IL-KUMMISSJONI EWROPEA

Brussell, 24.9.2020

COM(2020) 584 final

2020/0270(NLE)

Proposta għal

DEĊIŻJONI TAL-KUNSILL

dwar il-pożizzjoni li għandha tittieħed f’isem l-Unjoni Ewropea fil-Kumitat ta’ Sħubija stabbilit mill-Ftehim ta’ Sħubija Komprensiv u Msaħħaħ bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u r-Repubblika tal-Armenja, min-naħa l-oħra, fir-rigward tal-emenda tal-lista ta’ individwi biex iservu bħala arbitri fi proċeduri ta’ soluzzjoni tat-tilwim

MEMORANDUM TA’ SPJEGAZZJONI

1.Suġġett tal-proposta

Din il-proposta tikkonċerna d-deċiżjoni li tistabbilixxi l-pożizzjoni li għandha tittieħed f’isem l-Unjoni fil-Kumitat tas-Sħubija stabbilit mill-Ftehim ta’ Sħubija Komprensiv u Msaħħaħ bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u r-Repubblika tal-Armenja, min-naħa l-oħra (“il-Ftehim”), b’rabta mal-adozzjoni prevista ta’ deċiżjoni li temenda l-lista ta’ individwi li jservu bħala arbitri fi proċeduri ta’ soluzzjoni tat-tilwim.

2.Kuntest tal-proposta

2.1.Il-Ftehim

Il-Ftehim għandu l-għan li jespandi l-kooperazzjoni bilaterali wiesgħa f’oqsma ekonomiċi, kummerċjali u politiċi, u fil-politiki settorjali, filwaqt li b’hekk jipprovdi bażi fit-tul għall-iżvilupp ulterjuri tar-relazzjonijiet bejn l-UE u l-Armenja. Billi jsaħħaħ id-djalogu politiku u jtejjeb il-kooperazzjoni f’firxa wiesgħa ta’ oqsma, il-Ftehim iħejji l-pedamenti għal impenn bilaterali aktar effettiv mal-Armenja.

Id-Deċiżjoni tal-Kunsill (UE) 2018/104 tal-20 ta’ Novembru 2017 approvat l-iffirmar u l-applikazzjoni proviżorja tal-Ftehim skont l-Artikolu 385 tal-Ftehim. Il-Ftehim huwa applikat fuq bażi proviżorja mill-1 ta’ Ġunju 2018.

2.2.Il-Kumitat ta’ Sħubija

Il-Kumitat ta’ Sħubija li jiltaqa’ f’konfigurazzjoni speċifika biex jindirizza l-kwistjonijiet kollha marbuta mat-Titolu IV (Kummerċ u Kwistjonijiet relatati mal-Kummerċ) tal-Ftehim huwa speċifikat fl-Artikolu 363(7) tal-Ftehim. Skont l-Artikolu 363(1) u (6) tal-Ftehim, il-Kumitat ta’ Sħubija jassisti lill-Kunsill ta’ Sħubija fit-twettiq tad-dmirijiet u l-funzjonijiet tiegħu. Huwa għandu s-setgħa li jadotta deċiżjonijiet f’dawk l-oqsma li huma soġġetti għad-delega tas-setgħat mogħtija lilu mill-Kunsill ta’ Sħubija u fil-każijiet previsti fil-Ftehim. Dawn id-deċiżjonijiet huma vinkolanti fuq il-Partijiet tal-Ftehim, li għandhom jieħdu l-miżuri xierqa biex jimplimentawhom.

2.3.L-att previst tal-Kumitat ta’ Sħubija

Il-proċedura ta’ arbitraġġ stabbilita fil-Kapitolu 13 tat-Titolu VI tal-Ftehim tistipula li meta l-Partijiet jonqsu milli jsolvu tilwima permezz ta’ konsultazzjonijiet, il-Parti li tkun talbet il-konsultazzjoni tista’ titlob it-twaqqif ta’ bord ta’ arbitraġġ. L-Artikolu 339(1) tal-Ftehim jesiġi li l-Kumitat ta’ Sħubija jistabbilixxi, fuq il-bażi ta’ proposti magħmula mill-Partijiet, lista ta’ mill-inqas 15-il individwu li huma lesti u kapaċi jservu ta’ arbitri. Il-lista għandha tkun magħmula minn tliet sublisti: sublista għal kull Parti u sublista ta’ individwi li ma jkunu ċittadini tal-ebda Parti u li għandhom iservu bħala president tal-bord ta’ arbitraġġ. Kull sublista għandha tinkludi mill-inqas ħames individwi. Il-Kumitat ta’ Sħubija għandu jassigura li l-lista tinżamm dejjem f’dan il-livell.

L-arbitri u l-presidenti proposti mill-Unjoni u mir-Repubblika tal-Armenja jrid ikollhom għarfien espert speċjali fid-dritt, fil-kummerċ internazzjonali u fi kwistjonijiet oħra li jikkonċernaw id-dispożizzjonijiet tat-Titolu VI tal-Ftehim u jissodisfaw ir-rekwiżit ta’ indipendenza kif speċifikat fl-Artikolu 339(2) tal-Ftehim.

Fuq din il-bażi, il-lista ta’ arbitri ġiet stabbilita bid-deċiżjoni adottata mill-Kumitat ta’ Sħubija fil-Konfigurazzjoni tal-Kummerċ fis-17 ta’ Ottubru 2019. Madankollu, wieħed mill-ħames arbitri kandidati mir-Repubblika tal-Armenja ma għadux jissodisfa r-rekwiżit ta’ indipendenza kif speċifikat fl-Artikolu 339(2) tal-Ftehim.

Ir-Repubblika tal-Armenja pproponiet arbitru kandidat ġdid li għandu għarfien espert speċjali fid-dritt, fil-kummerċ internazzjonali u fi kwistjonijiet oħra li jikkonċernaw id-dispożizzjonijiet tat-Titolu VI tal-Ftehim u huwa mistenni li jissodisfa r-rekwiżit ta’ indipendenza kif speċifikat fl-Artikolu 339(2) tal-Ftehim.

Għaldaqstant, l-iskop tal-att previst huwa li jiddefinixxi l-pożizzjoni tal-Unjoni rigward l-adozzjoni mill-Kumitat ta’ Sħubija ta’ deċiżjoni li tiġi emendata l-lista ta’ individwi li huma lesti u kapaċi jservu bħala arbitri fi proċeduri ta’ soluzzjoni tat-tilwim, billi jiġi sostitwit l-individwu fost il-ħames arbitri kandidati mir-Repubblika tal-Armenja li ma għadux jissodisfa l-kundizzjonijiet tal-Artikolu 339(2) tal-Ftehim bil-kandidat ġdid propost mir-Repubblika tal-Armenja.

3.Pożizzjoni li għandha tittieħed f’isem l-Unjoni

Il-pożizzjoni li għandha tiġi adottata f’isem l-Unjoni għandha l-għan li temenda l-lista ta’ individwi li huma lesti u kapaċi jservu bħala arbitri fil-proċeduri ta’ soluzzjoni tat-tilwim.

4.Bażi ġuridika

4.1.Bażi ġuridika proċedurali

4.1.1.Prinċipji

L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jipprevedi deċiżjonijiet li jistabbilixxu “l-pożizzjonijiet li għandhom jiġu adottati f’isem l-Unjoni f’sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim”.

4.1.2.Applikazzjoni għal dan il-każ

Il-Kumitat ta’ Sħubija huwa korp stabbilit permezz tal-Ftehim. Id-deċiżjoni li għandha tiġi adottata mill-Kumitat ta’ Sħubija tkun vinkolanti skont id-dritt internazzjonali f’konformità mal-Artikolu 363(6) tal-Ftehim. L-att previst ma jissupplimentax u ma jemendax il-qafas istituzzjonali tal-Ftehim. Għaldaqstant, il-bażi ġuridika proċedurali għad-deċiżjoni proposta hija l-Artikolu 218(9) TFUE.

4.2.Bażi ġuridika sostantiva

4.2.1.Prinċipji

Il-bażi ġuridika sostantiva għal deċiżjoni skont l-Artikolu 218(9) TFUE tiddependi primarjament mill-objettiv u mill-kontenut tal-att previst li dwaru tittieħed pożizzjoni f’isem l-Unjoni.

4.2.2.Applikazzjoni għal dan il-każ

L-objettiv ewlieni u l-kontenut tal-att previst huma relatati mal-iżgurar tal-implimentazzjoni tal-politika kummerċjali komuni tal-Unjoni.

Għaldaqstant, il-bażi ġuridika sostantiva tad-deċiżjoni proposta hija l-Artikolu 207(3) u l-ewwel subparagrafu tal-Artikolu 207(4).

4.3.Konklużjoni

Jenħtieġ li l-bażi ġuridika tad-deċiżjoni proposta tkun l-Artikolu 207(3) u l-ewwel subparagrafu tal-Artikolu 207(4), flimkien mal-Artikolu 218(9) TFUE.

2020/0270 (NLE)

Proposta għal

DEĊIŻJONI TAL-KUNSILL

dwar il-pożizzjoni li għandha tittieħed f’isem l-Unjoni Ewropea fil-Kumitat ta’ Sħubija stabbilit mill-Ftehim ta’ Sħubija Komprensiv u Msaħħaħ bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u r-Repubblika tal-Armenja, min-naħa l-oħra, fir-rigward tal-emenda tal-lista ta’ individwi biex iservu bħala arbitri fi proċeduri ta’ soluzzjoni tat-tilwim

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-ewwel subparagrafu tal-Artikolu 207(4), flimkien mal-Artikolu 218(9) tiegħu,

Wara li kkunsidra l-proposta tal-Kummissjoni Ewropea,

Billi:

(1)Il-Ftehim ta’ Sħubija Komprensiv u Msaħħaħ bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u r-Repubblika tal-Armenja, min-naħa l-oħra 1 (“il-Ftehim”) ġie ffirmat f’isem l-Unjoni f’konformità mad-Deċiżjoni tal-Kunsill (UE) 2018/104 2 u ġie applikat fuq bażi proviżorja mill-1 ta’ Ġunju 2018.

(2)Skont l-Artikolu 339(1) tal-Ftehim, il-Kumitat ta’ Sħubija stabbilixxa lista ta’ 15-il individwu li huma lesti u kapaċi jservu bħala arbitri (“il-lista ta’ arbitri”) waqt il-laqgħa tiegħu fis-17 ta’ Ottubru 2019.

(3)L-Armenja infurmat lill-Unjoni li wieħed mill-arbitri li kienet ipproponiet ma għadux jissodisfa l-kundizzjonijiet stipulati fl-Artikolu 339(2) tal-Ftehim u, għaldaqstant, jenħtieġ li jiġi sostitwit.

(4)Sabiex jiżgura l-operazzjoni tad-dispożizzjonijiet applikati proviżorjament tal-Ftehim, il-Kumitat ta’ Sħubija jrid jadotta deċiżjoni biex jemenda l-lista ta’ arbitri.

(5)Jixraq li tiġi stabbilita l-pożizzjoni li għandha tittieħed f’isem l-Unjoni fil-Kumitat ta’ Sħubija billi l-abbozz tad-deċiżjoni se jkun vinkolanti għall-Unjoni,

ADOTTA DIN ID-DEĊIŻJONI:

Artikolu 1

Il-pożizzjoni li għandha tittieħed f’isem l-Unjoni fil-Kumitat ta’ Sħubija tal-Ftehim ta’ Sħubija Komprensiv u Msaħħaħ bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u r-Repubblika tal-Armenja, min-naħa l-oħra, fir-rigward tal-emenda tal-lista ta’ individwi li huma lesti u kapaċi jservu bħala arbitri, f’konformità mal-Artikolu 339(1) u (2) tal-Ftehim, għandha tkun ibbażata fuq l-abbozz tad-deċiżjoni tal-Kumitat ta’ Sħubija mehmuż ma’ din id-Deċiżjoni.

Artikolu 2

Din id-Deċiżjoni hija indirizzata lill-Kummissjoni.

Magħmul fi Brussell,

(1)    ĠU L 23, 26.1.2018, p. 4.

(2)    Id-Deċiżjoni tal-Kunsill (UE) 2018/104 tal-20 ta’ Novembru 2017 dwar l-iffirmar, f'isem l-Unjoni, u l-applikazzjoni proviżorja tal-Ftehim ta’ Sħubija Komprensiv u Msaħħaħ bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u r-Repubblika tal-Armenja, min-naħa l-oħra (ĠU L 23, 26.1.2018, p. 1).

IL-KUMMISSJONI EWROPEA

Brussell, 24.9.2020

COM(2020) 584 final

ANNESS

ta’ [...]

Proposta għal Deċiżjoni tal-Kunsill

dwar il-pożizzjoni li għandha tittieħed f’isem l-Unjoni Ewropea fil-Kumitat ta’ Sħubija stabbilit mill-Ftehim ta’ Sħubija Komprensiv u Msaħħaħ bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u r-Repubblika tal-Armenja, min-naħa l-oħra, fir-rigward tal-emenda tal-lista ta’ individwi biex iservu bħala arbitri fi proċeduri ta’ soluzzjoni tat-tilwim

ABBOZZ

DEĊIŻJONI Nru …/… TAL-KUMITAT TA’ SĦUBIJA UE-ARMENJA

ta’...

li temenda l-lista ta’ arbitri msemmija fl-Artikolu 339 tal-Ftehim ta’ Sħubija Komprensiv u Msaħħaħ bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u r-Repubblika tal-Armenja, min-naħa l-oħra

IL-KUMITAT TA’ SĦUBIJA,

Wara li kkunsidra l-Ftehim ta’ Sħubija Komprensiv u Msaħħaħ bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u r-Repubblika tal-Armenja, min-naħa l-oħra (“il-Ftehim”) u b’mod partikolari l-Artikolu 339(1) tiegħu,

Billi:

(1)Il-Kumitat ta’ Sħubija, waqt il-laqgħa tas-17 ta’ Ottubru 2019, stabbilixxa lista ta’ 15-il individwu li huma lesti u kapaċi jservu ta’ arbitri (“il-lista ta’ arbitri”).

(2)F’konformità mal-Artikolu 339(2) tal-Ftehim, jenħtieġ li l-individwi fuq il-lista jkunu indipendenti, iservu fil-kapaċitajiet individwali tagħhom u ma jieħdu struzzjonijiet mingħand ebda organizzazzjoni jew gvern, jew ikunu affiljati mal-gvern ta’ ebda waħda mill-Partijiet, u jenħtieġ li jikkonformaw mal-Kodiċi ta’ Kondotta.

(3)L-Armenja infurmat lill-Unjoni li wieħed mill-arbitri li kienet ipproponiet ma għadux jissodisfa l-kundizzjonijiet stipulati fl-Artikolu 339(2) tal-Ftehim u, għaldaqstant, ipproponiet individwu ieħor li jeħodlu postu.

(4)Sabiex tiġi żgurata l-operazzjoni tad-dispożizzjonijiet applikati proviżorjament tal-Ftehim, jenħtieġ li l-lista ta’ arbitri tiġi emendata mill-Kumitat ta’ Sħubija.

(5)L-Unjoni Ewropea taċċetta li l-individwu propost jissodisfa l-kundizzjonijiet tal-Artikolu 339(2) tal-Ftehim,

ADOTTA DIN ID-DEĊIŻJONI:

Artikolu 1

Il-lista ta’ individwi li huma lesti u kapaċi jservu ta’ arbitri, stabbilita skont l-Artikolu 339(1) tal-Ftehim, hija b’dan sostitwita bil-lista ta’ arbitri stipulata fl-Anness ta’ din id-Deċiżjoni.

Artikolu 2

Din id-Deċiżjoni għandha tidħol fis-seħħ fil-jum tal-adozzjoni tagħha.

Artikolu 3

Din id-Deċiżjoni hija mfassla f’żewġ kopji fil-lingwa Ingliża. Kull Parti tista’ tipprovdi traduzzjonijiet fil-lingwi uffiċjali tagħha.

Magħmul fi …,

Għall-Kumitat ta’ Sħubija
Il-President	Is-Segretarji

ANNESS

LISTA TA’ ARBITRI MSEMMIJA FL-ARTIKOLU 339 TAL-FTEHIM

Arbitri proposti mill-Unjoni Ewropea

1.Claus-Dieter EHLERMANN

2.Giorgio SACERDOTI

3.Jacques BOURGEOIS

4.Pieter Jan KUIJPER

5.Ramon TORRENT

Arbitri proposti mir-Repubblika tal-Armenja

1.Nora SARGSYAN

2.Arman SARGSYAN

3.Arsen TAVADYAN

4.Levon GEVORGYAN

5.Mushegh MANUKYAN

Presidenti

1.William DAVEY (l-Istati Uniti)

2.Helge SELAND (in-Norveġja)

3.Maryse ROBERT (il-Kanada)

4.Christian HÄBERLI (l-Iżvizzera)

5.Merit JANOW (l-Istati Uniti)