—

l-azzjonijiet skont l-IPA III għandhom jiġu ffinanzjati permezz ta’ approċċ tematiku, sabiex jiġi massimizzat l-impatt tal-assistenza tal-Unjoni, filwaqt li jiġu żgurati l-konsistenza, is-sinerġiji u l-komplementarjetajiet mal-oqsma l-oħra tal-azzjoni esterna tal-Unjoni u mal-politiki u l-programmi rilevanti l-oħra tal-Unjoni;

—

il-koerenza bejn l-assistenza u l-qafas ġenerali tal-politika tat-tkabbir, kif ukoll il-kooperazzjoni bejn il-Kummissjoni u l-Istati Membri sabiex tiġi żgurata l-koerenza u tiġi evitata d-duplikazzjoni bejn l-assistenza pprovduta skont l-IPA III u assistenza oħra;

—

l-assistenza skont dan ir-Regolament hija bbażata kemm fuq approċċ ibbażat fuq il-prestazzjoni kif ukoll fuq prinċipju ta’ sehem ġust: għandha tkun differenzjata fl-ambitu u fl-intensità skont il-prestazzjoni tal-benefiċjarji filwaqt li għandhom jitqiesu l-ħtiġijiet u l-kapaċitajiet ta’ dawk il-benefiċjarji sabiex jiġi evitat livell sproporzjonatament baxx ta’ assistenza meta mqabbel ma’ benefiċjarji oħra;

—

huwa previst li l-ambitu u l-intensità tal-assistenza jistgħu jiġu modulati f’każ ta’ rigressjoni sinifikattiva jew nuqqas ta’ progress persistenti minn benefiċjarju fl-oqsma fundamentali (l-istat tad-dritt u d-drittijiet fundamentali, l-istituzzjonijiet demokratiċi u r-riforma tal-amministrazzjoni pubblika kif ukoll l-iżvilupp ekonomiku u l-kompetittività), inkluż billi l-fondi jitnaqqsu proporzjonalment u jiġu diretti mill-ġdid, b’modi li għandhom jevitaw li jikkompromettu l-appoġġ għat-titjib tad-drittijiet fundamentali, id-demokrazija u l-istat tad-dritt, inkluż l-appoġġ għas-soċjetà ċivili u, fejn xieraq, il-kooperazzjoni mal-awtoritajiet lokali. Fejn ikun reġa’ beda l-progress, l-assistenza tiġi modulata wkoll skont dan biex isservi ta’ appoġġ ulterjuri għal dawk l-isforzi;

—

bord strateġiku speċifiku fil-ġestjoni tal-operazzjonijiet tal-EFSD+ għall-Balkani tal-Punent;

—

tiġi żgurata l-viżibbiltà tal-finanzjament tal-Unjoni mir-riċevituri ta’ tali finanzjament, b’mod partikolari meta jippromwovu u jirrapportaw dwar l-azzjonijiet u r-riżultati tagħhom billi jenfasizzaw l-appoġġ li rċevew mill-Unjoni u l-benefiċċji tiegħu għan-nies b’mod viżibbli fuq il-materjal ta’ komunikazzjoni relatat mal-azzjonijiet appoġġati bis-saħħa ta’ dan ir-Regolament; u billi jipprovdu informazzjoni mmirata koerenti, effettiva u proporzjonata lil udjenzi differenti, inkluż il-media u l-pubbliku, b’mod strateġiku;

—

bilanċ bejn id-dispożizzjonijiet proċedurali tal-Istrument: kien hemm qbil li ser jiġu adottati dokumenti ta’ programmazzjoni permezz ta’ atti ta’ implimentazzjoni u li l-Kummissjoni jkollha s-setgħa tadotta atti delegati biex jissupplimentaw dan ir-Regolament billi jiddefinixxu ċerti objettivi speċifiċi u prijoritajiet tematiċi għall-kooperazzjoni, kif ukoll biex jemendaw il-prijoritajiet tematiċi għall-assistenza u l-lista ta’ indikaturi ewlenin tal-prestazzjoni fl-Annessi II, III u IV;

—

id-definizzjoni tal-indikaturi ewlenin tal-prestazzjoni li għandhom jintużaw biex jgħinu fil-kejl tal-progress u, fejn xieraq, tal-prontezza mill-benefiċjarji elenkati fl-Anness I u l-kontribut tal-Unjoni għall-kisba tal-objettivi speċifiċi tal-IPA III (l-Anness IV);

—

l-applikazzjoni retroattiva tar-Regolament mill-1 ta’ Jannar 2021 (il-premessa (36)).