—

wara li kkunsidra l-abbozz ta' regolament tal-Kummissjoni li jemenda r-Regolament (KE) Nru 1881/2006 fir-rigward tal-livelli massimi ta' akrilammid f'ċerti oġġetti tal-ikel għat-trabi u għat-tfal żgħar (D067815/03,

—

wara li kkunsidra r-Regolament tal-Kunsill (KEE) Nru 315/93 tat-8 ta' Frar 1993 li jistipula l-proċeduri tal-Komunità għall-kontaminanti fl-ikel (1), u b'mod partikolari l-Artikolu 2(3) tiegħu,

—

wara li kkunsidra r-regolament tal-Kummissjoni (UE) 2017/2158 tal-20 ta' Novembru 2017 li jistabbilixxi miżuri ta' mitigazzjoni u livelli ta' parametri referenzjarji għat-tnaqqis tal-preżenza tal-akrilammid fl-ikel (2)

—

wara li kkunsidra l-opinjoni xjentifika dwar l-akrilammid fl-ikel adottata mill-Bord dwar kontaminanti fil-katina tal-ikel (Bord CONTAM) tal-Awtorità Ewropea dwar is-Sigurtà fl-Ikel (EFSA) fit-30 ta' April 2015, u ppubblikata fl-4 ta' Ġunju 2015 (3)

—

wara li kkunsidra l-Artikolu 5a(3)(b) tad-Deċiżjoni tal-Kunsill 1999/468/KE tat-28 ta' Ġunju 1999 li tipprovdi l-proċeduri għall-eżerċizzju tas-setgħat ta' implimentazzjoni konferiti fuq il-Kummissjoni (4),

—

wara li kkunsidra l-Artikolu 112(2), (3) u (4)(c) tar-Regoli ta' Proċedura tiegħu,

—

wara li kkunsidra l-mozzjoni għal riżoluzzjoni tal-Kumitat għall-Ambjent, is-Saħħa Pubblika u s-Sikurezza tal-Ikel,

A.

billi l-akrilammid hi sustanza kimika komposta preżenti fl-ikel magħmula minn aspariġina u zokkor ħielsa minn sustanzi preżenti b'mod naturali matul proċessar b'temperatura għolja bħal fil-qali, ix-xiwi u l-ħami;

B.

billi l-konsumaturi jiġu esposti għall-akrilammid minn ikel prodott b'mod industrijali, bħall-krisps, il-ħobż, il-gallettini u l-kafè, imma wkoll minn tisjir fid-dar, eż. fix-xiwi tal-ħobż jew fil-qali taċ-ċips;

C.

billi t-trabi, tfal żgħar u tfal oħra huma l-aktar grupp ta' età espost minħabba l-piż inqas ta' ġisimhom u għalhekk huma speċifikament vulnerabbli; billi hu magħruf li t-tfal għandhom metaboliżmu ogħla minħabba l-proporzjon akbar bejn il-fwied u l-piż tal-ġisem li jagħmilha aktar possibbli li l-glycidamide (il-metabolita tal-akrilammid, li tifforma permezz tal-bijotrasformazzjoni) tista' tiġi ffurmata b'rata ogħla fit-tfal, u b'hekk tiżdied il-possibbiltà ta' tossiċità tal-akrilammid fit-tfal (5);

D.

billi, skont il-klassifikazzjoni u t-tikkettar armonizzati (CLP00) approvati mill-Unjoni, l-akrilammid huwa tossiku jekk jinbela', jista' jikkawża difetti ġenetiċi, jista' jikkawża kanċer, jikkawża ħsara lill-organi minħabba esponiment fit-tul jew ripetut, huwa ta' ħsara f'kuntatt mal-ġilda, jikkawża irritazzjoni serja lill-għajnejn, huwa ta' ħsara jekk jinġibed man-nifs, huwa suspettat li jagħmel ħsara lill-fertilità, jikkawża irritazzjoni tal-ġilda u jista' jikkawża reazzjoni allerġika tal-ġilda; billi barra minn hekk, il-klassifikazzjoni pprovduta mill-kumpaniji lill-Aġenzija Ewropea għas-Sustanzi Kimiċi (ECHA) fir-reġistrazzjonijiet REACH tidentifika li din is-sustanza tista' tkun ta' ħsara għall-fertilità jew għat-tarbija fil-ġuf (6);

E.

billi lil hinn minn dan, ġiet osservata deġenerazzjoni tan-nervituri periferali u tan-nervituri terminali f'xi żoni tal-moħħ relatati mal-memorja, it-tagħlim u l-funzjonijiet konjittivi (7);

F.

billi l-opinjoni xjentifika tal-Bord CONTAM tat-30 ta' April 2015 dwar l-akrilammid fl-ikel (8) identifikat, mid-data kollha disponibbli, erba' punti aħħarin kritiċi possibbli għat-tossiċità tal-akrilammid, jiġifieri n-newrotossiċità, l-effetti fuq ir-riproduzzjoni tal-irġiel, it-tossiċità tal-iżvilupp, u l-karċinoġeniċità; billi l-Bord CONTAM innota wkoll li l-akrilammid huwa mutaġenu taċ-ċelloli ġerminali u li fil-preżent ma hemm l-ebda proċedura stabbilita għall-valutazzjoni tar-riskju bl-użu ta' dan il-punt aħħari; billi l-Bord CONTAM b'mod aktar speċifiku kkonferma l-evalwazzjonijiet preċedenti li l-akrilammid fl-ikel potenzjalment iżid ir-riskju tal-kanċer għall-konsumaturi fil-gruppi tal-etajiet kollha;

G.

billi t-tossiċità tal-akrilammid kienet diġà ġiet rikonoxxuta fl-2002 f'rapport konġunt tal-FAO/WHO (9); billi l-akrilammid ġie kklassifikat bħala “karċinoġenu uman probabbli” mill-Aġenzija Internazzjonali għar-Riċerka dwar il-Kanċer (IARC) (10), bħala “raġonevolment antiċipat li jkun karċinoġenu uman” mill-Programm Nazzjonali dwar it-Tossikoloġija (NTP) tal-Istati Uniti (11), u bħala “li x'aktarx hu karċinoġeniku għall-bnedmin” mill-Aġenzija għall-Protezzjoni tal-Ambjent (EPA) tal-Istati Uniti (12);

H.

billi l-proprjetajiet tal-akrilammid li jfixklu s-sistema endokrinali huma diskussi f'diversi studji xjentifiċi (13) u jeħtieġu eżami b'mod urġenti;

I.

billi l-Artikolu 191(2) tat-Trattat dwar il-Funzjonament tal-Unjoni Ewropea (TFUE) jistabbilixxi l-prinċipju ta' prekawzjoni bħala wieħed mill-prinċipji fundamentali tal-Unjoni;

J.

billi l-Artikolu 168(1) tat-TFUE jiddisponi li “livell għoli ta' ħarsien tas-saħħa fiżika u mentali għandu jkun assigurat fid-definizzjoni u l-implimentazzjoni tal-istrateġiji u l-attivitajiet kollha tal-Unjoni”;

K.

billi l-Artikolu 2(1) u (2) tar-Regolament (KEE) Nru 315/93 jipprevedi li l-ikel li fih kontaminant f'ammont li mhuwiex aċċettabbli mil-lat tas-saħħa pubblika u b'mod partikolari f'livell tossikoloġiku ma għandux jitqiegħed fis-suq, u li l-livelli tal-kontaminanti għandhom jinżammu baxxi daqs kemm dan jista' raġonevolment jinkiseb billi jiġu segwiti prattiki tajbin fl-istadji kollha tal-produzzjoni tal-ikel;

L.

billi r-Regolament (UE) 2017/2158 jirrikjedi li l-operaturi tan-negozji tal-ikel japplikaw miżuri ta' mitigazzjoni u jwettqu ċerti attivitajiet biex inaqqsu l-livelli tal-akrilammid f'ċerti oġġetti tal-ikel bil-għan li jiġi żgurat li l-livelli tal-akrilammid fil-prodotti tagħhom jibqgħu taħt il-“livelli tal-parametri referenzjarji”, li jintużaw biex tiġi vverifikata l-effikaċja tal-miżuri ta' mitigazzjoni permezz ta' kampjunar u analiżi;

M.

billi l-livelli livelli tal-parametri referenzjarji stabbiliti fir-Regolament (UE) 2017/2158 ilhom japplikaw minn April 2018, u għandhom jiġu riveduti mill-Kummissjoni kull tliet snin u l-ewwel darba fi żmien tliet snin wara d-dħul fis-seħħ ta' dak ir-Regolament, bil-għan li jiġu stabbiliti livelli aktar baxxi (14);

N.

billi l-livelli tal-parametri referenzjarji huma neqsin għal diversi kategoriji ta' prodotti, bħall-krisps veġetali, il-croquettes, jew il-crackers tar-ross, li rigward uħud minnhom ġie pprovat li fihom livelli għoljin ta' akrilammid; billi r-Rakkomandazzjoni tal-Kummissjoni (UE) 2019/1888 (15) tistabbilixxi lista mhux eżawrjenti ta' kategoriji tal-ikel li għandhom jiġu mmonitorjati regolarment għall-preżenza tal-akrilammid;

O.

billi, f'konformità mal-Artikolu 2(3) tar-Regolament (KEE) Nru 315/93, il-Kummissjoni tista', fejn meħtieġ, tistabbilixxi t-tolleranzi massimi għal kontaminanti speċifiċi, sabiex tipproteġi s-saħħa pubblika; billi għadu ma ġie stabbilit l-ebda livell massimu għall-akrilammid fl-ikel; billi l-Premessa 15 tar-Regolament (UE) 2017/2158 tindika li b'mod komplementari għall-miżuri ta' mitigazzjoni, għandu jiġi kkunsidrat l-iffissar ta' livelli massimi għall-akrilammid f'ċertu ikel;

P.

billi l-abbozz ta' regolament tal-Kummissjoni jirrikonoxxi l-importanza li l-livelli tal-akrilammid fl-ikel jinżammu baxxi daqs kemm dan jista' raġonevolment jinkiseb;

Q.

billi l-abbozz ta' regolament tal-Kummissjoni jipproponi li jiġu stabbiliti livelli massimi għal żewġ kategoriji speċifiċi ħafna ta' ikel biss, jiġifieri għall-“gallettini u l-biskuttelli għat-trabi u għat-tfal żgħar” (150 μg/kg, li jikkorrispondi għal-livell tal-paramentru referenzjarju kurrenti) u għall-“ikel tat-trabi, l-ikel ipproċessat ibbażat fuq iċ-ċereali għat-trabi u t-tfal żgħar minbarra l-gallettini u l-biskuttelli” (50 μg/kg, li huwa saħansitra 10 μg/kg ogħla mil-livell tal-parametru referenzjarju kurrenti ta' 40 μg/kg);

R.

billi d-data ta' okkorrenza li l-Kummissjoni bbażat l-abbozz ta' regolament tagħha fuqha tirriżulta mill-perjodu 2015-2018; billi, jekk ir-Regolament (UE) 2017/2158 għandu jkollu effett fuq il-livelli tal-akrilammid fl-ikel, jista' jkun raġonevolment mistenni li l-manifatturi tal-ikel għandhom tal-anqas sa issa jkunu laħqu l-valur tal-parametru referenzjarju stabbilit tliet snin ilu;

S.

billi r-riċerka mwettqa fil-ħarifa tal-2018 minn għaxar organizzazzjonijiet tal-konsumaturi madwar l-Ewropa (16) wriet li firxa ta' prodotti li ma jaqgħux taħt iż-żewġ kategoriji regolati fl-abbozz ta' regolament tal-Kummissjoni, bħall-gallettini u l-wejfers, spiss jiġu kkunsmati minn tfal taħt it-tliet snin; u xi wħud minn dawn il-prodotti huma ovvjament ikkummerċjalizzati b'mod li jimmiraw għat-tfal (jiġifieri d-disinn tal-imballaġġ b'karattri tal-kartuns li jappellaw għat-tfal); billi sitwazzjoni simili tista' tkun mistennija għal prodotti bħal crackers jew ċereali tal-kolazzjon;

T.

billi l-livell tal-parametru referenzjarju għall-“gallettini u l-wejfers” (350 μg/kg) u l-livell tal-parametru referenzjarju għall-“gallettini u l-biskuttelli għat-trabi u għat-tfal żgħar” (150 μg/kg) ivarjaw b'mod sinifikanti, mingħajr ma l-ġenituri jkunu magħmula konxji tad-differenza f'termini tal-kontenut massimu ta' akrilammid mixtieq;

U.

billi nstab ukoll li għall-gallettini u l-wejfers, terz mill-prodotti ttestjati kienu fil-livell tal-parametru referenzjarju jew 'il fuq minnu, u mill-gallettini u l-wejfers identifikati bħala “kkunsmati ta' spiss minn tfal taħt it-tliet snin” qrib żewġ terzi ma kinux jaqbżu l-parametru referenzjarju stabbilit għall-kategorija “gallettini u biskuttelli għat-trabi u għat-tfal żgħar”;

V.

billi mhuwiex ikkontestat li l-okkorrenza tal-akrilammid fl-ikel tista' tiġi minimizzata billi jiġu applikati miżuri xierqa ta' mitigazzjoni (17); billi, fil-kategoriji kollha tal-ikel, ġie ppruvat li huwa possibbli li jiġu manifatturati prodotti b'kontenut baxx ta' akrilammid (18);

W.

billi, fir-rigward tal-abbozz ta' regolament tal-Kummissjoni, kemm id-data mir-riċerka tal-konsumaturi (19) fl-2018 kif ukoll id-data dwar l-okkorrenza li tirriżulta mill-bażi ta' data tal-EFSA mill-perjodu 2015-2018 juru li livelli aktar baxxi mill-150 μg/kg u l-50 μg/kg proposti nkisbu faċilment minn maġġoranza kbira ħafna tal-produtturi fiż-żewġ kategoriji tal-ikel; billi wieħed jista' jassumi li llum kważi l-prodotti kollha jistgħu jilħqu dawk il-livelli; billi huma għalhekk meħtieġa livelli aktar stretti sabiex jiġi stabbilit inċentiv għal aktar tnaqqis;

X.

billi l-iffissar ta' livelli massimi jiffaċilita b'mod ċar l-infurzar tar-regoli dwar l-akrilammid mill-Istati Membri; billi, madankollu, il-livelli massimi xorta jridu jiġu stabbiliti f'konformità mal-prinċipju ALARA (“l-aktar baxx li jista' raġonevolment jinkiseb”) kif stabbilit fl-Artikolu 2 tar-Regolament (KEE) Nru 315/93;

Y.

billi, bħala konklużjoni, il-livelli proposti fl-abbozz ta' regolament tal-Kummissjoni diġà huma faċilment issodisfati mill-biċċa l-kbira tal-prodotti fis-suq, u ġie ppruvat li livelli aktar baxxi jistgħu jinkisbu mingħajr il-ħtieġa ta' sforzi kbar;

Z.

billi aktar riċerka tista' tgħin biex wieħed jifhem ir-raġunijiet għall-varjabbiltà għolja tal-livelli tal-akrilammid fil-kategoriji tal-ikel u biex wieħed jidentifika strateġiji li jkollhom l-għan li jimminimizzaw il-formazzjoni tal-akrilammid;

AA.

billi l-monitoraġġ tal-effikaċja tar-regoli dwar l-akrilammid huwa kruċjali; billi dan jimplika li l-Istati Membri jwettqu kontrolli effettivi u frekwenti biżżejjed u jiġbru data dwar l-okkorrenza tal-akrilammid;

AB.

billi kampanji ta' informazzjoni għall-pubbliku jistgħu jgħinu biex tiżdied is-sensibilizzazzjoni tal-konsumaturi dwar prodotti b'kontenut potenzjalment ogħla ta' akrilammid u jinfurmawhom dwar kif jillimitaw l-esponiment tal-akrilammid waqt it-tisjir;

1.

2.

3.

4.

5.

6.

7.

8.

9.

10.

11.

12.

13.