IL-KUMMISSJONI EWROPEA

Brussell, 24.4.2018

COM(2018) 229 final

2018/0109(COD)

Proposta għal

REGOLAMENT TAL-PARLAMENT EWROPEW U TAL-KUNSILL

dwar pjan pluriennali għall-irkupru tal-pixxispad tal-Mediterran u li jemenda r-Regolament tal-Kunsill (KE) Nru 1967/2006 u r-Regolament (UE) 2017/2107

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u għanijiet tal-proposta

•Konsistenza mad-dispożizzjonijiet eżistenti f’dan il-qasam ta’ politika

•Konsistenza ma’ politiki oħra tal-Unjoni

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

•Proporzjonalità

•Għażla tal-istrument

3.RIŻULTATI TAL-EVALWAZZJONIJIET EX-POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATTI

•Evalwazzjonijiet ex-post/kontrolli tal-idoneità tal-leġiżlazzjoni eżistenti

•Konsultazzjonijiet mal-partijiet ikkonċernati

•Ġbir u użu tal-kompetenzi

•Valutazzjoni tal-impatti

•Idoneità regolatorja u simplifikazzjoni

•Drittijiet fundamentali

4.IMPLIKAZZJONIJIET BAĠITARJI

•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar

•Dokumenti ta’ spjegazzjoni (għad-direttivi)

•Spjegazzjoni fid-dettall tad-dispożizzjonijiet speċifiċi tal-proposta

(a) Deroga mill-obbligu ta’ ħatt l-art

(b) Traspożizzjoni tal-opportunitajiet tas-sajd għall-2017 u għall-2018

Ir-Regolament tal-Kunsill (UE) 2018/120 15 jistabbilixxi l-opportunitajiet tas-sajd għall-2018 għal ċerti stokkijiet tal-ħut u ċerti gruppi ta’ stokkijiet tal-ħut, applikabbli fl-ilmijiet tal-Unjoni u, għall-bastimenti tas-sajd tal-Unjoni, f’ċerti ilmijiet mhux tal-Unjoni, u jemenda r-Regolament tal-Kunsill (UE) 2017/127. B’segwitu għall-paragrafu 4 tar-Rakkomandazzjoni 16-05 tal-ICCAT, it-TAC tnaqqset bi 3 % meta mqabbla ma’ dik adottata fl-2017.

(c) Setgħat delegati

L-Artikolu 34 ta’ dan ir-Regolament jistabbilixxi lista eżawrjenti ta’ każijiet li għalihom qed jintalbu setgħat delegati sabiex jiġu ttrattati l-bidliet spissi fir-rakkomandazzjonijiet li l-ICCAT tadotta. Il-fatturi ewlenin li jistgħu jispjegaw il-lista ta’ sitwazzjonijiet li għalihom qed jintalbu s-setgħat delegati jistgħu jinġabru fil-qosor kif ġej:

(a) il-fatt li pjan jiġi stabbilit għal 15-il sena ma jfissirx li l-Partijiet Kontraenti ma jippruvawx jerġgħu jżidu l-livell tal-bijomassa u jġibu l-livell tal-istokk malajr kemm jista’ jkun fil-limiti bijoloġiċi sikuri sabiex jintlaħqu malajr kemm jista’ jkun l-għanijiet tal-pjan mil-lat bijoloġiku. F’dan il-kuntest, l-esperjenza wriet li, wara ftit tas-snin, il-miżuri adottati u, b’mod partikulari, il-miżuri tekniċi u ta’ kontroll, ikollhom bżonn jissaħħu, l-iktar meta x-xejriet juru li jkun għad hemm ħafna x’isir biex jintlaħqu l-għanijiet tal-irkupru u li l-livell tal-istokk ma jkunx qed jiżdied bir-rata mistennija. Għalhekk, jista’ jkun hemm bżonn li jiġu implimentati bidliet speċifiċi u regolari fit-terminu qasir taż-żmien u li dawn jiġu adottati bi proċedura aċċellerata;

(b) l-esperjenzi li nkisbu mill-ICCAT u minn organizzazzjonijiet oħrajn b’rabta mal-pjanijiet ta’ rkupru s’issa juru li ta’ spiss ikun hemm bidliet fit-test u li jkun pjuttost urġenti li r-regoli jiddaħħlu fis-seħħ għalkollox. Pereżempju, it-test tal-pjan għall-irkupru tat-tonn fil-Lvant tal-Atlantiku u fil-Mediterran inbidel sitt darbiet minn meta l-ICCAT irrakkomandatu fl-2006 (fl-2006, fl-2008, fl-2010, fl-2012, fl-2014 u fl-2017).

2018/0109 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

dwar pjan pluriennali għall-irkupru tal-pixxispad tal-Mediterran u li jemenda r-Regolament tal-Kunsill (KE) Nru 1967/2006 u r-Regolament (UE) 2017/2107

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikulari l-Artikolu 43(2) tiegħu,

Wara li kkunsidraw il-proposta tal-Kummissjoni Ewropea,

Wara li l-abbozz tal-att leġiżlattiv intbagħat lill-parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew,

Filwaqt li jaġixxu skont il-proċedura leġiżlattiva ordinarja,

Billi:

(1)Kif stabbilit fir-Regolament (UE) Nru 1380/2013 tal-Parlament Ewropew u tal-Kunsill 16 , l-għan tal-politika komuni tas-sajd (“il-PKS”) huwa li tiżgura li r-riżorsi bijoloġiċi ħajjin tal-baħar jiġu sfruttati b’mod li jipprovdi kundizzjonijiet ambjentali, ekonomiċi u soċjali sostenibbli.

(2)L-Unjoni hija Parti tal-Kummissjoni Internazzjonali għall-Konservazzjoni tat-Tonn tal-Atlantiku (“l-ICCAT”).

(3)Waqt il-laqgħa annwali tal-ICCAT tal-2016 li saret f’Vilamoura (fil-Portugall), il-Partijiet Kontraenti tal-Konvenzjoni ICCAT u l-partijiet, l-entitajiet jew l-entitajiet tas-sajd mhux kontraenti tagħha li jikkooperaw magħha (“il-PKK”) għarfu l-bżonn li tiġi indirizzata s-sitwazzjoni allarmanti tal-pixxispad tal-Mediterran (Xiphias gladius). Għal dak il-għan, l-ICCAT adottat pjan ta’ rkupru li beda fl-2017 u li se jibqa’ għaddej sal-2031, minħabba li l-bijoloġija, l-istruttura u d-dinamika attwali tal-popolazzjoni tal-istokk tal-pixxispad fil-Mediterran ma jippermettux li jintlaħqu livelli tal-bijomassa li jistgħu jipproduċu r-rendiment massimu sostenibbli (l-MSY) fit-terminu qasir taż-żmien, anke jekk jiġu adottati miżuri drastiċi u urġenti ta’ ġestjoni (jiġifieri l-għeluq totali tas-sajd). Ir-Rakkomandazzjoni tal-ICCAT dwar il-pjan ta’ rkupru ġiet adottata fl-20 Laqgħa Speċjali tagħha, wara li ġie analizzat il-parir xjentifiku tal-Kumitat permanenti dwar ir-riċerka u l-istatistika (l-SCRS). Dik ir-Rakkomandazzjoni (bin-numru 16-05) 17 daħlet fis-seħħ fit-12 ta’ Ġunju 2017 u torbot lill-Unjoni.

(4)F’Diċembru tal-2016, l-Unjoni infurmat lis-Segretarjat tal-ICCAT, permezz ta’ ittra, li ċerti miżuri mogħtija fir-Rakkomandazzjoni 16-05 kellhom jidħlu fis-seħħ f’Jannar tal-2017, b’mod partikulari b’rabta mal-perjodu tal-għeluq mill-1 ta’ Jannar sal-31 ta’ Marzu u mal-allokazzjoni tal-kwoti għas-sajd tal-pixxispad tal-Mediterran. Jenħtieġ li l-miżuri l-oħrajn kollha tar-Rakkomandazzjoni 16-05 jiġu inklużi fil-pjan ta’ rkupru tal-Unjoni.

(5)Skont l-Artikolu 29(2) tar-Regolament (UE) Nru 1380/2013, il-pożizzjoni tal-Unjoni fl-organizzazzjonijiet reġjonali tal-ġestjoni tas-sajd għandha tkun ibbażata fuq l-aħjar parir xjentifiku disponibbli sabiex ikun żgurat li r-riżorsi tas-sajd ikunu ġestiti b’mod konformi mal-għanijiet tal-PKS, b’mod partikulari mal-għan li jerġgħu jiżdiedu bil-mod il-mod il-popolazzjonijiet tal-istokkijiet tal-ħut u li dawn jinżammu f’livelli tal-bijomassa li jkunu ’l fuq minn dawk li jistgħu jipproduċu r-rendiment massimu sostenibbli, anke jekk l-iskadenza stabbilita hija sal-2031, u mal-għan li, fl-istess ħin, jinħolqu l-kundizzjonijiet biex ikun hemm industrija tas-sajd li fiha l-qbid u l-ipproċessar tal-ħut ikunu ekonomikament vijabbli u kompetittivi u attività tas-sajd relatata li ssir fuq l-art li wkoll tkun ekonomikament vijabbli u kompetittiva, u b’hekk, b’konformità mal-Artikolu 28(1) u (2) u mal-Artikoli 29 u 33 tar-Regolament (UE) Nru 1380/2013, jiġu promossi kundizzjonijiet ekwi għall-operaturi tal-Unjoni.

(6)Il-pjan ta’ rkupru jqis l-ispeċifiċitajiet tat-tipi ta’ rkaptu u ta’ tekniki tas-sajd differenti. Huma u jimplimentaw il-pjan ta’ rkupru, jenħtieġ li l-Unjoni u l-Istati Membri jagħmlu ħilithom biex jippromwovu l-attivitajiet tas-sajd ta’ mal-kosta u l-użu ta’ rkaptu u ta’ tekniki tas-sajd li jkunu selettivi u li jkollhom impatt ambjentali mnaqqas, fosthom ta’ rkaptu u ta’ tekniki li jintużaw fis-sajd tradizzjonali u artiġjanali, biex b’hekk jikkontribwixxu għal livell ġust ta’ għajxien għall-ekonomiji lokali.

(7)Ir-Regolament (UE) Nru 1380/2013 jistabbilixxi l-kunċett ta’ daqsijiet minimi ta’ referenza għall-konservazzjoni. Sabiex tiġi żgurata l-konsistenza, jenħtieġ li l-kunċett tal-ICCAT ta’ daqsijiet minimi jiġi traspost fil-liġi tal-Unjoni bħala daqsijiet minimi ta’ referenza għall-konservazzjoni.

(8)Il-pixxispad tal-Mediterran li jkun inqabad u li jkun iżgħar mid-daqs minimu ta’ referenza għall-konservazzjoni se jkollu jiġi skartat, skont il-punt 17 tar-Rakkomandazzjoni 16-05 tal-ICCAT, sakemm dan ma jkunx jidħol fil-limiti tal-qabdiet aċċessorji stabbiliti mill-Istati Membri fil-pjanijiet annwali tas-sajd tagħhom. Għall-finijiet tal-konformità tal-Unjoni mal-obbligi internazzjonali tagħha fil-kuntest tal-ICCAT, ir-Regolament Delegat tal-Kummissjoni (UE) 2018/191 jipprevedi derogi mill-obbligu ta’ ħatt l-art għall-pixxispad tal-Mediterran, bi qbil mal-Artikolu 15(2) tar-Regolament (UE) Nru 1380/2013. Ir-Regolament Delegat tal-Kummissjoni (UE) 2018/191 jimplimenta ċerti dispożizzjonijiet tar-Rakkomandazzjoni 16-05 tal-ICCAT u jistabbilixxi l-obbligu li l-bastimenti jiskartaw il-pixxispad li jkollhom abbord li jkun jaqbeż il-kwota allokata għalihom u/jew il-livell massimu ta’ qabdiet aċċessorji permessi tagħhom. Il-kamp ta’ applikazzjoni ta’ dak ir-Regolament Delegat jinkludi l-bastimenti li jintużaw għas-sajd rikreattiv.

(9)Minħabba li l-pjan tal-irkupru se jimplimenta r-Rakkomandazzjoni 16-05 tal-ICCAT, jenħtieġ li d-dispożizzjonijiet dwar il-pixxispad tal-Mediterran mogħtija fir-Regolament (UE) 2017/2107 jitħassru.

(10)Fl-imgħoddi, l-attivitajiet tas-sajd bl-għeżula tat-tisqif żdiedu ferm f’termini tal-isforz tas-sajd u tan-nuqqas ta’ biżżejjed selettività. Iż-żieda bla kontroll f’dawn l-attivitajiet ħolqot riskju serju għall-ispeċijiet fil-mira u r-Regolament tal-Kunsill (KE) Nru 1239/98 18 ipprojbixxa li dawn jintużaw biex jinqabad il-ħut li jpassi ħafna, fosthom il-pixxispad.

(11)Biex tkun żgurata l-konformità mal-PKS, ġiet adottata leġiżlazzjoni tal-Unjoni sabiex tiġi stabbilita sistema ta’ kontroll, ta’ spezzjoni u ta’ infurzar li tinkludi l-ġlieda kontra s-sajd illegali, mhux irrappurtat u mhux irregolat (is-sajd IUU). B’mod partikulari, ir-Regolament tal-Kunsill (KE) Nru 1224/2009 19 jistabbilixxi sistema tal-Unjoni għall-kontroll, l-ispezzjoni u l-infurzar permezz ta’ approċċ globali u integrat sabiex tiġi żgurata l-konformità mar-regoli kollha tal-PKS. Ir-Regolament ta’ Implimentazzjoni tal-Kummissjoni (UE) Nru 404/2011 20 jistabbilixxi r-regoli dettaljati għall-implimentazzjoni tar-Regolament tal-Kunsill (KE) Nru 1224/2009. Ir-Regolament tal-Kunsill (KE) Nru 1005/2008 21 jistabbilixxi sistema Komunitarja sabiex tipprevjeni, tiskoraġġixxi u telimina s-sajd IUU. Dawk ir-Regolamenti diġà fihom għadd ta’ miżuri stabbiliti fir-Rakkomandazzjoni 16-05 tal-ICCAT. Għalhekk ma hemmx bżonn li dawk id-dispożizzjonijiet jiddaħħlu f’dan ir-Regolament.

(12)Fl-arranġamenti tal-kiri, ta’ spiss ma jkunux ċari r-relazzjonijiet bejn is-sid, in-noleġġatur u l-Istat tal-bandiera, u ċerti sajjieda tas-sajd IUU jevadu l-kontrolli billi jabbużaw mill-arranġamenti tal-kiri tal-bastimenti tas-sajd. Ir-Regolament (UE) 2016/1627 22 , li jistabbilixxi pjan pluriennali għall-irkupru tat-tonn fil-Lvant tal-Atlantiku u fil-Mediterran, jipprojbixxi l-kiri. Għalhekk, bħala miżura ta’ prevenzjoni sabiex jitħares stokk li qed jirkupra u sabiex ikun hemm il-konsistenza mal-liġijiet tal-Unjoni, huwa xieraq li tiġi adottata projbizzjoni simili fil-pjan pluriennali għall-irkupru tal-pixxispad tal-Mediterran.

(13)Jenħtieġ li l-leġiżlazzjoni tal-Unjoni timplimenta r-rakkomandazzjonijiet tal-ICCAT sabiex tpoġġi lis-sajjieda tal-Unjoni u lil dawk ta’ pajjiżi terzi fuq l-istess livell u sabiex tiżgura li r-regoli jkunu jistgħu jiġu aċċettati minn kulħadd.

(14)Sabiex l-emendi tar-rakkomandazzjonijiet tal-ICCAT li jista’ jkun hemm fil-ġejjieni jiġu implimentati malajr fil-liġi tal-Unjoni, jenħtieġ li l-Kummissjoni tingħata s-setgħa li tadotta atti skont l-Artikolu 290 tat-Trattat dwar il-Funzjonament tal-Unjoni Ewropea b’rabta mal-emendar tal-Annessi ta’ dan ir-Regolament, kif ukoll tad-dispożizzjonijiet imniżżlin fl-Artikolu 34(1) tiegħu. Huwa importanti ferm li l-Kummissjoni twettaq il-konsultazzjonijiet ix-xierqa matul il-ħidma ta’ tħejjija tagħha, inkluż fil-livell tal-esperti, u li dawk il-konsultazzjonijiet twettaqhom skont il-prinċipji stabbiliti fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet 23 . B’mod partikulari, biex tiġi żgurata parteċipazzjoni ndaqs fit-tħejjija tal-atti delegati, il-Parlament Ewropew u l-Kunsill iridu jirċievu d-dokumenti kollha fl-istess ħin li fih jirċevuhom l-esperti tal-Istati Membri, u l-esperti tagħhom irid ikollhom aċċess b’mod sistematiku għal-laqgħat tal-gruppi tal-esperti tal-Kummissjoni li jkunu qed jittrattaw it-tħejjija tal-atti delegati.

(15)Sabiex ikunu żgurati l-istess kundizzjonijiet għall-implimentazzjoni tad-dispożizzjonijiet ta’ dan ir-Regolament, jenħtieġ li l-Kummissjoni tingħata setgħat ta’ implimentazzjoni b’rabta mar-rapport annwali li l-Istati Membri jibagħtu dwar l-implimentazzjoni ta’ dan ir-Regolament. Jenħtieġ li dawk is-setgħat jiġu eżerċitati skont ir-Regolament (UE) Nru 182/2011 tal-Parlament Ewropew u tal-Kunsill 24 .

(16)L-atti delegati u l-atti ta’ implimentazzjoni previsti f’dan ir-Regolament huma mingħajr preġudizzju għall-implimentazzjoni tar-rakkomandazzjonijiet tal-ICCAT li jista’ jkun hemm fil-ġejjieni fil-liġi tal-Unjoni permezz tal-proċedura leġiżlattiva ordinarja.

(17)L-Anness II tar-Regolament tal-Kunsill (KE) Nru 1967/2006 25 jippermetti lill-bastimenti li jkunu qed jistadu għall-pixxispad jieħdu abbord jew ikalaw għadd massimu ta’ 3 500 sunnara, filwaqt li r-Rakkomandazzjoni 16-05 tal-ICCAT tippermetti għadd massimu ta’ 2 500 sunnara. Sabiex dik ir-Rakkomandazzjoni tiġi implimentata sewwa fil-liġi tal-Unjoni, jeħtieġ li r-Regolament tal-Kunsill (KE) Nru 1967/2006 jiġi emendat kif xieraq.

(18)It-Taqsima 2 tal-Kapitolu III tar-Regolament (UE) 2017/2107 tal-Parlament Ewropew u tal-Kunsill 26 tistabbilixxi ċerti miżuri tekniċi u ta’ kontroll għall-pixxispad tal-Mediterran. Il-miżuri li ġew adottati permezz tar-Rakkomandazzjoni 16-05 tal-ICCAT, li dan ir-Regolament qed jittrasponi, huma iktar restrittivi jew iktar preċiżi mill-miżuri li huma diġà fis-seħħ, sabiex l-istokk ikun jista’ jirkupra. Għalhekk jenħtieġ li t-Taqsima 2 tal-Kapitolu III tar-Regolament (UE) 2017/2107 titħassar u tiġi sostitwita bil-miżuri stabbiliti f’dan ir-Regolament.

ADOTTAW DAN IR-REGOLAMENT:

TITOLU I
DISPOŻIZZJONIJIET ĠENERALI

Artikolu 1
Suġġett

Dan ir-Regolament jistabbilixxi r-regoli ġenerali għall-implimentazzjoni, min-naħa tal-Unjoni, tal-pjan pluriennali għall-irkupru tal-pixxispad tal-Mediterran (Xiphias gladius), irrakkomandat mill-Kummissjoni Internazzjonali għall-Konservazzjoni tat-Tonn tal-Atlantiku (l-ICCAT), li jibda fl-2017 u li jkompli għaddej sal-2031 (“il-pjan ta’ rkupru”).

Artikolu 2
Kamp ta’ applikazzjoni

Dan ir-Regolament japplika:

(a)    għall-bastimenti tas-sajd tal-Unjoni u għall-bastimenti tal-Unjoni li jintużaw għas-sajd rikreattiv:

(i)li jistadu għall-pixxispad fiż-żona tal-Konvenzjoni ICCAT fil-Mediterran;
jew

(ii)li jittrażbordaw, anke ’l barra miż-żona tal-Konvenzjoni ICCAT, il-pixxispad maqbud fil-Mediterran; 

(b)    għall-bastimenti tas-sajd ta’ pajjiżi terzi u għall-bastimenti ta’ pajjiżi terzi li jintużaw għas-sajd rikreattiv li jistadu għall-pixxispad fl-ilmijiet tal-Unjoni fil-Mediterran;

(c)    għall-bastimenti ta’ pajjiżi terzi li jiġu spezzjonati fil-portijiet tal-Istati Membri u li jkollhom abbord pixxispad maqbud fil-Mediterran jew prodotti tas-sajd li joriġinaw mill-pixxispad maqbud fil-Mediterran li ma jkunux inħattu l-art jew ġew ittrażbordati fil-portijiet qabel.

Artikolu 3
Għan

B’deroga mill-Artikolu 2(2) tar-Regolament (UE) Nru 1380/2013, l-għan ta’ dan ir-Regolament huwa li jinkiseb livell tal-bijomassa tal-pixxispad fil-Mediterran li jkun jikkorrispondi mar-rendiment massimu sostenibbli sal-2031 u li jkun hemm probabbiltà ta’ mill-inqas 60 % li jintlaħaq dan il-għan.

Artikolu 4
Rabta ma’ liġijiet oħrajn tal-Unjoni

Id-dispożizzjonijiet ta’ dan ir-Regolament japplikaw minbarra d-dispożizzjonijiet stabbiliti fir-Regolamenti li ġejjin jew, meta dawk ir-Regolamenti jkunu jipprevedu dan, b’deroga minnhom:

(1)ir-Regolament tal-Kunsill (KE) Nru 1224/2009 27 li jistabbilixxi sistema Komunitarja ta’ kontroll għall-iżgurar tal-konformità mar-regoli tal-Politika Komuni tas-Sajd;

(2)ir-Regolament (UE) 2017/2403 tal-Parlament Ewropew u tal-Kunsill 28 dwar il-ġestjoni sostenibbli tal-flotot esterni;

(3)ir-Regolament (UE) 2017/2107 tal-Parlament Ewropew u tal-Kunsill 29 li jistabbilixxi l-miżuri ta’ ġestjoni, ta’ konservazzjoni u ta’ kontroll applikabbli fiż-żona tal-Konvenzjoni tal-Kummissjoni Internazzjonali għall-Konservazzjoni tat-Tonn tal-Atlantiku (l-ICCAT).

Artikolu 5
Definizzjonijiet

Għall-finijiet ta’ dan ir-Regolament, japplikaw id-definizzjonijiet li ġejjin:

(1)“bastiment tas-sajd” tfisser kull bastiment mgħammar għall-isfruttament kummerċjali tar-riżorsi bijoloġiċi ħajjin tal-baħar;

(2)“bastiment tas-sajd tal-Unjoni” tfisser bastiment tas-sajd li jtajjar il-bandiera ta’ Stat Membru u li jkun irreġistrat fl-Unjoni;

(3)“iż-żona tal-Konvenzjoni ICCAT” tfisser l-ilmijiet kollha tal-Oċean Atlantiku u tal-ibħra ta’ madwaru;

(4)“il-Baħar Mediterran” tfisser l-ilmijiet marittimi tal-Mediterran li jinsabu fil-Lvant tal-linja 5°36’ tal-Punent;

(5)“PKK” tfisser il-Partijiet Kontraenti tal-Konvenzjoni ICCAT u l-partijiet, l-entitajiet jew l-entitajiet tas-sajd mhux kontraenti tagħha li jikkooperaw magħha;

(6)“awtorizzazzjoni tas-sajd” tfisser awtorizzazzjoni maħruġa għal bastiment tas-sajd tal-Unjoni li tagħtih id-dritt iwettaq attivitajiet speċifiċi tas-sajd tul perjodu speċifikat, f’żona partikulari jew għal sajd partikulari, b’kundizzjonijiet speċifiċi;

(7)“awtorizzazzjoni speċjali tas-sajd” tfisser awtorizzazzjoni maħruġa għal bastiment tas-sajd tal-Unjoni li tagħtih id-dritt iwettaq attivitajiet speċifiċi tas-sajd bl-użu ta’ rkaptu speċifiku tul perjodu speċifikat, f’żona partikulari u għal sajd partikulari, b’kundizzjonijiet speċifiċi;

(8)“opportunità tas-sajd” tfisser dritt legali kkwantifikat għas-sajd, mogħti f’termini tal-qabdiet u/jew tal-isforz tas-sajd;

(9)“stokk” tfisser riżorsa bijoloġika tal-baħar li tinsab f’żona ta’ ġestjoni partikulari;

(10)“prodotti tas-sajd” tfisser l-organiżmi akkwatiċi li jirriżultaw minn kull attività tas-sajd jew il-prodotti li ġejjin minnha;

(11)“qbid skartat” tfisser il-qabdiet li jintefgħu lura fil-baħar;

(12)“sajd rikreattiv” tfisser attivitajiet tas-sajd mhux kummerċjali li jisfruttaw ir-riżorsi bijoloġiċi ħajjin tal-baħar għar-rikreazzjoni, għat-turiżmu jew għall-isport;

(13)“dejta tas-sistema ta’ monitoraġġ tal-bastimenti” tfisser id-dejta dwar l-identifikazzjoni, il-pożizzjoni ġeografika, id-data, il-ħin, ir-rotta u l-veloċità tal-bastiment tas-sajd li l-apparat ta’ lokalizzazzjoni permezz tas-satellita installat abbord il-bastiment tas-sajd jittrażmetti liċ-Ċentru tal-Monitoraġġ tas-Sajd tal-Istat Membru tal-bandiera;

(14)“ħatt l-art” tfisser il-ħatt inizjali ta’ kull kwantità ta’ prodotti tas-sajd minn abbord bastiment tas-sajd għal fuq l-art;

(15)“trażbord” tfisser il-ħatt tal-prodotti kollha tas-sajd li jkunu abbord bastiment, jew ta’ parti minnhom, minn fuq dak il-bastiment għal fuq bastiment ieħor;

(16)“kiri” tfisser arranġament li permezz tiegħu bastiment tas-sajd li jtajjar il-bandiera ta’ Stat Membru jingħata b’kuntratt għal perjodu ddefinit lil operatur li jkun jinsab fi Stat Membru ieħor jew f’pajjiż terz, mingħajr ma l-bastiment tinbidillu l-bandiera tiegħu;

(17)“bastiment kbir tas-sajd bil-konz tal-wiċċ” tfisser bastiment tas-sajd bil-konz tal-wiċċ li b’kollox ikun itwal minn 24 metru;

(18)“konzijiet” tfisser irkaptu tas-sajd li jinkludi lett prinċipali b’ħafna snanar fuq lettijiet sekondarji iqsar imdendlin minnu (brazzoli) ta’ tul u spazjar varjabbli skont l-ispeċijiet fil-mira;

(19)“sunnara” tfisser fidiferru tal-azzar mgħawweġ li jkun ġej għall-ponta;

(20)“qasba u xlief” tfisser xlief imqabbad ma’ qasba li jintuża mis-sajjieda li jistadu bil-qasba u li jkun imdawwar fuq mekkaniżmu ta’ tidwir (ril) li jintuża biex jitkebbeb ix-xlief.

TITOLU II
MIŻURI TA’ ĠESTJONI, MIŻURI TEKNIĊI TA’ KONSERVAZZJONI U MIŻURI TA’ KONTROLL

KAPITOLU 1
Miżuri ta’ ġestjoni

Artikolu 6
Sforz tas-sajd

1.Kull Stat Membru għandu jieħu l-miżuri meħtieġa sabiex jiżgura li l-isforz tas-sajd tal-bastimenti tas-sajd li jtajru l-bandiera tiegħu jkun proporzjonat mal-opportunitajiet tas-sajd għall-pixxispad tal-Mediterran li huwa jkollu għad-dispożizzjoni tiegħu.

2.Għandu jkun ipprojbit it-trasferiment minn sena għall-oħra tal-kwoti li ma jintużawx.

Artikolu 7
Allokazzjoni tal-opportunitajiet tas-sajd

1.B’konformità mal-Artikolu 17 tar-Regolament (UE) Nru 1380/2013, huma u jallokaw l-opportunitajiet tas-sajd li jkollhom għad-dispożizzjoni tagħhom, l-Istati Membri għandhom jużaw kriterji trasparenti u oġġettivi, inklużi dawk ta’ natura ambjentali, soċjali u ekonomika, u għandhom ukoll jagħmlu ħilithom biex iqassmu l-kwoti nazzjonali b’mod ġust fost id-diversi segmenti tal-flotta, filwaqt li jqisu s-sajd tradizzjonali u artiġjanali, u biex jipprovdu inċentivi għall-bastimenti tas-sajd tal-Unjoni li jużaw irkaptu selettiv tas-sajd jew li jużaw tekniki tas-sajd b’impatt ambjentali mnaqqas.

2.Kull Stat Membru għandu jipprevedi l-qabdiet aċċessorji tal-pixxispad fil-kwota tiegħu tal-pixxispad u għandu javża lill-Kummissjoni b’dan meta jkun qed jibagħtilha l-pjan tas-sajd tiegħu skont l-Artikolu 9. It-tali dispożizzjoni għandha tiżgura li l-ħut mejjet kollu jitnaqqas mill-kwota.

Artikolu 8
Limiti fuq il-kapaċità

1.Għandu jkun hemm limitu fuq il-kapaċità tal-bastimenti tas-sajd skont it-tip ta’ rkaptu għall-perjodu kollu li matulu jdum għaddej il-pjan ta’ rkupru. L-Istati Membri għandhom jillimitaw skont it-tip ta’ rkaptu, l-għadd ta’ bastimenti tas-sajd li jtajru l-bandiera tagħhom li jkunu awtorizzati jistadu għall-pixxispad tal-Mediterran abbażi ta’ waħda mill-miżuri li ġejjin, skont liema minnhom twassal għall-inqas għadd:

(a)l-għadd medju annwali ta’ bastimenti tagħhom li jkunu stadu għall-pixxispad tal-Mediterran, żammewh abbord, ittrażbordawh, ittrasportawh jew ħattewh l-art fil-perjodu mill-2013 sal-2016;
jew

(b)l-għadd ta’ bastimenti tas-sajd tagħhom li jkunu stadu għall-pixxispad tal-Mediterran, żammewh abbord, ittrażbordawh, ittrasportawh jew ħattewh l-art fl-2016.

2.L-Istati Membri jistgħu japplikaw tolleranza ta’ 5 % għal-limitu fuq il-kapaċità msemmi fil-paragrafu 1 għall-2018 u l-2019.

3.L-Istati Membri għandhom jgħarrfu lill-Kummissjoni bil-miżuri li jkunu ħadu biex jillimitaw l-għadd ta’ bastimenti tas-sajd li jtajru l-bandiera tagħhom li jkunu awtorizzati jistadu għall-pixxispad tal-Mediterran sal-15 ta’ Frar ta’ kull sena.

Artikolu 9
Pjanijiet annwali tas-sajd

1.L-Istati Membri għandhom jibagħtu l-pjanijiet tas-sajd tagħhom lill-Kummissjoni sal-1 ta’ Marzu ta’ kull sena. It-tali pjanijiet għandhom ikunu skont il-Linji Gwida tal-ICCAT għat-tressiq tad-dejta u tal-informazzjoni, u għandu jkun fihom informazzjoni ddettaljata dwar il-kwota tal-pixxispad tal-Mediterran allokata skont it-tip ta’ rkaptu, fosthom dik allokata għas-sajd rikreattiv, meta dan ikun rilevanti, u dik allokata għall-qabdiet aċċessorji.

2.Il-Kummissjoni għandha tiġbor flimkien il-pjanijiet imsemmijin fil-paragrafu 1 u tintegrahom fil-pjan tas-sajd tal-Unjoni. Il-Kummissjoni għandha tibgħat il-pjan tas-sajd tal-Unjoni lis-Segretarjat tal-ICCAT sal-15 ta’ Marzu ta’ kull sena.

KAPITOLU 2
Miżuri tekniċi ta’ konservazzjoni

Taqsima 1
Staġuni tas-sajd

Artikolu 10
Staġuni magħluqin għas-sajd

1.    Il-pixxispad tal-Mediterran ma għandux jinqabad, la bħala speċi fil-mira u lanqas bħala qabda aċċessorja, u ma għandux jinżamm abbord, jiġi ttrażbordat jew jinħatt l-art bejn l-1 ta’ Jannar u l-31 ta’ Marzu ta’ kull sena.

2.Sabiex jitħares il-pixxispad tal-Mediterran, għandu jkun hemm perjodu ta’ għeluq tas-sajd mill-1 ta’ Ottubru sat-30 ta’ Novembru ta’ kull sena għall-bastimenti tas-sajd bil-konz li jkunu qed jistadu għall-alongi (Thunnus alalunga) fil-Mediterran.

3.L-Istati Membri għandhom jimmonitorjaw l-effettività tal-perjodi tal-għeluq imsemmijin fil-paragrafi 1 u 2, u kull sena, tal-inqas xahrejn u ħmistax-il ġurnata qabel il-laqgħa annwali tal-ICCAT, għandhom jibagħtu l-informazzjoni kollha rilevanti lill-Kummissjoni dwar il-kontrolli u l-ispezzjonijiet ix-xierqa li huma jkunu wettqu fis-sena ta’ qabel sabiex jiżguraw li jitħarsu dawk il-paragrafi. Il-Kummissjoni għandha tibgħat dik l-informazzjoni lis-Segretarjat tal-ICCAT mill-inqas xahrejn qabel il-laqgħa annwali tal-ICCAT kull sena.

Taqsima 2
Daqs minimu ta’ referenza għall-konservazzjoni, qabdiet inċidentali u qabdiet aċċessorji

Artikolu 11
Daqs minimu ta’ referenza għall-konservazzjoni għall-pixxispad tal-Mediterran

1.B’deroga mill-Artikolu 15(1) tar-Regolament (UE) Nru 1380/2013, għandu jkun ipprojbit li jiġu mistada jew li jinżammu abbord, jiġu ttrażbordati, jinħattu l-art, jiġu ttrasportati, jinħażnu, jinbiegħu, jintwerew jew jiġu offruti għall-bejgħ il-qabdiet u l-qabdiet aċċessorji ta’ pixxispad, inkluż mis-sajd rikreattiv: 

(a)li jkun twil inqas minn 100 cm mix-xedaq ta’ isfel sal-furketta;
jew

(b)li jkollu piż ħaj ta’ inqas minn 11,4 kg jew piż ta’ inqas minn 10,2 kg wara li jkunu tneħħewlu l-garġi u jkun issewwa.

2.Jista’ jinżamm abbord, jinħatt l-art, jiġi ttrażbordat jew jinġarr waqt l-ewwel trasport wara l-ħatt l-art biss il-pixxispad sħiħ li ma tkun tneħħietlu l-ebda parti esterna, jew il-pixxispad li jkunu tneħħewlu l-garġi u jkun issewwa.

Artikolu 12
Qabdiet aċċessorji inċidentali ta’ pixxispad li jkun iżgħar mid-daqs minimu ta’ referenza għall-konservazzjoni

Minkejja l-Artikolu 11(1), il-bastimenti tal-qbid li jkunu qed jistadu b’mod attiv għall-pixxispad jistgħu jżommu abbord, jittrażbordaw, jittrasferixxu, iħottu l-art, jittrasportaw, jaħżnu, jbigħu, juru jew joffru għall-bejgħ il-qabdiet inċidentali ta’ pixxispad li jkun iżgħar mid-daqs minimu ta’ referenza għall-konservazzjoni, sakemm dawn il-qabdiet ma jkunux jaqbżu l-5 % skont il-piż jew l-għadd ta’ ħut tal-qabda totali tal-pixxispad tat-tali bastimenti.  

Artikolu 13
Qabdiet aċċessorji

1.Fi kwalunkwe ħin wara sajda, il-qabdiet aċċessorji tal-pixxispad ma għandhomx jaqbżu l-għadd totali tal-qabda abbord skont il-piż jew l-għadd ta’ ħut maqbud waqt is-sajd bil-konz.

2.B’deroga mill-Artikolu 15(1) tar-Regolament (UE) Nru 1380/2013, il-bastimenti tal-qbid li ma jkunux qegħdin jistadu b’mod attiv għall-pixxispad ma għandhomx iżommu abbord pixxispad li jaqbeż il-limitu tal-qabdiet aċċessorji li l-Istati Membri jkunu stabbilixxew fil-pjanijiet annwali tas-sajd tagħhom għall-qabda totali abbord skont il-piż jew l-għadd ta’ ħut.

3. B’deroga mill-Artikolu 15(1) tar-Regolament (UE) Nru 1380/2013, fil-każ tas-sajd rikreattiv għandhom ikunu pprojbiti l-qbid, iż-żamma abbord, it-trażbord jew il-ħatt l-art ta’ aktar minn pixxispad wieħed għal kull bastiment kuljum. L-Istati Membri għandhom jieħdu l-miżuri meħtieġa biex jiżguraw u jiffaċilitaw ir-rilaxx tal-pixxispad maqbud ħaj waqt is-sajd rikreattiv. 

4.B’deroga mill-Artikolu 15(1) tar-Regolament (UE) Nru 1380/2013, jekk il-kwota allokata lill-Istat Membru tal-bandiera tiġi eżawrita, il-pixxispad kollu li jinqabad ħaj għandu jinħeles. 

5.Meta l-kwota allokata lill-Istat Membru tal-bandiera tiġi eżawrita, il-pixxispad mejjet għandu jinħatt l-art sħiħ u minħajr ma jkun ipproċessat, u dan għandu jiġi kkonfiskat u għandha tittieħed l-azzjoni x-xierqa ta’ segwitu b’rabta miegħu. Kull sena, l-Istati Membri għandhom jipprovdu l-informazzjoni dwar il-kwantità tat-tali pixxispad mejjet lill-Kummissjoni, li għandha tibgħat dik l-informazzjoni lis-Segretarjat tal-ICCAT skont l-Artikolu 21.

Taqsima 3
Karatteristiċi tekniċi tal-irkaptu tas-sajd

Artikolu 14
Karatteristiċi tekniċi tal-irkaptu tas-sajd

1.L-għadd massimu ta’ snanar li l-bastimenti tas-sajd li jkunu qed jistadu għall-pixxispad fil-Mediterran jistgħu jkalaw jew jieħdu abbord għandu jkun ta’ 2 500 sunnara.

2.B’deroga mill-paragrafu 1, il-bastimenti tas-sajd għandhom jitħallew ikollhom abbord 2 500 sunnara ta’ sostituzzjoni mhux imqabbdin mal-irkaptu għal vjaġġi ta’ iktar minn jumejn.

3.It-tul tas-snanar ma għandux ikun ta’ inqas minn 7 cm.

4.Il-konzijiet tal-wiċċ ma għandhomx ikunu itwal minn 30 mil nawtiku (55,56 km).

KAPITOLU 3
Miżuri ta’ kontroll

Taqsima 1
Reġistru tal-bastimenti

Artikolu 15
Awtorizzazzjonijiet tas-sajd

1.L-Istati Membri għandhom joħorġu l-awtorizzazzjonijiet tas-sajd għall-qbid tal-pixxispad tal-Mediterran għall-bastimenti li jtajru l-bandiera tagħhom skont id-dispożizzjonijiet stabbiliti fir-Regolament (UE) 2017/2403:

(a)għall-bastimenti tas-sajd li jkunu qed jistadu għall-pixxispad tal-Mediterran;

(b)għall-bastimenti tas-sajd li jkunu qed jaqbdu l-pixxispad tal-Mediterran bħala qabda aċċessorja; u

(c)għall-bastimenti li jintużaw għas-sajd rikreattiv.

2.L-Istati Membri għandhom joħorġu awtorizzazzjoni speċjali tas-sajd għall-bastimenti tas-sajd tal-Unjoni li jkunu qed jistadu għall-pixxispad tal-Mediterran bil-ħarpuni jew bil-konzijiet tal-wiċċ.

3.Il-bastimenti tal-Unjoni mniżżlin fir-reġistru tal-bastimenti tal-ICCAT skont il-proċedura stabbilita fl-Artikoli 16 u 17 biss għandhom ikunu awtorizzati jistadu għall-pixxispad tal-Mediterran, iżommuh abbord, jittrażbordawh, jittrasportawh, jipproċessawh jew iħottuh l-art.

4.Il-bastimenti l-kbar tas-sajd awtorizzati mill-Istati Membri għandhom ikunu rreġistrati fir-reġistru tal-bastimenti tas-sajd li b’kollox huma itwal minn 20 metru tal-ICCAT, sabiex l-ICCAT tkun tista’ tawtorizzahom jistadu għat-tonn u għall-ispeċijiet li jixbhuh, iżommuhom abbord, jittrażbordawhom u jħottuhom l-art.

Artikolu 16
Informazzjoni dwar il-bastimenti awtorizzati jaqbdu l-pixxispad u l-alongi fis-sena attwali

1.Kull sena, l-Istati Membri għandhom jibagħtu l-informazzjoni li ġejja b’mod elettroniku lill-Kummissjoni, fil-format stabbilit fil-Linji Gwida tal-ICCAT għat-tressiq tad-dejta u tal-informazzjoni:

(a)sal-1 ta’ Jannar, l-informazzjoni dwar il-bastimenti tal-qbid li jtajru l-bandiera tagħhom u li jkunu awtorizzati jaqbdu l-pixxispad tal-Mediterran, anke bħala qabda aċċessorja u fil-kuntest tas-sajd rikreattiv. Il-Kummissjoni għandha tibgħat dik l-informazzjoni lis-Segretarjat tal-ICCAT sal-15 ta’ Jannar ta’ kull sena;

(b)sal-1 ta’ Marzu, l-informazzjoni dwar il-bastimenti tal-qbid li jtajru l-bandiera tagħhom u li jkunu awtorizzati jistadu għall-alongi fil-Mediterran. Il-Kummissjoni għandha tibgħat dik l-informazzjoni lis-Segretarjat tal-ICCAT sal-15 ta’ Marzu ta’ kull sena.

2.L-informazzjoni dwar il-bastimenti tal-qbid imsemmija fil-paragrafu 1(a) u (b) għandu jkun fiha isem il-bastiment u n-numru tiegħu tar-reġistru tal-flotta tas-sajd tal-Unjoni (in-numru tas-CFR), kif iddefinit fl-Anness I tar-Regolament ta’ Implimentazzjoni tal-Kummissjoni (UE) 2017/218 dwar ir-reġistru tal-flotta tas-sajd tal-Unjoni 30 .

3.Minbarra l-informazzjoni msemmija fil-paragrafu 2, l-Istati Membri għandhom jgħarrfu lill-Kummissjoni b’kull informazzjoni addizzjonali, informazzjoni mħassra jew informazzjoni emendata dwar il-bastimenti tal-qbid imsemmija fil-paragrafu 1, sa mhux aktar tard minn 30 ġurnata minn meta jsir dak it-tibdil fl-informazzjoni. Sa mhux aktar tard minn 45 ġurnata minn meta tiżdied, titħassar jew tiġi emendata l-informazzjoni dwar dawk il-bastimenti tal-qbid, il-Kummissjoni għandha tavża lis-Segretarjat tal-ICCAT b’dan.

4.B’konformità mal-Artikolu 7(6) tar-Regolament (UE) 2017/2403, matul is-sena l-Kummissjoni għandha temenda l-informazzjoni dwar il-bastimenti tal-qbid imsemmija fil-paragrafu 1 jekk ikun hemm bżonn, billi tibgħat l-informazzjoni aġġornata lis-Segretarjat tal-ICCAT.

Artikolu 17
Informazzjoni xjentifika dwar il-bastimenti li kienu awtorizzati jistadu għall-pixxispad bl-użu ta’ ħarpuni jew ta’ konzijiet tal-wiċċ fis-sena ta’ qabel

1.Sat-30 ta’ Ġunju ta’ kull sena, l-Istati Membri għandhom jibagħtu l-informazzjoni li ġejja b’mod elettroniku lill-Kummissjoni dwar il-bastimenti tal-qbid li jtajru l-bandiera tagħhom li kienu awtorizzati jistadu għall-pixxispad tal-Mediterran bil-konzijiet tal-wiċċ jew bil-ħarpuni fis-sena ta’ qabel:

(a)isem il-bastiment (jekk il-bastiment ma jkollux isem, għandu jingħata n-numru ta’ reġistrazzjoni tiegħu mingħajr l-inizjali tal-pajjiż);

(b)in-numru tar-reġistru tal-flotta tas-sajd tal-Unjoni kif iddefinit fl-Anness I tar-Regolament ta’ Implimentazzjoni tal-Kummissjoni (UE) 2017/218;

(c)in-numru fir-reġistru tal-ICCAT.

2.L-informazzjoni msemmija fil-paragrafu 1 għandha tintbagħat fil-format stabbilit fl-aħħar verżjoni tal-Linji Gwida tal-ICCAT għat-tressiq tad-dejta u tal-informazzjoni.

3.Il-Kummissjoni għandha tibgħat dik l-informazzjoni lis-Segretarjat tal-ICCAT sal-31 ta’ Lulju ta’ kull sena.

Taqsima 2
Monitoraġġ u sorveljanza

Artikolu 18
Sistema ta’ monitoraġġ tal-bastimenti

1.Il-bastimenti tas-sajd tal-Unjoni li jkunu mniżżlin fir-reġistru tal-bastimenti tal-ICCAT u li jkunu awtorizzati jistadu għall-pixxispad tal-Mediterran, u l-bastimenti ta’ pajjiżi terzi li jkunu awtorizzati jistadu għall-pixxispad tal-Mediterran fl-ilmijiet tal-Unjoni u li b’kollox ikunu itwal minn 12-il metru, għandu jkollhom installat abbord apparat li jiffunzjona għalkollox li jippermetti lill-bastiment jiġi awtomatikament lokalizzat u identifikat permezz tas-sistema ta’ monitoraġġ tal-bastimenti billi jittrażmetti d-dejta dwar il-pożizzjoni tal-bastiment f’intervalli regolari, bi qbil mal-Artikolu 9 tar-Regolament tal-Kunsill (KE) Nru 1224/2009.

2.Għall-finijiet tal-kontroll, it-trażmissjoni tad-dejta tas-sistema ta’ monitoraġġ tal-bastimenti mill-bastimenti tal-qbid li huma awtorizzati jistadu għall-pixxispad tal-Mediterran ma għandhiex tiġi interrotta meta l-bastimenti jkunu fil-port.

3.L-Istati Membri għandhom jiżguraw li ċ-Ċentri tal-Monitoraġġ tas-Sajd tagħhom jibagħtu l-messaġġi tas-sistema ta’ monitoraġġ tal-bastimenti li jaslulhom mingħand il-bastimenti tas-sajd li jtajru l-bandiera tagħhom lill-Kummissjoni u lil korp magħżul minnha, f’ħin reali u billi jużaw il-format “https data feed”. Il-Kummissjoni għandha tibgħat dawk il-messaġġi b’mod elettroniku lis-Segretarjat tal-ICCAT.

4.L-Istati Membri għandhom jiżguraw dan li ġej:

(a)li l-messaġġi tas-sistema ta’ monitoraġġ tal-bastimenti mingħand il-bastimenti tas-sajd li jtajru l-bandiera tagħhom jintbagħtu lill-Kummissjoni tal-inqas kull sagħtejn;

(b)li, f’każ ta’ ħsara teknika fis-sistema ta’ monitoraġġ tal-bastimenti, il-messaġġi alternattivi li jaslulhom skont l-Artikolu 25(1) tar-Regolament ta’ Implimentazzjoni tal-Kummissjoni (UE) Nru 404/2011 mingħand il-bastimenti tas-sajd li jtajru l-bandiera tagħhom jintbagħtu lill-Kummissjoni fi żmien 24 siegħa minn meta ċ-Ċentri tal-Monitoraġġ tas-Sajd tagħhom jirċevuhom;

(c)li l-messaġġi li jintbagħtu lill-Kummissjoni jingħataw numru sekwenzjali (b’identifikatur uniku) sabiex tiġi evitata d-duplikazzjoni;

(d)li l-messaġġi li jintbagħtu lill-Kummissjoni jkunu skont l-Artikolu 24(3) tar-Regolament ta’ Implimentazzjoni tal-Kummissjoni (UE) Nru 404/2011.

5.Kull Stat Membru għandu jieħu l-miżuri meħtieġa biex jiżgura li l-messaġġi kollha li jitqiegħdu għad-dispożizzjoni tal-bastimenti ta’ spezzjoni tiegħu jiġu ttrattati b’mod kunfidenzjali u jkunu limitati biss għall-attivitajiet ta’ spezzjoni fuq il-baħar.

Artikolu 19
Kiri ta’ bastimenti tas-sajd tal-Unjoni

Għandu jkun ipprojbit il-kiri ta’ bastimenti tas-sajd tal-Unjoni għas-sajd tal-pixxispad tal-Mediterran.

Artikolu 20
Programmi ta’ osservaturi nazzjonali għall-bastimenti tas-sajd bil-konz tal-wiċċ

1.Kull Stat Membru tal-bandiera li jkollu kwota tal-pixxispad tal-Mediterran għandu jimplimenta programm ta’ osservaturi nazzjonali għall-bastimenti tas-sajd bil-konz tal-wiċċ li jkunu qed jistadu għall-pixxispad tal-Mediterran skont dan l-Artikolu. Il-programm tal-osservaturi nazzjonali għandu jikkonforma mal-istandards minimi stabbiliti fl-Anness I.

2.Kull Stat Membru kkonċernat għandu jiżgura li jintbagħtu l-osservaturi xjentifiċi nazzjonali fuq tal-inqas 20 % mill-bastimenti kollha tas-sajd bil-konz tal-wiċċ li jkunu qed jistadu għall-pixxispad tal-Mediterran. Il-perċentwal ta’ kopertura se jitkejjel f’jiem tas-sajd, f’għadd ta’ kalati jew f’għadd ta’ vjaġġi.

3.B’deroga mill-paragrafu 2, għall-bastimenti li b’kollox ikunu iqsar minn 15-il metru, meta jista’ jkun hemm tħassib straordinarju dwar is-sikurezza li jipprekludi li jintbagħat osservatur abbord il-bastiment, Stat Membru jista’ juża metodu alternattiv għall-monitoraġġ xjentifiku. Dak il-metodu alternattiv għandu jiżgura kopertura li tkun tixbah lil dik speċifikata fil-paragrafu 2 u ġbir ekwivalenti tad-dejta. L-Istat Membru kkonċernat għandu jippreżenta d-dettalji tal-metodu alternattiv lill-Kummissjoni mingħajr dewmien żejjed.

4.Il-Kummissjoni għandha tibgħat id-dettalji tal-metodu alternattiv imsemmi fil-paragrafu 3 lill-Kumitat permanenti dwar ir-riċerka u l-istatistika tal-ICCAT minnufih biex dan jevalwah. Il-metodi alternattivi għandhom jiġu approvati mill-Kummissjoni tal-ICCAT waqt il-laqgħa annwali tal-ICCAT qabel ma jiġu implimentati.

5.Lill-osservaturi nazzjonali l-Istati Membri għandhom joħorġulhom dokumenti uffiċjali ta’ identifikazzjoni.

6.Minbarra l-kompiti tal-osservaturi xjentifiċi stabbiliti fl-Anness I, l-Istati Membri għandhom jeżiġu li l-osservaturi xjentifiċi jivvalutaw u jirrappurtaw id-dejta li ġejja dwar il-pixxispad tal-Mediterran:

(a)il-livell ta’ skartar ta’ ħut li jkun żgħir wisq;

(b)id-daqs u l-età tal-ħut meta jilħqu l-istat adult f’dak ir-reġjun partikulari;

(c)l-użu tal-ħabitat biex titqabbel id-disponibbiltà tal-pixxispad għat-tipi ta’ sajd differenti, fosthom tqabbil bejn il-konzijiet tradizzjonali u dawk mesopelaġiċi;

(d)l-impatt tas-sajd bil-konzijiet mesopelaġiċi f’termini tal-kompożizzjoni tal-qabdiet, tas-serje tal-qabda għal kull unità tal-isforz u tat-tqassim tad-daqs tal-qabdiet; u

(e)l-istima tal-proporzjon, ta’ kull xahar, ta’ ħut riproduttiv u ta’ rekluti fil-qabdiet.

7.Sat-30 ta’ Ġunju ta’ kull sena, l-Istati Membri għandhom jibagħtu l-informazzjoni li tkun inġabret fil-programmi tal-osservaturi xjentifiċi nazzjonali tagħhom tas-sena ta’ qabel lill-Kummissjoni. Il-Kummissjoni għandha tibgħat dik l-informazzjoni lis-Segretarjat tal-ICCAT sal-31 ta’ Lulju ta’ kull sena.

Taqsima 3
Kontroll tal-qabdiet

Artikolu 21
Reġistrazzjoni u rappurtar tal-qabdiet

1.Il-kaptan ta’ kull bastiment li jkun awtorizzat jaqbad il-pixxispad tal-Mediterran għandu jżomm ġurnal ta’ abbord dwar is-sajd skont ir-rekwiżiti stabbiliti fl-Anness II u għandu jibgħat l-informazzjoni tal-ġurnal ta’ abbord lill-Istat Membru tal-bandiera tiegħu.

2.Mingħajr preġudizzju għall-obbligi tar-rappurtar tal-Istati Membri stabbiliti fir-Regolament tal-Kunsill (KE) Nru 1224/2009, kull tliet xhur l-Istati Membri għandhom jibagħtu rapporti lill-Kummissjoni dwar il-qabdiet kollha tal-pixxispad tal-Mediterran li l-bastimenti awtorizzati u li jtajru l-bandiera tagħhom ikunu għamlu. Dawk ir-rapporti ta’ kull tliet xhur għandhom jintbagħtu sa mhux aktar tard minn 15-il jum wara li jintemm kull perjodu ta’ tliet xhur (jiġifieri sal-15 ta’ April, sal-15 ta’ Lulju u sal-15 ta’ Ottubru ta’ kull sena u sal-15 ta’ Jannar tas-sena ta’ wara). Il-Kummissjoni għandha tibgħat dik l-informazzjoni lis-Segretarjat tal-ICCAT sat-30 ta’ April, sat-30 ta’ Lulju u sat-30 ta’ Ottubru ta’ kull sena u sat-30 ta’ Jannar tas-sena ta’ wara.

3.Minbarra l-informazzjoni msemmija fil-paragrafu 1, sat-30 ta’ Ġunju ta’ kull sena, l-Istati Membri għandhom jibagħtu l-informazzjoni li ġejja lill-Kummissjoni dwar il-bastimenti tas-sajd tal-Unjoni li kienu awtorizzati jistadu għall-pixxispad tal-Mediterran bil-konzijiet tal-wiċċ jew bil-ħarpuni fis-sena ta’ qabel:

(a)informazzjoni marbuta mal-attivitajiet tas-sajd ibbażata fuq il-kampjunar jew fuq il-flotta kollha, fosthom:

(i)    il-perjodu jew il-perjodi tas-sajd u l-għadd totali annwali ta’ jiem tas-sajd tal-bastiment, skont l-ispeċi fil-mira u ż-żona;

(ii)    iż-żoni ġeografiċi, skont ir-rettangoli statistiċi tal-ICCAT, għall-attivitajiet tas-sajd li wettaq il-bastiment, skont l-ispeċi fil-mira u ż-żona;

(iii)    it-tip ta’ bastiment, skont l-ispeċi fil-mira u ż-żona;

(iv)    l-għadd ta’ snanar li uża l-bastiment, skont l-ispeċi fil-mira u ż-żona;

(v)    l-għadd ta’ konzijiet individwali li uża l-bastiment, skont l-ispeċi fil-mira u ż-żona;

(vi)    it-tul kollu tal-konzijiet individwali kollha li għandu l-bastiment, skont l-ispeċi fil-mira u ż-żona;

(b)id-dejta dwar il-qabdiet, fl-iżgħar unità temporali/spazjali possibbli, fosthom:

(i)    it-tqassim tad-daqs u, jekk inhu possibbli, tal-età tal-qabdiet;

(ii)    il-qabdiet ta’ kull bastiment u l-kompożizzjoni tagħhom;

(iii)    l-isforz tas-sajd (l-għadd medju ta’ jiem tas-sajd għal kull bastiment, l-għadd medju ta’ snanar għal kull bastiment, l-għadd medju ta’ konzijiet individwali għal kull bastiment u t-tul medju tal-konzijiet kollha f’daqqa għal kull bastiment).

4.Il-Kummissjoni għandha tibgħat dik l-informazzjoni lis-Segretarjat tal-ICCAT sal-31 ta’ Lulju ta’ kull sena.

5.L-informazzjoni msemmija fil-paragrafi 1, 2 u 3 għandha tintbagħat fil-format stabbilit fl-aħħar verżjoni tal-Linji Gwida tal-ICCAT għat-tressiq tad-dejta u tal-informazzjoni.

Artikolu 22
Informazzjoni dwar l-eżawriment tal-kwota u l-għeluq tas-sajd

1.Mingħajr preġudizzju għall-Artikolu 34 tar-Regolament tal-Kunsill (KE) Nru 1224/2009, kull Stat Membru għandu jgħarraf lill-Kummissjoni mingħajr dewmien meta jqis li l-kwota allokata għal tip ta’ rkaptu partikulari tkun laħqet it-80 %.

2.Meta l-qabdiet akkumulati tal-pixxispad tal-Mediterran ikunu laħqu l-limitu ta’ 80 % tal-kwota nazzjonali, l-Istat Membru tal-bandiera għandu jibgħat id-dejta dwar il-qabdiet lill-Kummissjoni kull ġimgħa.

Taqsima 4
Ħatt l-art u trażbord

Artikolu 23
Portijiet magħżulin

1.Il-qabdiet tal-pixxispad tal-Mediterran, inklużi l-qabdiet aċċessorji u l-pixxispad tal-Mediterran maqbud fil-kuntest tas-sajd rikreattiv mingħajr marka fuq kull ħuta kif imsemmi fl-Artikolu 30, għandhom jinħattu l-art fil-portijiet magħżulin biss.

2.Kull Stat Membru għandu jagħżel il-portijiet li fihom għandu jsir il-ħatt l-art imsemmi fil-paragrafu 1 u għandu jispeċifika meta u fejn hu permess li jsir il-ħatt l-art u t-trażbord u l-proċeduri ta’ spezzjoni u ta’ sorveljanza li japplikaw f’dawk il-portijiet.

3.Sal-15 ta’ Frar ta’ kull sena, l-Istati Membri għandhom jibagħtu lista tal-portijiet magħżulin tagħhom lill-Kummissjoni. Sal-1 ta’ Marzu ta’ kull sena, il-Kummissjoni għandha tibgħat dik l-informazzjoni lis-Segretarjat tal-ICCAT.

Artikolu 24
Notifika minn qabel

1.L-Artikolu 17 tar-Regolament tal-Kunsill (KE) Nru 1224/2009 għandu japplika għall-kaptani tal-bastimenti tas-sajd tal-Unjoni li b’kollox ikunu twal 12-il metru jew iktar u li huma inklużi fil-lista tal-bastimenti msemmija fl-Artikolu 16 ta’ dan ir-Regolament. In-notifika qabel il-wasla msemmija fl-Artikolu 17 tar-Regolament tal-Kunsill (KE) Nru 1224/2009 għandha tintbagħat lill-awtorità kompetenti tal-Istat Membru (inkluż l-Istat Membru tal-bandiera) jew tal-PKK li l-portijiet jew il-faċilità tal-ħatt l-art tagħha huma jkun beħsiebhom jużaw.

2.Mill-inqas erba’ sigħat qabel il-ħin stmat tal-wasla tagħhom fil-port, il-kaptani tal-bastimenti tas-sajd tal-Unjoni li b’kollox ikunu iqsar minn 12-il metru li huma inklużi fil-lista tal-bastimenti msemmija fl-Artikolu 16 għandhom jgħarrfu lill-awtorità kompetenti tal-Istat Membru (inkluż l-Istat Membru tal-bandiera) jew tal-PKK li l-portijiet jew il-faċilità tal-ħatt l-art tagħha huma jkunu jixtiequ jużaw, bl-informazzjoni li ġejja:

(a)il-ħin stmat tal-wasla tagħhom;

(b)il-kwantità stmata ta’ pixxispad tal-Mediterran li għandhom abbord; u

(c)l-informazzjoni dwar iż-żona ġeografika minn fejn ikun inqabad il-ħut.

3.L-awtoritajiet tal-Istati Membri tal-port għandhom iżommu reġistru tan-notifiki kollha minn qabel għas-sena attwali.

Artikolu 25
Trażbord

1.Għandu jkun ipprojbit it-trażbord fuq il-baħar, f’kull ċirkustanza, min-naħa ta’ bastimenti tas-sajd tal-Unjoni li jkollhom abbord il-pixxispad tal-Mediterran.

2.Mingħajr preġudizzju għall-Artikoli 51, 52, 54 u 57 tar-Regolament (UE) 2017/2107, il-bastimenti tas-sajd għandhom jittrażbordaw il-pixxispad tal-Mediterran f’portijiet magħżulin biss.

Taqsima 5
Spezzjonijiet

Artikolu 26
Pjanijiet annwali ta’ spezzjoni

1.Sal-31 ta’ Jannar ta’ kull sena, l-Istati Membri għandhom jibagħtu l-pjanijiet annwali ta’ spezzjoni tagħhom lill-Kummissjoni. Il-pjanijiet ta’ spezzjoni għandhom jiġu stabbiliti skont:

(a)l-għanijiet, il-prijoritajiet u l-proċeduri, kif ukoll il-punti ta’ riferiment għall-attivitajiet ta’ spezzjoni stabbiliti fid-Deċiżjoni ta’ Implimentazzjoni tal-Kummissjoni (UE) 2018/17 31 ; u

(b)il-programm ta’ azzjoni nazzjonali għall-kontroll għall-pixxispad tal-Mediterran stabbilit skont l-Artikolu 46 tar-Regolament tal-Kunsill (KE) Nru 1224/2009.

2.Il-Kummissjoni għandha tiġbor flimkien il-pjanijiet nazzjonali ta’ spezzjoni u tintegrahom fil-pjan ta’ spezzjoni tal-Unjoni. Il-Kummissjoni għandha tibgħat il-pjan lis-Segretarjat tal-ICCAT biex l-ICCAT tkun tista’ tapprovah, flimkien mal-pjanijiet annwali tas-sajd imsemmijin fl-Artikolu 9.

Artikolu 27
Skema tal-ICCAT għal spezzjonijiet internazzjonali konġunti

1.L-attivitajiet internazzjonali konġunti ta’ spezzjoni għandhom jitwettqu skont l-iskema tal-ICCAT għal spezzjonijiet internazzjonali konġunti (imsejħa “l-iskema tal-ICCAT”) stabbilita fl-Anness III.

2.L-Istati Membri li l-bastimenti tas-sajd tagħhom huma awtorizzati jistadu għall-pixxispad tal-Mediterran għandhom jassenjaw lill-ispetturi u jwettqu l-ispezzjonijiet fuq il-baħar skont l-iskema tal-ICCAT. Il-Kummissjoni jew korp magħżul minnha jistgħu jaħtru spetturi tal-Unjoni għall-iskema tal-ICCAT.

3.Meta, fi kwalunkwe ħin, ikun hemm iktar minn 50 bastiment tas-sajd li jtajru l-bandiera ta’ Stat Membru partikulari li jkunu qed jistadu għall-pixxispad fil-Mediterran fiż-żona tal-Konvenzjoni, dak l-Istat Membru għandu jibgħat bastiment ta’ spezzjoni għall-finijiet tal-ispezzjoni u l-kontroll fuq il-baħar fil-Mediterran għall-perjodu kollu li matulu dawk il-bastimenti jkunu hemmhekk. Dak l-obbligu għandu jitqies li jkun tħares ukoll f’każijiet fejn l-Istati Membri jikkooperaw biex jibagħtu bastiment ta’ spezzjoni jew f’każijiet fejn jintbagħat bastiment ta’ spezzjoni tal-Unjoni fil-Mediterran.

4.Il-Kummissjoni jew korp magħżul minnha għandhom jikkoordinaw l-attivitajiet ta’ sorveljanza u ta’ spezzjoni għall-Unjoni. Flimkien mal-Istat Membru kkonċernat, il-Kummissjoni tista’ tfassal programmi ta’ spezzjoni konġunta biex l-Unjoni tkun tista’ twettaq l-obbligu tagħha fil-kuntest tal-iskema tal-ICCAT. L-Istati Membri li l-bastimenti tas-sajd tagħhom ikunu qed jistadu għall-pixxispad tal-Mediterran għandhom jadottaw il-miżuri meħtieġa sabiex jiffaċilitaw l-implimentazzjoni ta’ dawk il-programmi, b’mod partikulari f’dak li għandu x’jaqsam mar-riżorsi umani u materjali meħtieġa u mal-perjodi meta jridu jintużaw dawk ir-riżorsi u maż-żoni ġeografiċi fejn iridu jintużaw.

5.Sal-1 ta’ Diċembru ta’ kull sena, l-Istati Membri għandhom jgħarrfu lill-Kummissjoni bl-ismijiet tal-ispetturi u tal-bastimenti ta’ spezzjoni li beħsiebhom jassenjaw għall-iskema tal-ICCAT fis-sena ta’ wara. Permezz ta’ dan it-tagħrif, il-Kummissjoni għandha tfassal, flimkien mal-Istati Membri, pjan annwali għall-parteċipazzjoni tal-Unjoni fl-iskema tal-ICCAT, li hija għandha tibgħat lis-Segretarjat tal-ICCAT sal-1 ta’ Jannar ta’ kull sena.

Artikolu 28
Spezzjonijiet f’każ ta’ ksur

1.Kull Stat Membru tal-bandiera għandu jieħu l-azzjoni msemmija fil-paragrafu 2 ta’ dan l-Artikolu jekk bastiment li jtajjar il-bandiera tiegħu jkun kiser id-dispożizzjonijiet ta’ dan ir-Regolament.

2.Kull Stat Membru tal-bandiera għandu jiżgura li ssir spezzjoni fiżika fil-portijiet tiegħu taħt l-awtorità tiegħu jew, meta bastiment tas-sajd li jtajjar il-bandiera tiegħu ma jkunx jinsab f’xi wieħed mill-portijiet tiegħu, minn persuna li huwa jaħtar.

KAPITOLU 4
Is-sajd rikreattiv

Artikolu 29
Miżuri ta’ ġestjoni

1.Kull Stat Membru għandu jipprevedi kwota għas-sajd rikreattiv fil-kwota nazzjonali tiegħu u għandu javża lill-Kummissjoni b’dan meta jkun qed jibagħtilha l-pjan tas-sajd tiegħu skont l-Artikolu 9. It-tali dispożizzjoni għandha tiżgura li l-ħut mejjet kollu jitnaqqas mill-kwota.

2.Waqt is-sajd rikreattiv għandhom ikunu pprojbiti l-qbid, iż-żamma abbord, it-trażbord jew il-ħatt l-art ta’ aktar minn pixxispad wieħed għal kull bastiment kuljum.

3.L-Istati Membri għandhom jieħdu l-miżuri meħtieġa biex jiżguraw li, kemm jista’ jkun, il-pixxispad li jinqabad ħaj waqt is-sajd rikreattiv jiġi rrilaxxat.

4.Għandhom ikunu pprojbiti l-bejgħ tal-pixxispad tal-Mediterran maqbud waqt is-sajd rikreattiv u kull tip ta’ kummerċjalizzazzjoni oħra tiegħu.

Artikolu 30
Miżuri ta’ kontroll

1.Il-bastimenti li jużaw “qasba u xlief” biss għandhom ikunu awtorizzati jistadu għall-pixxispad tal-Mediterran waqt is-sajd rikreattiv.

2.L-informazzjoni dwar il-bastimenti awtorizzati li jintużaw għas-sajd rikreattiv li tintbagħat lis-Segretarjat tal-ICCAT skont l-Artikolu 16(1)(a) għandha tinkludi dan li ġej:

(a)isem il-bastiment (jekk il-bastiment ma jkollux isem, għandu jingħata n-numru ta’ reġistrazzjoni tiegħu mingħajr l-inizjali tal-pajjiż);

(b)in-numru tar-reġistru tal-flotta tas-sajd tal-Unjoni kif iddefinit fl-Anness I tar-Regolament ta’ Implimentazzjoni tal-Kummissjoni (UE) 2017/218;

(c)l-isem preċedenti tal-bastiment, meta dan ikun rilevanti;

(d)it-tul totali tal-bastiment;

(e) l-isem u l-indirizz tas-sid jew tas-sidien u tal-operatur jew tal-operaturi tal-bastiment tas-sajd.

3.Id-dejta dwar il-qabdiet, fosthom il-piż ħaj u t-tul (mix-xedaq ta’ isfel sal-furketta) ta’ kull pixxispad tal-Mediterran li jinqabad, jinżamm abbord u jinħatt l-art fil-kuntest tas-sajd rikreattiv, għandha tiġi rreġistrata u rrappurtata skont l-Artikolu 21.

4.Il-pixxispad tal-Mediterran jista’ jinħatt l-art biss sħiħ jew bil-garġi mneħħijin u msewwi, u jista’ jinħatt l-art jew f’port magħżul skont l-Artikolu 23 jew b’marka fuq kull ħuta. Kull marka għandu jkollha numru uniku speċifiku għall-pajjiż u tkun imħarsa mit-tbagħbis.

5.L-Istati Membri għandhom jistabbilixxu programm ta’ mmarkar tal-ħut għall-finijiet ta’ dan ir-Regolament u għandhom jinkludu l-ispeċifikazzjonijiet tat-tali programm fil-pjanijiet annwali tas-sajd tagħhom imsemmijin fl-Artikolu 9 ta’ dan ir-Regolament.

6.L-Istati Membri għandhom jawtorizzaw l-użu tal-marki tal-ħut biss meta l-ammonti akkumulati tal-qabdiet ikunu fil-limiti tal-kwota allokata lilhom.

7.Xahrejn u ħmistax-il ġurnata qabel il-laqgħa annwali tal-ICCAT kull sena, l-Istati Membri għandhom jibagħtu rapport annwali lill-Kummissjoni dwar l-implimentazzjoni tal-programm tal-immarkar tal-ħut. Il-Kummissjoni għandha tiġbor flimkien l-informazzjoni li tirċievi mingħand l-Istati Membri u tibgħatha lis-Segretarjat tal-ICCAT xahrejn qabel il-laqgħa annwali tal-ICCAT kull sena.

TITOLU III
DISPOŻIZZJONIJIET FINALI

Artikolu 31
Rapport annwali

1.Sal-15 ta’ Settembru ta’ kull sena, l-Istati Membri għandhom jibagħtu rapport annwali lill-Kummissjoni, għas-sena kalendarja ta’ qabel, dwar l-implimentazzjoni tagħhom ta’ dan ir-Regolament, u kull informazzjoni oħra rilevanti.

2.Ir-rapport annwali għandu jinkludi informazzjoni dwar il-miżuri li jkunu ttieħdu biex jiġu mmitigati l-qabdiet aċċessorji u biex jitnaqqas l-iskartar ta’ pixxispad tal-Mediterran li jkun żgħir wisq, u informazzjoni dwar kull riċerka rilevanti f’dak il-qasam.

3.Il-Kummissjoni għandha tiġbor flimkien l-informazzjoni li tirċievi skont il-paragrafi 1 u 2 u għandha tibgħatha lis-Segretarjat tal-ICCAT sal-15 ta’ Ottubru ta’ kull sena.

4.Il-Kummissjoni tista’ tadotta atti ta’ implimentazzjoni b’rabta mar-regoli ddettaljati għall-format tar-rapport annwali msemmi f’dan l-Artikolu. Dawk l-atti ta’ implimentazzjoni għandhom jiġu adottati skont il-proċedura ta’ eżami msemmija fl-Artikolu 36.

Artikolu 32
Analiżi

Sal-31 ta’ Diċembru 2025, il-Kummissjoni għandha tibgħat rapport lill-Parlament Ewropew u lill-Kunsill dwar il-funzjonament tal-pjan għall-irkupru tal-pixxispad tal-Mediterran skont dan ir-Regolament.

Artikolu 33
Finanzjament

Għall-finijiet tar-Regolament (UE) Nru 508/2014 tal-Parlament Ewropew u tal-Kunsill, il-pjan pluriennali għall-irkupru tal-pixxispad tal-Mediterran għandu jitqies li huwa pjan pluriennali skont it-tifsira tal-Artikolu 9 tar-Regolament (UE) Nru 1380/2013.

Artikolu 34
Proċedura għall-emendi

1.Meta jkun hemm bżonn biex, fil-liġi tal-Unjoni, jiġu implimentati l-emendi tar-rakkomandazzjonijiet eżistenti tal-ICCAT li jsiru jorbtu lill-Unjoni, jew biex dawn jiġu ssupplimentati, u sakemm l-emendi tal-liġi tal-Unjoni ma jmorrux lil hinn mir-rakkomandazzjonijiet tal-ICCAT, il-Kummissjoni għandu jkollha s-setgħa tadotta atti delegati, b’konformità mal-Artikolu 35, biex temenda:

(a)l-iskadenzi għar-rappurtar tal-informazzjoni stabbiliti fl-Artikolu 9(1) u (2), fl-Artikolu 10(3), fl-Artikolu 16(1) u (3), fl-Artikolu 17(1) u (3), fl-Artikolu 21(2) u (3), fl-Artikolu 22(2), fl-Artikolu 23(3), fl-Artikolu 26(1), fl-Artikolu 27(5) u fl-Artikolu 31(1) u (3);

(b)il-perjodi taż-żmien tal-għeluq mogħtija fl-Artikolu 10(1) u (2);

(c)id-daqs minimu ta’ referenza għall-konservazzjoni stabbilit fl-Artikolu 11(1);

(d)il-livelli ta’ tolleranza msemmijin fl-Artikoli 12 u 13;

(e)il-karatteristiċi tekniċi tal-irkaptu tas-sajd stabbiliti fl-Artikolu 14(1) sa (4);

(f)il-perċentwal ta’ eżawriment tal-kwota stabbilit fl-Artikolu 22(1) u (2);

(g)l-informazzoni dwar il-bastimenti tal-qbid imsemmija fl-Artikolu 16(2), fl-Artikolu 17(1), fl-Artikolu 21(1), (2), (3) u (4) u fl-Artikolu 23(3); u

(h)l-Annessi I, II u III ta’ dan ir-Regolament.

2.Kull emenda li tiġi adottata skont il-paragrafu 1 għandha tkun strettament limitata għall-implimentazzjoni tal-emendi tar-rakkomandazzjonijiet rispettivi tal-ICCAT fil-liġi tal-Unjoni u/jew taż-żidiet magħhom.

Artikolu 35
Eżerċizzju tad-delega

1.Il-Kummissjoni qed tingħata s-setgħa li tadotta atti delegati bil-kundizzjonijiet stabbiliti f’dan l-Artikolu.

2.Il-Kummissjoni għandha tingħata s-setgħa li tadotta l-atti delegati msemmijin fl-Artikolu 34 għal perjodu ta’ ħames snin mid-data tad-dħul fis-seħħ ta’ dan ir-Regolament. Il-Kummissjoni għandha tfassal rapport b’rabta mad-delega tas-setgħa sa mhux aktar tard minn disa’ xhur qabel ma jintemm il-perjodu ta’ ħames snin. Id-delega tas-setgħa għandha tiġi estiża awtomatikament għal perjodi tal-istess tul ta’ żmien, sakemm il-Parlament Ewropew jew il-Kunsill ma joġġezzjonawx għat-tali estensjoni sa mhux aktar tard minn tliet xhur qabel ma jintemm kull perjodu.

3.Il-Parlament Ewropew jew il-Kunsill jistgħu jirrevokaw id-delega tas-setgħa msemmija fl-Artikolu 34 f’kull mument. Id-deċiżjoni ta’ revoka għandha ttemm id-delega tas-setgħa speċifikata f’dik id-Deċiżjoni. Hija għandha tidħol fis-seħħ l-għada tal-pubblikazzjoni tagħha f’Il-Ġurnal Uffiċjali tal-Unjoni Ewropea jew f’data iktar tard speċifikata fiha. Hija ma għandhiex taffettwa l-validità tal-atti delegati li jkunu diġà fis-seħħ.

4.Qabel ma tadotta att delegat, il-Kummissjoni għandha tikkonsulta mal-esperti maħturin minn kull Stat Membru skont il-prinċipji stabbiliti fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet.

5.Malli tadotta att delegat, il-Kummissjoni għandha tgħarraf lill-Parlament Ewropew u lill-Kunsill fl-istess ħin dwaru.

6.Att delegat adottat skont l-Artikolu 34 għandu jidħol fis-seħħ biss jekk la l-Parlament Ewropew u lanqas il-Kunsill ma jqajmu oġġezzjoni għalih fi żmien xahrejn minn meta dak l-att jiġi mgħarraf lilhom jew jekk, qabel ma jiskadi dak il-perjodu, il-Parlament Ewropew u l-Kunsill it-tnejn ikunu għarrfu lill-Kummissjoni li mhumiex se joġġezzjonaw għalih. Dak il-perjodu għandu jiġi estiż b’xahrejn fuq inizjattiva tal-Parlament Ewropew jew tal-Kunsill.

Artikolu 36
Proċedura ta’ kumitat

Il-Kummissjoni għandha tiġi megħjuna mill-Kumitat għas-Sajd u l-Akkwakultura mwaqqaf bl-Artikolu 47 tar-Regolament (UE) Nru 1380/2013. Dak il-kumitat għandu jkun kumitat skont it-tifsira tar-Regolament (UE) Nru 182/2011.

Meta ssir referenza għal dan il-paragrafu, għandu japplika l-Artikolu 5 tar-Regolament (UE) Nru 182/2011.

Artikolu 37
Emendi fir-Regolament (UE) 2017/2107

Fir-Regolament (UE) 2017/2107 jitħassru l-Artikoli 20 sa 26.

Artikolu 38
Emendi fir-Regolament tal-Kunsill (KE) Nru 1967/2006

Fl-Anness II tar-Regolament tal-Kunsill (KE) Nru 1967/2006, il-punt 6(2) huwa sostitwit b’dan li ġej:

–“2. 2 500 sunnara għall-bastimenti li jkunu qed jimmiraw lejn il-pixxispad (Xiphias gladius) fejn dawn l-ispeċi jagħmlu minn tal-inqas 70 % tal-qabda f’piż ħaj wara li jiġu magħżula;”.

Artikolu 39

Dan ir-Regolament għandu jidħol fis-seħħ fit-tielet jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,

(1)    Ir-Regolament (UE) Nru 1380/2013 tal-Parlament Ewropew u tal-Kunsill tal-11 ta’ Diċembru 2013 dwar il-Politika Komuni tas-Sajd, li jemenda r-Regolamenti tal-Kunsill (KE) Nru 1954/2003 u (KE) Nru 1224/2009 u li jħassar ir-Regolamenti tal-Kunsill (KE) Nru 2371/2002 u (KE) Nru 639/2004 u d-Deċiżjoni tal-Kunsill 2004/585/KE (ĠU L 354, 28.12.2013, p. 22).

(2)    Id-Deċiżjoni tal-Kunsill 98/392/KE tat-23 ta’ Marzu 1998 li tirrigwarda l-konklużjoni mill-Komunità Ewropea tal-Konvenzjoni tan-Nazzjonijiet Uniti tal-10 ta’ Diċembru 1982 dwar il-Liġi tal-Baħar u l-Ftehim tat-28 ta’ Lulju 1994 li għandu x’jaqsam mal-implimentazzjoni tal-Parti XI tagħha (ĠU L 179, 23.6.1998, p. 1).

(3)    Id-Deċiżjoni tal-Kunsill 86/238/KEE tad-9 ta’ Ġunju 1986 dwar l-Adeżjoni tal-Komunità fil-Konvenzjoni Internazzjonali għall-Konservazzjoni tat-Tonn tal-Atlantiku, kif emendata bil-Protokoll mehmuż mal-Att Finali tal-Konferenza tal-Plenipotenzjari tal-Istati li jifformaw Parti mill-Konvenzjoni ffirmata f’Pariġi fl-10 ta’ Lulju 1984 (ĠU L 162, 18.6.1986, p. 33).

(4)    Il-Partijiet Kontraenti tal-Konvenzjoni ICCAT u l-partijiet, l-entitajiet jew l-entitajiet tas-sajd mhux kontraenti tagħha li jikkooperaw magħha.

(5)    Ir-Regolament Delegat tal-Kummissjoni (UE) 2018/191 tat-30 ta’ Novembru 2017 li jemenda r-Regolament ta’ Delega tal-Kummissjoni (UE) 2015/98 dwar l-implimentazzjoni tal-obbligi internazzjonali tal-Unjoni, kif imsemmi fl-Artikolu 15(2) tar-Regolament (UE) Nru 1380/2013 tal-Parlament Ewropew u tal-Kunsill, taħt il-Konvenzjoni Internazzjonali għall-Konservazzjoni tat-Tonn tal-Atlantiku, fir-rigward tal-istokkijiet tal-pixxispad tal-Mediterran (ĠU L 36, 9.2.2018, p. 13).

(6)    Ir-Regolament tal-Kunsill (UE) 2017/127 tal-20 ta’ Jannar 2017 li jistabbilixxi għall-2017 l-opportunitajiet tas-sajd għal ċerti stokkijiet tal-ħut u ċerti gruppi ta’ stokkijiet tal-ħut, applikabbli fl-ilmijiet tal-Unjoni u, għal bastimenti tas-sajd tal-Unjoni, f’ċerti ilmijiet mhux tal-Unjoni (ĠU L 24, 28.1.2017, p. 1).

(7)    Ir-Regolament tal-Kunsill (UE) 2017/1398 tal-25 ta’ Lulju 2017 li jemenda r-Regolament (UE) 2017/127 fir-rigward ta’ ċerti opportunitajiet tas-sajd (ĠU L 199, 29.7.2017, p. 2).

(8)    ĠU L 409, 30.12.2006, p. 11, emendat l-aħħar bir-Regolament (UE) 2015/2102 tal-Parlament Ewropew u tal-Kunsill tat-28 ta’ Ottubru 2015 (ĠU L 308, 25.11.2015, p. 1).

(9)    ĠU L 315, 30.11.2017, p. 1.

(10)    ĠU L 199, 29.7.2017, p. 2.

(11)    Ir-Regolament tal-Kunsill (UE) 2018/120 tat-23 ta’ Jannar 2018 li jistabbilixxi l-opportunitajiet tas-sajd għall-2018 għal ċerti stokkijiet tal-ħut u ċerti gruppi ta’ stokkijiet tal-ħut, applikabbli fl-ilmijiet tal-Unjoni u, għal bastimenti tal-Unjoni, f’ċerti ilmijiet mhux tal-Unjoni, u li jemenda r-Regolament (UE) 2017/127 (ĠU L 27, 31.1.2018, p. 1).

(12)    Ir-Regolament (UE) 2016/1627 tal-Parlament Ewropew u tal-Kunsill tal-14 ta’ Settembru 2016 dwar pjan pluriennali għall-irkupru tat-tonn fil-Lvant tal-Atlantiku u fil-Mediterran, u li jħassar ir-Regolament tal-Kunsill (KE) Nru 302/2009 (ĠU L 252, 16.9.2016, p. 1).

(13)    Ir-Regolament tal-Kunsill (UE) 2017/127 tal-20 ta’ Jannar 2017 li jistabbilixxi għall-2017 l-opportunitajiet tas-sajd għal ċerti stokkijiet tal-ħut u ċerti gruppi ta’ stokkijiet tal-ħut, applikabbli fl-ilmijiet tal-Unjoni u, għal bastimenti tas-sajd tal-Unjoni, f’ċerti ilmijiet mhux tal-Unjoni (ĠU L 24, 28.1.2017, p. 1).

(14)    Ir-Regolament tal-Kunsill (UE) 2017/1398 tal-25 ta’ Lulju 2017 li jemenda r-Regolament (UE) 2017/127 fir-rigward ta’ ċerti opportunitajiet tas-sajd (ĠU L 199, 29.7.2017, p. 2).

(15)    Ir-Regolament tal-Kunsill (UE) 2018/120 tat-23 ta’ Jannar 2018 li jistabbilixxi l-opportunitajiet tas-sajd għall-2018 għal ċerti stokkijiet tal-ħut u ċerti gruppi ta’ stokkijiet tal-ħut, applikabbli fl-ilmijiet tal-Unjoni u, għal bastimenti tal-Unjoni, f’ċerti ilmijiet mhux tal-Unjoni, u li jemenda r-Regolament (UE) 2017/127 (ĠU L 27, 31.1.2018, p. 1).

(16)    Ir-Regolament (UE) Nru 1380/2013 tal-Parlament Ewropew u tal-Kunsill tal-11 ta’ Diċembru 2013 dwar il-Politika Komuni tas-Sajd, li jemenda r-Regolamenti tal-Kunsill (KE) Nru 1954/2003 u (KE) Nru 1224/2009 u li jħassar ir-Regolamenti tal-Kunsill (KE) Nru 2371/2002 u (KE) Nru 639/2004 u d-Deċiżjoni tal-Kunsill 2004/585/KE (ĠU L 354, 28.12.2013, p. 22).

(17)    Ir-Rakkomandazzjoni 16-05 tal-ICCAT li ġiet adottata waqt il-laqgħa annwali tal-ICCAT tal-2016, li tieħu post ir-Rakkomandazzjoni 13-04 u li tistabbilixxi pjan pluriennali għall-irkupru tal-pixxispad fil-Mediterran.

(18)    Ir-Regolament tal-Kunsill (KE) Nru 1239/98 tat-8 ta’ Ġunju 1998 li jemenda r-Regolament (KE) Nru 894/97 li jistabbilixxi ċerti miżuri tekniċi għall-konservazzjoni tar-riżorsi tas-sajd (ĠU L 171, 17.6.1998, p. 1).

(19)    Ir-Regolament tal-Kunsill (KE) Nru 1224/2009 tal-20 ta’ Novembru 2009 li jistabbilixxi sistema Komunitarja ta’ kontroll għall-iżgurar tal-konformità mar-regoli tal-Politika Komuni tas-Sajd, li jemenda r-Regolamenti (KE) Nru 847/96, (KE) Nru 2371/2002, (KE) Nru 811/2004, (KE) Nru 768/2005, (KE) Nru 2115/2005, (KE) Nru 2166/2005, (KE) Nru 388/2006, (KE) Nru 509/2007, (KE) Nru 676/2007, (KE) Nru 1098/2007, (KE) Nru 1300/2008, (KE) Nru 1342/2008 u li jħassar ir-Regolamenti (KEE) Nru 2847/93, (KE) Nru 1627/94 u (KE) Nru 1966/2006 (ĠU L 343, 22.12.2009, p. 1).

(20)    Ir-Regolament ta’ Implimentazzjoni tal-Kummissjoni (UE) Nru 404/2011 tat-8 ta’ April 2011 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 1224/2009 li jistabbilixxi sistema Komunitarja ta’ kontroll għall-iżgurar tal-konformità mar-regoli tal-Politika Komuni tas-Sajd (ĠU L 112, 30.4.2011, p. 1).

(21)    Ir-Regolament tal-Kunsill (KE) Nru 1005/2008 tad-29 ta’ Settembru 2008 li jistabbilixxi sistema Komunitarja sabiex tipprevjeni, tiskoraġġixxi u telimina sajd illegali, mhux irrappurtat u mhux irregolat, li jemenda r-Regolamenti (KEE) Nru 2847/93, (KE) Nru 1936/2001 u (KE) Nru 601/2004 u li jħassar ir-Regolamenti (KE) Nru 1093/94 u (KE) Nru 1447/1999 (ĠU L 286, 29.10.2008, p. 1).

(22)    Ir-Regolament (UE) 2016/1627 tal-Parlament Ewropew u tal-Kunsill tal-14 ta’ Settembru 2016 dwar pjan pluriennali għall-irkupru tat-tonn fil-Lvant tal-Atlantiku u fil-Mediterran, u li jħassar ir-Regolament tal-Kunsill (KE) Nru 302/2009 (ĠU L 252, 16.9.2016, p. 1).

(23)    Il-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (ĠU L 123, 12.5.2016, p. 1).

(24)    Ir-Regolament (UE) Nru 182/2011 tal-Parlament Ewropew u tal-Kunsill tas-16 ta’ Frar 2011 li jistabbilixxi r-regoli u l-prinċipji ġenerali dwar il-modalitajiet ta’ kontroll mill-Istati Membri tal-eżerċizzju mill-Kummissjoni tas-setgħat ta’ implimentazzjoni (ĠU L 55, 28.2.2011, p. 13).

(25)    Ir-Regolament tal-Kunsill (KE) Nru 1967/2006 tal-21 ta’ Diċembru 2006 dwar miżuri ta’ ġestjoni għall-isfruttament sostenibbli ta’ riżorsi tas-sajd fil-Baħar Mediterran u li jemenda r-Regolament (KE) Nru 2847/93 u jħassar ir-Regolament (KE) Nru 1626/94 (ĠU L 409, 30.12.2006, p. 11).

(26)    Ir-Regolament (UE) 2017/2107 tal-Parlament Ewropew u tal-Kunsill tal-15 ta’ Novembru 2017 li jistabbilixxi l-miżuri ta’ ġestjoni, ta’ konservazzjoni u ta’ kontroll applikabbli fiż-żona tal-Konvenzjoni tal-Kummissjoni Internazzjonali għall-Konservazzjoni tat-Tonn tal-Atlantiku (ICCAT), u li jemenda r-Regolamenti tal-Kunsill (KE) Nru 1936/2001, (KE) Nru 1984/2003 u (KE) Nru 520/2007 (ĠU L 315, 30.11.2017, p. 1).

(27)    Ir-Regolament tal-Kunsill (KE) Nru 1224/2009 tal-20 ta’ Novembru 2009 li jistabbilixxi sistema Komunitarja ta’ kontroll għall-iżgurar tal-konformità mar-regoli tal-Politika Komuni tas-Sajd, li jemenda r-Regolamenti (KE) Nru 847/96, (KE) Nru 2371/2002, (KE) Nru 811/2004, (KE) Nru 768/2005, (KE) Nru 2115/2005, (KE) Nru 2166/2005, (KE) Nru 388/2006, (KE) Nru 509/2007, (KE) Nru 676/2007, (KE) Nru 1098/2007, (KE) Nru 1300/2008, (KE) Nru 1342/2008 u li jħassar ir-Regolamenti (KEE) Nru 2847/93, (KE) Nru 1627/94 u (KE) Nru 1966/2006 (ĠU L 343, 22.12.2009, p. 1).

(28)    Ir-Regolament (UE) 2017/2403 tal-Parlament Ewropew u tal-Kunsill tat-12 ta’ Diċembru 2017 dwar il-ġestjoni sostenibbli ta’ flotot tas-sajd esterni, u li jħassar ir-Regolament tal-Kunsill (KE) Nru 1006/2008 (ĠU L 347, 28.12.2017, p. 81).

(29)    Ir-Regolament (UE) 2017/2107 tal-Parlament Ewropew u tal-Kunsill tal-15 ta’ Novembru 2017 li jistabbilixxi l-miżuri ta’ ġestjoni, ta’ konservazzjoni u ta’ kontroll applikabbli fiż-żona tal-Konvenzjoni tal-Kummissjoni Internazzjonali għall-Konservazzjoni tat-Tonn tal-Atlantiku (ICCAT), u li jemenda r-Regolamenti tal-Kunsill (KE) Nru 1936/2001, (KE) Nru 1984/2003 u (KE) Nru 520/2007 (ĠU L 315, 30.11.2017, p. 1).

(30)    ĠU L 34, 9.2.2017, p. 9.

(31)    Id-Deċiżjoni ta’ Implimentazzjoni tal-Kummissjoni (UE) 2018/17 tal-5 ta’ Jannar 2018 li temenda d-Deċiżjoni ta’ Implimentazzjoni 2014/156/UE li tistabbilixxi programm speċifiku ta’ kontroll u spezzjoni għas-sajd li jisfrutta l-istokkijiet tat-tonn fil-Lvant tal-Atlantiku u fil-Mediterran, u tal-pixxispad fil-Mediterran u għas-sajd li jisfrutta l-istokkijiet tas-sardin u l-inċova fil-Baħar Adrijatiku tat-Tramuntana (ĠU L 4, 9.1.2018, p. 20).

IL-KUMMISSJONI EWROPEA

Brussell,24.4.2018

COM(2018) 229 final

ANNESS

tal-

Proposta għal Regolament tal-Parlament Ewropew u tal-Kunsill

dwar pjan pluriennali għall-irkupru tal-pixxispad tal-Mediterran u li jemenda r-Regolament tal-Kunsill (KE) Nru 1967/2006 u r-Regolament (UE) 2017/2107

L-istandards minimi tal-ICCAT għall-programmi tal-osservaturi xjentifiċi tal-bastimenti tas-sajd

ANNESS I

L-istandards minimi tal-ICCAT għall-programmi tal-osservaturi xjentifiċi tal-bastimenti tas-sajd

Dispożizzjonijiet ġenerali

1. Dawn huma l-istandards minimi għall-programmi tal-osservaturi xjentifiċi tal-bastimenti tas-sajd stabbiliti fir-Rakkomandazzjoni 16-14 tal-ICCAT.

Il-kwalifiki tal-osservaturi

2. Mingħajr preġudizzju għal kull taħriġ jew kwalifika teknika rrakkomandati mill-Kumitat permanenti dwar ir-riċerka u l-istatistika (l-SCRS), il-PKK għandhom jiżguraw li l-osservaturi tagħhom ikollhom il-kwalifiki minimi li ġejjin biex iwettqu l-kompiti tagħhom:

a) biżżejjed għarfien u esperjenza biex ikunu jafu jidentifikaw l-ispeċijiet u l-konfigurazzjonijiet tal-irkaptu tas-sajd tal-ICCAT;

b) il-ħila li josservaw u jirreġistraw b’mod preċiż l-informazzjoni li trid tinġabar skont il-Programm;

c) il-ħila li jwettqu l-kompiti mniżżlin fil-paragrafu 7 ta’ hawn taħt;

d) il-ħila li jiġbru l-kampjuni bijoloġiċi; u

e) taħriġ minimu u xieraq fis-sikurezza u fis-sopravvivenza fuq il-baħar.

3. Barra minn hekk, biex jiżguraw l-integrità tal-programm domestiku tal-osservaturi tagħhom, il-PKK għandhom jiżguraw li l-osservaturi:

a) ma jkunux membri tal-ekwipaġġ tal-bastiment li jkun qed jiġi osservat;

b) ma jkunux impjegati tas-sid jew tas-sid benefiċjarju tal-bastiment tas-sajd li jkun qed jiġi osservat; u

c) ma jkollhomx interessi finanzjarji jew benefiċjarji attwali fis-sajd li jkun qed jiġi osservat.

L-affarijiet li jkopru l-programmi tal-osservaturi

4. Kull PKK għandha tiżgura dawn li ġejjin rigward il-programmi domestiċi tal-osservaturi tagħha:

a) kopertura minima ta’ 5% tal-programmi tal-osservaturi tal-isforz tas-sajd f’kull sajd bil-konzijiet tal-wiċċ, u, skont kif inhuma ddefiniti fil-glossarju tal-ICCAT, f’kull sajd bix-xlief u l-qasba, f’kull sajd bin-nases, f’kull sajd bl-għeżula, u f’kull sajd bix-xbieki tat-tkarkir. Il-perċentwal tal-kopertura se jitkejjel kif ġej:

i. għas-sajd bil-konzijiet tal-wiċċ, f’jiem tas-sajd, f’għadd ta’ kalati, jew f’għadd ta’ vjaġġi;

ii. għas-sajd bix-xlief u l-qasba u għas-sajd bin-nases, f’jiem tas-sajd;

iii. għas-sajd bl-għeżula, f’għadd ta’ sigħat jew f’jiem tas-sajd; u

iv. għas-sajd bix-xbieki tat-tkarkir, f’għadd ta’ rfigħ tax-xbieki jew f’jiem tas-sajd;

b) minkejja l-paragrafu a), fil-każ ta’ bastimenti li jkunu iqsar minn 15-il metru, u li fihom jista’ jkun hemm tħassib straordinarju dwar is-sikurezza li ma jippermettix li jintbagħat osservatur abbord il-bastiment, PKK tista’ tuża metodu alternattiv għall-monitoraġġ xjentifiku li jiġbor dejta ekwivalenti speċifikata f’din ir-Rakkomandazzjoni, b’mod li jiżgura l-istess kopertura. F’każ bħal dan, il-PKK li tkun tixtieq tuża metodu alternattiv għall-monitoraġġ trid tressaq id-dettalji tal-metodu lill-SCRS biex dan jevalwah. L-SCRS jagħti l-parir tiegħu lill-Kummissjoni tal-ICCAT dwar kemm il-metodu alternattiv ikun addattat biex jintlaħqu l-obbligi tal-ġbir tad-dejta stabbiliti f’din ir-Rakkomandazzjoni. Il-metodi alternattivi li jintużaw skont din id-dispożizzjoni għandhom jiġu approvati mill-Kummissjoni tal-ICCAT waqt il-laqgħa annwali tagħha qabel ma jiġu implimentati;

c) kopertura rappreżentattiva temporali u spazjali tal-ħidma tal-flotta biex ikun żgurat li tinġabar biżżejjed dejta xierqa, kif meħtieġ skont din ir-Rakkomandazzjoni, u skont kull rekwiżit ieħor tal-programmi domestiċi tal-osservaturi tal-PKK, li tqis il-karatteristiki tal-flotot u tas-sajd;

d) il-ġbir tad-dejta dwar l-aspetti rilevanti tal-ħidma tas-sajd, fosthom dwar il-qabdiet, kif speċifikat fil-paragrafu 7.

5. Il-PKK jistgħu jikkonkludu arranġamenti bilaterali bejniethom, li bihom PKK waħda tibgħat l-osservaturi domestiċi tagħha fuq bastimenti li jtajru l-bandiera ta’ PKK oħra, dment li jitħarsu d-dispożizzjonijiet kollha ta’ din ir-Rakkomandazzjoni.

6. Il-PKK għandhom jagħmlu ħilithom biex jiżguraw li l-osservaturi jintbagħtu fuq bastimenti differenti wara li jispiċċaw ħidmiethom fuq bastiment partikulari.

Il-kompiti tal-osservaturi

7. Il-PKK għandhom jitolbu lill-osservaturi jwettqu, fost affarijiet oħra, il-kompiti li ġejjin:

a) li jirreġistraw l-attività tas-sajd tal-bastiment li jkunu qed osservaw u jagħmlu rapport dwarha, li għall-inqas għandu jinkludi dawn li ġejjin:

i. li jiġbru d-dejta, fost l-oħrajn, dwar il-kwantitajiet totali tal-qabdiet tal-ispeċijiet fil-mira, tal-qbid skartat u tal-qabdiet aċċessorji (li jinkludu l-klieb il-baħar, il-fkieren tal-baħar, il-mammiferi tal-baħar, u l-għasafar tal-baħar), li jistmaw jew ikejlu l-kompożizzjoni tal-qabda skont id-daqsijiet fejn dan ikun jista’ jsir, u l-istat tal-ħut maqbud (jiġifieri miżmum, skartat, mejjet jew meħlus ħaj), li jiġbru l-kampjuni bijoloġiċi għall-istudji tal-istorja tal-ħajja (eż. il-gonadi, l-otoliti, ix-xewk tad-dahar u l-qxur);

ii. li jiġbru l-marki tal-ħut kollha li jsibu u jirrappurtaw dwarhom;

iii. li jiġbru l-informazzjoni dwar l-attivitajiet tas-sajd, li tkun tinkludi dan li ġej, u jirrappurtaw dwarha:

- fejn saret il-qabda skont il-latitudni u l-lonġitudni;

- l-informazzjoni dwar l-isforz tas-sajd (eż. l-għadd ta’ kalati, l-għadd ta’ snanar, eċċ.);

- id-data ta’ kull attività tas-sajd, u fejn ikun rilevanti, il-ħinijiet tal-bidu u tat-tmiem tal-attività tas-sajd;

- informazzjoni dwar l-użu ta’ oġġetti biex jinġabar il-ħut, fosthom l-irkapti biex jinġema’ l-ħut; u

- informazzjoni dwar il-kundizzjoni ġenerali tal-annimali li jinħelsu b’rabta mar-rati tas-sopravvivenza (jiġifieri jkunux ħajjin jew mejtin, midrubin, eċċ.);

b) li josservaw u jirreġistraw il-miżuri ta’ mitigazzjoni tal-qabdiet aċċessorji li jintużaw, u informazzjoni rilevanti oħra;

c) sa fejn ikun possibbli, li josservaw il-kundizzjonijiet ambjentali (eż. l-istat tal-baħar, il-klima, u l-parametri idroloġiċi, eċċ.) u jirrappurtaw dwarhom;

d) li josservaw l-irkaptu biex jinġema’ l-ħut u jirrappurtaw dwaru, bi qbil mal-programm tal-osservaturi tal-ICCAT li ġie adottat skont il-programm pluriennali għall-konservazzjoni u l-ġestjoni tat-tonn tropikali; u

e) li jwettqu l-kompiti xjentifiċi l-oħrajn irrakkomandati mill-SCRS u approvati mill-Kummissjoni tal-ICCAT.

L-obbligi tal-osservaturi

8. Il-PKK għandhom jiżguraw li l-osservaturi:

a) ma jbagħbsux it-tagħmir elettroniku tal-bastiment;

b) ikunu jafu l-proċeduri ta’ emerġenza ta’ abbord il-bastiment, fost l-oħrajn, fejn jinsabu ċ-ċattri tas-salvataġġ, l-apparati tat-tifi tan-nar u l-kaxxi għall-ewwel għajnuna;

c) jikkomunikaw, skont il-bżonn, mal-kaptan dwar kwistjonijiet u kompiti li huma rilevanti għalihom;

d) ma jfixklux l-attivitajiet tas-sajd u l-attivitajiet normali tal-bastiment u lanqas ma jindaħlu fihom;

e) jieħdu sehem fis-sessjonijiet ta’ informazzjoni mar-rappreżentanti rilevanti tal-istitut xjentifiku jew tal-awtorità domestika responsabbli mill-implimentazzjoni tal-programm tal-osservaturi.

L-obbligi tal-kaptan

9. Il-PKK għandhom jiżguraw li l-kaptan tal-bastiment li fuqu jkun assenjat l-osservatur:

a) jippermetti l-aċċess ix-xieraq għall-bastiment u għall-attivitajiet ta’ fuqu;

b) jippermetti lill-osservatur iwettaq dmirijietu b’mod effettiv, fost affarijiet oħra billi:

i. jipprovdi l-aċċess ix-xieraq għall-irkaptu tal-bastiment, għad-dokumenti tiegħu (inklużi l-ġurnali ta’ abbord, kemm dawk elettroniċi, kif ukoll dawk fuq il-karta), u għall-qabdiet tiegħu;

ii. jiffaċilita l-komunikazzjoni fi kwalunkwe ħin mar-rappreżentanti rilevanti tal-istitut xjentifiku jew tal-awtorità domestika;

iii. jiżgura l-aċċess ix-xieraq għat-tagħmir elettroniku u għal tagħmir ieħor rilevanti għas-sajd, li jinkludi t-tagħmir li ġej, iżda li mhuwiex limitat għalih:

- it-tagħmir ta’ navigazzjoni bis-satellita;

- il-mezzi ta’ komunikazzjoni elettroniċi;

iv. jiżgura li l-ebda persuna li tkun abbord il-bastiment li jkun qed jiġi osservat ma timmanipula jew teqred xi apparat jew xi dokument tal-osservaturi; ma timpedixxi lill-osservaturi milli jwettqu dmirijiethom, jew tindaħal jew tagħmel xi ħaġa oħra biex ma tħallihomx jagħmlu xogħolhom; b’xi mod tbeżża’, tagħti fastidju, jew tweġġa’ lill-osservaturi; jew ixxaħħamhom jew tipprova xxaħħamhom;

c) jagħti l-akkomodazzjoni lill-osservaturi, inkluż xi mkien fejn joqogħdu, ikel u faċilitajiet sanitarji u mediċi xierqa, li tkun l-istess bħalma jingħataw l-uffiċjali;

d) jagħti biżżejjed spazju lill-osservaturi biex iwettqu l-kompiti tagħhom fuq il-pont tan-navigazzjoni jew fil-kamra tat-tmunier, u biżżejjed spazju fuq il-gverta sabiex ikunu jistgħu jwettqu l-kompiti ta’ osservazzjoni tagħhom.

Id-dmirijiet tal-PKK

10. Kull PKK għandha:

a) teżiġi li meta l-bastimenti tagħha jkunu qed jistadu għall-ispeċijiet tal-ICCAT, ikollhom abbord osservatur xjentifiku bi qbil mad-dispożizzjonijiet ta’ din ir-Rakkomandazzjoni;

b) tissorvelja s-sikurezza tal-osservaturi tagħha;

c) fejn ikun fattibbli u xieraq, tħeġġeġ lill-istitut xjentifiku jew lill-awtorità domestika tagħha jagħmlu ftehimiet mal-istituti xjentifiċi jew mal-awtoritajiet domestiċi ta’ PKK oħrajn biex jiskambjaw ir-rapporti u d-dejta tal-osservaturi bejniethom;

d) tipprovdi, fir-Rapport Annwali tagħha lill-Kummissjoni tal-ICCAT u lill-SCRS, informazzjoni speċifika dwar l-implimentazzjoni ta’ din ir-Rakkomandazzjoni, li għandha tinkludi:

i. dettalji dwar l-istruttura u t-tfassil tal-programmi tal-osservaturi xjentifiċi tagħha li għandhom jinkludu, fost affarijiet oħra:

- il-livell fil-mira tal-kopertura tal-osservaturi skont it-tipi ta’ sajd u t-tipi ta’ rkaptu, kif ukoll kif dan se jitkejjel;

- id-dejta li jenħtieġ li tinġabar;

- il-protokolli fis-seħħ għall-ġbir tad-dejta u għall-manipulazzjoni tal-kampjuni;

- l-informazzjoni dwar kif jintagħżlu l-bastimenti li jkunu se jiġu koperti biex jintlaħaq il-livell fil-mira tal-kopertura tal-osservaturi tal-PKK;

- ir-rekwiżiti marbutin mat-taħriġ tal-osservaturi; u

- ir-rekwiżiti marbutin mal-kwalifiki tal-osservaturi;

ii. l-għadd ta’ bastimenti ssorveljati u l-livell ta’ kopertura li jinkiseb, skont it-tipi ta’ sajd u t-tipi ta’ rkaptu; u

iii. dettalji dwar kif ġew ikkalkulati dawk il-livelli ta’ kopertura;

e) wara l-ewwel preżentazzjoni tal-informazzjoni meħtieġa skont il-paragrafu 10(d)(i), tirrapporta l-bidliet fl-istruttura u/jew fit-tfassil tal-programmi tal-osservaturi tagħha fir-Rapporti Annwali tagħha meta jseħħu dawn il-bidliet biss. Kull sena, il-PKK għandhom jibqgħu jirrappurtaw l-informazzjoni meħtieġa skont il-paragrafu 10(d)(ii) lill-Kummissjoni tal-ICCAT;

f) kull sena, bl-użu tal-formati elettroniċi magħżulin li jiġu żviluppati mill-SCRS, tirrapporta lill-SCRS l-informazzjoni li tkun inġabret permezz tal-programmi domestiċi tal-osservaturi tagħha biex din tintuża mill-Kummissjoni tal-ICCAT, b’mod partikolari għall-valutazzjoni tal-istokkijiet u għal skopijiet xjentifiċi oħra, bi qbil mal-proċeduri fis-seħħ għar-rekwiżiti l-oħrajn dwar ir-rappurtar tad-dejta u b’konsistenza mar-rekwiżiti domestiċi tal-kunfidenzjalità;

g) tiżgura l-implimentazzjoni ta’ protokolli sodi għall-ġbir tad-dejta mill-osservaturi tagħha waqt li dawn ikunu qegħdin iwettqu l-kompiti tagħhom imsemmija fil-paragrafu 7, inkluż, meta jkun hemm bżonn, li jittieħdu r-ritratti.

Id-dmirijiet tas-segretarju eżekuttiv

11. Is-segretarju eżekuttiv jiffaċilita l-aċċess tal-SCRS u tal-Kummissjoni tal-ICCAT għad-dejta u għall-informazzjoni rilevanti li titressaq skont din ir-Rakkomandazzjoni.

Id-dmirijiet tal-SCRS

12. L-SCRS għandu:

a) jiżviluppa skont il-bżonn u r-rilevanza, manwal ta’ ħidma għall-osservaturi li jista’ jintuża b’mod fakultattiv mill-PKK fil-programmi domestiċi tal-osservaturi tagħhom. Dan ikun jinkludi mudelli tal-formuli għall-ġbir tad-dejta u proċeduri standardizzati għall-ġbir tad-dejta, li jkunu tfasslu filwaqt li tqiesu l-manwali għall-osservaturi u l-materjali relatati li diġà jkunu jeżistu minn sorsi oħrajn, fosthom mingħand il-PKK, il-korpi reġjonali u sottoreġjonali u organizzazzjonijiet oħrajn;

b) jiżviluppa linji gwida speċifiċi għas-sajd dwar is-sistemi elettroniċi ta’ monitoraġġ;

c) jipprovdi sommarju tad-dejta xjentifika u tal-informazzjoni li tkun inġabret u ġiet irrappurtata skont din ir-Rakkomandazzjoni, u kull sejba assoċjata rilevanti lill-Kummissjoni tal-ICCAT;

d) jagħmel ir-rakkomandazzjonijiet neċessarji u rilevanti dwar kif tiżdied l-effikaċja tal-programmi tal-osservaturi xjentifiċi biex jintlaħqu l-bżonnijiet tad-dejta tal-Kummissjoni tal-ICCAT, inklużi r-reviżjonijiet possibbli ta’ din ir-Rakkomandazzjoni, u/jew dwar l-implimentazzjoni mill-PKK ta’ l-istandards u l-protokolli minimi mniżżlin f’dan l-Anness.

Is-sistemi elettroniċi ta’ monitoraġġ

13. Is-sistemi elettroniċi ta’ monitoraġġ jistgħu jiġu installati abbord il-bastimenti tas-sajd biex jikkumplimentaw ix-xogħol tal-osservaturi umani abbord il-bastiment jew biex joħdulu postu, sakemm jinħareġ il-parir tal-SCRS u tittieħed deċiżjoni mill-Kummissjoni tal-ICCAT, meta l-SCRS ikun stabbilixxa li dawn is-sistemi huma effettivi għal ċertu tip ta’ sajd partikulari.

14. Jeħtieġ li l-PKK jikkunsidraw il-linji gwida applikabbli li jkun approva l-SCRS dwar l-użu tas-sistemi elettroniċi ta’ monitoraġġ.

15. Il-PKK huma mħeġġa jirrappurtaw lill-SCRS l-esperjenzi tagħhom b’rabta mal-użu tas-sistemi elettroniċi ta’ monitoraġġ fis-sajd tal-ICCAT tagħhom biex jikkumplimentaw il-programmi tal-osservaturi umani tagħhom. Il-PKK li għadhom ma implimentawx dawn is-sistemi huma mħeġġa jippruvaw jużawhom u jirrappurtaw is-sejbiet tagħhom lill-SCRS.