Opinjoni tal-Kumitat Ekonomiku u Soċjali Ewropew dwar “Proposta għal Regolament tal-Parlament Ewropew u tal-Kunsill li jemenda r-Regolament (KE) Nru 391/2009 fir-rigward tal-ħruġ tar-Renju Unit mill-Unjoni”

(COM(2018) 567 final — 2018/0298 (COD))

(2019/C 62/47)

Relatur ġenerali:

Séamus BOLAND

Konsultazzjoni	Parlament Ewropew, 10.9.2018 Kunsill tal-Unjoni Ewropea, 10.9.2018
Bażi legali	L-Artikolu 100(2) tat-Trattat dwar il-Funzjonament tal-Unjoni Ewropea
Sezzjoni kompetenti	Sezzjoni Speċjalizzata għat-Trasport, l-Enerġija, l-Infrastruttura u s-Soċjetà tal-Informazzjoni
Deċiżjoni tal-Bureau	18.9.2018
Adottata fil-plenarja	17.10.2018
Sessjoni plenarja Nru	538
Riżultat tal-votazzjoni (favur/kontra/astensjonijiet)	122/0/0

1.   Konklużjonijiet u rakkomandazzjonijiet

1.1.

Il-KESE jaqbel mal-proposta tal-Kummissjoni li jiġi emendat ir-Regolament (KE) Nru 391/2009 dwar l-ispezzjoni u ċ-ċertifikazzjoni tal-bastimenti, li hija meħtieġa bħala riżultat tal-ħruġ tar-Renju Unit mill-Unjoni Ewropea (UE).

1.2.

Il-KESE jemmen li l-bidliet proposti se joħolqu ambjent ta’ opportunità u jirrakkomanda li l-Kummissjoni trawwem kooperazzjoni eqreb bejn l-istituzzjonijiet Ewropej u nazzjonali kollha rilevanti, u l-organizzazzjonijiet rikonoxxuti, li magħhom l-Istati Membri ffirmaw ftehimiet ta’ awtorizzazzjoni.

1.3.

Il-KESE jilqa’ l-fatt li din il-proposta tagħti ċertezza legali lil industrija li fuqha hemm dipendenza kbira fir-rigward tat-trasport mingħajr xkiel ta’ merkanzija f’kundizzjonijiet li huma ppruvati li jkunu tal-ogħla livelli ta’ sikurezza. Għalhekk jirrakkomanda li l-proposta tiġi adottata b’mod urġenti.

1.4.

Il-KESE jilqa’ l-intenzjoni tal-Kummissjoni li tirrapporta dwar l-effetti tagħha wara perjodu adegwat ta’ applikazzjoni u jirrakkomanda li tittieħed biżżejjed azzjoni, b’mod partikolari meta l-konsegwenzi ma kinux previsti mill-kamp ta’ applikazzjoni tal-bidla fir-regolament.

2.   Kummenti ġenerali

2.1.

Fit-23 ta’ Ġunju 2016, wara referendum dwar is-sħubija fl-UE, ir-Renju Unit tal-Gran Brittanja u l-Irlanda ta’ Fuq ivvutaw biex joħorġu mill-Unjoni Ewropea. Din id-deċiżjoni tinkludi l-Gżira ta’ Ġibiltà.

2.2.

Fid-29 ta’ Marzu 2017, ir-Renju Unit ressaq in-notifika tal-intenzjoni tiegħu li joħroġ mill-Unjoni. Dan ifisser li l-liġi primarja u sekondarja kollha tal-Unjoni mhux ser tibqa’ tapplika għar-Renju Unit mit-30 ta’ Marzu 2019, (“id-data tal-ħruġ”). Ir-Renju Unit imbagħad isir “pajjiż terz”.

2.3.

Skont il-kontenut tal-ftehim ta’ ħruġ li qed jiġu nnegozjat bħalissa, huwa ċar li l-liġi tal-UE dwar it-trasport marittimu ma tibqax tapplika għar-Renju Unit tal-Gran Brittanja u l-Irlanda ta’ Fuq (inkluż Ġibiltà). Fil-liġi tal-Unjoni, ir-rikonoxximent fil-livell tal-unjoni ta’ organizzazzjonijiet li jipprovdu servizzi ta’ spezzjoni u perizja tal-bastimenti, li l-bandiera tagħhom ġejja minn wieħed mill-Istati Membri, jista’ jkompli biss soġġett għal qbil dwar il-proposta.

2.4.

L-Artikolu 8(1) tar-Regolament (KE) Nru 391/2009 (ir-“Regolament”) jirrikjedi li l-organizzazzjonijiet tal-ispezzjoni u l-perizji tal-bastimenti rikonoxxuti jiġu vvalutati tal-anqas kull sentejn mill-Kummissjoni flimkien mal-Istat Membru li qed ifittex rikonoxximent tal-organizzazzjoni. Madankollu, wara l-ħruġ tar-Renju Unit, mhux ser jibqa’ f’pożizzjoni li jipparteċipa fil-valutazzjonijiet imwettqa skont l-Artikolu 8(1) tar-Regolament għal dawk l-organizzazzjonijiet li għalihom ir-Renju Unit jaġixxi bħala Stat Membru “sponsor”.

2.5.

Minħabba t-telf mistenni għall-“organizzazzjonijiet” sponsorjati mir-Renju Unit tar-rikonoxximent tal-UE, huwa loġiku li wieħed jassumi li se jkun hemm konsegwenzi negattivi fuq il-kompetittività u l-attraenza tal-bnadar tal-Istati Membri tal-UE-27 li awtorizzaw dawn l-organizzazzjonijiet rikonoxxuti biex jaġixxu f’isimhom għall-finijiet tat-twettiq tal-ispezzjonijiet, tal-periziji taċ-ċertifikazzjoni statutorji tal-bastimenti. Bosta organizzazzjonijiet li huma milquta huma ftehimiet ta’ awtorizzazzjoni ma’ tat-27-il Stat Membru li jifdal, li se ssir nulla wara l-ħruġ tar-Renju Unit.

2.6.

Għaldaqstant, il-proposta tal-Kummissjoni għandha l-għan li żżid iċ-ċertezza legali, tiżgura l-kontinwità tan-negozju għas-sidien tal-bastimenti affettwati u tinżamm il-kompetittività tal-bnadar tal-Istati Membri tal-UE27.

2.7.

Meta r-Renju Unit jirtira bħala membru tal-Unjoni, se jtemm il-parteċipazzjoni fil-ħidma kollha skont l-Artikolu 8(1) tar-Regolament (KE) Nru 391/2009. Madankollu, l-organizzazzjonijiet soġġetti għall-ftehim tal-proposta se jkunu jistgħu jkomplu l-ħidma tagħhom.

3.   Il-kontenut essenzjali tal-proposta tal-Kummissjoni

3.1.

Il-proposta tal-Kummissjoni tfittex li tirrestawra ċ-ċertezza legali fir-regolament dwar l-affarijiet marittimi, li se jiġi mxekkel bħala riżultat tal-irtirar tar-Renju Unit mill-Unjoni.

3.2.

Fil-fatt, bit-tneħħija tal-ħtieġa għal stat sponsor, il-proposta se tippermetti lill-organizzazzjonijiet jaħdmu flimkien mal-Kummissjoni u flimkien mal-Istati Membri li jkollhom ftehimiet ta’ awtorizzazzjoni magħhom biex ikomplu l-ispezzjonijiet u ċ-ċertifikazzjoni tal-bastimenti.

3.3.

Għandha tipprova tipprovdi rikonoxximent għal “organizzazzjonijiet” li qabel kienu jaġixxu skont il-leġislazzjoni tar-Renju Unit fir-rwol tiegħu bħala Stat Membru sponsor f’isem il-Kummissjoni. L-għan ikun li tiġi żgurata t-tkomplija tal-arranġamenti eżistenti bejn dawn l-organizzazzjonijiet u l-Istati Membri l-oħra tal-UE-27. Dawn jinkludu t-tlestija ta’ perizji u spezzjonijiet tal-bastimenti, sabiex tkun żgurata s-sikurezza mingħajr interruzzjoni.

3.4.

Biex jinkiseb dan, il-proposta temenda l-Artikolu 8(1) tar-Regolament. Dan ibiddel ir-rekwiżit fejn l-Istat Membru sponsor biss jipparteċipa fil-proċess ta’ valutazzjoni regolari f’isem il-Kummissjoni. Fil-fatt, dan ikun ifisser li l-valutazzjonijiet jistgħu jitwettqu minn organizzazzjonijiet rikonoxxuti li jaħdmu f’isem il-Kummissjoni.

3.5.

Huwa mfassal biex jiżgura l-kontinwità tan-negozju u l-kompetittività tal-bnadar tas-27 Stat Membru li se jaħdmu mal-organizzazzjonijiet affettwati.

3.6.

Ir-regolament jillimita l-mandat tiegħu għarr-riżoluzzjoni ta’ konsegwenzi negattivi kkawżati bħala riżultat tal-ħruġ tar-Renju Unit mill-Unjoni.

4.   Kummenti tal-KESE

4.1.

Il-KESE jinnota li r-regolamenti li jirregolaw il-qasam marittimu, b’mod partikolari t-tbaħħir, evolvew b’mod li jiżgura li n-negozju u l-kummerċ kollu jkunu f’armonija madwar l-UE inkluż ir-Renju Unit.

4.2.

Il-KESE jaqbel mal-ħsieb prinċipali tal-proposta, li huwa meħtieġ li jiġu protetti l-bnadar tal-UE u jiġi żgurat li ma hemm l-ebda inċertezza legali fis-seħħ wara l-Brexit.

4.3.

Il-KESE jinnota li t-tliet entitajiet prinċipali involuti attwalment huma l-EMSA (Aġenzija Ewropea għas-Sigurtà Marittima), l-ABS (American Bureau Shipping) u Lloyds.

4.4.

Il-KESE jinnota li mingħajr din il-proposta l-Istati Membri mhux se jkunu jistgħu jibqgħu jaħdmu mal-organizzazzjonijiet rikonoxxuti għall-flotta bil-bandiera tagħhom. Minflok, ikollhom jibdlu l-bandiera tal-bastimenti tagħhom għal bandiera mhux tal-UE. Azzjonijiet bħal dawn se jkollhom konsegwenzi serji, f’termini ta’ kuntratti kurrenti mal-organizzazzjonijiet u t-tkomplija tal-kontinwità tal-industrija.

4.5.

Il-KESE jemmen li l-industrija tat-tbaħħir hija ċentrali għall-kummerċ dinji u l-moviment ta’ merkanzija. Bl-istess mod, huwa importanti li s-sistemi ta’ regolazzjoni jiżguraw l-ogħla livell ta’ sikurezza għal dawk kollha kkonċernati.

4.6.

Il-KESE jirrimarka li kull nuqqas li tiġi adottata l-proposta jista’ jinterrompi t-trasport madwar id-dinja tal-merkanzija u jipperikola serjament l-ekonomija tal-UE. Għalhekk, huwa essenzjali li din tiġi adottata minnufih.

4.7.

Il-KESE jinnota l-osservazzjoni tal-Kummissjoni li l-konsegwenzi, li bħalissa mhumiex identifikati, ser jiġu rrapportati wara ċertu perjodu ta’ applikazzjoni.