Sommarju tad-Deċiżjoni tal-Kummissjoni

tas-6 ta' Frar 2019

li tiddikjara konċentrazzjoni inkompatibbli mas-suq intern u mal-funzjonament tal-Ftehim ŻEE

(Il-Każ M.8677 — Siemens/Alstom)

(notifikat bid-dokument C(2019) 921)

(il-verżjoni bl-Ingliż biss hija awtentika)

(Test b'rilevanza għaż-ŻEE)

(2019/C 300/07)

Fis-6 ta' Frar 2019, il-Kummissjoni adottat Deċiżjoni f'każ ta' fużjoni skont ir-Regolament tal-Kunsill (KE) Nru 139/2004 tal-20 ta' Jannar 2004 dwar il-kontroll ta' konċentrazzjonijiet bejn impriżi (1), u b'mod partikolari l-Artikolu 8(3) ta' dak ir-Regolament. Verżjoni mhux kunfidenzjali tad-Deċiżjoni sħiħa, billi l-każ jista' jkun fil-forma ta' verżjoni provviżorja, hija disponibbli fil-lingwa awtentika tal-każ fuq is-sit web tad-Direttorat Ġenerali għall-Kompetizzjoni, f'dan l-indirizz: http://ec.europa.eu/comm/competition/index_en.html

I. IL-PARTIJIET

(1)

Siemens AG (il-Ġermanja, iktar 'il quddiem “Siemens” jew il-“Parti Notifikanti”) hija korporazzjoni Ġermaniża u l-kumpanija omm apikali ta' Siemens Group, li għandu l-kwartieri ġenerali f'Munich u li huwa kkwotat fil-boroż ta' Frankfurt am Main u Xetra. Siemens hija attiva f'għadd ta' żoni industrijali bit-taqsima tal-mobbiltà tagħha li toffri portafoll wiesa' ta' vetturi ferrovjarji, soluzzjonijiet għall-awtomatizzazzjoni tal-binarji u għas-sinjalar, sistemi ta' elettrifikazzjoni għall-binarji, teknoloġiji għat-traffiku fit-toroq, soluzzjonijiet tal-IT, kif ukoll prodotti u servizzi oħra li jikkonċernaw it-trasport ta' persuni u ta' beni bil-ferrovija u bit-triq.

(2)

Alstom SA (Franza, iktar 'il quddiem “Alstom”) hija korporazzjoni Franċiża, bil-kwartieri ġenerali tagħha fir-reġjun ta' Pariġi u hija kkwotata fil-borża Euronext ta' Pariġi. Alstom hija attiva globalment fl-industrija tat-trasport ferrovjarju, u toffri firxa wiesgħa ta' soluzzjonijiet tat-trasport (minn ferroviji b'veloċità għolja għal metros u trammijiet), servizzi personalizzati (manutenzjoni u modernizzazzjoni) kif ukoll offerti ddedikati għall-passiġġieri u l-infrastruttura, mobbiltà diġitali u soluzzjonijiet għas-sinjalar.

II. L-OPERAZZJONI

(3)

Fit-8 ta' Ġunju 2018, il-Kummissjoni rċeviet notifika formali ta' konċentrazzjoni proposta skont l-Artikolu 4 tar-Regolament tal-Kunsill (KE) Nru 139/2004 (ir-“Regolament dwar l-Għaqdiet”) li permezz tagħha Siemens takkwista l-kontroll esklużiv ta' Alstom permezz tal-kontribuzzjoni tan-negozju tal-mobbiltà ta' Siemens lil Alstom għal ishma ta' Alstom maħruġa ġodda (it-“Tranżazzjoni”). Siemens u Alstom huma kollettivament imsemmija bħala l-“Partijiet”.

(4)

It-Tranżazzjoni tirrigwarda l-akkwiżizzjoni tal-kontroll esklużiv ta' Alstom minn Siemens. Hija tinvolvi l-kombinazzjoni tan-negozju tal-mobbiltà ta' Alstom u ta' Siemens, inkluż il-ġbid tal-ferrovija u servizzi relatati (iktar 'il quddiem l-“entità fuża”).

III. ID-DIMENSJONI TAL-UNJONI

(5)

L-impriżi kkonċernati flimkien għandhom fatturat dinji aggregat ikkombinat ta' iktar minn EUR 5 000 miljun. Kull waħda minnhom għandha fatturat fl-UE ta' iktar minn EUR 250 miljun, iżda ma jilħqux iktar minn żewġ terzi tal-fatturat aggregat tagħhom fl-UE kollha fi Stat Membru wieħed biss. It-Tranżazzjoni għalhekk għandha dimensjoni tal-Unjoni.

IV. IL-PROĊEDURA

(6)

Fis-26 ta' Settembru 2017 tħabbret il-fużjoni tat-taqsima ta' Siemens għall-mobbiltà (tal-ferrovija) ma' Alstom.

(7)

Fit-8 ta' Ġunju 2018, il-Kummissjoni rċeviet notifika formali tat-Tranżazzjoni.

(8)

Fit-13 ta' Lulju 2018 il-Kummissjoni kkonstatat li t-Tranżazzjoni kienet tqajjem dubji serji dwar il-kompatibbiltà tat-Tranżazzjoni mas-suq intern u adottat deċiżjoni biex tinbeda investigazzjoni fil-fond. Fis-6 ta' Awwissu 2018 il-Parti Notifikanti ssottomettiet il-kummenti tagħha għad-deċiżjoni tal-Kummissjoni li tibda investigazzjoni fil-fond.

(9)

Bil-qbil tal-Partijiet, fis-16 ta' Lulju 2018 il-Kummissjoni estendiet l-iskadenza legali b'20 jum tax-xogħol skont l-Artikolu 10(3)(2) tar-Regolament dwar l-Għaqdiet.

(10)

Fit-8 ta' Awwissu 2018 il-Kummissjoni adottat deċiżjoni skont l-Artikolu 11(3) tar-Regolament dwar l-Għaqdiet u ssospendiet il-limitu ta' żmien għar-rieżami tal-fużjoni peress li l-Partijiet ma setgħux jipprovdu ċerti dokumenti mitluba. Is-sospensjoni damet għaddejja mis-7 ta' Awwissu 2018 sal-4 ta' Settembru 2018, id-data li fiha ġew ipprovduti d-dokumenti mitluba.

(11)

Fid-29 ta' Ottubru 2018, il-Kummissjoni adottat Dikjarazzjoni tal-Oġġezzjonijiet. Il-Parti Notifikanti rrispondiet għad-Dikjarazzjoni tal-Oġġezzjonijiet fl-14 ta' Novembru 2018. Il-Parti Notifikanti ma talbitx seduta orali.

(12)

Il-Parti Notifikanti ppreżentat impenji fit-12 ta' Diċembru 2018 (iktar 'il quddiem l-“Ewwel Impenji”). Fis-17 ta' Diċembru 2018, il-Kummissjoni nediet test tas-suq dwar l-impenji ppreżentati fit-12 ta' Diċembru 2018.

(13)

Fid-9 ta' Jannar 2019 il-Parti Notifikanti ppreżentat l-ewwel verżjoni modifikata tal-impenji (iktar 'il quddiem it-“Tieni Impenji”). Fil-25 ta' Jannar 2019 il-Parti Notifikanti ppreżentat it-tieni verżjoni modifikata tal-impenji (iktar 'il quddiem l-“Impenji Finali”).

(14)

Il-laqgħa mal-Kumitat Konsultattiv seħħet nhar il-31 ta' Jannar 2019.

V. SWIEQ RILEVANTI

a. Vetturi ferrovjarji b'veloċità għolja u b'veloċità għolja ħafna

(15)

Il-Kummissjoni tqis li l-ferroviji li kapaċi jilħqu veloċitajiet ta' 250 km/h jew iktar (“vetturi ferrovjarji ta' veloċità għolja”) jikkostitwixxu suq tal-prodott separat. Barra minn hekk, il-kunsiderazzjonijiet fin-naħa tal-provvista u tad-domanda, ikkonfermati minn fehim komuni fl-industrija kollha, mill-bejgħ u mir-rekwiżiti tekniċi, kif ukoll ir-riżultati tal-investigazzjoni tas-suq juru li l-vetturi ferrovjarji b'veloċità għolja (ferroviji li kapaċi jilħqu veloċità bejn 250 km/h u 299 km/h) mhumiex sostitwibbli għal vetturi ferrovjarji b'veloċità għolja ħafna (ferroviji li kapaċi jilħqu veloċitajiet ta' 300 km/h jew iktar fuq binarji speċjali). Għaldaqstant, il-vetturi ferrovjarji b'veloċità għolja ħafna potenzjalment jikkostitwixxu suq separat. Madankollu, peress li t-Tranżazzjoni tqajjem kwistjonijiet ta' kompetizzjoni irrispettivament mid-definizzjoni eżatta tas-suq, l-effetti se jiġu eżaminati fuq il-bażi taż-żewġ definizzjonijiet konċepibbli tas-suq. Il-Kummissjoni tqis li s-subsegmentazzjonijiet ibbażati fuq it-tip ta' sistema tal-ġbid, l-arkitettura jew in-numru ta' sulari mhumiex rilevanti.

(16)

Il-Kummissjoni tqis li s-suq ġeografiku rilevanti huwa mifrux mill-inqas fiż-ŻEE kollha u jinkludi l-Iżvizzera b'ħarsa lejn regoli applikabbli komuni u n-nuqqas ta' ostakli għad-dħul. Il-Kummissjoni ma tistax teskludi li s-suq huwa dinji, bl-esklużjoni taċ-Ċina, tal-Ġappun u tal-Korea t'Isfel minħabba ostakli insormontabbli għad-dħul f'dawk il-pajjiżi, kif ġie spjegat mill-Parti Notifikanti u kkonfermat mill-investigazzjoni tas-suq.

(17)

Il-Kummissjoni tqis li s-suq rilevanti huwa s-suq għall-ferroviji b'veloċità għolja, inkluż is-suq iktar żgħir ta' ferroviji b'veloċità għolja ħafna fiż-ŻEE (inkluża l-Iżvizzera) u fuq bażi dinjija (minbarra ċ-Ċina, il-Ġappun, u l-Korea t'Isfel).

b. Sinjalazzjoni tal-linji prinċipali

(18)

Il-Kummissjoni tqis li s-sinjalazzjoni tal-linji prinċipali u s-sinjalazzjoni urbana huma żewġt iswieq separati. Fi ħdan is-sinjalazzjoni tal-linji prinċipali, il-proġetti ta' sinjalazzjoni u l-prodotti ta' sinjalazzjoni jikkostitwixxu swieq separati. Barra minn hekk, jenħtieġ li l-proġetti ta' sinjalazzjoni tal-linji prinċipali jerġgħu jinqasmu bejn subsistemi (lokkjaturi, protezzjoni awtomatika tal-ferroviji (ATP, automatic train protection), u sistemi tal-operat u tal-kontroll), bejn proġetti miruta u tas-Sistema Ewropea ta' Kontroll tal-Ferroviji (ETCS, European Train Control System), bejn soluzzjonijiet on-board u dawk għaż-żoni maġenb il-binarji, kif ġej:

(a)	Proġetti OBU miruta;

(b)	Proġetti OBU tal-ETCS;

(c)	Proġetti miruta tal-ATP għaż-żoni maġenb il-binarji;

(d)	Proġetti indipendenti tal-ATP ETCS għaż-żoni maġenb il-binarji (l-hekk imsejħin proġetti ta' trikkib);

(e)	Proġetti indipendenti ta' lokkjatura;

(f)	Proġetti ta' risinjalazzjoni tal-ATP ETCS għaż-żoni maġenb il-binarji (pakkett ta' ATP ETCS għaż-żoni maġenb il-binarji u lokkjaturi).

(19)

Il-Kummissjoni ma tkomplix taqsam is-swieq skont id-daqs tal-proġett jew il-livell tal-ETCS (Livell 1 tal-ETCS, Livell 2 tal-ETCS).

(20)

Barra minn hekk, is-suq tal-prodotti ta' sinjalazzjoni għal tagħmir ta' lokkjatura jifforma suq separat.

(21)

Il-Kummissjoni tqis li s-suq ġeografiku rilevanti għal proġetti tal-OBU ETCS, proġetti ta' trikkib tal-ATP ETCS għaż-żoni maġenb il-binarji, u proġetti ta' risinjalazzjoni tal-ATP ETCS għaż-żoni maġenb il-binarji jkopri ż-ŻEE kollha.

(22)

Il-Kummissjoni tqis li s-suq ġeografiku rilevanti għal proġetti OBU miruta, proġetti ta' lokkjatura indipendenti, u tagħmir ta' lokkjatura huwa nazzjonali.

VI. VALUTAZZJONI KOMPETITTIVA

a. Vetturi ferrovjarji b'veloċità għolja u b'veloċità għolja ħafna

(23)

Iż-żewġ Partijiet jimmanifatturaw u jfornu vetturi ferrovjarji b'veloċità għolja u b'veloċità għolja ħafna.

(24)

Il-Kummissjoni wettqet il-valutazzjoni tagħha fuq il-bażi tal-ishma tas-suq ikkalkulati matul il-perjodu 2008–2018 (it-teħid ta' ordnijiet skont il-valur). L-entità fuża jkollha sehem tas-suq ikkombinat ta' [70–80] % tas-suq sħiħ għal vetturi ferrovjarji b'veloċità għolja u b'veloċità għolja ħafna fiż-ŻEE (inkluża l-Iżvizzera) u [60–70] % fid-dinja (minbarra ċ-Ċina, il-Ġappun u l-Korea t'Isfel). Fis-suq iktar strett għal vetturi ferrovjarji b'veloċità għolja ħafna, l-entità fuża jkollha sehem mis-suq ikkombinat ta' [70-80] % fiż-ŻEE (inkluża l-Iżvizzera) u [60–70] % fid-dinja (minbarra ċ-Ċina, il-Ġappun u l-Korea t'Isfel).

(25)

L-ishma mis-suq kbar ħafna tal-Partijiet fis-suq sħiħ għal vetturi ferrovjarji b'veloċità għolja u b'veloċità għolja ħafna kif ukoll fis-suq iktar strett ta' vetturi ferrovjarji b'veloċità għolja ħafna jikkostitwixxu evidenza li teżisti pożizzjoni dominanti fis-suq. It-tħassib dwar il-kompetizzjoni huwa ferm iktar probabbli peress li t-Tranżazzjoni se ssaħħaħ struttura tas-suq ikkonċentrata. Għaldaqstant, l-HHI wara l-fużjoni se jkun konsiderevolment ogħla minn 2 000 fis-segmentazzjonijiet kollha, filwaqt li d-delta tkun ħafna ogħla minn 250.

(i) Il-kompetituri tal-Partijiet

(26)

Kuntrarjament għall-Partijiet, il-kompetituri ma kellhomx bejgħ jew inkella kellhom bejgħ limitat ħafna ta' ferroviji b'veloċità għolja jew b'veloċità għolja ħafna lil klijenti miż-ŻEE, għajr lil operaturi f'pajjiżhom. B'mod partikolari, f'dak li għandu x'jaqsam mal-vetturi ferrovjarji b'veloċità għolja ħafna, minħabba strateġiji ta' offerti konġunti u limitazzjonijiet fil-portafoll, in-numu ta' kompetituri attwali tal-entità fuża wara t-Tranżazzjoni jkun essenzjalment limitat għal żewġ fornituri, jiġifieri Talgo u konsorzju ffurmat bejn Bombardier u Hitachi-Ansaldo. CAF ma kellha l-ebda bejgħ ta' ferroviji b'veloċità għolja ħafna.

(27)

Minbarra l-fornituri bbażati fiż-ŻEE, il-Parti Notifikanti tqis li CRRC, Hyundai Rotem u Kawasaki jeżerċitaw pressjoni kompetittiva fuq bażi dinjija. Madankollu, CRRC qatt ma rebħet offerta għal veloċità għolja jew veloċità għolja ħafna fiż-ŻEE. Il-pożizzjoni ta' CRRC fis-suq dinji għadha marġinali u tirriżulta minn bejgħ wieħed, kuntratt tal-2017 għall-Ferrovija Indoneżjana li ma nkisibx permezz ta' proċedura kompetittiva ta' offerti iżda b'riżultat ta' negozjati fil-livell tal-gvern. B'hekk, CRRC għadha ma ġietx ittestjata f'offerti kompetittivi barra miċ-Ċina kontra l-fornituri ewlenin tad-dinja ta' vetturi ferrovjarji b'veloċità għolja u b'veloċità għolja ħafna. Fiż-ŻEE, CRRC ma ġietx mistiedna tippreżenta offerta fis-sejħa għall-offerti li ġejja ta' HS2 (ir-Renju Unit). Jirriżulta li sa issa CRRC ma bigħetx vetturi ferrovjarji b'veloċità għolja jew b'veloċità għolja ħafna f'kundizzjonijiet kompetittivi normali, u lanqas ma ġiet mistiedna tagħmel dan. Għaldaqstant, CRRC ma tistax titqies li teżerċita restrizzjoni kompetittiva sinifikanti fuq is-suq dinji barra miċ-Ċina, il-Ġappun u l-Korea t'Isfel.

(ii) Prossimità tal-kompetizzjoni

(28)

Il-Kummissjoni tqis li l-Partijiet huma kompetituri mill-qrib, fuq il-bażi ta': (i) l-offerta tal-prodott u l-impronta ġeografika tagħhom, (ii) analiżi tad-data tal-offerti, u (iii) id-dokumenti interni tal-Partijiet.

(29)

Fir-rigward tal-impronta ġeografika, Siemens u Alstom huma attivi barra mill-Ġermanja u Franza, b'bejgħ lil klijenti fil-pajjiżi li ġejjin: l-Italja (NTV/Alstom), il-Belġju/Franza/in-Netherlands/ir-Renju Unit (Eurostar/Siemens), il-Finlandja (Karelian/Alstom) u l-Polonja (PKP/Alstom). Barra miż-ŻEE, il-Partijiet huma attivi f'dawn il-pajjiżi: il-Marokk (ONCF/Alstom), l-Istati Uniti (Amtrak/Alstom), ir-Russja (RZD/Siemens) u t-Turkija (TCDD/Siemens).

(30)

Il-parteċipanti fl-investigazzjoni tas-suq ikkonfermaw li l-offerti tal-prodotti tal-Partijiet jikkompetu mill-qrib. Il-klijenti kkonfermaw li l-offerta tal-Partijiet ta' prodotti b'veloċità għolja ħafna jirrappreżentaw l-aħjar alternattiva għal xulxin.

(31)

L-analiżi tas-sejħiet għal offerti li fihom kwalunkwe waħda mill-Partijiet ippreżentat offerta (2008–2018) turi li l-Partijiet huma l-kompetituri l-iktar frekwenti ta' xulxin f'sejħiet għal offerti ta' vetturi ferrovjarji b'veloċità għolja u b'veloċità għolja ħafna. Barra minn hekk, l-analiżi tad-data tal-offerti turi li l-parteċipazzjoni f'sejħiet għal offerti hija ġeneralment limitata, b'żewġ parteċipanti jew inqas (jiġifieri fornituri li jippreżentaw offerta) fil-biċċa l-kbira ta' sejħiet għal offerti ta' vetturi ferrovjarji b'veloċità għolja u b'veloċità għolja ħafna fiż-ŻEE u fil-livell dinji.

(32)

L-analiżi tal-parteċipazzjoni f'sejħiet għal offerti turi li l-interazzjoni tal-Partijiet tiffoka primarjament fuq sejħiet għal offerti ta' ferroviji b'veloċità għolja ħafna filwaqt li l-frekwenza tal-interazzjoni tal-Partijiet hija ferm inqas fir-rigward ta' sejħiet għal offerti ta' vetturi ferrovjarji b'veloċità għolja.

(33)

Kollox ma' kollox, speċjalment għall-vetturi ferrovjarji b'veloċità għolja ħafna, l-analiżi tal-offerti turi li l-Partijiet huma l-eqreb kompetituri ta' xulxin u r-restrizzjoni kompetittiva ewlenija. Barra minn hekk, l-analiżi tal-offerti turi li Talgo u l-konsorzju Bombardier/Hitachi-Ansaldo jeżerċitaw restrizzjonijiet kompetittivi iktar riżervati fuq Alstom u prattikament l-ebda fuq Siemens. CAF u Stadler ma jeżerċitaw l-ebda restrizzjoni kompetittiva fir-rigward ta' vetturi ferrovjarji b'veloċità għolja ħafna.

(34)

Kollox ma' kollox, id-dokumenti interni tal-Partijiet juru r-restrizzjonijiet kompetittivi mill-qrib eżerċitati fuq xulxin mill-Partijiet qabel it-Tranżazzjoni u l-pressjoni iktar riżervata eżerċitata minn fornituri rivali.

(iii) Ostakli għad-dħul

(35)

Matul l-investigazzjoni tas-suq ġew identifikati diversi ostakli għad-dħul fis-swieq tal-vetturi ferrovjarji b'veloċità għolja u b'veloċità għolja ħafna. Fost l-ostakli identifikati, uħud minnhom japplikaw b'mod ġenerali għal kull attività li tinvolvi vetturi ferrovjarji b'veloċità għolja jew għolja ħafna, irrispettivament mill-post. Dawn jinkludu l-ispejjeż għall-iżvilupp tal-vetturi ferrovjarji u r-rekwiżit tal-eżistenza ta' rekord adegwat biex ikunu jistgħu jiġu ppreżentati offerti kredibbli fis-sejħiet għal offerti. Ostakli oħra għad-dħul huma speċifiċi għaż-ŻEE u jinkludu l-iskema Ewropea għall-awtorizzazzjoni ta' vetturi ferrovjarji, in-neċessità ta' rekord pożittiv speċifiku għaż-ŻEE, rekwiżiti informali ta' lokalizzazzjoni u r-relazzjoni privileġġjata bejn għadd ta' fornituri bbażati fiż-ŻEE u l-operaturi nazzjonali f'pajjiżhom.

(36)

Dawn l-ostakli ġew rikonoxxuti minn CRRC, li tagħraf li fil-preżent mhijiex offerent kredibbli barra miċ-Ċina. L-istess jgħodd għal fornituri Asjatiċi oħra, li l-Partijiet iqisu bħala parteċipanti potenzjali iżda li bħalissa mhumiex attivi fiż-ŻEE u ma jeżerċitaw l-ebda restrizzjoni kompetittiva.

(iv) Konklużjoni

(37)

Minħabba r-raġunijiet stabbiliti hawn fuq, il-Kummissjoni tqis li t-Tranżazzjoni se timpedixxi b'mod sinifikanti l-kompetizzjoni effettiva, minħabba effetti orizzontali mhux koordinati fis-suq ta' vetturi b'veloċità għolja, inkluż is-suq iktar strett ta' ferroviji b'veloċità għolja ħafna fiż-ŻEE (inkluża l-Iżvizzera) u fuq bażi dinjija (minbarra ċ-Ċina, il-Ġappun u l-Korea t'Isfel).

b. Sinjalazzjoni tal-linji prinċipali

(i) Proġetti OBU tal-ETCS — effetti unilaterali orizzontali

(38)

It-Tranżazzjoni tkun tikkawża impediment sinifikanti għall-kompetizzjoni effettiva minħabba effetti orizzontali mhux koordinati, b'rabta ma' proġetti OBU tal-ETCS fiż-ŻEE.

(39)

(40)

Il-Partijiet huma kompetituri mill-qrib, kif ħareġ mill-analiżi tad-data tal-offerti għall-perjodu 2008–2018 u skont l-opinjonijiet tal-klijenti u fuq il-bażi tad-dokumenti interni tal-Partijiet. Il-Partijiet huma innovaturi importanti fl-OBUs tal-ETCS u t-Tranżazzjoni tkun telimina innovatur importanti. L-entità fuża tkun tgawdi vantaġġ kompetittiv, li jdgħajjef lill-kompetituri u jnaqqas b'mod sinifikanti l-kompetizzjoni wara t-Tranżazzjoni, minħabba l-aċċess tal-Partijiet għal sistemi ta' sinjalazzjoni miruta u l-pożizzjoni iktar b'saħħitha tal-Partijiet fir-rigward ta' kurituri internazzjonali. Il-Kummissjoni tqis li fil-futur qarib huwa improbabbli li jkun hemm parteċipant ġdid fis-suq taż-ŻEE, inklużi fornituri Ċiniżi. Sal-lum il-ġurnata ma ġiet ippreżentata l-ebda offerta minn fornituri Ċiniżi għal xi proġett OBU tal-ETCS fiż-ŻEE.

(ii) Proġetti OBU miruta fil-Belġju — effetti unilaterali orizzontali

(41)

It-Tranżazzjoni tkun tikkawża impediment sinifikanti għall-kompetizzjoni effettiva minħabba effetti orizzontali mhux koordinati, b'rabta ma' proġetti OBU miruta fil-Belġju.

(42)

Fil-perjodu 2008–2018 Alstom kienet l-uniku fornitur ta' proġetti OBU miruta fil-Belġju. Siemens hija l-uniku fornitur ieħor li għandu lokkjatura omologata fil-Belġju. Siemens teżerċita restrizzjoni kompetittiva fuq il-bażi tal-lokkjatura omologata tagħha, li tkun mitlufa wara t-Tranżazzjoni.

(iii) Proġetti ta' lokkjatura (indipendenti) — effetti unilaterali orizzontali

(43)

It-Tranżazzjoni tkun tikkawża impediment sinifikanti għall-kompetizzjoni effettiva minħabba effetti orizzontali mhux koordinati, b'rabta ma' proġetti ta' lokkjatura indipendenti f'dawn li ġejjin: il-Belġju, il-Kroazja, il-Greċja, l-Ungerija, il-Portugall, ir-Rumanija, Spanja u r-Renju Unit.

(44)

Fil-pajjiżi li fihom jirriżultaw is-swieq affettwati, jiġifieri l-Kroazja, Spanja, ir-Renju Unit, u l-Portugall, l-entità fuża jkollha sehem mis-suq ikkombinat għoli (fuq il-bażi tat-teħid ta' ordnijiet skont il-valur fil-perjodu 2008–2018) li jammonta għal [90-100] % fil-Kroazja, [40-50] % fi Spanja, [70-80] % fir-Renju Unit, u [50-60] % fil-Portugall. Il-Partijiet huma kompetituri mill-qrib u kwalunkwe saħħa potenzjali tax-xerrej tal-maniġer tal-infrastruttura tkun insuffiċjenti biex jingħeleb it-telf ta' kompetizzjoni mit-Tranżazzjoni.

(45)

Minbarra l-pajjiżi li fihom hemm koinċidenza attwali tal-bejgħ bejn il-Partijiet fil-perjodu 2008–2018, it-Tranżazzjoni tkun twassal ukoll għal impediment sinifikanti għall-kompetizzjoni effettiva fil-pajjiżi li fihom, minħabba l-għadd limitat ħafna ta' offerenti, il-Partijiet jeżerċitaw restrizzjoni kompetittiva billi jipparteċipaw f'offerti għal lokkjaturi indipendenti jew offerti li jinvolvu lokkjaturi. Dawn il-pajjiżi huma l-Greċja, ir-Rumanija, il-Belġju u l-Ungerija. Il-Partijiet huma kompetituri mill-qrib u kwalunkwe saħħa potenzjali tax-xerrej tal-maniġer tal-infrastruttura tkun insuffiċjenti biex jingħeleb it-telf ta' kompetizzjoni mit-Tranżazzjoni.

(iv) Proġetti ta' trikkib tal-ATP ETCS għaż-żoni maġenb il-binarji — effetti unilaterali orizzontali

(46)

Il-Kummissjoni tqis li t-Tranżazzjoni tkun tikkawża impediment sinifikanti għall-kompetizzjoni effettiva minħabba effetti orizzontali mhux koordinati, b'rabta ma' proġetti ta' trikkib tal-ATP ETCS għaż-żoni maġenb il-binarji.

(47)

(48)

Il-Partijiet huma kompetituri mill-qrib, id-dħul ta' parteċipanti ġodda (partikolarment fornituri Ċiniżi) huwa improbabbli, u kwalunkwe saħħa tax-xerrej potenzjali tal-klijenti tkun insuffiċjenti biex tegħleb it-telf ta' kompetizzjoni mit-Tranżazzjoni.

(v) Proġetti ta' risinjalazzjoni tal-ATP ETCS għaż-żoni maġenb il-binarji — effetti unilaterali orizzontali

(49)

Il-Kummissjoni tqis li t-Tranżazzjoni tkun tikkawża impediment sinifikanti għall-kompetizzjoni effettiva minħabba effetti orizzontali mhux koordinati, b'rabta ma' proġetti ta' risinjalazzjoni tal-ATP ETCS għaż-żoni maġenb il-binarji.

(50)

(51)

(vi) Tagħmir ta' lokkjatura — effetti unilaterali orizzontali

(52)

Il-Kummissjoni tqis li t-Tranżazzjoni tkun tikkawża impediment sinifikanti għall-kompetizzjoni effettiva minħabba effetti orizzontali mhux koordinati fis-suq tat-tagħmir ta' lokkjatura fir-Renju Unit.

(53)

L-entità fuża jkollha sehem mis-suq ikkombinat ta' [90-100] % fuq il-bażi tal-ishma mis-suq ikkalkulati matul il-perjodu 2015–2017 (it-teħid tal-ordnijiet skont il-valur). Wara t-Tranżazzjoni ma jkunx hemm fornituri alternattivi vijabbli ta' tagħmir ta' lokkjatura speċifiku għar-Renju Unit u kwalunkwe saħħa tax-xerrej potenzjali tal-klijenti tkun insuffiċjenti biex tegħleb it-telf ta' kompetizzjoni mit-Tranżazzjoni.

(vii) Effetti vertikali — preklużjoni tal-input mis-suq għal proġetti ta' lokkjatura indipendenti fir-Renju Unit

(54)

Il-Kummissjoni tqis li t-Tranżazzjoni tkun tikkawża impediment sinifikanti għall-kompetizzjoni effettiva minħabba effetti vertikali mhux koordinati fis-suq tal-proġetti ta' lokkjatura indipendenti fir-Renju Unit.

(55)

Il-Kummissjoni tqis li wara t-Tranżazzjoni l-entità fuża jkollha l-abbiltà u l-inċentiv li teskludi l-aċċess għat-tagħmir ta' lokkjatura fil-konfront ta' rivali downstream fir-Renju Unit li kontrihom tikkompeti għall-provvista ta' proġetti indipendenti ta' lokkjatura.

(56)

L-ewwel nett, l-entità fuża se jkollha l-kapaċità li teskludi l-aċċess għat-tagħmir ta' lokkjatura billi żżid il-prezzijiet jew inkella tfixkel il-kapaċità tal-kompetituri attivi fis-suq ta' proġetti indipendenti ta' lokkjatura li jippreżentaw l-offerta tagħhom b'mod kompetittiv f'sejħiet għal offerti li fihom jiddependu fuq il-prodotti ta' lokkjatura tal-Partijiet. Dan huwa l-każ peress li l-prodotti ta' lokkjatura tal-Partijiet huma komponent kritiku fil-provvista ta' proġetti indipendenti ta' lokkjatura fir-Renju Unit, u peress li l-entità fuża għandha grad sinifikanti ta' saħħa fis-suq upstream tal-provvista ta' tagħmir ta' lokkjatura fir-Renju Unit.

(57)

It-tieni nett, l-entità fuża jkollha inċentiv biex teskludi l-aċċess għall-prodotti ta' sinjalazzjoni upstream wara t-Tranżazzjoni, għax tkun strateġija profittabbli.

(58)

Finalment, l-imġiba passata tal-Partijiet turi li diġà ppruvaw ifixklu l-kapaċità tal-preżentazzjoni ta' offerti mill-kompetituri għal proġetti ta' sinjalazzjoni fil-linji prinċipali fir-Renju Unit.

(viii) Konklużjoni

(59)

Minħabba r-raġunijiet imsemmija hawn fuq, il-Kummissjoni tqis li t-Tranżazzjoni tkun tikkawża impediment sinifikanti għall-kompetizzjoni effettiva b'riżultat ta' effetti orizzontali u/jew mhux orizzontali li mhumiex koordinati, b'rabta mas-swieq li ġejjin:

(a)	Vetturi ferrovjarji b'veloċità għolja u b'veloċità għolja ħafna, inkluż is-suq iktar strett ta' vetturi ferrovjarji b'veloċità għolja ħafna fiż-ŻEE u fid-dinja (minbarra ċ-Ċina, il-Ġappun u l-Korea t'Isfel);

(b)	Proġetti OBU tal-ETCS fiż-ŻEE;

(c)	Proġetti OBU miruta fil-Belġju;

(d)	Proġetti ta' lokkjatura indipendenti f'dawn li ġejjin: il-Belġju, il-Kroazja, il-Greċja, l-Ungerija, il-Portugall, ir-Rumanija, Spanja, u r-Renju Unit;

(e)	Proġetti ta' trikkib tal-ATP ETCS għaż-żoni maġenb il-binarji;

(f)	Proġetti ta' risinjalazzjoni tal-ATP ETCS għaż-żoni maġenb il-binarji fiż-ŻEE;

(g)	Tagħmir ta' lokkjatura fir-Renju Unit.

VII. RIMEDJI

(60)

Sabiex jiġi eliminat it-tħassib dwar il-kompetizzjoni identifikat mill-Kummissjoni, il-Partijiet ippreżentaw l-Ewwel Impenji fit-12 ta' Diċembru 2018, li ġew suġġetti għal eżami tas-suq mill-Kummissjoni fis-17 ta' Diċembru 2018.

(61)

Fid-9 ta' Jannar 2019, il-Partijiet ippreżentaw it-Tieni Impenji. Fil-25 ta' Jannar 2019, il-Partijiet ippreżentaw reviżjonijiet addizzjonali fl-Impenji Finali. It-Tieni Impenji u l-Impenji Finali ma ġewx suġġetti għal eżami tas-suq.

(62)

L-Ewwel u t-Tieni Impenji u l-Impenji Finali kienu jinkludu b'mod partikolari miżuri li għandhom l-għan li jsolvu t-tħassib dwar il-kompetizzjoni identifikat mill-Kummissjoni b'rabta mas-swieq ta' (i) vetturi ferrovjarji b'veloċità għolja u b'veloċità għolja ħafna (l-“Impenji għal Vetturi Ferrovjarji b'Veloċità Għolja Ħafna”) u (ii) sinjalazzjoni fil-linja prinċipali (l-“Impenji għas-Sinjalazzjoni fil-Linja Prinċipali”).

a. Impenji għal Vetturi Ferrovjarji b'Veloċità Għolja Ħafna

(i) Deskrizzjoni

(63)

L-Impenji għal Vetturi Ferrovjarji b'Veloċità Għolja Ħafna jikkonsistu f'żewġ pakketti alternattivi:

(a)

Il-Pakkett Velaro jikkonsisti (i) fit-trasferiment tad-dritt li tiġi żviluppata, imtejba, manifatturata u kummerċjalizzata t-tielet ġenerazzjoni tal-pjattaforma Velaro ta' Siemens (“Velaro 3G”), u (ii) f'trasferiment tat-teknoloġija ewlenija tal-kunċett Velaro Novo ta' Siemens (il-“Liċenzja Velaro Novo”), magħmul disponibbli lill-akkwirent taħt ċerti kundizzjonijiet; jew

(b)	Il-Pakkett Pendolino jikkonsisti fl-iżvestiment tal-pjattaforma Pendolino ta' Alstom (l-“Iżvestiment Pendolino”), li se tkun magħmula disponibbli lill-akkwirent taħt ċerti kundizzjonijiet.

(ii) Valutazzjoni

(64)

Il-Kummissjoni tqis li ż-żewġ pakketti mhumiex biżżejjed biex jindirizzaw it-tħassib dwar il-kompetizzjoni deskritt iktar 'il fuq fir-rigward ta' ferroviji b'veloċità għolja ħafna:

(a)

Il-Pakkett Velaro ma jinkludi l-ebda assi ta' produzzjoni, manifattura, u riċerka u żvilupp. Barra minn hekk, il-liċenzja Velaro Novo hija wkoll wisq restrittiva fl-ambitu (esklużiva għal 10 snin fiż-ŻEE u mhux esklużiva fil-bqija tad-dinja) u tinkludi eċċezzjonijiet importanti li jkunu jipprevjenu kwalunkwe akkwirent milli jeżerċita restrizzjoni kompetittiva sinifikanti;

(b)

Il-Pakkett Pendolino huwa inadegwat peress li l-pjattaforma Pendolino hija pjattaforma ta' veloċità għolja, li mhijiex kapaċi tindirizza t-tħassib dwar il-kompetizzjoni mqajjem mill-Kummissjoni fir-rigward tas-settur ta' ferroviji b'veloċità għolja ħafna. Dan huwa limitat ukoll minħabba konċessjonijiet ippjanati, ftehimiet neċessarji ma' partijiet terzi u retroċessjoni ta' liċenzji ta' ċerti aspetti.

b. Impenji dwar is-Sinjalazzjoni tal-Linji Prinċipali

(i) Deskrizzjoni

(65)

L-Impenji dwar is-Sinjalazzjoni tal-Linji Prinċipali jikkonsistu mill-“Impenn dwar l-OBU tal-ETCS” u l-“Impenn dwar ETCS għaż-żoni maġenb il-binarji u l-lokkjatura”.

(66)

L-Impenn dwar l-OBU tal-ETCS jinkludi l-aċċess għat-teknoloġija OBU tal-ETCS ta' Siemens permezz ta' trasferiment tal-applikazzjoni tas-softwer OBU tal-ETCS ta' Siemens, iżda biss ftehim ta' liċenzja/provvista u servizz għall-pjattaforma ta' sikurezza sottostanti, limitat għal erba' snin, li meta jgħaddu l-akkwirent ikollu jagħmel migrazzjoni tal-applikazzjoni OBU lejn il-pjattaforma ta' sikurezza tiegħu stess. Il-proposta tinkludi ftehim ta' liċenzja u provvista u servizz li jrid jiġi pprovdut b'STMs tal-Klassi B kollha kemm huma proprjetà ta' Siemens.

(67)

Il-proposta tinkludi wkoll trasferiment tal-applikazzjoni OBU Belġjana miruta (TBL+) ta' Siemens, mingħajr il-pjattaforma sottostanti, u liċenzja fir-rigward tal-Class B STMs ta' Siemens. L-Impenji Finali jestendu l-liċenzja tal-pjattaforma minn erba' għal sitt snin biex tiġi faċilitata l-migrazzjoni lejn il-pjattaforma tal-akkwirent stess u tinkludi d-dritt tal-akkwirent li jingħata, skont ftehim ta' provvista u servizz, l-STMs tal-Klassi B ta' Alstom b'rati nnegozjati kummerċjalment.

(68)

L-Impenn dwar ETCS għaż-żoni maġenb il-binarji u l-lokkjaturi jinvolvi taħlita ta' trasferimenti tas-sjieda u arranġamenti ta' liċenzjar għat-teknoloġija ta' Alstom, speċifikament:

(a)

Għal sistemi tal-ATP ETCS għaż-żoni maġenb il-binarji: it-trasferiment tas-sjieda tal-applikazzjonijiet tas-softwer tal-ETCS tal-Livelli 1 u 2 ta' Alstom, ftehim ta' liċenzjar, provvista u servizz għall-pjattaformi li fuqhom jaħdmu l-applikazzjonijiet tas-softwer, u trasferiment tat-teknoloġija, li huwa forma differenti ta' ftehim ta' liċenzjar, għal waħda minn dawn il-pjattaformi;

(b)

Għal lokkjaturi: taħlita ta' trasferiment ta' teknoloġija u liċenzjar għall-aċċess għat-teknoloġija ta' lokkjatura ewlenija ta' Alstom li attwalment hija installata fiż-ŻEE. L-entità fuża tirriżerva d-dritt li tikkompeti barra miż-ŻEE bl-istess teknoloġija. Għal ċerta teknoloġija ta' lokkjatura oħra ta' Alstom, l-impenji jinvolvu taħtlita ta' trasferiment ta' sjieda, trasferiment ta' teknoloġija u liċenzjar.

(ii) Valutazzjoni

(69)

Il-Kummissjoni tqis li l-Impenji għas-Sinjalazzjoni tal-Linja Prinċipali huma insuffiċjenti biex jindirizzaw it-tħassib dwar il-kompetizzjoni li jirriżulta fis-swieq tas-sinjalazzjoni tal-linja prinċipali.

(a)

L-Impenn OBU tal-ETCS jinvolvi liċenzja b'terminu limitat ta' teknoloġija li hija insuffiċjenti biex tiġi żgurata l-vijabbiltà u l-kompetittività tan-negozju ta' żvestiment. Barra minn hekk, l-akkwirent jiddependi fuq l-entità fuża għall-provvista ta' teknoloġija ta' interfacing, bil-konsegwenza li x'aktarx tkun affettwata b'mod negattiv il-kapaċità tiegħu li jikkompeti b'mod effettiv.

(b)

L-Impenn dwar l-ETCS għaż-żoni maġenb il-binarji u l-lokkjaturi huwa inadegwat għaliex huwa kumpless u jinvolvi taħlita ta' assi u ftehimiet ta' liċenzjar li x'aktarx jirriżultaw f'riskji ta' implimentazzjoni li jimminaw il-vijabbiltà tan-negozju ta' żvestiment. Il-pakkett huwa limitat ukoll minħabba l-fatt li jeskludi l-manifattura u s-siti ta' riċerka u żvilupp, it-teknoloġija tal-pipeline u l-persunal relatat.

VIII. KONKLUŻJONI

(70)

Fuq il-bażi tal-analiżi tagħha u tal-evidenza disponibbli, il-Kummissjoni tikkonkludi li t-Tranżazzjoni hija inkompatibbli mas-suq intern u mal-funzjonament tal-Ftehim ŻEE.

(1) ĠU L 24, 29.1.2004, p. 1.