IL-KUMMISSJONI EWROPEA
Brussell, 12.5.2020
COM(2020) 193 final
2020/0077(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tiġi adottata, f’isem l-Unjoni Ewropea, fi ħdan il-Kumitat tal-FSE stabbilit mill-Ftehim interim ta’ Sħubija Ekonomika (FSE) bejn il-Kosta tal-Avorju, minn naħa, u l-Komunità Ewropea u l-Istati Membri tagħha, min-naħa l-oħra, rigward l-adozzjoni proposta tal-lista ta’ arbitri
MEMORANDUM TA’ SPJEGAZZJONI
1.Suġġett tal-proposta
Din il-proposta tirrigwarda d-deċiżjoni li tistabbilixxi l-pożizzjoni li għandha tiġi adottata f’isem l-Unjoni Ewropea (“l-Unjoni”) fil-Kumitat tal-FSE stabbilit mill-Ftehim Interim ta’ Sħubija Ekonomika bejn il-Kosta tal-Avorju, minn naħa, u l-Komunità Ewropea u l-Istati Membri tagħha, min-naħa l-oħra (“il-Ftehim”) 1 , rigward l-adozzjoni proposta tal-lista ta’ persuni li huma disposti u kapaċi jkunu arbitri.
2.Kuntest tal-proposta
2.1.Ftehim interim ta’ Sħubija Ekonomija bejn l-UE u l-Kosta tal-Avorju
L-iskop tal-ftehim huwa li jistabbilixxi qafas inizjali għal Ftehim ta’ Sħubija Ekonomika b’konformità mal-Ftehim ta’ Cotonou. Il-Ftehim ilu jiġi applikat b’mod provviżorju mit-3 ta’ Settembru 2016.
2.2.Il-Kumitat tal-FSE
Il-Kumitat tal-FSE huwa l-korp istituzzjonali konġunt ta’ dan il-Ftehim. L-Artikolu 73 tal-ftehim jistipula li l-Kumitat tal-FSE huwa responsabbli mill-amministrazzjoni tal-oqsma kollha koperti mill-Ftehim u mit-twettiq ta’ kull kompitu msemmi fih. Il-Kumitat tal-FSE jieħu d-deċiżjonijiet tiegħu bi qbil ġenerali. Il-funzjonament tal-Kumitat tal-FSE huwa deskritt fir-regoli ta’ proċedura tiegħu 2 .
2.3.Att stipulat mill-Kumitat tal-FSE
Fil-ħames laqgħa tiegħu tal-[data], il-Kumitat tal-FSE għandu jadotta deċiżjoni dwar l-adozzjoni tal-lista ta’ arbitri (“l-att previst”) skont l-Artikolu 64 tal-Ftehim.
L-Artikolu 64(1) tal-Ftehim jistipula li “il-Kumitat FSE għandu jistabbilixxi lista ta’ 15-il persuna li huma disposti u kapaċi jkunu arbitri ”
L-għan tal-att previst huwa li jistabbilixxi lista ta’ ħmistax-il individwu li jkunu jistgħu jservu bħala arbitri f’każ ta’ proċedura għal soluzzjoni ta’ tilwim skont it-Titolu V tal-Ftehim. L-adozzjoni ta’ din il-lista hija element essenzjali biex jiġi ffinalizzat il-qafas operazzjonali għad-dispożizzjonijiet tal-Ftehim dwar l-Evitar u s-Soluzzjoni tat-Tilwim.
3.Il-pożizzjoni li għandha tiġi adottata f’isem l-Unjoni
Din il-proposta għal Deċiżjoni tal-Kunsill tiddetermina l-pożizzjoni li għandha tittieħed f’isem l-Unjoni fil-Kumitat tal-FSE stabbilit mill-Ftehim Interim ta’ Sħubija Ekonomika bejn il-Kosta tal-Avorju, minn naħa, u l-Komunità Ewropea u l-Istati Membri tagħha, min-naħa l-oħra, fir-rigward tal-istabbiliment tal-lista ta’ persuni disposti u kapaċi jkunu arbitri skont l-Artikolu 64 tal-Ftehim.
Il-partijiet għall-Ftehim qablu ma’ dan l-abbozz ta’ Deċiżjoni, inizjalawh fir-raba’ laqgħa tal-Kumitat tal-FSE fis-27 u t-28 ta’ Novembru 2019 u, suġġett għall-proċeduri ta’ teħid ta’ deċiżjonijiet tal-Unjoni Ewropea, għandhom jadottawh fil-laqgħa li jmiss tal-Kumitat tal-FSE, li għandha ssir fi tmiem l-2020.
Din id-deċiżjoni hija essenzjali sabiex id-dispożizzjonijiet tal-Ftehim tat-Titolu V dwar l-Evitar u Soluzzjoni tat-Tilwim isiru operazzjonali u biex b'hekk tkun żgurata l-implimentazzjoni bla xkiel tal-Ftehim.
4.Bażi ġuridika proċedurali
4.1.Bażi ġuridika proċedurali
4.1.1. Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jipprevedi deċiżjonijiet li jistabbilixxu “il-pożizzjonijiet li għandhom jiġu adottati f’isem l-Unjoni f’sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim”.
Il-kunċett ta’ “atti li jkollhom effetti legali” jinkludi atti li jkollhom effetti legali bis-saħħa tar-regoli tad-dritt internazzjonali li jirregolaw il-korp inkwistjoni. Dan jinkludi wkoll l-istrumenti li ma għandhomx effett vinkolanti skont id-dritt internazzjonali, iżda li “jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatur tal-Unjoni” 3 .
4.1.2. Applikazzjoni għal dan il-każ
Il-Kumitat tal-FSE huwa korp stabbilit bi Ftehim, jiġifieri l-Ftehim Interim ta’ Sħubija Ekonomika bejn il-Kosta tal-Avorju, minn naħa, u l-Komunità Ewropea u l-Istati Membri tagħha min-naħa l-oħra.
L-att li l-Kumitat huwa mitlub jadotta jikkostitwixxi att li għandu effetti legali. L-att previst se jkun vinkolanti skont id-dritt internazzjonali b’konformità mal-Artikolu 64 tal-Ftehim.
L-att previst la jissupplimenta u lanqas jemenda l-qafas istituzzjonali tal-Ftehim.
Għaldaqstant, il-bażi ġuridika proċedurali tad-deċiżjoni proposta hija l-Artikolu 218(9) tat-TFUE.
4.2.Bażi ġuridika sostantiva
4.2.1. Prinċipji
Il-bażi ġuridika sostantiva għal deċiżjoni skont l-Artikolu 218(9) TFUE tiddependi primarjament mill-objettiv u l-kontenut tal-att previst li fir-rigward tiegħu tiġi meħuda pożizzjoni f’isem l-Unjoni. Jekk l-att previst ikollu żewġ għanijiet jew żewġ komponenti, u jekk wieħed minn dawn l-għanijiet jew komponenti jkun jista’ jiġi identifikat bħala dak ewlieni, filwaqt li l-ieħor ikun sempliċiment inċidentali, id-deċiżjoni skont l-Artikolu 218(9) TFUE trid tkun imsejsa fuq bażi ġuridika sostantiva waħda, jiġifieri dik rikjesta mill-għan jew mill-komponent ewlieni jew predominanti.
4.2.2. Applikazzjoni għal dan il-każ
Essenzjalment, il-proċedura ta’ arbitraġġ hija applikabbli għas-settur tal-kummerċ, u l-objettiv u l-kontenut tal-att previst huma relatati mal-politika kummerċjali komuni. Għaldaqstant, il-bażi ġuridika sostantiva tad-Deċiżjoni proposta hija l-Artikolu 207 tat-TFUE.
4.3.Konklużjoni
Jenħtieġ li l-bażi ġuridika tad-Deċiżjoni proposta tkun l-ewwel subparagrafu tal-Artikolu 207(4), flimkien mal-Artikolu 218(9) tat-TFUE.
5.PUBBLIKAZZJONI TAL-ATT PREVIST
Peress li d-deċiżjoni tal-Kumitat tal-FSE se temenda l-Ftehim, huwa xieraq li din tiġi ppubblikata f’Il-Ġurnal Uffiċjali tal-Unjoni Ewropea, ladarba tiġi adottata.
2020/0077 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tiġi adottata, f’isem l-Unjoni Ewropea, fi ħdan il-Kumitat tal-FSE stabbilit mill-Ftehim interim ta’ Sħubija Ekonomika (FSE) bejn il-Kosta tal-Avorju, minn naħa, u l-Komunità Ewropea u l-Istati Membri tagħha, min-naħa l-oħra, rigward l-adozzjoni proposta tal-lista ta’ arbitri
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea (TFUE), u b’mod partikulari l-ewwel subparagrafu tal-Artikolu 207(4) flimkien mal-Artikolu 218(9) tiegħu,
Wara li kkunsidra l-Ftehim interim ta’ Sħubija Ekonomika bejn il-Kosta tal-Avorju, minn naħa waħda, u l-Komunità Ewropea u l-Istati Membri tagħha, min-naħa l-oħra (“il-Ftehim”) 4 ,
Wara li kkunsidra l-proposta tal-Kummissjoni Ewropea,
Billi:
(1)Il-Ftehim ġie konkluż f’isem l-Unjoni Ewropea (“l-Unjoni”) permezz tad-Deċiżjoni 2009/156/KE 5 u qiegħed jiġi applikat b’mod provviżorju mill- 3 ta’ Settembru 2016.
(2)F’konformità mal-Artikolu 64(1) tal-Ftehim, il-Kumitat tal-FSE għandu jfassal lista ta’ persuni li huma disposti u kapaċi jkunu arbitri.
(3)Il-Kumitat tal-FSE fil-laqgħa annwali tiegħu fi [data] għandu jissejjaħ biex jadotta deċiżjoni li tistabbilixxi l-lista ta’ persuni li huma disposti u kapaċi jkunu arbitri b’konformità mal-Artikolu 64(1) tal-Ftehim.
(4)Ikun xieraq li tiġi stabbilita l-pożizzjoni li għandha tittieħed, f'isem l-Unjoni, fil-Kumitat tal-FSE, peress li d-deċiżjoni prevista se tkun vinkolanti fuq l-Unjoni,
ADOTTA DIN ID-DEĊIŻJONI:
Artikolu 1
Il-pożizzjoni li għandha tittieħed f’isem l-Unjoni fil-Kumitat tal-FSE għandha tkun ibbażata fuq l-abbozz ta’ Deċiżjoni tal-Kumitat tal-FSE fir-rigward tal-lista ta’ persuni disposti u kapaċi jkunu arbitri, mehmuża ma’ din id-Deċiżjoni.
Artikolu 2
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 12.5.2020
COM(2020) 193 final
ANNESS
tal-
Proposta għal Deċiżjoni tal-Kunsill
dwar il-pożizzjoni li għandha tiġi adottata, f’isem l-Unjoni Ewropea, fi ħdan il-Kumitat tal-FSE stabbilit mill-Ftehim interim ta’ Sħubija Ekonomika (FSE) bejn il-Kosta tal-Avorju, minn naħa, u l-Komunità Ewropea u l-Istati Membri tagħha, min-naħa l-oħra, rigward l-adozzjoni proposta tal-lista ta’ arbitri
ABBOZZ
DEĊIŻJONI Nru …/2020 TAL-KUMITAT tal-FSE
stabbilita bil-Ftehim Interim ta’ Sħubija Ekonomika
bejn il-Kosta tal-Avorju, minn naħa
u l-Komunità Ewropea u l-Istati Membri tagħha, min-naħa l-oħra
ta’ ...
dwar l-adozzjoni tal-lista ta’ arbitri
IL-KUMITAT TAL-FSE,
Wara li kkunsidra l-Ftehim ta’ Sħubija Ekonomika Interim bejn il-Kosta tal-Avorju, minn naħa, u l-Komunità Ewropea u l-Istati Membri tagħha, min-naħa l-oħra (minn hawn ’il quddiem, “il-Ftehim”), iffirmat fi Brussell fit-3 ta’ Marzu 2009, u applikat fuq bażi provviżorja minn Settembru 2016, u b’mod partikolari l-Artikoli 64(1) tiegħu,
Billi:
Il-Ftehim jipprevedi li l-Kumitat tal-FSE għandu jistabbilixxi lista ta’ ħmistax-il persuna li huma disposti u kapaċi jkunu arbitri għar-riżoluzzjoni tat-tilwim li jista’ jinqala’ bejn il-Partijiet,
ADOTTA DIN ID-DEĊIŻJONI:
Artikolu 1
1.Il-lista ta’ ħmistax-il persuna li huma disposti u kapaċi jkunu arbitri hija b’dan stabbilita f’konformità mal-Artikolu 64(1) tal-Ftehim u tinstab fl-Anness ta’ din id-Deċiżjoni.
2.Il-lista ta’ arbitri msemmija fil-paragrafu 1 hija stabbilita mingħajr preġudizzju għal kwalunkwe regola speċifika stabbilita fil-Ftehim jew li tista’ tiġi adottata mill-Kumitat tal-FSE.
Artikolu 2
Il-lista ta’ arbitri msemmija fil-paragrafu 1 tista’ tiġi emendata b’deċiżjoni mill-Kumitat tal-FSE f’konformità mal-Artikolu 67 tal-Ftehim.
Artikolu 3
Din id-Deċiżjoni għandha tidħol fis-seħħ fil-jum li tiġi ffirmata.
Magħmul fi …, il-…
Għar-Repubblika tal-Kosta tal-Avorju Għall-Unjoni Ewropea
... …
ANNESS
Lista ta’ arbitri (Artikolu 64(1) tal-Ftehim)
Arbitri magħżula min-naħa tal-Kosta tal-Avorju:
Is-Sur Abbe YAO – il-Kosta tal-Avorju
Is-Sur Abdouramane OUATTARA – il-Kosta tal-Avorju
Is-Sur M. Joachim BILA AKA – il-Kosta tal-Avorju
Is-Sur Narcisse AKA – il-Kosta tal-Avorju
Is-Sur Karim FADIKA – il-Kosta tal-Avorju
Arbitri magħżula min-naħa tal-Unjoni Ewropea:
Is-Sur Claus EHLERMANN – il-Ġermanja
Is-Sur Giorgio SACERDOTI – l-Italja
Is-Sur Jacques BOURGEOIS – il-Belġju
Is-Sur Pieter Jan KUIJPER – in-Netherlands
Is-Sinjura Hélène RUIZ FABRI – Franza
Arbitri magħżula b’mod konġunt miż-żewġ naħat:
Is-Sur Martial AKAKPO – it-Togo
Is-Sinjura Anna KOUYATE – il-Mali
Is-Sur Thomas COTTIER – l-Iżvizzera
Is-Sinjura Merit E. JANOW – l-Istati Uniti
Is-Sur Helge SELAND – in-Norveġja