MEMORANDUM TA’ SPJEGAZZJONI

1.KUNTEST TAL-PROPOSTA

1.1.Raġunijiet u objettivi tal-proposta

L-Istati Membri tal-UE ġew affettwati serjament mill-kriżi ekonomika li rriżultat mill-pandemija tal-COVID-19. Dan jirrikjedi reazzjoni rapida sabiex jingħata appoġġ lill-parteċipanti fis-swieq kapitali. Fil-Komunikazzjoni tal-Kummissjoni tat-13 ta’ Marzu 2020, intitolata “Rispons ekonomiku kkoordinat għat-tifqigħa tal-COVID-19” 1 , il-Kummissjoni enfasizzat l-importanza li tiġi żgurata l-likwidità tas-settur finanzjarju tal-UE u li tiġi miġġielda r-riċessjoni ta’ theddida permezz ta’ azzjonijiet fil-livelli kollha. Barra minn hekk, fis-27 ta’ Mejju 2020, fil-Komunikazzjoni tagħha intitolata “Il-mument tal-Ewropa: Tiswija u Preparazzjoni għall-Ġenerazzjoni li Jmiss” 2 , il-Kummissjoni ppreżentat strumenti ewlenin li jappoġġjaw il-pjan ta’ rkupru għall-Ewropa, inklużi miżuri li għandhom l-għan li jagħtu spinta lill-ekonomija u jgħinu l-investiment privat. Din il-Komunikazzjoni enfasizzat ukoll li l-likwidità u l-aċċess għall-finanzi se jkunu sfida kontinwa għall-kumpaniji.

L-objettiv tal-bidliet fil-mira għar-reġim tal-prospett kif stabbilit fir-Regolament dwar il-Prospett 3 huwa li jippermetti lill-kumpaniji li jkollhom aċċess għal finanzjament ġdid f’perjodu ta’ żmien qasir biex jgħin fl-irkupru ekonomiku mill-pandemija tal-COVID-19. B’mod partikolari, għandu l-għan li jgħin lill-kumpaniji jżidu l-ekwità sabiex ikunu jistgħu jirripristinaw proporzjonijiet ta’ dejn-ekwità b’mod sostenibbli u jsiru aktar reżiljenti.

Prospett huwa dokument legalment meħtieġ li jippreżenta informazzjoni dwar kumpanija u t-titoli li dawn il-kumpaniji joffru lill-pubbliku jew ifittxu li jdaħħlu fil-kummerċ f’suq regolat. Jenħtieġ li din l-informazzjoni tkun il-bażi li fuqha l-investituri jistgħu jiddeċiedu jekk jinvestux f’titoli maħruġa minn dik il-kumpanija. L-ispiża biex jitfassal prospett tista’ sservi ta’ deterrent għall-emittenti f’diffikultà finanzjarja li jfittxu li jżidu fondi ġodda, b’mod partikolari l-ekwità. Minħabba s-sitwazzjoni li tirriżulta mill-pandemija tal-COVID-19, huwa kruċjali li jiġi żgurat li għall-emittenti diġà elenkati, il-prospett ma jaġixxix bħala ostaklu biex iżid il-kapital fis-swieq pubbliċi.

Din il-proposta għalhekk għandha l-għan li tissimplifika l-proċedura għall-emittenti biex iżidu malajr il-kapital minħabba l-urġenza ekonomika li tirriżulta mill-pandemija tal-COVID-19. Dawn l-emendi għar-Regolament dwar il-Prospett huma relatati mal-ħolqien ta’ tip ġdid ta’ prospett f’forma qasira (il-“prospett ta’ Rkupru tal-UE”) kif ukoll emendi mmirati biex issir pressjoni fuq l-intermedjarji finanzjarji (notifika ta’ supplimenti u ħruġ ta’ nonekwità minn istituzzjonijiet ta’ kreditu).

1.1.1.Il-prospett ta’ Rkupru tal-UE

L-objettiv tal-prospett ta’ Rkupru tal-UE huwa li jipprovdi lill-emittenti elenkati b’regoli ta’ divulgazzjoni ssimplifikati li huma mfassla għall-ħtiġijiet speċifiċi tagħhom f’ambjent ta’ wara l-kriżi filwaqt li jżommu l-prospett bħala għodda rilevanti biex jiġu infurmati l-investituri potenzjali. Fis-sitwazzjoni attwali ta’ wara l-kriżi, huwa kruċjali li jitnaqqsu l-ostakli regolatorji li jistgħu jaffettwaw ir-rikapitalizzazzjoni tal-kumpaniji u jippermettu lill-emittenti biex jisfruttaw is-swieq pubbliċi fi stadju bikri fl-irkupru.

Il-prospett ta’ Rkupru tal-UE għandu l-għan li jiffoka fuq informazzjoni essenzjali u jkun disponibbli biss għall-ħruġ sekondarju ta’ ishma. Sakemm l-emittenti jkollhom ishma diġà ammessi għall-kummerċ f’suq regolat jew f’suq tat-Tkabbir tal-SMEs kontinwament għal mill-inqas l-aħħar 18-il xahar, id-divulgazzjoni mnaqqsa hija mistennija li tnaqqas il-kost tat-tfassil ta’ prospett u li tagħmel id-dokument aktar faċli biex jinftiehem. Barra minn hekk, jenħtieġ li l-prospett ta’ Rkupru tal-UE jagħmel ukoll skrutinju aktar effiċjenti mill-awtoritajiet nazzjonali kompetenti. Sa dak il-punt, ir-reġim propost tal-prospett ta’ Rkupru tal-UE għandu l-ħsieb li jqassar l-approvazzjoni tal-prospett għal ħamest ijiem ta’ xogħol biex jippermetti lill-emittenti biex jaħtfu malajr l-opportunitajiet biex iżidu l-kapital. Dan it-tip ġdid ta’ prospett jibbenefika wkoll mill-passaport uniku tal-UE ta’ prospetti approvati għal offerti transfruntiera u ammissjonijiet għall-kummerċ.

Il-prospett ta’ Rkupru tal-UE għandu l-għan li jkun (i) faċli li jiġi prodott għal kumpaniji li jixtiequ jżidu l-ekwità fis-swieq tal-kapital, (ii) faċli biex jinftiehem mill-investituri li jridu jiffinanzjawhom, u (iii) faċli għall-awtoritajiet nazzjonali kompetenti li jiskrutinizzawh u japprovawh.

Il-prospett ta’ Rkupru tal-UE għandu l-għan li jgħin ir-rikapitalizzazzjoni matul il-fażi ta’ rkupru. Għalhekk huwa maħsub bħala reġim temporanju li jiskadi 18-il xahar wara d-data ta’ applikazzjoni ta’ dan ir-Regolament. Bħala parti mir-reviżjoni tar-Regolament dwar il-Prospett, jenħtieġ li jiġi vvalutat ukoll jekk il-prospett ta’ Rkupru tal-UE jilħaqx l-objettivi tiegħu. Biex tgħin f’din il-valutazzjoni, il-proposta tkun teħtieġ li l-mekkaniżmu tal-ħżin ċentralizzat tal-ESMA li jiġbor id-data tal-prospett mill-awtoritajiet kompetenti nazzjonali jiġbor ukoll data dwar il-prospett ta’ Rkupru tal-UE. Dan l-aġġustament marġinali tal-mekkaniżmu ta’ ħżin ċentralizzat tal-ESMA mhux mistenni li jeħtieġ aktar riżorsi mill-persunal tal-ESMA. Dan ukoll ma għandux iġarrab spejjeż addizzjonali sinifikanti.

1.1.2.Emendi biex tiġi rilaxxata l-pressjoni fuq l-intermedjarji finanzjarji

Supplimenti

Emittent huwa meħtieġ li jippubblika suppliment għall-prospett għal kull fattur ġdid sinifikanti, żball materjali jew ineżattezza materjali marbuta mal-informazzjoni inkluża fi prospett li tista’ taffettwa l-valutazzjoni tat-titoli u li tinħoloq jew tiġi nnotata bejn iż-żmien meta l-prospett jiġi approvat u l-għeluq tal-perjodu tal-offerta jew meta jibda n-negozjar f’suq regolat, skont liema jseħħ l-aħħar. Il-pubblikazzjoni ta’ suppliment tagħti bidu għal dritt ta’ rtirar għall-investituri li għandu jiġi eżerċitat fi żmien jumejn tax-xogħol mill-pubblikazzjoni tas-suppliment. Bħala parti mid-dmir tagħhom li jipproteġu lill-investituri, l-intermedjarji finanzjarji jridu jikkuntattjaw lill-investituri biex jinfurmawhom bil-jum li fih is-suppliment ġie publikat. Tali skadenza, kif ukoll il-kwalifika wiesgħa ta’ “investituri”, ħolqu diffikultajiet għall-intermedjarji finanzjarji.

Biex jiġu indirizzati dawn id-diffikultajiet u jiġu liberati riżorsi għall-intermedjarji finanzjarji, il-proposta tiċċara l-obbligi fuq l-intermedjarji finanzjarji fir-rigward tas-supplimenti. Jenħtieġ li l-intermedjarji finanzjarji jinfurmaw biss lil dawk l-investituri li jkunu xtraw u ssottoskrivew titoli sottoskritti permezz tagħhom dwar il-possibbiltà tal-pubblikazzjoni ta’ suppliment, sakemm ix-xiri jew l-abbonament ikun sar qbil dwaru bejn iż-żmien meta l-prospett ikun ġie approvat u l-għeluq tal-perjodu tal-offerta jew il-ħin meta jkun beda l-kummerċ f’suq regolat, skont liema minnhom tkun seħħet l-aħħar. Wara l-pubblikazzjoni tas-suppliment, l-intermedjarju finanzjarju jrid jikkuntattja biss lil dawk l-investituri li jibbenefikaw minn dritt tal-irtirar. Il-proposta testendi wkoll l-iskadenza għal intermedjarji finanzjarji biex jikkuntattjaw l-investituri b’jum wieħed tax-xogħol mill-pubblikazzjoni tas-suppliment. Biex jinżamm livell għoli ta’ protezzjoni għall-investitur, il-perjodu li matulu jista’ jiġi eżerċitat dritt ta’ rtirar mill-investituri jiġi estiż minn jumejn tax-xogħol għal tliet ijiem tax-xogħol mill-pubblikazzjoni tas-suppliment.

Billi l-emenda mmirata dwar is-supplimenti tiffissa dawn id-diffikultajiet u tillibera r-riżorsi għall-intermedjarji finanzjarji filwaqt li żżomm livell għoli ta’ protezzjoni għall-investituri, tali emendi ma jkunux limitati fiż-żmien.

Titoli ta’ nonekwità maħruġa minn istituzzjonijiet ta’ kreditu

Offerta ta’ titoli ta’ nonekwità maħruġa b’mod kontinwu jew ripetut minn istituzzjoni ta’ kreditu, taħt ċerti kundizzjonijiet, mhijiex soġġetta għall-obbligu tal-pubblikazzjoni ta’ prospett jekk il-korrispettiv totali jkun inqas minn EUR 75 miljun għal kull istituzzjoni ta’ kreditu fuq perjodu ta’ 12-il xahar. L-istituzzjonijiet ta’ kreditu kienu attivi fl-irkupru biex jappoġġaw kumpaniji li kienu jeħtieġu finanzjament u huma mistennija li jkunu pilastru fundamentali tal-irkupru. Sabiex tgħin lill-istituzzjonijiet ta’ kreditu billi tagħmilha aktar faċli għalihom li jkollhom aktar finanzjament u li tagħtihom spazju biex jappoġġaw lill-klijenti tagħhom fl-ekonomija reali, il-Kummissjoni tipproponi żieda mmirata tal-limitu massimu minn EUR 75 miljun għal EUR 150 miljun. Hija għandha l-għan li tappoġġa l-finanzjament tal-istituzzjonijiet ta’ kreditu fil-fażi ta’ rkupru billi żżid il-livell tal-limitu massimu tal-eżenzjoni tal-prospett għal ċertu tip ta’ offerti ta’ titoli. Peress li din il-miżura hija marbuta direttament mal-fażi ta’ rkupru mill-pandemija tal-Covid-19, din għandha tkun disponibbli għal perjodu ta’ żmien limitat ta’ 18-il xahar.

1.2.Konsistenza mad-dispożizzjonijiet eżistenti fil-qasam ta’ politika

Filwaqt li tistabbilixxi miżuri straordinarji biex itaffu l-impatt tal-pandemija tal-COVID-19, din il-proposta tibqa’ konformi mal-għanijiet ġenerali tar-Regolament dwar il-Prospett biex trawwem flussi ta’ fondi permezz tas-swieq kapitali, tiżgura l-protezzjoni tal-investituri, u tixpruna l-konverġenza superviżorja fl-UE kollha. Din il-proposta tikkumplimenta wkoll l-obbligi ta’ rapportar stabbiliti fid-Direttiva dwar it-Trasparenza 4 , għal swieq regolati, ir-Regolament Delegat tal-Kummissjoni (UE) Nru 2017/565 5 , għas-swieq tat-Tkabbir tal-SMEs, u r-Regolament dwar l-Abbuż tas-Suq 6 għaż-żewġ ċentri tan-negozjar.

1.3.Konsistenza ma’ politiki oħra tal-Unjoni

Din il-proposta leġiżlattiva dwar l-emendi għar-Regolament dwar il-Prospett hija parti minn sett ta’ miżuri li jiffaċilitaw l-irkupru ekonomiku wara l-pandemija tal-COVID-19, li tinkludi wkoll proposta leġiżlattiva li temenda l-MiFID II 7 u proposta leġiżlattiva li temenda l-qafas dwar it-titolizzazzjoni, inklużi r-Regolament dwar it-Titolizzazzjoni 8 u r-Regolament dwar ir-Rekwiżiti ta’ Kapital 9 .

Din il-proposta leġiżlattiva għandha wkoll l-għan li tikkomplementa l-objettivi tal-Unjoni tas-Swieq Kapitali biex tiddiversifika s-sorsi ta’ finanzjament ibbażati fuq is-suq għall-kumpaniji. Billi tagħmilha aktar faċli għall-kumpaniji elenkati fl-UE li joħorġu l-ishma, din l-inizjattiva se tikkontribwixxi biex tiffaċilita l-ġbir tal-kapital mill-kumpaniji. F’dan ir-rigward, din il-proposta tkun konformi mar-rakkomandazzjoni tal-Forum ta’ Livell Għoli dwar l-Unjoni tas-Swieq Kapitali 10 ppubblikat fl-10 ta’ Ġunju 2020 li enfasizza l-ħtieġa li jitnaqqsu r-regoli ta’ elenkar, u dan jirreferi wkoll għar-Regolament dwar il-Prospett. Bħala parti mill-miżuri biex jittaffa l-impatt tal-pandemija tal-COVID-19 fuq l-ekonomija reali u fuq is-swieq finanzjarji, din l-inizjattiva għandha wkoll l-għan li ttaffi l-ispejjeż regolatorji għall-emittenti elenkati kemm fis-swieq regolati kif ukoll fis-swieq tat-Tkabbir tal-SMEs. B’mod partikolari, il-flessibbiltà mogħtija lill-emittenti tas-swieq tat-Tkabbir tal-SMEs tikkapitalizza aktar fuq l-objettivi tar-Regolament (UE) 2019/2115 tal-Parlament Ewropew u tal-Kunsill 11 li ġie adottat dan l-aħħar, li jistabbilixxi miżuri li għandhom l-għan li jippromwovu l-użu ta’ ċentru tan-negozjar bħal dan. Barra minn hekk, din l-inizjattiva trid tkun konsistenti ma’ kwalunkwe proposta addizzjonali li l-Kummissjoni għandha l-għan li tiżviluppa f’oqsma ta’ politika differenti biex ittaffi l-impatt tal-pandemija tal-COVID-19 fis-swieq kapitali, inklużi l-istrumenti ewlenin li jappoġġaw l-irkupru ppreżentat fil-Komunikazzjoni tal-Kummissjoni intitolata “Il-mument tal-Ewropa: Tiswija u Tħejjija għall-Ġenerazzjoni li Jmiss” tas-27 ta’ Mejju 2020

2.BAŻI ĠURIDIKA, SUSSIDJARJETÀ U PROPORZJONALITÀ

2.1.Bażi ġuridika

Il-bażi ġuridika tar-Regolament dwar il-Prospett hija l-Artikolu 114 tat-Trattat dwar il-Funzjonament tal-Unjoni Ewropea (TFUE) li jikkonferixxi lill-istituzzjonijiet Ewropej il-kompetenza li jistabbilixxu dispożizzjonijiet xierqa li għandhom bħala l-objettiv tagħhom l-istabbiliment u l-funzjonament tas-suq uniku. Dawk ir-Regolamenti jistgħu jiġu emendati biss, inkluż billi jnaqqsu l-kamp ta’ applikazzjoni tagħhom fuq bażi temporanja, mil-leġiżlatur tal-Unjoni, f’dan il-każ abbażi tal-Artikolu 114 tat-Trattat.

2.2.Sussidjarjetà

Skont l-Artikolu 4 tat-TFUE, l-azzjoni tal-UE għall-ikkompletar tas-suq intern trid tiġi vvalutata fid-dawl tal-prinċipju tas-sussidjarjetà stabbilit fl-Artikolu 5(3) tat-Trattat dwar l-Unjoni Ewropea. Skont il-prinċipju tas-sussidjarjetà, azzjoni fil-livell tal-UE għandha titwettaq biss meta l-objettivi tal-azzjoni proposta ma jkunux jistgħu jinkisbu biżżejjed mill-Istati Membri waħedhom u għalhekk tkun meħtieġa azzjoni fil-livell ta’ UE.

Ir-rekwiżiti ta’ divulgazzjoni f’każ ta’ offerti ta’ titoli jew ammissjoni għall-kummerċ f’suq regolat jirriżultaw mill-applikazzjoni tar-Regolament dwar il-Prospett. Dan ir-Regolamenti Ewropew għandu saħħa legali vinkolanti diretta fl-Istati Membri kollha. Dawn ma jħallu kważi l-ebda flessibbiltà għall-Istati Membri biex jadattaw ir-regoli għall-kundizzjonijiet lokali. Il-problemi li jirriżultaw minn dawn id-dispożizzjonijiet jistgħu jiġu indirizzati effettivament biss permezz ta’ emendi leġiżlattivi fil-livell Ewropew 12 . L-alternattivi possibbli, jiġifieri azzjoni mhux leġiżlattiva fil-livell tal-Unjoni ma setgħux jilħqu b’mod suffiċjenti u effettiv l-objettiv stabbilit, peress li ma setgħux jemendaw id-dispożizzjonijiet tar-Regolament.

Prospett armonizzat tal-UE huwa għodda essenzjali għall-integrazzjoni tas-swieq kapitali madwar l-Unjoni. Ladarba awtorità nazzjonali kompetenti tapprova prospett, l-emittent jista’ jitlob passaport biex juża dan il-prospett fi Stat Membru ieħor tal-UE. Ma jkunux meħtieġa aktar approvazzjonijiet jew proċeduri amministrattivi relatati mal-prospett f’dan l-Istat Membru “ospitanti”. Dan il-passaport jopera fuq is-suppożizzjoni li l-kontenut minimu tal-prospett huwa armonizzat fil-livell tal-Unjoni mir-regoli tal-prospett applikabbli. Minħabba li l-passaport huwa għalhekk ta’ natura Ewropea, kwalunkwe titjib jista’ jiġi indirizzat biss fil-livell tal-UE. L-alternattivi possibbli, bħall-azzjoni fil-livell tal-Istati Membri, joħolqu ostaklu għall-kummerċ u ma jistgħux jilħqu b’mod suffiċjenti u effettiv l-objettivi li joħolqu l-bażi armonizzata għall- “passaportar” tal-prospetti.

L-emendi proposti għar-Regolament dwar il-Prospett jagħtu sinjal ċar madwar l-Unjoni li r-reġim tal-prospett jista’ jadatta f’ċirkostanzi eċċezzjonali. It-tnaqqis ta’ piżijiet immirati u identifikati fir-Regolament dwar il-Prospett kif ukoll li l-prospett isir aktar aċċessibbli għall-emittenti li l-ishma tagħhom huma diġà ammessi għall-kummerċ f’suq regolat jew f’suq tat-tkabbir tal-SMEs jista’ jwassal biex jinġemgħu pools ta’ kapital pan-Ewropej disponibbli għal dawk l-emittenti. Dan jinvolvi t-tfassil ta’ reġim ta’ prospett distint li l-kontenut u l-format tiegħu huwa adattat kemm għal emittenti kif ukoll għal investituri taħt kondizzjonijiet stretti. Dawn l-objettivi ma jistgħux jinkisbu mill-Istati Membri waħedhom minħabba li dan iwassal għal kundizzjonijiet inqas ekwi għall-emittenti u għall-investituri u joħloq arbitraġġ regolatorju u ostakoli għall-kummerċ transfruntier. Dawn l-objettivi jistgħu jinkisbu aħjar fil-livell tal-Unjoni.

2.3.Proporzjonalità

Din il-proposta tressaq biss emendi tekniċi għar-Regolament dwar il-Prospett sabiex tindirizza malajr ir-riperkussjonijiet ekonomiċi tal-pandemija tal-COVID-19. Il-miżuri proposti sabiex itaffu r-rekwiżiti tal-prospett jirrispettaw il-prinċipju tal-proporzjonalità. Dawn huma adegwati biex jintlaħqu l-objettivi u ma jmorrux lil hinn minn dak li huwa meħtieġ u, għal uħud mill-miżuri, huma limitati fiż-żmien.

Emittenti

Il-proposta ttaffi r-rekwiżit ta’ żvelar tal-prospett għall-emittenti f’konformità mal-prinċipju tal-proporzjonalità. Sakemm l-ishma tagħhom ikunu diġà ġew ammessi għall-kummerċ f’suq regolat jew f’suq tat-Tkabbir tal-SMEs b’mod kontinwu għal mill-inqas l-aħħar 18-il xahar, l-emittenti li jixtiequ jżidu l-kapital se jibbenefikaw minn regoli ta’ divulgazzjoni mtaffa fil-prospett ta’ Rkupru tal-UE. Dan ir-reġim ta’ divulgazzjoni mtaffa jirriżulta fi tnaqqis fl-ispejjeż ta’ konformità peress li l-prospett ta’ Rkupru tal-UE jkun ħafna iqsar u għalhekk inqas għali biex jiġi prodott. Barra minn hekk, dawn l-emittenti jibbenefikaw minn approvazzjonijiet ta’ prospetti aktar rapidi li jippermettulhom jaħtfu l-opportunitajiet ta’ finanzjament b’mod aktar effettiv. Sabiex ma jmurx lil hinn minn dak li huwa meħtieġ, il-prospett ta’ Rkupru tal-UE ser ikun limitat fiż-żmien u għalhekk huwa propost bħala reġim temporanju li jiskadi 18-il xahar wara d-data ta’ applikazzjoni ta’ dan ir-Regolament.

Investituri

Il-prospett ta’ Rkupru tal-UE propost huwa wkoll konformi mal-prinċipju tal-proporzjonalità fir-rigward tal-investituri potenzjali. Il-prospett ta’ Rkupru tal-UE jkun aktar faċli biex jinqara b’numru mnaqqas ta’ paġni tiegħu u jekk jiffoka fuq informazzjoni essenzjali filwaqt li, fl-istess ħin, jimmira l-użu tiegħu għas-sitwazzjoni speċifika fejn l-emittent ikollu rekord ta’ riżultati u għalhekk diġà jkun hemm informazzjoni ppubblikata fis-suq.

Intermedjarji finanzjarji

L-intermedjarji finanzjarji jibbenefikaw minn emendi mmirati li jiċċaraw ir-rekwiżiti supplimentari tagħhom u jgħinuhom jegħlbu d-diffikultajiet li ltaqgħu magħhom biex jilħqu b’mod effettiv lill-investituri meta jiġi ppubblikat suppliment filwaqt li jinżamm livell għoli ta’ protezzjoni għall-investitur. Peress li l-emendi mmirati dwar is-supplimenti jirnexxielhom jegħlbu d-diffikultajiet, tali emendi ma jkunux limitati fiż-żmien.

L-istituzzjonijiet ta’ kreditu, li kienu attivi fl-irkupru biex jappoġġaw il-kumpaniji, jibbenefikaw ukoll minn tnaqqis immirat bil-proposta biex jiżdied il-livell limitu massimu tal-eżenzjoni tal-prospett minn EUR 75 miljun għal EUR 150 miljun għal offerti ta’ titoli mingħajr ekwità maħruġa b’mod kontinwu jew ripetut. Billi din il-miżura għandha l-għan li tgħin lill-istituzzjonijiet ta’ kreditu jkunu pilastru fundamentali tal-fażi ta’ rkupru, se tkun limitata fiż-żmien għal 18-il xahar.

Awtoritajiet nazzjonali kompetenti

Jenħtieġ li l-awtoritajiet nazzjonali kompetenti jibbenefikaw ukoll mis-simplifikazzjonijiet proposti tal-prospett tal-Irkupru tal-UE: b’inqas informazzjoni biex tiġi żvelata u skrutinizzata fil-prospett ta’ Rkupru tal-UE, l-ammont ta’ xogħol tagħhom jonqos u l-proċess ta’ approvazzjoni jkun aktar faċli.

2.4.Għażla tal-istrument

L-emendi leġiżlattivi proposti għandhom l-għan b’mod partikolari li jnaqqsu l-piż amministrattiv u l-ispejjeż ta’ konformità li jħabbtu wiċċhom magħhom l-emittenti u li jirriżultaw mill-applikazzjoni tar-Regolament dwar il-Prospett. Għal dan il-għan, il-miżuri leġiżlattivi se jemendaw id-dispożizzjonijiet attwali tar-Regolament dwar il-Prospett. Il-bażi legali għar-Regolament dwar il-Prospett hija l-Artikolu 114(1) TFUE. Kwalunkwe regolament emendatorju għalhekk għandu l-istess bażi ġuridika.

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

3.1.Valutazzjoni tal-impatt

Minħabba l-urġenza tal-miżuri li għandhom jittieħdu biex jgħinu l-irkupru wara l-kriżi fis-swieq finanzjarji u l-ekonomija reali li tirriżulta mill-pandemija tal-COVID-19, il-valutazzjoni tal-impatt ġiet sostitwita minn analiżi tal-ispejjeż imqabbla mal-benefiċċji inkluża fid-Dokument ta’ Ħidma tal-Persunal li jappoġġa l-Pakkett għall-Irkupru tas-Swieq Kapitali.

Ir-reġim ta’ żvelar issimplifikat tal-prospett ta’ Rkupru tal-UE għandu l-għan li jnaqqas b’mod sinifikanti l-ispejjeż ta’ konformità għall-emittenti u jiffoka fuq informazzjoni essenzjali għall-investituri. Jenħtieġ ukoll li jnaqqas l-ammont ta’ xogħol tal-awtoritajiet nazzjonali kompetenti peress li inqas informazzjoni jkollha tiġi skrutinizzata. Fl-istess ħin, il-proċess ta’ approvazzjoni jkun aktar mgħaġġel. L-intermedjarji finanzjarji jibbenefikaw ukoll mill-emendi mmirati dwar is-supplimenti u ż-żieda tal-livell limitu tal-prospett ta’ eżenzjoni għall-ħruġ ta’ titoli mhux ta’ ekwità.

3.2.Drittijiet fundamentali

Il-protezzjoni tad-data personali (l-Artikolu 8), il-libertà ta’ intrapriża (l-Art. 16) u l-protezzjoni tal-konsumatur (l-Art. 38) tal-Karta tad-Drittijiet Fundamentali tal-UE huma relevanti għal dak li jirrigwarda d-dispożizzjonijiet stipulati sa ċertu punt f’din il-proposta. Il-limitazzjonijiet fuq dawn id-drittijiet u l-libertajiet huma permessi skont l-Artikolu 52 tal-Karta tad-Drittijiet Fundamentali tal-UE. Fil-każ tal-leġiżlazzjoni relatata mal-prospett, l-objettiv ta’ interess ġenerali li jiġġustifika ċerti limitazzjonijiet tad-drittijiet fundamentali huwa l-objettiv li tiġi żgurata l-integrità tas-suq. Fir-rigward tal-protezzjoni tad-data personali, l-iżvelar ta’ ċerta informazzjoni fil-prospett huwa meħtieġ biex jiġi żgurat li l-investituri jkunu jistgħu jwettqu d-diliġenza dovuta tagħhom.

4.IMPLIKAZZJONIJIET BAĠITARJI

L-inizjattiva mhijiex mistennija li jkollha impatt fuq il-baġit tal-UE.

5.ELEMENTI OĦRAJN

5.1.Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar

Se jitwettaq monitoraġġ tal-impatt tar-Regolament il-ġdid f’kooperazzjoni mal-ESMA u mal-awtoritajiet nazzjonali kompetenti abbażi tar-rapporti annwali dwar il-prospetti approvati fl-Unjoni li l-ESMA għandha s-setgħa tipproduċi kull sena. Dan ikun jeħtieġ li l-mekkaniżmu tal-ħżin ċentralizzat tal-ESMA li jiġbor id-data tal-prospett mill-awtoritajiet kompetenti nazzjonali jiġbor ukoll data dwar il-prospett ta’ Rkupru tal-UE.

Il-prospett ta’ Rkupru tal-UE se jiġi vvalutat. B’mod partikolari, il-parametri ewlenin għall-kejl tal-kisba tal-objettivi ddikjarati tal-prospett ta’ Rkupru tal-UE se jkunu:

(a)in-numru ta’ prospetti ta’ Rkupru tal-UE approvati u analiżi tal-evoluzzjoni ta’ dan in-numru;

(b)il-kost tat-tħejjija u li jkun hemm prospett ta’ Rkupru tal-UE approvat meta mqabbel mal-ispejjeż attwali għal prospett ta’ ħruġ ta’ titoli sekondarju flimkien ma’ indikazzjoni tal-iffrankar finanzjarju globali miksub.

Din il-lista ta’ indikaturi mhijiex eżawrjenti u tista’ titwessa' sabiex takkomoda l-monitoraġġ ta’ impatti addizzjonali.

5.2.Spjegazzjoni fid-dettall tad-dispożizzjonijiet speċifiċi tal-proposta

L-emendi għar-Regolament dwar il-Prospett se jkollhom l-għan li joħolqu l-prospett ta’ Rkupru tal-UE bħala tip ġdid ta’ prospett kif ukoll emendi mmirati għall-intermedjarji finanzjarji.

L-Artikolu 1 ta’ din il-proposta jittratta l-emendi għar-Regolament dwar il-Prospett.

L-Artikolu 1(1) ta’ din il-proposta jittratta t-titoli mhux ta’ ekwità maħruġa minn istituzzjonijiet ta’ kreditu b’mod kontinwu jew ripetut (l-Artikolu 1(4)(j) tar-Regolament dwar il-Prospett).

Offerta ta’ titoli ta’ nonekwità maħruġa b’mod kontinwu jew ripetut minn istituzzjoni ta’ kreditu, taħt ċerti kundizzjonijiet, mhijiex soġġetta għall-obbligu tal-pubblikazzjoni ta’ prospett jekk il-korrispettiv totali jkun inqas minn EUR 75 miljun għal kull istituzzjoni ta’ kreditu kkalkulat fuq perjodu ta’ 12-il xahar. Barra minn hekk, ir-reġim attwali jipprovdi li t-titoli m’għandhomx ikunu subordinati, konvertibbli jew skambjabbli u ma għandhomx jagħtu d-dritt ta’ sottoskrizzjoni għal akkwist ta’ tipi oħra ta’ titoli u mhumiex marbuta ma’ strumenti derivattivi. L-istituzzjonijiet ta’ kreditu kienu attivi fl-irkupru biex jappoġġaw kumpaniji li kienu jeħtieġu finanzjament u huma mistennija li jkunu pilastru fundamentali tal-fażi ta’ rkupru. Sabiex tgħin lill-istituzzjonijiet ta’ kreditu billi tagħmilha aktar faċli għalihom li jkollhom aktar finanzjament u li tagħtihom spazju biex jappoġġaw lill-klijenti tagħhom fl-ekonomija reali, qed tiġi proposta żieda mmirata tal-limitu massimu minn EUR 75 miljun għal EUR 150 miljun. B’din l-emenda mmirata, l-istituzzjonijiet ta’ kreditu jibbenefikaw minn tnaqqis definit b’mod strett li jgħinhom joffru titoli mingħajr ekwità mingħajr ma jippubblikaw prospett fil-fażi ta’ rkupru wara l-kriżi li tirriżulta mill-pandemija tal-COVID-19. Peress li din il-miżura hija limitata għall-fażi ta’ rkupru, din tkun għalhekk disponibbli għal perjodu ta’ żmien limitat ta’ 18-il xahar.

L-Artikoli 1(2) u 1(3) ta’ din il-proposta jittrattaw aġġustamenti tekniċi dwar it-test ta’ materjalità (l-Artikolu 6 tar-Regolament dwar il-Prospett) u s-sommarju (l-Artikolu 7 tar-Regolament dwar il-Prospett) fir-rigward tar-reġim tal-prospett ta’ Rkupru tal-UE stabbilit fl-Artikolu 1(4) ta’ din il-proposta.

L-Artikolu 1(4) ta’ din il-proposta joħloq reġim ġdid għall-prospett ta’ Rkupru tal-UE (l-Artikolu 14a tar-Regolament dwar il-Prospett).

Ambitu tal-prospett ta’ Rkupru tal-UE

Skont l-Artikolu 1(4) ta’ din il-proposta, il-prospett ta’ Rkupru tal-UE jkun disponibbli biss għal emittenti li jkollhom ishma diġà ammessi f’suq regolat jew f’Suq tat-Tkabbir tal-SMEs għal mill-inqas 18-il xahar. L-emittenti jenħtieġ li jkunu żvelaw l-informazzjoni regolata lill-pubbliku skont id-Direttiva 2004/109/KE, meta applikabbli, ir-Regolament (UE) Nru 594/2014 u, meta applikabbli, l-informazzjoni msemmija fir-Regolament Delegat tal-Kummissjoni (UE) Nru 2017/565. Il-prospett ta’ Rkupru tal-UE ma jkunx adattat għal offerti pubbliċi inizjali meta l-emittenti potenzjali ma jkollhomx rekord ta’ riżultati fis-swieq finanzjarji. Biex jitnaqqas il-proporzjon ta’ dejn-ekwità għal kumpaniji li għandhom dejn għoli minħabba l-pandemija tal-COVID-19, il-prospett f’forma qasira jista’ jintuża biss għal ħruġ ta’ ishma.

Kontenut u approvazzjoni tal-prospett ta’ Rkupru tal-UE

Skont l-Artikolu 1(4) ta’ din il-proposta, il-prospett ta’ Rkupru tal-UE jiffoka fuq informazzjoni essenzjali. Bħala eċċezzjoni għall-Artikolu 6 tar-Regolament dwar il-Prospett, l-entrati ewlenin ġew identifikati bħala elementi li għandhom jiġu divulgati mill-emittenti u huma elenkati fl-Anness Va l-ġdid għar-Regolament dwar il-Prospett. Il-prospett ta’ Rkupru tal-UE se jitqassar għal massimu ta’ 30 paġna. Madankollu, bħala miżura ta’ bbilanċjar, se tkun permessa l-inkorporazzjoni b’referenza ta’ informazzjoni diġà disponibbli fis-suq kif definit fl-Artikolu 19 tar-Regolament dwar il-Prospett u li l-informazzjoni mhux se titqies fid-daqs massimu msemmi hawn fuq ta’ 30 paġna. Ikun disponibbli wkoll sommarju qasir ta’ żewġ paġni.

Diġà teżisti proċedura ta’ approvazzjoni rapida fir-Regolament dwar il-Prospett. Abbażi ta’ dan, il-prospett ta’ Rkupru tal-UE se jibbenefika wkoll minn approvazzjoni rapida bħal din ta’ mhux aktar minn ħamest ijiem ta’ xogħol.

L-Artikoli 1(5), 1(6), u 1(10) ta’ din il-proposta jittrattaw rispettivament ma’ aġġustament tekniku fil-perjodu ta’ żmien għall-iskrutinju u l-approvazzjoni tal-prospett (l-Artikolu 20 tar-Regolament dwar il-Prospett), il-mekkaniżmu ta’ ħżin (l-Artikolu 21 tar-Regolament dwar il-Prospett) u l-lista ta’ oġġetti li għandhom jiġu divulgati (l-Anness Va l-ġdid tar-Regolament dwar il-Prospett) fir-rigward tar-reġim tal-prospett ta’ Rkupru tal-UE stabbilit fl-Artikolu 1(4) ta’ din il-proposta.

Skont l-Artikoli 1(8) u 1 (9) ta’ din il-proposta, jenħtieġ li r-reġim tal-prospett ta’ Rkupru tal-UE jiskadi wara perjodu ta’ 18-il xahar ta’ applikazzjoni (l-Artikolu 47a tar-Regolament dwar il-Prospett). Il-valutazzjoni dwar jekk il-Prospett ta’ Irkupru tal-UE jilħaqx l-għanijiet segwiti minn dan ir-Regolament jenħtieġ li tkun parti mir-rieżami tar-Regolament dwar il-Prospett (l-Artikolu 48 tar-Regolament dwar il-Prospett).

L-Artikolu 1(7) ta’ din il-proposta jittratta s-supplimenti (l-Artikolu 23 tar-Regolament dwar il-Prospett).

Skont ir-reġim attwali, l-emittenti huma meħtieġa jippubblikaw suppliment għall-prospett għal kull fattur ġdid sinifikanti relatat mal-informazzjoni inkluża fi prospett li jista’ jaffettwa l-valutazzjoni tat-titoli u li jinħoloq jew jiġi nnotat bejn iż-żmien meta l-prospett jiġi approvat u l-għeluq tal-perjodu tal-offerta jew il-ħin meta jibda l-kummerċ f’suq regolat, skont liema jseħħ l-aħħar. Il-pubblikazzjoni ta’ suppliment tagħti bidu għal dritt ta’ rtirar għall-investituri li għandu jiġi eżerċitat fi żmien jumejn ta’ xogħol mill-pubblikazzjoni tas-suppliment. Bħala parti mid-dmir tagħhom li jipproteġu lill-investituri, l-intermedjarji finanzjarji jridu jikkuntattjaw lill-investituri biex jinfurmawhom li s-suppliment ġie publikat. Tali skadenza, kif ukoll il-kwalifika wiesgħa ta’ “investituri”, ħolqu diffikultajiet għall-intermedjarji finanzjarji.

Biex jiġu indirizzati dawn id-diffikultajiet u jiġu liberati riżorsi għall-intermedjarji finanzjarji, il-proposta attwali tistabbilixxi emendi mmirati. L-ewwel emenda tikkonċerna l-ambitu. Din tiċċara li l-intermedjarji finanzjarji jridu biss jikkuntattjaw u jinfurmaw lill-investituri li ssottoskrivew u xtraw titoli permezz tagħhom bejn iż-żmien meta l-prospett jiġi approvat u l-għeluq tal-perjodu tal-offerta jew il-ħin meta jibda l-kummerċ f’suq regolat, skont liema minn dawn iseħħ l-aħħar.

It-tieni nett, il-proposta testendi wkoll l-iskadenza għal intermedjarji finanzjarji biex jikkuntattjaw lill-investituri li ssottoskrivew u xtraw titoli permezz tagħhom u li jibbenefikaw minn dritt ta’ ħruġ sa mhux aktar tard minn jum wieħed tax-xogħol mill-pubblikazzjoni tas-suppliment. Biex jinżamm livell għoli ta’ protezzjoni għall-investitur, il-perjodu li matulu jista’ jiġi eżerċitat dritt ta’ rtirar mill-investituri jiġi estiż minn jumejn tax-xogħol għal tliet ijiem tax-xogħol mill-pubblikazzjoni tas-suppliment.

Billi l-emendi mmirati dwar is-supplimenti tiffissa dawn id-diffikultajiet u tillibera r-riżorsi għall-intermedjarji finanzjarji filwaqt li żżomm livell għoli ta’ protezzjoni għall-investituri, tali emendi ma jkunux limitati fiż-żmien.

L-Artikolu 2 ta’ din il-proposta jittratta d-dħul fis-seħħ tiegħu.

2020/0155 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

li jemenda r-Regolament (UE) 2017/1129 fir-rigward tal-prospett ta’ Rkupru tal-UE u aġġustamenti mmirati għall-intermedjarji finanzjarji biex jgħinu l-irkupru mill-pandemija tal-COVID-19

(Test b’rilevanza għaż-ŻEE)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 114 tiegħu,

Wara li kkunsidraw il-proposta tal-Kummissjoni Ewropea,

Wara li l-abbozz tal-att leġiżlattiv intbagħat lill-parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew,

Filwaqt li jaġixxu skont il-proċedura leġiżlattiva ordinarja,

Billi:

(1)Il-pandemija tal-COVID-19 qed taffettwa b’mod sever lin-nies, lill-kumpaniji, lis-sistemi tas-saħħa u lill-ekonomiji tal-Istati Membri. Fil-Komunikazzjoni tagħha lill-Parlament Ewropew, lill-Kunsill Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni tas-27 ta’ Marzu 2020 bl-isem “Il-mument tal-Ewropa: It-Tiswija u t-Tħejjija għall-Ġenerazzjoni li Jmiss” 13 , il-Kummissjoni saħqet li l-likwidità u l-aċċess għall-finanzjament se jkunu sfida kontinwa fix-xhur li ġejjin. Għalhekk huwa kruċjali li jiġi appoġġat l-irkupru mix-xokk ekonomiku sever ikkawżat mill-pandemija tal-COVID-19 bl-introduzzjoni ta’ emendi mmirati għal biċċiet eżistenti ta’ leġiżlazzjoni finanzjarja. Dan il-pakkett ta’ miżuri huwa adottat taħt it-tikketta “Pakkett għall-Irkupru tas-Swieq tal-Kapital”.

(2)Ir-Regolament (UE) 2017/1129 tal-Parlament Ewropew u tal-Kunsill 14 jistabbilixxi rekwiżiti għat-tfassil, l-approvazzjoni u d-distribuzzjoni tal-prospett li għandu jiġi ppubblikat meta titoli jiġu offruti lill-pubbliku jew jiġu ammessi għall-kummerċ f’suq regolat fl-Unjoni. Bħala parti mill-miżuri biex l-emittenti jiġu megħjuna jirkupraw mix-xokk ekonomiku li jirriżulta mill-pandemija tal-COVID-19, huma meħtieġa emendi mmirati għar-reġim tal-prospett. Jenħtieġ li tali emendi jippermettu lill-emittenti u lill-intermedjarji finanzjarji biex inaqqsu l-ispejjeż u jeħilsu r-riżorsi għall-fażi ta’ rkupru immedjatament wara l-kriżi.

(3)L-istituzzjonijiet ta’ kreditu kienu attivi fl-irkupru biex jappoġġaw kumpaniji li kienu jeħtieġu finanzjament u huma mistennija li jkunu pilastru fundamentali tal-irkupru. Ir-Regolament (UE) 2017/2019 jintitola lill-istituzzjonijiet ta’ kreditu għal eżenzjoni mill-obbligu li jippubblikaw prospett f’każ ta’ offerta ta’ ċerti titoli mingħajr ekwità maħruġa b’mod kontinwu jew ripetut sa ammont aggregat ta’ EUR 75 miljun f’perjodu ta’ 12-il xahar. Jenħtieġ li dak il-livell limitu tal-eżenzjoni jiżdied għal perjodu limitat ta’ żmien sabiex jitrawwem il-ġbir ta’ fondi għall-istituzzjonijiet ta’ kreditu u jingħataw naqra nifs biex jappoġġaw lill-klijenti tagħhom fl-ekonomija reali. Peress li dik il-miżura hija limitata għall-fażi ta’ rkupru, jenħtieġ li din tkun għalhekk disponibbli għal perjodu ta’ żmien limitat ta’ 18-il xahar.

(4)Sabiex l-impatt ekonomiku sever tal-pandemija tal-COVID-19 jiġi indirizzat malajr, huwa importanti li jiġu introdotti miżuri li jiffaċilitaw l-investimenti fl-ekonomija reali, jippermettu rikapitalizzazzjoni rapida tal-kumpaniji fl-Unjoni u jippermettu lill-emittenti li jisfruttaw is-swieq pubbliċi fi stadju bikri fil-proċess ta’ rkupru. Sabiex jinkisbu dawk l-objettivi, huwa xieraq li jinħoloq prospett ġdid f’forma qasira (“prospett ta’ Rkupru tal-UE”) li jkun faċli biex jiġi prodott għall-emittenti, li jkun faċli biex jinftiehem minn investituri li jkunu jridu jiffinanzjawhom u li jkun faċli li jiġi skrutinizzat u approvat għall-awtoritajiet kompetenti.

(5)Il-kumpaniji li kellhom kontinwament ishma ammessi għan-negozjar f’suq regolat jew innegozjati f’suq tat-Tkabbir tal-SMEs għal mill-inqas l-aħħar 18-il xahar qabel l-offerta tal-ishma jew l-ammissjoni għall-kummerċ, kellhom jikkonformaw mar-rekwiżiti ta’ divulgazzjoni perjodika u kontinwa skont ir-Regolament (UE) Nru 596/2014 tal-Parlament Ewropew u tal-Kunsill 15 , id-Direttiva 2004/109/KE tal-Parlament Ewropew u tal-Kunsill 16 jew ir-Regolament Delegat tal-Kummissjoni (UE) Nru 2017/565 17 . Għaldaqstant, ħafna mill-kontenut meħtieġ ta’ prospett diġà se jkun disponibbli pubblikament u l-investituri se jkunu qed jinnegozjaw abbażi ta’ dik l-informazzjoni. Għalhekk, jenħtieġ li l-prospett ta’ Rkupru tal-UE jintuża biss għal ħruġ ta’ titoli sekondarju u jenħtieġ li jiffoka biss fuq informazzjoni essenzjali li l-investituri jeħtieġu biex jieħdu deċiżjonijiet informati ta’ investiment.

(6)Sabiex ikun għodda effiċjenti għall-emittenti, jenħtieġ li l-prospett ta’ Rkupru tal-UE jkun dokument wieħed ta’ daqs limitat, jippermetti l-inkorporazzjoni b’referenza, u jibbenefika mill-passaport għal offerti pan-Ewropej ta’ titoli lill-pubbliku jew ammissjonijiet għall-kummerċ f’suq regolat.

(7)Jenħtieġ li l-prospett ta’ Rkupru tal-UE jinkludi sommarju qasir bħala sors utli ta’ informazzjoni għall-investituri, b’mod partikolari l-investituri bl-imnut. Jenħtieġ li dak is-sommarju jkun parti indipendenti mill-prospett ta’ Rkupru tal-UE u jiffoka fuq informazzjoni ewlenija li tippermetti lill-investituri jiddeċiedu liema offerti u ammissjonijiet għall-kummerċ ta’ titoli jeżaminaw aktar billi jirrevedu l-prospett sħiħ ta’ Rkupru tal-UE biex jieħdu d-deċiżjoni tagħhom.

(8)Sabiex tinġabar data li tappoġġa l-valutazzjoni tar-reġim tal-prospett ta’ Rkupru tal-UE, jenħtieġ li l-prospett ta’ Rkupru tal-UE jiġi inkluż fil-mekkaniżmu ta’ ħżin tal-ESMA. Sabiex jiġi limitat il-piż amministrattiv għat-tibdil ta’ dak il-mekkaniżmu, il-prospett ta’ Rkupru tal-UE jista’ juża l-istess data bħal dik definita għall-prospett ta’ ħruġ ta’ titoli sekondarju stabbilit fl-Artikolu 14 tar-Regolament (UE) Nru 2017/1129, dment li ż-żewġ tipi ta’ prospetti jibqgħu differenzjati b’mod ċar.

(9)Jenħtieġ li l-prospett ta’ Rkupru tal-UE jikkumplimenta l-forom l-oħra ta’ prospetti stipulati fir-Regolament (UE) 2017/1129 fid-dawl ta’ tipi differenti ta’ titoli, emittenti, offerti u ammissjonijiet. Għalhekk, sakemm ma jiġix iddikjarat espliċitament mod ieħor, ir-referenzi kollha għal “prospectus” skont ir-Regolament (UE) 2017/1129 jenħtieġ li jinftiehmu li jirreferu għall-forom kollha differenti ta’ prospetti, inkluż il-prospett ta’ Rkupru tal-UE stabbilit f’dan ir-Regolament.

(10)Ir-Regolament (UE) 2017/1129 jirrikjedi li l-intermedjarji finanzjarji jinfurmaw lill-investituri bil-possibbiltà ta’ suppliment u, f’ċerti ċirkostanzi, li jikkuntattjaw lill-investituri fl-istess jum li jiġi ppubblikat suppliment. L-ambitu tal-investituri li għandhom jiġu kkuntattjati kif ukoll l-iskadenza biex jikkuntattjawhom jistgħu jqajmu xi diffikultajiet. Sabiex jingħata sokkors u jiġu liberati riżorsi għall-intermedjarji finanzjarji filwaqt li jinżamm livell għoli ta’ protezzjoni għall-investitur, jenħtieġ li jiġi stabbilit reġim aktar proporzjonat. Jenħtieġ li tali sistema tispeċifika liema investituri għandhom jiġu kkuntattjati mill-intermedjarji finanzjarji meta jiġi ppubblikat suppliment u tiġi estiża l-iskadenza biex jiġu kkuntattjati dawk l-investituri.

(11)Peress li l-Prospett ta’ Rkupru tal-UE huwa limitat għall-fażi ta’ rkupru, jenħtieġ li r-reġim ta’ dan il-prospett jiskadi 18-il xahar wara d-data tal-applikazzjoni ta’ dan ir-Regolament. Sabiex tiġi żgurata l-kontinwità tal-prospetti ta’ Rkupru tal-UE, jenħtieġ li dawk approvati qabel l-iskadenza tar-reġim jibbenefikaw minn dispożizzjoni ta’ anterjorità.

(12)Jenħtieġ li l-Kummissjoni, qabel il-21 ta’ Lulju 2022, tippreżenta rapport lill-Parlament Ewropew u lill-Kunsill dwar l-applikazzjoni ta’ dan ir-Regolament, li jkun akkumpanjat fejn meħtieġ bi proposta leġiżlattiva. Jenħtieġ li din ir-reviżjoni tinkorpora fil-valutazzjoni tagħha jekk ir-reġim ta’ divulgazzjoni għal prospetti ta’ Rkupru tal-UE huwiex xieraq biex jintlaħqu l-għanijiet segwiti minn dan ir-Regolament.

(13)Jenħtieġ għalhekk li r-Regolament (UE) 2017/1129 jiġi emendat kif xieraq,

ADOTTAW DAN IR-REGOLAMENT:

Artikolu 1
Emendi għar-Regolament (UE) 2017/1129

Ir-Regolament (UE) 2017/1129 huwa emendat kif ġej:

(1)fl-Artikolu 1(4), huwa miżjud il-punt (k) li ġej:

“(k)minn [data ta’ applikazzjoni ta’ dan ir-Regolament] għal [18-il xahar mid-data ta’ applikazzjoni ta’ dan ir-Regolament] titoli mingħajr ekwità maħruġa b’manjiera kontinwa jew ripetuta mill-istituzzjoni ta’ kreditu, fejn il-korrispettiv aggregat totali fl-Unjoni għat-titoli offruti jkun inqas minn EUR 150 000 000 għal kull istituzzjoni ta’ kreditu kkalkolat fuq perijodu ta’ 12-il xahar, bil-kondizzjoni li dawn it-titoli:

(i)ma jkunux issubordinati, konvertibbli jew skambjabbli; kif ukoll

(ii)ma jagħtux id-dritt li jiġu sottoskritti jew miksuba tipi oħra ta’ titoli u li ma jkunux marbuta ma’ strument derivattiv.”;

(2)fl-ewwel subparagrafu tal-Artikolu 6(1), is-sentenza introduttorja tiġi sostitwita b’dan li ġej:

“1.Mingħajr preġudizzju għall-Artikoli 14(2), 14a(2) u 18(1), prospett għandu jkun fih l-informazzjoni meħtieġa li tkun materjali għal investitur biex jagħmel valutazzjoni infurmata ta’:”;

(3)fl-Artikolu 7, jiġi miżjud il-punt 12a li ġej:

“12a.B’deroga mill-paragrafi 3 sa 12, il-prospett ta’ Rkupru tal-UE mfassal skont l-Artikolu 14a għandu jinkludi sommarju skont dan il-paragrafu.

Is-sommarju ta’ prospett ta’ Rkupru tal-UE għandu jitfassal bħala dokument qasir miktub b’mod konċiż u ta’ tul massimu ta’ żewġ faċċati ta’ karta ta’ daqs A4 meta jiġi stampat.

Is-sommarju ma għandux ikun fih kontroreferenzi għal partijiet oħra tal-prospett jew jinkorpora informazzjoni skont referenza u għandu jkun:

(a)ippreżentat u strutturat b’mod li jkun faċli li jinqara, bl-użu ta’ tipa ta’ daqs li tinqara;

(b)ikun miktub b’lingwaġġ u bi stil li jiffaċilita l-fehim tal-informazzjoni, b’mod partikolari, b’lingwaġġ li jkun ċar, mhux tekniku, konċiż u li jinftiehem għall-investituri.

(c)magħmul mill-erba’ taqsimiet li ġejjin:

(i)introduzzjoni, li jkun fiha twissija kif definita fil-punt 5 ta’ dan l-Artikolu;

(ii)informazzjoni ewlenija dwar l-emittent;

(iii)informazzjoni ewlenija dwar it-titoli;

(iv)informazzjoni ewlenija dwar l-offerta ta’ titoli lill-pubbliku jew l-ammissjoni għall-kummerċ f’suq regolat jew it-tnejn.”;

(4)jiġi miżjud l-Artikolu 14a li ġej:

“Artikolu 14a
Prospett ta’ Rkupru tal-UE

1.L-emittenti li ġejjin jistgħu jagħżlu li jħejju prospett ta’ rkupru tal-UE skont ir-reġim simplifikat stabbilit f’dan l-Artikolu f’każ ta’ offerta ta’ ishma lill-pubbliku jew ammissjoni għan-negozjar ta’ ishma f’suq regolat:

(a)emittenti li l-ishma tagħhom ikunu ġew ammessi għall-kummerċ f’suq regolat b’mod kontinwu għal mill-inqas l-aħħar 18-il xahar u li joħorġu ishma funġibbli ma’ ishma eżistenti li jkunu nħarġu qabel;

(b)emittenti li l-ishma tagħhom ikunu diġà ġew negozjati f’suq tat-Tkabbir tal-SMEs kontinwament għal mill-inqas l-aħħar 18-il xahar, sakemm prospett ikun ġie ppubblikat għall-offerta ta’ dawk l-ishma, u li joħorġu ishma funġibbli b’ishma eżistenti li jkunu nħarġu qabel.

2.B'deroga mill-Artikolu 6(1), u mingħajr preġudizzju għall-Artikolu 18(1), il-prospett ta’ Rkupru tal-UE għandu jinkludi l-informazzjoni mqassra rilevanti li hija meħtieġa biex l-investituri jkunu jistgħu jifhmu:

(a)il-prospetti tal-emittent u l-bidliet sinifikanti fil-pożizzjoni finanzjarja tal-emittent li jkunu seħħew mit-tmiem tal-aħħar sena finanzjarja, jekk ikun hemm;

(b)l-informazzjoni essenzjali dwar l-ishma, ir-raġunijiet għall-ħruġ u l-impatt tiegħu fuq l-istruttura ġenerali tal-kapital tal-emittent, u l-użu tar-rikavat.

L-informazzjoni li tinsab fil-prospett ta’ Rkupru tal-UE għandha tinkiteb u tiġi ppreżentata f’forma li tkun faċilment analizzabbli, konċiża u li tinftiehem u għandha tippermetti lill-investituri sabiex jagħmlu deċiżjoni informata dwar l-investiment. L-awtorità kompetenti għandha tieħu inkunsiderazzjoni jekk l-emittent ikunx żvela l-informazzjoni regolata lill-pubbliku skont id-Direttiva 2004/109/KE, meta applikabbli, ir-Regolament (UE) Nru 596/2014 u, meta applikabbli, l-informazzjoni msemmija fir-Regolament Delegat tal-Kummissjoni (UE) Nru 2017/565.

Il-prospett ta’ rkupru tal-UE għandu jkun dokument uniku li jkun fih l-informazzjoni minima stabbilita fl-Anness Va. Dan għandu jkollu tul massimu ta’ 30 faċċati ta’ karta daqs A4 meta jiġi stampat u għandu jiġi ppreżentat u stabbilit b’tali mod li jkun faċli li jinqara, bl-użu ta’ tipa ta’ daqs li tinqara.

L-informazzjoni inkorporata b’referenza skont l-Artikolu 19 ma għandhiex titqies fir-rigward tat-tul massimu tat-30 faċċati ta’ karta ta’ daqs A4 msemmija fit-tielet subparagrafu ta’ dan il-paragrafu.

L-emittenti jistgħu jiddeċiedu l-ordni li fih l-informazzjoni msemmija fl-Anness Va tiġi stabbilita fil-prospett ta’ Rkupru tal-UE.”;

(5)fl-Artikolu 20, jiġi miżjud il-punt 6a li ġej:

“6 a.“Permezz ta’ deroga mill-paragrafi 2 u 4, il-limiti ta’ żmien stabbiliti fl-ewwel subparagrafu tal-paragrafu 2 u fil-paragrafu 4 għandhom jitnaqqsu għal ħamest ijiem ta’ xogħol għal prospett ta’ Rkupru tal-UE mfassal skont l-Artikolu 14a. L-emittent għandu jinforma lill-awtorità kompetenti mill-inqas ħamest ijiem ta’ xogħol qabel id-data prevista għas-sottomissjoni tal-applikazzjoni għall-approvazzjoni.”;

(6)fl-Artikolu 21, jiġi miżjud il-punt 5 a li ġej:

“5 a.Prospett ta’ rkupru tal-UE mfassal skont l-Artikolu 14a għandu jiġi kklassifikat fil-mekkaniżmu ta’ ħżin msemmi fil-paragrafu 6 ta’ dan l-Artikolu. Id-data użata għall-klassifikazzjoni tal-prospetti mfassla skont l-Artikolu 14 tista’ tintuża għall-klassifikazzjoni tal-prospetti ta’ Rkupru tal-UE mfassla skont l-Artikolu 14a, dment li ż-żewġ tipi ta’ prospetti jkunu differenzjati f’dak il-mekkaniżmu ta’ ħżin.”;

(7)L-Artikolu 23 huwa emendat kif ġej:

(a)fil-paragrafu 2, l-ewwel subparagrafu huwa sostitwit b’dan li ġej:

“2.Fejn il-prospett ikollu x’jaqsam ma’ offerta ta’ titoli lill-pubbliku, l-investituri li jkunu digà qablu li jixtru jew jissottoskrivu t-titoli qabel ma s-suppliment jiġi ppubblikat għandu jkollhom id-dritt, li jiġi eżerċitat fi tliet ijiem ta’ xogħol wara l-pubblikazzjoni tas-suppliment, li jirtiraw l-aċċettazzjonijiet tagħhom, bil-kondizzjoni li l-fattur ġdid sinifikanti, l-iżball materjali jew l-ineżattezza materjali msemmija fil-paragrafu 1 ikunu seħħew jew ikunu ġew innotati qabel l-għeluq tal-perijodu tal-offerta jew l-għoti tat-titoli, skont liema minnhom iseħħ l-ewwel. Dak il-perijodu jista’ jiġi estiż mill-emittent jew l-offerent. Id-data finali tad-dritt ta’ rtirar għandha tiġi ddikjarata fis-suppliment.”;

(b)fil-paragrafu 3, l-ewwel u t-tieni subparagrafi huma ssostitwiti b’dawn li ġejjin:

“3.Meta l-investituri jixtru jew jissottoskrivu titoli permezz ta’ intermedjarju finanzjarju, bejn iż-żmien meta l-prospett għal dawk it-titoli jiġi approvat u l-għeluq tal-perjodu tal-offerta jew il-ħin meta jibda l-kummerċ f’suq regolat, liema minnhom iseħħ l-ewwel, dak l-intermedjarju finanzjarju għandu jinforma lil dawk l-investituri bil-possibbiltà li jiġi ppubblikat suppliment, fejn u meta jiġi ppubblikat u li l-intermedjarju finanzjarju jgħinhom biex jeżerċitaw id-dritt tagħhom li jirtiraw l-aċċettazzjonijiet f’każ bħal dan.

Meta l-investituri msemmija fl-ewwel subparagrafu ta’ dan il-paragrafu jkollhom id-dritt ta’ rtirar imsemmi fil-paragrafu 2, l-intermedjarju finanzjarju għandu jikkuntattja lil dawk l-investituri fi żmien jum ta’ xogħol wara l-pubblikazzjoni tas-suppliment.”;

(8)għandu jiddaħħal l-Artikolu 47a li ġej:

“Artikolu 47 a
Limitu ta’ żmien ta’ validazzjoni tal-prospett ta’ Rkupru tal-UE

Ir-reġim stipulat fl-Artikolu 14a jiskadi fi [18-il xahar mid-data tal-applikazzjoni ta’ dan ir-Regolament].

Il-Prospetti ta’ Rkupru tal-UE li jitfasslu skont l-Artikolu 14a u li jiġu approvati bejn [id-data tal-applikazzjoni ta’ dan ir-Regolament] u [18-il xahar wara d-data tal-applikazzjoni ta’ dan ir-Regolament] għandhom ikomplu jiġu rregolati skont dak l-Artikolu sa tmiem il-validità tagħhom jew sa ma jkunu għaddew tnax-il xahar minn [18-il xahar wara d-data tal-applikazzjoni ta’ dan ir-Regolament], skont liema minn dawn iseħħ l-ewwel.”

(9)fl-Artikolu 48, il-paragrafu 2 huwa sostitwit b’dan li ġej:

“2. Ir-rapport għandu jevalwa, fost affarijiet oħrajn, jekk is-sommarju tal-prospett, ir-reġimi ta’ żvelar stipulati fl-Artikoli 14, 14a u 15 u d-dokument tar-reġistrazzjoni universali msemmi fl-Artikolu 9 jibqgħux xierqa fid-dawl tal-għanijiet segwiti tagħhom. B’mod partikolari, ir-rapport għandu jinkludi dawn li ġejjin:

(a)l-għadd ta’ prospetti UE tat-Tkabbir ta’ persuni f’kull waħda mill-erba’ kategoriji msemmija fil-punti (a) sa (d) tal-Artikolu 15(1) u analiżi tal-evoluzzjoni ta’ kull wieħed minn dawn u tax-xejriet fl-għażla tal-postijiet ta’ negozjar mill-persuni intitolati li jużaw il-prospett UE tat-Tkabbir;

(b)analiżi dwar jekk il-prospett UE tat-Tkabbir jilħaqx bilanċ tajjeb bejn il-protezzjoni tal-investitur u t-tnaqqis tal-piżijiet amministrattivi għall-persuni ntitolati li jużawh;

(c)in-numru ta’ prospetti ta’ Rkupru tal-UE approvati u analiżi tal-evoluzzjoni ta’ dan in-numru;

(d)il-kost tat-tħejjija u li jkun hemm prospett ta’ Rkupru tal-UE approvat meta mqabbel mal-ispejjeż attwali għal prospett flimkien ma’ indikazzjoni tal-iffrankar finanzjarju globali miksub;

(e)analiżi dwar jekk il-prospett ta’ Rkupru tal-UE jilħaqx bilanċ tajjeb bejn il-protezzjoni tal-investitur u t-tnaqqis tal-piż amministrattiv għall-persuni ntitolati li jużawh.

(10)it-test stabbilit fl-Anness għal dan ir-Regolament jiddaħħal bħala Anness Va.

Artikolu 2
Dħul fis-seħħ u applikazzjoni

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,

Għall-Parlament Ewropew Għall-Kunsill

Il-President Il-President

(1) Il-Komunikazzjoni tal-Kummissjoni lill-Parlament Ewropew, lill-Kunsill Ewropew, lill-Kunsill, lill-Bank Ċentrali Ewropew, lill-Bank Ewropew tal-Investiment u lill-Grupp tal-Euro dwar rispons ekonomiku kkoordinat għat-Tifqigħa tal-COVID-19, COM(2020) 112 final tat-13.3.2020.

(2) Komunikazzjoni tal-Kummissjoni lill-Parlament Ewropew, lill-Kunsill Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni. Il-mument tal-Ewropa: Tiswija u Tħejjija għall-Ġenerazzjoni li Jmiss, COM 5 (2020) 456 final tas-27.5.2020.

(3) Regolament (UE) 2017/1129 tal-Parlament Ewropew u tal-Kunsill tal-14 ta’ Ġunju 2017 dwar il-prospett li għandu jiġi ppubblikat meta titoli jiġu offruti lill-pubbliku jew jiġu ammessi għall-kummerċ f’suq regolat, u li jħassar id-Direttiva 2003/71/KE (ĠU L 168, 30.6.2017, p. 12).

(4) Id-Direttiva 2004/109/KE tal-Parlament Ewropew u tal-Kunsill tal-15 ta’ Diċembru 2004 dwar l-armonizzazzjoni tar-rekwiżiti ta’ trasparenza f’dak li għandu x’jaqsam ma’ informazzjoni dwar emittenti li t-titoli tagħhom huma ammessi għall-kummerċ f’suq regolat u li temenda d-Direttiva 2001/34/KE (ĠU L 390, 31.12.2004, p. 38).

(5) Ir-Regolament Delegat tal-Kummissjoni (UE) 2017/565 tal-25 ta’ April 2016 li jissupplimenta d-Direttiva 2014/65/UE tal-Parlament Ewropew u tal-Kunsill rigward rekwiżiti organizzazzjonali u kundizzjonijiet għall-operat għal ditti tal-investiment u termini definiti għall-finijiet ta' dik id-Direttiva (ĠU L 87, 31.3.2017, p. 1).

(6) Ir-Regolament (UE) Nru 596/2014 tal-Parlament Ewropew u tal-Kunsill tas-16 ta’ April 2014 dwar l-abbuż tas-suq (Regolament dwar l-abbuż tas-suq) u li jħassar id-Direttiva 2003/6/KE tal-Parlament Ewropew u tal-Kunsill u d-Direttivi tal-Kummissjoni 2003/124/KE, 2003/125/KE u 2004/72/KE (ĠU L 173, 12.6.2014, p. 1).

(7) Id-Direttiva 2014/65/UE tal-Parlament Ewropew u tal-Kunsill tal-15 ta’ Mejju 2014 dwar is-swieq fl-istrumenti finanzjarji u li temenda d-Direttiva 2002/92/KE u d-Direttiva 2011/61/UE (ĠU L 173, 12.6.2014, p. 349).

(8) Ir-Regolament (UE) 2017/2402 tal-Parlament Ewropew u tal-Kunsill tat-12 ta’ Diċembru 2017 li jistabbilixxi qafas ġenerali għat-titolizzazzjoni u li joħloq qafas speċifiku għal titolizzazzjoni sempliċi, trasparenti u standardizzata, u li jemenda d-Direttivi 2009/65/KE, 2009/138/KE u 2011/61/UE u r-Regolamenti (KE) Nru 1060/2009 u (UE) Nru 648/2012.

(9) Ir-Regolament (UE) Nru 575/2013 tal-Parlament Ewropew u tal-Kunsill tas-26 ta’ Ġunju 2013 dwar ir-rekwiżiti prudenzjali għall-istituzzjonijiet ta’ kreditu u d-ditti tal-investiment u li jemenda r-Regolament (UE) Nru 648/2012

(10) https://ec.europa.eu/info/files/200610-cmu-high-level-forum-final-report_en

(11) Ir-Regolament (UE) 2019/2115 tal-Parlament Ewropew u tal-Kunsill tas-27 ta’ Novembru 2019 li jemenda d-Direttiva 2014/65/UE u r-Regolamenti (UE) Nru 596/2014 u (UE) 2017/1129 fir-rigward tal-promozzjoni tal-użu ta’ swieq tat-tkabbir tal-SMEs (ĠU L 320, 11.12.2019, p. 1).

(12) Il-każ Vodafone C-58/08: “Meta att ibbażat fuq l-Artikolu 95 KE jkun diġà elimina kull ostakolu għall-kummerċ fil-qasam tal-qasam li għandu jiġi armonizzat, il-leġiżlatur Komunitarju ma jistax jiġi mċaħħad mill-possibbiltà li jadatta dan l-att għal kull bidla fiċ-ċirkustanzi jew għal kull evoluzzjoni tal-konoxxenzi fir-rigward tad-dover tiegħu li jissorvelja l-protezzjoni tal-interessi ġenerali rrikonoxxut mit-Trattat”

(13) COM/2020/456 final tas-27.5.2020.

(14) Regolament (UE) 2017/1129 tal-Parlament Ewropew u tal-Kunsill tal-14 ta’ Ġunju 2017 dwar il-prospett li għandu jiġi ppubblikat meta titoli jiġu offruti lill-pubbliku jew jiġu ammessi għall-kummerċ f’suq regolat, u li jħassar id-Direttiva 2003/71/KE (ĠU L 168, 30.6.2017, p. 12).

(15) Ir-Regolament (UE) Nru 596/2014 tal-Parlament Ewropew u tal-Kunsill tas-16 ta’ April 2014 dwar l-abbuż tas-suq (Regolament dwar l-abbuż tas-suq) u li jħassar id-Direttiva 2003/6/KE tal-Parlament Ewropew u tal-Kunsill u d-Direttivi tal-Kummissjoni 2003/124/KE, 2003/125/KE u 2004/72/KE (ĠU L 173, 12.6.2014, p. 1).

(16) Id-Direttiva 2004/109/KE tal-Parlament Ewropew u tal-Kunsill tal-15 ta’ Diċembru 2004 dwar l-armonizzazzjoni tar-rekwiżiti ta’ trasparenza f’dak li għandu x’jaqsam ma’ informazzjoni dwar emittenti li t-titoli tagħhom huma ammessi għall-kummerċ f’suq regolat u li temenda d-Direttiva 2001/34/KE (ĠU L 390, 31.12.2004, p. 38).

(17) Ir-Regolament Delegat tal-Kummissjoni (UE) 2017/565 tal-25 ta’ April 2016 li jissupplimenta d-Direttiva 2014/65/UE tal-Parlament Ewropew u tal-Kunsill rigward rekwiżiti organizzazzjonali u kundizzjonijiet għall-operat għal ditti tal-investiment u termini definiti għall-finijiet ta’ dik id-Direttiva (ĠU L 87, 31.3.2017, p. 1).