IL-KUMMISSJONI EWROPEA
Brussell, 7.10.2021
COM(2021) 618 final
2021/0316(BUD)
Proposta għal
DEĊIŻJONI TAL-PARLAMENT EWROPEW U TAL-KUNSILL
dwar il-mobilizzazzjoni tal-Fond Ewropew ta’ Aġġustament għall-Globalizzazzjoni għall-Ħaddiema Ssensjati wara applikazzjoni minn Spanja – EGF/2021/001 ES/País Vasco metal
MEMORANDUM TA’ SPJEGAZZJONI
KUNTEST TAL-PROPOSTA
1.Ir-regoli applikabbli għall-kontribuzzjonijiet finanzjarji mill-Fond Ewropew ta’ Aġġustament għall-Globalizzazzjoni għall-Ħaddiema Ssensjati (FEG) huma stipulati fir-Regolament (UE) 2021/691 tal-Parlament Ewropew u tal-Kunsill tat-28 ta’ April 2021 dwar il-Fond Ewropew ta’ Aġġustament għall-Globalizzazzjoni għall-Ħaddiema Ssensjati (FEG) u li jħassar ir-Regolament (UE) Nru 1309/2013 (minn hawn ’il quddiem imsejjaħ ir-Regolament tal-FEG).
2.Fil-25 ta’ Ġunju 2021, Spanja ssottomettiet applikazzjoni EGF/2021/001 ES/País Vasco metal għal kontribuzzjoni finanzjarja mill-FEG, wara s-sensji fis-settur ekonomiku kklassifikati skont id-diviżjoni 25 tan-NACE Reviżjoni 2 (Manifattura ta’ prodotti tal-metall iffabbrikat, għajr makkinarju u tagħmir) fir-reġjun NUTS 2 ta’ País Vasco (ES21) fi Spanja.
3.Wara l-valutazzjoni tagħha ta’ din l-applikazzjoni, il-Kummissjoni kkonkludiet li, f’konformità mad-dispożizzjonijiet kollha applikabbli tar-Regolament tal-FEG, il-kundizzjonijiet għall-għoti ta’ kontribuzzjoni finanzjarja mill-FEG ġew issodisfati.
SOMMARJU TAL-APPLIKAZZJONI
Applikazzjoni tal-FEG
|
EGF/2021/001 ES/País Vasco metal
|
Stat Membru
|
Spanja
|
Reġjun(i) ikkonċernat(i) (livell NUTS 2)
|
País Vasco (ES21)
|
Data tas-sottomissjoni tal-applikazzjoni
|
il-25 ta’ Ġunju 2021
|
Data tal-konferma tal-wasla tal-applikazzjoni
|
it-28 ta’ Ġunju 2021
|
Data tat-talba għal informazzjoni addizzjonali
|
id-9 ta’ Lulju 2021
|
Skadenza għall-għoti tal-informazzjoni addizzjonali
|
it-30 ta’ Lulju 2021
|
Skadenza għat-tlestija tal-valutazzjoni
|
it-8 ta’ Ottubru 2021
|
Kriterju ta’ intervent
|
L-Artikolu 4(2)(b) tar-Regolament tal-FEG
|
Għadd ta’ intrapriżi kkonċernati
|
6
|
Settur(i) tal-attività ekonomika
(Diviżjoni NACE Reviżjoni 2)
|
Diviżjoni 25 (Manifattura ta’ prodotti tal-metall iffabbrikat, għajr makkinarju u tagħmir)
|
Perjodu ta’ referenza (sitt xhur):
|
it-2 ta’ Ġunju 2020 – it-2 ta’ Diċembru 2020
|
Għadd ta’ sensji matul il-perjodu ta’ referenza
|
491
|
Għadd totali ta’ benefiċjarji fil-mira
|
300
|
Baġit għal servizzi personalizzati (EUR)
|
1 384 950
|
Baġit għall-implimentazzjoni tal-FEG (EUR)
|
0 044 000
|
Baġit totali (EUR)
|
1 428 950
|
Kontribuzzjoni tal-FEG (85 %) (EUR)
|
1 214 607
|
VALUTAZZJONI TAL-APPLIKAZZJONI
Proċedura
4.Fil-25 ta’ Ġunju 2021, Spanja ssottomettiet l-applikazzjoni EGF/2021/001 ES/País Vasco metal fi żmien 12-il ġimgħa mid-data li fiha ġew issodisfati l-kriterji tal-intervent stabbiliti fl-Artikolu 4 tar-Regolament tal-FEG. Il-Kummissjoni kkonfermat li rċeviet l-applikazzjoni fit-28 ta’ Ġunju 2021 u talbet informazzjoni addizzjonali mingħand Spanja fid-9 ta’ Lulju 2021. Tali informazzjoni addizzjonali ngħatat fi żmien 15-il jum mit-talba. L-iskadenza ta’ 50 jum ta’ xogħol għall-wasla tal-applikazzjoni kompluta, li fi ħdanhom il-Kummissjoni jenħtieġ li tiffinalizza l-valutazzjoni tagħha tal-konformità tal-applikazzjoni mal-kundizzjonijiet għall-għoti ta’ kontribuzzjoni finanzjarja, tiskadi fit-8 ta’ Ottubru 2021.
Eliġibbiltà tal-applikazzjoni
Intrapriżi u benefiċjarji kkonċernati
5.L-applikazzjoni hija relatata ma’ 491 ħaddiem issensjat li l-attività tagħhom waqfet fis-settur ekonomiku kklassifikat skont id-diviżjoni 25 tan-NACE Reviżjoni 2 (Manifattura ta’ prodotti tal-metall iffabbrikat, għajr makkinarju u tagħmir), li minnhom, 192 matul is-sensji kollettivi ġew innotifikati lill-awtoritajiet. Is-sensji kollettivi jikkonċernaw total ta’ 6 intrapriżi. Is-sensjar kollu seħħ fir-reġjun NUTS 2 ta’ País Vasco (ES21).
Kriterji ta’ intervent
6.Spanja ppreżentat l-applikazzjoni skont il-kriterju ta’ intervent tal-Artikolu 4(2)(b) tar-Regolament tal-FEG, li jirrikjedi l-waqfien mill-attività ta’ mill-anqas 200 ħaddiem issensjat fuq perjodu ta’ referenza ta’ sitt xhur f’intrapriżi li joperaw fl-istess settur ekonomiku definit fid-diviżjoni NACE Reviżjoni 2 u li jinsabu f’reġjun wieħed jew f’żewġ reġjuni kontigwi kif definiti fil-livell NUTS 2 fi Stat Membru. Kien hemm 491 ħaddiem issensjat fir-reġjun NUTS 2 ta’ País Vasco (ES21).
7.Il-perjodu ta’ referenza ta’ sitt xhur għall-applikazzjoni jibda mit-2 ta’ Ġunju 2020 sat-2 ta’ Diċembru 2020.
Kalkolu tas-sensji u tal-waqfien tal-attività
8.Il-waqfien tal-attivitajiet tal-ħaddiema ssensjati matul il-perjodu ta’ referenza ġie kkalkolat kif ġej:
–192 mid-data li fiha l-impjegatur, f’konformità mal-Artikolu 3(1) tad-Direttiva tal-Kunsill 98/59/KE, innotifika bil-miktub lill-awtorità pubblika kompetenti bis-sensji kollettivi ppjanati. Qabel id-data tat-tlestija tal-valutazzjoni mill-Kummissjoni, Spanja kkonfermat li dawn il-192 sensja fil-fatt kienu twettqu, u
–299 mid-data tal-avviż individwali tal-impjegatur biex ikeċċi jew biex itemm il-kuntratt ta’ impjieg tal-ħaddiem.
Benefiċjarji eliġibbli
9.Għaldaqstant, l-għadd totali ta’ benefiċjarji eliġibbli huwa ta’ 491.
Deskrizzjoni tal-avvenimenti li wasslu għas-sensji u għall-waqfien mill-attivitajiet
10.L-avveniment li wassal għal dawn is-sensji huwa l-kriżi ekonomika kkawżata mill-pandemija tal-COVID-19.
11.Il-miżuri stretti tal-lockdown implimentati fi Spanja fi Q2 2020 irriżultaw fi tnaqqis fl-attivitajiet u fis-servizzi ekonomiċi mhux essenzjali , li laqtu b’mod gravi lis-settur tal-metall. Meta l-miżuri tal-lockdown ittaffew, kwistjonijiet oħrajn marbuta mal-pandemija, bħal nuqqas ta’ provvisti u ta' materja prima, diffikultajiet biex il-faċilitajiet jiġu adattati għall-protokolli kontra l-COVID19, għall-kontaġji u għar-restrizzjonijiet fuq il-moviment tal-ħaddiema, jew għal kwistjonijiet ta’ mobbiltà, affettwaw ukoll lis-settur tal-metall.
12.Skont id-data minn Confemetal, il-pandemija kellha impatt sinifikanti fuq l-attività u fuq il-fatturat tal-intrapriżi li joperaw fis-settur tal-metall, b’konsegwenzi negattivi fuq l-impjieg u fuq il-likwidità tal-intrapriżi (inadempjenzi fil-ħlas, aċċess għall-kreditu, eċċ.).
13.Fl-2020 (varjazzjoni minn sena għall-oħra), il-produzzjoni naqset b’aktar minn 50 % fi 18 % tal-intrapriżi tal-metall. Il-fatturat naqas b’aktar minn 50 % f’16 % tan-negozji. Terz mill-intrapriżi tal-metall esperjenzaw tnaqqis ta’ bejn 30 % u 50 % kemm tal-produzzjoni kif ukoll tal-fatturat.
14.L-indiċijiet tal-produzzjoni, tal-fatturat u tal-prezzijiet għas-settur tal-prodotti tal-metall iffabbrikat naqsu sena wara sena fit-trimestri kollha fl-2020.
|
2019
|
2020
|
|
Q1
|
Q2
|
Q3
|
Q4
|
Q1
|
Q2
|
Q3
|
Q4
|
Indiċi ta’ produzzjoni (IPIMET)
|
6,4
|
4,5
|
1,9
|
3,6
|
-9,4
|
-32,9
|
-8,2
|
-2,7
|
Indiċi tal-fatturat tal-industrija tal-metall (ICNMET)
|
4,9
|
2,8
|
-0,7
|
1,6
|
-10,4
|
-34,5
|
-8,5
|
-3,9
|
Indiċi tal-Prezzijiet Industrijali (IPRIMET)
|
1,3
|
0,9
|
0,4
|
0,2
|
-0,3
|
-0,7
|
-0,5
|
0,2
|
Sors: Confemetal
15.It-tnaqqis fl-attività u fil-fatturat irriżulta f’sensji. Minkejja l-użu estensiv ta’ skemi ta’ xogħol b’ħinijiet iqsar, is-sensji seħħew f’14 % tal-intrapriżi fis-settur tal-metall, u affettwaw 10,6 % tal-forza tax-xogħol tagħhom. Is-sensji kkonċernati minn din l-applikazzjoni bdew fl-2020 Q2.
Impatt mistenni tas-sensji fir-rigward tal-ekonomija lokali, reġjonali jew nazzjonali u l-impjieg
16.Fir-reġjun Bask, is-settur tal-prodotti tal-metall iffabbrikat jirrappreżenta 27,4 % tal-valur miżjud gross (GVA) tal-industrija. Il-piż relattiv tal-industrija fuq il-GVA reġjonali b’mod ġenerali huwa ta’ madwar 24 %. Fil-livell nazzjonali, il-GVA tal-industrija jirrappreżenta 14,5 % tal-GVA, filwaqt li l-medja tal-EU-28 hija ta’ 18,8 %.
17.Minħabba l-piż kbir tiegħu fl-ekonomija reġjonali, id-diffikultajiet fis-settur tal-prodotti tal-metall iffabbrikat kellhom impatt sinifikanti fuq l-ekonomija reġjonali u fuq l-impjieg. Fil-bidu tal-2020, il-qgħad (sena wara sena) fis-settur kien qed jonqos. Madankollu, minn Marzu 2020, ix-xejra nbidlet drastikament, minħabba l-pandemija. F’Awwissu 2020, kien hemm 25 % aktar persuni qiegħda minn sitt xhur qabel. Il-qerda tal-impjiegi fl-industrija kienet akbar milli fis-setturi l-oħrajn kollha flimkien.
Qgħad fir-reġjun Bask fl-2020
(sena wara sena)
(%)
Sors: Lanbide - Servicio Vasco de Empleo
18.Għalkemm minn Jannar sa Mejju 2021, il-qgħad irreġistrat kien qed jonqos (6,21 %), xorta huwa 4,6 % ogħla mil-livelli ta’ qabel il-pandemija. Barra minn hekk, l-irkupru ma huwiex ta’ benefiċċju għall-gruppi kollha bl-istess mod. F’Mejju 2021, il-qgħad ta’ terminu twil kien jirrappreżenta 55,6 % tal-qgħad totali (3,6 p.p. ogħla milli f’Jannar 2021) u l-persuni qiegħda b’edukazzjoni bażika jew anqas kienu jirrappreżentaw 60,8 % (1,1 p.p. ogħla milli f’Jannar).
Applikazzjoni tal-Qafas ta’ Kwalità tal-UE għall-antiċipazzjoni tal-bidla u għar-ristrutturar
19.Fl-applikazzjoni tagħha għall-appoġġ tal-FEG, Spanja ddeskriviet kif tqiesu r-rakkomandazzjonijiet stabbiliti fil-Qafas ta’ Kwalità tal-UE għall-antiċipazzjoni tal-bidla u għar-ristrutturar. Spanja tenfasizza l-kunċetti ewlenin tal-Pjan ta’ Taħriġ Vokazzjonali Bask, l-Istrateġija Baska għall-Impjieg u l-programm Impjiegi ekoloġiċi. L-Osservatorju tas-Sitwazzjoni Industrijali jissorvelja s-sitwazzjoni ekonomika. Il-HOBETUZ (il-Fondazzjoni Baska għat-Taħriġ Professjonali Kontinwu) toffri taħriġ għal persuni f’impjieg attiv, filwaqt li AukerabeRRi huwa programm ġdid ta’ rikollokament li tnieda fl-2021 bil-għan li jħarreġ mill-ġdid u jirrialloka lill-ħaddiema ssensjati minn setturi fi kriżi. It-tnejn huma integrati fl-istruttura ta’ Lanbide (is-Servizz Pubbliku tal-Impjieg ta’ País Vasco). L-involviment tas-sħab soċjali huwa żgurat mir-rappreżentanza tagħhom fil-bord ta’ governanza ta’ Lanbide, li huwa magħmul minn rappreżentanti tal-gvern reġjonali, tat-trade unions u tal-organizzazzjonijiet tal-impjegaturi.
20.Fir-rigward tal-attivitajiet li diġà twettqu għall-għajnuna tal-ħaddiema ssensjati, Spanja indikat li Lanbide (is-Servizz Pubbliku tal-Impjieg ta’ País Vasco) ipprovda lill-ħaddiema b’aċċess għas-servizzi ġenerali tiegħu. Il-ħaddiema ġew infurmati wkoll dwar l-eliġibbiltà tagħhom li jipparteċipaw fil-programm pilota AukerabeRRi. Il-178 ħaddiem intitolati għall-pjanijiet ta’ rikollokament diġà lestew dawn il-pjanijiet.
Kumplimentarjetà ma’ azzjonijiet iffinanzjati minn fondi nazzjonali jew tal-Unjoni
21.Spanja kkonfermat li l-miżuri li jirċievu kontribuzzjoni finanzjarja mill-FEG ma humiex se jirċievu wkoll kontribuzzjonijiet finanzjarji minn strumenti finanzjarji oħrajn tal-Unjoni.
22.Il-pakkett ikkoordinat ta’ servizzi personalizzati jikkomplementa azzjonijiet iffinanzjati minn fondi nazzjonali jew tal-UE oħrajn bħall-AukerabeRRii jew il-pjanijiet ta’ rikollokament, imsemmija diġà.
Konsultazzjoni tal-benefiċjarji fil-mira jew tar-rappreżentanti tagħhom jew is-sħab soċjali kif ukoll l-awtoritajiet lokali u reġjonali
23.Spanja indikat li l-pakkett ikkoordinat ta’ servizzi personalizzati tfassal f’konsultazzjoni mas-sħab soċjali. L-applikazzjoni, li ġiet diskussa qabel f’diversi laqgħat tekniċi, ġiet approvata mill-bord ta’ governanza ta’ Lanbide fil-laqgħa li saret fit-2 ta’ Lulju 2021.
24.Saru laqgħat addizzjonali fid-19 ta’ Jannar u fit-2 ta’ Frar 2021 mal-Federación Vizcaína de Empresas del Metal, (il-federazzjoni tal-intrapriżi tal-metall tal-Biskalja), mal-Asociación de Empresas de Guipúzcoa - ADEGI (l-Assoċjazzjoni tan-negozju ta’ Gupúzcoa) u mas-SEA-Empresas Alavesas (l-assoċjazzjonijiet tan-negozju ta’ Alava). Dawn l-organizzazzjonijiet kollha tal-impjegaturi flimkien mal-assoċjazzjonijiet tal-gruppi rilevanti kkontribwew għall-proposta.
Benefiċjarji fil-mira u miżuri proposti
Benefiċjarji fil-mira
25.L-għadd stmat ta’ ħaddiema ssensjati li huma mistennija jipparteċipaw fil-miżuri huwa ta’ 300. It-tqassim ta’ dawn il-ħaddiema skont il-ġeneru, il-grupp ta’ età u l-livell edukattiv huwa kif ġej:
Kategorija
|
Għadd ta’
benefiċjarji mistennija
|
Ġeneru:
|
Irġiel:
|
265
|
(88,3 %)
|
|
Nisa:
|
35
|
(11,7 %)
|
|
Mhux binarji
|
0
|
(0,0 %)
|
Grupp ta’ età:
|
Taħt it-30 sena:
|
22
|
(7,3 %)
|
|
bejn it-30 u l-54 sena:
|
216
|
(72,0 %)
|
|
Aktar minn 54 sena:
|
62
|
(20,7 %)
|
Livell ta’ edukazzjoni
|
Edukazzjoni sekondarja tal-ewwel livell jew anqas
|
107
|
(35,7 %)
|
|
Edukazzjoni sekondarja tat-tieni livell jew postsekondarja
|
68
|
(22,6 %)
|
|
Edukazzjoni terzjarja
|
125
|
(41,7 %)
|
Miżuri proposti
26.Is-servizzi personalizzati li jridu jiġu pprovduti lill-ħaddiema ssensjati jikkonsistu fl-azzjonijiet li ġejjin:
–Sessjonijiet ta’ informazzjoni ġenerali, merħba u tfassil ta’ profili: Is-sessjoni ta’ informazzjoni hija l-ewwel miżura li trid tiġi offruta lill-benefiċjarji kollha fil-mira u tinkludi informazzjoni ġenerali dwar konsulenza vokazzjonali, programmi ta’ taħriġ u inċentivi disponibbli. Is-sessjonijiet ta’ informazzjoni individwali jinkludu t-tfassil ta’ profili tal-parteċipant u l-allokazzjoni tal-konsulent li se jakkumpanja lill-ħaddiem matul il-proċess lejn l-impjieg mill-ġdid.
–Il-gwida okkupazzjonali se tiġi pprovduta permezz ta’ sessjonijiet kollettivi u individwali.
–L-għajnuna intensiva għat-tfittix ta’ impjieg, inklużi sessjonijiet ta’ ħidma dwar proċessi ta’ tfittix ta’ impjieg u ta' reklutaġġ, it-tfittxija attiva għal opportunitajiet ta’ impjieg lokali u reġjonali, u sabiex jinsabu impjiegi li jaqblu mal-ħiliet tal-ħaddiema.
–Appoġġ għall-ħolqien ta’ negozju: Il-ħaddiema interessati li jsiru persuni li jaħdmu għal rashom se jirċievu sessjonijiet individwali ta’ tutoraġġ u taħriġ, li jistgħu jkopru l-ippjanar, it-twettiq ta’ studji ta’ fattibbiltà, il-preparazzjoni ta’ pjanijiet ta’ negozju, jgħinu fl-identifikazzjoni ta’ possibbiltajiet ta’ finanzjament, eċċ.
–Kontribuzzjoni għall-bidu ta’ negozju: Il-ħaddiema li jibdew negozju jew attività bħala persuni li jaħdmu għal rashom se jirċievu kontribuzzjoni sa EUR 8 000, biex tgħinhom fil-kostijiet tal-istabbiliment tagħhom.
–Taħriġ: Dan se jinkludi (1) taħriġ dwar kompetenzi ewlenin u orizzontali, bħall-ħiliet diġitali, il-ġestjoni tal-kwalità, il-prevenzjoni tar-riskji okkupazzjonali, eċċ.; (2) it-taħriġ mill-ġdid fil-ħiliet vokazzjonali — għal dawk li jagħżlu li jirridirezzjonaw il-karriera tagħhom barra mis-settur tal-metall —, bħal-loġistika, il-ġestjoni tal-imħażen, il-kostruzzjoni u l-effiċjenza enerġetika, l-industrija tal-ikel, l-immaniġġjar tal-iskart urban u industrijali, l-attivitajiet rikreazzjonali għall-anzjani, eċċ.; (3) it-taħriġ għat-titjib fil-ħiliet vokazzjonali biex jiġu indirizzati l-ħiliet meħtieġa fis-settur tal-metall bħall-assemblaġġ 3D tal-CAD u l-immudellar tal-parts; Programmazzjoni tal-għodod bil-magna tas-CNC; Disinn mekkaniku tal-CATIA; forklifters, krejnijiet pont u pjattaformi tal-irfigħ; xogħol tal-metall b’folja fina u xogħol tal-kaldaruni; iwweldjar (b’ossiġenu u fjuwil, semiawtomatiku, TIG, eċċ.); immaxinjar permezz tat-tneħħija taċ-ċipep, immaxinjar bil-brix, immaxinjar ta’ deformazzjoni eċċ.; u (4) Taħriġ fuq il-post tax-xogħol imfassal għal postijiet tax-xogħol vakanti li ma għandhomx kandidati xierqa. Wara li jlesti t-taħriġ b’suċċess, il-ħaddiem inkwistjoni jiġi offrut kuntratt.
–Parteċipazzoni, tfittix ta’ impjieg u benefiċċji tat-taħriġ: Huwa previst benefiċċju ta’ parteċipazzjoni sa EUR 300 għal dawk li jipparteċipaw fis-sessjonijiet ta’ konsulenza individwali kollha stabbiliti fl-itinerarju personalizzat ta’ inserzjoni tagħhom. Il-ħaddiema li jipparteċipaw b’mod attiv fil-miżura “Għajnuna intensiva fit-tfittix ta’ impjieg” jew li jtemmu t-taħriġ jirċievu somma f’daqqa ta’ EUR 400.
27.Il-Miżuri kienu ppjanati li jkunu konformi mal-Istrateġija Spanjola dwar l-Ekonomija Ċirkolari. It-taħriġ jikkontribwixxi biex jagħti spinta lill-proċess tat-trasformazzjoni diġitali fl-industrija. Il-konklużjonijiet tar-rapport DESI 2020 tqiesu biex jiġi stabbilit il-kontenut tat-taħriġ fil-ħiliet diġitali. Il-pakkett se jikkontribwixxi għat-tixrid tal-ħiliet orizzontali meħtieġa fl-era industrijali diġitali kif ukoll f’ekonomija effiċjenti fir-riżorsi, f’konformità mal-Artikolu 7.2 tar-Regolament tal-FEG.
28.Il-pakkett koordinat propost ta’ servizzi personalizzati, deskritt hawnhekk, jikkostitwixxi miżuri attivi tas-suq tax-xogħol fi ħdan il-miżuri eliġibbli stabbiliti fl-Artikolu 7 tar-Regolament tal-FEG. Is-servizzi proposti ma jissostitwixxux miżuri passivi ta’ protezzjoni soċjali.
29.Spanja pprovdiet l-informazzjoni meħtieġa dwar miżuri li huma obbligatorji għall-intrapriża kkonċernata permezz tal-liġi nazzjonali jew skont ftehimiet kollettivi. Huma kkonfermaw li kontribuzzjoni finanzjarja mill-FEG ma hijiex se tissostitwixxi miżuri bħal dawn.
Baġit stmat
30.Il-kostijiet totali stmati huma ta’ EUR 1 428 950, li jinkludu nefqa ta’ EUR 1 384 950 għal servizzi personalizzati u nefqa ta’ EUR 44 000 għal attivitajiet preparatorji, ta’ ġestjoni, ta’ informazzjoni u ta' pubbliċità, ta’ kontroll u ta’ rapportar.
31.Il-kontribuzzjoni finanzjarja totali mitluba mill-FEG hija ta’ EUR 1 214 607 (85 % tal-kostijiet totali).
32.Il-prefinanzjament u l-kofinanzjament nazzjonali huma pprovduti minn Lanbide, is-servizz pubbliku tal-impjieg Bask.
Miżuri
|
Għadd stmat ta’ parteċipanti
|
Kost stmat għal kull parteċipant
(EUR)
|
Kostijiet totali stmati
(EUR)
|
Servizzi personalizzati (miżuri skont l-Artikolu 7(2)(a) tar-Regolament tal-FEG)
|
Informazzjoni ġenerali. Sessjonijiet ta’ merħba u tfassil ta’ profili
(Difusión y presentación del proyecto. Acogida)
|
300
|
406
|
121 800
|
Gwida okkupazzjonali
(Asesoramiento y orientación laboral)
|
300
|
455
|
136 500
|
Għajnuna intensiva għat-tfittix ta’ impjieg
(Apoyo a la búsqueda de empleo)
|
280
|
750
|
210 000
|
Appoġġ għall-ħolqien ta’ negozju
(Apoyo a personas emprendedoras)
|
20
|
1 838
|
36 750
|
Kontribuzzjoni għall-bidu ta’ negozju
(Ayuda al emprendimiento)
|
10
|
8 000
|
80 000
|
Taħriġ
(Desarrollo profesional y prácticas en empresas)
|
300
|
1 486
|
445 900
|
Subtotal (a):
Perċentwal tal-pakkett ta’ servizzi personalizzati
|
–
|
1 030 950
|
|
|
(74,44 %)
|
Benefiċċji u inċentivi (miżuri skont l-Artikolu 7(2)(b) tar-Regolament tal-FEG)
|
Inċentivi
(Ayuda por la participación)
|
300
|
1 180
|
354 000
|
Subtotal (b):
Perċentwal tal-pakkett ta’ servizzi personalizzati:
|
–
|
354 000
|
|
|
(25,56 %)
|
Azzjonijiet skont l-Artikolu 7(5) tar-Regolament tal-FEG
|
1. Attivitajiet preparatorji
|
–
|
3 000
|
2. Ġestjoni
|
–
|
3 000
|
3. Informazzjoni u pubbliċità
|
–
|
3 000
|
4. Kontroll u rapportar
|
–
|
35 000
|
Subtotal (c):
Perċentwal tal-kostijiet totali:
|
–
|
44 000
|
|
|
(3,08 %)
|
Kostijiet totali (a + b + c):
|
–
|
1 428 950
|
Kontribuzzjoni tal-FEG (85 % tal-kostijiet totali)
|
–
|
1 214 607
|
33.Il-kostijiet tal-miżuri identifikati fit-tabella ta’ hawn fuq bħala miżuri skont l-Artikolu 7(2)(b) tar-Regolament tal-FEG ma jaqbżux il-35 % tal-kostijiet totali tal-pakkett ikkoordinat ta’ servizzi personalizzati. Spanja kkonfermat li dawn il-miżuri huma kondizzjonali fuq il-parteċipazzjoni attiva tal-benefiċjarji fil-mira fl-attivitajiet ta’ tfittix ta’ impjieg jew ta’ taħriġ.
34.Spanja kkonfermat li l-kostijiet tal-investimenti għall-impjieg indipendenti, għall-bidu tan-negozji u għall-akkwiżizzjonijiet maġġoritarji mill-impjegati ma humiex se jaqbżu l-EUR 22 000 għal kull benefiċjarju.
Perjodu ta’ eliġibbiltà tan-nefqa
35.Spanja bdiet tipprovdi s-servizzi personalizzati lill-benefiċjarji fil-mira fil-11 ta’ Ġunju 2021. Għalhekk, in-nefqa fuq il-miżuri se tkun eliġibbli għal kontribuzzjoni finanzjarja mill-FEG mill-11 ta’ Ġunju 2021 sa 24 xahar wara d-data tad-dħul fis-seħħ tad-Deċiżjoni ta’ Finanzjament.
36.Spanja bdiet iġġarrab in-nefqa amministrattiva sabiex timplimenta l-FEG fl-1 ta’ Frar 2021. In-nefqa għal attivitajiet preparatorji, ta’ ġestjoni, ta’ informazzjoni u ta’ pubbliċità, ta’ kontroll u ta’ rapportar għandha għalhekk tkun eliġibbli għal kontribuzzjoni finanzjarja mill-FEG mill-1 ta’ Frar 2021 sa 31 xahar wara d-data tad-dħul fis-seħħ tad-Deċiżjoni ta’ Finanzjament.
Sistemi ta’ ġestjoni u ta’ kontroll
37.L-applikazzjoni fiha deskrizzjoni tas-sistema ta’ ġestjoni u ta’ kontroll li tispeċifika r-responsabbiltajiet tal-korpi involuti. Spanja nnotifikat lill-Kummissjoni li l-kontribuzzjoni finanzjarja se tkun ġestita u kkontrollata mill-istess korpi li jimmaniġġaw u li jikkontrollaw il-Fond Soċjali Ewropew Plus. Lanbide se jkun il-korp intermedjarju għall-awtorità ta’ ġestjoni.
Impenji pprovduti mill-Istat Membru kkonċernat
38.Spanja pprovdiet l-assigurazzjonijiet neċessarji kollha rigward dawn li ġejjin:
–il-prinċipji tal-ugwaljanza tat-trattament u tan-nondiskriminazzjoni se jiġu rispettati fl-aċċess għall-azzjonijiet proposti u għall-implimentazzjoni tagħhom,
–ir-rekwiżiti stabbiliti fil-leġiżlazzjoni nazzjonali u tal-UE dwar is-sensji kollettivi ġew issodisfati,
–l-intrapriżi li taw is-sensji, li komplew bl-attivitajiet tagħhom wara s-sensji, ikkonformaw mal-obbligi legali tagħhom u pprovdew għall-ħaddiema tagħhom kif xieraq,
–kwalunkwe finanzjament doppju se jiġi evitat,
–il-kontribuzzjoni finanzjarja mill-FEG se tkun konformi mar-regoli proċedurali u materjali tal-Unjoni dwar l-għajnuna mill-Istat.
IMPLIKAZZJONI BAĠITARJA
Proposta baġitarja
39.L-FEG ma għandux jaqbeż ammont annwali massimu ta’ EUR 186 miljun (prezzijiet tal-2018), kif stipulat fl-Artikolu 8 tar-Regolament tal-Kunsill (UE, Euratom) Nru 2020/2093 tas-17 ta’ Diċembru 2020 li jistabbilixxi l-qafas finanzjarju pluriennali għas-snin mill-2021 sal-2027.
40.Wara li eżaminat l-applikazzjoni fir-rigward tal-kundizzjonijiet stipulati fl-Artikolu 13(1) u (2) tar-Regolament tal-FEG, u wara li qieset l-għadd ta’ benefiċjarji fil-mira, l-azzjonijiet proposti u l-kostijiet stmati, il-Kummissjoni tipproponi li l-FEG jiġi mobilizzat għall-ammont ta’ EUR 1 214 607, li jirrappreżenta 85 % tal-kostijiet totali tal-azzjonijiet proposti, sabiex tiġi pprovduta kontribuzzjoni finanzjarja għall-applikazzjoni.
41.Id-deċiżjoni proposta għall-mobilizzazzjoni tal-FEG se tittieħed b’mod konġunt mill-Parlament Ewropew u mill-Kunsill, kif stabbilit fil-punt 9 tal-Ftehim Interistituzzjonali tas-16 ta’ Diċembru 2020 bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar dixxiplina baġitarja, dwar kooperazzjoni f’materji baġitarji u dwar ġestjoni finanzjarja tajba, kif ukoll dwar riżorsi proprji ġodda, inkluż pjan direzzjonali lejn l-introduzzjoni ta’ riżorsi proprji ġodda.
Atti relatati
42.Fl-istess waqt li tippreżenta din il-proposta għal deċiżjoni sabiex jiġi mobilizzat l-FEG, il-Kummissjoni se tippreżenta lill-Parlament Ewropew u lill-Kunsill, proposta għal trasferiment tal-ammont ta’ EUR 1 214 607 għal-linja baġitarja rilevanti.
43.Fl-istess ħin li adottat din il-proposta għal deċiżjoni sabiex jiġi mobilizzat l-FEG, il-Kummissjoni adottat deċiżjoni dwar kontribuzzjoni finanzjarja li tikkostitwixxi deċiżjoni ta’ finanzjament skont it-tifsira tal-Artikolu 110 tar-Regolament Finanzjarju. Dik id-deċiżjoni ta’ finanzjament se tidħol fis-seħħ fid-data li fiha l-Kummissjoni tiġi nnotifikata bl-approvazzjoni tat-trasferiment baġitarju mill-Parlament Ewropew u mill-Kunsill.
2021/0316 (BUD)
Proposta għal
DEĊIŻJONI TAL-PARLAMENT EWROPEW U TAL-KUNSILL
dwar il-mobilizzazzjoni tal-Fond Ewropew ta’ Aġġustament għall-Globalizzazzjoni għall-Ħaddiema Ssensjati wara applikazzjoni minn Spanja – EGF/2021/001 ES/País Vasco metal
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea,
Wara li kkunsidraw ir-Regolament (UE) 2021/691 tal-Parlament Ewropew u tal-Kunsill tat-28 ta’ April 2021 dwar il-Fond Ewropew ta’ Aġġustament għall-Globalizzazzjoni għall-Ħaddiema Ssenjati (FEG) u li jħassar ir-Regolament (UE) Nru 1309/2013, u b’mod partikolari l-Artikolu 15(1) tiegħu,
Wara li kkunsidraw il-Ftehim Interistituzzjonali tas-16 ta’ Diċembru 2020 bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar dixxiplina baġitarja, dwar kooperazzjoni f’materji baġitarji u dwar ġestjoni finanzjarja tajba, kif ukoll dwar riżorsi proprji ġodda, inkluż pjan direzzjonali lejn l-introduzzjoni ta’ riżorsi proprji ġodda, u b’mod partikolari l-punt 9 tiegħu,
Wara li kkunsidraw il-proposta tal-Kummissjoni Ewropea,
Billi:
(1)Il-Fond Ewropew ta’ Aġġustament għall-Globalizzazzjoni għall-Ħaddiema Ssensjati (FEG) għandu l-għan li juri solidarjetà u li jippromwovi impjieg deċenti u sostenibbli fl-Unjoni billi jipprovdi appoġġ għall-ħaddiema ssensjati u għal dawk li jaħdmu għal rashom li l-attività tagħhom tkun waqfet fil-każ ta’ avvenimenti kbar ta’ ristrutturar u jgħinhom jirritornaw għal xogħol deċenti u impjieg sostenibbli mill-aktar fis possibbli.
(2)L-FEG ma jridx jaqbeż l-ammont massimu annwali ta’ EUR 186 miljun (il-prezzijiet tal-2018), kif stabbilit fl-Artikolu 8 tar-Regolament tal-Kunsill (UE, Euratom) Nru 2020/2093.
(3)Fil-25 ta’ Ġunju 2021, Spanja ssottomettiet applikazzjoni għall-mobilizzazzjoni tal-FEG, fir-rigward ta’ sensji ta’ ħaddiema fis-settur ekonomiku kklassifikat skont il-klassifikazzjoni Statistika tal-attivitajiet ekonomiċi fil-Komunità Ewropea (“NACE”) Reviżjoni 2 Diviżjoni 25 (Manifattura ta’ prodotti tal-metall iffabbrikat, għajr għal makkinarju u tagħmir fil-Klassifikazzjoni Komuni ta’ Unitajiet Territorjali għall-Istatistika (“NUTS”) livell 2 ir-reġjun ta’ País Vasco (ES21) fi Spanja. Din ġiet issupplimentata b’informazzjoni addizzjonali pprovduta f’konformità mal-Artikolu 8(5) tar-Regolament (UE) Nru 2021/691. Dik l-applikazzjoni tikkonforma mal-kundizzjonijiet għal kontribuzzjoni finanzjarja mill-FEG, kif stabbilit fl-Artikolu 13 tar-Regolament (UE) Nru 2021/691.
(4)Għalhekk, jenħtieġ li l-FEG jiġi mobilizzat sabiex jipprovdi kontribuzzjoni finanzjarja ta’ EUR 1 214 607 fir-rigward tal-applikazzjoni sottomessa minn Spanja.
(5)Sabiex jitnaqqas kemm jista’ jkun iż-żmien li jittieħed għall-mobilizzazzjoni tal-FEG, jenħtieġ li din id-deċiżjoni tapplika mid-data tal-adozzjoni tagħha,
ADOTTAW DIN ID-DEĊIŻJONI:
Artikolu 1
Għall-baġit ġenerali tal-Unjoni għas-sena finanzjarja 2021, il-Fond Ewropew ta’ Aġġustament għall-Globalizzazzjoni għall-Ħaddiema Ssensjati għandu jiġi mobilizzat biex jipprovdi l-ammont ta’ EUR 1 214 607 f’approprjazzjonijiet ta’ impenn u ta’ pagament.
Artikolu 2
Din id-Deċiżjoni għandha tidħol fis-seħħ fil-jum tal-pubblikazzjoni tagħha f’Il-Ġurnal Uffiċjali tal-Unjoni Ewropea. Hija għandha tapplika minn [id-data tal-adozzjoni tagħha].
Magħmul fi Brussell,
Għall-Parlament Ewropew
Għall-Kunsill
Il-President
Il-President