IL-KUMMISSJONI EWROPEA
Brussell, 23.10.2019
COM(2019) 491 final
Rakkomandazzjoni għal
DEĊIŻJONI TAL-KUNSILL
li tawtorizza l-ftuħ ta' negozjati f'isem l-Unjoni Ewropea għall-konklużjoni ta' Ftehim ta' Sħubija dwar is-Sajd Sostenibbli u ta' Protokoll mal-Gvern tad-Danimarka u mal-Gvern Awtonomu ta' Greenland
{SWD(2019) 385 final} - {SWD(2019) 386 final}
MEMORANDUM TA’ SPJEGAZZJONI
1. KUNTEST TAR-RAKKOMANDAZZJONI
•Raġunijiet u objettivi tal-proposta
Il-Kummissjoni qed tipproponi li tinnegozja ftehim ġdid ta’ sħubija dwar is-sajd sostenibbli (SFPA) u protokoll ġdid ma’ Greenland li jkunu jissodisfaw il-bżonnijiet tal-flotta tal-Unjoni u jkunu konformi mar-Regolament (UE) Nru 1380/2013 1 dwar il-politika komuni tas-sajd (PKS) u mal-konklużjonijiet tal-Kunsill tad-19 ta’ Marzu 2012 dwar Komunikazzjoni tal-Kummissjoni dwar id-Dimensjoni Esterna tal-politika komuni tas-sajd.
•Konsistenza mad-dispożizzjonijiet eżistenti fil-qasam ta’ politika
Il-ftehim attwali ta’ sħubija dwar is-sajd (FPA) bejn l-UE u Greenland 2 ġie ffirmat fit-28 ta’ Ġunju 2007 3 . Qed jiġi propost li jiġi nnegozjat SFPA ġdid biex jiġu integrati ċerti dispożizzjonijiet tar-Regolament (UE) Nru 1380/2013 4 li mhumiex koperti mill-FPA.
Il-protokoll attwali ta’ ħames snin 5 tal-FPA daħal fis-seħħ fl-1 ta’ Jannar 2016 6 u se jiskadi fil-31 ta’ Diċembru 2020. Huwa jistabbilixxi l-opportunitajiet tas-sajd għall-flotta tal-Unjoni u l-kontribuzzjoni finanzjarja korrispondenti li l-Unjoni u s-sidien tal-bastimenti tal-UE jridu jħallsu.
Il-protokoll attwali jippermetti li l-flotta tal-UE tistad fl-ilmijiet ta’ Greenland għall-bakkaljaw, għar-redfish pelaġiku u demersali, għall-ħalibatt ta’ Greenland, għall-gamblu, għall-grenadier u għall-kapelin, għal opportunitajiet ta’ sajd annwali indikattivi ta’ 42 726 tunnellata. Fis-sajd hemm involuti bastimenti minn tmien Stati Membri (id-Danimarka, l-Estonja, Franza, il-Ġermanja , il-Latvja, il-Litwanja, l-Iżvezja u r-Renju Unit). L-UE tittrasferixxi wkoll parti mill-kwota maqbula lejn in-Norveġja u l-Gżejjer Faeroe, bi skambju għall-aċċess tal-bastimenti tal-UE għall-ilmijiet tagħhom. Minbarra t-tariffi li l-flotta tal-Unjoni tħallas lil Greenland, l-UE tħallas kumpens annwali ta’ EUR 13 168 978 (ikkalkulat fuq il-bażi ta’ prezzijiet ta’ referenza għal kull speċi), inkluża riżerva finanzjarja ta’ EUR 1 700 000 għal kwantitajiet addizzjonali possibbli. Il-baġit tal-UE jipprevedi wkoll ammont ta’ EUR 2 931 999 għall-appoġġ tal-politika settorjali tas-sajd ta’ Greenland.
Dan huwa ftehim li jittratta l-ispeċijiet imħallta. L-allokazzjoni tal-kwoti lill-Istati Membri hija soġġetta għad-dispożizzjonijiet tar-regolamentazzjoni dwar il-qabdiet totali permissibbli u l-kwoti 7 . L-SFPAs jgħinu biex jippromwovu l-objettivi tal-PKS fil-livell internazzjonali u jiżguraw li l-attivitajiet tas-sajd tal-Unjoni ’l barra mill-ilmijiet tagħha jissejsu fuq l-istess prinċipji u standards li japplikaw skont il-liġi tal-Unjoni. Barra minn hekk, huma jrawmu l-kooperazzjoni xjentifika bejn l-UE u s-sħab tagħha, jippromwovu t-trasparenza u s-sostenibbiltà sabiex ir-riżorsi tas-sajd jiġu ġestiti aħjar u jinkoraġġixxu l-governanza billi jappoġġaw il-monitoraġġ, il-kontroll u s-sorveljanza tal-attivitajiet tal-flotot nazzjonali u barranin u billi jipprovdu l-fondi biex jiġi miġġieled is-sajd illegali, mhux irrappurtat u mhux irregolat. L-SFPAs jikkontribwixxu għall-iżvilupp sostenibbli tal-industriji lokali tas-sajd u għall-promozzjoni tat-tkabbir u ta’ xogħol deċenti b’rabta mal-attività marittima. Huma jsaħħu l-pożizzjoni tal-UE f’organizzazzjonijiet tas-sajd internazzjonali u reġjonali (b’mod partikolari, fil-każ ta’ Greenland, il-Kunsill Internazzjonali għall-Esplorazzjoni tal-Baħar u l-Organizzazzjoni tas-Sajd fl-Atlantiku tal-Majjistral) 8 .
•Konsistenza ma’ politiki oħra tal-Unjoni
In-negozjar ta’ ftehim ġdid u ta’ protokoll ġdid ma’ Greenland huwa konformi mal-azzjoni esterna tal-UE b’rabta mal-pajjiżi u t-territorji extra-Ewropej (PTEE), u b’mod partikolari, mal-objettivi tagħha f’dak li għandu x’jaqsam mal-ħarsien tal-prinċipji demokratiċi u tad-drittijiet tal-bniedem.
2. ELEMENTI ĠURIDIĊI TAR-RAKKOMANDAZZJONI
•Bażi ġuridika
Il-bażi ġuridika għad-Deċiżjoni hija l-Artikolu 218 tat-Trattat dwar il-Funzjonament tal-Unjoni Ewropea (TFUE), li tistabbilixxi l-proċedura għan-negozjar u l-konklużjoni ta’ ftehimiet internazzjonali.
•Sussidjarjetà (għall-kompetenza mhux esklużiva)
Mhux applikabbli (kompetenza esklużiva).
•Proporzjonalità
Id-Deċiżjoni hija proporzjonali mal-objettiv.
•Għażla tal-istrument
L-istrument huwa previst fl-Artikolu 218(3) u (4) tat-TFUE.
3.RIŻULTATI TAL-EVALWAZZJONIJIET EX-POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
•Evalwazzjonijiet ex-post/kontrolli tal-idoneità tal-leġiżlazzjoni eżistenti
Fl-2019, il-Kummissjoni wettqet evalwazzjoni ex-post tal-FPA u tal-protokoll attwali ma’ Greenland u evalwazzjoni ex ante tat-tiġdid possibbli tagħhom. Il-konklużjonijiet tagħha huma mogħtija b’mod separat f’dokument ta’ ħidma tal-persunal.
L-evalwazzjoni kkonkludiet li s-settur tas-sajd tal-UE għandu interess ċar fis-sajd fi Greenland u li t-tiġdid tal-ftehim u tal-protokoll jikkontribwixxi għal governanza mtejba tas-sajd fir-reġjun.
Minħabba li Greenland għandha żona kbira tas-sajd taħt il-ġuriżdizzjoni tagħha, għall-UE huwa importanti li żżomm strument li jippermetti kooperazzjoni settorjali mill-qrib ma’ dan l-attur ewlieni tal-governanza tal-oċeani fil-livell sottoreġjonali. Dan se jippermetti lill-UE ssaħħaħ ir-rwol tagħha fis-sajd Nordiku, anki permezz tal-iskambji ta’ kwoti man-Norveġja u mal-Gżejjer Faeroe.
Għall-bastimenti tal-UE, dan ifisser li jinżamm l-aċċess għal żona importanti tas-sajd fejn ikunu jistgħu jintużaw strateġiji tal-qbid f’qafas legali internazzjonali pluriennali.
Għall-awtoritajiet ta’ Greenland, l-għan hu li jkomplu jżommu relazzjonijiet mal-UE biex tissaħħaħ il-governanza tal-oċeani u biex jibbenefikaw mill-appoġġ settorjali speċifiku li jipprevedi appoġġ finanzjarju pluriennali għall-ġestjoni tas-sajd.
•Konsultazzjonijiet mal-partijiet ikkonċernati
Il-Kummissjoni kkonsultat lill-Istati Membri, lir-rappreżentanti tal-industrija, lill-organizzazzjonijiet internazzjonali tas-soċjetà ċivili u lill-amministrazzjoni tas-sajd u tas-soċjetà ċivili ta’ Greenland bħala parti mill-evalwazzjoni.
•Ġbir u użu tal-għarfien espert
Mhux applikabbli.
•Valutazzjoni tal-impatt
Mhux applikabbli.
•Idoneità regolatorja u simplifikazzjoni
Mhux applikabbli.
•Drittijiet fundamentali
Id-direttivi tan-negozjati proposti (stabbiliti f’anness tad-Deċiżjoni) jitolbu lill-Kummissjoni biex tinnegozja l-inklużjoni fl-SFPA l-ġdid ta’ klawżola dwar il-konsegwenzi tal-ksur tad-drittijiet tal-bniedem u tal-prinċipji demokratiċi.
4. IMPLIKAZZJONIJIET BAĠITARJI
Il-protokoll il-ġdid jipprevedi l-ħlas ta’ kontribuzzjoni finanzjarja lil Greenland. L-allokazzjonijiet baġitarji rilevanti għall-approprjazzjonijiet ta’ impenn u ta’ pagament se jiddaħħlu kull sena fil-linja baġitarja għall-“ftehimiet ta’ sħubija dwar is-sajd sostenibbli” (11 03 01) u li dawn l-allokazzjonijiet ikunu kompatibbli mal-ipprogrammar finanzjarju tal-qafas finanzjarju pluriennali (QFP) rilevanti. L-ammonti għall-impenji u għall-pagamenti huma stabbiliti fil-proċedura baġitarja annwali, inkluża l-linja ta’ riżerva għall-protokolli li jkun għad iridu jidħlu fis-seħħ fil-bidu tas-sena 9 .
5. ELEMENTI OĦRA
•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar
In-negozjati mistennija jinbdew fir-raba’ kwart tal-2019.
•Spjegazzjoni fid-dettall tad-dispożizzjonijiet speċifiċi tal-proposta
Il-Kummissjoni tirrakkomanda li:
il-Kunsill jawtorizzaha tiftaħ u twettaq negozjati għall-konklużjoni ta’ SFPA u protokoll ġodda ma’ Greenland;
in-negozjati jsiru f’konsultazzjoni mal-kumitat speċjali, f’konformità mat-TFUE; kif ukoll
li l-Kunsill japprova d-direttivi tan-negozjati mehmużin ma’ din ir-Rakkomandazzjoni.
Rakkomandazzjoni għal
DEĊIŻJONI TAL-KUNSILL
li tawtorizza l-ftuħ ta’ negozjati dwar Ftehim ta’ Sħubija dwar is-Sajd Sostenibbli u Protokoll bejn l-Unjoni Ewropea u l-Gvern tad-Danimarka u l-Gvern Awtonomu ta’ Greenland
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 218(3) u (4) tiegħu,
Wara li kkunsidra r-rakkomandazzjoni tal-Kummissjoni Ewropea,
Billi:
Fit-28 ta’ Ġunju 2007 ġie ffirmat Ftehim ta’ Sħubija dwar is-Sajd bejn il-Komunità Ewropea, minn naħa waħda, u l-Gvern tad-Danimarka u l-Gvern Awtonomu ta’ Greenland, min-naħa l-oħra (FPA) flimkien ma’ Protokoll li jistabbilixxi l-opportunitajiet tas-sajd u l-kontribuzzjoni finanzjarja previsti fl-FPA 10 . Wara li ntemmet il-validità ta’ dak il-Protokoll, ġie ffirmat Protokoll ġdid u daħal fis-seħħ fl-1 ta’ Jannar 2016 11 . Se jiskadi fil-31 ta’ Diċembru 2020.
L-FPA ma jkoprix ċerti dispożizzjonijiet tar-Regolament (UE) 1380/2013 tal-Parlament Ewropew u tal-Kunsill 12 . L-opportunitajiet tas-sajd u l-kontribuzzjoni finanzjarja applikabbli mill-1 ta’ Jannar 2021 jenħtieġ li jiġu stabbiliti wkoll wara l-iskadenza imminenti tal-Protokoll attwali. Għaldaqstant, il-Kummissjoni qed tipproponi li tinnegozja Ftehim u Protokoll ġodda li jissodisfaw il-ħtiġijiet tal-flotta tal-Unjoni u li dan qed isir ukoll f’konformità mar-Regolament (UE) Nru 1380/2013.
Għaldaqstant, jenħtieġ li jinfetħu negozjati bil-ħsieb li jiġi konkluż Ftehim ġdid ta’ Sħubija dwar is-Sajd Sostenibbli u Protokoll ġdid mal-Gvern tad-Danimarka u mal-Gvern Awtonomu ta’ Greenland.
ADOTTA DIN ID-DEĊIŻJONI:
Artikolu 1
Il-Kummissjoni hija b’dan awtorizzata tinnegozja, f'isem l-Unjoni, Ftehim ġdid ta’ Sħubija dwar is-Sajd Sostenibbli u Protokoll ġdid mal-Gvern tad-Danimarka u mal-Gvern Awtonomu ta’ Greenland.
Artikolu 2
In-negozjati għandhom jitwettqu b’konsultazzjoni mal-Grupp ta’ Ħidma tal-Kunsill dwar il-Politika Esterna tas-Sajd u abbażi tad-direttivi tan-negozjati stabbiliti fl-Anness ta’ din id-Deċiżjoni.
Artikolu 3
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 23.10.2019
COM(2019) 491 final
ANNESS
tar-
Rakkomandazzjoni
għal DEĊIŻJONI TAL-KUNSILL li tawtorizza l-ftuħ ta' negozjati f'isem l-Unjoni Ewropea għall-konklużjoni ta' Ftehim ta' Sħubija dwar is-Sajd Sostenibbli u ta' Protokoll mal-Gvern tad-Danimarka u mal-Gvern Awtonomu ta' Greenland
{SWD(2019) 385 final} - {SWD(2019) 386 final}
ANNESS
Direttivi tan-negozjati ta’ Ftehim ta’ Sħubija dwar is-Sajd Sostenibbli u Protokoll bejn l-Unjoni Ewropea u l-Gvern tad-Danimarka u l-Gvern Awtonomu ta’ Greenland
(1)L-objettiv tan-negozjati huwa l-konklużjoni ta’ Ftehim ta’ Sħubija dwar is-Sajd Sostenibbli (SFPA) u Protokoll bejn l-UE u Greenland f’konformità mar-Regolament (UE) Nru 1380/2013 u mal-Konklużjonijiet tal-Kunsill tad-19 ta’ Marzu 2012 dwar Komunikazzjoni mill-Kummissjoni dwar id-dimensjoni esterna tal-Politika Komuni tas-Sajd.
(2)L-SFPA jenħtieġ li jistabbilixxi l-qafas, il-prinċipji ġenerali u l-objettivi li se jiffurmaw il-bażi tas-sħubija l-ġdida ma’ Greenland. Għaldaqstant, jenħtieġ li jkun fih klawżola li tħassar il-ftehim attwali ta’ sħubija dwar is-sajd bejn il-partijiet.
(3)Jenħtieġ li s-sħubija l-ġdida tippromwovi sajd sostenibbli u responsabbli filwaqt li tiżgura benefiċċji reċiproċi għall-UE u għal Greenland. B’mod partikolari, matul in-negozjati, il-Kummissjoni jenħtieġ li timmira li tilħaq l-objettivi stabbiliti fid-dettall hawn taħt:
·tiżgura l-aċċess għaż-żona tas-sajd ta’ Greenland u l-awtorizzazzjonijiet meħtieġa għall-flotta tas-sajd tal-UE biex tistad f’dik iż-żona;
·tiżgura s-sostenibbiltà ambjentali tal-attivitajiet tas-sajd u tippromwovi l-governanza tal-oċeani fil-livell internazzjonali, filwaqt li tqis l-aqwa pariri xjentifiċi disponibbli u l-pjanijiet ta’ ġestjoni rilevanti adottati mill-Organizzazzjonijiet Reġjonali tal-Ġestjoni tas-Sajd (RFMOs). Jenħtieġ li l-attivitajiet tas-sajd ikunu mmirati biss lejn ir-riżorsi disponibbli, filwaqt li titqies il-kapaċità tas-sajd tal-flotta lokali u titqies b’mod speċjali n-natura migratorja ferm tal-istokkijiet ikkonċernati;
·tfittex sehem xieraq ta’ riżorsi żejda tas-sajd li jkun konformi għalkollox mal-interessi tal-flotta tal-UE, f’każ li jkun hemm flotot ta’ pajjiżi terzi interessati f’dawn ir-riżorsi wkoll;
·tapplika l-istess kundizzjonijiet tekniċi għall-flotot kollha tal-pajjiżi terzi, filwaqt li tqis it-trasferiment possibbli lejn pajjiżi Nordiċi oħra ta’ parti mill-kwoti miftiehma tal-UE;
·tiżgura li l-kontribuzzjoni finanzjarja tal-UE għall-aċċess għas-sajd tkun ibbażata fuq l-attività storika tal-flotta tal-UE fir-reġjun u fuq dik mistennija fil-ġejjieni, fid-dawl tal-aqwa valutazzjonijiet xjentifiċi u ta’ dawk l-aktar aġġornati;
·toħloq djalogu li jsaħħaħ l-implimentazzjoni ta’ politika tas-sajd responsabbli minn Greenland, marbuta mal-objettivi ta’ żvilupp tagħha, b’mod partikolari fir-rigward tal-governanza tas-sajd, il-ġlieda kontra s-sajd illegali, mhux irrappurtat u mhux irregolat, il-kontroll, il-monitoraġġ u s-sorveljanza tal-attivitajiet tas-sajd u l-għoti ta’ pariri xjentifiċi;
·tinkludi klawżola dwar il-konsegwenzi tal-ksur tad-drittijiet tal-bniedem u tal-prinċipji demokratiċi.
·tiżgura li l-Protokoll se jikkontribwixxi għall-promozzjoni tat-tkabbir u ta’ xogħol deċenti b’rabta mal-attività marittima, filwaqt li tqis il-konvenzjonijiet rilevanti tal-Organizzazzjoni Internazzjonali tax-Xogħol (ILO).
(4)B’mod partikolari, il-protokoll jenħtieġ li jistabbilixxi:
·l-opportunitajiet tas-sajd, kategorija kategorija, li jridu jingħataw lill-flotta tal-UE;
·il-kumpens finanzjarju stabbilit għal Greenland u l-kundizzjonijiet ta’ pagament rilevanti; kif ukoll
·l-ammont li jrid jitħallas f’appoġġ settorjali u l-mekkaniżmi għall-implimentazzjoni tiegħu.