IL-KUMMISSJONI EWROPEA
Brussell, 8.7.2021
COM(2021) 358 final
RAPPORT TAL-KUMMISSJONI LILL-PARLAMENT EWROPEW U LILL-KUNSILL
skont l-Artikolu 14(3) tar-Regolament (UE) 2019/880 tal-Parlament Ewropew u tal-Kunsill tas-17 ta' April 2019 dwar l-introduzzjoni u l-importazzjoni ta’ beni kulturali
Werrej
1.
INTRODUZZJONI
2.
OBJETTIVI LI GĦANDHOM JINTLAĦQU
3.
L-ARKITETTURA TAL-PROĠETT U L-APPROĊĊ TAL-IPPJANAR
4.
Ħarsa ġenerali lejn il-PROGRESS
Adozzjoni ta’ dispożizzjonijiet implimentattivi
Żvilupp tal-proġett — Ħidma mal-Grupp tal-Proġett
Kunċettwalizzazzjoni — Każ tan-Negozju
Definizzjoni tal-proġett — Dokument ta’ Viżjoni
5.
RISKJI GĦAD-DEWMIEN
6.
KONKLUŻJONIJIET
Anness I: Ippjanar strateġiku pluriennali
Anness II: Fażijiet ewlenin tal-proġett u skeda ta’ żmien tal-istadji importanti kritiċi
GLOSSARJU
Aspett intraprenditorjali
|
Id-dokument li jipprovdi l-ġustifikazzjoni tal-proġett tal-IT u jiddefinixxi r-rekwiżiti baġitarji tiegħu
|
Dokument ta’ Viżjoni
|
Id-dokument ta’ Viżjoni jelabora fuq is-suppożizzjonijiet li saru fid-Dokument ta’ Każ tan-Negozju. Huwa jirreġistra s-sid tas-sistema/is-sħubija tal-fornitur tas-sistema u l-fehim tas-sistema fil-ħin tal-kitba.
|
Sistema ICG
|
Sistema ta’ Importazzjoni ta’ Beni Kulturali - is-sistema elettronika ċentralizzata għall-importazzjoni ta’ beni kulturali
|
TRAĊĊI
|
Sistema Esperta u ta’ Kontroll tal-Kummerċ - il-pjattaforma multilingwi online tal-Kummissjoni Ewropea għaċ-ċertifikazzjoni sanitarja u fitosanitarja
|
CSW - CERTEX tal-UE
|
Punt ta' Kuntatt Uniku Doganali tal-UE - Skambju taċ-Ċertifikati
|
QFP
|
Qafas Finanzjarju Pluriennali; il-baġit fit-tul tal-UE, li jkopri mill-2021 sal-2027
|
1.INTRODUZZJONI
Ir-Regolament (UE) 2019/880 tal-Parlament Ewropew u tal-Kunsill tal-17 ta’ April 2019 dwar l-introduzzjoni u l-importazzjoni ta’ beni kulturali (“ir-Regolament”) għandu l-għan li jipprevjeni l-kummerċ illeċitu tal-beni kulturali, b’mod partikolari meta jikkontribwixxi għall-finanzjament ta’ attivitajiet terroristiċi, u li jipprojbixxi l-importazzjoni fit-Territorju Doganali tal-Unjoni ta’ beni kulturali esportati illegalment minn pajjiżi terzi.
Ir-Regolament jissoġġetta l-importazzjoni ta’ ċerti beni kulturali li huma meqjusa bħala wirt partikolarment fil-periklu, għal liċenzji tal-importazzjoni u oħrajn, li huma kkunsidrati bħala anqas fil-periklu, għal dikjarazzjonijiet tal-importatur u jiżgura li jgħaddu minn kontrolli uniformi meta jiġu importati fl-Unjoni. Ċerti importazzjonijiet ta’ oġġetti kulturali li huma maħsuba għal użi speċifiċi (edukattivi, xjentifiċi jew relatati mar-riċerka) huma eżentati minn dawn ir-rekwiżiti ta’ dokumentazzjoni.
L-obbligu għall-importaturi li jiksbu liċenzja tal-importazzjoni jew li jfasslu u jippreżentaw dikjarazzjoni tal-importatur lid-dwana se jibda japplika biss mill-mument li sistema elettronika ċentralizzata (is-sistema ICG) issir operattiva. Is-sistema ICG għandha tiġi żviluppata mill-Kummissjoni sa mhux aktar tard mit-28 ta’ Ġunju 2025.
Is-sistema mhux biss se sservi bħala mezz għat-twettiq tal-formalitajiet mill-operaturi, iżda wkoll għall-ħażna u l-iskambju ta’ informazzjoni bejn l-amministrazzjonijiet tal-Istati Membri inkarigati mill-implimentazzjoni tar-Regolament (l-awtoritajiet doganali u kulturali).
L-iżvilupp u l-funzjonament tas-sistema ICG huma wkoll marbuta mill-qrib ma’ inizjattiva ewlenija oħra tal-Kummissjoni fil-qasam tad-dwana: is-Sistema ta’ Tieqa Unika tal-UE għall-iskambju taċ-ċertifikati (is-CSW-CERTEX tal-UE).
Is-CSW-CERTEX tal-UE tgħaqqad flimkien is-sistemi ċentralizzati tal-UE għall-formalitajiet mhux doganali tal-UE, mas-sistemi doganali nazzjonali biex tippermetti l-iskambju diġitali tad-dokumenti ta’ sostenn, tar-riżultati tal-kontrolli u tal-eżitu tal-proċeduri doganali u mhux doganali.
Kull 12-il xahar mid-dħul fis-seħħ tar-Regolament u, sakemm is-sistema ICG issir operattiva, il-Kummissjoni għandha tippreżenta rapport lill-Parlament Ewropew u lill-Kunsill dwar il-progress li jkun sar fl-istabbiliment ta’ din is-sistema elettronika.
Il-Kummissjoni ppreżentat l-ewwel rapport ta’ progress annwali tagħha s-sena l-oħra. Ir-rapport spjega l-azzjoni meħuda mill-Kummissjoni matul l-ewwel sena wara li r-Regolament daħal fis-seħħ, jiġifieri: il-ħidma preparatorja għall-adozzjoni tad-dispożizzjonijiet ta’ implimentazzjoni meħtieġa, u (b) il-konsultazzjonijiet mal-Istati Membri permezz tal-Grupp ta’ Esperti għall-kwistjonijiet doganali relatati mal-beni kulturali u l-Grupp ta’ Proġett għall-importazzjoni ta’ beni kulturali. Fir-rigward tar-riskji potenzjali għad-dewmien fit-twettiq tas-sistema ICG sal-iskadenza stabbilita, ir-rapport identifika l-inċertezza dwar il-persunal allokat għall-proġett u l-finanzjament tiegħu mill-QFP.
Dan it-tieni rapport ta’ progress annwali jkopri l-perjodu minn Lulju 2020 sa Ġunju 2021 u jippreżenta l-progress miksub bl-adozzjoni tad-dispożizzjonijiet ta’ implimentazzjoni meħtieġa u l-introduzzjoni tal-Fażi 1 — “Konċettwalizzazzjoni” tal-proġett ICG. Għall-finijiet ta’ kompletezza, l-objettivi li għandhom jintlaħqu, l-arkitettura tal-proġett u l-approċċ ta’ ppjanar, li huma dettaljati fl-ewwel rapport ta’ progress annwali, huma msemmija fil-qosor hawnhekk. Il-valutazzjoni ġenerali tal-progress li sar u r-riskji identifikati għad-dewmien huma miġbura fil-qosor fit-taqsima tal-konklużjonijiet ta’ dan ir-rapport.
2.OBJETTIVI LI GĦANDHOM JINTLAĦQU
Is-sistema ICG għandha ssir operattiva sa mhux aktar tard mit-28 ta’ Ġunju 2025, billi f’dik id-data se jsir obbligatorju għall-operaturi kollha li jiksbu l-liċenzji tal-importazzjoni jew jissottomettu d-dikjarazzjonijiet tal-importatur permezz ta’ dik is-sistema elettronika, sabiex ikunu jistgħu jimpurtaw beni kulturali legalment fl-Unjoni.
Ir-Regolament jistabbilixxi wkoll l-iskadenza tat-28 ta’ Ġunju 2021 għall-adozzjoni ta’ dispożizzjonijiet ta’ implimentazzjoni li jistabbilixxu r-regoli dettaljati għas-sistema elettronika.
Wara l-adozzjoni tad-dispożizzjonijiet ta’ implimentazzjoni u l-approvazzjoni tad-Dokument ta’ Viżjoni, il-fażi tal-iżvilupp tas-sistema elettronika se tibda. Fit-tielet fażi, is-sistema ICG ser tkun interkonnessa mas-CSW-CERTEX tal-UE, biex tippermetti l-iskambju ta’ dokumenti mas-sistemi doganali tal-Istati Membri. B’mod parallel, se jiġu organizzati sessjonijiet ta’ taħriġ biex l-amministrazzjonijiet tagħhom jiffamiljarizzaw ruħhom mal-funzjonalitajiet operattivi tas-sistema ICG.
Flimkien ma’ attivitajiet oħra tal-Kummissjoni fil-qasam tad-dwana, il-proġett dwar l-importazzjoni ta’ beni kulturali huwa ppjanat ukoll fid-dettall permezz tal-Pjan Strateġiku Pluriennali għad-Dwana elettronika, ir-reviżjoni tal-2019 (MASP-C rev. 2019). Silta mill-ippjanar tal-proġett dwar l-importazzjoni ta’ beni kulturali mill-MASP-C rev. 2019 hija pprovduta fl-Anness I ta’ dan ir-rapport. Ta’ min jinnota li l-iskeda tal-proġett se tiġi aġġornata fir-reviżjoni li jmiss tal-MASP-C biex tirrifletti l-progress attwali fuq il-proġett.
Parti mill-proġett dwar l-importazzjoni ta’ beni kulturali hija żviluppata wkoll fl-Ambjent ta’ Tieqa Unika tal-UE għad-Dwana (MASP-C rev 2019 Fiche 1.13) li tiegħu is-CSW-CERTEX tal-UE hija s-sistema tal-IT ewlenija. Silta mill-ippjanar tas-CSW-CERTEX tal-UE mill-MASP-C Fiche 1.13 hija pprovduta fl-Anness I ta’ dan ir-rapport.
3.L-ARKITETTURA TAL-PROĠETT U L-APPROĊĊ TAL-IPPJANAR
Kif diġà spjegat fl-ewwel rapport dwar il-progress annwali, l-Arkitettura tal-Proġett hija bbażata fuq il-metodoloġija prevista fl-MASP-C rev. 2019 u l-Annessi tiegħu, inklużi l-Iskema ta’ Governanza, il-Politika tal-Immudellar tal-Proċess tan-Negozju Doganali tal-UE u l-istrateġija tal-IT. Pjan direzzjonali komprensiv, bil-fażijiet ewlenin tal-proġett u l-istadji importanti kritiċi, huwa spjegat fid-dettall fl-Anness II.
Minkejja li l-proġett se jimxi ’l quddiem fuq diversi livelli fl-istess ħin, huwa jista’ jinqasam b’mod figurattiv fi tliet fażijiet:
Fażi 1 – Kunċettwalizzazzjoni: Fil-bidu, jitħejja Każ tan-negozju:, li jipprovdi l-ġustifikazzjoni tal-proġett u jiddefinixxi r-rekwiżiti baġitarji. Imbagħad jiġi prodott Dokument ta’ Viżjoni, permezz ta’ Mudellar tal-Proċess tan-Negozju (Business Process Modelling, BPM), li jipprovdi informazzjoni aktar dettaljata dwar id-definizzjoni tal-proġett f’termini tal-arkitettura, l-ispiża, iż-żmien, u r-riskju, kif ukoll informazzjoni dwar l-istadji importanti, ir-riżultati tanġibbli u l-organizzazzjoni tal-proġett. Dawn id-dokumenti jirriflettu d-diskussjonijiet, u l-kontenut tal-att ta’ implimentazzjoni li għandu jiġi prodott mill-Kummissjoni.
Fażi 2 – Żvilupp tas-sistema: Skont id-dispożizzjonijiet tal-att ta’ implimentazzjoni, u l-produzzjoni tar-rekwiżiti tal-utent u l-ispeċifikazzjonijiet funzjonali għas-sistema, jiġu żviluppati speċifikazzjonijiet tekniċi dwar kif se tinbena s-sistema. Dawn l-ispeċifikazzjonijiet tekniċi jinkludu: l-arkitettura li għandha tintuża, il-messaġġi li għandhom jiġu ppreżentati mill-operaturi ekonomiċi, l-interfaċċi għal sistemi oħra, il-pjanijiet tal-ittestjar, eċċ.
Ladarba t-tfassil tas-sistema jkun lest mill-perspettiva kunċettwali u jiġu prodotti r-riżultati tanġibbli elenkati fit-Tabella 1, l-Istadji Importanti 1 u 3 (ara l-Anness I), jibda xogħol aktar fil-fond u jiġu kkunsidrati aktar aspetti tekniċi fl-ispeċifikazzjonijiet tal-Applikazzjoni u tas-Servizz u fid-dokumenti tal-Ispeċifikazzjoni Teknika tas-Sistema, li huma l-konkretizzazzjoni tal-Każ tan-negozju u d-Dokument ta’ Viżjoni.
Fażi 3 – Varar u Tħaddim: Tibda l-fażi proprja tal-iżvilupp tal-IT (Fażi tal-Kostruzzjoni), li hija segwita minn fażi ta’ Tranżizzjoni fejn il-verżjonijiet bikrin tas-sistema ICG se jiġu introdotti gradwalment għall-gruppi differenti ta’ utenti u jitwettqu testijiet biex jiġi żgurat li, sat-28 ta’ Ġunju 2025, l-operaturi u l-awtoritajiet kompetenti jkunu kapaċi u mħarrġa sew fl-użu tas-sistema. Ma’ din il-fażi jkun hemm perjodu ta’ segwitu ta’ sitt xhur, li fih is-sistema tiġi rfinuta biex tissodisfa kwalunkwe ħtieġa operattiva li tista’ ssir evidenti biss wara li sistema tal-IT issir obbligatorja, u biex ikun żgurat li l-operazzjonijiet ikunu qegħdin jaħdmu mingħajr problemi.
Ta’ min jinnota li s-sistema ICG se tkun interkonnessa mal-amministrazzjonijiet doganali tal-Istati Membri permezz tas-CSW-CERTEX tal-UE sat-3 ta’ Marzu 2021, wara l-proposta tal-Kummissjoni dwar Sistema ta’ Tieqa Unika Doganali biex tippermetti lid-dwana kontrolli awtomatizzati fuq id-dokumenti maħruġa għall-importazzjoni ta’ beni kulturali. Din l-attività se tirrikjedi Ttestjar tal-Konformità.
4.Ħarsa ġenerali lejn il-PROGRESS
Adozzjoni ta’ dispożizzjonijiet implimentattivi
Fl-ewwel fażi, il-Kummissjoni adottat id-dispożizzjonijiet ta’ implimentazzjoni għall-istabbiliment tas-sistema elettronika. Biex tinkiseb perspettiva aħjar minn perspettiva ta’ implimentazzjoni prattika, ikkonsultat b’mod estensiv mar-rappreżentanti tal-Istati Membri fil-Grupp ta’ Esperti dwar kwistjonijiet doganali relatati mal-beni kulturali u fil-Kumitat dwar il-Beni Kulturali.
Il-Grupp ta’ Esperti huwa forum għad-diskussjoni ta’ kwistjonijiet ta’ implimentazzjoni tal-leġiżlazzjoni tal-Unjoni dwar il-beni kulturali li jappartjenu lid-dwana u, b’mod partikolari, ir-Regolament (UE) 2019/880 dwar l-introduzzjoni u l-importazzjoni ta’ beni kulturali u r-Regolament (KE) Nru 116/2009 dwar l-esportazzjoni ta’ beni kulturali. Dan tal-aħħar huwa sett ta’ regoli tal-UE li jipprevedu wkoll sistema ta’ liċenzjar - fl-esportazzjoni - li ilha fis-seħħ mill-1993.
Il-Kummissjoni informat lill-assoċjazzjonijiet tas-suq tal-arti dwar il-progress tax-xogħol f’kull opportunità, sabiex tiżgura li l-implimentazzjoni prattika tar-Regolament tkun adattata sew għar-realtajiet tas-suq. Bħala pass formali tal-proċedura ta’ adozzjoni, l-abbozz tal-att ta’ implimentazzjoni kien ukoll disponibbli online għall-konsultazzjoni għall-partijiet ikkonċernati għal perjodu ta’ erba’ ġimgħat (24.3.2021–21.4.2021).
L-att ta’ implimentazzjoni jinkludi ħames taqsimiet, li l-aħħar waħda minnhom tikkonċerna l-arranġamenti dettaljati għall-istabbiliment u t-tħaddim tas-sistema ICG.
L-ICG għandu jiġi żviluppat bħala modulu indipendenti tas-sistema TRACES eżistenti, li hija ġestita mid-Direttorat Ġenerali tal-Kummissjoni għas-Saħħa u s-Sikurezza Alimentari (DĠ SANTE). Il-Kummissjoni għandha tiżgura l-operat, il-manutenzjoni, l-appoġġ u kwalunkwe aġġornament jew żvilupp meħtieġ tagħha.
Biex tipproduċi r-rapporti perjodiċi meħtieġa u tiżgura l-iżvilupp, il-funzjonament u l-manutenzjoni tas-sistema, il-Kummissjoni għandu jkollha aċċess għad-data, l-informazzjoni u d-dokumenti kollha fis-sistema ICG. Se tiżgura wkoll l-interkonnessjoni bejn is-sistema ICG u s-sistemi doganali nazzjonali, bl-użu tas-CSW-CERTEX tal-UE.
Biex jiġġestixxu, jiżviluppaw, jidentifikaw il-prijoritajiet għal, u jimmonitorjaw l-implimentazzjoni korretta tas-sistema ICG, l-Istati Membri u l-Kummissjoni se jkollhom jaħtru punti ta’ kuntatt.
Huwa importanti ħafna li l-applikanti/id-detenturi tal-liċenzji jew id-dikjaranti fid-dikjarazzjonijiet tal-importatur jiġu identifikati b’mod korrett fis-sistema ICG. Għal din ir-raġuni, l-att ta’ implimentazzjoni jirrikjedi mill-operaturi jidentifikaw lilhom infushom bl-użu ta’ numru EORI.
Biex jimtlew l-applikazzjonijiet għal-liċenzji tal-importazzjoni u d-dikjarazzjonijiet tal-importatur, l-att ta’ implimentazzjoni jistabbilixxi fl-anness tiegħu dizzjunarju tad-data, jiġifieri t-tip ta’ informazzjoni li l-applikanti u d-dikjaranti se jkunu meħtieġa li jdaħħlu fis-sistema ICG biex jimlew u jissottomettu l-formoli rilevanti.
Għalkemm l-att bażiku jagħmel referenza għall-“format”, dan ma għandux jittieħed litteralment, billi l-formoli li jimtlew se jkunu elettroniċi, mhux dokumenti tipiċi tal-karta Se jkun possibbli li ssir kopja stampata ta’ liċenzja, dikjarazzjoni jew deskrizzjoni ġenerali, iżda kuntrarju għall-ispeċifikazzjonijiet li jinsabu fir-Regolament għall-esportazzjoni ta’ oġġetti kulturali, dan jista’ jsir fuq kwalunkwe tip ta’ karta (jiġifieri l-ebda dimensjoni obbligatorja ta’ paġna jew ħxuna tal-karta jew mudelli ta’ sikurezza li jillokkjaw flimkien). Fi kwalunkwe każ, meta l-awtoritajiet doganali jew kompetenti jkollhom bżonn jivverifikaw liċenzja jew dikjarazzjoni, huma jagħmlu dan billi jirkuprawha b’mod elettroniku mis-sistema ICG. Barra minn hekk, tali dokumenti miksuba se jkunu awtonomi, li jfisser li l-validità tal-firem elettroniċi u l-integrità tad-dokument jiġu vverifikati kull darba li d-dokument (jew kopja tiegħu) jiġi aċċessat, f’konformità mal-istandard eIDAS.
Billi d-dokumentazzjoni se teżisti fis-sistema ICG u se tkun disponibbli għad-dwana b’mod elettroniku permezz tas-CSW-CERTEX tal-UE, mhu se jkun hemm l-ebda riskju ta’ falsifikazzjoni, kif inhu r-riskju b’dokumenti stampati. Barra minn hekk, l-att ta’ implimentazzjoni jipprovdi sett ta’ garanziji, fil-forma ta’ siġilli u firem elettroniċi, li jipprevjenu kwalunkwe bidla illegali tal-kontenut u jiċċertifikaw il-ħin u d-data eżatti li formola ġiet ippreżentatajew riċevuta mill-awtorità kompetenti.
B’mod speċifiku, il-liċenzji elettroniċi tal-importazzjoni se jiġu ffirmati mill-uffiċjal tal-awtorizzazzjoni tal-awtorità kompetenti bil-firma elettronika tiegħu, issiġillati b’siġill elettroniku avvanzat jew kwalifikat tal-awtorità kompetenti emittenti, u mbagħad jiġu ssiġillati mis-sistema ICG b’siġill elettroniku avvanzat jew kwalifikat.
Barra minn hekk, il-preżentazzjoni ta’ applikazzjoni għal liċenzja; talba mill-awtorità kompetenti għal informazzjoni addizzjonali; preżentazzjoni ta’ informazzjoni jew dokument addizzjonali mill-applikant; id-Deċiżjoni meħuda mill-awtorità kompetenti; u l-iskadenza ta’ 90 jum mingħajr deċiżjoni mill-awtorità kompetenti se tkun kollha mmarkata mis-sistema ICG b’timbru tal-ħin kwalifikat elettroniku.
Fir-rigward tal-aċċess għad-dokumenti fis-sistema ICG, l-att ta’ implimentazzjoni jipprevedi li d-dwana u l-awtoritajiet kompetenti jkollhom aċċess għal-liċenzji tal-importazzjoni li għalihom tkun ittieħdet deċiżjoni u għad-dikjarazzjonijiet tal-importatur u għad-deskrizzjonijiet ġenerali li jkunu ġew ippreżentati lid-dwana. L-operaturi se jkollhom aċċess għal-liċenzji, id-dikjarazzjonijiet u d-deskrizzjonijiet ġenerali tagħhom stess. Biex jiffaċilitaw il-kummerċ, jistgħu jipprovdu wkoll aċċess fis-sistema ICG għal dawn l-istess dokumenti lil partijiet oħra (eż. lil klijenti prospettivi, esperti, eċċ.).
Il-Kummissjoni u l-Istati Membri se jkunu kontrolluri tad-data tal-operazzjonijiet tal-ipproċessar meħtieġa għall-istabbiliment tas-sistema ICG. Għal dan il-għan, se jkollhom jidħlu f’arranġament ta’ kontroll bi sħab sa mhux aktar tard mit-28 ta’ Ġunju 2022.
Biex jiġu stabbiliti r-rekwiżiti prattiċi għad-disponibbiltà u l-prestazzjoni tas-sistema ICG, kif ukoll biex tiġi żgurata l-kontinwità tal-operat, l-att ta’ implimentazzjoni jipprevedi l-konklużjoni ta’ ftehimiet operazzjonali bejn il-Kummissjoni u l-Istati Membri.
Għalkemm dan mhux mistenni li jseħħ, ġew stabbiliti ċerti arranġamenti ta’ kontinġenza, jekk is-sistema ICG ma tibqax disponibbli għal aktar minn tmien sigħat. B’mod speċifiku, il-punti ta’ kuntatt tas-sistema ICG fl-Istati Membri għandhom iżommu repożitorju pubbliku online li jkun fih mudell elettroniku bil-miktub tad-dokumenti kollha li jistgħu jinħarġu fis-sistema ICG. Ladarba s-sistema ICG jew il-funzjonalità mhux disponibbli jerġgħu jsiru disponibbli, l-operaturi jistgħu jużaw id-dokumenti maħluqa fir-repożitorju online biex jirreġistraw l-istess informazzjoni fis-sistema.
Fl-aħħar nett, l-att ta’ implimentazzjoni fih ċerti dispożizzjonijiet dwar is-sigurtà tas-sistema biex tiġi żgurata operazzjoni affidabbli u sigura, b’mod partikolari, għall-verifika tas-sors tad-data u għall-protezzjoni tad-data kontra r-riskju ta’ aċċess, telf, alterazzjoni jew qerda mhux awtorizzati. Kull input, modifika u tħassir tad-data għandu jiġi rreġistrat flimkien ma’ informazzjoni li tagħti r-raġuni u l-ħin eżatt ta’ tali pproċessar u li tidentifika l-persuna li tkun wettqet dan. Barra minn hekk, l-Istati Membri għandhom jinfurmaw lil xulxin, lill-Kummissjoni u, fejn ikun xieraq, lill-operatur ikkonċernat dwar kull ksur reali jew issuspettat tas-sigurtà tas-sistema ICG.
Żvilupp tal-proġett — Ħidma mal-Grupp tal-Proġett
Il-Kummissjoni ħolqot “Grupp ta’ Proġett Doganali dwar l-importazzjoni ta’ beni kulturali” (“PGICG”), li jservi bħala forum ta’ diskussjoni għal esperti mill-amministrazzjonijiet doganali nazzjonali tal-Istati Membri u awtoritajiet (kulturali) kompetenti b’esperjenza fit-twettiq ta’ formalitajiet ta’ liċenzjar fi kwistjonijiet ta’ wirt, b’mod partikolari b’mod diġitali. Il-Grupp ipprovda appoġġ fit-tħejjija tal-att ta’ implimentazzjoni, u se jgħin lis-servizzi tal-Kummissjoni fid-definizzjoni tal-parametri u l-elaborazzjoni tal-kriterji għall-ispeċifikazzjonijiet funzjonali tas-sistema ICG.
Il-Grupp tal-Proġett huwa magħmul minn 18-il delegat minn 11-il Stat Membru (AT, BE, BG, ES, LV, PT, RO, DE, NL, IT, FR) u sal-lum iltaqa’ disa’ darbiet (erbgħa matul il-perjodu ta' rapportar 29.6.2020 - 28.6.2021).
Matul dan il-perjodu ta’ rappurtar, il-Grupp ta’ Proġett ħadem prinċipalment fuq id-definizzjoni tal-kamp ta’ applikazzjoni tas-sistema tal-IT, il-funzjonalitajiet minimi, u r-rekwiżiti tal-utenti. Ir-riżultat ta’ dawn id-diskussjonijiet inqabad l-ewwel mill-Każ tan-Negozju, u ġie rfinut aktar fid-Dokument ta’ Viżjoni.
Kunċettwalizzazzjoni — Każ tan-Negozju
Il-każ tan-Negozju ġie approvat mill-ITCB fit-23 ta’ Settembru 2020 u mill-Grupp ta’ Koordinazzjoni Doganali Elettroniku fis-16 ta’ Ottubru 2020 mingħajr kummenti. Il-Każ tan-Negozju jesplora l-alternattivi differenti u jikkonferma li s-sistema TRACES ospitata mid-DĠ SANTE hija l-aktar pjattaforma xierqa għall-iżvilupp tas-sistema ICG, billi l-biċċa l-kbira tal-funzjonalitajiet meħtieġa għall-iskemi ta’ ċertifikazzjoni u liċenzjar huma żviluppati sew f’dik il-pjattaforma.
Definizzjoni tal-proġett — Dokument ta’ Viżjoni
Id-dokument ta’ Viżjoni jkompli jirfina l-valutazzjoni inizjali li saret fil-każ tan-negozju, u jagħti dettalji dwar l-approċċ metodoloġiku, il-governanza tal-proġett u s-sinerġiji ma’ proġetti oħra. B’riżultat ta’ dan, is-sistema ICG se tiġi żviluppata fi sħubija bejn id-Direttorat Ġenerali għat-Tassazzjoni u l-Unjoni Doganali tal-Kummissjoni (DĠ TAXUD) u d-DĠ SANTE, filwaqt li tingrana l-kooperazzjoni u s-sinerġija fit-tul bejn dawn iż-żewġ Direttorati Ġenerali għall-kollaborazzjoni bejn l-awtoritajiet doganali u l-awtoritajiet kompetenti sħab, li sa issa wriet li kellha suċċess kbir fil-qasam tal-kontrolli tal-importazzjoni tal-annimali, l-ikel u l-għalf. Id-Dokument ta’ Viżjoni jinsab fl-istadju tal-finalizzazzjoni tiegħu, u huwa mistenni li jiġi approvat mill-Grupp ta’ Koordinazzjoni Doganali Elettronika sal-aħħar ta’ Ġunju 2021.
5.RISKJI GĦAD-DEWMIEN
Sommarju tal-Proġett
Il-Kummissjoni għandha l-kompitu li tiżviluppa sistema ċentralizzata ta’ liċenzjar elettroniku u tikkollegaha mad-dwana nazzjonali fi żmien sitt snin wara d-dħul fis-seħħ tar-Regolament. Huma meħtieġa żewġ pożizzjonijiet ta’ Amministratur (AD) fid-DĠ TAXUD sabiex titwettaq din l-inizjattiva, kif stabbilit fid-Dikjarazzjoni Finanzjarja Leġiżlattiva rilevanti.
Titolu u Deskrizzjoni tar-Riskju
It-twassil tas-sistema ICG tiddependi fuq l-approvazzjoni ta’ finanzjament xieraq u fuq l-allokazzjoni ta’ riżorsi fid-DĠ TAXUD, filwaqt li jitqiesu d-diversi prijoritajiet li qed jiffaċċja dak id-Direttorat Ġenerali.
Riskju 1 – Allokazzjoni tal-persunal
Il-proposta inizjali tal-Kummissjoni ma pprovdietx għall-ħolqien ta’ sistema tal-IT. Għalhekk, ma ġewx allokati riżorsi għal dan. Madankollu, matul in-negozjati u fuq talba tal-koleġiżlaturi, fir-Regolament ġie inkluż il-ħolqien tas-sistema ICG, li kien jirrikjedi riżorsi addizzjonali li f’dak il-punt ma kinux previsti. Il-ħtiġijiet għal dan il-proġett ta’ sitt snin f’termini ta’ persunal għall-iżvilupp tal-IT fid-DĠ TAXUD kienu stmati fi żmien it-trilogi politiċi finali f’Diċembru 2018 bħala żewġ pożizzjonijiet ta’ Amministratur full time. Madankollu, minn nofs Lulju 2020 seta’ jiġi allokat Amministratur wieħed biss full-time.
Riskju 2 — pandemija tal-Covid-19
Minbarra r-riskji identifikati hawn fuq, il-kriżi tas-saħħa pubblika kkawżata mill-COVID-19 qed taffettwa sa ċertu punt il-kapaċità tat-tim li jwettaq ħidmietu u b’mod speċjali l-attivitajiet u l-laqgħat tal-proġett mal-Grupp ta’ Esperti u l-Grupp tal-Proġett mal-Istati Membri. Il-laqgħat saru f’format virtwali, b’aġendi iqsar u interazzjoni limitata. Barra minn hekk, il-kriżi tas-saħħa pubblika sfurzat skedar mill-ġdid tal-prijoritajiet fl-Istati Membri, u b’hekk illimitat il-kapaċità tagħhom li jipprovdu input u feedback għall-fajl. Dan l-impatt se jiddependi minn kemm iddum il-kriżi tas-saħħa pubblika.
Riskju 3 - Proposta għal Ambjent ta’ Tieqa Unika tal-UE għad-Dwana
Il-Funzjonament tajjeb tas-sistema ICG huwa marbut mas-suċċess tal-proposta tal-Kummissjoni għal Ambjent ta' Tieqa Unika tal-Unjoni Ewropea għad-Dwana, li għandu l-għan li jipprovdi bażi legali għall-funzjonament tas-CSW-CERTEX tal-UE. Il-pilastru minn gvern għal gvern (G2G) ta’ dik il-proposta jirrifletti kif l-awtoritajiet doganali u l-awtoritajiet kompetenti sħab se jiskambjaw id-data b’mod diġitali. Għalhekk, f’każ li l-koleġiżlaturi fl-aħħar mill-aħħar jilħqu ftehim li huwa konsiderevolment differenti mill-approċċ tal-G2G kif minqux fil-proposta, dan se jkollu impatt fuq kif is-sistema ICG u s-CSW-CERTEX tal-UE huma interkonnessi u se jaffettwa wkoll id-dispożizzjoni ta’ implimentazzjoni għas-sistema ICG deskritta hawn fuq.
Riskju 4 – Disponibbiltà baġitarja
L-inċertezza baġitarja minħabba n-negozjati dwar il-QFP il-ġdid tagħmel il-progress diffiċli ħafna. Madankollu, għandu jiġi nnutat li l-eżitu favorevoli tan-negozjati tal-QFP taffa dak ir-riskju minn tmiem l-2020 u li, f’termini ta’ baġit, din l-inizjattiva hija koperta bis-sħiħ taħt il-programm Dwana l-ġdid.
Azzjonijiet ta’ mitigazzjoni
Ir-riskji ġew irrappurtati fid-DĠ TAXUD.
6.KONKLUŻJONIJIET
L-azzjonijiet ewlenin meħuda matul il-perjodu kopert minn dan it-tieni rapport ta’ progress biex tiġi żviluppata sistema elettronika ċentralizzata għall-importazzjoni ta’ beni kulturali (sistema ICG) huma kif ġej: l-adozzjoni ta’ dispożizzjonijiet ta’ implimentazzjoni għall-finijiet tar-Regolament (UE) 2019/880; il-ħidma mwettqa mill-Grupp tal-Proġett maħluq għal dan il-għan; u (3) l-avvanz tal-Każ tan-Negozju u tad-Dokument ta’ Viżjoni għall-proġett ICG.
Filwaqt li sa issa l-Kummissjoni kienet fil-ħin, ġew identifikati xi riskji potenzjali għal dewmien fit-twassil tas-sistema ICG fi żmien l-iskadenza stabbilita. Riskju wieħed jikkonċerna l-inċertezza dwar il-persunal allokat għall-proġett, billi dan jiddependi fuq id-disponibbiltajiet baġitarji attwali u l-prijoritajiet ġenerali tal-iżvilupp tal-IT doganali. Il-kriżi tas-saħħa pubblika tal-COVID-19 ġiet identifikata wkoll bħala li taffettwa ftit il-progress tal-proġett ICG. L-impatt sħiħ se jiddependi minn kemm iddum il-kriżi tas-saħħa pubblika.
Anness I: Ippjanar strateġiku pluriennali
L-MASP-C jiżgura ġestjoni effettiva u koerenti tal-proġetti tal-IT billi jistabbilixxi kemm qafas strateġiku kif ukoll stadji importanti. Dan finalment jiġi approvat mill-Istati Membri fil-Grupp tal-Politika Doganali (Customs Policy Group, CPG) abbażi ta’ parir espert mogħti mill-Grupp ta’ Koordinazzjoni dwar id-Dwana Elettronika (ECCG, ECCG) u konsultazzjonijiet mal-kummerċ fil-Grupp ta’ Kuntatt dwar il-Kummerċ (Trade Contact Group, TCG).
L-ippjanar għas-sistema elettronika ġie diskuss u approvat mill-Istati Membri u huwa deskritt fid-dettall fil-Fiche 1.18 tal-MASP-C rev. 2019.
It-Tabella 1 ta’ hawn taħt tipprovdi silta mill-ippjanar tal-proġett dwar l-importazzjoni ta’ beni kulturali mill-MASP-C rev. 2019 Fiche 1.18.
Tabella 1 - Silta mill-MASP-C rev. 2019 Fiche 1.18
|
|
Stadji importanti
|
Data stmata tat-tlestija
|
1
|
Analiżi tan-Negozju u Mmudellar tan-Negozju
|
|
|
- Dokument tal-Argument għall-Vijabbiltà
|
Ir-raba’ trimestru tal-2020
|
|
- Livell 3 (BPM tar-Rekwiżiti tal-Utenti)
|
L-ewwel trimestru tal-2022
|
|
- Livell 4 (BPM dettaljat tar-Rekwiżiti Funzjonali)
|
L-ewwel trimestru tal-2022
|
2
|
Dispożizzjonijiet Legali
|
|
|
- Id-dispożizzjonijiet attwali adottati*
|
It-tieni trimestru tal-2019
|
|
- Id-dispożizzjonijiet futuri adottati **
|
It-tieni trimestru tal-2021
|
3
|
Fażi tal-Bidu tal-Proġett
|
|
|
- Dokument ta’ Viżjoni
|
It-tieni trimestru tal-2021
|
|
- Deċiżjoni tal-GO
|
It-tieni trimestru tal-2021
|
4
|
Proġett tal-IT
|
|
|
- Speċifikazzjonijiet tal-Applikazzjoni u tas-Servizz
|
It-tieni trimestru tal-2023
|
|
- Speċifikazzjonijiet Tekniċi tas-Sistema
|
It-tieni trimestru tal-2023
|
|
Fażi tal-Kostruzzjoni
|
|
|
- Implimentazzjoni tas-servizzi ċentrali
|
It-tielet trimestru tal-2024
|
|
- Integrazzjoni tas-servizz fis-Sistemi Nazzjonali
|
Mhux Applikabbli
|
|
- Implimentazzjoni nazzjonali
|
Mhux Applikabbli
|
|
Fażi tranżitorja
|
|
|
- Varar u tnedija
|
Ir-raba’ trimestru tal-2024
|
|
- Testijiet tal-konformità
|
It-tieni trimestru tal-2025
|
5
|
Tħaddim
|
|
|
- Il-Kummissjoni, l-amministrazzjonijiet tal-Istati Membri u l-Kummerċjanti
|
It-tieni trimestru tal-2025
|
|
- Pajjiżi Mhux tal-UE u kummerċjanti mhux tal-UE (jekk ikun meħtieġ)
|
Mhux Applikabbli
|
6
|
Appoġġ għall-implimentazzjoni (taħriġ u komunikazzjoni)
|
|
|
- Taħriġ u komunikazzjoni żviluppati b’mod ċentrali
|
Ir-raba’ trimestru tal-2024
|
|
- Taħriġ u komunikazzjoni nazzjonali
|
Ir-raba’ trimestru tal-2024
|
*Id-dispożizzjonijiet attwali jirreferu għar-Regolament (UE) 2019/880
**Id-dispożizzjonijiet futuri jirreferu għad-dispożizzjonijiet ta’ implimentazzjoni li għandhom jiġu adottati skont ir-Regolament (UE) 2019/880
It-Tabella 2 tipprovdi silta mill-proġett CSW-CERTEX tal-UE, b’enfasi fuq il-Komponent 2 tal-proġett CSW-CERTEX tal-UE, li jgħaqqad is-sistema ICG.
Tabella 2 - Silta mill-MASP-C rev. 2019 Fiche 1.13 – Komponent 2 “CSW-CERTEX tal-UE”
|
|
Stadji importanti
|
Data stmata tat-tlestija
|
1
|
Analiżi tan-Negozju u Mmudellar tan-Negozju
|
|
|
- Dokument tal-Argument għall-Vijabbiltà
|
L-ewwel trimestru tal-2017
|
|
- Anness tal-Argument għall-Vijabbiltà
|
It-tieni trimestru tal-2023
|
|
- Livell 3 (BPM tar-Rekwiżiti tal-Utenti)
|
L-ewwel trimestru tal-2024
|
|
- Livell 4 (BPM dettaljat tar-Rekwiżiti Funzjonali)
|
L-ewwel trimestru tal-2024
|
2
|
Dispożizzjonijiet Legali
|
|
|
- Id-dispożizzjonijiet attwali adottati*
|
Fis-seħħ
|
|
- Id-dispożizzjonijiet futuri adottati **
|
2021
|
3
|
Fażi tal-Bidu tal-Proġett
|
|
|
- Dokument ta’ Viżjoni
|
It-tielet trimestru tal-2017
|
|
- Anness tad-Dokument ta’ Viżjoni
|
It-tielet trimestru tal-2023
|
|
- Deċiżjoni tal-GO
|
It-tielet trimestru tal-2023
|
4
|
Proġett tal-IT
|
|
|
- Speċifikazzjonijiet tal-Applikazzjoni u tas-Servizz
|
It-tieni trimestru tal-2024
|
|
- Speċifikazzjonijiet Tekniċi tas-Sistema
|
It-tieni trimestru tal-2024
|
|
Fażi tal-Kostruzzjoni
|
|
|
- Implimentazzjoni tas-servizzi ċentrali
|
It-tielet trimestru tal-2024
|
|
- Integrazzjoni tas-servizz fis-Sistemi Nazzjonali
|
Mir-raba’ trimestru tal-2024 ’il quddiem
|
|
- Implimentazzjoni nazzjonali
|
Mir-raba’ trimestru tal-2024 ’il quddiem
|
|
Fażi tranżitorja
|
|
|
- Varar u tnedija
|
Ir-raba’ trimestru tal-2024
|
|
- Testijiet tal-konformità
|
Mill-ewwel trimestru tal-2025 ’il quddiem
|
5
|
Tħaddim
|
|
|
Il-Kummissjoni, l-amministrazzjonijiet tal-Istati Membri u l-Kummerċjanti (NB: Din hija d-data tat-Tħaddim għall-Kummissjoni, l-Istati Membri se jittestjaw għall-konformità mit-tieni trimestru tal-2020)
|
It-tieni trimestru tal-2025
|
|
- Pajjiżi Mhux tal-UE u kummerċjanti mhux tal-UE (jekk ikun meħtieġ)
|
Mhux Applikabbli
|
6
|
Appoġġ għall-implimentazzjoni (taħriġ u komunikazzjoni)
|
|
|
- Taħriġ u komunikazzjoni żviluppati b’mod ċentrali
|
Mhux Applikabbli
|
|
- Taħriġ u komunikazzjoni nazzjonali
|
Mhux Applikabbli
|
*Id-dispożizzjonijiet attwali jirreferu għar-Regolament (UE) 2019/880
**Id-dispożizzjonijiet futuri jirreferu għad-dispożizzjonijiet ta’ implimentazzjoni li għandhom jiġu adottati skont ir-Regolament (UE) 2019/880
Anness II: Fażijiet ewlenin tal-proġett u skeda ta’ żmien tal-istadji importanti kritiċi