OPINJONI NRU 5/2018

(skont l-Artikoli 287(4) u 322(2) TFEU)

dwar (a) Il-proposta għal Deċiżjoni tal-Kunsill dwar is-sistema ta’ riżorsi proprji tal-Unjoni Ewropea (COM(2018) 325 final); (b) Il-proposta għal Regolament tal-Kunsill dwar il-metodi u l-proċedura għad-disponibbiltà tar-Riżorsi Proprji bbażati fuq Bażi Komuni Konsolidata tat-Taxxa Korporattiva, fuq l-Iskema għall-Iskambju ta’ Kwoti tal-Emissjonijiet tal-Unjoni Ewropea u fuq l-Iskart tal-Plastik mill-imballaġġ li mhux qed jiġi riċiklat, u dwar il-miżuri li jissodisfaw il-ħtiġijiet fi flus kontanti (COM(2018) 326 final); u (c) Il-proposta għal Regolament tal-Kunsill li jemenda r-Regolament tal-Kunsill (tal-KEE, u l-Euratom) Nru 1553/89 dwar l-arranġamenti uniformi definittivi għall-ġbir mir-riżorsi nfushom li jidħol mit-taxxa fuq il-valur miżjud (COM(2018) 328 final)

(2018/C 431/01)

WERREJ

			Paragrafu	Paġna
SOMMARJU				3
INTRODUZZJONI			1 – 6	5
L-EWWEL PARTI: KUMMENTI ĠENERALI			7 – 12	6
	Rati ta’ prelevazzjoni għar-riżorsi proprji		9 – 10	7
	Dispożizzjonijiet ta’ implimentazzjoni		11 – 12	8
IT-TIENI PARTI: KUMMENTI SPEĊIFIĊI			13 – 48	8
	Ir-riforma ta’ xi wħud mir-riżorsi proprji eżistenti		14 – 23	9
		Iż-żamma tad-dazji doganali (RPT), iżda b’rata aktar baxxa għall-ispejjeż tal-ġbir	14 – 16	9
		Iż-żamma tar-riżorsa proprja bbażata fuq l-ING	17 – 19	10
		Is-simplifikazzjoni tar-riżorsa proprja bbażata fuq il-VAT	20 – 23	10
	“Basket” ta’ riżorsi proprji ġodda		24 – 43	11
		Riżorsa proprja bbażata fuq il-BKKTK	26 – 33	11
		Riżorsa proprja bbażata fuq l-EU ETS	34 – 37	12
		Riżorsa proprja bbażata fuq l-iskart tal-plastik mill-imballaġġ	38 – 43	13
	Eliminazzjoni gradwali tal-korrezzjonijiet		44 – 47	14
	Żieda fil-limiti massimi għar-riżorsi proprji		48	15
IT-TIELET PARTI: KONKLUŻJONIJIET U EMENDI PROPOSTI			49 – 54	15
	Rakkomandazzjonijiet biex isir titjib fir-riforma proposta tar-riżorsi proprji		53 – 54	15
Anness I — L-emendi għall-proposti ssuġġeriti mill-Qorti				17
Anness II — Metodoloġija għall-kalkolu tar-riżorsa proprja l-ġdida proposta bbażata fuq il-VAT				19

IL-QORTI TAL-AWDITURI TAL-UNJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea (TFUE), u b’mod partikolari l-Artikoli 287(4) u 322(2) tiegħu,

Wara li kkunsidrat dawn il-proposti tal-Kummissjoni li saru fit-2 ta’ Mejju 2018:

(a)	il-proposta għal Deċiżjoni tal-Kunsill dwar is-sistema ta’ riżorsi proprji tal-Unjoni Ewropea (COM(2018) 325 final);

(b)

il-proposta għal Regolament tal-Kunsill dwar il-metodi u l-proċedura għad-disponibbiltà tar-Riżorsi Proprji bbażati fuq Bażi Komuni Konsolidata tat-Taxxa Korporattiva, fuq l-Iskema għall-Iskambju ta’ Kwoti tal-Emissjonijiet tal-Unjoni Ewropea u fuq l-Iskart tal-Plastik mill-imballaġġ li mhux qed jiġi riċiklat, u dwar il-miżuri li jissodisfaw il-ħtiġijiet fi flus kontanti (COM(2018) 326 final);

(c)	il-proposta għal Regolament tal-Kunsill li jistabbilixxi miżuri ta’ implimentazzjoni għas-sistema tar-Riżorsi Proprji tal-Unjoni Ewropea (COM(2018) 327 final); u

(d)	il-proposta għal Regolament tal-Kunsill li jemenda r-Regolament tal-Kunsill (tal-KEE, u l-Euratom) Nru 1553/89 dwar l-arranġamenti uniformi definittivi għall-ġbir mir-riżorsi nfushom li jidħol mit-taxxa fuq il-valur miżjud (COM(2018) 328 final),

Wara li kkunsidrat it-talbiet tal-Kummissjoni għal opinjoni dwar il-proposti taħt il-punti (b) u (d) hawn fuq, li waslu fil-15 ta’ Mejju 2018,

Wara li kkunsidrat it-talbiet tal-Kunsill għal opinjoni dwar il-proposti taħt il-punti (b) u (d) hawn fuq, li waslu fit-28 ta’ Mejju 2018,

Wara li kkunsidrat it-talba tal-Parlament Ewropew għal opinjoni dwar il-proposta taħt il-punt (a) imsemmi hawn fuq, li waslet fil-25 ta’ Ġunju 2018,

Wara li kkunsidrat id-Deċiżjoni tal-Kunsill 2014/335/UE, Euratom tas-26 ta’ Mejju 2014 dwar is-sistema tar-riżorsi proprji tal-Unjoni Ewropea (1),

Wara li kkunsidrat ir-Regolament tal-Kunsill (UE, Euratom) Nru 608/2014 tas-26 ta’ Mejju 2014 li jistabbilixxi miżuri li jimplimentaw is-sistema tar-riżorsi proprji tal-Unjoni Ewropea; u r-Regolament tal-Kunsill (UE, Euratom) Nru 609/2014 tas-26 ta’ Mejju 2014 dwar il-metodi u l-proċedura li jintużaw biex jitqiegħdu għad-dispożizzjoni r-riżorsi proprji tradizzjonali, dawk ibbażati fuq il-VAT u dawk ibbażati fuq l-ING u dwar il-miżuri li jissodisfaw il-ħtiġijiet fi flus kontanti (2), dan tal-aħħar kif emendat bir-Regolament tal-Kunsill (UE, Euratom) 2016/804 tas-17 ta’ Mejju 2016 (3),

Wara li kkunsidrat ir-Regolament tal-Kunsill (KEE, Euratom) Nru 1553/89 tad-29 ta’ Mejju 1989 dwar l-arranġamenti uniformi definittivi għall-ġbir ta’ riżorsi proprji li jakkumulaw mit-taxxa tal-valur miżjud (4), kif emendat l-aħħar bir-Regolament tal-Kunsill (KE) Nru 807/2003 tal-14 ta’ April 2003 (5),

Wara li kkunsidrat l-opinjonijiet preċedenti mogħtija mill-Qorti Ewropea tal-Awdituri dwar is-sistema tar-riżorsi proprji tal-UE (6).

Wara li kkunsidrat id-dokument informattiv u analitiku tal-Qorti Ewropea tal-Awdituri dwar il-futur tal-finanzi tal-UE (7).

Wara li kkunsidrat id-dokument informattiv u analitiku tal-Qorti Ewropea tal-Awdituri dwar il-Qafas Finanzjarju Pluriennali għall-perjodu 2021-2027 (8).

Wara li kkunsidrat ir-rapport finali u r-rakkomandazzjonijiet tal-Grupp ta’ Livell Għoli rigward ir-Riżorsi Proprji (HLGOR) dwar il-finanzjament futur tal-UE, li nħareġ f’Diċembru 2016 (9).

Billi:

(1)

Il-Kunsill Ewropew tal-24 u tal-25 ta’ Marzu 1999 ikkonkluda (10), fost affarijiet oħra, li jenħtieġ li s-sistema tar-riżorsi proprji tal-UE tkun ekwa, trasparenti, kosteffettiva u sempliċi, u li trid tkun ibbażata fuq kriterji li jesprimu bl-aħjar mod il-kapaċità ta’ kull Stat Membru li jikkontribwixxi;

(2)

Il-Kunsill Ewropew tal-15 u s-16 ta’ Diċembru 2005 laħaq ftehim (11), fost affarijiet oħra, li jenħtieġ li l-arranġamenti tar-riżorsi proprji jkunu ggwidati mill-objettiv kumplessiv tal-ekwità, li jenħtieġ li dawn l-arranġamenti, b’hekk, jiżguraw li l-ebda Stat Membru ma jġarrab piż baġitarju li jkun eċċessiv meta mqabbel mal-prosperità relattiva tiegħu, u li jenħtieġ li dawn l-arranġamenti jintroduċu dispożizzjonijiet li jkopru Stati Membri speċifiċi, kif meħtieġ;

(3)

Fil-laqgħa tiegħu tas-7 u t-8 ta’ Frar 2013, il-Kunsill Ewropew appella biex ikompli jaħdem fuq il-proposta tal-Kummissjoni għal riżorsa proprja ġdida bbażata fuq il-VAT biex tkun sempliċi u trasparenti kemm jista’ jkun possibbli, biex tissaħħaħ ir-rabta bejn il-politika tal-UE dwar il-VAT u l-entrati reali tal-VAT, u biex jiġi żgurat trattament ugwali għal dawk li jħallsu t-taxxi fl-Istati Membri kollha (12);

(4)

F’Diċembru 2013, il-Kunsill, il-Parlament Ewropew u l-Kummissjoni adottaw “Dikjarazzjoni Konġunta”, li kienet tiddikjara li l-kwistjoni tar-riżorsi proprji kienet tirrikjedi aktar xogħol, u li kien se jitlaqqa’ grupp ta’ livell għoli interistituzzjonali, biex iwettaq analiżi ġenerali tas-sistema (13);

(5)	Il-White Paper tal-Kummissjoni dwar il-ġejjieni tal-Ewropa (14), fix-“Xenarju 5: Flimkien isir ferm aktar”, indikat li jenħtieġ li l-baġit tal-UE jiżdied u jiġi modernizzat b’mod sinifikanti, sostnut mir-riżorsi proprji;

(6)	Id-Dokument ta’ Riflessjoni tal-Kummissjoni dwar il-futur tal-finanzi tal-UE (15) enfasizza li l-approċċ attwali għal finanzjament huwa wisq kumpless, opak u mimli b’mekkaniżmi ta’ korrezzjoni li huma kumplessi u li, fil-futur, jenħtieġ li s-sistema ssir sempliċi, ġusta u trasparenti;

(7)

Ir-riżoluzzjoni dwar ir-riforma tas-sistema tar-riżorsi proprji tal-UE, li ġiet adottata mill-Parlament Ewropew f’Marzu 2018, enfasizzat xi nuqqasijiet fil-mod kif il-baġit tal-UE jiġi attwalment iffinanzjat u appellat biex isiru riformi estensivi. Hija appellat ukoll, b’mod partikolari, biex jiġu introdotti kategoriji ġodda u differenti ta’ riżorsi proprji biex jitwaqqfu l-korrezzjonijiet kollha (16).

ADOTTAT L-OPINJONI LI ĠEJJA:

SOMMARJU

I.

Is-sistema ta’ finanzjament għall-baġit tal-UE ma ġietx irriformata b’mod sinifikanti mill-1988 ’il hawn. It-tliet kategoriji prinċipali ta’ dħul (ir-Riżorsi Proprji Tradizzjonali (RPT), ir-riżorsa proprja bbażata fuq it-Taxxa fuq il-Valur Miżjud (VAT) u r-riżorsa proprja bbażata fuq l-Introjtu Nazzjonali Gross (ING)), għal dawn l-aħħar 30 sena, żguraw li l-fondi miġbura kienu kumplessivament stabbli u suffiċjenti. Il-Kummissjoni pproponiet li tibdel din is-sistema ta’ finanzjament għall-baġit futur taħt il-Qafas Finanzjarju Pluriennali 2021-2027 billi: — tirriforma r-riżorsi proprji eżistenti, li se jirrappreżentaw 87 % tad-dħul tal-UE: filwaqt li żżomm l-RPT iżda b’rata aktar baxxa għall-ispejjeż tal-ġbir, iżżomm ir-riżorsa proprja bbażata fuq l-ING u tissimplifika r-riżorsa proprja bbażata fuq il-VAT; — tintroduċi “basket” ta’ tliet riżorsi proprji ġodda, li flimkien jirrappreżentaw 12 % tad-dħul tal-UE: waħda bbażata fuq il-Bażi Komuni Konsolidata għat-Taxxa Korporattiva (BKKTK), waħda bbażata fuq l-Iskema għall-Iskambju ta’ Kwoti tal-Emissjonijiet (ETS) tal-Unjoni Ewropea (UE) u waħda bbażata fuq l-iskart tal-plastik mill-imballaġġ li mhux qed jiġi riċiklat; — telimina gradwalment il-korrezzjoniijiet li jeżistu fis-sistema attwali; u — iżżid il-limiti massimi biex ir-riżorsi proprji jegħlbu l-impatt tal-Brexit u l-integrazzjoni tal-Fond Ewropew għall-Iżvilupp (FEŻ) fil-baġit tal-UE, kif ukoll biex jiġu koperti l-obbligazzjonijiet finanzjarji marbuta ma’ self jew ma’ faċilitajiet finanzjarji ggarantiti mill-baġit tal-UE.

II.

Is-sistema ta’ finanzjament tal-UE l-ġdida li ġiet proposta ħadet kont ta’ għadd ta’ prinċipji ewlenin tar-riforma, iżda mhux kollha kemm huma. Minbarra dan, hija tindirizza xi wħud mid-dgħufijiet li aħna identifikajna fix-xogħol preċedenti tagħna fir-rigward tas-sistema eżistenti tar-riżorsi proprji. Fil-fehma tagħna, is-sistema ta’ finanzjament tal-UE proposta għadha kumplessa.

III.

Aħna vvalutajna l-proposti tal-Kummissjoni u sibna l-kwistjonijiet prinċipali li ġejjin: — It-tnaqqis propost tar-rata tal-ispejjeż tal-ġbir għall-RPT mhuwiex iġġustifikat minn studju li jipprovdi stimi affidabbli tal-ispejjeż imġarrba mill-awtoritajiet doganali fil-ġbir tad-dazji; — Ir-riżorsa proprja proposta bbażata fuq il-VAT issimplifikata tinkludi suppożizzjonijiet fir-rigward ta’ tranżazzjonijiet b’rata standard u li ma jaderixxux ma’ xi wħud mill-istadji tal-kalkolu deskritti mill-Kummisjoni; — L-applikazzjoni tar-riżorsa proprja bbażata fuq il-BKKTK hija suġġetta għad-Direttiva relatata ma’ din it-taxxa li qed tiġi adottata mill-Kunsill u trasposta fl-Istati Membri. Din se tiddaħħal b’mod gradwali matul bosta snin wara l-bidu tal-QFP il-ġdid; — L-EU ETS hija għodda importanti għall-implimentazzjoni tal-politiki tal-UE dwar il-klima u l-ambjent. Madankollu, ir-riżorsa proprja proposta bbażata fuq l-EU ETS, ma toħloqx inċentiv addizzjonali għall-Istati Membri biex inaqqsu l-emissjonijiet ta’ gassijiet serra. Barra minn hekk, mhijiex riżorsa stabbli peress li l-prezzijiet tal-irkant tal-kwoti tal-emissjonijiet huma volatili ħafna; — Ir-riżorsa proprja bbażata fuq l-iskart tal-plastik mill-imballaġġ tipprovdi inċentiv għall-Istati Membri biex iżidu r-riċiklaġġ tal-plastik. Madankollu, aħna osservajna li jeħtieġ li titjieb il-kwalità tad-data li tintuża għall-kalkolu ta’ din ir-riżorsa proprja; — L-eliminazzjoni gradwali tal-korrezzjonijiet hija pass ’il quddiem lejn l-implimentazzjoni ta’ sistema aktar trasparenti u inqas kumplessa. Skont il-proposta tal-Kummissjoni, il-korrezzjonijiet se jintemmu fl-2026, u — Fir-rigward tar-riżorsi proprji l-ġodda proposti, is-setgħat tal-awditjar tagħna, dwar dawk ibbażati fuq il-BKKTK u l-iskart tal-plastik mill-imballaġġ, jistgħu jkunu ristretti. Hemm riskju li dan jaffettwa l-possibbiltà tal-awditjar u b’hekk, l-obbligu ta’ rendikont.

IV.

Aħna nirrakkomandaw li l-korpi leġiżlattivi jitolbu lill-Kummissjoni biex twettaq dan li ġej mill-aktar fis possibbli: (a) Teżamina l-proposti leġiżlattivi; fir-rigward tar-riżorsi proprji l-ġodda, jenħtieġ li l-Kummissjoni: — tivvaluta bir-reqqa l-probabbiltà li r-riżorsa proprja bbażata fuq il-BKKTK tiġi applikata matul il-QFP li jmiss; — tikkjarifika, fil-proposta tagħha, li r-riżorsa bbażata fuq l-EU ETS ma toħloqx inċentiv addizzjonali għall-Istati Membri biex inaqqsu l-emissjonijiet ta’ gassijiet serra, u tanalizza l-impatt tal-volatilità ta’ din ir-riżorsa; — tqis bir-reqqa t-tnaqqis possibbli tal-ammonti li huma mistennija li jinġabru permezz tar-riżorsa proprja bbażata fuq l-iskart tal-plastik mill-imballaġġ minħabba bidliet fl-imġiba tal-unitajiet domestiċi u tal-operaturi ekonomiċi, (b) Tqis mill-ġdid il-proposta dwar ir-riżorsa proprja bbażata fuq il-VAT issimplifikata, u jekk tiddeċiedi li żżommha, timmodifika l-proposta.

INTRODUZZJONI

1.

Is-sistema ta’ finanzjament għall-baġit tal-UE ma ġietx irriformata b’mod sinifikanti mill-1988 ’il hawn. It-tliet kategoriji prinċipali ta’ dħul (ir-Riżorsi Proprji Tradizzjonali (RPT), ir-riżorsa proprja bbażata fuq it-Taxxa fuq il-Valur Miżjud (VAT) u r-riżorsa proprja bbażata fuq l-Introjtu Nazzjonali Gross (ING)), għal dawn l-aħħar 30 sena, żguraw li l-fondi miġbura kienu kumplessivament stabbli u suffiċjenti. Madankollu, huma saħħew ukoll il-perċezzjoni li l-kontribuzzjonijiet nazzjonali għall-baġit tal-UE huma biss fattur ta’ spejjeż għall-Istati Membri. Dan ippermetta li xi wħud minnhom jinnegozjaw il-korrezzjonijiet u r-ribassi sabiex inaqqsu l-iżbilanċi baġitarji tagħhom.

2.

Fl-2011, il-Kummissjoni pproponiet li tissimplifika r-riżorsa proprja bbażata fuq il-VAT u li toħloq riżorsa proprja ġdida bbażata fuq it-Taxxa fuq it-Tranżazzjonijiet Finanzjarji (TTF). Din il-proposta ġiet appoġġata mill-Parlament Ewropew. Minkejja li kien hemm kunsens ġenerali dwar il-ħtieġa għal riforma, l-Istati Membri ma setgħux jilħqu qbil unanimu għall-adozzjoni tal-proposta.

3.

Il-Grupp ta’ Livell Għoli dwar ir-Riżorsi Proprji (HLGOR) twaqqaf bħala parti mill-ftehim finali dwar il-Qafas Finanzjarju Pluriennali (QFP) għall-perjodu 2014-2020. Ir-rapport finali tiegħu għall-2016 irrakkomanda l-introduzzjoni ta’ kategoriji ġodda ta’ riżorsi proprji b’rabta aktar mill-qrib ma’ linji ta’ politika tal-UE u t-tneħħija ta’ mekkaniżmi ta’ korrezzjoni. Id-Dokument ta’ Riflessjoni tal-Kummissjoni dwar il-futur tal-finanzi tal-UE stipula l-prinċipji ewlenin għar-riżorsi proprji rriformati, filwaqt li jieħu kont tar-rakkomandazzjonijiet tal-HLGOR: (a) it-trasparenza; (b) is-sempliċità, (c) l-istabbiltà, (d) il-konsistenza mal-objettivi ta’ politika tal-UE, (e) l-impatt tagħhom fuq il-kompetittività u t-tkabbir sostenibbli, kif ukoll (f) ir-ripartizzjoni ekwa fost l-Istati Membri.

4.

Il-proposta tal-Kummissjoni dwar il-QFP għall-perjodu 2021-2027 (17) tipprovdi opportunità biex jiġi mmodernizzat il-qafas finanzjarju tal-UE, għal bosta raġunijiet. L-UE qed tiffaċċja l-ħtieġa li tiffinanzja politiki ġodda Ewropej li ma jistgħux jitwettqu b’mod effiċjenti jew effettiv permezz ta’ nfiq nazzjonali. Barra minn hekk, il-konsegwenzi baġitarji dovuti għall-ħruġ tar-Renju Unit (UK) mill-UE se jirrikjedu riforma tal-parti tal-baġit tal-UE li tikkonċerna d-dħul.

5.

Fil-fehma tal-Kummissjoni, l-infiq tal-UE joħloq beni pubbliċi Ewropej li minnhom jibbenefikaw l-Istati Membri kollha. Il-benefiċċji li jirriżultaw mill-istabbiltà, il-paċi, il-valuri komuni u s-suq uniku ma jidhrux fil-kalkoli tal-bilanċ nett. Jenħtieġ li l-QFP futur jiġi msawwar skont il-prinċipju tal-valur miżjud Ewropew. Barra minn hekk, f’baġit tal-UE li jkun imfassal tajjeb u modern, jenħtieġ li l-Istati Membri kollha jkunu benefiċjarji netti (18).

6.

Kif previst fil-memorandum ta’ spjegazzjoni tal-proposta għal Deċiżjoni tal-Kunsill dwar is-sistema ta’ riżorsi proprji, għall-perjodu 2021-2027, il-Kummissjoni pproponiet li: (a) Tirriforma xi wħud mir-riżorsi proprji eżistenti: i Iżżomm id-dazji doganali (RPT), iżda b’rata aktar baxxa għall-ispejjeż tal-ġbir; ii Iżżomm ir-riżorsa proprja bbażata fuq l-ING; iii Tissimplifika r-riżorsa proprja bbażata fuq il-VAT. (b) Tintroduċi “basket” ta’ tliet riżorsi proprji ġodda: i Ir-riżorsa proprja bbażata fuq il-Bażi Komuni Konsolidata għat-Taxxa Korporattiva (BKKTK); ii Ir-riżorsa proprja bbażata fuq l-Iskema għall-Iskambju ta’ Kwoti tal-Emissjonijiet (ETS) tal-Unjoni Ewropea (UE); iii Ir-riżorsa proprja bbażata fuq l-iskart tal-plastik mill-imballaġġ. (c) Telimina gradwalment il-korrezzjonijiet. (d) Iżżid il-limiti massimi għar-riżorsi proprji.

L-EWWEL PARTI: KUMMENTI ĠENERALI

7.

Il-proposta tal-Kummissjoni għar-riforma tal-finanzjament tal-UE tagħmel referenza għar-rapport finali tal-HLGOR u għall-prinċipji ewlenin stipulati fid-Dokument ta’ Riflessjoni dwar il-futur tal-finanzi al-UE (ara l-paragrafu 3). Madankollu, it-tħejjija ta’ din il-proposta ma inkludietx valutazzjoni tal-impatt komprensiva, iddokumentata u ppubblikata (19).

8.

Il-Kummissjoni tistma li l-bidliet proposti għall-baġit futur tal-UE se jkollhom l-impatt li ġej meta mqabbla mas-sistema attwali (ara l-Figura 1): — Ir-riżorsa proprja bbażata fuq l-ING se titnaqqas bi 13-il punt perċentwali, — Se jinħolqu tliet riżorsi proprji ġodda (ibbażati fuq il-BKKTK, l-EU ETS u l-iskart tal-plastik mill-imballaġġ), li se jammontaw għal 12 %, — Ir-riżorsa proprja bbażata fuq il-VAT (issimplifikata) se tiżdied bi ftit, u — Is-sorsi l-oħra (l-RPT u d-dħul l-ieħor), b’mod ġenerali se jibqgħu stabbli. Il-kontribuzzjonijiet nazzjonali (20) se jirrappreżentaw madwar 84 % (skont l-istimi tal-Kummissjoni) tad-dħul, kif inhu wkoll il-każ għas-sistema ta’ finanzjament attwali tal-UE (83 % fil-baġit tal-2018). Figura 1 Stima tal-Kummissjoni tal-bidliet proposti għall-baġit futur tal-UE meta mqabbel ma’ dak attwali Riżorsi proprji Baġit 2018 Medja annwali stmata 2021-2027 biljun EUR % tad-dħul totali   biljun EUR % tad-dħul totali   RPT 23 16   26 15   Riżorsa proprja bbażata fuq il-VAT (issimplifikata) 17 12 Kontribuzzjonijiet nazzjonali: EUR 120 biljun (83 % tad-dħul totali) 25 14 Kontribuzzjonijiet nazzjonali: EUR 150 biljun (84 % tad-dħul totali) Riżorsa proprja bbażata fuq l-ING 103 71 103 58 Riżorsa proprja bbażata fuq il-BKKTK — — 12 6 Riżorsa proprja bbażata fuq l-EU ETS — — 3 2 Riżorsa proprja bbażata fuq l-iskart tal-plastik mill-imballaġġ — — 7 4 Total tar-riżorsi proprji 143 99   176 99   Dħul għajr ir-riżorsi proprji 2 1   2 1   Total tad-dħul 145 100   178 100   Sors: Il-QEA, ibbażat fuq il-memorandum ta’ spjegazzjoni tal-proposta tal-Kummissjoni għal Deċiżjoni tal-Kunsill dwar is-sistema ta’ riżorsi proprji tal-Unjoni Ewropea.

Rati ta’ prelevazzjoni għar-riżorsi proprji

9.

Fis-sistema attwali, ir-rata ta’ prelevazzjoni (21) li għandha tiġi applikata għar-riżorsa proprja bbażata fuq il-VAT hija stipulata fid-Deċiżjoni tal-Kunsill. Ma hemm l-ebda rata ta’ prelevazzjoni għall-RPT, u r-rata ta’ prelevazzjoni reali għar-riżorsa propja bbażata fuq l-ING tiġi ddeterminata kull sena sabiex jiġi żgurat li l-baġit tal-UE jkun ibbilanċjat.

10.

Sabiex ikun possibbli li matul il-perjodu tal-QFP jinbidel il-kombinament ta’ riżorsi proprji mingħajr ma tkun meħtieġa emenda għad-Deċiżjoni tal-Kunsill dwar is-sistema ta’ Riżorsi Proprji, il-Kummissjoni tipprevedi żewġ settijiet ta’ rati ta’ prelevazzjoni għal kull kategorija ta’ riżorsi proprji, ħlief għall-ING (ara l-Figura 2): livell massimu fil-proposta tagħha għal Deċiżjoni tal-Kunsill, u rata ta’ prelevazzjoni li għandha tiġi applikata (f’livell aktar baxx) fil-proposta tagħha għal Regolament tal-Kunsill li jimplimenta d-Deċiżjoni ta’ hawn fuq (ara l-paragrafi 21, 27, 35 u 39). Dan l-approċċ jipprovdi aktar flessibbiltà fil-mod kif il-baġit tal-UE jiġi ffinanzjat. Figura 2 Rati massimi ta’ prelevazzjoni u rati ta’ prelevazzjoni li għandhom jiġu applikati Riżorsa proprja Rata massima ta’ prelevazzjoni Kif indikat fil-proposta għal Deċiżjoni tal-Kunsill dwar is-sistema ta’ Riżorsi Proprji tal-Unjoni Ewropea. Rati ta’ prelevazzjoni li għandhom jiġu applikati Kif indikat fil-proposta għal Regolament tal-Kunsill li jistabbilixxi miżuri ta’ implimentazzjoni għas-sistema ta’ Riżorsi Proprji tal-Unjoni Ewropea. Riżorsa proprja bbażata fuq il-VAT (issimplifikata) % applikabbli għall-bażi tal-VAT b’rata standard. 2 1 Riżorsa proprja bbażata fuq il-BKKTK % applikabbli għall-proporzjon ta’ profitti taxxabbli attribwiti għal kull Stat Membru. 6 3 Riżorsa proprja bbażata fuq l-EU ETS % tad-dħul iġġenerat mill-kwoti li għandhom jiġu rkantati u l-valur tas-suq ta’ kwoti tranżizzjonali mingħajr ħlas għall-immodernizzar tas-settur tal-enerġija. 30 20 Riżorsa proprja bbażata fuq l-iskart tal-plastik mill-imballaġġ Applikabbli għall-piż tal-iskart tal-plastik mill-imballaġġ li mhux qed jiġi riċiklat. EUR 1,00 għal kull kilogramm EUR 0,80 għal kull kilogramm Sors: Il-QEA, ibbażat fuq il-proposti mill-Kummissjoni.

Dispożizzjonijiet ta’ implimentazzjoni

11.

Il-proposta tal-Kummissjoni għal Regolament tal-Kunsill dwar il-metodi u l-proċedura għad-disponibbiltà tar-riżorsi proprji bbażati fuq il-BKKTK, fuq l-EU ETS u fuq l-iskart tal-plastik mill-imballaġġ li mhux qed jiġi riċiklat, u dwar il-miżuri li jissodisfaw il-ħtiġijiet fi flus kontanti, flimkien mar-Regolament tal-Kunsill (UE, Euratom) Nru 609/2014 (22), se jkompli japplika għar-riżorsi proprji eżistenti.

12.

Din il-proposta tinkludi bosta referenzi għar-Regolament (UE, Euratom) Nru 609/2014 ta’ hawn fuq, u r-rekwiżiti aġġornati se jwasslu għal żewġ regolamenti differenti dwar ir-riżorsi proprji. Fil-fehma tagħna, regolament uniku b’sett ta’ dispożizzjonijiet komprensivi dwar ir-riżorsi proprji jagħmel is-sistema aktar sempliċi u aktar trasparenti (ara l- Anness 1 ).

IT-TIENI PARTI: KUMMENTI SPEĊIFIĊI

13.

Hawn taħt hawn il-kummenti speċifiċi tagħna dwar is-sistema ta’ finanzjament tal-UE rriformata. B’mod partikolari, aħna vvalutajna: — il-livell ta’ kumplessità tas-sistemi ta’ ġestjoni tal-Kummissjoni, — il-kwalità tad-data u tal-mudelli li ntużaw bħala bażi għall-proposti, — l-istabbiltà tal-fondi li jridu jinġabru, — it-trasparenza fil-kalkolu annwali tal-kontribuzzjonijiet tal-Istati Membri, u — il-possibbiltà li nipprovdu aċċertament fuq il-bażi ta’ xogħol tal-awditjar li jkun suffiċjenti (possibbiltà tal-awditjar). Fil-Figura 3 nippreżentaw sommarju tal-valutazzjoni tagħna skont il-kriterji ta’ hawn fuq. Figura 3 Il-valutazzjoni tal-Qorti dwar ix-xerqien tar-riżorsi proprji individwali inklużi fir-riforma proposta mill-Kummissjoni Kriterji: Livell ta’ kumplessità Kwalità tad-data u tal-mudelli Stabbiltà tal-fondi Trasparenza Possibbiltà tal-awditjar Riżorsi proprji bbażati fuq: VAT issimplifikata Baxx Baxxa (ara l-paragrafu 22) Għolja Għolja Medja EU ETS Baxx Għolja Baxxa (ara l-paragrafu 37) Medja Għolja BKKTK Medju Baxxa (ara l-paragrafu 33) Għolja Medja Medja (ara l-paragrafu 30) Skart tal-plastik mill-imballaġġ Medju Baxxa (ara l-paragrafu 40) Medja Għolja Medja (ara l-paragrafu 41) RPT Baxx Medja (ara n-nota 24 f’qiegħ il-paġna) Għolja Għolja Medja ING Medju (ara l-paragrafu 18) Medja (ara l-paragrafu 18) Għolja Medja Medja (ara n-nota 49 f’qiegħ il-paġna) Sors: Il-QEA, b’kont meħud tax-xogħol li twettaq mill-HLGOR (ara l-paragrafi 3 u 7).

Ir-riforma ta’ xi wħud mir-riżorsi proprji eżistenti

Iż-żamma tad-dazji doganali (RPT), iżda b’rata aktar baxxa għall-ispejjeż tal-ġbir

14.

L-RPT huma dazji doganali imposti fuq importazzjonijiet ta’ prodotti li jkunu ġejjin minn pajjiżi terzi. Huma jirrappreżentaw 16 % tal-baġit tal-UE fl-2018 (EUR 23 biljun). Skont l-istimi tal-Kummissjoni, il-kontribuzzjoni tagħhom għall-baġit tal-UE hija mistennija li tibqa’ stabbli: bħala medja, 15 % tal-baġit annwali tal-UE (EUR 26 biljun) għall-perjodu 2021-2027. L-Istati Membri jiġbru dawn id-dazji f’isem l-UE u jagħmluhom disponibbli għall-baġit tal-UE wara li jnaqqsu 20 % bħala spejjeż tal-ġbir tagħhom. F’verżjonijiet preċedenti tas-sistema tar-riżorsi proprji din ir-rata varjat bejn 10 % u 25 %.

15.

Il-Kummissjoni tistma li l-ispejjeż tal-ġbir attwalment huma ogħla mill-infiq reali mġarrba mill-Istati Membri fuq l-irkupru diliġenti tad-dazji doganali. Hija tirrimarka wkoll li l-ammonti li jinġabru u l-intensità tal-kontrolli jvarjaw b’mod sinifikanti bejn l-Istati Membri, u li l-ammonti li jinżammu bħala spejjeż tal-ġbir mhux dejjem jintużaw biex jappoġġaw l-attivitajiet doganali (23). B’konsegwenza ta’ dan, il-Kummissjoni pproponiet li r-rata titnaqqas għal-livell inizjali ta’ 10 %.

16.

L-RPT huma riżorsa proprja ġenwina u jikkostitwixxu sors affidabbli ta’ dħul tal-UE (24). Madankollu, aħna nosservaw li l-Kummissjoni ma ġġustifikatx ir-rata ta’ 10 % permezz ta’ studju li jipprovdi stimi affidabbli tal-ispejjeż imġarrba mill-awtoritajiet doganali tal-Istati Membri fil-ġbir tad-dazji (25).

Iż-żamma tar-riżorsa proprja bbażata fuq l-ING

17.

Attwalment, ir-riżorsa proprja bbażata fuq l-ING hija s-sors prinċipali ta’ dħul tal-UE (EUR 103 biljun, jew 71 % tal-baġit tal-UE fl-2018). Skont l-istimi tal-Kummissjoni, il-kontribuzzjoni tagħha għall-baġit tal-UE hija mistennija li titnaqqas, bħala medja, għal 58 % tal-baġit annwali tal-UE (EUR 103 biljun) għall-perjodu 2021-2027. Hija tiġi kkalkulata bl-applikazzjoni ta’ rata uniformi għall-ING tal-Istati Membri. Din ir-rata tiġi ddeterminata bħala perċentwal tal-ING annwali previst, biex tkopri kompletament dik il-parti tal-baġit li mhijiex iffinanzjata mill-RPT, mir-riżorsa proprja bbażata fuq il-VAT u minn dħul ieħor. Ir-riżorsa proprja bbażata fuq l-ING b’hekk hija l-entrata saldatorja tal-baġit tal-UE.

18.

F’Opinjonijiet preċedenti (26), aħna enfasizzajna r-riskji għoljin li huma marbuta mal-kumplessità involuta fil-ġabra tal-aggregat statistiku tal-ING u fis-sistemi ta’ ġestjoni relatati, kif ukoll in-nuqqas ta’ trasparenza fil-kalkolu ta’ din ir-riżorsa proprja. Minħabba ċ-ċiklu ta’ verifikazzjoni pluriennali tal-Kummissjoni u l-ġestjoni tar-riżervi, id-data tal-ING li tintuża biex jiġu kkalkulati r-riżorsi proprji tieħu ħafna ħin biex tiġi riveduta. B’riżultat ta’ dan, wara aktar minn 10 snin mis-sena inkwistjoni, il-kontribuzzjonijiet nazzjonali xorta jistgħu jkunu suġġetti għal korrezzjonijiet u l-Istati Membri jistgħu jiffaċċjaw inċertezza baġitarja (27).

19.

Aħna nirrikonoxxu li r-riżorsa proprja bbażata fuq l-ING tiżgura l-istabbiltà kumplessiva tas-sistema ta’ finanzjament tal-UE. Madankollu, fir-Rapporti Annwali 2016 u 2017 tagħna, aħna indikajna l-ħtieġa li jsir xogħol addizzjonali sabiex jiġi żgurat li ċerti fenomeni relatati mal-globalizzazzjoni (bħar-rilokazzjoni ta’ intrapriżi multinazzjonali) jiġu riflessi b’mod korrett fil-kontijiet nazzjonali. Il-Kummissjoni, irrikonoxxiet din is-sitwazzjoni fil-proposti tagħha, u għarfet li l-iżviluppi ekonomiċi reċenti jippreżentaw sfidi għall-awtoritajiet nazzjonali biex ikejlu l-ING b’mod korrett. B’riżultat ta’ dan, il-kontribuzzjonijiet ibbażati fuq l-ING tal-Istati Membri jiġu kkalkulati bl-użu ta’ data li tista’ ma tkunx għalkollox affidabbli f’dan ir-rigward.

Is-simplifikazzjoni tar-riżorsa proprja bbażata fuq il-VAT

20.

Fis-sistema attwali, il-proċess ta’ armonizzazzjoni tal-bażijiet tal-VAT tal-Istati Membri jirriżulta f’għadd ta’ korrezzjonijiet u kumpensi. Il-kalkolu tar-Rata Medja Ponderata (WAR) huwa kumpless ukoll. Din ir-riżorsa proprja tirrappreżenta 12 % tal-baġit tal-UE fl-2018 (EUR 17-il biljun) u, skont l-istimi tal-Kummissjoni, il-kontribuzzjoni tagħha hija mistennija li tiżdied, bħala medja, għal 14 % tal-baġit annwali tal-UE (EUR 25 biljun) għall-perjodu 2021-2027.

21.

Is-simplifikazzjoni proposta hija bbażata fuq tliet stadji: (a) L-iffukar fuq provvisti li huma suġġetti għar-rata standard tal-VAT, (b) Is-simplifikazzjoni tal-proċedura għall-kalkolu tal-bażijiet tal-VAT bl-użu ta’ suppożizzjonijiet issimplifikati bbażati fuq id-dħul b’rata standard, u (c) L-applikazzjoni ta’ rata ta’ prelevazzjoni uniformi fuq il-bażijiet b’rata standard (28) biex tinkiseb ir-riżorsa proprja.

22.

L-eżaminar tagħna tal-metodoloġija proposta jiżvela li s-suppożizzjonijiet użati mill-Kummissjoni għall-kalkolu tal-kontribuzzjonijiet tal-VAT issimplifikata ma jikkonformawx mal-istadji (a) u (b) ta’ hawn fuq. L-Anness II jipprovdi eżaminar fid-dettall tas-sistema attwali u dik ġdida proposta għall-kalkolu tar-riżorsa proprja bbażata fuq il-VAT (29).

23.

Kif imsemmi fl-Opinjoni Nru 2/2012 tagħna, f’għadd ta’ każijiet, aħna kkritikajna r-riżorsa proprja bbażata fuq il-VAT minħabba l-kumplessità tal-kalkolu tagħha (30) u n-nuqqas ta’ rabta diretta mal-bażi għat-taxxa. Il-proposta l-ġdida tal-Kummissjoni għar-riżorsa proprja bbażata fuq il-VAT tissimplifika l-kalkolu, iżda xorta ma tipprovdi l-ebda rabta diretta mal-bażi għat-taxxa. Madankollu, rabta bħal din tista’ tinkiseb billi tiġi applikata rata ta’ prelevazzjoni direttament mad-dħul mill-VAT (31).

“Basket” ta’ riżorsi proprji ġodda

24.

Il-Kummissjoni pproponiet li tintroduċi “basket” ta’ tliet sorsi ġodda ta’ dħul. L-approċċ tal-“basket” għandu l-għan li jipprovdi riżorsi proprji ġenwini li jkunu marbuta ma’ politiki ewlenin tal-UE, bħat-tibdil fil-klima, il-politika ambjentali, l-istrateġija għall-plastiks, l-ekonomija ċirkolari, u s-suq uniku. Madankollu, is-sorsi l-ġodda proposti ta’ dħul huma, essenzjalment, kontribuzzjonijiet nazzjonali, u tnejn biss (ir-riżorsa proprja bbażata fuq il-BKKTK u dik ibbażata fuq l-iskart tal-plastik mill-imballaġġ) minn tlieta jista’ jkollhom xi impatt fuq l-implimentazzjoni tal-politiki tal-UE (ara l-paragrafi 26 u 42).

25.

Skont il-Kummissjoni, l-implimentazzjoni tas-sistema rriformata mhijiex se twassal għal aktar approprjazzjonijiet baġitarji jew għal aktar persunal, b’mod partikolari fir-rigward tar-riżorsi proprji l-ġodda. Madankollu, din il-valutazzjoni mhijiex issostanzjata minn studju ddettaljat.

Riżorsa proprja bbażata fuq il-BKKTK

26.

Il-globalizzazzjoni u r-rwol li qed jikber tal-kumpaniji diġitali jippreżentaw sfidi għall-awtoritajiet nazzjonali tat-taxxa. Fi snin reċenti, iż-żieda ta’ assi intanġibbli ffaċilitat il-mobbiltà kapitali, u d-dibattitu dar lejn l-inadegwatezza tal-oqfsa tat-tassazzjoni nazzjonali fir-rigward tal-indirizzar b’mod xieraq ta’ dawn l-iżviluppi. Id-diskussjonijiet fil-Kunsill dwar il-proġett tal-introduzzjoni tal-BKKTK inbdew fl-2011, u l-Kummissjoni, fil-pjan ta’ azzjoni tagħha ta’ Ġunju 2015 (32), ipproponiet approċċ gradwali lejn sistema tat-taxxa korporattiva fl-UE kollha. F’Ottubru 2016, il-Kummissjoni għamlet żewġ proposti leġiżlattivi simultanji: (a) għall-ewwel stadju, hija għamlet proposta għal Direttiva tal-Kunsill dwar Bażi Komuni għat-Taxxa Korporattiva (BKKTK) (33), biex tiġi żgurata komputazzjoni xierqa tal-bażi għat-taxxa għal kumpaniji u għal stabbilimenti permanenti fl-UE, u (b) għat-tieni stadju, hija għamlet proposta għal Direttiva tal-Kunsill dwar il-BKKTK (34), biex il-proċess tal-konsolidazzjoni u kwistjonijiet oħra relatati jiġu ttrattati kif xieraq (35).

27.

F’każ li l-proposti leġiżlattivi ta’ hawn fuq jiġu adottati mill-Kunsill u rratifikati fl-Istati Membri, it-tassazzjoni bbażata fuq il-BBKKTK tkun obbligatorja għal kumpaniji kbar li jissodisfaw ċerti rekwiżiti fir-rigward tal-forma ġuridika, it-tassazzjoni, il-konsolidazzjoni tal-entitajiet u s-soll tal-grupp (id-dħul ta’ EUR 750 miljun matul is-sena li tiġi qabel is-sena finanzjarja rilevanti). Ir-riżorsa proprja l-ġdida proposta li tkun ibbażata fuq din it-taxxa tiġi kkalkulata bl-applikazzjoni tar-rata ta’ prelevazzjoni ta’ 3 % (36) għall-profitti taxxabbli ta’ kumpaniji multinazzjonali jew gruppi ta’ kumpaniji.

28.

Kumpaniji li ma jissodisfawx dawn il-kriterji kollha jistgħu, fuq bażi volontarja, jagħżlu li jkunu suġġetti għal din it-taxxa minflok it-taxxi korporattivi nazzjonali ta’ Stati Membri oħra. Madankollu, il-valur tad-dħul tagħhom jiġi eskluż mill-bażi li tintuża għall-kalkolu tar-riżorsa proprja.

29.

Il-proposta għal Direttiva tal-Kunsill dwar il-BKKTK tiddikjara li jenħtieġ li, fi tmiem is-sena finanzjarja, il-bażi konsolidata għat-taxxa tiġi kondiviża bejn l-entitajiet tal-grupp ta’ kumpaniji fl-Istati Membri differenti, abbażi ta’ formula li tagħti ponderazzjoni ugwali (jiġifieri terz) għal tliet fatturi: il-bejgħ, ix-xogħol (ir-remunerazzjoni u l-għadd ta’ impjegati) u l-assi.

30.

Madankollu, aħna nosservaw li l-kapaċità tal-Istati Membri individwali li jivverifikaw l-allokazzjoni korretta tad-dħul fi ħdan il-grupp tiddependi mill-kooperazzjoni tal-Istati Membri l-oħra fir-rigward tat-trażmissjoni ta’ data dwar id-diversi kumpaniji sussidjarji u kumpaniji omm. L-aċċess tagħna, u dak tal-Kummissjoni, għal informazzjoni ddettaljata tal-ġestjoni dwar kumpaniji privati jista’ jkun suġġett għal restrizzjonijiet.

31.

Il-Kummissjoni pproponiet, kemm fir-rigward tal-BKKTK kif ukoll fir-rigward tal-iskart tal-plastik mill-imballaġġ, li kwalunkwe bidla fil-kalkolu ta’ dawn ir-riżorsi proprji ma tkomplix tittieħed inkunsiderazzjoni wara l-31 ta’ Lulju tas-sitt sena wara sena finanzjarja partikolari (37). Dan il-perjodu, li matulu l-kontribuzzjonijiet tal-Istati Membri għal sena partikolari jistgħu jiġu riveduti, huwa magħruf bħala l-“perjodu tal-preskrizzjoni”.

32.

Aħna nosservaw li dan il-perjodu huwa itwal minn dak li jintuża għar-riżorsi proprji bbażati fuq il-VAT u għal dawk ibbażati fuq l-ING, li huwa biss ta’ erba’ snin. L-istess japplika għall-perjodu taż-żamma għad-dokumenti ta’ sostenn (38). Peress li kemm il-Kummissjoni kif ukoll l-Istati Membri jistgħu jestendu l-perjodu tal-preskrizzjoni billi jistabbilixxu riżervi, ma hemm l-ebda riskju finanzjarju għall-baġit tal-UE li huwa relatat mar-riżorsi proprji l-ġodda bbażati fuq il-BKKTK u fuq l-iskart tal-plastik mill-imballaġġ (ara l-Anness I).

33.

Minħabba li, sentejn wara li nħarġu l-proposti, id-Direttivi dwar il-BKTK u l-BKKTK għadhom ma ġewx adottati, huma se jiddaħħlu gradwalment mhux qabel ma jgħaddu bosta snin mill-bidu tal-QFP il-ġdid. Ir-riżorsa proprja bbażata fuq il-BKKTK hija mistennija li tiffinanzja, bħala medja, 6 % tal-baġit annwali tal-UE (EUR 12 biljun) għall-perjodu 2021-2027 (39).

Riżorsa proprja bbażata fuq l-EU ETS

34.

Fil-kuntest tal-Ftehim ta’ Pariġi, li ġie adottat f’Diċembru 2015, l-UE impenjat lilha nfisha li sal-2030 tnaqqas l-emissjonijiet tagħha ta’ gassijiet serra b’mill-inqas 40 % (mil-livelli tal-1990). L-EU ETS hija waħda mill-istrumenti prinċipali (40) għall-ilħuq ta’ dawn il-miri ta’ tnaqqis tal-emissjonijiet. Bl-ETS, l-UE stabbiliet limitu fuq l-emissjonijiet kumplessivi li jkunu ġejjin minn ċerti setturi tal-provvista tal-enerġija, industriji li jużaw ħafna enerġija u titjiriet ġewwa ż-Żona Ekonomika Ewropea (ŻEE), u ħolqot suq għall-kwoti tal-emissjonijiet, biex hekk stabbiliet prezz fuq il-karbonju. Hija tipprovdi limitu (massimu) fuq l-emissjonijiet. Il-kumpaniji jirċievu jew jixtru kwoti tal-emissjonijiet, li huma jistgħu jinnegozjaw. Il-Kaxxa 1 tagħti stampa ġenerali tal-EU ETS (41). Kaxxa 1 — Stampa ġenerali tal-EU ETS L-EU ETS taħdem fuq il-prinċipju ta’ “limitu u skambju”. Il-volum kumplessiv ta’ gassijiet serra li jista’ jiġi emess matul perjodu pluriennali minn impjanti tal-enerġija, fabbriki u kumpaniji oħra li huma koperti mis-sistema huwa suġġett għal limitu massimu li huwa stabbilit fil-livell tal-UE. Fi ħdan dan il-limitu, il-kumpaniji jirċievu jew jixtru kwoti tal-emissjonijiet li, jekk ikunu jixtiequ, jistgħu jinnegozjaw. Matul il-perjodu 2013-2020, il-limitu massimu fuq l-emissjonijiet minn stazzjonijiet tal-enerġija u installazzjonijiet fissi oħra qed jitnaqqas b’1,74 % kull sena. Mill-2021 ’il quddiem, ir-rata ta’ tnaqqis annwali se tkun ta’ 2,2 %. L-irkant tal-kwoti jipprovdi dħul għall-Istati Membri, li matul il-perjodu 2013-2017 ġabru EUR 21,3 biljun. Taħt id-Direttiva dwar l-EU ETS, jenħtieġ li mill-inqas 50 % minn dan id-dħul jintuża għal skopijiet relatati mal-klima. Skont il-Kummissjoni, il-proporzjon ta’ dħul mill-ETS li jintuża għal dawn l-iskopijiet huwa ta’ madwar 80 %.

35.

Din ir-riżorsa proprja l-ġdida proposta tiġi kkalkulata bl-applikazzjoni tar-rata ta’ prelevazzjoni ta’ 20 % (42) għad-dħul mill-irkant tal-kwoti, li jiġu vvalutati skont il-prezz uniformi tal-irkant u jkunu disponibbli biex jiġu distribwiti fl-Istati Membri kollha abbażi tal-emissjonijiet għall-perjodu 2005-2007 (43). Il-prezzijiet tal-irkant u l-volumi jiġu ppubblikati kuljum mill-pjattaformi rilevanti.

36.

L-EU ETS hija għodda importanti għall-implimentazzjoni tal-politiki tal-UE dwar il-klima u l-ambjent. Madankollu, ir-riżorsa proprja proposta bbażata fuq l-EU ETS, ma toħloqx inċentiv addizzjonali għall-Istati Membri biex inaqqsu l-emissjonijiet ta’ gassijiet serra.

37.

Skont il-Kummissjoni, ir-riżorsa proprja bbażata fuq l-EU ETS għandha tiffinanzja, bħala medja, 2 % tal-baġit annwali tal-UE (EUR 3 biljun) għall-perjodu 2021-2027. Kif turi l-Figura 4, il-prezz uniformi tal-irkant (44) tal-kwoti huwa volatili. Madankollu, dan mhux se jipperikola l-istabbiltà tal-baġit peress li r-riżorsa proprja bbażata fuq l-ETS tirrappreżenta biss proporzjon żgħir tad-dħul tal-UE. Figura 4 Prezzijiet tal-irkant tal-kwoti tal-emissjonijiet għall-perjodu Jannar 2012-Settembru 2018 Sors: Il-QEA, ibbażat fuq l-informazzjoni disponibbli għall-pubbliku fuq is-sit web tal-pjattaforma tal-irkant (www.eex.com).

Riżorsa proprja bbażata fuq l-iskart tal-plastik mill-imballaġġ

38.

L-imballaġġ tal-plastik jirrappreżenta madwar 60 % tal-iskart tal-plastik prodott fil-fażi ta’ wara l-konsumatur fl-UE. Il-Kummissjoni pproponiet il-mira li sal-2025 jiġi riċiklat mill-inqas 50 % tal-imballaġġ kollu tal-plastik li jiġi prodott fl-UE u sal-2030 jiġi riċiklat aktar min-nofs. Hija stabbiliet ukoll l-objettiv li, sal-2030, l-imballaġġ kollu tal-plastik li jitqiegħed fis-suq tal-UE għandu jkun jista’ jintuża mill-ġdid jew jiġi riċiklat faċilment (45).

39.

Il-kontribuzzjoni ta’ kull Stat Membru għal din ir-riżorsa proprja proposta għall-baġit tal-UE se tkun direttament proporzjonali għall-kwantità ta’ skart tal-plastik tal-imballaġġ li huwa jiġġenera u li mhux qed jiġi riċiklat. Hija se tiġi kkalkulata bl-applikazzjoni tar-rata ta’ prelevazzjoni ta’ EUR 0,80 għal kull kilogramm (46) ta’ skart.

40.

Il-Kaxxa 2 turi s-sors u l-kwalità tad-data użata mill-Kummissjoni għall-kalkolu tar-riżorsa proprja bbażata fuq l-iskart tal-plastik tal-imballaġġ. Kaxxa 2 — Sors u kwalità tad-data dwar l-iskart tal-plastik tal-imballaġġ Id-data dwar il-ġenerazzjoni u r-riċiklaġġ tal-imballaġġ diġà tiġi rrappurtata lill-Kummissjoni (Eurostat) skont l-Artikolu 12 tad-Direttiva tal-Parlament Ewropew u tal-Kunsill 94/62/KE tal-20 ta’ Diċembru 1994 dwar l-imballaġġ u l-iskart mill-imballaġġ (47). Il-Kummissjoni tipproponi li, għal xi Stati Membri, jeħtieġ li jsir aktar titjib fid-data dwar l-imballaġġ tal-plastik riċiklat. Hija tipprevedi li tikseb dan permezz tal-leġiżlazzjoni l-ġdida dwar l-iskart li tintroduċi regoli għall-kalkolu li huma stretti u armonizzati. Din il-leġiżlazzjoni ġiet adottata f’Mejju 2018 (48) u emendat id-Direttiva ta’ hawn fuq. Dawn l-emendi għad-Direttiva, li jintroduċu kalkoli stretti u armonizzati, iridu jiġu ppromulgati fil-leġiżlazzjoni nazzjonali sa Lulju 2020.

41.

Aħna nosservaw li, minħabba raġunijiet ta’ kunfidenzjalità statistika (49), mhuwiex possibbli li nistabbilixxu rendikont sħiħ tal-entrati li jiddokumenta l-ġabra tad-data statistika li tintuża bħala l-bażi għall-kalkolu ta’ din ir-riżorsa proprja. Il-verifikazzjoni, min-naħa tal-Kummissjoni, ta’ dan is-sors ta’ dħul, hija mistennija li tkun suġġetta għal proċess ta’ kontroll pluriennali, kif inhu l-każ għar-riżorsa proprja bbażata fuq l-ING (ara l-paragrafu 18).

42.

Ir-riżorsa proprja bbażata fuq l-iskart tal-plastik mill-imballaġġ hija intenzjonata li tipprovdi inċentiv għall-Istati Membri biex inaqqsu l-iskart tal-plastik mill-imballaġġ. Fuq terminu twil, bidla bħal din fl-imġiba tista’ tnaqqas il-bażi ta’ kalkolu. Aħna nosservaw li, kif kien ukoll il-każ bir-riżorsa proprja bbażata fuq il-BKKTK, il-perjodu tal-preskrizzjoni mhuwiex allinjat ma’ dak tar-riżorsi proprji bbażati fuq il-VAT u l-ING (ara l-paragrafi 31 u 32, u l-Anness I).

43.

Il-Kummissjoni tistma li r-riżorsa proprja bbażata fuq l-iskart tal-plastik mill-imballaġġ, bħala medja, se tiffinanzja 4 % tal-baġit annwali tal-UE (EUR 7 biljun) għall-perjodu 2021-2027. Dawn l-istimi huma bbażati fuq is-suppożizzjoni li l-Istati Membri kollha se jilħqu l-miri tar-riċiklaġġ stabbiliti fid-Direttivi. Madankollu, huma ma jiħdux inkunsiderazzjoni l-bidla potenzjali fl-imġiba msemmija hawn fuq.

Eliminazzjoni gradwali tal-korrezzjonijiet

44.

Fis-Summit Ewropew ta’ Fontainebleau li sar f’Ġunju 1984 intlaħqet il-konklużjoni li l-Istati Membri li jġarrbu piżijiet baġitarji eċċessivi meta mqabbel mal-prosperità relattiva tagħhom jistgħu jibbenefikaw minn korrezzjoni. Minn dakinhar ’il hawn, is-sistema tar-riżorsi proprji inkludiet xi mekkaniżmi ta’ korrezzjoni li jiffavorixxu għadd ta’ Stati Membri. Dan wassal għal kumplessità eċċessiva u għal inqas trasparenza fil-finanzjament tal-baġit tal-UE. Kritika li enfasizzajna f’Opinjonijiet preċedenti (50).

45.

Il-mekkaniżmi ta’ korrezzjoni attwali huma: ir-ribass (51) tar-Renju Unit, ir-“ribassi fuq ir-ribass tar-Renju Unit” għall-Ġermanja, in-Netherlands, l-Awstrija u l-Iżvezja, it-tnaqqis ta’ somom f’daqqa għar-riżorsa proprja bbażata fuq l-ING għad-Danimarka, in-Netherlands, l-Awstrija u l-Iżvezja, u t-tnaqqis tar-rati ta’ prelevazzjoni tal-VAT għall-Ġermanja, in-Netherlands u l-Iżvezja.

46.

Bidla partikolari li l-Kummissjoni pproponiet fir-riforma tagħha tas-sistema ta’ finanzjament tal-UE kienet li telimina gradwalment dawn il-korrezzjonijiet (bl-esklużjoni tar-ribass tar-Renju Unit, iżda bl-inklużjoni tar-“ribassi fuq ir-ribass tar-Renju Unit”) bejn l-2021 u l-2025. L-ammonti ta’ referenza tal-korrezzjonijiet kollha għall-ħames Stati Membri (52) kkonċernati se jkunu bbażati fuq il-kalkolu tagħhom għas-sena 2020 skont is-sistema attwali (stima kumplessiva ta’ EUR 5,8 biljun). Il-korrezzjonijiet kollha se jinbidlu f’somom f’daqqa u progressivament se jitnaqqsu fi stadji li jkunu bbażati fuq l-istess perċentwal (17 % kull sena).

47.

Skont il-Kummissjoni, l-abolizzjoni immedjata tal-korrezzjonijiet b’effett mill-2021 tista’ twassal għal żieda f’daqqa fil-kontribuzzjonijiet ta’ dawk l-Istati Membri li preċedentement kienu bbenefikaw minn dawn il-korrezzjonijiet. Aħna nqisu li l-eliminazzjoni progressiva tal-korrezzjonijiet tkun pass ’il quddiem lejn sistema aktar trasparenti u inqas kumplessa minn dik eżistenti (ara l-paragrafi 44 u 45). Skont il-proposta tal-Kummissjoni, il-korrezzjonijiet se jintemmu fl-2026.

Żieda fil-limiti massimi għar-riżorsi proprji

48.

Il-limitu massimu attwali għar-riżorsi proprji għall-finanzjament ta’ approprjazzjonijiet għal pagamenti annwali huwa stabbilit għal rata ta’ 1,20 % tas-somom tal-ING tal-Istati Membri kollha, u għall-approprjazzjonijiet għal pagamenti r-rata hija ta’ 1,26 %. B’kont meħud tal-impatt tal-ħruġ tar-Renju Unit mill-UE u l-inkorporazzjoni tal-Fond Ewropew għall-Iżvilupp (FEŻ) fil-baġit tal-UE, kif ukoll il-ħtieġa li jiġu koperti obbligazzjonijiet finanzjarji marbuta ma’ self jew faċilitajiet finanzjarji ggarantiti mill-baġit tal-UE, il-Kummissjoni pproponiet li dawn il-limiti massimi tal-ING tas-27 Stat Membru jiżdiedu għal 1,29 % u 1,35 % rispettivament.

IT-TIELET PARTI: KONKLUŻJONIJIET U EMENDI PROPOSTI

49.

Il-Kummissjoni pproponiet dawn il-bidliet li ġejjin fir-rigward tas-sistema attwali għall-finanzjament futur tal-UE: titnaqqas ir-riżorsa proprja bbażata fuq l-ING bi 13-il punt perċentwali, jiġi introdott “basket” ta’ riżorsi proprji ġodda (ibbażati fuq il-BKKTK, l-EU ETS u l-iskart tal-plastik mill-imballaġġ), li jirrappreżentaw 12 % tad-dħul tal-UE, tiżdied bi ftit ir-riżorsa proprja bbażata fuq il-VAT issimplifikata u r-riżorsi l-oħra (l-RPT u d-dħul l-ieħor) jinżammu fl-istess livelli kumplessivi. Hija pproponiet ukoll l-eliminazzjoni gradwali tal-korrezzjonijiet eżistenti li huma ta’ benefiċċju għal ċerti Stati Membri u ż-żieda tal-limiti massimi għar-riżorsi proprji.

50.

Id-Dokument ta’ Riflessjoni dwar il-futur tal-finanzi tal-UE jistipula l-prinċipji ewlenin għal din ir-riforma, filwaqt li jieħu inkunsiderazzjoni tar-rakkomandazzjonijiet tal-HLGOR. Il-proposta tieħu kont ta’ xi wħud minnhom, iżda mhux kollha kemm huma. Barra minn hekk, din ir-riforma tindirizza biss xi wħud mid-dgħufijiet li aħna identifikajna fix-xogħol preċedenti tagħna dwar ir-riżorsi proprji eżistenti. Fil-fehma tagħna, is-sistema ta’ finanzjament tal-UE proposta għadha kumplessa.

51.

Aħna osservajna li t-tħejjija ta’ din il-proposta ma inkludietx valutazzjoni tal-impatt komprensiva, iddokumentata u ppubblikata (ara l-paragrafu 7).

52.

L-analiżi tagħna tas-sistema rriformata identifikat dawn il-kwistjonijiet prinċipali li ġejjin: — Ir-riżorsa proprja proposta bbażata fuq il-VAT issimplifikata tinkludi suppożizzjonijiet dwar tranżazzjonijiet b’rata standard li ma jaderixxux ma’ xi wħud mill-istadji tal-kalkolu deskritti mill-Kummisjoni (ara l-paragrafu 22), — Minħabba li l-applikazzjoni tar-riżorsa proprja bbażata fuq il-BKKTK hija suġġetta għad-Direttiva dwar din it-taxxa li qed tiġi adottata mill-Kunsill u implimentata fil-liġi nazzjonali fl-Istati Membri, hija se tiddaħħal b’mod gradwali u mhux qabel ma jgħaddu bosta snin mill-bidu tal-QFP l-ġdid (ara l-paragrafi 26 u 27, u 33), — L-EU ETS hija għodda importanti għall-implimentazzjoni tal-politiki tal-UE dwar il-klima u l-ambjent. Madankollu, ir-riżorsa proprja proposta bbażata fuq l-ETS ma toħloqx inċentiv addizzjonali għall-Istati Membri biex inaqqsu l-emissjonijiet ta’ gassijiet serra. Barra minn hekk, hija mhijiex riżorsa stabbli minħabba l-volatilità tal-prezzijiet tal-irkant tal-kwoti tal-emissjonijiet (ara l-paragrafi 36 u 37), — Ir-riżorsa proprja bbażata fuq l-iskart tal-plastik mill-imballaġġ tipprovdi inċentiv għall-Istati Membri biex jirriċiklaw aktar plastik. Madankollu, jeħtieġ li jsir titjib fil-kwalità tad-data li tintuża għall-kalkolu ta’ din ir-riżorsa proprja (ara l-paragrafi 40 u 42), — L-eliminazzjoni gradwali tal-korrezzjonijiet hija pass ’il quddiem lejn sistema aktar trasparenti u inqas kumplessa. Skont il-proposta tal-Kummissjoni, il-korrezzjonijiet se jintemmu fl-2026 (ara l-paragrafu 47), u — Fir-rigward tar-riżorsi proprji l-ġodda proposti, is-setgħat tal-awditjar tagħna, dwar dawk ibbażati fuq il-BKKTK u l-iskart tal-plastik mill-imballaġġ, jistgħu jkunu ristretti. Hemm riskju li dan jaffettwa l-possibbiltà tal-awditjar u b’hekk, l-obbligu ta’ rendikont (ara l-paragrafi 30 u 41).

Rakkomandazzjonijiet biex isir titjib fir-riforma proposta tar-riżorsi proprji

53.

Aħna nirrakkomandaw li l-korpi leġiżlattivi jitolbu lill-Kummissjoni biex twettaq dawn l-azzjonijiet li ġejjin mill-aktar fis possibbli: Rakkomandazzjoni 1: Teżamina l-proposti leġiżlattivi tagħha Jenħtieġ li l-Kummissjoni teżamina l-proposti tagħha fir-rigward tar-riżorsi proprji l-ġodda: (a) Ir-riżorsa proprja bbażata fuq il-BKKTK – jenħtieġ li l-Kummissjoni tivvaluta bir-reqqa l-probabbiltà li din ir-riżorsa tiġi implimentata matul il-QFP li jmiss u l-implikazzjonijiet ta’ kwalunkwe dewmien; (b) Ir-riżorsa proprja bbażata fq l-EU ETS – jenħtieġ li fil-prosposta tagħha, il-Kummissjoni tikkjarafika li din ir-riżorsa ma toħloqx inċentiv addizzjonali għall-Istati Membri biex inaqqsu l-emissjonijiet ta’ gassijiet serra. Jenħtieġ li hija tanalizza wkoll l-impatt tal-volatilità assoċjata ma’ dan is-sors ta’ dħul; (c) Ir-riżorsa proprja bbażata fuq l-iskart tal-plastik mill-imballaġġ – jenħtieġ li l-Kummissjoni tanalizza t-tnaqqis possibbli tal-ammonti li huma mistennija li jinġabru minn din ir-riżorsa minħabba bidliet fl-imġiba tal-unitajiet domestiċi u tal-operaturi ekonomiċi. Rakkomandazzjoni 2: Tqis mill-ġdid il-proposta tagħha għar-riżorsa proprja bbażata fuq il-VAT ssimplifikata Jenħtieġ li l-Kummissjoni tqis mill-ġdid il-proposta tagħha għar-riżorsa proprja bbażata fuq il-VAT issimplifikata. F’każ li tiddeċiedi li żżomm dan is-sors ta’ dħul, hija tista’: — jew tikkjarifika li s-simplifikazzjonijiet proposti ma jwasslux għall-kalkolu tal-kontribuzzjonijiet tal-VAT ibbażat fuq il-bażijiet taxxabbli b’rata standard, — jew tintroduċi sors ġdid ta’ dħul ibbażat biss fuq dħul mill-VAT.

54.

L-Anness I jistipula l-emendi u l-kummenti dwar il-proposti tal-Kummissjoni li ġew diskussi fl-ewwel u fit-tieni parti.

---

(1)  ĠU L 168, 7.6.2014, p. 105.

(2)  ĠU L 168, 7.6.2014, p. 29 u 39.

(3)  ĠU L 132, 21.5.2016, p. 85.

(4)  ĠU L 155, 7.6.1989, p. 9.

(5)  ĠU L 122, 16.5.2003, p. 36.

(6)  L-Opinjonijiet Nru 7/2015 (ĠU C 5, 8.1.2016, p. 1), Nru 7/2014 (ĠU C 459, 19.12.2014, p. 1), Nru 2/2012 (ĠU C 112, 18.4.2012, p. 1), Nru 2/2008 (ĠU C 192, 29.7.2008, p. 1), Nru 2/2006 (ĠU C 203, 25.8.2006, p. 50), Nru 4/2005 (ĠU C 167, 7.7.2005, p. 1) u Nru 7/2003 (ĠU C 318, 30.12.2003, p. 1).

(7)  Future of EU finances: reforming how the EU budget operates (Il-futur tal-finanzi tal-UE: nirriformaw il-mod kif jopera l-baġit tal-UE), dokument informattiv u analitiku, il-15 ta’ Frar 2018.

(8)  The Commission’s proposal for the 2021-2027 Multiannual Financial Framework (Il-proposta tal-Kummissjoni għall-Qafas Finanzjarju Pluriennali 2021-2027), dokument informattiv u analitiku, l-10 ta’ Lulju 2018.

(9)  Future Financing of the EU – Final report and recommendations of the High Level Group on Own Resources (HLGOR) on the future financing of the EU (Il-Finanzjament Futur tal-UE – Ir-rapport finali u r-rakkomandazzjonijiet tal-Grupp ta’ Livell Għoli rigward ir-Riżorsi Proprji (HLGOR) dwar il-finanzjament futur tal-UE), li nħareġ f’Diċembru 2016.

(10)  Ara l-Bullettin EU 3-1999.

(11)  Ara l-paragrafu 6 tal-Konklużjonijiet tal-Presidenza (Id-Dokument tal-Kunsill 15914/1/05, REV 1, CONCL 3 tat-30 ta’ Jannar 2006) li jirreferi għad-Dokument tal-Kunsill 15914/05 CADREFIN 268 tad-19 ta’ Diċembru 2005, u b’mod partikolari l-paragrafu 77 tiegħu.

(12)  Il-Konklużjonijiet tal-Kunsill Ewropew tas-7/8 ta’ Frar 2013 (Qafas Finanzjarju Pluriennali) EUCO 37/13.

(13)  Id-Dikjarazzjoni Konġunta dwar ir-Riżorsi Proprji, il-Kunsill tal-Unjoni Ewropea: Fajl Interistituzzjonali: 2011/0177 (APP).

(14)  COM(2017) 2025 final tal-1 ta’ Marzu 2017.

(15)  COM(2017) 358 final tat-28 ta’ Ġunju 2017.

(16)  Riżoluzzjoni tal-Parlament Ewropew tal-14 ta’ Marzu 2018 dwar riforma tas-sistema ta’ riżorsi proprji tal-Unjoni Ewropea (2017/2053(INI)).

(17)  Proposta għal Regolament tal-Kunsill li jistabbilixxi l-qafas finanzjarju pluriennali għas-snin mill-2021 sal-2027 (COM(2018) 322 final tat-2 ta’ Mejju 2018).

(18)  Komunikazzjoni tal-Kummissjoni lill-Parlament Ewropew u lill-Kunsill dwar “Qafas Finanzjarju Pluriennali ġdid u modern għal Unjoni Ewropea li tagħti riżultati fuq il-prijoritajiet tagħha b’mod effiċjenti wara l-2020” (COM(2018) 98 final tal-14 ta’ Frar 2018).

(19)  Skont il-Linji Gwida għal Regolamentazzjoni Aħjar (SWD(2017) 350 final tas-7 ta’ Mejju 2017), hija meħtieġa valutazzjoni tal-impatt meta l-impatti ekonomiċi, ambjentali jew soċjali mistennija tal-azzjoni tal-UE x’aktarx ikunu sinifikanti (p. 15).

(20)  Il-kontribuzzjonijiet nazzjonali huma pagamenti li jsiru direttament mill-baġits tal-Istati Membri. Huma jinkludu r-riżorsi proprji kollha ħlief l-RPT.

(21)  Ir-rata ta’ prelevazzjoni hija r-rata unitarja (espressa f’perċentwal jew f’valur) li tapplika għall-aggregati li jintużaw bħala bażi għall-kalkolu tar-riżorsi proprji.

(22)  Ir-Regolament tal-Kunsill (UE, Euratom) Nru 609/2014 tas-26 ta’ Mejju 2014 dwar il-metodi u l-proċedura li jintużaw biex jitqiegħdu għad-dispożizzjoni r-riżorsi proprji tradizzjonali, dawk ibbażati fuq il-VAT u dawk ibbażati fuq l-ING u dwar il-miżuri li jissodisfaw il-ħtiġijiet fi flus kontanti (ĠU L 168, 7.6.2014, p. 39).

(23)  Ir-rata għolja tal-ispejjeż tal-ġbir ġiet ipperċepita bħala ribass moħbi għal xi Stati Membri, kif indikat ukoll mir-rapport finali tal-HLGOR, p. 40.

(24)  L-evażjoni tad-dazji doganali taffettwa l-ġbir tal-RPT. Aħna eżaminajna l-kwistjoni ta’ “nuqqas doganali” (jiġifieri d-differenza bejn id-dħul doganali mistenni u dak verament miġbur) fir-Rapport Speċjali Nru 19/2017 — Proċeduri ta’ importazzjoni: xi nuqqasijiet fil-qafas legali u implimentazzjoni ineffettiva għandhom impatt fuq l-interessi finanzjarji tal-UE. Ara wkoll ir-Rapport Annwali 2017 tagħna.

(25)  Fl-Opinjoni Nru 2/2012 tagħna, aħna konna diġà osservajna li ma kien hemm l-ebda studju, fil-livell tal-UE, li jipprovdi stimi affidabbli dwar l-ispejjeż reali mġarrba mill-awtoritajiet doganali għall-ġbir tad-dazji u għad-disponibbiltà tal-RPT.

(26)  Ara n-Nota 6 f’qiegħ il-paġna.

(27)  Ir-Rapport Speċjali Nru 11/2013 — Kisba ta’ data korretta dwar l-Introjtu Nazzjonali Gross (ING): approċċ aktar strutturat u ffukat aħjar itejjeb l-effettività tal-verifikazzjoni mill-Kummissjoni u r-Rapport Annwali 2014 tagħna.

(28)  Ir-rata ta’ wieħed fil-mija tikkorrispondi għar-rata uniformi stipulata mill-proposta għal Regolament tal-Kunsill li jistabbilixxi miżuri ta’ implimentazzjoni għas-sistema ta’ Riżorsi Proprji tal-Unjoni Ewropea. Il-proposta għal Deċiżjoni tal-Kunsill dwar is-sistema ta’ Riżorsi Proprji tal-Unjoni Ewropea tindika li jenħtieġ li r-rata ta’ prelevazzjoni reali ma tkunx aktar minn 2 %.

(29)  Skont il-Kummissjoni, din il-metodoloġija għall-kalkolu tar-riżorsa proprja l-ġdida kellha tintuża minħabba n-nuqqas ta’ data disponibbli dwar ir-ripartizzjoni tad-dħul skont ir-rata tal-VAT.

(30)  Fir-Rapport Annwali 2017 tagħna, aħna rrappurtajna dgħufijiet fil-verifikazzjoni mwettqa mill-Kummissjoni tar-riżorsa proprja bbażata fuq il-VAT, b’mod notevoli fir-rigward tal-kalkolu tal-WAR.

(31)  L-evażjoni tal-VAT taffettwa kemm il-kalkolu tar-riżorsa proprja attwali kif ukoll dak tar-riżorsa proprja proposta bbażata fuq dan l-aggregat tat-taxxa. Aħna eżaminajna din id-“diskrepanza fil-VAT” fir-Rapport Speċjali Nru 24/2015 – L-indirizzar tal-frodi intra-Komunitarja tal-VAT: Tinħtieġ aktar azzjoni.

(32)  Komunikazzjoni tal-Kummissjoni lill-Parlament Ewropew u lill-Kunsill tas-17 ta Ġunju 2015 dwar Sistema tat-Taxxa Korporattiva Ġusta u Effiċjenti fl-Unjoni Ewropea: Ħames Oqsma Ewlenin għal Azzjoni (COM(2015) 302 final).

(33)  Proposta għal Direttiva tal-Kunsill dwar Bażi Komuni għat-Taxxa Korporattiva (COM(2016) 685 final tal-25 ta’ Ottubru 2016).

(34)  Proposta għal Direttiva tal-Kunsill dwar Bażi Komuni Konsolidata għat-Taxxa Korporattiva (COM(2016) 683 final tal-25 ta’ Ottubru 2016).

(35)  Pereżempju, ir-riorganizzazzjonijiet ta’ gruppi, it-trattament ta’ telf u ta’ qligħ kapitali mhux realizzat, u l-metodu tat-tqassim għall-allokazzjoni tal-bażi għat-taxxa fost l-Istati Membri.

(36)  Din hija r-rata uniformi stipulata fil-proposta għal Regolament tal-Kunsill li jistabbilixxi miżuri ta’ implimentazzjoni għas-sistema ta’ Riżorsi Proprji tal-Unjoni Ewropea. Il-proposta għal Deċiżjoni tal-Kunsill dwar is-sistema ta’ Riżorsi Proprji tal-Unjoni Ewropea tindika li jenħtieġ li r-rata ta’ prelevazzjoni reali ma tkunx aktar minn 6 %.

(37)  L-Artikolu 13(4) tal-proposta għal Regolament tal-Kunsill (COM(2018) 326 final).

(38)  Għar-riżorsa proprja bbażata fuq l-EU ETS u l-RPT, il-perjodu taż-żamma tad-dokumenti huwa mill-inqas ta’ tliet snin.

(39)  Minħabba d-disponibbiltà limitata tad-data, dan il-kalkolu huwa bbażat fuq informazzjoni għall-2012, u jinkludi l-gruppi multinazzjonali kollha (inklużi dawk li ma jaqbżux is-soll tad-dħul, kif stipulat fil-paragrafu 28).

(40)  Emissjonijiet minn setturi li ma jaqgħux taħt l-EU ETS huma koperti minn miri annwali vinkolanti relatati, mal-emissjonijiet ta’ gassijiet serra li huma stabbiliti fil-livell tal-Istat Membru.

(41)  Preċedentement aħna ppubblikajna rapport dwar l-EU ETS (Ir-Rapport Speċjali Nru 6/2015 — L-integrità u l-implimentazzjoni tal-EU ETS). Pubblikazzjonijiet oħra f’dan il-qasam se jsegwu f’qasir żmien.

(42)  Din hija r-rata uniformi stipulata fil-proposta għal Regolament tal-Kunsill li jistabbilixxi miżuri ta’ implimentazzjoni għas-sistema ta’ Riżorsi Proprji tal-Unjoni Ewropea. Il-proposta għal Deċiżjoni tal-Kunsill dwar is-sistema ta’ Riżorsi Proprji tal-Unjoni Ewropea tindika li jenħtieġ li r-rata ta’ prelevazzjoni reali ma tkunx aktar minn 30 %.

(43)  Ara l-Artikolu 10(2)(a) tad-Direttiva 2003/87/KE tal-Parlament Ewropew u tal-Kunsill tat-13 ta’ Ottubru 2003 li tistabbilixxi sistema għall-iskambju ta’ kwoti ta’ emissjonijiet ta’ gassijiet serra ġewwa l-Unjoni u li temenda d-Direttiva 96/61/KE (ĠU L 275, 25.10.2003, p. 32), kif emendata bid-Direttiva (UE) 2018/410 tal-Parlament Ewropew u tal-Kunsill tal-14 ta’ Marzu 2018 (ĠU L 76, 19.3.2018, p. 3) (id-“Direttiva dwar l-ETS”).

(44)  L-emendi għad-Direttiva dwar l-ETS introduċew mekkaniżmi biex il-prezzijiet tal-irkant isiru aktar stabbli. Madankollu, dawn il-prezzijiet jiddependu mir-riżultati tal-irkant.

(45)  Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni “Strateġija Ewropea għall-Plastiks f’Ekonomija Ċirkolari” (COM(2018) 28 final tas-16 ta’ Jannar 2018) u l-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni dwar qafas ta’ monitoraġġ għall-ekonomija ċirkolari (COM(2018) 29 final tas-16 ta’ Jannar 2018).

(46)  Din hija r-rata uniformi stipulata mill-proposta għal Regolament tal-Kunsill li jistabbilixxi miżuri ta’ implimentazzjoni għas-sistema ta’ Riżorsi Proprji tal-Unjoni Ewropea. Il-proposta għal Deċiżjoni tal-Kunsill dwar is-sistema ta’ Riżorsi Proprji tal-Unjoni Ewropea tindika li jenħtieġ li r-rata ta’ prelevazzjoni reali ma tkunx aktar minn EUR 1,00 għal kull kilogramm.

(47)  ĠU L 365, 31.12.1994, p. 10.

(48)  Id-Direttiva (UE) 2018/852 tal-Parlament Ewropew u tal-Kunsill tat-30 ta’ Mejju 2018 li temenda d-Direttiva 94/62/KE dwar l-imballaġġ u l-iskart mill-imballaġġ (ĠU L 150, 14.6.2018, p. 141).

(49)  Kunfidenzjalità statistika tfisser “li l-ħarsien ta’ data kunfidenzjali relatata ma’ unitajiet ta’ statistika uniċi li huma miksuba direttament għal skopijiet ta’ statistika jew indirettament minn sorsi amministrattivi jew sorsi oħra u dan jimplika l-projbizzjoni tal-użu tad-data miksuba għal skopijiet mhux ta’ statistika jew l-iżvelar illegali tagħha”. Ara l-Artikolu 2(1)(e) tar-Regolament (KE) Nru 223/2009 tal-Parlament Ewropew u tal-Kunsill tal-11 ta’ Marzu 2009 dwar l-Istatistika Ewropea u li jħassar ir-Regolament (Euratom, KE) Nru 1101/2008 tal-Parlament Ewropew u tal-Kunsill dwar it-trażmissjoni ta’ data suġġetta għall-kunfidenzjalità statistika lill-Uffiċċju tal-Istatistika tal-Komunitajiet Ewropej, ir-Regolament tal-Kunsill (KE) Nru 322/97 u d-Deċiżjoni tal-Kunsill 89/382/KEE, Euratom li tistabbilixxi Kumitat dwar il-Programmi tal-Istatistika tal-Komunitajiet Ewropej (ĠU L 87, 31.3.2009, p. 164).

(50)  Fl-Opinjonijiet Nru 2/2012 u Nru 2/2006, aħna esprimejna tħassib dwar il-kumplessità u n-nuqqas ta’ trasparenza tas-sistemi attwali (u dawk preċedenti) tar-riżorsi proprji għall-finanzjament tal-baġit tal-UE.

(51)  Skont il-proposta, ir-ribass tar-Renju Unit se jibqa’ jeżisti sakemm il-pajjiż jibqa’ jagħti kontribuzzjonijiet għall-baġit tal-UE (jiġifieri sal-2020).

(52)  Id-Danimarka, il-Ġermanja, in-Netherlands, l-Awstrija u l-Iżvezja.