IL-KUMMISSJONI EWROPEA
Brussell, 25.7.2019
COM(2019) 348 final
2019/0160(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f'isem l-Unjoni Ewropea fil-Kumitat tal-FSE stabbilit mill-Ftehim Preliminari lejn Ftehim ta' Sħubija Ekonomika bejn il-Komunità Ewropea u l-Istati Membri tagħha, fuq naħa waħda, u l-Parti Afrika Ċentrali, fuq in-naħa l-oħra, rigward l-adozzjoni proposta tal-lista ta’ persuni lesti u kapaċi jaġixxu bħala arbitri
MEMORANDUM TA’ SPJEGAZZJONI
1.Suġġett tal-proposta
Din il-proposta tirrigwarda d-deċiżjoni li tistabbilixxi l-pożizzjoni li għandha tiġi adottata f’isem l-Unjoni Ewropea (“l-Unjoni”) fil-Kumitat tal-FSE stabbilit mill-Ftehim Preliminari lejn Ftehim ta’ Sħubija Ekonomika bejn il-Komunità Ewropea u l-Istati Membri tagħha, minn naħa, u l-Parti Afrika Ċentrali, min-naħa l-oħra (“il-Ftehim”) 1 , rigward l-adozzjoni proposta tal-lista ta’ persuni preparati u kapaċi jaġixxu bħala arbitri.
2.Kuntest tal-proposta
2.1.Il-Ftehim ta’ Sħubija Ekonomika UE - Afrika Ċentrali
L-għan tal-ftehim huwa li jistabbilixxi qafas inizjali għal sħubija ekonomika reġjonali sħiħa f’konformità mal-Ftehim ta’ Cotonou. Sa issa, il-Parti Afrika Ċentrali, hija magħmula mir-Repubblika tal-Kamerun. Mill-4 ta’ Awwissu 2014, il-Ftehim ġie applikat fuq bażi proviżorja.
2.2.Il-Kumitat FSE
Il-Kumitat tal-FSE huwa l-organu istituzzjonali konġunt ta’ dan il-ftehim. L-Artikolu 92 tal-ftehim jistipula li l-Kumitat tal-FSE ikun responsabbli mill-amministrazzjoni tal-oqsma kollha koperti mill-ftehim u mit-twettiq ta’ kull kompitu msemmi fih. Il-Kumitat tal-FSE jieħu d-deċiżjonijiet tiegħu bi qbil ġenerali. Il-funzjonament tal-Kumitat tal-FSE huwa deskritt fir-regoli ta’ proċedura tiegħu 2 .
2.3.Att stipulat mill-Kumitat tal-FSE
Fil-ħames laqgħa tiegħu tal-[data], il-Kumitat tal-FSE għandu jadotta deċiżjoni dwar l-adozzjoni tal-lista ta’ arbitri (“l-att previst”) skont l-Artikolu 85 tal-Ftehim.
L-Artikolu 85(1) tal-Ftehim jistipula li “il-Kumitat tal-FSE għandu jistabbilixxi lista ta’ 15-il individwu li huma lesti u kapaċi jaġixxu ta’ arbitri. ”
L-għan tal-att previst huwa li jistabbilixxi lista ta’ 15-il individwu li jistgħu jservu bħala arbitri f’każ ta’ proċedura għal soluzzjoni ta’ tilwim skont it-Titolu VI tal-Ftehim. L-adozzjoni ta’ din il-lista hija element essenzjali biex jiġi finalizzat il-qafas operazzjonali għad-dispożizzjonijiet tal-Ftehim dwar l-Evitar u s-Soluzzjoni tat-Tilwim.
3.Il-pożizzjoni li għandha tiġi adottata f’isem l-Unjoni
Din il-proposta għal Deċiżjoni tal-Kunsill tiddetermina l-pożizzjoni li għandha tittieħed f’isem l-Unjoni fil-Kumitat tal-FSE stabbilit mill-Ftehim ta’ Sħubija Ekonomika interim bejn il-Komunità Ewropea u l-Istati Membri tagħha, minn naħa waħda, u l-Parti tal-Afrika Ċentrali, min-naħa l-oħra, fir-rigward tal-istabbiliment tal-lista ta’ persuni lesti u kapaċi jservu bħala arbitri skont l-Artikolu 85 tal-Ftehim.
Il-partijiet għall-Ftehim qablu ma’ dan l-abbozz ta’ Deċiżjoni, inizjalawh fir-raba’ laqgħa tal-Kumitat tal-FSE fit-18 u d-19 ta’ Frar 2019 u, soġġett għall-proċeduri ta’ teħid ta’ deċiżjonijiet tal-Unjoni Ewropea, għandhom jadottawh fil-laqgħa li jmiss tal-Kumitat tal-FSE, li għandha ssir fi tmiem l-2019.
Din id-deċiżjoni hija essenzjali sabiex id-dispożizzjonijiet tal-Ftehim tat-Titolu VI dwar l-Evitar u Soluzzjoni tat-Tilwim isiru operazzjonali u biex b'hekk tkun żgurata l-implimentazzjoni bla xkiel tal-Ftehim.
4.Il-Bażi ġuridika proċedurali
4.1.Il-Bażi ġuridika proċedurali
4.1.1.Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jipprevedi deċiżjonijiet li jistabbilixxu “il-pożizzjonijiet li għandhom jiġu adottati f’isem l-Unjoni f’sede stabbilita bi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim”.
Il-kunċett ta’ “atti li jkollhom effetti legali” jinkludi atti li jkollhom effetti legali bis-saħħa tar-regoli tad-dritt internazzjonali li jirregolaw il-korp inkwistjoni. Dan jinkludi wkoll l-istrumenti li ma għandhomx effett vinkolanti skont id-dritt internazzjonali, iżda li “jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatura tal-UE 3 ”.
4.1.2.Applikazzjoni għal dan il-każ
Il-Kumitat tal-FSE huwa eżempju maħluq minn Ftehim, jiġifieri l-Ftehim preliminari lejn Ftehim ta' Sħubija Ekonomika bejn il-Komunità Ewropea u l-Istati Membri tagħha, min-naħa, u l-Parti Afrika Ċentrali, min-naħa l-oħra.
L-att, li l-Kumitat huwa mitlub jadotta, jikkostitwixxi att li għandu effetti legali. L-att previst ikun vinkolanti skont id-dritt internazzjonali b’konformità mal-Artikolu 85 tal-Ftehim.
L-att previst ma jissupplimentax u ma jemendax il-qafas istituzzjonali tal-Ftehim.
Għalhekk, il-bażi ġuridika proċedurali tad-deċiżjoni proposta hija l-Artikolu 218(9) TFUE.
4.2.Il-Bażi ġuridika sostantiva
4.2.1.Prinċipji
Il-bażi ġuridika sostantiva għal deċiżjoni skont l-Artikolu 218(9) TFUE tiddependi primarjament fuq l-objettiv u l-kontenut tal-att previst li fir-rigward tiegħu tiġi meħuda pożizzjoni f’isem l-Unjoni. Jekk l-att previst ikollu żewġ għanijiet jew żewġ komponenti, u jekk wieħed minn dawn l-għanijiet jew komponenti jkun jista’ jiġi identifikat bħala dak ewlieni, filwaqt li l-ieħor ikun sempliċiment inċidentali, id-deċiżjoni skont l-Artikolu 218(9) tat-TFUE trid tkun imsejsa fuq bażi ġuridika sostantiva waħda, jiġifieri dik rikjesta mill-għan jew mill-komponent ewlieni jew predominanti.
4.2.2.Applikazzjoni għal dan il-każ
L-objettiv ewlieni u l-kontenut tal-att previst huma relatati mal-politika kummerċjali komuni. Għalhekk, il-bażi ġuridika sostantiva tad-Deċiżjoni proposta hija l-Artikolu 207 tat-TFUE.
4.3.Konklużjoni
Jenħtieġ li l-bażi ġuridika tad-deċiżjoni proposta tkun l-ewwel sub-paragrafu tal-Artikolu 207(4) TFUE flimkien mal-Artikolu 218(9) tat-TFUE.
2019/0160 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f'isem l-Unjoni Ewropea fil-Kumitat tal-FSE stabbilit mill-Ftehim Preliminari lejn Ftehim ta' Sħubija Ekonomika bejn il-Komunità Ewropea u l-Istati Membri tagħha, fuq naħa waħda, u l-Parti Afrika Ċentrali, fuq in-naħa l-oħra, rigward l-adozzjoni proposta tal-lista ta’ persuni lesti u kapaċi jaġixxu bħala arbitri
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea (TFUE), u b’mod partikulari l-Artikoli 207(4) u l-ewwel subparagrafu tal-Artikolu 207(4) flimkien mal-Artikolu 218(9) tiegħu,
Wara li kkunsidra l-Ftehim Preliminari lejn Ftehim ta’ Sħubija Ekonomika bejn il-Komunità Ewropea u l-Istati Membri tagħha, fuq naħa waħda, u l-Parti Afrika Ċentrali, fuq in-naħa l-oħra (“il-Ftehim”) 4 ,
Wara li kkunsidra l-proposta tal-Kummissjoni Ewropea,
Billi:
(1)Il-Ftehim ġie konkluż f’isem l-Unjoni Ewropea (“l-Unjoni”) permezz tad-Deċiżjoni 2009/152/KE 5 u qiegħed jiġi applikat b’mod proviżorju mill-4 ta’ Awwissu 2014.
(2)F’konformità mal-Artikolu 85(1) tal-Ftehim, il-Kumitat tal-FSE għandu jfassal lista ta’ persuni li huma lesti u kapaċi jservu bħala arbitri.
(3)Il-Kumitat tal-FSE fil-laqgħa annwali tiegħu fi [data] għandu jissejjaħ biex jadotta deċiżjoni li tistabbilixxi l-lista ta’ persuni li huma lesti u kapaċi li jservu bħala arbitri.
(4)Huwa xieraq li tiġi stabbilita l-pożizzjoni li se tiġi adottata f’isem l-Unjoni fil-Kumitat tal-FSE, peress li d-deċiżjoni prevista se tkun vinkolanti fuq l-Unjoni.
(5)L-istabbiliment ta’ lista ta’ individwi li huma lesti u kapaċi jservu bħala arbitri hija prevista mill-Ftehim fl-Artikolu 85(1) tiegħu,
ADOTTA DIN ID-DEĊIŻJONI:
Artikolu 1
Il-pożizzjoni li għandha tittieħed f’isem l-Unjoni fil-Kumitat tal-FSE għandha tkun ibbażata fuq l-abbozz ta’ Deċiżjoni tal-Kumitat tal-FSE fir-rigward tal-lista ta’ persuni li huma lesti u kapaċi jservu ta’ arbitri, mehmuża ma’ din id-Deċiżjoni.
Artikolu 2
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 25.7.2019
COM(2019) 348 final
ANNESS
għall-
Proposta għal Deċiżjoni tal-Kunsill
dwar il-pożizzjoni li għandha tittieħed f'isem l-Unjoni Ewropea fil-Kumitat tal-FSE stabbilita mill-Ftehim Preliminari lejn Ftehim ta’ Sħubija Ekonomika bejn il-Komunità Ewropea u l-Istati Membri tagħha, minn naħa, u l-Parti Afrika Ċentrali, min-naħa l-oħra dwar l-adozzjoni tal-lista ta’ arbitri
ANNESS
DEĊIŻJONI Nru xx/2019 TAL-KUMITAT TAL-FSE
stabbilita mill-Ftehim Preliminari lejn Ftehim ta’ Sħubija Ekonomika
bejn il-Komunità Ewropea u l-Istati Membri tagħha, minn naħa,
u l-Parti Afrika Ċentrali, min-naħa l-oħra,
ta’ xx/xx/2019
dwar l-adozzjoni tal-lista ta’ arbitri
IL-KUMITAT TAL-FSE,
Wara li kkunsidra l-Ftehim preliminari lejn Ftehim ta' Sħubija Ekonomika bejn il-Komunità Ewropea u l-Istati Membri tagħha, minn naħa, u l-Parti tal-Afrika Ċentrali, min-naħa l-oħra (minn hawn 'il quddiem “il-Ftehim”), iffirmat fi Brussell, fil-15 ta' Jannar 2009, u applikat b'mod proviżorju mill-4 ta' Awwissu 2014, u b'mod partikolari l-Artikolu 85.1 tiegħu,
Billi:
(1)Taħt it-termini tal-Ftehim u ta' din id-Deċiżjoni, il-Parti tal-Afrika Ċentrali hija komposta mir-Repubblika tal-Kamerun.
(2)Il-Ftehim jipprovdi li l-Kumitat tal-FSE għandu jistabbilixxi lista ta’ ħmistax-il (15) individwu ppreparati u kapaċi jservu bħala arbitri għas-soluzzjoni tat-tilwim,
Adotta din ID-DEĊIŻJONI:
Artikolu 1
Il-lista ta’ ħmistax-il (15) arbitru prevista fl-Artikolu 85.1 għandha titfassal kif stabbilit fl-Anness.
Din il-lista għandha tkun mingħajr preġudizzju għal kwalunkwe regola speċifika prevista fil-Ftehim jew li tista’ tiġi adottata mill-Kumitat tal-FSE.
Artikolu 2
Din il-lista tista’ tiġi emendata b’deċiżjoni tal-Kumitat tal-FSE skont l-Artikolu 92.4 tal-Ftehim.
Artikolu 3
Din id-Deċiżjoni għandha tidħol fis-seħħ mal-iffirmar tagħha.
Magħmul fi xx, xx
|
Għar-Repubblika tal-Kamerun |
Għall-Unjoni Ewropea |
|
Alamine Ousmane MEY |
Cecilia MALMSTRÖM |
ANNESS
Lista ta’ arbitri (Artikolu 85.1)
Arbitri magħżula mill-Parti tal-Afrika Ċentrali (il-Kamerun):
Is-Sinjura Mildred Alugu BEJUKA - Il-Kamerun
Is-Sur Jean Michel MBOCK BIUMLA - Il-Kamerun
Is-Sur Henri-Désiré MODI KOKO BEBEY - Il-Kamerun
Is-Sur David NYAMSI - Il-Kamerun
Is-Sur OUSMANOU - Il-Kamerun
Arbitri magħżula mill-Parti tal-Unjoni Ewropea:
Is-Sur Jacques BOURGEOIS - il-Belġju
Is-Sur Claus – Dieter EHLERMANN - il-Ġermanja
Is-Sur Pieter Jan KUIJPER - in-Netherlands
Is-Sur Giorgio SACERDOTI - l-Italja
Is-Sur RamonTORRENT - Spanja
Arbitri magħżula b'mod konġunt miż-żewġ Partijiet:
Is-Sur Thomas COTTIER - (l-Iżvizzera)
Is-Sur Fabien GELINAS - il-Kanada
Is-Sinjura Merit E. JANOW - l-Istati Uniti
Is-Sinjura Anna KOUYATE - Mali
Is-Sur Helge SELAND - in-Norveġja