Brussell, 18.1.2018

COM(2018) 37 final

KOMUNIKAZZJONI TAL-KUMMISSJONI

L-Ewwel Rapport ta’ Progress dwar it-Tnaqqis tas-Self Improduttiv fl-Ewropa

{SWD(2018) 33 final}


KOMUNIKAZZJONI TAL-KUMMISSJONI KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL U LILL-BANK ĊENTRALI EWROPEW

L-Ewwel Rapport ta’ Progress dwar it-Tnaqqis tas-Self Improduttiv fl-Ewropa

1.L-Indirizzar tas-Self Improduttiv bħala parti mit-tnaqqis tar-riskji fis-settur finanzjarju

Wara l-kriżi finanzjarja, il-qafas regolatorju għall-banek inbidel b’mod sostanzjali. L-unjoni Ewropea ħadet rwol ta’ tmexxija fl-implimentazzjoni tar-riformi maqbula globalment fil-livell tal-G20 u fil-Kumitat ta’ Basel bil-għan li tissaħħaħ l-istabbiltà finanzjarja, jitnaqqas ir-riskju fis-settur bankarju, u jiġi evitat li l-kontribwenti jkollhom jikkontribwixxu finanzjarjament għall-ispejjeż tal-banek li qed ifallu.

Bara l-kapital aktar strett b’mod sinifikanti u r-rekwiżiti ta’ likwidità għall-banek, kif ukoll l-obbligu għall-banek kollha li jkollhom ammont biżżejjed ta’ kapital b’kapaċità ta’ rikapitalizzazzjoni interna għall-iskop ta’ riżoluzzjoni, l-arranġamenti istituzzjonali għas-superviżjoni u r-riżoluzzjoni tal-banek fl-Unjoni, l-aktar fiż-żona tal-euro ssaħħu l-aktar bit-twaqqif ta’ Unjoni Bankarja u tnejn mit-tliet pilastri tagħha, Il-Mekkaniżmu Superviżorju Uniku u l-Bord Uniku ta’ Riżoluzzjoni 1 . Bħala riżultat ta’ dawn il-miżuri, is-settur bankarju tal-UE huwa f’qagħda ħafna aħjar milli kien fis-snin ta’ qabel. Mill-2014 il-banek fiż-żona tal-euro żiedu l-kapital tagħhom b’EUR 234 biljun u EUR 813-il biljun u żiedu EUR 813-il biljun f’assi likwidi. Il-banek taż-żona tal-euro matul dawn l-aħħar snin naqqsu l-pussess tagħhom ta’ dejn tal-gvern, bi tnaqqis bi 17 % bejn l-2015 u l-2017 u b’hekk naqqsu wkoll ir-rabta finanzjarja mas-sovrani tagħhom. F’Novembru 2016, il-Kummissjoni pproponiet aktar miżuri għat-tnaqqis tar-riskji, inklużi l-bidliet fid-Direttiva u r-Regolament dwar ir-Rekwiżiti ta’ Kapital 2 u proposta li tittratta l-insolvenza tan-negozji, ir-ristrutturar u t-tieni opportunità 3 . Il-Kummissjoni qed tkompli l-ħidma fuq l-Unjoni tas-Swieq Kapitali (CMU) bħala waħda mill-ogħla prijoritajiet tagħha.

Ħażniet kbar ta’ Self Improduttiv (NPLs), f’ċerti banek u Stati Membri, qed jonqsu. Il-proporzjon medju ta’ NPLs naqas b’terz mill-2014 u huwa fuq xejra kostanti ta’ tnaqqis. Stokks kbar ta’ NPLs jistgħu jkunu ta’ piż fuq il-prestazzjoni fuq terminu qasir u fuq terminu itwal tal-bank permezz ta’ żewġ mezzi ewlenin. L-ewwel nett, l-NPLs jeħtieġu livelli ogħla ta’ proviżjonament. Id-dispożizzjonijiet ta’ self inaqqsu l-profittabbiltà tal-banek u jnaqqsu l-kapital regolatorju. Fil-każijiet l-iktar gravi, il-kontabilità meħtieġa għal NPLs tista’ tpoġġi f’dubju l-vijabbiltà ta’ bank b’implikazzjonijiet potenzjali għall-istabbiltà finanzjarja. It-tieni nett, l-NPLs jużaw ammonti sinifikanti mir-riżorsi ta’ bank, kemm umani kif ukoll finanzjarji. Dan inaqqas il-kapaċità tal-banek li jsellfu, inkluż lil intrapriżi żgħar u ta’ daqs medju li jiddependu fuq is-self bankarju ferm aktar minn kumpaniji akbar, u b’hekk jaffettwaw it-tkabbir ekonomiku u l-ħolqien tal-impjiegi. Għal dawn ir-raġunijiet, il-Kummissjoni ilha żmien twil tenfasizza l-urġenza biex jittieħdu l-miżuri neċessarji sabiex tindirizza r-riskji relatati ma’ NPLs.

L-indirizzar ta’ stokks kbar ta’ NPLs u l-akkumulazzjoni futura possibbli tagħhom hija essenzjali biex titlesta l-Unjoni Bankarja, u s-swieq sekondarji ta’ NPLs żviluppati sew huma wieħed mill-elementi kostitwenti għal Unjoni tas-Swieq Kapitali li tiffunzjona tajjeb. Dawn l-elementi jagħmlu prijorità ewlenija taħt l-aġenda tal-UE biex tiġi approfondita l-Unjoni Ekonomika u Monetarja, kif stabbilit fid-Dokument ta’ Riflessjoni tal-Kummissjoni ta’ Mejju 2017 4 . Barra minn hekk, sistema finanzjarja integrata ser issaħħaħ ir-reżiljenza tal-Unjoni Ekonomika u Monetarja għal xokkijiet negattivi billi tiġi ffaċilitata l-kondiviżjoni tar-riskju privat bejn il-fruntieri, filwaqt li fl-istess ħin titnaqqas il-ħtieġa għal kondiviżjoni tar-riskju pubbliku. Il-pakkett tal-UEM tal-Kummissjoni tas-6 ta’ Diċembru 2017 ippreżenta pjan direzzjonali u proposti konkreti għall-approfondiment tal-Unjoni Ekonomika u Monetarja tal-Ewropa, li hija parti minn Unjoni aktar Magħquda, aktar Qawwija u aktar Demokratika. 5  

Ir-responsabbiltà primarja biex jiġu indirizzati proporzjonijiet ta’ NPL għoli tibqa’ mal-banek u l-Istati Membri affettwati. Il-Kummissjoni semmiet kostantement din il-kwistjoni, għall-pajjiżi konċernati, fil-kuntest tas-Semestru Ewropew. Madankollu, hemm ukoll dimensjoni ċara tal-UE li jitnaqqsu il-proporzjonijiet ta’ NPL attwali, kif ukoll li tiġi evitata kwalunkwe akkumulazzjoni ta’ NPLs fil-futur, minħabba l-interkonnettività tas-sistema bankarja tal-UE u b’mod partikolari fiż-żona tal-euro. B’mod partikolari, hemm riperkussjonijiet kbar minn Stati Membri bi proporzjonijiet ta’ NPL għoljin għall-ekonomija tal-UE kollha kemm hi, kemm f’termini ta’ tkabbir ekonomiku kif ukoll tal-istabbiltà finanzjarja.

Filwaqt li jirrifletti fuq din id-dimensjoni tal-UE u jibni fuq il-livell għoli ta’ qbil dwar il-ħtieġa li jitkomplew u jiġu estiżi l-azzjonijiet diġà mibdija mill-Kummissjoni, f’Lulju 2017 il-Kunsill adotta Pjan ta’ Azzjoni biex jiġi indirizzat is-Self Improduttiv fl-Ewropa”. Dan il-Pjan ta’ Azzjoni jitlob lill-istituzzjonijiet varji — inkluż il-Kummissjoni — biex jieħdu miżuri xierqa biex jindirizzaw aktar l-isfidi ta’ proporzjonijiet ta’ NPL għoljin fl-Ewropa. Barra minn hekk, il-Kunsill fil-konklużjonijiet tiegħu qabel li jerġa’ lura għal din il-kwistjoni b’mod regolari u inizjalment wara sitt xhur, sabiex jittieħed kont tal-evoluzzjoni ta’ NPLs fl-Unjoni fuq il-bażi ta’ inventarju mill-Kummissjoni. Din il-Komunikazzjoni, flimkien mad-Dokument ta’ Ħidma tal-Persunal mehmuż, hija l-ewwel rapport ta’ progress dwar l-implimentazzjoni tal-Pjan ta’ Azzjoni. Id-Dokument ta’ Ħidma tal-Persunal jinkludi kontribuzzjonijiet minn partijiet ikkonċernati oħra tal-UE, li wkoll ġew mistiedna mill-Kunsill, flimkien mal-Kummissjoni, biex jieħdu azzjoni biex jappoġġaw u jħaffu r-riżoluzzjoni ta’ NPLs fl-Unjoni.

2.L-evoluzzjoni reċenti tas-Self Improduttiv

Kif imsemmi hawn fuq, it-titjib ġenerali fil-proporzjonijiet tal-NPL fis-snin reċenti kompla fl-2017. Il-kwalità tal-portafolli tas-self tal-bank kompliet titjieb. L-aħħar ċifri jikkonfermaw it-tendenza 'l isfel fil-proporzjon tal-NPL, li naqas għal 4.6 % (Q2 2017), b’madwar punt perċentwali minn sena għal sena (ara t-Tabella 1).  B'riżultat ta' dan, il-proporzjon laħaq l-aktar livell baxx tiegħu minn Q4 2014. Il-proporzjon ta’ dispożizzjonament 6 żdied ukoll, u jammonta għal 50.8 % (Q2 tal-2017).

Il-proporzjonijiet ta’ NPL dan l-aħħar naqsu fi kważi l-Istati Membri kollha, għalkemm is-sitwazzjoni tvarja b’mod sinifikanti bejn l-Istati Membri. Bosta għad għandhom proporzjonijiet għolja ta’ NPL (9 Stati Membri kellhom proporzjonijiet ta’ aktar minn 10 % fi tmiem it-tieni kwart tal-2017) u oħrajn kellhom proporzjonijiet baxxi ħafna (10 Stati Membri għandhom proporzjon ta’ inqas minn 3 %). Id-dokument ta’ Ħidma tal-Persunal mehmuż jirrapporta fid-dettall dwar l-evoluzzjoni ta’ NPLs u dwar il-miżuri ta’ politika f’għadd ta’ pajjiżi magħżula bi proporzjonijiet ta’ NPL għolja.

F’dawn l-Istati Membri hemm evidenza ta’ progress inkoraġġanti fit-tnaqqis tal-NPL minħabba kombinazzjoni ta’ azzjonijiet ta’ politika u tkabbir ekonomiku. Madankollu, l-NPLs ikomplu joħolqu riskji għat-tkabbir ekonomiku u l-istabbiltà finanzjarja. Il-volum totali ta’ NPLs fl-UE għadu fil-livell ta’ EUR 950 biljun, b’mod ċar ogħla mil-livelli ta’ qabel il-kriżi 7 . Impedimenti strutturali jkomplu jxekklu tnaqqis aktar mgħaġġel ta’ stokkijiet ta’ NPL. Fost elementi oħra, l-attività fis-swieq sekondarji għal Self Improduttiv għadha mhix biżżejjed biex tikkontribwixxi b’mod sostanzjali għall-isforzi għat-tnaqqis ta’ NPL, minkejja aktar interess minn ċerti gruppi ta’ investituri u l-volum dejjem jiżdied ta’ tranżazzjonijiet relatati mal-NPL. Barra minn hekk, ir-ristrutturar tad-dejn, l-insolvenza u l-proċessi ta’ rkupru ta’ dejn għadhom bil-mod wisq u imprevedibbli f’xi każijiet.

3.lejn pakkett komprensiv ta’ miżuri biex jindirizzaw self improduttiv

Il-Kummissjoni tat attenzjoni sinifikanti lill-indirizzar tal-kwistjonijiet tal-NPLs mindu faqqgħet il-kriżi finanzjarja fl-2008/9. Għall-banek, li l-vijabilità tagħhom ġiet mhedda bi proporzjonijiet għolja ta’ NPL, il-Kummissjoni assistiet lill-Istati Membri biex iwaqqfu miżuri ad-hoc u mifruxa mas-sistema kollha bl-għan li jitnaqqsu l-istokks ta’ NPL (xi drabi bħala parti minn programm ta’ assistenza finanzjarja) permezz ta’ soluzzjonijiet kompatibbli ma’ regoli tal-għajnuna mill-istat bħal miżuri speċifiċi ta’ assi indeboliti għall-banek, vetturi ta’ stralċ u/jew strutturi kompatibbli mas-suq, li jġibu magħhom tnaqqis sostanzjali tal-istokk ta’ Self Improduttiv preżenti fis-settur bankarju. B’dan il-mod, hija inċentivat il-banek biex jimmaniġġjaw u jnaqqsu l-NPLs tagħhom permezz tal-mekkaniżmi tas-suq u għaldaqstant il-kontribwenti kienu protetti milli jġorru l-ispejjeż permezz ta’ kondiviżjoni xierqa tal-piżijiet u ristrutturar fil-fond. Ġiet enfasizzata wkoll il-ħtieġa li tiġi ddeterminata azzjoni biex jiġu indirizzati l-proporzjonijiet ta’ NPL fir-rakkomandazzjonijiet tas-Semestru Ewropew lill-Istati Membri rilevanti. Il-Bank Ċentrali Ewropew fil-kapaċità tiegħu ta’ superviżur (Mekkaniżmu Superviżorju Uniku), l-awtoritajiet nazzjonali kompetenti u l-Awtorità Bankarja Ewropea kellhom ukoll rwol importanti fit-tisħiħ ta’ superviżjoni u rappurtaġġ ta’ NPLs fl-Ewropa, filwaqt li l-Bank Ċentrali Ewropew kellu parti integrali fis-salvagwardja tal-istabbiltà finanzjarja fl-Unjoni.

Biex isir progress, għandu jinżamm dan l-approċċ komprensiv fl-indirizzar tal-proporzjonijiet tal-NPL u, kif stabbilit fil-Pjan ta’ Azzjoni tal-Kunsill, għandu jiffoka fuq taħlit ta’ azzjonijiet ta’ politika komplementari f’erba’ oqsma: (i) azzjonijiet ta’ superviżjoni, (ii) ir-riforma tar-ristrutturar, l-oqfsa tal-insolvenza u tal-irkupru tad-dejn, (iii) l-iżvilupp ta’ swieq sekondarji għal assi f’diffikultà, u (iv) it-trawwim tar-ristrutturar tas-sistema bankarja. L-azzjoni f’dawn l-oqsma għandha tingħata fil-livell nazzjonali u fil-livell tal-Unjoni fejn ikun xieraq.

Min-naħa tagħha, il-Kummissjoni hija impenjata li tagħti servizzi fuq dawk l-elementi tal-Pjan ta’ Azzjoni tal-NPL li għandha responsabbiltà diretta għalih. Fil-Komunikazzjoni dwar l-ikkompletar tal-Unjoni Bankarja ta’ Ottubru 2017, il-Kummissjoni ħabbret pakkett komprensiv għall-ittrattar ta’ rati għolja ta’ NPL sar-rebbiegħa tal-2018. 8 Diġà sar progress sinifikanti u t-tlestija tal-pakkett ta’ miżuri - inklużi 3 proposti leġiżlattivi 9 - jinsab għaddej għar-rebbiegħa tal-2018.

Il-pakkett se jikkonsisti fil-miżuri li ġejjin:

·Pjan ta’ azzjoni dwar kif il-Kumpaniji Maniġerjali tal-Assi (KMA) nazzjonali jistgħu jiġu stabbiliti skont ir-regoli attwali bankarji u dwar l-għajnuna mill-Istat tal-UE billi dan isir fuq il-bażi tal-aħjar prattiki mitgħallma mill-esperjenzi tal-passat fl-Istati Membri. Apparti l-iżvilupp ta’ pjan ta’ azzjoni għal AMCs nazzjonali, il-Kummissjoni, fejn rilevanti, biħsiebha tkompli tanalizza proposti oħra għal miżuri ta’ salvataġġ ta’ assi indeboliti li huma alternattivi għal AMCs ċentralizzati, b’rispett sħiħ tal-BRRD, l-SRMR u tar-regoli tal-Għajnuna mill-Istat.

·Miżuri għall-iżvilupp ulterjuri tas-swieq sekondarji għas-Selfiet Improduttivi, b’mod speċjali bl-għan li jitneħħew l-ostakoli bla bżonn għas-servizzi ta’ self minn partijiet terzi u t-trasferiment tas-selfiet.

·Miżuri li jtejbu l-protezzjoni tal-kredituri garantiti billi dawn ikollhom disponibbli metodi aktar effiċjenti biex jirkupraw il-valur mis-self garantit permezz ta’ Infurzar Kollaterali Extraġudizzjarju Aċċellerat (AECE). Dan jirreferi għal mekkaniżmu ta’ infurzar imħaffef u effiċjenti barra mill-qorti li jippermetti lis-selliefa garantiti li jirkupraw il-valur minn kollateral mogħti biss mill-kumpaniji u lill-intraprendituri biex jiksbu self 10 .

·Hija tintroduċi salvagwardji prudenzjali statutorji biex tevita r-riskju ta’ nuqqas ta’ proviżjonament ta’ NPLs. Tali garanziji ta’ kontinġenza, dwar self oriġinat ġdid li aktar tard jirriżulta improduttiv, tammonta għal livelli minimi ta’ provvedimenti u tnaqqis mill-fondi proprji li l-banek ikunu jridu jagħtu biex ikopru l-ispejjeż imġarrba u t-telf mistenni. F’dan il-kuntest, il-Kummissjoni se tikkunsidra wkoll li tintroduċi definizzjoni komuni ta’ skoperturi improduttivi (NPE), f’konformità ma’ dik diġà użata għal finijiet ta’ rappurtar superviżorju.

·It-triq ’il quddiem sabiex titrawwem it-trasparenza dwar NPLs fl-Ewropa permezz tat-titjib tad-disponibilità u l-komparabilità tad-data dwar l-NPLs u l-appoġġ potenzjali tal-iżvilupp mill-parteċipanti fis-suq ta’ pjattaformi ta’ informazzjoni dwar l-NPLs jew reġistri tal-kreditu 11 .

B’żieda ma’ dan il-pakkett u kif imsemmi hawn fuq, f’Novembru 2016, fil-kuntest tal-Unjoni tas-Swieq Kapitali, il-Kummissjoni ppreżentat proposta għal Direttiva dwar ir-ristrutturar u t-tieni opportunità u l-effiċjenza tal-proċedimenti ta’ insolvenza 12 . Il-karatteristiċi prinċipali ta’ din il-proposta, b’mod partikolari d-disponibbiltà tal-proċeduri ta’ ristrutturar li jippermettu lill-kumpaniji vijabbli f’diffikultajiet finanzjarji jevitaw l-insolvenza kif ukoll miżuri li jtejbu l-effettività tal-proċeduri tar-ristrutturar u tal-insolvenza, jikkontribwixxu biex inaqqsu l-NPLs kif ukoll biex jipprevjenu l-akkumulazzjoni tagħhom fil-futur. Il-Kummissjoni tistieden lill-Parlament Ewropew u lill-Kunsill biex jagħmlu progress rapidu dwar din il-proposta importanti, wara eżami dettaljat mill-Kunsill Ġustizzja u Affarijiet Interni u skambju reċenti ta’ fehmiet fil-Kunsill Ecofin. Il-Kummissjoni fir-Rapport ta’ Rieżami tal-Mekkaniżmu Superviżorju Uniku, li jakkumpanja din il-Komunikazzjoni minn Ottubru 2017, il-Kummissjoni qed tiċċara wkoll l-interpretazzjoni tal-Artikoli rilevanti tad-Direttiva dwar ir-Rekwiżiti ta’ Kapital (CRD) u r-Regolament dwar il-Mekkaniżmu Superviżorju Uniku. Il-Kummissjoni qed tikkonferma li s-setgħat superviżorji stabbiliti fih jippermettu lill-awtoritajiet kompetenti jinfluwenzaw il-politika ta’ proviżjonament ta’ bank fir-rigward tal-NPLs fil-limiti tal-qafas tal-kontabbiltà applikabbli u japplikaw aġġustamenti speċifiċi fejn dan ikun meħtieġ għal skopijiet prudenzjali 13 .

Id-dokument ta’ Ħidma tal-Persunal li jakkumpanja din il-Komunikazzjoni joffri ħarsa ġenerali dettaljata mis-servizzi tal-Kummissjoni tal-progress li sar fl-implimentazzjoni tal-Pjan ta’Azzjoni tal-Kunsill b’mod ġenerali. Dan jinkludi miżuri taħt ir-responsabbiltà tal-Kummissjoni u miżuri taħt ir-responsabbiltà ta’ istituzzjonijiet u aġenziji oħra.

B’mod ġenerali, il-progress li sar s’issa fuq il-fronti kollha huwa inkoraġġanti. Dawn l-isforzi għandhom jinżammu mill-atturi kollha, bil-għan li jikkompletaw il-miżuri kollha previsti fil-Pjan ta’ Azzjoni, sabiex tinkiseb soluzzjoni sostenibbli għall-NPLs fl-Unjoni kollha.

4.Konklużjonijiet

F’konformità mal-progress ġenerali sinifikanti fuq it-tnaqqis tar-riskji fis-settur bankarju tal-UE, il-proporzjon ta’ NPLs qed ikompli jonqos fl-Unjoni. Minkejja din ix-xejra pożittiva, il-proporzjonijiet għoljin ta’ NPLs jibqgħu sfida kbira għal diversi Stati Membri kif ukoll għall-Unjoni kollha kemm hi. Il-Pjan ta’ Azzjoni, li ntlaħaq qbil dwaru mill-Kunsill f’Lulju 2017, kien pass importanti fl-indirizzar ta’ din l-isfida. Din l-ewwel valutazzjoni turi li qiegħed isir progress importanti fl-implimentazzjoni tal-Pjan ta’ Azzjoni.

Huwa meħtieġ li jinżamm dan ir-ritmu ta’ progress fl-implimentazzjoni tal-Pjan ta’ Azzjoni fix-xhur u s-snin li ġejjin, jekk il-kontestazzjoni ta’ NPLs għoljin trid tiġi indirizzata kemm f’termini ta’ tnaqqis ta’ ħażniet eżistenti għal livelli sostenibbli kif ukoll fil-prevenzjoni ta' kwalunkwe akkumulazzjoni futura. Filwaqt li għandha titkompla l-ħidma b’pass sostnut fil-livell ta’ banek individwali u l-Istati Membri kkonċernati, hija meħtieġa azzjoni miftiehma kontinwa mill-Kummissjoni u minn istituzzjonijiet oħra tal-UE inkluż il-Bank Ċentrali Ewropew fil-livell tal-UE. Fir-rebbiegħa tal-2018, il-Kummissjoni se tippreżenta pakkett ta’ miżuri ddedikati inkluż għadd ta’ proposti leġiżlattivi biex tiġi ffaċilitata l-ġestjoni ta’ NPLs minn banek u tiġi evitata l-akkumulazzjoni ta’ NPLs fil-futur.

Il-Kummissjoni se tkompli ssegwi din il-kwistjoni mill-qrib u se terġa’ tirrapporta sa mhux aktar tard minn Marzu 2018.

(1) It-tielet pilastru tal-Unjoni Bankarja, l-Iskema Ewropea ta’ Assigurazzjoni tad-Depożiti, ġiet proposta mill-Kummissjoni f’Novembru 2015. f'Ottubru 2017 il-Kummisjoni fil-Komunikazzjoni tagħha dwar l-ikkompletar tal-Unjoni Bankarja [COM(2017) 592], tat spinta ġdida għan-negozjati dwar l-Iskema Ewropea ta' Assigurazzjoni tad-Depożiti (EDIS).
(2) Il-proposti tal-Kummissjoni jeħtieġu li l-banek jibnu bafers ta’ obbligazzjonijiet li jistgħu, jekk ikun meħtieġ, jiġu rrikapitalizzati internament, bl-implimentazzjoni tal-istandard tal-Kapaċità Totali ta’ Assorbiment tat-Telf tal-Bord għall-Istabilità Finanzjarja u l-integrazzjoni ta’ dan fir-regoli eżistenti dwar ir-Rekwiżit Minimu għal fondi proprji u obbligazzjonijiet eliġibbli; u billi tistipula regoli armonizzati dwar fejn strumenti ta’ dejn eliġibbli biex jissodisfaw il-bafers tal-Kapaċità Totali ta’ Assorbiment tat-Telf / ir-Rekwiżit Minimu għal fondi proprji u Obbligazzjonijiet Eliġibbli qegħdin fil-ġerarkija tal-kredituri tal-banek. Il-proposti tal-Kummissjoni jistipulaw ukoll regoli armonizzati li jikkonċernaw l-applikazzjoni ta’ għodod ta’ moratorju applikati mis-superviżuri u mill-awtoritajiet ta’ riżoluzzjoni biex jistabbilizzaw il-banek, li huma daqstant importanti fuq il-bażi tal-esperjenza reċenti. Fl-aħħar nett, il-Pakkett Bankarju jipproponi li jimplimenta għadd ta’ standards internazzjonali, inkluż l-introduzzjoni ta’ proporzjon ta’ ingranaġġ u Proporzjon ta’ Ffinanzjar Stabbli Nett (NSFR),
(3) COM/2016/0723 finali - 2016/0359 (COD)
(4)

 COM(2017) 291

(5) COM(2017) 821
(6) Sors: BĊE. Minħabba n-nuqqas ta’ disponibbiltà ta’ dejta ta’ proviżjonament għal self, il-proporzjon ta’ proviżjonament għall-UE ġie kkalkolat billi ġie kkunsidrat it-tfixkil u s-Self Improduttiv għall-istrumenti ta’ dejn kollha (self u titoli ta’ dejn).
(7) Sors: BĊE.
(8)

 COM(2017) 592

(9) Il-Kummissjoni kellha konsultazzjonijiet mal-partijiet ikkonċernati dwar tliet inizjattivi leġiżlattivi potenzjali.
(10) Il-ħidma f’dan il-qasam se tiġi determinata permezz tal-Valutazzjoni tal-Impatt u se tibqa’ konsistenti ma’ u komplementarja għall-proposta tal-Kummissjoni ta’ Novembru 2016 għal Direttiva dwar ristrutturar, it-tieni opportunità u l-effiċjenza tal-oqfsa ta’ insolvenza u mhux se teħtieġ l-armonizzazzjoni tad-dispożizzjonijiet attwali ta’ insolvenza.
(11) Barra dan, billi oqfsa ta’ infurzar tas-self u ta’ insolvenza iktar effiċjenti u prevedibbli jkunu ta’ benefiċċju għall-ġestjoni tas-Selfiet Improduttivi, il-Kummissjoni qed twettaq ukoll eżerċizzju ta’ parametraġġ referenzjarju tas-sistemi tal-infurzar tas-self biex tistabbilixxi stampa affidabbli tad-dewmien u tal-irkupru tal-valur li l-banek jesperjenzaw meta jiffaċċaw l-inadempjenzi ta’ min jissellef, u titlob kooperazzjoni mill-qrib mingħand l-Istati Membri u s-superviżuri biex jiżviluppaw metodoloġija ta’ parametraġġ referenzjarju soda u sinifikanti. F’dan il-kuntest, il-proposta tal-Kummissjoni għal Direttiva dwar l-insolvenza tan-negozji, ir-ristrutturar u t-tieni opportunità tistabbilixxi obbligi fuq l-Istati Membri biex jiġbru data komparabbli dwar il-proċeduri ta’ insolvenza u ta’ ristrutturar u biex jikkomunikawha lill-Kummissjoni, li jkun kruċjali biex tintwera l-effiċjenza tal-qafas regolatorju fl-Istati Membri f’dak li jirrigwarda d-debituri insolventi.
(12) COM/2016/0723 finali - 2016/0359 (COD)
(13) COM(2017) 591