IL-KUMMISSJONI EWROPEA
Brussell, 20.8.2021
COM(2021) 465 final
RAPPORT TAL-KUMMISSJONI
LILL-PARLAMENT EWROPEW, LILL-KUNSILL U LILL-QORTI TAL-AWDITURI
DWAR IL-FOND TAL-GARANZIJA GĦAL AZZJONIJIET ESTERNI U L-ĠESTJONI TIEGĦU FL-2020
{SWD(2021) 224 final}
Werrej
1.Introduzzjoni
2.Il-Pożizzjoni Finanzjarja u t-Tranżazzjonijiet Sinifikanti tal-Fond ta’ Garanzija
2.1.Il-Qagħda Finanzjarja tal-Fond ta’ Garanzija fil-31 ta’ Diċembru 2020
2.2.Tranżazzjonijiet Sinifikanti mill-Fond fl-2020
2.2.1Sejħiet fuq il-Fond ta’ Garanzija 2020
2.2.2Proviżjonament tal-Fond ta’ Garanzija 2020
2.3.Tranżazzjonijiet sinifikanti wara d-data tar-rapportar (minn tmiem April 2021)
3.Rapporti finanzjarji prekonsolidati tal-Fond
3.1.Pożizzjoni Finanzjarja prekonsolidata fil-31 ta’ Diċembru 2020
3.2.Rapport tal-Introjtu Prekonsolidat
4.Ġestjoni tal-Flus tal-Fond ta’ Garanzija
4.1.Politika ta' Investiment
4.2. Il-prestazzjoni u l-iżviluppi tas-suq fl-2020
5.Talbiet mill-Fond ta’ Garanzija
6.Rimunerazzjoni tal-BEI
1.Introduzzjoni
Ir-Regolament tal-Kunsill (KE, Euratom) Nru 480/2009 tal-25 ta’ Mejju 2009 (“ir-Regolament”) 1 stabbilixxa Fond ta’ Garanzija għall-azzjonijiet esterni ("il-Fond") li jipprovdi riżervi ta’ likwidità biex jitħallsu lura l-kredituri tal-Unjoni fil-każ ta’ inadempjenza mill-benefiċjarji ta’ self maħruġ jew garantit mill-Unjoni Ewropea. Skont l-Artikolu 7 tar-Regolament, il-Kummissjoni fdat il-ġestjoni finanzjarja tal-Fond lill-Bank Ewropew tal-Investiment (il-BEI) skont ftehim iffirmat bejn l-Unjoni Ewropea u l-BEI fil-25 ta’ Novembru 1994, u sussegwentement emendat fit-23 ta’ Settembru 1996, fit-8 ta’ Mejju 2002, fil-25 ta’ Frar 2008 u fid-9 ta’ Novembru 2010 u fit-28 ta’ Settembru 2018 2 (“il-Ftehim”).
L-Artikolu 8 tar-Regolament jitlob lill-Kummissjoni tibgħat rapport lill-Parlament Ewropew, lill-Kunsill u lill-Qorti tal-Awdituri dwar is-sitwazzjoni tal-Fond u l-ġestjoni tal-Fond fi tmiem is-sena kalendarja ta’ qabel għal kull sena finanzjarja sa mhux aktar tard mill-31 ta’ Mejju tas-sena ta’ wara.
Dan ir-rapport flimkien mad-Dokument ta’ Ħidma tal-Persunal tal-Kummissjoni (SWD) jipprovdi din l-informazzjoni. Huwa bbażat fuq data li waslet mill-BEI, b'konformità mal-ftehim.
2.Il-Pożizzjoni Finanzjarja u t-Tranżazzjonijiet Sinifikanti tal-Fond ta’ Garanzija
2.1.Il-Qagħda Finanzjarja tal-Fond ta’ Garanzija fil-31 ta’ Diċembru 2020
Fil-31 ta’ Diċembru 2020 il-Fond ta’ Garanzija laħaq total ta’ EUR 2,855,047,432.59 (EUR 2,828,738,292.88 mill-31 ta’ Diċembru 2019) (ara l-Anness tal-SWD: Rapporti finanzjarji tal-Fond ta' Garanzija kif ipprovduti mill-BEI).
Fl-2020 il-valur totali skont il-karta tal-bilanċ tal-Fond żdied b’madwar EUR 26,31 miljun. Dan huwa spjegat l-aktar kif ġej:
Żidiet:
·Il-kontribuzzjoni mill-baġit tal-UE (ammont ta’ proviżjonament) ta’ EUR 42,34 miljun biex jiġi aġġustat il-Fond għall-ammont fil-mira ta’ 9 % tal-obbligazzjonijiet pendenti totali;
·Ir-riżultat ekonomiku tal-operazzjonijiet finanzjarji ammonta għal EUR 22,26 miljun;
·L-istima tal-portafoll żdiedet bi EUR 13,39 miljun minħabba l-aġġustament skont il-valur fis-suq;
·Ġie irkuprat ammont prelevat storikament ta’ EUR 0,70 miljun minn debitur inadempjenti;
·L-ammont pagabbli lill-BEI għat-tariffi tal-immaniġġjar tal-flus u għat-tariffi tal-awditjar pendenti fil-31 ta’ Diċembru żdiedu b’0,05 miljun.
Tnaqqis:
·L-Interventi tal-Fond biex ikopri l-inadempjenzi fil-pagament għal ammont totali ta’ EUR 52,43 miljun.
2.2.Tranżazzjonijiet Sinifikanti mill-Fond fl-2020
2.2.1Sejħiet fuq il-Fond ta’ Garanzija 2020
Is-Sirja
Fl-2020, il-BEI baqa’ jaffaċċa arretrati fuq self sovran Sirjan. Minħabba f’hekk, u f’konformità mal-Ftehim ta’ Garanzija bejn l-UE u l-BEI, il-BEI għamel 14-il sejħa addizzjonali fuq il-Fond ta’ Garanzija tal-UE sal-31 ta’ Diċembru 2020 għal ammont totali ta’ EUR 52,43 miljun (ara l-punt 5).
2.2.2Proviżjonament tal-Fond ta’ Garanzija 2020
Fi Frar 2020 ġie trasferit ammont ta’ EUR 240,15 miljun mill-baġit lejn il-Fond li jikkorrispondi għall-ammont ta’ proviżjonament għall-2019.
Il-kalkolu tal-kontribuzzjoni mill-baġit tal-UE lejn il-Fond għall-2021 ġie kkalkolat ukoll fi Frar 2020 u rriżulta fit-trasferiment ta’ EUR 42,34 miljun.
Dan ġie kkalkolat skont l-Artikolu 3 u l-Artikolu 5 tar-Regolament:
L-Artikolu 3 tar-Regolament jistabbilixxi l-ammont fil-mira għall-Fond għal 9 % tat-total tal-obbligazzjonijiet tal-kapital pendenti li jirriżultaw minn kull operazzjoni, flimkien ma’ kull imgħax dovut mhux imħallas.
Skont l-Artikolu 5 tar-Regolament, l-ammont li jrid jiġi trasferit mill-baġit għall-Fond fis-sena n + 1 huwa kkalkulat fuq il-bażi tad-differenza bejn l-ammont fil-mira u l-valur tal-assi netti tal-Fond fi tmiem is-sena n - 1, ikkalkulat fil-bidu tas-sena n.
Biex il-Fond jiġi aġġustat għal 9 % tat-total tal-obbligazzjonijiet tal-kapital pendenti, ammont ta’ EUR 42,34 miljun kien ikkalkulat fuq il-bażi tal-operazzjonijiet garantiti pendenti fil-31 ta’ Diċembru 2019 u mdaħħla fil-baġit tal-UE tal-2021 għall-proviżjonament tal-Fond. L-ammont kien approvat mill-Kunsill u mill-Parlament Ewropew u rikonoxxut bħala assi (riċevibbli) tal-Fond fil-karta tal-bilanċ tal-31 ta’ Diċembru 2020.
Il-ħlas ta’ EUR 42,34 miljun lill-Fond ta’ Proviżjonament Komuni (Common Provisioning Fund, CPF) huwa ppjanat li jsir fl-aħħar ta’ Novembru kif miftiehem internament. Huwa relatat direttament mat-trasferiment preċedenti tal-assi tal-GFEA mill-BEI lejn il-Fond ta’ Proviżjonament Komuni (Common Provisioning Fund, CPF) li huwa mistenni li jitwettaq fit-tielet kwart (Q3) (tmiem Lulju) soġġett għall-adozzjoni tar-Regolament NDICI.
2.3.Tranżazzjonijiet sinifikanti wara d-data tar-rapportar (minn tmiem April 2021)
F’Jannar u Marzu 2021, ġew irkuprati ammonti ta’ EUR 498,490.95 u EUR 167,718.31 rispettivament mis-self inadempjenti lill-Ajruport ta’ Enfidha (it-Tuneżija).
F’April 2021, tħallset sejħa fuq il-garanzija ta’ EUR 7,4 miljun għal pagamenti inadempjenti tas-Sirja (b’penali li ġew applikati mill-BEI).
3.Rapporti finanzjarji prekonsolidati tal-Fond
Ir-rapporti finanzjarji prekonsolidati tal-Fond jitħejjew biex jiġu inklużi l-operazzjonijiet tal-kontijiet li ma jkunux inklużi fir-rapporti finanzjarji tal-Fond imħejjija mill-BEI (ara l-SWD). Dawn huma parti mir-rapporti finanzjarji konsolidati tal-UE.
3.1.Pożizzjoni Finanzjarja prekonsolidata fil-31 ta’ Diċembru 2020
Karta tal-bilanċ - Assi
|
Il-31 ta’ Diċembru 2020 |
Il-31 ta’ Diċembru 2019 |
|
|
ASSI MHUX KURRENTI |
2,378,221,641 |
2,312,151,734 |
|
Assi finanzjarji |
2,378,221,641 |
2,312,151,734 |
|
ASSI KURRENTI |
434,485,659 |
277,139,064 |
|
Assi finanzjarji |
415,856,202 |
233,048,865 |
|
Riċevibbli |
1,810,109 |
1,290,863 |
|
Il-flus kontanti u l-ekwivalenti ta’ flus kontanti |
16,819,348 |
42,799,336 |
|
ASSI TOTALI |
2,812,707,300 |
2,589,290,798 |
Karta tal-bilanċ - Obbligazzjonijiet
|
Il-31 ta’ Diċembru 2020 |
Il-31 ta’ Diċembru 2019 |
|
|
RIŻORSI TAL-KONTRIBUTURI |
2,609,255,287 |
2,407,419,308 |
|
Il-kontribuzzjoni tal-Kummissjoni Ewropea |
2,190,348,119 |
1,950,195,297 |
|
Riżerva ta’ valur ġust |
34,252,128 |
20,859,023 |
|
Qligħ miżmum |
384,655,040 |
436,364,988 |
|
OBBLIGAZZJONIJIET MHUX KURRENTI |
82,892,623 |
111,685,549 |
|
Provvedimenti finanzjarji |
82,892,623 |
111,685,549 |
|
OBBLIGAZZJONIJIET KURRENTI |
120,559,388 |
70,185,941 |
|
Provvedimenti finanzjarji |
29,880,034 |
49,709,547 |
|
Obbligazzjonijiet tal-garanziji finanzjarji |
89,750,000 |
19,590,000 |
|
Ammonti pagabbli |
929,354 |
886,394 |
|
RIŻORSI TOTALI TAL-KONTRIBUTURI + OBBLIGAZZJONIJIET |
2,812,707,300 |
2,589,290,798 |
Id-differenza ta’ EUR 42,34 miljun bejn il-valur totali tal-karta tal-bilanċ prekonsolidata tal-Fond (EUR 2,812,707,300) u l-valur tal-Fond fir-rapporti finanzjarji mħejjija mill-BEI (EUR 2,855,047,433) tista’ tiġi spjegata l-aktar bil-punti li ġejjin:
·Il-Karta tal-bilanċ prekonsolidata (assi) tinkludi:
§l-ammonti kollha surrogati lill-UE bħala riżultat tal-pagamenti ta’ garanzija lill-BEI jsejħu għal pagamenti parzjali ta’ self inadempjenti (arretrati dovuti flimkien mal-imgħax akkumulat fuq pagamenti li jsiru tard). Madankollu, fid-dawl tas-sitwazzjoni politika tas-Sirja u fuq il-bażi tad-deċiżjoni tal-Uffiċjal tal-Kontabilità tal-KE, dawn l-ammonti ġew kompletament indeboliti fir-rapporti finanzjarji tal-2020.
·Il-karta tal-bilanċ prekonsolidata ma tinkludix:
§Il-provvedimenti finanzjarji ta’ EUR 112,8 miljun relatati ma’ pagamenti parzjali futuri tas-self pendenti Sirjan li għad baqa’ ġew rikonoxxuti fil-karta tal-bilanċ prekonsolidata fl-2020.
§Ammont ta’ EUR 42,34 miljun mill-kontribuzzjoni mill-baġit tal-UE lejn il-Fond ta’ Proviżjonament Komuni (Common Provisioning Fund, CPF) billi dan ir-riċevibbli huwa paċut mill-ammont pagabbli korrispondenti fil-kontijiet konsolidati tal-UE.
·Il-pagamenti ta’ sejħiet mill-Fond ta’ Garanzija għall-BEI (u fejn applikabbli l-irkupri suċċessivi tas-sejħiet u imgħax ta’ inadempjenza) huma rikonoxxuti bħala tnaqqis (żidiet) tal-Assi Netti (kontribuzzjoni tal-UE) fir-rapporti finanzjarji mħejjija mill-BEI. Fir-rapporti finanzjarji prekonsolidati, l-ammonti mħallsa għal sejħiet tal-BEI ma jitnaqqsux mill-Assi Netti billi jsiru ammonti surrogati. L-ammonti relatati huma jew kontabilizzati bħala dħul (imgħax ta’ inadempjenza u penali li jsiru dovuti, qligħ mill-kambju barrani) jew bħala spejjeż (provvedimenti, insuffiċjenza, obbligazzjoni għal garanzija finanzjarja, telf mill-kambju barrani). Dan iwassal għal differenza permanenti bejn il-partiti tal-Assi Netti (Kontribuzzjoni tal-UE u Qligħ imfaddal) rikonoxxuta fir-rapporti finanzjarji mħejjija mill-BEI u fir-rapporti finanzjarji prekonsolidati imħejjija mill-KE.
3.2.Rapport tal-Introjtu Prekonsolidat
Hekk kif isir għall-karta tal-bilanċ, ir-Rapport tal-Introjtu prekonsolidat jitħejja u jiġi inkluż fir-Rapporti Finanzjarji konsolidati tal-UE.
|
2020 |
2019 |
|
|
Dħul minn attivitajiet operatorji |
0 |
266,252 |
|
Nefqiet minn attivitajiet operatorji |
(3,460,002) |
(3,494,876) |
|
RIŻULTAT MINN ATTIVITAJIET OPERATORJI |
(3,460,002) |
(3,228,615) |
|
Introjtu finanzjarju |
42,933,660 |
42,681,966 |
|
Spejjeż finanzjarji |
(91,183,606) |
(39,575,953) |
|
RIŻULTAT FINANZJARJU |
(48,249,946) |
3,106,013 |
|
RIŻULTAT EKONOMIKU TAS-SENA |
(51,709,948) |
(122,602) |
·L-ispejjeż mill-attivitajiet operattivi jinkludu prinċipalment it-tariffi tal-ġestjoni tal-assi tal-BEI (EUR 0,8 miljun), żidiet mal-provvedimenti finanzjarji fuq il-pagamenti parzjali pendenti Sirjani tal-futur (EUR 1,1 miljun u telf mill-kambju (EUR 1,2 miljun).
·Id-Dħul Finanzjarju jinkludi l-iktar id-dħul mill-imgħax mill-portafoll tal-investiment (EUR 6,8 miljun), qligħ realizzat fuq bejgħ ta’ assi finanzjarji (EUR 8,8 miljun), remunerazzjoni relatata mar-riskju minn mandat privat ERI (EUR 9.1 miljun) u mgħax għal ħlas tardiv akkumulat fuq ammonti surrogati (EUR 18,1 miljun).
·L-Ispejjeż Finanzjarji jinkludu l-aktar it-telf minn indeboliment (EUR 19,6 il miljun) fuq ammonti surrogati lill-UE fl-2020 (ara l-punt 5), telf realizzat fuq bejgħ ta’ assi finanzjarji (EUR 1,4 miljun) u obbligazzjoni ta’ garanzija finanzjarja rikonoxxuta fuq operazzjonijiet ta’ mandat privat tal-ERI (EUR 70,2 miljun).
4.Ġestjoni tal-Flus tal-Fond ta’ Garanzija
4.1.Politika ta' Investiment
L-assi likwidi tal-Fond huma investiti skont il-prinċipji ta’ ġestjoni stipulati fl-Anness tal-Ftehim ta’ Ġestjoni, kif emendat 3 . B’konformità ma’ dan, se jitpoġġew biżżejjed assi f’assi monetarji biex jiġu koperti l-flussi ta’ ħruġ fuq żmien qasir (anqas minn sena waħda), bi proporzjon li jrid jiġi stabbilit fl-istrateġija annwali tal-investiment. L-assi li jifdal jistgħu jiġu allokati lil strumenti ta’ terminu qasir u medju, b’maturità massima ta’ 10 snin u sitt xhur mid-data tal-pagament (portafoll fuq terminu medju u twil). Sa tmiem l-2020, it-tul ta’ żmien globali modifikat tal-portafoll tal-Fond kien ta’ madwar tliet snin.
4.2.Il-prestazzjoni u l-iżviluppi tas-suq fl-2020
Il-prestazzjoni tal-portafoll tal-Fond kien immonitorjat fuq bażi ta’ prezzar skont il-valur tas-suq. Matul l-2020, il-portafoll tal-Fond irriżulta f’redditu ta’ 1,074 %, u qabeż il-valur referenzjarju bi 28,6 bps. Il-prestazzjoni ssawret mill-volatilità għolja filwaqt li l-ambjent ta’ rendiment aktar baxx kompla, appoġġat mill-pożizzjoni akkomodanti tal-politika fiskali u monetarja matul il-pandemija. Ir-redditu pożittiv issarraf f’kontribuzzjoni pożittiva ta’ EUR 30 miljun. Sa minn tmiem l-2020, il-valur tas-suq tal-portafoll tal-Fond kien ta’ madwar EUR 2,810 miljun.
Il-pandemija ħolqot sfidi għal għarrieda u mingħajr paragun għall-ekonomija globali. Il-miżuri biex titrażżan il-firxa tal-virus kellhom effett negattiv qawwi fuq l-attività ekonomika, tnaqqis fil-kummerċ globali u żieda fil-volatilità tas-suq finanzjarju. Partijiet kbar tal-ekonomija globali kienu fil-lockdowns, li żiedu l-inċertezza tal-konsumatur u dgħajfu d-domanda, irriżultaw fl-aktar impatt negattiv li qed jinħass mis-setturi tas-servizzi filwaqt li l-manifattura kienet aktar reżiljenti.
Il-qagħda tal-politika monetarja u fiskali baqgħet ta’ appoġġ. Fiż-Żona tal-Euro, il-BĊE introduċa Programm ta’ Xiri tal-Assi Pandemiċi temporanju ġdid għal total ta’ EUR 1850 biljun, li jikkomplementa l-Programmi ta’ Xiri ta’ Assi (Asset Purchases Programmes, APP) eżistenti. Ingħatat akkomodazzjoni monetarja addizzjonali permezz tal-iffaċilitar tal-kundizzjonijiet għal Operazzjoni ta’ Rifinanzjament fit-Tul (Long Term Refinancing Operation, LTRO) u Operazzjonijiet Immirati ta’ Rifinanzjament fit-Tul (Targeted Long Term Refinancing Operation, TLTRO) u l-estensjoni tal-APP bil-pakkett temporanju addizzjonali ta’ EUR 120 biljun. Fl-Istati Uniti tal-Amerka, il-Federal Reserve introduċiet sett ta’ miżuri biex tistabbilizza s-swieq u tistimula t-tkabbir, inklużi ż-żewġ faċilitajiet ġodda (il-Faċilità ta’ Kreditu Korporattiv tas-Suq Primarju u Sekondarju), filwaqt li neħħiet il-limiti fuq ix-xiri ta’ assi ppjanat skont il-QE u minn Marzu 2020 qatgħet ir-rata b’1,5 punti perċentwali, li issa qarrbet lejn iż-żero.
Is-swieq finanzjarji kellhom prestazzjoni relattivament tajba lejn l-aħħar tal-2020, bis-saħħa ta’ sentiment tar-riskju mtejjeb u l-aħbarijiet tajba relatati mal-iżvilupp tat-tilqim u tal-ottimiżmu dwar il-pakkett ta’ stimolu fiskali wara l-elezzjonijiet presidenzjali tal-Istati Uniti tal-Amerka. Fl-Ewropa, l-introduzzjoni tal-programm NextGenerationEU (NGEU) u appoġġ biex jittaffew ir-Riskji ta’ Qgħad f’Emerġenza (Support to mitigate Unemployment Risks in an Emergency, SURE) kompliet issaħħaħ il-miżuri fiskali fil-livell nazzjonali, u għenet biex jinkiseb il-momentum u jitnaqqsu l-firxiet. F’dan l-isfond, ir-rati u l-kreditu fiż-Żona tal-Euro komplew jonqsu, għalkemm b’pass aktar kajman minn qabel, filwaqt li r-rendiment fit-tul tat-Teżor kien ogħla.
5.Talbiet mill-Fond ta’ Garanzija
Is-Sirja
Fid-dawl tad-deterjorament tas-sitwazzjoni fis-Sirja, il-Kunsill tal-Affarijiet Barranin, il-Parlament Ewropew u l-Kunsill ħadu deċiżjonijiet fl-2011 li jipprojbixxu żborzi mill-BEI b’rabta mal-ftehimiet ta’ self eżistenti kif ukoll li jissospendu l-kuntratti ta’ assistenza teknika tal-BEI għal proġetti sovrani fis-Sirja. Il-miżuri restrittivi ġew suċċessivament minquxa fir-Regolament tal-Kunsill (UE) Nru 36/2012 tat-18 ta’ Jannar 2012, kif emendat.
B'hekk, il-BEI ma pprova jagħmel l-ebda operazzjoni ta' finanzjament ġdida minn Mejju 2011 'il quddiem u l-iżborżi kollha li għaddejjin bħalissa u s-servizzi ta’ assistenza teknika lis-Sirja ilhom sospiżi minn Novembru 2011 sa ma jingħata avviż ieħor.
Minn Novembru 2011, il-BEI qed jiffaċċja arretrati fuq self sovran li ngħata lis-Sirja. B’hekk, u f’konformità mal-ftehimiet ta’ garanzija rilevanti bejn l-UE u l-BEI, il-BEI għamel 91 sejħa fuq il-Fond ta’ Garanzija tal-UE sal-31 ta’ Diċembru 2020 għal ammont totali ta’ EUR 528,39 miljun (inklużi l-penali applikati mill-BEI u l-ammonti rkuprati).
6.Rimunerazzjoni tal-BEI
Ir-rimunerazzjoni tal-BEI hija komposta mit-tariffi ta’ ġestjoni u mit-tariffi tal-irkupru. It-tariffi ta’ ġestjoni jkopru l-ġestjoni tal-Fond. It-tariffi ta’ rkupru jkopru n-nefqiet tal-irkupru estern tal-BEI rigward talbiet wara inadempjenzi koperti mill-garanzija tal-UE għall-operazzjonijiet finanzjarji tal-BEI barra mill-Unjoni.
It-tieni Ftehim Supplimentari għall-Ftehim tat-8 ta’ Mejju 2002 jistabbilixxi li t-tariffi ta’ ġestjoni tal-Bank għandhom jiġu kkalkulati bl-applikazzjoni ta’ rati annwali digressivi għal kull segment tal-assi tal-Fond. Din ir-rimunerazzjoni hija kkalkulata fuq il-bażi tal-medja annwali tal-assi tal-Fond.
It-tariffi ta’ ġestjoni tal-Bank għall-2020 ġew iffissati għal EUR 837,634 u ddaħħlu bħala spiża fir-Rapport tal-Introjtu u bħala dovuti (obbligazzjonijiet) fil-Karta tal-Bilanċ.
Il-Ftehim ta’ Rkupru li ġie ffirmat bejn il-Kummissjoni u l-Bank f’Diċembru 2018 jipprevedi biss il-ħlas tal-infiq tal-irkupru estern (u m’għadux jinkludi l-intern) tal-BEI.