IL-KUMMISSJONI EWROPEA
Brussell, 18.4.2018
COM(2018) 199 final
2018/0097(COD)
Proposta għal
REGOLAMENT TAL-PARLAMENT EWROPEW U TAL-KUNSILL
li jemenda r-Regolament (KE) Nru 110/2008 f’dak li għandu x’jaqsam mal-kwantitajiet nominali għat-tqegħid fis-suq tal-Unjoni tal-ispirtu ddistillat darba biss imsejjaħ “FMT:Italicshochu/FMT”, li jsir fil-Ġappun b’lampik tat-tip “pot still” u li jiġi bbottiljat f’dan il-pajjiż
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u għanijiet tal-proposta
Fid-29 ta’ Novembru 2012, il-Kunsill awtorizza lill-Kummissjoni tibda n-negozjati mal-Ġappun dwar Ftehim ta’ Kummerċ Ħieles.
Il-Kummissjoni nnegozjat Ftehim ambizzjuż u komprensiv ta’ Sħubija Ekonomika mal-Ġappun abbażi tad-direttivi għan-negozjar li l-Kunsill kien adotta fl-2012 1 , bil-għan li jinħolqu opportunitajiet ġodda u tingħata ċ-ċertezza legali sabiex ikunu jistgħu jiżviluppaw il-kummerċ u l-investiment bejn iż-żewġ naħat. It-testi li ntlaħaq qbil dwarhom fi tmiem in-negozjati ġew ippubblikati u jinsabu fis-sit web li ġej:
http://trade.ec.europa.eu/doclib/press/index.cfm?id=1684.
Din il-proposta qed issir fl-istess ħin li qed isiru l-proposti li ġejjin:
-Proposta għal Deċiżjoni tal-Kunsill dwar l-iffirmar f’isem l-Unjoni Ewropea tal-Ftehim ta’ Sħubija Ekonomika bejn l-Unjoni Ewropea u l-Ġappun;
-Proposta għal Deċiżjoni tal-Kunsill dwar il-konklużjoni tal-Ftehim ta’ Sħubija Ekonomika bejn l-Unjoni Ewropea u l-Ġappun;
-Proposta għal Regolament li jimplimenta d-dispożizzjonijiet ta’ salvagwardja li se jkopri s-salvagwardji previsti fil-Ftehim ta’ Sħubija Ekonomika bejn l-UE u l-Ġappun.
Din il-proposta tal-Kummissjoni għandha l-għan li timplimenta d-dispożizzjonijiet tal-Ftehim ta’ Sħubija Ekonomika bejn l-UE u l-Ġappun f’dak li għandu x’jaqsam mal-esportazzjoni, mill-Ġappun lejn l-Unjoni, tal-ispirtu ddistillat darba biss, imsejjaħ “shochu”, li jsir fil-Ġappun b’lampik tat-tip “pot still” u li jiġi bbottiljat f’dan il-pajjiż, u li għandu jiġi esportat lejn l-Unjoni fi fliexken tradizzjonali ta’ erba’ “go” （合） jew ta’ “sho” wieħed （升) 2 .
•Konsistenza mad-dispożizzjonijiet eżistenti f’dan il-qasam ta’ politika
Il-Ftehim ta’ Sħubija Ekonomika bejn l-UE u l-Ġappun huwa konsistenti għalkollox mal-politiki tal-Unjoni, u l-UE mhu se jkollha bżonn temenda l-ebda regola, regolament jew standard tagħha fl-ebda qasam irregolat minħabba fih (pereżempju r-regoli tekniċi u l-istandards tal-prodotti, ir-regoli sanitarji u fitosanitarji, ir-regolamenti dwar l-ikel u dwar is-sikurezza, l-istandards tas-saħħa u tas-sikurezza, ir-regoli dwar l-organiżmi ġenetikament modifikati, ir-regoli dwar il-ħarsien ambjentali u r-regoli dwar il-ħarsien tal-konsumaturi) - hija se jkollha biss iddaħħal deroga sabiex tiġi ffaċilitata l-esportazzjoni Ġappuniża tal-ispirtu ddistillat darba biss imsejjaħ “shochu”, li jsir fil-Ġappun b’lampik tat-tip “pot still” u li jiġi bbottiljat f’dan il-pajjiż, u li dan il-pajjiż jesporta fi fliexken tradizzjonali ta’ erba’ “go” （合） jew ta’ “sho” wieħed （升).
Din il-proposta tal-Kummissjoni għandha l-għan li ddaħħal deroga mir-regoli tal-Unjoni dwar id-daqs tal-fliexken għall-ispirtu ddistillat darba biss imsejjaħ “shochu”, li jsir fil-Ġappun b’lampik tat-tip “pot still” u li jiġi bbottiljat f’dan il-pajjiż, u li jinbiegħ b’mod tradizzjonali fi fliexken ta’ erba’ “go” （合） jew ta’ “sho” wieħed （升), li jikkorrispondu għal kwantitajiet nominali ta’ 720 ml (minħabba li “go” wieħed jikkorrispondi għal 180 ml) u ta’ 1 800 ml rispettivament, li bħalissa mhumiex fost il-kwantitajiet nominali permessi fl-Unjoni skont id-Direttiva 2007/45/KE li tistabbilixxi r-regoli dwar il-kwantitajiet nominali tal-prodotti imballati minn qabel.
•Konsistenza ma’ politiki oħra tal-Unjoni
Il-Ftehim ta’ Sħubija Ekonomika bejn l-UE u l-Ġappun huwa konsistenti għalkollox mal-politiki tal-Unjoni, u l-UE mhi se jkollha bżonn temenda l-ebda regola, regolament jew standard tagħha fl-ebda qasam irregolat minħabba fih (pereżempju r-regoli tekniċi u l-istandards tal-prodotti, ir-regoli sanitarji u fitosanitarji, ir-regolamenti dwar l-ikel u dwar is-sikurezza, l-istandards tas-saħħa u tas-sikurezza, ir-regoli dwar l-organiżmi ġenetikament modifikati, ir-regoli dwar il-ħarsien ambjentali u r-regoli dwar il-ħarsien tal-konsumaturi).
2.BAŻI ĠURIDIKA, SUSSIDJARJETÀ U PROPORZJONALITÀ
•Bażi ġuridika
L-Artikolu 114(1) tat-Trattat dwar il-Funzjonament tal-Unjoni Ewropea, minħabba li din il-proposta temenda r-Regolament (KE) Nru 110/2008 tal-Parlament Ewropew u tal-Kunsill tal-15 ta’ Jannar 2008 dwar id-definizzjoni, id-deskrizzjoni, il-preżentazzjoni, l-ittikkettar, u l-protezzjoni ta’ indikazzjonijiet ġeografiċi, ta’ xorb spirituż u li jħassar ir-Regolament tal-Kunsill (KEE) Nru 1576/89 (ĠU L 39, 13.2.2008, p. 16).
•Sussidjarjetà (għall-kompetenza mhux esklużiva)
Skont l-Artikolu 3 tat-TFUE, il-politika kummerċjali komuni, li fil-kuntest tagħha għandu jiġi ffirmat il-Ftehim ta’ Sħubija Ekonomika bejn l-UE u l-Ġappun, tidħol fil-kompetenza esklużiva tal-Unjoni.
Din il-proposta timplimenta dispożizzjoni tal-Ftehim ta’ Sħubija Ekonomika bejn l-UE u l-Ġappun, li tikkonsisti minn deroga mir-regoli attwali tal-Unjoni dwar il-kwantitajiet nominali tal-ispirti li jistgħu jitqiegħdu fis-suq (mogħtija fid-Direttiva 2007/45/KE) għall-ispirtu ddistillat darba biss imsejjaħ “shochu”. Deroga bħal din tista’ tiddaħħal biss permezz ta’ leġiżlazzjoni tal-Unjoni.
•Proporzjonalità
Il-Ftehim ta’ Sħubija Ekonomika bejn l-UE u l-Ġappun jikkonforma mal-istrateġija Ewropa 2020 u jikkontribwixxi għall-għanijiet tal-UE fl-oqsma tal-kummerċ u tal-iżvilupp. Din il-proposta tal-Kummissjoni għandha l-għan li timplimenta dispożizzjoni tal-Ftehim ta’ Sħubija Ekonomika bejn l-UE u l-Ġappun fl-ordni legali tal-Unjoni.
•Għażla tal-istrument
Id-deroga li qed tiġi proposta biex jiġi implimentat il-Ftehim ta’ Sħubija Ekonomika bejn l-UE u l-Ġappun tista’ tiddaħħal biss permezz ta’ Regolament minħabba li trid tapplika fl-istess ħin fl-Istati Membri kollha malli jidħol fis-seħħ il-Ftehim ta’ Sħubija Ekonomika bejn l-UE u l-Ġappun.
3.RIŻULTATI TAL-EVALWAZZJONIJIET EX-POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
•Konsultazzjonijiet mal-partijiet ikkonċernati
•Ġbir u użu tal-kompetenzi
•Valutazzjoni tal-impatt
Saru evalwazzjonijiet u konsultazzjonijiet mal-partijiet ikkonċernati bħala parti mill-proċess li wassal għall-konklużjoni tal-Ftehim ta’ Sħubija Ekonomika bejn l-UE u l-Ġappun. Id-dettalji dwar dawk l-evalwazzjonijiet u dawk il-konsultazzjonijiet jinsabu fil-proposta tal-Kummissjoni għal Deċiżjoni tal-Kunsill dwar l-iffirmar f’isem l-Unjoni Ewropea tal-Ftehim ta’ Sħubija Ekonomika bejn l-Unjoni Ewropea u l-Ġappun.
Il-kuntrattur estern “London School of Economics Enterprises” wettaq Valutazzjoni tal-Impatt fuq is-sostenibbiltà kummerċjali tal-Ftehim ta’ Sħubija Ekonomika bejn l-UE u l-Ġappun. Id-dettalji dwar din il-valutazzjoni jinsabu fil-proposta tal-Kummissjoni għal Deċiżjoni tal-Kunsill dwar l-iffirmar f’isem l-Unjoni Ewropea tal-Ftehim ta’ Sħubija Ekonomika bejn l-Unjoni Ewropea u l-Ġappun.
Il-proċeduri tar-REFIT ma japplikawx għall-Ftehim ta’ Sħubija Ekonomika bejn l-UE u l-Ġappun. U lanqas ma japplikaw għal din il-proposta.
•Drittijiet fundamentali
Il-proposta ma taffettwax il-ħarsien tad-drittijiet fundamentali fl-Unjoni.
4.IMPLIKAZZJONIJIET BAĠITARJI
Din il-proposta ma għandha l-ebda implikazzjoni baġitarja għall-Unjoni.
Il-Ftehim ta’ Sħubija Ekonomika bejn l-UE u l-Ġappun se jkollu impatt finanzjarju fuq il-baġit tal-Unjoni mil-lat tad-dħul. Qed jiġi stmat li d-dazji mitlufin jistgħu jilħqu ammont ta’ EUR 1,6 biljun ladarba jiġi implimentat għalkollox il-Ftehim.
5.ELEMENTI OĦRA
•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar
Għal din il-proposta mhu previst l-ebda pjan speċifiku ta’ implimentazzjoni jew arranġament speċifiku dwar ir-rapportar.
•Dokumenti ta’ spjegazzjoni (għad-direttivi)
Mhumiex rilevanti.
•Spjegazzjoni fid-dettall tad-dispożizzjonijiet speċifiċi tal-proposta
Il-proposta ddaħħal deroga speċifika mill-kwantitajiet nominali għall-ispirti stabbiliti fl-Artikolu 3 tad-Direttiva 2007/45/KE u fit-Taqsima 1 tal-Anness tagħha għall-ispirtu ddistillat darba biss imsejjaħ “shochu”, li jsir fil-Ġappun b’lampik tat-tip “pot still” u li jiġi bbottiljat f’dan il-pajjiż, sabiex dan ikun jista’ jitqiegħed fis-suq tal-Unjoni fi fliexken tradizzjonali ta’ erba’ “go” （合） jew ta’ “sho” wieħed （升), li jikkorrispondu għal kwantitajiet nominali ta’ 720 ml u ta’ 1 800 ml rispettivament, dejjem jekk dan l-ispirtu jkun jissodisfa r-rekwiżiti l-oħrajn tal-Unjoni għat-tali spirti.
2018/0097 (COD)
Proposta għal
REGOLAMENT TAL-PARLAMENT EWROPEW U TAL-KUNSILL
li jemenda r-Regolament (KE) Nru 110/2008 f’dak li għandu x’jaqsam mal-kwantitajiet nominali għat-tqegħid fis-suq tal-Unjoni tal-ispirtu ddistillat darba biss imsejjaħ “shochu”, li jsir fil-Ġappun b’lampik tat-tip “pot still” u li jiġi bbottiljat f’dan il-pajjiż
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 114(1) tiegħu,
Wara li kkunsidraw il-proposta tal-Kummissjoni Ewropea,
Wara li l-abbozz tal-att leġiżlattiv intbagħat lill-parlamenti nazzjonali,
Wara li kkunsidraw l-opinjoni tal-Kumitat Ekonomiku u Soċjali Ewropew 3 ,
Filwaqt li jaġixxu skont il-proċedura leġiżlattiva ordinarja,
Billi:
(1)Permezz ta’ Deċiżjoni li adotta fid-29 ta’ Novembru 2012, il-Kunsill awtorizza lill-Kummissjoni tibda n-negozjati mal-Ġappun dwar Ftehim ta’ Kummerċ Ħieles.
(2)In-negozjati dwar Ftehim ta’ Sħubija Ekonomika bejn l-Unjoni Ewropea u l-Ġappun (minn hawn ’il quddiem imsejjaħ “il-Ftehim”) tlestew b’suċċess.
(3)L-Anness 2-D tal-Ftehim jipprevedi li l-ispirtu ddistillat darba biss imsejjaħ “shochu”, kif iddefinit fis-sottoparagrafu 10 tal-Artikolu 3 tal-Liġi Ġappuniża dwar it-taxxa fuq l-alkoħol (il-Liġi Nru 6 tal-1953), li jsir fil-Ġappun b’lampik tat-tip “pot still” u li jiġi bbottiljat f’dan il-pajjiż, għandu jitħalla jitqiegħed fis-suq tal-Unjoni Ewropea fi fliexken tradizzjonali ta’ daqs ta’ erba’ “go” （合) jew ta’ “sho” wieħed (升）, li jikkorrispondu għal kwantitajiet nominali ta’ 720 ml u ta’ 1 800 ml rispettivament, dejjem jekk jiġu ssodisfati r-rekwiżiti legali l-oħrajn tal-Unjoni Ewropea.
(4)L-Artikolu 3 tad-Direttiva 2007/45/KE tal-Parlament Ewropew u tal-Kunsill 4 jipprevedi li l-ispirti mqiegħda f’imballaġġi minn qabel jistgħu jitqiegħdu fis-suq tal-Unjoni biss jekk ikunu imballati minn qabel fil-kwantitajiet nominali elenkati fit-Taqsima 1 tal-Anness ta’ dik id-Direttiva. Fit-Taqsima 1 tal-Anness tad-Direttiva 2007/45/KE jingħataw disa’ kwantitajiet nominali għall-ispirti fil-medda bejn 100 ml u 2 000 ml. Dawn il-kwantitajiet nominali ma jinkludux il-kwantitajiet ta’ 720 ml u 1 800 ml, li huma l-kwantitajiet nominali li fihom jiġi bbottiljat u kkummerċjalizzat fil-Ġappun l-ispirtu ddistillat darba biss imsejjaħ “shochu”, li jsir b’lampik tat-tip “pot still”.
(5)Għalhekk hemm bżonn ta’ deroga mill-kwantitajiet nominali stabbiliti għall-ispirti fl-Anness tad-Direttiva 2007/45/KE sabiex ikun żgurat li l-ispirtu ddistillat darba biss imsejjaħ “shochu”, li jsir fil-Ġappun b’lampik tat-tip “pot still” u li jiġi bbottiljat f’dan il-pajjiż, ikun jista’ jitqiegħed fis-suq tal-Unjoni fi fliexken tradizzjonali li jkunu jesgħu kwantitajiet nominali ta’ 720 ml u ta’ 1 800 ml, li jikkorrispondu għall-fliexken Ġappuniżi tad-daqsijiet ta’ erba’ “go” （合) u ta’ “sho” wieħed (升）rispettivament, kif stabbilit fil-Ftehim.
(6)Din id-deroga trid tiddaħħal permezz ta’ emenda tar-Regolament (KE) Nru 110/2008 tal-Parlament Ewropew u tal-Kunsill 5 sabiex ikun żgurat li l-ispirtu ddistillat darba biss imsejjaħ “shochu”, li jsir fil-Ġappun b’lampik tat-tip “pot still” u li jiġi bbottiljat f’dan il-pajjiż, ikun jista’ jitqiegħed fis-suq tal-Istati Membri kollha fl-istess ħin malli jidħol fis-seħħ il-Ftehim.
(7)Għalhekk jenħtieġ li r-Regolament (KE) Nru 110/2008 jiġi emendat.
(8)Sabiex jiġi implimentat il-Ftehim f’dak li għandu x’jaqsam mat-tqegħid fis-suq tal-Unjoni tal-ispirtu ddistillat darba biss imsejjaħ “shochu”, li jsir fil-Ġappun b’lampik tat-tip “pot still” u li jiġi bbottiljat f’dan il-pajjiż, jenħtieġ li dan ir-Regolament jibda japplika mid-data tad-dħul fis-seħħ tal-Ftehim,
ADOTTAW DAN IR-REGOLAMENT:
Artikolu 1
Ir-Regolament (KE) Nru 110/2008 huwa emendat kif ġej:
fil-Kapitolu IV jiżdied l-Artikolu 24a li ġej:
“Artikolu 24a
Deroga mid-Direttiva 2007/45/KE
B’deroga mill-Artikolu 3 tad-Direttiva 2007/45/KE tal-Parlament Ewropew u tal-Kunsill* u mis-sitt ringiela tat-Taqsima 1 tal-Anness ta’ dik id-Direttiva, l-ispirtu ddistillat darba biss imsejjaħ “shochu”**, li jsir fil-Ġappun b’lampik tat-tip “pot still” u li jiġi bbottiljat f’dan il-pajjiż, jista’ jitqiegħed fis-suq tal-Unjoni fi kwantitajiet nominali ta’ 720 ml u ta’ 1 800 ml.
----------------------------
* Id-Direttiva 2007/45/KE tal-Parlament Ewropew u tal-Kunsill tal-5 ta’ Settembru 2007 li tistabbilixxi regoli dwar kwantitajiet nominali għal prodotti imballati minn qabel, li tħassar id-Direttivi tal-Kunsill 75/106/KEE u 80/232/KEE, u li temenda d-Direttiva tal-Kunsill 76/211/KEE (ĠU L 247, 21.9.2007, p. 17).
** Kif imsemmi fl-Anness 2-D tal-Ftehim ta’ Sħubija Ekonomika bejn l-Unjoni Ewropea u l-Ġappun.”
Artikolu 2
Dan ir-Regolament għandu jidħol fis-seħħ fil-[…] jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Għandu jibda japplika mid-data tad-dħul fis-seħħ tal-Ftehim ta’ Sħubija Ekonomika bejn l-Unjoni Ewropea u l-Ġappun.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell,
Għall-Parlament Ewropew Għall-Kunsill
Il-President Il-President