IL-KUMMISSJONI EWROPEA

Brussell, 30.4.2019

COM(2019) 207 final

2019/0100(NLE)

Proposta għal

DEĊIŻJONI TAL-KUNSILL

dwar il-pożizzjoni li trid tittieħed f’isem l-Unjoni Ewropea fil-Kumitat ta’ Kooperazzjoni stabbilit mill-Ftehim dwar il-Kooperazzjoni u l-Unjoni Doganali bejn il-Komunità Ekonomika Ewropea u r-Repubblika ta’ San Marino fir-rigward tad-dispożizzjonijiet applikabbli dwar il-produzzjoni organika u t-tikkettar ta’ prodotti organiċi, u l-arranġamenti għal importazzjonijiet ta’ prodotti organiċi

MEMORANDUM TA’ SPJEGAZZJONI

1.Suġġett tal-proposta

Din il-proposta tikkonċerna Deċiżjoni li tistabbilixxi l-pożizzjoni li trid tittieħed f’isem l-Unjoni fil-Kumitat ta’ Kooperazzjoni UE-San Marino b’rabta mal-adozzjoni prevista ta’ Deċiżjoni dwar id-dispożizzjonijiet applikabbli, skont il-Ftehim dwar il-Kooperazzjoni u l-Unjoni Doganali UE-San Marino dwar il-produzzjoni organika, it-tikkettar ta’ prodotti organiċi u l-arranġamenti għal importazzjonijiet ta’ prodotti organiċi.

2.Kuntest tal-proposta

2.1.Il-Ftehim dwar il-Kooperazzjoni u l-Unjoni Doganali bejn il-Komunità Ekonomika Ewropea u r-Repubblika ta’ San Marino

Il-Ftehim dwar il-Kooperazzjoni u l-Unjoni Doganali bejn il-Komunità Ekonomika Ewropea u r-Repubblika ta’ San Marino (“il-Ftehim”) għandu l-għan li jistabbilixxi unjoni doganali bejn il-partijiet u jippromwovi kooperazzjoni komprensiva bejniethom sabiex jikkontribwixxi għall-iżvilupp soċjali u ekonomiku ta’ San Marino u jsaħħaħ ir-relazzjonijiet bejniethom. Il-Ftehim daħal fis-seħħ fl-1 ta’ April 2002.

2.2.Il-Kumitat ta’ Kooperazzjoni UE-San Marino

Il-Kumitat ta’ Kooperazzjoni UE-San Marino għandu l-kompitu li jamministra l-Ftehim u jiżgura li jkun implimentat kif xieraq. Huwa magħmul minn rappreżentanti tal-Kummissjoni (assistiti minn delegati tal-Istati Membri) u San Marino. Id-deċiżjonijiet jittieħdu bi qbil komuni. Il-president huwa rappreżentant tal-Kummissjoni mill-1 ta’ Jannar sat-30 ta’ Ġunju kull sena u rappreżentant ta’ San Marino għat-tieni nofs tas-sena.

2.3.Att previst tal-Kumitat ta’ Kooperazzjoni UE-San Marino

Fis-sessjoni li jmiss, il-Kumitat ta’ Kooperazzjoni UE-San Marino jrid jadotta Deċiżjoni rigward id-dispożizzjonijiet applikabbli dwar il-produzzjoni organika, it-tikkettar ta’ prodotti organiċi u l-arranġamenti għall-importazzjonijiet ta’ prodotti organiċi (“l-att previst”).

F’konformità mar-Regoli ta’ Proċedura tiegħu, il-Kumitat ta’ Kooperazzjoni beħsiebu juża l-possibbiltà ta’ proċedura bil-miktub skont l-Artikolu 6 tal-Anness I tad-“Deċiżjoni Omnibus” (id-Deċiżjoni Nru 1/2010 tal-Kumitat ta’ Kooperazzjoni UE-San Marino tad-29 ta’ Marzu 2010 1 ).

L-iskop tal-att previst huwa li jistabbilixxi r-regoli applikabbli tal-UE dwar il-produzzjoni organika, it-tikkettar ta’ prodotti organiċi u l-arranġamenti għall-importazzjonijiet ta’ prodotti organiċi bejn il-partijiet tal-Ftehim.

Il-kjarifika se tippermetti li San Marino japplika l-acquis tal-UE b’mod korrett u jkompli bil-kummerċ fi prodotti organiċi mal-UE. Se jippermetti wkoll li l-UE żżid lil San Marino fis-Sistema elettronika tal-Kontroll tal-Kummerċ u tal-Esperti Veterinarji (“TRACES”). Minn Ottubru 2017, skont ir-Regolament (KE) 2016/1842, kien possibbli li jinħareġ u jiġi approvat ċertifikat elettroniku ta’ spezzjoni (kif mitlub għar-rilaxx ta’ prodotti importati għaċ-ċirkolazzjoni libera fl-Unjoni) permezz tat-TRACES biss. Qabel, iċ-ċertifikat kien maħruġ biss f’forma stampata.

L-att previst se jippermetti wkoll li l-awtoritajiet ta’ San Marino jieħdu deċiżjonijiet fil-qasam kopert mill-att u jagħmlu komunikazzjonijiet meta d-dispożizzjonijiet rilevanti jirreferu għal deċiżjonijiet jew komunikazzjonijiet mill-Istati Membri tal-UE.

3.Pożizzjoni li trid tittieħed f’isem l-Unjoni

Il-Ftehim UE-San Marino jitlob li San Marino japplika l-partijiet tal-acquis tal-UE koperti mill-Ftehim, kif applikabbli fl-UE u fejn meħtieġ għall-funzjonament tajjeb tal-Ftehim. Huwa jipprovdi li d-dispożizzjonijiet applikabbli, inklużi r-regoli dwar il-kwalità, għandhom ikunu determinati f’aktar dettall mill-Kumitat ta’ Kooperazzjoni. Sabiex tiġi żgurata ċ-ċertezza legali u jiġi appoġġjat il-funzjonament tajjeb tal-unjoni doganali stabbilita mill-Ftehim, issa hemm ħtieġa li jiġi ċċarat l-acquis applikabbli dwar il-produzzjoni organika, it-tikkettar ta’ prodotti organiċi u l-arranġamenti għall-importazzjoniiet ta’ prodotti organiċi. Dan l-abbozz ta’ deċiżjoni tal-Kumitat ta’ Kooperazzjoni UE-San Marino jipprevedi din il-kjarifika.

–ir-Regolament tal-Kunsill (KE) Nru 834/2007 dwar il-produzzjoni organika u t-tikkettar ta’ prodotti organiċi 2 ;

–ir-Regolament tal-Kummissjoni (KE) Nru 889/2008 3 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 834/2007; u

–Ir-Regolament (KE) Nru 1235/2008 4 li jistabbilixxi r-regoli dettaljati għall-implimentazzjoni tar-Regolament tal-Kunsill (KE) Nru 834/2007 dwar l-arranġamenti għall-importazzjonijiet ta’ prodotti organiċi minn pajjiżi terzi.

Il-kjarifika, permezz ta’ deċiżjoni tal-Kumitat ta’ Kooperazzjoni, se tippermetti li San Marino japplika l-acquis tal-UE b’mod korrett, biex ikompli l-kummerċ fi prodotti organiċi mal-UE u tippermetti li l-UE żżid lil San Marino fit-“TRACES”, is-Sistema elettronika tal-UE tal-Kontroll tal-Kummerċ u tal-Esperti Veterinarji (ara t-Taqsima 2.3).

Il-Ftehim UE-San Marino għandu l-għan li jippromwovi l-kooperazzjoni komprensiva bejn il-partijiet, isaħħaħ ir-relazzjonijiet bejniethom u jikkontribwixxi għall-iżvilupp soċjali u ekonomiku ta’ San Marino. Il-kjarifika tar-regoli li għandhom jiġu applikati għall-prodotti organiċi se tippermetti li San Marino jagħmel kummerċ f’dawn il-prodotti u għaldaqstant isaħħaħ ir-relazzjoni speċjali tal-UE miegħu, kif previst fl-Artikolu 8 tat-Trattat dwar l-Unjoni Ewropea u d-Dikjarazzjoni Nru 3 dwar dik id-dispożizzjoni.

Il-proposta tikkonforma mal-prinċipju tas-sussidjarjetà billi l-objettiv huwa li tiġi ċċarata l-applikabbiltà f’pajjiż mhux tal-UE ta’ regoli fis-settur tal-agrikoltura organika deċiżi fil-livell tal-UE. Dan ma jistax isir mill-Istati Membri.

4.Bażi ġuridika

4.1.Bażi ġuridika proċedurali

4.1.1.Prinċipji

L-Artikolu 218(9) tat-Trattat dwar il-Funzjonament tal-Unjoni Ewropea (it-TFUE) jistipula deċiżjonijiet li jistabbilixxu “l-pożizzjonijiet li għandhom jiġu adottati f’isem l-Unjoni f’sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim.”

“Atti li jkollhom effett legali” jinkludu atti li għandhom effett legali skont ir-regoli tad-dritt internazzjonali li jirregolaw il korp inkwistjoni u l-istrumenti li ma għandhomx effett vinkolanti skont id-dritt internazzjonali, iżda “jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatur tal-Unjoni” 5 .

4.1.2.Applikazzjoni għal dan il-każ

Il-Kumitat ta’ Kooperazzjoni UE-San Marino huwa korp imwaqqaf bi ftehim, jiġifieri l-ftehim dwar il-Kooperazzjoni u l-Unjoni Doganali bejn il-Komunità Ekonomika Ewropea u r-Repubblika ta’ San Marino.

L-att li l-Kumitat ta’ Kooperazzjoni huwa mitlub jadotta jikkostitwixxi att b’effett legali.

L-att previst għandu effett legali kif ġej.

Il-Ftehim UE-San Marino jitlob li San Marino japplika l-partijiet tal-acquis tal-UE koperti mill-Ftehim, kif applikabbli fl-UE u fejn meħtieġ għall-funzjonament tajjeb tal-Ftehim.

Il-Ftehim jipprevedi li d-dispożizzjonijiet applikabbli, inklużi dawk dwar ir-regoli dwar il-kwalità, iridu jiġu determinati f’aktar dettall mill-Kumitat ta’ Kooperazzjoni. Sabiex tiġi żgurata ċ-ċertezza legali u jiġi appoġġjat il-funzjonament tajjeb tal-unjoni doganali stabbilita mill-Ftehim, issa hemm ħtieġa li jiġi ċċarat l-acquis applikabbli dwar il-produzzjoni organika, it-tikkettar ta’ prodotti organiċi u l-arranġamenti għall-importazzjoniiet ta’ prodotti organiċi. L-abbozz ta’ Deċiżjoni tal-Kumitat ta’ Kooperazzjoni UE-San Marino jipprevedi din il-kjarifika.

Il-kjarifika se tippermetti li San Marino japplika l-acquis tal-UE b’mod korrett u jkompli bil-kummerċ fi prodotti organiċi mal-UE. Se jippermetti wkoll li l-UE żżid lil San Marino fis-Sistema elettronika tal-Kontroll tal-Kummerċ u tal-Esperti Veterinarji (“TRACES”).

Minn Ottubru 2017, skont ir-Regolament (KE) 2016/1842, kien possibbli li jinħareġ u jiġi approvat ċertifikat elettroniku ta’ spezzjoni (kif mitlub għar-rilaxx ta’ prodotti importati għaċ-ċirkolazzjoni libera fl-Unjoni) permezz tat-TRACES biss. Qabel, iċ-ċertifikat kien maħruġ biss f’forma stampata.

L-att previst se jippermetti li l-awtoritajiet ta’ San Marino jieħdu deċiżjonijiet fil-qasam kopert mill-att u jagħmlu komunikazzjonijiet meta d-dispożizzjonijiet rilevanti jirreferu għal deċiżjonijiet jew komunikazzjonijiet mill-Istati Membri tal-UE.

L-att previst ma jissupplimentax u ma jemendax il-qafas istituzzjonali tal-Ftehim.

Għaldaqstant, il-bażi ġuridika proċedurali għad-deċiżjoni proposta hija l-Artikolu 218(9) tat-TFUE.

4.2.Bażi ġuridika sostantiva

4.2.1.Prinċipji

Il-bażi ġuridika sostantiva għal Deċiżjoni skont l-Artikolu 218(9) tat-TFUE tiddependi primarjament mill-objettiv u mill-kontenut tal-att previst li fir-rigward tiegħu tittieħed pożizzjoni f’isem l-Unjoni. Jekk dak l-att ikollu żewġ għanijiet jew żewġ komponenti u jekk wieħed minn dawn l-għanijiet jew komponenti jkun jista’ jiġi identifikat bħala dak ewlieni, filwaqt li l-ieħor ikun sempliċiment inċidentali, id-Deċiżjoni skont l-Artikolu 218(9) tat-TFUE trid tkun imsejsa fuq bażi ġuridika sostantiva waħda, jiġifieri dik rikjesta mill-għan jew mill-komponent ewlieni jew predominanti.

4.2.2.Applikazzjoni għal dan il-każ

L-objettiv ewlieni u l-kontenut tal-att previst jirrigwardaw l-agrikoltura.

Ir-Regolamenti li huma s-suġġett tal-att previst (ir-Regolament tal-Kunsill (KE) Nru 834/2007 u r-Regolamenti tal-Kummissjoni (KE) Nri 889/2008 u 1235/2008) huma bbażati fuq l-Artikolu 43 tat-TFUE (li qabel kien l-Artikolu 37 tat-TKE).

Għaldaqstant, il-bażi ġuridika sostantiva tad-Deċiżjoni proposta hija l-Artikolu 43 tat-TFUE.

4.3.Konklużjoni

Jenħtieġ li l-bażi ġuridika tad-Deċiżjoni proposta tkun l-Artikolu 43 tat-TFUE, flimkien mal-Artikolu 218(9) tat-TFUE.

5.Pubblikazzjoni tal-att previst

Billi d-Deċiżjoni tal-Kumitat ta’ Kooperazzjoni UE-San Marino se jkollha l-effetti legali indikati fil-punt 4.1.2, huwa xieraq li tiġi ppubblikata f’Il-Ġurnal Uffiċjali tal-Unjoni Ewropea wara l-adozzjoni tagħha.

2019/0100 (NLE)

Proposta għal

DEĊIŻJONI TAL-KUNSILL

dwar il-pożizzjoni li trid tittieħed f’isem l-Unjoni Ewropea fil-Kumitat ta’ Kooperazzjoni stabbilit mill-Ftehim dwar il-Kooperazzjoni u l-Unjoni Doganali bejn il-Komunità Ekonomika Ewropea u r-Repubblika ta’ San Marino fir-rigward tad-dispożizzjonijiet applikabbli dwar il-produzzjoni organika u t-tikkettar ta’ prodotti organiċi, u l-arranġamenti għal importazzjonijiet ta’ prodotti organiċi

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 43, flimkien mal-Artikolu 218(9) tiegħu,

Wara li kkunsidra l-proposta tal-Kummissjoni Ewropea,

Billi:

(1)Il-Ftehim dwar il-Kooperazzjoni u l-Unjoni Doganali bejn il-Komunità Ekonomika Ewropea u r-Repubblika ta’ San Marino 6 (“il-Ftehim”) ġie konkluż mill-Unjoni bid-Deċiżjoni tal-Kunsill 2002/245/KE 7 u daħal fis-seħħ fl-1 ta’ April 2002.

(2)Skont l-Artikolu 7(2) tal-Ftehim, il-Kumitat ta’ Koperazzjoni irid jiddetermina f’aktar dettall id-dispożizzjonijiet tar-regolamenti dwar il-kwalità.

(3)Il-Kumitat ta’ Kooperazzjoni irid jadotta deċiżjoni dwar id-dispożizzjonijiet applikabbli, taħt il-Ftehim, tal-leġiżlazzjoni tal-Unjoni dwar il-produzzjoni organika u t-tikkettar ta’ prodotti organiċi, u l-arranġamenti għall-importazzjonijiet ta’ prodotti organiċi.

(4)Huwa xieraq li tiġi stabbilita l-pożizzjoni li trid tittieħed f’isem l-Unjoni fil-Kumitat ta’ Kooperazzjoni, billi d-determinazzjoni f’aktar dettall tad-dispożizzjonijiet applikabbli tal-leġiżlazzjoni tal-Unjoni se ssaħħaħ iċ-ċertezza tad-dritt fost il-partijiet tal-Ftehim u se tappoġġja l-funzjonament tajjeb tal-unjoni doganali bejn l-Unjoni u San Marino.

(5)Konsegwentement, hemm il-ħtieġa li tiġi ċċarata l-leġiżlazzjoni tal-Unjoni applikabbli dwar il-produzzjoni organika u t-tikkettar ta’ prodotti organiċi, li tinkludi r-Regolament tal-Kunsill (KE) Nru 834/2007 8 u r-Regolamenti tal-Kummissjoni (KE) Nru 889/2008 9 u (KE) Nru 1235/2008 10 . Barra minn hekk, huwa xieraq li jiġu stipulati l-arranġamenti meħtieġa għall-importazzjonijiet ta’ prodotti organiċi, kif ukoll proċedura li trid tiġi segwita f’każ li tiġi adottata leġiżlazzjoni ġdida tal-Unjoni dwar il-produzzjoni organika u t-tikkettar ta’ prodotti organiċi li taffettwa r-referenzi għad-dispożizzjonijiet applikabbli u l-arranġamenti maqbula,

ADOTTA DIN ID-DEĊIŻJONI:

Artikolu 1

Il-pożizzjoni li trid tittieħed f’isem l-Unjoni fil-Kumitat ta’ Kooperazzjoni stabbilit mill-Ftehim dwar il-Kooperazzjoni u l-Unjoni Doganali bejn il-Komunità Ekonomika Ewropea u r-Repubblika ta’ San Marino għandha tkun ibbażata fuq l-abbozz tal-att tal-Kumitat ta’ Kooperazzjoni li jinsab mehmuż ma’din id-Deċiżjoni.

Tibdil minuri fl-abbozz tal-att jista’ jiġi miftiehem mir-rappreżentanti tal-Unjoni fil-Kumitat ta’ Kooperazzjoni mingħajr deċiżjoni ulterjuri tal-Kunsill.

Artikolu 2

Din id-Deċiżjoni hija indirizzata lill-Kummissjoni.

Magħmul fi Brussell,

(1)    ĠU L 156, 23.6.2010, p. 13.

(2)    Ir-Regolament tal-Kunsill (KE) Nru 834/2007 tat-28 ta’ Ġunju 2007 dwar il-produzzjoni organika u t-tikkettar ta’ prodotti organiċi u li jħassar ir-Regolament (KEE) Nru 2092/91 (ĠU L 189, 20.7.2007, p. 1).

(3)    Ir-Regolament tal-Kummissjoni (KE) Nru 889/2008 tal-5 ta’ Settembru 2008 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 834/2007 dwar il-produzzjoni organika u t-tikkettar ta’ prodotti organiċi fir-rigward tal-produzzjoni, it-tikkettar u l-kontroll organiku (ĠU L 250, 18.9.2008, p. 1).

(4)    Ir-Regolament tal-Kummissjoni (KE) Nru 1235/2008 tat-8 ta’ Diċembru 2008 li jistabbilixxi r-regoli dettaljati għall-implimentazzjoni tar-Regolament tal-Kunsill (KE) Nru 834/2007 dwar l-arranġamenti għall-importazzjonijiet ta’ prodotti organiċi minn pajjiżi terzi (ĠU L 334, 12.12.2008, p. 25).

(5)    Is-Sentenza tal-Qorti tal-Ġustizzja tas-7 ta’ Ottubru 2014, il-Ġermanja vs il-Kunsill, C-399/12, ECLI:EU:C:2014:2258, il-paragrafi 61 sa 64.

(6)    ĠU L 84, 28.3.2002, p. 43.

(7)    Id-Deċiżjoni tal-Kunsill 2002/245/KE tat-28 ta’ Frar 2002 dwar il-konklużjoni ta’ ftehim dwar il-koperazzjoni u l-unjoni doganali bejn il-Komunità Ekonomika Ewropea u r-Repubblika ta’ San Marino u tal-Protokoll tiegħu wara t-tkabbir li sar fl-1 ta’ Jannar 1995 (ĠU L 84, 28.3.2002, p. 41).

(8)    Ir-Regolament tal-Kunsill (KE) Nru 834/2007 tat-28 ta’ Ġunju 2007 dwar il-produzzjoni organika u t-tikkettar ta’ prodotti organiċi u li jħassar ir-Regolament (KEE) Nru 2092/91 (ĠU L 189, 20.7.2007, p. 1).

(9)    Ir-Regolament tal-Kummissjoni (KE) Nru 889/2008 tal-5 ta’ Settembru 2008 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 834/2007 dwar il-produzzjoni organika u t-tikkettar ta’ prodotti organiċi fir-rigward tal-produzzjoni, it-tikkettar u l-kontroll organiku (ĠU L 250, 18.9.2008, p. 1).

(10)    Ir-Regolament tal-Kummissjoni (KE) Nru 1235/2008 tat-8 ta’ Diċembru 2008 li jistabbilixxi r-regoli dettaljati għall-implimentazzjoni tar-Regolament tal-Kunsill (KE) Nru 834/2007 dwar l-arranġamenti għall-importazzjonijiet ta’ prodotti organiċi minn pajjiżi terzi (ĠU L 334, 12.12.2008, p. 25).

IL-KUMMISSJONI EWROPEA

Brussell, 30.4.2019

COM(2019) 207 final

ANNESS

tal-

Proposta għal Deċiżjoni tal-Kunsill

dwar il-pożizzjoni li trid tittieħed f’isem l-Unjoni Ewropea fil-Kumitat ta’ Kooperazzjoni stabbilit mill-Ftehim dwar il-Kooperazzjoni u l-Unjoni Doganali bejn il-Komunità Ekonomika Ewropea u r-Repubblika ta’ San Marino fir-rigward tad-dispożizzjonijiet applikabbli dwar il-produzzjoni organika u t-tikkettar ta’ prodotti organiċi, u l-arranġamenti għal importazzjonijiet ta’ prodotti organiċi

ANNESS

Abbozz

DEĊIŻJONI Nru …/2018 TAL-KUMITAT TA’ KOOPERAZZJONI UE-SAN MARINO

ta’ XX YY 2018

li tikkonċerna d-dispożizzjonijiet applikabbli dwar il-produzzjoni organika u t-tikkettar ta’ prodotti organiċi, u l-arranġamenti għall-importazzjonijiet ta’ prodotti organiċi adottati skont il-Ftehim dwar il-Kooperazzjoni u l-Unjoni Doganali bejn il-Komunità Ekonomika Ewropea u r-Repubblika ta’ San Marino

IL-KUMITAT TA’ KOOPERAZZJONI UE-SAN MARINO,

Wara li kkunsidra l-Ftehim dwar il-Kooperazzjoni u l-Unjoni Doganali bejn il-Komunità Ekonomika Ewropea u r-Repubblika ta’ San Marino 1 , u b’mod partikulari l-Artikoli 7(2), 8(3)(c) u23(1) tiegħu,

Billi:

(1)    L-Artikolu 6(4) tal-Ftehim dwar il-Kooperazzjoni u l-Unjoni Doganali bejn il-Komunità Ekonomika Ewropea u r-Repubblika ta’ San Marino (“il-Ftehim”) jipprovdi li, fil-kummerċ tal-prodotti agrikoli bejn l-Unjoni u r-Repubblika ta’ San Marino, ir-Repubblika ta’ San Marino timpenja ruħha li tadotta l-leġiżlazzjoni ta’ kwalità tal-Unjoni fejn meħtieġ għall-funzjonament tajjeb tal-Ftehim.

(2)    Taħt il-ħames inċiż tal-Artikolu 7(1) tal-Ftehim, ir-Repubblika ta’ San Marino trid tapplika, fir-rigward tal-pajjiżi li mhumiex membri tal-Unjoni (“pajjiżi terzi”), il-leġiżlazzjoni ta’ kwalità tal-Unjoni fejn meħtieġ għall-funzjonament tajjeb tal-Ftehim.

(3)    Sabiex jiġu evitati ostakli għaċ-ċirkolazzjoni libera tal-oġġetti u sabiex jiġi żgurat il-funzjonament tajjeb tal-unjoni doganali stabbilita mill-Ftehim, huwa xieraq li jiġu determinati f’aktar dettall id-dispożizzjonijiet tal-leġiżlazzjoni ta’ kwalità tal-Unjoni li huma applikabbli għall-produzzjoni organika u t-tikkettar ta’ prodotti organiċi.

(4)    Sabiex tiġi żgurata l-konformità mal-leġiżlazzjoni tal-Unjoni fir-rigward tal-importazzjonijiet ta’ prodotti organiċi minn pajjiżi terzi fir-Repubblika ta’ San Marino, huwa neċessarju li jiġu stipulati l-arranġamenti rilevanti li jridu jiġu applikati mill-awtoritajiet nazzjonali tagħha.

(5)    Sabiex tiġi żgurata l-konformità mal-leġiżlazzjoni tal-Unjoni fir-rigward ta’ prodotti organiċi ppreparati jew prodotti fir-Repubblika ta’ San Marino, jenħtieġ ukoll li jiġu stipulati l-arranġamenti rilevanti.

(6)    Huwa xieraq ukoll li tiġi prevista proċedura li trid tiġi segwita f’każ li tiġi adotatta leġiżlazzjoni ġdida tal-Unjoni dwar il-produzzjoni organika u t-tikkettar ta’ prodotti organiċi li taffettwa r-referenzi għad-dispożizzjonijiet u l-arranġamenti stipulati f’din id-Deċiżjoni.

   ADOTTAT DIN ID-DEĊIŻJONI:

Artikolu 1

Id-dispożizzjonijiet applikabbli tal-leġiżlazzjoni tal-Unjoni dwar il-produzzjoni organika u t-tikkettar ta’ prodotti organiċi huma elenkati fl-Anness A.

Artikolu 2

L-arranġamenti meħtieġa biex tiġi żgurata l-konformità mal-leġiżlazzjoni tal-Unjoni msemmija fl-Artikolu 1 fir-rigward tal-importazzjonijiet ta’ prodotti organiċi minn pajjiżi terzi fir-Repubblika ta’ San Marino huma stipulati fl-Anness B.

Artikolu 3

L-arranġamenti meħtieġa biex tiġi żgurata l-konformità mal-leġiżlazzjoni tal-Unjoni msemmija fl-Artikolu 1 fir-rigward ta’ prodotti organiċi ppreparati jew prodotti fir-Repubblika ta’ San Marino huma stipulati fl-Anness C.

Artikolu 4

L-emendi tal-Annessi A, B u C kif ukoll arranġamenti prattiċi oħra meħtieġa għall-applikazzjoni tal-leġiżlazzjoni msemmija f’dawk l-Annessi għandhom jiġu maqbula mis-servizzi tal-Kummissjoni Ewropea u l-awtoritajiet tar-Repubblika ta’ San Marino.

Artikolu 5

Din id-Deċiżjoni għandha tidħol fis-seħħ fil-jum tal-adozzjoni tagħha.

Magħmul fi Brussell, XX YYY 2018.

   Għall-Kumitat ta’ Kooperazzjoni

   Il-President

ANNESS A

LISTA TA’ DISPOŻIZZJONIJIET APPLIKABBLI DWAR IL-PRODUZZJONI ORGANIKA U T-TIKKETTAR TAL-PRODOTTI ORGANIĊI

Ir-Regolament tal-Kunsill (KE) Nru 834/2007 tat-28 ta’ Ġunju 2007 dwar il-produzzjoni organika u t-tikkettar ta’ prodotti organiċi u li jħassar ir-Regolament (KEE) Nru 2092/91 (ĠU L 189, 20.7.2007, p. 1), kif emendat bi:

-    Ir-Regolament tal-Kunsill (KE) Nru 967/2008 tad-29 ta’ Settembru 2008 (ĠU L 264, 3.10.2008, p. 1),

-    Ir-Regolament tal-Kunsill (UE) Nru 517/2013 tat-13 ta’ Mejju 2013 (ĠU L 158, 10.6.2013, p. 1).

Ir-Regolament tal-Kummissjoni (KE) Nru 889/2008 tal-5 ta’ Settembru 2008 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 834/2007 dwar il-produzzjoni organika u t-tikkettar ta’ prodotti organiċi fir-rigward tal-produzzjoni, it-tikkettar u l-kontroll organiku (ĠU L 250, 18.9.2008, p. 1), kif emendat bi:

-    Ir-Regolament tal-Kummissjoni (KE) Nru 1254/2008 tal-15 ta’ Diċembru 2008 (ĠU L 337, 16.12.2008, p. 80),

-    Ir-Regolament tal-Kummissjoni (KE) Nru 710/2009 tal-5 ta’ Awwissu 2009 (ĠU L 204, 6.8.2009, p. 15),

-    Ir-Regolament tal-Kummissjoni (UE) Nru 271/2010 tal-24 ta’ Marzu 2010 (ĠU L 84, 31.3.2010, p. 19),

-    Ir-Regolament ta’ Implimentazzjoni tal-Kummissjoni (UE) Nru 344/2011 tat-8 ta’ April 2011 (ĠU L 96, 9.4.2011, p. 15),

-    Ir-Regolament ta’ Implimentazzjoni tal-Kummissjoni (UE) Nru 426/2011 tat-2 ta’ Mejju 2011 (ĠU L 113, 3.5.2011, p. 1),

-    Ir-Regolament ta’ Implimentazzjoni tal-Kummissjoni (UE) Nru 126/2012 tal-14 ta’ Frar 2012 (ĠU L 41, 15.2.2012, p. 5),

-    Ir-Regolament ta’ Implimentazzjoni tal-Kummissjoni (UE) Nru 203/2012 tat-8 ta’ Marzu 2012 (ĠU L 71, 9.3.2012, p. 42),

-    Ir-Regolament ta’ Implimentazzjoni tal-Kummissjoni (UE) Nru 505/2012 tal-14 ta’ Ġunju 2012 (ĠU L 154, 15.6.2012, p. 12),

-    Ir-Regolament ta’ Implimentazzjoni tal-Kummissjoni (UE) Nru 392/2013 tad-29 ta’ April 2013 (ĠU L 118, 30.4.2013, p. 5),

-    Ir-Regolament tal-Kummissjoni (UE) Nru 519/2013 tal-21 ta’ Frar 2013 (ĠU L 158, 10.6.2013, p. 74),

-    Ir-Regolament ta’ Implimentazzjoni tal-Kummissjoni (UE) Nru 1030/2013 tal-24 ta’ Ottubru 2013 (ĠU L 283, 25.10.2013, p. 15),

-    Ir-Regolament ta’ Implimentazzjoni tal-Kummissjoni (UE) Nru 1364/2013 tas-17 ta’ Diċembru 2013 (ĠU L 343, 19.12.2013, p. 29),

-    Ir-Regolament ta’ Implimentazzjoni tal-Kummissjoni (UE) Nru 354/2014 tat-8 ta’ April 2014 (ĠU L 106, 9.4.2014, p. 7),

-    Ir-Regolament ta’ Implimentazzjoni tal-Kummissjoni (UE) Nru 836/2014 tat-31 ta’ Lulju 2014 (ĠU L 230, 1.8.2014, p. 10),

-    Ir-Regolament ta’ Implimentazzjoni tal-Kummissjoni (UE) Nru 1358/2014 tat-18 ta’ Diċembru 2014 (ĠU L 365, 19.12.2014, p. 97),

-    Ir-Regolament ta’ Implimentazzjoni tal-Kummissjoni (UE) 2016/673 tad-29 ta’ April 2016 (ĠU L 116, 30.4.2016, p. 8),

-    Ir-Regolament ta’ Implimentazzjoni tal-Kummissjoni (UE) 2016/1842 tal-14 ta’ Ottubru 2016 (ĠU L 282, 19.10.2016, p. 19),

-    Ir-Regolament ta’ Implimentazzjoni tal-Kummissjoni (UE) 2017/838 tas-17 ta’ Mejju 2017 (ĠU L 125, 18.5.2017, p. 5),

-    Ir-Regolament ta’ Implimentazzjoni tal-Kummissjoni (UE) 2017/2273 tat-8 ta’ Diċembru 2017 (ĠU L 326, 9.12.2017, p. 42).

Ir-Regolament tal-Kummissjoni (KE) Nru 1235/2008 tat-8 ta’ Diċembru 2008 li jistabbilixxi r-regoli dettaljati għall-implimentazzjoni tar-Regolament tal-Kunsill (KE) Nru 834/2007 dwar l-arranġamenti għall-importazzjonijiet ta’ prodotti organiċi minn pajjiżi terzi (ĠU L 334, 12.12.2008, p. 25), kif emendat bi:

-    Ir-Regolament tal-Kummissjoni (KE) Nru 537/2009 tad-19 ta’ Ġunju 2009 (ĠU L 159, 20.6.2009, p. 6),

-    Ir-Regolament tal-Kummissjoni (UE) Nru 471/2010 tal-31 ta’ Mejju 2010 (ĠU L 134, 1.6.2010, p. 1),

-    Ir-Regolament ta’ Implimentazzjoni tal-Kummissjoni (UE) Nru 590/2011 tal-20 ta’ Ġunju 2011 (ĠU L 161, 21.6.2011, p. 9),

-    Ir-Regolament ta’ Implimentazzjoni tal-Kummissjoni (UE) Nru 1084/2011 tas-27 ta’ Ottubru 2011 (ĠU L 281, 28.10.2011, p. 3),

-    Ir-Regolament ta’ Implimentazzjoni tal-Kummissjoni (UE) Nru 1267/2011 tas-6 ta’ Diċembru 2011 (ĠU L 324, 7.12.2011, p. 9),

-    Ir-Regolament ta’ Implimentazzjoni tal-Kummissjoni (UE) Nru 126/2012 tal-14 ta’ Frar 2012 (ĠU L 41, 15.2.2012, p. 5),

-    Ir-Regolament ta’ Implimentazzjoni tal-Kummissjoni (UE) Nru 508/2012 tal-20 ta’ Ġunju 2012 (ĠU L 162, 21.6.2012, p. 1),

-    Ir-Regolament ta’ Implimentazzjoni tal-Kummissjoni (UE) Nru 751/2012 tas-16 ta’ Awwissu 2012 (ĠU L 222, 18.8.2012, p. 5),

-    Ir-Regolament ta’ Implimentazzjoni tal-Kummissjoni (UE) Nru 125/2013 tat-13 ta’ Frar 2013 (ĠU L 43, 14.2.2013, p. 1),

-    Ir-Regolament tal-Kummissjoni (UE) Nru 519/2013 tal-21 ta’ Frar 2013 (ĠU L 158, 10.6.2013, p. 74),

-    Ir-Regolament ta’ Implimentazzjoni tal-Kummissjoni (UE) Nru 567/2013 tat-18 ta’ Ġunju 2013 (ĠU L 167, 19.6.2013, p. 30),

-    Ir-Regolament ta’ Implimentazzjoni tal-Kummissjoni (UE) Nru 586/2013 tal-20 ta’ Ġunju 2013 (ĠU L 169, 21.6.2013, p. 51),

-    Ir-Regolament ta’ Implimentazzjoni tal-Kummissjoni (UE) Nru 355/2014 tat-8 ta’ April 2014 (ĠU L 106, 9.4.2014, p. 15),

-    Ir-Regolament ta’ Implimentazzjoni tal-Kummissjoni (UE) Nru 442/2014 tat-30 ta’ April 2014 (ĠU L 130, 1.5.2014, p. 39),

-    Ir-Regolament ta’ Implimentazzjoni tal-Kummissjoni (UE) Nru 644/2014 tas-16 ta’ Ġunju 2014 (ĠU L 177, 17.6.2014, p. 42),

-    Ir-Regolament ta’ Implimentazzjoni tal-Kummissjoni (UE) Nru 829/2014 tat-30 ta’ Lulju 2014 (ĠU L 228, 31.7.2014, p. 9),

-    Ir-Regolament ta’ Implimentazzjoni tal-Kummissjoni (UE) Nru 1287/2014 tat-28 ta’ Novembru 2014 (ĠU L 348, 4.12.2014, p. 1),

-    Ir-Regolament ta’ Implimentazzjoni tal-Kummissjoni (UE) 2015/131 tas-26 ta’ Jannar 2015 (ĠU L 23, 29.1.2015, p. 1),

-    Ir-Regolament ta’ Implimentazzjoni tal-Kummissjoni (UE) 2015/931 tas-17 ta’ Ġunju 2015 (ĠU L 151, 18.6.2015, p. 1),

-    Ir-Regolament ta’ Implimentazzjoni tal-Kummissjoni (UE) 2015/1980 tal-4 ta’ Novembru 2015 (ĠU L 289, 5.11.2015, p. 6),

-    Ir-Regolament ta’ Implimentazzjoni tal-Kummissjoni (UE) 2015/2345 tal-15 ta’ Diċembru 2015 (ĠU L 330, 16.12.2015, p. 29),

-    Ir-Regolament ta’ Implimentazzjoni tal-Kummissjoni (UE) 2016/459 tat-18 ta’ Marzu 2016 (ĠU L 80, 31.3.2016, p. 14),

-    Ir-Regolament ta’ Implimentazzjoni tal-Kummissjoni (UE) 2016/910 tad-9 ta’ Ġunju 2016 (ĠU L 153, 10.6.2016, p. 23),

-    Ir-Regolament ta’ Implimentazzjoni tal-Kummissjoni (UE) 2016/1330 tat-2 ta’ Awwissu 2016 (ĠU L 210, 4.8.2016, p. 43),

-    Ir-Regolament ta’ Implimentazzjoni tal-Kummissjoni (UE) 2016/1842 tal-14 ta’ Ottubru 2016 (ĠU L 282, 19.10.2016, p. 19),

-    Ir-Regolament ta’ Implimentazzjoni tal-Kummissjoni (UE) 2016/2259 tal-15 ta’ Diċembru 2016 (ĠU L 342, 16.12.2016, p. 4),

-    Ir-Regolament ta’ Implimentazzjoni tal-Kummissjoni (UE) 2017/872 tat-22 ta’ Mejju 2017 (ĠU L 134, 23.5.2017, p. 6),

-    Ir-Regolament ta’ Implimentazzjoni tal-Kummissjoni (UE) 2017/1473 tal-14 ta’ Awwissu 2017 (ĠU L 210, 15.8.2017, p. 4),

-    Ir-Regolament ta’ Implimentazzjoni tal-Kummissjoni (UE) 2017/1862 tas-16 ta’ Ottubru 2017 (ĠU L 266, 17.10.2017, p. 1),

-    Ir-Regolament ta’ Implimentazzjoni tal-Kummissjoni (UE) 2017/2329 tal-14 ta’ Diċembru 2017 (ĠU L 333, 15.12.2017, p. 29),

-    Ir-Regolament ta’ Implimentazzjoni tal-Kummissjoni (UE) 2018/949 tat-3 ta’ Lulju 2018 (ĠU L 167, 4.7.2018, p. 3),

kif ikkoreġut bi:

ĠU L 28, 4.2.2015, p. 48 (1287/2014),

ĠU L 241, 17.9.2015, p. 51 (2015/131).

ANNESS B

ARRANĠAMENTI MSEMMIJA FL-ARTIKOLU 2

1. Il-prodotti organiċi importati fir-Repubblika ta’ San Marino minn pajjiżi terzi għandhom ikunu akkumpanjati minn ċertifikat ta’ spezzjoni kif imsemmi fil-punt (d) tal-ewwel subparagrafu tal-Artikolu 33(1) tar-Regolament (KE) Nru 834/2007.

2. Ir-Repubblika ta’ San Marino għandha tuża s-Sistema elettronika tal-Kontroll tal-Kummerċ u tal-Esperti (TRACES) stabbilita bid-Deċiżjoni tal-Kummissjoni 2003/24/KE 2 biex tipproċessa ċ-ċertifikati elettroniċi ta’ spezzjoni għall-importazzjonijiet ta’ prodotti organiċi minn pajjiżi terzi.

3. Għall-finijiet tal-Artikolu 13 tar-Regolament (KE) Nru 1235/2008, fir-rigward tal-importazzjonijiet ta’ prodotti organiċi minn pajjiżi terzi fir-Repubblika ta’ San Marino, il-verifika u l-approvazzjoni taċ-ċertifikati ta’ spezzjonijiet li jużaw it-TRACES għandhom jitwettqu f’isem ir-Repubblika ta’ San Marino mill-uffiċċji doganali elenkati fl-Anness II tad-Deċiżjoni Omnibus Nru 1/2010 3 .

4. Għall-finijiet tal-Artikolu 16(2) tar-Regolament (KE) Nru 1235/2008, ir-Repubblika ta’ San Marino tista’ tintalab biex taġixxi bħala korelatur. Ir-Repubblika ta’ San Marino tista’ taċċetta dan il-kompitu fid-diskrezzjoni tagħha stess.

ANNESS C

ARRANĠAMENTI MSEMMIJA FL-ARTIKOLU 3

1.Fl-Artikoli rilevanti tar-Regolamenti elenkati fl-Anness A, it-terminu “Stat Membru” jew “Stati Membri” għandu jinftiehem li jinkludi r-Repubblika ta’ San Marino.

2.Meta l-Artikoli rilevanti tar-Regolamenti elenkati fl-Anness A jipprevedu li Stat Membru jrid jieħu deċiżjoni jew irid jagħmel komunikazzjoni jew notifika, din id-deċiżjoni għandha tittieħed jew din il-komunikazzjoni jew in-notifika għandha ssir mill-awtoritajiet tar-Repubblika ta’ San Marino. Dawn l-awtoritajiet għandhom iqisu l-opinjonijiet tal-kumitajiet xjentifiċi tal-Unjoni u jużaw bħala bażi għad-deċiżjonijiet tagħhom il-ġurisprudenza tal-Qorti tal-Ġustizzja tal-Unjoni Ewropea u r-regoli tal-imġiba amministrattiva adottati mill-Kummissjoni Ewropea.

(1)    ĠU L 84, 28.3.2002, p. 43.

(2)    Id-Deċiżjoni tal-Kummissjoni 2003/24/KE tat-30 ta’ Diċembru 2002 li tirrigwarda l-iżvilupp ta’ sistema veterinarja integrata u komputerizzata (ĠU L 8, 14.1.2003, p. 44).

(3)    Id-Deċiżjoni “Omnibus” Nru 1/2010 tal-Kumitat ta’ Kooperazzjoni UE – San Marino tad- 29 ta’ Marzu 2010 li tistabbilixxi diversi miżuri ta’ implimentazzjoni għall-Ftehim ta’ Kooperazzjoni u Unjoni Doganali bejn il-Komunità Ekonomika Ewropea u r-Repubblika ta’ San Marino (ĠU L 156, 23.6.2010, p. 13).