IL-KUMMISSJONI EWROPEA
Brussell, 9.3.2018
COM(2018) 121 final
2018/0055(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tieħu l-Unjoni Ewropea fil-Kunsill tal-Ministri AKP-UE dwar ir-reviżjoni tal-Anness IC tal-Ftehim ta’ Sħubija AKP-UE
MEMORANDUM TA’ SPJEGAZZJONI
1.Suġġett tal-proposta
Din il-proposta tirrigwarda d-deċiżjoni li tistabbilixxi l-pożizzjoni li trid tittieħed f'isem l-Unjoni fil-Kunsill tal-Ministri AKP-UE b’rabta mal-adozzjoni prevista ta’ deċiżjoni tal-Kunsill tal-Ministri li tirrigwarda t-tqassim mill-ġdid ta’ fondi għall-allokazzjoni għall-finanzjament tal-kooperazzjoni interreġjonali u intra-AKP ma’ ħafna jew mal-Istati kollha tal-AKP.
2.Kuntest tal-proposta
2.1.Il-Ftehim ta' Sħubija AKP-UE ("il-Ftehim ta' Cotonou")
Il-Ftehim ta' Sħubija AKP-UE 1 ("il-Ftehim") għandu l-għan li jwaqqaf Assoċjazzjoni bejn l-Unjoni Ewropea u l-Istati AKP. Il-Ftehim daħal fis-seħħ fl-1 ta’ April 2003 u ġie rivedut fl-2005 u fl-2010 skont il-klawżola ta’ reviżjoni sabiex il-Ftehim jiġi eżaminat kull ħames snin.
B’konformità mal-Artikolu 95(2) tal-Ftehim, il-protokolli ta’ finanzjament huma definiti għal perjodu speċifiku. Tali protokolli finanzjarji jistabbilixxu l-ammont ġenerali tal-assistenza finanzjarja tal-UE.
Il-protokoll finanzjarju ġie adottat mid-Deċiżjoni Nru 1/2013 tal-Kunsill ta’ Ministri AKP-UE tas-7 ta’ Ġunju 2013 għall-perjodu 2014-2020 2 : jieħu l-forma tal-Anness IC għall-Ftehim.
L-Artikolu 100 tal-Ftehim ta’ Sħubija AKP-UE jiddikjara li l-Annessi tiegħu jistgħu jiġu riveduti u / jew emendati mill-Kunsill tal-Ministri AKP-UE fuq il-bażi ta’ rakkomandazzjoni mill-Kumitat ta’ Kooperazzjoni għall-Finanzjament tal-Iżvilupp AKP-EU.
Il-punt 2(b) tal-Artikolu 15 tal-Ftehim jiddikjara li l-funzjonijiet tal-Kunsill tal-Ministri AKP-UE għandhom ikunu li jieħdu d-deċiżjonijiet meħtieġa għall-implimentazzjoni tad-dispożizzjoni tal-“Ftehim”.
2.2.Il-Kunsill tal-Ministri AKP-UE
Il-Kunsill tal-Ministri AKP-UE jista’ jieħu deċiżjonijiet li jkunu legalment vinkolanti fuq il-Partijiet. Il-Kunsill tal-Ministri jinkludi, fuq naħa waħda, il-membri tal-Kunsill tal-Unjoni Ewropea u, fuq in-naħa l-oħra, membru mill-gvern ta’ kull Stat tal-AKP. Alternattivament, l-uffiċċju tal-President tal-Kunsill tal-Ministri jinżamm minn membru tal-Kunsill tal-Unjoni Ewropea u membru mill-gvern ta’ kull Stat tal-AKP. Bħala regola, il-Kunsill jiltaqa’ darba fis-sena bl-inizjattiva tal-President u kull meta jqis meħtieġ, f’forma u kompożizzjoni ġeografika xierqa għall-kwistjonijiet li jridu jiġu indirizzati.
2.3.L-att previst tal-Kunsill tal-Ministri AKP-UE
Il-Kunsill tal-Ministri AKP-UE għandu jadotta deċiżjoni rigward il-modifika tal-Anness IC tal-Ftehim ta’ Sħubija AKP-UE (“l-att previst”).
Id-Deċiżjoni tapplika għall-Anness IC, il-punti 2(a) u 2(b) u tikkonċerna t-tqassim mill-ġdid ta’ fondi għall-allokazzjoni għall-finanzjament tal-kooperazzjoni interreġjonali u intra-AKP ma’ ħafna jew mal-istati kollha tal-AKP.
Minn naħa, EUR 425 miljun se jitnaqqsu mill-allokazzjoni għall-finanzjament tal-programmi indikattivi nazzjonali u reġjonali msemmija fil-punt 2(a) tal-Anness IC.
Min-naħa l-oħra, l-allokazzjoni għall-finanzjament tal-kooperazzjoni interreġjonali u intra-AKP, imsemmija fil-punt 2(b) tal-Anness IC se tiżdied b’EUR 425 miljun biex tikkontribwixxi għall-finanzjament taż-żewġ inizjattivi, jiġifieri l-Inizjattiva Spotlight u s-Sħubija Globali għall-Edukazzjoni (GPE).
L-inizjattiva Spotlight hija azzjoni globali konġunta bejn l-UE u n-NU mmirata lejn il-prevenzjoni u r-rispons għall-vjolenza kontra n-nisa u l-bniet fil-pajjiżi fil-mira.
L-objettiv globali tal-GPE huwa li jimmobilizza l-isforzi globali u nazzjonali biex jinkisbu edukazzjoni u tagħlim ta’ kwalità għal kulħadd permezz ta’ sħubija inklużiva, enfasi fuq sistemi ta’ edukazzjoni effettivi u l-finanzjament għall-edukazzjoni bażika.
Il-finanzjament se jiġi allokat permezz tal-FEŻ, mir-riżerva ġenerali għall-Programmi Indikattivi Nazzjonali u Reġjonali sal-kooperazzjoni intra-AKP kif ġej:
- Ammont ta’ EUR 350 miljun huwa allokat għall-inizjattiva Spotlight;
- Ammont ta’ EUR 75 miljun huwa allokat għall-GPE.
L-att ippjanat isir vinkolanti fuq il-partijiet f'konformità mal-Artikolu 15.3 tal-Ftehim li jipprevdi li “l-Kunsill tal-Ministri AKP-UE jista’ jieħu deċiżjonijiet li jkunu vinkolanti fuq il-Partijiet”.
3.Pożizzjoni li għandha tittieħed f'isem l-Unjoni
Skont l-Artikolu 100 tal-Ftehim ta’ Sħubija AKP-UE, il-Kunsill tal-Ministri AKP-UE jista’ jirrevedi, jeżamina u / jew jemenda l-Ftehim abbażi ta’ rakkomandazzjoni mill-Kumitat ta’ Kooperazzjoni għall-Finanzjament tal-Iżvilupp AKP-UE.
L-Unjoni Ewropea hija impenjata bil-qawwa favur l-ugwaljanza bejn is-sessi, it-tisħiħ tal-pożizzjoni tan-nisa ta’ kull età u l-eliminazzjoni ta’ kull forma ta’ vjolenza kontra n-nisa u l-bniet madwar id-dinja.
L-inizjattiva Spotlight hija azzjoni globali konġunta bejn l-UE u n-NU mmirata lejn il-prevenzjoni u r-rispons għall-vjolenza kontra n-nisa u l-bniet fil-pajjiżi fil-mira. Ġiet imnedija uffiċjalment fit-Tnejn u Sebgħin (72) sessjoni tal-Assemblea Ġenerali tan-NU fl-20 ta’ Settembru 2017.
Fuq il-bażi tal-evidenza, l-inizjattiva Spotlight se tiffoka fuq forom partikolari ta’ vjolenza sesswali u l-vjolenza abbażi ta’ sess li huma prevalenti jew li joħorġu b’mod prominenti f’reġjuni speċifiċi u b’hekk se tikkontribwixxi biex jintlaħaq l-SDG 5 dwar “Ugwaljanza bejn is-Sessi”.
Se jitnieda mekkaniżmu ta’ Fond Multidonatur għall-inizjattiva dwar is-Sessi, li se jiġi mmaniġġat mill-Uffiċċju Eżekuttiv tas-SĠ tan-NU. Il-finanzjament se jiġi allokat permezz tal-Istrument tal-Kooperazzjoni għall-Iżvilupp (SKŻ) tal-UE għall-Amerka Latina u l-Asja u l-Fond Ewropew għall-Iżvilupp (FEŻ) għal pajjiżi AKP.
L-inizjattiva tal-GPE tappoġġa l-kisba ta’ tliet għanijiet ta’ livell għoli. L-ewwel żewġ għanijiet huma l-ekwità inklużi l-ugwaljanza bejn is-sessi u l-inklużjoni, u t-tagħlim ta’ kwalità. It-tielet għan huwa l-bini ta’ sistemi edukattivi aktar b’saħħithom bil-kapaċità li jagħtu servizzi edukattivi bbilanċjati u ta’ kwalità. L-inizjattiva nħolqot fl-2012 biex twettaq impenji globali tal-edukazzjoni li saru fil-Forum Dinji għall-Edukazzjoni f'Dakar u fis-Summit tal-Millenju.
Il-GPE hija sħubija bejn ħafna partijiet interessati u pjattaforma ta’ finanzjament bil-għan li ssaħħaħ is-sistemi edukattivi f’pajjiżi bi dħul medju baxx, jew iktar baxxi, billi ttejjeb l-pjanijiet settorjali tal-edukazzjoni u l-implimentazzjoni tagħhom.
L-UE, flimkien mal-Grupp ta’ Stati tal-AKP, ilha tappoġġa l-GPE mill-2005. It-tkomplija tal-finanzjament ta’ din is-sħubija taqbel sew mal-qafas ta’ politika tal-UE-AKP.
Iż-żewġ inizjattivi huma u se jkunu f’konformità mal-Kunsens Ewropew dwar l-Iżvilupp li jippromwovi approċċ aktar komprensiv lejn l-iżvilupp uman. Fir-rigward tal-edukazzjoni, dan l-approċċ ifisser aktar għajnuna għal edukazzjoni ta’ kwalità inklużiva u bbilanċjata għal kulħadd u t-tagħlim tul il-ħajja (SDG 4) b’attenzjoni partikolari fuq il-promozzjoni tal-ugwaljanza bejn is-sessi (SDG 5).
B'hekk, il-Kummissjoni qed tipproponi lill-Kunsill jadotta d-deċiżjoni attwali.
4.Bażi ġuridika
4.1.Bażi ġuridika proċedurali
4.1.1.Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jipprevedi deċiżjonijiet li jistabbilixxu “l-pożizzjonijiet li għandhom jiġu adottati f'isem l-Unjoni f'sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim”.
Il-kunċett ta’ “atti li jkollhom effetti legali” jinkludi atti li jkollhom effetti legali skont ir-regoli tad-dritt internazzjonali li jirregola l-korp (“sede”) inkwistjoni. Jinkludi wkoll strumenti li ma għandhomx effett vinkolanti skont id-dritt internazzjonali, iżda li "jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatura tal-Unjoni" 3 .
4.1.2.Applikazzjoni għal dan il-każ
Il-Kunsill tal-Ministri AKP-UE huwa korp stabbilit minn ftehim, jiġifieri l-Ftehim ta’ Cotonou.
L-att li l-Kunsill tal-Ministri AKP-UE huwa msejjaħ li jadotta jikkostitwixxi att b’effetti legali. L-att previst se jkun vinkolanti skont id-dritt internazzjonali b’konformità mal-Artikolu 100 tal-Ftehim ta’ Cotonou.
L-att previst la jissupplimenta u lanqas jemenda l-qafas istituzzjonali tal-Ftehim.
Għalhekk, il-bażi ġuridika proċedurali għad-deċiżjoni proposta hija l-Artikolu 218(9) TFUE.
4.2.Bażi ġuridika sostantiva
4.2.1.Prinċipji
Il-bażi ġuridika sostantiva għal deċiżjoni skont l-Artikolu 218(9) TFUE tiddependi primarjament fuq l-objettiv u l-kontenut tal-att previst li fir-rigward tiegħu tiġi meħuda pożizzjoni f’isem l-Unjoni. Jekk l-att previst ikollu żewġ għanijiet jew ikollu żewġ komponenti, u jekk wieħed minn dawn l-għanijiet jew komponenti jkun identifikabbli bħala l-ewlieni filwaqt li l-ieħor ikun sempliċiment inċidentali, id-deċiżjoni skont l-Artikolu 218(9) TFUE trid tkun imsejsa fuq bażi ġuridika sostantiva waħda, jiġifieri dik rikjesta mill-għan jew mill-komponent ewlieni jew predominanti.
4.2.2.Applikazzjoni għal dan il-każ
L-objettiv u l-kontenut ewlieni tal-att previst jirrigwardaw il-"kooperazzjoni għall-iżvilupp". Għalhekk, il-bażi ġuridika sostantiva għad-deċiżjoni proposta hija l-Artikolu 209(2) TFUE.
4.3.Konklużjoni
Il-bażi ġuridika tad-deċiżjoni proposta jenħtieġ li tkun l-Artikolu 209(2) TFUE flimkien mal-Artikolu 218(9) TFUE.
5.Pubblikazzjoni tal-att previst
Billi l-att tal-Kunsill tal-Ministri AKP-UE se japplika għall-Anness IC tal-Ftehim ta’ Cotonou, huwa xieraq li dan jiġi ppubblikat f’Il-Ġurnal Uffiċjali tal-Unjoni Ewropea wara l-adozzjoni tiegħu.
2018/0055 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tieħu l-Unjoni Ewropea fil-Kunsill tal-Ministri AKP-UE dwar ir-reviżjoni tal-Anness IC tal-Ftehim ta’ Sħubija AKP-UE
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 209 tiegħu, flimkien mal-Artikolu 218(9) tiegħu,
Wara li kkunsidra l-Ftehim ta’ Sħubija bejn il-membri tal-Grupp tal-Istati Afrikani, tal-Karibew u tal-Paċifiku minn naħa waħda, u l-Komunità Ewropea u l-Istati Membri tagħha, min-naħa l-oħra, (minn hawn ’il quddiem imsejjaħ “il-Ftehim ta’ Sħubija AKP-UE") 4 ,
Wara li kkunsidra l-proposta mill-Kummissjoni Ewropea,
Billi:
(1)Il-Ftehim ta' Sħubija bejn il-membri tal-Grupp ta' Stati Afrikani, tal-Karibew u tal-Paċifiku ("AKP"), minn naħa, u l-Komunità Ewropea u l-Istati Membri tagħha, min-naħa l-oħra ("il-Ftehim ta' Sħubija AKP-UE"), ġie ffirmat f'Cotonou fit-23 ta' Ġunju 2000. Il-Ftehim ta’ Sħubija AKP-UE daħal fis-seħħ fl-1 ta’ April 2003 u ġie rivedut fl-2005 u fl-2010 skont il-klawżola ta’ reviżjoni sabiex il-Ftehim jiġi eżaminat kull ħames snin.
(2)B’konformità mal-Artikolu 95(2) tal-Ftehim ta’ Sħubija AKP-UE, il-protokolli ta’ finanzjament huma definiti għal perjodu speċifiku. Tali protokolli finanzjarji jistabbilixxu l-ammont ġenerali tal-assistenza finanzjarja tal-UE. Il-protokoll finanzjarju ġie adottat mid-Deċiżjoni Nru 1/2013 tal-Kunsill ta’ Ministri AKP-UE tas-7 ta’ Ġunju 2013 għall-perjodu 2014-2020 5 , fil-forma ta’ Anness IC tal-Ftehim.
(3)Skont l-Artikolu 100 tal-Ftehim ta’ Sħubija AKP-UE, il-Kunsill tal-Ministri AKP-UE jista’ jirrevedi, jeżamina u / jew jemenda l-Ftehim abbażi ta’ rakkomandazzjoni mill-Kumitat ta’ Kooperazzjoni għall-Finanzjament tal-Iżvilupp AKP-UE.
(4)L-Unjoni għandha tappoġġa t-twassil mill-ġdid ta’ fondi skont l-Anness IC tal-Ftehim ta' Sħubija AKP-UE mill-allokazzjoni għall-finanzjament ta’ programmi indikattivi nazzjonali u reġjonali, għall-allokazzjoni għall-finanzjament tal-kooperazzjoni intra-AKP u dik interreġjonali ma’ ħafna jew mal-istati kollha tal-AKP.
(5)Huwa xieraq li tiġi stabbilita l-pożizzjoni li trid tittieħed f’isem l-Unjoni fil-Kunsill tal-Ministri AKP-UE billi d-Deċiżjoni se tkun vinkolanti fuq l-Unjoni.
ADOTTA DIN ID-DEĊIŻJONI:
Artikolu 1
1.Il-pożizzjoni li trid tittieħed f’isem l-Unjoni fil-Kunsill tal-Ministri AKP-UE fir-rigward tar-reviżjoni tal-Anness IC tal-Ftehim ta’ Sħubija AKP-UE għandha tkun ibbażata fuq l-abbozz tal-att tal-Kunsill tal-Ministri AKP-UE mehmuż ma' din id-Deċiżjoni.
2. Ir-rappreżentanti tal-Unjoni fil-Kunsill tal-Ministri AKP-UE jistgħu jiftiehmu dwar tibdil minuri għall-abbozz tad-Deċiżjoni mingħajr deċiżjoni ulterjuri tal-Kunsill.
Artikolu 2
Wara l-adozzjoni tagħha, id-Deċiżjoni tal-Kunsill tal-Ministri AKP-UE għandha tiġi ppubblikata f’Il-Ġurnal Uffiċjali tal-Unjoni Ewropea.
Artikolu 3
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell,9.3.2018
COM(2018) 121 final
ANNESS
ta' [...]
Proposta ta'
DEĊIŻJONI TAL-KUNSILL
dwar il-pożizzjoni li għandha tieħu l-Unjoni Ewropea fil-Kunsill tal-Ministri AKP-UE dwar ir-reviżjoni tal-Anness IC tal-Ftehim ta' Sħubija AKP-UE
ANNESS
DEĊIŻJONI Nru .../2018
TAL-KUNSILL TAL-MINISTRI AKP-UE
ta’ ../../2018
dwar ir-reviżjoni tal-Anness IC tal-Ftehim ta’ Sħubija AKP-UE
IL-KUNSILL TAL-MINISTRI AKP-UE
Wara li kkunsidra l-ftehim ta’ sħubija bejn il-Membri tal-Grupp tal-Istati Afrikani, tal-Karibew u tal-Paċifiku, minn naħa waħda, u l-Komunità Ewropea u l-Istati Membri tagħha, min-naħa l-oħra 1 , (minn hawn 'il quddiem “il-Ftehim ta’ Sħubija AKP-UE”), u partikolarment l-Artikolu 15(2) tiegħu, flimkien mal-Artikoli 100 tiegħu;
Billi:
(1)Skont l-Artikolu 15(2) tal-Ftehim ta’ Sħubija AKP-UE, il-funzjonijiet tal-Kunsill tal-Ministri jinkludu t-teħid ta’ kull deċiżjoni biex tiġi żgurata l-implimentazzjoni effettiva u effiċjenti tal-Ftehim.
(2)L-Artikolu 100 tal-Ftehim ta’ Sħubija AKP-UE jiddikjara li l-Annessi tiegħu jista’ jiġi riveduti, eżaminat u / jew emendati mill-Kunsill tal-Ministri AKP-UE fuq il-bażi ta’ rakkomandazzjoni mill-Kumitat ta’ Kooperazzjoni għall-Finanzjament tal-Iżvilupp AKP-UE.
(3)Jinħtieġ li l-Anness IC tal-Ftehim ta’ Sħubija AKP-UE jiġi modifikat sabiex jassenja mill-ġdid il-fondi bejn l-istrumenti ta’ kooperazzjoni permezz tal-Fond Ewropew għall-Iżvilupp għall-istrument ta’ kooperazzjoni interreġjonali u dak intra-AKP.
Il-fondi mqassmin mill-ġdid għandhom jikkontribwixxu għall-iffinanzjar tal-inizjattiva Spotlight u tas-Sħubija Globali għall-Edukazzjoni (GPE).
L-inizjattiva Spotlight hija azzjoni globali konġunta bejn l-UE u n-NU mmirata lejn il-prevenzjoni u r-rispons għall-vjolenza kontra n-nisa u l-bniet f’pajjiżi fil-mira. Fuq il-bażi tal-evidenza, l-inizjattiva Spotlight se tiffoka fuq forom partikolari ta’ vjolenza sesswali u l-vjolenza fuq il-bażi ta’ sess li huma prevalenti jew li joħorġu b’mod prominenti f’reġjuni speċifiċi u b’hekk se tikkontribwixxi biex jintlaħaq l-SDG 5 dwar l-“Ugwaljanza bejn is-Sessi”.
L-objettiv globali tal-GPE huwa li timmobilizza l-isforzi nazzjonali biex tinkiseb edukazzjoni u tagħlim ta’ kwalità għal kulħadd permezz tas-sħubija inklużiva, attenzjoni fuq sistemi ta’ edukazzjoni effettivi u l-iffinanzjar għall-edukazzjoni bażika. Iż-żewġ inizjattivi huma konformi mal-Ftehim ta’ Sħubija ta’ Cotonou kif ukoll mal-Aġenda 2030 għall-Iżvilupp Sostenibbli li jippromwovu approċċ aktar komprensiv għall-iżvilupp tal-bniedem. Fir-rigward tal-edukazzjoni, dan l-approċċ ifisser aktar għajnuna għal edukazzjoni ta’ kwalità inklużiva u bbilanċjata għal kulħadd u t-tagħlim tul il-ħajja (SDG 4) b’attenzjoni partikolari fuq il-promozzjoni tal-ugwaljanza bejn is-sessi (SDG 5).
IDDEĊIEDA KIF ĠEJ
Artikolu 1
1.Sabiex jiġu ssodisfati r-rekwiżiti tal-ipprogrammar, il-finanzjament permezz tal-Fond Ewropew għall-Iżvilupp se jitqassam mill-ġdid bejn l-allokazzjonijiet għal strumenti ta’ kooperazzjoni stabbiliti fl-Anness IC tal-Ftehim ta’ Sħubija AKP-UE.
2.Ammont ta’ EUR 425 miljun se jitqassam mill-ġdid mir-riżerva ġenerali għal Programmi Indikattivi Nazzjonali u Reġjonali, stabbiliti fil-punt 2(a) tal-Anness IC, lill-kooperazzjoni intra-AKP u dik interreġjonali, stabbiliti fil-punt 2 (b) tal-Anness IC, kif ġej:
–Ammont ta’ EUR 350 miljun għandu jiġi allokat lill-inizjattiva Spotlight;
–Ammont ta’ EUR 75 miljun għandu jiġi allokat lill-Isħubija Globali għall-Edukazzjoni.
Artikolu 2
B’konsegwenza tat-tqassim mill-ġdid ta’ allokazzjonijiet permezz l-Artikolu 1, it-test tal-Anness IC tal-Ftehim ta’ Sħubija AKP-UE għandu jiġi modifikat kif ġej:
1.Il-punt 2(a) tal-Anness IC għall-Ftehim ta' Sħubija AKP-KE għandu jiġi sostitwit b'li ġej:
“(a) EUR 23 940 miljun biex ikunu ffinanzjati programmi indikattivi nazzjonali u reġjonali. Din l-allokazzjoni se tintuża biex tiffinanzja:
(i) il-programmi indikattivi nazzjonali tal-Istati individwali tal-AKP skont l-Artikoli minn 1 sa 5 tal-Anness IV għal dan il-Ftehim rigward il-proċeduri ta' implimentazzjoni u ta' amministrazzjoni;
(ii) il-programmi indikattivi reġjonali ta’ appoġġ għall-kooperazzjoni reġjonali u interreġjonali u l-integrazzjoni reġjonali tal-Istati tal-AKP skont l-Artikoli minn 6 sa 11 tal-Anness IV għal dan il-Ftehim rigward il-proċeduri ta' implimentazzjoni u ta' amministrazzjoni;”
2.Il-punt 2(b) tal-Anness IC għall-Ftehim ta' Sħubija AKP-KE għandu jiġi sostitwit b'li ġej:
“(b) EUR 4 015-il miljun għall-finanzjament tal-kooperazzjoni intra-AKP u interreġjonali ma’ ħafna mill-istati tal-AKP jew għal dawn l-Istati kollha skont l-Artikoli minn 12 sa 14 tal-Anness IV għal dan il-Ftehim rigward il-proċeduri ta' implimentazzjoni u ta' amministrazzjoni. Dan il-pakkett għandu jinkludi appoġġ għall-istituzzjonijiet konġunti u l-korpi maħluqa skont dan il-Ftehim. Għandu jkopri wkoll l-assistenza għall-infiq operattiv tas-Segretarjat tal-AKP imsemmi fil-punti 1 u 2 tal-Protokoll Nru 1 dwar in-nefqa operattiva tal-istituzzjonijiet konġunti".
Artikolu 3
Id-deċiżjoni għandha tidħol fis-seħħ mal-adozzjoni tagħha.
Magħmul fi […], […]
Għall-Kunsill tal-Ministri AKP-UE
Il-President