Avviż tal-Gvern tar-Renju Unit b’rabta mad-Direttiva 94/22/KE tal-Parlament Ewropew u tal-Kunsill dwar il-kondizzjonijiet għall-għoti u l-użu ta’ awtorizzazzjonijiet għall-prospettar, esplorazzjoni u produzzjoni ta’ idrokarburi

(Test b'rilevanza għaż-ŻEE)

(2019/C 210/08)

Avviż tar-Renju Unit ta’ Ċiklu Straordinarju ta’ offerta ta’ Ħruġ ta’ Liċenzji Offshore

OIL AND GAS AUTHORITY (OGA)

The Petroleum Act 1998

Ċiklu Straordinarju ta’ Offerta ta’ Ħruġ ta’ Liċenzji Offshore

L-awtorità taż-żejt u l-gass (Oil and Gas Authority/OGA) tistieden lill-persuni interessati biex japplikaw għal-Liċenzji għall-Produzzjoni ta’ Idrokarburi f’żoni speċifiċi tal-Blata Kontinentali tar-Renju Unit.

Id-dettalji kollha tal-offerta, inklużi l-listi u l-mapep taż-żoni inklużi fl-offerta flimkien ma’ gwida dwar il-liċenzji, it-termini li se jinkludu dawk il-liċenzji, u kif wieħed għandu japplika, huma disponibbli fis-sit web tal-OGA (ara hawn taħt).

L-applikazzjonijiet kollha se jiġu ddeterminati, skont il-każ, abbażi tat-termini tar-Regolamenti applikabbli: il-Hydrocarbons Licensing Directive Regulations tal-1995 (S.I. 1995 No. 1434), il-Petroleum Licensing (Applications) Regulations tal-2015 (SI 2015 No. 766) u l-Offshore Petroleum Licensing (Offshore Safety Directive) Regulations tal-2015 (SI 2015 No. 385). Fl-1 ta’ Ottubru 2016, il-funzjonijiet tas-Segretarju tal-Istat f’dan ir-rigward ġew ittrasferiti lill-OGA bis-saħħa tal-Energy (Transfer of Functions, Consequential Amendments and Revocation) Regulations tal-2016 (http://www.legislation.gov.uk/uksi/2016/912/pdfs/uksi_2016), li jipprevedu li kulma jsir (jew li għandu effett daqslikieku sar) mis-Segretarju tal-Istat jew b’rabta miegħu fir-rigward ta’ dawn il-funzjonijiet trasferiti, issa għandu effett, sakemm ikun meħtieġ biex jitkompla l-effett ta’ dan wara l-1 ta’ Ottubru 2016, daqslikieku sar mill-OGA jew b’rabta magħha. Id-determinazzjonijiet se jsiru fil-kuntest tal-ħtieġa kontinwa għal tiftix komprensiv, effiċjenti u sikur sabiex ikunu identifikati r-riżorsi taż-żejt u tal-gass tar-Renju Unit filwaqt li jitqiesu kif xieraq l-aspetti ambjentali.

Qafas “Innovattiv”

L-applikazzjonijiet għal-liċenzji se jitqiesu fid-dawl tal-approċċ innovattiv adottat għall-Programmi ta’ Ħidma tal-Perjodu Inizjali (“Programmi ta’ Ħidma”) għal-liċenzji. Dawn il-Programmi ta’ Ħidma se jinkorporaw il-kombinament flessibbli ta’ mhux aktar minn tliet Fażijiet (A, B u C) fil-Perjodu Inizjali. Dan se jgħin biex jiġi żgurat li l-Programmi ta’ Ħidma għall-blokka(blokok) li għalihom qed issir l-applikazzjoni jkunu xierqa għall-isfidi ġeotekniċi u ta’ tipi oħra li jridu jiġu indirizzati f’żona partikolari, filwaqt li jiġu ottimizzati l-fatturi elenkati fil-Paragrafu 3. Il-flessibbiltà li qed tingħata mill-kombinament ta’ mhux aktar minn tliet fażijiet tippermetti wkoll li l-applikanti jfasslu Programm ta’ Ħidma xieraq għall-pjanijiet u għar-rekwiżiti partikolari tagħhom.

Il-Fażi A tal-Programm ta’ Ħidma tinkludi perjodu li fih se jitwettqu Studji Ġeotekniċi u Riproċessar Ġeofiżiku tad-Data; Il-Fażi B tal-Programm ta’ Ħidma se tkun perjodu fejn se tinġabar data Siżmika Ġdida; Il-Fażi C tal-Programm ta’ Ħidma se tkun għat-tħaffir esploratorju u/jew ta’ evalwazzjoni. L-applikanti jistgħu jiddeċiedu l-kombinament tal-Fażijiet, jekk isirux it-tliet Fażijiet kollha, direttament il-Fażi B segwita mill-Fażi C, direttament il-Fażi C, inkella l-Fażi A direttament għall-Fażi C.

Il-Fażi A u l-Fażi B mhumiex obbligatorji u jistgħu ma jkunux xierqa f’ċirkostanzi partikolari, iżda kull applikazzjoni trid tipproponi Fażi C, ħlief meta l-applikant jaħseb li ma tkun meħtieġa l-ebda esplorazzjoni u jipproponi li jmur direttament għall-iżvilupp (jiġifieri “direttament għat-Tieni Perjodu”). F’dan il-każ, jenħtieġ li l-applikazzjonijiet isiru skont il-gwida disponibbli fuq is-sit web tal-OGA.

Il-liċenzji mogħtija f’dan iċ-ċiklu jista’ jkollhom Perjodu Inizjali ta’ mhux aktar minn disa’ snin. It-tul ta’ żmien tal-liċenzja u l-fażijiet se jeħtieġu ġustifikazzjoni fil-kuntest tal-programm ta’ ħidma propost, u se jkunu s-suġġett ta’ diskussjoni fil-waqt tal-applikazzjoni.

L-applikazzjonijiet li l-fażi tal-bidu tagħhom hija l-Fażi A jew B se jiġu ġġudikati abbażi tal-kriterji li ġejjin:

(a)	Il-vijabbiltà finanzjarja tal-applikant;

(b)	Il-kapaċità teknika tal-applikant li se tiġi vvalutata parzjalment skont kif muri mill-kwalità tal-analiżi relatata mal-blokka;

(c)	Il-mod li bih l-applikant jipproponi li jwettaq l-attivitajiet li se jkunu permessi skont il-liċenzja, inkluża l-kwalità tal-Programm ta’ Ħidma mressaq għall-evalwazzjoni tal-potenzjal sħiħ taż-żona li għaliha qed issir l-applikazzjoni;

(d)

Il-kapaċità tas-sikurezza u dik ambjentali. Skont l-Offshore Petroleum Licensing (Offshore Safety Directive) Regulations tal-2015, id-detenturi prospettivi kollha tal-liċenzji offshore, jiġifieri inkluż is-sħab kollha fi grupp ta’ applikanti, iridu jipprovdu informazzjoni dwar il-kapaċità tagħhom tas-sikurezza u dik ambjentali bħala sostenn għall-applikazzjoni għal-liċenzja. Gwida ulterjuri fir-rigward tar-rekwiżiti kollha tas-sikurezza u dawk ambjentali tinsab fuq http://www.hse.gov.uk/osdr/assets/docs/appendix-c.pdf; kif ukoll

(e)	Meta l-applikant ikollu jew kellu liċenzja mogħtija skont l-Att tal-Petroleum tal-1998, jew ittrattata daqslikieku ngħatat skontu, kull nuqqas ta’ effiċjenza u ta’ responsabbiltà murija mill-applikant f’operazzjonijiet skont dik il-liċenzja.

Il-liċenzji b’Fażi B għandhom jispeċifikaw perjodu ta’ żmien biex il-liċenzja tiskadi fi tmiem din il-fażi jekk id-Detentur tal-liċenżja ma jkunx issodisfa l-OGA bil-kapaċità teknika u finanzjarja tiegħu biex itemm il-Programm ta’ Ħidma. Għal-liċenzji b’Fażi A iżda bl-ebda Fażi B, il-liċenzja se tispeċifika wkoll perjodu biex il-liċenzja tiskadi fi tmiem din il-fażi jekk id-Detentur tal-liċenżja ma jkunx issodisfa lill-OGA bil-kapaċità teknika u finanzjarja tiegħu biex itemm il-Programm ta’ Ħidma.

10.

L-applikazzjonijiet fejn il-Fażi tal-bidu hija l-Fażi C se jiġu ġġudikati abbażi tal-kriterji li ġejjin:

(a)	Il-vijabbiltà finanzjarja tal-applikant u l-kapaċità finanzjarja tiegħu biex iwettaq l-attivitajiet li se jkunu permessi bil-liċenzja waqt il-Perjodu Inizjali, inkluż il-Programm ta’ Ħidma mressaq għall-evalwazzjoni tal-potenzjal sħiħ taż-żona fil-blokka;

(b)	Il-kapaċità teknika tal-operatur propost għas-superviżjoni tal-operazzjonijiet u b’mod partikolari l-operazzjonijiet ta’ tħaffir;

(c)	Il-mod li bih l-applikant jipproponi li jwettaq l-attivitajiet li jkunu permessi bil-liċenzja, inkluż il-kwalità tal-Programm ta’ Ħidma mressaq għall-evalwazzjoni tal-potenzjal sħiħ taż-żona li għaliha qed issir l-applikazzjoni;

(d)

Il-kapaċità tas-sikurezza u dik ambjentali. Skont l-Offshore Petroleum Licensing (Offshore Safety Directive) Regulations tal-2015, id-detenturi prospettivi kollha tal-liċenzji offshore, jiġifieri inkluż is-sħab kollha fi grupp ta’ applikanti, iridu jipprovdu informazzjoni dwar il-kapaċità tagħhom tas-sikurezza u dik ambjentali bħala sostenn għall-applikazzjoni għal-liċenzja. Gwida addizzjonali fir-rigward tar-rekwiżiti kollha tas-sikurezza u dawk ambjentali tinsab fuq http://www.hse.gov.uk/osdr/assets/docs/appendix-c.pdf; kif ukoll

(e)	Meta l-applikant ikollu jew kellu liċenzja mogħtija jew ġie ttrattat daqslikieku ngħatatlu skont l-Att dwar il-Petroleum tal-1998, kwalunkwe nuqqas ta’ effiċjenza u ta’ responsabbiltà muri mill-applikant f’operazzjonijiet skont dik il-liċenzja.

Gwida

11.

Gwida addizzjonalii tinsab fuq is-sit web tal-OGA: https://www.ogauthority.co.uk/licensing-consents/licensing-rounds/

Offerti għal-Liċenzji

12.

Sakemm ma tkunx meħtieġa Valutazzjoni Xierqa għal xi Blokka partikolari (ara l-Paragrafu 15 hawn isfel), kull offerta mill-OGA ta’ liċenzja f’konformità ma’ din l-istedina, se ssir fi żmien tmintax-il xahar mid-data ta’ dan l-Avviż.

13.

L-OGA ma taċċetta l-ebda responsabbiltà għal kwalunkwe kost imġarrab mill-applikant waqt il-kunsiderazzjoni tal-applikazjoni tiegħu jew waqt li jkun qed jagħmilha.

Valutazzjonijiet Ambjentali

14.

Is-Segretarju tal-Istat wettaq Stima (Valutazzjoni) Ambjentali Strateġika (Strategic Environmental Assessment/SEA) skont id-Direttiva 2001/42/KE dwar l-istima tal-effetti ta’ ċerti pjanijiet u programmi fuq l-ambjent taż-żoni kollha li se jiġu offruti f’dan il-Ċiklu. Is-sejbiet ta’ dik il-SEA jinsabu fuq is-sit web gov.uk tal-SEA għall-enerġija offshore:

https://www.gov.uk/offshore-energy-strategic-environmental-assessment-sea-an-overview-of-the-sea-process

15.

Il-liċenzji skont din l-istedina se jiġu offruti biss jekk, skont id-Direttiva dwar il-Ħabitats (id-Direttiva tal-Kunsill 92/43/KEE tal-21 ta’ Mejju 1992 dwar il-konservazzjoni tal-ħabitat naturali u tal-fawna u l-flora selvaġġa):

(a)	l-attivitajiet li għandhom jitwettqu bil-liċenzja aktarx mhux se jkollhom effett sinifikanti fuq il-ġestjoni ta’ Żona Speċjali ta’ Konservazzjoni (ŻSK) jew ta’ Żona Speċjali ta’ Protezzjoni (ŻSP), jew jekk

(b)	Valutazzjoni Xierqa tkun aċċertat li l-attivitajiet mhux se jkollhom effetti negattivi fuq l-integrità ta’ ŻSKs jew ŻSPs bħal dawn; jew

(c)

f’każ fejn l-attivitajiet jiġu vvalutati li x’aktarx jikkawżaw effetti negattivi bħal dawn, diment li

(i)	ikun hemm raġunijiet imperattivi ta’ interess pubbliku prevalenti għall-għoti tal-liċenzja,

(ii)	jittieħdu miżuri xierqa ta’ kumpens, u

(iii)

ma hemmx soluzzjonijiet alternattivi.

16.

Kuntatt:

Duncan Bruce

Oil and Gas Authority

21 Bloomsbury Street

London WC1B 3HF

UNITED KINGDOM

Tel. +44 3000671675

Is-sit web tal-OGA: https://www.ogauthority.co.uk/licensing-consents/licensing-rounds/