Skeda tas-Sommarju Eżekuttiv

Valutazzjoni tal-impatt dwar ir-Reviżjoni REFIT tar-Regolament KE 733/2002 li jistabbilixxi d-dominju tal-ogħla livell (TLD) .eu u r-Regolament KE 874/2004 li jippreskrivi r-regoli tal-politika pubblika dwar l-implimentazzjoni u l-funzjonijiet tat-TLD .eu.

A. Ħtieġa li tittieħed azzjoni

Għaliex? X’inhi l-problema li qed tiġi indirizzata?

Is-suq u l-kuntest politiku tas-sistema tal-ismijiet tad-dominju (DNS) evolvew minn meta daħlu fis-seħħ ir-Regolamenti ta’ .eu. Filwaqt li l-qafas ġuridiku kien suġġett għal emendi żgħar, ir-Regolamenti ta’ .eu qatt ma saritilhom reviżjoni sħiħa biex ikun żgurat li qed jaqdu l-għan maħsub tagħhom mingħajr spejjeż amministrattivi u ta’ implimentazzjoni kkumplikati u li għadhom iwasslu l-benefiċċji maħsuba fl-appoġġ għall-attivitajiet transfruntieri online u l-promozzjoni tal-identità Ewropea online b’mod effettiv. L-evalwazzjoni turi li l-qafas regolatorju attwali ma jappoġġax biżżejjed l-istabbiltà u s-sostenibbiltà tat-TLD .eu u ma jisfruttax bis-sħiħ il-potenzjal fis-Suq Uniku Diġitali tal-UE. Ġew identifikati dawn il-problemi relatati bejniethom: leġiżlazzjoni skaduta u riġida; nuqqasijiet fil-governanza u r-responsabbiltà; bidliet mgħaġġla fis-suq.

X’mistenni tikseb din l-inizjattiva?

Din l-inizjattiva mistennija tiżgura l-istabbiltà u s-sostenibbiltà tat-TLD .eu, biex tippermetti aħjar il-kisba tal-għanijiet tat-tħeġġiġ tal-attivitajiet transfruntieri fl-Ewropa u t-tiswir ta’ identità online Ewropea. L-għanijiet ta’ politika speċifiċi (SO) huma dawn: (SO1) Jitneħħew ir-rekwiżiti legali/amministrattivi skaduti; (SO2) Ikun żgurat li r-regoli huma validi għall-ġejjieni u jippermettu li d-dominju .eu jadatta għall-bidliet mgħaġġla fis-suq tat-TLD u għax-xenarju diġitali dinamiku, filwaqt li jippermettu l-użu tat-TLD .eu bħala mezz li jippromwovi l-prijoritajiet tal-Unjoni fid-dinja online; (SO3) Tkun żgurata struttura ta’ governanza li tirrifletti l-aqwa prattiki tekniċi u ta’ governanza u sservi l-interessi tal-pubbliku tal-UE; (SO4) Tiġi promossa l-attraenza ta’ .eu.

X’inhu l-valur miżjud ta’ azzjoni fil-livell tal-UE? 

Min-natura tiegħu, it-TLD .eu għandu dimensjoni transfruntiera. Hu t-TLD tal-Unjoni Ewropea u simbolu tal-identità Ewropea online. L-eżistenza ta’ isem speċifiku tad-dominju għall-Unjoni Ewropea b’denominazzjoni komuni li tkun ċara u identifikabbli ħafna hi pass importanti u siewi biex tissawwar l-identità online Ewropea.

L-azzjoni regolatorja meħuda fil-livell tal-Istati Membri ma tkunx tista’ tikseb l-għanijiet fundamentali li fuqhom jistrieħu l-ħolqien u l-immaniġġar ta’ spazju tal-isem ta’ fiduċja u innovattiv għall-UE. It-TLD .eu twaqqaf bħala TLD tal-kodiċi tal-pajjiż (ccTLD) aktar milli bħala TLD ġeneriku (.com, .berlin). Ir-responsabbiltà tal-politika pubblika għat-TLD .eu hi f’idejn l-Unjoni Ewropea.

B. Soluzzjonijiet

X’alternattivi ta’ politika leġiżlattivi u mhux leġiżlattivi ġew ikkunsidrati? Hemm xi alternattiva preferuta jew le? Għaliex? 

Il-valutazzjoni tal-impatt (IA) tesplora serje ta’ alternattivi ta’ politika li b’mod ġenerali, iżda mhux esklussivament, huma estrapolati minn kwistjonijiet problematiċi relatati ma’ “leġiżlazzjoni skaduta u riġida” u “mekkaniżmi ta’ governanza”. Qed jitqiesu żewġ kwistjonijiet trasversali b'mod orizzontali, li għandhom l-għan li jindirizzaw il-kwistjonijiet li joħorġu mill-“bidliet mgħaġġla fis-suq”.

ALTERNATTIVA 0: IX-XENARJU BAŻI: Jinżamm il-qafas regolatorju attwali għal .eu.

ALTERNATTIVA 1: IL-KUMMERĊJALIZZAZZJONI: Jiġi ssimplifikat il-qafas regolatorju u jiġu esternalizzati l-operat u l-immaniġġar tar-Reġistru lil fornitur tas-servizzi estern bi profitt.

ALTERNATTIVA 2: L-IMMODERNIZZAR TAL-QAFAS ĠURIDIKU: Il-qafas ġuridiku attwali jinbidel bi strument ġuridiku wieħed ibbażat fuq il-prinċipji. Tinżamm sistema esterna tal-immaniġġar għat-TLD .eu, ibbażata fuq kuntratt.

ALTERNATTIVA 3: GOVERNANZA SEPARATA: Tgħaqqad l-alternattiva 2 mal-ħolqien ta’ korp li jinvolvi bosta partijiet konċernati li jkollu rwol konsultattiv. Dan il-korp ikun independenti mir-Reġistru .eu.

ALTERNATTIVA 4: ISTITUZZJONALIZZAZZJONI: L-immaniġġar u l-operat tar-Reġistru fi ħdan dipartiment tal-Kummissjoni jew aġenzija tal-UE (b1: l-EUIPO, b2: l-ENISA)

L-Alternattiva 1, l-Alternattiva 4(.a) u l-Alternattiva 4(b2) twarrbu fi stadju bikri għax ma jilħqux l-għanijiet ta’ politika.

Fir-rigward taż-żewġ kwistjonijiet trasversali indirizzati b’mod separat, il-valutazzjoni tal-impatt tanalizza kemm il-possibbiltà li r-Reġistru .eu joffri reġistrazzjoni diretta lir-reġistranti b’kont tal-bidliet fil-kundizzjonijiet tas-suq, kif ukoll bidliet possibbli lill-kriterji tal-eliġibbiltà biex jinkiseb TLD .eu.

L-alternattiva preferuta: L-ALTERNATTIVA 3, flimkien mat-tneħħija tar-rekwiżiti stretti fir-rigward tar-reġistrazzjoni diretta, kriterju taċ-ċittadinanza għall-persuni fiżiċi u kriterju tar-residenza għall-organizzazzjonijiet/kumpaniji.

Liema alternattiva u min jappoġġaha? 

Il-maġġoranza vasta tal-partijiet konċernati li pparteċipaw fil-konsultazzjonijiet laqgħu l-alternattiva preferuta peress li jiffavorixxu s-simplifikazzjoni tal-qasam ġuridiku, filwaqt li l-kriterji tal-eliġibbiltà attwali jsiru inqas stretti. Il-fehmiet dwar il-mudell ta’ governanza kienu iktar varjati.

C. Impatti tal-alternattiva preferuta

X’inhuma l-benefiċċji tal-alternattiva preferuta (jekk hemm, inkella x’inhuma dawk ewlenin)? 

Bl-alternattiva preferuta jinħoloq qafas ġuridika simplifikat, ibbażat fuq il-prinċipji. Dan għandu jipprovdi l-flessibbiltà meħtieġa biex it-TLD .eu jadatta għat-titjib tekniku mgħaġġel tad-DNS, inkluż f’termini ta’ karatteristiċi tas-sigurtà. L-utenti finali jkunu jistgħu jgawdu l-benefiċċji tat-titjib tekniku mingħajr ma jkunu żvantaġġati biż-żmien meħtieġ biex jiġu emendati r-Regolamenti. L-alternattiva preferuta ttejjeb ukoll il-funzjonament tat-TLD .eu u trawwem l-innovazzjoni fl-ekosistema .eu kemm fil-livell tar-Reġistru kif ukoll fis-swieq downstream tar-reġistraturi u tar-reġistranti, biex b’hekk tipprovdi prodott imtejjeb għall-benefiċċju taċ-ċittadini u n-negozji Ewropej.

It-TLD .eu jkun iktar attraenti għas-suq tat-TLD, u b’hekk iżid il-kompetizzjoni bejn ir-reġistraturi. Dan, min-naħa tiegħu, għandu jwassal biex a) potenzjalment inaqqas il-prezzijiet għall-utenti finali, b) jiżgura disponibbiltà akbar għad-dominju .eu u l-benefiċċji tiegħu għas-soċjetà tal-UE, c) iżid ir-reġistrazzjoni u jitbiegħed minn xenarju li fih ir-rati tat-tiġdid ikunu inqas mil-livelli limitu li jwasslu biex tiġi mhedda s-sostenibbiltà finanzjarja tal-isem tad-dominju.

Din l-alternattiva tinvolvi bidla fl-istruttura tal-governanza, b’korp separat jagħti pariri dwar deċiżjonijiet strateġiċi fir-rigward tal-funzjonament tat-TLD .eu u s-sorveljanza fuq ir-reġistru. Dawn il-bidliet, hekk kif isaħħu u jwessgħu l-kontribut fil-governanza tajba tar-Reġistru .eu, mistennija jappoġġaw trasparenza u responsabbiltà akbar u effettivament inaqqsu r-riskji potenzjali ta’ amministrazzjoni ħażina tal-operat tat-TLD .eu.

Barra minn hekk, l-introduzzjoni ta’ kriterji taċ-ċittadinanza għandha tippermetti li ċ-ċittadini tal-UE li jgħixu f’pajjiżi terzi jibbenefikaw mill-vantaġġi tat-TLD .eu, filwaqt li jneħħu r-rekwiżiti stretti fir-rigward tar-reġistrazzjoni diretta u se jkunu ta’ benefiċċju f’termini ta’ promozzjoni aħjar tat-TLD .eu, pereżempju fi skritti li ma jkunux bil-Latin.

X’inhuma l-ispejjeż tal-alternattiva preferuta (jekk hemm, inkella x'inhuma dawk ewlenin)? 

L-ispejjeż ta’ konformità għar-reġistru huma mistennija jonqsu bl-alternattiva preferuta. Madankollu, minkejja li l-qafas ġuridiku hu inqas ikkumplikat, xorta se jkun hemm il-ħtieġa li t-TLD .eu jkun organizzat, amministrat u mmaniġġat b’mod xieraq. Xorta waħda, xi spejjeż ta’ governanza għar-Reġistru se jitneħħew. Bħalissa l-ispejjeż ta’ governanza huma bbaġitjati taħt l-ispejjeż ġenerali u huma stmati € 296,000 għall-2018.

Min-naħa tal-Kummissjoni Ewropea, ix-xogħol involut għas-sorveljanza tat-TLD .eu jitnaqqas permezz ta’ a) il-korp imwaqqaf ġdid li hu mistenni jkopri wħud mill-kompiti li l-Kummissjoni qed twettaq bħalissa, u b) qafas ġuridiku iktar ħafif u li jibqa' validu fil-ġejjieni li hu kapaċi jadatta għall-bidliet fis-suq mingħajr emendi li jqumu l-flus għall-proċeduri leġiżlattivi. Il-korp li jinvolvi bosta partijiet konċernati jrid jingħata r-riżorsi xierqa. Hu se jkun sostnut finanzjarjament mill-Kummissjoni.

L-utenti finali u r-reġistraturi mhumiex mistennija jiġu affettwati (f’termini tal-prezz li jħallsu għat-TLD .eu).

Kif se jintlaqtu n-negozji, l-SMEs u l-mikrointrapriżi?

L-alternattiva preferuta għandu jkollha impatt pożittiv fuq in-negozji, l-SMEs u l-mikrointrapriżi Ewropej għax se żżid l-innovazzjoni tal-prodott, se tnaqqas il-prezzijiet u se tipprovdi viżibbiltà u disponibbiltà aktar tat-TLD .eu.

Se jkun hemm impatti sinifikanti fuq il-baġits u l-amministrazzjonijiet nazzjonali?

Mhu mistenni l-ebda impatt.

Se jkun hemm impatti sinifikanti oħra? 

L-inizjattiva mistenni jkollha impatt pożittiv fuq ir-Reġistru u fis-swieq downstream tar-reġistraturi u r-reġistranti, inkluż in-negozji u ċ-ċittadini, billi se twassal għal aktar flessibbiltà u innovazzjoni, se tnaqqas il-prezzijiet u se tipprovdi disponibbiltà akbar tat-TLD .eu.

D. Segwitu

Meta se tiġi rieżaminata l-politika?

Skont l-alternattiva preferuta, il-qafas ġuridiku l-ġdid se jippermetti l-flessibbiltà meħtieġa biex ikun jiflaħ għall-bidliet fis-suq mingħajr il-ħtieġa ta’ reviżjonijiet leġiżlattivi. B’hekk għandha toħloq qafas ġuridiku li jibqa’ validu fil-ġejjieni.

Madankollu, il-Kummissjoni se tagħmel monitoraġġ tal-applikazzjoni tal-qafas ġuridiku l-ġdid u se tippreżenta rapport li jagħti r-riżultati tal-evalwazzjoni tagħha lill-Parlament Ewropew u lill-Kunsill sa mhux aktar minn ħames snin mid-data tal-applikazzjoni tal-qafas il-ġdid.