IL-KUMMISSJONI EWROPEA
Brussell, 1.6.2018
SWD(2018) 293 final
DOKUMENT TA’ ĦIDMA TAL-PERSUNAL TAL-KUMMISSJONI
SOMMARJU EŻEKUTTIV TAL-VALUTAZZJONI TAL-IMPATT
Li jakkumpanja d-dokument
Regolament tal-Parlament Ewropew u tal-Kunsill
dwar l-istabbiliment ta' Programm għall-Ambjent u l-Azzjoni Klimatika (LIFE)
{COM(2018) 385 final}
{SEC(2018) 275 final}
{SWD(2018) 292 final}
L-UE hija mexxej globali għall-protezzjoni ambjentali u għall-azzjoni klimatika u - kif ikkonfermat fid-diskors dwar l-Istat tal-Unjoni 1 tal-2017 tal-President Juncker - tixtieq issaħħaħ dan ir-rwol 2 .
Il-programm LIFE huwa l-uniku fond tal-UE ddedikat kollu kemm hu għall-għanijiet tal-ambjent u tal-klima. Bil-baġit modest tiegħu dan jikkonċentra fuq settur speċifiku bejn il-programmi tal-UE li jappoġġaw ir-riċerka u l-innovazzjoni fuq naħa waħda, u l-programmi tal-UE li jiffinanzjaw it-teħid fuq skala kbira ta’ miżuri fuq in-naħa l-oħra.
Filwaqt li l-attivitajiet ta’ LIFE jindirizzaw ċerti problemi direttament fuq il-post, l-impatt ewlieni tal-programm huwa indirett permezz tar-rwol katalitiku tiegħu maħsub biex jimplimenta, jespandi jew iħaffef il-prattiki ta’ produzzjoni, distribuzzjoni u konsum sostenibbli billi jappoġġa:
L-iżvilupp u l-iskambju tal-aħjar prassi u tal-għarfien;
It-tisħiħ tal-kapaċitajiet u t-tħaffif tal-implimentazzjoni ta’ leġiżlazzjoni u ta’ politiki ambjentali u klimatiċi;
Il-partijiet ikkonċernati li jittestjaw teknoloġiji u soluzzjonijiet fuq skala żgħira; kif ukoll
Il-mobilizzazzjoni ta’ finanzjament minn sorsi oħra.
Din il-valutazzjoni tal-impatt takkumpanja l-proposta tal-Kummissjoni għall-Programm LIFE futur għall-Ambjent u l-Azzjoni Klimatika wara l-2020 u tissodisfa r-rekwiżiti tar-Regolament Finanzjarju fir-rigward tat-tħejjija ta’ evalwazzjoni ex-ante.
L-isfidi u l-opportunitajiet għall-programm LIFE għall-QFP li jmiss
L-aħħar evalwazzjoni ta’ nofs it-terminu ta’ LIFE (MTE) 3 , ikkonfermat li l-programm attwali jinsab fit-triq it-tajba biex ikun effettiv 4 , effiċjenti u rilevanti u qed jikkontribwixxi għall-istrateġija Ewropa 2020. Barra minn hekk, ħafna mill-partijiet ikkonċernati jqisu l-programm LIFE bħala strument importanti ħafna biex jiġu indirizzati l-prijoritajiet ambjentali u klimatiċi.
Madankollu, il-MTE identifikat ukoll opportunitajiet biex tkompli tissaħħaħ l-effettività globali tal-programm, li ma jseħħux jekk il-programm LIFE jissokta fil-format u fl-iskala attwali tiegħu, fil-perjodu bejn l-2021 u l-2027. Dawn jikkonċernaw, b’mod partikolari, l-opportunitajiet biex titjieb il-koerenza bejn il-programm LIFE u l-fondi l-oħra tal-UE u biex jissaħħaħ ir-rwol katalitiku tal-programm. Ġew identifikati wkoll aktar opportunitajiet b’rabta mal-enfasi strateġika tal-programm, kif ukoll opportunitajiet biex tiżdied l-effiċjenza u tiġi ssimplifikata l-ġestjoni ta’ LIFE.
L-għażliet ippreferuti
Sabiex jiġu indirizzati l-isfidi identifikati, diversi għażliet ġew identifikati u mbagħad skrinjati f’termini tal-effettività, l-effiċjenza u l-koerenza tagħhom. Dan identifika għadd ta’ għażliet għal titjib speċifiċi għall-programm il-ġdid, kif deskritt aktar fid-dettall hawn taħt.
It-tliet għażliet tpoġġew fuq lista ristretta f’dak li għandu x’jaqsam mal-kopertura u mal-kamp ta’ applikazzjoni tal-programm:
1.L-estensjoni tal-kamp ta' applikazzjoni ta’ LIFE biex jinkludi proġetti ta’ bini ta’ kapaċità marbuta mal-enerġija nadifa billi jiżdied subprogramm dwar it-Tranżizzjoni lejn Enerġija Nadifa, se tipprovdi approċċ aktar koerenti għall-finanzjament ta’ proġetti ta’ bini ta’ kapaċità fil-qasam tal-enerġija nadifa, filwaqt li ttejjeb ukoll l-aċċess għal firxa usa’ ta’ benefiċjarji.
2.It-tisħiħ tal-appoġġ ta’ LIFE għall-integrazzjoni tal-għanijiet tan-natura u tal-bijodiversità. Dan isaħħaħ il-finanzjament tan-natura u jtejjeb il-koerenza fl-istrutturar globali tal-baġit tal-UE billi jiffaċilita approċċ ta’ integrazzjoni mtejba. Madankollu, jistgħu jkunu meħtieġa aktar sforzi ta’ ppjanar u koordinazzjoni mill-awtoritajiet ambjentali.
3.L-estensjoni tal-eliġibilità ta’ LIFE għall-Pajjiżi u Territorji Extra-Ewropej (OCTs) tal-UE, speċifikament għall-azzjonijiet tan-natura u tal-bijodiversità fi ħdan is-subprogramm tan-Natura u tal-Bijodiversità, tindirizza lakuna potenzjali fil-finanzjament tal-iskema BEST 5 .
Jekk il-baġit jinżied speċifikament biex jinkludi t-Tranżizzjoni lejn Enerġija Nadifa u/jew biex jinkludi subprogramm għan-Natura, dawn l-għażliet (l-għażla 1 u 2) jenħtieġ li jiġu inklużi fl-istruttura tal-Programm LIFE.
Disa’ għażliet tpoġġew fuq lista ristretta b’rabta mal-mekkaniżmi ta’ twettiq tal-programm u mal-ġestjoni tal-programm
Sabiex jitjiebu l-prestazzjoni u r-rwol katalitiku ta’ LIFE, ġew eżaminati żewġ għażliet li jikkonċernaw l-aċċessibbiltà ta’ LIFE għall-applikanti mill-Istati Membri kollha tal-UE. L-għażla li jingħata appoġġ ċentralizzat lin-netwerk tal-NCP kollu minflok lill-proġetti nazzjonali ta’ bini ta’ kapaċità attwali (għal ċerti Stati Membri biss) hija vvalutata b’mod pożittiv. L-għażla li jinżiedu r-rati ta’ kofinanzjament tkun teħtieġ li tiġi kkunsidrata ulterjorment ladarba l-istruttura globali u l-baġit tal-programm LIFE għall-QFP li jmiss jiġu deċiżi u bbażati fuq id-domanda matul iż-żmien.
Ġew ikkunsidrati erba’ għażliet kumplimentari oħra biex itejbu l-prestazzjoni u r-rwol katalitiku tal-Programm. Fosthom, l-estensjoni tal-Proġetti Integrati Strateġiċi hija meqjusa bħala l-aktar mekkaniżmu b’saħħtu bbażat fuq l-esperjenza pilota ta’ proġetti integrati fil-programm LIFE attwali. Madankollu, dan ikun jeħtieġ baġit addizzjonali meta mqabbel mal-Programm attwali.
L-għażliet biex tissaħħaħ ir-replikazzjoni u biex jiżdiedu kemm il-flessibbiltà tal-programm kif ukoll il-possibbiltà li jiġu mmirati kwistjonijiet ewlenin u emerġenti billi jiġu ssimplifikati r-Regolament u l-MAWP, ma għandhom l-ebda implikazzjoni negattiva serja, u għalhekk jenħtieġ li jiġu introdotti t-tnejn li huma. Fir-rigward tal-istrumenti finanzjarji, ikun ta’ benefiċċju jekk l-approċċi żviluppati fi ħdan l-istrumenti pilota LIFE attwali jiġu aġġornati skont InvestEU.
Kif se tiġi mmonitorjata u evalwata l-prestazzjoni?
Il-prestazzjoni se tkompli tiġi mkejla fil-livell ta’ programmi u subprogrammi, billi tibni fuq l-approċċ attwali bbażat fuq il-proġetti. Madankollu, ġew identifikati kriterji tal-prestazzjoni addizzjonali biex isaħħu l-monitoraġġ u l-evalwazzjoni tal-effett katalitiku tal-programm LIFE u l-kontribut tiegħu biex tiġi appoġġata t-trasformazzjoni tas-soċjetà. Il-piż tal-applikazzjoni tiegħu hija prinċipalment f’idejn il-Kummissjoni sabiex jiġi evitat l-infiħ tar-rekwiżiti attwali għar-rappurtar u biex jiġi żgurat rappurtar preċiż u robust.
Żewġ evalwazzjonijiet fil-fond se jitlestew f’nofs it-terminu (sal-2024) u mal-għeluq tal-perjodu ta’ programmazzjoni (sal-2027).