IL-KUMMISSJONI EWROPEA
Brussell, 9.2.2018
COM(2018) 61 final
Proposta għal
DEĊIŻJONI TAL-PARLAMENT EWROPEW U TAL-KUNSILL
dwar il-mobilizzazzjoni tal-Fond Ewropew ta' Aġġustament għall-Globalizzazzjoni wara
applikazzjoni mill-Ġermanja – EGF/2017/008 DE/Goodyear
MEMORANDUM TA’ SPJEGAZZJONI
KUNTEST TAL-PROPOSTA
1.Ir-regoli applikabbli għall-kontribuzzjonijiet finanzjarji mill-Fond Ewropew ta’ Aġġustament għall-Globalizzazzjoni (FEG) huma stabbiliti fir-Regolament (UE) Nru 1309/2013 tal-Parlament Ewropew u tal-Kunsill tas-17 ta’ Diċembru 2013 dwar il-Fond Ewropew ta’ Aġġustament għall-Globalizzazzjoni (2014-2020) u li jħassar ir-Regolament (KE) Nru 1927/2006 1 (ir-“Regolament tal-FEG”).
2.Fis-6 ta’ Ottubru 2017, il-Ġermanja ppreżentat applikazzjoni EGF/2017/008 DE/Goodyear għal kontribuzzjoni finanzjarja mill-FEG, wara s-sensji 2 fil-Goodyear Dunlop Tires Germany GmbH fil-Ġermanja.
3.Wara l-valutazzjoni tagħha ta’ din l-applikazzjoni, il-Kummissjoni kkonkludiet li, skont id-dispożizzjonijiet kollha applikabbli tar-Regolament tal-FEG, il-kundizzjonijiet għall-għoti ta’ kontribuzzjoni finanzjarja mill-FEG huma ssodisfati.
SOMMARJU TAL-APPLIKAZZJONI
|
Applikazzjoni tal-FEG |
EGF/2017/008 DE/Goodyear |
|
L-Istat Membru |
Il-Ġermanja |
|
Ir-reġjun(i) ikkonċernat(i) (il-livell NUTS 2 3 ) |
Regierungsbezirk Karlsruhe (DE12) |
|
Id-data tat-tressiq tal-applikazzjoni |
Is-6 ta' Ottubru 2017 |
|
Id-data ta’ konferma tal-wasla tal-applikazzjoni |
Is-6 ta’ Ottubru 2017 |
|
Id-data tat-talba għal informazzjoni addizzjonali |
It-23 ta' Ottubru 2017 |
|
Id-data ta’ skadenza għall-għoti tal-informazzjoni addizzjonali |
L-4 ta’ Diċembru 2017 |
|
L-iskadenza għat-tlestija tal-valutazzjoni |
Is-26 ta' Frar 2018 |
|
Il-kriterju ta’ intervent |
L-Artikolu 4(1)(a) tar-Regolament tal-FEG |
|
L-intrapriża primarja |
Goodyear |
|
L-għadd ta’ intrapriżi kkonċernati |
1 |
|
Is-settur(i) tal-attività ekonomika (Id-Diviżjoni NACE Reviżjoni 2) 4 |
Id-Diviżjoni 22 tan-NACE Reviżjoni 2 (Manifattura ta’ prodotti tal-lasktu u tal-plastik) |
|
L-għadd ta’ sussidjarji, fornituri u produtturi fl-istadju aħħari tal-produzzjoni |
0 |
|
Il-perjodu ta’ referenza (massimu ta' erba’ xhur): |
L-14 ta' Lulju 2017 - il-5 ta' Ottubru 2017 |
|
L-għadd ta’ sensji matul il-perjodu ta’ referenza (a) |
632 |
|
L-għadd ta’ sensji qabel jew wara l-perjodu ta’ referenza (b) |
14 |
|
L-għadd totali ta’ sensji (a + b) |
646 |
|
L-għadd totali ta' benefiċjarji eliġibbli |
646 |
|
L-għadd totali ta’ benefiċjarji fil-mira |
646 |
|
L-għadd ta’ żgħażagħ fil-mira barra mill-edukazzjoni, impjieg jew taħriġ (NEETs) |
0 |
|
Il-baġit għal servizzi personalizzati (EUR) |
3 464 371 |
|
Il-baġit għall-implimentazzjoni tal-FEG 5 (EUR) |
144 348 |
|
Il-baġit totali (EUR) |
3 608 719 |
|
Il-kontribuzzjoni tal-FEG (60 %) (EUR) |
2 165 231 |
VALUTAZZJONI TAL-APPLIKAZZJONI
Proċedura
4.Fis-6 ta' Ottubru 2017, il-Ġermanja ressqet l-applikazzjoni EGF/2017/008 DE/Goodyear fi żmien 12-il ġimgħa mid-data li fiha ġew issodisfati l-kriterji ta' intervent stabbiliti fl-Artikolu 4 tar-Regolament tal-FEG. Il-Kummissjoni kkonfermat il-wasla tal-applikazzjoni fl-istess jum u talbet informazzjoni addizzjonali mill-Ġermanja fit-23 ta’ Ottubru 2017. Din l-informazzjoni addizzjonali ngħatat fi żmien sitt ġimgħat mid-data tat-talba. L-iskadenza ta’ 12-il ġimgħa mill-wasla tal-applikazzjoni kompluta li fiha l-Kummissjoni jenħtieġ li tiffinalizza l-valutazzjoni tagħha tal-konformità tal-applikazzjoni mal-kundizzjonijiet għall-għoti ta’ kontribuzzjoni finanzjarja tiskadi fis-26 ta’ Frar 2018.
L-eliġibbiltà tal-applikazzjoni
L-intrapriżi u l-benefiċjarji kkonċernati
5.L-applikazzjoni tikkonċerna 646 ħaddiem li ngħataw is-sensja mill-Goodyear Dunlop Tires Germany GmbH. Din l-intrapriża topera fis-settur ekonomiku kklassifikat taħt id-Diviżjoni 22 tan-NACE Reviżjoni 2 (Manifattura ta’ prodotti minerali oħra li mhumiex metalliċi). Is-sensji li ngħataw mill-Goodyear jinsabu prinċipalment fir-reġjun tan-NUTS il-livell 2 fir-reġjun ta’ Regierungsbezirk Karlsruhe (DE12) fil-Ġermanja.
|
L-intrapriżi u l-għadd ta’ sensji matul il-perjodu ta’ referenza |
|||
|
Goodyear Dunlop Tires Germany GmbH |
632 |
||
Il-kriterji ta’ intervent
6.Il-Ġermanja ressqet l-applikazzjoni skont il-kriterji ta’ intervent tal-Artikolu 4(1)(a) tar-Regolament tal-FEG, li jeħtieġu li tal-inqas 500 ħaddiem ikunu ngħataw is-sensja fuq perjodu ta’ referenza ta’ erba’ xhur f’intrapriża fi Stat Membru, inkluż il-ħaddiema li ngħataw is-sensja mill-fornituri u mill-produtturi fl-istadju aħħari tal-produzzjoni u/jew persuni li jaħdmu għal rashom li l-attività tagħhom waqfet.
7.Il-perjodu ta' referenza ta' erba' xhur għall-applikazzjoni huwa mill-14 ta' Lulju 2017 sal-5 ta' Ottubru 2017.
8.Is-sensji matul il-perjodu ta' referenza huma kif ġej:
–632 ħaddiem li ngħataw is-sensja fil-Goodyear.
Kalkolu tas-sensji u tal-waqfien tal-attività
9.Is-sensji mogħtija matul il-perjodu ta' referenza ġew ikkalkulati kif ġej:
–632 mid-data tal-avviż individwali tal-impjegatur biex ikeċċi jew iwaqqaf il-kuntratt ta’ impjieg tal-ħaddiem.
Benefiċjarji eliġibbli
10.Minbarra l-ħaddiema li diġà ssemmew, il-benefiċjarji eliġibbli jinkludu 14-il ħaddiem li ngħataw is-sensja qabel jew wara l-perjodu ta' referenza. Dawn il-ħaddiema kollha ngħataw is-sensja wara t-tħabbira ġenerali tas-sensji previsti li saret fl-24 ta' Ottubru 2016. Tista' tiġi stabbilita rabta kawżali ċara mal-avveniment li wassal għas-sensji matul il-perjodu ta' referenza.
11.Għalhekk, l-għadd totali ta’ benefiċjarji eliġibbli huwa ta’ 646.
Rabta bejn is-sensji u bidliet strutturali ewlenin fil-mudelli kummerċjali dinjija minħabba l-globalizzazzjoni
12.Sabiex tiġi stabbilita r-rabta bejn is-sensji u l-bidliet strutturali ewlenin fix-xejriet tal-kummerċ dinji dovuti għall-globalizzazzjoni, il-Ġermanja ssostni li l-globalizzazzjoni kellha impatt negattiv fuq il-produzzjoni tat-tajers ta’ karozzi tas-segment B 6 fl-UE. Dan huwa dovut għall-fatt li, f’dawn l-aħħar snin, il-fornituri Asjatiċi ggwadanjaw ishma sinifikanti fis-suq .
13.Filwaqt li l-produzzjoni tal-karozzi tal-passiġġieri fl-UE-27, li naqset b’mod drastiku fil-kriżi finanzjarja, reġgħet tikber matul dawn l-aħħar snin, damet sal-2016 biex tikseb il-livell li kellha fl-2006. Skont l-analiżijiet tal- Assoċjazzjoni Ewropea tal-Manifatturi tal-Vetturi (ACEA), fl-2016, il-bejgħ tal-karozzi ż-żgħar baqa’ taħt il-livell tiegħu tal-2005. Madankollu, is-sehem mis-suq globali tal-vetturi bil-mutur manufatturati fl-Ewropa naqas minn 35 % fl-2001 għal 23% fl-2016. Is-sehem mis-suq globali taċ-Ċina matul l-istess perjodu kiber minn 5 % għal 30 % 7 . Il-produzzjoni tal-karozzi fl-Asja rat żieda ta’ 45 % matul l-aħħar għaxar snin 8 .
14.Mill-2015 sal-2016, l-importazzjonijiet fl-UE żdiedu bi 22 %, filwaqt li l-esportazzjonijiet naqsu bi 3 % 9 . Għalkemm ħafna mill-vetturi importati jiġu mit-Turkija (is-sehem mis-suq hu ta’ 29 %), l-aktar tkabbir b’saħħtu ta’ importazzjonijiet ta’ vetturi bil-mutur bejn l-2015 u l-2016 inkiseb mill-Indja (żieda ta’ 31 %), segwita mill-qrib mill-Afrika t’Isfel (29 %) u mill-Ġappun (20 %) 10 . L-istrateġiji fit-tul tas-suq tal-karozzi u tal-manifatturi tat-tajers ukoll iridu jiġu allinjati mar-rati ta’ tkabbir potenzjali. Billi l-motorizzazzjoni fl-Unjoni Ewropea żdiedet biss b’9 % mill-2005 sal-2015, il-motorizzazzjoni fl-Asja/Oċeanja żdiedet b’140 %, u fl-Amerika Ċentrali u t’Isfel b’59 % matul l-istess perjodu 11 .
15.Għalhekk, is-suq tat-tajers globali nbidel ukoll b’mod sinifikanti sa mill-bidu ta’ dan il-millennju. Filwaqt li t-tliet atturi globali l-kbar Bridgestone, Michelin u Goodyear kienu jgħoddu għal 57 % tal-produzzjoni globali tat-tajers fl-2000, fid-dinja kollha s-sinifikat tagħhom naqas għal 38 % sal-2013. Matul l-istess perjodu, is-sehem mis-suq tal-manifatturi Asjatiċi miċ-Ċina, it-Tajwan u Singapor żdied minn 4 % fl-2001 għal 20 % fl-2013, skont studju intern minn Ernst & Young Consulting. Skont l-Assoċjazzjoni Ewropea tal-Manifatturi tat-Tajers u tal-Gomma (ETRMA), mill-10 manifatturi tat-tajers li ġġeneraw l-ogħla fatturat fl-2016, sitta kienu mill-Asja 12 .
16.Fl-2015, fl-UE, l-importazzjonijiet tat-tajers (130 miljun tajer) sebqu bil-bosta l-esportazzjonijiet (74 miljun). Il-produzzjoni tal-UE tat-tajers fl-2015 (4,9 miljun tunnellata) xorta kienet kemxejn inqas miċ-ċifra tal-output tal-2007 (5,1 miljun tunnellata) 13 .
17.Studju ppubblikat mill-istitut tar-riċerka tas-suq Gesellschaft für Konsumforschung juri li filwaqt li 77 % tat-tajers mibjugħin fil-Ġermanja fl-2005 kienu tas-segment tat-tajers B, tali daqsijiet tat-tajers kienu jgħoddu għal 43 % biss tal-bejgħ fil-Ġermanja fl-2014, u dan jirrifletti ċ-ċaqliq tal-produzzjoni tal-vetturi żgħar lejn is-swieq li qed jikbru fl-Asja u fl-Amerka t’Isfel 14 .
18.Sal-lum, is-settur taħt id-Diviżjoni 22 tan-NACE Reviżjoni 2 (Manifattura taʼ prodotti tal-gomma u tal-plastik) ma kienx is-suġġett ta’ applikazzjoni tal-FEG 15 .
Avvenimenti li wasslu għas-sensji u l-waqfien tal-attività
19.L-avveniment li wassal għal dawk is-sensji huwa l-għeluq għalkollox tal-impjant tal-produzzjoni tal-Goodyear f’Philippsburg. Il-Goodyear Tire & Rubber Company ġiet stabbilita f’Akron, Ohio, fl-Istati Uniti, fl-1898 u hija fost il-manifatturi tat-tajers ewlenin fid-dinja. Fl-1954, ġiet stabbilita Deutsche Goodyear GmbH, u fl-1966 beda l-bini tal-fabbrika tat-tajers tal-kumpanija f’Philippsburg. Bħalissa l-Goodyear Dunlop għandha madwar 7 600 impjegat fil-Ġermanja. Il-kwartieri ġenerali Ġermaniż tagħha huwa f’Hanau. Fil-Ġermanja hemm impjanti oħra fi Fürstenwalde, Wittlich, Riesa u Fulda.
20.Peress li l-produzzjoni tal-karozzi fl-UE u s-sehem mis-suq naqsu bħala riżultat tal-globalizzazzjoni, kien hemm kapaċità żejda sinifikanti fis-segment B fil-Goodyear li kien jammonta għal madwar ħames miljun tajer fl-istabbiliment tal-produzzjoni integrata tal-kumpanija fl-Ewropa. Dan jikkorrispondi għall-kapaċità medja annwali ta’ impjant wieħed tal-produzzjoni. Għalhekk, il-Goodyear inġagħlet tagħlaq waħda mill-fabbriki tagħha fl-Ewropa. Il-Goodyear iddeċidiet li tagħlaq l-impjant f’Philippsburg li għandu l-ikbar kapaċità tal-produzzjoni għal tajers fis-segment B fost l-impjanti Ewropej tal-Goodyear. Għalhekk, fl-24 ta’ Ottubru 2016, il-maniġment tal-Goodyear ħabbar li l-fabbrika tat-tajers f’Philippsburg, bi 888 ħaddiem, kellha tagħlaq fl-2017.
21.Fis-26 ta’ April 2017, il-Goodyear ikkonkludiet ftehim kollettiv li jirregola t-termini tas-sensji mat-trade union IG BCE. Wara taħdidiet mal-kunsill tax-xogħol, dan il-ftehim kollettiv ġie inkorporat fi skema tal-għoti tas-sensji. Il-produzzjoni twaqqfet diġà fil-15 ta’ Lulju 2017, u l-għeluq tal-fabbrika tħabbret fil-31 ta’ Diċembru 2017.
22.Is-sħab soċjali qablu fuq il-ħolqien ta’ żewġ kumpaniji ta’ trasferiment. Il-ħolqien ta’ kumpanija ta’ trasferiment mhuwiex obbligatorju skont il-liġi Ġermaniża. Ma hemm l-ebda obbligu fuq in-naħa tal-kumpanija li tat is-sensji li tikkontribwixxi lejn il-ħolqien ta’ kumpanija ta’ trasferiment. Mingħajr il-parteċipazzjoni tal-kumpanija li tat is-sensji, l-ebda kumpanija ta’ trasferiment ma kienet tinħoloq. Jekk il-kumpanija li tat is-sensji toffri li tipparteċipa, u jekk is-sħab soċjali jaqblu li joħolqu kumpanija ta’ trasferiment, il-liġi soċjali Ġermaniża tistabbilixxi l-qafas legali (§§ 110 u 111, SGB III).
23.Il-kumpaniji ta’ trasferiment se jitmexxew mill-weitblick - personalpartner GmbH, kumpanija li s-sid tagħha hu l-Konfederazzjoni tat-Trade Unions Ġermaniżi (Deutscher Gewerkschaftsbund - DGB). 646 mill-ħaddiema ffirmaw ftehim tripartiku li skontu jingħaqdu mal-kumpanija ta’ trasferiment mat-tmiem uffiċjali tal-impjieg tagħhom mal-Goodyear. 632 iffirmaw il-ftehim fil-perjodu ta’ referenza, 14 oħra kienu għadhom ma jistgħux jiffirmaw minħabba l-liv tal-maternità, eċċ, iżda huma mistennija jiffirmaw qabel it-terminazzjoni tal-kuntratt mal-Goodyear. Il-persuni li għażlu li ma jidħlux mal-kumpanija ta’ trasferiment kienu sabu xogħol ġdid diġà, jew iddeċidew li jirtiraw.
24. Il-Goodyear għamlet il-ħlasijiet għat-terminazzjonijiet, qablet fuq iż-żieda fl-allowance tat-taħriġ (Transferkurzarbeitergeld) u pprovdiet baġit għat-taħriġ mill-ġdid ta’ madwar EUR 3 000 għal kull impjegat. Il-perjodu ta’ trasferiment ta’ kull impjegat huwa kkalkulat abbażi tat-tul tas-servizz mal-kumpanija u jammonta għal massimu ta’ sena.
25.L-għajnuna addizzjonali tal-FEG se tintuża biex tikkumplimenta l-miżuri u tista’ tintuża wkoll biex testendi t-tul tal-miżuri individwali. 595 ħaddiem daħlu fl-ewwel kumpanija ta’ trasferiment fl-1 ta’ Jannar 2018. Hekk kif 51 ħaddiem ieħor jibqgħu fl-impjieg biex jiżmantellaw l-impjant tal-Goodyear, tinħoloq it-tieni kumpanija ta' trasferiment sabiex il-ħaddiema li jibqa’, ikunu jistgħu jingħaqdu mat-tieni kumpanija ta’ trasferiment fl-1 ta’ April 2018.
L-impatt mistenni tas-sensji fir-rigward tal-ekonomija lokali, reġjonali jew nazzjonali u l-impjiegi
26.Is-sensji huma mistennija li jkollhom effett negattiv sinifikanti fuq l-ekonomija lokali. Il-belt ta’ Philippsburg, b'madwar 13 000 abitant, tinsab fid-distrett tal-Aġenzija Pubblika tal-Impjiegi (PES) ta’ Waghäusl, b’popolazzjoni totali ta’ madwar 60 000. Is-settur terzjarju jgħodd għal 48 % biss tal-impjiegi u għalhekk hija sottorappreżentata meta mqabbla mal-Istat Federali ta’ Baden-Württemberg b’mod sħiħ (63 %). Ir-reġjun hu karatterizzat primarjament minn proporzjon ogħla mill-medja ta’ nies li jaħdmu fis-settur tal-manifattura. Meta mqabbla mad-distretti ġirien, ir-rata tal-qgħad fir-reġjun ta’ Waghäusl huwa pjuttost għoli, u hu ta’ 5,7 % (f’Ġunju 2017), meta mqabbel ma’ 3,3 % fid-distrett ġar ta’ Karlsruhe. Il-qgħad fiż-żona ta’ Waghäusl qed jiżdied, u hu 17 % ogħla mis-sena preċedenti. Iċ-ċittadini bi sfond ta’ migrazzjoni u nies kbar fl-età, jidhru li huma l-aktar żvantaġġati fis-suq tax-xogħol reġjonali. 25 % ta’ dawk qiegħda huma ċittadini barranin, u xi terz ta’ dawk qiegħda fit-tul li jiddependu mis-servizz soċjali għandhom 55 sena jew aktar. Proporzjon kbir tal-ħaddiema li ġew issensjati mill-Goodyear jaqa’ wkoll f’dawk il-kategoariji.
27.L-impjant tal-Goodyear kien l-akbar impjegatur fir-reġjun, it-tieni l-akbar hu l-impjant tal-enerġija nukleari. Minħabba d-deċiżjoni tal-Ġermanja li tkun ħielsa mill-enerġija nukleari, l-impjant tal-enerġija nukleari dalwaqt jingħalaq fis-snin li ġejjin. Bosta kumpaniji żgħar jew ta’ daqs medju fir-reġjun issensjaw mijiet ta’ ħaddiema, pereżempju, fis-sajf tal-2017, 146 ruħ ġew issensjati minn kumpanija li topera fl-industrija tal-karozzi, jew 144 ruħ ġew issensjati minħabba l-għeluq ta’ manifattur tal-preses. Ir-reġjun qed iħabbat wiċċu ma’ bidla strutturali. Għalhekk, il-PES fassal strateġija għall-kwalifiki u l-ħiliet, li tieħu kont kemm tal-ħtiġijiet (futuri) tas-suq tax-xogħol kif ukoll tal-livell tal-kwalifiki tal-ħaddiema konċernati.
Il-benefiċjarji fil-mira u l-azzjonijiet proposti
Benefiċjarji fil-mira
28.L-għadd stmat ta’ ħaddiema ssensjati li mistennija jipparteċipaw fil-miżuri huwa ta’ 646. It-tqassim ta' dawn il-ħaddiema skont is-sess, iċ-ċittadinanza u l-grupp ta’ età huwa kif ġej:
|
Il-kategorija |
L-għadd ta'
|
||
|
Sess: |
Irġiel: |
641 |
(99,23 %) |
|
Nisa |
5 |
(0,77 %) |
|
|
Ċittadinanza: |
Ċittadini tal-UE: |
493 |
(76,32 %) |
|
ċittadini mhux tal-UE: |
153 |
(23,68 %) |
|
|
Grupp ta’ età: |
15-24 sena: |
15 |
(2,32 %) |
|
25-29 sena: |
33 |
(5,11 %) |
|
|
30-54 sena: |
428 |
(66,25 %) |
|
|
55-64 sena: |
168 |
(26,01 %) |
|
|
iktar minn 64 sena: |
2 |
(0,31 %) |
|
L-eliġibbiltà tal-azzjonijiet proposti
29.Kif stipulat hawn fuq, is-sħab soċjali qablu fuq il-ħolqien ta’ żewġ kumpaniji ta’ trasferiment li se jkopru żewġ lottijiet differenti ta’ ħaddiema mogħtija s-sensja tal-impjant tal-Goodyear li ser jidħlu jew fl-ewwel kumpanija ta’ trasferiment fl-1 ta’ Jannar 2018 jew fit-tieni kumpanija ta’ trasferiment fl-1 ta’ April 2018, rispettivament. Il-miżuri addizzjonali offruti mill-Goodyear qed jingħataw ukoll mill-kumpanija ta’ trasferiment, iżda mhumiex parti mill-applikazzjoni tal-FEG. Il-miżuri kollha deskritti hawn taħt jikkombinaw flimkien biex jiffurmaw pakkett ta’ servizzi personalizzati kkordinati mill-kumpaniji ta’ trasferiment u għandhom l-għan li jintegraw mill-ġdid fix-xogħol lill-ħaddiema mogħtija s-sensja.
30.Is-servizzi personalizzati li jridu jiġu pprovduti lill-ħaddiema ssensjati jikkonsistu mill-azzjonijiet li ġejjin:
–Miżuri għat-titjib tal-ħiliet: Dawn huma offruti lil ħaddiema eliġibbli wara l-ħolqien ta’ profili u intervisti ta’ gwida dwar il-karriera, u għandhom l-intenzjoni li jgħinuhom jibbenefikaw mill-opportunitajiet fis-suq tax-xogħol. Il-korsijiet ta’ taħriġ offruti se jiffukaw fuq setturi bi prospetti futuri, bħalma huma x-xogħol fil-metall u fis-setturi tal-imħażen. Il-korsijiet jistgħu jingħataw individwalment jew fi gruppi, u jvarjaw minn kompetenzi bażiċi għal korsijiet għat-titjib tal-ħiliet u korsijiet li jippreparaw il-parteċipanti għal bidliet fil-karriera. Il-korsijiet tal-lingwa Ġermaniża se jkunu ta’ punt fokali partikolari għall-parteċipanti b’livell baxx ħafna ta’ ħiliet tal-lingwa Ġermaniża.
–Gruppi ta’ pari/Gruppi ta’ ħidma: Dawn se jkunu fora ta’ gruppi assistiti minn faċilitatur, li se jgħin lill-parteċipanti jaqsmu ideat u riflessjonijiet. Il-gruppi ta’ pari jistgħu jiffokaw fuq firxa ta’ suġġetti, bħall-ġestjoni tal-ħin, l-awtoġestjoni, il-promozzjoni ta’ miżuri tas-saħħa jew gruppi speċjali ta’ pari għall-parteċipanti bi sfond ta’ migrazzjoni. Qiegħda tiġi offruta varjetà ta’ workshops, bħalma huma workshops dwar il-bilanċ bejn ix-xogħol u l-ħajja privata jew dwar il-kwistjonijiet ta’ ugwaljanza bejn is-sessi.
–Servizz ta’ pariri dwar il-bidu ta’ negozju: Dan se jinkludi pakkett ta’ servizzi ta’ konsulenza għal dawk interessati li jibdew in-negozji tagħhom stess. Dawn is-servizzi se jinkludu miżuri ta’ kowċing imfassla apposta u individwalizzati.
–Tfittxija għal impjieg: Il-job scouts professjonali se jgħinu biex jidentifikaw postijiet tax-xogħol vakanti potenzjali li għadhom ma ġewx ippubblikati, li jistgħu jissodisfaw xi ħaddiema eliġibbli. Hemm ippjanata wkoll fiera tal-impjiegi.
–Mentoring ta’ segwitu/l-iżgurar tal-impjiegi: Il-ħaddiema jistgħu jibbenefikaw minn servizzi oħrajn ta’ konsulenza ta’ gwida wara li jibdew jaħdmu fl-impjieg il-ġdid biex tiġi ffaċilitata t-tranżizzjoni fl-impjieg il-ġdid u biex jitnaqqas ir-riskju ta’ telf ta’ impjiegi.
–Allowance tat-taħriġ: Il-ħlas jibda mid-data li fiha l-ħaddiem jidħol fil-kumpanija ta’ trasferiment, u jintemm hekk kif il-persuna titlaq minn mal-kumpanija ta’ trasferiment.
31.Il-proġett se jikkontribwixxi għall-iżvilupp ekonomiku sostenibbli fil-Ġermanja. Il-miżuri huma organizzati skont l-istrateġija ta’ sostenibbiltà tal-Ġermanja, u l-weitblick - personalpartner GmbH, li ġiet fdata bit-twaqqif taż-żewġ kumpaniji ta’ trasferiment, għandha ċertifikazzjoni tas-sostenibilità.
32.L-azzjonijiet proposti deskritti hawnhekk jikkostitwixxu miżuri attivi tas-suq tax-xogħol fil-qafas tal-azzjonijiet eliġibbli stabbiliti fl-Artikolu 7 tar-Regolament tal-FEG. Dawn l-azzjonijiet ma jiħdux post miżuri passivi ta’ protezzjoni soċjali.
33.Il-Ġermanja pprovdiet l-informazzjoni meħtieġa dwar l-azzjonijiet li huma obbligatorji għall-intrapriża kkonċernata permezz tal-liġi nazzjonali jew tal-ftehimiet kollettivi. Huma kkonfermaw li kontribuzzjoni finanzjarja mill-FEG mhijiex sejra tieħu post dawn l-azzjonijiet.
Baġit stmat
34.L-ispejjeż totali stmati huma ta' EUR 3 608 719, li jinkludu nefqa ta' EUR 3 464 371 għal servizzi personalizzati u nefqa ta' EUR 144 348 għal attivitajiet preparatorji, ta' ġestjoni, informazzjoni u pubbliċità, kontroll u rapportar.
35.Il-kontribuzzjoni finanzjarja totali mitluba mill-FEG hija ta’ EUR 2 165 231 (60 % tal-ispejjeż totali).
|
Azzjonijiet |
L-għadd stmat ta’ parteċipanti |
L-ispiża stmata (arrotondata) għal kull parteċipant 16 (f’EUR) |
L-ispejjeż totali stmati (f’EUR) |
|
Servizzi personalizzati (Azzjonijiet skont l-Artikolu 7(1)(a) u (c) tar-Regolament tal-FEG) |
|||
|
Miżuri għat-titjib tal-ħiliet (Qualifizierungsmaßnahmen) |
288 |
4 512 |
1 299 516 |
|
Gruppi ta’ pari/workshops |
276 |
1 294 |
357 086 |
|
Servizz ta’ pariri dwar il-bidu ta’ negozju (Existenzgründerberatung) |
30 |
1 690 |
50 710 |
|
Tfittxija ta’ Xogħol (Stellenakquise) |
350 |
369 |
129 319 |
|
Mentoraġġ ta’ segwitu/tfittxija ta’ impjieg (Nachbetreuung/Beschäftigungssicherung) |
646 |
643 |
415 211 |
|
Is-subtotal (a): Il-perċentwal tal-pakkett ta' servizzi personalizzati |
– |
2 251 842 |
|
|
(65 %) |
|||
|
L-allowances u l-inċentivi (Azzjonijiet skont l-Artikolu 7(1)(b) tar-Regolament tal-FEG) |
|||
|
Benefiċċju għat-taħriġ (Transferkurzarbeitergeld) |
646 |
1 877 |
1 212 529 |
|
Is-subtotal (b): Il-perċentwal tal-pakkett ta' servizzi personalizzati: |
– |
1 212 529 |
|
|
(35 %) |
|||
|
L-azzjonijiet skont l-Artikolu 7(4) tar-Regolament tal-FEG |
|||
|
1. L-attivitajiet preparatorji |
– |
21 652 |
|
|
2. Ġestjoni |
– |
79 391 |
|
|
3. L-informazzjoni u l-pubbliċità |
– |
7 218 |
|
|
4. Il-kontroll u r-rapportar |
– |
36 087 |
|
|
Is-subtotal (c): Il-perċentwal tal-ispejjeż totali: |
– |
144 348 |
|
|
(4 %) |
|||
|
L-ispejjeż totali (a + b + c): |
– |
3 608 719 |
|
|
Il-kontribuzzjoni tal-FEG (60 % tal-ispejjeż totali) |
– |
2 165 231 |
|
36.L-ispejjeż tal-azzjonijiet identifikati fit-tabella ta' hawn fuq bħala azzjonijiet skont l-Artikolu 7(1)(b) tar-Regolament tal-FEG ma jaqbżux il-35 % tal-ispejjeż totali tal-pakkett koordinat ta' servizzi personalizzati. Il-Ġermanja kkonfermat li dawn l-azzjonijiet huma soġġetti għall-parteċipazzjoni attiva tal-benefiċjarji fil-mira fit-tfittxija għax-xogħol jew l-attivitajiet ta’ taħriġ.
Il-perjodu ta’ eliġibbiltà tan-nefqa
37.Il-Ġermanja bdiet tipprovdi s-servizzi personalizzati lill-benefiċjarji fil-mira fl-1 ta’ Jannar 2018. Għalhekk, in-nefqa fuq l-azzjonijiet se tkun eliġibbli għal kontribuzzjoni finanzjarja mill-FEG mill-1 ta’ Jannar 2018 sal-1 ta’ Jannar 2020.
38.Il-Ġermanja bdiet iġġarrab in-nefqa amministrattiva biex timplimenta l-FEG fis-7 ta’ Lulju 2017. Għalhekk, in-nefqa għall-attivitajiet ta' tħejjija, ġestjoni, informazzjoni u pubbliċità kif ukoll dawk ta' kontroll u rapportar għandha tkun eliġibbli għal kontribuzzjoni finanzjarja mill-FEG mis-7 ta’ Lulju 2017 sal-1 ta’ Lulju 2020.
Kumplimentarjetà ma’ azzjonijiet iffinanzjati minn fondi nazzjonali jew tal-Unjoni
39.Is-sorsi tal-prefinanzjament jew kofinanzjament nazzjonali huma l-baġit Federali u l-Bundesagentur für Arbeit (is-Servizz Federali għall-Impjieg Pubbliku). Dawn jiffinanzjaw il-kontribuzzjoni nazzjonali ta’ 40 % tal-ispejjeż totali tal-miżuri ffinanzjati mill-FEG offruta mill-kumpanija ta’ trasferiment 17 .
40.Il-Ġermanja kkonfermat li l-miżuri deskritti hawn fuq li jirċievu kontribuzzjoni finanzjarja mill-FEG mhux se jirċievu wkoll kontribuzzjonijiet finanzjarji minn strumenti finanzjarji oħrajn tal-Unjoni.
Proċeduri għall-konsultazzjoni tal-benefiċjarji fil-mira jew ir-rappreżentanti tagħhom jew is-sħab soċjali kif ukoll l-awtoritajiet lokali u reġjonali
41.Il-Ġermanja indikat li l-pakkett ikkoordinat ta’ servizzi personalizzati tfassal f’konsultazzjoni mal-partijiet kollha konċernati, b’mod partikolari mar-rappreżentanti tal-ħaddiema li ngħataw is-sensja, is-sħab soċjali u l-awtoritajiet reġjonali. Għall-ippjanar ta’ miżuri sostnuti mill-FEG, il-Ministeru Federali għax-Xogħol u l-Affarijiet Soċjali kellu taħditiet mal-Goodyear, il-kunsill tax-xogħol, it-trade union IG BCE kif ukoll il-PSE biex jiddiskutu l-ambitu għall-appoġġ possibbli mill-FEG. Waqt taħditiet madwar mejda fis-7 ta’ Lulju 2017, il-partijiet kollha kkonċernati taw approvazzjonijiet ċara għal applikazzjoni possibbli tal-FEG. Il-partijiet kollha kienu qed jikkooperaw mill-qrib, u fit-18 ta’ Settembru 2017, il-kunċett għall-pakkett ippjanat ta’ miżuri personalizzati ġie ppreżentat mill-PES
Sistemi ta' ġestjoni u kontroll
42.L-applikazzjoni tinkludi deskrizzjoni tas-sistema ta’ ġestjoni u kontroll li tispeċifika r-responsabbiltajiet tal-korpi involuti. Il-Ġermanja nnotifikat lill-Kummissjoni li l-kontribuzzjoni finanzjarja se tiġi amministrata mill-istess entitajiet fil-Ministeru Federali għax-Xogħol u l-Affarijiet Soċjali (Bundesministerium für Arbeit und Soziales) li jiġġestixxu l-Fond Soċjali Ewropew (FSE). Madankollu, fi ħdan il-“Gruppe Europäische Fonds für Beschäftigung”, huwa r-“Referat EF 4” li taġixxi bħala l-awtorità maniġerjali għall-FEG, filwaqt li l-awtorità maniġerjali għall-FSE hija r-“Referat EF 1”. L-“Organisationseinheit Prüfbehörde” hija l-awtorità ta’ kontroll kemm għall-FEG kif ukoll għall-FSE. Dawn l-entitajiet jiġġestixxu wkoll il-kontribuzzjonijiet preċedenti mill-FEG lill-Ġermanja. Xi wħud mill-kompiti tal-awtorità maniġerjali tasl-FEG ġew delegati b’mod permanenti lill-PES bi ftehim amministrattiv.
Impenji pprovduti mill-Istat Membru kkonċernat
43.Il-Ġermanja tat l-assigurazzjonijiet kollha meħtieġa rigward dawn li ġejjin:
–il-prinċipji tal-ugwaljanza tat-trattament u ta' nondiskriminazzjoni se jiġu rispettati fil-kuntest tal-aċċess għall-azzjonijiet proposti u fl-implimentazzjoni tagħhom,
–ir-rekwiżiti stabbiliti fil-leġiżlazzjoni nazzjonali u tal-UE dwar is-sensji kollettivi ġew issodisfati,
–Il-Goodyear, li ssoktat bl-attivitajiet tagħha wara s-sensji, ikkonformat mal-obbligi legali tagħha li jirregolaw is-sensji u pprovdiet għall-ħaddiema tagħha kif xieraq,
–l-azzjonijiet proposti mhumiex se jirċievu għajnuna finanzjarja minn fondi oħrajn jew minn strumenti finanzjarji oħra tal-Unjoni, u kwalunkwe finanzjament doppju se jiġi evitat,
–l-azzjonijiet proposti se jikkumplimentaw l-azzjonijiet iffinanzjati mill-Fondi Strutturali,
–il-kontribuzzjoni finanzjarja mill-FEG se tkun konformi mar-regoli proċedurali u materjali tal-Unjoni dwar l-għajnuna mill-Istat.
IMPLIKAZZJONI BAĠITARJA
Proposta baġitarja
44.Il-FEG ma għandux jaqbeż ammont annwali massimu ta' EUR 150 miljun (prezzijiet tal-2011), kif stipulat fl-Artikolu 12 tar-Regolament tal-Kunsill (UE, Euratom) Nru 1311/2013 tat-2 ta' Diċembru 2013 li jistabbilixxi l-qafas finanzjarju pluriennali għas-snin 2014-2020 18 .
45.Wara li eżaminat l-applikazzjoni fir-rigward tal-kundizzjonijiet stabbiliti fl-Artikolu 13(1) tar-Regolament tal-FEG, u b'kont meħud tal-għadd ta' benefiċjarji fil-mira, l-azzjonijiet proposti u l-ispejjeż stmati, il-Kummissjoni qed tipproponi li timmobilizza l-FEG għall-ammont ta' EUR 2 165 231, li jirrappreżenta 60 % tal-ispejjeż totali tal-azzjonijiet proposti, sabiex tiġi pprovduta kontribuzzjoni finanzjarja għall-applikazzjoni.
46.Id-deċiżjoni proposta għall-mobilizzazzjoni tal-FEG se tittieħed b'mod konġunt mill-Parlament Ewropew u mill-Kunsill, kif stabbilit fil-punt 13 tal-Ftehim Interistituzzjonali tat-2 ta' Diċembru 2013 bejn il-Parlament Ewropew, il-Kunsill u l-Kummissjoni dwar dixxiplina baġitarja, dwar kooperazzjoni f'materji ta' baġit u dwar ġestjoni finanzjarja tajba 19 .
Atti relatati
47.Fl-istess waqt li tippreżenta din il-proposta għal deċiżjoni biex jiġi mmobilizzat il-FEG, il-Kummissjoni se tippreżenta proposta lill-Parlament Ewropew u lill-Kunsill għal trasferiment tal-ammont ta' EUR 2 165 231 għall-intestatura baġitarja rilevanti.
48.Fl-istess waqt li se tadotta din il-proposta għal deċiżjoni biex jiġi mmobilizzat il-FEG, il-Kummissjoni se tadotta deċiżjoni dwar kontribuzzjoni finanzjarja, permezz ta’ att ta’ implimentazzjoni, li se jidħol fis-seħħ fid-data li fiha l-Parlament Ewropew u l-Kunsill jadottaw id-deċiżjoni proposta biex jiġi mmobilizzat il-FEG.
Proposta għal
DEĊIŻJONI TAL-PARLAMENT EWROPEW U TAL-KUNSILL
dwar il-mobilizzazzjoni tal-Fond Ewropew ta' Aġġustament għall-Globalizzazzjoni wara
applikazzjoni mill-Ġermanja – EGF/2017/008 DE/Goodyear
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea,
Wara li kkunsidraw ir-Regolament (UE) Nru 1309/2013 tal-Parlament Ewropew u tal-Kunsill tas-17 ta' Diċembru 2013 dwar il-Fond Ewropew ta' Aġġustament għall-Globalizzazzjoni (2014-2020) u li jħassar ir-Regolament (KE) Nru 1927/2006 20 , u b'mod partikolari l-Artikolu 15(4) tiegħu,
Wara li kkunsidraw il-Ftehim Interistituzzjonali tat-2 ta’ Diċembru 2013 bejn il-Parlament Ewropew, il-Kunsill u l-Kummissjoni dwar dixxiplina baġitarja, dwar kooperazzjoni f’materji ta' baġit u dwar ġestjoni finanzjarja tajba 21 , u b'mod partikolari l-punt 13 tiegħu,
Wara li kkunsidraw il-proposta tal-Kummissjoni Ewropea,
Billi:
(1)Il-Fond Ewropew ta' Aġġustament għall-Globalizzazzjoni (FEG) għandu l-għan li jipprovdi appoġġ lill-ħaddiema li jkunu ngħataw is-sensja u fil-każ ta' persuni li jaħdmu għal rashom meta l-attività tagħhom tkun intemmet b'riżultat ta' bidliet strutturali kbar fl-andament tal-kummerċ dinji minħabba l-globalizzazzjoni, b'riżultat ta' kontinwazzjoni tal-kriżi finanzjarja u ekonomika globali, jew b'riżultat ta' kriżi ekonomika u finanzjarja globali ġdida, u biex jgħinhom fl-integrazzjoni mill-ġdid tagħhom fis-suq tax-xogħol.
(2)Il-FEG ma jridx jaqbeż l-ammont annwali massimu ta' EUR 150 miljun (prezzijiet tal-2011), kif stabbilit fl-Artikolu 12 tar-Regolament tal-Kunsill (UE, Euratom) Nru 1311/2013 22 .
(3)Fis-6 ta’ Ottubru 2017, il-Ġermanja ppreżentat applikazzjoni biex timmobilizza l-FEG, fir-rigward tas-sensji il-Goodyear Dunlop Tires Germany GmbH fil-Ġermanja. Din ġiet issupplimentata b'informazzjoni addizzjonali pprovduta skont l-Artikolu 8(3) tar-Regolament (UE) Nru 1309/2013. Dik l-applikazzjoni tikkonforma mar-rekwiżiti għad-determinazzjoni ta' kontribuzzjoni finanzjarja mill-FEG kif stabbilit fl-Artikolu 13 tar-Regolament (UE) Nru 1309/2013.
(4)Il-FEG jenħtieġ, għalhekk, li jkun immobilizzat biex jipprovdi kontribuzzjoni finanzjarja ta’ EUR 2 165 231 fir-rigward tal-applikazzjoni mressqa mill-Ġermanja.
(5)Sabiex iż-żmien li jittieħed għall-mobilizzazzjoni tal-FEG jitnaqqas kemm jista' jkun, din id-deċiżjoni jenħtieġ li tidħol fis-seħħ mid-data tal-adozzjoni tagħha,
ADOTTAW DIN ID-DEĊIŻJONI:
Artikolu 1
Għall-baġit ġenerali tal-Unjoni għas-sena finanzjarja 2018, il-Fond Ewropew ta’ Aġġustament għall-Globalizzazzjoni għandu jiġi mmobilizzat biex jipprovdi l-ammont ta’ EUR 2 165 231 f’approprjazzjonijiet ta’ impenn u ta’ pagament.
Artikolu 2
Din id-Deċiżjoni għandha tidħol fis-seħħ fil-jum tal-pubblikazzjoni tagħha f’Il-Ġurnal Uffiċjali tal-Unjoni Ewropea. Hija għandha tapplika minn [the date of its adoption]*.
Magħmul fi Brussell,
Għall-Parlament Ewropew Għall-Kunsill
Il-President Il-President