IL-KUMMISSJONI EWROPEA

Brussell, 29.5.2018

COM(2018) 352 final

2018/0183(NLE)

Proposta għal

REGOLAMENT TAL-KUNSILL

li jemenda r-Regolament (UE) 2018/120 fir-rigward ta’ ċerti opportunitajiet tas-sajd

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u għanijiet tal-proposta

Ir-Regolament tal-Kunsill (UE) 2018/120 jistabbilixxi l-opportunitajiet tas-sajd għall-2018 għal ċerti stokkijiet tal-ħut u ċerti gruppi ta’ stokkijiet tal-ħut, applikabbli fl-ilmijiet tal-Unjoni u, għal bastimenti tal-Unjoni, f’ċerti ilmijiet mhux tal-Unjoni. Is-soltu, dawn l-opportunitajiet tas-sajd jiġu emendati diversi drabi fil-perjodu li matulu jkunu fis-seħħ.

•Konsistenza mad-dispożizzjonijiet ta’ politika eżistenti fil-qasam ta’ politika

Il-miżuri proposti huma mfassla skont l-għanijiet u r-regoli tal-Politika Komuni tas-Sajd u huma konsistenti mal-politika tal-Unjoni dwar l-iżvilupp sostenibbli.

•Konsistenza ma’ politiki oħra tal-Unjoni

Il-miżuri proposti huma konsistenti ma’ politiki oħra tal-Unjoni, b’mod partikolari mal-politiki fil-qasam tal-ambjent.

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

Il-bażi ġuridika ta’ din il-proposta hija l-Artikolu 43(3) tat-Trattat dwar il-Funzjonament tal-Unjoni Ewropea.

L-obbligi tal-Unjoni għall-isfruttament sostenibbli tar-riżorsi akkwatiċi ħajjin jirriżultaw mill-obbligi stabbiliti fl-Artikolu 2 tar-Regolament bażiku l-ġdid tal-PKS.

•Sussidjarjetà (għall-kompetenza mhux esklużiva)

Il-proposta taqa’ fil-kompetenza esklużiva tal-Unjoni, kif imsemmi fl-Artikolu 3(1)(d) tat-Trattat. Għalhekk il-prinċipju tas-sussidjarjetà ma japplikax.

•Proporzjonalità

•Għażla tal-istrument

L-istrument propost: regolament.

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Evalwazzjonijiet ex post/kontrolli tal-idoneità tal-leġiżlazzjoni eżistenti

•Konsultazzjonijiet mal-partijiet ikkonċernati

•Ġbir u użu tal-għarfien espert

•Valutazzjoni tal-impatt

Il-kamp ta’ applikazzjoni tar-Regolament dwar l-opportunitajiet tas-sajd huwa ċirkoskritt bl-Artikolu 43(3) tat-Trattat.

•Idoneità regolatorja u simplifikazzjoni

•Drittijiet fundamentali

4.IMPLIKAZZJONIJIET BAĠITARJI

5.ELEMENTI OĦRA

•Spjegazzjoni fid-dettall tad-dispożizzjonijiet speċifiċi tal-proposta

L-emendi proposti għandhom l-għan li jimmodifikaw ir-Regolament (UE) 2018/120 kif deskritt hawn taħt.

Kelb il-baħar baliena

Fit-12-il laqgħa tal-Konferenza tal-Partijiet għall-Konvenzjoni dwar il-Konservazzjoni ta’ Speċijiet ta’ Annimali Selvaġġi Migratorji, inżdied il-kelb il-baħar baliena (Rincodon typus) mal-Appenix I tal-Konvenzjoni. Għalhekk jenħtieġ li din l-ispeċi tiddaħħal fil-listi ta’ speċijiet ipprojbiti.

Megrims

Sakemm il-parir xjentifiku jindika li l-megrims fis-subżona 7 tal-ICES u fid-diviżjonijiet 8a, 8b, 8d u 8e tal-ICES huma l-istess stokkijiet bijoloġiċi, huwa xieraq li tkun prevista flessibbiltà bejn iż-żoni ta’ 25 % mis-subżona 7 tal-ICES sad-diviżjoniet 8a, 8b, 8d u 8e tal-ICES għall-Istati Membri li għandhom kwota għal dawk l-ispeċijiet fiż-żewġ żoni.

Gamblu tat-Tramuntana

Fis-26 ta’ Marzu 2018, l-ICES ħareġ parir dwar il-qabdiet tal-gamblu tat-Tramuntana (Pandalus borealis) fid-diviżjonijiet 3a u 4a tal-ICES fil-Lvant (Skagerrak, Kattegat, u t-Tramuntana tal-Baħar tat-Tramuntana fin-Norwegian Deep). Wara l-konsultazzjonijiet man-Norveġja, ġie deċiż li l-allokazzjoni tal-gamblu tat-Tramuntana għall-UE fi Skagerrak għandha tkun ta’ 3 327 tunnellata.

Laċċa kaħla

Fit-12 ta’ April l-ICES ipprovda l-parir annwali tiegħu dwar il-laċċa kaħla (Sprattus sprattus) fil-Baħar tat-Tramuntana. Skont il-parir tal-ICES, jenħtieġ li l-qabdiet tal-laċċa kaħla fil-Baħar tat-Tramuntana ma jkunux aktar minn 177 545 tunnellata fil-perjodu mill-1 ta’ Lulju 2018 sat-30 ta’ Ġunju 2019. Għalhekk jenħtieġ li l-opportunitajiet tas-sajd għal-laċċa kaħla jiġu ffissati skont dan.

Aringa tal-Baħar Ċeltiku

Il-parir tal-ICES jiddeskrivi li l-istokk tal-aringa tal-Baħar Ċeltiku mhuwiex fil-limiti bijoloġiċi sikuri. Għalhekk jenħtieġ li titħassar ir-referenza għall-Artikolu 7(2).

Merluzz tan-Norveġja

Fil-11 ta’ April 2018 l-ICES aġġorna l-parir tiegħu ta’ Ottubru tal-2017 dwar l-opportunitajiet tas-sajd għall-merluzz tan-Norveġja għall-perjodu mill-1 ta’ Novembru 2017 sal-31 ta’ Ottubru 2018. Għalhekk jenħtieġ li l-opportunitajiet tas-sajd għall-merluzz tan-Norveġja jiġu emendati skont dan, biex iqisu wkoll skambju ma’ pajjiżi terzi.

Skampu

B’konformità mal-parir tal-ICES, jekk ma jkunx jista’ jsir stħarriġ televiżiv ta’ taħt wiċċ l-ilma (UWTV), jista’ jiġi stabbilit sajd sentinell sabiex tinġabar id-dejta dwar is-serje tal-qabda għal kull unità tal-isforz (CPUE) għall-iskampu fl-unità funzjonali 25 tad-diviżjoni 8c tal-ICES. L-opportunitajiet tas-sajd huma emendati sabiex jipprevedu dan is-sajd sentinell.

Traspożizzjoni ta’ opportunitajiet tas-sajd għall-bastimenti tal-UE fiż-żona tal-SPRFMO

Fis-sitt laqgħa annwali tagħha fl-2018, l-Organizzazzjoni Reġjonali għall-Ġestjoni tas-Sajd fin-Nofsinhar tal-Paċifiku (l-SPRFMO) stabbiliet l-opportunitajiet tas-sajd magħmula minn qabda totali permissibli (TAC) għas-sawrell ta’ 35 186 tunnellata. Din it-TAC għandha tkun inkluża fir-Regolament.

2018/0183 (NLE)

Proposta għal

REGOLAMENT TAL-KUNSILL

li jemenda r-Regolament (UE) 2018/120 fir-rigward ta’ ċerti opportunitajiet tas-sajd

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 43(3) tiegħu,

Wara li kkunsidra l-proposta tal-Kummissjoni Ewropea,

Billi:

(1)Ir-Regolament tal-Kunsill (UE) 2018/120 1 jistabbilixxi għall-2018 l-opportunitajiet tas-sajd għal ċerti stokkijiet tal-ħut u għal ċerti gruppi ta’ stokkijiet tal-ħut applikabbli fl-ilmijiet tal-Unjoni u, għal bastimenti tal-Unjoni, f’ċerti ilmijiet mhux tal-Unjoni.

(2)Fit-12-il laqgħa tal-Konferenza tal-Partijiet għall-Konvenzjoni dwar il-Konservazzjoni ta’ Speċijiet ta’ Annimali Selvaġġi Migratorji, inżdied il-kelb il-baħar baliena (Rincodon typus) mal-Appendiċi I tal-Konvenzjoni. Għalhekk jenħtieġ li din l-ispeċi tiddaħħal fil-listi ta’ speċijiet ipprojbiti.

(3)Il-parir xjentifiku tal-Kunsill Internazzjonali għall-Esplorazzjoni tal-Baħar (l-ICES) jindika li l-megrims fis-subżona 7 tal-ICES u fid-diviżjonijiet 8a, 8b, 8d u 8e tal-ICES huma l-istess stokkijiet bijoloġiċi. Għalhekk jixraq li tiġi prevista flessibbiltà bejn iż-żoni ta’ 25 % mis-subżona 7 tal-ICES sad-diviżjonijiet 8a, 8b, 8d u 8e tal-ICES għall-Istati Membri li għandhom kwota għal dawk l-ispeċijiet fiż-żewġ żoni.

(4)Fis-26 ta’ Marzu 2018, l-ICES ħareġ parir dwar qabdiet tal-gamblu tat-Tramuntana (Pandalus borealis) fid-diviżjonijiet 3a u 4a tal-ICES fil-Lvant (Skagerrak, Kattegat, u t-Tramuntana tal-Baħar tat-Tramuntana fin-Norwegian Deep). Fuq il-bażi ta’ dak il-parir u wara konsultazzjonijiet man-Norveġja, jixraq li s-sehem tal-Unjoni tal-gamblu tat-Tramuntana fi Skagerrak jiġi ffissat għal 3 327 tunnellata.

(5)Skont il-parir tal-ICES tat-12 ta’ April 2018, jenħtieg li l-qabdiet tal-laċċa kaħla (Sprattus sprattus) fil-Baħar tat-Tramuntana ma jkunux aktar minn 177 545 tunnellata għall-perjodu mill-1 ta’ Lulju 2018 sat-30 ta’ Ġunju 2019. Jenħtieġ li l-opportunitajiet tas-sajd għal-laċċa kaħla jiġu stabbiliti skont dan.

(6)Fil-11 ta’ April 2018, l-ICES ħareġ parir rivedut għall-merluzz tan-Norveġja għall-perjodu mill-1 ta’ Novembru 2017 sal-31 ta’ Ottubru 2018. Jenħtieġ li l-opportunitajiet tas-sajd għal-laċċa kaħla jiġu stabbiliti skont dan.

(7)L-ICES ħareġ parir li jekk ma jkunx jista’ jsir stħarriġ televiżiv ta’ taħt wiċċ l-ilma, jista’ jiġi stabbilit sajd sentinell sabiex tinġabar id-dejta dwar il-qabda għal kull unità ta’ sforz għall-iskampu fl-unità funzjonali 25 fis-subżona 8c tal-ICES. Jenħtieġ li l-opportunitajiet tas-sajd jiġu emendati sabiex jipprevedu dan is-sajd sentinell.

(8)Fis-sitt laqgħa annwali tagħha fl-2018, l-Organizzazzjoni Reġjonali għall-Ġestjoni tas-Sajd fin-Nofsinhar tal-Paċifiku (SPRFMO) stabbiliet qabda totali permissibli (TAC) għas-sawrell. Dik il-miżura jenħtieġ li tiġi implimentata fil-liġi tal-Unjoni.

(9)Il-limiti tal-qbid previsti fir-Regolament (UE) 2018/120 japplikaw mill-1 ta’ Jannar 2018. Għalhekk, jenħtieġ li d-dispożizzjonijiet ta’ dan ir-Regolament dwar il-limiti tal-qbid japplikaw ukoll minn dik id-data. Tali applikazzjoni retroattiva hija mingħajr preġudizzju għall-prinċipji taċ-ċertezza legali u għall-protezzjoni ta’ aspettattivi leġittimi billi l-opportunitajiet tas-sajd ikkonċernati għadhom ma ġewx eżawriti,

(10)Għalhekk jenħtieġ li r-Regolament (UE) 2018/120 jiġi emendat skont dan.

ADOTTAT DAN IR-REGOLAMENT:

Artikolu 1

Ir-Regolament (UE) 2018/120 huwa emendat kif ġej:

(a)Fl-Artikolu 13(1), jiddaħħal il-punt li ġej:

“kelb il-baħar baliena (Rhincodon typus) fl-ilmijiet kollha;”.

(b)fl-Artikolu 45(1), jiddaħħal il-punt li ġej:

“kelb il-baħar baliena (Rhincodon typus) fl-ilmijiet tal-Unjoni;”.

(c)L-Annessi IA u IJ huma emendati skont l-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika mill-1 ta’ Jannar 2018, għajr il-punti (a) u (b) tal-Artikolu 1 li għandhom japplikaw mid-data tad-dħul fis-seħħ ta’ dan ir-Regolament.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,

(1)    Ir-Regolament tal-Kunsill (UE) 2018/120 tat-23 ta’ Jannar 2018 li jistabbilixxi għall-2018 l-opportunitajiet tas-sajd għal ċerti stokkijiet tal-ħut u ċerti gruppi ta’ stokkijiet tal-ħut, applikabbli fl-ilmijiet tal-Unjoni u, għal bastimenti tas-sajd tal-Unjoni, f’ċerti ilmijiet mhux tal-Unjoni (ĠU L 27, 31.1.2018, p. 1).

IL-KUMMISSJONI EWROPEA

Brussell,29.5.2018

COM(2018) 352 final

ANNESS

ta’ [...]

PROPOSTA GĦAL REGOLAMENT TAL-KUNSILL

li jemenda r-Regolament (UE) 2018/120 fir-rigward ta’ ċerti opportunitajiet tas-sajd

ANNESS

1.L-Anness IA tar-Regolament (UE) 2018/120 huwa emendat kif ġej:

(1)it-tabella tal-opportunitajiet tas-sajd għall-megrims f’7 hija sostitwita b’dan li ġej:

“

Speċijiet:	Megrims			Żona:	7
	Lepidorhombus spp.				(LEZ/07.)
Il-Belġju		333	(1)	TAC analitika
Spanja		3 693	(2)	Japplika l-Artikolu 7(2) ta’ dan ir-Regolament
Franza		4 481	(2)	Japplika l-Artikolu 12(1) ta’ dan ir-Regolament
L-Irlanda		2 038	(1)
Ir-Renju Unit		1 765	(1)
L-Unjoni		12 310
TAC		12 310
(1)	5 % minn din il-kwota tista’ tintuża f’8a, 8b, 8d u 8e (LEZ/*8ABDE) għall-qabdiet aċċessorji tas-sajd dirett għal-lingwata.
(2)	25 % minn din il-kwota tista’ tinqabad f’8a, 8b, 8d u 8e (LEZ/*8ABDE).

”;

(2)it-tabella tal-opportunitajiet tas-sajd għall-gamblu tat-Tramuntana fi 3a hija sostitwita b’dan li ġej:

“

Speċijiet:	Gamblu tat-Tramuntana			Żona:	3a
	Pandalus borealis				(PRA/03A.)
Id-Danimarka		2 162		TAC ta’ prekawzjoni
L-Iżvezja		1 165		Japplika l-Artikolu 7(2) ta’ dan ir-Regolament
L-Unjoni		3 327		L-Artikolu 3 tar-Regolament (KE) Nru 847/96 ma għandux japplika
				L-Artikolu 4 tar-Regolament (KE) Nru 847/96 ma għandux japplika
TAC		6 230

”;

(3)it-tabella tal-opportunitajiet tas-sajd għal-laċċa kaħla u għall-qabdiet aċċessorji assoċjati fl-ilmijiet tal-Unjoni ta’ 2a u 4 hija sostitwita b’dan li ġej:

“

Speċijiet:	Laċċa kaħla u qabdiet aċċessorji assoċjati			Żona:	L-ilmijiet tal-Unjoni ta’ 2a u 4
	Sprattus sprattus				(SPR/2AC4-C)
Il-Belġju		1 911	(1)(2)	TAC analitika
Id-Danimarka		155 660	(1)(2)
Il-Ġermanja		1 911	(1)(2)
Franza		1 911	(1)(2)
In-Netherlands		1 911	(1)(2)
L-Iżvezja		1 330	(1) (2)(3)
Ir-Renju Unit		1 911	(1)(2)
L-Unjoni		166 545	(1)
In-Norveġja		10 000	(1)
Il-Gżejjer Faroe		1 000	(1)(4)
TAC		177 545	(1)
(1)	Din il-kwota tal-Unjoni tista’ tinqabad biss mill-1 ta’ Lulju 2018 sat-30 ta’ Ġunju 2019.
(2)	Sa 2 % tal-kwota tista’ tkun qabdiet aċċessorji tal-merlangu (OTH/ *2AC4C). Il-qabdiet aċċessorji tal-merlangu għandhom jingħaddu mal-kwota skont din id-dispożizzjoni u l-qabdiet aċċessorji tal-ispeċijiet jingħaddu mal-kwota skont l-Artikolu 15(8) tar-Regolament (UE) Nru 1380/2013, flimkien, ma għandhomx jaqbżu d-9 % tal-kwota.
(3)	Inkluż iċ-ċiċċirell.
(4)	Jista’ jkun fihom sa 4 % ta’ qabdiet aċċessorji ta’ aringi.

”;

(4)fit-tabella tal-opportunitajiet tas-sajd għall-aringa fl-ilmijiet tal-Unjoni ta’ 7g, 7h, 7j u 7k, titħassar ir-referenza “Japplika l-Artikolu 7(2) ta’ dan ir-Regolament”;

(5)it-tabella tal-opportunitajiet tas-sajd għall-merluzz tan-Norveġja u qabdiet aċċessorji assoċjati fi 3a u fl-ilmijiet tal-Unjoni ta’ 2a u 4 hija sostitwita b’dan li ġej:

“

Speċijiet:		Merluzz tan-Norveġja u qabdiet aċċessorji assoċjati			Żona:	3a; L-ilmijiet tal-Unjoni ta’ 2a u 4
		Trisopterus esmarki				(NOP/2A3A4.)
Id-Danimarka			85 186	(1)	TAC analitika
Il-Ġermanja			16	(1) (2)	L-Artikolu 3 tar-Regolament (KE) Nru 847/96 ma għandux japplika
In-Netherlands			63	(1) (2)	L-Artikolu 4 tar-Regolament (KE) Nru 847/96 ma għandux japplika
L-Unjoni			85 265	(1) (3)
In-Norveġja			15 000	(4)
Il-Gżejjer Faroe			6 000	(5)
TAC			mhux rilevanti
(1)	Sa 5 % tal-kwota tista’ tkun qabdiet aċċessorji tal-merluzz tal-linja sewda u tal-merlangu (OT2/*2A3A4). Il-qabdiet aċċessorji tal-merluzz tal-linja sewda u tal-merlangu għandhom jingħaddu mal-kwota skont din id-dispożizzjoni u l-qabdiet aċċessorji tal-ispeċijiet jingħaddu mal-kwota skont l-Artikolu 15(8) tar-Regolament (UE) Nru 1380/2013, flimkien, ma għandhomx jaqbżu d-9 % tal-kwota.
(2)	Il-kwota tista’ tinqabad biss fl-ilmijiet tal-Unjoni taż-żoni 2a, 3a u 4 tal-ICES.
(3)	Il-kwota tal-Unjoni tista’ tinqabad biss mill-1 ta’ Novembru 2017 sal-31 ta’ Ottubru 2018.
(4)	Għandha tintuża tabella ta’ klassifikazzjoni.
(5)	Għandha tintuża tabella ta’ klassifikazzjoni. Li tinkludi massimu ta’ 15 % tal-qabdiet aċċessorji inevitabbli (NOP/*2A3A4), li għandhom jingħaddu ma’ din il-kwota.

”;

(6)it-tabella tal-opportunitajiet tas-sajd għall-iskampu f’8c hija sostitwita b’dan li ġej:

“

Speċijiet:	Skampu				Żona:	8c
	Nephrops norvegicus					(NEP/08C.)
Spanja			2	(1)	TAC ta’ prekawzjoni
Franza			0
L-Unjoni			2	(1)
TAC			2	(1)
(1)		Esklussivament għall-qabdiet meħuda bħala parti minn sajd sentinell li jiġbor il-qabda għal kull unità ta’ sforz (CPUE) fl-unità funzjonali 25 matul ħames vjaġġi kull xahar f’Awwissu u Settembru b’bastimenti li jġorru abbord lill-osservaturi.

”;

2.Fl-Anness IJ tar-Regolament (UE) 2018/120, it-tabella tal-opportunitajiet tas-sajd għas-sawrell fiż-Żona tal-Konvenzjoni tal-SPRFMO hija sostitwita b’dan li ġej:

“

Speċijiet:	Sawrell		Żona:	Iż-Żona tal-Konvenzjoni tal-SPRFMO
	Trachurus murphyi			(CJM/SPRFMO)
Il-Ġermanja	8 849,28		TAC analitika
In-Netherlands	9 591,70		L-Artikolu 3 tar-Regolament (KE) Nru 847/96 ma għandux japplika
Il-Litwanja	6 157,56		L-Artikolu 4 tar-Regolament (KE) Nru 847/96 ma għandux japplika
Il-Polonja	10 587,46
L-Unjoni	35 186
TAC	Mhux relevanti

”.