—

wara li kkunsidra l-abbozz ta' deċiżjoni ta' implimentazzjoni tal-Kummissjoni li tagħti awtorizzazzjoni għal ċerti użi tat-triossidu tal-kromu skont ir-Regolament (KE) Nru 1907/2006 tal-Parlament Ewropew u tal-Kunsill (Lanxess Deutschland GmbH u oħrajn) (D060095/03),

—

wara li kkunsidra r-Regolament (KE) Nru 1907/2006 tal-Parlament Ewropew u tal-Kunsill tat-18 ta' Diċembru 2006 dwar ir-reġistrazzjoni, il-valutazzjoni, l-awtorizzazzjoni u r-restrizzjoni ta' sustanzi kimiċi (REACH), li jistabbilixxi Aġenzija Ewropea għas-Sustanzi Kimiċi, li jemenda d-Direttiva 1999/45/KE u li jħassar ir-Regolament (KEE) Nru 793/93 tal-Kunsill u r-Regolament (KE) Nru 1488/94 tal-Kummissjoni kif ukoll id-Direttiva 76/769/KEE tal-Kunsill u d-Direttivi 91/155/KEE, 93/67/KEE, 93/105/KE u 2000/21/KE (1) tal-Kummissjoni (“ir-Regolament REACH”), u b'mod partikolari l-Artikolu 64(8) tiegħu,

—

wara li kkunsidra l-opinjonijiet tal-Kumitat għall-Istima tar-Riskji (RAC) u tal-Kumitat għall-Analiżi Soċjoekonomika (SEAC), (2) skont it-tielet subparagrafu tal-Artikolu 64(5) tar-Regolament (KE) Nru 1907/2006,

—

wara li kkunsidra l-Artikoli 11 u 13 tar-Regolament (UE) Nru 182/2011 tal-Parlament Ewropew u tal-Kunsill tas-16 ta' Frar 2011 li jistabbilixxi r-regoli u l-prinċipji ġenerali dwar il-modalitajiet ta' kontroll mill-Istati Membri tal-eżerċizzju mill-Kummissjoni tas-setgħat ta' implimentazzjoni (3),

—

wara li kkunsidra s-sentenza tas-7 ta' Marzu 2019 tal-Qorti Ġenerali fil-Kawża T-837/16 (4),

—

wara li kkunsidra l-mozzjoni għal riżoluzzjoni tal-Kumitat għall-Ambjent, is-Saħħa Pubblika u s-Sikurezza tal-Ikel,

—

wara li kkunsidra l-Artikolu 106(2) u (3) tar-Regoli ta' Proċedura tiegħu,

A.

billi t-triossidu tal-kromu ġie miżjud fil-lista ta' sustanzi kandidati ta' tħassib serju ħafna skont ir-Regolament REACH fl-2010 (5) minħabba l-klassifikazzjoni tiegħu bħala karċinoġeniku (kategorija A1) u mutaġeniku (kategorija B1);

B.

billi t-triossidu tal-kromu ġie inkluż fl-Anness XIV tar-Regolament REACH fl-2013 (6) minħabba dik il-klassifikazzjoni, il-volumi għoljin li qed jintużaw bħalissa, l-għadd kbir ta' siti fejn jintuża fl-Unjoni u r-riskju ta' esponiment sinifikanti għall-ħaddiema (7), b'data tat-terminazzjoni tal-21 ta' Settembru 2017;

C.

billi l-kumpaniji li huma lesti jkomplu jużaw it-triossidu tal-kromu kellhom jippreżentaw applikazzjoni għal awtorizzazzjoni sal-21 ta' Marzu 2016;

D.

billi Lanxess u sitt kumpaniji oħra (“l-Applikanti”) iffurmaw konsorzju biex jissottomettu applikazzjoni konġunta, bi sħubija ta' aktar minn 150 kumpanija, iżda li s-sħubija eżatta tiegħu mhijiex magħrufa (8);

E.

billi, wara li ressqu applikazzjoni konġunta qabel l-iskadenza tal-21 ta' Marzu 2016, l-Applikanti u l-utenti downstream tagħhom tħallew ikomplu jużaw it-triossidu tal-kromu, sakemm tittieħed id-deċiżjoni ta' awtorizzazzjoni fl-applikazzjoni tal-Artikolu 58 tar-Regolament REACH, fir-rigward tal-użi li saret applikazzjoni għalihom;

F.

billi l-Kummissjoni rċeviet l-opinjonijiet tar-RAC u tas-SEAC f'Settembru 2016; billi d-dewmien tal-Kummissjoni fl-abbozzar tad-deċiżjoni de facto wassal biex l-użu kontinwu tat-triossidu tal-kromu jiġi ttollerat għal aktar minn sena u nofs wara d-data tat-terminazzjoni;

G.

billi l-objettiv primarju tar-Regolament REACH, fid-dawl tal-premessa 16 tiegħu, kif interpretat mill-Qorti tal-Ġustizzja tal-Unjoni Ewropea (9), huwa li jiżgura livell għoli ta' protezzjoni tas-saħħa tal-bniedem u tal-ambjent;

H.

billi skont l-Artikolu 55, u fid-dawl tal-premessa 12 tar-Regolament REACH, is-sostituzzjoni ta' sustanzi ta' tħassib serju ħafna b'sustanzi jew teknoloġiji alternattivi aktar sikuri, jirrappreżenta għan ewlieni tal-awtorizzazzjoni;

I.

billi r-RAC ikkonferma li mhuwiex possibbli li jiġi stabbilit livell derivat ta' bla effett għall-proprjetajiet karċinoġeniċi tat-triossidu tal-kromu u, għaldaqstant, huwa meqjus bħala “sustanza mingħajr valur ta' limitu” għall-finijiet tal-Artikolu 60(3)(a) tar-Regolament REACH; billi dan ifisser li ma jistax jiġi stabbilit u użat bħala punt ta' riferiment “livell ta' esponiment sikur” teoretiku għal din is-sustanza bil-għan li jiġi vvalutat jekk ir-riskju ta' użu huwiex ikkontrollat b'mod xieraq;

J.

billi r-RAC stima li l-għoti ta' tali awtorizzazzjoni jwassal għal 50 każ statistiku fis-sena ta' kanċer fatali;

K.

billi l-Artikolu 60(4) tar-Regolament REACH jipprevedi li tista' tingħata awtorizzazzjoni għall-użu ta' sustanza li toħloq riskji mhux ikkontrollati b'mod xieraq biss jekk jintwera li l-benefiċċji soċjoekonomiċi jegħlbu r-riskju għas-saħħa tal-bniedem jew l-ambjent li jinħoloq mill-użu tas-sustanza u jekk ma jkun hemm l-ebda sustanza jew teknoloġija alternattiva xierqa;

L.

billi l-applikazzjoni tikkonċerna l-użu ta' 20 000 tunnellata ta' triossidu tal-kromu fis-sena;

M.

billi l-applikazzjoni tikkonċerna għadd kbir ħafna ta' utenti downstream (aktar minn 4 000 sit) attivi f'setturi industrijali li jvarjaw minn kożmetiċi sas-settur ajruspazjali, mill-ippakkjar tal-ikel sal-karozzi, u mis-settur sanitarju sa dak tal-kostruzzjoni, bl-esponiment ta' għadd bla preċedent ta' ħaddiema (aktar minn 100 000 ħaddiem);

N.

billi l-applikazzjoni formalment tikkonċerna sitt “użi”; billi dawk id-deskrizzjonijiet ta' użu madankollu tant huma ġeneriċi li jirriżultaw f'ambitu wiesa' ħafna, jew anke “f'ambitu estremament wiesgħa” (10); billi dan il-fatt jivvizzja kemm il-valutazzjoni soċjoekonomika kif ukoll il-valutazzjoni ta' alternattivi xierqa;

O.

billi l-punt (d) tal-Artikolu 62(4) tar-Regolament REACH jirrikjedi li l-Applikanti jipprovdu rapport dwar is-sikurezza kimika skont l-Anness I; billi dan irid jinkludi valutazzjoni ta' esponiment (11);

P.

billi r-RAC innota diskrepanza ewlenija bejn l-ambitu tal-applikazzjoni sottomessa u l-informazzjoni pprovduta fiha (12);

Q.

billi r-RAC identifika lakuni kbar fl-informazzjoni pprovduta mill-Applikanti rigward ix-xenarji ta' esponiment għall-ħaddiema (13);

R.

billi l-abbozz ta' deċiżjoni ta' implimentazzjoni tal-Kummissjoni (14) jirrikonoxxi n-nuqqas tal-Applikanti li jipprovdu l-informazzjoni meħtieġa rigward ix-xenarji ta' esponiment tal-ħaddiema;

S.

billi minflok l-applikazzjoni tiġi kkunsidrata bħala mhux konformi mal-Artikolu 60(7) tar-regolament REACH, l-abbozz ta' deċiżjoni ta' implimentazzjoni tal-Kummissjoni jirrikjedi sempliċement li l-Applikanti jipprovdu d-data nieqsa fir-rapport ta' rieżami taghħom, snin wara l-adozzjoni ta' dan l-abbozz ta' deċiżjoni (15);

T.

billi r-rapport ta' rieżami, bi qbil mal-Artikolu 61 tar-Regolament REACH, mhuwiex intiż biex jagħti lill-kumpaniji żmien addizzjonali biex jimtlew id-diskrepanzi fl-informazzjoni li kellha tiġi pprovduta minn qabel (peress li din l-informazzjoni hija ewlenija għat-teħid ta' deċiżjonijiet), iżda għandu l-għan li jiżgura li l-informazzjoni inizjalment ipprovduta fl-applikazzjoni tkun għadha aġġornata;

U.

billi l-Qorti Ġenerali ddikjarat b'mod ċar li l-kundizzjonijiet għal awtorizzazzjoni, fis-sens tal-Artikolu 60(8) u (9) tar-Regolament REACH, ma jistgħux jintużaw biex jiġu rimedjati n-nuqqasijiet jew id-diskrepanzi potenzjali fl-applikazzjoni għal awtorizzazzjoni (16);

V.

billi l-opinjoni tas-SEAC enfasizzat, barra minn hekk, l-inċertezzi sinifikanti fl-analiżi ta' alternattivi ppreżentati mill-Applikanti, li ġew riflessi wkoll fl-abbozz ta' deċiżjoni ta' implimentazzjoni tal-Kummissjoni (17);

W.

billi, fid-dawl tal-Artikolu 55 u tal-Artikolu 60(4) tar-Regolament REACH, applikant jeħtieġ li jagħti prova li m'hemmx sustanzi jew teknoloġiji alternattivi xierqa għall-użi li jkun applika għalihom;

X.

billi ntwera li jeżistu alternattivi xierqa għal ħafna mill-applikazzjonijiet li huma koperti mill-użi li għandhom jiġu awtorizzati (18);

Y.

billi l-Qorti Ġenerali fakkret lill-Kummissjoni li, sabiex tagħti awtorizzazzjoni ġuridika skont l-Artikolu 60(4) tar-Regolament REACH, hija trid tivverifika kwantità suffiċjenti ta' informazzjoni sostanzjali u verifikabbli sabiex tikkonkludi jew li m'hemmx alternattivi xierqa disponibbli għal kwalunkwe wieħed mill-użi koperti fl-applikazzjoni jew, inkella, li l-inċertezzi li baqa' dwar in-nuqqas ta' alternattivi disponibbli fid-data tal-adozzjoni tal-awtorizzazzjoni, huma biss negliġibbli (19);

Z.

billi f'dan il-każ l-inċertezzi dwar l-analiżi tal-alternattivi ma kinux daqshekk negliġibbli (20);

AA.

billi, il-fatt li “l-użi” li għalihom l-Applikanti ddeċidew li japplikaw huma wiesgħa ħafna ma jiġġustifikax b'mod leġittimu li jkun hemm analiżi mhux kompleta tal-alternattivi;

AB.

billi l-Artikolu 62 tar-Regolament REACH ma jipprovdi l-ebda rinunzja ta' informazzjoni għall-kumpaniji li japplikaw flimkien bħala konsorzju;

AC.

billi, għalhekk, l-awtorizzazzjoni proposta mill-Kummissjoni tikser l-Artikoli 60(7) u (4) tar-Regolament REACH;

AD.

billi, barra minn hekk, numru ta' utenti downstream, koperti mill-abbozz ta' deċiżjoni ta' implimentazzjoni tal-Kummissjoni, diġà applikaw separatament għall-awtorizzazzjoni; billi r-RAC u s-SEAC diġà ħarġu l-opinjoni tagħhom dwar uħud minn dawn l-applikazzjonijiet; billi diġà ngħataw xi awtorizzazzjonijiet għall-utenti downstream;

AE.

billi, madankollu, jista' jkun hemm applikazzjonijiet speċifiċi fost l-użi wiesa' ħafna tal-applikazzjoni konġunta mill-Applikanti li dwarhom l-utenti downstream ma għamlux talba separata għal awtorizzazzjoni, iżda li għalihom jistgħu jiġu ssodisfati l-kundizzjonijiet tal-Artikolu 60(4) tar-Regolament REACH;

AF.

billi tali applikazzjonijiet jistgħu jkunu f'oqsma importanti;

AG.

billi, għalhekk, ikun xieraq li eċċezzjonalment tingħata opportunità lil utenti downstream simili li għadhom ma għamlux applikazzjoni speċifika biex jippreżentaw applikazzjoni separata abbażi ta' skadenza qasira;

1.

2.

3.

4.

5.

6.

7.