1.Introduzzjoni

L-Unjoni Ewropea (UE) minn dejjem kienet fuq quddiem nett fl-iżvilupp ta’ mudell leġiżlattiv solidu u bbażat fuq ix-xjenza dwar it-trattament xieraq tal-annimali. Il-Kummissjoni minn kmieni fehmet li, biex inkunu sostenibbli, jenħtieġ li tali mudell jiġi disseminat ukoll internazzjonalment.

Il-promozzjoni tat-trattament xieraq tal-annimali u l-kompetizzjoni ġusta globalment tibqa’ waħda mill-prijoritajiet tal-Kummissjoni dwar it-trattament xieraq tal-annimali.

L-għan ġenerali tal-attivitajiet internazzjonali tal-Kummissjoni dwar it-trattament xieraq tal-annimali huwa l-promozzjoni tal-valuri tal-UE fir-rigward tal-annimali, li titqajjem sensibilizzazzjoni u li jiġu mħeġġa fil-livell globali, l-istandards għoljin għat-trattament xieraq tal-annimali b’mod partikolari mas-sħab kummerċjali tal-UE, li jirriflettu l-mudell u l-prinċipji tal-UE. It-titjib tal-istandards tat-trattament xieraq tal-annimali fil-livell globali jikkontribwixxi wkoll biex jiġu żgurati kundizzjonijiet ekwi bejn l-operaturi tal-UE u dawk li mhumiex tal-UE.

Fl-2012, fi ħdan l-Istrateġija tal-UE għall-Protezzjoni u t-Trattament Xieraq tal-Annimali 2012-2015 1 il-Kummissjoni ddeċidiet li tkompli bl-attivitajiet internazzjonali tagħha dwar it-trattament xieraq tal-annimali.

Il-Kummissjoni ddeskriviet il-ħtieġa li jiddaħħlu dispożizzjonijiet dwar it-trattament xieraq tal-annimali fil-ftehimiet kummerċjali bilaterali jew li jiġu stabbiliti forom oħra ta’ kooperazzjoni, kif ukoll li tiġi żviluppata kollaborazzjoni konkreta ma’ pajjiżi terzi.

Il-Kummissjoni xtaqet ukoll li tibqa’ attiva fl-arena multilaterali, b’mod partikolari fl-Organizzazzjoni Dinjija għas-Saħħa tal-Annimali (OIE) u fl-Organizzazzjoni tal-Ikel u l-Agrikoltura tan-Nazzjonijiet Uniti (FAO), kif ukoll fil-qafas tal-Politika Ewropea tal-Viċinat.

L-Istrateġija tal-UE kienet ipprevediet l-adozzjoni ta’ dan ir-rapport. Din tikkostitwixxi pass importanti biex jitqiesu l-attivitajiet internazzjonali 2 , 3 , 4 mwettqa f’dawn l-aħħar 15-il sena fil-qasam tat-trattament xieraq tal-annimali.

2.għanijiet

Dan ir-rapport għandu l-għan li jeżamina l-attivitajiet internazzjonali ewlenin dwar it-trattament xieraq tal-annimali li jipproduċu l-ikel u sar mill-Kummissjoni bl-appoġġ tal-Istati Membri tal-UE.

Ir-rapport jevalwa l-eżiti tal-attivitajiet għall-promozzjoni tal-istandards tat-trattament xieraq tal-annimali fil-livell globali u janalizza kif dawn ikkontribwew biex jiġu żgurati kundizzjonijiet ekwi bejn l-operaturi tal-UE u dawk li mhumiex tal-UE.

Ir-rapport għalhekk għandu l-għan li jidentifika l-attivitajiet u l-istrumenti ta’ politika li kienu l-aktar effikaċi f’termini ta’ eżiti matul il-perjodu 2004-2016.

Dan ir-rapport huwa bbażat fuq studju bit-titlu “Study on the impact of animal welfare international activities” 5 (aktar ’il quddiem “l-istudju”). Dan iqis ukoll l-istudju bit-titlu “Assessing farmers’ cost of compliance with EU legislation in the fields of environment, animal welfare and food safety” 6 . L-istudju tal-aħħar mhuwiex dedikat għat-trattament xieraq tal-annimali iżda fih informazzjoni rilevanti għal dan ir-rapport.

3.attivitajiet internazzjonali

L-attivitajiet internazzjonali tal-Kummissjoni dwar it-trattament xieraq tal-annimali jsiru kemm fil-livell multilaterali kif ukoll dak bilaterali.

L-attivitajiet multilaterali jirreferu għall-attivitajiet imwettqa fil-qafas ta’ organizzazzjonijiet intergovernattivi internazzjonali li joperaw fuq bażi dinjija (eż. OIE, FAO).

L-attivitajiet bilaterali jirreferu għall-kooperazzjoni ma’ gruppi individwali jew reġjonali ta’ pajjiżi terzi bħall-Istati tal-Mercosur. Tali kooperazzjoni tista’ sseħħ fil-qafas tal-ftehimiet kummerċjali, jew f’forom oħra ta’ kooperazzjoni (ara l-Anness II).

L-istrumenti prinċipali li jżidu s-sensibilizzazzjoni dwar it-trattament xieraq tal-annimali huma inizjattivi ta’ taħriġ u ta’ bini ta’ kapaċità, bħalma huma l-programm għat-Taħriġ Imtejjeb għal Iżjed Sikurezza fl-Ikel (il-BTSF) 7 u l-istrument ta’ Assistenza Teknika u Skambju ta’ Informazzjoni (it-TAIEX) 8 , il-programmi ta’ riċerka 9 u l-proġetti mmirati tal-UE.

3.1.kunsiderazzjonijiet ġenerali

Fl-1995, il-Kunsill ta mandat 10 lill-Kummissjoni biex tmexxi negozjati bil-ħsieb li tikkonkludi ftehimiet ma’ pajjiżi terzi dwar miżuri sanitarji u fitosanitarji, inkluż dwar it-trattament xieraq tal-annimali relatati mal-kummerċ.

Bl-eċċezzjoni ta’ standards waqt il-qatla fil-biċċerija 11 , l-istandards tal-UE dwar it-trattament xieraq tal-annimali japplikaw biss għall-produzzjoni tal-UE u mhux għall-prodotti importati. Barra minn hekk, meta jiġu esportati annimali ħajjin, ċerti rekwiżiti dwar it-trasport tal-annimali biss huma applikabbli barra mit-territorju tal-UE 12 . Għall-istandards tal-UE dwar it-trattament xieraq tal-annimali, il-Kummissjoni għandha setgħa limitata biex tinfluwenza pajjiżi terzi. It-trattament xieraq tal-annimali ma ġiex espliċitament rikonoxxut bħala kummerċ rilevanti skont il-Ftehim Ġenerali dwar it-Tariffi u l-Kummerċ (il-GATT). Konsegwentement, id-dispożizzjonijiet relatati mat-trattament xieraq tal-annimali inklużi fil-ftehimiet kummerċjali huma marbutin l-aktar mal-kooperazzjoni u mhux mal-konformità ma’ ċerti rekwiżiti. Il-kisbiet tal-UE f’dan il-qasam jiddependu fuq il-livell tar-rieda tal-pajjiżi terzi biex jikkooperaw.

3.2.attivitajiet multilaterali

Dawn l-attivitajiet huma mmirati lejn l-iżvilupp u l-adozzjoni ta’ standards internazzjonali mill-OIE u l-kooperazzjoni mal-FAO.

L-għanijiet prinċipali tal-attivitajiet mal-OIE huma li:

1.Jiżguraw li l-istandards jirriflettu sa fejn possibbli l-prinċipji u l-mudell tal-UE;

2.Jibnu kunsens ma’ pajjiżi terzi biex jadottaw dawn l-istandards;

3.Jippromwovu u jappoġġaw l-implimentazzjoni ta’ dawn l-istandards tal-OIE f’pajjiżi terzi;

4.Jużaw l-istandards tal-OIE bħala l-bażi biex jintlaħaq fehim komuni dwar it-trattament xieraq tal-annimali ma’ pajjiżi terzi.

Il-Kummissjoni u l-Istati Membri tal-UE ilhom mill-2002 jaħdmu flimkien mal-OIE f’kull pass tal-proċess tat-twaqqif ta’ standards kif ukoll waqt l-implimentazzjoni tagħhom mill-pajjiżi membri tal-OIE.

Il-kontributi ewlenin min-naħa tal-Kummissjoni huma:

1.Involviment fil-proċess tat-twaqqif ta’ standards permezz tal-parteċipazzjoni tagħha fi gruppi ta’ ħidma u billi tipprovdi pożizzjonijiet koordinati tal-UE;

2.Għoti ta’ appoġġ finanzjarju u organizzazzjoni konġunta ta’ avvenimenti ta’ taħriġ tal-OIE li jiffaċilitaw l-implimentazzjoni ta’ standards internazzjonali;

3.Appoġġ għall-iżvilupp u l-implimentazzjoni ta’ strateġiji reġjonali tal-OIE dwar it-trattament xieraq tal-annimali.

L-Istati Membri kollha tal-UE huma membri tal-OIE, filwaqt li l-Kummissjoni għandha l-istatus ta’ osservatur. Fil-proċess tat-twaqqif ta’ standards, fi stadju bikri, il-Kummissjoni tikkontribwixxi għall-gruppi ta’ esperti rilevanti tal-OIE 13 . Ladarba l-istandards jiġu ppreżentati għall-adozzjoni, il-Kummissjoni tikkontribwixxi permezz tal-mekkaniżmu ta’ koordinazzjoni tal-UE “b’vuċi waħda”. Il-Kummissjoni fil-fatt għandha rwol ewlieni sabiex tippreżenta pożizzjonijiet komuni tal-UE f’kull stadju ta’ konsultazzjoni u fil-mument tal-adozzjoni tal-istandards mill-OIE.

Barra minn hekk, il-Kummissjoni tikkontribwixxi biex tiffaċilita l-adozzjoni tal-istandards billi jiġu kkoordinati l-pożizzjonijiet mill-pajjiżi tal-OIE mhuex membri tal-UE . Il-Kummissjoni tappoġġa wkoll lill-pajjiżi membri tal-OIE fil-proċess tat-twaqqif ta’ standards, pereżempju, billi jiġu organizzati seminars reġjonali għall-punti fokali tal-OIE għat-trattament xieraq tal-annimali. Barra minn hekk, il-proġetti ta’ kooperazzjoni tal-Kummissjoni 14 , iddedikati għat-tisħiħ tas-servizzi veterinarji, appoġġaw il-koordinazzjoni reġjonali fost il-pajjiżi Afrikani u l-involviment tagħhom fil-proċess tat-twaqqif ta’ standards tal-OIE.

Mill-2002, bħala riżultat, kienu adottati 14-il standard internazzjonali dwar it-trattament xieraq tal-annimali kif ukoll prinċipji ta’ gwida (ara l-Anness I). Barra minn hekk, l-UE rnexxielha tilħaq livell konsiderevoli ta’ allinjament bejn l-istandards tat-trattament xieraq tal-annimali tal-OIE u dawk tal-UE f’bosta oqsma 15 .

Fejn jidħol il-livell tal-implimentazzjoni tal-istandards, il-Kummissjoni appoġġat l-iżvilupp ta’ għarfien u ta’ ħiliet fost l-awtoritajiet kompetenti ta’ pajjiżi terzi li huma membri tal-OIE. Sa mill-2004, il-Kummissjoni kkontribwiet finanzjarjament ukoll għall-organizzazzjoni ta’ inizjattivi globali u reġjonali tal-OIE, u kienet tifforma parti mill-kumitati li jiddefinixxu l-għanijiet u l-programmi ta’ avvenimenti bħal dawn. L-attivitajiet tal-Kummissjoni ffaċilitaw l-implimentazzjoni tal-istandards tal-OIE f’pajjiżi terzi b’mod partikolari waqt il-qatla u fit-trasport.

Fil-livell reġjonali, il-Kummissjoni ffaċilitat l-iżvilupp ta’ Strateġiji Reġjonali tal-OIE għat-Trattament Xieraq tal-Annimali 16 u kkofinanzjat l-organizzazzjoni ta’ avvenimenti f’ħames reġjuni tal-OIE. Il-Kummissjoni ffinanzjat l-attivitajiet tal-Pjattaforma tal-OIE dwar it-Trattament Xieraq tal-Annimali għall-Ewropa fejn hi għandha rwol ewlieni fit-tmexxija tal-prijoritajiet u biex tiddeskrivi l-attivitajiet tal-Pjattaforma 17 .

Fl-2017, intlaħaq avveniment importanti meta l-OIE adottat, bl-appoġġ tal-UE, l-ewwel strateġija globali tagħha għat-trattament xieraq tal-annimali. Fil-fatt hija tippromwovi t-trattament xieraq tal-annimali bħala parti minn valuri soċjali ewlenin oħra bħalma huma l-iżvilupp u s-sostenibbiltà soċjoekonomiċi. Barra minn hekk, l-istrateġija tal-OIE hija bbażata fuq l-iżvilupp u l-implimentazzjoni ta’ standards ibbażati fuq ix-xjenza, il-bini tal-kapaċità, l-edukazzjoni, id-diversi partijiet ikkonċernati u d-djalogu. Dan l-approċċ huwa konformi mal-viżjoni u l-prinċipji tal-UE dwar it-trattament xieraq tal-annimali.

Il-Kummissjoni tikkoopera wkoll mal-FAO fl-organizzazzjoni ta’ avvenimenti tal-bini tal-kapaċità, li jippromwovu t-trattament xieraq tal-annimali bħala ġid pubbliku u komponent tal-produzzjoni sostenibbli. F’dan il-kuntest, il-Kummissjoni kkontribwiet għal avvenimenti importanti, bħal pereżempju l-ewwel laqgħa tal-esperti tal-FAO dwar il-bini tal-kapaċità, il-“FAO Expert meeting on capacity building to implement good animal welfare practices 18 ”. Il-Kummissjoni kkontribwiet ukoll għall-iżvilupp tal-portal tal-FAO, il-“FAO Gateway to Farm Animal Welfare”, pjattaforma virtwali għall-iskambju tal-għarfien bejn diversi partijiet ikkonċernati 19 . Il-Gateway, li l-Kummissjoni tifforma parti mill-Bord Editorjali tiegħu, ikkontribwixxa biex titqajjem sensibilizzazzjoni dwar it-trattament xieraq tal-annimali fil-livell globali, kif ukoll dwar l-inizjattivi tal-Kummissjoni.

3.3.attivitajiet bilaterali

L-għanijiet ewlenin tal-kooperazzjoni bilaterali huma li:

1.Titqajjem sensibilizzazzjoni u jinħoloq fehim komuni dwar it-trattament xieraq tal-annimali;

2.Qsim tal-għarfien tekniku;

3.Appoġġ għall-pajjiż sieħeb fl-iżvilupp u fl-implimentazzjoni tal-leġiżlazzjoni u tal-istandards tat-trattament xieraq tal-annimali bbażati fuq il-mudell u l-prinċipji tal-UE jew tal-OIE;

4.Diskussjoni dwar suġġetti fuq it-trattament xieraq tal-annimali b’impatt fil-kummerċ bejn il-partijiet.

L-istrumenti ewlenin użati mill-Kummissjoni biex jintlaħqu dawn l-għanijiet huma:

1.Konferenzi u avvenimenti internazzjonali;

2.Sessjonijiet ta’ ħidma ta’ taħriġ jew missjonijiet tal-esperti;

3.Programmi komuni tar-riċerka, immirati għall-kuntest lokali;

4.Assistenza teknika.

L-ewwel ftehim kummerċjali bilaterali b’referenza espliċita għat-trattament xieraq tal-annimali kien iffirmat maċ-Ċilì 20 fl-2002. Minn dak iż-żmien ’il hawn, il-kooperazzjoni dwar it-trattament xieraq tal-annimali ddaħħlet fil-biċċa l-kbira tal-ftehimiet kummerċjali bilaterali 21 inklużi l-kwistjonijiet sanitarji u fitosanitarji u ġiet proposta b’mod konsistenti fin-negozjati kummerċajli kollha li għaddejjin.

Il-Kummissjoni stabbiliet ukoll kooperazzjoni ’l barra mill-ftehimiet kummerċjali (ara l-Anness II).

L-istandards tal-OIE spiss jintużaw bħala bażi biex jintlaħaq fehim komuni ma’ pajjiżi terzi. Fil-fatt dawn l-istandards jipprovdu qafas aċċettat b’mod wiesa’ sabiex jibdew u jiżviluppaw kooperazzjoni ma’ pajjiżi terzi 22 .

L-inklużjoni tat-trattament xieraq tal-annimali fi ftehimiet kummerċjali bilaterali dejjem saret fuq talba tal-UE. Fi ħdan jew barra mill-ftehimiet kummerċjali, il-kooperazzjoni bilaterali kisbet riżultati konkreti matul is-snin. Il-gruppi ta’ ħidma bejn l-UE u s-sħab tagħha (eż. iċ-Ċilì u n-New Zealand) ħafna drabi jiġu stabbiliti biex jiddefinixxu l-pjanijiet ta’ ħidma annwali b’azzjonijiet korrispondenti. Bħala riżultat, iċ-Ċilì żviluppa korp sħiħ ta’ leġiżlazzjoni nazzjonali dwar it-trattament xieraq tal-annimali, u f’New Zealand u fil-Kanada twaqqfet l-ekwivalenza dwar it-trattament xieraq tal-annimal waqt il-qatla.

Proġetti fuq żmien qasir ukoll kisbu riżultati tanġibbli bħalma huma l-azzjonijiet 23 implimentati mill-2014 fil-qafas tal-Istrument ta’ Djalogu Settorjali bejn l- UE u l-Brażil fil-kuntest ta’ Memorandum ta’ Qbil dwar it-trattament xieraq tal-annimali. B’mod ġenerali, dawn l-azzjonijiet jistgħu jitqiesu li jinfluwenzaw l-attitudnijiet tal-bdiewa u tal-industriji fuq id-dibattitu dwar it-trattament xieraq tal-annimali, u f’xi każijiet iwassluhom biex jinvolvu ruħhom f’impenji volontarji tat-trattament xieraq tal-annimali, bħal dwar il-hawsing fi grupp għall-ħnieżer nisa 24 .

3.4.riċerka, Assistenza Teknika u attivitajiet għall-bini ta’ kapaċità

Attivitajiet tar-riċerka

Il-Kummissjoni ffinanzjat 15-il proġett 25 dwar it-trattament xieraq tal-annimali fil-qafas tas-Sitt u s-Seba’ Programmi ta’ Qafas, li jinvolvu l-istituzzjonijiet ta’ riċerka minn pajjiżi terzi. Fosthom, Welfare Quality® 26 kien l-ewwel proġett kbir tal-UE dwar it-trattament xieraq tal-annimali li stabbilixxa netwerk xjentifiku li ilu għaddejj għal ħafna żmien bejn l-UE u l-pajjiżi terzi.

Barra minn hekk, l-EFSA ilha mill-2004, tipproduċi opinjonijiet xjentifiċi dwar it-trattament xieraq tal-annimali li l-Kummissjoni tippromwovi f’pajjiżi terzi. Il-Kummissjoni ffaċilitat wkoll skambji bejn l-esperti u x-xjenzati tal-EFSA minn pajjiżi sħab (pereżempju, New Zealand, iċ-Ċilì).

Iż-żewġ attivitajiet ikkontribwew biex jipprovdu l-bażi xjentifka għall-iżvilupp ta’ standards u linji gwida internazzjonali għat-trattament xieraq tal-annimali.

Assistenza Teknika u attivitajiet għall-Bini ta’ kapaċità

Il-Programm BTSF u t-TAIEX huma l-istrumenti ewlenin għall-bini ta’ kapaċità. Barra minn hekk, intużaw proġetti ta’ ġemellaġġ fil-kuntest tal-Politika tal-Viċinat.

Il-programm BTSF jimmira lill-uffiċjali f’pajjiżi terzi li jesportaw ikel u annimali lejn l-UE. L-uffiċjali mħarrġa mbagħad huma responsabbli għat-tixrid tal-għarfien miksub u biex jimplimentaw taħriġ ta’ disseminazzjoni.

Il-BTSF kien ilu jwassal il-bini ta’ kapaċità lil pajjiżi terzi permezz ta’:

1.BTSF World, dedikat u organizzat f’pajjiżi terzi, bħal sessjonijiet ta’ ħidma reġjonali 27 u Missjonijiet ta’ Taħriġ Sostnut 28 ;

2.L-integrazzjoni ta’ uffiċjali ta’ pajjiżi terzi f’sessjonijiet ta’ taħriġ organizzati għall-UE;

3.Moduli ta’ tagħlim elettroniku.

Is-suġġetti koperti mill-BTSF kienu jvarjaw minn prinċipji xjentifiċi bażiċi għal leġiżlazzjoni speċifika tal-UE u l-istandards tal-OIE dwar it-trattament xieraq tal-annimali, b’mod partikolari l-qatla u t-trasport. Bejn l-2004 u l-2015, l-attivitajiet tal-BTSF World dedikati għat-trattament xieraq tal-annimali laħqu madwar 1.000 parteċipant minn pajjiżi terzi.

It-TAIEX jappoġġa l-amministrazzjoni fil-pajjiżi kandidati kollha u fil-pajjiżi tal-viċinat għall-approssimazzjoni, it-traspożizzjoni u l-infurzar tal-leġiżlazzjoni tal-UE 29 .

Bejn l-2004 u l-2015, it-TAIEX iffinanzja aktar minn 60 proġett tat-trattament xieraq tal-annimali, b’aktar minn 40 sessjoni ta’ ħidma u 16-il missjoni ta’ esperti. Eżempju ta’ suċċess ta’ wieħed minn dawn is-sessjonijiet ta’ ħidma kien dak li seħħ fil-Libanu 30 , fl-2015. Is-sessjoni ta’ ħidma, organizzata f’kooperazzjoni mal-OIE, immirat lejn it-titjib tat-trattament xieraq tal-annimali waqt it-trasport u l-qatla.

Fil-perjodu eżaminat, it-trattament xieraq tal-annimali ddaħħal fi proġetti ta’ ġemellaġġ b’mod partikolari mal-pajjiżi tal-Balkani u mal-Ukrajna.

3.5.IMPATT FUQ IL-KOMPETITTIVITÀ

Din it-taqsima tivvaluta sa liema punt l-attivitajiet internazzjonali dwar it-trattament xieraq tal-annimali taw kontribut għat-titjib tal-kundizzjonijiet ekwi fil-livell globali bejn il-produtturi tal-UE u dawk mhux tal-UE.

L-istudju evalwa l-kompetittività tas-setturi tal-UE influwenzati mill-istandards tat-trattament xieraq tal-annimali kif ukoll l-impatt tal-konformità tal-istandards tat-trattament xieraq tal-annimali fuq erba’ dimensjonijiet ewlenin tal-kompetittività:

1.Il-produttività u l-kost tal-kompetittività;

2.L-aċċess għas-suq;

3.Id-distorsjonijiet tal-kummerċ;

4.Il-kapaċità tal-innovazzjoni.

Il-metodoloġija applikata għall-analiżi tal-kompetittività kienet ibbażata fuq erba’ sorsi ewlenin ta’ informazzjoni: i) il-letteratura disponibbli, (ii) l-intervisti ma’ assoċjazzjonijiet tan-negozju tal-UE, iii) il-flussi tal-kummerċ, iv) żewġ stħarriġiet apposta mmirati lejn operaturi tal-UE u dawk mhux tal-UE f’pajjiżi terzi magħżula.

Abbażi tan-numru limitat ta’ risposti għall-istħarriġ, jidher li l-operaturi tal-UE u dawk mhux tal-UE għandhom perċezzjoni differenti ħafna tal-impatt fuq il-kompetittività tal-istandards tat-trattament xieraq tal-annimali.

Il-produttività u l-kost tal-kompetittività

Ir-riżultati tal-istħarriġ jissuġġerixxu li l-konformità mal-leġiżlazzjoni/l-istandards tat-trattament xieraq tal-annimali timplika kosti tal-produzzjoni ogħla għall-operaturi irrispettivament mill-pożizzjoni ġeografika tagħhom.

Fir-rigward tal-kompetittività fis-swieq tal-UE u dawk internazzjonali, l-istudju enfasizza d-differenzi sinifikanti bejn l-operaturi tal-UE u dawk mhux tal-UE fil-perċezzjoni tagħhom rigward il-fatturi tal-kompetittività. Minn naħa waħda, l-operaturi tal-UE jqisu li l-leġiżlazzjoni dwar it-trattament xieraq tal-annimali tqiegħedhom fi żvantaġġ sinifikanti għall-kosti u l-ishma tas-suq tagħhom fi ħdan u barra l-UE. Min-naħa l-oħra, l-operaturi ta’ pajjiżi terzi ma jqisux id-differenzi fl-istandards tat-trattament xieraq tal-annimali bħala sors ta’ vantaġġ għalihom. Fil-fatt, l-istudju sab li f’ħafna każijiet il-kosti tal-konformità mal-leġiżlazzjoni tat-trattament xieraq tal-annimali huma relattivament baxxi meta mqabbla ma’ kosti oħra tal-produzzjoni (bħall-għalf u l-ħaddiema). Għall-bajd u l-prodotti tal-bajd l-istudju sab evidenza li tissuġġerixxi li d-differenza fl-istandards tat-trattament xieraq tal-annimali jistgħu jikkawżaw id-devjazzjoni tat-traffiku kummerċjali u r-rilokazzjoni tal-prodott. Madankollu, dan ftit li xejn seħħ għall-importazzjonijiet fl-UE, minħabba rekwiżiti sanitarji u fitosanitarji paralleli.

Il-letteratura 31 , 32 , 33 indikat li l-vantaġġi tal-kosti f’xi pajjiżi terzi huma prinċipalment dovuti għall-kosti tal-għalf u dawk tal-ħaddiema kif ukoll għad-disponibbiltà tar-riżorsi naturali. Id-differenzi fl-istandards tat-trattament xieraq tal-annimali jidhru li għandhom impatt ħafna aktar baxx 34 . Il-letteratura dwar il-produzzjoni tat-tiġieġ tas-simna pereżempju, turi li f’pajjiżi bħall-Brażil u t-Tajlandja l-vantaġġi kompetittivi huma prinċipalment dovuti għall-kosti tal-għalf u tal-ħaddiema u l-kundizzjonijiet klimatiċi aktar favorevoli 35 . Fil-qosor, fil-biċċa l-kbira tal-każijiet l-operaturi mhux tal-UE se jibqgħu aktar kompetittivi anke kieku ġew applikati standards tal-UE dwar it-trattament xieraq tal-annimali, minħabba kundizzjonijiet strutturali aktar favorevoli.

Madankollu, minkejja l-fatt li s-setturi tal-UE tal-laħam tal-majjal u tat-tjur huma soġġetti għal leġiżlazzjoni komprensiva dwar it-trattament xieraq tal-annimali, huma għadhom esportaturi netti għal għadd ta’ setturi tas-suq. Fil-perjodu kkunsidrat fir-rapport, l-UE saħħet il-pożizzjoni tagħha bħala l-akbar esportatur tal-laħam tal-majjal fil-livell dinji 36 . Barra minn hekk, l-UE hija t-tielet l-akbar esportatur dinji tal-laħam tat-tjur, iżda hija wkoll importatur ewlieni ta’ prodotti tat-tjur. Bl-istess mod l-UE hija waħda mill-akbar esportaturi tal-bajd u tal-prodotti tal-bajd b’madwar 25 % tal-kummerċ totali fl-2013-2015 37 . Sadanittant, l-UE hija attur minuri f’oqsma mhux regolati mil-leġiżlazzjoni tal-UE speċifika għall-ispeċi u, b’mod partikolari, hija importatur nett tal-laħam taċ-ċanga u tan-nagħaġ. Fl-istess ħin, wieħed mill-esportaturi ewlenin tad-dinja tal-laħam tan-nagħaġ, New Zealand, għandu standards għolja tat-trattament xieraq tal-annimali.

Għalhekk, l-istandards tat-trattament xieraq tal-annimali mhumiex xprun ewlieni tal-kompetittività fis-suq dinji għaliex fatturi oħrajn jistgħu jinfluwenzaw b’mod qawwi l-kompetittività (bħalma huma l-prossimità tas-suq, fatturi tal-produzzjoni oħrajn, it-tip ta’ segmenti tas-suq jew l-eżistenza jew in-nuqqas ta’ ftehimiet kummerċjali).

Minkejja dan li ntqal hawn fuq, il-perċezzjoni li qed tikber tal-konsumatur tal-metodi ta’ produzzjoni sostenibbli tal-UE – inklużi l-istandards għoljin tat-trattament xieraq tal-annimali – tista’ ttejjeb u fil-fatt ittejjeb il-pożizzjoni fis-suq ta’ prodotti tal-UE.

B’mod ġenerali l-operaturi tal-UE u mhux tal-UE jidhru li għandhom preċezzjoni differenti wkoll dwar l-impatt tal-istandards tat-trattament xieraq tal-annimali fuq il-produttività. L-operaturi mhux tal-UE jirrapportaw produttività ogħla li tirriżulta minn konformità mal-leġiżlazzjoni tat-trattament xieraq tal-annimali, filwaqt li l-operaturi tal-UE rrappurtaw l-oppost. It-tnejn li huma qiesu li l-konformità mal-leġiżlazzjoni tat-trattament xieraq tal-annimali għandha impatt pożittiv fuq il-kwalità tal-prodott.

L-aċċess għas-suq

Il-maġġoranza kemm tal-operaturi tal-UE kif ukoll dawk mhux tal-UE indikaw li l-konformità mal-leġiżlazzjoni tat-trattament xieraq tal-annimali u mal-istandards għenet biex jaċċessaw fetħiet għal swieq ġodda.

Teżisti perċezzjoni differenti dwar l-aċċess għas-swieq ta’ pajjiżi terzi minħabba fatturi relatati mat-trattament xieraq tal-annimali. Filwaqt li aktar minn nofs ta’ dawk li wieġbu li mhumiex fl-UE rrapportaw aċċess aħjar għas-swieq internazzjonali, ir-rispondenti tal-UE ċaħdu t-tali aċċess imtejjeb.

Il-konformità mar-rekwiżiti tal-UE dwar it-trattament xieraq tal-annimali waqt il-qatla kkontribwew għal kundizzjonijiet ugwali ta’ aċċess għall-UE, u biex jitnaqqas id-distakk bejn il-pajjiżi esportaturi u l-UE. Barra minn hekk, l-operaturi ta’ pajjiżi terzi jqisu li din il-konformità għandha impatti pożittivi f’termini tal-aċċess għas-swieq tal-esportazzjonijiet primjum minbarra l-UE. Dan juri li l-promozzjoni globali tal-istandards tal-Unjoni dwar it-trattament xieraq tal-annimali tirrappreżenta opportunità biex jiġi valorizzat il-valur fis-suq ta’ prodotti miksuba skont dawn l-istandards. Dan huwa fil-fatt wieħed mill-għanijiet tal-Pjattaforma tal-UE dwar it-Trattament Xieraq tal-Annimali 38 .

Id-distorsjonijiet tal-kummerċ

L-istudju sab żewġ każijiet potenzjali ta’ distorsjonijiet tal-kummerċ li jirriżultaw minn differenzi fil-leġiżlazzjoni tat-trattament xieraq tal-annimali applikati bejn il-pajjiżi tal-UE u dawk ta’ pajjiżi terzi. Dan kien jikkonċerna l-bajd u l-prodotti tal-bajd u l-esportazzjonijiet tal-bovini ħajjin.

Fir-rigward tal-bajd u l-prodotti tal-bajd, l-istudju 39 juri li d-dewmien fl-implimentazzjoni tar-rekwiżiti tal-UE għat-tiġieġ tal-bajd f’pajjiżi tal-Viċinat, b’mod partikolari fl-Ukrajna, seta’ kkawża żvantaġġi għall-kosti tal-operaturi tal-UE. Madankollu, dawn ma ġewx materjalizzati f’distorsjonijiet tal-kummerċ fis-suq għall-bajd tal-ikel minħabba l-fatturi sanitarji paralleli (eż. sistema ekwivalenti tal-kontroll tas-Salmonella) li ma ppermettewx l-esportazzjoni lejn l-UE. Id-distorsjonijiet fis-suq għall-prodotti tal-bajd baqgħu ristretti fid-daqs minħabba d-dewmien fl-implimentazzjoni tal-kwoti.

Rigward il-kummerċ tal-bovini ħajjin lejn pajjiżi terzi 40 , l-operaturi tal-UE qiesu li l-istandards tat-trattament xieraq tal-annimali jistgħu jfixklu t-trasport tal-annimali fit-tul (b’mod partikolari bil-baħar). Madankollu, l-istudju ma sab l-ebda evidenza konklużiva li l-istandards differenti tat-trattament xieraq tal-annimali dwar it-trasport bil-baħar kellhom impatt fuq il-flussi tal-kummerċ, jew ta’ ħsara għall-pożizzjoni kompetittiva tal-UE fl-istudji tal-każijiet li ġew analizzati.

Il-kapaċità tal-innovazzjoni

L-istudju juri li kien diffiċli li tiġi kkwantifikata l-importanza ekonomika tas-suq fil-prodotti li huma favur it-trattament xieraq tal-annimali. Ħafna drabi d-dejta ma kinitx disponibbli u komponenti oħra (eż. sostenibbiltà ambjentali) kienu kkombinati flimkien mat-trattament xieraq tal-annimali kemm fil-kummerċjalizzazzjoni tal-prodotti kif ukoll fil-perċezzjoni tal-konsumaturi.

4.Konklużjonijiet

1.Il-Kummissjoni għandha approċċ kooperattiv biex tippromwovi t-trattament xieraq tal-annimali fix-xena internazzjonali.

2. L-attivitajiet internazzjonali tat-trattament xieraq tal-annimali huma investiment fit-tul, li huwa bbażat fuq tliet stadji sussegwenti: sensibilizzazzjoni, bini ta’ kapaċità u ffinanzjar. Matul is-snin, il-Kummissjoni allokat riżorsi sinifikanti għal inizjattivi bħal dawn.

3.Il-Kummissjoni, flimkien mal-Istati Membri tal-UE, kellha rwol prominenti u deċiżiv sabiex tiżdied is-sensibilizzazzjoni globali dwar it-trattament xieraq tal-annimali u nkisbu riżultati sinifikanti.

4.Il-Kummissjoni hija impenjata bis-sħiħ favur il-kummerċ internazzjonali bbażat fuq il-valuri kif enfasizzat fl-istrateġija “Kummerċ għal Kulħadd” 41 . Hija tirrikonoxxi li l-promozzjoni tat-trattament xieraq tal-annimali hija importanti.

5.L-istandards tal-UE dwar it-trattament xieraq tal-annimali kellhom effett ta’ sinjalazzjoni u spiss kienu jirrappreżentaw sors ta’ ispirazzjoni għal inizjattivi volontarji mill-industrija dwar it-trattament xieraq tal-annimali.

6.Il-Kummissjoni rnexxielha tpoġġi t-trattament xieraq tal-annimali fid-djalogu ma’ ħafna pajjiżi terzi.

7.Fil-livell multilaterali, l-attivitajiet imwettqa flimkien ma’ organizzazzjonijiet internazzjonali ppromwovew il-mudell tal-UE dwar it-trattament xieraq tal-annimali f’għadd kbir ta’ pajjiżi terzi.

8.L-UE għandha rwol ewlieni fil-promozzjoni u l-appoġġ għall-attivitajiet tal-OIE. B’mod partikolari, l-UE kienet kontributur kbir għall-proċess tat-twaqqif tal-istandards tal-OIE u kienet proattiva fit-tħeġġiġ ta’ parteċipazzjoni attiva minn bosta pajjiżi terzi.

9.Il-Kummissjoni għandha wkoll rwol ewlieni fl-implimentazzjoni tal-istandards tal-OIE f’pajjiżi terzi, b’mod partikolari dwar it-trattament xieraq tal-annimali waqt il-qatla u t-trasport.

10.Il-kooperazzjoni bilaterali tejbet il-kondizzjonijiet tat-trattament xieraq tal-annimali mrobbija f’xi pajjiżi terzi. Din iffaċilitat l-implimentazzjoni tar-rekwiżiti tal-UE għall-importazzjoni dwar l-istandards tat-trattament xieraq tal-annimali waqt il-qatla.

11.Ir-riċerka, it-taħriġ u l-attivitajiet għall-bini ta’ kapaċità tal-Kummissjoni laħqu eluf ta’ professjonisti. Dawn żiedu b’mod sostanzjali l-għarfien u l-ħiliet dwar it-trattament xieraq tal-annimali u appoġġaw l-implimentazzjoni ta’ politiki u standards tat-trattament xieraq tal-annimali f’pajjiżi benefiċjarji.

12.L-istandards tat-trattament xieraq tal-annimali għandhom impatt limitat b’mod ġenerali fuq il-kompetittività tal-produtturi tal-UE fis-swieq dinjija.

13.Il-kostijiet ġenerali tal-konformità mal-istandards tat-trattament xieraq tal-annimali għadhom baxxi ħafna meta mqabbla ma’ kosti oħra tal-produzzjoni li jaffettwaw il-kompetittività globali u jinfluwenzaw ix-xejriet tal-kummerċ dinji.

14.Il-promozzjoni globali tal-istandards tal-Unjoni dwar it-trattament xieraq tal-annimali tikkontribwixxi sabiex jintlaħaq l-għan fit-tul li t-trattament xieraq tal-annimali jitjieb madwar id-dinja u li jitnaqqsu l-prattiki kummerċjali inġusti. Din hija wkoll opportunità biex jiġi vvalorizzat il-valur miżjud tas-suq għall-prodotti miksuba skont dawn l-istandards.

(1) COM(2012) 6, final/2.

(2) COM(2002) 626 final.

(3) KUMM(2006) 13 finali.

(4) Evaluation of the EU Policy on Animal Welfare and Possible Policy Options for the future, https://ec.europa.eu/food/sites/food/files/animals/docs/aw_arch_122010_full_ev_report_en.pdf

(5) https://publications.europa.eu/mt/publication-detail/-/publication/dc039353-ca9c-11e7-8e69-01aa75ed71a1

(6) https://ec.europa.eu/agriculture/sites/agriculture/files/external-studies/2014/farmer-costs/fulltext_en.pdf

(7) https://ec.europa.eu/food/safety/btsf_en

(8) https://ec.europa.eu/neighbourhood-enlargement/tenders/taiex_en

(9) http://ec.europa.eu/research/index.cfm?pg=sitemap

(10) Id-Direttivi għan-negozjar ta’ Ftehimiet bejn il-Komunità Ewropea u Pajjiżi Terzi dwar miżuri sanitarji u fitosanitarji.

(11) L-Artikolu 12 tar-Regolament tal-Kunsill (KE) Nru 1099/2009 dwar il-protezzjoni tal-annimali waqt il-qatla.

(12) Is-sentenza tal-Qorti tal-Ġustizzja tal-UE fil-każijiet C-424/13 u C-383/16.

(13) Ir-rappreżentant tal-Kummissjoni kien membru tal-Grupp ta’ Ħidma tal-OIE dwar it-Trattament Xieraq tal-Annimali.

(14) Eż. L-istudju “Sanitary and Phytosanitary Standards Setting Organizations project “ (PANSPO), p.42

(15) L-istandards tal-OIE għall-ħnieżer u għat-tiġieġ tal-bajd għadhom qed jiġu żviluppati.

(16) Rappreżentant tal-Kummissjoni kien osservatur fil-laqgħat tal-Grupp ta’ Koordinazzjoni tal-Istrateġija Reġjonali għat-Trattament Xieraq tal-Annimali għall-Asja, il-Lvant Imbiegħed u l-Oċeanja.

(17) Il-Pjattaforma tal-OIE dwar it-Trattament Xieraq tal-Annimali għall-Ewropa tiffoka fuq l-istandards tal-OIE dwar it-trasport, il-qatla, u l-ġestjoni tal-popolazzjoni tal-klieb li jiġru fit-toroq.

(18) Il-kwartieri ġenerali tal-FAO Headquarters, Ruma, Settembru-Ottubru 2008, http://www.fao.org/ag/againfo/themes/animal-welfare/

(19) http://www.fao.org/ag/againfo/themes/animal-welfare/en/

(20) Fil-Kapitolu Sanitarju u Fitosanitarju tal-Ftehim ta’ Assoċjazzjoni mal-UE.

(21) Il-Ftehim Veterinarju bejn l-UE u l-Messiku qed jiġi nnegozjat mill-ġdid.

(22) Pereżempju, il-kooperazzjoni formali mal-Arġentina u l-Brażil tirreferi għall-istandards tal-OIE. Ix-xogħol li sar fuq bażi bilaterali dejjem kien ibbażat fuq l-istandards tal-OIE.

(23) L-istudju, p. 48-50.

(24) L-istudju, p. 48 u http://sectordialogues.org/ .

(25) L-istudju, p. 29.

(26) Il-proġett kien jammonta għal kontribuzzjoni tal-UE ta’ EUR 14.6-il miljun.

(27) Il-Kanada, iċ-Ċina, iċ-Ċilì, il-Korea t’Isfel, it-Tajlandja, il-Brażil, il-Costa Rica, is-Sri Lanka.

(28) It-Tajlandja, il-Malawi, il-Lesoto, iċ-Ċilì, il-Brażil.

(29) L-istudju, p. 36.

(30) Sessjoni ta’ ħidma multibenefiċjarja dwar it-trattament xieraq tal-annimali fil-ħin tal-qatla, li saret bejn id-9 u l-10 ta’ Marzu 2015, li għaliha attendew parteċipanti mil-Libanu, it-Turkija, il-Ġordan, il-Palestina, l-Eġittu u l-Alġerija.

(31) In-nota ta’ qiegħ il-paġna Nru 6.

(32) Study on the stunning/killing practices in slaughterhouses and their economic, social and environmental consequences, https://ec.europa.eu/food/sites/food/files/animals/docs/aw_arch_report_parti_en.pdf

(33) Study on various methods of stunning for poultry, https://ec.europa.eu/food/sites/food/files/animals/docs/aw_practice_slaughter_study_stunning_poultry_en.pdf

(34) L-istudju, p. 143.

(35) L-istudju, p. 118.

(36) L-istudju, p. 134.

(37) L-istudju, p. 137.

(38) Id-Deċiżjoni tal-Kummissjoni C(2017) 0280, ĠU C 31, 31.1.2017, p. 61.

(39) L-istudju, p. 87, 93, 154.

(40) L-istudju, p. 92, 93, 154, 167.

(41) COM(2015) 497 final.