Werrej

1.PROĊEDURA BAĠITARJA

1.1. L-Abbozz tal-Baġit tal-2020 u l-Ittra Emendatorja 1/2020

1.2. L-Adozzjoni tal-Baġit tal-2020

1.3. Id-dħul assenjat lill-FAEG

2.IL-POŻIZZJONI TAL-LIKWIDITÀ U L-ĠESTJONI TAL-APPROPRJAZZJONIJIET

2.1. Il-ġestjoni tal-approprjazzjonijiet

2.1.1. Approprjazzjonijiet disponibbli għas-sena finanzjarja 2020

2.1.2. Eżekuzzjoni tal-approprjazzjonijiet disponibbli għas-sena finanzjarja 2020

2.1.3. Eżekuzzjoni tal-baġit tal-approprjazzjonijiet ivvotati - Nefqa taħt ġestjoni diretta magħmula mill-Kummissjoni

2.2. Pagamenti ta’ kull xahar

2.2.1. Pagamenti ta’ kull xahar lill-Istati Membri taħt ġestjoni kondiviża

3.L-IMPLIMENTAZZJONI TAL-BAĠIT TAL-FAEG 2020

3.1. L-użu tal-approprjazzjonijiet tal-FAEG

3.2. Kummenti dwar l-implimentazzjoni tal-baġit

3.2.1. Kapitolu 05 02: Interventi fis-swieq agrikoli

3.2.2. Kapitolu 05 03: Pagamenti diretti

3.2.3. Kapitolu 05 04: Żvilupp Rurali

3.2.4. Kapitolu 05 07: Awditjar tan-nefqa agrikola

3.2.5. Kapitolu 05 08: Strateġija u koordinament tal-politiki

4.L-IMPLIMENTAZZJONI TAD-DĦUL ASSENJAT LILL-FAEG

Annessi (ara d-dokument separat):

Anness 1

Anness 2

Anness 3-I

Anness 3-II

Anness 4

Il-proċedura baġitarja għall-Approprjazzjonijiet tal-FAEG tal-2020

L-analiżi tal-eżekuzzjoni baġitarja tal-FAEG – Is-sena finanzjarja 2020

L-analiżi tal-eżekuzzjoni Baġitarja tal-FAEG – Is-sena finanzjarja 2020. id-dħul assenjat. C4

L-analiżi tal-eżekuzzjoni Baġitarja tal-FAEG – Is-sena finanzjarja 2020. id-dħul assenjat. C5

L-eżekuzzjoni Baġitarja tal-FAEG skont l-artikolu u skont l-Istat Membru – Is-sena finanzjarja 2020

Nota: Dan ir-rapport huwa akkumpanjat minn Dokument ta’ Ħidma tal-Persunal tal-Kummissjoni dettaljat. It-test sħiħ ta’ dan id-Dokument ta’ Ħidma tal-Persunal (bil-Malti) u t-tabelli annessi (bl-Ingliż) se jkunu disponibbli wkoll fuq is-sit web Europa tad-DĠ Agrikoltura ( http://ec.europa.eu/agriculture/cap-funding/financial-reports/eagf/index_mt.htm ).

1.PROĊEDURA BAĠITARJA 1

1.1.L-Abbozz tal-Baġit tal-2020 u l-Ittra Emendatorja 1/2020

L-Abbozz tal-Baġit tal-2020 ġie adottat mill-Kummissjoni fil-5 ta’ Lulju 2019. L-approprjazzjonijiet ta’ impenn proposti għall-FAEG kienu jammontaw għal total ta’ EUR 43 531,8 miljun. Il-Kunsill adotta l-pożizzjoni tiegħu dwar l-Abbozz tal-Baġit tal-2020 fit-3 ta’ Settembru 2019, filwaqt li naqqas l-approprjazzjonijiet ta’ impenn għall-FAEG b’EUR 239,9 miljun. Il-Parlament Ewropew adotta l-pożizzjoni tiegħu fit-23 ta’ Ottubru 2019, filwaqt li żied l-approprjazzjonijiet ta’ impenn għall-FAEG bi EUR 32 miljun meta mqabbla mal-Abbozz tal-Baġit.

Fil-15 ta’ Ottubru 2019, il-Kummissjoni ppubblikat l-Ittra Emendatorja (AL) Nru 1 għall-Abbozz tal-Baġit tal-2020 li żżid il-ħtiġijiet fl-impenji bi EUR 304,3 miljun meta mqabbla mal-Abbozz tal-Baġit. Madankollu, dawn il-ħtiġijiet addizzjonali ġew ikkumpensati biż-żieda ta’ EUR 354 miljun fid-dħul assenjat, li mistenni jkun disponibbli fl-2020. B’riżultat ta’ dan, l-approprjazzjonijiet ta’ impenn mitluba għall-FAEG fl-AL naqsu b’EUR 49,7 miljun meta mqabbel mal-Abbozz tal-Baġit.

Il-Kumitat ta’ Konċiljazzjoni, magħmul minn membri tal-Parlament Ewropew u tal-Kunsill, qabel rigward test konġunt fl-20 ta’ Novembru 2019.

1.2.L-Adozzjoni tal-Baġit tal-2020

Il-Baġit tal-2020 ġie ddikjarat bħala adottat mill-Kunsill u mill-Parlament Ewropew fil-25 ta’ Novembru u fis-27 ta’ Novembru 2019, rispettivament. L-approprjazzjonijiet ta’ impenn totali tal-baġit għall-FAEG ammontaw għal EUR 43 410,1 miljun u l-approprjazzjonijiet ta’ pagament tiegħu ammontaw għal EUR 43 380,0 miljun.

Id-differenza bejn l-approprjazzjonijiet ta’ impenn u l-approprjazzjonijiet ta’ pagament hija dovuta għall-fatt li, għal ċerti miżuri li jiġu implimentati direttament mill-Kummissjoni, jintużaw approprjazzjonijiet differenzjati. Dawn il-miżuri jirrigwardaw prinċipalment il-promozzjoni tal-prodotti agrikoli, l-istrateġija tal-politika u l-miżuri ta’ koordinazzjoni għall-agrikoltura.

Speċifikament, mill-approprjazzjonijiet ta’ impenn tal-FAEG ivvutati għall-qasam ta’ politika 05 (l-Agrikoltura u l-Iżvilupp Rurali), li jammontaw għal EUR 43 410,1 miljun: EUR 2 530,1 miljun ġew previsti għal interventi fi swieq agrikoli skont il-kapitolu 05 02; EUR 40 621,0 miljun ġew previsti għal pagamenti diretti skont il-kapitolu 05 03; EUR 205,9 miljun ġew previsti għall-awditu tan-nefqa agrikola skont il-kapitolu 05 07; u EUR 41,4 miljun għall-istrateġija u l-koordinazzjoni tal-politiki skont il-kapitolu 05 08.

Jingħataw aktar dettalji fl-Anness 1.

1.3.Id-dħul assenjat lill-FAEG 2

F’konformità mal-Artikolu 43 tar-Regolament (UE) Nru 1306/2013 dwar il-finanzjament tal-Politika Agrikola Komuni 3 , id-dħul li joriġina mill-korrezzjonijiet finanzjarji skont id-deċiżjonijiet ta’ approvazzjoni tal-konformità jew tal-kontabbiltà, minn irregolaritajiet u mill-imposta fuq il-ħalib huwa indikat bħala dħul assenjat għall-finanzjament tan-nefqa tal-FAEG. Skont dawn ir-regoli, id-dħul assenjat jista’ jintuża sabiex ikopri l-finanzjament ta’ kwalunkwe nefqa tal-FAEG. Jekk parti minn dan id-dħul ma tintużax, mela din il-parti tiġi riportata awtomatikament għas-sena baġitarja ta’ wara.

Waqt l-istabbiliment tal-baġit għall-2020, saret stima ta’ dan id-dħul kemm għall-ammont li kien mistenni li jinġabar matul is-sena baġitarja 2020, kif ukoll għall-ammont li kien mistenni jiġi riportat mis-sena baġitarja 2019 għall-2020. Din l-istima kienet tammonta għal EUR 1 071 miljun, u tqieset meta l-Awtorità Baġitarja adottat il-baġit għall-2020. B’mod partikolari:

¾id-dħul mill-korrezzjonijiet tal-approvazzjoni tal-konformità u mill-irregolaritajiet ġie stmat għal EUR 592 miljun u EUR 127 miljun rispettivament, filwaqt li ma kienx antiċipat dħul mill-imposta fuq il-ħalib. B’hekk, l-ammont totali ta’ dħul assenjat li kien mistenni jinġabar matul is-sena baġitarja 2020 kien stmat għal EUR 719 miljun;

¾L-ammont ta’ dħul assenjat li mistenni li jiġi riportat mis-sena baġitarja 2019 għall-2020 kien stmat għal EUR 352 miljun.

Fil-baġit għall-2020, dan id-dħul li kien inizjalment stmat għal EUR 1 071 miljun kien assenjat għal żewġ skemi, jiġifieri:

¾EUR 150 miljun għall-fondi operazzjonali għall-organizzazzjonijiet tal-produtturi fis-settur tal-frott u tal-ħxejjex;

¾EUR 921 miljun għall-iskema ta’ pagament bażiku (il-pagamenti diretti).

Għal dawn l-iskemi, is-somma tal-approprjazzjonijiet ivvotati mill-Awtorità Baġitarja u tad-dħul assenjat tikkorrispondi mal-istima totali tal-approprjazzjonijiet disponibbli ta’:

¾EUR 849 miljun għall-fondi operazzjonali għall-organizzazzjonijiet tal-produtturi fis-settur tal-frott u l-ħxejjex;

¾EUR 17 038 miljun għall-iskema ta’ pagament bażiku (pagamenti diretti).

2.IL-POŻIZZJONI TAL-LIKWIDITÀ U L-ĠESTJONI TAL-APPROPRJAZZJONIJIET

2.1.Il-ġestjoni tal-approprjazzjonijiet

2.1.1.Approprjazzjonijiet disponibbli għas-sena finanzjarja 2020

F’EUR
It-taqsima tan-nefqa tal-baġit (1)	Approprjazzjonijiet ta’ impenn	Approprjazzjonijiet ta’ pagament	It-taqsima tad-dħul tal-baġit (AR) (2)	Previżjonijiet
1. Approprjazzjonijiet inizjali tal-FAEG, li minnhom	43 410 105 687,00	43 380 031 798,00	1. Deċiżjonijiet ta’ approvazzjoni	592 000 000.00
1a. Approprjazzjonijiet taħt ġestjoni kondiviża	43 245 200 000,00	43 245 200 000,00	2. Irregolaritajiet	127 000 000,00
1b Approprjazzjonijiet taħt ġestjoni diretta	164 905 687,00	134 831 798,00	3. Imposta addizzjonali mill-produtturi tal-ħalib	-
2. Baġit Emendatorju	48 655 078,00	48 655 078,00	Previżjoni totali tal-AR	719 000 000,00
3. Trasferiment lejn il-FAEG jew mill-FAEG matul is-sena		-9 639 000,00
4. Approprjazzjonijiet finali għall-FAEG, li minnhom	43 458 760 765,00	43 419 047 876,00
4 a. Approprjazzjonijiet taħt ġestjoni kondiviża	43 298 480 078,00	43 298 480 078,00
4b Approprjazzjonijiet taħt ġestjoni diretta	160 280 687,00	120 567 798,00
(1) L-approprjazzjonijiet li ddaħħlu fil-baġit għall-2020 wara li tnaqqas id-dħul assenjat li kellu jinġabar fl-2020, kif ukoll id-dħul riportat mill-2019 għall-2020 f’konformità mal-Artikolu 12 tar-Regolament (UE, EURATOM) Nru 2018/1046. (2) AR: Id-dħul assenjat li jrid jinġabar matul is-sena finanzjarja. Ma hemm l-ebda ammont ta’ dħul li ddaħħal fil-linja tad-dħul (p.m.), iżda l-ammont tal-previżjoni huwa indikat fil-kummenti baġitarji

2.1.2.Eżekuzzjoni tal-approprjazzjonijiet disponibbli għas-sena finanzjarja 2020

			F’EUR
	Eżekuzzjoni tal-approprjazzjonijiet ta’ impenn	Eżekuzzjoni tal-approprjazzjonijiet ta’ pagament
Ġestjoni kondiviża (1)	44 156 243 297,63	44 156 243 297,63
Nefqa taħt ġestjoni diretta	158 591 816,48	98 309 811,62
Total	44 314 835 114,11	44 254 553 109,25

(1) Ammonti impenjati. Impenji u pagamenti minbarra d-dħul assenjat ta’ EUR 580 665 888,61 (ara l-punt 4 u l-anness 3-I) riċevuti għall-ġestjoni kondiviża: EUR 43 575 577 409,02

Għas-sena finanzjarja 2020, l-ammont proprju tal-approprjazzjonijiet ta’ impenn użati kien jammonta għal EUR 44 314 835 114,1, filwaqt li dak għall-approprjazzjonijiet ta’ pagament kien jammonta għal EUR 44 254 553 109,3. Fit-taqsima 3.2 hawn taħt jingħataw aktar dettalji dwar l-eżekuzzjoni tal-approprjazzjonijiet taħt ġestjoni kondiviża.

2.1.3.Eżekuzzjoni tal-baġit tal-approprjazzjonijiet ivvotati - Nefqa taħt ġestjoni diretta magħmula mill-Kummissjoni

F’EUR
Nefqa taħt ġestjoni diretta	Approprjazzjonijiet ta’ impenn		Approprjazzjonijiet ta’ pagament		Riport għall-2021 (2)
Approprjazzjonijiet (C1)(1)	160 280 687,00	120 567 798,00		-
Eżekuzzjoni (C1)	158 591 816,48	98 309 811,62		17 490 660,00
Approprjazzjonijiet ikkanċellati	1 688 870,52	4 767 326,38		-
(1) C1 tirreferi għall-approprjazzjonijiet ivvotati tal-baġit. Dan l-ammont jinkludi trasferimenti minn “ ġestjoni kondiviża” għall-ammont ta’ EUR 4 625 000,00 għall-approprjazzjonijiet ta’ impenn u ta’ pagament, trasferimenti “’l barra” mill-FAEG għall-ammont totali ta’ EUR -9 639 000,00 għall-approprjazzjonijiet ta’ pagament. (2) Riport għall-2021 għal approprjazzjonijiet mhux differenzjati biss.

L-approprjazzjonijiet ta’ impenn disponibbli għan-nefqa taħt ġestjoni diretta fil-baġit tal-2020 kienu EUR 160,3 miljun. Fl-2020 ġie impenjat ammont ta’ EUR 158,6 miljun. Il-bilanċ ta’ dawn l-approprjazzjonijiet, jiġifieri EUR 1,7 miljun, ġie kkanċellat.

Il-maġġoranza tal-approprjazzjonijiet ta’ impenn tal-FAEG għan-nefqa taħt ġestjoni diretta magħmula mill-Kummissjoni huma approprjazzjonijiet differenzjati.

Ir-riport awtomatiku għall-2021, li jirrigwarda biss approprjazzjonijiet mhux differenzjati, jammonta għal EUR 17,5-il miljun.

2.2.Pagamenti ta’ kull xahar

2.2.1.Pagamenti ta’ kull xahar lill-Istati Membri taħt ġestjoni kondiviża

2.2.1.1.Pagamenti ta’ kull xahar għall-provvediment tan-nefqa

L-Artikolu 18(1) tar-Regolament (UE) Nru 1306/2013 jiddikjara li “l-pagamenti ta’ kull xahar għandhom isiru mill-Kummissjoni għal nefqa magħmula mill-aġenziji tal-pagamenti akkreditati tal-Istati Membri matul ix-xahar ta’ referenza”. Il-pagamenti ta’ kull xahar għandhom isiru lil kull Stat Membru mhux aktar tard mit-tielet jum tax-xogħol tat-tieni xahar wara dak li fih tkun saret in-nefqa.

Il-pagamenti ta’ kull xahar huma rimborż tan-nefqa netta (wara t-tnaqqis tad-dħul) li tkun diġà twettqet u jsiru disponibbli abbażi tad-dikjarazzjonijiet ta’ kull xahar mibgħuta mill-Istati Membri 4 . Il-kontabbiltà ta’ kull xahar tan-nefqa u tad-dħul hija soġġetta għal kontrolli u korrezzjonijiet abbażi ta’ dawn id-dikjarazzjonijiet. Barra minn hekk, dawn il-pagamenti jsiru finali wara l-verifiki tal-Kummissjoni skont il-proċedura għall-approvazzjoni tal-kontijiet tal-kontabbiltà.

Il-pagamenti magħmula mill-Istati Membri bejn is-16 ta’ Ottubru 2019 u l-15 ta’ Ottubru 2020 huma koperti mis-sistema għall-pagamenti ta’ kull xahar.

Għas-sena finanzjarja kollha, it-total tal-ammonti deċiżi tal-pagamenti ta’ kull xahar kienu ta’ EUR 44 011,7 million. Filwaqt li jitqiesu l-ammonti rkuprati minn deċiżjonijiet ta’ approvazzjoni u mir-rimborż ta’ ammonti sospiżi preċedentement, tħallsu effettivament EUR 43 707,2 miljun lill-Istati Membri.

2.2.1.2.Deċiżjonijiet dwar pagamenti ta’ kull xahar

Il-Kummissjoni adottat deċiżjoni ta’ pagament għal kull wieħed mit-12-il perjodu tas-sena finanzjarja. Barra minn hekk, f’Diċembru ġiet adottata deċiżjoni addizzjonali, li taġġusta n-nefqa totali imposta għas-sena.

3.L-IMPLIMENTAZZJONI TAL-BAĠIT TAL-FAEG 2020

3.1.L-użu tal-approprjazzjonijiet tal-FAEG

L-implimentazzjoni tal-approprjazzjonijiet tal-FAEG kienet tammonta għal EUR 44 314,8 miljun 5 . Din in-nefqa ġiet iffinanzjata mill-approprjazzjonijiet inizjali tal-baġit, bl-użu tad-dħul assenjat lill-FAEG u ammont mill-Baġit Emendatorju Nru 9. Id-dħul assenjat lill-FAEG huwa magħmul mill-ammont ta’ EUR 348,2 miljun riportat mill-2019 u minn parti mid-dħul assenjat miġbur fl-2020 li jammonta għal EUR 525,2 miljun minn total ta’ EUR 580,7 miljun. Fil-qasam ta’ politika 05, in-nefqa tal-FAEG ammontat għal EUR 2 662,3 miljun għal miżuri tas-suq u għal EUR 41 396,3 miljun għal pagamenti diretti.

Għad-dettalji dwar l-implimentazzjoni tal-baġit skont il-qasam ta’ politika, jekk jogħġbok ara l-Anness 2.

L-Anness 4 jippreżenta t-tqassim tan-nefqa fuq il-miżuri tas-suq, il-pagamenti diretti u l-awditjar tan-nefqa agrikola, skont l-entrata, skont is-sors tal-fond u skont l-Istat Membru.

3.2.Kummenti dwar l-implimentazzjoni tal-baġit

Hawn taħt qed jiġi ppreżentat kummentarju qasir dwar l-implimentazzjoni tal-approprjazzjonijiet kif ukoll dwar l-użu tad-dħul assenjat disponibbli abbażi tad-dettalji mogħtija fl-annessi 2, 3-I u 3-II. Il-linji tal-baġit b’rata ta’ eżekuzzjoni qrib ħafna tal-ammonti bbaġitjati mhumiex deskritti f’din it-taqsima.

3.2.1.Kapitolu 05 02: Interventi fis-swieq agrikoli

3.2.1.1.Daħla

L-eżekuzzjoni totali (f’approprjazzjonijiet ta’ impenji) għal dan il-kapitolu ammontat għal EUR 2 662,3 miljun u ġew iffinanzjati mill-approprjazzjonijiet ivvotati li jammontaw għal EUR 2 530,1 miljun u mid-dħul assenjat li jammonta għal EUR 83,7 miljun. Dan tal-aħħar kien maħsub biex ikopri n-nefqa mġarrba fis-settur tal-frott u l-ħxejjex (għad-dettalji, ara l-punt 3.2.1.2). Fil-partiti fejn il-ħtiġijiet kienu aktar mill-approprjazzjonijiet baġitarji, in-nefqa addizzjonali ġiet koperta permezz ta’ trasferimenti minn partiti tal-baġit oħrajn, jew permezz tal-Baġit Emendatorju Nru 9/2020. Għall-miżuri tas-suq fejn intużaw anqas approprjazzjonijiet tal-baġit milli kien mistenni, l-approprjazzjonijiet disponibbli li rriżultaw ġew ittrasferiti għal linji baġitarji oħrajn fi ħdan il-FAEG sabiex ikopru n-nefqa addizzjonali skont kif kien meħtieġ (għad-dettalji dwar it-trasferimenti li saru, ara l-Anness 2).

3.2.1.2.Artikolu 05 02 08: Frott u ħxejjex

Approprjazzjonijiet totali ta’ EUR 902,7 miljun kienu disponibbli biex ikopru l-ħtiġijiet baġitarji tal-miżuri kollha għal dan is-settur. L-Awtorità Baġitarja vvutat approprjazzjonijiet ta’ EUR 700,5 miljun filwaqt li qieset id-dħul stmat assenjat għal dan is-settur (EUR 150 miljun). Barra minn hekk, ġew ittrasferiti EUR 69,8 miljun matul il-baġit għall-2020 minn linji baġitarji oħrajn fi ħdan l-istess kapitolu. Minbarra dan, il-baġit issaħħaħ b’EUR 48,7 miljun permezz tal-Baġit Emendatorju Nru 9/2020. In-nefqa mġarrba mill-Istati Membri fl-2020 kienet tammonta għal EUR 902,7 miljun.

3.2.1.3.Artikolu 05 02 09: Prodotti tas-settur tal-vitikultura

Il-baġit ippreveda EUR 1 026,1 miljun approprjazzjoni sabiex jiġu koperti l-ħtiġijiet stmati tal-miżuri kollha għal dan is-settur. Sar trasferiment ta’ EUR 30,6 miljun sabiex tiġi koperta l-eżekuzzjoni totali li ammontat għal EUR 1 056,7 miljun. In-nefqa tinkludi wkoll il-miżuri ta’ appoġġ adottati minn nofs l-2020, biex jiġi miġġieled l-impatt tal-pandemija tal-COVID-19 fuq is-settur tal-inbid, b’mod partikolari EUR 250,2 miljun għd-distillazzjoni waqt il-kriżi u EUR 21,1 miljun għall-miżuri tal-ħżin waqt il-kriżi.

3.2.1.4.Artikolu 05 02 10: Promozzjoni

Fir-rigward tal-miżuri ta’ promozzjoni, il-pagamenti mill-Istati Membri, is-sottoeżekuzzjoni ta’ EUR 9,3 miljun meta mqabbla mal-ħtiġijiet ibbaġitjati kienet dovuta primarjament għall-pandemija tal-COVID-19. Id-differenza ġiet ittrasferita lejn artikoli baġitarji oħra.

Fir-rigward tal-azzjonijiet ta’ promozzjoni taħt ġestjoni diretta mill-Kummissjoni Ewropea, il-Kummissjoni impenjat approprjazzjonijiet għall-ammont totali previst fil-baġit għal dawn l-azzjonijiet (EUR 100,9 miljun).

3.2.1.5.Artikolu 05 02 11: Prodotti oħrajn tal-pjanti

Ġew ibbaġitjati approprjazzjonijiet ta’ EUR 234,4 miljun li minnhom EUR 232 miljun għall-POSEI (esklużi l-Pagamenti Diretti) skont il-partita tal-baġit 05 02 11 04. Sar trasferiment ta’ EUR 6,7 miljun barra l-artikolu baġitarju.

3.2.1.6.Artikolu 05 02 12: Ħalib u prodotti tal-ħalib

Il-baġit ippreveda approprjazzjonijiet totali disponibbli li jammontaw għal EUR 0,1 miljun sabiex jiġu koperti l-ħtiġijiet tal-miżuri kollha għal dan is-settur, filwaqt li l-eżekuzzjoni kienet ta’ EUR 1 miljun.

B’mod partikolari, sar tisħiħ tal-baġit ta’ EUR 0,9 miljun, prinċipalment għal miżuri ta’ ħżin tal-butir u tal-krema. Miżuri oħrajn, il-ħalib għall-iskejjel u l-miżuri ta’ ħżin għat-trab tal-ħalib xkumat ġew imsaħħa b’ammonti minuri.

3.2.1.7. Artikolu 05 02 13: Ċanga u vitella

Il-baġit ippreveda EUR 50 miljun għal miżuri oħra (linja 99), sabiex tiġi koperta n-nefqa għal miżura eċċezzjonali adottata għal dan is-settur. Il-limitu massimu għal din il-miżura ntuża kważi kollu mill-Istat Membru kkonċernat u l-ammont residwu (EUR 0,5 miljun) ġie ttrasferit barra mill-artikolu. Dan l-artikolu baġitarju kien affettwat ukoll mill-miżuri ta’ ħżin privat li twettqu fil-kuntest tal-pandemija tal-COVID-19. Il-baġit tal-2020 ma ppreveda l-ebda approprjazzjoni għall-miżuri ta’ ħżin taċ-ċanga u tal-vitella filwaqt li ġġarrbet xi nefqa (EUR 0,1 miljun).

3.2.1.8.Artikolu 05 02 15: Laħam tal-majjal, bajd u pollam, trobbija tan-naħal u prodotti oħrajn li ġejjin mill-annimali

Il-baġit ippreveda approprjazzjonijiet li jammontaw għal EUR 71 miljun sabiex jiġu koperti l-ħtiġijiet tal-miżuri kollha għal dan l-artikolu. In-nefqa mġarrba mill-Istati Membri kienet tammonta biss għal EUR 50,0 miljun. Id-differenza ta’ EUR 21 miljun ġiet ittrasferita lejn artikoli baġitarji oħra.

In-nefqa fuq l-għajnuna speċifika għat-trobbija tan-naħal kienet tammonta għal EUR 36,5 miljun meta mqabbla ma’ ħtiġijiet previsti ta’ EUR 39 miljun inklużi fil-baġit.

Mill-“miżuri oħrajn”, EUR 18,5-il miljun ġew ittrasferiti barra mill-artikolu minħabba li ma kienx hemm wisq użu tal-miżuri eċċezzjonali relatati mat-tifqigħat tal-influwenza avjarja fi Stat Membru wieħed.

3.2.1.9.Artikolu 05 02 18: Skemi għall-iskejjel

In-nefqa mġarrba għall-iskemi għall-iskejjel kienet tammonta għal EUR 162,1 miljun meta mqabbla ma’ ħtiġijiet previsti ta’ EUR 215,0 miljun inklużi fil-baġit. Id-differenza (EUR 52,9 miljun) ġiet ittrasferita barra l-artikolu biex tkopri nefqa oħra tal-FAEG. Dan l-użu baxx jirrifletti r-riperkussjonijiet prattiċi li nqalgħu minħabba l-pandemija tal-COVID-19 għall-implimentazzjoni ta’ dawn l-iskemi, b’mod partikolari għad-distribuzzjoni tal-prodotti tal-ħalib u tal-frott u l-ħxejjex b’rabta mas-sena skolastika 2019/2020.

3.2.2.Kapitolu 05 03: Pagamenti diretti

Is-sena finanzjarja 2020 kienet il-ħames sena ta’ implimentazzjoni tas-sistema riformata ta’ pagamenti diretti kif deċiż fir-riforma tal-2013 tal-Politika Agrikola Komuni. Il-pagamenti totali għal dan il-kapitolu tal-baġit kienu jammontaw għal EUR 41 396,4 miljun. Dan jinkludi EUR 462,5 miljun li tħallsu għar-rimborż ta’ pagamenti diretti lill-bdiewa fir-rigward tad-dixxiplina finanzjarja, iffinanzjati minn EUR 466,8 miljun riportati mill-2019 (għad-dettalji, ara l-punt 3.2.2.4). Il-bqija tal-pagamenti li saru, EUR 40 934,0 miljun, ġew iffinanzjati mill-approprjazzjonijiet ivvotati (EUR 40 621 miljun), u mid-dħul assenjat (EUR 1 312-il miljun). Dan tal-aħħar intuża sabiex ikopri n-nefqa mġarrba għall-iskema ta’ pagament bażiku.

L-approprjazzjonijiet totali li ma ntużawx kienu jammontaw għal EUR 537,7 miljun, li minnhom EUR 533,5 miljun ġew riportati għas-sena finanzjarja 2021. Dan jinkludi l-ammont ta’ EUR 478 miljun tar-riżerva għall-kriżijiet li ma ntużatx, li jikkorrispondi mad-dixxiplina finanzjarja applikata b’mod effettiv fl-2020, li ġie ttrasferit għall-artikolu baġitarju 05 03 09 u mbagħad ġie riportat għall-2021 għar-rimborż mill-Istati Membri lill-bdiewa kkonċernati. Il-bilanċ li fadal tad-dħul assenjat miġbur fl-2020 (EUR 55,5 miljun) ġie riportat għall-2021. Fil-partiti fejn il-ħtiġijiet kienu akbar mill-approprjazzjonijiet ivvotati tal-baġit, in-nefqa addizzjonali ġiet koperta permezz ta’ trasferimenti ta’ approprjazzjonijiet ivvotati minn partiti oħrajn tal-baġit jew tad-dħul assenjat.

Fid-dawl tal-kriżi tal-COVID-19, il-Kummissjoni adottat pakkett biex tipprovdi avvanzi miżjuda għall-pagamenti diretti kif ukoll biex il-kontrolli jkunu aktar flessibbli.

3.2.2.1.Artikolu 05 03 01: Pagamenti diretti diżakkoppjati

L-iskemi ewlenin iffinanzjati mill-approprjazzjonijiet ta’ dan l-artikolu huma l-iskema ta’ pagament uniku skont l-erja (SPUE), l-iskema ta’ pagament bażiku (BPS), il-pagament għal prattiki agrikoli li huma ta’ benefiċċju għall-klima u għall-ambjent, il-pagament ridistributtiv u l-pagament għall-bdiewa żgħażagħ. L-iskemi ta’ għajnuna kollha f’dan l-artikolu jitħallsu b’mod indipendenti mill-produzzjoni iżda skont ċerti kundizzjonijiet, pereżempju, ir-rispett tal-kundizzjonalità. L-approprjazzjonijiet disponibbli fl-2020 għal pagamenti diretti diżakkoppjati ammontaw għal EUR 35 459,3 miljun, inklużi l-approprjazzjonijiet ivvutati mill-Awtorità Baġitarja li jammontaw għal EUR34 574,0 miljun, trasferimenti tal-artikolu u tal-kapitolu ta’ EUR 40,1 miljun u d-dħul assenjat li kien jammonta għal EUR 845,2 miljun. In-nefqa mġarrba mill-Istati Membri għall-iskemi kollha f’dan l-artikolu ammontat għal EUR 35 403,7 miljun, li jikkorrispondi għal 99,8 % tal-approprjazzjonijiet disponibbli.

3.2.2.2.Artikolu 05 03 02: Pagamenti diretti oħrajn

L-approprjazzjonijiet ta’ dan l-artikolu kienu jkopru n-nefqa fuq “pagamenti diretti oħrajn”. Dan jinkludi skemi li għalihom xorta jista’ jkun hemm rabta bejn il-pagament u l-produzzjoni, b’kundizzjonijiet iddefiniti sewwa u b’limiti ċari. Bħala konsegwenza tar-riforma tal-2013, l-iskemi miżjuda taħt dan l-Artikolu kienu l-appoġġ akkoppjat volontarju u l-iskema għall-bdiewa żgħar, filwaqt li għadd ta’ linji koprew biss pagamenti residwi relattivament żgħar għal skemi skaduti.

Il-baġit tal-2020 inkluda approprjazzjonijiet ta’ EUR 5 569,0 miljun għal dan l-artikolu baġitarju. L-Istati Membri ġarrbu nefqa li tammonta għal EUR 5 530,0 miljun, li kienet aktar baxxa mill-approprjazzjonijiet imdaħħla fil-baġit.

3.2.2.3.Artikolu 05 03 09: Ir-rimborż tal-pagamenti diretti b’rabta mad-dixxiplina finanzjarja

L-Awtorità Baġitarja ma allokat l-ebda approprjazzjoni għal dan l-artikolu. L-għan ta’ dan l-artikolu huwa li jiġbor l-approprjazzjonijiet ivvotati u mhux impenjati tar-riżerva għall-kriżi mhux użata, riportati biex jiffinanzjaw ir-rimborż tad-dixxiplina finanzjarja applikata għall-pagamenti diretti 6 .

Mill-ammont ta’ EUR 466,8 miljun, li jikkorrispondi mad-dixxiplina finanzjarja applikata matul is-sena finanzjarja 2019 u li ġie riportat għall-baġit tal-2020 għar-rimborż, l-Istati Membri ħallsu lura EUR 462,5 miljun. Id-differenza ta’ EUR 4,3 miljun reġgħet iddaħħlet fil-baġit għall-2020 sabiex tingħata lura lill-Istati Membri permezz ta’ Baġit Emendatorju fis-sena baġitarja li jmiss.

3.2.2.4.Artikolu 05 03 10: Riżerva għall-kriżijiet fis-settur agrikolu

L-approprjazzjonijiet ta’ dan l-artikolu huma maħsuba sabiex ikopru n-nefqa għall-miżuri li għandhom jittieħdu bl-għan li jiġu ffaċċjati l-kriżijiet kbar li jaffettwaw il-produzzjoni jew id-distribuzzjoni agrikola. Ir-riżerva għall-kriżijiet tiġi stabbilita billi, fil-bidu ta’ kull sena, jiġi applikat tnaqqis għall-pagamenti diretti permezz tal-mekkaniżmu ta’ dixxiplina finanzjarja f’konformità mal-Artikoli 25 u 26 tar-Regolament (UE) Nru 1306/2013, kif ukoll f’konformità mal-Artikolu 8 tar-Regolament (UE) Nru 1307/2013 7 . Fl-2020 ir-riżerva għall-kriżijiet ta’ EUR 478,0 miljun ma ntużatx.

Madankollu, fi tmiem l-2020, l-approprjazzjonijiet ivvotati mhux impenjati li jikkorrispondu mal-ammont tad-dixxiplina finanzjarja applikata b’mod effettiv għas-sena tat-talba 2019 ġew ittrasferiti għall-artikolu tal-baġit 05 03 09 sabiex jiġu riportati għas-sena finanzjarja li jmiss għar-rimborż tad-dixxiplina finanzjarja imposta fuq il-bdiewa fis-sena kalendarja 2020.

3.2.3.Kapitolu 05 04: Żvilupp Rurali

Għall-Artikolu 05 04 01 (Tlestija tal-Iżvilupp Rurali ffinanzjata mit-Taqsima tal-Garanziji tal-FAEGG - il-Perjodu ta’ programmazzjoni 2000-2006), l-ammont nett finali rkuprat kien ta’ EUR 0,4 miljun.

3.2.4.Kapitolu 05 07: Awditjar tan-nefqa agrikola

3.2.4.1.Artikolu 05 07 01: Kontroll tan-nefqa agrikola

Dan l-artikolu jinvolvi l-miżuri li ttieħdu sabiex jissaħħu l-mezzi ta’ kontrolli fuq il-post u sabiex jittejbu s-sistemi ta’ verifika bil-għan li jiġi limitat ir-riskju ta’ frodi u ta’ irregolaritajiet għad-detriment tal-baġit tal-Unjoni. Jinkludi wkoll in-nefqa sabiex jiġu ffinanzjati l-korrezzjonijiet possibbli tal-kontabbiltà u tal-konformità favur l-Istati Membri.

L-Unjoni Ewropea ffinanzjat direttament ix-xiri ta’ immaġni bis-satellita fi ħdan il-qafas tal-Amministrazzjoni Integrata u s-Sistema ta’ Kontroll għal ammont ta’ EUR 11,2 miljun.

Il-korrezzjonijiet favur l-Istati Membri wara l-approvazzjoni tal-kontijiet kienu ta’ EUR 5,4 miljun, jiġifieri inqas mill-ammont ibbaġitjat ta’ EUR 17,4 miljun.

Il-korrezzjonijiet favur l-Istati Membri wara l-approvazzjoni tal-konformità tal-kontijiet irriżultaw aktar għolja milli mistenni b’EUR 186,5 miljun minflok l-EUR 176,6 miljun previsti fil-baġit.

3.2.4.2.Artikolu 05 07 02: Soluzzjoni tat-tilwim

L-approprjazzjonijiet f’dan l-artikolu huma maħsuba sabiex ikopru n-nefqa li għaliha l-Kummissjoni tista’ tinżamm responsabbli permezz ta’ deċiżjoni ta’ qorti tal-ġustizzja, inkluż il-kost tal-ħlas għad-danni u l-imgħax. Il-baġit għall-2020 ippreveda approprjazzjonijiet li jammontaw għal EUR 1,0 miljun, li minnhom ġew eżegwiti EUR 0,3 miljun. Il-bqija tal-approprjazzjonijiet ġew ittrasferiti lejn partiti oħra tal-baġit.

3.2.5.Kapitolu 05 08: Strateġija u koordinament tal-politiki

L-approprjazzjonijiet impenjati taħt dan il-kapitolu ammontaw għal EUR 35,1 miljun, filwaqt li l-baġit ippreveda approprjazzjonijiet li jammontaw għal EUR 41,4 miljun. EUR 5 miljun ġew ittrasferiti sabiex ikopru ħtiġijiet barra minn dan il-kapitolu.

4.L-IMPLIMENTAZZJONI TAD-DĦUL ASSENJAT LILL-FAEG

Id-dħul assenjat effettivament riportat mill-2019 għall-2020 ammonta għal EUR 348,2 miljun, u ntuża kompletament għall-finanzjament tan-nefqa tas-sena baġitarja 2020, f’konformità mal-Artikolu 14 tar-Regolament Finanzjarju. Kif ippreżentat fl-anness 3-II, dan l-ammont kopra n-nefqa ta’ EUR 46,1 miljun għall-fondi operazzjonali għall-organizzazzjonijiet tal-produtturi fis-settur tal-frott u l-ħxejjex u n-nefqa ta’ EUR 302,1 miljun għall-iskema ta’ pagament bażiku.

Fir-rigward tad-dħul assenjat miġbur fl-2020, l-anness 3-I juri li dan id-dħul kien jammonta għal EUR 580,7 miljun u li dan kien ġej:

¾mill-proċedura tal-korrezzjonijiet tal-approvazzjoni, EUR 450,9 miljun;

¾mill-irċevuti mill-irregolaritajiet, EUR 127,9 miljun;

¾mill-ġbir tal-imposta fuq il-ħalib, EUR 1,9 miljun.