IL-KUMMISSJONI EWROPEA
Brussell, 2.12.2020
COM(2020) 775 final
RAPPORT TAL-KUMMISSJONI LILL-PARLAMENT EWROPEW U LILL-KUNSILL
Valutazzjoni tal-kooperazzjoni tal-operatur tar-Reġistru .eu mal-EUIPO u aġenziji oħrajn tal-Unjoni bil-ħsieb li jikkombattu r-reġistrazzjonjiet tal-isem tad-dominju abbużivi u spekulattivi, skont l-Artikolu 16 tar-Regolament (UE) 2019/517
Werrej
1.
Introduzzjoni
2.
Objettivi u metodoloġija
2.1 Objettivi
2.2 Metodoloġija
3.
Kooperazzjoni bejn l-EURid u l-EUIPO fil-ġlieda kontra r-reġistrazzjonijiet abbużivi u spekulattivi tal-ismijiet ta’ dominju
3.1 Kooperazzjoni bikrija
3.2 Kooperazzjoni reċenti
3.3 Attivitajiet ippjanati 2020-22
3.4 Valutazzjoni tal-kooperazzjoni bejn l-EURid u l-EUIPO, u rakkomandazzjonijiet għal titjib
4.
Kooperazzjoni ma’ korpi oħrajn tal-Unjoni u organizzazzjonijiet nazzjonali jew internazzjonali
4.1 Kooperazzjoni mal-Europol
4.2 Kollaborazzjoni ma’ korpi oħra
5.
L-intrapriżi żgħar u ta’ daqs medju
5.1 Proċedura ta’ reġistrazzjoni
5.2 Soluzzjoni alternattiva għat-tilwim
6.
Konklużjonijiet
1.Introduzzjoni
Il-Kummissjoni hija responsabbli mid-dominju tal-ogħla livell .eu, li bħalissa qed jintuża minn 3.6 miljun utent finali fl-UE
. Id-dominju .eu kien ġie stabbilit mir-Regolament (KE) Nru 733/2002 u mir-Regolament tal-Kummissjoni (KE) Nru 874/2004. L-atti ġew revokati dan l-aħħar mir-Regolament (UE) 2019/517, “ir-Regolament .eu”, li daħal fis-seħħ fit-18 ta’ April 2019 u se japplika mit-13 ta’ Ottubru 2022.
Isem id-dominju .eu huwa operat mir-Reġistru .eu. Bħalissa din hija EURid, organizzazzjoni privata, indipendenti u mingħajr skop ta’ qligħ, abbażi ta’ kuntratt ta’ konċessjoni ta’ servizz konkluż mal-Kummissjoni, li jibqa’ għaddej sat-12 ta’ Ottubru 2022. Il-Kummissjoni, skont l-Artikolu 19(2) tar-Regolament .eu se tagħżel u tidħol f’kuntratt mal-entità li se taġixxi bħala r-Reġistru .eu mit-13 ta’ Ottubru 2022.
Ir-Regolament .eu jirrikjedi li r-Reġistru jadotta politiki u jimplimenta miżuri biex tiġi evitata reġistrazzjoni spekulattiva u abbużiva ta’ ismijiet ta’ dominju.
“Reġistrazzjoni spekulattiva u abużiva” hija definita bħala r-reġistrazzjoni ta’ isem ta’ dominju li jkun identiku jew simili b’tali mod li jista’ jiġi konfuż ma’ isem li fir-rigward tiegħu jkun rikonoxxut jew stabbilit dritt mil-liġi tal-Unjoni jew minn dik nazzjonali, li: (a) ikun ġie rreġistrat mid-detentur tiegħu mingħajr drittijiet jew interess leġittimu assoċjat miegħu; jew (b) ikun ġie rreġistrat jew ikun qed jintuża b’mala fede
.
Id-drittijiet protetti fil-livell tal-UE jinkludu, fost l-oħrajn, trademarks nazzjonali u tal-Komunità rreġistrati, indikazzjonijiet ġeografiċi u denominazzjonijiet tal-oriġini, kif ukoll id-drittijiet tal-proprjetà intellettwali (IPR) protetti fil-livell nazzjonali li ġejjin:
·trademarks mhux irreġistrati
·ismijiet kummerċjali
·identifikaturi tan-negozji
·ismijiet tal-kumpaniji
·kunjomijiet
·titoli distintivi ta’ xogħlijiet letterarji u artistiċi protetti.
Reġistrazzjonijiet .eu spekulattivi u abbużivi jridu jiġu revokati, bl-użu tal-proċess .eu tas-soluzzjoni alternattiva għat-tilwim (ADR) jew ta’ proċedura ġudizzjarja mibdija mid-detenturi tad-drittijiet.
Ir-Regolament .eu jirrikjedi li l-Kummissjoni tippromwovi l-kooperazzjoni bejn ir-Reġistru .eu, l-Uffiċċju tal-Proprjetà Intellettwali tal-Unjoni Ewropea (EUIPO) u korpi oħra tal-Unjoni, bil-ħsieb li tiġġieled ir-reġistrazzjonijiet spekulattivi u abbużivi ta’ ismijiet ta’ dominju, inkluż is-cybersquatting, u tipprovdi proċeduri amministrattivi ssimplifikati, b’mod partikolari għall-intrapriżi żgħar u ta’ daqs medju (SMEs).
Ir-Regolament .eu jirrikjedi wkoll li l-Kummissjoni, sat-30 ta’ Ġunju 2020, tevalwa din il-kooperazzjoni u tivvaluta jekk u kif ir-Reġistru għandu jistabbilixxi proċeduri amministrattivi aktar sempliċi għall-SMEs.
Sussegwentement, il-Kummissjoni għandha tinforma lill-Parlament Ewropew u lill-Kunsill dwar il-valutazzjoni tagħha.
Il-Kummissjoni ħejjiet dan ir-rapport biex tissodisfa dan l-obbligu legali.
2.Objettivi u metodoloġija
2.1 Objettivi
Is-Sistema tal-Ismijiet tad-Dominji (DNS) tappoġġja internet aċċessibbli, funzjonali u affidabbli, iżda mhijiex immuni għall-abbuż. L-isem tad-dominju .eu mhuwiex eċċezzjoni, għalhekk ir-Regolamenti .eu jirrikjedu li jiġu implimentati politiki u miżuri biex jiġu evitati reġistrazzjonijiet abbużivi u spekulattivi ta’ ismijiet ta’ dominju.
Dan ir-rapport:
·jevalwa l-kooperazzjoni bejn ir-Reġistru .eu (EURid) u l-EUIPO u korpi oħrajn tal-Unjoni jew organizzazzjonijiet internazzjonali biex jiġu indirizzati reġistrazzjonijiet spekulattivi u abbużivi;
·jivvaluta jekk u kif din il-kooperazzjoni tista’ tittejjeb biex jinżamm ambjent .eu online sigur, trasparenti u affidabbli;
·iqis il-prattika attwali tal-industrija f’dan il-qasam;
·jidentifika aspetti possibbli tal-proċedura ta’ reġistrazzjoni .eu, jew proċeduri oħrajn ta’ ġestjoni tal-isem tad-dominju (bħal soluzzjoni alternattiva għat-tilwim) li jistgħu jiġu ssimplifikati b’mod utli biex jiġu ffaċilitati r-reġistrazzjonijiet tal-ismijiet ta’ dominju u tiżdied il-protezzjoni għad-detenturi tad-drittijiet, għall-benefiċċju tal-SMEs.
2.2 Metodoloġija
Dan ir-rapport huwa bbażat kemm fuq il-valutazzjoni tal-Kummissjoni kif ukoll fuq is-sejbiet ta’ studju estern li sar bejn Diċembru 2019 u April 2020 li jevalwa l-prattiki għall-ġlieda kontra r-reġistrazzjonijiet tal-ismijiet ta’ dominju spekulattivi u abbużivi
.
L-awturi tal-istudju wettqu reviżjoni estensiva tar-rapporti rilevanti tal-industrija u ġabru u analizzaw data u informazzjoni minn diversi partijiet ikkonċernati involuti fil-ġlieda kontra r-reġistrazzjoni spekulattiva/abbużiva. B’mod partikolari, huma wettqu analiżi tas-suq u tqabbil bejn il-prattiki tar-Reġistru .eu u reġistri oħra tal-ismijiet ta’ dominju, bl-użu kemm ta’ metodi kwalitattivi kif ukoll ta’ metodi kwantitattivi. Dan inkluda l-valutazzjoni tal-proċeduri amministrattivi li jippermettu lill-SMEs jiġġieldu b’mod effettiv ir-reġistrazzjonijiet spekulattivi u abbużivi fl-isem tad-dominju .eu.
Dan ir-rapport iqis ukoll ir-rappurtar formali mir-Reġistru .eu lill-Kummissjoni
u l-informazzjoni miġbura mill-Kummissjoni matul l-iskambji regolari mar-Reġistru bħala parti mid-dmirijiet superviżorji tagħha.
3.Kooperazzjoni bejn l-EURid u l-EUIPO fil-ġlieda kontra r-reġistrazzjonijiet abbużivi u spekulattivi tal-ismijiet ta’ dominju
3.1 Kooperazzjoni bikrija
Il-kooperazzjoni bejn l-EURid u l-EUIPO ġiet formalizzata għall-ewwel darba fit-23 ta’ Ġunju 2016 f’ittra ta’ kollaborazzjoni.
L-objettiv tagħha kien il-ġlieda kontra l-attivitajiet frodulenti, wara evidenza li l-partijiet terzi sistematikament ibbrawżjaw il-bażi tad-data tal-EUIPO biex ifittxu applikazzjonijiet ġodda tat-Trademark tal-UE (EUTM) u għamlu reġistrazzjonijiet spekulattivi jew abbużivi tal-isem tad-dominju .eu għal dawn it-termini, prattika magħrufa bħala cybersquatting. Iż-żewġ partijiet qablu li jimplimentaw bidliet fis-sistema bil-għan li tiżdied is-sensibilizzazzjoni tad-detenturi tal-EUTM u jitnaqqas is-cybersquatting.
Matul l-istadji bikrija ta’ kooperazzjoni bejn l-EURid u l-EUIPO, l-enfasi kienet fuq il-kondiviżjoni tal-informazzjoni u l-kooperazzjoni f’oqsma ta’ interess reċiproku. L-EURid bagħtet b’mod partikolari fatturi suspettużi lill-EUIPO u ż-żewġ organizzazzjonijiet żiedu links fuq il-portali u l-għodod rispettivi tagħhom, inkluż link għal għodda għat-tiftix tat-trademarks fuq is-sit web tal-EURid; link għas-sit web tal-EUIPO fuq il-paġna web .eu WHOIS; u link għall-għodda tat-tiftix għad-disponibbiltà ta' .eu fl-għodda ta’ preżentazzjoni elettronika tal-EUTM.
3.2 Kooperazzjoni reċenti
Fl-20 ta’ Mejju 2019, il-EURid u l-EUIPO estendew il-kooperazzjoni tagħhom billi ffirmaw l-ewwel ftehim ta’ kollaborazzjoni.
Żewġ funzjonalitajiet saru disponibbli għad-detenturi tal-EUTM:
·verifika tad-disponibbiltà għall-isem tad-dominju korrispondenti meta jippreżentaw mal-EUTM;
·notifika (twissija) meta jiġi irreġistrat isem tad-dominju li jikkorrispondi għal EUTM.
Kontroll tad-disponibbiltà
Flimkien mal-għodda ta’ preżentazzjoni elettronika tal-EUTM, din il-funzjoni tinforma direttament lill-utenti – hekk kif ilestu l-preżentazzjoni tat-trademark tagħhom – jekk it-trademark tagħhom hijiex disponibbli bħala isem tad-dominju .eu. B’dan il-mod, huma jistgħu, immedjatament, jagħżlu li jirreġistraw l-isem tad-dominju qabel ma tiġi ppubblikata l-applikazzjoni EUTM tagħhom.
Twissijiet
Id-detenturi tal-EUTM għandhom ukoll l-għażla li jirċievu twissija meta jiġi rreġistrat isem tad-dominju .eu identiku għat-trademark tagħhom – iżda biss jekk jagħżlu dan espressament. Is-sistema hija bbażata fuq lista aġġornata tal-applikazzjonijiet EUTM lill-EURid permezz tas-servizz ta’ tniżżil tal-EUIPO li ta’ kuljum tintbagħat mill-EUIPO
. Kull reġistrazzjoni ġdida tal-isem tad-dominju .eu tiġi vverifikata ma’ din il-lista mill-EURid, u jekk ikun hemm konkordanza, l-EUIPO jiġi nnotifikat u l-utenti jirċievu twissija fiż-Żona tal-Utent tal-EUIPO tagħhom.
3.3 Attivitajiet ippjanati 2020-22
Skont il-programm ta’ ħidma konġunt tagħhom għall-2020-22
, l-EUIPO u l-EURid se jesploraw il-possibbiltà li jimplimentaw proċess reċiproku meta jiġi rreġistrat isem tad-dominju .eu, li jippermetti lid-detenturi tal-isem tad-dominju jaraw jekk trademark b’isem simili tkunx disponibbli fl-EUIPO.
Barra minn hekk, iż-żewġ organizzazzjonijiet se jaħdmu fuq studju konġunt dwar l-imġiba fl-applikazzjoni, biex jaraw jekk it-trademarks jew l-ismijiet ta’ dominju humiex irreġistrati l-ewwel. L-istudju se jgħinhom jindirizzaw l-ismijiet ta’ dominju frodulenti u r-reġistrazzjonijiet li saru f'mala fede.
Se jibda wkoll xogħol fuq studju ta’ fattibbiltà biex tinħoloq għodda li tinforma lill-utenti dwar id-disponibbiltà tat-termini li qed ifittxu kemm bħala trademark kif ukoll bħala isem tad-dominju. L-EUIPO u l-EURid se jesploraw ukoll il-possibbiltà li jestendu l-verifika attwali tad-disponibbiltà bbażata fuq “tiftix identiku”
għal “tiftix simili”, biex jinstabu l-konkordanzi possibbli fil-bażi ta’ data tal-EURid wara li tkun ġiet ippreżentata applikazzjoni EUTM online.
Il-programm ta’ ħidma jinkludi wkoll link għall-programm tal-SMEs tal-EUIPO, li se jinkludi inizjattivi bħal:
·chatbot li tipprovdi informazzjoni dwar kwistjonijiet ta’ negozju utli għall-SMEs, l-ewwel nett dwar kwistjonijiet ta’ proprjetà intellettwali;
·gwidi ta’ skoperta li jipprovdu appoġġ u gwida lill-SMEs li jixtiequ jirreġistraw EUTM, u li jindikaw l-importanza tal-ismijiet ta’ dominju;
·webinars immirati lejn l-SMEs u organizzazzjonijiet multiplikaturi.
3.4 Valutazzjoni tal-kooperazzjoni bejn l-EURid u l-EUIPO, u rakkomandazzjonijiet għal titjib
L-EURid u l-EUIPO kisbu kooperazzjoni produttiva fil-ġlieda kontra r-reġistrazzjonijiet spekulattivi u abbużivi ta’ ismijiet ta’ dominji, inkluż is-cybersquatting, u l-azzjoni futura ppjanata miż-żewġ organizzazzjonijiet hija mistennija li tgħin biex tkompli tnaqqas ir-reġistrazzjonijiet spekulattivi u abbużivi u ttejjeb l-appoġġ għall-SMEs.
Fl-istadju li jmiss tal-kooperazzjoni tagħhom, iż-żewġ organizzazzjonijiet għandhom ifittxu li jissimplifikaw il-proċedura għall-isem tad-dominju .eu u r-reġistrazzjoni tal-EUTM u li jrawmu sensibilizzazzjoni tar-rabta bejn l-ismijiet ta’ dominju u t-trademarks. Kwalunkwe għodda jew miżura li jipproponu għandha tkun sempliċi, faċli għall-utent, aċċessibbli u effettiva għall-SMEs.
B’mod speċifiku, huma jistgħu jagħmlu t-titjib li ġej:
·Aktar attivitajiet ta’ sensibilizzazzjoni u ta’ bini ta’ għarfien, biex id-detenturi tad-drittijiet u d-detenturi ta’ isem tad-dominju .eu jsiru konxji tal-miżuri u l-għodod eżistenti u jżidu l-użu tagħhom. Eżempji jinkludu korsijiet ta’ taħriġ u webinars, speċjalment immirati lejn l-SMEs. Se jkun importanti li jinġabar il-feedback mill-SMEs, li jiġu mifhuma l-ħtiġijiet tagħhom u li jittejbu l-attivitajiet ta’ sensibilizzazzjoni.
·Jipprovdu aktar informazzjoni lill-utenti meta jippreżentaw applikazzjoni EUTM. Pereżempju, flimkien mal-irċevuta finali u r-rekord uffiċjali tal-applikazzjoni, l-EUIPO jista’ jipprovdi lill-applikanti b’dokumenti li jkun fihom aktar informazzjoni dwar l-ismijiet tad-dominju .eu u modi kif jitħares l-IPR.
·Itejbu l-għodod eżistenti:
oL-użu sħiħ tal-verifika tad-disponibbiltà u l-funzjonalitajiet ta’ twissija se jirrikjedi aktar titjib tekniku. Dawn il-funzjonijiet joffru mod sempliċi u effettiv għad-detenturi tad-drittijiet, inkluż l-SMEs, biex iżommu l-ismijiet ta’ dominju jaqblu mat-trademarks tagħhom jew jaġixxu fir-rigward ta’ reġistrazzjonijiet abbużivi/spekulattivi.
oJiġġeneralizzaw l-użu tas-sistema ta’ twissija. L-istatistika pprovduta mill-EURid u mill-EUIPO turi li hemm lakuna importanti bejn in-numru ta’ konkordanzi li nstabu bejn l-EUTM u r-reġistrazzjonijiet ta’ isem tad-dominju .eu u n-numru ta’ twissijiet mibgħuta lid-detenturi tal-EUTM. Hemm bżonn li jiżdied il-livell ta’ sensibilizzazzjoni ta’ din il-funzjonalità u jiżdied l-użu tagħha.
oJinvestigaw il-possibbiltajiet biex jiġu estiżi l-għodod eżistenti dwar il-verifika tad-disponibbiltà u l-funzjonalitajiet ta’ twissija biex ikopru l-indikazzjonijiet ġeografiċi.
·Jiżviluppaw għodod ġodda biex jiffaċilitaw ir-reġistrazzjoni simultanja tal-EUTM u tal-ismijiet tad-dominju .eu:
oJiżviluppaw għodda ta’ tiftix konġunta li tippermetti lill-utenti jivverifikaw jekk it-termini humiex disponibbli kemm bħala EUTM kif ukoll bħala isem tad-dominju .eu.
oJivvalutaw il-possibbiltà li l-EUIPO jsir reġistratur akkreditat ta’ .eu u jintegra r-reġistrazzjoni ta’ isem tad-dominju .eu mal-applikazzjonijiet EUTM. Dan joffri lid-detenturi tad-drittijiet il-possibbiltà ta’ punt uniku ta’ reġistrazzjoni.
Il-Kummissjoni se ssegwi dawn ir-rakkomandazzjonijiet mal-EURid u l-EUIPO u se ssegwi mill-qrib kif il-kooperazzjoni tagħhom tiżviluppa u kemm il-miżuri li jieħdu huma effettivi għall-ġlieda kontra r-reġistrazzjonijiet spekulattivi u abbużivi. B’hekk, se tagħti attenzjoni partikolari lill-miżuri adottati għall-SMEs.
4.Kooperazzjoni ma’ korpi oħrajn tal-Unjoni u organizzazzjonijiet nazzjonali jew internazzjonali
4.1 Kooperazzjoni mal-Europol
L-EURid u l-Europol għandhom stabbilit memorandum ta’ qbil
, iffirmat fl-2016. Skont dan il-ftehim, huma qed jiskambjaw informazzjoni dwar ismijiet tad-dominju .eu suspettużi, inkluż oqsma identifikati mis-Sistema tal-Prevenzjoni ta’ Abbużi u ta’ Twissija Bikrija (APEWS)
tal-EURid.
Il-kooperazzjoni bejn l-EURid u l-Europol tista’ tissaħħaħ ulterjorment, l-ewwel nett permezz tal-formalizzazzjoni ta’ dawn l-arranġamenti. Dan jinkludi:
·il-formalizzazzjoni tal-kamp ta’ applikazzjoni u l-impenji ta’ kull parti;
·l-identifikazzjoni ta’ punti ta’ kuntatt u kanali ta’ komunikazzjoni fuq iż-żewġ naħat;
·id-deskrizzjoni tal-azzjonijiet li kull parti għandha tieħu meta jiġi identifikat isem suspettuż tad-dominju;
·id-determinazzjoni ta’ mekkaniżmi ta’ segwitu u ta’ rappurtar.
Iż-żewġ organizzazzjonijiet jistgħu jwettqu wkoll attivitajiet konġunti ta’ sensibilizzazzjoni u ta’ bini tal-għarfien biex jinfurmaw lill-pubbliku ġenerali u jħarrġu lill-esperti taċ-ċibersigurtà u lill-uffiċjali tal-infurzar tal-liġi dwar it-theddid taċ-ċiberkriminalità relatat ma’ reġistrazzjonijiet spekulattivi u abbużivi tal-ismijiet ta’ dominju, u l-kontromiżuri disponibbli. B’mod speċifiku, dawn jistgħu jiżviluppaw studji tal-każ relatati mal-proprjetà intellettwali biex jedukaw lid-detenturi tad-drittijiet u lir-rappreżentanti tagħhom, b’enfasi fuq l-SMEs.
4.2 Kollaborazzjoni ma’ korpi oħra
L-EURid tikkollabora ma’ awtoritajiet u organizzazzjonijiet internazzjonali u Ewropej biex tipprevjeni attivitajiet illegali online. Dawn jinkludu, fost l-oħrajn:
·id-Dwana Belġjana (kontra siti web foloz);
·il-Prosekuturi u l-aġenziji tal-infurzar tal-liġi Belġjani (kontra ċ-ċiberkriminalità);
·l-Assoċjazzjoni għal Spiżerija Online Sikura;
·il-Koalizzjoni Internazzjonali kontra l-Falsifikazzjoni
;
·il-Fondazzjoni tal-Kummerċ elettroniku (kontra l-ħwienet elettroniċi foloz);
·il-Grupp ta’ Ħidma Kontra l-Phishing;
·l-iskwadra Belġjana ta’ Rispons f’Emerġenza relatata mal-Kompjuters.
It-trademarks nazzjonali rreġistrati huma protetti taħt il-qafas regolatorju .eu bl-istess mod bħall-EUTMs. Madankollu, ma teżisti l-ebda kollaborazzjoni strutturata tar-Reġistru .eu mal-uffiċċji tat-trademarks tal-Istati Membri. Dan il-grad ta’ kollaborazzjoni jista’ jiġi stabbilit, possibbilment permezz tan-Network tal-Proprjetà Intellettwali tal-Unjoni Ewropea (EUIPN) stabbilit mill-EUIPO
. Il-kollaborazzjoni tal-EURid mal-EUIPO tista’ tiġi estiża wkoll għall-uffiċċji tat-trademarks tal-Istati Membri, billi toffri wkoll il-funzjonalitajiet tal-kontroll tad-disponibbiltà u/jew ta’ twissija lill-utenti tagħhom.
Bħalissa, id-detenturi tal-IPR minbarra t-trademarks (eż. indikazzjonijiet ġeografiċi u denominazzjonijiet tal-oriġini, ismijiet kummerċjali, identifikaturi tan-negozji u ismijiet tal-kumpaniji) għandhom aċċess biss għal miżuri kurattivi f’każ ta’ reġistrazzjoni .eu abbużiva. Sabiex tittejjeb din is-sitwazzjoni, ir-Reġistru .eu jista’ jistabbilixxi aktar kollaborazzjoni ma’ korpi u aġenziji rilevanti. Dan jista jinkludi t-twettiq ta’ verifiki fil-bażijiet tad-data tagħhom tal-IPR
. Fejn ir-Reġistru jsib ismijiet li huma identiċi jew simili għal ismijiet tad-dominju .eu, dan jista’ mbagħad jew jinnotifika lid-detenturi tad-drittijiet (sabiex ikunu jistgħu jieħdu azzjoni) jew jieħu azzjoni direttament huwa nnifsu (ex officio). Fil-prattika, dan ikun ifisser li l-funzjonalità ta’ twissija tiġi estiża wkoll għal dawk l-IPRs. Fir-rigward tal-ismijiet kummerċjali, tal-identifikaturi tan-negozji u tal-ismijiet tal-kumpaniji, jista’ jitnieda studju biex tiġi vvalutata l-utilità li tiġi stabbilita kollaborazzjoni man-network tal-UE tar-reġistri kummerċjali.
L-estensjoni tal-kamp ta’ applikazzjoni tal-kollaborazzjoni mal-awtoritajiet u l-organizzazzjonijiet inkarigati minn IPRs oħrajn lil hinn mill-EUTM tista’ tkun ta’ benefiċċju partikolari għall-SMEs.
5.L-intrapriżi żgħar u ta’ daqs medju
L-aspetti kollha analizzati f’dan ir-rapport li jipprevedu perspettiva speċifika li tiffoka fuq l-intrapriżi żgħar u ta’ daqs medju.
Barra minn hekk, din it-taqsima tiffoka fuq aspetti relatati mal-proċeduri ta’ reġistrazzjoni .eu għall-SMEs u r-rimedji għad-dispożizzjoni tagħhom – speċjalment is-Soluzzjoni Alternattiva għat-Tilwim – biex jiġu indirizzati reġistrazzjonijiet abbużivi/spekulattivi ta’ ismijiet ta’ dominju.
5.1 Proċedura ta’ reġistrazzjoni
B’mod ġenerali, il-proċedura ta’ reġistrazzjoni .eu hija pjuttost sempliċi u faċli. Madankollu, meta wieħed iqis l-importanza tal-miżuri preventivi biex jiġu indirizzati reġistrazzjonijiet spekulattivi u abbużivi, dan jista’ jitjieb għall-SMEs, b’mod partikolari billi:
·Jiġu implimentati servizzi li jippermettu lid-detenturi tal-IPR jimblukkaw b’mod preventiv ir-reġistrazzjonijiet ta’ ismijiet ta’ dominju li jiksru l-liġi, kif diġà jagħmlu parteċipanti oħrajn tal-industrija
. Servizzi bħal dawn jgħinu lid-detenturi tad-drittijiet biex jipproteġu d-drittijiet preċedenti tagħhom u jipproteġu d-ditti tagħhom mit-typosquatting;
·L-estensjoni tal-użu ta’ algoritmi ta’ tbassir biex jiġu evitati reġistrazzjonijiet spekulattivi u abbużivi flimkien ma’ reġistrazzjonijiet malizzjużi, kif inhu l-każ bħalissa;
·Iż-żieda fis-sensibilizzazzjoni tad-detenturi tad-drittijiet dwar għodod ta’ tiftix eżistenti ta’ similarità, bħal pereżempju t-tiftix ta’ .be WHOIS, sabiex ikunu jistgħu jfittxu ismijiet simili ta’ dominju li potenzjalment jistgħu jiksru d-drittijiet tagħhom;
·Li l-informazzjoni tkun faċilment aċċessibbli għall-utenti dwar kif jirrappurtaw tipi differenti ta’ użu ħażin
.
5.2 Soluzzjoni alternattiva għat-tilwim
Peress li l-internet għandu firxa globali u s-soluzzjoni ta’ tilwim transfruntier permezz ta’ proċedimenti fil-qorti jiswa ħafna flus u jieħu ħafna żmien, mekkaniżmi (alternattivi) ekstraġudizzjarji għas-soluzzjoni tat-tilwim biex isolvu tilwim bħal dan huma rikonoxxuti fuq livell internazzjonali bħala miżuri kurattivi effettivi kontra reġistrazzjonijiet spekulattivi u abbużivi.
Soluzzjoni alternattiva għat-tilwim dwar .eu
hija regolata b'regoli speċifiċi
u ġiet ipprovduta minn fornitur indipendenti, il-Qorti Ċeka tal-Arbitraġġ (CAC), mill-2006. Is-servizz huwa pprovdut ukoll mill-Organizzazzjoni Dinjija tal-Proprjetà Intellettwali (WIPO), mill-2017. Il-proċedura tar-riżoluzzjoni .eu ddum madwar 3 xhur.
B’mod ġenerali, is-soluzzjoni alternattiva għat-tilwim għal .eu taħdem kif maħsuba – iżda jistgħu jiġu implimentati xi bidliet biex din issir aktar sempliċi, aktar aċċessibbli u affordabbli għall-SMEs. Pereżempju:
·Id-disponibbiltà ta’ portal online għall-ġestjoni tat-tilwim li jippermetti lill-partijiet jittrattaw it-tilwim kollu dwar .eu online (bħalissa mhux il-fornituri kollha tas-soluzzjoni .eu jagħmluh disponibbli);
·It-tqassir tal-proċedura (fejn possibbli), f’konformità mal-Proċedura Uniformi għas-Soluzzjoni ta’ Tilwim dwar l-Isem tad-Dominju (UDRP);
·Iż-żamma tat-tariffi għall-preżentata għall-bidu ta’ riżoluzzjoni dwar .eu affordabbli għall-SMEs;
·L-introduzzjoni ta’ mekkaniżmu ta’ “min jitlef iħallas” biex jiġu skoraġġuti reġistrazzjonijiet spekulattivi/abbużivi u biex il-parti prevalenti tkun tista' tirkupra l-ispiża sabiex tinbeda l-proċedura .eu;
·Il-provvediment għal proċeduri mħaffa bħas-sospensjoni ta’ ismijiet tad-dominju mir-Reġistru f’kawżi jew fi proċeduri ċari ta’ typosquatting għas-sistema Uniformi ta’ Sospensjoni Rapida (URS)
;
·Li l-proċeduri preliminari jsiru disponibbli, qabel ma t-tilwima dwar l-isem tad-dominju tinbeda uffiċjalment.
6.Konklużjonijiet
B’mod ġenerali, il-kooperazzjoni bejn ir-Reġistru .eu u l-EUIPO dwar il-ġlieda kontra reġistrazzjonijiet abbużivi u spekulattivi ta’ ismijiet ta’ dominju hija sodisfaċenti. Dan ir-rapport jissuġġerixxi aktar titjib dwar:
·Il-kooperazzjoni bejn l-EURid u l-EUIPO, b’mod partikolari billi jittejbu l-attivitajiet ta’ sensibilizzazzjoni u ta’ bini tal-għarfien u billi jittejbu l-għodod eżistenti u jiġu żviluppati għodod ġodda biex tiġi ffaċilitata r-reġistrazzjoni simultanja tal-EUTM u tal-ismijiet tad-dominju .eu;
·Il-kollaborazzjoni ma’ entitajiet oħrajn: il-kollaborazzjoni eżistenti bħal dik mal-Europol tista’ tissaħħaħ; jistgħu jiġu introdotti kollaborazzjonijiet ġodda, pereżempju mal-uffiċċji nazzjonali tat-trademarks;
·Il-miżuri stabbiliti għall-SMEs, b’mod partikolari billi jittejbu aktar ir-reġistrazzjoni u l-proċeduri għal soluzzjoni alternattiva għat-tilwim.
Ir-rakkomandazzjonijiet kollha għal titjib ippreżentati f’dan ir-rapport jistgħu jinkisbu permezz ta’ taħlita ta’:
·implimentazzjoni ta’ miżuri eżistenti;
·implimentazzjoni ta’ miżuri ġodda ta’ kooperazzjoni bejn l-EURid u l-EUIPO u korpi, awtoritajiet u organizzazzjonijiet oħra tal-Unjoni fil-livell nazzjonali jew internazzjonali;
·u l-aġġornament tal-proċeduri EURid.
Ma jirrikjedux aktar miżuri leġiżlattivi, iżda implimentazzjoni u segwitu konkreti. Uħud minn dawn il-miżuri jistgħu jiġu introdotti fil-kuntratt ta’ konċessjoni ta’ servizz bejn ir-Reġistru .eu u l-Kummissjoni (li għandu jiġi applikat ladarba r-Regolament (UE) 2019/517 ikun qed jiġi applikat).
Il-Kummissjoni se ssegwi r-Reġistru .eu u l-EUIPO dwar it-titjib propost, b’attenzjoni partikolari għall-miżuri ta’ simplifikazzjoni għall-SMEs, u se tirrapporta lill-Parlament Ewropew u lill-Kunsill dwar il-progress miksub bħala parti mir-rappurtar regolari dwar il-funzjonament tal-isem tad-dominju .eu.