IL-KUMMISSJONI EWROPEA
Brussell, 26.10.2018
COM(2018) 714 final
2018/0367(NLE)
Proposta għal
DEĊIŻJONI TA’ IMPLIMENTAZZJONI TAL-KUNSILL
li tawtorizza lin-Netherlands jintroduċu miżura speċjali li tidderoga mill-Artikolu 285 tad-Direttiva 2006/112/KE dwar is-sistema komuni ta’ taxxa fuq il-valur miżjud
MEMORANDUM TA’ SPJEGAZZJONI
Skont l-Artikolu 395(1) tad-Direttiva 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (“id-Direttiva tal-VAT” 1 ), il-Kunsill, li jaġixxi b’mod unanimu bi proposta tal-Kummissjoni, jista’ jawtorizza lil kwalunkwe Stat Membru biex jintroduċi miżuri speċjali għal deroga mid-dispożizzjonijiet ta’ dik id-Direttiva sabiex jissimplifika l-proċedura tal-ġbir tal-VAT jew biex jipprevjeni ċerti forom ta’ evażjoni jew ta’ evitar tat-taxxa.
B’ittra rreġistrata mal-Kummissjoni fid-19 ta’ Lulju 2018, in-Netherlands talbu awtorizzazzjoni biex jintroduċu miżura ta’ deroga mill-Artikolu 285 tad-Direttiva tal-VAT li tippermetti l-eżenzjoni mill-VAT lil persuni taxxabbli li l-fatturat annwali tagħhom ma jkunx aktar minn EUR 25 000.
Skont l-Artikolu 395(2) tad-Direttiva tal-VAT, il-Kummissjoni infurmat lill-Istati Membri l-oħra b’ittri datati d-9 ta’ Awwissu 2018 dwar it-talba li għamlu n-Netherlands, għajr lil Spanja u Ċipru li ġew informati b’ittri datati l-10 ta’ Awwissu 2018. B’ittra datata t-13 ta’ Awwissu 2018, il-Kummissjoni nnotifikat lin-Netherlands li kellha l-informazzjoni kollha meħtieġa biex tqis it-talba.
1.KUNTEST TAL-PROPOSTA
•Raġunijiet u għanijiet tal-proposta
Il-Kapitolu 1 tat-Titolu XII tad-Direttiva tal-VAT jippermetti lill-Istati Membri japplikaw skemi speċjali għall-impriżi żgħar, inkluż il-possibbiltà ta’ eżenzjoni mill-VAT lil persuni taxxabbli li l-fatturat annwali tagħhom ma jkunx jaqbeż ċertu livell limitu. Din l-eżenzjoni timplika li persuna taxxabbli ma jkollhiex għalfejn timponi l-VAT fuq il-provvisti tagħha u b’hekk ma tistax tnaqqas il-VAT fuq l-input tagħha.
Skont l-Artikolu 285 tad-Direttiva tal-VAT, l-Istati Membri li ma jeżerċitawx din l-għażla skont l-Artikolu 14 tat-Tieni Direttiva tal-Kunsill 67/228/KEE 2 jistgħu jeżentaw mill-VAT lil persuni taxxabbli li l-fatturat annwali tagħhom ma jkunx aktar minn EUR 5 000. In-Netherlands, wieħed minn dawn l-Istati Membri, talbu li jżidu l-livell limitu tal-eżenzjoni minn EUR 5 000 għal EUR 25 000 mill-1 ta’ Jannar 2020.
Skont l-informazzjoni tan-Netherlands, is-sistema attwali tagħhom tagħti ħelsien gradat lil persuni taxxabbli li, fuq bażi annwali u wara tnaqqis tat-taxxa tal-input imħallsa, ma jkunu responsabbli għall-ebda VAT aktar minn EUR 1 883. Il-proċess għall-għoti tal-ħelsien gradwat mit-taxxa hu kumpless, u fih livell għoli ta’ errur. L-għadd ta’ negozji żgħar fin-Netherlands qed kulma jmur jiżdied, u għalhekk qed jiżdiedu wkoll l-ispejjeż operazzjonali għall-awtoritajiet tat-taxxa Olandiżi u l-piż amministrattiv għan-negozji, filwaqt li l-interess finanzjarju involut għadu baxx. Għaldaqstant in-Netherlands jixtiequ jimmodernizzaw is-sistema tagħhom billi jintroduċu skema fakultattiva ta’ eżenzjoni mill-VAT marbuta mal-fatturat li jkollha livell limitu tal-eżenzjoni ta’ EUR 25 000. Din il-miżura se tnaqqas l-obbligi tal-VAT għan-negozji żgħar u tissimplifika l-ġbir tal-VAT għall-awtoritajiet tat-taxxa.
In-Netherlands jenfasizzaw ukoll li din il-miżura tikkonforma mal-kamp ta’ applikazzjoni tal-proposta għal Direttiva dwar l-iskema speċjali għan-negozji żgħar ippubblikata mill-Kummissjoni Ewropea fit-18 ta’ Jannar 2018 3 .
Għalhekk qed jiġi propost li n-Netherlands jitħallew iżidu l-livell limitu tal-eżenzjoni għall-SMEs minn EUR 5 000 għal EUR 25 000 sal-31 ta’ Diċembru 2022 jew sad-data meta l-Istati Membri jridu japplikaw kwalunkwe dispożizzjonijiet nazzjonali li jeħtieġ jadottaw jekk tiġi adottata Direttiva li temenda l-Artikoli 281 sa 294 tad-Direttiva 2006/112/KE li tirregola l-iskema speċjali għall-impriżi żgħar.
•Konsistenza mad-dispożizzjonijiet ta’ politika eżistenti fil-qasam ta’ politika
Stati Membri oħra ngħataw derogi simili. Il-Lussemburgu 4 ngħata livell limitu ta’ EUR 30 000, il-Polonja 5 u l-Estonja 6 livell limitu ta’ EUR 40 000, l-Italja 7 livell limitu ta’ EUR 65 000, il-Kroazja 8 livell limitu ta’ EUR 45 000, il-Latvja 9 livell limitu ta’ EUR 40 000 u r-Rumanija 10 livell limitu ta’ EUR 88 500.
Jenħtieġ li d-derogi mid-Direttiva tal-VAT ikunu dejjem limitati fiż-żmien biex l-effetti tagħhom ikunu jistgħu jiġu vvalutati. Barra minn hekk, bħalissa d-dispożizzjonijiet tal-Artikoli 281 sa 294 tad-Direttiva tal-VAT dwar skema speċjali għall-impriżi żgħar qed isirilhom rieżami. Kif tħabbar fil-Pjan ta’ Azzjoni dwar il-VAT 11 , u fil-Programm ta’ Ħidma tal-Kummissjoni 2017 12 , dan l-aħħar ġiet ippreżentata l-proposta tal-Kummissjoni dwar l-iskema tal-SMEs.
•Konsistenza ma’ politiki oħra tal-Unjoni
Il-miżura tikkonforma mal-għanijiet tal-Unjoni għan-negozji żgħar, kif stabbilit fil-Komunikazzjoni tal-Kummissjoni “Aħseb l-Ewwel fiż-Żgħir” – “Att dwar in-Negozji ż-Żgħar” għall-Ewropa 13 li tistieden lill-Istati Membri biex iqisu l-karatteristiċi speċjali tal-SMEs meta jfasslu l-leġiżlazzjoni u għalhekk biex jissimplifikaw l-ambjent regolatorju eżistenti.
2.BAŻI ĠURIDIKA, SUSSIDJARJETÀ U PROPORZJONALITÀ
•Bażi ġuridika
L-Artikolu 395 tad-Direttiva tal-VAT.
•Sussidjarjetà (għall-kompetenza mhux esklużiva)
Meta titqies id-dispożizzjoni tad-Direttiva tal-VAT li fuqha hi bbażata l-proposta, il-prinċipju tas-sussidjarjetà ma japplikax.
•Proporzjonalità
Id-Deċiżjoni tikkonċerna awtorizzazzjoni mogħtija lil Stat Membru wara talba mingħandu stess u ma tikkostitwixxi l-ebda obbligu.
Minħabba l-ambitu limitat tad-deroga, il-miżura speċjali hi proporzjonata mal-għan mixtieq, jiġifieri s-simplifikazzjoni għall-impriżi żgħar u għall-amministrazzjoni tat-taxxi.
•Għażla tal-istrument
L-istrument propost: Deċiżjoni ta’ Implimentazzjoni tal-Kunsill.
Skont l-Artikolu 395 tad-Direttiva tal-Kunsill 2006/112/KE, deroga mid-dispożizzjonijiet komuni tal-VAT hi possibbli biss bl-awtorizzazzjoni tal-Kunsill li jaġixxi b’mod unanimu bi proposta tal-Kummissjoni. Id-Deċiżjoni ta’ Implimentazzjoni tal-Kunsill hi l-aktar strument xieraq għax tista’ tiġi indirizzata lil Stat Membru individwali.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET KONĊERNATI U TAL-VALUTAZZJONIJIET TAL-IMPATT
•Konsultazzjonijiet mal-partijiet konċernati
Din il-proposta hi bbażata fuq talba li għamlu n-Netherlands u tikkonċerna biss lil dan l-Istat Membru.
•Ġbir u użu tal-għarfien espert
Ma kienx hemm bżonn għarfien espert estern.
•Valutazzjoni tal-impatt
Il-proposta għal Deċiżjoni ta’ Implimentazzjoni tal-Kunsill tawtorizza lin-Netherlands biex jeżentaw mill-VAT lil persuni taxxabbli li l-fatturat annwali tagħhom ma jkunx aktar minn EUR 25 000 mill-1 ta’ Jannar 2020. Il-persuni taxxabbli li l-fatturat annwali tagħhom ma jkunx aktar mil-livell limitu jinħelsu minn ħafna mill-obbligi tal-VAT ġenerali, u permezz ta’ din il-miżura se jonqsilhom ukoll il-piż amministrattiv. Barra minn hekk, din tissimplifika l-ġbir tat-taxxa għall-awtoritajiet tat-taxxa Olandiżi.
Skont in-Netherlands, l-introduzzjoni tal-livell limitu ta’ EUR 25 000 mhu se jħalli l-ebda impatt sostanzjali fuq it-total tad-dħul mit-taxxa fl-istadju tal-konsum finali. Madwar 9 % tal-persuni taxxabbli huma mistennija jużaw il-livell limitu tal-eżenzjoni, u dan jikkorrispondi għal impatt fuq il-baġit tal-Istat ta’ madwar 0,09 %.
4.IMPLIKAZZJONIJIET BAĠITARJI
Il-proposta ma għandha l-ebda implikazzjoni għall-baġit tal-UE għax in-Netherlands se jagħmlu kalkolu ta’ kumpens b’konformità mal-Artikolu 6 tar-Regolament tal-Kunsill (KEE, EURATOM) 1553/89.
5.ELEMENTI OĦRA
•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rappurtar
Il-proposta hija limitata biż-żmien.
2018/0367 (NLE)
Proposta għal
DEĊIŻJONI TA’ IMPLIMENTAZZJONI TAL-KUNSILL
li tawtorizza lin-Netherlands jintroduċu miżura speċjali li tidderoga mill-Artikolu 285 tad-Direttiva 2006/112/KE dwar is-sistema komuni ta’ taxxa fuq il-valur miżjud
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea,
Wara li kkunsidra d-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud 14 , u b’mod partikolari l-Artikolu 395(1) tagħha,
Wara li kkunsidra l-proposta tal-Kummissjoni Ewropea,
Billi:
(1)Skont l-ewwel paragrafu tal-Artikolu 285 tad-Direttiva 2006/112/KE, l-Istati Membri li ma jeżerċitawx din l-għażla skont l-Artikolu 14 tad-Direttiva tal-Kunsill 67/228/KEE 15 , jistgħu jeżentaw mit-taxxa fuq il-valur miżjud (il-VAT) lil persuni taxxabbli li l-fatturat annwali tagħhom ma jkunx aktar minn EUR 5 000.
(2)B’ittra rreġistrata mal-Kummissjoni fid-19 ta’ Lulju 2018, in-Netherlands talbu awtorizzazzjoni biex jintroduċu miżura speċjali li tidderoga mill-Artikolu 285 tad-Direttiva 2006/112/KE biex japplikaw livell limitu tal-eżenzjoni ta’ EUR 25 000. B’dik il-miżura speċjali, dawk il-persuni taxxabbli li l-fatturat annwali tagħhom ma jkunx aktar minn EUR 25 000 se jkunu eżentati minn ċerti obbligi jew mill-obbligi kollha fir-rigward tal-VAT, imsemmija fil-Kapitoli 2 sa 6 tat-Titolu XI tad-Direttiva 2006/112/KE.
(3)Il-livell limitu ogħla għall-iskema speċjali għall-impriżi żgħar li hemm stabbilit fl-Artikoli 281 sa 294 tad-Direttiva 2006/112/KE hu miżura ta’ simplifikazzjoni għax dan jista’ jnaqqas l-obbligi tal-VAT tal-impriżi żgħar b’mod sinifikanti. L-iskema speċjali hi fakultattiva għall-persuni taxxabbli.
(4)Skont it-tieni subparagrafu tal-Artikolu 395(2) tad-Direttiva 2006/112/KE, il-Kummissjoni infurmat lill-Istati Membri l-oħra b’ittri datati d-9 ta’ Awwissu 2018 dwar it-talba li għamlu n-Netherlands, għajr lil Spanja u Ċipru li ġew informati b’ittri datati l-10 ta’ Awwissu 2018. B’ittra datata t-13 ta’ Awwissu 2018, il-Kummissjoni nnotifikat lin-Netherlands li kellha l-informazzjoni kollha meħtieġa biex tqis it-talba.
(5)Id-deroga mitluba hija skont l-għanijiet ta’ politika tal-Komunikazzjoni tal-Kummissjoni “Aħseb l-Ewwel fiż-Żgħir” – “Att dwar in-Negozji ż-Żgħar” għall-Ewropa 16 .
(6)In-Netherlands jistennew li ladarba jiżdied il-livell limitu, dan se jwassal biex jonqsu l-obbligi tal-VAT u b’hekk jonqu l-piżijiet amministrattivi u l-ispejjeż ta’ konformità għall-impriżi żgħar; għalhekk jenħtieġ li n-Netherlands jiġu awtorizzati japplikaw il-miżura speċjali għal perjodu taż-żmien limitat, sal-31 ta’ Diċembru 2022. L-iskema speċjali għall-impriżi żgħar hija fakultattiva, u għalhekk il-persuni taxxabbli xorta waħda se jkunu jistgħu jagħżlu li jħaddmu l-arranġamenti normali tal-VAT.
(7)Peress li l-Artikoli 281 sa 294 tad-Direttiva 2006/112/KE li jirregolaw l-iskema speċjali għall-impriżi żgħar huma soġġetti għal rieżami, tista’ tidħol fis-seħħ Direttiva li temenda dawn l-Artikoli u li tistabbilixxi data meta l-Istati Membri għandhom japplikaw id-dispożizzjonijiet nazzjonali qabel ma jiskadi l-perjodu ta’ validità tad-deroga fil-31 ta’ Diċembru 2022. Jekk jiġri dan, jenħtieġ li din id-Deċiżjoni ma tibqax tapplika.
(8)Abbażi tal-informazzjoni mogħtija min-Netherlands, il-livell limitu miżjud se jkollu biss impatt negliġibbli fuq l-ammont ġenerali tad-dħul mit-taxxa tan-Netherlands miġbur fl-istadju finali tal-konsum.
(9)Id-deroga ma tħalli l-ebda impatt fuq ir-riżorsi proprji tal-Unjoni li jakkumulaw mit-taxxa fuq il-valur miżjud għax in-Netherlands se jagħmlu kalkolu ta’ kumpens skont l-Artikolu 6 tar-Regolament tal-Kunsill (KEE EURATOM) Nru 1553/89 17 ,
ADOTTA DIN ID-DEĊIŻJONI:
Artikolu 1
B’deroga mill-Artikolu 285 tad-Direttiva 2006/112/KE, in-Netherlands huma awtorizzati jeżentaw mill-VAT lil persuni taxxabbli li l-fatturat annwali tagħhom ma jkunx aktar minn EUR 25 000.
Artikolu 2
Din id-Deċiżjoni għandha tapplika mill-1 ta’ Jannar 2020 sal-aktar data kmieni minn dawn iż-żewġ dati li ġejjin:
(a) Il-31 ta’ Diċembru 2022;
(b) id-data meta l-Istati Membri jridu japplikaw kwalunkwe dispożizzjonijiet nazzjonali li jeħtieġ jadottaw jekk tiġi adottata Direttiva li temenda l-Artikoli 281 sa 294 tad-Direttiva 2006/112/KE li tirregola l-iskema speċjali għall-impriżi żgħar.
Artikolu 3
Din id-Deċiżjoni hija indirizzata lin-Netherlands.
Magħmul fi Brussell,
Għall-Kunsill
Il-President