IL-KUMMISSJONI EWROPEA
Brussell, 3.7.2019
COM(2019) 314 final
Rakkomandazzjoni għal
DEĊIŻJONI TAL-KUNSILL
li tissupplimenta d-direttivi tan-negozjati għall-Aġenda ta’ Doha għall-Iżvilupp dwar in-negozjati ta’ qafas multilaterali dwar il-faċilitazzjoni tal-investiment
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet għal u objettivi tal-proposta
Fit-13 ta’ Diċembru 2017, fil-Ħdax-il Konferenza Ministerjali tal-Organizzazzjoni Dinjija tal-Kummerċ (WTO), 70 Membru tad-WTO adottaw Dikjarazzjoni Konġunta dwar il-Faċilitazzjoni ta’ Investiment għall-Iżvilupp 1 li talbet għal “diskussjonijiet strutturati bil-għan li jiġi żviluppat qafas multilaterali dwar il-faċilitazzjoni tal-investiment.” Dawn id-diskussjonijiet għandhom l-għan li jidentifikaw u jiżviluppaw l-elementi ta’ qafas li jiffaċilita l-investiment dirett barrani (IDB). L-Unjoni Ewropea (UE) u l-Istati Membri tagħha appoġġaw bis-sħiħ u ssieħbu fl-inizjattiva.
L-UE pparteċipat b’mod attiv fid-diskussjonijiet strutturati li seħħew matul l-2018 fid-WTO. Id-diskussjonijiet kienu trasparenti u miftuħa għall-Membri kollha tad-WTO, u rriżultaw fi “Lista ta’ Kontroll ta’ Kwistjonijiet Imqajma mill-Membri” li tinkludi elementi possibbli ta’ qafas li jiffaċilita l-IDB identifikat mill-membri tad-WTO. Din il-“Lista ta’ Kontroll” ġiet approvata waqt laqgħa ta’ rendikont fis-6 ta’ Diċembru 2018.
Fl-2019 bdiet fażi ġdida ta’ diskussjonijiet. Il-membri tad-WTO qablu dwar skeda ta’ laqgħat għall-ewwel nofs tas-sena, li se tkun iddedikata għall-iżvilupp tal-elementi inklużi fil-Lista ta’ Kontroll. Din il-ħidma esploratorja dwar l-iżvilupp ta’ elementi bħal dawn tibqa’ trasparenti u miftuħa għall-Membri kollha tad-WTO. Id-diskussjoni tkopri l-elementi kollha tal-“Lista ta’ Kontroll” fuq il-bażi ta’ eżempji ta’ dispożizzjonijiet eżistenti fi ftehimiet bilaterali jew multilaterali li huma rilevanti għall-faċilitazzjoni tal-investiment. Dawn l-eżempji jinġabru f’“Kompendju ta’ eżempji bbażati fuq it-test”. Se ssir laqgħa ta’ rendikont f’Lulju 2019. Fil-ħarifa tal-2019, il-membri aktarx li jibdew jipproponu testi speċifiċi għal qafas multilaterali dwar il-faċilitazzjoni tal-investiment. Dan ifisser li l-ewwel fażi tan-negozjati x’aktarx tibda minn Settembru-Ottubru 2019.
In-negozjati għandhom isiru fi ħdan il-qafas tad-WTO, u jibqgħu trasparenti u miftuħa għal kwalunkwe Membru tad-WTO li jiddeċiedi li jissieħeb. Matul in-negozjati, il-Membri parteċipanti jistgħu jqiegħdu fuq il-mejda kwalunkwe proposta ta’ negozjati fil-qasam tal-iffaċilitar tal-IDB, fil-bidu jew fi stadju aktar tard tal-proċess tan-negozjati fid-WTO.
Il-Kummissjoni kisbet awtorizzazzjoni mill-Kunsill skont l-Aġenda ta’ Doha għall-Iżvilupp (DDA), għal negozjati fid-WTO, fost l-oħrajn dwar il-kummerċ u l-investiment. 2 Billi l-IDB huwa mezz ewlieni għall-kummerċ internazzjonali, u l-faċilitazzjoni tal-investiment huwa mod kif jitrawwem l-investiment transfruntier billi tingħata għajnuna biex tiġi żgurata klima stabbli u prevedibbli għall-IDB fid-dinja kollha, 3 in-negozjati l-ġodda tad-WTO dwar il-faċilitazzjoni tal-investiment huma koperti mill-awtorizzazzjoni eżistenti, peress li jappartjenu għall-qasam tal-kummerċ u l-investiment. 4 Għaldaqstant, mhijiex meħtieġa deċiżjoni ġdida tal-Kunsill li tawtorizza l-bidu ta’ negozjati b’konformità mal-Artikolu 218(3) tat-Trattat dwar il-Funzjonament tal-Unjoni Ewropea (TFUE).
Madankollu, filwaqt li l-kummerċ u l-investiment mhumiex kwistjoni ġdida fuq l-aġenda tad-WTO, 5 in-negozjati dwar l-iffaċilitar tal-investiment jistgħu jkunu potenzjalment ġodda f’xi aspetti u jistgħu jindirizzaw xi suġġetti li fuqhom l-UE għandha prijoritajiet speċifiċi. Konsegwentement, sabiex jiġu inkwadrati b’mod aktar preċiż in-negozjati, il-Kummissjoni tirrakkomanda lill-Kunsill l-adozzjoni ta’ direttivi supplimentari għan-negozjar speċifiċi għan-negozjati tad-WTO dwar il-faċilitazzjoni tal-investiment.
Id-Direttivi ta’ negozjar proposti għandhom l-għan li jiżguraw li l-UE tkun f’pożizzjoni li tidħol f’negozjati dwar kwalunkwe element ta’ faċilitazzjoni ta’ investiment propost mill-Membri parteċipanti tad-WTO matul in-negozjati, b’rispett sħiħ tal-acquis u l-għażliet ta’ politika tal-UE fin-negozjati kummerċjali u ta’ investiment.
Għall-UE, l-objettivi tan-negozjati huma li jiffaċilitaw l-IDB mill-investituri u n-negozji, inklużi l-intrapriżi mikro, żgħar u ta’ daqs medju, u joħolqu opportunitajiet ġodda għall-promozzjoni tat-tkabbir inklussiv u l-iżvilupp sostenibbli. Qafas ta’ faċilitazzjoni tal-investiment multilaterali jista’ jiffaċilita l-investiment globali bl-istess mod li d-WTO qed tgħin biex jiġi ffaċilitat il-kummerċ globali mal-Ftehim ta’ Faċilitazzjoni tal-Kummerċ. Sabiex jinkiseb eżitu ta’ standard għoli bil-parteċipazzjoni tal-akbar għadd possibbli ta’ Membri tad-WTO, ir-regoli u l-impenji jenħtieġ li jipprevedu flessibbiltà xierqa għall-Membri.
•Konsistenza mad-dispożizzjonijiet ta’ politika eżistenti fil-qasam ta’ politika
L-għanijiet imsemmija hawn fuq huma kompletament konsistenti mat-Trattat dwar l-Unjoni Ewropea (TUE) li jipprevedi li l-UE għandha “tinkoraġġixxi l-integrazzjoni tal-pajjiżi kollha fl-ekonomija dinjija, permezz tat-tneħħija progressiva tar-restrizzjonijiet fuq il-kummerċ internazzjonali”. 6
Il-Kunsill Ewropew tat-28-29 ta’ Ġunju 2018 awtorizza lill-Kummissjoni li ssegwi l-modernizzazzjoni tad-WTO biex tilħaq l-għanijiet li (1) id-WTO issir aktar rilevanti u adattabbli għal dinja li qiegħda tinbidel, u (2) ssaħħaħ l-effettività tad-WTO. L-immodernizzar tal-attivitajiet ta’ tfassil tar-regoli tad-WTO, li huwa wieħed mill-objettivi ewlenin tan-negozjati prospettivi dwar il-faċilitazzjoni tal-investiment, jifforma l-pilastru ċentrali ta’ dan il-proċess.
Fit-18 ta’ Settembru 2018 il-Kummissjoni ppreżentat dokument kunċettwali 7 dwar il-modernizzazzjoni tad-WTO. Fil-kuntest tat-tisħiħ tal-funzjoni ta’ regolamentazzjoni tad-WTO, il-Kummissjoni fost l-oħrajn enfasizzat li “wara d-Dikjarazzjonijiet Konġunti miftiehma fi Buenos Aires, diġà għaddejja ħidma fl-oqsma ta’ [...] faċilitazzjoni ta’ investiment iżda se jkunu meħtieġa aktar sforzi biex jiġu indirizzati l-lakuni u biex jiġi aġġornat il-ktieb tar-regoli tad-WTO.”
L-UE sistematikament tressaq dixxiplini ambizzjużi dwar it-trasparenza u r-regolamentazzjoni domestika fis-setturi tas-servizzi u dawk mhux tas-servizzi fin-negozjati tagħha dwar il-kummerċ ħieles. Id-Direttivi ta’ negozjati proposti għan-negozjati għall-faċilitazzjoni tal-investiment ikunu bbażati fuq l-istess approċċ bħal dak tal-UE fl-FTAs tagħha.
•Konsistenza ma’ politiki oħrajn tal-Unjoni
Id-dixxiplini li l-UE tista’ tipproponi fid-WTO, ikunu kompletament konformi u jibnu fuq il-leġiżlazzjoni rilevanti tas-suq intern tal-UE, u jirriflettu l-proposti magħmula mill-UE f’negozjati bilaterali
Id-Direttivi ta’ negozjar proposti jikkonfermaw li kwalunkwe regola jew impenn miftiehma mill-UE għandha tkun konformi mal-qafas legali tal-UE (punt 5 fl-Anness).
2.BAŻI ĠURIDIKA, SUSSIDJARJETÀ U PROPORZJONALITÀ
•Bażi ġuridika
L-ewwel subparagrafu tal-Artikolu 207(4) flimkien mal-Artikolu 218(3) u (4) tat-TFUE.
Skont l-Artikolu 207, fejn għandhom jiġu nnegozjati ftehimiet li jikkonċernaw il-politika kummerċjali komuni, il-Kummissjoni għandha tagħmel rakkomandazzjonijiet lill-Kunsill. Il-Kummissjoni għandha tmexxi dawn in-negozjati b’konsultazzjoni ma’ kumitat speċjali maħtur mill-Kunsill sabiex jgħin lill-Kummissjoni f’din il-ħidma u fil-qafas ta’ tali direttivi li l-Kunsill jista’ jindirizzalha.
L-Artikolu 218(3) TFUE jistipula li l-Kummissjoni għandha tippreżenta rakkomandazzjonijiet lill-Kunsill. Il-Kunsill għandu s-setgħa li jadotta deċiżjonijiet li jawtorizzaw il-bidu ta’ negozjati u b’konformità mal-Artikolu 218(4) TFUE, jista’ jindirizza direttivi lin-negozjatur u jaħtar kumitat speċjali li n-negozjati jkunu jridu jsiru b’konsultazzjoni miegħu.
Fir-rigward tan-negozjati tad-WTO dwar il-faċilitazzjoni tal-investiment, il-Kunsill diġà awtorizza l-ftuħ tan-negozjati, u ħareġ direttivi lill-Kummissjoni dwar il-kummerċ u l-investiment fid-WTO. Madankollu, jeħtieġ li jiġu adottati direttivi ta’ negozjati supplimentari biex in-negozjati jitpoġġew f’qafas aktar preċiż. Għaldaqstant, il-Kummissjoni tirrakkomanda lill-Kunsill jadotta Deċiżjoni abbażi tal-Artikolu 207(4) l-ewwel subparagrafu flimkien mal-Artikolu 218(3) u (4) tat-TFUE.
•Sussidjarjetà (għal kompetenza mhux esklużiva)
Il-politika kummerċjali komuni hija qasam ta’ kompetenza esklużiva tal-UE skont l-Artikolu 3 TFUE. B’konformità ma’ dan, il-prinċipju tas-sussidjarjetà ma japplikax (l-Artikolu 5(3) TUE).
•Proporzjonalità
Ir-rakkomandazzjoni tal-Kummissjoni hija konformi mal-prinċipju tal-proporzjonalità (l-Artikolu 5(4) TUE).
•Għażla tal-istrument
Deċiżjoni tal-Kunsill tal-Unjoni Ewropea dwar direttivi ta’ negozjar dwar il-faċilitazzjoni tal-investiment fid-WTO biex tissupplimenta d-direttivi maħruġa lill-Kummissjoni dwar l-Aġenda ta’ Doha għall-Iżvilupp.
3.RIŻULTATI TAL-EVALWAZZJONIJIET EX POST, KONSULTAZZJONIJIET MAL-PARTIJIET IKKONĊERNATI U VALUTAZZJONIJIET TAL-IMPATT
•Evalwazzjonijiet ex post/kontrolli tal-idoneità tal-leġiżlazzjoni eżistenti
Mhux applikabbli.
•Konsultazzjonijiet mal-partijiet ikkonċernati
Ma saret l-ebda konsultazzjoni pubblika peress li l-elementi sostantivi tan-negozjati tad-WTO għadhom mhumiex magħrufa.
Il-Kummissjoni regolarment tikkonsulta mal-partijiet ikkonċernati, fost l-oħrajn il-Grupp ta’ Esperti dwar il-Ftehimiet Kummerċjali 8 u d-Djalogu tas-Soċjetà Ċivili. 9
•Ġbir u użu tal-għarfien espert
Mhux applikabbli.
•Valutazzjoni tal-impatt
Ma saritx valutazzjoni tal-impatt għar-raġunijiet li ġejjin: In-negozjati tad-WTO dwar l-iffaċilitar ta’ investiment huma bbażati fuq l-awtorizzazzjoni eżistenti tal-Kummissjoni mill-Kunsill għan-negozjati tad-WTO (ara t-Taqsima 1). Is-sustanza tan-negozjati ma tirrappreżentax qasam ta’ politika ġdida; dawn huma l-kontinwazzjoni ta’ negozjati usa’ tad-WTO li issa tnaqqsu għal żona aktar speċifika, li ma tinkludix il-liberalizzazzjoni tal-investiment jew il-protezzjoni tal-investiment.
Abbażi tal-elementi possibbli ta’ qafas multilaterali għall-faċilitazzjoni tal-investiment identifikat fil-“Lista ta’ Kontroll”, m’hemm l-ebda indikazzjoni li ratifika ta’ ftehim bħal dan iwassal għal xi impatt sinifikanti għall-UE. Dan minflok ikun ifisser kodifikazzjoni ta’ prattiki li diġà huma stabbiliti sew fi ħdan l-UE. L-impatti ta’ regoli u impenji ġodda possibbli li jirriżultaw min-negozjati fid-WTO x’aktarx li jkunu aktar sostanzjali għal ċerti pajjiżi terzi, b’mod partikolari pajjiżi li qed jiżviluppaw u pajjiżi l-anqas żviluppati. Madankollu, ma jistgħux jiġu identifikati ex-ante. L-ewwel nett għaliex il-proposti tan-negozjar għadhom ma tressqux mill-Membri parteċipanti fid-WTO. It-tieni nett, minħabba li mhuwiex magħruf liema Membri se jieħdu impenji dwar ir-regoli u l-obbligi ġodda tad-WTO u, jekk iva, f’liema perjodu ta’ żmien.
Meta l-impatti potenzjali jkunu aktar ċari, jiġifieri meta l-kontenut tal-qafas multilaterali u l-impenji tal-membri tad-WTO jkunu magħrufa aħjar, il-Kummissjoni terġa’ tivvaluta l-ħtieġa għal analiżi aktar bir-reqqa. Dan għandu jseħħ mhux aktar tard mill-konklużjoni tan-negozjati tad-WTO.
L-UE se tipparteċipa b’mod attiv u tressaq proposti mill-istadji bikrin tan-negozjati biex tinfluwenza l-eżitu.
•Idoneità regolatorja u simplifikazzjoni
Mhux applikabbli.
•Drittijiet fundamentali
L-inizjattiva tirrispetta bis-sħiħ il-Karta tad-Drittijiet Fondamentali tal-Unjoni Ewropea.
4.IMPLIKAZZJONIJIET GĦALL-BAĠIT
Il-proposta ma għandha l-ebda implikazzjoni għall-baġit.
5.ELEMENTI OĦRAJN
•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rappurtar
Mhux applikabbli.
•Dokumenti ta’ spjegazzjoni (għad-Direttivi)
Mhux applikabbli.
•Spjegazzjoni fid-dettall tad-dispożizzjonijiet speċifiċi tal-proposta
Mhux applikabbli.
Rakkomandazzjoni għal
DEĊIŻJONI TAL-KUNSILL
li tissupplimenta d-direttivi tan-negozjati għall-Aġenda ta’ Doha għall-Iżvilupp dwar in-negozjati ta’ qafas multilaterali dwar il-faċilitazzjoni tal-investiment
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-ewwel subparagrafu tal-Artikolu 207(4) flimkien mal-Artikolu 218(3) u (4) tiegħu,
Wara li kkunsidra r-rakkomandazzjoni tal-Kummissjoni Ewropea,
Billi:
(1)Skont l-Aġenda ta’ Doha għall-Iżvilupp, il-Kunsill awtorizza l-ftuħ tan-negozjati fl-Organizzazzjoni Dinjija tal-Kummerċ (WTO), u indirizza direttivi lill-Kummissjoni, fost l-oħrajn dwar il-kummerċ u l-investiment,
(2)Fit-13 ta’ Diċembru 2017, fil-Ħdax-il Konferenza Ministerjali tal-Organizzazzjoni Dinjija tal-Kummerċ, 70 Membru tad-WTO adottaw Dikjarazzjoni Konġunta dwar il-Faċilitazzjoni tal-Investiment għall-Iżvilupp 10 li titlob li jsiru diskussjonijiet strutturati bil-għan li jiġi żviluppat qafas multilaterali dwar il-faċilitazzjoni tal-investiment.
(3)Il-fażi attwali tad-diskussjonijiet, li għandha l-għan li tiżviluppa l-elementi possibbli ta’ qafas multilaterali dwar il-faċilitazzjoni tal-investiment, se tikkonkludi f’Lulju 2019 skont l-aħħar skeda 11 , u x’aktarx li tiġi segwita mill-ewwel fażi ta’ negozjati fil-ħarifa tal-2019.
(4)L-adozzjoni ta’ direttivi ta’ negozjar supplimentari hija meħtieġa biex tiġi inkwadrata aktar il-pożizzjoni tal-Unjoni fin-negozjati prospettivi tad-WTO dwar il-faċilitazzjoni tal-investiment.
(5)B’konformità mal-Artikolu 207(3), il-Kumitat tal-Politika Kummerċjali jenħtieġ li jibqa’ maħtur bħala l-kumitat li għandu jiġi kkonsultat u li miegħu għandhom isiru n-negozjati,
ADOTTA DIN ID-DEĊIŻJONI:
Artikolu 1
Id-direttivi ta’ negozjati indirizzati lill-Kummissjoni dwar l-Aġenda ta’ Doha għall-Iżvilupp huma ssupplimentati bid-direttivi ta’ negozjati għan-negozjati ta’ qafas multilaterali dwar il-faċilitazzjoni tal-investiment stabbiliti fl-Anness.
Artikolu 2
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 3.7.2019
COM(2019) 314 final
ANNESS
ta' [...]
Rakkomandazzjoni għal Deċiżjoni tal-Kunsill
li tissupplimenta d-direttivi tan-negozjati għall-Aġenda ta’ Doha għall-Iżvilupp dwar in-negozjati ta’ qafas multilaterali dwar il-faċilitazzjoni tal-investiment
ANNESS
1.NATURA U AMBITU TAR-REGOLI U L-IMPENJI
1.Abbażi tal-awtorizzazzjoni eżistenti mill-Kunsill għan-negozjati fl-Organizzazzjoni Dinjija tal-Kummerċ (WTO) skont l-Aġenda ta' Doha għall-Iżvilupp, l-għan tan-negozjati multilaterali dwar il-faċilitazzjoni tal-investiment għandu jkun li jiġi stabbilit qafas multilaterali ta’ regoli bil-għan li jiġi ffaċilitat l-investiment dirett barrani (IDB) fid-dinja kollha. L-għan huwa li tinħoloq klima aktar trasparenti, effiċjenti u prevedibbli għall-iffaċilitar tal-investiment transfruntier. Tali qafas għandu jiffoka fuq l-IDB bl-esklużjoni ta’ movimenti kapitali fuq perjodu qasir ta’ żmien, u għandu jimmira li jiżgura l-kundizzjonijiet tajbin għall-investiment internazzjonali li jwassal għal żvilupp sostenibbli, filwaqt li jippreserva l-kapaċità tal-pajjiżi ospitanti biex jirregolaw l-attività ta’ investituri fit-territorji rispettivi tagħhom.
2.F’konformità mad-Dikjarazzjoni Ministerjali Konġunta dwar l-Iffaċilitar tal-Investimenti għall-Iżvilupp adottata minn 70 Membru tad-WTO waqt il-Ħdax-il Konferenza Ministerjali fit-13 ta’ Diċembru 2017, dawn in-negozjati mhux se jindirizzaw l-aċċess għas-suq, il-protezzjoni tal-investiment u s-soluzzjoni tat-tilwim bejn l-investitur u l-Istat.
3.In-negozjati għandhom jitmexxew u jiġu konklużi b’attenzjoni xierqa għad-drittijiet u l-obbligi tal-Membri skont id-WTO, filwaqt li jiġu rispettati l-prinċipji ta’ trasparenza u inklużività u jibnu fuq ftehimiet eżistenti tad-WTO.
4.In-negozjati għandhom jimmiraw li jiżviluppaw dixxiplini u impenji ta’ standard għoli bil-parteċipazzjoni tal-akbar għadd possibbli ta’ Membri tad-WTO. In-negozjati għandhom iqisu l-opportunitajiet uniċi għall-Membri tad-WTO dwar il-faċilitazzjoni tal-investiment, kif ukoll l-isfidi li qegħdin jiffaċċjaw f’dan ir-rigward. Għaldaqstant, ir-regoli u l-impenji jenħtieġ li jipprovdu għall-flessibilità xierqa.
5.Ir-regoli u l-impenji miftiehma mill-Unjoni Ewropea (UE) għandhom iqisu l-obbligu tan-nondiskriminazzjoni fi ftehimiet eżistenti tad-WTO sal-punt li dawn huma rilevanti u applikabbli f’kuntest ta’ faċilitazzjoni tal-investiment.
2.KONTENUT PROPOST TAR-REGOLI U L-IMPENJI
6.In-negozjati għandhom jiżviluppaw qafas ġdid ta’ dixxiplini fid-WTO li għandhom l-għan li jiffaċilitaw l-IDB. Dan il-qafas għandu joħloq ambjent trasparenti, effiċjenti u prevedibbli għall-investimenti internazzjonali għall-benefiċċju tan-negozji tal-UE ta’ kull daqs, inklużi l-intrapriżi mikro, żgħar u ta’ daqs medju, u għandha ssaħħaħ ukoll il-kapaċità ta’ pajjiżi li qed jiżviluppaw u dawk l-anqas żviluppati biex jattiraw l-IDB biex b’hekk tiżdied il-parteċipazzjoni tagħhom fil-katini tal-valur globali.
7.In-negozjati se jitmexxew b’mod miftuħ u inklużiv. Għaldaqstant, dawn jistgħu jkopru kwalunkwe aspett ta’ faċilitazzjoni tal-investiment li jkun propost mill-Membri parteċipanti. Filwaqt li jirrikonoxxu n-natura trażversali tal-faċilitazzjoni tal-investiment, in-negozjati jistgħu jkopru kwistjonijiet bħal:
–Elementi mmirati lejn it-titjib tat-trasparenza u l-prevedibbiltà tal-miżuri ta’ investiment, inklużi r-regoli u l-kundizzjonijiet applikabbli għad-dħul u l-operazzjoni ta’ IDB (pubblikazzjoni u disponibbiltà ta’ miżuri u informazzjoni; notifikazzjoni lid-WTO; punti ta’ informazzjoni);
–Elementi mmirati lejn is-simplifikazzjoni u t-tħaffif ta’ proċeduri amministrattivi u rekwiżiti (proċeduri amministrattivi u rekwiżiti ta’ dokumentazzjoni; limiti ta’ żmien għall-proċeduri amministrattivi; trattament ta’ applikazzjonijiet mhux kompluti; tariffi u imposti; reviżjoni tal-proċeduri amministrattivi; użu tal-gvern elettroniku; tipi ta’ mekkaniżmi ta’ punt uniku ta' servizz/tieqa unika; tipi ta’ mekkaniżmi ta’ punt fokali/punt ta’ kuntatt/ombudsperson, inklużi r-relazzjonijiet mal-partijiet ikkonċernati u prevenzjoni tat-tilwim);
–Elementi li għandhom l-għan li jsaħħu l-kooperazzjoni internazzjonali, kondiviżjoni tal-informazzjoni, l-iskambju tal-aħjar prattiki (il-kooperazzjoni internazzjonali fost il-Membri; kooperazzjoni internazzjonali fil-livell multilaterali permezz ta’ Kumitat tad-WTO dwar kwistjonijiet ta’ faċilitazzjoni tal-investiment);
–Id-dimensjoni tal-iżvilupp (l-isfidi li jiffaċċjaw il-pajjiżi inqas żviluppati; il-kondiviżjoni tal-aħjar prattiki; dispożizzjonijiet ta’ trattament speċjali u differenzjali; assistenza teknika u bini ta' kapaċità) u l-promozzjoni ta’ responsabbiltà soċjali korporattiva u żvilupp sostenibbli.
8.L-Unjoni Ewropea tista’ tidħol ukoll f’negozjati dwar aspetti oħra relevanti għall-iffaċilitar tal-IDB, kif propost mill-Membri parteċipanti, f'konformità ma’ dawn id-direttivi.
9.Kwalunkwe regola jew impenn miftiehem mill-Unjoni Ewropea jenħtieġ li tkun/ikun konformi mal-qafas legali tal-UE.