IL-KUMMISSJONI EWROPEA

Brussell, 24.5.2018

COM(2018) 336 final

2018/0168(COD)

Proposta għal

DIRETTIVA TAL-PARLAMENT EWROPEW U TAL-KUNSILL

li temenda d-Direttiva Nru 2009/103/KE tas-16 ta’ Settembru 2009 tal-Parlament Ewropew u tal-Kunsill dwar l-assigurazzjoni kontra responsabbiltà ċivili fir-rigward tal-użu ta’ vetturi bil-mutur u l-infurzar tal-obbligu ta’ assigurazzjoni kontra din ir-responsabbiltà

(Test b’relevanza għaż-ŻEE)

{SEC(2018) 248 final}
{SWD(2018) 247 final}
{SWD(2018) 248 final}

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u għanijiet tal-proposta

Id-Direttiva dwar l-Assigurazzjoni ta’ Vetturi bil-Mutur hija strument legali ewlieni li jirfed il-funzjonament bla xkiel tas-Suq Uniku. Din tippermetti l-qsim bla xkiel tal-fruntieri interni tal-UE minn residenti tal-UE bil-vetturi tagħhom kemm għal skopijiet kummerċjali kif ukoll għal skopijiet ta’ rikreazzjoni. Fuq il-bażi ta’ primjum wieħed, ir-residenti tal-UE jistgħu jivvjaġġaw kullimkien mingħajr il-ħtieġa li jixtru assigurazzjoni addizzjonali u bl-istess mod id-Direttiva tfittex li tilħaq livell għoli ta’ konverġenza f’termini ta’ protezzjoni tal-vittmi potenzjali ta’ inċidenti ta’ vetturi bil-mutur. Id-Direttiva hija strumentali wkoll għall-funzjonament taż-Żona Schengen.

L-ewwel Direttiva tal-UE dwar l-assigurazzjoni tal-vetturi bil-mutur 1 ġiet adottata fl-1972, b'żewġ objettivi: il-protezzjoni tal-vittmi ta’ inċidenti ta’ vetturi bil-mutur (b’element transfruntier jew mingħajru), u l-faċilitazzjoni tal-moviment liberu tal-vettura bil-mutur bejn l-Istati Membri. Il-leġiżlazzjoni dwar il-vetturi bil-mutur tal-UE hija mibnija fuq is-Sistema Internazzjonali tal-Karta l-Ħadra, li huwa ftehim mhux tal-UE li jinvolvi 48 pajjiż, iżda l-leġiżlazzjoni tal-UE tmur lil hinn minn dan. Ħames Direttivi dwar l-assigurazzjoni ta’ vetturi bil-mutur mill-1972 progressivament saħħew id-Direttiva u tejbu d-dispożizzjonijiet tagħha; ġew ikkonsolidati fid-Direttiva 2009/103/KE (minn hawn ‘il quddiem id-Direttiva). Elementi prinċipali tad-Direttiva jinkludu:

·Obbligu fuq vetturi bil-mutur li jkollhom polza ta’ assigurazzjoni tar-responsabbiltà ċivili għall-vetturi bil-mutur, valida fil-partijiet kollha tal-UE fuq il-bażi ta’ primjum wieħed.

·Ammonti minimi obbligatorji ta’ kopertura li dawn it-tip ta’ poloz ta’ assigurazzjoni iridu jipprovdu (Stati Membri jistgħu jeħtieġu kopertura ogħla fil-livell nazzjonali).

·Projbizzjoni fuq Stati Membri li jwettqu kontrolli sistematiċi fuq l-assigurazzjoni ta’ vetturi bil-mutur li normalment ikunu bbażati fit-territorju ta’ Stat Membru ieħor.

·Obbligu fuq Stati Membri li joħolqu fondi ta’ garanzija għall-kumpens tal-vittmi ta’ inċidenti kkawżati minn vetturi mhux assigurati jew mhux identifikati.

·Protezzjoni għall-vittmi tal-inċidenti ta’ vetturi bil-mutur fi Stat Membru għajr l-Istat Membru tar-residenza tagħhom (“vittmi fuq żjara”).

·Id-dritt għal detenturi tal-poloz sabiex jiksbu dikjarazzjoni tal-pretensjonijiet preċedenti tagħhom għall-aħħar ħames snin mill-assiguratur tagħhom.

Biex tiġi vvalutata l-effettività, l-effiċjenza u l-koerenza tal-leġiżlazzjoni dwar il-vetturi bil-mutur, il-Programm ta' Ħidma tal-Kummissjoni għall-2016 ħabbar evalwazzjoni tad-Direttiva 2 . Il-konklużjoni tal-evalwazzjoni kienet li ħafna elementi tad-Direttiva jibqgħu idonei, filwaqt li jkunu xierqa ċerti emendi f’oqsma speċifiċi.

B’żieda ma’ dan, fil-Pjan ta' Azzjoni għas-Servizzi Finanzjarji għall-Konsumatur ta’ Marzu 2017 3 , il-Kummissjoni ħabbret li, wara evalwazzjoni, tiddeċiedi minnufih dwar emendi possibbli għad-Direttiva sabiex ittejjeb il-pretensjoni tal-vittmi ta’ inċidenti tat-traffiku meta l-assiguratur ikun insolventi, u ttejjeb ir-rikonoxximent tad-dikjarazzjonijiet ta’ pretensjonijiet preċedenti, b’mod partikolari f’kuntest transfruntier. Din il-proposta tindirizza dawn iż-żewġ kwistjonijiet, flimkien ma’ tlieta oħra identifikati fl-evalwazzjoni: verifiki ta’ assigurazzjoni għall-ġlieda kontra s-sewqan mhux assigurat, l-armonizzazzjoni ta’ ammonti minimi ta’ kopertura, u l-kamp ta' applikazzjoni tad-direttiva.

1) Insolvenza tal-assiguratur

3) Riskji minħabba s-sewqan mhux assigurat

Skont l-Assoċjazzjoni tal-Awtoritajiet tar-Reġistrazzjoni Ewropej tal-Vetturi u s-Sewwieqa (EREG 5 ), is-sewqan mhux assigurat, iċ-ċirkolazzjoni b’vettura bil-mutur mingħajr assigurazzjoni obbligatorja tar-responsabbiltà ċivili għall-vetturi bil-mutur, huma problema li qed tikber fl-UE. Il-kost għall-UE ġie stmat għal EUR 870 miljun f’pretensjonijiet fl-2011 għall-UE kollha kemm hi.

Is-sewqan mhux assigurat jaffettwa b’mod negattiv bosta partijiet ikkonċernati inklużi vittmi ta’ inċidenti, assiguraturi, fond ta’ garanzija u detenturi ta' poloz tal-assigurazzjoni tal-vetturi bil-mutur.

B'żieda ma’ dan, tali verifika ta’ assigurazzjoni ta’ vetturi li jidħlu fit-territorju nazzjonali tirrikjedi l-iskambju ta’ data bejn l-Istati Membri; f’dan il-każ huwa neċessarju li d-drittijiet, il-libertajiet u l-interessi leġittimi tas-suġġett tad-data jiġu salvagwardjati. Il-provvedimenti tar-Regolament Ġenerali tal-UE dwar il-Protezzjoni tad-Data 6 japplikaw għall-ipproċessar tad-data personali għall-fini tal-ġlieda kontra s-sewqan mhux assigurat. Il-leġiżlazzjoni domestika jkollha bżonn tirrispetta l-kundizzjonijiet u r-rekwiżiti stabbiliti fir-Regolament, b’mod partikolari sabiex jiġi żgurat li d-data personali tiġi pproċessata skont il-liġi, b’mod ġust u trasparenti, tinġabar għal skopijiet speċifikati espliċiti u leġittimi, tirreferi għall-bażi legali rilevanti għall-ipproċessar, tkun konformi mar-rekwiżiti ta’ sigurtà u ta’ kunfidenzjalità relevanti stipulati fir-Regolament Ġenerali dwar il-Protezzjoni tad-Data u tirrispetta l-prinċipji tan-neċessità, il-proporzjonalità, il-limitazzjoni tal-iskop u l-perjodu proporzjonat ta’ perjodu taż-żamma tad-data. Barra dan, il-protezzjoni tad-data personali mid-disinn u l-protezzjoni tad-data b’mod awtomatiku jeħtieġ ukoll li jkunu parti integrali fis-sistemi kollha ta’ pproċessar tad-data żviluppati u użati fil-qafas tal-leġiżlazzjoni tal-Istati Membri. L-operazzjonijiet kollha ta’ proċessar inklużi dawk relatati mal-kooperazzjoni amministrattiva u l-assistenza reċiproka bejn l-awtoritajiet kompetenti tal-Istati Membri għandhom isiru f’konformità mar-regoli dwar il-protezzjoni ta' data personali stipulati fir-Regolament Ġenerali dwar il-Protezzjoni tad-Data, u f'konformità mal-leġiżlazzjoni nazzjonali rilevanti.

•Konsistenza mad-dispożizzjonijiet ta’ politika eżistenti fil-qasam ta’ politika

•Konsistenza ma’ politiki oħra tal-Unjoni

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

•Sussidjarjetà (għall-kompetenza mhux esklużiva)

Skont l-Artikolu 4 TFUE, l-azzjoni tal-UE għall-ikkompletar tas-suq intern trid tiġi vvalutata fid-dawl tal-prinċipju tas-sussidjarjetà stabbilit fl-Artikolu 5(3) TUE.

F’dan il-kuntest, huwa mfakkar li d-Direttiva tipproteġi l-vittmi ta’ inċident fi Stati Membri tal-UE għajr dak tar-residenza tagħhom, u l-vittmi domestiċi ta’ inċident ikkawżat minn sewwieq minn Stat Membru ieħor. Il-miżuri previsti fil-proposta jistgħu biss jiġu ppromulgati fil-livell tal-UE, billi jikkonċernaw assiguraturi transfruntiera attivi, detenturi ta’ poloz transfruntiera tal-assigurazzjoni ta’ vetturi bil-mutur mobbli u verifiki transfruntiera ta’ assigurazzjoni tal-vetturi.

Kumpens ta’ vittmi ta’ inċidenti tat-traffiku f’każ ta’ insolvenza transfruntiera ta’ assiguratur hija ta’ importanza ewlenija għall-funzjonament bla xkiel tas-suq uniku. Azzjoni mhux koordinata permezz ta’ taħlita ta’ oqfsa volontarji bejn l-uffiċji nazzjonali tal-assigurazzjoni tal-vetturi bil-mutur ma jistgħux jiggarantixxu li l-vittmi jiġu kkumpensati kif xieraq u li r-riskji jkunu kondiviżi bl-istess mod indaqs fost l-Istati Membri. Kundizzjonijiet ekwivalenti ta’ kompetizzjoni fost l-Istati Membri kollha f’termini ta’ ammonti minimi ta’ kopertura biex tiġi żgurata protezzjoni minima ndaqs għal vittmi tal-inċidenti tat-traffiku fl-UE kollha ma tistax tinkiseb permezz ta’ sforzi mhux koordinati mill-Istati Membri. L-indirizzar ta’ sewqan mhux assigurat fil-każ ta’ traffiku transfruntier ma jistax jinkiseb b'azzjoni fil-livell nazzjonali. Barra minn hekk, azzjoni fil-livell tal-UE biss tista’ tiżgura l-protezzjoni ta’ vittmi f’każ ta’ inċidenti li jinvolvu assiguratur transfruntier insolventi. Azzjoni fil-livell tal-UE biss tista’ tiżgura applikazzjoni uniformi tal-kamp ta’ applikazzjoni tad-Direttiva. Fl-aħħar nett, l-iżgurar ta’ trattament indaqs ta’ dikjarazzjonijiet ta’ pretensjonijiet preċedenti minn assiguraturi għal detenturi ta' poloz prospettivi li jaqsmu l-fruntieri ma jistgħax jinkiseb mingħajr azzjoni koordinata.

•Il-proporzjonalità

Il-proposta tqis bis-sħiħ il-prinċipju tal-proporzjonalità, jiġifieri li azzjoni tal-UE ma għandhiex teċċedi dak li jkun meħtieġ sabiex jitwettqu l-objettivi tat-Trattati. L-għażliet ta’ politika magħżula ġew evalwati u mfassla sabiex ikun hemm il-bilanċ adegwat bejn l-interess pubbliku inkwistjoni (b’mod partikulari, il-ħtieġa li jitnaqqas is-sewqan mhux assigurat u li jiġi żgurat livell minimu ndaqs ta’ protezzjoni tal-vittmi) u l-kostijiet potenzjali għall-awtoritajiet pubbliċi, l-assiguraturi u d-detenturi ta’ poloz, sabiex tiġi żgurata l-kosteffiċjenza tal-miżuri proposti.

•L-għażla tal-istrument

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET INTERESSATI U TAL-VALUTAZZJONIJIET TAL-IMPATT

•L-evalwazzjonijiet ex post/il-kontrolli tal-idoneità tal-leġiżlazzjoni eżistenti

Ir-riżultati tal-konsultazzjoni pubblika wrew sodisfazzjon ġenerali mill-partijiet interessati rigward it-tħaddim tal-maġġoranza tal-elementi tad-Direttiva. Kien hemm appoġġ wiesa’ mill-kategoriji kollha tal-partijiet interessati għal inizjattiva tal-UE li tiżgura l-ħlas rapidu ta’ kumpens għal vittmi ta’ inċidenti f’każ ta’ insolvenza ta’ assiguratur ta’ vettura bil-mutur, speċjalment f’kuntest transfruntier. Maġġoranza tal-partijiet interessati tappoġġa l-għażla li tqiegħed ir-responsabbiltà finanzjarja aħħarija f’każijiet bħal dawn mal-Istat Membru tal-istabbiliment tal-assiguratur ta’ vetturi bil-mutur inkwistjoni, bl-ewwel responsabbiltà fuq l-Istat Membru ta’ residenza tal-vittma biex jiġi żgurat kumpens rapidu.

Ma kien hemm ebda oppożizzjoni fost il-partijiet interessati għall-armonizzazzjoni ta’ ammonti minimi ta’ assigurazzjoni għal vetturi bil-mutur mal-livell ogħla li japplika diġà fi 15-il Stat Membru. Xi organizzazzjonijiet tal-konsumatur appoġġaw livell differenzjat ogħla ta’ assigurazzjoni obbligatorja għal vetturi ikbar bħal trakkijiet u kowċijiet, iżda dan kien oppost mis-settur tal-assigurazzjoni u l-kumpaniji tat-trakkijiet u l-kowċijiet bħala mhux ġustifikat mill-evidenza u jikkawża kostijiet ogħla ta’ assigurazzjoni li tiġi mgħoddija lill-utent aħħari (speċjalment billi inċident li jaffettwa lil kowċ b’ħafna passiġġieri jista’ jkun ikkawżat ukoll minn vettura iżgħar).

Fir-rigward tar-rikonoxximent ta’ rendikonti ta’ pretensjonijiet preċedenti minn assiguratur ġdid, speċjalment fi Stat Membru ġdid, għadd ta’ ċittadini individwali rrakkontaw l-esperjenzi negattivi tagħhom f’dan ir-rigward u sejħu għal intervent sabiex jiġi żgurat li l-assiguraturi ma jittrattawx liċ-ċittadini transfruntiera mobbli differenti minn residenti eżistent ta’ Stat Membru, fir-rigward tar-rikonoxximent ta’ rendikonti tal-istorja tal-pretensjonijiet tagħhom. Is-settur tal-assigurazzjoni oppona l-obbligi vinkolanti fuq l-assiguraturi f’dan ir-rigward, għax qieshom sproporzjonati.

Fir-rigward ta’ sewqan mhux assigurat, ma kienx hemm oppożizzjoni għall-awtorizzazzjoni ta’ kontrolli diskreti tal-assigurazzjoni bl-użu ta’ teknoloġija ta’ rikonoxximent tal-pjanċa tan-numru li ma jirrikjedux li vettura titwaqqaf.

Barra minn hekk, kien hemm appoġġ wiesa’ biex jiċċara l-kamp ta’ applikazzjoni tad-Direttiva fid-dawl tal-ġurisprudenza ġdida tal-Qorti. Partijiet interessati mis-settur tal-isport bil-muturi talbu għal esklużjoni ta’ dan is-settur mid-Direttiva.

- konsultazzjoni pubblika (mit-30 ta’ Settembru 2015 sal-31 ta’ Jannar 2016) fil-qafas tas-Sejħa għal Evidenza dwar il-qafas regolatorju tal-UE għas-servizzi finanzjarji li tistieden reazzjonijiet u evidenza empirika dwar il-benefiċċji, l-effetti mhux intenzjonati, il-konsistenza u l-koerenza tal-leġiżlazzjoni finanzjarja 10 u seduta pubblika dwar is-Sejħa għal Evidenza, li saret fis-17 ta’ Mejju 2016 11 ;

- dibattitu dwar ir-rieżmi tad-Direttiva li saret fit-12 ta’ Lulju 2017 li kienet tinkludi gruppi ta’ partijiet interessati, b’mod partikolari assiguraturi, organizzazzjonijiet tal-konsumatur, il-Kunsill tal-Uffiċċji u l-Awtoritajiet tal-Istati Membri;

- skambji ta’ fehmiet ma’ esperti mill-Awtoritajiet tal-Istati Membri (Grupp ta’ Esperti dwar Banek, Pagamenti u Assigurazzjoni);

- statistiki u rapporti mill-Kunsill ta’ l-Uffiċċji tal-assigurazzjoni tal-vetturi (entitajiet tad-dritt privat li huma fdati b’ċerti kompiti mid-Direttiva).

•Valutazzjoni tal-impatt

B’reazzjoni għall-kummenti tal-Bord, il-valutazzjoni tal-impatt riveduta tispjega li, fir-rigward tal-ambitu tad-Direttiva, huwa preferibbli li tiġi kkodifikata, essenzjalment, id-dispożizzjoni ewlenija tas-sentenzi konsekuttivi tal-Qorti tal-Ġustizzja tal-Unjoni Ewropea dwar il-kamp ta’ applikazzjoni fid-Direttiva sabiex tiġi żgurata ċarezza ġuridika. Dan jippermetti lill-Istati Membri li jimplimentaw il-bidliet implikati mid-deċiżjonijiet b’mod ordnat u trasparenti. Barra minn hekk, ikun jipprovdi aktar ċertezza ġuridika għall-partijiet interessati dwar il-kamp ta’ applikazzjoni tad-Direttiva, billi d-deċiżjonijiet tal-qorti jiġu direttament trasposti fil-leġiżlazzjoni nazzjonali. Il-kodifikazzjoni tiffaċilita wkoll l-infurzar tal-liġi tal-UE f’dan il-qasam, billi tkun akkumpanjata b’eżerċizzju standard ta’ traspożizzjoni.

Barra minn hekk, fir-rigward ta’ żviluppi teknoloġiċi tal-ġejjieni, il-valutazzjoni tal-impatt tispjega li l-obbligu tad-Direttiva li tinkiseb assigurazzjoni tar-responsabbiltà ċivili obbligatorja għall-vettur bil-mutur diġà tapplika għal vetturi awtonomi u semiawtonomi. Ir-raġuni ewlenija hija l-ħtieġa kontinwa li jiġu protetti u kkumpensati l-vittmi ta’ inċidenti li jinvolvu vetturi awtonomi li jiċċirkolaw fl-UE. Ġraw għadd ta’ inċidenti kkawżati minn vetturi awtonomi (u semiawtonomi), li juru l-ħtieġa li ċ-ċittadini tal-UE jiġu protetti f’każ ta’ inċident. Barra minn hekk, il-valutazzjoni tal-impatt tispjega li tipi ġodda ta’ vetturi bil-mutur, bħar-roti elettriċi, is-segways, l-iscooters elettriċi diġà jaqgħu fil-kamp ta’ applikazzjoni tad-Direttiva. L-użu ta’ dawn it-tipi ġodda ta’ vetturi elettriċi bil-mutur għandu l-potenzjal li jikkawża inċidenti li l-vittmi tagħhom jeħtieġu jkunu protetti u rimborżati malajr. Madankollu, id-Direttiva attwali tipprovdi wkoll lill-Istati Membri bis-setgħa li jeżentaw tali vetturi minn assigurazzjoni tar-responsabbiltà ċivili għall-vetturi bil-mutur jekk iqisu li dan ikun meħtieġ. Matul il-konsultazzjoni pubblika għadd ta’ assoċjazzjonijiet li jirrappreżentaw l-industrija tar-roti elettriċi appellaw għal esklużjoni ta’ tali vetturi fid-Direttiva nnifisha, bl-argument li l-obbligu ta’ assigurazzjoni tar-responsabbiltà ċivili jista’ jipperikola l-użu ta’ roti elettriċi. Dan mhuwiex meqjus bħala neċessarju fid-dawl tas-setgħa tal-Istati Membri li jeżentaw roti elettriċi jew kwalunkwe vetturi elettriċi ġodda oħra. F’dan il-każ, il-fondi ta’ garanzija nazzjonali se jġarrab il-kostijiet tar-rimborż lill-vittmi ta’ inċidenti kkawżati minn dawn it-tipi ġodda ta’ vetturi. Dan jipprovdi l-ogħla livell ta’ protezzjoni tal-vittmi mingħajr il-ħtieġa għal xi azzjoni addizzjonali tal-UE.

Il-valutazzjoni tal-impatt analizzat diversi alternattivi ta’ politika għal kull problema identifikata:

Billi d-Direttiva diġà teżisti, l-alternattiva bażi fil-każijiet kollha kienet l-ebda bidla fid-Direttiva. Minbarra x-xenarju bażi, il-valutazzjoni tal-impatt analizzat ukoll firxa ta’ alternattivi ta’ politika possibbli oħra.

Fir-rigward l-insolvenza tal-assiguraturi, suġġett li bħalissa mhux parti mid-Direttiva, it-tieni alternattiva kienet li tiġi imposta responsabbiltà għal kumpens inizjali tal-vittmi iżda l-ebda responsabbiltà aħħarija. It-tielet alternattiva kienet li jinnominaw iż-żewġ responsabbiltajiet, bir-responsabbiltà inizjali fuq l-Istat Membru ta’ residenza tal-vittma u r-responsabbiltà aħħarija fuq l-Istat Membru ta’ stabbiliment tal-assiguratur insolventi. Il-valutazzjoni tal-impatt ikkonkludiet li t-tielet alternattiva hija l-alternattiva ta’ politika ppreferuta, billi mhux biss tiżgura l-kumpens rapidu tal-vittmi, iżda tkun tipprovdi wkoll kumpens nazzjonali tal-assiguraturi, korpi ta’ kumpens nazzjonali u detenturi ta’ polza ta’ assigurazzjoni ta’ vetturi bil-mutur b’iktar ċertezza ġuridika dwar is-saldu inizjali u finali tal-pretensjonijiet, u jnaqqsu l-ħtieġa għal proċeduri legali.

Fir-rigward tal-ammonti minimi tal-kopertura, barra mix-xenarju bażi, it-tieni alternattiva kienet li tarmonizza ammonti ta’ kopertura mal-ogħla livell minimu obbligatorju li japplika fl-istess żmien fl-Istati Membri. It-tielet alternattiva li tqieset kienet timponi ammonti ogħla ta’ kopertura obbligatorja għal vetturi ikbar bħal trakkijiet u karozzi tal-linja. Il-valutazzjoni tal-impatt ikkonkludiet li t-tieni alternattiva hija l-għażla politika ppreferuta billi tiżgura protezzjoni minima ugwali tal-vittmi fl-UE, u ma hemmx biżżejjed evidenza biex jappoġġaw it-tielet alternattiva.

Fir-rigward tal-pretensjonijiet preċedenti, apparti mix-xenarju bażi, it-tieni alternattiva kienet li tinħareġ rakkomandazzjoni lill-Istati Membri dwar it-trattament ta’ dikjarazzjonijiet ta’ pretensjonijiet preċedenti. It-tielet alternattiva kienet li jiġi armonizzat biss il-mudell għal dikjarazzjonijiet ta’ pretensjonijiet preċedenti, mingħajr ma jiġi impost l-ebda trattament obbligatorju ta’ tali dikjarazzjonijiet mill-assiguraturi, biex tiġi ffaċilitata l-awtentikazzjoni kontra l-frodi. Ir-raba’ alternattiva kienet li jkomplu jimponu fuq l-assiguraturi rekwiżit ta’ nondiskriminazzjoni għat-trattament ta’ dikjarazzjonijiet ta’ pretensjonijiet preċedenti maħruġa minn assiguraturi fi Stati Membri oħra u rekwiżit ta’ trasparenza dwar l-użu tad-dikjarazzjoni. Il-valutazzjoni tal-impatt ikkonkludiet li din l-aħħar alternattiva kienet l-għażla politika ppreferuta, billi mhux biss tiffaċilita l-istandardizzazzjoni ta’ dikjarazzjonijiet ta’ pretensjonijiet preċedenti, iżda tkun tiżgura wkoll trattament ugwali tal-pretensjonijiet preċedenti bejn detenturi tal-polza domestiċi u dawk li jiċċaqalqu bejn il-fruntieri.

Fir-rigward ta’ sewqan mhux assigurat, apparti x-xenarju bażi, it-tieni alternattiva kienet li jiġu awtorizzati kontrolli diskreti (attwalment ipprojbiti) fuq bażi volontarja għall-Istati Membri. It-tielet alternattiva kienet li l-kontrolli diskreti fuq l-assigurazzjoni fil-fruntieri jsiru obbligatorji. It-tielet għażla kienet meqjusa li għandha potenzjal ikbar li tnaqqas is-sewqan mhux assigurat meta mqabbla mat-tieni għażla. Madankollu, il-valutazzjoni tal-impatt qieset li l-kostijiet marbuta mat-tielet alternattiva setgħu jegħlbu l-benefiċċji f’ħafna Stati Membri, billi l-livelli ta’ sewqan mhux assigurat mhumiex l-istess madwar l-UE. Għaldaqstant, il-valutazzjoni tal-impatt ikkonkludiet li t-tieni alternattiva (kontrolli diskreti volontarji) hija l-għażla politika ppreferuta.

Fir-rigward tal-kamp ta’ applikazzjoni tad-Direttiva, anness tal-valutazzjoni tal-impatt jispjega li l-ġurisprudenza eżistenti tal-Qorti tal-Ġustizzja se tiġi kodifikata permezz ta’ definizzjoni ta’ “użu ta’ vettura”, ġaladarba ma ġiet ippreżentata ebda evidenza mill-partijiet interessati li l-kamp ta’ applikazzjoni kif definit fil-ġurisprudenza se jiġġenera kostijiet eċċessivi. Xi Stati Membri diġà jimponu rekwiżit ta’ assigurazzjoni tar-responsabbiltà ċivili għall-vetturi bil-mutur b’konformità mal-ġurisprudenza, mingħajr ammont eċċessivament għoli ta’ primjums, inkluż għal avvenimenti sportivi bil-muturi.

Il-proposta mhijiex mistennija li jkollha impatt soċjali sinifikanti oħra minbarra l-benefiċċji diġà deskritti. L-emendi proposti għandhom l-għan li jnaqqsu s-sewqan mhux assigurat, potenzjalment inaqqsu l-primjums tal-assigurazzjoni ta’ vetturi bil-mutur, u li jtejbu l-livell ta’ protezzjoni tal-vittmi ta’ inċidenti tat-traffiku, u potenzjalment jkunu ta’ benefiċċju għaċ-ċittadini kollha fl-UE. Il-proposta tevita r-riskju ta’ żidiet potenzjali kbar ta’ primjums tal-assigurazzjoni tal-vetturi bil-mutur. B’mod partikolari l-miżuri proposti dwar il-kopertura minima tinvolvi biss l-allinjament ta’ ammonti minimi ta’ kopertura biex tiżgura protezzjoni minima ndaqs madwar l-Istati Membri.

•Drittijiet fundamentali

Il-proposta tirrispetta d-drittijiet fundamentali u tosserva l-prinċipji rikonoxxuti mill-Karta tad-Drittijiet Fundamentali tal-Unjoni Ewropea, b’mod partikolari d-dritt għall-protezzjoni tad-data personali (l-Artikolu 8 tal-Karta), id-dritt għall-proprjetà (l-Artikolu 17 tal-Karta), u l-prinċipju ta’ ugwaljanza bejn in-nisa u l-irġiel (l-Artikolu 23 tal-Karta). Tikkontribwixxi wkoll għall-għanijiet tal-Artikolu 16 tal-Karta li jistabbilixxu l-libertà tal-intrapriża, għall-għanijiet ta’ l-Artikolu 38 tal-Karta li jipprovdi għal livell għoli ta’ protezzjoni tal-konsumatur u għall-għanijiet tal-Artikolu 45 tal-Karta rigward l-libertà ta’ moviment u ta’ residenza taċ-ċittadini.

REFIT

Il-proposta hija konsistenti mal-għanijiet ta’ simplifikazzjoni u tnaqqis fil-kostijiet. Fir-rigward tal-insolvenza tal-assiguraturi, se jkun hemm inqas kostijiet ta’ litigazzjoni minħabba li d-Direttiva tkun tistabbilixxi rwoli ċari dwar il-pagament inizjali lill-vittma u r-responsabbiltà aħħarija għall-pretensjoni. Barra minn hekk, it-tnaqqis tar-riskju ta’ sewqan mhux assigurat permezz ta’ verifiki diskreti jista’ jnaqqas il-pretensjonijiet fuq korpi ta’ kumpens u kontribuzzjonijiet għal assiguraturi. Barra minn hekk, iktar standardizzazzjoni ta’ dikjarazzjonijiet ta’ pretensjonijiet preċedenti tissimplifika l-verifika tal-awtentiċità ta’ dikjarazzjonijiet ta’ pretensjonijiet preċedenti pprovduti minn assiguraturi barranin. Finalment, il-proposta ma tinkludi l-ebda rekwiżiti ġodda ta’ rappurtar għall-awtoritajiet pubbliċi.

4.IMPLIKAZZJONIJIET BAĠITARJI

Il-proposta ma għandha l-ebda implikazzjoni fuq il-baġit tal-UE.

Il-proposta jista’ jkollha impatt fuq il-baġits nazzjonali ta’ dawk l-Istati Membri li jagħżlu l-alternattiva għal kontrolli diskreti ta’ assigurazzjoni fuq il-fruntiera ta’ vetturi normalment ibbażati fi Stat Membru ieħor, li tkun tirrikjedi l-użu ta’ teknoloġija ta’ rikonoxximent tal-pjanċa tan-numru u skambju ta’ informazzjoni ma’ Stati Membri oħra dwar l-istatus tal-assigurazzjoni tal-vetturi.

5.ELEMENTI OĦRAJN

•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rappurtar

Il-Kummissjoni se twettaq monitoraġġ tal-implimentazzjoni tal-politika f’kooperazzjoni mal-Istati Membri. Ħames snin wara d-data tat-traspożizzjoni, il-Kummissjoni se twettaq evalwazzjoni ta’ din id-Direttiva. L-evalwazzjoni se tifli l-effettività, l-effiċjenza, ir-relevanza, il-koerenza u l-valur miżjud tal-proposta, inkluż kull impatt sinifikanti fuq l-impriżi.

•Dokumenti ta’ spjegazzjoni (għad-direttivi)

Sabiex l-objettiv ta’ din il-proposta jkun issodisfat u jiġu evitati lakuni u diskrepanzi potenzjali f’termini ta’ implimentazzjoni tal-Istati Membri f’liġi nazzjonali, dokumenti ta’ spjegazzjoni se jkunu neċessarji sabiex jgħinu fit-traspożizzjoni u jippermettu verifika effettiva. Dan jiġġustifika l-ħtieġa għall-Istati Membri li jinkludu flimkien man-notifika tal-miżuri ta’ traspożizzjoni tagħhom, dokumenti ta’ spjegazzjoni, fl-għamla ta’ pereż. tabella ta’ korrelazzjoni.

•Spjegazzjoni fid-dettall tad-dispożizzjonijiet speċifiċi tal-proposta

- partijiet li jkun ġarrbu dannu għandhom jiġu kkumpensati minn tali korp tal-Istat Membru tar-residenza tagħhom;

- dan il-korp għandu jkollu d-dritt li jitlob rimborż ta’ dan il-kumpens mingħand il-korp tal-Istat Membru fejn l-impriża ta’ assigurazzjoni li ħarġet il-polza hija stabbilita (din l-aħħar entità għandha tassumi r-responsabbiltà finali);

2018/0168 (COD)

Proposta għal

DIRETTIVA TAL-PARLAMENT EWROPEW U TAL-KUNSILL

li temenda d-Direttiva Nru 2009/103/KE tas-16 ta’ Settembru 2009 tal-Parlament Ewropew u tal-Kunsill dwar l-assigurazzjoni kontra responsabbiltà ċivili fir-rigward tal-użu ta’ vetturi bil-mutur u l-infurzar tal-obbligu ta’ assigurazzjoni kontra din ir-responsabbiltà

(Test b’relevanza għaż-ŻEE)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 114 tiegħu,

Wara li kkunsidraw il-proposta tal-Kummissjoni Ewropea,

Wara li l-abbozz tal-att leġiżlattiv intbagħat lill-parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew 14 ,

F’azzjoni skont il-proċedura leġiżlattiva ordinarja,

Billi:

(1)Assigurazzjoni kontra r-responsabbiltà ċivili fir-rigward tal-użu ta’ vetturi bil-mutur (assigurazzjoni ta’ vetturi bil-mutur) hi ta’ importanza speċjali għaċ-ċittadini Ewropej, kemm għal dawk li għandhom polza ta’ assigurazzjoni kif ukoll għall-vittmi potenzjali ta’ inċident. Għandha wkoll importanza ewlenija għal impriżi ta’ assigurazzjoni billi tikkostitwixxi parti importanti tan-negozju tal-assigurazzjoni li ma tirrigwardax il-ħajja, konklużi fl-Unjoni. L-assigurazzjoni ta’ vetturi b’mutur għandha wkoll impatt fuq il-moviment ħieles ta’ persuni u vetturi. Jinħtieġ għaldaqstant li l-iżvilupp u l-konsolidament tas-suq intern fir-rigward tal-assigurazzjoni ta’ vetturi bil-mutur fil-qasam tas-servizzi finanzjarji jkun għan ewlieni tal-azzjoni tal-Unjoni.

(2)Il-Kummissjoni wettqet evalwazzjoni tal-funzjonament tad-Direttiva 2009/103/KE tal-Parlament Ewropew u tal-Kunsill 15 , inklużi l-effiċjenza tagħha l-effettività u l-koerenza ma’ politiki oħra tal-Unjoni. Il-konklużjoni tal-evalwazzjoni kienet li d-Direttiva 2009/103/KE tiffunzjona tajjeb b’mod ġenerali, u ma teħtieġx emenda f’ħafna aspetti. Madankollu, ġew identifikati erba’ oqsma fejn emendi mmirati jkunu xierqa: il-kumpens tal-vittmi ta’ inċidenti f’każijiet ta’ insolvenza ta’ impriża ta’ assigurazzjoni, l-ammonti minimi obbligatorji ta’ kopertura tal-assigurazzjoni, il-kontrolli tal-assigurazzjoni tal-vetturi mill-Istati Membri, u l-użu ta’ dikjarazzjonijiet tal-pretensjonijiet preċedenti tad-detenturi ta’ poloz minn impriża ta’ assigurazzjoni ġdida.

(3)Barra minn hekk, f’deċiżjonijiet riċenti tal-Qorti tal-Ġustizzja tal-Unjoni Ewropea, jiġifieri Vnuk 16 , Rodrigues de Andrade 17 u Torreiro 18 , il-Qorti ċċarat it-tifsira tal-kliem “użu ta’ vettura”. B’mod partikolari, il-Qorti Ewropea tal-Ġustizzja ċċarat li vetturi bil-mutur huma normalment intiżi biex iservu bħala mezz ta’ trasport, irrispettivament mill-karatteristiċi tal-vettura, u ġie ċċarat li l-użu ta’ tali vetturi jkopri kull użu ta’ vettura konsistenti mal-funzjoni normali tagħha bħala mezz ta’ trasport, irrispettivament mit-terren li fiha l-vettura hija użata u jekk hijiex stazzjonarja jew miexja. Fl-interess taċ-ċertezza legali, huwa xieraq li dik il-ġurisprudenza tiġi riflessa fid-Direttiva 2009/103/KE bl-introduzzjoni ta’ definizzjoni ta’ “użu ta’ vettura”.

(4)Jinħtieġ li l-Istati Membri jastjenu milli jagħmlu spezzjonijiet dwar l-assigurazzjoni fuq vetturi normalment ibbażati fit-territorju ta’ Stat Membru ieħor u fir-rigward ta’ vetturi normalment ibbażati fit-territorju ta’ pajjiż terz li jkunu deħlin fit-territorju tagħhom mit-territorju ta’ Stat Membru ieħor. Żviluppi teknoloġiċi ġodda jippermettu l-verifika tal-assigurazzjoni tal-vetturi mingħajr ma jkollhom għalfejn jitwaqqfu u mingħajr ma jixxekkel il-moviment liberu tal-persuni. Għalhekk huwa xieraq li jitħallew isiru dawk il-verifiki dwar tal-assigurazzjoni fuq il-vetturi, jekk ma jiddiskriminawx, jekk ikunu meħtieġa u proporzjonati, jekk jiffurmaw parti minn sistema ġenerali ta’ verifiki fuq it-territorju nazzjonali u ma jkunx meħtieġ li titwaqqaf il-vettura.

(5)L-Istati Membri li jagħżlu li jwaqqfu sistema li tipproċessa d-data personali li wara tista’ tiġi kondiviża ma’ Stati Membri oħra, bħad-data mit-teknoloġija ta’ rikonoxximent tan-numru tal-pjanċa, jeħtieġ li jdaħħlu liġi li tippermetti l-ipproċessar ta’ data personali għall-finijiet tal-ġlieda kontra sewqan mhux assigurat, filwaqt li jistabbilixxu wkoll miżuri xierqa ta’ salvagwardja tad-drittijiet u l-libertajiet tas-suġġett tad-data u l-interess leġittimu. Id-dispożizzjonijiet tar-Regolament (UE) 2016/679 tal-Parlament Ewropew u tal-Kunsill 19 japplikaw għall-ipproċessar tad-data personali għall-finijiet tal-ġlieda kontra s-sewqan mingħajr assigurazzjoni. Jinħtieġ li l-leġiżlazzjoni tal-Istati Membri b’mod partikolari tispeċifika l-għan preċiż, tirreferi għall-bażi ġuridika rilevanti, tosserva r-rekwiżiti rilevanti tas-sigurtà u tħares il-prinċipji ta’ neċessità, proporzjonalità u limitazzjoni tal-iskop, u jintħeġ li tistabbilixxi l-perjodu proporzjonat ta’ żamma tad-data. Barra dan, il-prinċipji tal-protezzjoni tad-data personali mid-disinn u l-protezzjoni tad-data b’mod awtomatiku jinħtieġ li jkunu applikati fis-sistemi kollha ta’ pproċessar tad-data żviluppati u użati fil-qafas tal-leġiżlazzjoni tal-Istati Membri.

(6)Id-Direttiva 2009/103/KE tistipula dati ta’ referenza differenti għall-kalkolu mill-ġdid tal-ammonti minimi ta’ assigurazzjoni fi Stati Membri differenti, li twassal għal ammonti minimi differenti skont l-Istat Membru. Sabiex tiġi żgurata protezzjoni minima ndaqs tal-partijiet li jkunu ġarrbu dannu fl-Unjoni, dawn l-ammonti minimi jinħtieġ li jkunu armonizzati u jinħtieġ li tiġi introdotta klawżola ta’ reviżjoni uniformi, bl-indiċi armonizzat tal-prezzijiet tal-konsumatur tal-Eurostat bħala valur referenzjarju, kif ukoll regoli proċedurali li jirregolaw tali reviżjoni u jistabbilixxu skadenza uniformi.

(7)Il-protezzjoni effettiva u effiċjenti tal-vittmi ta’ inċidenti tat-traffiku teħtieġ li dawk il-vittmi jirċievu rimborż dejjem għad-danni personali jew ħsara lill-proprjetà tagħhom, irrispettivament minn jekk l-impriża ta’ assigurazzjoni tal-parti responsabbli hix solventi jew le. Jinħtieġ li l-Istati Membri għalhekk iwaqqfu jew jaħtru korp li jipprovdi kumpens inizjali għall-partijiet li jkunu ġarrbu dannu li għandhom ir-residenza abitwali tagħhom fuq it-territorju rispettiv tagħhom, u li għandu dritt jirkupra dak il-kumpens mill-korp li twaqqaf jew ġie maħtur għall-istess skop fl-Istat Membru tal-istabbiliment tal-impriża tal-assigurazzjoni li ħarġet il-polza tal-vettura tal-parti responsabbli. Madankollu, sabiex jiġi evitat li jiġu introdotti pretensjonijiet paralleli, jinħtieġ li l-vittmi tal-inċidenti tat-traffiku ma jitħallewx jippreżentaw pretensjoni għal kumpens quddiem dak il-korp jekk ikunu diġà ppreżentaw il-pretensjoni tagħhom jew ikunu ħadu miżuri legali kontra l-impriża tal-assigurazzjoni kkonċernata u dik il-pretensjoni għadha qed tiġi kkunsidrata u l-kawża għadha pendenti.

(8)L-evidenza dwar pretensjonijiet preċedenti ta’ detenturi ta’ polza tal-assigurazzjoni li jridu jikkonkludu kuntratti tal-assigurazzjoni ġodda ma’ impriżi tal-assigurazzjoni jinħtieġ li tiġi vverifikata faċilment sabiex tiffaċilita r-rikonoxximent ta’ din l-evidenza tal-pretensjonijiet preċedenti meta’ tiġi konkluża polza ġdida tal-assigurazzjoni. Sabiex tiġi ssimplifikata l-verifika u l-awtentikazzjoni tad-dikjarazzjonijiet tal-evidenza tal-pretensjonijiet preċedenti, huwa importanti li l-kontenut u l-format tad-dikjarazzjoni ta’ din l-evidenza ta’ pretensjonijiet preċedenti jkunu l-istess madwar l-Istati Membri kollha. Barra minn hekk, l-impriżi tal-assigurazzjoni li jqisu d-dikjarazzjonijiet dwar l-evidenza tal-pretensjonijiet preċedenti sabiex jiddeterminaw il-primjums tal-assigurazzjoni ta’ vetturi bil-mutur jinħtieġ li ma jiddiskriminawx fuq il-bażi tan-nazzjonalità jew fuq il-bażi biss tal-Istat Membru ta’ residenza preċedenti tad-detentur tal-polza. Sabiex l-Istati Membri jkunu jistgħu jivverifikaw kif l-impriżi tal-assigurazzjoni jitrattaw id-dikjarazzjonijiet ta’ evidenza ta’ pretensjonijiet preċedenti, jinħtieġ li l-impriżi tal-assigurazzjoni jippubblikaw il-politiki tagħhom fir-rigward ta’ kif jużaw id-dikjarazzjonijiet tal-evidenza ta’ pretensjonijiet preċedenti meta jikkalkulaw il-primjums.

(9)Sabiex ikun hemm kundizzjonijiet uniformi għall-implimentazzjoni ta’ din id-Direttiva, jinħtieġ li s-setgħat ta’ implimentazzjoni jiġu kkonferiti fuq il-Kummissjoni fir-rigward tal-kontenut u l-forma tad-dikjarazzjoni tal-evidenza ta’ pretensjonijiet preċedenti. Dawn is-setgħat ta’ implimentazzjoni jinħtieġ li jiġu eżerċitati skont ir-Regolament (UE) Nru 182/2011 tal-Parlament Ewropew u tal-Kunsill 20 .

(10)Sabiex jiġi żgurat li l-ammonti minimi jibqgħu konformi mar-realtà ekonomika li qed tevolvi (u ma jispiċċawx maż-żmien), is-setgħa li jiġu adottati atti skont l-Artikolu 290 tat-Trattat dwar il-Funzjonament tal-Unjoni Ewropea jinħtieġ li tiġi delegata lill-Kummissjoni fir-rigward tal-adattament ta’ dawk l-ammonti minimi ta’ kopertura ta’ assigurazzjoni tar-responsabbiltà ċivili ta’ vetturi bil-mutur sabiex tirrifletti r-realtà ekonomika li qed tevolvi, kif ukoll biex tiddefinixxi l-kompiti proċedurali u l-obbligi proċedurali tal-korpi mwaqqfa biex jipprovdu kumpens jew fdati bil-kompitu li jipprovdi kumpens skont l-Artikolu 10a fir-rigward tal-kumpens. Huwa ta’ importanza partikolari li waqt il-ħidma preparatorja tagħha, il-Kummissjoni twettaq konsultazzjonijiet xierqa anki fil-livell tal-esperti, u li dawn il-konsultazzjonijiet jsiru f’konformità mal-prinċipji stabbiliti fil-Ftehim Interistituzzjonali dwar it-Tfassil Aħjar tal-Liġijiet tat-13 ta’ April 2016. B’mod partikolari, biex tiġi żgurata parteċipazzjoni ugwali fit-tħejjija tal-atti delegati, il-Parlament Ewropew u l-Kunsill jirċievu d-dokumenti kollha fl-istess ħin bħall-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi ta’ esperti tal-Kummissjoni li jittrattaw it-tħejjija ta’ atti delegati.

(11)Bħala parti mill-evalwazzjoni tal-funzjonament tad-Direttiva, jenħtieġ li l-Kummissjoni Ewropea timmonitorja l-applikazzjoni tad-Direttiva, fejn tqis in-numru ta’ vittmi, l-ammont tal-pretensjonijiet pendenti minħabba dewmien fil-pagamenti wara każijiet ta’ insolvenza transfruntiera, il-livell ta’ ammonti minimi ta’ kopertura fl-Istati Membri, l-ammont ta’ pretensjonijiet dovuti għal sewqan mhux assigurat marbut mat-traffiku transfruntier u n-numru ta’ lmenti fuq id-dikjarazzjonijiet tal-evidenza ta’ pretensjonijiet preċedenti

(12)Billi l-għanijiet ta’ din id-Direttiva, b’mod partikolari biex jiżguraw l-istess protezzjoni minima lill-vittmi ta’ inċidenti tat-traffiku fl-Unjoni kollha u biex jiżguraw il-protezzjoni tal-vittmi f’każ ta’ insolvenza tal-impriżi tal-assigurazzjoni, ma jistgħux jinkisbu b’mod suffiċjenti mill-Istati Membri iżda jistgħu pjuttost, minħabba l-effetti tagħhom, jiġu miksuba aħjar fil-livell tal-Unjoni, l-Unjoni tista’ tadotta miżuri, skont il-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. Skont il-prinċipju tal-proporzjonalità, kif stabbilit fl-istess Artikolu, din id-Direttiva ma tmurx lilhinn minn dak li hu meħtieġ biex jintlaħqu dawk l-għanijiet.

(13)Skont id-Dikjarazzjoni Politika Konġunta tat-28 ta’ Settembru 2011 tal-Istati Membri u l-Kummissjoni dwar id-dokumenti ta’ spjegazzjoni 21 , l-Istati Membri refgħu r-responsabbiltà li jakkumpanjaw, f’każijiet ġustifikati, in-notifika tal-miżuri ta’ traspożizzjoni tagħhom b’dokument wieħed jew aktar li jispjegaw ir-relazzjoni bejn il-komponenti ta’ direttiva u l-partijiet korrispondenti tal-istrumenti nazzjonali ta’ traspożizzjoni. Fir-rigward ta’ din id-Direttiva, il-leġiżlatur iqis li t-trażmissjoni ta’ dawn id-dokumenti hija ġġustifikata.

(14)Għalhekk jinħtieġ li d-Direttiva 2009/103/KE tiġi emendata skont dan,

ADOTTAW DIN ID-DIRETTIVA:

Artikolu 1

Id-Direttiva 2009/103/KE hija emendata kif ġej:

(1)    Fl-Artikolu 1 jiddaħħal il-punt 1a segwenti:

“1a.    “użu ta’ vettura” jfisser kwalunkwe użu ta’ tali vettura, normalment maħsuba biex isservi bħala mezz ta’ trasport, li huwa konformi mal-funzjoni normali ta’ dik il-vettura, irrispettivament mill-karatteristiċi tal-vettura u irrispettivament mill-karatteristiċi tal-art li fuqha tintuża l-vettura bil-mutur u jekk hix wieqfa jew miexja.”;

(2)    L-Artikolu 4 jinbidel b’dan li ġej:

“Artikolu 4

Spezzjonijiet dwar l-assigurazzjoni

1. L-Istati Membri għandhom jastjenu milli jagħmlu spezzjonijiet dwar l-assigurazzjoni tar-responsabbiltà ċivili fir-rigward ta’ vetturi normalment ibbażati fit-territorju ta’ Stat Membru ieħor u fir-rigward ta’ vetturi normalment ibbażati fit-territorju ta’ pajjiż terz li jkunu deħlin fit-territorju tagħhom mit-territorju ta’ Stat Membru ieħor.

Madankollu, jistgħu jwettqu dawn il-kontrolli tal-assigurazzjoni sakemm dawk il-kontrolli ma jkunux diskriminatorji, ikunu neċessarji u proporzjonati biex jiksbu l-għan mixtieq, u

a) jitwettqu bħala parti minn kontroll li mhux immirat esklussivament għall-verifika ta’ assigurazzjoni jew

b) jiffurmaw parti minn sistema ġenerali ta’ kontrolli fuq it-territorju nazzjonali u ma jirrikjedux li titwaqqaf il-vettura.

2. Fuq il-bażi tal-liġi tal-Istat Membru li għaliha huwa soġġett il-kontrollur, id-data personali tista’ tiġi proċessata fejn meħtieġ għall-iskop tal-ġlieda kontra s-sewqan mingħajr assigurat ta’ vetturi li jivvjaġġaw fi Stati Membri għajr f’dawk fejn huma normalment ibbażata kif stabbilit fl-Artikolu 1. Din il-liġi għandha tkun f’konformità mar-Regolament (UE) 2016/679* u se tistabbilixxi wkoll miżuri xierqa għas-salvagwardja tad-drittijiet u l-libertajiet tas-suġġett tad-data u l-interess leġittimu.

______________________________________________________________

*        Ir-Regolament (UE) 2016/679 tal-Parlament Ewropew u tal-Kunsill tas-27 ta' April 2016 dwar il-protezzjoni tal-persuni fiżiċi fir-rigward tal-ipproċessar ta' data personali u dwar il-moviment liberu ta' tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (ĠU L 119, 4.5.2016, p. 1).”;

(3)    L-Artikolu 9 jinbidel b'dan li ġej:

“1.    Mingħajr preġudizzju għal xi garanziji ogħla li l-Istati Membri jistgħu jistabbilixxu, kull Stat Membru għandu jesiġi li l-assigurazzjoni msemmija fl-Artikolu 3 tkun obbligatorja mill-inqas fir-rigward tal-ammonti minimi li ġejjin:

(a)    għal danni personali: EUR 6 070 000 għal kull inċident, irrispettivament min-numru ta’ vittmi, jew EUR 1 220 000 għal kull vittma;

(b)    għal ħsara fuq il-proprjetà, EUR 1 220 000 għall kull pretensjoni, irrispettivament min-numru ta’ vittmi.

Għall-Istati Membri li ma adottawx il-euro, l-ammonti minimi għandhom jiġu maqluba fil-munita nazzjonali billi tiġi applikata r-rata ta’ skambju fi [Publications Office – set the date the date of entry in force of this Directive] ippubblikata f’Il-Ġurnal Uffiċjali tal-Unjoni Ewropea.

2.    Kull ħames snin minn [id-data tad-dħul fis-seħħ ta’ din id-Direttiva], il-Kummissjoni għandha tirrevedi l-ammonti msemmija fil-paragrafu 1 skont l-indiċi armonizzat tal-prezzijiet għall-konsumatur (HICP) stabbilit skont ir-Regolament (UE) 2016/792 tal-Parlament Ewropew u tal-Kunsill **.

Il-Kummissjoni se tingħata s-setgħa li tadotta atti delegati skont l-Artikolu 28b fir-rigward tal-adattament ta’ dawn l-ammonti fl-HICP fi żmien sitt xhur wara t-tmiem ta’ kull perijodu ta’ ħames snin.

**    Ir-Regolament (UE) 2016/792 tal-Parlament Ewropew u tal-Kunsill tal-11 ta' Mejju 2016 dwar l-indiċijiet armonizzati tal-prezzijiet għall-konsumatur u l-indiċi armonizzat tal-prezzijiet tad-djar, u li jħassar ir-Regolament tal-Kunsill (KE) Nru 2494/95 (ĠU L 135, 24.5.2016, p. 11).

(4)    għandu jiddaħħal l-Artikolu 10a li ġej:

“Artikolu 10a

Il-protezzjoni ta’ partijiet li ġarrbu danni f’każ ta’ insolvenza ta’ impriża tal-assigurazzjoni jew nuqqas ta’ kooperazzjoni ta’ impriża tal-assigurazzjoni

1.    L-Istati Membri għandhom jistabbilixxu jew jawtorizzaw korp sabiex jikkumpensaw lill-partijiet li ġarrbu l-ħsara, abitwalment residenti fit-territorju tagħhom, mill-inqas fil-limiti tal-obbligu tal-assigurazzjoni msemmi fl-Artikolu 9(1) għad-danni personali jew ħsara fuq il-proprjetà, ikkawżati minn vettura assigurata minn impriża tal-assigurazzjoni f’xi waħda mis-sitwazzjonijiet li ġejjin:

(a)    l-impriża tal-assigurazzjoni hija soġġetta għal proċeduri ta’ falliment;;

(b)    l-impriża tal-assigurazzjoni hija soġġetta għal proċedura ta’ stralċ kif definit fl-Artikolu 268(d) tad-Direttiva 2009/138/KE tal-Parlament Ewropew u tal-Kunsill***;

(c)    l-impriża tal-assigurazzjoni jew ir-rappreżentant għall-pretensjonijiet tagħha ma pprovdietx tweġiba raġunata għal punti magħmula fit-talba għal kumpens fi żmien tliet xhur wara d-data li fiha l-parti li ġarrbet dannu ppreżentat il-pretensjoni tagħha ma’ dik l-impriża tal-assigurazzjoni.

2.    Il-partijiet li ġarrbu dannu ma jistgħux jippreżentaw pretensjoni lill-korp imsemmi fil-paragrafu 1 jekk huma jkunu ppreżentaw pretensjoni direttament jew ħadu azzjoni legali direttament kontra l-impriża tal-assigurazzjoni u tali pretensjoni jew azzjoni għadhom pendenti.

3.    Il-korp imsemmi fil-paragrafu 1 għandu jippreżenta tweġiba għall-pretensjoni fi żmien xahrejn wara d-data ta’ meta l-parti li ġarrbet dannu ppreżentat il-pretensjoni tagħha għal kumpens.

4.    Meta l-parti li tkun ġarrbet dannu tkun residenti fi Stat Membru ieħor li mhuwiex l-Istat Membru fejn hija stabbilita l-impriża tal-assigurazzjoni msemmija fil-paragrafu 1, il-korp imsemmi fil-paragrafu 1, li jkun ta kumpens lil dik il-parti li ġarrbet dannu fl-Istat Membru ta’ residenza tagħha, għandu jkollu d-dritt li jitlob ir-rimborż tas-somma mħallsa bħala kumpens mill-korp imsemmi fil-paragrafu 1 fl-Istat Membru li fih l-impriża tal-assigurazzjoni li tkun ħarġet il-polza tal-parti responsabbli hija stabbilita.

5.    Il-paragrafi minn 1 sa 4 huma mingħajr preġudizzju għal:

(a)    id-dritt tal-Istati Membri li jqisu kumpens imħallas mill-korp imsemmi fil-paragrafu 1 bħala sussidjarju jew mhux-sussidjarju;

(b)    id-dritt tal-Istati Membri li jipprevedu l-ħlas ta’ pretensjonijiet fir-rigward tal-istess inċidenti bejn:

(i)    il-korp imsemmi fil-paragrafu 1;

(ii)    il-persuna jew persuni responsabbli għall-inċident;

(iii)    impriżi tal-assigurazzjoni oħra jew korpi tas-sigurtà soċjali li jridu jikkumpensaw il-parti li ġarrbet id-dannu.

6.    L-Istati Membri ma jistgħux jippermettu li l-korp imsemmi fil-paragrafu 1 jissoġġetta l-ħlas ta’ kumpens għal xi kundizzjonijiet għajr dawk stabbiliti f’din id-Direttiva u b’mod partikolari mhux għar-rekwiżit li l-parti li tkun ġarrbet ħsara trid tiddetermina li l-parti responsabbli ma tkunx tista’ jew tirrifjuta li tħallas.

***    Id-Direttiva 2009/138/KE tal-Parlament Ewropew u tal-Kunsill tal-25 ta’ Novembru 2009 dwar il-bidu u l-eżerċizzju tan-negozju tal-assigurazzjoni u tar-riassigurazzjoni (Solvibbiltà II) (ĠU L 335, 17.12.2009, p. 1).”;

(5)    L-Artikolu 16 huwa emendat kif ġej:

(a)    is-sentenza li ġejja żdiedet fit-tmiem tat-tieni subparagrafu:

“Għandhom jagħmlu dan billi jużaw il-formola tal-evidenza ta’ pretensjonijiet preċedenti”;

(b)    jiżdiedu s-subparagrafi li ġejjin:

“L-Istati Membri għandhom jiżguraw li l-impriżi tal-assigurazzjoni jew il-korpi kif imsemmija fit-tieni subparagrafu, meta jkunu qiegħdin jikkunsidraw id-dikjarazzjonijiet tal-evidenza ta’ pretensjonijiet preċedenti maħruġa minn impriżi tal-assigurazzjoni oħra jew korpi oħra kif imsemmi fit-tieni subparagrafu, ma jittrattawx lid-detenturi tal-poloz tal-assigurazzjoni b’mod diskriminatorju jew iżommu ż-żejjed fuq il-primjums tagħhom minħabba n-nazzjonalità tagħhom jew fuq il-bażi tal-Istat Membru ta’ residenza preċedenti tagħhom.

L-Istati Membri għandhom jiżguraw li l-impriżi tal-assigurazzjoni jippubblikaw il-politiki tagħhom meta jużaw id-dikjarazzjonijiet tal-evidenza ta’ pretensjonijiet preċedenti fil-kalkolu tal-primjums.

Il-Kummissjoni għandha tingħata s-setgħa li tadotta atti ta’ implimentazzjoni f’konformità mal-Artikolu 28s(2) li jispeċifikaw il-kontenut u l-forma tad-dikjarazzjoni ta’ pretensjonijiet preċedenti msemmija fit-tieni subparagrafu. Din id-dikjarazzjoni għandu jkun fiha informazzjoni dwar dan kollu li ġej:

(a)    l-identità tal-impriża tal-assigurazzjoni li ħarġet id-dikjarazzjoni ta’ pretensjonijiet preċedenti;

(b)    l-identità tad-detentur ta’ polza;

(c)    il-vettura assigurata;

(d)    il-perjodu tal-kopertura tal-vettura assigurata:

(e)    in-numru u l-valur tal-pretensjonijiet iddikjarati tar-responsabbiltà ċivili matul il-perjodu kopert mid-dikjarazzjoni tal-pretensjonijiet preċedenti.”

(6)    jiddaħħlu l-Artikoli 28a, 28b u 28c li ġejjin:

"Artikolu 28a

Il-proċedura ta’ kumitat

1. Il-Kummissjoni għandha tkun assistita mill-Kumitat Ewropew għall-Assigurazzjoni u l-Pensjonijiet stabbilit bid-Deċiżjoni tal-Kummissjoni 2004/9/KE ****. Dak il-kumitat għandu jkun kumitat fis-sens tar-Regolament (UE) Nru 182/2011 tal-Parlament Ewropew u tal-Kunsill****.

2. Jekk issir referenza għal dan il-paragrafu, għandu japplika l-Artikolu 4 tar-Regolament (UE) Nru 182/2011.

Artikolu 28b

Eżerċizzju ta’ setgħat delegati

1. Is-setgħa ta' adozzjoni ta' atti delegati hija mogħtija lill-Kummissjoni suġġett għall-kondizzjonijiet stipulati f'dan l-Artikolu.

2. Is-setgħa li tadotta atti delegati msemmija fl-Artikoli 9(2) u 10a(7) għandha tiġi konferita lill-Kummissjoni għal perjodu ta’ żmien indeterminat mid-data msemmija fl-Artikolu 30.

3. Id-delegazzjoni tas-setgħa msemmija fl-Artikoli 9(2) u 10a(7) tista’ tiġi rrevokata f'kull ħin mill-Parlament Ewropew jew mill-Kunsill. Deċiżjoni ta' revoka għandha ttemm id-delega tas-setgħa speċifikata f'dik id-deċiżjoni. Għandha ssir effettiva l-għada tal-pubblikazzjoni ta’ dik id-deċiżjoni f'Il-Ġurnal Uffiċjali tal-Unjoni Ewropea jew f’data aktar ’il quddiem speċifikata fiha. Din ma għandhiex taffettwa l-validità ta' kwalunkwe att delegat diġà fis-seħħ.

4. Hekk kif tadotta att delegat, il-Kummissjoni għandha tinnotifikah simultanjament lill-Parlament Ewropew u lill-Kunsill.

5. Att delegat adottat skont l-Artikoli 9(2) u 10a(7) għandu jidħol fis-seħħ biss jekk ma tkun ġiet espressa l-ebda oġġezzjoni la mill-Parlament Ewropew u lanqas mill-Kunsill fi żmien xahrejn min-notifika ta’ dan l-att lill-Parlament Ewropew u lill-Kunsill jew jekk, qabel jiskadi dak il-perjodu, il-Parlament Ewropew u l-Kunsill ikunu t-tnejn informaw lill-Kummissjoni li mhumiex se joġġezzjonaw. Dan il-perjodu għandu jiġi estiż b’xahrejn fuq l-inizjattiva tal-Parlament Ewropew jew tal-Kunsill.

Artikolu 28c

Evalwazzjoni

Mhux aktar tard minn seba’ snin wara d-data ta’ traspożizzjoni ta’ din id-Direttiva, għandha ssir evalwazzjoni tagħha.  Il-Kummissjoni għandha tikkomunika l-konklużjonijiet ta’ din l-evalwazzjoni, flimkien mal-kummenti tagħha, lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni.

______________________________________________________________________________

****    Id-Deċiżjoni tal-Kummissjoni 2004/9/KE tal-5 ta' Novembru 2003 li tistabbilixxi Kumitat tal-Assigurazzjonijiet u tal-Pensjonijiet tax-Xogħol Ewropej (ĠU L 3, 7.1.2004, p. 34).

*****    Ir-Regolament (UE) Nru 182/2011 tal-Parlament Ewropew u tal-Kunsill tas-16 ta’ Frar 2011 li jistabbilixxi r-regoli u l-prinċipji ġenerali dwar il-modalitajiet ta’ kontroll mill-Istati Membri tal-eżerċizzju mill-Kummissjoni tas-setgħat ta’ implimentazzjoni (ĠU L 55, 28.2.2011, p. 13.).”.

Artikolu 2

Traspożizzjoni

L-Istati Membri għandhom jadottaw u jippubblikaw sa [PO: Please insert date 12 months after the date of entry into force ], il-liġijiet, ir-regolamenti u d-dispożizzjonijiet amministrattivi meħtieġa biex jikkonformaw ma' din id-Direttiva. Għandhom minnufih jikkomunikaw lill-Kummissjoni t-testi ta' dawk id-dispożizzjonijiet.

Għandhom japplikaw dawn id-dispożizzjonijiet minn [PO: Please insert date 12 months after the date of entry into force ].

Meta l-Istati Membri jadottaw dawk id-dispożizzjonijiet, dawn għandhom jirreferu għal din id-Direttiva jew ikunu akkumpanjati mit-tali referenza waqt il-pubblikazzjoni uffiċjali tagħhom. L-Istati Membri għandhom jiddeċiedu kif għandha ssir it-tali referenza.

2.L-Istati Membri għandhom jikkomunikaw lill-Kummissjoni t-test tad-dispożizzjonijiet ewlenin tal-liġi nazzjonali li jadottaw fil-qasam kopert minn din id-Direttiva.

Artikolu 3

Dħul fis-seħħ

Din id-Direttiva għandha tidħol fis-seħħ fl-għoxrin jum wara l-pubblikazzjoni tagħha f’Il-Ġurnal Uffiċjali tal-Unjoni Ewropea.

Artikolu 4

Destinatarji

Din id-Direttiva hi indirizzata lill-Istati Membri.

Magħmul fi Brussell,

(1)    Id-Direttiva tal-Kunsill 72/166/KE tal-24 ta’ April 1972 dwar l-approssimazzjoni tal-liġijiet tal-Istati Membri li għandhom x’jaqsmu ma’ assigurazzjoni kontra responsabbiltà ċivili fir-rigward tal-użu ta’ vetturi bil-mutur u l-infurzar tal-obbligu ta’ assigurazzjoni kontra din ir-responsabbiltà.

(2)    Ara l-Valutazzjoni tal-Impatt Inizjali tal-24 ta’ Lulju 2017, tinsab hawnhekk . It-tlestija tal-evalwazzjoni ġiet posposta għall-2017 sabiex tistenna sentenza “Andrade” tal-QtĠ, li ngħatat fit-28 ta’ Novembru 2017 u s-sentenza “Torreiro” tal-QtĠ, li ngħatat fl-20 ta’ Diċembru 2017.

(3)    COM(2017) 139 final tat-23 ta’ Marzu 2017, http://eur-lex.europa.eu/legal-content/MT/TXT/?uri=CELEX%3A52017DC0139 .

(4)     Ara n-nota ta’ qiegħ il-paġna 3.

(5)    EREG, Topic Group XI on tackling uninsured driving, 8 ta’ April 2013, https://www.ereg-association.eu/media/1120/final-report-ereg-topic-group-xi-tackling-uninsured-driving.pdf

(6)    Ir-Regolament (UE) 2016/679 tal-Parlament Ewropew u tal-Kunsill tas-27 ta' April 2016 dwar il-protezzjoni tal-persuni fiżiċi fir-rigward tal-ipproċessar ta' data personali u dwar il-moviment liberu ta' tali data, u li jħassar id-Direttiva 95/46/KE (ĠU L 119, 4.5.2016, p. 1).

(7)    Is-sentenza Vnuk (C-162/13), is-sentenza Rodrigues de Andrade (C-514/16), is-sentenza Torreiro (C-334/16)

(8)    Ara n-nota f’qiegħ il-paġna 6.

(9)     https://ec.europa.eu/info/sites/info/files/2017-motor-insurance-consultation-document_en.pdf

(10)     http://ec.europa.eu/finance/consultations/2015/financial-regulatory-framework-review/index_en.htm

(11)     http://ec.europa.eu/finance/events/2016/0517-call-for-evidence/index_en.htm

(12)    BIEX TIŻDIED qabel il-pubblikazzjoni tad-dokument.

(13)    BIEX TIŻDIED qabel il-pubblikazzjoni tad-dokument.

(14)    ĠU C , , p. .

(15)    Id-Direttiva 2009/103/KE tal-Parlament Ewropew u tal-Kunsill tas-16 ta’ Settembru 2009 dwar l-assigurazzjoni kontra responsabbiltà ċivili fir-rigward tal-użu ta’ vetturi bil-mutur u l-infurzar tal-obbligu ta’ assigurazzjoni kontra din ir-responsabbiltà (ĠU L 263, 7.10.2009, p. 11).

(16)    Is-sentenza tal-Qorti tal-Ġustizzja tal-4 ta' Diċembru 2014, Vnuk, C-162/13,ECLI:EU:C:2014:2146

(17)    Is-sentenza tal-Qorti tal-Ġustizzja tat-28 ta' Novembru 2017, Rodrigues de Andrade, C-514/16,ECLI:EU:C:2017:908.

(18)    Is-sentenza tal-Qorti tal-Ġustizzja tal-20 ta' Diċembru 2017, Torreiro, C-334/16,ECLI:EU:C:2017:1007.

(19)    Ir-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’tali data, u li jħassar id-Direttiva 95/46/KE (ĠU L 119, 4.5.2016, p. 1).

(20)    Ir-Regolament (UE) Nru 182/2011 tal-Parlament Ewropew u tal-Kunsill tas-16 ta’ Frar 2011 li jistabbilixxi r-regoli u l-prinċipji ġenerali dwar il-modalitajiet ta’ kontroll mill-Istati Membri tal-eżerċizzju mill-Kummissjoni tas-setgħat ta’ implimentazzjoni (ĠU L 55, 28.2.2011, p. 13).

(21)    ĠU C 369, 17.12.2011, p. 14.