Pubblikazzjoni ta’ applikazzjoni għal emenda skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel

(2017/C 137/04)

Din il-pubblikazzjoni tikkonferixxi d-dritt ta’ oppożizzjoni għall-applikazzjoni skont l-Artikolu 51 tar-Regolament (UE) Nru 1151/2012 tal-Parlament Ewropew u tal-Kunsill (1).

APPLIKAZZJONI GĦALL-APPROVAZZJONI TA’ EMENDA MHUX MINURI GĦALL-ISPEĊIFIKAZZJONI TAL-PRODOTT TA’ DENOMINAZZJONI TA’ ORIĠINI PROTETTA JEW TA’ INDIKAZZJONI ĠEOGRAFIKA PROTETTA

Applikazzjoni għall-approvazzjoni ta’ emenda skont l-ewwel subparagrafu tal-Artikolu 53(2) tar-Regolament (UE) Nru 1151/2012

“LIMONE COSTA D’AMALFI”

Nru tal-KE: PGI-IT-02185 — 26.9.2016

DOP ( ) IĠP ( X )

1.   Grupp applikant u interess leġittimu

Il-“Consorzio di tutela Limone Costa di Amalfi I.G.P” għandu l-jedd li jressaq applikazzjoni għal emenda skont l-Artikolu 13(1) tad-Digriet Nru 12511 tal-14 ta’ Ottubru 2013 tal-Ministeru tal-Politika tal-Agrikoltura, tal-Ikel u tal-Forestrija.

2.   Stat Membru jew Pajjiż Terz

L-Italja

3.   Titlu fl-ispeċifikazzjoni tal-prodott affettwat mill-emenda

4.   Tip ta’ emenda

5.   Emenda (emendi)

Deskrizzjoni tal-prodott

L-Artikolu 6 tal-ispeċifikazzjoni tal-prodott attwali

Ġie speċifikat li l-perċentwali tal-kwantitajiet tar-rendiment indikati fil-punt dwar il-polpa jirreferu għall-meraq. Din hija emenda fil-kliem tal-ispeċifikazzjoni tal-prodott, peress li fil-verżjoni attwali l-kelma “meraq” tħalliet barra bi żball, filwaqt li tinstab fil-punt 4.2 tal-applikazzjoni ppubblikata fil-Ġurnal Uffiċjali (C 282/04 tal-5 ta’ Ottubru 2000). L-emenda ma tinvolvi ebda varjazzjoni tal-parametri deskrittivi tal-prodott.

Il-metodu ta’ produzzjoni

L-Artikolu 4 tal-ispeċifikazzjoni tal-prodott attwali

L-iżvilupp soċjoekonomiku globali u l-iżvilupp turistiku taż-żona ta’ produzzjoni tal-“Limone Costa di Amalfi” wasslu għall-abbandun tal-forestrija. Dan il-fattur affettwa l-metodi ta’ produzzjoni tal-lasti tal-qastan mingħajr qoxra għall-ħolqien tal-kannizzati għall-protezzjoni tal-lumi: infatti, sabiex titnaqqas l-ispiża tal-produzzjoni, il-metodi tradizzjonali ta’ produzzjoni tal-lasti ma baqgħux jintużaw, b’effett fuq il-kwalità tal-injam li ma għadux iservi fit-tul daqs qabel, u f’xi każijiet mingħajr ma jintlaħaq il-perjodu ta’ deprezzament għax-xiri u għall-installazzjoni tal-lasti. Għaldaqstant, hemm il-possibbiltà li jintużaw, minflok lasti tal-injam, lasti magħmulin minn materjal sostenibbli għall-ambjent li ma jkollhomx impatt kbir fuq il-pajsaġġ iddefinit mill-imsaġar tal-lumi. L-użu ta’ materjal sostenibbli għall-ambjent li jdum aktar iwassal għat-tnaqqis tal-ispejjeż fissi, li jista’ jipprovdi inċentiv għat-tkabbir tal-lumi. Fl-aħħar nett, m’għandiex tiġi sottovalutata s-sigurtà tal-post tax-xogħol, li hija żgurata prinċipalment permezz tal-użu ta’ lasti mhux tal-injam, speċjalment meta x-xogħol iseħħ fil-partijiet għoljin tal-imsaġar tal-lumi.

Il-bżonn li jiġi stabbilit l-għoli tal-lasti, billi jiġi introdott il-kliem “fil-mument tas-sostituzzjoni”, huwa marbut man-natura partikolari tal-artijiet tal-kosta ta’ Amalfi, li hija tali li matul iż-żmien il-lasti jkollhom tendenza li jisfrundaw b’xi 10-20 cm, kemm minħabba l-piż tal-istruttura li fuqhom joqogħdu l-fergħat tas-siġar tal-lumi, kif ukoll minħabba li l-ħamrija nnifisha hija poruża.

L-importanza tal-ilqugħ fil-produzzjoni tal-Limone Costa di Amalfi IĠP tiġġustifika t-tħassir tal-kliem “fejn hu meħtieġ”. L-ilqugħ jipproteġi l-pjanta mill-kundizzjonijiet ħżiena tat-temp (il-kesħa, il-ġlata, is-silġ), u għaldaqstant l-użu tiegħu ma jistax jitqies fakultattiv.

L-emenda tirriżulta mis-sejba li n-numru ta’ pjanti għal kull ettaru huwa relatat mal-wisa’ u mal-forma tal-artijiet imtarrġa. Il-forom ġeometriċi tal-artijiet imtarrġa huma aktar diversi u irregolari; din l-irregolarità tiġġenera varjabbiltà kbira fin-numru ta’ pjanti għal kull ettaru, peress li l-bidwi jrid juża kull spazju disponibbli għall-kultivazzjoni.

Id-densità tal-pjanti għal kull ettaru tiddependi mix-xaqliba tal-għoljiet, li ħafna drabi tistabbilixxi l-wisa’ tal-artijiet imtarrġa. Fiż-żona ta’ produzzjoni, il-pjanti, peress li għandhom forma ta’ kultivazzjoni “adattata” għall-art imtarrġa, jiġu mxebilka kemm b’mod orizzontali b’sistema ta’ forma ta’ koppla kif ukoll b’mod perpendikolari mat-tul tal-art imtarrġa. Dan jippermetti l-kultivazzjoni tal-pjanti b’lasti mhux dritti, li jitqiegħdu minn isfel għal fuq u li jgħaqdu żewġ artijiet imtarrġa fuq żewġ lasti orizzontali sottostanti, u b’hekk tingħata aktar possibbiltà għall-iżvilupp tal-fergħat prinċipali fuq il-kannizzati.

Din it-teknika tippermetti żieda ta’ 1 200 pjanta għal kull ettaru, b’kunsiderazzjoni għall-kwalità tal-frott u f’konformità mar-rekwiżiti tal-ispeċifikazzjoni tal-prodott.

It-titjib fil-kundizzjonijiet tat-tkabbir tal-lumi, minħabba għarfien akbar tal-fiżjoloġija tal-pjanta, flimkien mal-aħjar kompetenzi miksuba fir-rigward tat-tekniki ta’ kultivazzjoni u tal-ġestjoni agronomika tal-imsaġar tal-lumi, mat-titjib fil-ġestjoni tas-sistema tal-irrigazzjoni mmirata lejn il-kisba ta’ effiċjenza għola, u mal-involviment ta’ persunal kompetenti ħafna, jippermetti titjib fil-ġestjoni tal-imsaġar tal-lumi u jintroduċi l-possibbiltà ta’ żieda fil-produzzjoni ħdejn dik prevista fl-ispeċifikazzjoni tal-prodott attwali, imfassla fis-snin 90. Il-limitu ta’ 35 tunnellata għal kull ettaru ma jaffettwax il-fiżjoloġija tal-pjanta jew il-kwalità tal-frott.

Punti oħra

L-Artikolu 7 tal-ispeċifikazzjoni tal-prodott attwali

L-ippakkjar:

L-iskop ta’ din l-emenda huwa li jiġi introdott il-bejgħ tal-lumi IĠP individwali, u li jiġi awtorizzat l-użu ta’ kontenituri oħrajn magħmulin minn materjal mhux veġetali, iżda li tinżamm preferenza għal dawk veġetali. Ta’ min jiftakar li f’żona ta’ ħafna turiżmu, din l-emenda se tikkontribwixxi għat-tixrid u għall-konoxxenza tal-prodott u għall-isem tiegħu, anki f’pajjiżi oħrajn.

Referenza ġuridika aġġornata:

Korrezzjoni tal-ismijiet ġeografiċi:

DOKUMENT UNIKU

“LIMONE COSTA D’AMALFI”

Nru tal-KE: PGI-IT-02185 — 26.9.2016

DOP ( ) IĠP ( X )

1.   Isem (ismijiet)

“Limone Costa d’Amalfi”

2.   Stat Membru jew Pajjiż Terz

L-Italja

3.   Deskrizzjoni tal-prodott agrikolu jew tal-oġġett tal-ikel

3.1.   Tip ta’ prodott

Klassi 1.6. Frott, ħxejjex u ċereali, friski jew ipproċessati

3.2.   Deskrizzjoni tal-prodott li għalih japplika l-isem f’(1)

Għamla tal-frott ellittika u mtawla, bi protuberanza kbira u ppuntata u b’qoxra ta’ ħxuna medja ta’ kulur isfar lewn iċ-ċitru hekk kif jimmatura; piż tal-frott mhux inqas min 100 g; flavedo mimli żjut essenzjali; aroma u fwieħa qawwija; meraq abbundanti (b’rendiment ta’ mhux inqas minn 25 %) u b’aċidità għolja (ta’ mhux inqas minn 3,5 g/100 ml, qamħet il-lewn; numru baxx ta’ żrieragħ.

3.3.   Għalf (għall-prodotti li joriġinaw mill-annimali biss) u materja prima (għall-prodotti pproċessati biss)

—

3.4.   Passi speċifiċi tal-produzzjoni li jridu jsiru fiż-żona ġeografika ddefinita

Kull pass, mill-kultivazzjoni sal-ħsad tal-“Limone Costa d’Amalfi” IĠP, għandu jseħħ fiż-żona ġeografika deskritta fil-punt 4.

3.5.   Regoli speċifiċi dwar it-tqattigħ, it-tħakkik, l-ippakkjar, eċċ.

Il-prodott għandu jinbiegħ f’kontenituri sodi adattati, minn lumija waħda sa mhux aktar minn 15 kg, preferibbilment magħmulin minn materjal ta’ oriġini veġetali. Kontenituri sodi tal-kartun huma awtorizzati wkoll.

3.6.   Regoli speċifiċi dwar it-tikkettar

Dawn li ġejjin għandhom jidhru fuq it-tikketti b’karattri ċari li ma jitħassrux: 1) l-IĠP Limone Costa d’Amalfi; 2) isem il-produttur; 3) il-kwantità tal-prodott li fil-fatt ikun hemm fl-imballaġġ; 4) is-sena ta’ produzzjoni. Għandu jidher is-simbolu grafiku marbut max-xbieha artistika tal-logo magħżul kompost minn lumija bil-weraq, imqiegħda fuq in-naħa tax-xellug ta’ cirku doppju li fuqu, fuq sfond isfar u bl-iswed, hemm miktub “Limone Costa d’Amalfi”. Fiċ-ċirku doppju jidher il-kontorn tal-kosta minn Maiori sa Capo Conca, u fuq quddiem jidher arbuxxell tal-veġetazzjoni tal-Mediterran.

4.   Deskrizzjoni fil-qosor taż-żona ġeografika

Tinkludi t-territorju kollu tal-muniċipalità ta’ Atrani fil-provinċja ta’ Salerno, u parzjalment it-territorju tal-muniċipalitajiet li ġejjin, li jinstabu fl-istess provinċja: Amalfi, Cetara, Conca dei Marini, Furore, Maiori, Minori, Positano, Praiano, Ravello, Scala, Tramonti, Vietri sul Mare. Iż-żona ddefinita hija magħrufa internazzjonalment bħala “Costiera Amalfitana” jew “Costa d’Amalfi”.

5.   Rabta maż-żona ġeografika

L-isem stess tal-kultivar “Sfusato Amalfitano” juri r-rabta b’saħħitha maż-żona ġeografika kkonċernata. Għandu jingħad ukoll li din il-varjetà tiġi kkultivata kważi esklużivament f’din iż-żona u l-karatteristiċi kwalitattivi intrinsiċi tal-frott inbidlu matul is-sekli fir-rigward tal-partikolaritajiet ambjentali taż-żona. Dan jirrigwarda, b’mod partikolari, l-aroma, il-fwieħa, is-sukkulenza u l-aċidità tal-meraq li wasslu għall-fama dinjija ta’ dan il-frott. Il-kultivazzjoni tal-lumi fil-kosta ta’ Amalfi sebqet bil-mod ‘il mod dik ta’ frott ieħor, u kellha rwol kruċjali mhux biss fl-ekonomija taż-żona, iżda wkoll fil-karatterizzazzjoni tal-pajżaġġ (ta’ min jiftakar li l-iżvilupp tat-turiżmu serraħ ħafna fuq l-armonija tal-blu tal-baħar u l-ħdura tas-siġar taċ-ċitru) u fil-protezzjoni tal-idroġeoloġija tat-territorju.

Elementi storiċi

Il-preżenza tas-siġar tal-lumi fil-kosta Amalfitana ġiet dokumentata ħafna fis-sekli preċedenti, sa mill-bidu tas-seklu 11, speċjalment wara l-iskoperta tal-effettività tagħhom fil-ġlieda kontra l-iskorbut, marda kkawżata, kif inhu magħruf, min-nuqqas tal-vitamina Ċ fil-ġisem. Huwa proprju għalhekk, anki fid-dawl tal-istudji tal-magħrufa Skola medika ta’ Salerno, li r-Repubblika ta’ Amalfi ordnat li dan il-frott kellu jkun abbord kull vapur tagħha. Dan serva wkoll bħala inċentiv għall-installazzjoni ta’ msaġar tal-lumi fiż-żona (matul is-sekli 12-14), li minn dak iż-żmien ‘l hawn okkupaw spazji dejjem akbar tal-kosta u tal-għoljiet taż-żona.

Provi ta’ dan it-tixrid jistgħu jinstabu wkoll f’diversi dokumenti tal-epoka medjevali.

Minn parċmina tal-1112, Camera, studjuż tal-istorja tas-seklu 19, iddikjara li l-lumi u l-larinġ kien ikkultivat fiż-żona ta’ Amalfi għall-ewwel darba mill-inqas minn dik is-sena. Dokumenti awtentiċi mill-1600 jsemmu l-firxa tal-“ġonna tal-lumi (horti)” tul il-kosta kollha, filwaqt li fl-1626, Ferrari ddeskriva għall-ewwel darba l-“limon amalphitanus” li huwa simili ħafna għas-“Sfusato Amalfitano” tal-lum il-ġurnata. Minn dak iż-żmien ’l hawn jissemma wkoll suq kbir tal-lumi fiż-żona, b’żieda gradwali ta’ kwantitajiet fl-1700 u, b’mod partikolari, fit-tieni nofs tas-seklu 19, meta l-merkanzija kienet tinxtara kważi esklużivament min-negozjanti ta’ żoni oħra (Sorrento). Wara dak il-perjodu, il-pjantaġġuni l-ġodda bdew jonqsu, parzjalment dovut għad-disponibbiltà limitata ta’ artijiet oħra, u n-nies iffokaw fuq l-istrutturazzjoni tal-art (artijiet imtarrġa) u fuq it-tnaqqis tad-distanzi ta’ tħawwil.

Referenza għall-pubblikazzjoni tal-ispeċifikazzjoni

(it-tieni subparagrafu tal-Artikolu 6(1) ta’ dan ir-Regolament)

L-amministrazzjoni attwali nediet il-proċedura nazzjonali ta’ oġġezzjoni bil-pubblikazzjoni tal-proposta għall-emenda tal-ispeċifikazzjoni tal-prodott tal-IĠP “Limone Costa d’Amalfi” fil-Gazzetta Uffiċjali tar-Repubblika Taljana Nru. 163 tal-14 ta’ Lulju 2016. u Nru 187 tal-11 ta’ Awwissu 2016.

It-test sħiħ tal-ispeċifikazzjoni tal-prodott jinsab fuq is-sit web li ġej: http://www.politicheagricole.it/flex/cm/pages/ServeBLOB.php/L/MT/IDPagina/3335

Jew

billi żżur il-paġna uffiċjali tal-Ministeru tal-Politika Agrikola, Alimentari u l-Forestrija (www.politicheagricole.it) u tagħfas fuq “Prodotti DOP e IGP” (fin-naħa ta’ fuq fil-lemin tal-iskrin), u wara fuq “Prodotti DOP, IGP e STG” (fil-ġenb, fuq in-naħa tax-xellug tal-iskrin) u fl-aħħar tagħfas fuq “Disciplinari di produzione all’esame dell’UE”.

(1)  ĠU L 343, 14.12.2012, p. 1.