni fiż-żona ġeografika demarkata

Deskrizzjoni tal-indikazzjoni:

Id-Digriet Ministerjali Konġunt Nru 392169 tal-20 ta’ Ottubru 1999, “Regoli ġenerali dwar l-użu tat-terminu ‘Τοπικός Οίνος’ (inbid lokali) biex jiddeskrivi inbid tal-mejda” (JORH Nru 1985, it-2ni volum, tat-8 ta’ Novembru 1999), kif emendat bid-Digriet Ministerjali Konġunt Nru 321813 tad-29 ta’ Awwissu 2007, jipprevedi, fl-Artikolu 4(c) tiegħu:

“L-inbejjed tal-mejda awtorizzati li jużaw it-terminu ‘inbid lokali’ bl-indikazzjoni ġeografika ta’ reġjun, nomenklatura jew reġjun ta’ vitikultura iżgħar min-nomenklatura, għandhom jiġu prodotti f’kantini tal-inbid li jinsabu fin-nomenklatura jew f’nomenklaturi li jmissu magħha.”

Aktar speċifikament, l-inbejjed tal-IĠP Epanomi jistgħu jiġu prodotti f’kantini tal-inbid fin-nomenklatura ta’ Tessaloniki jew fin-nomenklaturi ġirien ta’ Chalcidique, Émathie, Pella, Kilkis u Serres.

Referenza għall-pubblikazzjoni tal-ispeċifikazzjoni tal-prodott

http://www.minagric.gr/images/stories/docs/agrotis/POP-PGE/OINOS/PGE_prodiagrafes_epanomh050517.pdf

(1) ĠU L 347, 20.12.2013, p. 671.