IL-KUMMISSJONI EWROPEA

Brussell, 30.6.2021

COM(2021) 381 final

Komunikazzjoni tal-Kummissjoni lill-Parlament Ewropew, lill-Kunsill u lill-Qorti tal-Awdituri - Il-Kontijiet Annwali tal-Unjoni Ewropea 2020

WERREJ

DAĦLA    

IL-PUNTI EWLENIN FINANZJARJI TAS-SENA    

NOTA LI TAKKUMPANJA L-KONTIJIET KONSOLIDATI    

RAPPORTI FINANZJARJI KONSOLIDATI U NOTI TA’ SPJEGAZZJONI    

IL-KARTA BILANĊJALI    

RAPPORT TAL-INTROJTU    

RAPPORT TAL-FLUSS TAL-FLUS    

DIKJARAZZJONI TAL-BIDLIET FL-ASSI NETTI    

NOTI GĦAR-RAPPORTI FINANZJARJI    

RAPPORTI DWAR L-IMPLIMENTAZZJONI BAĠITARJA U NOTI TA’ SPJEGA    

GLOSSARJU    

LISTA TA’ ABBREVJAZZJONIJIET    

DAĦLA

L-2020 kienet sena straordinarja, tħares kif tħares lejha: Quddiem l-isfidi ekonomiċi u politiċi kkawżati mill-pandemija tal-coronavirus, l-Unjoni Ewropea kellha tirreaġixxi b’soluzzjonijiet u b’ħeffa mingħajr preċedent. Il-Kummissjoni Ewropea ilha taħdem fuq il-fronti kollha biex issalva l-ħajjiet u l-għajxien, biex tappoġġa s-sistemi tas-saħħa nazzjonali u l-kumpaniji, biex trawwem l-irkupru u r-reżiljenza. Immobilizzajna l-mezzi kollha għad-dispożizzjoni tagħna biex ngħinu lill-Istati Membri jikkoordinaw ir-reazzjonijiet nazzjonali tagħhom u biex ngħinu lil dawk l-aktar milquta mill-kriżijiet, bl-użu ta’ strumenti bħall-Inizjattiva ta’ Investiment fir-Rispons għall-Coronavirus jew SURE (Appoġġ biex jittaffew ir-Riskji ta’ Qgħad f’Emerġenza). Taħt SURE ammont ta’ EUR 39,5 biljun minn total ta’ EUR 100 biljun diġà ġie żborżat fl-2020 lill-Istati Membri affettwati biex jindirizzaw żidiet f’daqqa fin-nefqa pubblika għall-preservazzjoni tal-impjiegi. Fl-2021 imbagħad saru aktar żborżi sostanzjali.

Madankollu, filwaqt li tiġġieled il-pandemija, l-Unjoni Ewropea wettqet l-objettivi ta’ politika tagħha, b’enfasi fuq iż-żgħażagħ, l-impjiegi u t-tkabbir, kif ukoll it-tibdil fil-klima. Il-miżuri maħsuba biex jappoġġaw it-tkabbir ekonomiku u jnaqqsu l-lakuni ekonomiċi bejn ir-reġjuni kienu jammontaw għal kważi nofs il-fondi impenjati. Il-finanzjament tal-UE kkontribwixxa EUR 29,7 biljun għal reġjuni inqas żviluppati u EUR 16,4 biljun għar-riċerka u l-innovazzjoni taħt Orizzont 2020. Barra minn hekk, il-baġit tal-UE għall-2020 għen l-agrikoltura u ż-żoni rurali taħt il-Fond Agrikolu Ewropew ta’ Garanzija u l-Fond Agrikolu għall-Iżvilupp Rurali b’impenji totali ta’ EUR 59 biljun. Il-baġit tal-2020 kien il-baġit finali tal-qafas finanzjarju pluriennali attwali, b’implimentazzjoni tal-baġit li tammonta għal EUR 181,7 biljun f’impenji magħmula – żieda fil-valur għall-Ewropej kollha.

Fl-aħħar nett, l-2020 kienet ukoll is-sena tal-ftehim dwar il-baġit fit-tul tal-UE għall-2021–2027 ta’ EUR 1,074 triljun (fi prezzijiet tal-2018), imsaħħa b’EUR 750 biljun permezz ta’ NextGenerationEU, strument temporanju biex jagħti spinta lill-irkupru u jmexxi t-tranżizzjoni lejn Ewropa aktar sostenibbli u diġitali.

Huwa l-pjaċir tiegħi li nippreżenta l-kontijiet annwali tal-Unjoni Ewropea għas-sena 2020. Huma jipprovdu ħarsa ġenerali sħiħa lejn il-finanzi tal-UE u lejn l-implimentazzjoni tal-baġit tal-UE għas-sena li għaddiet, inkluża informazzjoni dwar l-obbligazzjonijiet kontinġenti, l-impenji finanzjarji u l-obbligi l-oħra tal-Unjoni. Il-kontijiet annwali konsolidati tal-Unjoni Ewropea huma parti mill-pakkett integrat ta’ rappurtar finanzjarju u tar-responsabbiltà tal-Kummissjoni u jiffurmaw parti essenzjali mis-sistema ta’ responsabbiltà finanzjarja żviluppata ħafna tagħna.

Johannes Hahn

Il-Kummissarju għall-Baġit u r-Riżorsi Umani

IL-PUNTI EWLENIN FINANZJARJI TAS-SENA

L-objettiv tal-Analiżi tar-Rapporti Finanzjarji, li tħejjiet abbażi tal-prinċipji deskritti fil-Linja Gwida dwar il-Prattika Rakkomandata (RPB) tal-IPSASB 2 “Diskussjoni u Analiżi tar-Rapporti Finanzjarji” huwa li tgħin lill-qarrejja jifhmu kif l-attivitajiet operazzjonali, finanzjarji u ta’ investiment tal-UE huma riflessi fl-elementi differenti tar-rapporti finanzjarji konsolidati tal-UE. L-informazzjoni ppreżentata f’din it-taqsima ma ġietx awditjata.

Jenħtieġ li jiġi nnotat li minħabba l-ittondjar taċ-ċifri f’miljuni ta’ euro, xi data finanzjarja fit-tabelli ta’ hawn taħt tista’ tidher li ma taqbilx fl-għadd finali.

WERREJ

1.    ĊIFRI EWLENIN 2020    

2.    IR-RISPONS GĦALL-CORONAVIRUS    

2.1.    Il-punti ewlenin tar-rispons tal-UE għall-coronavirus    

2.2.    Inizjattivi ta’ rispons taħt il-qafas finanzjarju pluriennali (QFP) tal-2014-2020 u taħt il-programm SURE    

3.    IL-BAĠIT FIT-TUL TAL-UE GĦALL-2021-2027 U L-ISTRUMENT EWROPEW GĦALL-IRKUPRU    

4.    IT-TLUQ TAR-RENJU UNIT MILL-UNJONI EWROPEA    

4.1.    Sfond    

4.2.    Sehem tar-Renju Unit    

4.3.    Il-kontijiet annwali tal-UE: Ammonti dovuti mir-Renju Unit u lilu skont il-Ftehim dwar il-Ħruġ    

5.    SOMMARJU TAL-IMPLIMENTAZZJONI TAL-BAĠIT    

6.    STRUMENTI FINANZJARJI U GARANZIJI BAĠITARJI    

6.1.    Strumenti finanzjarji ffinanzjati mill-baġit tal-UE    

6.2.    Assi finanzjarji miżmuma f’fondi ta’ garanzija għall-garanziji baġitarji    

6.3.    Is-self u t-teħid b’self relatat għall-programmi ta’ assistenza finanzjarja    

6.4.    Obbligazzjonijiet kontinġenti baġitarji għal programmi ta’ assistenza finanzjarja    

7.    ANALIŻI TAR-RAPPORTI FINANZJARJI    

7.1.    DĦUL    

7.2.    SPEJJEŻ    

7.3.    ASSI    

7.4.    OBBLIGAZZJONIJIET    

8.    QAFAS POLITIKU U FINANZJARJU, GOVERNANZA U AKKONTABBILTÀ TAL-UE    

8.1.    QAFAS POLITIKU U FINANZJARJU    

8.2.    GOVERNANZA U AKKONTABBILTÀ    

0.ĊIFRI EWLENIN 2020

1.IR-RISPONS GĦALL-CORONAVIRUS

1.0.Il-punti ewlenin tar-rispons tal-UE għall-coronavirus

Mit-tifqigħa tal-pandemija tal-COVID-19, il-Kummissjoni Ewropea ħadet azzjoni determinata biex issaħħaħ is-setturi tas-saħħa pubblika u ttaffi l-impatt soċjoekonomiku fl-Unjoni Ewropea. Abbażi tal-qafas finanzjarju pluriennali (QFP) tal-2014-2020, il-Kummissjoni Ewropea mmobilizzat il-mezzi kollha għad-dispożizzjoni tagħha biex tgħin lill-Istati Membri jikkoordinaw ir-risponsi nazzjonali tagħhom u pprovdiet informazzjoni oġġettiva dwar it-tixrid tal-virus u dwar sforzi effettivi biex dan jitrażżan.

Skeda ta’ żmien tal-azzjonijiet meħuda 1

1.1.Inizjattivi ta’ rispons taħt il-qafas finanzjarju pluriennali (QFP) tal-2014-2020 u taħt il-programm SURE

L-interventi tal-Unjoni Ewropea skont il-QFP tal-2014-2020 biex tiġi miġġielda l-pandemija tal-COVID-19 varjaw minn azzjonijiet immedjati bħall-finanzjament ta’ provvista medika urġenti u ż-żieda fil-kumulazzjoni ta' riżerva medika, għall-introduzzjoni ta’ aktar flessibbiltà fir-rigward tal-użu tal-appoġġ finanzjarju mill-Fondi Strutturali u ta’ Investiment Ewropej, u l-provvediment ta’ self b’termini favorevoli kemm għall-Istati Membri kif ukoll għas-sħab tat-tkabbir u tal-viċinat. Fl-2020, l-appoġġ dirett totali mill-baġit tal-UE ammonta għal madwar EUR 70 biljun. Dan ikopri impenji li jistgħu jiġu ridiretti lejn azzjonijiet relatati mal-COVID-19, li minnhom EUR 66 biljun ġew minn riallokazzjoni u minn riprijoritizzazzjoni fi ħdan il-programmi eżistenti u EUR 4 biljun minn tisħiħ baġitarju. L-inizjattivi ewlenin huma spjegati f’aktar dettall hawn taħt.

1.1.0.Attivazzjoni tal-Istrument għall-Appoġġ ta’ Emerġenza (SIE)

Minħabba l-profondità tal-kriżi wara l-pandemija tal-COVID-19, kif ukoll il-firxa u n-natura tal-ħtiġijiet li jeħtieġu appoġġ mill-baġit tal-UE, l-UE attivat mill-ġdid l-istrument SIE għal perjodu ta’ 2 snin biex tiffinanzja n-nefqa meħtieġa biex tiġi indirizzata l-pandemija tal-COVID-19 għall-perjodu mill-1 ta’ Frar 2020 sal-31 ta’ Jannar 2022 (ara r-Regolament tal-Kunsill (UE) 2016/369 tal-15 ta’ Marzu 2016) 2 . Biex ikompli dan l-objettiv, il-baġit tal-2020 ġie emendat 3 . B’kunsiderazzjoni wkoll ta’ DEC 13/2020 adottata fl-24 ta’ Lulju 2020, ġew allokati għall-istrument SIE għall-2020 EUR 2,7 biljun f’approprjazzjonijiet ta’ impenn u EUR 2,6 biljun f’approprjazzjonijiet ta’ pagament. Ir-riattivazzjoni se tippermetti lill-Unjoni tuża miżuri li jipprevjenu u li jtaffu konsegwenzi serji fi Stat Membru wieħed jew aktar u tindirizza, b’mod koordinat, il-ħtiġijiet relatati mal-pandemija tal-COVID-19, billi tikkumplimenta kwalunkwe assistenza pprovduta taħt strumenti oħrajn tal-UE. L-istrument huwa ġestit b’mod ċentrali mill-Kummissjoni u jiffoka l-aktar fuq akkwist dirett u għotjiet, ikkumplimentat f’ċerti każijiet b’azzjonijiet implimentati permezz ta’ msieħba bħal organizzazzjonijiet internazzjonali.

Fl-2020, il-Kummissjoni ffirmat ftehimiet ta’ xiri bil-quddiem ma’ għadd ta’ kumpaniji farmaċewtiċi. Il-ftehimiet ta’ xiri bil-quddiem jgħinu biex jitnaqqas ir-riskju marbut mal-investimenti magħmula mill-manifatturi fl-iżvilupp ta’ vaċċini potenzjali jew li għandhom bħala għan il-garanzija tal-provvisti, u b’hekk li jiġu massimizzati l-possibbiltajiet li jiġu żviluppati, immanifatturari u użati vaċċini sikuri u effettivi malajr, u li jiġi żgurat li ċ-ċittadini tal-UE jkollhom aċċess għalihom. Il-Kummissjoni nnegozjat ma’ kumpaniji tal-prodotti farmaċewtiċi f’isem l-Istati Membri tal-UE, u dan wassal għall-iffirmar inizjali ta’ sitt ftehimiet, b’iktar taħditiet esploratorji ma’ manifatturi addizzjonali tal-vaċċini li bdew fl-2020 u li għadhom għaddejjin fl-2021. L-ewwel vaċċin li ngħata awtorizzazzjoni kondizzjonali għat-tqegħid fis-suq, fil-21 ta’ Diċembru 2020, ġie prodott minn BioNTech/Pfizer. Id-distribuzzjoni tiegħu bdiet ftit jiem wara, mat-tnedija tal-Jiem tal-Vaċċinazzjoni tal-UE fis-27, fit-28 u fid-29 ta’ Diċembru 2020. Din l-awtorizzazzjoni ngħatat wara rakkomandazzjoni xjentifika pożittiva bbażata fuq valutazzjoni bir-reqqa tas-sikurezza, tal-effettività u tal-kwalità tal-vaċċin imwettqa mill-Aġenzija Ewropea għall-Mediċini, u din ġiet approvata mill-Istati Membri.

Mill-31 ta’ Diċembru 2020, il-Kummissjoni kkuntrattat 1 965 miljun doża (li minnhom 1 305 miljun fissi u 660 miljun fakultattivi).

Fl-2021, il-Kummissjoni kkuntrattat 2 400 miljun doża oħra (fissi jew fakultattivi). Madankollu, dawn id-dożi se jitħallsu kompletament mill-Istati Membri kkonċernati, mingħajr ebda effett fuq il-baġit tal-UE.

1.1.1.Appoġġ għar-riċerka

Fl-4 ta’ Mejju 2020, l-UE u s-sħab tagħha ospitaw konferenza internazzjonali b’appell għal wegħdiet li ġabret EUR 9,8 biljun f’wegħdiet minn donaturi minn madwar id-dinja biex tingħata spinta lill-kooperazzjoni globali fuq ir-riċerka dwar il-coronavirus. Inkluż ma’ dan kien hemm wegħda ta’ EUR 1,4 biljun mill-Kummissjoni, li EUR 1 biljun minnhom ġejjin minn Orizzont 2020.

L-UE għandha rwol ċentrali fl-appoġġ u fil-koordinazzjoni tar-riċerka fuq il-mard infettiv, b’EUR 4,1 biljun investiti mill-2007 sal-2019 permezz tas-Seba’ Programm Qafas u Orizzont 2020, b’impenji ulterjuri fl-2020, flimkien mal-wegħda ta’ EUR 1 biljun għar-riċerka dwar il-coronavirus. Ċifri aġġornati tal-finanzjament kollu mwiegħed u diġà mobilizzat taħt Orizzont 2020 bħala kontribut għall-maratona ta’ wegħdiet tar-Rispons Globali għall-Coronavirus huma disponibbli online. 4

Barra minn hekk, fit-3 ta’ Marzu 2020, l-Inizjattiva dwar il-Mediċini Innovattivi (IMI) appoġġata permezz tal-Programm Qafas għar-Riċerka u l-Innovazzjoni, Orizzont 2020 tal-Kummissjoni Ewropea, nediet sejħa rapida speċjali għall-“Iżvilupp tat-terapewtiċi u tad-dijanjostika fil-ġlieda kontra l-infezzjonijiet bil-coronavirus” b’kontribuzzjoni tal-UE ta’ EUR 45 miljun, li sussegwentement żdiedet għal EUR 72 miljun.

Fl-aħħar nett, fit-8 ta’ Ġunju 2020, il-Kummissjoni tat kważi EUR 166 miljun, permezz tal-Proġett Pilota Aċċeleratur tal-Kunsill Ewropew tal-Innovazzjoni (EIC), lil 36 kumpanija stabbiliti biex jiġġieldu l-pandemija tal-coronavirus.

1.1.2.It-tisħiħ ulterjuri tal-Mekkaniżmu tal-UE għall-Protezzjoni Ċivili (UCPM/rescEU)

1.1.3.Inizjattiva ta’ Investiment fir-Rispons għall-Coronavirus (CRII u CRIIplus)

Waħda mill-ewwel miżuri mnedija mill-UE, biex l-Istati Membri jiġu appoġġati finanzjarjament fir-rispons tagħhom għall-kriżi kienet is-CRII, implimentata mir-Regolament 2020/460 tal-Parlament Ewropew u tal-Kunsill tat-30 ta’ Marzu 2020. Permezz tal-mobilizzazzjoni ta’ flus mhux minfuqa li diġà kienu ġew allokati lill-Istati Membri tal-UE, l-inizjattiva tat spinta immedjata ta’ likwidità lill-baġits tal-Istati Membri u tar-reġjuni u għenithom jużaw il-finanzjament tal-politika ta’ koeżjoni biex jiffinanzjaw in-nefqa fuq il-kura tas-saħħa u l-iskemi tax-xogħol għal żmien qasir, u joffru appoġġ bil-kapital operatorju lil intrapriżi żgħar u medji. Il-kamp ta’ applikazzjoni tal-Fond ta’ Solidarjetà tal-Unjoni Ewropea ġie estiż ukoll biex ikopri emerġenzi maġġuri tas-saħħa pubblika, u b’hekk l-Istati Membri jkunu jistgħu jirċievu appoġġ taħt dan il-fond biex jgħinhom jindirizzaw il-pandemija tal-COVID-19.

Minn April, il-CRIIplus, implimentat bir-Regolament 2020/558 tal-Parlament Ewropew u tal-Kunsill tal-23 ta’ April 2020, għamilha aktar sempliċi li jsir użu malajr mill-Fondi Strutturali u ta’ Investiment Ewropej eżistenti għal miżuri relatati mal-kriżi, u għamilha possibbli li l-kontribut tal-UE għall-programmi tal-politika ta’ koeżjoni jiżdied sa 100 % għall-applikazzjonijiet għall-pagamenti ppreżentati bejn l-1 ta’ Lulju 2020 u t-30 ta’ Ġunju 2021.

F’Diċembru, il-Kummissjoni ħabbret ir-riżultati tal-2020 taż-żewġ inizjattivi. Mill-bidu tal-kriżi, l-UE mmobilizzat finanzjament sinifikanti biex tiġġieled l-effetti tal-pandemija. L-intrapriżi żgħar u medji bbenefikaw mill-biċċa l-kbira tal-finanzjament disponibbli, jiġifieri iktar minn EUR 10 biljun, li għen lin-negozji biex ma jfallux. Ġew diretti EUR 3 biljun liċ-ċittadini, inkluż bil-provvediment ta’ servizzi soċjali lil gruppi vulnerabbli u skemi ta’ impjieg temporanju għall-ħaddiema. Fl-aħħar nett, ingħataw EUR 7 biljun bħala appoġġ lis-settur tas-saħħa, flimkien mal-EUR 10,2 biljun mill-baġit tal-UE li kien diġà ġie allokat lil dan il-qasam għas-snin 2014-2020 (tista’ tinnota li hemm xi trikkib bejn il-gruppi ta’ benefiċjarji).

1.1.4.Assistenza għat-tkabbir, għas-sħab tal-viċinat u lil hinn minnhom

1.1.5.Appoġġ Temporanju biex jittaffew ir-Riskji ta’ Qgħad f’Emerġenza (SURE) wara t-tifqigħa tal-COVID-19

2.IL-BAĠIT FIT-TUL TAL-UE GĦALL-2021-2027 U L-ISTRUMENT EWROPEW GĦALL-IRKUPRU

Fl-2020, l-UE pprovdiet rispons mingħajr preċedent għall-kriżi tal-coronavirus li laqtet lill-Ewropa u lid-dinja. Fil-qalba tiegħu huwa pakkett ta’ stimolu li jiswa EUR 2,018 triljun fi prezzijiet attwali (EUR 1,8 triljun fi prezzijiet tal-2018). Dan jikkonsisti fil-baġit fit-tul tal-UE għall-2021-2027 ta’ EUR 1,211 triljun (EUR 1,074 triljun fil-prezzijiet tal-2018), miżjud b’EUR 807 biljun (EUR 750 biljun fil-prezzijiet tal-2018) permezz tal-Istrument Ewropew għall-Irkupru, strument temporanju biex isaħħaħ l-irkupru 5 . Flimkien, il-fondi se jgħinu biex isewwu d-dannu ekonomiku u soċjali kkawżat mill-pandemija tal-coronavirus u biex imexxu t-tranżizzjoni lejn Ewropa moderna u aktar sostenibbli.

Aktar minn 50 % tal-baġit fit-tul u tal-Istrument Ewropew għall-Irkupru se jmorru għal prijoritajiet ġodda. Il-flus se jmorru għar-riċerka u l-innovazzjoni, permezz ta’ Orizzont Ewropa; għal klima ġusta u tranżizzjonijiet diġitali, permezz tal-Fond għal Tranżizzjoni Ġusta u l-programm Ewropa Diġitali; għat-tħejjija, l-irkupru u r-reżiljenza, permezz tal-Faċilità għall-Irkupru u r-Reżiljenza, il-mekkaniżmu tal-protezzjoni ċivili tal-UE, ir-rescEU, u għall-programm tas-saħħa, EU4Health.

30 % tal-baġit fit-tul u tal-Istrument Ewropew għall-Irkupru se jintnefqu biex jiġi miġġieled it-tibdil fil-klima, l-akbar sehem li qatt ġie allokat mill-akbar baġit Ewropew.

20 % tal-fondi tal-Istrument Ewropew għall-Irkupru se jiġu investiti fit-trasformazzjoni diġitali tal-UE. Il-fondi se jgħinu lill-UE tinvesti aktar fis-supercomputing, fl-intelliġenza artifiċjali, fiċ-ċibersigurtà, fil-ħiliet diġitali avvanzati, u fl-użu aktar mifrux ta’ teknoloġiji diġitali fl-ekonomija u fis-soċjetà.

Fl-2026 u fl-2027, 10 % tal-infiq annwali taħt il-baġit fit-tul se jikkontribwixxi biex jitwaqqaf u jitreġġa’ lura t-tnaqqis tal-bijodiversità.

Strument Ewropew għall-Irkupru

L-ammonti miġbura u minfuqa taħt l-Istrument Ewropew għall-Irkupru (NextGenerationEU) se jiġu inklużi fil-kontijiet annwali tal-2021. L-ewwel ħruġ ta’ bonds, li ġabar EUR 20 biljun permezz ta’ bond ta’ għaxar snin dovut fl-2031, seħħ fit-15 ta’ Ġunju 2021.

B’baġit ta’ EUR 806,9 biljun, l-Istrument Ewropew għall-Irkupru se jgħin biex isewwi d-dannu ekonomiku u soċjali immedjat li jirriżulta mill-pandemija tal-coronavirus. L-istrument se jgħin ukoll biex tinbena Ewropa ta’ wara l-COVID-19, li se tkun aktar ekoloġika, aktar diġitali, aktar reżiljenti u aktar adatta għall-isfidi attwali u futuri.

Parti mill-fondi – EUR 385.8 biljun – se jintużaw biex jiġi pprovdut self mill-Unjoni lil Stati Membri individwali. Dan is-self se jitħallas lura minn dawk l-Istati Membri. Il-parti l-oħra – EUR 338,0 biljun – se tiġi pprovduta fil-forma ta’ għotjiet jew biex jiġu permessi garanziji baġitarji għall-appoġġ għall-investiment.

3.IL-ĦRUĠ TAR-RENJU UNIT MILL-UNJONI EWROPEA

3.0.Sfond

Fil-31 ta’ Jannar 2020, ir-Renju Unit (UK) ħareġ mill-Unjoni Ewropea. It-termini tat-tluq tiegħu huma definiti fi Ftehim dwar il-ħruġ tar-Renju Unit mill-UE u mill-Komunità Ewropea tal-Enerġija Atomika 6 , magħruf ukoll bħala l-“Ftehim dwar il-Ħruġ” jew “FĦ”. Bħala parti minn dan il-ftehim, ir-Renju Unit qabel li jonora l-obbligi finanzjarji kollha li kien daħal għalihom meta kien għadu membru tal-UE. Il-ftehim daħal fis-seħħ fl-31 ta’ Jannar 2020.

Matul il-perjodu ta’ tranżizzjoni, ir-Renju Unit kompla jikkontribwixxi għall-baġit tal-UE u jibbenefika minnu, daqslikieku kien Stat Membru. Wara t-tmiem tal-perjodu ta’ tranżizzjoni u f’konformità mal-FĦ, ir-Renju Unit se jkompli jikkontribwixxi għall-baġit tal-UE. Bl-istess mod, ir-Renju Unit se jkompli jibbenefika mill-programmi u min-nefqa tal-UE ta’ qabel l-2021 daqslikieku kien Stat Membru. Ir-Renju Unit se jirċievi wkoll lura ċerti flejjes definiti li ħallas fil-baġit tal-UE jew flejjes riċevuti mill-baġit tal-UE marbuta mal-perjodu ta’ sħubija tiegħu.

Dawn l-obbligi joħolqu obbligazzjonijiet u riċevibbli għall-UE li jridu jiġu kkalkolati u riflessi fil-kontijiet annwali tal-UE: il-kontijiet annwali tal-2020 juru dawn l-ammonti għall-ewwel darba, peress li din hija s-sena li r-Renju Unit telaq mill-UE.

Għalhekk, dawn il-kontijiet annwali fihom spjegazzjonijiet dettaljati tal-kontribuzzjonijiet futuri tar-Renju Unit għall-baġit tal-UE meħtieġa mill-FĦ, kif ukoll ammonti dovuti lir-Renju Unit. L-ammonti kkonċernati se jitħallsu mir-Renju Unit fuq perjodu ta’ żmien twil.

L-ammont nett jirrispetta bis-sħiħ it-tliet prinċipji li jirfdu s-saldu finanzjarju fil-FĦ:

Il-FĦ jagħti wkoll dettalji dwar il-metodoloġiji għall-kalkolu tad-diversi ammonti, kif spjegat hawn taħt.

3.1.Sehem tar-Renju Unit

F’konformità mal-Artikolu 139 tal-FĦ, Is-sehem tar-Renju Unit tal-obbligi finanzjarji li jirriżultaw mill-FĦ huwa kkalkolat bħala proporzjon bejn ir-riżorsi proprji magħmula disponibbli mir-Renju Unit fis-snin 2014 sa 2020 u r-riżorsi proprji magħmula disponibbli matul dak il-perjodu mill-Istati Membri kollha u mir-Renju Unit. L-aġġustamenti li jirriżultaw min-netting tal-bilanċi tal-VAT u tal-ING għas-snin 2014 sa 2019 huma inklużi wkoll. Is-sehem ikkalkolat tar-Renju Unit se jkun suġġett għall-aġġustamenti finali previsti fl-Artikolu 139 tal-FĦ fl-2022. Is-sehem tar-Renju Unit għall-2021 jintuża għall-kalkoli fil-punti (a) u (c) tal-Artikolu 136(3), u fl-Artikoli 140 sa 147.

Is-sehem tar-Renju Unit ikkalkolat f’konformità mal-Artikolu 139 tal-Ftehim dwar il-Ħruġ huwa ta’ 12.358072326018200 %.

3.2.Il-kontijiet annwali tal-UE: Ammonti dovuti mir-Renju Unit u lilu skont il-Ftehim dwar il-Ħruġ

Il-Ftehim dwar il-Ħruġ jidentifika jipprevedi obbligi ta’ pagament bejn iż-żewġ partijiet b’mod partikolari fl-oqsma li ġejjin:

Il-FĦ jistabbilixxi wkoll il-metodoloġija dwar kif dawn l-obbligi se jiġu ttrattati kull sena – fil-qosor, l-UE se tirrapporta darbtejn fis-sena lir-Renju Unit dwar l-ammonti dovuti u r-Renju Unit se jħallas dawn fuq bażi ta’ kull xahar. Ir-rapportar se jiġi aġġornat kull sena abbażi taċ-ċifri attwali.

It-tabella ta’ hawn taħt tiġbor fil-qosor l-ammonti dovuti mir-Renju Unit lill-UE, kif ukoll kwalunkwe ammont dovut mill-UE lir-Renju Unit, li jirriżulta f’riċevibbli globali nett għall-UE. Il-kalkoli kollha saru b’rispett sħiħ tal-Ftehim dwar il-Ħruġ. Dawn l-obbligi huma relatati ma’ impenji li saru fil-passat meta r-Renju Unit kien Stat Membru tal-UE u matul il-perjodu ta’ tranżizzjoni sal-31 ta’ Diċembru 2020, u se jiskadu malli jkunu tħallsu jew jekk l-obbligu ma jimmaterjalizzax. Il-pagamenti se jsiru f’konformità mal-proċedura stabbilita fl-Artikolu 148 tal-Ftehim dwar il-Ħruġ.

L-ammont globali jinkludi l-elementi li ġejjin:

Artikolu 136: Riżorsi proprji

L-Artikolu 136 jistabbilixxi d-dispożizzjonijiet applikabbli wara l-31 ta’ Diċembru 2020 fir-rigward tar-riżorsi proprji. Ir-Renju Unit huwa intitolat li jirċievi s-sehem tiegħu ta’ aġġustamenti relatati mas-surplus tas-sena 2020. Huwa wkoll soġġett għal kwalunkwe aġġustament tar-riżorsi proprji tal-VAT u tal-ING relatati mas-snin finanzjarji sal-2020 - dawn l-aġġustamenti se jiġu kkalkulati kull sena sal-31 ta’ Diċembru 2028. Isiru wkoll aġġornamenti tal-korrezzjoni tar-Renju Unit.

Ir-Renju Unit huwa meħtieġ iħallas ir-riżorsi proprji tradizzjonali miġbura minnhom wara l-28 ta’ Frar 2021, iżda relatati mas-sena 2020 u qabel. Is-sehem tagħhom mit-total tar-riżorsi proprji tradizzjonali disponibbli mill-UE 27 u minnhom imbagħad jitnaqqas minn dan l-ammont. Il-kont separat għar-riżorsi proprji tradizzjonali għandu jiġi likwidat kompletament fil-31 ta’ Diċembru 2025.

Ammont ta’ EUR 230 miljun għandu jitħallas mir-Renju Unit matul l-2021.

Artikolu 140: Impenji pendenti (“RAL”)

Ir- “Reste à liquider”, jew ir- “RAL” jirrappreżenta l-volum totali tal-impenji legali li l-UE għamlet lir-riċevituri, li l-pagamenti għalihom se jsegwu fis-snin li ġejjin. Ir-RAL huwa karatteristika normali tal-baġits pluriennali kollha, bħall-baġit tal-UE.

L-impenji għalhekk jirreferu għal proġetti, programmi, ftehimiet jew kuntratti li diġà ġew impenjati, qabel il-31 ta’ Diċembru 2020, iżda li għadhom mhumiex implimentati bis-sħiħ, b’pagamenti li għad iridu jiġu segwiti. Xi wħud minn dawn il-pagamenti huma għar-riċevituri tar-Renju Unit.

Skont il-Ftehim dwar il-Ħruġ, ir-Renju Unit irid iħallas is-sehem tiegħu tal-impenji pendenti tal-UE mill-31 ta’ Diċembru 2020, tmiem il-perjodu ta’ tranżizzjoni. Kwalunkwe impenn, jew partijiet minnu, li mistennija jiġu kkanċellati (diżimpenji) u ammonti relatati ma’ impenji ffinanzjati minn dħul assenjat, jew ma’ programmi fejn ir-Renju Unit ma jipparteċipax (opt out), jitnaqqsu mill-ammont totali.

Aġġustamenti oħra għall-ammont dovut mir-Renju Unit skont dan l-artikolu huma relatati mal-korrezzjonijiet finanzjarji netti mill-2014-2020 jew perjodi ta’ programmazzjoni preċedenti u r-Riżorsi Proprji Tradizzjonali relatati mal-2020 u magħmula disponibbli f’Jannar-Frar 2021.

Biex jiġi kkalkulat is-sehem tar-Renju Unit tar-RAL, ir-RAL baġitarju uffiċjali mill-31 ta’ Diċembru 2020 intuża bħala l-punt tat-tluq (EUR 303.2 biljun ara t-tabella 4.4 fit-tabelli tal-implimentazzjoni baġitarja). Sa tmiem l-2020, is-sehem tar-Renju Unit tar-RAL aġġustat kien ta’ EUR 36 biljun - ladarba aġġustat għat-tbassir tad-diżimpenji, ir-riċevibbli lill-UE fi tmiem l-2020 ammonta għal EUR 35 biljun, li minnhom EUR 6.8 biljun se jitħallsu bejn l-30 ta’ Ġunju 2021 u l-31 ta’ Diċembru 2021.

Artikolu 141 Multi tal-kompetizzjoni

Il-Kummissjoni Ewropea tinforza direttament ir-regoli tal-kompetizzjoni tal-UE, billi tiżgura li l-kumpaniji kollha jikkompetu b’mod ugwali u ġust fuq il-merti tagħhom. Dan jista’ jwassal għall-impożizzjoni ta’ multi. Ladarba jiġu imposti mill-UE, il-multi jistgħu jiġu kkontestati (permezz ta’ proċedimenti legali) mill-benefiċjarju tal-multa - il-multa ma tkunx definittiva sakemm jintemmu l-proċedimenti kollha bħal dawn.

L-UE se tħallas lir-Renju Unit, kull sena, is-sehem tiegħu ta’ kwalunkwe multa tal-kompetizzjoni li kienet ġiet deċiża mill-Unjoni qabel l-31 ta’ Diċembru 2020, ladarba dawn il-multi jsiru definittivi, jiġifieri l-entità mmultata jew ma tintroduċix appell quddiem il-Qorti Ewropea tal-Ġustizzja jew l-appell ifalli u trid tħallas il-multa.

Fil-kontijiet annwali, l-ammonti dovuti lir-Renju Unit bħala riżultat tal-multi jitnaqqsu mill-ammont globali dovut mir-Renju Unit. Mill-31 ta’ Diċembru 2020, is-sehem stmat tar-Renju Unit mill-multi pendenti huwa ta’ EUR 1,8 biljun. Dan l-ammonti se jiġi ritornat lejn ir-Renju Unit fuq perjodu ta’ żmien twil. Iċ-ċifra hija bbażata fuq il-każijiet pendenti fil-31 ta’ Diċembru 2020 u tista’ tinbidel, biex tirrifletti l-ammonti attwali mdaħħla fil-baġit wara li l-multi jkunu saru definittivi.

Artikolu 142 Obbligazzjonijiet tal-Unjoni

Ir-Renju Unit impenja ruħu li jħallas is-sehem tiegħu tal-obbligazzjonijiet tal-Unjoni sa tmiem l-2020 ħlief għal obbligazzjonijiet speċifikati kif stabbilit fil-Ftehim dwar il-Ħruġ. Għalhekk, ir-Renju Unit se jkun qed iħallas is-sehem tiegħu tal-obbligi marbuta mal-UE bħala impjegatur (jiġifieri l-pensjonijiet u l-assigurazzjoni tal-mard tal-persunal irtirat), mill-31 ta’ Diċembru 2020:

1.Pensjonijiet tal-uffiċjali tal-UE: Il-pagamenti tal-pensjonijiet tal-persunal tal-UE huma koperti mill-baġit annwali tal-UE. Barra minn hekk, l-uffiċjali tal-UE jħallsu l-kontribuzzjonijiet tal-pensjoni matul il-karriera tax-xogħol tagħhom. Dawn il-kontribuzzjonijiet jiddaħħlu fil-baġit bħala dħul, u b’hekk jitnaqqsu l-kontribuzzjonijiet meħtieġa mill-Istati Membri għall-finanzjament tal-baġit annwali globali. L-Istati Membri tal-UE jimpenjaw ruħhom li jkopru l-ispejjeż tal-pensjonijiet tal-persunal tal-UE meta jirtiraw. F’konformità ma’ dan l-impenn, ir-Renju Unit se jkun qed iħallas, minn Ġunju 2022, is-sehem tiegħu tal-pensjonijiet annwali mħallsa lill-uffiċjali tal-UE sakemm id-drittijiet tal-pensjoni kollha miksuba mill-persunal sal-31 ta’ Diċembru 2020 jiġu eżawriti, matul diversi deċennji. Ir-Renju Unit jista’ jiddeċiedi li jsalda l-obbligu tiegħu fi kwalunkwe punt, billi jħallas l-obbligazzjoni attwarja fi tmiem is-sena fuq perjodu ta’ 5 snin.

2.Pensjonijiet tal-Membri tal-Parlament Ewropew, Kummissarji Ewropej, Imħallfin fil-Qorti Ewropea tal-Ġustizzja, eċċ.: Ir-Renju Unit se jħallas is-sehem tiegħu tal-obbligazzjoni attwarja fil-31 ta’ Diċembru 2020 fuq perjodu ta’ 10 snin, li jibda f’Ottubru 2021.

3.Reġim Komuni tal-Assigurazzjoni tal-Mard (JSIS): din hija s-sistema li tkopri l-ispejjeż tal-kura tas-saħħa tal-persunal tal-UE, inklużi l-pensjonanti. L-uffiċjali u l-pensjonanti tal-UE jagħmlu kontribuzzjonijiet għall-iskema matul il-karriera tagħhom u meta jirtiraw, kif tagħmel l-UE bħala impjegatur. F’konformità mal-prinċipju applikat ukoll għas-sistema tal-pensjonijiet tal-uffiċjali tal-UE, ir-Renju Unit se jħallas is-sehem tiegħu tal-kontribuzzjoni tal-baġit tal-UE għall-kopertura tal-kura tas-saħħa għall-persunal irtirat. Dawn il-pagamenti, li jibdew f’Ġunju 2022, se jkomplu għal diversi deċennji, jew sakemm dawk l-obbligi kollha jkunu ġew eżawriti. Bħal fil-każ tal-pensjonijiet tal-uffiċjali, ir-Renju Unit jista’ jiddeċiedi li jsalda l-obbligu tiegħu fi kwalunkwe punt, billi jħallas l-obbligazzjoni attwarja fi tmiem is-sena fuq perjodu ta’ 5 snin.

L-obbligazzjonijiet tal-UE relatati mal-obbligi tal-benefiċċji ta’ wara l-impjieg ta’ hawn fuq huma kkalkulati bl-użu ta’ valutazzjonijiet attwarji awditjati bbażati fuq standards internazzjonali. L-ammont attribwibbli lir-Renju Unit fil-31 ta’ Diċembru 2020 huwa ta’ EUR 14,3 biljun.

EUR 11-il miljun għandhom jitħallsu mir-Renju Unit matul l-2021 u huma relatati biss mal-iskemi tal-pensjoni speċifiċi separati (eż. MEPs). L-ammonti li jifdal għall-iskemi kollha se jitħallsu f’konformità mal-arranġamenti deskritti hawn fuq, mill-2022 ’il quddiem.

Artikoli 143/144 Strumenti finanzjarji u Garanziji Baġitarji

Skont dawn l-artikoli, ir-Renju Unit għandu jkun responsabbli li jiffinanzja l-obbligazzjonijiet kontinġenti tal-UE li jirriżultaw minn operazzjonijiet tad-data ta’ qabel il-ħruġ fir-rigward tal-attivitajiet ta’ teħid, għoti u garanzija tiegħu jekk dawn jikkristallizzaw u jekk ma jkunux koperti mis-sehem tar-Renju Unit fil-fondi ta’ garanzija eżistenti. L-UE se tirrimborża lir-Renju Unit ammonti li r-Renju Unit diġà kkontribwixxa għall-fondi ta’ garanzija u li fl-aħħar mill-aħħar jispiċċaw ma jkunux meħtieġa.

Dawn l-ammonti huma primarjament:

Artikolu 145 Il-Komunità Ewropea tal-Faħam u l-Azzar f’Likwidazzjoni (KEFA f’Likwidazzjoni)

Ir-Renju Unit huwa intitolat għas-sehem tiegħu mill-assi netti tal-Komunità Ewropea tal-Faħam u l-Azzar (KEFA) f’Likwidazzjoni fil-31 ta’ Diċembru 2020 - dan se jitħallas lir-Renju Unit fuq ħames snin. L-ammont totali pagabbli lir-Renju Unit huwa ta’ EUR 183 miljun (EUR 37 miljun li għandhom jitħallsu lura, jiġifieri, paċuti ma’ ammonti oħra dovuti fl-2021). Dan ifisser li kull sena bejn l-2021 u l-2025, l-ammont ta’ EUR 37 miljun se jitnaqqas mill-ammonti dovuti mir-Renju Unit.

Artikolu 146 Investiment fil-FEI

Ir-Renju Unit huwa intitolat għas-sehem tiegħu tal-investiment li l-UE għamlet fil-kapital azzjonarju mħallas tal-Fond Ewropew tal-Investiment (FEI), pagabbli f’pagamenti indaqs fuq 5 snin. L-ammont totali pagabbli lir-Renju Unit huwa ta’ EUR 33 miljun. Dan ifisser li kull sena bejn l-2021 u l-2025, l-ammont ta’ EUR 7 miljun se jitnaqqas mill-ammonti dovuti mir-Renju Unit.

Artikolu 147 Obbligazzjonijiet kontinġenti relatati ma’ kawżi legali

Ir-Renju Unit irid iħallas, kull sena, is-sehem tiegħu tal-ammonti mħallsa mill-baġit tal-UE fir-rigward ta’ kawżi legali li jikkonċernaw avvenimenti li seħħew qabel l-31 ta’ Diċembru 2020. L-istima tas-sehem tar-Renju Unit ta’ kawżi legali li x’aktarx se jirrikjedu pagamenti futuri fi tmiem is-sena hija ta’ EUR 46 miljun, iżda mhijiex pagabbli mir-Renju Unit sakemm u sakemm il-każijiet ma jiġux saldati u jsir pagament għall-ewwel darba mill-UE.

4.SOMMARJU TAL-IMPLIMENTAZZJONI TAL-BAĠIT 

Il-baġit adottat finali tal-2020 ammonta għal total ta’ EUR 173,9 biljun f’approprjazzjonijiet ta’ impenn u għal EUR 164,1 biljun f’approprjazzjonijiet ta’ pagament. L-implimentazzjoni tiegħu kienet affettwata ħafna mill-pandemija tal-COVID-19 u mill-kriżi transsettorjali sussegwenti. Il-kriżi ħolqot il-ħtieġa li jittieħdu azzjonijiet determinati biex jissaħħu s-setturi tas-saħħa pubblika tal-UE u jittaffa l-impatt soċjoekonomiku fl-UE, kif ukoll li tingħata assistenza lil pajjiżi terzi. Il-baġit tal-2020 kien l-aħħar baġit implimentat taħt il-Qafas Finanzjarju Pluriennali 2014-2020. L-implimentazzjoni tiegħu ġiet immonitorjata bir-reqqa u ġestita b’mod attiv, u dan irriżulta f’implimentazzjoni kważi sħiħa ta’ kważi l-programmi kollha.

L-implimentazzjoni tal-approprjazzjonijiet ta’ impenn totali fl-2020 kienet tammonta għal EUR 181,7 biljun:

Il-pagamenti totali li saru fl-2020 ammontaw għal total ta’ EUR 173,3 biljun:

L-intestaturi kollha laħqu livelli għoljin ta’ implimentazzjoni fl-2020. L-implimentazzjoni tal-2020 għat-tipi kollha ta’ approprjazzjonijiet (baġit, riporti mis-sena preċedenti u dħul assenjat) kienet 97 % għall-impenji u 94 % għall-pagamenti. Ir-rati ta’ implimentazzjoni, minbarra d-dħul assenjat, juru implimentazzjoni sħiħa fl-2020 (99,5 % għal approprjazzjonijiet ta’ impenji u 98,5 % għal approprjazzjonijiet ta’ pagament).

L-ogħla parti tal-introjtu kienet irrappreżentata minn Riżorsi proprji, li ammontaw għal 91,9 % tad-dħul totali ta’ EUR 174,3 biljun, segwita minn 4,7 % mill-Kontribuzzjonijiet u r-rifużjonijiet b’rabta mal-ftehimiet u mal-programmi tal-UE, li prinċipalment jikkonċernaw id-dħul minn korrezzjonijiet finanzjarji (FSIE, FAEG u FAEŻR).

L-impenji pendenti (xi drabi msejħa r-RAL – reste à liquider), li huma ammonti impenjati li għadhom ma tħallsux, kienu ta’ EUR 303,2 biljun fl-aħħar tal-2020. Kienet mistennija żieda mil-livell tal-2019, minħabba d-differenza bejn l-approprjazzjonijiet ibbaġitjati għall-impenji u għall-pagamenti (EUR 9,8 biljun) fil-baġit finali adottat u wara li tqies il-fatt li żieda fl-impenji pendenti tikkostitwixxi evoluzzjoni normali, billi l-approprjazzjonijiet ta’ impenn jiżdiedu kull sena kif previst fil-Qafas Finanzjarju Pluriennali. Iż-żieda fl-impenji pendenti meta mqabbla mal-2019 kienet ta’ EUR 5,5 biljun.

Ir-riżultat tal-baġit (surplus) naqas minn EUR 3,2 biljun fl-2019 għal EUR 1,8 biljun fl-2020:

5.STRUMENTI FINANZJARJI U GARANZIJI BAĠITARJI

5.0.Strumenti finanzjarji ffinanzjati mill-baġit tal-UE

Taħt implimentazzjoni tal-baġit ta’ dan it-tip, il-fondi jew diġà jkunu ġew żborżati fil-kontijiet fiduċjarji ġestiti mill-entitajiet fdati u jibqgħu disponibbli (bħala flus u ekwivalenti ta’ flus, titoli ta’ dejn jew investimenti f’fondi tas-suq monetarju jew portafolli ta’ assi miġbura) sabiex ikopru t-talbiet għal ħlas ta’ garanzija fil-ġejjieni, jew inkella jkunu ġew investiti f’ekwità. Is-sinifikat u l-volum tal-istrumenti finanzjarji ffinanzjati mill-baġit tal-UE taħt ġestjoni diretta u indiretta żdiedu minn sena għal sena. Il-kunċett bażiku wara dan l-approċċ, b’kuntrast mal-metodu tradizzjonali ta’ implimentazzjoni tal-baġit li jingħataw għotjiet u sussidji, huwa li għal kull euro li jintefaq mill-baġit permezz ta’ strumenti finanzjarji, il-benefiċjarju finali jirċievi aktar minn EUR 1 bħala appoġġ finanzjarju minħabba l-effett ta’ ingranaġġ. L-istrumenti finanzjarji ffinanzjati mill-baġit tal-UE jeżistu fil-forma ta’ strumenti ta’ garanzija, strumenti ta’ ekwità u strumenti ta’ self. Skont il-QFP tal-2021-2027, l-użu ta’ garanziji baġitarji mistenni li jiżdied meta mqabbel mal-użu ta’ strumenti finanzjarji ffinanzjati għal kollox, jew ipprovduti, mill-baġit tal-UE. B’mod partikolari, skont il-Programm InvestEU, se jiġu pprovduti EUR 26,2 biljun ta’ garanzija tal-UE lill-grupp tal-BEI u istituzzjonijiet finanzjarji oħrajn biex jiġu appoġġati diversi objettivi ta’ politika tal-Unjoni permezz ta’ operazzjonijiet ta’ finanzjament u investiment.

5.1.Assi finanzjarji miżmuma f’fondi ta’ garanzija għall-garanziji baġitarji

Taħt dan it-tip ta’ implimentazzjoni tal-baġit, l-UE tipprovdi garanziji lil kontropartijiet li għalihom il-finanzjament huwa biss ipprovdut parzjalment permezz ta’ fondi ta’ garanzija stabbiliti mill-Kummissjoni u, b’hekk, jinħolqu obbligazzjonijiet kontinġenti għall-baġit tal-UE f’każ li l-provvediment ma jkunx suffiċjenti biex jiġu koperti s-sejħiet. L-UE tat garanziji fuq self mogħti barra mill-UE (l-hekk imsejjaħ Mandat ta’ Self Estern jew ELM) u fuq operazzjonijiet ta’ dejn u ta’ ekwità koperti mill-garanzija tal-FEIS lill-Grupp tal-BEI, kif ukoll garanziji fuq operazzjonijiet koperti mill-garanzija tal-EFSD, mogħtija lill-Grupp tal-BEI u lil istituzzjonijiet finanzjarji oħrajn.

Sabiex jittaffa r-riskju li jista’ jkollhom it-talbiet għal ħlas ta’ garanzija mill-Grupp tal-BEI jew minn istituzzjonijiet finanzjarji oħrajn fuq il-baġit tal-UE, l-UE ħolqot fondi ta’ garanzija ddedikati ffinanzjati mill-baġit. Fil-31 ta’ Diċembru 2020, il-Kummissjoni għandha assi finanzjarji:

Il-Fond ta’ Garanzija għal azzjonijiet esterni huwa pprovdut mill-baġit tal-UE sabiex ikopri 9 % tas-self garantit fi tmiem is-sena għall-attivitajiet b’mandat tal-għoti b’self estern tal-‑BEI lil pajjiżi terzi li jkun għadu pendenti. Fil-31 ta’ Diċembru 2020, il-valur tal-assi totali msemmi fuq ikopri skopertura ta’ ammonti żborżati ta’ EUR 20,3 biljun.

Il-Fond ta’ Garanzija tal-FEIS beda jopera fl-2016. Skont ir-Regolament emendat dwar il-FEIS (ir-Regolament (UE) 2017/2396), il-limitu massimu tal-garanzija tal-UE tal-FEIS żdied għal EUR 26 biljun (minn dak inizjali ta’ EUR 16-il biljun) u l-limitu għall-fond ta’ garanzija naqas għal 35 % (minn dak inizjali ta’ 50 %) tal-obbligu totali tal-garanzija tal-UE. Għalhekk, il-Fond ta’ Garanzija tal-FEIS issa huwa mistenni li jilħaq ammont totali ta’ EUR 9,1 biljun. L-assi totali li jikkostitwixxu l-Fond ta’ Garanzija tal-FEIS fil-31 ta’ Diċembru 2019 huma ta’ EUR 8, biljun u dan ikopri skopertura tal-ammonti żborżati ta’ EUR 18,9 biljun.

Skont ir-Regolament tal-EFSD (ir-Regolament (UE) 2017/1601), il-Garanzija tal-EFSD sal-ammont ta’ EUR 1,5 biljun (miżjuda aktar permezz ta’ kontribuzzjonijiet esterni) għandha tkun disponibbli biex tappoġġa l-investimenti fil-pajjiżi msieħba fl-Afrika u fil-Viċinat Ewropew. L-UE tiddivulga l-Garanzija tal-EFSD fin-noti għar-rapporti finanzjarji kkonsolidati tagħha (ara n-nota 4.1.1) bħala obbligazzjoni kontinġenti. Mill-31 ta’ Diċembru 2020, kien hemm ħmistax-il ftehim ta’ garanzija tal-EFSD effettivi, għal limitu ta’ kopertura totali ta’ EUR 1 370 miljun. Il-Fond ta’ Garanzija tal-EFSD ġie stabbilit sabiex ikopri t-talbiet futuri potenzjali għal ħlas ta’ garanzija. Il-kontribuzzjonijiet totali riċevuti fil-fond fil-31 ta’ Diċembru 2020 jammontaw għal EUR 0,8 biljun. Minħabba li l-biċċa l-kbira tal-ftehimiet ta’ garanzija ġew konklużi mal-kontropartijiet fl-2020, il-programm jinsab fil-fażi ta’ żieda b’operazzjonijiet garantiti ta’ EUR 438 miljun iffirmati mill-kontropartijiet sa tmiem l-2020.

Wara d-dħul fis-seħħ tal-QFP tal-2021-2027, l-assi netti tal-Fond ta’ Garanzija tal-FEIS ġew ittrasferiti mill-1 ta’ Jannar 2021 fil-Fond ta’ Proviżjonament Komuni (CPF) 7 li jżomm id-dispożizzjonijiet magħmula biex ikopru l-obbligazzjonijiet finanzjarji li jirriżultaw minn garanziji baġitarji u minn programmi ta’ assistenza finanzjarja skont il-QFP tal-2021-2027. L-assi tal-Fond ta’ Garanzija tal-EFSD u tal-Fond ta’ Garanzija għall-azzjonijiet esterni huma mistennija li jiġu ttrasferiti lis-CPF matul l-2021.

5.2.Is-self u t-teħid b’self relatat għall-programmi ta’ assistenza finanzjarja

L-appoġġ finanzjarju għall-Istati Membri u l-pajjiżi terzi fil-forma ta’ self bilaterali ffinanzjat mis-swieq kapitali bil-garanzija tal-baġit tal-UE huwa pprovdut mill-Kummissjoni skont id-deċiżjonijiet tal-Parlament Ewropew u tal-Kunsill.

Fl-2020 il-Kummissjoni, li taġixxi f’isem l-UE, operat erba’ programmi ewlenin li taħthom tista’ tagħti self:

Il-kapital meħtieġ sabiex jiffinanzja s-self mogħti mill-UE jinġabar fis-swieq kapitali jew ma’ istituzzjonijiet finanzjarji. L-attivitajiet ta’ għoti u teħid b’self tal-UE għall-programmi ta’ assistenza finanzjarja huma operazzjonijiet mhux baġitarji. B’mod ġenerali, il-fondi miġbura jingħataw b’self back-to-back lill-pajjiż benefiċjarju, jiġifieri bl-istess kupun, maturità u ammont. Minkejja l-metodoloġija back-to-back, is-servizz tad-dejn tal-istrumenti ta’ finanzjament huwa obbligu legali tal-UE, li għandha tiżgura li l-pagamenti kollha jsiru b’mod sħiħ u f’waqtu. Il-Kummissjoni daħħlet fis-seħħ proċeduri sabiex tiżgura l-ħlas lura tas-self meħud anki f’każ ta’ inadempjenza tas-self.

Fil-31 ta’ Diċembru 2020, l-ammont nominali tas-self mogħti għal assistenza finanzjarja kien:

L-iskeda ta’ ripagament għall-ammonti pendenti fi tmiem is-sena hija kif ġej:

SURE

SURE ġie stabbilit fl-2020 biex jipprovdi assistenza finanzjarja lill-Istati Membri li jkunu qed jesperjenzaw, jew li huma mhedda serjament b’disturb ekonomiku serju kkawżat mill-pandemija tal-COVID-19 fit-territorju tagħhom. L-istrument jikkomplementa l-miżuri nazzjonali meħuda mill-Istati Membri affettwati.

L-ammont massimu ta’ assistenza finanzjarja ma għandux jaqbeż il-EUR 100 biljun għall-Istati Membri kollha. Fl-2020, l-Istati Membri ffirmaw ftehimiet dwar il-faċilità ta’ self li jammontaw għal EUR 85,9 biljun u minn dan l-ammont ġew żborżati EUR 39,5 biljun. Il-maturità tas-self tvarja bejn 5, 10, 15, 20 u 30 sena.

EFSM

L-EFSM inħoloq sabiex jipprovdi assistenza finanzjarja lill-Istati Membri kollha li qed jesperjenzaw jew huma mhedda serjament minn tfixkil finanzjarju ekonomiku serju kkawżat minn okkorrenzi eċċezzjonali lil hinn mill-kontroll tagħhom. L-EFSM intuża sabiex jipprovdi assistenza finanzjarja, kondizzjonali fuq l-implimentazzjoni ta’ riformi, lill-Irlanda u lill-Portugall bejn l-2011 u l-2014. Dan il-programm skada u issa ma jista’ jittieħed ebda self addizzjonali, għalkemm jibqa’ fis-seħħ għal kompiti speċifiċi bħall-estensjoni tal-maturitajiet għal self lill-Irlanda u lill-Portugall u l-għoti ta’ self tranżitorju. Fi Frar 2021, l-Irlanda u l-Portugall talbu li tittawwal il-maturità għall-ammonti dovuti f’Ġunju 2021 (EUR 4,8 biljun) u Settembru 2021 (EUR 5 biljuni). F’April 2021, il-Kummissjoni ssellfet EUR 4,8 biljun biex jiġi riportat is-self dovut f’Ġunju 2021, li ġie estiż bi 15-il sena.

Fl-2020 ma seħħet l-ebda operazzjoni ġdida u lanqas ripagamenti ta’ self.

AMF

Il-programm ta’ assistenza makrofinanzjarja (AMF) huwa forma ta’ assistenza finanzjarja estiża mill-UE lil pajjiżi msieħba barra l-UE li jkunu qed jesperjenzaw kriżi ta’ bilanċ tal-pagamenti. Jieħu l-forma ta’ self jew għotjiet fuq perjodu ta’ żmien medju/twil, jew kombinazzjoni ta’ dawn, u huwa disponibbli biss għal pajjiżi li jibbenifikaw minn programm ta’ żborż tal-FMI.

Fl-2020, il-Kummissjoni adottat proposta għal pakkett ta’ AMF ta’ EUR 3 biljun lil għaxar sħab tat-tkabbir u tal-viċinat biex tgħinhom jillimitaw il-konsegwenzi ekonomiċi tal-pandemija tal-coronavirus. Id-deċiżjoni ġiet adottata mill-Parlament Ewropew u mill-Kunsill fil-25 ta' Mejju 2020.

B’mod ġenerali, fl-2020 ġew żborżati EUR 1,7 biljun taħt il-programm tal-AMF.

Bilanċ tal-Pagamenti (BTP)

Il-BTP huwa programm ta’ assistenza maħsub għal pajjiżi barra ż-żona tal-euro li qegħdin jesperjenzaw jew li huma mhedda minn diffikultajiet fir-rigward tal-bilanċ tal-pagamenti tagħhom. L-assistenza tal-BTP tieħu l-forma ta’ self b’terminu medju li huwa kondizzjonali fuq l-implimentazzjoni ta’ politiki maħsuba sabiex jindirizzaw il-problemi ekonomiċi sottostanti. Ġeneralment, l-assistenza tal-bilanċ tal-pagamenti mill-UE tiġi offruta f’kooperazzjoni mal-Fond Monetarju Internazzjonali (FMI) u ma’ pajjiżi jew istituzzjonijiet internazzjonali oħrajn.

Fl-2020, ma seħħet l-ebda operazzjoni ġdida jew ripagamenti ta’ self.

5.3.Obbligazzjonijiet kontinġenti baġitarji għal programmi ta’ assistenza finanzjarja

It-teħid b’self tal-UE jikkostitwixxi obbligi diretti u mhux kondizzjonali tal-UE u dawn huma garantiti mill-Istati Membri tal-UE (obbligazzjonijiet kontinġenti baġitarji). It-teħid b’self għall-finanzjament tas-self lil pajjiżi barra mill-UE huwa kopert mill-Fond ta’ Garanzija għal azzjonijiet esterni. Jekk Stat Membru benefiċjarju jsir inadempjenti, is-servizz tad-dejn jiġi prelevat mill-bilanċ tat-teżor disponibbli għall-Kummissjoni, jekk ikun possibbli. Jekk dan ma jkunx possibbli f’dak il-mument, il-Kummissjoni tiġbed il-fondi neċessarji mingħand l-Istati Membri. L-Istati Membri tal-UE huma legalment obbligati, skont il-leġiżlazzjoni tal-UE dwar ir-riżorsi proprji (l-Artikolu 14 tar-Regolament tal-Kunsill 609/2014), li jagħmlu disponibbli biżżejjed fondi sabiex jissodisfaw l-obbligi tal-UE. B’hekk, l-investituri huma esposti biss għar-riskju ta’ kreditu tal-UE, mhux għal dak tal-benefiċjarju tas-self iffinanzjat. L-għoti ta’ self “back-to-back” jiżgura li l-baġit tal-UE ma jassumi l-ebda riskju ta’ ċaqliq fir-rata tal-imgħax jew riskju tal-kambju.

Self ipprovdut lill-Istati Membri taħt l-istrument SURE huwa sostnut minn sistema ta’ garanziji volontarji mill-Istati Membri li jammontaw għal 25 % tal-ammont massimu ta’ assistenza finanzjarja. Il-kontribuzzjoni ta’ kull Stat Membru għall-ammont globali tal-garanzija tikkorrispondi għas-sehem relattiv tagħha fl-introjtu nazzjonali gross (ING) totali tal-Unjoni Ewropea, abbażi tal-baġit tal-UE għall-2020.

Għal kull programm tal-pajjiżi, l-ammont komplessiv mogħti, l-għadd ta’ pagamenti li għandhom jiġu żborżati u l-maturità massima (medja) tal-pakkett tas-self jiġi determinat b’deċiżjoni tal-Parlament Ewropew, tal-Kunsill u tal-Kummissjoni. Sussegwentement, il-Kummissjoni u l-Istat Membru kkonċernat, jaqblu fuq il-parametri tas-self/tal-finanzjament, b’mod partikolari fuq il-maturità tal-pagamenti akkont. Barra minn hekk, il-pagamenti akkont kollha tas-self, ħlief l-ewwel wieħed, jiddependu fuq il-konformità mal-kundizzjonijiet tal-politika, fil-kuntest ta’ assistenza finanzjarja konġunta bejn l-UE/FMI, li huwa fattur ieħor li jinfluwenza ż-żmien meta jsiru l-operazzjonijiet ta’ finanzjament. Dan jimplika li t-twaqqit u l-maturitajiet tal-ħruġ jiddependu fuq l-attività relatata ta’ għoti b’self tal-UE. Il-finanzjament huwa denominat b’mod esklussiv f’euro u l-ispettru tal-maturità huwa ta’ minn tlieta (3) sa 30 sena.

6.ANALIŻI TAR-RAPPORTI FINANZJARJI

6.0.DĦUL

Id-dħul ikkonsolidat tal-UE jinkorpora ammonti relatati mat-tranżazzjonijiet ta’ skambju u mat‑tranżazzjonijiet mhux ta’ skambju, b’dawn tal-aħħar ikunu l-aktar sinifikanti. Ix-xejra ta’ ħames snin tal-kategoriji ewlenin tad-dħul mhux tal-kambju (li jinkludu r-riżorsi tal-ING, ir-riżorsi proprji tradizzjonali, ir-riżorsi tal-VAT, il-Multi u l-Irkupru tal-ispejjeż, u bl-esklużjoni tal-effett ta’ darba tad-dħul relatat mal-ħruġ tar-Renju Unit mill-UE fis-sena 2020) hija kif ġej:

Ix-xejra fuq ħames snin tad-dħul minn tranżazzjonijiet prinċipali mhux ta’ skambju (f’miljuni ta’ EUR)

*Minbarra d-dħul mhux tal-kambju relatat mal-ħruġ tar-Renju Unit mill-UE (EUR 47 456 miljun)

Peress li d-dħul tal-baġit jenħtieġ li jkun daqs (jew jisboq) in-nefqa tal-baġit, il-fattur ewlieni wara t-tendenza tad-dħul murija hawn fuq huwa l-pagamenti magħmula kull sena.

Fl-2020, id-dħul konsolidat kien jammonta għal EUR 224,0 biljun, żieda konsiderevoli ta’ EUR 63,7 biljun jew 39,7% miċ-ċifra tas-sena preċedenti ta’ EUR 160,3 biljun. L-ixprunatur ewlieni ta’ dan l-iżvilupp kien l-effett finanzjarju tal-Ħruġ tar-Renju Unit mill-Unjoni Ewropea (EUR 47,5 biljun). Jekk jiġi aġġustat għal dan l-effett ta’ darba, id-dħul konsolidat tal-2020 kien jammonta għal EUR 176,5 billjun, xorta waħda żieda ta’ EUR 16,2 biljun jew 10,1 % meta mqabbel mas-sena ta’ qabel. Din iż-żieda aġġustata hija prinċipalment dovuta għall-effetti li ġejjin:

Il-bidliet imsemmija hawn fuq ġew ikkontrobilanċjati bi tnaqqis fid-dħul mir-riżorsi proprji tradizzjonali, li naqas minn EUR 21,2 biljun fl-2019 għal EUR 19,6 biljun fl-2020 (tnaqqis ta’ EUR 1,6 biljun jew 7,5 %) u t-tnaqqis fl-irkupru finanzjarju, li naqas minn EUR 2,6 biljun fl-2019 għal EUR 1,4 biljun fl-2020 (tnaqqis ta’ EUR 1,2 biljun jew 46,2 %).

6.1.SPEJJEŻ

Il-komponent prinċipali tal-ispejjeż rikonoxxuti fir-rapporti finanzjarji kkonsolidati huwa l-pagamenti ta’ trasferiment taħt il-mod ta’ ġestjoni kondiviża, li jinkludi l-fondi li ġejjin: (i) il-Fond Agrikolu Ewropew ta’ Garanzija (FAEG), (ii) il-Fond Agrikolu Ewropew għall-Iżvilupp Rurali (FAEŻR) u strumenti oħrajn ta’ żvilupp rurali, (iii) il-Fond Ewropew għall-Iżvilupp Reġjonali (FEŻR) u l-Fond ta’ Koeżjoni (FK), u (iv) il-Fond Soċjali Ewropew (FSE). Dawn il-fondi kienu jammontaw għal EUR 109,7 biljun jew għal 65,9 % tal-ispejjeż totali ta’ EUR 166,6 biljun imġarrba fl-2020 (2019: EUR 103,9 biljun jew 66,8 %). Il-qsim tal-ispejjeż jista’ jinstab fiċ-ċart ta’ hawn taħt:

Piż relattiv tal-ispejjeż ewlenin implimentati mill-Istati Membri (ġestjoni kondiviża) għas-sena finanzjarja tal-2020:

L-ispejjeż imġarrba taħt ġestjoni diretta jirrappreżentaw l-implimentazzjoni tal-baġit mill-Kummissjoni, mill-aġenziji eżekuttivi u mill-fondi fiduċjarji. Taħt il-ġestjoni indiretta, il-baġit jiġi implimentat minn aġenziji tal-UE, korpi tal-UE, pajjiżi terzi, organizzazzjonijiet internazzjonali u entitajiet oħrajn.

L-UE tirrikonoxxi ċerti obbligi ta’ ħlas futuri bħala spejjeż, anki jekk għadhom ma humiex murija fil-kontijiet baġitarji bbażati fuq il-ħlasijiet. L-ammonti importanti huma murija taħt l-ammonti pagabbli u l-imposti dovuti rigward l-agrikoltura u l-iżvilupp rurali u anki taħt l-obbligazzjonijiet tal-pensjonijiet u tal-benefiċċji tal-impjegati relatati mad-drittijiet tal-pensjoni u ta’ wara l-impjieg miksuba mill-Kummissarji, mill-Membri tal-istituzzjonijiet tal-UE u mill-persunal.

B’mod ġenerali, l-ispejjeż żdiedu b’7,1 % jew b’EUR 11,1 biljun minn EUR 155,5 biljun għal EUR 166,6 biljun meta mqabbla mal-2019, u dan kien prinċipalment xprunat mill-effetti li ġejjin:

6.2.ASSI

L-aktar entrati sinifikanti fuq in-naħa tal-assi tal-karta bilanċjali huma relatati ma’ assi finanzjarji (minbarra flus u ekwivalenti ta’ flus), li jikkostitwixxu 40,4 % tal-assi totali tal-UE, segwiti minn riċevibbli u prefinanzjament b’perċentwali ta’ 26,6 % u 22,4 % rispettivament:

Il-kompożizzjoni tal-assi kkonsolidati tal-UE

Fil-31 ta’ Diċembru 2020, l-assi totali kienu ta’ EUR 280,0 biljun, li jirriflettu żieda ta’ EUR 101,1 biljun jew 56,5 % fuq is-sena preċedenti (2019: EUR 178,9 biljun), prinċipalment minħabba l-bidliet ewlenin li ġejjin:

Il-bilanċ tal-flus ta’ EUR 16,7 biljun fi tmiem is-sena jikkostitwixxi l-elementi prinċipali li ġejjin:

Prefinanzjament

Jenħtieġ li jiġi nnotat li l-livell ta’ prefinanzjament huwa influwenzat b’mod sinifikanti miċ-ċiklu tal-QFP - pereżempju, fil-bidu ta’ perjodu tal-QFP, huwa mistenni li jitħallsu avvanzi kbar lill-Istati Membri taħt il-politika ta’ koeżjoni u li dawn l-ammonti jibqgħu disponibbli għall-Istati Membri sal-għeluq tal-programmi. Jitħallas ukoll prefinanzjament annwali, li jrid jintuża matul is-sena jew jiġi rkuprat fis-sena ta’ wara bħala parti mill-għeluq annwali taċ-ċiklu tal-kontijiet. Il-Kummissjoni tagħmel kull sforz biex tiżgura li l-livelli ta’ prefinanzjament jinżammu f’livell xieraq. Għandu jinstab bilanċ bejn l-iżgurar ta’ finanzjament suffiċjenti għall-proġetti u r-rikonoxximent f’waqtu tal-infiq.

Il-prefinanzjament totali (minbarra avvanzi oħrajn lill-Istati Membri u kontribuzzjonijiet għall-fondi fiduċjarji Bêkou u Afrika) fuq il-karta bilanċjali tal-UE jammonta għal EUR 55,5 biljun (2019: EUR 44,4 biljun), li kważi kollha huma relatati ma’ attivitajiet tal-Kummissjoni. Madwar 58 % tal-prefinanzjament tal-Kummissjoni jikkonċerna l-ġestjoni kondiviża, li jfisser li l-implimentazzjoni tal-baġit hija ddelegata lill-Istati Membri (il-Kummissjoni żżomm irwol superviżorju).

Prefinanzjament mill-Kummissjoni skont il-mod ta’ ġestjoni

6.3.OBBLIGAZZJONIJIET

L-aktar partiti sinifikanti fuq in-naħa tal-obbligazzjoni tal-karta bilanċjali jikkonsistu primarjament f’erba’ partiti ewlenin: (i) obbligazzjonijiet tal-pensjoni u obbligazzjonijiet oħrajn ta’ benefiċċji tal-impjegati; (ii) it-teħid b’self; (iii) l-ammonti pagabbli lil partijiet terzi u (iv) l-imposti dovuti.

Il-kompożizzjoni tal-obbligazzjonijiet fuq il-karta bilanċjali kkonsolidata tal-UE

Fil-31 ta’ Diċembru 2020, l-obbligazzjonijiet totali kienu ta’ EUR 313,5 biljun, żieda ta’ EUR 62,0 biljun jew 24,7 % meta mqabbla mas-sena preċedenti (EUR 251,5 biljun).

Il-bidliet ewlenin kienu relatati mal-effetti li ġejjin:

Il-pretensjonijiet tal-kostijiet u l-fatturi totali rċevuti u rikonoxxuti fil-Karta Bilanċjali taħt l-intestatura “Ammonti Pagabbli”

Assi netti

L-eċċess tal-obbligazzjonijiet fuq l-assi ma jfissirx li l-istituzzjonijiet u l-korpi tal-UE jinsabu f’diffikultajiet finanzjarji, iżda pjuttost ifisser li ċerti obbligazzjonijiet ser jiġu ffinanzjati minn baġits annwali futuri. Ħafna mill-ispejjeż huma rikonoxxuti skont ir-regoli dwar il-kontabbiltà bbażata fuq id-dovuti fis-sena kurrenti, għalkemm effettivament jistgħu jitħallsu fis-snin ta’ wara jew aktar tard u ffinanzjati bl-użu ta’ baġits futuri; id-dħul relatat se jitqies fil-perjodi futuri biss. L-aktar ammonti sinifikanti li għandhom jiġu enfasizzati huma l-attivitajiet tal-FAEG (li l-biċċa l-kbira tagħhom ġeneralment jitħallsu fl-ewwel trimestru tas-sena ta’ wara) u l-obbligazzjoni tal-benefiċċji tal-impjegati (li għandhom jitħallsu matul diversi deċennji). It-tnaqqis konsiderevoli tal-ammonti li għandhom jinġabru mill-Istati Membri minn EUR 77,6 biljun fl-2019 għal EUR 38,5 biljun fl-2020 huwa primarjament dovut għad-dħul relatat mal-ammonti netti dovuti mir-Renju Unit skont il-Ftehim dwar il-Ħruġ iffirmat wara l-ħruġ tiegħu mill-Unjoni fl-2020 - ara n-nota 2.6.1.2 tal-kontijiet annwali konsolidati tal-UE.

7.QAFAS POLITIKU U FINANZJARJU, GOVERNANZA U AKKONTABBILTÀ TAL-UE

L-Unjoni Ewropea (UE) hija Unjoni li lilha l-Istati Membri jagħtu kompetenzi sabiex jilħqu objettivi li għandhom komuni bejniethom. L-Unjoni hija msejsa fuq il-valuri tar-rispett għad-dinjità tal-bniedem, il-libertà, id-demokrazija, l-ugwaljanza, l-istat tad-dritt u r-rispett għad-drittijiet tal-bniedem, inklużi d-drittijiet ta’ persuni li jappartjenu għal minoranzi. Dawn il-valuri huma komuni għall-Istati Membri f’soċjetà fejn jipprevalu l-pluraliżmu, in-nondiskriminazzjoni, it-tolleranza, il-ġustizzja, is-solidarjetà u l-ugwaljanza bejn in-nisa u l-irġiel.

7.0.QAFAS POLITIKU U FINANZJARJU

L-UE ssegwi l-objettivi stabbiliti mit-Trattat b’għadd ta’ għodod, li waħda minnhom hija l-baġit tal-UE. Oħrajn huma, pereżempju, qafas leġiżlattiv komuni jew strateġiji ta’ politika konġunti.

6 AMBIZZJONIJIET EWLENIN

Is-sorsi ta’ finanzjament ewlenin tal-UE huma d-dħul mir-riżorsi proprji, li huwa kkomplementat minn dħul ieħor. Hemm tliet tipi ta’ riżorsi proprji: riżorsi proprji tradizzjonali (prinċipalment dazji doganali), ir-riżorsa proprja bbażata fuq it-taxxa fuq il-valur miżjud (VAT) u r-riżorsa proprja bbażata fuq l-introjtu nazzjonali gross (ING). Dħul ieħor li jirriżulta mill-attivitajiet tal-UE (eż. multi tal-kompetizzjoni) normalment jirrappreżenta inqas minn 10 % tad-dħul totali (mingħajr ma jitqies l-effett ta’ darba tal-ħruġ tar-Renju Unit mill-UE fuq il-kontijiet annwali tal-2020). L-ammont kumplessiv tar-riżorsi proprji meħtieġa għall-iffinanzjar tal-baġit jiġi ddeterminat min-nefqa totali bit-tnaqqis ta’ dħul ieħor.

7.1.GOVERNANZA U AKKONTABBILTÀ

7.1.0.Struttura istituzzjonali

L-UE għandha qafas istituzzjonali li għandu l-għan li jippromwovi l-valuri tagħha, imexxi ’l quddiem l-objettivi tagħha, iservi l-interessi tagħha, dawk taċ-ċittadini tagħha u dawk tal-Istati Membri, kif ukoll jiżgura l-konsistenza, l-effettività u l-kontinwità tal-politiki u l-azzjonijiet tagħha. L-istruttura organizzazzjonali tikkonsisti minn istituzzjonijiet, aġenziji u korpi oħrajn tal-UE, li huma inklużi fil-kontijiet konsolidati tal-UE, diment li jiġu ssodisfati l-kriterji ta’ konsolidazzjoni kif stabbiliti fir-Regolament Finanzjarju u r-regoli tal-kontabbiltà applikabbli (jekk jogħġbok irreferi għan-nota 9 tal-kontijiet annwali konsolidati tal-UE għal-lista ta’ entitajiet inklużi fil-kamp ta’ applikazzjoni tal-konsolidazzjoni).

Il-Parlament Ewropew, flimkien mal-Kunsill, jeżerċita funzjonijiet leġiżlattivi u baġitarji. Il-Kummissjoni hija politikament responsabbli lejn il-Parlament Ewropew. Il-Kunsill iwettaq ukoll funzjonijiet ta’ tfassil tal-politika u ta’ koordinazzjoni fid-direzzjoni politika ġenerali u l-prijoritajiet tal-Unjoni stabbiliti mill-Kunsill Ewropew.

Il-Kummissjoni Ewropea hija l-fergħa eżekuttiva tal-Unjoni Ewropea. Hija tippromwovi l-interess ġenerali tal-Unjoni u tieħu inizjattivi xierqa għal dak il-għan. Tiżgura l-applikazzjoni tat-Trattati u tissorvelja l-applikazzjoni tad-dritt tal-Unjoni mill-Istati Membri taħt il-kontroll tal-Qorti tal-Ġustizzja tal-Unjoni Ewropea. Hija teżerċita funzjonijiet ta’ koordinazzjoni, eżekuttivi u ta’ ġestjoni, teżegwixxi l-baġit u timmaniġġa l-programmi.

Il-Kummissjoni timplimenta l-baġit, fil-biċċa l-kbira b’kooperazzjoni mal-Istati Membri 10 . Flimkien, huma jiżguraw li l-approprjazzjonijiet jintużaw f’konformità mal-prinċipji ta’ ġestjoni finanzjarja tajba. Ir-regolamenti jistabbilixxu l-obbligi ta’ kontroll u verifika tal-Istati Membri meta jikkondividu l-implimentazzjoni tal-baġit u r-responsabbiltajiet li jirriżultaw. Huma jistabbilixxu wkoll ir-responsabbiltajiet u r-regoli dettaljati għal kull waħda mill-istituzzjonijiet tal-UE fir-rigward tan-nefqa tagħhom stess.

7.1.1.L-istruttura ta’ governanza tal-Kummissjoni

L-arranġamenti ta’ governanza tal-Kummissjoni u kif dawn jiżguraw li l-Kummissjoni tiffunzjona bħala istituzzjoni moderna, responsabbli u orjentata lejn il-prestazzjoni huma deskritti fil-Komunikazzjoni, C(2020) 4240 dd 24.6.2020, dwar il-Governanza fil-Kummissjoni Ewropea.

Il-Kummissjoni twettaq il-funzjonijiet tagħha taħt it-tmexxija tal-Kulleġġ tal-Kummissarji, li jistabbilixxi l-prijoritajiet u jieħu responsabbiltà politika ġenerali għall-ħidma tal-Kummissjoni. Bħala Kulleġġ, il-Kummissjoni taħdem taħt il-gwida politika tal-President tagħha, li jippreżenta l-objettivi li biħsiebu jsegwi fil-forma tal-linji gwida politiċi tal-President. Il-President jiddeċiedi dwar l-organizzazzjoni interna tal-Kummissjoni, sabiex jiżgura li din taġixxi b’mod konsistenti, effiċjenti u bħala korp kolleġġjali. L-arranġamenti interni joħolqu struttura ta’ kontrolli u għodod ta’ ġestjoni robusti li jippermettu lill-Kulleġġ tal-Kummissarji jieħu r-responsabbiltà politika għall-ħidma tal-Kummissjoni. 11

Il-Kulleġġ jiddelega l-implimentazzjoni operazzjonali tal-baġit u l-ġestjoni finanzjarja lid-Diretturi Ġenerali u lill-Kapijiet tas-Servizz li jmexxu l-istruttura amministrattiva tal-Kummissjoni. Dan l-approċċ deċentralizzat joħloq kultura amministrattiva li tħeġġeġ lill-impjegati taċ-ċivil jerfgħu r-responsabbiltà għall-attivitajiet li fuqhom għandhom kontroll u jitlobhom jipprovdu assigurazzjoni fir-rigward tal-attivitajiet li għalihom huma responsabbli.

7.1.2.Il-ġestjoni finanzjarja tal-Kummissjoni

Fil-Kummissjoni, ir-rwoli u r-responsabbiltajiet fil-ġestjoni finanzjarja huma definiti b’mod ċar (eż. fir-Regolament Finanzjarju u fir-Regoli Interni 12 ) u applikati kif xieraq. Bħala uffiċjali awtorizzanti b’delega, id-Diretturi Ġenerali u l-Kapijiet tas-Servizzi tal-Kummissjoni huma responsabbli għall-ġestjoni finanzjarja tajba tar-riżorsi tal-UE, għall-konformità mad-dispożizzjonijiet tar-Regolament Finanzjarju, għall-ġestjoni tar-riskji u għall-istabbiliment ta’ qafas ta’ kontroll intern xieraq.

Ir-responsabbiltà tal-Uffiċjali Awtorizzanti tkopri l-proċess kollu tal-ġestjoni, mid-determinazzjoni ta’ x’hemm bżonn li jsir biex jintlaħqu l-objettivi tal-politika stabbiliti mill-istituzzjoni sal-ġestjoni tal-attivitajiet minn perspettiva kemm operattiva kif ukoll ta’ ġestjoni finanzjarja tajba. Il-kompiti jistgħu jiġu ddelegati wkoll lid-Diretturi, lill-Kapijiet ta’ Unitajiet u lil oħrajn, li b’hekk isiru Uffiċjali Awtorizzanti b’Sottodelega. Kull uffiċjal awtorizzanti b’delega jista’ jibbaża fuq direttur wieħed jew fuq żewġ diretturi inkarigat(i) mill-ġestjoni tar-riskju u mill-kontroll intern biex jissorvelja u jimmonitorja l-implimentazzjoni tas-sistemi ta’ kontroll intern.

Is-servizzi ċentrali tal-Kummissjoni jipprovdu gwida u pariri u jippromwovu l-aħjar prattiki, inkluż permezz tal-ħidma tal-Bord ta’ Tmexxija Korporattiva.

Ir-Regolament Finanzjarju jesiġi li kull uffiċjal awtorizzanti jħejji rapport annwali tal-attività (“RAA”)bid-dettalji tal-kisbiet, u tal-attivitajiet ta’ kontroll intern u tal-ġestjoni finanzjarja matul is-sena. Ir-RAA jinkludi dikjarazzjoni li r-riżorsi ntużaw abbażi tal-prinċipji ta’ ġestjoni finanzjarja tajba u li hemm fis-seħħ proċeduri ta’ kontroll li jipprovdu l-garanziji meħtieġa li jikkonċernaw il-legalità u r-regolarità tat-tranżazzjonijiet sottostanti. Ir-Rapport Annwali dwar il-Ġestjoni u l-Prestazzjoni għall-baġit tal-UE huwa l-istrument ewlieni li permezz tiegħu, il-Kulleġġ tal-Kummissarji jassumi responsabbiltà politika għall-ġestjoni finanzjarja tal-baġit tal-UE.

L-Uffiċjal tal-Kontabbiltà tal-Kummissjoni huwa ċentralment responsabbli għall-ġestjoni tat-teżor, għall-proċeduri ta’ rkupru, għall-istabbiliment ta’ regoli tal-kontabbiltà bbażati fuq metodi u Standards Internazzjonali tal-Kontabbiltà għas-Settur Pubbliku, għall-validazzjoni tas-sistemi kontabilistiċi u għat-tħejjija tal-kontijiet annwali konsolidati tal-Kummissjoni u tal-UE. Barra minn hekk, l-Uffiċjal tal-Kontabbiltà huwa mitlub jiffirma l-kontijiet annwali, filwaqt li jiddikjara li dawn jippreżentaw b’mod ġust, fl-aspetti materjali kollha, il-pożizzjoni finanzjarja, ir-riżultati tal-operazzjonijiet u l-flussi tal-flus tal-Unjoni. Il-kontijiet annwali jiġu adottati mill-Kulleġġ tal-Kummissarji. L-Uffiċjal tal-Kontabilità huwa funzjoni indipendenti u għandu responsabbiltà ewlenija fir-rigward tar-rapportar finanzjarju fil-Kummissjoni.

L-Awditur Intern tal-Kummissjoni huwa wkoll funzjoni ċentralizzata u indipendenti u jipprovdi pariri, opinjonijiet u rakkomandazzjonijiet indipendenti dwar il-kwalità u l-funzjonament ta’ sistemi ta’ kontroll intern ġewwa l-Kummissjoni, l-aġenziji tal-UE u korpi awtonomi oħrajn.

Il-Kumitat tal-Progress tal-Awditjar jiżgura l-indipendenza tal-Awditur Intern u jissorvelja l-kwalità tax-xogħol tal-awditjar intern u s-segwitu mogħti mill-Kummissjoni għar-rakkomandazzjonijiet tal-awditjar intern u estern, kif ukoll għas-sejbiet u r-rakkomandazzjonijiet relatati mal-kwittanza tal-Qorti Ewropea tal-Awdituri dwar l-affidabbiltà tal-kontijiet konsolidati annwali tal-UE. Ir-rwol konsultattiv tal-kumitat jikkontribwixxi għat-titjib ulterjuri ġenerali tal-effettività u l-effiċjenza tal-Kummissjoni biex tilħaq l-għanijiet tagħha u jiffaċilita s-sorveljanza mill-Kulleġġ tal-governanza, tal-ġestjoni tar-riskji u tal-prattiki ta’ kontroll intern tal-Kummissjoni.

7.1.3.Awditjar estern u l-proċedura ta’ kwittanza

F’konformità mal-prinċipji ta’ ġestjoni finanzjarja tajba, il-fondi jridu jiġu ġestiti b’mod effettiv, effiċjenti u ekonomiku. Jeżisti qafas ta’ akkontabbiltà bbażat fuq ir-rapportar komprensiv, l-awditjar estern u l-kontroll politiku sabiex tiġi pprovduta assigurazzjoni raġonevoli li l-fondi tal-UE jintnefqu b’mod xieraq.

Kull sena, il-Qorti Ewropea tal-Awdituri teżamina l-affidabbiltà tal-kontijiet, jekk id-dħul kollu kienx riċevut u jekk in-nefqa kollha kinitx imġarrba b’mod leġittimu u regolari u jekk il-ġestjoni finanzjarja u l-aspetti kwalitattivi tal-ibbaġitjar, inkluża d-dimensjoni tal-prestazzjoni, kinux b’saħħithom. Il-pubblikazzjoni tar-rapport annwali tal-Qorti Ewropea tal-Awdituri hija l-punt tat-tluq għall-proċedura ta’ kwittanza. L-awdituri jħejju wkoll rapporti speċjali dwar l-oqsma ta’ nfiq jew ta’ politika speċifiċi, jew dwar kwistjonijiet baġitarji jew maniġerjali.

Il-Parlament Ewropew jiddeċiedi, wara rakkomandazzjoni mill-Kunsill, dwar jekk jipprovdix jew le l-approvazzjoni finali tiegħu, magħrufa bħala “għoti tal-kwittanza”, fuq il-mod li bih il-Kummissjoni implimentat il-baġit tal-UE f’sena partikolari. Il-proċedura ta’ kwittanza annwali tiżgura li l-Kummissjoni tinżamm politikament responsabbli għall-implimentazzjoni tal-baġit tal-UE.

Id-deċiżjoni dwar il-kwittanza hija bbażata wkoll fuq ir-rapportar finanzjarju u ta’ akkontabbiltà integrat tal-Kummissjoni, fuq is-seduti ta’ smigħ tal-Kummissarji fil-Parlament Ewropew u fuq it-tweġibiet ipprovduti għall-mistoqsijiet bil-miktub indirizzati lill-Kummissjoni.

NOTA LI TAKKUMPANJA L-KONTIJIET KONSOLIDATI

Il-kontijiet annwali konsolidati tal-Unjoni Ewropea għas-sena 2020 tħejjew fuq il-bażi tal-informazzjoni ppreżentata mill-istituzzjonijiet u l-korpi skont l-Artikolu 246(2) tar-Regolament Finanzjarju applikabbli għall-baġit ġenerali tal-Unjoni Ewropea. B’dan niddikjara li tħejjew skont it-Titolu XIII ta’ dan ir-Regolament Finanzjarju u skont il-prinċipji, ir-regoli u l-metodi kontabilistiċi stipulati fin-noti għar-rapporti finanzjarji.

Ksibt mingħand l-uffiċjali tal-kontabilità ta’ dawn l-istituzzjonijiet u korpi, li ċċertifikaw l-affidabilità tagħha, l-informazzjoni kollha neċessarja għall-produzzjoni tal-kontijiet li juru l-assi u l-obbligazzjonijiet tal-Unjoni Ewropea u l-implimentazzjoni tal-baġit.

Jiena hawnhekk niċċertifika li fuq il-bażi ta’ din l-informazzjoni, u fuq il-verifiki li dehruli neċessarji biex niffirma l-kontijiet tal-Kummissjoni Ewropea, għandi assigurazzjoni raġonevoli li l-kontijiet jippreżentaw b’mod ġust il-pożizzjoni finanzjarja, ir-riżultati tal-operazzjonijiet u l-fluss tal-flus tal-Unjoni Ewropea fl-aspetti materjali kollha.

Rosa ALDEA BUSQUETS

L-Uffiċjal tal-Kontabbiltà tal-Kummissjoni

It-18 ta’ Ġunju 2021

L-UNJONI EWROPEA

IS-SENA FINANZJARJA 2020

RAPPORTI FINANZJARJI KONSOLIDATI U NOTI TA’ SPJEGAZZJONI

Jenħtieġ li jiġi nnotat li minħabba l-ittondjar taċ-ċifri f’miljuni ta’ euro, xi data finanzjarja fit-tabelli t’hawn taħt tista’ tidher li ma taqbilx fl-għadd finali.

WERREJ

IL-KARTA BILANĊJALI    

RAPPORT TAL-INTROJTU    

RAPPORT TAL-FLUSS TAL-FLUS    

DIKJARAZZJONI TAL-BIDLIET FL-ASSI NETTI    

NOTI GĦAR-RAPPORTI FINANZJARJI    

1.    POLITIKI KONTABILISTIĊI SINIFIKANTI    

2.    NOTI GĦALL-KARTA BILANĊJALI    

3.    NOTI GĦAR-RAPPORT TAL-INTROJTU    

4.    OBBLIGAZZJONIJIET U ASSI KONTINĠENTI    

5.    IMPENJI LEGALI U BAĠITARJI    

6.    ĠESTJONI TAR-RISKJU FINANZJARJU    

7.    DIVULGAZZJONIJIET DWAR IL-PARTIJIET RELATATI    

8.    EVENTI WARA D-DATA TAL-KARTA BILANĊJALI    

9.    IL-KAMP TA’ APPLIKAZZJONI TAL-KONSOLIDAZZJONI    

IL-KARTA BILANĊJALI

*    Fit-18 ta’ Diċembru 2020, il-Parlament Ewropew adotta baġit li jipprevedi l-ħlas tal-obbligazzjonijiet ta’ terminu qasir tal-Unjoni mir-riżorsi proprji li għandhom jinġabru mill-Istati Membri, jew li għandhom jintalbu mingħandhom, fl-2021. Barra minn hekk, skont l-Artikolu 83 tar-Regolamenti tal-Persunal (ir-Regolament tal-Kunsill 259/68 tad-29 ta’ Frar 1968 kif emendat), l-Istati Membri għandhom jiggarantixxu b’mod konġunt l-obbligazzjoni għall-pensjonijiet.

RAPPORT TAL-INTROJTU

RAPPORT TAL-FLUSS TAL-FLUS

DIKJARAZZJONI TAL-BIDLIET FL-ASSI NETTI

NOTI GĦAR-RAPPORTI FINANZJARJI

Innota li fit-tabelli li ġejjin, l-ammonti li jikkonċernaw ir-Renju Unit għadhom jidhru taħt l-intestatura Stati Membri, minħabba li għalkemm ir-Renju Unit telaq mill-Unjoni fl-1 ta’ Frar 2020, matul il-perjodu ta’ tranżizzjoni sal-31 ta’ Diċembru 2020, huwa kompla jkollu relazzjoni finanzjarja mal-Unjoni ekwivalenti għal dik ta’ Stat Membru.

1.POLITIKI KONTABILISTIĊI SINIFIKANTI

2.Il-BAŻI ĠURIDIKA U R-REGOLI KONTABILISTIĊI

Il-kontijiet tal-UE jinżammu f’konformità mar-Regolament (UE, Euratom) Nru 2018/1046 tal-Parlament Ewropew u tal-Kunsill tat-18 ta’ Lulju 2018 dwar ir-regoli finanzjarji applikabbli għall-baġit ġenerali tal-Unjoni, li jemenda r-Regolamenti (UE) Nru 1296/2013, (UE) Nru 1301/2013, (UE) Nru 1303/2013, (UE) Nru 1304/2013, (UE) Nru 1309/2013, (UE) Nru 1316/2013, (UE) Nru 223/2014, (UE) Nru 283/2014 u d-Deċiżjoni Nru 541/2014/UE u li jħassar ir-Regolament (UE, Euratom) Nru 966/2012 (ĠU L 193, it-30 ta’ Lulju 2018, p. 1) minn hawn ’il quddiem imsejjaħ ir-“Regolament Finanzjarju” (RF).

F’konformità mal-artikolu 80 tar-Regolament Finanzjarju, l-UE tħejji r-rapporti finanzjarji tagħha abbażi ta’ regoli kontabilistiċi bbażati fuq id-dovuti li huma bbażati fuq l-Istandards Internazzjonali tal-Kontabbiltà għas-Settur Pubbliku (‘International Public Sector Accounting Standards’ - IPSAS). Dawn ir-regoli kontabilistiċi, adottati mill-Uffiċjal tal-Kontabilità tal-Kummissjoni, għandhom jiġu applikati mill-istituzzjonijiet u mill-korpi kollha tal-UE li jaqgħu fil-kamp ta’ applikazzjoni tal-konsolidazzjoni sabiex tiġi żgurata l-konsistenza interna tal-kontijiet konsolidati tal-UE.

L-applikazzjoni ta’ Regoli Kontabilistiċi tal-Unjoni Ewropea (EAR) ġodda u emendati

EAR ġodda li huma effettivi għal perjodi annwali li jibdew fl-1 ta’ Jannar 2020 jew wara

Ma hemm ebda EAR ġdida li saret effettiva għal perjodi annwali li jibdew fl-1 ta’ Jannar 2020 jew wara.

EAR ġdida adottata, iżda li kienet għadha mhux effettiva fil-31 ta’ Diċembru 2020

Fis-17 ta’ Diċembru 2020, l-Uffiċjal tal-Kontabilità tal-Kummissjoni Ewropea adotta EAR 11 riveduta “Strumenti Finanzjarji”, li hija effettiva għall-perjodi kontabilistiċi li jibdew fl-1 ta’ Jannar 2021 jew wara. EAR 11 riveduta ġiet aġġornata f’konformità mal-IPSAS 41 il-ġdida “Strumenti Finanzjarji” u tistabbilixxi l-prinċipji għar-rapportar finanzjarju tal-assi finanzjarji u l-obbligazzjonijiet finanzjarji miżmuma mill-entitajiet tal-UE.

Il-bidliet ewlenin u l-impatti mistennija tagħhom fuq il-kontijiet tal-UE għall-2021 huma kif ġej:

Prinċipji ġodda ta’ klassifikazzjoni u kejl għall-assi finanzjarji

EAR 11 riveduta tintroduċi approċċ ibbażat fuq il-prinċipji għall-klassifikazzjoni tal-assi finanzjarji li huwa bbażat fuq żewġ kriterji: il-mudell ta’ ġestjoni li entità tapplika għall-ġestjoni tal-assi finanzjarji tagħha u l-karatteristiċi kuntrattwali tal-fluss tal-flus ta’ dawk l-assi. Skont dawn il-kriterji, l-assi finanzjarji huma kklassifikati fil-kategoriji assi finanzjarji b’kost amortizzat (AC), assi finanzjarji b’valur ġust permezz ta’ assi/ekwità netti (FVNA), jew assi finanzjarji b’valur ġust permezz ta’ surplus u defiċit (FVSD).

Assi finanzjarji b’termini kuntrattwali li jirrappreżentaw biss kapital u interessi huma kklassifikati bħala AC (jekk l-assi finanzjarju jinżamm f’mudell ta’ ġestjoni li l-objettiv tiegħu jkun li jżomm assi finanzjarji sabiex jiġbor flussi ta’ flus kuntrattwali) jew FVNA (jekk l-assi finanzjarju jinżamm f’mudell ta’ ġestjoni li l-objettiv tiegħu jinkiseb kemm bil-ġbir ta’ flussi ta’ flus kuntrattwali kif ukoll bil-bejgħ ta’ assi finanzjarji). L-assi finanzjarji li ma jissodisfawx il-kriterji biex jiġu kklassifikati bħala jew AC jew FVNA, b’mod partikolari l-assi finanzjarji li għalihom il-flussi tal-flus kuntrattwali ma jirrappreżentawx biss kapital u interessi jew li huma miżmuma f’mudelli ta’ ġestjoni oħrajn, huma kklassifikati bħala FVSD.

F’konformità ma’ dawn il-prinċipji, fil-kontijiet annwali tal-UE tal-2021, l-investimenti kollha ta’ ekwità li bħalissa huma kklassifikati bħala “disponibbli għall-bejgħ” se jiġu riklassifikati bħala FVSD. It-titoli ta’ dejn huma mistennija wkoll li jiġu riklassifikati bħala FVSD, minħabba li l-UE timmaniġġa dawn il-portafolli tal-assi u tevalwa l-prestazzjoni tagħhom fuq bażi ta’ valur ġust. Ir-riżerva tal-valur ġust relatata se tiġi rilaxxata għall-Assi Netti.

Mudell ta’ indeboliment ġdid

Filwaqt li l-mudell ta’ indeboliment attwali huwa bbażat fuq telf imġarrab, EAR 11 riveduta tintroduċi mudell ta’ indeboliment li jħares ’il quddiem ibbażat fuq telf ta’ kreditu mistenni, filwaqt li jitqiesu l-avvenimenti ta’ inadempjenza possibbli kollha u kwalunkwe titjib fil-kreditu li huwa integrali għat-termini kuntrattwali. Fir-rigward tal-orizzont ta’ żmien applikabbli japplika approċċ fi stadji: sakemm ma jkun hemm l-ebda żieda sinifikanti fir-riskju ta’ kreditu, il-provvediment għal indeboliment jitkejjel f’ammont ugwali għat-telf ta’ kreditu mistenni ta’ 12-il xahar (stadju 1). F’każ ta’ żieda sinifikanti fir-riskju ta’ kreditu (stadju 2) u għall-assi finanzjarji b’indeboliment fil-kreditu, il-provvediment għall-indeboliment huwa daqs it-telf ta’ kreditu mistenni tul il-ħajja kollha. Il-mudell il-ġdid ta’ indeboliment japplika għall-assi finanzjarji kollha mkejla f’AC jew f’FVNA, impenji ta’ self u kuntratti ta’ garanzija finanzjarja.

Huwa mistenni li l-mudell il-ġdid ta’ indeboliment li jħares ’il quddiem se jwassal għal rikonoxximent ta’ provvediment addizzjonali għal indeboliment fil-kontijiet annwali tal-UE tal-2021, b’mod partikolari fir-rigward tas-self għall-assistenza finanzjarja pprovdut lil pajjiżi sħab skont il-programmi tal-AMF u tal-Euratom.

Kontabilità ta’ garanzija finanzjarja

Taħt EAR 11 attwali, il-biċċa l-kbira tal-garanziji finanzjarji – b’mod partikolari dawk ipprovduti mingħajr ħlas jew b’konsiderazzjoni nominali – huma kontabbilizzati f’konformità mal-prinċipji ta’ EAR 10 “Provvedimenti, obbligazzjonijiet kontinġenti u assi kontinġenti”, għalhekk jew rikonoxxuti bħala provvedimenti jew iddivulgati bħala obbligazzjonijiet kontinġenti skont il-probabbiltà ta’ telf.

EAR 11 riveduta teħtieġ l-applikazzjoni tar-rekwiżiti kontabilistiċi tal-garanzija finanzjarja għall-kuntratti ta’ garanzija finanzjarja kollha, li inizjalment jenħtieġ li jiġu rikonoxxuti jew fuq il-bażi tal-valur ġust jew fit-telf ta’ kreditu mistenni tul il-ħajja f’każ li ma tkun tista’ tiġi ddeterminata l-ebda miżura affidabbli tal-valur ġust. Fil-kejl sussegwenti, il-kuntratti ta’ garanzija finanzjarja jenħtieġ li jitkejlu fl-ogħla fost (i) l-ammont tal-provvediment għat-telf, u (ii) l-ammont inizjalment rikonoxxut nieqes, fejn xieraq, l-ammont kumulattiv ta’ amortizzament rikonoxxut f’konformità mal-prinċipji ta’ EAR 4 “Dħul minn tranżazzjonijiet ta’ skambju”.

B’konsegwenza ta’ dan, fil-kontijiet tal-UE tal-2021, il-kuntratti ta’ garanzija finanzjarja eżistenti huma mistennija li jiġu riklassifikati minn provvedimenti finanzjarji għall-kategoriji ta’ obbligazzjonijiet ta’ garanzija finanzjarja u mkejla mill-ġdid għall-ogħla fost it-telf ta’ kreditu mistenni tul il-ħajja, u – jekk applikabbli – l-ammont inizjalment rikonoxxut bħala provvedimenti nieqes l-amortizzament akkumulat. Din il-bidla hija mistennija li twassal għal żieda fl-obbligazzjonijiet finanzjarji fuq il-karta bilanċjali, b’mod partikolari fir-rigward tal-garanziji pprovduti lill-Grupp tal-BEI skont il-Mandat ta’ Self Estern.

Ir-rekwiżiti l-ġodda għandhom jiġu applikati b’mod retrospettiv u soġġetti għad-dispożizzjonijiet tranżitorji speċifiċi f’EAR 11 riveduta. B’mod partikolari, ma hija meħtieġa l-ebda dikjarazzjoni mill-ġdid tal-komparattivi. Għalhekk, l-impatti ta’ kwalunkwe kejl mill-ġdid se jiġu rikonoxxuti f’Assi Netti fid-data tal-applikazzjoni inizjali ta’ EAR 11 riveduta.

3.IL-PRINĊIPJI KONTABILISTIĊI

L-objettiv tar-rapporti finanzjarji huwa li jipprovdu informazzjoni li tkun utli għal firxa wiesgħa ta’ utenti dwar il-pożizzjoni finanzjarja, ir-rendiment u l-flussi tal-flus ta’ entità. Għall-UE bħala entità tas-settur pubbliku, l-objettivi huma, b’mod aktar speċifiku, li tiġi pprovduta informazzjoni utli għat-teħid tad-deċiżjonijiet, u li tintwera r-responsabbiltà tal-entità għar-riżorsi fdati lilha. Huwa b’kunsiderazzjoni ta’ dawn l-għanijiet li tfassal dan id-dokument.

Il-kunsiderazzjonijiet kumplessivi (jew il-prinċipji kontabilistiċi) li għandhom jiġu segwiti meta jitħejjew ir-rapporti finanzjarji huma stipulati fir-regola kontabilistika 1 tal-UE “Rapporti Finanzjarji” u huma l-istess bħal dawk deskritti fl-IPSAS 1: preżentazzjoni ġusta, bażi tad-dovuti, negozju avvjat, konsistenza tal-preżentazzjoni, materjalità, aggregazzjoni, tpaċija u informazzjoni komparattiva.

Il-karatteristiċi kwalitattivi tar-rapportar finanzjarju huma r-rilevanza, ir-rappreżentazzjoni fidila (l-affidabbiltà), il-komprensibbiltà, il-puntwalità, il-komparabbiltà u l-verifikabbiltà.

4.KONSOLIDAZZJONI

Il-kamp ta’ applikazzjoni tal-konsolidazzjoni

Ir-rapporti finanzjarji konsolidati tal-UE jinkludu l-entitajiet ikkontrollati sinifikanti kollha, l-arranġamenti konġunti u l-kumpaniji assoċjati. Il-lista sħiħa ta’ entitajiet li jaqgħu taħt il-kamp ta’ applikazzjoni tal-konsolidazzjoni, li issa tinkludi 52 entità kkontrollata u 1 kumpanija assoċjata, tista’ tinstab fin-nota 9. Fost l-entitajiet ikkontrollati hemm l-istituzzjonijiet tal-UE (inklużi l-Kummissjoni, iżda mhux il-Bank Ċentrali Ewropew) u l-aġenziji tal-UE (ħlief dawk tal-Politika Estera u ta’ Sigurtà Komuni). Il-Komunità Ewropea tal-Faħam u l-Azzar f’Likwidazzjoni (KEFA f’Likwidazzjoni) hija meqjusa wkoll bħala entità kkontrollata. L-uniku assoċjat tal-UE huwa l-Fond Ewropew tal-Investiment (FEI).

L-entitajiet li jaqgħu taħt il-kamp ta’ applikazzjoni tal-konsolidazzjoni, iżda li huma immaterjali għar-rapporti finanzjarji konsolidati tal-UE b’mod ġenerali, ma għandhomx bżonn jiġu kkonsolidati jew ikkontabilizzati bl-użu tal-metodu tal-ekwità, meta dan ikun ser jirriżulta f’ħin jew kost eċċessiv għall-UE. Dawk l-entitajiet issir referenza għalihom bħala “Entitajiet minuri” u huma elenkati separatament fin-nota 9. Fl-2020, kien hemm 8 entitajiet li kienu kklassifikati bħala tali entitajiet minuri.

Entitajiet ikkontrollati

Sabiex jiġi ddeterminat il-kamp ta’ applikazzjoni tal-konsolidazzjoni, jiġi applikat il-kunċett ta’ kontroll. L-entitajiet ikkontrollati huma entitajiet li għalihom l-UE hija esposta, jew għandha dritt, għal benefiċċji varjabbli mill-involviment tagħha u għandha l-kapaċità li taffettwa n-natura u l-ammont ta’ dawk il-benefiċċji permezz tas-setgħa tagħha fuq l-entità l-oħra. Din is-setgħa trid tkun preżentement eżerċitabbli u trid tkun relatata mal-attivitajiet rilevanti tal-entità. L-entitajiet ikkontrollati huma kompletament ikkonsolidati. Il-konsolidazzjoni tibda fl-ewwel data li fiha jeżisti l-kontroll u tintemm meta ma jibqax jeżisti dan il-kontroll.

L-aktar indikaturi komuni ta’ kontroll fl-UE huma: il-ħolqien tal-entità permezz ta’ trattati fundaturi jew leġiżlazzjoni sekondarja, il-finanzjament tal-entità mill-baġit tal-UE, l-eżistenza tad-drittijiet tal-vot fil-korpi ta’ tmexxija, l-awditjar mill-Qorti Ewropea tal-Awdituri u l-kwittanza mill-Parlament Ewropew. Issir valutazzjoni individwali għal kull entità sabiex jiġi deċiż jekk wieħed mill-kriterji jew il-kriterji kollha elenkati hawn fuq humiex biżżejjed biex jirriżultaw f’kontroll.

It-tranżazzjonijiet u l-bilanċi materjali kollha bejn l-entitajiet u bejn entitajiet ikkontrollati mill-UE jiġu eliminati, filwaqt li l-qligħ u t-telf mhux realizzati fuq tali tranżazzjonijiet ma humiex materjali u allura ma ġewx eliminati.

Arranġamenti Konġunti

Arranġament konġunt huwa ftehim li fuqu għandhom kontroll konġunt l-UE u parti waħda jew aktar. Kontroll konġunt huwa l-kondiviżjoni miftiehma tal-kontroll ta’ arranġament permezz ta’ arranġament vinkolanti, li jeżisti biss meta d-deċiżjonijiet dwar l-attivitajiet rilevanti jkunu jeħtieġu l-kunsens unanimu tal-partijiet li jikkondividu l-kontroll. Il-ftehimiet konġunti jistgħu jkunu impriżi konġunti jew operazzjonijiet konġunti. Impriża konġunta hija arranġament konġunt li huwa strutturat permezz ta’ veikolu separat u li permezz tiegħu l-partijiet li għandhom kontroll konġunt tal-arranġament għandhom drittijiet għall-assi netti tal-arranġament. Il-parteċipazzjonijiet f’impriżi konġunti jiġu kkontabilizzati bl-użu tal-metodu tal-ekwità (ara n-nota 1.5.4). Operazzjoni konġunta hija arranġament konġunt li permezz tiegħu l-partijiet li jkollhom kontroll konġunt tal-arranġamenti jkollhom drittijiet għall-assi, u obbligi għall-obbligazzjonijiet, b’rabta mal-arranġament. Il-parteċipazzjonijiet f’operazzjonijiet konġunti jiġu kkontabilizzati permezz tar-rikonoxximent fir-rapporti finanzjarji tal-UE tal-assi u l-obbligazzjonijiet, id-dħul u l-ispejjeż tagħha, kif ukoll is-sehem tagħha ta’ assi, obbligazzjonijiet, dħul u spejjeż miżmuma jew imġarrba b’mod konġunt.

Kumpaniji assoċjati

Il-kumpaniji assoċjati huma entitajiet li fuqhom l-UE għandha, direttament jew indirettament, influwenza sinifikanti, iżda mhux kontroll esklussiv jew konġunt. Huwa preżunt li teżisti influwenza sinifikanti jekk l-UE jkollha, direttament jew indirettament, 20 % jew aktar tad-drittijiet tal-vot. Il-parteċipazzjonijiet f’kumpaniji assoċjati jiġu kkontabilizzati bl-użu tal-metodu tal-ekwità (ara n-nota 1.5.4).

Entitajiet mhux ikkonsolidati li l-fondi tagħhom jiġu ġestiti mill-Kummissjoni

Il-fondi tar-Reġim Komuni tal-Assigurazzjoni tal-Mard għall-persunal tal-UE, il-Fond Ewropew għall-Iżvilupp u l-Fond ta’ Garanzija tal-Parteċipanti jiġu ġestiti mill-Kummissjoni f’isem dawn l-entitajiet. Madankollu, billi dawn l-entitajiet ma humiex ikkontrollati mill-UE, huma ma humiex ikkonsolidati fir-rapporti finanzjarji tagħha.

5.IL-BAŻI TAT-TĦEJJIJA

Ir-rapporti finanzjarji jiġu ppreżentati kull sena. Is-sena kontabilistika tibda fl-1 ta’ Jannar u tintemm fil-31 ta’ Diċembru.

6.Il-munita u l-bażi għall-konverżjoni

Il-munita funzjonali u tar-rapportar

Ir-rapporti finanzjarji jiġu ppreżentati f’miljuni ta’ euro, sakemm ma jkunx indikat mod ieħor, billi l-euro hija l-munita funzjonali tal-UE.

Tranżazzjonijiet u bilanċi

It-tranżazzjonijiet f’muniti barranin jiġu kkonvertiti f’euro bir-rati tal-kambju prevalenti fid-dati tat-tranżazzjonijiet. Il-qligħ u t-telf tal-kambju li jirriżultaw mis-saldu ta’ tranżazzjonijiet f’muniti barranin u mill-konverżjoni mill-ġdid skont ir-rati tal-kambju fi tmiem is-sena tal-assi u l-obbligazzjonijiet monetarji denominati f’muniti barranin huma rikonoxxuti fir-rapport tal-introjtu. Id-differenzi fil-qlib fuq strumenti finanzjarji mhux monetarji kklassifikati bħala assi finanzjarji disponibbli għall-bejgħ huma inklużi fir-riżerva ta’ valur ġust.

Japplikaw metodi ta’ konverżjoni differenti għall-proprjetà, l-impjanti u t-tagħmir u għall-assi intanġibbli, li jżommu l-valur tagħhom f’euro bir-rata li tkun ġiet applikata fid-data meta nxtraw.

Il-bilanċi fi tmiem is-sena tal-assi u tal-obbligazzjonijiet monetarji denominati f’muniti barranin jiġu kkonvertiti f’euro fuq il-bażi tar-rati tal-kambju tal-Bank Ċentrali Ewropew (BĊE) applikabbli fil-31 ta’ Diċembru:

Ir-rati tal-kambju tal-euro

7.L-użu tal-estimi

F’konformità mal-IPSAS u mal-prinċipji kontabilistiċi aċċettati b’mod ġenerali, ir-rapporti finanzjarji bilfors iridu jinkludu ammonti bbażati fuq estimi u suppożizzjonijiet mill-maniġment ibbażati fuq l-aktar informazzjoni affidabbli disponibbli. L-estimi sinifikanti jinkludu, iżda ma humiex limitati għal: ammonti għal obbligazzjonijiet tal-benefiċċji tal-impjegati, riskju finanzjarju ta’ kontijiet riċevibbli u l-ammonti żvelati fin-noti li jikkonċernaw strumenti finanzjarji, dħul u ħlasijiet dovuti, provvedimenti, grad ta’ indeboliment ta’ assi intanġibbli u proprjetà, impjant u tagħmir, valur nett realizzabbli ta’ inventarji, assi u obbligazzjonijiet kontinġenti. Ir-riżultati attwali jistgħu jkunu differenti minn dawk l-estimi. Bidliet fl-estimi huma riflessi fil-perjodu li fih isiru magħrufa, jekk il-bidla taffettwa l-perjodu biss, jew dak il-perjodu u perjodi futuri, jekk il-bidla taffettwa lit-tnejn li huma.

8.IL-KARTA BILANĊJALI

9.Assi intanġibbli

Assi intanġibbli huwa assi mhux monetarju identifikabbli mingħajr sustanza fiżika. Assi jkun identifikabbli jekk ikun separabbli (jiġifieri jista’ jiġi sseparat jew maqsum mill-entità, pereżempju, billi jinbiegħ, jiġi ttrasferit, liċenzjat, mikri, jew skambjat, individwalment jew flimkien ma’ kuntratt relatat, assi jew obbligazzjoni identifikabbli, irrispettivament minn jekk l-entità jkollhiex il-ħsieb li tagħmel hekk), jew jekk jirriżulta minn arranġamenti vinkolanti (inklużi drittijiet minn kuntratti jew drittijiet legali oħrajn), irrispettivament minn jekk dawk id-drittijiet ikunux trasferibbli jew separabbli mill-entità jew minn drittijiet u obbligi oħrajn).

L-assi intanġibbli akkwistati jiġu ddikjarati skont il-kost storiku nieqes l-amortizzament akkumulat u t-telf mill-indeboliment. L-assi intanġibbli żviluppati internament jiġu kapitalizzati meta jiġu ssodisfati l-kriterji rilevanti tar-Regoli Kontabilistiċi tal-UE u l-ispejjeż ikunu jirrigwardjaw biss il-fażi ta’ żvilupp tal-assi. Il-kostijiet kapitalizzabbli jinkludu l-kostijiet direttament attribwibbli kollha meħtieġa biex joħolqu, jipproduċu u jħejju l-assi sabiex ikun jista’ jopera bil-mod maħsub mill-maniġment. Il-kostijiet assoċjati mal-attivitajiet ta’ riċerka, il-kostijiet tal-iżvilupp mhux kapitalizzabbli u l-kostijiet tal-manutenzjoni huma rikonoxxuti bħala spejjeż kif imġarrba.

L-assi intanġibbli jiġu amortizzati fuq bażi ta’ linja dritta matul il-ħajja utli stmata tagħhom (minn 3 snin sa 11-il sena). Il-ħajjiet utli stmati tal-assi intanġibbli jiddependu mill-ħajja ekonomika jew legali speċifika tagħhom iddeterminata permezz ta’ ftehim.

10.Proprjetà, impjanti u tagħmir

Il-proprjetà, l-impjanti u t-tagħmir kollha jiġu ddikjarati skont il-kost storiku nieqes id-deprezzament akkumulat u t-telf mill-indeboliment. Il-kost jinkludi nefqa li hija direttament attribwibbli għall-akkwiżizzjoni, il-kostruzzjoni jew it-trasferiment tal-assi.

Il-kostijiet sussegwenti jiġu inklużi fl-ammont riportat tal-assi jew rikonoxxuti bħala assi separat, kif xieraq, biss meta jkun probabbli li l-benefiċċji ekonomiċi futuri jew il-potenzjal tas-servizz assoċjat mal-partita jiġu ċċirkolati lill-UE u l-kost ta’ dan ikun jista’ jitkejjel b’mod affidabbli. Il-kostijiet tat-tiswija u tal-manutenzjoni jiġu ddebitati lir-rapport tal-introjtu matul il-perjodu finanzjarju li fih jiġġarrbu.

L-art ma tiġix deprezzata billi hija titqies li għandha ħajja utli indefinita. L-assi taħt kostruzzjoni ma jiġux deprezzati, billi dawn l-assi għadhom ma humiex disponibbli għall-użu. Id-deprezzament fuq assi oħrajn jiġi kkalkolat bl-użu tal-metodu ta’ linja dritta sabiex jiġi allokat il-kost tagħhom nieqes il-valuri residwi tagħhom matul il-ħajja utli stmata tagħhom, kif ġej:

Il-qligħ jew it-telf fuq disponimenti jiġu ddeterminati billi r-rikavat nieqes l-ispejjeż tal-bejgħ jitqabbel mal-ammont riportat tal-assi disposti u jiġu inklużi fir-rapport tal-introjtu.

Lokazzjonijiet

Lokazzjoni hija ftehim li permezz tiegħu, il-lokatur jagħti lil-lokatarju bi ħlas jew b’serje ta’ pagamenti, id-dritt li juża assi għal perjodu ta’ żmien miftiehem. Il-lokazzjonijiet jiġu kklassifikati bħala lokazzjonijiet finanzjarji jew lokazzjonijiet operatorji.

Il-lokazzjonijiet finanzjarji huma lokazzjonijiet fejn sostanzjalment ir-riskji u l-benefiċċji kollha inċidentali għas-sjieda jiġu ttrasferiti lil-lokatarju. Meta wieħed jidħol f’lokazzjoni finanzjarja bħala lokatarju, l-assi akkwistati taħt il-lokazzjoni finanzjarja jiġu rikonoxxuti bħala assi u obbligi ta’ lokazzjoni assoċjati bħala obbligazzjonijiet mill-bidu tat-terminu tal-lokazzjoni. L-assi u l-obbligazzjonijiet jiġu rikonoxxuti f’ammonti ugwali għall-valur ġust tal-proprjetà mogħtija b’lokazzjoni jew, jekk ikun aktar baxx, il-valur preżenti tal-ħlasijiet minimi tal-lokazzjoni, kull wieħed iddeterminat fil-bidu tal-lokazzjoni. Matul il-perjodu tat-terminu tal-lokazzjoni, l-assi miżmuma taħt lokazzjonijet finanzjarji jiġu deprezzati matul l-iqsar ħajja utli tal-assi u t-terminu tal-lokazzjoni. Il-ħlasijiet minimi tal-lokazzjoni jitqassmu bejn l-imposta finanzjarja (l-element tal-imgħax) u t-tnaqqis tal-obbligazzjoni pendenti (l-element tal-kapital). L-imposta finanzjarja tiġi allokata għal kull perjodu matul it-terminu tal-lokazzjoni sabiex tipproduċi rata perjodika kostanti tal-imgħax fuq il-bilanċ li jifdal tal-obbligazzjoni, li tiġi ppreżentata bħala kurrenti/mhux kurrenti, kif applikabbli. Il-kirjiet kontinġenti jiġu ddebitati bħala spejjeż fil-perjodu li fih jiġġarrbu.

Il-lokazzjoni operatorja hija lokazzjoni minbarra lokazzjoni finanzjarja, jiġifieri lokazzjoni fejn il-lokatur iżomm sostanzjalment ir-riskji u l-benefiċċji kollha inċidentali għas-sjieda ta’ assi. Meta wieħed jidħol f’lokazzjoni operatorja bħala lokatarju, il-pagamenti tal-lokazzjoni operatorja jiġu rikonoxxuti bħala spiża fir-rapport tal-introjtu fuq bażi ta’ linja dritta matul it-terminu tal-lokazzjoni la b’assi mogħti b’lokazzjoni u lanqas b’obbligazzjoni ta’ lokazzjoni ppreżentata fir-rapport tal-pożizzjoni finanzjarja.

11.L-indeboliment ta’ assi mhux finanzjarji

Indeboliment huwa telf fil-benefiċċji ekonomiċi futuri jew il-potenzjal ta’ servizz ta’ assi, minbarra r-rikonoxximent sistematiku tat-telf tal-benefiċċji ekonomiċi futuri tal-assi jew il-potenzjal ta’ servizz permezz ta’ amortizzament jew deprezzament (kif applikabbli). L-assi li għandhom ħajja utli indefinita ma humiex soġġetti għal amortizzament/deprezzament u jiġu ttestjati kull sena għal indeboliment. Assi li huma soġġetti għal amortizzament/deprezzament jiġu ttestjati għal indeboliment kull meta jkun hemm indikazzjoni fid-data tar-rapportar li assi jista’ jkun indebolit. Telf minn indeboliment jiġi rikonoxxut għall-ammont li bih l-ammont riportat tal-assi jaqbeż l-ammont (servizz) rekuperabbli tiegħu. L-ammont (servizz) rekuperabbli huwa l-ogħla mill-valur ġust ta’ assi nieqes il-kostijiet tal-bejgħ u l-valur tiegħu fl-użu.

Il-valuri residwi tal-assi intanġibbli u l-proprjetà, l-impjanti u t-tagħmir u l-ħajja utli jiġu rieżaminati u, jekk ikun xieraq, aġġustati, mill-inqas darba fis-sena. Jekk ir-raġunijiet għall-indebolimenti rikonoxxuti fis-snin preċedenti ma japplikawx aktar, it-telf minn indeboliment jitreġġa’ lura kif xieraq.

12.Investimenti kontabilizzati bl-użu tal-metodu tal-ekwità

Parteċipazzjonijiet f’kumpaniji assoċjati u impriżi konġunti

L-investimenti kontabbilizzati bl-użu tal-metodu tal-ekwità inizjalment jiġu rikonoxxuti skont il-kost, bl-ammont riportat inizjali sussegwentement jiżdied jew jitnaqqas sabiex jiġu rikonoxxuti kontribuzzjonijiet ulterjuri, is-sehem tal-UE mis-surplus jew mid-defiċit tad-destinatarja ta’ investiment, kwalunkwe indeboliment u dividend. Il-kost inizjali flimkien mal-movimenti kollha jagħtu l-ammont riportat tal-investiment fir-rapporti finanzjarji fid-data tal-karta bilanċjali. Is-sehem tal-UE mis-surplus jew mid-defiċit tad-destinatarja ta’ investiment jiġi rikonoxxut fir-rapport tal-introjtu, u s-sehem tagħha mill-movimenti tad-destinatarja ta’ investiment fl-ekwità jiġi rikonoxxut fir-riżervi fi ħdan l-assi netti. Id-distribuzzjonijiet riċevuti mill-investiment inaqqsu l-ammont riportat tal-assi.

Jekk is-sehem tal-UE mid-defiċits ta’ investiment ikkontabilizzat bl-użu tal-metodu tal-ekwità jkun daqs jew aktar mill-interess tagħha fl-investiment, l-UE ma tibqax tirrikonoxxi s-sehem tagħha mit-telf ulterjuri (“telf mhux rikonoxxut”). Wara li l-interess tal-UE jitnaqqas għal żero, jiġi previst telf addizzjonali u tiġi rikonoxxuta obbligazzjoni biss sal-punt li l-UE tkun ġarrbet obbligu legali jew kostruttiv jew tkun għamlet pagamenti f’isem l-entità.

Jekk ikun hemm indikazzjonijiet ta’ indeboliment, tkun meħtieġa valwazzjoni negattiva għall-inqas ammont rekuperabbli. L-ammont rekuperabbli jiġi ddeterminat kif deskritt fin-nota 1.5.3. Jekk ir-raġuni għall-indeboliment ma tibqax tapplika f’data aktar tard, it-telf minn indeboliment jitreġġa’ lura għall-ammont riportat li kien jiġi ddeterminat kieku ma kien rikonoxxut l-ebda telf minn indeboliment.

F’każijiet fejn l-UE jkollha 20 % jew aktar minn fond ta’ kapital tal-investiment, hija ma tfittix li teżerċita influwenza sinifikanti. Għalhekk, dawn il-fondi huma ttrattati bħala strumenti finanzjarji u kkategorizzati bħala assi finanzjarji disponibbli għall-bejgħ.

Il-kumpaniji assoċjati u l-impriżi konġunti kklassifikati bħala entitajiet minuri (ara n-nota 1.3) ma jiġux ikkontabilizzati skont il-metodu tal-ekwità. Il-kontribuzzjonijiet tal-UE għal dawk l-entitajiet jiġu kkontabilizzati bħala spiża tal-perjodu.

13.Assi finanzjarji

Klassifikazzjoni

L-UE tikklassifika l-assi finanzjarji tagħha fil-kategoriji “assi finanzjarji abbażi tal-valur ġust permezz ta’ surplus jew defiċit”, “self u riċevibbli”, “investimenti miżmuma sal-maturità” u “assi finanzjarji disponibbli għall-bejgħ”. Il-klassifikazzjoni tal-istrumenti finanzjarji tiġi ddeterminata mar-rikonoxximent inizjali u terġa’ tiġi evalwata f’kull data tal-karta bilanċjali.

(I)Assi finanzjarji abbażi tal-valur ġust permezz ta’ surplus jew defiċit

Assi finanzjarju jiġi kklassifikat fil-kategorija “valur ġust permezz ta’ surplus jew defiċit” jekk jiġi akkwistat prinċipalment bl-iskop li jinbiegħ fuq perjodu ta’ żmien qasir, jew jekk ikun hekk deżinjat mill-entità. Id-derivattivi huma ppreżentati wkoll f’din il-kategorija. L-assi f’din il-kategorija jiġu kklassifikati bħala assi kurrenti jekk ikunu mistennija li jiġu realizzati fi żmien 12-il xahar mid-data tal-karta bilanċjali.

(II)Self u riċevibbli

Is-self u r-riċevibbli huma assi finanzjarji mhux derivattivi b’pagamenti fissi jew determinabbli li ma humiex ikkwotati f’suq attiv. Dawn jinħolqu meta l-UE tipprovdi flus, oġġetti jew servizzi direttament lil debitur mingħajr l-intenzjoni li jinnegozja r-riċevibbli, jew f’każ li l-UE tkun surrogata għad-drittijiet tal-mutwanti oriġinali wara pagament li jkun sar mill-UE taħt kuntratt ta’ garanzija. Pagamenti dovuti fi żmien 12-il xahar mid-data tal-karta bilanċjali jiġu kklassifikati bħala assi kurrenti. Pagamenti dovuti wara 12-il xahar mid-data tal-karta bilanċjali jiġu kklassifikati bħala assi mhux kurrenti. Is-self u r-riċevibbli jinkludu depożiti ta’ żmien fiss b’maturità oriġinali ta’ aktar minn tliet xhur.

(III)Investimenti miżmuma sal-maturità

L-investimenti miżmuma sal-maturità huma assi finanzjarji mhux derivattivi b’pagamenti fissi jew varjabbli u maturitajiet fissi li l-UE għandha l-intenzjoni pożittiva u l-kapaċità li żżomm sal-maturità. Matul din is-sena finanzjarja, l-UE ma żammet l-ebda investiment f’din il-kategorija.

(IV)Assi finanzjarji disponibbli għall-bejgħ

Assi finanzjarji disponibbli għall-bejgħ huma assi mhux derivattivi li huma nnominati f’din il-kategorija jew li mhuma kklassifikati fl-ebda waħda mill-kategoriji l-oħrajn. Dawn huma kklassifikati bħala assi kurrenti jew mhux kurrenti, skont il-perjodu ta’ żmien li matulu l-UE tistenna li żżommhom. L-investimenti f’entitajiet li la huma kkonsolidati u lanqas ikkontabbilizzati bl-użu tal-metodu tal-ekwità u investimenti oħrajn tat-tip ta’ ekwità (eż. Operazzjonijiet b’Kapital ta’ Riskju) huma kklassifikati wkoll bħala assi finanzjarji disponibbli għall-bejgħ.

Rikonoxximent u kejl inizjali

Ix-xiri u l-bejgħ ta’ assi finanzjarji kklassifikati bħala “abbażi tal-valur ġust permezz ta’ surplus jew defiċit”, “miżmuma sal-maturità” jew “disponibbli għall-bejgħ” jiġu rikonoxxuti fid-data tan-negozju tagħhom – id-data li fiha l-UE timpenja ruħha li tixtri jew li tbiegħ l-assi. L-ekwivalenti ta’ flus u s-self jiġu rikonoxxuti meta l-flus kontanti jiġu ddepożitati f’istituzzjoni finanzjarja jew avvanzati lill-mutwatarji. L-istrumenti finanzjarji huma inizjalment rikonoxxuti skont il-valur ġust. Għall-assi finanzjarji kollha mhux riportati abbażi tal-valur ġust permezz ta’ surplus jew defiċit, il-kostijiet tat-tranżazzjonijiet jiżdiedu mal-valur ġust fir-rikonoxximent inizjali. L-assi finanzjarji riportati abbażi tal-valur ġust permezz ta’ surplus jew defiċit għall-ewwel jiġu rikonoxxuti skont il-valur ġust u l-kostijiet tat-tranżazzjonijiet jiġu ddebitati fir-rapport tal-introjtu.

Il-valur ġust ta’ assi finanzjarju mar-rikonoxximent inizjali normalment ikun il-prezz tat-tranżazzjoni (jiġifieri l-valur ġust tal-korrispettiv riċevut), sakemm il-valur ġust ta’ dak l-istrument ma jintweriex permezz ta’ tqabbil ma’ tranżazzjonijiet tas-suq kurrenti osservabbli oħrajn fl-istess strument jew abbażi ta’ teknika ta’ valwazzjoni li l-varjabbli tagħha jinkludu biss data minn swieq osservabbli (eż. f’każ ta’ xi kuntratti tad-derivattivi). Madankollu, meta jingħata self fit-tul li ma jkollu l-ebda mgħax jew inkella jkollu mgħax taħt il-kundizzjonijiet tas-suq, il-valur ġust tiegħu jista’ jiġi stmat bħala l-valur preżenti tar-riċevuti ta’ flus futuri kollha skontati billi tintuża r-rata tal-imgħax tas-suq prevalenti għal strument simili bi klassifikazzjoni tal-kreditu simili.

Is-self mogħti jitkejjel fl-ammont nominali tiegħu, li jitqies li huwa l-valur ġust tas-self. Ir-raġunament għal dan huwa kif ġej:

L-istrumenti finanzjarji ma jibqgħux rikonoxxuti meta jiskadu d-drittijiet li jiġu riċevuti flussi ta’ flus mill-investimenti jew meta l-UE tkun ittrasferiet b’mod sostanzjali r-riskji u l-benefiċċji kollha tas-sjieda lil parti oħra.

Kejl sussegwenti

Il-valuri ġusti tal-investimenti kkwotati fi swieq attivi huma bbażati fuq il-prezzijiet kurrenti tal-offerti. Jekk is-suq għal assi finanzjarju ma jkunx attiv (u għal titoli mhux ikkwotati u derivattivi barra l-Borża), l-UE tistabbilixxi valur ġust billi tuża tekniki ta’ valwazzjoni. Dawn jinkludu l-użu ta’ tranżazzjonijiet distakkati reċenti, referenza għal strumenti oħrajn li huma sostanzjalment l-istess, analiżi tal-flussi tal-flus skontati, mudelli tal-ipprezzar tal-opzjonijiet u tekniki ta’ valwazzjoni oħrajn li jintużaw b’mod komuni mill-parteċipanti tas-suq.

L-investimenti f’Fondi ta’ Kapital ta’ Riskju, ikklassifikati bħala assi finanzjarji disponibbli għall-bejgħ, li ma għandhomx prezz ikkwotat f’suq attiv, jiġu stmati bil-valur tal-assi netti attribwibbli, li jitqies bħala ekwivalenti tal-valur ġust tagħhom.

Fil-każijiet fejn il-valur ġust tal-investimenti fi strumenti ta’ ekwità li ma għandhomx prezz tas-suq ikkwotat f’suq attiv ma jkunx jista’ jitkejjel b’mod affidabbli, dawn l-investimenti jiġu stmati abbażi tal-kost tagħhom nieqes it-telf minn indeboliment.

Indeboliment tal-assi finanzjarji

Assi finanzjarju jkun indebolit u jiġi rikonoxxut telf jekk, u biss jekk, ikun hemm evidenza oġġettiva ta’ indeboliment bħala riżultat ta’ avveniment wieħed jew aktar li seħħew wara r-rikonoxximent inizjali tal-assi u dak l-avveniment (jew avvenimenti) ta’ telf ikollu/ikollhom impatt fuq il-flussi ta’ flus stmati fil-ġejjieni tal-assi finanzjarju li jista’ jiġi stmat b’mod affidabbli. L-UE tivvaluta f’kull data tar-rapportar jekk hemmx evidenza oġġettiva li assi finanzjarju huwa indebolit.

(a)Assi riportati abbażi tal-kost amortizzat

Jekk ikun hemm evidenza oġġettiva li ġġarrab telf minn indeboliment fuq self u riċevibbli jew investimenti miżmuma sal-maturità riportati abbażi tal-kost amortizzat, l-ammont tat-telf jitkejjel bħala d-differenza bejn l-ammont riportat tal-assi u l-valur preżenti tal-flussi tal-flus stmati fil-ġejjieni (minbarra t-telf ta’ kreditu futur li ma ġġarrabx) skontati bir-rata effettiva tal-imgħax oriġinali tal-assi finanzjarju. L-ammont riportat tal-assi jitnaqqas u l-ammont tat-telf jiġi rikonoxxut fir-rapport tal-introjtu. Jekk self jew investiment miżmum sal-maturità jkollu rata tal-imgħax varjabbli, ir-rata ta’ skont għall-kejl ta’ kwalunkwe telf minn indeboliment tkun ir-rata effettiva tal-imgħax kurrenti stabbilita skont il-kuntratt. Il-kalkolu tal-valur preżenti tal-flussi ta’ flus stmati fil-ġejjieni ta’ assi finanzjarju kollateralizzat jirrifletti l-flussi ta’ flus li jistgħu jirriżultaw minn preklużjoni neqsin il-kostijiet għall-kisba u l-bejgħ tal-kollateral, kemm jekk preklużjoni tkun probabbli kif ukoll jekk le. Jekk, f’perjodu sussegwenti, l-ammont tat-telf minn indeboliment jonqos u t-tnaqqis jista’ jkun relatat b’mod oġġettiv ma’ avveniment li jseħħ wara li jkun ġie rikonoxxut l-indeboliment, it-telf minn indeboliment preċedentement rikonoxxut jitreġġa’ lura permezz tar-rapport tal-introjtu.

(b)Assi riportati skont il-valur ġust

Fil-każ ta’ investimenti ta’ ekwità kklassifikati bħala assi finanzjarji disponibbli għall-bejgħ, tnaqqis sinifikanti jew permanenti (imtawwal) fil-valur ġust tat-titolu taħt il-kost tiegħu jiġi kkunsidrat fid-determinazzjoni ta’ jekk it-titoli humiex indeboliti. Jekk tkun teżisti evidenza bħal din għal assi finanzjarji disponibbli għall-bejgħ, it-telf kumulattiv – imkejjel bħala d-differenza bejn il-kost tal-akkwiżizzjoni u l-valur ġust kurrenti, nieqes kwalunkwe telf minn indeboliment fuq dak l-assi finanzjarju preċedentement rikonoxxut fir-rapport tal-introjtu – jitneħħa mir-riżervi u jiġi rikonoxxut fir-rapport tal-introjtu. It-telf minn indeboliment rikonoxxut fir-rapport tal-introjtu fuq strumenti ta’ ekwità ma jitreġġax lura permezz tar-rapport tal-introjtu. Jekk, f’perjodu sussegwenti, jiżdied il-valur ġust ta’ strument ta’ dejn ikklassifikat bħala assi finanzjarju disponibbli għall-bejgħ u ż-żieda tista’ tkun relatata b’mod oġġettiv ma’ avveniment li jseħħ wara li jkun ġie rikonoxxut it-telf minn indeboliment, it-telf minn indeboliment jitreġġa’ lura permezz tar-rapport tal-introjtu.

14.Inventarji

L-inventarji jiġu ddikjarati skont l-inqas kost u valur nett realizzabbli. Il-kost jiġi ddeterminat bl-użu tal-metodu li joħroġ li daħal l-ewwel (“first-in, first-out” — FIFO). Il-kost tal-oġġetti lesti u tax-xogħol li jkun għadu għaddej jinkludi l-kostijiet tal-materja prima, tax-xogħol dirett u kostijiet oħrajn direttament attribwibbli, kif ukoll spejjeż ġenerali tal-produzzjoni relatati (abbażi tal-kapaċità operazzjonali normali). Il-valur nett realizzabbli huwa l-prezz tal-bejgħ stmat matul il-perkors normali tan-negozju, nieqes il-kostijiet tat-tlestija u l-ispejjeż tal-bejgħ. Meta l-inventarji jinżammu għad-distribuzzjoni mingħajr ħlas jew għal ħlas nominali, dawn jitkejlu skont l-inqas kost u l-kost tas-sostituzzjoni kurrenti. Il-kost tas-sostituzzjoni kurrenti huwa l-kost li ġġarrab l-UE sabiex tikseb l-assi fid-data tar-rapportar.

15.Ammonti tal-prefinanzjament

Prefinanzjament huwa pagament maħsub sabiex jipprovdi lill-benefiċjarju b’avvanz ta’ flus, jiġifieri “float”. Huwa jista’ jinqasam f’għadd ta’ pagamenti fuq perjodu definit fil-kuntratt, fid-deċiżjoni, fil-ftehim jew fl-att ġuridiku bażiku partikolari. Il-float jew l-avvanz jew jintuża għall-finijiet li għalihom ġie pprovdut matul il-perjodu definit fil-ftehim jew inkella jitħallas lura. Jekk il-benefiċjarju ma jġarrabx in-nefqa eliġibbli, huwa għandu l-obbligu li jrodd lura l-avvanz ta’ prefinanzjament lill-UE. Billi l-UE żżomm il-kontroll fuq il-prefinanzjament u hija intitolata għal rifużjoni għall-parti ineliġibbli, l-ammont jiġi ppreżentat bħala assi.

Il-prefinanzjament għall-ewwel jiġi rikonoxxut fuq il-karta bilanċjali meta l-flus kontanti jiġu ttrasferiti lir-riċevitur. Dan jitkejjel fl-ammont tal-korrispettiv mogħti. Fil-perjodi sussegwenti, il-prefinanzjament jitkejjel fl-ammont inizjalment rikonoxxut fuq il-karta bilanċjali nieqes l-ispejjeż eliġibbli (inklużi l-ammonti stmati, fejn meħtieġa) mġarrba matul il-perjodu.

L-imgħax fuq il-prefinanzjament jiġi rikonoxxut hekk kif jinkiseb f’konformità mal-provvedimenti tal-ftehim rilevanti. Stima tad-dħul dovut mill-imgħaxijiet, abbażi tal-aktar informazzjoni affidabbli, issir fl-aħħar tas-sena u tiġi inkluża fil-karta bilanċjali.

Avvanzi oħrajn lill-Istati Membri li joriġinaw minn rimborż mill-UE ta’ ammonti mħallsa bħala avvanzi mill-Istati Membri lill-benefiċjarji tagħhom (inklużi “strumenti finanzjarji taħt ġestjoni kondiviża”) jiġu rikonoxxuti bħala assi u ppreżentati taħt l-intestatura tal-“Prefinanzjament”. Avvanzi oħrajn lill-Istati Membri sussegwentement jitkejlu fl-ammont inizjalment rikonoxxut fuq il-karta bilanċjali nieqes l-aħjar stima tal-ispejjeż eliġibbli mġarrba mill-benefiċjarji finali, ikkalkolat abbażi ta’ suppożizzjonijiet raġonevoli u li jistgħu jiġu appoġġati.

Il-kontribuzzjonijiet f’fondi fiduċjarji tal-UE mhux konsolidati fil-Kummissjoni Ewropea, jew f’entitajiet mhux konsolidati oħrajn, jiġu kklassifikati bħala prefinanzjament minħabba li l-għan tagħhom huwa li jagħtu ‘float’ lill-fond fiduċjarju sabiex dan ikun jista’ jiffinanzja azzjonijiet speċifiċi definiti skont l-objettivi tal-fond fiduċjarju. Il-kontribuzzjonijiet tal-UE għall-fondi fiduċjarji jitkejlu fl-ammont inizjali tal-kontribuzzjoni tal-UE nieqes l-ispejjeż eliġibbli, inklużi l-ammonti stmati, fejn ikunu meħtieġa, imġarrba mill-fond fiduċjarju matul il-perjodu tar-rapportar u allokati għall-kontribuzzjoni tal-UE f’konformità mal-ftehim sottostanti.

16.Riċevibbli ta’ skambju u rekuperabbli mhux ta’ skambju

Ir-Regoli Kontabilistiċi tal-UE jeħtieġu preżentazzjoni separata ta’ tranżazzjonijiet ta’ skambju u mhux ta’ skambju. Sabiex issir distinzjoni bejn iż-żewġ kategoriji, it-terminu “riċevibbli” huwa riżervat għal tranżazzjonijiet ta’ skambju, filwaqt li għal “tranżazzjonijiet mhux ta’ skambju”, jiġifieri meta l-UE tirċievi valur mingħand entità oħra mingħajr ma tagħti direttament valur kważi ugwali bi skambju, jintuża t-terminu “rekuperabbli” (pereżempju, rekuperabbli minn Stati Membri relatati mar-riżorsi proprji).

Ir-riċevibbli minn tranżazzjonijiet ta’ skambju jissodisfaw id-definizzjoni ta’ strumenti finanzjarji u, b’hekk, huma kklassifikati bħala self u riċevibbli u jitkejlu kif xieraq (ara n-nota 1.5.5). Id-divulgazzjonijiet fin-noti tal-istrumenti finanzjarji li jikkonċernaw ir-riċevibbli minn tranżazzjonijiet ta’ skambju jinkludu d-dħul dovut u l-imposti differiti minn tranżazzjonijiet ta’ skambju, minħabba li ma humiex materjali. Issir valwazzjoni negattiva ġenerali abbażi tal-esperjenza tal-passat għal ordnijiet ta’ rkupru pendenti li ma humiex diġà soġġetti għal valwazzjoni negattiva speċifika.

Ammonti rekuperabbli minn tranżazzjonijiet mhux ta’ skambju jiġu riportati bil-valur ġust fid-data tal-akkwiżizzjoni (aġġustati għall-imgħax u l-penali) bit-tnaqqis tal-valwazzjoni negattiva minħabba indeboliment. Valwazzjoni negattiva għal indeboliment ta’ rekuperabbli minn tranżazzjonijiet mhux ta’ skambju tiġi stabbilita meta jkun hemm evidenza oġġettiva li l-UE ma tkunx tista’ tiġbor l-ammonti kollha dovuti skont it-termini oriġinali tar-rekuperabbli minn tranżazzjonijiet mhux ta’ skambju. L-ammont tal-valwazzjoni negattiva huwa d-differenza bejn l-ammont riportat tal-assi u l-ammont li jista’ jiġi rkuprat. L-ammont tal-valwazzjoni negattiva huwa rikonoxxut fir-rapport tal-introjtu. Issir ukoll valwazzjoni negattiva ġenerali, abbażi tal-esperjenza tal-passat, għal ordnijiet ta’ rkupru pendenti li ma humiex diġà soġġetti għal valwazzjoni negattiva speċifika. Ara n-nota 1.5.14 dwar it-trattament tad-dħul dovut fi tmiem is-sena. L-ammonti murija u divulgati bħala rekuperabbli minn tranżazzjonijiet mhux ta’ skambju ma humiex strumenti finanzjarji, minħabba li ma jirriżultawx minn kuntratt li kien iwassal għal obbligazzjoni finanzjarja jew għal strument ta’ ekwità. Madankollu, fin-noti għar-rapporti finanzjarji, ir-rekuperabbli minn tranżazzjonijiet mhux ta’ skambju jiġu divulgati flimkien mar-riċevibbli minn tranżazzjonijiet ta’ skambju, fejn xieraq.

17.Il-flus u l-ekwivalenti ta’ flus

Il-flus u l-ekwivalenti ta’ flus huma strumenti finanzjarji u jinkludu flus fl-idejn, depożiti miżmuma fuq talba jew b’avviż ta’ malajr mal-banek u investimenti ferm likwidi oħrajn b’terminu qasir bil-maturitajiet oriġinali ta’ tliet xhur jew inqas.

18.Benefiċċji tal-impjegati

L-UE tipprovdi sett ta’ benefiċċji (emolumenti u sigurtà soċjali) lill-impjegati. Għall-finijiet ta’ kontabbiltà, dawn għandhom jiġu kklassifikati f’benefiċċji b’terminu qasir u ta’ wara l-impjieg.

Benefiċċji tal-impjegati b’terminu qasir

Il-benefiċċji tal-impjegati b’terminu qasir huma dawk il-benefiċċji li għandhom jiġu saldati qabel tnax-il xahar wara tmiem il-perjodu ta’ rapportar li fih l-impjegati taw is-servizz, bħal salarji, liv minħabba mard annwali u bi ħlas, u allowances oħrajn b’terminu qasir. Il-benefiċċji b’terminu qasir tal-impjegati jiġu rikonoxxuti bħala spiża meta jiġi pprovdut is-servizz relatat. Obbligazzjoni tiġi rikonoxxuta għall-ammont li mistenni jitħallas jekk l-UE jkollha obbligu legali jew kostruttiv preżenti xi tħallas bħala riżultat ta’ servizz passat ipprovdut mill-impjegat u l-obbligu jkun jista’ jiġi stmat b’mod affidabbli.

Benefiċċji ta’ wara l-impjieg

L-UE tagħti sett ta’ benefiċċji ta’ wara l-impjieg lill-impjegati, li jinkludu pensjonijiet tal-irtirar, tal-invalidità u tas-sopravivenza pprovduti taħt l-Iskema ta’ Pensjonijiet tal-Uffiċjali Ewropej (‘Pension Scheme of the European Officials’ - PSEO), kif ukoll kopertura medika pprovduta taħt ir-Reġim Komuni tal-Assigurazzjoni tal-Mard (‘Joint Sickness Insurance Scheme’ - JSIS) (ara n-nota 2.9). Dawn il-benefiċċji jiġu pprovduti taħt pjan wieħed – għalkemm maqsum f’żewġ skemi – u dawn iridu jiġu ttrattati b’mod simili sabiex tingħata preżentazzjoni ġusta tas-sitwazzjoni u jkunu jirriflettu r-realtà ekonomika:

. Il-membri tal-persunal jikkontribwixxu terz mill-kost mistenni ta’ dawn il-benefiċċji mis-salarji tagħhom.

L-UE tipprovdi wkoll benefiċċji ta’ wara l-impjieg lil membri tal-istituzzjonijiet tal-UE permezz ta’ skemi ta’ pensjonijiet separati. Dawn jintwerew taħt l-intestatura “Skemi ta’ benefiċċji tal-irtirar oħrajn”. Permezz ta’ dawn l-iskemi l-UE tipprovdi benefiċċji tal-pensjoni lil membri tal-Kummissjoni, tal-Qorti tal-Ġustizzja u l-Qorti Ġenerali, tal-Qorti tal-Awdituri, tal-Kunsill, tal-Parlament Ewropew, tal-Ombudsman, tal-Kontrollur għall-Protezzjoni tad-Data, tat-Tribunal tas-Servizz Ċivili. L-UE tipprovdi kopertura tas-saħħa lill-membri tal-Istituzzjonijiet tal-UE permezz tal-JSIS.

Il-benefiċċji ta’ hawn fuq ta’ wara l-impjieg jikkwalifikaw bħala obbligi tal-benefiċċji definiti tal-UE u huma kkalkolati f’kull data ta’ rapportar billi jiġi stmat l-ammont tal-benefiċċju futur li l-impjegati jkunu ggwadanjaw fil-perjodi kurrenti u ta’ qabel, filwaqt li jitnaqqas dak l-ammont u l-valur ġust ta’ kwalunkwe assi tal-pjan. Il-kalkolu tal-obbligu tal-benefiċċju definit isir ta’ kull sena bl-użu tal-metodu ta’ kreditu għal kull unità proġettata. Il-valur preżenti tal-obbligu tal-benefiċċju definit jiġi ddeterminat billi l-ħruġ tal-flus stmat fil-ġejjieni jiġi skontat bl-użu ta’ rati tal-imgħax ta’ bonds tal-gvern li huma denominati fil-munita li biha jitħallsu l-benefiċċji u li għandhom perjodi ta’ maturità approssimattivi għat-termini tal-obbligazzjoni tal-pensjoni relatata.

Il-benefiċċji ta’ wara l-impjieg ipprovduti lill-persunal tal-UE huma inkorporati fi pjan wieħed li jinkludi kemm skema tal-pensjoni (PSEO) kif ukoll reġim tal-assigurazzjoni tal-mard (JSIS), bid-dritt ta’ kopertura skont l-iskema JSIS li jiddependi mill-kisba tad-dritt għal kopertura skont l-iskema PSEO. Skont it-termini ta’ dan il-pjan uniku, kif stipulat fir-Regolament dwar il-Persunal, ċerti intitolamenti, bħad-dritt għal pensjoni differita u mnaqqsa skont l-iskema PSEO, jinkisbu wara 10 snin ta’ servizz. Madankollu, l-intitolamenti miksuba skont il-pjan uniku mis-servizz sussegwenti tal-impjegat huma materjalment ogħla minn dawk l-intitolamenti inizjali kif riflessi mid-drittijiet sussegwenti tal-pensjoni li jsiru dovuti ta’ kull sena.

Għaldaqstant, sabiex tintwera s-sustanza ekonomika tat-tranżazzjoni sottostanti rikjesta mill-karatteristika kwalitattiva tar-rappreżentazzjoni leali tar-rapportar finanzjarju kif deskritt kemm fl-EAR 1 kif ukoll fil-Qafas Kunċettwali tal-IPSAS, il-kost tas-servizz imġarrab fuq bażi ta’ linja dritta tul il-perjodu ta’ servizz attiv stmat tal-persunal, jiġifieri l-perjodu mid-data meta s-servizz mill-impjegat iwassal għall-ewwel darba għall-benefiċċji skont il-pjan (kemm jekk il-beneifċċji jkunu kundizzjonali għal servizz addizzjonali kif ukoll jekk le) sad-data meta s-servizz addizzjonali mill-impjegat ma jwassal għal ebda ammont materjali ta’ benefiċċji addizzjonali skont il-pjan, minbarra żidiet ulterjuri fis-salarju. Dan l-approċċ huwa applikat b’mod konssitenti għall-benefiċċji pprovduti skont il-pjan uniku.

Il-kejl mill-ġdid tal-obbligazzjoni definita netta tal-benefiċċju jinkludi l-qligħ u t-telf attwarjali u r-redditu fuq l-assi tal-pjan, u hu rikonoxxut minnufih fl-assi netti.

L-UE tagħraf l-ispiża netta tal-imgħax (introjtu) u spejjeż oħra relatati mal-pjanijiet tal-benefiċċju definiti fir-rapport tal-introjtu fi ħdan il-intestatura “kostijiet tal-persunal u tal-pensjoni”.

Meta l-benefiċċji pprovduti jinbidlu jew jitnaqqsu, it-tibdil li jirriżulta fil-benefiċċji li jkun relatat mas-servizz fl-imgħoddi jew il-qligħ jew it-telf fuq it-trażżin jiġi rikonoxxut minnufih fir-rapport tal-introjtu. Il-qligħ u t-telf mas-saldu jiġu rikonoxxuti meta jseħħ is-saldu. Il-kost tas-servizz tal-passat jiġi rikonoxxut minnufih fir-rapport tal-introjtu, sakemm il-bidliet fil-pjan tal-pensjonijiet ma jkunux kundizzjonali fuq il-fatt li l-impjegati jibqgħu fis-servizz għal perjodu ta’ żmien speċifikat.

19.Provvedimenti

Il-provvedimenti jiġu rikonoxxuti meta l-UE jkollha obbligu legali jew kostruttiv preżenti lejn il-partijiet terzi bħala riżultat ta’ avvenimenti passati, meta jkun aktar probabbli milli le li jkun hemm ħtieġa ta’ fluss ta’ ħruġ ta’ riżorsi sabiex jiġi saldat l-obbligu u meta l-ammont ikun jista’ jiġi stmat b’mod affidabbli. Il-provvedimenti ma jiġux rikonoxxuti għal telf operatorju fil-futur. L-ammont tal-provvediment huwa l-aħjar stima tal-ispejjeż li mistennija jkunu meħtieġa sabiex jiġi saldat l-obbligu preżenti fid-data tar-rapportar. Meta l-provvediment jinvolvi għadd kbir ta’ partiti, l-obbligu jiġi stmat permezz tal-ponderazzjoni tal-eżiti kollha possibbli bil-probabbiltajiet assoċjati tagħhom (il-metodu tal-“valur mistenni”).

Il-provvedimenti għal kuntratti onerużi jitkejlu bil-valur preżenti tal-inqas wieħed minn fost il-kost mistenni tat-terminazzjoni tal-kuntratt u l-kost nett mistenni tal-kontinwazzjoni bil-kuntratt.

20.Obbligazzjonijiet finanzjarji

L-obbligazzjonijiet finanzjarji huma kklassifikati bħala obbligazzjonijiet finanzjarji bil-valur ġust permezz ta’ bilanċ pożittiv jew defiċit, bħala obbligazzjonijiet finanzjarji riportati bil-kost amortizzat jew bħala obbligazzjonijiet ta’ garanzija finanzjarja.

Is-self meħud jikkonsisti f’self meħud minn istituzzjonijiet ta’ kreditu u djun ipprovati minn ċertifikati. Huma jiġu rikonoxxuti inizjalment abbażi tal-valur ġust, bħala r-rikavat mill-ħruġ tagħhom (il-valur ġust tal-korrispettiv riċevut) wara li jitnaqqsu l-kostijiet tat-tranżazzjoni mġarrba, imbagħad sussegwentement jiġu riportati bil-kost amortizzat bl-użu tal-metodu tal-imgħax effettiv; kwalunkwe differenza bejn ir-rikavat, wara li jitnaqqsu l-kostijiet tat-tranżazzjoni, u l-prezz tal-fidwa tiġi rikonoxxuta fir-rapport tal-introjtu matul il-perjodu tat-teħid b’self bl-użu tal-metodu tal-imgħax effettiv. Fil-każ tas-self mogħti fuq fondi missellfa, il-metodu tal-imgħax effettiv ma jistax jiġi applikat għall-għoti ta’ self u t-teħid b’self, abbażi ta’ kunsiderazzjonijiet ta’ materjalità. Il-kostijiet tat-tranżazzjoni mġarrba mill-UE u mbagħad iddebitati mill-ġdid lill-benefiċjarju tas-self jiġu direttament rikonoxxuti fir-rapport tal-introjtu.

L-obbligazzjonijiet finanzjarji kategorizzati abbażi tal-valur ġust permezz ta’ surplus jew defiċit jinkludu derivattivi li l-valur ġust tagħhom ikun negattiv. Huma jingħataw l-istess trattament kontabilistiku bħall-assi finanzjarji abbażi tal-valur ġust permezz ta’ bilanċ pożittiv jew defiċit, ara n-nota 1.5.5.

L-obbligazzjonijiet tal-garanziji finanzjarji għall-ewwel jiġu rikonoxxuti abbażi tal-valur ġust, li huwa l-premium riċevut. Sussegwentement, l-obbligazzjonijiet tal-garanziji finanzjarji jitkejlu skont l-ogħla stima tal-ispejjeż li mistennija jkunu meħtieġa sabiex tiġi saldata l-obbligazzjoni tal-garanzija finanzjarja u l-ammont inizjalment rikonoxxut nieqes, fejn xieraq, l-amortizzament kumulattiv. L-UE tirrikonoxxi obbligazzjoni ta’ garanzija finanzjarja meta tirċievi korrispettiv għall-għoti tal-garanzija, jiġifieri f’termini tas-suq, jew meta l-valur ġust tal-garanzija jkun jista’ jitkejjel b’mod affidabbli. F’każ li ma jeżisti l-ebda suq attiv għal kuntratt ta’ garanzija direttament ekwivalenti, l-UE tiddivulga l-garanzija mogħtija bħala obbligazzjoni kontinġenti (ara n-nota 1.7.2) jew – meta jkun aktar probabbli milli le li jkun meħtieġ ħruġ ta’ riżorsi sabiex jiġi saldat l-obbligu – l-UE tirrikonoxxi provvediment (ara n-nota 1.5.11).

L-obbligazzjonijiet finanzjarji huma kklassifikati bħala obbligazzjonijiet mhux kurrenti, għajr għall-maturitajiet ta’ inqas minn 12-il xahar wara d-data tal-karta bilanċjali.

Il-fondi fiduċjarji tal-UE li huma meqjusa bħala parti mill-attivitajiet operazzjonali tal-Kummissjoni (jiġifieri fondi fiduċjarji Madad u Colombia), jiġu kontabilizzati fil-kontijiet tal-Kummissjoni u kkonsolidati ulterjorment fil-kontijiet annwali tal-UE. Għalhekk, il-kontribuzzjonijiet minn donaturi oħrajn għall-fondi fiduċjarji tal-UE jissodisfaw il-kriterji tad-dħul minn tranżazzjonijiet mhux ta’ skambju taħt ċerti kundizzjonijiet u jiġu ppreżentati bħala obbligazzjonijiet finanzjarji diment li jiġu ssodisfati l-kundizzjonijiet marbuta mal-kontribuzzjonijiet ittrasferiti, jiġifieri jiġġarrbu l-kostijiet eliġibbli mill-fond fiduċjarju. Il-fond fiduċjarju huwa meħtieġ biex jiffinanzja proġetti speċifiċi u jagħti lura l-bqija tal-fondi fil-mument tal-istralċ. Fid-data tal-karta bilanċjali, l-obbligazzjonijiet pendenti tal-kontribuzzjoni jitkejlu f’kontribuzzjonijiet riċevuti neqsin l-ispejjeż imġarrba mill-fond fiduċjarju, inkluż l-ammonti stmati, meta jkun meħtieġ. Għall-finijiet ta’ rapportar, l-ispejjeż netti jiġu allokati għall-kontribuzzjonijiet ta’ donaturi oħrajn fi proporzjon għall-kontribuzzjonijiet netti mħallsin fil-31 ta’ Diċembru. Din l-allokazzjoni ta’ kontribuzzjonijiet hija biss indikattiva. Meta l-fond fiduċjarju jiġi stralċat, il-qasma attwali tar-riżorsi li jifdal tiġi deċiża mill-bord tal-fond fiduċjarju.

21.Ammonti pagabbli

Ammont sinifikanti mill-ammonti pagabbli tal-UE huma pretensjonijiet ta’ kostijiet mhux imħallsin mill-benefiċjarji ta’ għotjiet jew finanzjament ieħor mill-UE (tranżazzjonijiet mhux ta’ skambju). Huma jiġu rreġistrati bħala ammonti pagabbli għall-ammont mitlub meta tiġi riċevuta l-pretensjoni tal-kost. Wara verifika u aċċettazzjoni tal-kostijiet eliġibbli, l-ammonti pagabbli jiġu vvalutati fl-ammont eliġibbli.

L-ammonti pagabbli li jirriżultaw mix-xiri ta’ oġġetti u servizzi jiġu rikonoxxuti hekk kif tasal il-fattura għall-ammont oriġinali u l-ispejjeż eleġibbli korrispondenti jiddaħħlu fil-kontijiet meta l-provvisti jew is-servizzi jiġu kkonsenjati u aċċettati mill-UE.

22.Dħul u imposti dovuti u differiti

It-tranżazzjonijiet u l-avvenimenti jiġu rikonoxxuti fir-rapporti finanzjarji fil-perjodu li miegħu huma relatati. Fl-aħħar tas-sena, jekk fattura tkun għadha ma nħarġitx iżda s-servizz ikun ingħata, il-provvisti jkunu ġew ikkonsenjati mill-UE, jew ikun jeżisti ftehim kuntrattwali (pereżempju, b’referenza għal trattat), dħul dovut jiġi rikonoxxut fir-rapporti finanzjarji. Barra minn hekk, fl-aħħar tas-sena, jekk tinħareġ fattura iżda s-servizzi jkunu għadhom ma ġewx ipprovduti jew l-oġġetti fornuti jkunu għadhom ma ġewx ikkonsenjati, id-dħul jiġi differit u rikonoxxut fil-perjodu kontabilistiku sussegwenti.

L-ispejjeż jingħaddu wkoll fil-perjodu li jkunu relatati miegħu. Fl-aħħar tal-perjodu kontabilistiku, l-ispejjeż dovuti jiġu rikonoxxuti fuq il-bażi ta’ ammont stmat tal-obbligu tat-trasferiment għall-perjodu. Il-kalkolu tal-ispejjeż dovuti jsir f’konformità mal-linji gwida operazzjonali u prattiċi dettaljati maħruġa mill-Kummissjoni, li għandhom l-għan li jiżguraw li r-rapporti finanzjarji jipprovdu rappreżentazzjoni fidila tal-fenomeni ekonomiċi u oħrajn li huma jippretendu li jirrappreżentaw. Permezz ta’ analoġija, jekk ikun sar pagament bil-quddiem għal servizzi jew oġġetti li jkunu għadhom ma ġewx riċevuti, l-ispiża tiġi differita u rikonoxxuta fil-perjodu kontabilistiku sussegwenti.

23.RAPPORT TAL-INTROJTU

24.Dħul

DĦUL MINN TRANŻAZZJONIJIET MHUX TA’ SKAMBJU

Il-maġġoranza l-kbira tad-dħul tal-UE huwa relatat ma’ tranżazzjonijiet mhux ta’ skambju kif ġej:

Riżorsi bbażati fuq l-ING u r-riżorsi tal-VAT

Id-dħul jiġi rikonoxxut għall-perjodu li fih il-Kummissjoni tibgħat sejħa għal fondi lill-Istati Membri, fejn hija titlob il-kontribuzzjoni tagħhom. Huma jitkejlu abbażi tal-“ammont eżerċitat” tagħhom. Billi r-riżorsi tal-VAT u tal-ING huma bbażati fuq estimi tad-data għas-sena baġitarja kkonċernata, huma jistgħu jiġu riveduti hekk kif iseħħu bidliet sakemm tinħareġ id-data finali mill-Istati Membri. L-effett ta’ bidla fl-istima jiġi inkluż meta jiġi ddeterminat il-bilanċ pożittiv jew id-defiċit nett għal dak il-perjodu li fih tkun seħħet il-bidla.

Riżorsi proprji tradizzjonali

Ir-rekuperabbli minn tranżazzjonijiet mhux ta’ skambju u d-dħul relatat jiġu rikonoxxuti meta d-dikjarazzjonijiet rilevanti tat-tip “A” ta’ kull xahar (li jinkludu d-dazji miġbura u l-ammonti dovuti li huma garantiti u mhux ikkontestati) jiġu riċevuti mill-Istati Membri. Fid-data ta’ rapportar, id-dħul miġbur mill-Istati Membri għall-perjodu iżda li jkun għadu ma tħallasx lill-Kummissjoni Ewropea jiġi stmat u rikonoxxut bħala dħul dovut. Id-dikjarazzjonijiet tat-tip “B” ta’ kull trimestru (li jinkludu dazji li la huma miġbura u lanqas garantiti, kif ukoll ammonti garantiti li ġew ikkontestati mid-debitur) riċevuti mill-Istati Membri jiġu rikonoxxuti bħala dħul nieqes il-kostijiet tal-ġbir li għalihom huma intitolati. Barra minn hekk, tnaqqis fil-valur jiġi rikonoxxut għall-ammont tad-differenza stmata fl-irkupru.

Multi

Id-dħul minn multi jiġi rikonoxxut meta tittieħed id-deċiżjoni tal-UE li timponi multa u meta din tkun ġiet innotifikata b’mod uffiċjali lid-destinatarju. Wara d-deċiżjoni li tiġi imposta multa, l-impriżi għandhom xahrejn mid-data tan-notifika biex:

Anki jekk tiġi appellata, il-multa trid titħallas fil-limitu ta’ żmien ta’ tliet xhur stipulat, minħabba li l-appell ma għandux effett ta’ sospensjoni (l-Artikolu 278 tat-TFUE). Il-flus riċevuti jintużaw biex jiġi kklirjat l-ammont rekuperabbli. Madankollu, soġġett għall-qbil tal-Uffiċjal tal-Kontabilità tal-Kummissjoni, l-impriża tista’ minflok tippreżenta garanzija bankarja għall-ammont. F’dak il-każ, il-multa tibqa’ bħala rekuperabbli. Jekk ma jiġux riċevuti flus kontanti jew garanzija u jkun hemm dubji dwar is-solvenza tal-impriża, jiġi rikonoxxut tnaqqis fil-valur fuq l-intitolament.

Fil-każ li l-impriża tappella kontra d-deċiżjoni, u tkun diġà ħallset il-multa b’mod provviżorju, l-ammont jiġi divulgat bħala obbligazzjoni kontinġenti, jew, jekk jidher probabbli li l-Qorti Ġenerali ma tkunx tista’ tiddeċiedi favur l-UE, jiġi rikonoxxut provvediment sabiex ikopri dan ir-riskju. Jekk minflok tkun ingħatat garanzija, l-ammont rekuperabbli pendenti ssirlu valwazzjoni negattiva.

L-imgħax akkumulat riċevut mill-Kummissjoni fuq il-kontijiet bankarji fejn jiġu ddepożitati l-pagamenti riċevuti jiġi rikonoxxut bħala dħul, u kwalunkwe obbligazzjoni kontinġenti tiżdied kif xieraq.

Mill-2010, il-multi kollha msarrfin b’mod provviżorju bdew jiġu amministrati mill-Kummissjoni f’fond maħluq speċifikament (BUFI) u investiti fi strumenti finanzjarji.

DĦUL MINN TRANŻAZZJONIJIET TA’ SKAMBJU

Id-dħul mill-bejgħ ta’ oġġetti u servizzi jiġi rikonoxxut meta r-riskju u l-benefiċċji sinifikanti tas-sjieda tal-oġġetti jiġu ttrasferiti lill-akkwirent. Id-dħul assoċjat ma’ tranżazzjoni li tinvolvi l-forniment ta’ servizzi jiġi rikonoxxut b’referenza għall-istadju ta’ meta titlesta t-tranżazzjoni fid-data tar-rapportar.

Dħul u spejjeż tal-imgħax

Id-dħul u l-ispejjeż tal-imgħax jiġu rikonoxxuti fir-rapport tal-introjtu billi jintuża l-metodu tal-imgħax effettiv. Dan huwa metodu li jintuża sabiex jiġi kkalkolat il-kost amortizzat ta’ assi finanzjarju jew ta’ obbligazzjoni finanzjarja u sabiex jiġi allokat id-dħul mill-imgħax jew l-ispiża tal-imgħax matul il-perjodu rilevanti. Meta tikkalkula r-rata effettiva tal-imgħax, l-UE tistma l-flussi tal-flus wara li tikkunsidra t-termini kuntrattwali kollha tal-istrument finanzjarju (pereżempju, għażliet ta’ prepagament), iżda ma tqisx it-telf ta’ kreditu fil-futur. Il-kalkolu jinkludi l-imposti u l-punti kollha tar-rata tal-imgħax imħallsin jew riċevuti bejn il-partijiet fil-kuntratt li huma parti integrali mir-rata effettiva tal-imgħax, mill-kostijiet tat-tranżazzjoni u mill-premiums jew mill-iskontijiet l-oħrajn kollha.

Ladarba assi finanzjarju jew grupp ta’ assi finanzjarji simili jkun tniżżel fil-valur minħabba telf minn indeboliment, id-dħul mill-imgħax jiġi rikonoxxut billi tintuża r-rata tal-imgħax sabiex jiġu skontati l-flussi ta’ flus futuri għall-fini tal-kejl tat-telf minn indeboliment.

Dħul minn dividendi

Id-dħul minn dividendi u distribuzzjonijiet simili huwa rikonoxxut meta jiġi stabbilit id-dritt li jiġi riċevut pagament.

25.Spejjeż

L-ispejjeż minn tranżazzjonijiet mhux ta’ skambju jirrappreżentaw il-maġġoranza tal-ispejjeż tal-UE. Huma jirrigwardjaw it-trasferimenti lill-benefiċjarji u jistgħu jkunu ta’ tliet tipi: intitolamenti, trasferimenti skont ftehim u għotjiet diskrezzjonarji, kontribuzzjonijiet u donazzjonijiet.

It-trasferimenti jiġu rikonoxxuti bħala spejjeż fil-perjodu li matulu jkunu seħħew l-avvenimenti li jkunu wasslu għat-trasferiment, dment li n-natura tat-trasferiment tkun permessa mir-regolament (ir-Regolament Finanzjarju, ir-Regolamenti tal-Persunal, jew regolament ieħor) jew ikun ġie ffirmat ftehim li jawtorizza t-trasferiment, kwalunkwe kriterju tal-eliġibbiltà jkun ġie ssodisfat mill-benefiċjarju, u tkun tista’ ssir stima raġonevoli tal-ammont.

Meta tasal talba għall-ħlas jew pretensjoni għall-kostijiet u din tissodisfa l-kriterji ta’ rikonoxximent, hija tiġi rikonoxxuta bħala spiża għall-ammont eliġibbli. Fl-aħħar tas-sena, l-ispejjeż eliġibbli mġarrba dovuti lill-benefiċjarji, iżda li jkunu għadhom ma ġewx irrapportati, jiġu stmati u rreġistrati bħala spejjeż dovuti.

L-ispejjeż minn tranżazzjonijiet ta’ skambju li jirriżultaw mix-xiri ta’ oġġetti u servizzi jiġu rikonoxxuti meta l-provvisti jiġu kkonsenjati u aċċettati mill-UE. Dawn jiġu stmati fl-ammont oriġinali tagħhom fuq il-fattura. Barra minn hekk, fid-data tal-karta bilanċjali, l-ispejjeż relatati mas-servizz mogħti matul il-perjodu li għalih ma tkunx għadha waslet jew ġiet aċċettata fattura, ikunu stmati u rikonoxxuti fir-rapport tal-introjtu.

26.ASSI U OBBLIGAZZJONIJIET KONTINĠENTI

27.Assi kontinġenti

Assi kontinġenti huwa assi possibbli li jinħoloq minn avvenimenti passati u li l-eżistenza tiegħu tiġi kkonfermata biss mill-okkorrenza jew min-nuqqas ta’ okkorrenza ta’ avveniment inċert wieħed jew aktar fil-ġejjieni mhux fil-kontroll sħiħ tal-UE. Assi kontinġenti jiġi divulgat meta jkun hemm probabbiltà ta’ influss ta’ benefiċċji ekonomiċi jew potenzjal ta’ servizz.

28.Obbligazzjonijiet kontingenti

Obbligazzjoni kontinġenti hija obbligu possibbli li jirriżulta minn avvenimenti tal-passat u li l-eżistenza tagħhom tiġi kkonfermata biss meta jseħħ jew ma jseħħx avveniment inċert wieħed jew aktar fil-futur mhux totalment fil-kontroll tal-UE, jew obbligu preżenti li jirriżulta minn avvenimenti tal-passat iżda li ma huwiex rikonoxxut minħabba li ma jkunx probabbli li jkun meħtieġ ħruġ ta’ riżorsi li jinkorporaw benefiċċji ekonomiċi jew potenzjal ta’ servizz għas-saldu tal-obbligu, jew fiċ-ċirkostanzi rari fejn l-ammont tal-obbligu ma jkunx jista’ jitkejjel b’affidabbiltà suffiċjenti. Obbligazzjoni kontinġenti tiġi divulgata, sakemm il-possibbiltà ta’ ħruġ ta’ riżorsi li jinkorporaw benefiċċji ekonomiċi jew potenzjal ta’ servizz ma tkunx remota.

29.RAPPORT TAL-FLUSS TAL-FLUS

L-informazzjoni dwar il-fluss tal-flus tintuża sabiex tipprovdi bażi għall-valutazzjoni ta’ kemm l-UE hija kapaċi tiġġenera l-flus u l-ekwivalenti ta’ flus, kif ukoll il-ħtiġijiet tagħha sabiex tuża dawk il-flussi tal-flus.

Ir-rapport tal-fluss tal-flus jitħejja billi jintuża l-metodu indirett. Dan ifisser li r-riżultat ekonomiku għas-sena finanzjarja jiġi aġġustat għall-effetti ta’ tranżazzjonijiet ta’ natura mhux ta’ flus, kwalunkwe differiment jew dovuti ta’ riċevuti ta’ flus jew pagamenti operatorji, kemm passati kif ukoll futuri, u partiti ta’ dħul jew infiq assoċjati mal-flussi tal-flus tal-investimenti.

Il-flussi ta’ flus li jirriżultaw minn tranżazzjonijiet f’munita barranija jiġu rreġistrati fil-munita tar-rapportar tal-UE (Euro), billi tiġi applikata, għall-ammont ta’ flus fil-munita barranija, ir-rata tal-kambju bejn l-euro u l-munita barranija fid-data tal-fluss ta’ flus.

Ir-rapport tal-fluss tal-flus jirrapporta flussi ta’ flus matul il-perjodu kklassifikat skont attivitajiet operatorji u ta’ investiment (l-UE ma għandhiex attivitajiet ta’ finanzjament).

Attivitajiet operatorji huma l-attivitajiet tal-UE li ma humiex attivitajiet ta’ investiment. Dawn huma l-maġġoranza tal-attivitajiet imwettqa. Self mogħti lill-benefiċjarji (u l-għotjiet b’self relatati, meta applikabbli) ma humiex ikkunsidrati bħala attivitajiet ta’ investiment (jew finanzjament) minħabba li huma parti mill-objettivi ġenerali u, b’hekk, huma operazzjonijiet ta’ kuljum tal-UE.

L-attivitajiet ta’ investiment huma l-akkwiżizzjoni u d-disponiment ta’ assi intanġibbli u proprjetà, impjanti u tagħmir u ta’ investimenti oħrajn li ma humiex inklużi fl-ekwivalenti ta’ flus. L-attivitajiet ta’ investiment ma jinkludux is-self mogħti lill-benefiċjarji. L-għan huwa li jintwerew l-investimenti reali li jsiru mill-UE.

30.NOTI GĦALL-KARTA BILANĊJALI

ASSI

31.ASSI INTANĠIBBLI

L-ammonti ta’ hawn fuq huma primarjament relatati ma’ softwer tal-kompjuter.

32.PROPRJETÀ, IMPJANTI U TAGĦMIR

Il-kategorija tal-assi spazjali tkopri l-assi fissi operazzjonali relatati maż-żewġ programmi spazjali tal-UE: is-Sistemi Globali ta’ Navigazzjoni bis-Satellita (GNSS), jiġifieri Galileo u Sistema Ewropea ta’ Navigazzjoni b’Kopertura Ġeostazzjonarja (EGNOS), kif ukoll il-programm Ewropew ta’ osservazzjoni tad-Dinja msejjaħ Copernicus. L-assi tas-sistemi spazjali li għadhom ma humiex operazzjonali huma inklużi taħt l-intestatura “Assi taħt kostruzzjoni”. L-assi relatati mal-programmi spazjali tal-UE qegħdin jinbnew bl-assistenza tal-Aġenzija Spazjali Ewropea (ESA).

Fir-rigward ta’ Galileo, l-ebda satellita ġdida ma saret operattiva fl-2020. Il-kostellazzjoni tinkludi 26 satellita. L-assi fissi operazzjonali ta’ Galileo, li jkopru kemm satelliti kif ukoll installazzjonijiet fuq l-art, kienu jammontaw għal EUR 2 145 miljun fil-31 ta’ Diċembru 2020, netti mid-deprezzament akkumulat (2019: EUR 2 489 miljun). L-assi taħt kostruzzjoni li jifdal jammontaw għal total ta’ EUR 1 872 miljun (2019: EUR 1 361 miljun). L-iżvilupp tas-sistema Galileo se jkompli sakemm is-sistema tilħaq il-kapaċità operazzjonali sħiħa tagħha. Meta titlesta, il-kostellazzjoni Galileo ser tkun tinkludi 30 satellita (inklużi sitt satelliti ta’ riżerva).

Fir-rigward ta’ Copernicus, l-ebda satellita ġdida ma saret operattiva fl-2020. Il-valur totali tal-assi fissi operazzjonali ta’ Copernicus huwa ta’ EUR 1 877 miljun (2019: EUR 1 153 miljun), netti mid-deprezzament akkumulat. EUR 1 894 miljun oħrajn relatati mas-satelliti ta’ Copernicus huma rikonoxxuti bħala assi taħt kostruzzjoni (2019: EUR 1 453 miljun). Din iż-żieda tinkludi EUR 266 miljun fir-rigward tas-satellita 6A, li s-sjieda tagħha ġiet riċevuta mill-ESA fl-21 ta’ Novembru 2020, id-data tat-tlugħ tagħha. Hija mistennija li tiġi ddikjarata operazzjonali wara l-kontrolli f’nofs l-2021.

L-assi fissi relatati mal-infrastruttura fuq l-art tal-EGNOS ta’ EUR 24 miljun (2019: EUR 37 miljun) huma inklużi wkoll taħt l-intestatura “Assi spazjali”. Barra minn hekk, l-assi taħt kostruzzjoni tal-EGNOS jammontaw għal EUR 273 miljun (2019: EUR 238 miljun).

Proprjetà, impjanti u tagħmir

33.INVESTIMENTI MAGĦDUDA BL-UŻU TAL-METODU TAL-EKWITÀ

Il-parteċipazzjoni tal-UE, irrappreżentata mill-Kummissjoni, fil-Fond Ewropew tal-Investiment (FEI) hija ttrattata bħala l-kumpanija assoċjata bl-użu tal-metodu tal-ekwità tal-kontabbiltà. Il-FEI huwa l-istituzzjoni finanzjarja tal-UE li tispeċjalizza fil-forniment ta’ kapital ta’ riskju u garanziji lil Entitajiet Żgħar u ta’ Daqs Medju (SMEs). Il-FEI jinsab fil-Lussemburgu u jopera bħala sħubija pubblika-privata, li l-membri tagħha huma l-Bank Ewropew tal-Investiment (BEI), l-UE u grupp ta’ istituzzjonijiet finanzjarji. Fil-31 ta’ Diċembru 2020, l-UE żammet 29,7 % tal-interessi tas-sjieda fil-FEI (2019: 29,7 %) u 29,7 % tad-drittijiet tal-vot (2019: 29,7 %). F’konformità mal-istatuti tiegħu, il-FEI huwa meħtieġ li jalloka mill-inqas 20 % tar-riżultat nett annwali tiegħu għal riżerva statutorja, sakemm ir-riżerva aggregata tkun tammonta għal 10 % tal-kapital sottoskritt. Din ir-riżerva ma hijiex disponibbli għad-distribuzzjoni.

L-ammonti riportati li ġejjin huma attribwibbli għall-UE abbażi tal-perċentwal tal-parteċipazzjoni tagħha:

Ir-rikonċiljazzjoni tal-informazzjoni finanzjarja miġbura fil-qosor hawn fuq mal-ammont riportat tal-imgħax miżmum fil-FEI hija kif ġej:

L-UE, irrappreżentata mill-Kummissjoni, ħallset 20 % tal-ishma sottoskritti tagħha fil-kapital tal-FEI fil-31 ta’ Diċembru 2020, bl-ammont mhux eżerċitat ikun kif ġej:

34.ASSI FINANZJARJI

35.Assi finanzjarji disponibbli għall-bejgħ

Mit-total ta’ EUR 19 587 miljun, l-UE għandha assi finanzjarji disponibbli għall-bejgħ fil-forma ta’ investimenti fi:

Investimenti BUFI

Il-multi msarrfin b’mod provviżorju relatati ma’ każijiet ta’ kompetizzjoni jiġu allokati għal fond iddedikat (il-Fond BUFI — Fond “Budget Fines”) u huma investiti mill-Kummissjoni fi strumenti ta’ dejn ikkategorizzati bħala assi finanzjarji disponibbli għall-bejgħ.

Il-KEFA f’Likwidazzjoni

Fir-rigward tal-Komunità Ewropea tal-Faħam u l-Azzar f’Likwidazzjoni (KEFA f’Likwidazzjoni), l-assi finanzjarji kollha disponibbli għall-bejgħ huma titoli ta’ dejn denominati f’EUR u kkwotati f’suq attiv.

Il-Bank Ewropew għar-Rikostruzzjoni u l-Iżvilupp

L-UE għandha investiment finanzjarju fil-kapital tal-Bank Ewropew għar-Rikostruzzjoni u l-Iżvilupp (BERŻ), li fih l-għadd ta’ ishma miżmuma fil-31 ta’ Diċembru 2020 kien ta’ 90 044 (2019: 90 044 sehem), li jirrappreżentaw 3 % tal-kapital azzjonarju sottoskritt totali. L-UE ssottoskriviet għal ammont totali ta’ EUR 900 miljun ta’ kapital azzjonarju, li minnhom, EUR 713-il miljun ma humiex eżerċitati bħalissa. Skont il-ftehim li jistabbilixxi l-BERŻ, l-azzjonisti għandhom xi restrizzjonijiet kuntrattwali, bħall-fatt li l-ishma ma humiex trasferibbli u l-fidi tagħhom huwa limitat sal-massimu tal-kost oriġinali tax-xiri. L-UE tkejjel l-investiment fil-BERŻ abbażi tal-valur ġust. Il-kost oriġinali tax-xiri huwa meqjus bħala l-aħjar stima tal-valur ġust, b’mod partikolari minħabba r-restrizzjonijiet kuntrattwali msemmija hawn fuq. Għalkemm l-ishma tal-BERŻ ma huma kkwotati fl-ebda suq tal-Borża, kien hemm tranżazzjonijiet reċenti fl-ekwità tad-destinatarja ta’ investiment (il-ħruġ ta’ kapital b’parità), li jindikaw li l-kost huwa l-aħjar stima tal-valur ġust f’din is-sitwazzjoni.

FONDI TA’ GARANZIJA GĦALL-GARANZIJI BAĠITARJI

Il-Fond ta’ Garanzija tal-FEIS

Skont ir-Regolament tal-FEIS (ir-Regolament (UE) 2015/2017), il-Fond ta’ Garanzija tal-FEIS ġie stabbilit sabiex jipprovdi riżerva ta’ likwidità kontra t-telf potenzjali mġarrab mill-BEI b’rabta mal-operazzjonijiet ta’ finanzjament u investiment tiegħu eliġibbli għall-garanzija tal-FEIS tal-UE skont il-Ftehim tal-FEIS – ara n-nota 4.1.1. Il-Fond ta’ Garanzija tal-FEIS huwa ffinanzjat mill-kontribuzzjonijiet mill-baġit tal-UE. Huwa mogħni wkoll b’redditi fuq ir-riżorsi tal-fond ta’ garanzija investiti, id-dħul riċevut mill-UE bħala remunerazzjoni għall-garanzija skont il-Ftehim tal-FEIS u l-ammonti rkuprati mill-BEI minn debituri f’kontumaċja fir-rigward tat-talbiet għal ħlasijiet ta’ garanziji preċedenti. Fi tmiem l-2020, l-assi tal-fond ta’ garanzija tal-FEIS kienu jammontaw għal total ta’ EUR 8 028 miljun (2019: EUR 6 688 miljun), li minnhom EUR 7 526 miljun ġew investiti f’assi finanzjarji disponibbli għall-bejgħ (2019: EUR 6 654 miljun). EUR 931 miljun oħrajn (2019: EUR 1 879 miljun) ġew impenjati iżda għadhom ma tħallsux fil-fond u huma inklużi fl-RAL baġitarju, u huma divulgati wkoll bħala impenji pendenti li għadhom ma ġewx iddebitati fin-nota 5.1. Il-fond se jiġi pprovdut b’mod progressiv u se jilħaq, b’mod gradwali, EUR 9,1 biljun, jiġifieri 35 % tal-obbligi totali ta’ garanzija tal-FEIS tal-UE.

Il-Fond ta’ Garanzija għal azzjonijiet esterni

Il-Fond ta’ Garanzija għal azzjonijiet esterni jkopri s-self garantit mill-baġit tal-UE, b’mod partikolari l-operazzjonijiet ta’ self tal-BEI barra l-UE, iffinanzjati mir-riżorsi proprji tal-BEI u s-self taħt assistenza makrofinanzjarja (AMF) u self tal-Euratom barra l-UE - ara n-nota 4.1.1. Il-fond huwa ġestit mill-BEI u huwa maħsub biex ikopri kwalunkwe self inadempjenti garantit mill-UE. Il-Fond huwa mogħni b’pagamenti mill-baġit tal-UE, ir-rikavat mill-imgħax fuq l-investimenti magħmula mill-assi tal-fond u l-ammonti rkuprati minn debituri inadempjenti li għalihom il-fond kellu jattiva l-garanzija tiegħu. Il-Fond ta’ Garanzija għal azzjonijiet esterni jenħtieġ li jinżamm f’ammont fil-mira li jikkorrespondi għal 9 % tas-self garantit pendenti fi tmiem is-sena. Id-differenza bejn l-ammont fil-mira u l-valur tal-assi tal-fond fi tmiem is-sena ser tkun koperta mill-baġit tal-UE fis-sena N+2, filwaqt li kwalunkwe surplus jitħallas lura lill-baġit tal-UE. Fi tmiem l-2020, l-assi tal-Fond ta’ Garanzija għal azzjonijiet esterni kienu jammontaw għal total ta’ EUR 2 813-il miljun (2019: EUR 2 590 miljun), li minnhom EUR 2 794 miljun ġew investiti f’assi finanzjarji disponibbli għall-bejgħ (2019: EUR 2 545 miljun).

Il-Fond ta’ Garanzija tal-EFSD

Skont ir-Regolament tal-EFSD (ir-Regolament (UE) 2017/1601), il-Fond ta’ Garanzija tal-EFSD ġie stabbilit biex jipprovdi riżerva ta’ likwidità li għandha tintuża f’każ ta’ opzjoni eżerċitabbli fuq il-garanzija tal-Unjoni mogħtija skont il-ftehimiet ta’ garanzija rilevanti tal-EFSD. Il-Fond ta’ Garanzija tal-EFSD huwa ffinanzjat minn kontribuzzjonijiet mill-baġit tal-UE u minn kontribuzzjonijiet mill-11-il FEŻ għall-baġit tal-UE, flimkien ma’ kontribuzzjonijiet volontarji mill-Istati Membri u minn kontributuri oħrajn. Il-fond huwa mogħni b’redditi fuq ir-riżorsi investiti, l-ammonti rkuprati mingħand debituri inadempjenti, dħul u kwalunkwe pagament ieħor riċevut mill-UE f’konformità mal-ftehimiet ta’ garanzija tal-EFSD. Sar provvediment għall-Fond ta’ Garanzija tal-EFSD sa EUR 750 miljun, jiġifieri 50 % tal-obbligi futuri totali ta’ garanzija tal-EFSD koperti mill-baġit tal-UE, u ser ikomplu jiżdiedu b’kontribuzzjonijiet oħrajn. Fi tmiem l-2020, l-assi tal-Fond ta’ Garanzija tal-FEIS kienu jammontaw għal total ta’ EUR 804 miljun (2019: EUR 600 miljun), li minnhom EUR 692 miljun ġew investiti f’assi finanzjarji disponibbli għall-bejgħ (2019: EUR 595 miljun).

STRUMENTI FINANZJARJI FFINANZJATI MILL-BAĠIT TAL-UE

Orizzont 2020

Skont ir-Regolament tal-UE li jistabbilixxi l-Orizzont 2020 - il-Programm Qafas għar-Riċerka u l-Innovazzjoni (2014–2020), ġew stabbiliti strumenti finanzjarji ġodda sabiex jittejjeb l-aċċess għall-finanzjament għall-entitajiet involuti fir-riċerka u l-innovazzjoni (R&I). Dawn l-istrumenti huma:

Il-Faċilità Nikkollegaw l-Ewropa

Skont ir-Regolament (UE) Nru 2013/1316, l-istrument tad-dejn tal-Faċilità Nikkollegaw l-Ewropa (FNE) ġie stabbilit bl-għan li jiffaċilita l-aċċess tal-proġetti ta’ infrastruttura għal finanzjament fis-setturi tat-trasport, tat-telekomunikazzjoni u tal-enerġija. Huwa jiġi ġestit mill-BEI skont ftehim mal-UE. L-istrument finanzjarju tad-dejn tal-FNE huwa l-kontinwità tal-Istrument ta’ Garanzija fuq is-Self għall-proġetti TEN-T (LGTT) u tal-fażi pilota tal-Inizjattiva tal-Bonds tal-Proġetti (PBI). Huwa joffri kondiviżjoni tar-riskji għall-finanzjament tad-dejn fil-forma ta’ dejn jew garanzija superjuri u subordinat(a), kif ukoll appoġġ għall-bonds tal-proġetti. Wara d-19 ta’ Ġunju 2019, bl-effett tal-ewwel emenda tal-ftehim ta’ delega mal-BEI, l-operazzjonijiet kollha tal-FNE skjerati mill-BEI huma assenjati għal waħda miż-żewġ portafolli: portafoll ta’ dejn jew portafoll ta’ finanzjament mhux titolizzabbli, li għalih jiġi introdott approċċ ġdid ta’ kondiviżjoni tar-riskji abbażi ta’ portafoll.

Il-Faċilitajiet tal-UE ta’ Ekwità għall-SMEs

Dawn huma strumenti ta’ ekwità ffinanzjati mill-programmi COSME, CIP u MIP u l-Inizjattiva għat-Tkabbir u l-Impjiegi, li l-FEI hu l-fiduċjarju tagħhom, li jagħtu l-appoġġ lill-ħolqien u lill-finanzjament tal-SMEs tal-UE fl-istadji bikri (ta’ ftuħ) u ta’ tkabbir tagħhom billi jinvestu f’fondi ta’ kapital ta’ riskju speċjalizzati xierqa.

Il-Faċilità ta’ Finanzjament għall-Kondiviżjoni tar-Riskji

Taħt il-Faċilità ta’ Finanzjament għall-Kondiviżjoni tar-Riskji, l-UE tiggarantixxi lill-BEI, self u garanziji li l-BEI jagħti lil proġetti ta’ riċerka eliġibbli. L-assi disponibbli għall-bejgħ taħt din l-intestatura jintużaw biex jipprovdu r-riskju finanzjarju tal-UE mis-sejħiet li l-BEI jista’ jagħmel fuq il-garanzija tal-UE. B’kollox, ġie allokat baġit tal-UE sal-ammont ta’ EUR 1 biljun għall-FFQR fil-QFP 2007–2013. Skont il-QFP 2014-2020, ma hemmx kontribuzzjonijiet baġitarji ġodda previsti għall-FFQR. Minħabba li porzjon sinifikanti tal-operazzjonijiet pendenti tal-FFQR diġà tħallas lura lill-BEI, fl-2019 u fl-2020 il-BEI ħareġ parzjalment il-garanzija tal-UE. Dan irriżulta fi tnaqqis fir-responsabbiltà kontinġenti tal-UE (ara n-nota 4.1.3). Sussegwentement, fi tmiem l-2020, assi disponibbli għall-bejgħ tal-UE kienu ferm aktar baxxi, peress li fl-2020, il-BEI ħallas lura EUR 500 miljun mill-kontribuzzjoni tal-UE lill-Kummissjoni li kienet primarjament użata biex issaħħaħ l-istrumenti finanzjarji tal-UE taħt Orizzont 2020.

36.Assi finanzjarji abbażi tal-valur ġust permezz ta’ surplus jew defiċit

L-UE tidħol f’kuntratti forward f’munita barranija sabiex tiħħeġġja r-riskju tal-kambju relatat mat-titoli tad-dejn denominati f’USD miżmuma fil-Fond ta’ Garanzija tal-FEIS. Skont dawn il-kuntratti forward f’munita barranija, l-UE twassal l-ammont nozzjonali miftiehem b’mod kuntrattwali f’munita barranija (“stadju ta’ pagament”), kif ippreżentat fit-tabella ta’ hawn fuq, u ser tirċievi l-ammont nozzjonali f’EUR (“stadju ta’ riċeviment”) fid-data tal-maturità. Dawn il-kuntratti tad-derivattivi jitkejlu abbażi tal-valur ġust fid-data tal-karta bilanċjali u jiġu kklassifikati bħala assi jew obbligazzjonijiet finanzjarji abbażi tal-valur ġust permezz ta’ surplus jew defiċit skont jekk il-valur ġust tagħhom ikunx pożittiv jew negattiv.

L-intestatura “Garanzija fuq portafoll ta’ ekwità” tinkludi l-garanziji mogħtija mill-UE lill-istituzzjonijiet finanzjarji fuq il-portafolli tal-investimenti ta’ ekwità li huma kklassifikati bħala strumenti finanzjarji derivattivi u kontabilizzati bħala assi finanzjarju jew obbligazzjoni finanzjarja abbażi tal-valur ġust permezz ta’ surplus jew defiċit. L-ammont totali jirrappreżenta prinċipalment il-garanzija tal-FEIS mogħtija mill-UE lill-Grupp tal-BEI b’investimenti ta’ ekwità sottostanti żborżati mill-BEI u mill-FEI li jammontaw għal EUR 2 223 miljun (2019: EUR 1 420 miljun). Il-valur ġust tal-garanzija tal-UE fuq il-portafolli tal-ekwità tal-FEIS kien jammonta għal total ta’ EUR 164 miljun (2019: EUR 134 miljun).

Il-ġerarkija f’valur ġust tal-assi finanzjarji mkejla abbażi tal-valur ġust

Matul il-perjodu ma kienx hemm trasferimenti bejn il-livell 1 u l-livell 2.

Rikonċiljazzjoni tal-assi finanzjarji mkejla bl-użu ta’ tekniki ta’ valwazzjoni b’inputs mhux ibbażati fuq data osservabbli tas-suq (il-livell 3)

37.Self

38.Self għall-assistenza finanzjarja

Il-valur nominali tas-self għall-assistenza finanzjarja fil-31 ta’ Diċembru 2020 jammonta għal total ta’ EUR 92 565 miljun (2019: EUR 51 941 miljun). Il-bidla fl-ammont riportat tikkorrespondi għall-bidla fl-imgħaxijiet dovuti.

Il-Mekkaniżmu Ewropew ta’ Stabbilizzazzjoni Finanzjarja (EFSM) jippermetti l-għoti ta’ assistenza finanzjarja lil Stat Membru f’diffikultajiet, jew lil Stat Membru mhedded serjament minn diffikultajiet severi kkawżati minn ċirkostanzi eċċezzjonali barra mill-kontroll tiegħu. L-assistenza tista’ tieħu l-forma ta’ self jew linja ta’ kreditu. Il-konklużjonijiet tal-Kunsill ECOFIN tad-9 ta’ Mejju 2010 jirrestrinġu l-faċilità għal EUR 60 biljun, iżda l-limitu legali jirrestrinġi l-ammont pendenti tas-self jew tal-linji ta’ kreditu għall-marġini disponibbli taħt il-limitu massimu tar-riżorsi proprji. Is-self meħud relatat mas-self żborżat skont l-EFSM huwa garantit mill-baġit tal-UE. Mhux previst li l-EFSM jinvolvi ruħu fi programmi ta’ finanzjament ġodda jew li jidħol fi ftehimiet ġodda dwar faċilità ta’ self.

L-appoġġ biex jittaffew ir-Riskji ta’ Qgħad f’Emerġenza (SURE) huwa l-istrument Ewropew il-ġdid li jgħin biex in-nies jinżammu f’xogħol u f’impjiegi affettwati mill-pandemija tal-coronavirus. L-istrument jippermetti lill-Istati Membri jitolbu għajnuna finanzjarja mill-UE biex tgħin fil-finanzjament ta’ żidiet f’daqqa u severi tan-nefqa pubblika nazzjonali b’rabta ma’ skemi nazzjonali ta’ xogħol b’ħinijiet iqsar u miżuri simili, inkluż għal persuni li jaħdmu għal rashom, jew għal xi miżuri relatati mas-saħħa, b’mod partikolari fuq il-post tax-xogħol b’reazzjoni għall-kriżi. Dan jista’ jipprovdi assistenza finanzjarja sa EUR 100 biljun fil-forma ta’ self lill-Istati Membri affettwati. L-istrument huwa sostnut minn EUR 25 biljun ta’ garanziji li l-Istati Membri pprovdew lill-Kummissjoni. F’konformità mar-Regolament tal-Kunsill (UE) 2020/672, il-Kummissjoni tista’ tidħol fi ftehim ta’ self ma’ Stat Membru biss wara li l-Kummissjoni tkun ipproponiet, u l-Kunsill ikun adotta, deċiżjoni ta’ implimentazzjoni għall-assistenza finanzjarja ta’ SURE. Fil-31 ta’ Diċembru 2020, il-Kunsill kien approva EUR 90 363 miljun ta’ assistenza finanzjarja, li minnhom il-Kummissjoni kienet iffirmat ftehimiet ta’ self mal-Istati Membri għal EUR 85 863 miljun u kienet żborżat EUR 39 500 miljun lill-Istati Membri (ammonti nominali). L-ammonti tal-ftehim ta’ self iffirmat li jifdal qed jiġu żborżati fl-2021. Għall-obbligazzjonijiet kontinġenti relatati ma’ self ta’ SURE, ara wkoll in-nota 4.1.2.

Il-faċilità tal-Bilanċ tal-Pagamenti (BOP), strument finanzjarju bbażat fuq il-politika, tipprovdi assistenza finanzjarja għal perjodu ta’ żmien medju lill-Istati Membri tal-UE li ma adottawx l-Euro. Hija tippermetti l-għoti ta’ self lil Stati Membri li jkunu qegħdin jesperjenzaw, jew li jkunu mhedda serjament minn, diffikultajiet fil-bilanċi tal-pagamenti jew fil-movimenti tal-kapital tagħhom. L-ammont pendenti massimu ta’ self mogħti taħt l-istrument huwa limitat għal EUR 50 biljun. Is-self meħud relatat ma’ dan is-self tal-BOP huwa garantit mill-baġit tal-UE.

L-Assistenza Makrofinanzjarja (AFM) hija forma ta’ għajnuna finanzjarja estiża mill-UE lil pajjiżi sħab li jkunu qed jesperjenzaw kriżi ta’ bilanċ tal-pagamenti. Hija tieħu l-forma ta’ self jew għotjiet b’terminu medju jew twil jew taħlita xierqa tat-tnejn u ġeneralment tikkomplementa finanzjament ipprovdut fil-kuntest ta’ programm ta’ aġġustament u ta’ riforma appoġġat mill-FMI. Dan is-self huwa garantit mill-Fond ta’ Garanzija għal azzjonijiet esterni. Matul is-sena li ntemmet fil-31 ta’ Diċembru 2020, ġew ipprovduti żborżi oħrajn ta’ self taħt l-AMF għal ammont totali ta’ EUR 1 675 miljun, li EUR 1 100 miljun minnhom lill-Ukrajna, EUR 250 miljun lill-Ġordan u EUR 325 miljun lil pajjjiżi oħrajn. Għall-obbligazzjonijiet kontinġenti relatati mas-self tal-AMF, ara wkoll in-nota 4.1.2.

Il-Komunità Ewropea tal-Enerġija Atomika (Euratom, irrappreżentata mill-Kummissjoni) issellef flus kemm lil Stati Membri kif ukoll lil Stati li ma humiex Stati Membri, u lil entitajiet tat-tnejn, biex tiffinanzja proġetti relatati ma’ istallazzjonijiet tal-enerġija. Ġew riċevuti garanziji minn partijiet terzi li ammontaw għal EUR 279 miljun (2019: EUR 214-il miljun) biex ikopru s-self tal-Euratom. Għall-obbligazzjonijiet kontinġenti relatati mas-self tal-Euratom ara n-nota 4.1.2.

Ir-rati effettivi tal-imgħax fuq is-self (espressi bħala firxa ta’ rati tal-imgħax)

39.Self għal programmi tal-baġit u depożiti b’terminu

Is-self għall-programmi baġitarji jinkludi: self li jingħata f’kundizzjonijiet preferenzjali bħala parti mill-kooperazzjoni ma’ Stati mhux Membri (eż. taħt il-programm MEDA sħubija Ewro-Mediterranja), self mogħti taħt il-Programm tal-UE għall-Impjiegi u l-Innovazzjoni Soċjali u taħt l-Inizjattiva ta’ Finanzjament tal-Elettrifikazzjoni tal-UE.

Id-depożiti fissi jinkludu ammonti b’maturità ta’ aktar minn 3 xhur li ma jissodisfawx id-definizzjoni ta’ ekwivalenti ta’ flus.

Il-valur nominali tas-self għall-programmi tal-baġit u d-depożiti għal terminu ta’ żmien jammontaw għal EUR 768 miljun (2019: EUR 728 miljun).

Indeboliment fuq self għal programmi baġitarji