Skeda tas-Sommarju Eżekuttiv

Valutazzjoni tal-impatt tal-proposta għal Regolament tal-Kunsill li jemenda r-Regolament (UE) Nru 904/2010 dwar miżuri biex tissaħħaħ il-koperazzjoni amministrattiva fil-qasam tat-taxxa fuq il-valur miżjud

A. Ħtieġa li tittieħed azzjoni

Għalhiex? X’inhi l-problema li qed tiġi indirizzata?

Il-frodi tal-VAT hija problema kostanti fil-livell tal-UE b’diskrepanza stmata ta’ madwar EUR 160 biljun li minnhom bejn EUR 40 u 60 biljun jirriżultaw mill-frodi transfruntiera tal-VAT. Is-sitwazzjoni hija sforz id-dgħufijiet endemiċi tal-“arranġamenti tranżitorji” previsti fid-Direttiva tal-VAT li jippermettu li l-oġġetti u s-servizzi jinbiegħu mingħajr VAT fil-kummerċ intra-UE. Din il-proposta tindirizza tliet problemi prinċipali:

·il-“Frodi Intra-Komunitarja b’Negozjant Nieqes” (jew MTIC, magħrufa wkoll bħala “frodi karusell”) li ssir meta klijent jixtri oġġetti jew servizzi mingħajr VAT minn pajjiż ieħor u jiċċarġja l-VAT mingħajr ma jħallasha lura lill-awtoritajiet tat-taxxa filwaqt li l-klijent tiegħu jkun jista’ jnaqqasha;

·il-frodi fuq il-bejgħ tal-karozzi użati meta jiġi ntaxxat biss il-marġni minflok l-ammont kollu tal-bejgħ; kif ukoll

·il-frodi marbuta mal-proċeduri doganali Nri 42/63 li skonthom il-VAT ma tridx titħallas fil-pajjiż tal-importazzjoni kif isir fl-arranġamenti normali tal-VAT, peress li l-oġġetti jiġu konsenjati lil negozju stabbilit fi Stat Membru ieħor.

X'mistennija tikseb din l-inizjattiva?

L-għanijiet tal-inizjattivi huma li jipprovdu lill-amministrazzjonijiet tat-taxxa b’għodod aktar effiċjenti u effettivi għall-ġlieda kontra t-tliet sorsi prinċipali ta’ frodi tal-VAT li jitwettqu f’sitwazzjonijiet transfruntiera. Bl-użu u l-kondiviżjoni aħjar tal-informazzjoni bejn l-awtoritajiet u t-tisħiħ tal-Eurofisc, l-amministrazzjonijiet tat-taxxa tal-Istati Membri se jkunu jistgħu jidentifikaw aħjar il-frodaturi, iwaqqfu l-frodi u fl-aħħar mill-aħħar jiżguraw kundizzjonijiet ekwi għan-negozji.

X’inhu l-valur miżjud ta’ azzjoni fil-livell tal-UE?

Għalkemm il-ġestjoni, il-ġbir u l-kontroll tal-VAT jaqgħu qabelxejn taħt il-kompetenza nazzjonali tal-Istati Membri, il-frodi tal-VAT tkun ta’ spiss marbuta ma’ tranżazzjonijiet transfruntiera fis-suq uniku. Il-frodi għandha impatt negattiv fuq il-funzjonament tas-suq uniku u tikkawża telf serju għall-baġit tal-UE. Għalhekk, l-UE implimentat strumenti ta’ kooperazzjoni bl-organizzazzjoni ta’ skambji ta’ informazzjoni bejn l-amministrazzjonijiet tat-taxxa u bl-appoġġ tal-attivitajiet ta’ awditjar komuni u l-Eurofisc. It-titjib tal-effiċjenza ta’ dawn l-għodod fil-livell tal-UE, b’mod partikolari billi jissaħħaħ il-Eurofisc, se joffri valur miżjud minn dak li jista’ jinkiseb fil-livell tal-Istati Membri.

B. Soluzzjonijiet

X’għażliet ta’ politika leġiżlattivi u mhux leġiżlattivi ġew ikkunsidrati? Hemm għażla ppreferuta jew le? Għalhiex? 

Ġew identifikati 5 għażliet prinċipali b’għażliet sekondarji. Jekk jittieħdu flimkien bħala pakkett wieħed, l-għażliet kollha jtejbu s-sitwazzjoni attwali dwar il-frodi transfruntiera tal-VAT billi:

·Jimplimentaw l-ipproċessar u l-analiżi tad-dejta konġunti fil-Eurofisc;

·Jimplimentaw azzjonijiet konġunti ġodda fl-awditjar għall-amministrazzjonijiet tat-taxxa u jtejbu l-koordinazzjoni tagħhom bil-Eurofisc;

·Jiżviluppaw l-iskambju ta’ informazzjoni u ta’ għarfien bejn l-amministrazzjonijiet tat-taxxa tal-Istati Membri fil-Eurofisc u l-awtoritajiet ta’ infurzar tal-liġi fil-livell tal-UE;

·Itejbu l-aċċess għad-dejta dwar ir-reġistrazzjoni tal-vetturi;

·Jikkondividu l-informazzjoni doganali u dwar ir-reġistrazzjoni tal-VAT marbuta mal-proċeduri doganali 42/63 bejn l-awtoritajiet tad-dwana u tat-taxxa.

Liema għażla u min jappoġġaha?

L-Istati Membri jappoġġaw l-implimentazzjoni tal-ipproċessar konġunt tad-dejta u l-introduzzjoni ta’ miżuri għall-ġlieda kontra l-frodi marbuta mal-proċeduri doganali 42/63. Anke l-aċċess għad-dejta dwar ir-reġistrazzjoni tal-karozzi kien appoġġat mill-Istati Membri, iżda fuq skala iżgħar.

Partijiet ikkonċernati oħra huma favur l-implimentazzjoni ta’ skambji awtomatizzati ġodda ta’ informazzjoni u modi ġodda ta’ kollaborazzjoni bejn l-awtoritajiet tat-taxxa u l-awtoritajiet tal-infurzar tal-liġi. Dawn jappoġġaw ir-rwol akbar tal-Eurofisc u esprimew opinjoni ġenerali pożittiva dwar l-awditi konġunti.

C. Impatti tal-għażla ppreferuta

X'inhuma l-benefiċċji tal-għażla preferuta (jekk hemm, inkella x’inhuma dawk ewlenin)?

Mhuwiex possibbli li jiġu vvalutati u kwantifikati l-benefiċċji fihom infushom tal-għażliet ippreferuti ewlenin.

L-Istati Membri: l-għażliet prinċipali koperti b’din l-inizjattiva mistennija jtejbu malajr u b’mod effiċjenti s-sitwazzjoni dwar il-frodi transfruntiera tal-VAT u għalhekk mistenni li jiżdied id-dħul mill-VAT.

In-Negozji: l-identifikazzjoni aħjar tal-frodaturi tista’ tnaqqas il-kostijiet ta’ konformità għan-negozji involuti fil-kummerċ intra-UE.

Is-Suq uniku: mistenni li jkun hemm impatt pożittiv fuq il-funzjonament tiegħu peress li l-ġlieda kontra l-frodi tal-VAT se tiżgura kundizzjonijiet ekwi għan-negozji konformi fl-UE. 

L-impatti soċjali u ambjentali mhumiex sinifikanti.

X'inhuma l-kostijiet tal-għażla ppreferuta (jekk hemm, inkella x’inhuma dawk ewlenin)?

In-Negozji: l-ebda kost addizzjonali. Il-proposta se tipprovdi l-kundizzjonijiet għall-użu u l-analiżi aħjar tal-informazzjoni diġà disponibbli.

L-Istati Membri: l-implimentazzjoni tal-proċess konġunt tad-dejta mhux se twassal għal kostijiet addizzjonali peress li jiġġarbu mill-programm Fiscalis. Id-dejta dwar ir-reġistrazzjoni tal-vetturi u d-dejta doganali huma diġà disponibbli. L-għoti ta’ aċċess awtomatizzat għall-informazzjoni lill-amministrazzjoni tat-taxxa jeħtieġ ċerti żviluppi limitati tal-IT. Madankollu, ma kienx possibbli li jiġu stmati l-kostijiet għaliex la ġie identifikat xi paragun riċenti u lanqas ma ngħata mill-Istati Membri.

Kif se jintlaqtu n-negozji, l-SMEs u l-mikrointrapriżi?

In-negozji, l-SMEs u l-mikrointrapriżi mhux mistennija li jiġu affettwati b’mod negattiv b’din l-inizjattiva peress li mhux suppost twassal għal piżijiet amministrattivi u kostijiet ta’ konformità addizzjonali.

Jenħtieġ li dawn jibbenefikaw minn kundizzjonijiet ekwi aħjar u minn funzjonament aħjar tas-suq uniku. 

Se jkun hemm impatti sinifikanti fuq il-baġits u l-amministrazzjonijiet nazzjonali?

Għalkemm xi għażliet jimplikaw kostijiet ta’ żvilupp, il-baġits tal-Istati Membri se jibbenefikaw mill-istrumenti l-ġodda stabbiliti għall-ġlieda kontra l-frodi tal-VAT. Dan il-qligħ ma jistax jiġi kwantifikat eżatt iżda huma previsti benefiċċji netti.

Se jkun hemm impatti sinifikanti oħra? 

Din il-proposta se twassal għal skambju ġdid u pproċessar konġunt ta’ informazzjoni dwar il-VAT, li jistgħu jinkludu d-dejta personali. Dawn jista’ jkollhom impatt fuq id-drittijiet fundamentali. Madankollu, l-iskambji ġodda ta’ informazzjoni u l-ipproċessar tad-dejta previsti b’din l-inizjattiva se jiġu strettament immirati u limitati għal dak li hu meħtieġ biex jinkisbu l-għanijiet ta’ din l-inizjattiva, jiġifieri l-ġlieda effettiva kontra l-frodi transfruntiera tal-VAT.

D. Segwitu

Meta se tiġi rieżaminata l-politika?  

Skont l-Artikolu 59 tar-Regolament (UE) Nru 904/2010, l-applikazzjoni tiegħu tiġi rieżaminata kull ħames snin. Barra minn hekk, l-Istati Membri għandhom jikkomunikaw lill-Kummissjoni kull informazzjoni disponibbli rilevanti għall-applikazzjoni tar-Regolament (l-Artikolu 49) u, fost l-oħrajn, l-istatistika annwali.