Opinjoni tal-Kumitat Ekonomiku u Soċjali Ewropew dwar il-“Proposta għal Regolament tal-Parlament Ewropew u tal-Kunsill li jemenda r-Regolament (UE) 2015/760 fir-rigward tal-firxa tal-assi u l-investimenti eliġibbli, ir-rekwiżiti tal-kompożizzjoni tal-portafoll u tad-diversifikazzjoni, ir-regoli dwar is-self ta’ flus kontanti u regoli oħrajn tal-fondi u fir-rigward tar-rekwiżiti li jappartjenu għall-awtorizzazzjoni, għall-politiki ta’ investiment u għall-kundizzjonijiet operattivi tal-fondi Ewropej tal-investiment fuq terminu twil”

(COM(2021) 722 final — 2021/0377 (COD))

(2022/C 290/11)

Relatur:

Pierre BOLLON

Konsultazzjoni	Parlament Ewropew, 14.2.2022 Kunsill tal-Unjoni Ewropea, 22.3.2022
Bażi legali	Artikoli 114 u 304 tat-Trattat dwar il-Funzjonament tal-Unjoni Ewropea
Sezzjoni kompetenti	Sezzjoni għall-Unjoni Ekonomika u Monetarja u l-Koeżjoni Ekonomika u Soċjali
Adottata fis-sezzjoni	3.3.2022
Adottata fil-plenarja	23.3.2022
Sessjoni Plenarja Nru	568
Riżultat tal-votazzjoni (favur/kontra/astensjonijiet)	111/1/0

1. Konklużjonjiet u rakkomandazzjonijiet

1.1

Il-KESE jappoġġja bil-qawwa r-rieżami bbilanċjat propost tar-Regolament dwar il-Fondi Ewropej tal-Investiment fuq Terminu Twil, peress li l-format preċedenti tiegħu ma kisibx l-għanijiet b’intenzjoni tajba tiegħu. Bidla fir-riżorsi finanzjarji u fl-iffrankar lejn investimenti fit-tul hija partikolarment meħtieġa għall-irkupru soċjalment inklużiv wara l-COVID-19 u għat-tranżizzjonijiet diġitali u klimatiċi doppji. F’din il-perspettiva, rieżami fil-fond tar-Regolament dwar il-Fondi Ewropej tal-Investiment fuq Terminu Twil huwa tabilħaqq essenzjali. Konsegwentement, il-KESE jittama li l-proċess ta’ adozzjoni ma jwassalx għaż-żieda ta’ rekwiżiti regolatorji ġodda li jdgħajfu l-ispinta lejn aktar sempliċità kif ġustament propost mill-Kummissjoni.

1.2

“Il-Fondi Ewropej tal-Investiment fuq terminu twil 2” hija proposta f’waqtha u rilevanti li tista’ tagħti spinta sostanzjali lit-tkabbir ekonomiku u l-ħolqien tal-impjiegi fl-UE. Il-Fondi Ewropej tal-Investiment fuq terminu twil huma fondi fit-tul li jibbenefikaw minn “passaport Ewropew”. Dawn se jaqdu rwol sinifikanti fil-finanzjament tat-tranżizzjonijiet klimatiċi u diġitali doppji, fil-bini tal-infrastruttura tat-trasport u dik soċjali, u fil-finanzjament ta’ proġetti ta’ akkomodazzjoni, kif ukoll, naturalment, fil-finanzjament ta’ kumpaniji Ewropej żgħar u ta’ daqs medju, speċjalment dawk innovattivi u negozji ġodda.

1.3

Sfortunatament, f’dan l-istadju mhix disponibbli stima preċiża biżżejjed tan-nuqqas globali f’dak li jirrigwarda l-finanzjament fit-tul. Fil-livell Ewropew għad hemm bżonn ta’ ħidma għal stima aħjar, iżda l-ħtieġa ta’ finanzjament hija bla dubju kbira, li tammonta għal diversi triljuni ta’ euro.

1.4

B’mod kruċjali, il-KESE jenfasizza bil-qawwa l-importanza li tiġi ffinanzjata t-tranżizzjoni essenzjali lejn ekonomija Ewropea ħafna inqas intensiva fl-użu tal-karbonju (u fl-aħħar mill-aħħar newtrali f’termini ta’ emissjonijiet tal-karbonju), u tal-“istrateġija għall-finanzjament tat-tranżizzjoni lejn ekonomija sostenibbli”. Jeħtieġ ukoll li tiżdied l-aċċessibbiltà għad-data ambjentali, soċjali u ta’ governanza (ESG) u dik finanzjarja, b’mod partikolari permezz tal-proġett Punt ta’ Aċċess Uniku Ewropew (ESAP) u, b’mod partikolari, ir-regolamentazzjoni u s-superviżjoni meħtieġa tal-fornituri tad-data.

1.5

Il-proposta “Fondi Ewropej tal-Investiment fuq Terminu Twil 2” tal-Kummissjoni Ewropea fiha titjib immirat fl-investimenti eliġibbli. Dan se jkabbar l-univers tal-investiment tal-Fondi Ewropej tal-Investiment fuq Terminu Twil u jappoġġja t-tkabbir ekonomiku u l-kompetittività. Dan se jippermettilhom ukoll li jkopru ambitu ġeografiku akbar ta’ investimenti fl-Ewropa.

1.6

Il-KESE jappoġġja l-adattament ta’ ostakli dissważivi preċedenti għall-aċċess tal-Fondi Ewropej tal-Investiment fuq Terminu Twil għall-investituri fil-livell tal-konsumatur, li bħalissa ma jistgħux jibbenefikaw mir-redditi fuq l-investimenti fit-tul. Il-Fondi Ewropej tal-Investiment fuq Terminu Twil għalhekk jikkomplementaw is-suċċess attwali tal-fondi tal-Impriżi ta’ Investiment Kollettiv f’Titoli Trasferibbli (UCITS). Dan huwa pass importanti, aktar u aktar peress li l-protezzjoni tal-investitur hija msaħħa mir-rabta qawwija l-ġdida mal-“valutazzjonijiet tal-adattament” obbligatorji skont id-Direttiva dwar is-Swieq fl-Istrumenti Finanzjarji (MiFID II) u l-kjarifika tar-regoli dwar il-kunflitti ta’ interess. Il-KESE jtenni bil-qawwa wkoll l-appelli numerużi preċedenti tiegħu biex l-edukazzjoni tal-investituri tiġi żviluppata fl-Ewropa kollha.

1.7

Il-KESE jkun miftuħ għal Fondi Ewropej tal-Investiment fuq Terminu Twil “parzjalment miftuħin” (flimkien ma’ dawk tat-tip magħluqin) – jiġifieri Fondi Ewropej tal-Investiment fuq Terminu Twil li jistgħu jkunu kbar u diversifikati u li jistgħu jippermettu tifdijiet (u sottoskrizzjonijiet) wara perjodu ta’ notifika, sakemm naturalment dawn il-possibbiltajiet jiġu stabbiliti b’mod ċar fid-dokumentazzjoni mogħtija lill-klijenti u ssorveljati mill-awtorità nazzjonali kompetenti. Bħala għajnuna biex isiru aktar “likwidi”, dawn il-Fondi Ewropej tal-Investiment fuq Terminu Twil għandhom ikunu jistgħu jinvestu sa 50 % (u possibbilment aktar minn hekk) f’assi diversifikati li jirrispettaw ir-regoli tal-UCITS. Żieda ulterjuri fil-livell possibbli ta’ investiment f’fondi oħrajn tgħin ukoll b’mod sinifikanti.

1.8

1.9

Huwa importanti li tiġi ffaċilitata l-eliġibbiltà tal-Fondi Ewropej tal-Investiment fuq Terminu Twil għall-kontijiet tat-tfaddil, għall-kuntratti tal-assigurazzjoni tal-ħajja marbuta ma’ unitajiet ta’ investiment, għall-iskemi tat-tfaddil tal-impjegati u, naturalment, għall-mekkaniżmi tal-irtirar bħall-prodott tal-pensjoni personali pan-Ewropew. Fl-istess ħin, il-proposta attwali għal riformulazzjoni tad-Direttiva Solvenza 2 u r-reviżjoni futura tad-Direttiva dwar l-attivitajiet u s-superviżjoni ta’ istituzzjonijiet għall-provvista ta’ rtirar okkupazzjonali (IORP) jistgħu jinkludu inċentiv għall-impriżi tal-assigurazzjoni u tal-pensjonijiet biex jinvestu fil-Fondi Ewropej tal-Investiment fuq Terminu Twil.

1.10

Fl-aħħar iżda mhux l-inqas, l-investituri Ewropej fil-Fondi Ewropej tal-Investiment fuq Terminu Twil għandhom ikunu jistgħu jibbenefikaw mill-“aħjar trattament tat-taxxa” fuq it-tfaddil tagħhom mogħti mill-pajjiż ta’ residenza tagħhom. L-investituri fit-tul għandhom jibbenefikaw minn regoli tat-taxxa stabbli u ta’ inċentiv fl-Ewropa kollha.

2. Sommarju tal-proposta tal-Kummissjoni

2.1

Ir-“Regolament Fond Ewropew tal-Investiment fuq Terminu Twil” huwa qafas Ewropew għal fondi ta’ investiment alternattiv (AIFs) li jinvestu f’investimenti fuq terminu twil, bħal proġetti ta’ infrastruttura soċjali u tat-trasport, proprjetà immobbli u intrapriżi żgħar u ta’ daqs medju (SMEs). Ir-Regolament Fond Ewropew tal-Investiment fuq Terminu Twil jistabbilixxi regoli uniformi dwar l-awtorizzazzjoni, il-politiki tal-investiment u l-kundizzjonijiet tal-operat u l-kummerċjalizzazzjoni tal-Fondi Ewropej tal-Investiment fuq Terminu Twil.

2.2

Il-qafas regolatorju tal-Fond Ewropew tal-Investiment fuq Terminu Twil huwa maħsub biex jiffaċilita l-investimenti fuq terminu twil f’dawn it-tipi ta’ assi minn investituri istituzzjonali u fil-livell tal-konsumatur u biex jipprovdi sors alternattiv ta’ finanzjament mhux bankarju lill-ekonomija reali.

2.3

Dan ir-rieżami għandu l-għan li jżid l-użu tal-Fondi Ewropej tal-Investiment fuq Terminu Twil fl-UE kollha għall-benefiċċju tal-ekonomija u l-investituri Ewropej. Dan, min-naħa tiegħu, jappoġġja l-iżvilupp kontinwu tal-Unjoni tas-Swieq Kapitali, li għandha wkoll l-għan li tiffaċilita l-aċċess tal-kumpaniji tal-UE għal finanzjament fit-tul aktar stabbli, sostenibbli u divers.

2.4

Mill-adozzjoni tal-qafas legali oriġinali tal-Fond Ewropew tal-Investiment fuq Terminu Twil f’April 2015, ġew awtorizzati biss 67 Fond Ewropew tal-Investiment fuq Terminu Twil (minn Frar 2022), b’ammont relattivament żgħir ta’ assi netti mmaniġġjati (stmati għal madwar EUR 2,4 biljun fl-2021). Dawn il-Fondi Ewropej tal-Investiment fuq Terminu Twil awtorizzati huma domiċiljati f’erba’ Stati Membri biss (il-Lussemburgu, Franza, l-Italja u Spanja), u l-Istati Membri l-oħrajn ma kellhom l-ebda Fond Ewropew tal-Investiment fuq Terminu Twil domestiku.

2.5

Filwaqt li l-Fond Ewropew tal-Investiment fuq Terminu Twil għadu qafas relattivament ġdid, id-data disponibbli tas-suq tindika li l-iżvilupp tas-suq ma żdiedx kif mistenni.

2.6

Abbażi tal-evalwazzjoni tal-funzjonament tal-qafas legali tal-Fond Ewropew tal-Investiment fuq Terminu Twil u r-rispons tal-partijiet ikkonċernati, il-vantaġġi tal-Fondi Ewropej tal-Investiment fuq Terminu Twil jitnaqqsu mir-regoli restrittivi tal-fond u l-ostakli għall-aċċess għall-investituri fil-livell tal-konsumatur, li l-effett ikkombinat tagħhom inaqqas l-utilità, l-effettività u l-attraenza tal-qafas legali tal-Fond Ewropew tal-Investiment fuq Terminu Twil għall-maniġers u l-investituri. Dawn ir-restrizzjonijiet huma l-fatturi ewlenin għan-nuqqas tal-Fondi Ewropej tal-Investiment fuq Terminu Twil li jespandu b’mod sinifikanti u jilħqu l-potenzjal sħiħ tagħhom biex jidderieġu l-investimenti lejn l-ekonomija reali.

2.7

F’dan ir-rigward, ir-rieżami tal-qafas regolatorju tal-Fond Ewropew tal-Investiment fuq Terminu Twil ifittex li jaċċellera l-aċċettazzjoni u jtejjeb l-attraenza tal-Fondi Ewropej tal-Investiment fuq Terminu Twil billi jagħmel bidliet immirati fir-regoli tal-fond. Dan ifisser b’mod speċjali t-twessigħ tal-kamp ta’ applikazzjoni tal-assi u l-investimenti eliġibbli, li jippermettu regoli aktar flessibbli dwar il-fondi li jinkludu l-faċilitazzjoni ta’ strateġiji “fond ta’ fond”, u t-tnaqqis tal-ostakli mhux ġustifikati li jipprevjenu lill-investituri fil-livell tal-konsumatur milli jaċċessaw il-Fondi Ewropej tal-Investiment fuq Terminu Twil, b’mod partikolari r-rekwiżit ta’ investiment inizjali ta’ EUR 10 000 u r-rekwiżit ta’ limitu massimu aggregat ta’ 10 % għal dawk l-investituri fil-livell tal-konsumatur li l-portafolli finanzjarji tagħhom huma inqas minn EUR 500 000.

2.8

Barra minn hekk, il-proposta għandha l-għan li tagħmel l-istruttura tal-Fond Ewropew tal-Investiment fuq Terminu Twil aktar attraenti billi tillaxka regoli magħżula tal-fondi għall-Fondi Ewropej tal-Investiment fuq Terminu Twil distribwiti biss lill-investituri professjonali. Ir-rieżami tal-qafas legali tal-Fond Ewropew tal-Investiment fuq Terminu Twil jintroduċi wkoll mekkaniżmu fakultattiv ta’ tieqa ta’ likwidità biex jipprovdi aktar likwidità lill-investituri tal-Fond Ewropew tal-Investiment fuq Terminu Twil u lill-investituri sottoskritti ġodda mingħajr il-ħtieġa ta’ prelevament mill-kapital tal-Fondi Ewropej tal-Investiment fuq Terminu Twil. Il-proposta tfittex ukoll li tiżgura li jkun hemm fis-seħħ salvagwardji xierqa għall-protezzjoni tal-investituri.

3. Kummenti ġenerali

3.1

Il-KESE jappoġġja bil-qawwa r-rieżami bbilanċjat propost tar-Regolament dwar il-Fondi Ewropej tal-Investiment fuq Terminu Twil, peress li l-format preċedenti tiegħu ma kisibx l-għanijiet b’intenzjoni tajba tiegħu. Dan ir-rieżami li ntlaqa’ tajjeb, diġà tfaħħar fl-Opinjoni tal-KESE dwar l-Unjoni tas-Swieq Kapitali (1) bħala l-pedament tal-pjan ta’ azzjoni l-ġdid tal-Unjoni tas-Swieq Kapitali.

3.2

Tabilħaqq, lil hinn mit-titjib fl-effiċjenza u s-sikurezza tas-swieq kapitali Ewropej, bidla fir-riżorsi finanzjarji u fl-iffrankar fir-rigward tal-investimenti fit-tul hija partikolarment meħtieġa għall-irkupru soċjalment inklużiv “wara l-COVID-19” u għat-tranżizzjonijiet diġitali u klimatiċi doppji. F’din il-perspettiva, rieżami fil-fond tar-Regolament dwar il-Fondi Ewropej tal-Investiment fuq Terminu Twil huwa tabilħaqq essenzjali. Konsegwentement, il-KESE jittama li l-proċess ta’ adozzjoni ma jwassalx għaż-żieda ta’ rekwiżiti regolatorji ġodda li jdgħajfu l-ispinta lejn aktar sempliċità kif ġustament propost mill-Kummissjoni.

3.3

Il-Fondi Ewropej tal-Investiment fuq Terminu Twil huma fondi fit-tul li jistgħu jiġu kkummerċjalizzati u sottoskritti bejn il-fruntieri madwar l-Unjoni, peress li għandhom “passaport Ewropew”. Dawn se jkunu jistgħu jaqdu rwol sinifikanti fil-bini tal-infrastruttura (bħat-trasport u l-enerġija), fl-aġġornament tal-akkomodazzjoni, fil-finanzjament tar-riċerka u l-iżvilupp u, naturalment, fil-finanzjament ta’ kumpaniji Ewropej żgħar u ta’ daqs medju u negozji ġodda (investimenti li ġeneralment ma jibbenefikawx mil-likwidità pprovduta minn elenkar fis-swieq finanzjarji), u b’hekk jippromovu l-ħolqien tal-impjiegi.

3.4

B’mod kruċjali, il-KESE jenfasizza bil-qawwa wkoll l-importanza li tiġi ffinanzjata t-tranżizzjoni essenzjali lejn ekonomija Ewropea inklużiva u ħafna inqas intensiva fl-użu tal-karbonju (u fl-aħħar mill-aħħar newtrali f’termini ta’ emissjonijiet tal-karbonju), u tal-“Istrateġija Ewropea għall-finanzjament tat-tranżizzjoni lejn ekonomija sostenibbli”, b’mod partikolari d-Direttiva dwar ir-Rappurtar Korporattiv dwar is-Sostenibbiltà u t-“tassonomija” soċjali prevista. Jeħtieġ ukoll li tiżdied l-aċċessibbiltà għad-data ESG u dik finanzjarja, b’mod partikolari permezz tal-proġett Punt ta’ Aċċess Uniku Ewropew (ESAP) u, b’mod partikolari, ir-regolamentazzjoni u s-superviżjoni meħtieġa tal-fornituri tad-data. Il-ħidma fuq it-tikketti ESG għandha titħaffef ukoll biex tipprovdi gwida lill-investituri tal-Fond Ewropew tal-Investiment fuq Terminu Twil.

3.5

Il-Proposta “Fondi Ewropej tal-Investiment fuq Terminu Twil 2” tal-Kummissjoni Ewropea, li hija kkalibrata sew u proporzjonata, bir-raġun fiha titjib immirat fl-investimenti eliġibbli li se jippermetti appoġġ aktar b’saħħtu għat-tkabbir u l-kompetittività permezz tal-Fondi Ewropej tal-Investiment fuq Terminu Twil. Għalhekk, għadd sinifikanti minnhom se jkunu aktar diversifikati, peress li l-univers tal-investiment tal-Fondi Ewropej tal-Investiment fuq Terminu Twil se jitwessa’, u b’hekk se jiżdied l-għadd ta’ opportunitajiet. Oħrajn se jkunu aktar ikkonċentrati, b’enfasi fuq investimenti ewlenin. Il-bidliet se jippermettu wkoll lill-Fondi Ewropej tal-Investiment fuq Terminu Twil ikopru ambitu ġeografiku akbar ta’ investimenti fl-Ewropa.

3.6

Il-KESE jappoġġja l-adattament ta’ ostakli dissważivi preċedenti għall-aċċess tal-Fondi Ewropej tal-Investiment fuq Terminu Twil għall-investituri fil-livell tal-konsumatur. Minħabba l-ammont kbir ta’ ffrankar li llum ma jistax jibbenefika mir-redditi fuq investimenti fit-tul, dan huwa pass importanti, speċjalment f’kuntest ta’ rati tal-imgħax baxxi (għalkemm f’xi każijiet qed jiżdiedu) u ta’ pressjonijiet inflazzjonarji. F’termini ta’ protezzjoni tal-investituri, l-għoti ta’ spettru usa’ ta’ assi eliġibbli u strateġiji ta’ investiment huwa ta’ importanza kbira u se jkun aktar effiċjenti mir-restrizzjonijiet dettaljati mill-2015, li kellhom l-iżvantaġġ li jillimitaw serjament l-offerta ta’ fondi lill-investituri, kemm istituzzjonali kif ukoll fil-livell tal-konsumatur. Il-KESE jilqa’ r-rabta qawwija l-ġdida mal-“valutazzjonijiet tal-adattament” obbligatorji skont id-Direttiva MiFID II kif ukoll il-kjarifika tar-regoli dwar il-kunflitti ta’ interess. Il-KESE jtenni bil-qawwa wkoll l-appelli numerużi preċedenti tiegħu biex l-edukazzjoni tal-investituri tiġi żviluppata fl-Ewropa kollha.

3.7

Tip wieħed ta’ Fondi Ewropej tal-Investiment fuq Terminu Twil għandu karatteristiċi li jagħmluhom simili għal fondi “magħluqin”. Għal dawn, il-mod klassiku biex jipprovdu likwidità lill-investituri huwa, kif propost, “mekkaniżmi ta’ tieqa” fakultattivi permezz ta’ mekkaniżmi ta’ negozjar sekondarji, iżda dawn il-mekkaniżmi ħafna drabi huma diffiċli jew saħansitra impossibbli biex ikunu implimentati, b’mod partikolari meta l-“ġeneraturi tas-suq” huma skarsi (riskju enfasizzat fl-Opinjoni tal-KESE tas-16 ta’ Ottubru 2013 li sfortunatament sar reali).

3.8

Din hija r-raġuni għaliex, flimkien ma’ dawn il-“Fondi Ewropej tal-Investiment fuq Terminu Twil magħluqin”, il-KESE jinsab miftuħ ukoll għal Fondi Ewropej tal-Investiment fuq Terminu Twil “parzjalment miftuħin” (2), jiġifieri Fondi Ewropej tal-Investiment fuq Terminu Twil li jistgħu jkunu kbar u diversifikati u jistgħu perjodikament (pereżempju darbtejn fis-sena) jippermettu tifdijiet (kif ukoll sottoskrizzjonijiet) wara perjodu ta’ avviż (pereżempju ta’ 90 jum), sakemm naturalment dawn il-possibbiltajiet jiġu stabbiliti b’mod ċar mill-maniġer tal-Fond Ewropew tal-Investiment fuq Terminu Twil fid-dokumentazzjoni mogħtija lill-klijenti u ssorveljata mill-awtorità nazzjonali kompetenti. Il-proposta tal-Kummissjoni li tipprovdi ċarezza addizzjonali fl-Istandards Tekniċi Regolatorji fir-rigward tal-perċentwal ta’ rtirar tat-tifdija hija l-ewwel pass pożittiv fid-direzzjoni t-tajba li għandu jiġi segwit minn oħrajn. Biex jgħinuhom isiru aktar “likwidi”, il-Fondi Ewropej tal-Investiment fuq Terminu Twil parzjalment miftuħin għandhom ikunu jistgħu jinvestu sa 50 % (u possibbilment aktar minn hekk) f’assi diversifikati li jirrispettaw ir-regoli tal-UCITS. Iż-żidiet ulterjuri fil-livell possibbli ta’ investiment f’fondi oħrajn jgħinu wkoll b’mod sinifikanti.

3.9

Il-KESE jixtieq jara li l-fondi miġbura permezz tal-Fondi Ewropej tal-Investiment fuq Terminu Twil essenzjalment jiġu investiti fl-ekonomija tal-UE, fil-kuntest ta’ kompetizzjoni ħarxa fil-livell globali u tal-ħtieġa li jiġu ffinanzjati t-tranżizzjonijiet doppji. Sfortunatament, f’dan l-istadju mhix disponibbli stima preċiża biżżejjed tan-nuqqas f’dak li jirrigwarda l-finanzjament fit-tul. Għalhekk għad hemm bżonn ta’ ħidma fil-livell Ewropew għal stima aħjar, iżda l-ħtieġa ta’ finanzjament hija bla dubju kbira, li tammonta għal diversi triljuni ta’ euro (perċentwal baxx b’ċifra waħda tal-prodott domestiku gross (PDG) tal-UE) jekk wieħed iżid il-ħtiġijiet għall-klima u s-sostenibbiltà, għall-ekwità u l-SMEs innovattivi u n-negozji ġodda, għall-infrastruttura tat-trasport u, b’mod importanti, għall-infrastruttura soċjali.

3.10

Peress li l-Fondi Ewropej tal-Investiment fuq Terminu Twil huma meħtieġa jsegwu strettament ir-regoli stabbiliti f’Regolament Ewropew, azzjoni pożittiva addizzjonali tkun li l-Kummissjoni Ewropea tivvaluta l-mertu u l-fattibbiltà li tippermettilhom jużaw kodiċi ISIN “.eu”, li jtejjeb id-disponibbiltà u l-viżibbiltà tagħhom bejn il-fruntieri. Il-KESE jilqa’, f’dan ir-rigward, it-tisħiħ tar-reġistru tal-Fondi Ewropej tal-Investiment fuq Terminu Twil propost mill-Kummissjoni. Il-KESE jappella għall-istabbiliment u l-infurzar ta’ regoli ċari għall-UE kollha, taħt rwol ta’ tmexxija effettiv għall-ESMA u b’kooperazzjoni dovuta minn regolaturi nazzjonali attivi. Ir-regoli jridu, b’mod partikolari, jiżguraw li l-maniġers tal-Fond Ewropew tal-Investiment fuq Terminu Twil jinkorporaw għodod adegwati għall-ġestjoni tal-likwidità fil-fondi li jniedu u jipprovdu wkoll informazzjoni ċara u preċiża dwar it-tariffi u r-riskji, kif diġà pprovdut mir-Regolament dwar dokumenti bl-informazzjoni ewlenija għal prodotti aggregati ta’ investiment għall-konsumaturi bbażati fuq l-assigurazzjoni (PRIIPs) u l-leġiżlazzjonijiet tal-MiFID.

3.11

Huwa importanti li tiġi ffaċilitata l-eliġibbiltà tal-Fondi Ewropej tal-Investiment fuq Terminu Twil għall-kontijiet tat-tfaddil, għall-kuntratti tal-assigurazzjoni tal-ħajja marbuta ma’ unitajiet ta’ investiment, għall-iskemi tat-tfaddil tal-impjegati u, naturalment, għall-mekkaniżmi tal-irtirar bħall-prodott tal-pensjoni personali pan-Ewropew. Fl-istess ħin, il-proposta attwali għal riformulazzjoni tad-Direttiva Solvenza 2 u r-reviżjoni futura tad-Direttiva IORP jistgħu jinkludu inċentiv għall-impriżi tal-assigurazzjoni u tal-pensjonijiet biex jinvestu fil-Fondi Ewropej tal-Investiment fuq Terminu Twil.

3.12

Fl-aħħar iżda mhux l-inqas, l-investituri Ewropej fil-Fondi Ewropej tal-Investiment fuq Terminu Twil għandhom ikunu jistgħu jibbenefikaw mill-“aħjar trattament tat-taxxa” fuq it-tfaddil tagħhom mogħti mill-pajjiż ta’ residenza tagħhom. Sfortunatament, f’ħafna pajjiżi Ewropej, ħafna drabi t-tfaddil fuq medda qasira ta’ żmien f’assi likwidi huwa fil-preżent iffavorit mil-lat fiskali, u jibgħat messaġġ ħażin lill-investituri li jkun aħjar li “jippreferu l-likwidità” anke meta jistgħu jkunu aktar orjentati fit-tul. Fi kwalunkwe każ, l-investituri fit-tul għandhom jibbenefikaw minn regoli tat-taxxa stabbli u li jservu ta’ inċentiv.

Brussell, it-23 ta’ Marzu 2022.

Christa SCHWENG

Il-President tal-Kumitat Ekonomiku u Soċjali Ewropew

(1) ĠU C 155, 30.4.2021, p. 20.

(2) Kif inhu previst bħalissa fl-iskema li jmiss tal-Fond ta’ Assi fit-Tul (Long Term Asset Fund) fir-Renju Unit. Il-maġġoranza ta’ dawk li wieġbu għar-rapport tal-valutazzjoni tal-impatt tal-Kummissjoni kienu tal-l-istess fehma (ara p. 73).