IL-KUMMISSJONI EWROPEA
Brussell, 18.5.2021
COM(2021) 251 final
KOMUNIKAZZJONI TAL-KUMMISSJONI LILL-PARLAMENT EWROPEW U LILL-KUNSILL EMPTY
It-Tassazzjoni tal-Intrapriżi għas-Seklu 21
IL-KUMMISSJONI EWROPEA
Brussell, 18.5.2021
COM(2021) 251 final
KOMUNIKAZZJONI TAL-KUMMISSJONI LILL-PARLAMENT EWROPEW U LILL-KUNSILL EMPTY
It-Tassazzjoni tal-Intrapriżi għas-Seklu 21
1. Qafas tal-politika tat-taxxa tal-UE
1.1 Kuntest
Il-kuntest tal-politika tal-UE dwar it-tassazzjoni tal-intrapriżi inbidel radikalment fl-aħħar sena. Il-coronavirus affettwa ħafna lis-soċjetajiet u l-ekonomiji fl-Ewropa u globalment. L-isfida tas-saħħa pubblika nbidlet fl-aktar kriżi ekonomika drastika fl-istorja tal-UE, akkumpanjata minn impatti soċjali profondi u inugwaljanzi li qed jiżdiedu.
Il-pandemija seħħet fl-isfond ta’ xejriet ewlenin li għaddejjin bħalissa li qed isawru l-ekonomiji u s-soċjetajiet tagħna, inkluż it-tixjiħ tal-popolazzjoni, it-tibdil fil-klima, id-degradazzjoni ambjentali, il-globalizzazzjoni u t-trasformazzjoni tas-suq tax-xogħol. Il-pandemija aċċellerat ukoll ix-xejriet li kienu jeżistu qabel lejn id-diġitalizzazzjoni, b’għadd dejjem akbar ta’ nies u intrapriżi li jixtru, jaħdmu, jinteraġixxu u jagħmlu negozju online. Dawn ix-xejriet għandhom impatti kbar fuq il-bażijiet tat-taxxa eżistenti u jeħtieġu riflessjoni dwar il-forma li se jieħdu fil-futur l-oqfsa tat-taxxa effiċjenti, sostenibbli u ġusti, inkluż b’kunsiderazzjoni tat-taħlita ta’ taxxi kumplessiva (ara l-Kaxxa 1).
Barra minn hekk, bħalissa hemm kunsens dwar il-fatt li l-kunċetti fundamentali tar-residenza u tas-sors tat-taxxa li fuqhom kienet ibbażata s-sistema ta’ tassazzjoni internazzjonali għall-aħħar seklu huma skaduti. Il-prattiki tan-negozju issa jinvolvu regolarment li attività titwettaq fi Stat mingħajr ma tinżamm preżenza fiżika, sitwazzjoni li r-regoli attwali mhumiex adatti biex ilaħħqu magħha, waqt li d-diġitalizzazzjoni tal-ekonomija wasslet ukoll għal opportunitajiet ġodda biex jiġu mmanipulati l-prinċipji eżistenti permezz ta’ skemi ta’ ppjanar tat-taxxa.
B’rispons għal dan, il-gvernijiet impenjaw ruħhom dejjem aktar fl-adozzjoni ta’ taħlita ta’ miżuri kontra l-evitar u l-evażjoni tat-taxxa. Filwaqt li dawn il-miżuri rnexxielhom jindirizzaw problemi speċifiċi, huma żiedu aktar kumplessità ma’ dik li kien hemm. Xprunati minn diversi skandli tat-taxxa, mill-infurzar rigoruż tar-regoli dwar l-għajnuna mill-Istat u mill-ħtieġa li tiġi ffinanzjata n-nefqa pubblika wara l-kriżi finanzjarja, id-diskussjonijiet dwar ir-riforma tal-qafas tat-taxxa korporattiva internazzjonali aċċelleraw fil-bidu tas-snin 2010, u dan wassal għall-proġett tal-Erożjoni tal-Bażi tat-Taxxa u t-Trasferiment tal-Profitti (BEPS) 1 , immexxi mill-OECD u mill-G20. Dan il-proċess ta l-ewwel riżultati tiegħu fl-2015, li ġew implimentati fl-UE, inkluż permezz tad-Direttivi Kontra l-Evitar tat-Taxxa 2 . Id-diskussjonijiet internazzjonali issa qed javvanzaw lejn soluzzjoni globali biex tiġi riformata s-sistema internazzjonali antikwata tat-taxxa korporattiva, flimkien ma’ azzjoni dwar ir-riallokazzjoni tad-drittijiet ta’ tassazzjoni u dwar it-tassazzjoni minima effettiva. Is-sustanza ta’ dawn id-diskussjonijiet se tinfluwenza l-forma li l-aġenda tal-UE dwar it-taxxa fuq l-intrapriżi se tieħu fil-futur, irrispettivament minn jekk jintlaħaqx ftehim globali konkret jew le.
Fl-istess ħin, is-sħab internazzjonali, bħall-Istati Uniti, diġà ħabbru pjanijiet biex ifasslu l-aġenda tagħhom tat-taxxa fuq l-intrapriżi għas-snin li ġejjin, li jmorru lil hinn mid-diskussjonijiet internazzjonali jew jibnu fuqhom. Dawn l-azzjonijiet jirrikonoxxu li d-dħul huwa meħtieġ biex jiġi ffinanzjat l-investiment pubbliku sabiex l-irkupru ekonomiku inklużiv jinbena mill-ġdid aħjar, u jiġi appoġġat u sostnut. Pajjiżi oħra, bħar-Renju Unit, ħabbru wkoll miżuri dwar it-tassazzjoni korporattiva wara l-COVID-19.
F’dan il-kuntest, l-UE teħtieġ qafas tat-taxxa robust, effiċjenti u ġust li jissodisfa l-ħtiġijiet ta’ finanzjament pubbliku, filwaqt li jappoġġa wkoll l-irkupru u t-tranżizzjoni ekoloġika u diġitali billi joħloq ambjent li jwassal għal tkabbir ġust u sostenibbli, li joħloq l-impjiegi u l-investiment.
1.2 Aġenda tal-UE dwar il-Politika tat-Taxxa
L-azzjoni tal-UE dwar it-tassazzjoni tal-intrapriżi trid tkun inkorporata f’aġenda komprensiva tal-UE dwar it-taxxa. Fil-qalba tal-aġenda, hemm il-ħtieġa għal taħlita bbilanċjata ta’ dħul mit-taxxa, u sistema tat-taxxa ggwidata mill-prinċipji tal-ġustizzja, l-effiċjenza u s-sempliċità.
Il-prijoritajiet li ġejjin se jkunu vitali biex tinkiseb din il-viżjoni:
(I)L-iffaċilitar ta’ tkabbir ġust u sostenibbli
L-aġenda tat-taxxa tal-UE tikkontribwixxi għall-objettiv ġenerali tal-iffaċilitar ta’ tkabbir ġust u sostenibbli billi tappoġġa politiki usa’ tal-UE bħall-Patt Ekoloġiku Ewropew 3 , l-aġenda diġitali tal-Kummissjoni, l-Istrateġija Industrijali Ġdida għall-Ewropa 4 u l-Unjoni tas-Swieq Kapitali 5 . Jenħtieġ li tikkontribwixxi wkoll għall-appoġġ ta’ rkupru inklużiv f’konformità mal-prinċipji tal-Pilastru Ewropew tad-Drittijiet Soċjali.
Sistema ta’ taxxa li tappoġġa t-tranżizzjoni ekoloġika se tkun għodda vitali biex jintlaħqu l-objettivi tal-Patt Ekoloġiku Ewropew. Il-miżuri tat-taxxa se jkollhom jimxu id f’id ma’ strumenti oħra ta’ pprezzar ambjentali kif ukoll ma’ miżuri regolatorji, filwaqt li jitqiesu l-impatti distributtivi biex tiġi żgurata tranżizzjoni ġusta.
Fil-livell tal-UE, il-proposta li jmiss għar-riforma tad-Direttiva dwar it-Tassazzjoni fuq l-Enerġija 6 se tkun pass kbir ’il quddiem f’dan ir-rigward. Ir-reviżjoni tagħha se tikkumplimenta inizjattivi oħra fil-pakkett “Fit for 55”, billi tirrazzjonalizza s-sistema ta’ rati minimi u tneħħi eżenzjonijiet skaduti u rati mnaqqsa. Bħala parti mill-istess pakkett, il-Kummissjoni se tipproponi mekkaniżmi ta’ pprezzar ġodda u riformati biex tappoġġa l-objettivi klimatiċi tal-UE, b’mod partikolari Mekkaniżmu ta’ Aġġustament tal-Karbonju fil-Fruntieri (CBAM, Carbon Border Adjustment Mechanism), u proposta għal Skema riveduta tal-UE għan-Negozjar ta’ Emissjonijiet (ETS, Emissions Trading System). Fil-livell nazzjonali, jenħtieġ li l-Istati Membri jżidu l-isforzi tagħhom biex jiddeterminaw il-prezz tal-esternalitajiet 7 filwaqt li jqisu b’mod xieraq kwalunkwe impatt soċjali negattiv, u jeliminaw gradwalment is-sussidji dannużi, anki fl-ambitu tar-riformi aktar wesgħin tat-taxxa 8 .
Fil-Komunikazzjoni dwar id-Deċennju Diġitali 9 , il-Kummissjoni stabbiliet il-miri tal-UE fit-tranżizzjoni diġitali sal-2030. Jeħtieġ li t-tassazzjoni tiffaċilita din it-tranżizzjoni, billi tipprovdi ambjent fejn l-intrapriżi diġitali jistgħu jirnexxu. Fl-istess ħin, jeħtieġ li l-qafas tat-taxxa jiġi adatt biex jirrifletti aħjar ir-realtajiet ta’ ekonomija diġitalizzata. Dan jinvolvi wkoll id-diġitalizzazzjoni tal-amministrazzjoni tat-taxxa.
Il-qafas tat-taxxa tal-UE jrid jitfassal biex ikun jikkontribwixxi għal Suq Uniku aktar b’saħħtu għall-irkupru fl-Ewropa, f’konformità mal-Istrateġija Industrijali Ġdida tal-2020 u l-aġġornament tagħha adottat f’Mejju 2021 10 . Jenħtieġ li huwa jnaqqas il-kostijiet tal-konformità għall-intrapriżi, jiffaċilita l-investiment transfruntier u jipprovdi ambjent tajjeb għall-SMEs u għal intrapriżi akbar biex jirnexxu f’Ewropa ekoloġika u diġitali.
Il-qafas tat-taxxa tal-UE għandu wkoll rwol ewlieni x’jaqdi fl-appoġġ tal-iżvilupp tal-Unjoni tas-Swieq Kapitali (CMU) 11 , b’mod partikolari billi jneħħi l-ostakli tat-taxxa għall-investiment transfruntier u jindirzza l-predispożizzjoni favur id-dejn fit-tassazzjoni korporattiva.
(II)L-iżgurar ta’ tassazzjoni effettiva
L-iżgurar tal-ġbir effettiv tad-dħul mit-taxxa huwa vitali għall-finanzjament ta’ servizzi pubbliċi ta’ kwalità, u huwa prekundizzjoni għal kondiviżjoni ġusta tal-piż tat-taxxa bejn il-kontribwenti. Jikkontribwixxi wkoll għal kondizzjonijiet ekwivalenti ta’ kompetizzjoni għad-ditti, waqt li jtejjeb il-kompetittività tal-UE. Kull sena fl-UE jintilfu biljuni ta’ Euro minħabba l-frodi, l-evażjoni u l-evitar tat-taxxa 12 . Id-dispożizzjonijiet tat-taxxa ta’ Stati Membri individwali jistgħu jirriżultaw ukoll f’telf ta’ dħul għal Stati Membri oħra tal-UE, pereżempju, fejn ir-royalties u l-pagamenti tal-imgħax jistgħu jitħallsu lil riċevituri f’ġuriżdizzjonijiet b’taxxa baxxa jew mingħajr taxxa mingħajr ma jkunu tħallsu taxxi fl-UE.
|
Kaxxa 1: It-taħlita ta’ taxxi tal-UE fil-mixja lejn l-2050 Jeħtieġ li s-sistemi tat-taxxa jiġu modernizzati biex jirriflettu aħjar l-iżviluppi ekonomiċi u soċjali attwali u futuri. Il-baġits tal-Istati Membri jiddependu ħafna fuq it-taxxi tax-xogħol, inklużi l-kontribuzzjonijiet soċjali, li jipprovdu aktar minn 50 % tad-dħul globali mit-taxxa fl-UE-27. Il-VAT tammonta għal aktar minn 15 % tad-dħul totali mit-taxxa, filwaqt li bażijiet oħrajn għat-taxxa, bħat-taxxi ambjentali (~6%), it-taxxi fuq il-proprjetà (~5%) jew it-taxxi korporattivi fuq l-introjtu (~7%) jikkontribwixxu relattivament ftit 13 . Għalkemm il-kompożizzjoni ġenerali tad-dħul mit-taxxa fl-UE baqgħet relattivament stabbli matul dawn l-aħħar għoxrin sena 14 , il-megatendenzi bħat-tibdil fil-klima u t-trasformazzjoni diġitali tas-suq tax-xogħol x’aktarx li jkollhom impatt fuq it-taħlita ta’ taxxi futura fl-Istati Membri tal-UE. Minħabba t-tixjiħ tal-popolazzjoni u ż-żieda fix-xogħol mhux standard, jista’ jkun li fil-futur mhux se jiġi ġġenerat l-istess dħul permezz tat-tassazzjoni tax-xogħol. Kif diġà ġie enfasizzat fil-Green Paper dwar it-Tixjiħ 15 u fir-Rapport dwar it-Tixjiħ tal-2021 16 , dan se jirrikjedi li naħsbu mill-ġdid dwar kif ix-xogħol jiġi ntaxxat u l-implikazzjonijiet għal bażijiet għat-taxxa oħrajn. Barra minn hekk, trid titqies il-ħtieġa għal dħul sostenibbli u ġustizzja interġenerazzjonali, u li jingħata kontribut għas-sostenibbiltà tas-sistemi ta’ protezzjoni soċjali. Il-piż tat-taxxa tax-xogħol li tradizzjonalment huwa għoli fl-UE, anki meta mqabbel ma’ ekonomiji avvanzati oħrajn, se jkollu jitnaqqas aktar biex jappoġġa l-kompetittività, l-impjiegi u l-ħolqien tal-impjiegi wara l-kriżi. 17 Fl-istess ħin, ir-rati tat-taxxa fuq il-konsum diġà jinsabu f’livell għoli storiku, hekk kif ir-rati tal-VAT żdiedu fis-snin ta’ wara l-kriżi finanzjarja. Għandha tingħata prijorità biex jiġi limitat l-użu ineffiċjenti ta’ rati mnaqqsa u eżenzjonijiet, li spiss jonqsu milli jilħqu l-objettiv ta’ politika preżunt tagħhom. It-taxxi fuq l-imġiba, bħat-taxxi ambjentali u tas-saħħa, għad għandhom importanza dejjem akbar għall-politiki tat-taxxa tal-UE. It-taxxi ambjentali mfassla tajjeb jgħinu biex jappoġġaw it-tranżizzjoni ekoloġika billi jibgħatu s-sinjali t-tajba tal-prezzijiet, kif ukoll jimplimentaw il-prinċipju ta’ min iniġġes iħallas 18 . Huma jiġġeneraw ukoll dħul li jista’ jikkumpensa għal ċertu tnaqqis meħtieġ fit-taxxa fuq ix-xogħol. Bl-istess mod, it-taxxi fuq is-saħħa, pereżempju fuq it-tabakk jew l-alkoħol, jistgħu jtejbu s-saħħa pubblika u jsalvaw il-ħajjiet, filwaqt li jnaqqsu l-pressjoni fuq is-sistemi tas-saħħa pubblika. Fl-aħħar nett, taħlita ta’ taxxi li tibqa’ valida fil-futur se tirrikjedi tassazzjoni ġusta u effettiva ta’ dħul minn kapital, kemm minn individwi kif ukoll minn korporazzjonijiet. Fl-istess ħin, se jkunu meħtieġa s-simplifikazzjoni u miżuri oħra biex titnaqqas il-kumplessità amministrattiva. Barra minn hekk, it-taxxi rikorrenti fuq il-proprjetà immobbli jistgħu jkunu mod relattivament effiċjenti kif jista’ jiżdied id-dħul mit-taxxa. Madankollu, l-isfidi distributtivi u amministrattivi relatati mal-valutazzjoni tal-proprjetà jeħtieġ li jiġu indirizzati kif xieraq. Abbażi ta’ dawn il-kunsiderazzjonijiet, il-Kummissjoni se tniedi riflessjoni aktar wiesgħa, li għandha twassal għal Simpożju tat-Taxxa dwar it-“It-taħlita ta’ taxxi tal-UE fil-mixja lejn l-2050” fl-2022. Din ir-riflessjoni se tqis il-prinċipji stabbiliti hawn fuq, kif ukoll l-impatt distributtiv tal-bidliet possibbli fit-taħlita ta’ taxxi, inkluż l-effett tagħhom fuq l-unitajiet domestiċi bi dħul baxx. |
Il-prinċipji deskritti f’din it-taqsima għandhom japplikaw ukoll għas-sistema ta’ finanzjament tar-riżorsi proprji tal-baġit tal-UE. F’konformità mal-mandat mill-Kunsill Ewropew u mal-impenji meħuda fil-ftehim interistituzzjonali 19 li jakkumpanjaw il-qafas finanzjarju pluriennali l-ġdid, il-Kummissjoni se tressaq ukoll proposti għal Riżorsi Proprji ġodda li se jikkontribwixxu għall-ħlasijiet lura ta’ NextGenerationEU. Wara sett inizjali ta’ proposti f’Lulju 2021, fejn fosthom hemm proposti għal CBAM, għal imposta diġitali u reviżjoni tal-EU ETS, il-Kummissjoni se tipproponi riżorsi proprji ġodda addizzjonali, li jistgħu jinkludu Taxxa fuq it-Tranżazzjonijiet Finanzjarji u riżorsa proprja marbuta mas-settur korporattiv.
Il-proposta tas-CBAM se tifforma parti mill-pakkett “Fit for 55” li jmiss. Dan il-mekkaniżmu se jkollu l-għan li jnaqqas ir-riskju tar-rilokazzjoni tal-emissjonijiet tal-karbonju billi jiżgura li l-prezz tal-importazzjonijiet jkun jirrifletti b’mod aktar preċiż il-kontenut tal-karbonju tagħhom jekk il-pajjiżi terzi ma jkollhomx fis-seħħ politiki klimatiċi ambizzjużi bl-istess mod. Se jikkontribwixxi wkoll biex jintlaħqu l-objettivi klimatiċi billi jimmotiva produtturi minn pajjiżi terzi u importaturi tal-UE jadottaw teknoloġiji b’livell baxx ta’ karbonju. Is-CBAM se jkun kompletament kompatibbli mad-WTO u ma’ obbligi internazzjonali oħrajn.
Il-kumpaniji diġitali għandhom it-tendenza li jħallsu anqas taxxi minn kumpaniji oħra u t-taxxi li jħallsu mhux dejjem ikunu ta’ benefiċċju għall-pajjiżi fejn iseħħu l-attivitajiet tagħhom. L-imposta diġitali se tiżgura kontribuzzjoni ġusta tas-settur diġitali għall-finanzjament tal-irkupru fl-UE u għas-soċjetà inġenerali. Se titfassal b’tali mod li tkun indipendenti mill-ftehim globali li jmiss dwar ir-riforma tat-taxxa korporattiva internazzjonali u li tkun kompatibbli mad-WTO u ma’ obbligi internazzjonali oħra 20 . Din l-imposta se tkun kompatibbli mal-objettiv ewlieni tal-politika, li jappoġġa u jaċċellera t-tranżizzjoni diġitali. Wara l-istabbiliment tagħha, se tikkoeżisti mal-implimentazzjoni ta’ ftehim tal-OECD dwar il-kondiviżjoni ta’ frazzjoni tal-bażi għat-taxxa tal-akbar intrapriżi multinazzjonali, ladarba dan tal-aħħar jiġi ratifikat u traspost fid-dritt tal-UE.
1.3 Dan x’ifisser għat-Tassazzjoni tal-intrapriżi fl-UE?
Jenħtieġ li t-tassazzjoni tal-intrapriżi tiżgura li l-piż tat-taxxa jinqasam b’mod ġust fost l-intrapriżi u li d-dħul taxxabbli jinqasam b’mod ġust bejn ġuriżdizzjonijiet differenti. Is-sistema ġenerali għandha tkun sempliċi, sabiex jitnaqqsu l-kostijiet tal-konformità, u għandha tiffaċilita l-investiment u t-tkabbir, u b’hekk issaħħaħ is-Suq Uniku. Minkejja l-progress fit-tneħħija tal-ostakli għas-Suq uniku f’oqsma oħrajn, il-kumpaniji li jagħmlu negozju fl-UE għad iridu jlaħħqu ma’ massimu ta’ 27 sistemi tat-taxxa nazzjonali differenti. Din it-taħlita ta’ regoli nazzjonali tat-taxxa toħloq kostijiet tal-konformità mhux meħtieġa għall-intrapriżi, u dan jiskoraġġixxi l-investiment transfruntier fis-Suq Uniku. Dan huwa l-każ kemm għal intrapriżi akbar, iżda wkoll għal SMEs, intrapriżi ġodda u intrapriżi oħra li qed ifittxu li jikbru, jespandu u jinnegozjaw b’mod transfruntier, li għalihom il-kostijiet huma proporzjonalment akbar 21 . Dan iwassal ukoll għal lakuni u kumplessitajiet li jistgħu joffru opportunitajiet għall-ippjanar aggressiv tat-taxxa, filwaqt li jxekklu kondizzjonijiet ekwivalenti ta’ kompetizzjoni. Dan jagħmel ħsara lill-investiment u lit-tkabbir, kif ukoll lill-kompetittività tal-UE meta mqabbla ma’ sħab internazjonali oħrajn. L-għażliet ta’ politika fil-qasam tat-tassazzjoni tal-intrapriżi jinfluwenzaw ukoll sa liema punt is-sistema tat-taxxa tappoġġa l-investiment. Fl-aħħar nett, is-sistema tat-taxxa għandha timminimizza d-distorsjonijiet mhux intenzjonati tad-deċiżjonijiet kummerċjali, pereżempju lejn id-dejn aktar milli lejn il-finanzjament tal-ekwità, u b’hekk tappoġġa l-finanzjament korporattiv sostenibbli u fit-tul u l-ekwitazzjoni mill-ġdid ta’ kumpaniji li akkumulaw livell għoli b’mod perikoluż ta’ dejn, inkluż bħala riżultat tal-kriżi tal-COVID-19.
Skont il-prinċpju tas-sussidjarjetà, l-azzjoni tal-UE dwar it-tassazzjoni tal-intrapriżi għandha tħares lejn l-isfidi b’dimensjoni transfruntiera. Dan jinkludi t-tneħħija tal-ostakli għat-tħaddim bla xkiel tas-Suq Uniku u għall-investiment transfruntier maħluqa mid-differenzi bejn is-sistemi tat-taxxa nazzjonali.
Il-progress fil-livell tal-UE għandu jiġi kkomplementat b’appoġġ għal azzjoni nazzjonali f’oqsma fejn l-Istati Membri jistgħu jkunu fl-aħjar pożizzjoni biex jiġġudikaw il-ħtiġijiet tal-ekonomija u tas-soċjetà tagħhom. Dan jinkludi l-istabbiliment tal-livell tar-rata tat-taxxa korporattiva fuq l-introjtu ogħla mil-livelli minimi li jridu jiġu miftiehma internazzjonalment (ara t-taqsima 2), li se jibqgħu taħt il-kompetenza nazzjonali fl-UE, kif ukoll il-miżuri domestiċi biex itejbu l-amministrazzjoni tat-taxxa u jiffaċilitaw il-konformità mar-regoli tat-taxxa. Fejn xieraq, jista’ jinkludi miżuri aktar immirati, bħal inċentivi tat-taxxa mfassla tajjeb u effiċjenti, biex jappoġġaw għanijiet ta’ politika usa’. F’dawn l-oqsma, l-UE jista’ jkollha wkoll rwol fit-tfassil tal-aġenda u l-kondiviżjoni tal-informazzjoni, kif ukoll tipprovdi appoġġ finanzjarju għar-riformi nazzjonali u l-investiment. Il-Faċilità għall-Irkupru u r-Reżiljenza (RRF, Recovery and Resilience Facility), li tinsab fil-qalba tal-aġenda ta’ rkupru tal-UE, u l-Istrument ta’ Appoġġ Tekniku (TSI, Technical Support Instrument) jistgħu ipprovdu finanzjament essenzjali għall-modernizzazzjoni u t-trasformazzjoni diġitali ta’ amministrazzjonijiet tat-taxxa, filwaqt li jappoġġaw ukoll riformi importanti tal-politika tat-taxxa.
L-UE ħadet passi importanti ’l quddiem f’dawn l-aħħar snin, pereżempju, billi adottat u bdiet timplimenta d-Direttivi kontra l-Evitar tat-Taxxa (ATAD, Anti-tax Avoidance Directives) u d-Direttiva dwar il-Kooperazzjoni Amministrattiva (DAC, Directive on Administrative Cooperation) 22 . Fl-ambitu tal-Grupp dwar il-Kodiċi tal-Kondotta dwar it-Tassazzjoni tal-Intrapriżi, l-Istati Membri jkomplu jagħmlu evalwazzjoni bejn il-pari tas-sistemi tat-taxxa ta’ xulxin biex jiżguraw li dawn jikkonformaw mal-prinċipji ta’ kompetizzjoni ġusta fil-qasam tat-taxxa. Barra minn hekk, il-Parlament Ewropew kien attiv ħafna fil-qasam tat-tassazzjoni b’mod ġenerali, u tat-tassazzjoni tal-intrapriżi b’mod partikolari. Barra minn hekk, f’Lulju 2020, il-Kummissjoni adottat Pjan ta’ Azzjoni ambizzjuż 23 biex jagħmel it-tassazzjoni aktar ġusta, aktar sempliċi u aktar adatta għat-teknoloġiji moderni u l-Komunikazzjoni dwar il-Governanza Tajba fil-Qasam tat-Taxxa fl-UE u lil hinn minnha, 24 li għandha l-għan li tkompli ssaħħaħ il-promozzjoni tal-UE tat-trasparenza u tassazzjoni ġusta kemm fil-livell Ewropew kif ukoll f’dak globali.
Din il-Komunikazzjoni tistabbilixxi miżuri ulterjuri fil-qasam tat-tassazzjoni tal-intrapriżi kemm fiż-żmien qarib kif ukoll fit-tul. Il-Kummissjoni se taġixxi malajr biex timplimenta l-ftehim globali li jmiss dwar ir-riallokazzjoni tad-drittijiet ta’ tassazzjoni u t-tassazzjoni minima effettiva (ara t-taqsima 2). Se tieħu azzjoni wkoll matul is-sentejn li ġejjin biex tindirizza l-isfidi l-aktar immedjati (ara t-taqsima 3). Barra minn hekk, il-Komunikazzjoni tistabbilixxi pjan għal qafas olistiku tal-UE dwar it-taxxa fuq l-intrapriżi adattat għall-għexieren ta’ snin li ġejjin (ara t-taqsima 4).
2. Riforma tal-qafas internazzjonali tat-taxxa korporattiva
2.1 Diskussjonijiet globali li għaddejjin bħalissa
B’mandat mill-G20, il-Qafas Inklużiv tal-OECD qed jaħdem fuq soluzzjoni globali bbażata fuq il-kunsens għar-riforma tal-qafas internazzjonali tat-taxxa korporattiva. Id-diskussjonijiet jiffukaw fuq żewġ flussi ta’ ħidma wesgħin: Il-Pilastru 1 (ir-riallokazzjoni parzjali tad-drittijiet ta’ tassazzjoni) u l-Pilastru 2 (it-tassazzjoni effettiva minima tal-profitti tal-kumpaniji multinazzjonali). Iż-żewġ pilastri għandhom l-għan li jindirizzaw kwistjonijiet differenti iżda relatati marbuta maż-żieda fil-globalizzazzjoni u fid-diġitalizzazzjoni tal-ekonomija.
L-UE ppromwoviet b’mod konsistenti riformi ambizzjużi fil-livell internazzjonali, u d-diskussjonijiet globali issa jistgħu jibnu wkoll fuq l-impenn pożittiv tal-amministrazzjoni l-ġdida tal-Istati Uniti. L-irtirar tal-proposta preċedenti ta’ “livell xieraq ta’ protezzjoni” 25 u t-tressiq ta’ proposti konkreti u kostruttivi dwar il-Pilastru 1 huwa pass importanti u joffri opportunità promettenti biex isir progress reali lejn ftehim globali dwar il-kondiviżjoni ta’ parti mill-bażi taxxabbli tal-intrapriżi multinazzjonali (MNEs, multinational enterprises). It-tħabbiriet reċenti tal-amministrazzjoni tal-Istati Uniti dwar l-intenzjonijiet tagħhom għal riforma tat-taxxa korporattiva domestika huma pass ambizzjuż u pass importanti lejn ftehim dwar il-Pilastru 2, li se jtemm il-ġirja lejn l-aktar livell baxx. Il-Ministri tal-Finanzi tal-G20 reċentement affermaw mill-ġdid l-impenn tagħhom li jilħqu soluzzjoni globali u bbażata fuq il-kunsens sa nofs l-2021 26 .
Il-Pilastru 1 għandu l-għan li jadatta r-regoli internazzjonali dwar it-tassazzjoni tal-profitti korporattivi biex ikunu jirriflettu n-natura li qed tinbidel tal-mudelli ta’ negozju, inkluża l-kapaċità tal-kumpaniji li jagħmlu negozju mingħajr preżenza fiżika. Huwa se jagħti lill-ġuriżdizzjonijiet tas-suq id-dritt li jintaxxaw parti mill-profitti ta’ ċerti intrapriżi mhux residenti billi jipprevedu riallokazzjoni ta’ porzjon ta’ dawn il-profitti globali fost il-ġuriżdizzjonijiet fejn il-grupp ikollu klijenti jew utenti, bl-użu ta’ formula miftiehma. Id-diskussjonijiet tal-pilastru 1 inizjalment iffukaw primarjament fuq kumpaniji attivi fis-settur diġitali. Madankollu, is-soluzzjoni proposta issa tista’ tiġi ssimplifikata b’għadd iżgħar ta’ MNEs fil-kamp ta’ applikazzjoni u fl-istess ħin titwessa’ biex tkopri l-aktar kumpaniji multinazzjonali kbar u l-aktar profittabbli, irrispettivament mis-settur tan-negozju tagħhom.
Il-Pilastru 2 se jistabbilixxi limitu minimu għall-kompetizzjoni eċċessiva fil-qasam tat-taxxa billi jiżgura li l-intrapriżi multinazzjonali jkunu soġġetti għal ċertu livell minimu ta’ taxxa fuq il-profitti kollha tagħhom kull sena. Il-globalizzazzjoni tal-ekonomiji u l-intensifikazzjoni tal-użu tal-assi intanġibbli fil-ktajjen ta’ valur mondjali ppermettew lil ċerti kumpaniji multinazzjonali jittrasferixxu l-profitti lejn ġuriżdizzjonijiet b’taxxa baxxa. Il-Pilastru 2 se jippermetti lill-ġuriżdizzjonijiet iżidu l-ammont ta’ taxxa mħallsa minn kumpaniji multinazzjonali kbar għal livell effettiv minimu, filwaqt li jħalli lill-pajjiżi individwali liberi li jiddeċiedu dwar il-karatteristiċi tas-sistemi tat-taxxa tagħhom stess. Tassazzjoni effettiva minima bħal din tal-profitt tal-intrapriżi se tillimita l-opportunitajiet ta’ evitar tat-taxxa.
Iż-żewġ pilastri tal-ftehim globali futur huma konformi mal-viżjoni tal-Kummissjoni għal qafas ta’ tassazzjoni tal-intrapriżi għas-seklu 21, kif deskritt fit-Taqsima 4. L-objettivi tagħhom huma komplementari u hija meħtieġa soluzzjoni għat-tnejn li huma bħala parti mid-diskussjonijiet globali. Dawn jimmarkaw passi lejn il-prinċipji importanti ta’ tqassim skont formula speċifika (permezz tal-użu ta’ formula għar-riallokazzjoni parzjali tad-drittijiet tal-intaxxar fil-qafas tal-Pilastru 1) u definizzjoni komuni tal-bażi għat-taxxa. Il-Kummissjoni qed tieħu sehem attiv fid-diskussjonijiet internazzjonali, u qed taħdem mal-Istati Membri biex tiżgura li jitqiesu l-kwistjonijiet ta’ tħassib komuni għall-UE – bħall-kompatibbiltà mas-Suq Uniku u l-minimizzazzjoni tal-kumplessità amministrattiva – u li s-soluzzjonijiet ikunu ta’ benefiċċju għall-UE. Fil-konklużjonijiet tiegħu tal-25 ta’ Marzu 2021, il-Kunsill Ewropew tenna wkoll “il-preferenza u l-impenn qawwija tagħna għal soluzzjoni globali”, u ddikjara li se jistinka biex jilħaq soluzzjoni bbażata fuq il-kunsens sa nofs l-2021 fil-qafas tal-OECD 27 .
2.2 Kif il-ftehim globali se jiġi implimentat fl-UE
Ladarba jintlaħaq qbil dwaru u jiġi tradott f’konvenzjoni multilaterali, l-applikazzjoni tal-Pilastru 1 se tkun obbligatorja għall-pajjiżi parteċipanti. Sabiex tiġi żgurata l-implimentazzjoni konsistenti tagħha fl-Istati Membri kollha tal-UE, inklużi dawk li mhumiex Membri tal-OECD u li ma jipparteċipawx fil-Qafas Inklużiv, il-Kummissjoni se tipproponi Direttiva għall-implimentazzjoni tal-Pilastru 1 fl-UE.
Sabiex tiġi żgurata l-applikazzjoni konsistenti tiegħu fl-UE u l-kompatibbiltà mad-dritt tal-UE, il-metodu prinċipali għall-implimentazzjoni tal-Pilastru 2 se jkun Direttiva tal-UE li se tirrifletti r-Regoli Mudell tal-OECD bl-aġġustamenti meħtieġa. L-implimentazzjoni ta’ ftehim globali dwar it-tassazzjoni effettiva minima se jkollha wkoll implikazzjonijiet għad-Direttivi u l-inizjattivi eżistenti u pendenti tal-UE (ara l-kaxxa 2 hawn taħt).
|
Kaxxa 2: Interazzjonijiet bejn ftehim dwar it-tassazzjoni minima effettiva u l-inizjattivi eżistenti tal-UE L-implimentazzjoni tal-Pilastru 2 se jkollha implikazzjonijiet għar-regoli eżistenti fil-qafas tal-ATAD, u speċifikament għar-regoli tal-Kumpaniji Barranin Ikkontrollati (CFC, fontrolled foreign company), li se jinteraġixxu mar-regola primarja fil-qafas tal-Pilastru 2 (ir-Regola tal-Inklużjoni tal-Introjtu jew “IIR”). Meta IIR tiġi implimentata fl-UE, se jkun meħtieġ li jiġi esplorat kif l-aħjar tiġi akkomodata l-interazzjoni bejn iż-żewġ regoli. It-traspożizzjoni tal-Pilastru 2 għandha twitti t-triq biex jintlaħaq qbil dwar il-proposta pendenti għar-riformulazzjoni tad-Direttiva dwar l-Imgħax u r-Royalties (IRD, Interest and Royalties Directive) 28 , li ilha fil-Kunsill mill-2011. L-għan tad-Direttiva riformulata kien li tagħmel il-benefiċċji tad-Direttiva (li telimina l-ostakli tat-taxxa minn ras il-għajn għall-pagamenti transfruntiera tal-imgħax u tar-royalties fi grupp ta’ kumpaniji) kundizzjonali fuq li l-imgħax ikun soġġett għat-taxxa fl-istat tad-destinazzjoni. Xi Stati Membri kienu tal-fehma li l-IRD għandha tmur lil hinn minn dan u tistabbilixxi livell minimu ta’ taxxa fl-istat tad-destinazzjoni bħala kundizzjoni biex wieħed jibbenefika min-nuqqas ta’ taxxa minn ras il-għajn. Ftehim dwar il-Pilastru 2 se jsolvi din il-kwistjoni. Kif rifless fil-Komunikazzjoni riċenti dwar Governanza Tajba fil-Qasam tat-Taxxa fl-UE u lil hinn minnha 29 , il-Kummissjoni se tipproponi li tintroduċi l-Pilastru 2 fil-kriterji użati għall-valutazzjoni ta’ pajjiżi terzi fil-proċess tal-elenkar tal-UE, sabiex tinċentivahom jissieħbu fil-ftehim internazzjonali. Dan huwa konformi mal-approċċ eżistenti tal-UE li tuża l-proċess ta’ elenkar biex tippromwovi prattiki tajbin maqbula internazzjonalment. |
3. Lil hinn mill-ftehim tal-OECD – soluzzjonijiet immirati
Din it-taqsima tistabbilixxi l-aġenda tal-UE dwar it-taxxa fuq l-intrapriżi għas-sentejn li ġejjin, b’miżuri li jtejbu s-sistema attwali, b’enfasi fuq il-prijoritajiet doppji li tiġi żgurata tassazzjoni ġusta u effettiva u li jiġu promossi l-investiment produttiv u l-intraprenditorija.
3.1 L-iżgurar ta’ tassazzjoni ġusta u effettiva
L-ewwel pass għal sistema tat-taxxa aktar ġusta huwa trasparenza pubblika akbar fuq it-taxxi mħallsa minn atturi ekonomiċi kbar. Hemm domanda dejjem tiżdied miċ-ċittadini u l-organizzazzjonijiet tas-soċjetà ċivili biex jiġu żgurati aktar trasparenza kif ukoll aktar ġustizzja fir-rigward tat-tassazzjoni tal-intrapriżi, b’mod partikolari t-tassazzjoni korporattiva fuq l-introjtu.
Il-Kummissjoni se tressaq proposta ġdida għall-pubblikazzjoni annwali tar-rata tat-taxxa korporattiva effettiva ta’ ċerti kumpaniji kbar b’operazzjonijiet fl-UE, bl-użu tal-metodoloġija li sar qbil dwarha għall-kalkoli tal-Pilastru 2. Ir-rata tat-taxxa korporattiva effettiva tipprovdi informazzjoni dwar il-proporzjon ta’ taxxa korporattiva mħallas mill-kumpaniji meta mqabbel mal-ammont ta’ profitti li jiġġeneraw aktar milli meta mqabbel mal-“profitti taxxabbli” tagħhom, li jistgħu jitnaqqsu permezz ta’ diversi mezzi bħal konċessjonijiet tat-taxxa. Għalhekk, il-proposta se ttejjeb it-trasparenza pubblika dwar ir-rata tat-taxxa effettiva reali esperjenzata minn kumpaniji kbar tal-UE.
L-UE se tkompli tintensifika wkoll il-ġlieda kontra l-użu abbużiv ta’ kumpaniji fittizji – jiġifieri kumpaniji mingħajr preżenza sostanzjali jew b’attività ekonomika reali minima – permezz ta’ inizjattiva leġiżlattiva ġdida għan-newtralizzazzjoni tal-użu ħażin tal-entitajiet fittizji għal finijiet ta’ taxxa. Filwaqt li diversi azzjonijiet fil-livell tal-UE u f’dak internazzjonali jipprovdu strumenti biex jindirizzaw l-użu ta’ strutturi tat-taxxa abbużivi, entitajiet ġuridiċi bl-ebda sustanza u attività ekonomika, jew li huma minimi biss, ikomplu joħolqu riskju li jintużaw għal skopijiet mhux xierqa, bħall-ippjanar aggressiv tat-taxxa, l-evażjoni tat-taxxa jew il-ħasil tal-flus. Filwaqt li jista’ jkun hemm raġunijiet validi għall-użu ta’ entitajiet bħal dawn, hemm bżonn ta’ aktar azzjoni biex jiġu indirizzati entitajiet u strutturi maħluqa għall-iskop ewlieni li titnaqqas l-obbligazzjoni tat-taxxa jew li tinħeba mġiba mhux xierqa tal-grupp jew tal-operazzjonijiet li jappartjenu għalihom, mingħajr sustanza u attivitajiet ekonomiċi reali fil-pajjiżi fejn huma inkorporati.
Il-proposta tal-Kummissjoni tkun tinkludi azzjonijiet bħal li l-kumpaniji jintalbu jirrapportaw l-informazzjoni meħtieġa lill-amministrazzjoni tat-taxxa biex tivvaluta jekk għandhomx preżenza sostanzjali u attività ekonomika reali, iċ-ċaħda ta’ benefiċċji tat-taxxa marbuta mal-eżistenza jew l-użu ta’ kumpaniji fittizji abbużivi, u l-ħolqien ta’ rekwiżiti ġodda ta’ informazzjoni, monitoraġġ u trasparenza fiskali. Il-Kummissjoni biħsiebha wkoll tieħu passi ulterjuri biex tipprevjeni li l-pagamenti tar-royalties u tal-imgħax li joħorġu mill-UE jaħarbu mit-tassazzjoni (l-hekk imsejħa “nontassazzjoni doppja”).
B’mod parallel, il-Kummissjoni se tkompli tuża l-għodod kollha għad-dispożizzjoni tagħha biex tiżgura li l-kumpaniji jħallsu s-sehem ġust tagħhom tat-taxxa, inkluż l-infurzar tar-regoli dwar l-għajnuna mill-Istat. Filwaqt li t-tassazzjoni diretta taqa’ taħt il-kompetenza tal-Istati Membri, l-Istati Membri jridu jeżerċitaw dik il-kompetenza b’mod konsistenti mad-dritt tal-Unjoni, inklużi r-regoli dwar l-għajnuna mill-Istat.
|
Azzjonijiet biex tiġi żgurata tassazzjoni ġusta u effettiva: Azzjoni 1: Preżentazzjoni ta’ proposta leġiżlattiva għall-pubblikazzjoni ta’ rati tat-taxxa effettivi mħallsa minn kumpaniji kbar, abbażi tal-metodoloġija li qed tiġi diskussa fil-Pilastru 2 tan-negozjati tal-OECD (sal-2022) Azzjoni 2: Preżentazzjoni ta’ proposta leġiżlattiva li tistabbilixxi r-regoli tal-Unjoni biex jinnewtralizzaw l-użu ħażin ta’ entitajiet fittizji għal finijiet ta’ taxxa (sar-raba’ trimestru tal-2021) |
3.2 L-iffaċilitar tal-investiment produttiv u l-intraprenditorija
It-tassazzjoni għandha rwol importanti fl-appoġġ tal-intrapriżi biex jinvestu u jikbru billi tinkoraġġixxi u tippermetti deċiżjonijiet ekonomiċi minn intraprendituri li jkunu soċjalment mixtieqa. Din il-parti “abilitanti” tal-politika tat-taxxa hija parti partikolarment importanti mit-tranżizzjonijiet doppji u mill-irkupru ekonomiku mill-pandemija tal-COVID-19.
Minħabba fluss tal-flus aktar limitat, l-SMEs spiss ikunu anqas kapaċi jassorbu jew jiffinanzjaw telf minn kumpaniji akbar. Din hija r-raġuni għaliex ħafna Stati Membri aġixxew malajr matul il-kriżi attwali biex itaffu l-piż immedjat tat-taxxa fuq l-SMEs, pereżempju permezz tad-differiment tal-obbligi tat-taxxa. Madankollu, it-trattament tat-telf fl-Istati Membri għadu differenti ħafna u hemm lok għal titjib fl-ambjent għall-investiment u t-tkabbir. Flimkien ma’ din il-Komunikazzjoni, il-Kummissjoni qed tadotta rakkomandazzjoni lill-Istati Membri dwar it-trattament domestiku tat-telf. Dan se jgħin biex tiġi żgurata kompetizzjoni ġusta bejn il-kumpaniji u jingħata appoġġ aħjar lill-intrapriżi matul l-irkupru. Dan x’aktarx li jkun ta’ benefiċċju partikolari għall-SMEs . Is-servizzi tal-Kummissjoni se jinvestigaw ukoll b’mod aktar ġenerali l-prospett ta’ trattament koordinat ta’ kumpens tat-telf transfruntier biex jiġu indirizzati l-isfidi esperjenzati mill-SMEs u intrapriżi oħra fl-istadji inizjali tal-espansjoni Ewropea tagħhom.
Minħabba l-qafas tat-taxxa attwali li jippermetti tnaqqis fit-taxxa tal-imgħax fuq id-dejn, hemm preġudizzju persistenti favur id-dejn tar-regoli tat-taxxa. Dan ifisser li kumpanija tista’ tnaqqas l-imgħax marbut ma’ finanzjament b’dejn iżda mhux il-kostijiet relatati ma’ finanzjament mill-ekwità, bħall-pagament ta’ dividendi, u b’hekk tinċentivaha tiffinanzja l-investimenti hija stess permezz ta’ dejn aktar milli ekwità. Dan jista’ jikkontribwixxi għal akkumulazzjoni eċċessiva ta’ djun, b’effetti kollaterali negattivi possibbli għall-UE kollha kemm hi, jekk xi pajjiżi jiffaċċjaw mewġiet kbar ta’ insolvenza. Il-predispożizzjoni favur id-dejn tippenalizza wkoll il-finanzjament tal-innovazzjoni permezz tal-ekwità. Din il-kwistjoni saret aktar urġenti, peress li l-istokk tad-dejn tal-kumpaniji żdied b’mod sinifikanti minħabba l-kriżi ekonomika wara l-pandemija tal-COVID-19. Għalhekk, il-Kummissjoni se tagħmel proposta biex tindirizza l-predispożizzjoni favur id-dejn fit-tassazzjoni korporattiva, permezz ta’ sistema ta’ kwoti għall-finanzjament mill-ekwità, u b’hekk tikkontribwixxi għall-ekwitizzazzjoni mill-ġdid tal-kumpaniji finanzjarjament vulnerabbli. Il-proposta se tinkorpora miżuri kontra l-abbuż biex jiġi żgurat li ma tintużax għal skopijiet mhux intenzjonati.
|
Azzjonijiet li jippermettu investiment produttiv u intraprenditorija Azzjoni 3: Adozzjoni ta’ rakkomandazzjoni dwar it-trattament domestiku tat-telf (flimkien ma’ din il-Komunikazzjoni) Azzjoni 4: Issir proposta leġiżlattiva li toħloq Kwota ta’ Tnaqqis ta’ Predispożizzjoni Favur id-Dejn (DEBRA) (sal-ewwel trimestru tal-2022) |
4. Lil hinn mill-ftehim tal-OECD - Ambjent tal-UE dwar it-tassazzjoni tal-intrapriżi għas-Seklu 21
Il-kunsens dwar ir-riforma tar-regoli internazzjonali dwar it-taxxa korporattiva se jikkostitwixxi pass storiku ’l quddiem lejn il-modernizzazzjoni tar-regoli globali dwar it-taxxa fuq l-intrapriżi. Għal raġunijiet tajbin, il-ftehim globali dwar il-Pilastru 1 se japplika l-ewwel biss għal għadd limitat ta’ kumpaniji. Biex soluzzjoni bħal din taħdem globalment, jeħtieġ li tkun amministrabbli għal 139 ġuriżdizzjoni u bejnhom, bi profili ekonomiċi u livelli differenti ta’ kapaċità amministrattiva. Unjoni Ewropea integrata mill-qrib mas-Suq Uniku tagħha, madankollu, tista’ u għandha tmur lil hinn minn dan.
In-nuqqas ta’ sistema komuni ta’ taxxa korporattiva fis-Suq Uniku huwa ta’ xkiel għall-kompetittività. Dan huwa riżultat ta’ distorsjonijiet fid-deċiżjonijiet ta’ investiment u ta’ finanzjament (fejn dawn huma xprunati minn strateġiji ta’ ottimizzazzjoni tat-taxxa aktar milli minn kunsiderazzjonijiet oħra), u kostijiet ogħla tal-konformità għal intrapriżi attivi f’aktar minn Stat Membru wieħed. Dan joħloq żvantaġġ kompetittiv meta mqabbel mas-swieq ta’ pajjiżi terzi.
Għalhekk, il-Kummissjoni se tipproponi qafas ġdid għat-tassazzjoni tal-introjtu għall-intrapriżi fl-Ewropa (L-Intrapriżi fl-Ewropa: Qafas għat-Tassazzjoni tal-Introjtu jew BEFIT). Il-BEFIT se jkun ġabra unika tar-regoli tat-taxxa korporattiva għall-UE, ibbażata fuq il-karatteristiċi ewlenin ta’ bażi komuni għat-taxxa u l-allokazzjoni ta’ profitti bejn l-Istati Membri abbażi ta’ formula (formula tat-tqassim). Se jibni fuq il-progress fid-diskussjonijiet globali, fejn dawn il-kunċetti diġà huma preżenti, permezz tal-użu ta’ formula għar-riallokazzjoni parzjali tal-profitti fil-qafas tal-Pilastru 1, u regoli komuni għall-kalkolu tal-bażi għat-taxxa għall-finijiet tal-applikazzjoni tal-Pilastru 2. Il-BEFIT se jiżgura li l-intrapriżi fis-Suq Uniku jkunu jistgħu joperaw mingħajr ostakli tat-taxxa mhux dovuti. Fl-istess ħin, se jiżgura li l-eżistenza ta’ diskrepanzi bejn is-sistemi tat-taxxa korporattiva fl-UE ma ddgħajjifx il-kapaċità tal-Istati Membri li jżidu d-dħul biex jiffinanzjaw il-prijoritajiet tal-infiq nazzjonali.
Ir-regoli komuni għad-determinazzjoni tal-bażi għat-taxxa korporattiva se jwasslu għal simplifikazzjoni sostanzjali għal gruppi ta’ kumpaniji li joperaw fis-Suq Uniku. Minflok ma jkollu jikkonforma ma’ massimu ta’ 27 sett differenti ta’ regoli tat-taxxa korporattiva, il-grupp se jkun jista’ jiddetermina l-obbligazzjoni tat-taxxa tiegħu f’kull Stat Membru tal-UE skont sett wieħed ta’ regoli. Dan se jwitti t-triq ukoll għal aktar simplifikazzjonijiet amministrattivi, bħall-possibbiltà ta’ dikjarazzjoni tat-taxxa korporattiva unika tal-UE għal grupp.
Din il-proposta l-ġdida se tissostitwixxi l-proposti pendenti għal Bażi Komuni Konsolidata għat-Taxxa Korporattiva (BKKTK) 30 , li se tiġi rtirata.
|
Il-BEFIT se… §... joħloq ġabra komuni tar-regoli għal gruppi ta’ kumpaniji li joperaw fis-Suq Uniku f’aktar minn Stat Membru wieħed, filwaqt li jnaqqas l-ostakli għall-investiment transfruntier; §...inaqqas il-burokrazija u jnaqqas il-kostijiet tal-konformità fis-Suq Uniku, u b’hekk inaqqas il-piż amministrattiv fuq l-awtoritajiet tat-taxxa u l-kontribwenti; §...jiġġieled kontra l-evitar tat-taxxa, jappoġġa l-ħolqien tal-impjiegi, it-tkabbir u l-investiment; §... jipprovdi mod aktar sempliċi u ġust biex jiġu allokati d-drittijiet ta’ tassazzjoni bejn l-Istati Membri; §... jiżgura dħul affidabbli u prevedibbli mit-taxxa korporattiva għall-Istati Membri. |
Il-BEFIT se jikkonsolida l-profitti tal-membri tal-UE ta’ grupp multinazzjonali f’bażi għat-taxxa unika, li mbagħad tiġi allokata lill-Istati Membri bl-użu ta’ formula, li għandha tiġi ntaxxata bir-rati tat-taxxa korporattiva nazzjonali fuq l-introjtu. Il-kunsiderazzjonijiet ewlenin se jinkludu kif jingħata piż xieraq lill-bejgħ skont id-destinazzjoni, biex tiġi riflessa l-importanza tas-suq fejn grupp multinazzjonali tagħmel negozju, kif ukoll kif għandhom jiġu riflessi l-assi (inklużi l-assi intanġibbli) u x-xogħol (persunal u salarji), biex tiġi żgurata distribuzzjoni bilanċjata tad-dħul mit-taxxa korporattiva madwar l-Istati Membri tal-UE bi profili ekonomiċi differenti.
L-użu ta’ formula biex jiġu allokati l-profitti se jneħħi l-ħtieġa għall-applikazzjoni ta’ regoli kumplessi tal-ipprezzar tat-trasferimenti fi ħdan l-UE għall-kumpaniji fil-kamp ta’ applikazzjoni. Tipi differenti ta’ formula tat-tqassim huma diġà użati f’diversi pajjiżi. Pereżempju fl-Istati Uniti, il-Kanada u l-Iżvizzera, tintuża formula biex tiġi kkalkulata l-bażi għat-taxxa fil-livell reġjonali jew subnazzjonali. B’kuntrast ma’ dan, l-ipprezzar tat-trasferimenti jeħtieġ li l-entitajiet jipprezzaw it-tranżazzjonijiet bejn il-membri tal-istess grupp multinazzjonali bl-istess mod li tranżazzjoni komparabbli tiġi pprezzata bejn żewġ entitajiet mhux relatati (“Prinċipju ta’ Distakkament”). L-azzjonijiet tal-BEPS tal-OECD dwar l-Ipprezzar tat-Trasferimenti aġġornaw il-linji gwida internazzjonali iżda madankollu dawn il-prinċipji huma diffiċli biex jiġu applikati u infurzati f’ekonomija moderna li tiddependi fuq assi intanġibbli u mhux kummerċjalizzati. Il-ħidma fuq il-Pilastru 1 uriet interess f’approċċ differenti għall-allokazzjoni tad-drittijiet ta’ tassazzjoni permezz tal-użu tagħha ta’ formula għar-riallokazzjoni ta’ parti żgħira tal-bażi taxxabbli. Il-BEFIT se jibni fuq dan il-pass, u jiżviluppah aktar biex joħloq sistema aktar sempliċi fi ħdan is-Suq Uniku. B’kuntrast mal-Pilastru 1, fejn ir-regoli attwali u r-riallokazzjoni tal-profitt skont formula joperaw b’mod parallel, fil-BEFIT il-formula tat-tqassim tissostitwixxi r-regoli attwali għall-allokazzjoni tal-bażi taxxabbli fis-Duq Uniku għall-kumpaniji fil-kamp ta’ applikazzjoni .
Permezz ta’ taħlita ta’ formula tat-tqassim u ta’ ġabra komuni tar-regoli għall-bażi tat-taxxa, il-BEFIT se jimmarka pass importanti fil-bini ta’ sistema tat-taxxa fuq l-intrapriżi aktar robusta fis-Suq Uniku. Filwaqt li l-prinċipji ta’ bażi komuni tat-taxxa u tal-formula tat-tqassim diġà dehru fil-proposta preċedenti tal-BKKTK, il-proposta l-ġdida se tirrifletti l-bidliet sinifikanti fl-ekonomija u fil-qafas internazzjonali minn Marzu 2011 meta l-BKKTK kienet oriġinarjament proposta. B’mod partikolari, se tibni fuq l-approċċ meħud fil-ftehim globali li jmiss fil-proposti tagħha għad-definizzjoni tal-bażi għat-taxxa. Se jkollha wkoll formula tat-tqassim differenti, li se tirrifletti aħjar ir-realtajiet tal-ekonomija tal-lum u l-iżviluppi globali, b’mod partikolari billi tqis aktar id-diġitalizzazzjoni.
Il-Kummissjoni se taħdem mill-qrib mal-Istati Membri fit-tħejjija ta’ din il-proposta, filwaqt li tqis ukoll il-fehmiet tal-Parlament Ewropew, u f’konsultazzjoni mas-settur tan-negozju u mal-gruppi tas-soċjetà ċivili.
|
Azzjonijiet għal qafas aktar fit-tul dwar it-tassazzjoni tal-intrapriżi Azzjoni 5: Preżentazzjoni ta’ proposta għall-BEFIT (L-Intrapriżi fl-Ewropa: Qafas għat-Tassazzjoni tal-Introjtu), nimxu lejn ġabra komuni ta’ regoli tat-taxxa u li tiġi prevista allokazzjoni aktar ġusta tad-drittijiet tat-tassazzjoni bejn l-Istati Membri (2023) |
5. Konklużjoni
Il-Ftehim globali li jmiss se jimmarka pass ’il quddiem deċiżiv fir-riforma tas-sistema tat-taxxa korporattiva internazzjonali u jindirizza sfidi importanti relatati mal-allokazzjoni tad-drittijiet ta’ tassazzjoni u tassazzjoni minima effettiva fil-livell globali. Fil-livell tal-UE, irridu nibnu fuq dan il-progress u mmexxu ’l quddiem aġenda ambizzjuża simili għat-tassazzjoni tal-intrapriżi li tiżgura tassazzjoni ġusta u effettiva u li tappoġġa l-investiment produttiv u l-intraprenditorija. Il-miżuri mħabbra f’din il-Komunikazzjoni, flimkien mal-ħidma li diġà għaddejja, se jwasslu biex l-UE tkun tista’ tagħmel progress u tissodisfa din il-viżjoni għal qafas tal-UE dwar taxxa fuq l-intrapriżi li jkun adatt biex jilqa’ l-isfidi tas-seklu 21 u mmirat lejn Suq Uniku li jiffunzjona tajjeb.
F’dan il-proġett issa hemm involuti 139 ġuriżdizzjoni madwar id-dinja.
Id-Direttiva tal-Kunsill (UE) 2016/1164 tat-12 ta’ Lulju 2016 li tistabbilixxi regoli kontra l-prattiki ta’ evitar tat-taxxa li jaffettwaw direttament il-funzjonament tas-suq intern, ĠU L 193, 19.7.2016, p. 1.
COM(2019) 640 final.
COM(2020) 102 final.
Ara, pereżempju, COM(2020) 590 final.
Id-Direttiva tal-Kunsill 2003/96/KE tas-27 ta’ Ottubru 2003 li tirriforma l-istruttura tal-Komunità dwar tassazzjoni fuq prodotti ta’ enerġija u elettriku, ĠU L 283, 31.10.2003, p. 51.
L-Artikolu 191(2) tat-TFUE jitlob li jiġu stabbiliti l-esternalitajiet negattivi ta’ attivitajiet li jniġġsu jew attivitajiet oħra li jagħmlu ħsara, filwaqt li l-Istrateġija Annwali għat-Tkabbir Sostenibbli 2021 tinkoraġġixxi lill-Istati Membri jinkludu riformi strutturali fil-Pjanijiet għall-Irkupru u r-Reżiljenza, inklużi “riformi tas-sistema tat-taxxa, pereżempju billi jittrasferixxu l-piż tat-taxxa minn fuq ix-xogħol għal taxxi li joħolqu inqas distorsjoni” (COM(2020) 575).
Biex tappoġġa dan il-proċess, il-Kummissjoni se tadotta rakkomandazzjonijiet dwar kif jistgħu jiġu promossi aktar l-istrumenti u l-inċentivi rilevanti biex jiġi implimentat aħjar il-prinċipju ta’ min iniġġes iħallas u b’hekk tiġi kompluta l-eliminazzjoni gradwali tal-era ta’ “tniġġis bla ħlas”, b’segwitu għar-rapport tal-Qorti Ewropea tal-Awdituri. (COM(2021) 400).
COM(2021) 118 final
COM(2021) 350 final.
COM(2020) 590 final.
L-evażjoni internazzjonali tat-taxxa minn individwi tirriżulta f’telf ta’ dħul mit-taxxa ta’ EUR 46 biljun/sena għall-Istati Membri tal-UE. Ara ECOPA and CASE (2019) Estimating International Tax Evasion by Individuals,Taxation Papers 76. Barra minn hekk, huwa stmat li kull sena jintilfu EUR 35-70 biljun fl-evitar tat-taxxa korporattiva fl-UE. Ara Dover, R., Ferrett, B., Gravino, D., Jones, E., & Merler, S. (2015) Bringing transparency, coordination and convergence to corporate tax policies in the European Union, Servizz tar-Riċerka tal-Parlament Ewropew, PE 558.773; Álvarez-Martínez, M., Barrios, S., d’Andria, D., Gesualdo, M., Nicodème, G., & Pycroft, J. (2018) How Large is the Corporate Tax Base Erosion and Profit Shifting? A General Equilibrium Approach, CEPR Discussion Papers 12637; u Tørsløv, T., Wier, L., & Zucman, G. (2018) The Missing Profits of Nations, NBER Working Paper 24701.
https://ec.europa.eu/taxation_customs/business/economic-analysis-taxation/data-taxation_en
Il-Kummissjoni Ewropea, Annual Review of Taxation – 2021 Edition, se jiġi ppubblikat dalwaqt.
COM(2021) 50 final, 27.1.2021.
Ir-Rapport dwar it-Tixjiħ 2021. Projezzjonijiet ekonomiċi u baġitarji għall-Istati Membri tal-UE (2019-2070). Institutional Paper 148. Mejju 2021.
Bejn l-2012 u l-2020, il-porzjon ta’ taxxa medju fl-UE-27 għal persuna waħda li taqla’ l-paga medja naqas b’aktar minn 2 punti perċentwali.
L-Artikolu 191(2) TFUE.
Il-Ftehim Interistituzzjonali bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar dixxiplina baġitarja, dwar kooperazzjoni f’materji ta’ baġit u dwar ġestjoni finanzjarja tajba, kif ukoll dwar riżorsi proprji ġodda, inkluż pjan direzzjonali lejn l-introduzzjoni ta’ riżorsi proprji ġodda, ĠU L 433I, 22.12.2020, p. 28–46.
Din il-proposta se tkun differenti mill-proposti tal-2018 għal Taxxa fuq is-Servizzi Diġitali (COM(2018) 148 final) u għal Preżenza Diġitali Sinifikanti (COM(2018) 147 final), li se jiġu rtirati.
L-istima tal-kostijiet tal-konformità mar-regoli tat-taxxa għall-kumpaniji l-kbar tammonta għal madwar 2 % tat-taxxi mħallsin, filwaqt li l-istima għall-SMEs hija madwar 30 % tat-taxxi mħallsin.
https://ec.europa.eu/taxation_customs/sites/taxation/files/resources/documents/tax_survey.pdf
Id-Direttiva tal-Kunsill 2011/16/UE tal-15 ta’ Frar 2011 dwar il-kooperazzjoni amministrattiva fil-qasam tat-tassazzjoni, ĠU L 64, 11.3.2011, p. 1.
COM(2020) 312 final.
COM(2020) 313 final.
Li essenzjalment kien jagħmel l-applikazzjoni tal-Pilastru 1 fakultattiva għall-intrapriżi.
https://www.consilium.europa.eu/media/48976/ 250321-vtc-euco-statement-en.pdf (europa.eu)
COM(2011) 714 final.
COM(2020) 313 final.
COM(2016) 685 final u COM(2016) 683 final.